Iragarkia

34. ALDIZKARIA - 2024ko otsailaren 15a

1. NAFARROAKO FORU KOMUNITATEA

1.7. BESTELAKOAK

1/2024 EBAZPENA, urtarrilaren 19koa, Industriaren, Energia, Enpresa I+G+b eta Ekintzailetzako zuzendari nagusiak emana, zeinaren bidez industria segurtasunaren arloko lanbide gaikuntza eta txartel profesionalak lortzeko proben 2024ko deialdia onesten baita.

Maiatzaren 7ko 560/2010 Errege Dekretuak eta martxoaren 5eko 249/2010 Errege Dekretuak industria segurtasunaren arloko erregelamenduzko zenbait arau eta energiaren eta meategien gaineko zenbait xedapen aldatu zituzten, arau-xedapen horiek egokitzeko, batetik, azaroaren 23ko 17/2009 Legera (zerbitzu jardueretan libreki sartu eta horietan aritzeari buruzkoa), eta bestetik, abenduaren 22ko 25/2009 Legera (zenbait lege aldatzen dituena zerbitzu jardueretan libreki sartu eta horietan aritzeari buruzko Legera egokitzeko asmoz).

Apirilaren 21eko 298/2021 Errege Dekretuak industria segurtasunaren arloko Espainiako araudia eguneratzen du, eta dauden erregelamenduak harmonizatzen ditu enpresa instalatzaileen lan eta giza bitartekoei dagokienez. Era berean, jarduera betetzeko irizpideak bateratzen ditu, eta arautzen du zer egoeratan den beharrezkoa autonomia erkidegoko organo eskudunaren aurrean azterketa bat gainditzea, profesionalak instalatzaile, konpontzaile edo operadore gisa aritu ahal daitezen eta/edo dagokion txartel profesionala lor dezaten.

Bestalde, industria segurtasunaren arloko profesionalak Nafarroako Foru Komunitatean egiaztatzeko prozedura arautzen duen ekainaren 30eko 291/2011 Foru Aginduaren bosgarren artikuluan ezarrita dago azterketak egiteko eta gaikuntza lortzeko prozedura.

Xedapen horiek betetzeko asmoz, bidezkoa da industria segurtasunaren arloko lanbide gaikuntza eta txartel profesionalak lortzeko 2024. urterako deialdi hau onestea.

Adierazitakoarekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. Industria segurtasunaren arloko lanbide gaikuntza eta txartel profesionalak lortzeko proben 2024ko deialdia onestea.

2. Deialdi hori arautuko duten oinarriak eta betebeharrak, ebazpen honen eranskinetan ageri direnak, onestea.

3. Ebazpen honen aurka gora jotzeko errekurtsoa jartzen ahal da, Industriako eta Enpresen Trantsizio Ekologiko eta Digitalerako kontseilariari zuzendua, Nafarroako Aldizkari Ofizialean argitaratu eta biharamunetik hilabeteko epean.

4. Ebazpen hau eta eranskinak Nafarroako Aldizkari Ofizialean argitaratzea.

Iruñean, 2024ko urtarrilaren 19an.–Energia, Enpresa I+G+b eta Ekintzailetzako zuzendari nagusia, Uxue Itoiz Mariñelarena.

I. ERANSKINA.–OINARRIAK

Lehena.–Xedea.

Ebazpen honen xedea proben deialdia egitea da honako hauek lortzeko gaitasun azterketak egiteko:

–Galdaretako operadore industrialaren lanbide gaikuntza.

–Gas-instalatzailea (A, B eta C kategoriak).

–Petrolio produktu likidoen instalatzailea edo konpontzailea (I., II. eta III. kategoriak).

–Dorre-garabiko operadorearen txartela.

–Eraikinetako instalazio termikoen arloko txartel profesionala.

Bigarrena.–Izena ematea.

1. Izena eman nahi dutenek inskripzio eskabide bat aurkeztu beharko dute ezarritako epean, ebazpen honen II. eranskineko ereduaren araberakoa, egin nahi duten azterketa bakoitzeko.

Honela ematen ahalko da izena:

–Aurrez aurre: Nafarroako Gobernuko erregistro bulegoetan, edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan ezarritako lekuetan. Eskubide hori erabiliz, espedientea posta bidez igortzen bada, gutun-azal irekian aurkeztuko da, postetxeko funtzionarioak data eta zigilua jar ditzan gutuna ziurtatu baino lehen.

–Telematikoki: www.nafarroa.eus web-orritik (bilatzailea: "industria segurtasuneko azterketak 2024").

Azterketa egiteko inskripzio bakoitzeko, dagokion tasa ordaindu beharko da azterketa eskubideengatik; tasa ordaindu izanaren frogagiria aurkeztu beharko da inskripzio eskabidearekin batera. Ordaindu ezean, izangaia baztertuko da.

Tasa ordaindu izanaren frogagiria aurkezteak ez du inola ere aldatuko inskripzio eskabidea behar den epean eta moduan aurkeztu beharra.

Tasa itzultzea, interesdunak eskaturik, bidezko izanen da, bakar-bakarrik, bitan ordaindu bada.

2. 2024. urtean bi epe izanen dira izena emateko:

Izena emateko lehenbiziko epea (soil-soilik galdaretako operadore industrialaren azterketarako): eskabidea eta ordainagiria 2024ko martxoaren 1etik 15era aurkeztu beharko dira, bi egunak barne.

Izena emateko bigarren epea (galdaretako operadore industrialaren, gas-instalatzailearen, petrolio produktu likidoen instalatzaile edo konpontzailearen, dorre-garabiko operadorearen eta eraikinetako instalazio termikoen arloko instalatzailearen azterketetarako): eskabidea eta ordainagiria 2024ko irailaren 1etik 15era aurkeztu beharko dira, bi egunak barne.

Hirugarrena.–Izangaien onarpena eta erreklamazioak.

Eskabideak aurkezteko epea amaituta, eta 10 egun balioduneko gutxieneko epean, www.nafarroa.eus webgunean (bilatzailea: "industria segurtasuneko azterketak 2024") izangai onartu eta baztertuen behin-behineko zerrenda argitaratuko da.

Bazterturik gelditu direnek bost egun balioduneko epea izanen dute, behin-behineko zerrendak argitaratzen direnetik, erreklamazioak aurkezteko eta, akatsik egin badute, horiek zuzentzeko.

Erreklamazioak ebatzi ondoren, onartu eta baztertutako izangaien behin betiko zerrenda argitaratuko da, azterketak egiteko eguna, ordua eta tokia adierazita.

Izangaiak onartuen behin betiko zerrendetan egoteak ez dakar inola ere Administrazioak aitortzea deialdiaren oinarrietan eta kasuan kasuko erregelamenduetan eskatzen diren baldintzak betetzen dituztela.

Laugarrena.–Kalifikazio epaimahaia.

Hauek izanen dira kalifikazio epaimahaiko kideak:

–Epaimahaiburua: Laura Larraya Irigoyen andrea, Industria Antolamenduaren, Azpiegitura Energetikoen eta Meatzeen Zerbitzuko zuzendaria.

Ordezkoa: Esperanza Aristu Perez de Larraya andrea, Trantsizio Energetikoaren Zerbitzuko zuzendaria.

–Epaimahaiko kidea: Javier Amezaga Ruiz jauna, Enpresen Erregistroaren eta Industria Segurtasunaren Ataleko industria ingeniaria.

Ordezkoa: Iñaki Ayesa Zubiri jauna, Azpiegitura Energetikoen Ataleko burua.

–Epaimahaiko kidea: María José Lacruz Baztán andrea, Enpresen Erregistroaren eta Industria Segurtasunaren Ataleko industria ingeniaria.

Ordezkoa: Gabriel Viedma Moreno jauna, Enpresen Erregistroaren eta Industria Segurtasunaren Ataleko burua.

–Epaimahaiko kidea: Yolanda Tofiño Alba andrea, Enpresen Erregistroaren eta Industria Segurtasunaren Ataleko administraria.

Ordezkoa: Ester Román Plaza andrea, Enpresen Erregistroaren eta Industria Segurtasunaren Ataleko administraria.

–Idazkaria: Ana Sainz Jiménez andrea, Industriaren, Energiaren eta Meatzeen Araubide Juridikoaren Ataleko burua.

Ordezkoa: Isabel Akerreta Larraz andrea, Laguntza Juridikoaren Ataleko burua.

Epaimahaiko buruak deialdia egin ondoren, epaimahaia eratuko da baldin eta kideen gehiengo soila bertaratzen bada, titularrak nahiz ordezkoak izan. Bilkura horretan, epaimahaiak behar diren erabakiak hartuko ditu probak behar bezala gara daitezen.

Bosgarrena.–Proben garapena eta edukia

1. Azterketa teorikoa:

Azterketetan izena ematen dutenek Nortasun Agiri Nazionala, pasaportea edo legez onartua den beste edozein dokumentu, identitatea behar adina frogatzen duena, eraman beharko dute probetara aurkezteko.

Azterketak test moduko 40 galdera izanen ditu, ebazpen honen III. eranskinean ezarritako edukiei buruzkoak. Galderetako bakoitzak hiru erantzun alternatibo izanen ditu, eta erantzun zuzenak puntu batekin baloratuko dira, eta okerrak, erantzun gabeak edo erantzun bat baino gehiago dauzkatenak, berriz, ez dira puntuatuko, ez positiboki ez negatiboki.

Azterketa gainditzeko 32 puntu lortu behar dira gutxienez.

Proba hori egiteko, ordubete izanen da.

Proba egiteko ez da inolako kalkulagailurik erabiltzen ahalko, ez eta telefono mugikorrik edo bestelako materialik ere, bolaluma urdina edo beltza izan ezik.

Azterketatik bazterturik geldituko dira adierazten diren egun, ordu eta tokietan agertzen ez diren izangaiak, arrazoia edozein dela ere, edo identitatea behar bezala frogatzen ez dutenak.

Azterketak epaimahaiak ezartzen dituen moduan eta tokian eginen dira, eta www.nafarroa.eus webgunean (bilatzailea: "industria segurtasuneko azterketak 2024") iragarriko da.

Seigarrena.–Gainditu duten izangaien zerrenda eta erreklamazioak.

Ariketen kalifikazioa bukatuta, gai eta ez-gai direnen eta aurkeztu ez direnen behin-behineko emaitzak argitaratuko dira www.nafarroa.eus webgunean (bilatzailea: "industria segurtasuneko azterketak 2024").

Behin-behineko emaitzak argitaratu ondoren, 5 egun balioduneko epea emanen da erreklamazioak aurkezteko. Erreklamazioak ebatzi ondoren, Energia, Enpresa I+G+b eta Ekintzailetzako zuzendari nagusiaren ebazpena eman eta argitaratuko da behin betiko zerrenda onesteko. Ebazpen horren aurka gora jotzeko errekurtsoa jartzen ahalko da, Industriako eta Enpresen Trantsizio Ekologiko eta Digitalerako kontseilariari zuzendua, argitaratu eta biharamunetik hilabeteko epean.

II. ERANSKINA.–ESKABIDEA, INDUSTRIA SEGURTASUNAREN ARLOKO PROFESIONALAREN TXARTELA EDO GAIKUNTZA LORTZEKO AZTERKETAN ONARTUA IZATEKO

Sinatzaileak ESKATZEN du onar dezatela eskabide honetan adierazitako prozesuan, eta ADIERAZTEN du, erantzukizuna berea izanik, bertan agertzen diren datu guztiak egiazkoak direla eta deialdiaren oinarrian eskatutako betebehar guztiak betetzen dituela proba egiteko unean.

Iruñean, 20….(e)ko ………………………aren ……. (e)an.

Eskatzailearen sinadura

Oharra: Probak gainditzen dituztenek txartela egiteko eskatu beharko dute; horretarako, frogatu beharko dute dagokion araudian ezarritako baldintzak betetzen dituztela.

III. ERANSKINA.–GAI ZERRENDA

Azterketa: galdaretako operadore industriala.

Beharrezkoak diren gutxieneko ezagutzak adierazita daude Presio-ekipoen erregelamendua eta haren jarraibide tekniko osagarriak onesten dituen abenduaren 21eko 809/2021 Errege Dekretuaren PE-1 JTOaren II. eranskinean.

Azterketa: EITE instalatzailea.

Beharrezkoak diren gutxieneko ezagutzak adierazita daude Eraikinetako Instalazio Termikoen Erregelamendua onesten duen uztailaren 20ko 1027/2007 Errege Dekretuaren eranskinean, "Eraikinetako Instalazio Termikoen Erregelamendua (EITE)" izenekoan, 3. gehigarrian (Eraikinetako instalazio termikoei buruzko ezagutzak)

Azterketa: gas-instalatzailea, A kategoriakoa.

Beharrezkoak diren gutxieneko ezagutzak adierazita daude Gas-erregaien banaketa eta erabilerarako Erregelamendu Teknikoaren GEI-09 JTOaren 1. eranskineko 1. puntuan. Erregelamendu hori uztailaren 28ko 919/2006 Errege Dekretuaren bidez onetsi zen.

Azterketa: gas-instalatzailea, B kategoriakoa.

Beharrezkoak diren gutxieneko ezagutzak adierazita daude Gas-erregaien banaketa eta erabilerarako Erregelamendu Teknikoaren GEI-09 JTOaren 1. eranskineko 2. puntuan. Erregelamendu hori uztailaren 28ko 919/2006 Errege Dekretuaren bidez onetsi zen.

Azterketa: gas-instalatzailea, C kategoriakoa.

Beharrezkoak diren gutxieneko ezagutzak adierazita daude Gas-erregaien banaketa eta erabilerarako Erregelamendu Teknikoaren GEI-09 JTOaren 1. eranskineko 3. puntuan. Erregelamendu hori uztailaren 28ko 919/2006 Errege Dekretuaren bidez onetsi zen.

Azterketa: dorre-garabiko operadorea.

Beharrezkoak diren gutxieneko ezagutzak adierazita daude ekainaren 27ko 836/2003 Errege Dekretuaren VI. eranskinean. Errege dekretu horren bidez Jasotzeko gailuen eta haien mantentze-lanetarako Erregelamenduaren jarraibide tekniko osagarri berri bat onesten da, "IEM-JGM-2", obretarako eta bestelako aplikazioetarako dorre-garabiei buruzkoa.

Azterketa: petrolio produktu likidoen instalatzaile edo konpontzailea (I. kategoria).

Beharrezkoak diren gutxieneko ezagutzak adierazita daude "Petrolio produktu likidoen instalatzaile edo konpontzaileak edo enpresa instalatzaile edo konpontzaileak" IM-PI05 jarraibide tekniko osagarria onesten duen apirilaren 8ko 365/2005 Errege Dekretuaren II. gehigarrian (ezagutza teoriko-praktikoak-I. kategoria)

Azterketa: petrolio produktu likidoen instalatzailea edo konpontzailea (II. kategoria).

Beharrezkoak diren gutxieneko ezagutzak adierazita daude "Petrolio produktu likidoen instalatzaile edo konpontzaileak edo enpresa instalatzaile edo konpontzaileak" IM-PI05 Jarraibide Tekniko Osagarria onetsi zuen apirilaren 8ko 365/2005 Errege Dekretuaren III. gehigarrian (ezagutza teoriko-praktikoak-II. kategoria)

Azterketa: petrolio produktu likidoen instalatzailea edo konpontzailea (III. kategoria).

Beharrezkoak diren gutxieneko ezagutzak adierazita daude "Petrolio produktu likidoen instalatzaile edo konpontzaileak edo enpresa instalatzaile edo konpontzaileak" IM-PI05 jarraibide tekniko osagarria onesten duen apirilaren 8ko 365/2005 Errege Dekretuaren IV. gehigarrian (ezagutza teoriko-praktikoak-III. kategoria).

Oharra.–Gai guztiak ebazpen hau Nafarroako Aldizkari Ofizialean argitaratzen den egunean indarra duen legeriaren arabera eskatuko dira.

Iragarkiaren kodea: F2401408