Iragarkia

41. ALDIZKARIA - 2024ko otsailaren 26a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

15/2024 FORU AGINDUA, otsailaren 7koa, Ekonomia eta Ogasuneko kontseilariak emana, foru agindu hauek aldatzen dituena: 27/2009 Foru Agindua, otsailaren 27koa, Ekonomia eta Ogasuneko kontseilariak emana, "Balore, aseguru eta errentei buruzko urteko aitorpen informatiboa" 189 eredua onesten duena, eta 80/2013 Foru Agindua, martxoaren 1ekoa, Ekonomia, Ogasun, Industria eta Enpleguko kontseilariak emana, "Atzerrian dauden ondasun eta eskubideen gaineko aitorpen informatiboa" 720 eredua onesten duena.

Tributuei buruzko abenduaren 14ko 13/2000 Foru Lege Orokorraren 27.5 eta 103. artikuluetan arautzen diren informazio betebeharren esparruan, Pertsona Fisikoen Errentaren gaineko Zergari buruzko Foru Legearen testu bateginaren (ekainaren 2ko 4/2008 Legegintzako Foru Dekretu bidez onetsia) laugarren xedapen gehigarriaren zazpigarren apartatuan ezartzen da balore, aseguru eta errentei buruzko informazioa emateko betebeharra.

Pertsona Fisikoen Errentaren gaineko Zergaren Erregelamenduaren 62.17.C) artikuluak garatzen du betebehar hori (maiatzaren 24ko 174/1999 Foru Dekretuaren bidez onetsi zen erregelamendu hori). Artikulu hori berriki aldatu du urriaren 31ko 234/2023 Foru Dekretuak, edukia testu bateginaren laugarren xedapen gehigarriaren indarreko idazketara egokitzeko.

Betebehar hori konplitzeko, balore, aseguru eta errentei buruzko urteko aitorpen informatiboaren 189 eredua aurkeztu behar da, otsailaren 27ko 27/2009 Foru Aginduak onetsi zuena. Arau hori otsailaren 13ko 10/2023 Foru Aginduaren bidez aldatu zen, besteak beste, erreskate-eskubiderik ez duten bizi-aseguruei buruzko informazioa aitorpenari eransteko. Hala ere, egindako aldaketa ez zen guztiz bat etortzen zergaren erregelamenduaren 62.17.C) artikuluaren egungo idazketarekin.

Horregatik, foru agindu honek zenbait alderdi zuzentzen ditu, aitorpen informatiboa koherentea izan dadin informazioa emateko betebeharraren gainean indarra duen erregulazioarekin.

Horrez gain, ereduaren erregistro-diseinuak aldatzen dira, 2. erregistro motako (Aitortuaren erregistroa) "Balore kopurua" eremuko idazgune kopurua handitu dadin. Handitze horrek berekin dakar hurrengo eremuek dituzten idazguneak aldatzea.

Bestalde, 13/2000 Foru Legearen hemezortzigarren xedapen gehigarriak informazioa emateko betebeharra ezartzen du atzerrian kokatutako entitateekin kontratatutako bizi-aseguruei dagokienez. Informazioa emateko betebehar hori konplitzeko, 720 eredua aurkeztu behar da ("Atzerrian dauden ondasun eta eskubideei buruzko aitorpen informatiboa").

189 ereduan onartutako aldaketen ildotik, aipatutako 10/2023 Foru Aginduak 720 eredua aldatu zuen, helburu berarekin: azken aitorpen hori egokitzea atzerrian kokatutako entitateekin kontratatutako erreskate-eskubiderik ez duten bizi-aseguruei buruzko informazioa emateko betebeharrera.

Informazioa emateko betebeharraren gainean indarra duen erregulazioa ikusita, 80/2013 Foru Agindua aldatu behar da, 720 ereduari ("Atzerrian dauden ondasun eta eskubideei buruzko aitorpen informatiboa") koherentzia emateko.

Pertsona Fisikoen Errentaren gaineko Zergari buruzko Foru Legearen testu bateginaren laugarren xedapen gehigarriko zazpigarren apartatua dela-eta eta Tributuei buruzko Foru Lege Orokorraren hemezortzigarren xedapen gehigarria dela-eta, tributuen arloan eskudun den departamentuko titularrak gaikuntza dauka informazioa emateko betebehar horiek nola bete behar diren ezartzeko.

Foru agindu honen bidez garatutako erregelamendu ahalaren erabilera bat dator premiaren, eraginkortasunaren, proportzionaltasunaren, segurtasun juridikoaren, gardentasunaren eta efizientziaren printzipioekin, zeinak ezarrita baitaude Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean.

Horrenbestez,

AGINTZEN DUT:

Lehenengo artikulua. Ekonomia eta Ogasuneko kontseilariak otsailaren 27an emandako 27/2009 Foru Aginduaren aldaketa. Foru agindu horren bidez, batetik, 189 eredua onetsi zen (balore, aseguru eta errentei buruzko urteko aitorpen informatiboa), eta bestetik, eredu hori ordenagailuz zuzenean irakurtzeko moduko euskarrietan aurkezteko diseinu fisiko eta logikoak ezarri ziren.

27/2009 Foru Aginduaren manu hauek honako testu hau izanen dute:

Bat.–2.3 artikulua.

"3. Espainian zerbitzu-emate libreko araubidean diharduten eta Europako Esparru Ekonomikoko beste estatu batean helbidea duten aseguru-entitateen ordezkariak eta aseguru-entitateak, bai eta finantza-entitateak ere, bizi-aseguruen hartzaileei dagokienez eta kapital bat dirutan, ondasun higigarrietan edo higiezinetan ematearen ondorioz eratutako errentei dagokienez."

Bi.–3.3 artikulua.

"3. 2.3 artikuluan aipatzen den 189 eredua aurkeztera beharturik daudenek Nafarroako Foru Ogasunari eman beharko dizkiote, foru agindu honen eranskinetan bildutako zehaztapenekin bat, honako datu hauek:

a) Bizi-aseguruaren hartzaileen izen-abizenak edo sozietatearen izena edo izen osoa eta identifikazio fiskalerako zenbakia, abenduaren 31n, data horretan duen erreskate balioa adierazita. Hala ere, hartzaileak ez badauka ahalmenik abenduaren 31n erreskate osoko eskubidea gauzatzeko, data horretan onuradunak lortu beharko lukeen kapitalaren balioa adieraziko da, Ondarearen gaineko Zergari buruzko azaroaren 19ko 13/1992 Foru Legearen 17. artikuluarekin bat etorriz, salbu eta kontratu horiek aldi baterako kontratuak badira, soilik heriotza edo baliaezintasunagatiko edo bestelako arriskuetarako berme osagarriengatiko prestazioak ematen dituztenak, edo kontrasegururik gabeko bizi osoko errentak eta aldi baterakoak.

b) Kapital bat dirutan edo ondasun higigarri zein higiezinetan entregatzearen ondorioz aldi baterako edo biziarteko errenta baten onuradun direnen izen-abizenak edo sozietatearen izena edo izen osoa eta identifikazio fiskalerako zenbakia, abenduaren 31n, data horretan duen kapitalizazio balioa adierazita, bat etorriz Ondarearen gaineko Zergari buruzko 17 artikuluarekin.

Hiru.–II. eranskina, 2. erregistro mota (Aitortuaren erregistroa), honela aldatzen da:

a) "Balore gakoa" eremua, 81 idazgunea, "D" eta "F" gakoak:

"D. Bizi-aseguruak (erreskate-balioa dutenetara mugatuta)."

"F. Erreskate baliorik ez duten bizi aseguruak. Gako honetan adieraziko dira, halaber, erreskate baliorik ez duten bizi- edo baliaezintasun-aseguruen ondoriozko aldi baterako edo biziarteko errentak, abenduaren 31n. Aldi baterako aseguruak hortik kanpo geldituko dira baldin eta bakarrik jasotzen badituzte heriotza edo baliaezintasun kasuetarako prestazioak edo arrisku kasuetarako beste berme osagarri batzuk edo kontraasegururik gabeko biziarteko eta aldi baterako errentak."

b) "Balore kopurua" eremua, gaur egun 130-145 idazguneak hartzen dituena, 130-146 idazguneak hartuko ditu:

c) "Baloreen nominal unitarioa" eremua, gaur egun 146-163 idazguneak hartzen dituena, 147-164 idazguneak hartuko ditu:

e) "Zuriak" eremua, gaur egun 164-500 idazguneak hartzen dituena, 165-500 idazguneak hartuko ditu:

Bigarren artikulua. Ekonomia, Ogasun, Industria eta Enpleguko kontseilariak martxoaren 1ean emandako 80/2013 Foru Aginduaren aldaketa. Foru agindu horren bidez atzerrian dauden ondasun eta eskubideei buruz informatzeko betebeharra (Tributuei buruzko abenduaren 14ko 13/2000 Foru Lege Orokorraren hemezortzigarren xedapen gehigarriak arautua) garatzen da, eta "Atzerrian dauden ondasun eta eskubideei buruzko aitorpen informatiboa" izeneko 720 eredua onesten.

80/2013 Foru Aginduaren manu hauek honako testu hau izanen dute:

Bat.–3.3.a) artikulua.

"a) Bizi edo baliaezintasun aseguruak, urte bakoitzeko abenduaren 31n horien hartzaile badira, eta aseguru entitatea atzerrian kokaturik badago, data horretan duten erreskate balioa adieraziz.

Hala ere, abenduaren 31n hartzaileak ez badu erabateko erreskaterako eskubidea gauzatzeko ahalmena, egun horretan onuradunari legokiokeen kapitalaren balioa adieraziko da.

Aurreko paragrafoan xedatutakoa ez zaie aplikatuko aldi baterako aseguruei, baldin eta heriotza edo balioezintasun kasuetarako prestazioak edo arrisku kasuetarako beste berme osagarri batzuk baizik jasotzen ez badituzte, ez eta kontraasegururik gabeko biziarteko eta aldi baterako errentei ere".

Bi.–Eranskina, 2. erregistro mota (Xehetasun erregistroa), 432-446 idazguneak, "Balorazioa" eremua: Abenduaren 31ko saldoa edo balioa; iraungitze-datako saldoa edo balioa; eskuratze-balioa:

"432-446. Alfazenbakizkoa. 1. BALORAZIOA: ABENDUAREN 31KO SALDOA EDO BALIOA; IRAUNGITZE DATAKO SALDOA EDO BALIOA; ESKURATZE BALIOA. Aitortutako ondasun eta eskubideen balioa eurotan adieraziko da, edo, dibisa-eragiketak egiten direnean, horien kontrabalioa. Orobat, aitortutako ondasun edo eskubideari lotutako partaide bat baino gehiago daudenean, zenbatekoa EZ da hainbanatuko. Eremu hau honela banatzen da:

• 432. ZEINUA: eremu alfabetikoa. Saldoa negatiboa bada, "N" bat adieraziko da. Beste edozein kasutan, eremu honen edukia zuriune bat izanen da.
• 433-446. ZENBATEKOA: zenbakizko eremua, 14 idazgunekoa. Saldoa dezimalen komarik gabe adieraziko da. Zenbatekoak eurotan adieraziko dira. Eremu hau bitan banatzen da:
  • 433-444. Saldoaren osoko zatia; halakorik ez badu, zeroz beteko da.
  • 445-446. Saldoaren zati dezimala; halakorik ez badu, zeroz beteko da.

"ONDASUN EDO ESKUBIDE MOTAREN GAKOA" (102 idazgunea) izeneko eremuan adierazitako balioaren araberakoa izanen da eremu honetan idatzi beharreko zenbatekoa:

–"ONDASUN EDO ESKUBIDE MOTAREN GAKOA" "C" bada: abenduaren 31ko saldoa, edo kontuaren titulartasuna, ordezkaritza, baimena, erabiltzeko ahala edo titulartasun erreala iraungitzen edo uzten den egunekoa.

–"ONDASUN EDO ESKUBIDE MOTAREN GAKOA" "V" bada: abenduaren 31ko saldoa edo aitortutako titulartasuna iraungitzen den egunekoa.

–"ONDASUN EDO ESKUBIDE MOTAREN GAKOA" "I" bada: abenduaren 31ko likidazioa-balioa, edo aitortutako titulartasuna edo titulartasun erreala iraungitzen den egunekoa. Ondarearen gaineko Zergari buruzko azaroaren 19ko 13/1992 Foru Legearen arauen arabera eman beharko da balorazio hori.

–"ONDASUN EDO ESKUBIDE MOTAREN GAKOA" "S" bada eta aitortutako "ONDASUN EDO ESKUBIDEAREN AZPIGAKOA" (103 idazgunea) "1", abenduaren 31ko erreskate balioa adieraziko da, edo onuradunari abenduaren 31n legokiokeen kapitalaren balioa, hartzaileak ez badu data horretan erabateko erreskaterako eskubidea gauzatzeko ahalmena (salbuespena dira heriotza edo baliaezintasun kasuetarako prestazioak edo arrisku kasuetarako beste berme osagarri batzuk edo kontraasegururik gabeko biziarteko eta aldi baterako errentak baizik ez dituzten jasotzen aldi baterako aseguruen kontratuak). "ONDASUN EDO ESKUBIDEAREN AZPIGAKOA" (103 idazgunea) "2" bada, aldi baterako edo biziarteko errentaren abenduaren 31ko kapitalizazio balioa adieraziko da. Ondarearen gaineko Zergari buruzko azaroaren 19ko 13/1992 Foru Legearen arauen arabera eman beharko da balorazio hori.

–"ONDASUN EDO ESKUBIDE MOTAREN GAKOA" "B" bada eta "ONDASUN EDO ESKUBIDEAREN AZPIGAKOA" (103 idazgunea) "1" bada, ondasun higiezinaren eskuratze balioa adieraziko da, ordaindutako zergak barnean direla, kasua bada. "ONDASUN EDO ESKUBIDEAREN AZPIGAKOA" (103 idazgunea) "2", "3" edo "4" bada, abenduaren 31ko balioa adierazi beharko da, Ondarearen gaineko Zergari buruzko azaroaren 19ko 13/1992 Foru Legean ezarritako balorazio arauen arabera.

Aitortutako zenbatekoak, salbu "B" "ONDASUN EDO ESKUBIDE MOTAREN GAKOARI" eta "1" "ONDASUN EDO ESKUBIDEAREN AZPIGAKOARI" dagozkienak, ekitaldiko aitorpenari dagozkio.

–"ONDASUN EDO ESKUBIDE MOTAREN GAKOA" "M" bada eta "ONDASUN EDO ESKUBIDEAREN AZPIGAKOA" (103 idazgunea) "1" bada, ondasun higigarriaren eskuratze balioa adieraziko da, ordaindutako zergak barnean direla, kasua bada. "ONDASUN EDO ESKUBIDEAREN AZPIGAKOA"(103 idazgunea) "2" edo "3" bada, abenduaren 31ko balioa adierazi beharko da, Ondarearen gaineko Zergari buruzko azaroaren 19ko 13/1992 Foru Legean ezarritako balorazio arauen arabera. Aitortutako zenbatekoak, salbu "B" edo "M" "ONDASUN EDO ESKUBIDE MOTAREN GAKOARI" eta "1" "ONDASUN EDO ESKUBIDEAREN AZPIGAKOARI" dagozkienak, ekitaldiko aitorpenari dagozkio."

Azken xedapenetan lehena.–Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra, eta 2024ko urtarrilaren 1etik aurrera aurkezten diren aitorpenei aplikatuko zaie lehenbizikoz, 2023ko informazioari dagokionez.

Iruñean, 2024ko otsailaren 7an.–Ekonomia eta Ogasuneko kontseilaria, José Luis Arasti Pérez.

Iragarkiaren kodea: F2402262