Iragarkia

249. ALDIZKARIA - 2024ko abenduaren 10a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

188C/2024 EBAZPENA, urriaren 13koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Productos Naturales de la Vega SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Productos Naturales de la Vega SL enpresak aurkeztutako hitzarmen kolektiboa (kode zenbakia: 31100271012015), erregistro honetan sartu baitzen 2024ko urriaren 17an, 2024ko urriaren 11n enpresaren eta sindikatuen ordezkaritzek sinatu ondoren.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Productos Naturales de la Vega SL enpresak aurkeztutako hitzarmen kolektiboa (kode zenbakia: 31100271012015).

Bigarrena.–Nafarroako Aldizkari Ofizialean argitara dadila xedatzea, orok jakin dezaten.

Hirugarrena.–Ebazpen hau eskatzaileari jakinaraztea, eta ohartaraztea ebazpenak ez diola bukaera ematen administrazio-bideari, eta, haren aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko urriaren 13an.–Ekonomia Sozialeko eta Laneko zuzendari nagusia, Iñaki Mendióroz Casallo.

PRODUCTOS NATURALES DE LA VEGA SL ENPRESAREN HITZARMEN KOLEKTIBOA

I. KAPITULUA.–XEDAPEN OROKORRAK

1. artikulua. Hitzartzen duten alderdiak.

Hitzarmen kolektibo hau Lodosako Productos Naturales de la Vega SL enpresako zuzendaritzaren eta hango langileen ordezkarien artean egiten da.

2. artikulua. Langile eta lurralde eremua.

Hitzarmen honetako arauak Lodosako Productos Naturales de la Vega SL enpresak El Ramal industrialdean (Sartagudako errep., z.g., Lodosa, Nafarroa) duen lantokiko langile guztiei aplikatzen zaizkie.

Langileen eremutik kanpo gelditzen dira Langileen Estatutuaren 1.32 eta 2. artikuluetan arautzen diren kasuetan daudenak.

3. artikulua. Iraunaldia eta salaketa.

Hitzarmen kolektibo honek lau urte iraunen du. 2023ko urtarrilaren 1etik aurrera sortuko ditu ondorioak, eta 2026ko abenduaren 31n bukatuko da.

Hitzarmena salatuta geldituko da, zuzenean, iraungitzearekin batera.

Hitzarmen honen eduki osoak indarrean jarraituko du, Langileen Estatutuaren 86. artikuluan ezarritakoaren arabera, hura ordezteko beste bat sinatu arte.

4. artikulua. Osotasunari lotzea.

Hitzarmen kolektibo honetako baldintzek multzo oso bat eratzen dute, eta, hortaz, klausulak osorik aplikatuko dira, haietako bakar bat ere bazter utzi gabe. Ezarritako baldintzek konpentsatu eta irentsiko dituzte hitzarmen honek indarra hartzean lehendik zeuden beste baldintza guztiak.

Langileren batek hitzarmen honetan ezarritakoak baino lan-baldintza hobeak izanez gero, errespetatu eginen zaizkio.

Langileen Estatutuaren 41. eta 82.3 artikuluetan zehaztutako kasuan, enpresak enpresa batzordearekin negoziatu beharko du egoera berria eta nola eragiten dion hitzarmenari. Adostasunik ez bada, batzorde paritariora bideratuko da gaia. Afera Nafarroako Lan Auzitegira edo Nafarroako Gobernuko Ekonomia, Ogasun, Industria eta Enplegu Departamentuko Adiskidetze Atalera iritsita akordiorik ez bada, bi alderdiek hitzartzen dute gaia arbitrajearen menpe jarriko dela alderdiak ados badaude.

Bi alderdien arteko akordioa beharko da (enpresaren ordezkaritza eta langileen ordezkaritzaren gehiengoa) hitzarmena ez aplikatzearen gaineko desadostasuna Hitzarmen Kolektiboetarako Aholku Batzorde Nazionalaren edo Nafarroako Foru Komunitatean sortzen ahal den hirualdekoaren menpe jartzeko.

II. KAPITULUA.–LANAREN ANTOLAKETA

5. artikulua. Lanaren antolaketa.

Enpresako zuzendaritzaren eskumenekoak dira lanaren antolaketa, enpresako arloen arteko banaketa eta lan egiteko baldintza orokorrak. Eskumen horiek mugatuta daude bete beharreko legezko arauekin eta langilearen duintasun pertsonalari zor zaion errespetuarekin.

III. KAPITULUA.–LANBIDE SAILKAPENA

6. artikulua. Lanbide sailkapena.

Hitzarmen kolektibo honi lotutako langileak ondoko lanbide taldeetako batean sailkatuko dira, eskakizun profesionalen arabera, prestakuntzaren arabera eta lanaren eduki orokorraren arabera, zehazten diren berariazko edukietan oinarrituta:

–I. taldea: zuzeneko laneskuaren lanpostuak dira, produkziokoak edo biltegikoak izan, eta oro har lan egiteko jarraibide zehatzak dituztenak, erabateko menpekotasun hierarkikoa eta funtzionala edukita. Halaber, talde honetakoak izanen dira II. taldeko lanpostuetarako prestakuntza prozesu batean daudenak. Talde hau honako lanpostu hauek osatuko dute: langileak, zaborretako langileak (zaborretako langileen kasuan, logistikako langileak ordezkatzen badituzte, ordezkatutako kategoriari dagokion plusa aplikatuko zaie), atezainak, administrazioko laguntzaileak, mantentze-lanetako laguntzaileak, laborategiko laguntzaileak, eta abar. Lanpostuetako laguntzaile horiek teknikariei sostengu ematen diete eta jarduketa eremuko oinarrizko eginkizunak betetzen dituzte. I. taldeko langileek (atezainak, langileak eta laguntzaileak) gehienez 9 hilabetez jasoko dute 1. soldata-maila, horretarako kontuan hartuz enpresan emandako aldi guztiak, ABLE bidez emandako denbora ere barne, halakorik bada. Bederatzi hilabeteak igaro ondoren, I. taldeko 2. soldata-maila jasoko dute.

I. taldea. Soldata/ordua formatua desagertu da eta 2 mailatan banatu da.

a) I. mailako kategoria: lehen hilabetetik bederatzigarrenera (17.802,84 euro).

b) II. mailako kategoria: hamargarren hilabetetik aitzin (19.677,36 euro).

–II. taldea: lana behar bezala egiteko, hartan espezializazio eta esperientzia eskatzen dituzten lanpostuak dira, baita nolabaiteko autonomia ere lanean erabakiak hartzeko orduan. Talde honetakoak izanen dira III. taldeko lanpostuetarako prestakuntza prozesu batean daudenak. Honako hauek osatzen dute talde hau: administrariak, mantentze-lanetako langileak, kalitate teknikariak, langile kualifikatuak (agiriak kudeatzen ez dituzten logistika-langileak, orga-gidariak, egosleak, makina errazak erabiltzen dituztenak), garbiketa taldeko "muntaketa-desmuntaketa" lanetako langileak, taldeko buruak, 2. mailako makinistak (horien kokapena langileak produkzio-makina bat eta, gehienez, bi produkzio-makina/-linea kontrolatzearen araberakoa da –prozesuko funtsezko zatia ez diren lan prozesuetarako makinak, ekoizpen prozesuaren osagarriak edo lagungarriak direnak, esate baterako, betetzeko makinak–); 1. mailako makinistak (horien kokapena langileak bi produkzio-makina/-linea kontrolatzearen araberakoa da –produktua egiteko makinak–); agiriak kudeatzen dituzten eta aldez aurreko ebaluaketa egiten duten logistikako langileak (LLOk emandako dokumentuan oinarrituko den enpresaren kargura), araztegia kontrolatzeko arduraduna, eta abar.

2024ko urritik aurrera, taldeko buruek 2. mailako makinistaren soldata-maila bera jasoko dute.

–III. taldea. lanpostu espezializatuak dira, lana behar bezalakoa izan dadin esperientzia eta ibilbide profesionala eskatzen dituztenak. Lanpostu horietan aritzen direnek erantzukizuna dute beren jarduketa eremuaren gainean. Taldea honako hauek osatzen dute: teknikariak (administrazioa, erosketak, giza baliabideak, sistemak, kalitatea, produkzioa edo mantentze-lanak), atalburuak, biltegiko buruak eta abar. Talde honetako kalitate teknikariak eta produkzio teknikariak kalitateko arduraduna eta txandako burua ordez ditzakete, hurrenez hurren, eta errendimendu nabarmena daukate. Administrazioko, erosketetako, giza baliabideetako, sistemetako eta mantentze-lanetako teknikariek, nagusiaren konfiantza osoa izanik, beren mailako lan guztiak behar bezala egiten dituztenean errendimendu nabarmenarekin, maila goragoko soldata plusa izanen dute.

–IV. taldea: espezialitate zehatzeko lanpostuak dira, ardura dutenak departamentu bateko arlo oso baten gainean enpresa osorako, edo lantokiko arlo baten gainean, bere ardurapean langileak dituztela. Honako hauek osatzen dute, besteak beste: administrazioko arduraduna, langileen administraziokoa, giza baliabideetakoa, laneko arriskuen prebentziokoa, sistemetakoa, kalitatekoa, txandako buruak eta abar.

–V. taldea: lanpostu hauek esperientzia handia eskatzen dute, eta lantaldeak eta eginkizun ugari kudeatu eta koordinatu beharra izanik, erantzukizun handia eskatzen dute. Honako hauek osatzen dute, besteak beste: produkzioko arduraduna, mantentze-lanetako arduraduna, plantako burua eta abar.

–VI. taldea: ibilbide egiaztatua eskatzen dute, zuzendu eta kudeatu beharrarekin. Zuzendaritzako lanpostuak dira.

IV. KAPITULUA.–DIRU-SARRERAK, KARGU-UZTEAK ETA LANPOSTU HUTSAK BETETZEA

7. artikulua. Probaldia.

Lan kontratuek probaldia izanen dute, gehienez ere 30 egunekoa I. eta II. taldeetarako eta 90 egunekoa gainerako taldeetarako.

Probaldia noiz arte izanen den idatziz agerraraziko da eta eten eginen da aldi baterako ezintasuneko kasuetan, amatasun bajan, haurdunaldian arriskua dagoenean, umeen adopzioan edo harreran eta egoera horiek dirauten denboran.

Probaldian, langileak bere lanbide taldeari eta lanpostuari dagozkien eskubide eta betebeharrak izanen ditu, plantillakoa balitz bezala eta kontratazio motaren arabera, salbu lan harremana suntsitzearen ondoriozkoak (aldeetako edozeinen eskariz suntsi daiteke lan harremana).

Probaldia bukatutakoan, atzera egin ez bada, kontratuak dagokion modalitateko ondorioak sortuko ditu, eta enpresan lanean aritutako denbora kontatuko da antzinatasunerako.

8. artikulua. Borondatezko uzteak.

Langileek borondatez utzi nahi badute lanpostua, ezinbestean jakinarazi behar diote inguruabar hori enpresari, aurreabisurako epe hauek betez:

–Teknikari tituludunak, hala administrazioan nola produkzioan, mantentze-lanetan eta kalitatean: hilabete bat.

–Gainerako langileak: 15 egun.

Abisua, aipatu bezala, aurrez egin ez bada, enpresak eskubidea izanen du langilearen likidaziotik eguneko soldata adinako deskontua egiteko, aurreabisua atzeratzen den egun bakoitzeko.

Enpresak, iraupen zehatzeko kontratuetan, kontratua bukatu baino astebete lehenago abisatuko du, ahal delarik produkzioaren planifikazioaren arabera, kontratua berritzen duen ala ez.

9. artikulua. Lanpostu hutsak betetzea eta mugigarritasun funtzionala.

Enpresak idatziz argitaratuko ditu informazio tauletan enpresan sortzen diren lanpostu hutsak eta batzordeari jakinaraziko dizkio, lehenengo eta behin, eta gero langile guztiei eskainiko dizkie. Enpresak bidezko jotzen dituen probak eta balorazioak eginen ditu, betiere gaitasunaren, merezimenduen, prestakuntzaren eta trebetasunen irizpideetan oinarrituta.

Bi hautagaik ezaugarri berberak izanez gero, antzinatasun handiagoa duenak izanen du lehentasuna. Enpresaren barnean inork ez baditu betetzen beharrezko baldintzak, enpresatik kanpoko langileak onartuko dira.

Mugigarritasun funtzionala langileen duintasuna kaltetu gabe eta bere lanbide prestakuntza eta sustapena galarazi gabe gauzatuko da. Mugigarritasun funtzionala erabiliz, enpresako zuzendaritzak eslei diezazkieke lanbide talde bateko langileei beren taldearen azpitik dagoen bati dagozkion lanak, baldin eta horiek lan arrunten artean badaude edo bere lanbide taldekoen osagarriak badira; bigarren kasuan, jatorriko taldearen lansariak mantenduko dira, langileak esleiturik daukan lanpostu plusa barne hartuta.

Talde edo kategoria goragoko baten eginkizunak betetzen badira, plus bat jasoko da bi talde edo kategorietako soldaten arteko tartearengatik, horretan aritu den egunen araberakoa. Kategoria goragoko eginkizunak denboran luzatzen badira, Langileen Estatutuan ezarritakoa beteko da. Ondorio horietarako kontuan hartuko dira enpresan lan egindako aldi guztiak, ABLE bidez lan egindakoak barne.

10. artikulua. Likidazioa.

Dagozkien ordainsari guztien likidazioa emanen zaie enpresa uzten duten langileei, guztia zehatz azalduta, argi ikus dezaten kontzeptu bakoitza zeri dagokion eta zein den haren zenbatekoa. Langileen legezko ordezkariei kontsulta egiten ahalko die interesdunak.

V. KAPITULUA.–KONTRATAZIOA

11. artikulua. Kontratazio motak.

Unean uneko indarreko araudian ezarritakoari jarraituko zaio. Horri dagokionez, honako xedapen hauek ezarriko dira:

1. Prestakuntza kontratuak: Langileen Estatutuaren 11. artikuluan xedatutakoa garatzeko, artikulu horretako irizpide zehatzak hitzarmen kolektibora igortzen badira, barazki kontserbak fabrikatzeko estatuko hitzarmen kolektiboan (99001305011981) xedatutakoa beteko da.

2. Ekoizpen gorabeherengatiko kontratua: 15. artikuluan xedatutakoa garatzeko, enpresako zuzendaritzak kontratu mota hori aplikatzen ahalko du, barazki kontserbak fabrikatzeko estatuko hitzarmen kolektiboan (99001305011981), edo, halakorik ezean, artikulu horretan ezarritako iraupen eta baldintzekin.

3. Lanpostua gordetzeko eskubidea duen langile bat ordezteko kontratua: Langileen Estatutuaren 15. artikuluan jasotako araudian xedatutakoari jarraituko zaio.

VI. KAPITULUA.–ORDAINSARIAK

12. artikulua. Soldata.

I. eranskinen ageri dira lanbide kategoria bakoitzerako 2023an ezarritako soldatak.

I. eranskinen ageri dira lanbide kategoria bakoitzerako 2024an aplikatu beharreko soldatak.

13. artikulua. Soldata-osagarriak.

Soldataren osagarriak taldeko oinarrizko soldatari eransten zaizkion zenbatekoak dira, langilearen urteko lanaldiaren kontzeptua eta lanbide talde bati atxikitzearena kenduta. Soldataren osagarriak honako hauek izanen dira:

–Pertsonalak: norberaren baldintza pertsonalen ondoriozkoak. Urteko soldata gordina handiagoa denean oinarrizko soldata, pagen hainbanaketa eta lanpostuko plusa batutakoa baino (I. eranskinaren arabera), zenbateko horiek gainditzen dituena plus pertsonalaren kontzeptuarekin jasoko da.

–Lanpostukoak: lanpostuko plusari dagokion zenbatekoa I. eranskineko soldata tauletan ezarri da, eta, oinarrizko soldatari gehituta, taula horietan adierazitako kategoriaren oinarrizko soldata osatzen dute.

–Guardiako plusa: asteburuan "jaurtiketa" egiteko lanean hasteko moduan egon behar duten laborategiko langileek lan egiten dutenean, 120 euroko plusa kobratuko dute, eta horrek benetan lan egindako 4 ordura arte estaliko du. Hau da, 4. ordutik aurrera egiten dena aparteko orduen modura kobratuko da. Plus horrek asteburuko guardia estaltzen du. Astelehenetik ostiralera bitarteko astean jaiegunik bada, beste 100 euro ordainduko dira egun horiek estaltzeko, asteburuko guardiaz bestelakoa baita. Mantentze-lanen kasuan 120 euroko plusa kobratuko dute guardian egoteagatik aste osoan.

–Gaueko lanaren plusa: 2023an, 2,63 euro ordainduko dira 22:00etatik 06:00etara bitarte egiten den ordu bakoitzeko; 2024an, behin-behinean, 2,71 euro ordainduko dira. Zenbateko hori berdina izanen da gaueko lana egiten duten guztientzat, kontuan izan gabe zein den haien taldea. Gaueko lanaren plus hori, lanaldia produkzio beharrak direla-eta egin behar izanda produkzio prozesuarekin lotura dutenek baino ez dute kobratuko, hala nola produkzioko eta garbiketako langileek (garbiketako talderako, oporretako eta bajetako ordainsarian sartuko da). Baina ez da hala izanen soilik gauez lan egiteko kontratatzen direnen kasuan, hala nola etxezainak edo sarbidearen kontrolatzaileak.

–Aparteko pagen zati proportzionala: aparteko pagen hainbanaketari dagokio. Hilero jasotzen dira, eta horien zenbatekoa I. eranskineko soldata tauletan ezarri da.

14. artikulua. Soldata igoera.

2023rako soldata igoera bat ezarri da, honako hau:

–2023. urtea: 2023ko KPIa (%3,10) + %0,20 = %3,30.

Hitzarmenaren indarraldiko gainerako urteetarako (2024, 2025 eta 2026), gutxienez %3 bermatuko da urte bakoitzerako, 2022ko behin betiko taulei aplikatuta eta oinarrizko soldataren, aparteko ordainsarien hainbanaketaren, lanpostuko plusaren, asteburuko plusaren eta gaueko lanaren plusaren gainean, honela:

–2024. urtea: 2024ko KPIaren berrikuspena + %0,75.

–2025. urtea: 2025eko KPIaren berrikuspena + %1.

–2026. urtea: 2026ko KPIaren berrikuspena + %1.

Hitzartutako soldata igoerak atzerakinak ordaindu beharra ekarriko du, tauletako urteko soldaten gainean ezarritako ehunekoarekin, 2023ko eta 2024ko urtarrilaren 1era arteko atzeraeraginarekin. 2024, 2025 eta 2026an, hitz emandako guztizko igoeraren zifra (KPI + %X) hasierako %3ko igoera baino handiagoa bada, atzerakinak ordaindu beharra ekarriko du, %3aren gaineko ehuneko aldearekin, urteko soldaten gainean, eta urte bakoitzeko urtarrilaren 1era arteko atzeraeraginarekin.

Igoera hori ez zaio plus pertsonalari aplikatuko. Izan ere, horrek ez ditu konpentsatuko edo xurgatuko beste kontzeptuen igoerak.

Atzerakinak bost kuota berdinetan ordainduko dira, hilabete bakoitzeko 15. egunean, hitzarmena sinatzen denetik zenbatzen hasita. Lehenbiziko kuota hitzarmena sinatzen den hurrengo hilabetean ordainduko da.

Edozein kasutan, I. taldeko lehen kategorian (9 hilabete arteko langileak) lansaria izanen da, gutxienez, barazki kontserbak fabrikatzeko estatuko hitzarmen kolektiboan (99001305011981) laguntzaileak daukana adinakoa.

V. eta VI. taldeetako zuzendaritza lanpostuetako langileek, hitzarmen honetan ezarritakoak baino lansari handiagoak dituztenek, ez dute lansari igoera hau izanen.

15. artikulua. Aparteko orduak.

Aparteko ordutzat hartuko dira lan egutegian hitzartutako lanalditik kanpo edo lanaldiaz gain egiten direnak. Hitzarmena indarrean egonen den urte guztietan, aparteko orduen zenbatekoa honela kalkulatuko da: 1,25 koefizientea aplikatuko zaio ordu arruntaren balioari, hitzarmenaren soldata taulan langilearen lanbide taldearentzat ezarritako urteko soldata gordinaren arabera kalkulatuta, eta hitzarmena indarrean egonen den urte bakoitzerako itundutako urteko lanaldiarekin zatituko da.

Nazioko eta/edo Foru Komunitateko jaiegunetan eta igandeetan egindako aparteko orduak aurreko kalkuluaren arabera ordainduko dira, baina 1,50 koefizientea aplikatuta.

Erabaki da aparteko orduaren saria ez dela inola ere izanen ordu arruntaren lansaria baino txikiagoa, langile bakoitzaren banakako lansariaren gainean kalkulatuta.

Aparteko ordu gisa zenbatu eta likidatu beharreko denbora langilearen lanaldi arrunta bukatu eta 15 minutu igarota lan egindakoa izanen da, betiere aparteko orduak egitea langilearen nagusi hierarkikoak baimendu badu.

16. artikulua. Soldataren ordainketa.

Soldatak banku transferentzia bidez ordainduko dira, ordaindu beharreko hila bukatu eta hurrengo hilaren lehen bost egun baliodunen barnean. Soldata 12 alditan kobratuko da. Hortaz, hilero ordainduko da aparteko pagen zati proportzionala.

Nominak kalkulatzeko epea izanen da, bai orduka kobratzen dutenen orduen kasuan bai langile guztiek egiten dituzten aparteko orduen kasuan, aurreko hileko 26tik nomina ordainduko den hileko 25era bitartekoa.

Hitzarmen honetan araututako soldatek, barazki kontserbak fabrikatzeko estatuko hitzarmen kolektiboan (99001305011981) ezarritakoak baino handiagoak direnez, konpentsatu eta xurgatzen dute enpresan emandako denborari dagokion zati proportzionalaren soldata, barazki kontserbak fabrikatzeko estatuko hitzarmen kolektibo horretan zehaztua (99001305011981), eta etorkizunean barazki kontserbak fabrikatzeko estatuko hitzarmen kolektibo horretan (99001305011981) sor litekeen beste edozein plus xurgatu eta konpentsatutzat hartuko da hitzarmen honek arautzen duen ordainsari sistemaren barnean.

VII. KAPITULUA.–LANALDIA, ATSEDENALDIAK ETA OPORRAK

17. artikulua. Lanaldia.

Akordioa: Langileen Estatutuaren 34.1 artikuluan ezarritakoarekin bat, urteko lanaldia ezartzen da, eta honako benetan lan egindako ordu hauek ezartzen dira hitzarmen kolektiboaren indarraldiko urte bakoitzerako:

–2023. urtea: 1.768 ordu.

–2024. urtea: 1.760 ordu, gehienez 220 lanalditan banatuta.

–2025. urtea: 1.752 ordu, gehienez 219 lanalditan banatuta.

–2026. urtea: 1.744 ordu, gehienez 218 lanalditan banatuta.

Lanaldia astelehenetik ostiralera izanen da normalean, eta benetako lana 8 ordukoa izanen da. Ohiko lanalditzat hartuko da astelehenetik larunbatera (goizeko txandan) egindakoa, hurrengo atalean araututako ordu poltsa aplikatzearen ondorioz.

Lanaldien arteko atsedena hamabi ordukoa izanen da gutxienez.

–Lanaldiaren banaketa irregularra.

Langileen Estatutuaren 34. artikuluko 2. apartatuan ezarritako ondorioetarako, enpresak benetan lan egindako 100 ordu izanen ditu, langile eta urte bakoitzeko, modu irregularrean banatzeko, bai eguneko lanaldia ordubetez luzatzearen bidez, bai larunbatean goizeko txanda osoan lan egitearen bidez.

Enpresako zuzendaritzak ordu horiek jarduera handieneko hilabeteetan erabiltzen ahalko ditu; egungo ekoizpen egoeraren arabera, maiatzetik abuztura bitarteko hilabeteak dira, biak barne.

Lanaldiaren banaketa irregularra aplikatzearen ondorioz benetan lan egindako orduak idatzi eta erregistratuko dira, eta jarduera txikieneko aldietan iraupen bereko atsedenekin konpentsatuko dira, langileak aldez aurretik eskatuta, eta betiere lanpostu bera betetzen duten bi langilek aldi berean eskatzen ez badute. Larunbateko goizeko txandan lan egindako orduak benetan lan egindako ordu bakoitzeko 1,5 ordurekin konpentsatuko dira.

Garbiketa taldeko eta normalean gaueko txandan lan egiten duten langileei dagokienez, banaketa irregularrerako ezarritako orduak larunbatean ere egiten ahalko dira, arratsaldeko edo gaueko txandan.

Enpresak ahalik eta aurrerapen handienarekin jakinaraziko die eraginpeko langileei eguneko lanaldia ordubetez luzatuko zaiela eta/edo larunbateko goizeko txandan lan egin behar dutela, lanaldiaren banaketa irregularra aplikatuz. Horretarako, larunbatetarako txandakako proposamen bat egiten jarraitzea erabaki da.

Lanaldiaren banaketa irregularretik kanpo geratzen dira seme-alaba adingabea zaintzeagatik lanaldia murriztuta duten langileak, borondatez atxiki ezean.

–Kasu bereziak.

Araudi honetatik kanpo geratzen dira asteburuetako atezaintzako lanak eta garbiketa eta mantentze-lanak; izan ere, ekoizpen premiak direla eta, baliteke fabrika geldi dagoenean lan egin behar izatea. Hori gertatzen denean, borondatezkoa izanen da zerbitzuak jaiegunetan ematea. Laborategiko lanak ere salbuetsita egonen dira egun horietan analisiak egitea beharrezkoa denean.

Beste langile batzuen lana abiarazi edo ixteko eginkizuna duten langileek beren lanaldia luzatuko dute horretarako behar-beharrezkoa den denboran bakarrik, lanaldi berezietarako arauetan dauden mugak errespetatuz.

Berrikuspen klausula, produktuen ekoizpenean eta/edo eskarian izandako aldaketengatik.

Egiten ditugun produktuetan edo eskarian aldaketak gertatu direlako ekoizpen- eta entrega-karga eta -denborak aldatu behar badira, bi alderdiek konpromisoa hartzen dute lanaldiaren banaketari buruzko araudi berria negoziatzeko, ekoizpenaren behar berrietara egokitzeko.

18. artikulua. Lan-egutegia eta oporrak.

Hitzarmenaren indarraldiko urte bakoitzean urteko lanaldia murrizteak opor gehiago izatea ekarriko du; hala, 2024an, langileek opor egun bat gehiago izanen dute. 2025ean, urteko lanaldia murriztearen ondoriozko orduak enpresak erabiltzen ahalko ditu, eta 2026an, berriz, urteko lanaldia murriztearen ondoriozko orduak langileek erabiltzen ahalko dituzte. Aurrekoarekin bat etorriz, erabaki da 2024an 25 lanegun izanen direla opor (15 langileak erabakiak eta 10 enpresarekin adostuta), 26 lanegun 2025ean (15 langileak erabakiak eta 11 enpresarekin adostuta) eta 27 lanegun 2026an (16 langileak erabakiak eta 11 enpresarekin adostuta), hasierako plataforman proposatutako idazketarekin. Enpresak ezarritako egiturari eutsiko zaio beti, bai aste bakoitzean oporrak hartzen dituztenen kopuruari dagokionez, bai lanpostuak bat egiteari dagokionez, produzitzeko ahalmenari kalterik ez egiteko.

Enpresak, enpresa batzordeari galdetu ondoren, urteko azkeneko hiruhilekoan, hurrengo urteko lan egutegia argitaratuko du iragarki oholean.

Enpresak oporren koadrante bat eginen du enpresak jardun txikiena duen garairako. Langileen eskura utziko du, kasua bada, horiek haien artean trukaketak egin ditzaten, baina, betiere, enpresak ezarritako egiturari eutsiz, aste bakoitzean oporrak hartzen dituztenen kopuruari dagokionez eta lanpostuak bat egiteari dagokionez, produzitzeko ahalmenari kalterik ez egiteko. Jardun handieneko aldietan ere 10 lanegun baino gehiago eskatzen ahalko dira, jarraian hartzeko. Baina enpresa beharturik dago soilik ondoz ondoko 10 lanegun ematera.

Oporrak esleitzearekin desadostasunak sortzen direnean edo inplikatutako pertsonak bat ez datozenean, enpresaren eta enpresa batzordearen artean ebatziko da.

Lan egutegia prestatzearen ondorioz ezarritako urteko lanaldiaren gainetik sortzen den ordu soberakina enpresaren eta langilearen artean banatuko da, eta horietako bakoitzak %50 hautatuko du, egun osoetan nahiz orduka. Urtez urte, lan egutegia prestatzen denean, enpresak eta enpresa batzordeak puntu hori jorratuko dute, aztertzeko zenbat ordu soberakin dagoen eta horiek nola esleitu.

19. artikulua. Atsedena, asteko atsedena eta ordutegiak.

Txanda jarraitua 6 ordutik gorakoa denean, 25 minutu jarraituko atsedenaldia egonen da, benetan lan egindako denboratzat hartuko dena.

Oro har, asteko atsedena egun eta erdikoa izanen da, etenik gabe.

Lantoki bakoitzean beti agerian egonen den kartel baten bidez azalduko dira egutegia eta lan ordutegia.

VIII. KAPITULUA.–LIZENTZIAK ETA ESZEDENTZIAK

20. artikulua. Lizentzia ordainduak.

Langile orok, aurretik abisatu eta justifikatuta, zilegi du lanera ez joatea, lansaria jasotzeko eskubidearekin, arrazoi hauetako bat dela medio eta honenbeste denborarako:

1. Hamabost egun natural, ezkontzeagatik edo izatezko bikotea osatzeagatik.

2. Hiru egun, seme edo alabaren jaiotzagatik, eta horietako bi lanegunak izanen dira. Baimena hartu ondoren, langileak astebete har dezake, bere urteko oporretakoa, hala nahi baldin badu.

3. Zazpi egun natural, langilearen ahaide hurbiletako baten heriotzagatik (ez ezkontidearenak): gurasoak, anai-arrebak, seme-alabak edo ezkontidea (izatezko bikotekideak barne). Gainerako ahaideen heriotzaren kasuan, betiere odol edo ezkontza bidezko 2. mailara artekoak badira, langilearenak edo ezkontidearenak izan: bi egun natural. Odol edo ezkontza bidezko 2. mailara arteko ahaideen istripua, eritasun larria, ospitalizazioa edo ospitalizaziorik gabe etxean atseden hartzea eskatzen duen ebakuntza kirurgikoa: bost lanegun. Izatezko bikotekideak barne hartuta, behar bezala frogaturik dagoenean. Ospitalizazioaren kasuan, 2 egun gehiago hartuko dira ospitaleratzeak irauten duen hilabete bakoitzeko. Etxeko ospitalizazioa ospitaleko ospitalizazioaren parekotzat hartuko da.

Horrelakoetan beste norabait joan behar izanez gero, beste egun bat erantsiko da lantokitik pazientea edo hildakoa dagoen tokiraino dauden 100 kilometroko, 5 egun natural egin arte. Gertaera eragilearen egunean bertan hasiko dira egunak kontatzen, langileak egun horretan lanik egin ez badu, edo biharamunean, benetan lan egin badu. Ospitalizazioaren kasuan, langileak baimenaren egunak har ditzake gertaera eragileak irauten duen bitartean. Ez dira jarraian izan behar.

4. Langileak sendagilearengana joan behar badu eritasunagatik, lanaldiaren barnean, enpresak hogeita hamar ordu ordainduko ditu gehienez urteko. Familia-medikuaren kontsultara joateko, egunean lau ordu erabiliko dira gehienez, eta Gizarte Segurantzako mediku espezialistaren kontsultara joateko behar den denbora erabiltzen ahalko da. Gizarte Segurantzako mediku espezialistengana joateko denbora ez da kontuan hartuko urteko 30 orduko gehieneko kopuru horretan. Langilearen kargura dauden seme-alabekin, ezkontidearekin edo gurasoekin kontsulta medikora joateko ere erabil daitezke ordu horiek. Baimen hori erabiltzeko, langilearen lanaldiak enpresaren instalazioetan hasi edo bukatu behar du. Guraso, ezkontide eta seme-alabei egindako kirurgia handi anbulatorioa, ospitalizazioa (hau da, ospitalean 24 ordu baino gutxiago egotea) edo etxeko atsedena behar ez duena: kirurgia egiten den eguneko lanaldia. Halako kasuan, enpresan ahaide bat baino gehiago baldin badaude, horietako batek bakarrik izanen du lizentzia hartzeko aukera.

Gaueko txandari atxikitako langileek lanaldiaren bukaera 4 ordu aurreratzen ahalko dute, hitzarmen honetan ezarritakoaz baliatuz, familiako medikuarengana eguerdiko 12ak baino lehen joan behar badute, eta 4 ordu espezialistarengana joan behar dutenean, dela norberarentzat dela laguntzaile gisa. Betiere, salbuespenak salbu, astebete lehenago eman beharko da horren berri.

5. Etxebizitzaz aldatzeagatik: egun bat. Etxebizitza berrian erroldatuta dagoela egiaztatzen duen agiria edo alokairu kontratua aurkeztu beharko da.

6. Behar adina ordu langileak azken azterketara joan daitezen, ikasketa ofizialak egiten dituztenean. Halakoetan, eskaera frogatzen duen egiaztagiri administratiboa aurkeztu behar dute. Arrazoi horregatik, langile bakoitzak urtean gehienez ere bost egun izanen ditu. Baimen horretarako eskubiderik ez da izanen azterketa Productos Naturales de la Vega SL ez den enpresa batean edo administrazioan hasteko denean.

7. Beharrezkoa den denbora, erditu aurreko azterketa medikoak egiteko eta erditzea prestatzeko tekniketan trebatzeko, lanorduetatik kanpo ezin badira egin.

8. Egun bat langilearen aita, ama, anai-arrebak edo seme-alabak edo langilearen ahaide zuzenak ezkontzeagatik. Ezkontzaren egunean har daiteke, lanegunean bada, edo aurre-aurreko lanegunean edo ondo-ondokoan.

9. Bularra emateko baimena Langileen Estatutuaren 37.4. artikuluan xedatuari jarraituz arautuko da. Bularra emateko baimena metatzen ahalko da, langileak hala eskatzen badu, eta aldi bakar batean hartu amatasun bajaren ondotik, edo proportzioan dagokiona, lanaldi murriztuarekin egonez gero. Kalkulua egiteko, aldi horretako lanegun guztiak kontuan hartuko dira.

10. Baimen berriak ELD/2023:

21. artikulua. Soldatarik gabeko lizentziak.

Oro har, enpresa batean gutxienez ere bi urte egin dituztenek soldatarik gabeko lizentzia eskatzen ahalko dute, gutxienez hamabost egunerako eta gehienez hirurogeirako, eta hurrengo hilabetearen barrenean emanen zaie, zerbitzu beharrek uzten badute eta eskaeraren arrazoiak egokiro justifikatzen badituzte.

Jardun handieneko garaiak kanpo utz ditzake enpresak. Lizentzia adingabeak edo senideak zaintzeko behar bada, ondoz ondoko urteetan eskatzen ahalko da. Langileak ezin du lizentziarik eskatu beste enpresa batean lan egiteko. Enpresak Gizarte Segurantzan emanen du ukitutako langilearen baja.

22. artikulua. Eszedentziak.

Eszedentziak borondatezkoak, nahitaezkoak edo bereziak izan daitezke, eta eskatu ahal izateko, langileek urtebeteko antzinatasuna izan beharko dute enpresan:

1. Borondatezkoa: Aipatutako enpresetan gutxienez urtebeteko antzinatasuna duten langileek eskatzen ahalko dute borondatezko eszedentzia. Eszedentzia lortzeko, baldintza hauek bete beharko dira ezinbestean:

a) Idatzizko eskabidea aurkeztea, arrazoiak azalduta.

b) Konpromiso formala adieraztea, eszedentzia bitartean, eszedentzia eman dion enpresaren jarduera berean ez aritzeko, hau da, prestatutako platerak, saltsak, entsaladak, ogian zabaltzekoak, sandwich barrubeteak eta abar egiteko sektorean, ez bere kontura, ez beste inoren kontura. Baldintza hori bete ezean, lan harremana eteten ahalko da, eta eskuratutako eskubidea galduko du.

Eszedentzia eskaerak aurkeztu eta hurrengo hamabost egunean ebatziko dira.

Eszedentzia gutxienez lau hilabetekoa eta gehienez bost urtekoa izanen da. Eszedentzian dagoen langileak enpresan hutsik dauden eta bere lanbide talde berekoak diren lanpostuetan sartu ahal izateko lehentasuna du. Horretarako, eszedentzia bukatu aurreko hogeita hamar egun naturaletik hirurogeira bitarteko epean itzultzea eskatu beharko du. Bestela, lan harremanari uko egiten diola ulertuko da.

2. Seme-alabak eta ahaideak zaintzeari dagokionez, Langileen Estatutuaren 46.3 artikuluan xedatuari jarraituko zaio.

23. artikulua. Antzinatasuna lizentzietan eta eszedentzietan.

Antzinatasuna kalkulatzeko orduan, ez da kenduko kapitulu honetan arautzen diren lizentzietan eta eszedentzietan emandako denbora, salbu eta borondatezko eszedentzian emandakoa, ez baita konputatuko ondorio horietarako.

IX. KAPITULUA.–LANEKO ARRISKUEN PREBENTZIOA ETA ELIKAGAIEN SEGURTASUNA

24. artikulua. Laneko arriskuen prebentzioa eta lan osasuna.

Enpresako zuzendaritzak konpromiso sendoa hartzen du, laneko arriskuen prebentzioari buruzko araudia betetze hutsez haratago joanda, baliabide guztiak erabiltzeko, ekonomikoak zein giza baliabideak izan, langileen segurtasuna eta osasuna zaintzeko, enpresan lanean ari diren bitartean.

Langileak, bere aldetik, segurtasunaren eta osasunaren arloan babes eraginkorra jasotzeko eskubideaz gain, laneko arriskuen prebentzioari buruzko araudia konplitzeko betebeharra dauka.

Segurtasun eta osasun batzordearen barnean, beharrezko prozedurak ezarriko dira langile guztien segurtasuna zaintzeko.

A.–Prebentzioko ordezkarien eskumenak eta ahalmenak:

1. Prebentzioko ordezkarien eskumenak Lan Arriskuen Prebentzioari buruzko 31/1995 Legearen 36.1 artikuluan jasotakoak dira.

2. Eskumen horien esparruan, prebentzioko ordezkariek honako eginkizun hauek betetzeko ahalmena izanen dute:

a) Teknikariei laneko ingurumenaren prebentzio ebaluazioak egiten laguntzea, bai eta, lege horren 40. artikuluan xedatutako moduan, Laneko eta Gizarte Segurantzako ikuskatzaileei ere, lantokiei egindako bisitetan eta egiaztapenetan, laneko arriskuen prebentzioari buruzko araudia betetzen dela egiaztatzeko, egokitzat jotzen dituzten oharrak eginez.

b) Beren eginkizunak betetzeko behar dituzten lan-baldintzei buruzko informazioa eta dokumentazioa eskuratu ahal izatea, lege horren 22. artikuluko 4. apartatuan ezarritako mugekin, eta, bereziki, lege horren 18. eta 23. artikuluetan xedatutako informazioa eta dokumentazioa eskuratu ahal izatea. Informazioak aipatutako mugak dituenean, konfidentzialtasuna errespetatzen dela bermatzeko moduan bakarrik ematen ahalko da.

Aipatutako dokumentazioa honako hau da (aldatuz gero, eguneratu egin beharko da):

a. Laneko arriskuen prebentziorako plana.

b. Lanpostu bakoitzaren arriskuen ebaluazioa.

c. Prebentzio jardueraren plangintza, hartu beharreko babes eta prebentzio neurriak barne.

d. Plantillaren osasun kontrolen jardutea eta ateratako ondorioak.

e. Egun bateko baino gehiagoko aldi baterako ezintasuna eragin duten lan istripuen eta lanbide gaixotasunen zerrenda.

f. Prebentzio jardueraren ituntzea (prebentzio zerbitzua).

g. Prebentzio zerbitzuaren egiaztapena, auditoria eta urteko memoria.

h. Larrialdi eta ebakuazio plana.

i. Erabilitako produktu kimikoen fitxa teknikoa.

j. Erabiltzen diren laneko eta babeserako ekipamenduen jarraibideen eskuliburua eta informazio agiriak.

k. Segurtasunari eta osasunari buruzko beste edozein agiri, isilpean gorde beharreko datuak alde batera utzita, hala eskatzen badute.

c) Enpresaburuak langileen osasunean eragindako kalteei buruzko informazioa ematea, kalte horien berri izan ondoren. Egitateen lekura joaten ahalko dira, baita lanalditik kanpo ere, egoeraren berri izateko.

d) Enpresaburuak enpresan babes eta prebentzio jarduerez arduratzen diren pertsona edo organoek eta langileen segurtasun eta osasunerako erakunde eskudunek jakinarazitako informazioa ematea, hargatik eragotzi gabe lege horren 40. artikuluan Laneko eta Gizarte Segurantzako Ikuskatzailetzarekin lankidetzan aritzeari buruz xedatutakoa.

e) Lantokietara bisitak egitea, lan-baldintzen egoera zaintzeko eta kontrolatzeko. Lantokietako ezein eremutan sartzen ahalko da, eta lanaldian zehar langileekin hitz egiten ahalko da, betiere produkzio prozesuaren garapen normala eragotzi gabe.

f) Enpresaburuari prebentzio neurriak eta langileen segurtasunaren eta osasunaren babes-mailak hobetzeko neurriak har ditzan eskatzea. Enpresaburuari proposamenak egiten ahalko zaizkio, baita Segurtasun eta Osasun Batzordeari ere, bertan eztabaidatzeko.

g) Langileen ordezkaritza organoari proposatzea 21. artikuluaren 3. apartatuan aipatzen diren jarduerak geldiarazteko erabakia hartzeko.

3. Artikulu honen 1. apartatuko c) letraren arabera egin behar dituzten txostenak 15 eguneko epean egin beharko dira, edo behar-beharrezko denboran, berehalako arriskuak prebenitzeko neurriak hartu behar badira. Epe hori igaro eta txostenik egin ez bada, enpresaburuak hartutako erabakia praktikan jartzen ahalko du.

4. Artikulu honetako 2. apartatuko f) letraren arabera ordezkariak proposatutako neurriak hartzeari enpresaburuak ezezkoa ematen badio, erabaki hori arrazoitu beharko du.

B.–Prebentzioko ordezkarien bermeak:

Langileen Estatutuaren 68. artikuluan bermeen arloan aurreikusitakoa aplikatuko zaie prebentzioko ordezkariei langileen ordezkariak diren aldetik.

Prebentzioko ordezkariek hitzarmen honetan aurreikusitako eginkizunetan ematen dituzten orduak ordezkaritza eginkizunetan emandako ordutzat joko dira, Langileen Estatutuko artikulu horren e) letran aurreikusi diren hileko ordu ordainduen kredituaren erabilerari dagokionez.

Nolanahi ere, ordu horiek benetako lan denboratzat joko dira, hau da, ez dira egotziko aipatutako ordu kreditura, Segurtasun eta Osasun Batzordearen bileretan eta arriskuen prebentzio alorrean enpresak deitutako beste edozeinetan emandakoak badira.

C.–Prebentzioko ordezkarien prestakuntza:

Lan Arriskuen Prebentzioari buruzko 31/1995 Legearen 37.2 artikuluan ezartzen da enpresaburuak emanen dizkiela prebentzioko ordezkariei haien eginkizunetarako premiazkoak diren prebentzio alorreko baliabideak eta prestakuntza. Enpresak prestakuntza bere baliabidez emanen du, edota alor horretan espezializatuta dauden erakunde edo entitateekin egiten dituzten akordioen bidez. Prestakuntza hori arriskuen bilakaerara egokituko da uneoro, eta sor daitezkeen arrisku berrietara, eta, beharko balitz, aldizka-aldizka errepikatuko da.

Artikulu horretan ezartzen da, halaber, "prestakuntzan emandako denbora lan denboratzat hartuko dela ondorio guztietarako eta haren kostua ez zaiela inola ere prebentzioko ordezkariei ordainaraziko."

Prebentzioko ordezkariei aplikatuko zaie Langileen Estatutuko 65. artikuluko 2. apartatuan xedatutakoa, enpresan betetzen duten jardueraren ondorioz jasotzen duten informazioa isilean gordetzeari dagokionez.

25. artikulua. Osasun azterketak.

Enpresako langileek osasun azterketa bat izanen dute urtero, lanpostu bakoitzaren berezitasunetara egokitua.

26. artikulua. Laneko jantziak.

Enpresak laneko arropa emanen die langileei, beharren arabera.

27. artikulua. Elikagaien segurtasuna.

Enpresako zuzendaritzaren ustez elikagaien segurtasuna da balio nagusia. Hartara, beharrezko arauak ezarriko dira, langile guztiek nahitaez bete beharrekoak, horren alde egiteko.

Jangaiak prestatzeko eta erabiltzeko lanetan zuzenean esku hartzen duten langileek zorrotz beteko dituzte higiene eta osasun neurri guztiak. Enpresak langile guztiei emanen die elikagaiak manipulatzeko ikastaro bat.

X. KAPITULUA.–LEKUALDATZEAK ETA JOAN-ETORRIAK

28. artikulua. Lekualdatzeak eta joan-etorriak.

Lekualdatzeak eta joan-etorriak Langileen Estatutuaren 40. artikuluan xedatutakoari jarraikiz eginen dira.

Enpresak laneko araudian ezarritako legezko prozedura bete beharko du beste enpresa edo lantoki batzuetara lekualdatzeak eta/edo joan-etorriak modu kolektiboan egiteko; lekualdatze indibiduala eginez gero, langilearekin adostu beharko du.

XI. KAPITULUA.–HUTSEGITEAK ETA ZEHAPENAK

29. artikulua. Diziplina-araubidea.

Enpresako zuzendaritzak langileak zehatzen ahal ditu, indarreko araudian xedatuarekin bat, eta, batik bat, hitzarmen honetan xedatuarekin bat. Hutsegitetzat hartuko dira indarreko araudian eta hitzarmen honetan ezarritako edozein betebehar urratzea edo ez ezagutzea dakarten langileen ekintzak edo ez-egiteak.

30. artikulua. Hutsegite arinen sailkapena.

1. Zabarkeria, akats edo atzerapen adierazezina edozein lan egitean.

2. Hilabeteko epean lanera behin, bitan edo hirutan berandu iristea, bidezko arrazoirik gabe.

3. Aldi baterako ezintasuneko baja edo lanera ez agertzearen bidezko arrazoiak ez jakinaraztea bi egun balioduneko epean, hori egiterik ez dela izan frogatu ezean.

4. Lanpostutik denbora gutxirako alde egitea, bidezko arrazoirik gabe. Ulertuko da 5 minutura arte dela. Denbora laburra izanda ere, enpresari kalte nabarmena egiten badio, larritzat hartuko da.

5. Bizilekuz aldatu izanaren berri ez ematea, aldaketa egin eta hamar eguneko epearen barnean.

6. Egun batean lanera ez joatea beharrezko baimena edo justifikazioa izan gabe. Horretaz gain, abisua ematen ez bada lanaldia hasi baino lehenago, larritzat hartuko da.

7. Noizean behin mozkortuta agertzea.

8. Lanarekin zerikusirik ez duen edozein motatako inprimaki edo argitalpen irakurtzea lanorduetan.

9. Norberaren garbitasun eta txukuntasunik eza.

31. artikulua. Hutsegite larrien sailkapena.

1. Hilabeteko epean lanera lau aldiz berandu iristea, bidezko arrazoirik gabe.

2. Hilabeteko epean lanera bi egunez ez agertzea, arrazoirik gabe.

3. Absentzia kasuan aldez aurretik ez abisatzea, salbu ezinezkoa izan bada.

4. Lanaldian jolasean edo denbora pasa ibiltzea.

5. Beste langile bat lanean agertu dela simulatzea, haren fitxatzeko txartela erabiliz.

6. Laneko edozein gaitan goragokoen esanak ez betetzea. Ez-betetze hori errepikatua bada, diziplina galera nabarmenik eragiten bada edo jokabide horrek enpresari kalte nabaria sortzen badio, hutsegite oso larritzat jotzen ahal da.

7. Lanaldian norberaren lanak egitea, baita enpresaren lanabesak norberarentzat erabiltzea ere, lanalditik kanpo izan arren, horretarako baimenik izan gabe.

Berdin hartuko dira baliabide informatikoak, posta elektronikoa eta Interneteko nabigazioa erabiltzea. Baliabide horiek enpresarenak dira, eta lanerako soil-soilik eskaintzen zaizkie langileei. Zeharo debekaturik dago fitxategiak deskargatu, biltegiratu edo gordetzea enpresaren informazioa biltegiratzeko sistemetan, finkoa zein mugigarria izan. Halaber, debeku da enpresaren informazioa ateratzea norberaren erabilera pribatuko biltegiratze dispositibo batera.

Baliabide informatikoak, posta elektronikoa eta Interneteko sarbidea eta nabigazioa erabiltzea lanari lotuta daude, eta zeharo debekaturik dago edozein hardware nahiz software gailu erabiltzea enpresak emandako baliabide informatikoen gainean.

Zaintza eta kontroleko beharrezko prozeduren bidez, enpresak egiaztatzen ahalko du baliabide horiek behar bezala erabiltzen direla eta langileek betetzen dituztela beren laneko betebeharrak eta zereginak. Enpresako baliabideen erabilera pertsonalak kalterik sortzen badio enpresari hutsegite oso larritzat hartuko da.

8. Segurtasun eta osasun arloko zein elikagaien segurtasuneko neurriak ez betetzea. Enpresak emandako NBEak eramateko betebeharra behin eta berriro konplitzen ez bada, edo ez-betetze horrek arrisku larria ekartzen badio norberaren, lankideen edo enpresatik kanpokoen osotasun fisikoari, edo arriskugarria bada elikagaien segurtasunerako, hutsegite oso larritzat hartuko da.

9. Langileak ikusitako egintzak edo hutsegiteak ezkutatzea, horrek kalte larriak sortzen baditu, eta instalazioetan ikusten den edozein arazo garrantzitsuren berri nagusiei berehala ez ematea.

10. Akatsak eta hanka-sartzeak asmo txarrez ezkutatzea eta, horren ondorioz, enpresari kalte egitea.

11. Lanaldian eta lantokian mozkortuta ibiltzea edo drogak hartzea.

12. Bi hutsegite arin edo gehiago egitea, desberdinak izan arren, aurretik hitzezko kargu-hartzea ez den zehapen bat jarri bazaio, sei hilabeteko epean lehendabizikoa egiten denetik.

32. artikulua. Hutsegite oso larrien sailkapena.

1. Iruzurra, leialtasun eza edo konfiantza-abusua agindutako eginkizunetan, eta lapurreta edo ebasketa, balio ekonomikoa edozein dela ere, enpresari, lankideei edo beste edozeini lantoki barnean edo beste edozein lekutan lanean ari dela.

2. Enpresaren material, lanabes, tresna, makina, aparatu, instalazio, eraikin, altzari eta dokumentuak desagerrarazi, hondatu, suntsitu edo haustea.

3. Enpresaren edo langileen eskutitzen edo isilpeko agirien sekretua haustea.

4. Enpresakoa ez den norbaiti ezagutaraztea nahitaez isilean eduki beharreko datuak.

5. Nagusiei edo lankideei kolpez edo hitzez eraso egitea.

6. Eritasuna edo istripua simulatzea. Eta aldi baterako ezintasunean onera egitea galarazten duten jarduerak egitea.

7. Lankideekin liskarrak eta iskanbilak maiz sortzea, arrazoirik gabe.

8. Enpresako instalazioetan erretzea, irekiak edo itxiak izan. Elikagaien segurtasun handieneko tokietan erretzen bada, segituan ekarriko du erretzailea kaleratzea.

9. Ohiko edota itundutako errendimendua luzaroan eta nahita gutxitzea.

10. Sexu-jazarpena. Halakotzat hartuko da lan ingurunean langile bati hitzez edo egitez iraintzea. Halakorik egiten bada hierarkiako postuaz baliatuz, faktore astungarria izanen da. Jazarpena jasan duen langileak aukera izanen du lanpostu berean jarraitzeko, antzeko beste postu batera aldatzeko edo eszedentzia eskatzeko, salatutako gertaeragatik enpresak zehapen irmoa eman arte, edo, halakorik bada, ebazpen judizial irmoa eman arte. Espedientea bukatuta, ebazten bada ez dela jazarpenik izan, edo frogatzen bada gezurrezkoa izan dela salaketa, hutsegite oso larria izanen da salaketa egin zuenarentzat.

11. Jazarpen morala edo psikologikoa; honako hauek hartuko dira halakotzat:

a) Langileari buruz salaketa edo iradokizun gaiztoak egitea, hari adierazten utzi gabe.

b) Langilea lankideengandik bereiztea, informazioaz gabetzea, bere komunikazio bideak etetea edo blokeatzea, bere lana aintzat ez hartzea edo baliogabetzea, bere errendimendua gutxiestea, bere eginkizunak oztopatzea, edo bere osasun fisikoa zein psikikoa arriskuan jartzea, etengabeko presio estres eragilearen bidez, zeinak bultzatzen dituen asaldura depresiboak, psikosomatikoak eta beste ondorio batzuk, lanpostuari bat-batean uko egitea barne. Halakorik egiten bada hierarkiako postuaz baliatuz, faktore astungarria izanen da. Halako kasuetan langileak 10. puntuan ezarri bezala jokatzen ahalko du.

12. Hutsegite larriak behin baino gehiagotan egitea; hots, gertaerako aurreko urtean langileari bitan edo gehiagotan zehapenak jarri zaizkionean hutsegite larriengatik, nahiz eta izaera diferentetakoak izan.

33. artikulua. Zehapenen araubidea.

Enpresako zuzendaritzak du zehapenak jartzeko ahalmena, hitzarmen honetan ezarritakoari jarraikiz.

Gehieneko zehapen hauek ezartzen ahalko dira, zein den kasua, egindako falten larritasuna aintzat hartuta:

–Hutsegite arinengatik:

• Hitzezko kargu-hartzea.
• Idatzizko kargu-hartzea.
• Enplegu eta soldatarik gabe uztea egun batez.

–Hutsegite larriengatik:

• Enplegu eta soldatarik gabe uztea bi egunetik 15 egunera bitarte.

–Hutsegite oso larriengatik:

• Enplegu eta soldatarik gabe uztea 16 egunetik 60 egunera bitarte.
• Kaleratzea.

34. artikulua. Zehapenak betetzea.

Zehapenak jakinarazten diren unetik beretik hasita betearaziko dira; horrek ez du alde batera uzten zehapena jasotzen duenak jurisdikzio eskudunean erreklamazioak egiteko duen eskubidea. Hala ere, enpresak, egoki iruditzen bazaio, zehapenaren betearazpena atzeratzen ahalko du 6 hilabetez gehienez.

35. artikulua. Preskripzioa.

Hutsegite arinak hamar egunen buruan preskribatuko dira, larriak hogei egunen buruan, eta oso larriak hirurogei egunen buruan, horiek guztiak enpresak hutsegitearen berri izaten duen egunetik aitzina, eta, nolanahi ere, hutsegitea egin eta sei hilabeteren buruan.

XII. KAPITULUA.–LANGILEEN ORDEZKARIAK

36. artikulua. Eskubide sindikalak.

Alderdi sinatzaileek elkarri aitortzen diote solaskide egokiak direla, lan harremanak elkarrekiko errespetuan oinarri daitezen eta enpresaren dinamika sozialak ekar ditzakeen gatazka eta problema guztien konponketa errazteko modukoak izan daitezen.

Ordezkari sindikalen eskubide eta eginkizunei dagokienez, bi alderdiek bat egiten dute Sindikatu Askatasunaren Lege Organikoan xedatuarekin.

Sindikatu bakoitzak batzordean dituen kideak ordu sindikalen kredituaz baliatzen ahalko dira, urte osoari dagozkionez, denen artean, guztientzat legez ezarritako gehieneko ordu kopurua gainditu gabe.

37. artikulua. Bermeak.

Enpresa batzordeen ordezkaritzak Langileen Estatutuan aitortzen zaizkion bermeak izanen ditu.

XIII. KAPITULUA.–TRATU ETA AUKERA BERDINTASUNA

38. artikulua. Tratu eta aukera berdintasuna.

Hitzarmena sinatzen duten alderdiek, langileen zein enpresaren aldekoak izan, ulertzen dute beharrezkoa dela ahaleginak egitea tratu eta aukera berdintasunerako eskubidea bermatzeko enpresan.

3/2007 Lege Organikoan ezarritakoarekin bat, enpresak adierazten du konpromiso sendoa duela tratu eta aukera berdintasuna errespetatzeko emakumeen eta gizonen artean enpresan sartzeari, kontratazioari, lan baldintzei, igoerari, prestakuntzari, ordainsariei, lana, familia eta bizitza pertsonala bateratzeari, laneko osasunari eta abarri dagokienez.

I. ERANSKINA.–SOLDATA TAULAK

2024KO BEHIN-BEHINEKO TAULAK

%3ko igoera.

2023KO BEHIN BETIKO SOLDATA TAULAK

II. ERANSKINA.–BATZORDE PARITARIOA

Hitzarmeneko Batzorde Paritarioa sortzen da, enpresa batzordeko hiru kidek eta enpresako zuzendaritzako beste hiru kidek osatua.

1. Batzorde paritarioaren eginkizunak:

a) Haren esku jartzen diren gatazka indibidual eta kolektiboetan bitartekari-, arbitraje- eta adiskidetze-lana egitea.

b) Akordio guztien interpretazio lanak egitea.

c) Akordio guztien jarraipen lanak egitea.

d) Langileen Estatutuak edo beste arau batzuek ezartzen dizkiotenak.

2. Batzorde Paritarioak denen intereseko arloetan hartzen dituen akordioak oinarrizko hitzarmen honen partetzat joko dira eta horiek ere bete beharrekoak izanen dira. Halako akordioak Lan Arloko Agintaritzari igorriko zaizkio, erregistra ditzan. Batzordeak akordioak adosteko, edonola ere, bi ordezkaritzetako bakoitzaren %60ren aldeko botoa beharko da.

3. Funtzionamenduaren erregelamendua:

a) Bilerak: Batzorde paritarioa zeregin hauetarako bilduko da: Aurreko artikuluko 1 a) eta b) ataletan aipatutako eginkizunak betetzeko, esku hartzeko eskatzen zaionean. 1 c) eta 1 d) ataletako kasurako, hiru hilean behin.

b) Deialdiak: Batzorde paritarioa biltzeko deia alderdi sinatzaileetako edozeinek eginen du, eta horretarako aski izanen da idatzizko ohar bat, gai zerrenda azalduko duena. Batzorde paritarioa gaiaren garrantziaren arabera komeni den epearen barnean bilduko da, baina deialdia egin eta hamabost eguneko epean gehienez. Epe horretan batzordea biltzen ez bada, batzorde paritarioaren esku-hartzea bukatu dela ulertuko da eta interesdunak bidezko iruditzen zaizkion ekintzetara jotzen ahalko du.

c) Quoruma. Aholkulariak: Batzordea eratutzat joko da ordezkaritza bakoitzaren gehiengo soila bertaratzen denean.

d) Akordioen baliozkotasuna: Batzordeak akordioak adosteko, edonola ere, bi ordezkaritzetako bakoitzaren %60ren aldeko botoa beharko da. Bilera bakoitzaren akta eginen da, eta idazkariek eta alderdi bakoitzeko ordezkari batek sinatuko dute.

e) Helbidea: Batzorde paritarioak enpresaren lokaletan izanen du jakinarazpen eta deialdietarako helbidea, Lodosako El Ramal poligonoan (Sartagudako errep. z.g.).

4. Alderdiek, edozein egintza judizial edo administratibo egin aurretik, sortzen diren interes orokorreko gai guztiak aurkeztu behar dizkiote Batzorde Paritarioari, nahiz eta horrek ez duen galarazten gero eskubide kolektiboak erabiltzea. Nolanahi ere, fede onaren printzipioari jarraituz negoziatu beharko da.

5. Adostasunik lortzen ez denean aurkeztutako gaien inguruan, hitzarmen kolektibo hau sinatu duten alderdiek erabakitzen dute desadostasunak eta hitzarmen hau interpretatzean sortzen diren gatazka mota guztiak, maila indibidualean zein kolektiboan izan, Nafarroako Lan Auzitegiaren menpe edo Nafarroako Gobernuko Ekonomia, Ogasun, Industria eta Enplegu Departamentuko Adiskidetze Atalaren menpe uztea, alderdiek erabakita, haren bitartekotza eta adiskidetze faseetan.

III. ERANSKINA.–ALDI BATERAKO EZINTASUNAREN OSAGARRIA

Laneko istripuaren edo laneko gaixotasunaren ondoriozko aldi baterako ezintasuna eta haurdunaldirako edo edoskitze naturalerako arriskuaren ondoriozkoa dagoenean, enpresak osatuko du langilearen lansaria, %100ekoa izan arte, bajako lehen egunetik eta egoerak dirauen bitartean. Halaber, baldintza berberetan ordainduko da oinarrizko soldataren, pagen hainbanaketaren, lanpostuko plusaren eta plus pertsonalaren (halakorik balego) baturaren %100era bitarte, bajaren lehenbiziko egunetik bajaren seigarren hilabetera arte, kontingentzia arruntengatik ospitaleratzen denean (halakotzat joko da ospitale batean 24 ordu baino gehiagotan egotea), bai eta larritasun bereziagatik, ospitaleratu gabe ere, tratamendu erasokorra denean edo errehabilitazio luzea dakarrenean.

Aurreko paragrafoan aurreikusi ez diren kontingentzia arruntek eragindako aldi baterako ezintasun guztietarako, oinarrizko soldataren, pagen hainbanaketaren, lanpostuko plusaren eta plus pertsonalaren (halakorik balego) baturaren %100era bitarte osatuko du enpresak, bajaren 21. egunetik bajaren seigarren hilabetera arte (hori barne).

IV. ERANSKINA.–HERIOTZAREN EDO BALIAEZINTASUNAREN KALTE-ORDAINA

Enpresak langileen aldeko aseguru poliza orokor bat kontratatuko du enpresan lan egin eta Gizarte Segurantzan alta emanda dauden langileentzat. Horren arabera, berez hilez gero, haien eskubidedunek 6.000 euro jasoko dituzte; laneko istripuaren ondoriozko heriotza edo lan orotarako erabateko ezintasun iraunkorra gertatuz gero, 30.000 euro.

Lan istripu edo lanbide eritasun baten ondorioz gaitasuna gutxitua (ahalmen fisiko edo intelektualak murriztuak) duten langile guztiek lehentasuna izanen dute enpresan beren baldintzen araberako lanpostu egokienak betetzeko, baldin eta lanpostu egokirik eta hutsik badago. Halakoetan, lanbide kategoria berri horri dagokion soldata jasoko du langileak.

V. ERANSKINA.–ERRETIRO PARTZIALA

Enpresak baloratuko du erretiro partziala ematea, errelebo-kontratu baten bidez, langileak eskatzen badu eta abenduaren 7ko 20/2018 Errege Lege Dekretuan legez ezarritako baldintzak betetzen baditu.

Erretiro partziala jasotzen duten dekretuak sartu behar dira, arlo horretan indarrean dagoen lan araudian ezarritako legezko baldintzak betez.

VI. ERANSKINA

Behin-behineko langileen orduko prezioa enpresa hitzarmen hau sinatu eta hurrengo hilabetean kenduko da, eta, beraz, egun horretatik aurrera kontratatu berri diren langileendako. Hitzarmen hau sinatzen den egunean kontratua indarrean duten langile guztien orduko prezioa aurreko hitzarmenean ezarritakoa izanen da bosgarren hilabetera arte, kontratuak iraupen hori badu, edo, kontratuak iraupen laburragoa badu, indarrean dagoen kontratua bukatu arte.

Hitzarmen hau enpresaren egoitza sozialean sinatu da, Lodosan, 2024ko urriaren 11n.

Iragarkiaren kodea: F2416476