Iragarkia

34. ALDIZKARIA - 2024ko otsailaren 15a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

242E/2023 EBAZPENA, abenduaren 28koa, Ekonomia Sozialeko eta Laneko zuzendari nagusiak emana, dirulaguntzen deialdi hau onesten duena: "Langile autonomoentzako dirulaguntzak, 5.000 biztanle arteko Nafarroako herrietan kokatutako negozioen eskualdatzeengatik ordaindutako gastuak estaltzeko". DDBN identifikazioa: 738008.

Lan Zerbitzuak nagusiki autonomoen ardurapean dauden negozioak ixtea ekidin nahi du; horretarako, Nafarroako Lan Autonomoaren I. Planaren 4.3 ildo estrategikoa garatuz ("Itxiera saihesteko eta erreleboa sustatzeko neurriak"), enpresa ondorengotzarik gabeko negozio poltsa bat sortu zuen.

Aurreko planak irekitako bidetik jarraituz, Nafarroako Lan Autonomoaren II. Planak, "Belaunaldien eta enpresen erreleboa sustatzea" izeneko 4.2 ildo estrategikoan, zenbait neurri eta ekintza jasotzen ditu bideragarritasun ekonomiko eta soziala izan arren ondorengotzarik ez izateagatik desagertzeko arriskuan dauden negozioei eta enpresei eusten laguntzeko.

Negozioen erreleborako poltsari ekonomikoki laguntzeko, 2024an aurrekontu partida bat gorde da belaunaldiarteko erreleboa sustatzeko laguntzen deialdi honetarako, zeinaren helburua baita 5.000 biztanletik beherako herrietan erreleboa aurkitzeko zailtasunak dituzten negozioen jarraitutasuna erraztea.

Negozioak eskualdatzeagatik ordaindutako gastuetarako laguntza honen bidez, erreleboa aurkitzeko zailtasunak dituzten negozioek aurrera egitea sustatu nahi da. Negozio horiek Nafarroako 5.000 biztanletik beherako herri batean kokatuta egon behar dute, eta negozioen erreleborako poltsaren bidez eskualdatu behar dira.

Nafarroako Gobernuaren 2023ko abenduaren 20ko Erabakiaren bidez, baimena eman zen dirulaguntza hauek banakako ebaluazioko araubidean tramitatzeko, Dirulaguntzei buruzko azaroaren 9ko 11/2005 Foru Legearen 17.1 artikuluan xedatutakoarekin bat.

Adierazitakoarekin bat, eta martxoaren 11ko Nafarroako Foru Komunitateko Administrazioari eta foru-sektore publiko instituzionalari buruzko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. Langile autonomoentzako dirulaguntzen deialdi bat onestea negozioak eskualdatzeagatik ordaindutako gastuak estaltzen laguntzeko, betiere eskualdatutako negozioa Nafarroako 5.000 biztanletik beherako herri batean kokatuta badago.

2. Dirulaguntzak emateko oinarri arautzaileak onestea. Ebazpen honen eranskinean bildu dira.

3. 120.000 euroko gastua baimentzea deialdi honetatik sortutako konpromisoei erantzuteko, 2024ko gastuen aurrekontuko "Autonomoentzako laguntzak belaunaldiarteko erreleborako" izeneko 810012 81500 4709 494100 partidaren kargura.

Izapidetze aurreratuko espedientea denez, orain baimendutako krediturako baldintza da kreditu egokia eta behar adinakoa izatea aipatu partidan, 2024ko ekitaldian.

4. Ebazpen hau eta eranskina Nafarroako Aldizkari Ofizialean argitaratzea, eta ohartaraztea deialdiak ez duela ondoriorik sortuko harik eta aipatu aldizkarian argitaratu arte.

5. Ebazpen honek ez du administrazio bidea amaitzen, eta haren aurka gora jotzeko errekurtsoa jar daiteke, Eskubide Sozialetako, Ekonomia Sozialeko eta Enpleguko kontseilariari zuzendua, hilabeteko epean, argitaratu eta biharamunetik hasita.

Iruñean, 2023ko abenduaren 28an.–Ekonomia Sozialeko eta Laneko zuzendari nagusia, Iñaki Mendióroz Casallo.

ERANSKINA.–OINARRI ARAUTZAILEAK

1. oinarria.–Xedea.

Dirulaguntza hauen xedea da erreleboa aurkitzeko zailtasunak dituzten negozioen jarraitutasuna erraztea, bai eta 2024an lan autonomoa edo norbere kontura lan egiteko aukera sustatzea eta bultzatzea ere.

2. oinarria.–Jarduketa diruz lagungarriak.

Diruz laguntzen ahalko dira Nafarroako 5.000 biztanlera bitarteko herrietan kokatutako negozioak eskualdatzeagatik ordaindutako gastuak, baldin eta negozioek gutxienez ere bost urteko antzinatasuna badute eta Lan Zerbitzuaren negozioen erreleborako poltsan inskribatuta badaude (www.navarraemprende.com), eta negozioak eskualdatzeko kontratuak 2023ko azaroaren 1etik 2024ko urriaren 31ra bitartean sinatu badira (bi egunak barne).

Honako gastu hauek izan daitezke diruz lagungarriak, baldin eta 2023ko azaroaren 1etik 2024ko urriaren 31ra bitartean sortu eta benetan ordaindutakoak badira, eta negozio eskualdatzeari egozten ahal bazaizkio:

a) Negozioa eskualdatzeko behar bezala formalizatutako akordioan ezarritako prezioa.

b) Notario eta erregistro gastuak.

c) Aholkularitza juridikoko edo finantzarioko gastuak.

d) Peritu gastuak.

e) Negozio lokalaren alokairu gastuak, eta/edo negoziorako beharrezkoak diren ekoizpen bitartekoak.

f) Negozioa eskualdatzearen ondoriozko beste gastu batzuk.

3. oinarria.–Onuradunak.

1. Dirulaguntzaren onuradun izanen dira norberaren kontura egiten den enpresa jarduera baten titularraren ondorengotza hartzen duten langile autonomoak, dirulaguntza eskatzeko unean baldintza hauek betetzen badituzte:

a) Negozioa eskualdatzeko kontratua sinatzen denean Lan Zerbitzuaren negozioen erreleborako poltsan inskribatuta egotea.

b) Negozioek bost urteko antzinatasuna izan behar dute gutxienez ere.

c) Negozioa benetan eskualdatzeko kontratua 2023ko azaroaren 1etik 2024ko urriaren 31ra bitarte formalizatzea.

d) Ekonomia-jardueren gaineko zergan alta emanda egotea, jarduera ekonomikoa non eginen den, herri horretan, edo nekazaritza jardueren kasuan, Nekazaritzako Ustiategien Erregistroan izena emanda egotea, uztailaren 2ko 150/2002 Legegintzako Foru-dekretuarekin bat.

e) Gizarte Segurantzako langile autonomoen araubide berezian edo dagokion lanbide elkargoaren mutualitatean alta emanda egotea.

f) Ez egotea Dirulaguntzei buruzko azaroaren 9ko 11/2005 Foru Legearen 13.2 artikuluak onuradun izateko ezarritako debeku egoeretako batean ere. Erantzukizunpeko adierazpenaren bidez frogatzen ahalko da egoera hori.

2. Zerga betebeharrak eta Gizarte Segurantzarekikoak egunean dituztela eta oinarri hauetako 4.1 atalean eskatutako baldintzak betetzen dituztela egiaztatzeko, dirulaguntzaren eskaera aurkezteak berekin dakar Eskubide Sozialetako, Ekonomia Sozialeko eta Enpleguko Departamentuari baimena ematea inguruabar horiek egiaztatzen dituzten datuak kontsultatzeko. Eskabidean interesdunak horri berariaz uko egiten badio, berak aurkeztu beharko ditu aipatutako inguruabarrak egiaztatzeko agiriak.

4. oinarria.–Onuradunen betebeharrak.

1. Dirulaguntzaren onuradunek honako betebehar hauek bete beharko dituzte:

a) Eskualdatzearen akordioa indarrean hasten denetik hurrengo hamabi hilabeteetan alta emanda jarraitzea Gizarte Segurantzako langile autonomoen araubide berezian edo lanbide elkargoaren mutualitatean.

b) Eskualdatzearen akordioa indarrean hasten denetik hurrengo hamabi hilabeteetan alta emanda jarraitzea ekonomia-jardueren gaineko zergan jarduera ekonomikoa non eginen den, herri horretan, edo nekazaritza jardueren kasuan, Nekazaritzako Ustiategien Erregistroan.

c) Ematen zaion laguntzaren xede den jarduera ekonomiko berean jardutea hamabi hilabetez gutxienez, negozioa eskualdatzen denetik hasita. Jarduera ekonomikoa aldatuz gero, horren berri eman beharko zaio laguntzak ematen dituen organoari.

d) Jasotako laguntzaren publizitatea egitea, hurrengo esaldia webgune korporatiboan sartuz edo enpresan ikusteko moduko toki batean jarriz, gutxienez bi urtez, laguntza ordaintzeko ebazpenaren egunetik aurrera: "Enpresa honek Nafarroako Gobernuaren dirulaguntza bat jaso du belaunaldiarteko erreleboa sustatzeko".

e) Dirulaguntzei buruzko azaroaren 9ko 11/2005 Foru Legearen 9. artikuluan oro har ezarritako betebeharrak betetzea, eta laguntza ematen duen organoak edo horretarako eskumena duen edozein organok egin beharreko egiaztapen eta kontrol jarduketak onartzea. Horretarako, jarduketa horien ondorioz eskatzen zaien dokumentazio guztia aurkeztu beharko dute.

2. Onuradunak ondorengotza hartzen badu lokala eta/edo ekoizpen bitartekoak alokatuz, 4.1 oinarriko a), b) eta c) letretan ezarritako iraupen betebeharrak 36 hilabetez bete beharko dira, eskualdatzea egiten denetik hasita. Alokairuaren zenbatekoa eskualdatze kontratuan jaso beharko da.

3. Betebehar horiek edo Dirulaguntzei buruzko Foru Legean ezarritako betebeharrak betetzen ez badira, dirulaguntza itzuli beharko da, salbu eta onuradunaren heriotza, ezintasun iraunkor osoa nahiz absolutua edo baliaezintasun handia gertatuz gero, betiere foru lege horren 35. artikuluan xedatutakoarekin bat.

Halaber, goian azaldutako betebeharren bat hein batean ez betetzeak dirulaguntzaren zati bat itzuli behar izatea ekar dezake.

5. oinarria.–Dirulaguntzaren zenbatekoa.

1. Dirulaguntzaren zenbatekoa kalkulatzeko, kontuan hartuko da eskualdatutako negozioa non dagoen, herri horretako biztanle kopurua, eta justifikatutako gastuen aurrekontuko %70 adinakoa izanen da, ondorengo taulan ageri diren gehieneko mugekin, betiere:

Gehieneko zenbatekoa handituko da, aipatu taula horretan adierazitako mugetaraino, eskatzaileak baldin badira:

a) Emakumeak.

b) Gutxienez %33ko desgaitasun aitortua duten pertsonak.

2. Negozioa pertsona batek baino gehiagok eskuratzen badute, dirulaguntzaren zenbatekoa proportzionalki banatuko da, bakoitzak negozioan duen partaidetza-ehunekoaren arabera.

3. Eskualdatzea lokala edo ekoizpen bitartekoak alokatuz egiten bada, kontzeptu horregatiko dirulaguntzaren zenbatekoa honela kalkulatuko da: kontratuan jasotako hilabeteko prezioa bider 24 hilabete, oinarri honetako taulan jasotako mugarekin, betiere.

4. 2024. urtean, deialdi honek sortutako betebehar ekonomikoei erantzuteko erabilgarri dagoen aurrekontu kreditua 120.000 eurokoa da.

6. oinarria.–Eskaerak aurkezteko epea eta modua.

1. Eskaerak aurkezteko epea hilabetekoa izanen da, eskualdatzeak indarra hartu eta hurrengo egunetik hasita, betiere ordurako deialdi hau Nafarroako Aldizkari Ofizialean argitaratu bada. Bestela, epea hilabetekoa izanen da, deialdia Nafarroako Aldizkari Ofizialean argitaratu eta hurrengo egunetik hasita.

Deialdi honetarako baimendutako aurrekontu kreditua egun hori baino lehen bukatzen bada, eskaerak aurkezteko epea itxi dela jakinaraziko da Nafarroako Gobernuak Interneten duen atariko (www.nafarroa.eus) tramiteen katalogoko fitxaren bidez.

Epez kanpo aurkeztutako eskaerak ez dira onartuko.

2. Eskaerak telematikoki aurkeztuko dira nahitaez, laguntzen fitxaren bidez. Fitxa horretan, Nafarroako Foru Komunitateko Administrazioko Erregistro Orokor Elektronikoan sartzeko esteka bat izanen da.

Hala xedatzen baitu bere 16.8 eta 66.6 artikuluetan Administrazio Publikoen Administrazio Prozedura Erkideari buruzko urriaren 1eko 39/2015 Legeak, ez dira aurkeztutzat hartuko laguntzen fitxan dagoen eredura egokitzen ez diren eskaerak, ezta aipatutako fitxa erabiliz telematika bidez aurkezten ez direnak ere. Horrenbestez, ez-aurkeztutzat jotzen direnez, eskaera horiek ezin izanen dira zuzendu.

3. Laguntza eskaera bakarra onartuko da pertsona eta/edo eskualdatutako negozio bakoitzeko. Pertsona batek baino gehiagok eskuratzen badute negozioa, laguntzaren zenbatekoa bakoitzak negozioan duen partaidetzaren araberakoa izanen da.

4. Eskabidearekin batera agiri hauek aurkeztu behar dira, bakoitza artxibo batean eskaneatua eta bere izenarekin behar bezala identifikatua, eta, betiere, laguntzen fitxan eskuragarri dauden ereduei jarraikiz:

a) Eskaera inprimakia.

b) Erantzukizunpeko adierazpena, adierazteko eskatzaileak ez duela urratzen, onuradun izateko, Dirulaguntzei buruzko azaroaren 9ko 11/2015 Foru Legearen 13. artikuluan ezarritako inolako debekurik (eskatzaile bakoitzak berea).

c) Gizarte Segurantzako langile autonomoen araubide berezian edo dagokion lanbide elkargoaren mutualitatean alta emanda egotearen ziurtagiria.

d) Ekonomia-jardueren gaineko zergan alta emanda egotearen ziurtagiria, edo nekazaritzako jardueren kasuan, Nekazaritzako Ustiategien Erregistroan izena emanda egotearena, uztailaren 2ko 150/2002 Legegintzako Foru-dekretuarekin bat.

e) Eskualdatutako negozioak 5 urteko antzinatasuna duela (gutxienez) egiaztatzeko agiria.

f) Laguntza transferentzia bidez ordaintzeko eskaera, eskatzaile bakoitzak berea.

g) Negozioa eskualdatzeko akordioa, behar bezala formalizatua.

h) Hala badagokio, 2. oinarrian aipatzen diren gastu diruz lagungarriak sortu izanaren eta ordaindu izanaren frogagirien kopia. Eskatzailearen izenean egon beharko dute.

i) Hala badagokio, desgaitasunen bat duen pertsona dela frogatzea, 5.1.b) oinarrian xedatu bezala.

4. Aurkeztutako dokumentazioak ez baditu Administrazio Publikoen Administrazio Prozedura Erkideari buruzko Legearen 66. artikuluko betebeharrak betetzen, Lan Zerbitzuak interesdunari eskatuko dio 10 egun balioduneko epean zuzentzeko, eta ohartaraziko dio ezen, hala egin ezean, eskaera bertan behera uzten duela ulertuko dela eta espedientea artxibatzeko ebazpena emanen dela.

Eskatzen den dokumentazioa aurkezten ez bada, ezin izanen da inola ere zuzendu.

7. oinarria.–Dirulaguntza emateko irizpideak.

Dirulaguntza hau banakako ebaluazioaren araubideari jarraikiz emanen da, Dirulaguntzei buruzko azaroaren 9ko 11/2015 Legearen 17.1 artikuluan ezarritakoaren arabera. Hortaz, eskaerak oinarri hauetan ezarritako irizpideei jarraikiz baloratuko dira, eta dirulaguntzaren intentsitatea ebaluazio horren emaitzaren arabera zehaztuko da.

Eskaerak zein hurrenkeratan aurkezten diren, horren arabera tramitatu eta ebatziko dira espedienteak, aurrekontuan horretarako kreditua dagoen bitartean. Aurrekontuan behar adina diru ez egoteagatik kontuan hartzen ez diren eskaerak ezetsitzat joko dira.

Hala ere, azken negozio baten eskuratzea partzialki diruz laguntzeko kreditua geratzen bada aurrekontuan, erabilgarri dagoen kreditua adinako dirulaguntza emanen zaio azken eskaera horri.

8. oinarria.–Dirulaguntzaren ebazpena eta ordainketa.

1. Dirulaguntzak emateko prozeduraren instrukzioa Lan Zerbitzuari dagokio. Zerbitzu horrek ebazpen proposamen bat igorriko dio organo eskudunari, non adieraziko baitu onuradunek dirulaguntza eskuratzeko betebehar guztiak betetzen dituztela.

Ekonomia Sozialeko eta Laneko Zuzendaritza Nagusia izanen da dirulaguntza ematea eta ordaintzea edo ukatzea ebatziko duen organo eskuduna. Ebazpena 2 hilabeteko epean eman eta jakinarazi beharko da, eskaera organo eskudunaren erregistroan aurkezten denetik zenbatzen hasita.

Epealdi horretan berariazko ebazpenik ematen ez bada, eskabidea ezetsitzat joko da. Berariazko edo ustezko ezespenaren aurka, interesdunek errekurtsoa jartzen ahalko dute, administrazio prozedura erkideari buruzko legeriari jarraikiz.

2. Instrukzio organoak egiaztatu ondoren aurkezten den dokumentazioa zuzen dagoela eta 6. oinarrian ezarritako betebeharrak betetzen direla, dirulaguntza onartu eta ordainduko da, edo, hala badagokio, ukatuko da.

3. Aurrekontuan krediturik ez izatea dirulaguntza ukatzeko arrazoia izanen da.

9. oinarria.–Baliabide elektronikoen bidezko harremanak.

1. Laguntzen eskaera eta erantsi beharreko dokumentazio guztia telematika bidez aurkeztuko dira Nafarroako Foru Komunitateko Administrazioaren Erregistro Orokor Elektronikoan, laguntzen fitxaren bidez, Nafarroako Gobernuaren Interneteko Atariko (www.nafarroa.eus) tramiteen katalogoaren barnean.

2. Administrazio egintzen jakinarazpena eta laguntza hauek emateko prozeduraren barruan egiten diren jarduketa guztien komunikazioak eskatzaileen gaitutako helbide elektroniko bakarraren bidez (GHEb) eginen dira. Jakinarazpen edo komunikazioaren bidalketaren berri emanen da eskaera-inprimakian jarritako helbide elektronikoaren bitartez.

10. oinarria.–Dirulaguntzaren bateraezintasuna.

Deialdi honetako dirulaguntzak bateraezinak dira Nafarroako Foru Komunitateko Administrazioak, beste administrazio publiko batzuek, beste entitate publiko nahiz pribatu batzuek edo partikularrek, Espainiakoek nahiz nazioartekoek, gastu beretarako emandako beste dirulaguntza batzuekin.

11. oinarria.–"De minimis" laguntzak.

Deialdi honetako dirulaguntzak "de minimis" laguntzak dira, Europako Batzordeak 2013ko abenduaren 18an emandako 1407/2013 Erregelamenduan xedatutakoaren arabera. Erregelamendu hori Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko moduari buruzkoa da.

Erregelamendu horrekin bat, enpresa bakar bati hiru zerga-ekitaldiko edozein alditan emandako "de minimis" laguntza guztien batura ezin da 200.000 eurotik gorakoa izan. Aipatu erregelamenduaren 2.2 artikuluan ezarrita dago enpresa bakarraren definizioa.

Horretarako, interesdunek kasuan kasuko zerga ekitaldian eta aurreko bi zerga ekitaldietan hartutako bestelako "de minimis" laguntzak aitortu beharko dituzte eskaera-orrian.

Nekazaritzako produktuen lehen mailako ekoizpenean diharduten enpresen kasuan, Batzordeak 2013ko abenduaren 18an emandako 1408/2013 (EB) Erregelamenduaren bidez ezarritako "de minimis" araubidearen barruan sartuko dira laguntzak (erregelamendu hori Europar Batasunaren Itunaren 107. eta 108. artikuluak nekazaritza sektorearentzako "de minimis" laguntzei aplikatzeari buruzkoa da).

Kasu horietan, ezin izanen da laguntzarik eman enpresari emandako "de minimis" laguntzen zenbateko osoak 200.000 euroko gehieneko muga gainditzen badu hiru zerga ekitaldiko edozein alditan.

12. oinarria.–Emandako dirulaguntzen publizitatea.

Lan Zerbitzuak jendaurrean jarriko ditu emandako dirulaguntzak Ogasuneko eta Funtzio Publikoko Ministerioaren Dirulaguntzen Datu Base Nazionalaren bitartez (http://www.pap.minhafp.gob.es/bdnstrans/GE/eu/index), honako hauek adierazita: deialdia, laguntza zein aurrekontu kredituri egotzi zaion, onuradunak eta emandako diru kopurua.

13. oinarria.–Itzultzea.

1. Dirulaguntza emateko ebazpena baliorik gabe uzteko Dirulaguntzei buruzko azaroaren 9ko 11/2005 Foru Legearen 34. artikuluan aipatzen diren arrazoiez gain, kobratutako dirua osorik edo hein batean itzuli beharko da, eta berandutze-interesak ordaindu, dirulaguntza eman zenetik hori itzuli behar dela erabaki arte, foru lege horren 35. artikuluan aipatzen diren kasuetan.

2. Dirulaguntzak itzultzeko, Dirulaguntzei buruzko azaroaren 9ko 11/2005 Foru Legean xedatutakoari jarraituko zaio.

14. oinarria.–Oinarri arautzaileen aurkako errekurtsoa.

Oinarri arautzaile hauen aurka gora jotzeko errekurtsoa jar dezakete interesdunek, Eskubide Sozialetako, Ekonomia Sozialeko eta Enpleguko kontseilariari zuzendua, hilabeteko epean, argitaratu eta hurrengo egunetik aurrera.

Iragarkiaren kodea: F2401226