Iragarkia

246. ALDIZKARIA - 2024ko abenduaren 5a

1. NAFARROAKO FORU KOMUNITATEA

1.7. BESTELAKOAK

145/2024 EBAZPENA, azaroaren 7koa, Energia, Enpresa I+G+b eta Ekintzailetzako zuzendari nagusiak emana. Honen bidez, eraikitzeko administrazio baimena ematen da energia elektrikoa ekoizteko 29,25 MWp-ko (20,90 MWn) "Zangoza I" eguzki instalazio fotovoltaikorako Kaseda udal mugartean eta haren ebakuazio azpiegituretarako Kaseda, Oibar eta Zangoza udal mugarteetan, eta instalazio horrek onura publikoa duela zehazki deklaratzen da.

1.–Eraikitzeko administrazio baimenaren eta zehazki onura publikoaren adierazpenaren eskaera.

2024ko martxoaren 5ean, eta abenduaren 1eko 1955/2000 Errege Dekretuaren 130. eta 143. artikuluak aplikatuz (haren bidez, energia elektrikoa garraiatu, banatu, merkaturatu eta hornidura egiteko jarduerak eta instalazioak baimentzeko prozedurak arautzen dira), Metka EGN Solar 29 SLUk Industria Antolamenduaren, Azpiegitura Energetikoen eta Meatzeen Zerbitzuari eskatu zion eraikitzeko administrazio baimena emateko eta onura publiko zehazki deklaratzeko eskaera tramitatzen jarraitzeko, proiektu honetarako: energia elektrikoa ekoizteko 29,25 MWp-ko (20,90 MWn) "Zangoza I" eguzki instalazio fotovoltaikoa Kaseda udal mugartean eta haren ebakuazio azpiegiturak Kaseda, Oibar eta Zangoza udal mugarteetan.

"Zangoza I" eguzki instalazio fotovoltaikoaren egikaritze proiektuak honako ekipo nagusi hauek jasotzen ditu:

• 59.696 modulu, unitateko 490 Wp-ko potentziakoak, guztira puntako 29,25 MWp-ko potentzia izateko, okupatutako azalera 46,41 Ha-koa izanik.
• 6 inbertitzaile fotovoltaiko, 3.483,33 kW-eko AC potentzia dutenak, 50ºC-ra mugatuta (20,90 MWn).
• 3 transformazio zentro, 7.340 kVA-eko AC potentzia dutenak, 50ºC-ra.

Eguzki instalazio fotovoltaikoak sortutako energia lurpeko 30 kV-ko tentsioko linea batetik ebakuatzen da "Zangoza I eta II eguzki instalazioa" izeneko transformazio azpiestaziora (66 / 30 kV).

Azpiestazio jasotzaile hau eta Zangoza azpiestazioarekin konektatzen diren ebakuazio azpiegiturak (Red Eléctrica de España SAUren jabetzakoak, 220 kV) partekatu egiten dira beste espediente bateko (5108-CE) "Zangoza II" izeneko eguzki instalazio fotovoltaikoarekin (29,25 MWp/20,90 MWn).

Espediente horren barruan sartzen dira "Zangoza I eta II eguzki instalazioa" izeneko 66/30 kV transformazio azpiestazioaren eta ebakuazio linea mistoaren (airekoa eta lurpekoa, 66 kV) proiektuak, egungo transformazio azpiestazio jasotzaileraino, 66/220 kV-tan, Zangozan ("Sangüesa Promotores" izenekoa).

"Sangüesa Promotores" azpiestaziotik Zangoza transformazio azpiestazio jasotzaileko (220 kV) sarbide eta konexiora bitarteko ebakuazioa 220 kV-ko lurpeko linea bidez egiten da.

2.–Aurrekariak.

2021eko apirilaren 20an, Metka EGN Solar 29 SLUk aurretiazko administrazio baimena eta eraikitzeko administrazio baimena eskatu zituen Kasedako udal mugartean energia elektrikoa ekoizteko 29,25 MWp-ko "Zangoza I" eguzki instalazio fotovoltaikoa izeneko instalazioa ezartzeko, Ingurumen Ebaluazioari buruzko abenduaren 9ko 21/2013 Legearen 36. artikuluak eta Sektore Elektrikoari buruzko abenduaren 26ko 24/2013 Legearen 53. artikuluak ezartzen dutena aplikatuz.

Ingurumeneko zuzendari nagusiaren maiatzaren 15eko 418E/2023 Ebazpenaren bidez, ingurumen eraginaren aldeko adierazpena egin zen eguzki instalazio fotovoltaikoaren eta haren ebakuazio azpiegituraren proiekturako.

Lurralde eta Paisaia Zerbitzuko zuzendariaren abuztuaren 21eko 315E/2023 Ebazpenaren bidez, lurzoru urbanizaezinean jarduerak eta erabilerak egiteko baimena eman zen aipatu instalaziorako.

Industriaren, Energiaren eta S4 Proiektu Estrategikoen zuzendari nagusiaren abuztuaren 25eko 112/2023 ebazpenaren bidez (2023ko irailaren 22ko Nafarroako Aldizkari Ofiziala, 199. zenbakia) aurretiazko administrazio baimena eman zitzaion Metka EGN Solar 29 SLUri eguzki instalazio fotovoltaikoko "Zangoza I" instalazioa jartzeko, Kaseda udal mugartean, eta horren ebakuazio azpiegiturarako, Kaseda, Oibar eta Zangoza udal mugarteetan.

3.–Onura publikoa zehazki deklaratzeko proposamena eta kontsulten izapidea jendaurrean jartzea.

Sektore Elektrikoari buruzko abenduaren 26ko 24/2013 Legearen 55. artikuluarekin eta abenduaren 1eko 1955/2000 Errege Dekretuaren 144. artikuluarekin bat etorriz, 2024ko martxoaren 26an eta 27an, hurrenez hurren, iragarkia argitaratu zen 64. Nafarroako Aldizkari Ofizialean eta Diario de Navarra egunkarian, ukitutako ondasun eta eskubideen gainean onura publikoa zehazki deklaratzeko eskaera jendaurrean jartzekoa.

Halaber, iragarkia Kasedako, Oibarko eta Zangozako udalei igorri zitzaien, epe berean jendaurrean jar zezaten. Egintza hori egiaztatzen duten eginbideak daude espedientean.

Informazioa jendaurrean jartzeko izapidearen epearen barruan alegazio hauek jaso ziren (aurkeztu ziren egunaren araberako hurrenkeran daude):

–1. alegazioa. María Reyes Ballaz Zabalza eta Antonio Ballaz Zabalza, 2024ko apirilaren 24koa.

–2. alegazioa. José María Carlos Baines, Feliciana Lacosta Sánchez eta María Eugenia Carlos Garralda, 2024ko apirilaren 26koa.

–3. alegazioa. María Ángeles Manuela Pérez de Obanos Liso, Trinidad Pérez de Obanos Lisoren izenean, 2024ko maiatzaren 7koa.

–4. alegazioa. Nekazaritza eta Abeltzaintza Zuzendaritza Nagusia, 2024ko maiatzaren 10ekoa.

–5. alegazioa. Miguel Ángel Ayape Arbe, 2024ko maiatzaren 13koa.

Horrez gain, informazioa jendaurrean jartzeko izapidearen epetik kanpo honako alegazio hauek jaso ziren:

–6. alegazioa. Héctor Miguel Nagore Sorabilla, Francisco Javier Mauleón Lafitaren izenean, 2024ko maiatzaren 31koa.

–7. alegazioa. Héctor Miguel Nagore Sorabilla, Ángel eta Francisco Javier Rada Arlegui anaien izenean, 2024ko maiatzaren 31koa.

–8. alegazioa. Héctor Miguel Nagore Sorabilla, Teodoro Máximo Zulet Solaren izenean, 2024ko maiatzaren 31koa.

Era berean, abenduaren 1eko 1955/2000 Errege Dekretuaren 146. artikuluan ezarritakoaren arabera, aurkeztutako dokumentazio teknikoaren berri eman zitzaien ukitutako erakunde desberdinei, horiek beren txostenak igor zitzaten. Taulan adierazitako txostenak jaso ziren:

Jendaurreko informazioaren eta kontsulten izapidea bukatutakoan, jasotako txosten eta alegazio guztiak igorri zitzaizkion sustatzaileari, kontuan har zitzan.

2024ko ekainaren 19an, erakunde sustatzaileak erantzuna eman zien jasotako alegazio eta txosten guztiei.

Jasotako alegazioen eta txostenen edukia eta azterketa ebazpen honen I. eta II. eranskinetan laburbiltzen dira.

4.–Eraikitzeko administrazio baimena eta zehazki onura publikoko deklarazioa emateko proposamena.

Aurkeztutako dokumentazioa ikusita, eta abenduaren 1eko 1955/2000 Errege Dekretuan xedatutakoari jarraikiz, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatzen du prozedura behar bezala gauzatu dela, eta proposatzen du Metka EGN Solar 29 SLUri eraikitzeko administrazio baimena ematea eta onura publikoa zehazki deklaratzea, eskatu bezala, soilik II. eranskineko zerrendan ageri diren ukitutako ondasun eta eskubideetara mugatuta.

Adierazitakoarekin bat, eta Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, honako hau

EBAZTEN DUT:

1. Eraikitzeko administrazio baimena ematea Metka EGN Solar 29 SLUri, energia elektrikoa ekoizteko "Zangoza I" instalaziorako, Kaseda udal mugartean, eta haren ebakuazio azpiegituretarako, Kaseda, Oibar eta Zangozako udal mugarteetan.

2. Aurkeztutako proiektuak onestea, eta hogeita hamasei hilabeteko epea ematea obrak egiteko:

–"Zangoza I" izeneko eguzki instalazio fotovoltaikoa instalatzeko egikaritze proiektua, Manuel Cañas Mayordomo goi mailako ingeniari teknikoak eta Daniel Correro Cabrera ingeniari industrialak sinatua,

–"Zangoza eguzki instalazioa I eta II" izeneko 66/30 kV-ko transformazio azpiestazioaren egikaritze proiektua, David Remírez de Ganuza Satrústegui ingeniari tekniko industrialak sinatua,

–66 kV-ko ebakuazio linea mistoaren egikaritze proiektua, Héctor Sánchez Segura ingeniari tekniko industrialak sinatua.

3. Instalazio horren onura publikoa deklaratzea, Sektore Elektrikoari buruzko abenduaren 26ko 24/2013 Legearen 54., 55. eta 56. artikuluetan, eta abenduaren 1eko 1955/2000 Errege Dekretuaren 148. eta 149. artikuluetan ezarritakoarekin bat; hori horrela, Metka EGN Solar 29 SLU enpresa onuraduna izanen da desjabetze espedientean. III. eranskinean jaso da ukitutako ondasunen eta eskubideen zerrenda.

4. Instalazioak aurkeztutako dokumentazioari jarraikiz gauzatu beharko dira, eta bat etorri beharko dute honako hauetan xedatutakoarekin: Goi tentsioko instalazio elektrikoen baldintza teknikoei eta segurtasun bermeei buruzko erregelamendua onesten duen maiatzaren 9ko 337/2014 Errege Dekretua; Goi tentsioko linea elektrikoen baldintza teknikoei eta segurtasun bermeei buruzko erregelamendua onesten duen otsailaren 15eko 223/2008 Errege Dekretua; eta Behe tentsiorako Erregelamendu elektroteknikoa onesten duen abuztuaren 2ko 842/2002 Errege Dekretua.

5. Behin proiektua gauzaturik, eskatzaileak ustiatzeko baimena eskatu beharko du. Eskaerarekin batera, orobat aurkeztu beharko da abenduaren 1eko 1955/2000 Errege Dekretuaren 132. artikuluan adierazitako dokumentazioa.

6. Baimen hau emanda ere, instalazioaren eskatzaileak lortu beharko ditu instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, bat etorrita aplikatzekoak diren beste xedapen batzuekin.

7. Ebazpen hau igortzea, behar diren ondorioak izan ditzan, Industria Antolamenduaren, Azpiegitura Energetikoen eta Meatzeen Zerbitzuari, Ingurumen Ebaluaziorako Atalari, Paisaiaren eta Landa-lurzoruaren Atalari, Herri-lurren Atalari, Zainketa Zerbitzuari eta Ondare Historikoaren Zerbitzuari.

8. Ebazpen hau Nafarroako Aldizkari Ofizialean argitaratzea, orok jakin dezan.

9. Ebazpen hau jakinaraztea Metka EGN Solar 29 SLUri, Viscofán SAri, Nedgia Navarra SAri, Telefónica de España SAUri, i-DE Redes Eléctricas Inteligentes SAUri eta Acciona Generación Renovable SAri, Miguel Ángel Ayape Arberi, Héctor Miguel Nagore Sorabillari eta ukitutako ondasun eta eskubideen titularrei, eta ohartaraztea ebazpen honek ez duela administrazio bidea bukatzen eta haren kontra gora jotzeko errekurtsoa aurkezten ahal dela Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, ebazpena jakinarazi eta hurrengo egunetik aurrera, espediente-zenbakia adierazita (idazpuruan ageri da, erreferentzia honetan: espedientea).

10. Ebazpen hau jakinaraztea Kaseda, Oibar eta Zangozako Udalei, Ebroko Konfederazio Hidrografikoari, eta Trantsizio Ekologikorako eta Erronka Demografikorako Ministerioari (MITECO) eta ohartaraztea honen kontra administrazioarekiko auzi-errekurtsoa jartzen ahal dela, eskumena duen ordena jurisdikzionalari zuzendua, argitaratu eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2024ko azaroaren 7an.–Energia, Enpresa I+G+b eta Ekintzailetzako zuzendari nagusia, Uxue Itoiz Mariñelarena.

I. ERANSKINA.–JASOTAKO ALEGAZIOAK

Jaso diren alegazio guztien laburpena eta analisia azalduko dira jarraian:

1. alegazioa. María Reyes Ballaz Zabalza eta Antonio Ballaz Zabalza, 2024ko apirilaren 24koa.

Zangozako 72. poligonoko 37. lurzatiaren jabe gisa, eskatu dute birplanteatu dadila lurpeko ebakuazio linearen trazadura, 20 zenbakiko euskarritik azpiestazio biltzailearekiko konexio punturaino (66/220 kV), zati horretan kutxatila bat aurreikusten delako aipatu lurzatiaren erdian eta haren nekazaritza jarduerari eragiten diolako. Proiektatutako trazaduraren alternatiba moduan, aipatu finka iparraldetik inguratzen duen trazadura proposatu dute (135 metro gehiago handitzen du lurpeko linea).

Erantzuna:

2024ko ekainaren 19ko idazkiaren bidez, erakunde sustatzaileak erantzun du hartutako irtenbidea IBERDROLAk azpiestazioari emandako sarbideari zor zaiola, dauden beste kanalizazio batzuei ez eragiteko. Linearen trazadurak ahalik eta gutxien eragin diezaion aipatu lurzatiari eta bertako nekazaritza ekoizpenari, lurzatiaren hegoaldeko albotik eginen da (erantsitako planoaren arabera), bertan dagoen ubidetik ahalik eta hurbilen, hodien goiko aldetik gutxieneko sakonera 1,05 metrokoa izanik eta aipatu lurzatian kutxatilak jartzea saihestuz.

2. alegazioa. José María Carlos Baines, Feliciana Lacosta Sánchez eta María Eugenia Carlos Garralda, 2024ko apirilaren 26koa.

José María Carlos Baines eta Feliciana Lacosta Sánchezek, 71. lurzatiaren jabe diren aldetik, eta María Eugenia Carlos Garraldak, 73. lurzatiaren jabe moduan, biak ere 73. poligonoko lurzatiak, Zangoza udal mugartean (Nafarroa), 10 zenbakiko euskarria jartzeak beren lurzatietan edukiko lukeen eragina alegatu dute, kontuan hartuta dimentsio txikikoak direla. Ondorioz, horien balioa murriztu eginen litzateke eta lanen kostua areagotu eta, beraz, etekinaren zati bat galdu.

Erantzuna:

2024ko ekainaren 19ko idazkiaren bidez, erakunde sustatzaileak erantzun du euskarriak bi lurzatietan izanen duen eragina ahalik eta txikiena izan dadin aipatu euskarri hori 71. eta 72. lurzatien arteko mugara lekualdatuko dela.

3. alegazioa. María Ángeles Manuela Pérez de Obanos Liso, Trinidad Pérez de Obanos Lisoren izenean, 2024ko maiatzaren 7koa.

Zangozako 73. poligonoko 79. lurzatiaren jabe moduan, eskatzen du planteatu dadila 11, 12 eta 13 zenbakiko euskarrien kokapena aldatzeko aukera, lurzatiaren gaineko eraginak murrizteko, eta kokapen berri bat proposatzen du hiru euskarri horietako bakoitzerako.

Erantzuna:

2024ko ekainaren 19ko idazkiaren bidez, erakunde sustatzaileak egokitzat jo du 13 zenbakiko euskarrirako proposatutako kokapena eta justifikatu egin du 11 eta 12 zenbakietako euskarrietarako proposatutako kokapenak ez direla bideragarriak, errepiderako segurtasun distantzien ondorioz, alegatzaileak proposatutako horretara hurbilago dauden irtenbideak aztertzen ari diren arren.

4. alegazioa. Nekazaritza eta Abeltzaintza Zuzendaritza Nagusia, 2024ko maiatzaren 10ekoa.

Nekazaritza eta Abeltzaintzako zuzendari nagusiak sinatutako agirian, onura publikoa ukatzeko eskatzen da, lursailak premiaz eta presaz okupatu ahal izateko. Agiriaren arabera, ukatze hori egin ezean, aurretik deskribatutako zerrendan agertzen diren lursailak herri-lurzatitzat hartu behar dira, eta lursail horien titularrek laborantza-aprobetxamendurako eskubidea baino ez dute, edo, bestela, balio justuaren zenbatekoa Gordailuen Kutxa Orokorrean kontsignatu behar da, Corella edo Murchante bezalako beste udalerri batzuetan egin den bezala, txosten honetan aipatzen diren lurzatien kasuan.

Erantzuna:

Horri dagokionez, adierazi behar da okupatu beharreko ondasun edo eskubideak auzigaiak izan daitezkeela berariaz jasota dagoela Nahitaezko Desjabetzeari buruzko Legean, zeinak ezartzen baititu legezko jabeen eskubideak zaintzeko mekanismoak, dela Fiskaltzaren esku-hartzearen bidez, dela zenbatekoak Gordailuen Kutxa Orokorrean kontsignatzearen bidez.

Legezko aurreikuspen horrekin bat etorriz, auzigaiak diren lurzatiei dagozkien zenbatekoak kontsignatu eginen dira, Nekazaritza eta Abeltzaintzako zuzendari nagusiaren txostenean proposatzen den bezala.

5. alegazioa. Miguel Ángel Ayape Arbe, 2024ko maiatzaren 13koa.

Alegazioak aurkeztu dira honako hauei buruz: onura publikoaren justifikaziorik eza, aurretiazko proiektu exekutiborik eza, finken eta horien benetako titularren identifikazio eskasa, Nafarroako Gobernuko Garapen eta Ingurumen Departamentuko Herri-lurren Atalak jarritako eragozpenak, desjabetzera jo behar duten finken zehaztapenik eza, eta etorkizuneko desjabetzearen eraginpeko lur batzuk onura publikoko mendietan duten kokapena.

Erantzuna:

Alegazio hau Metka EGN Solar 29 SLUri helarazi zaio, eta enpresak gogorarazi du Miguel Ángel Ayape Arbek, bere alegazioan, ez duela egiaztatu instalazio elektrikoek ukitutako eskubide eta ondasunekin lotutako lurzatietako baten titularra denik.

Hala ere, planteatzen diren alegazioei dagokienez, honako hau adierazi behar da:

Sektore Elektrikoari buruzko Legearen helburua da sektore elektrikoaren araubidea ezartzea, argindarraren hornidura bermatzeko eta kontsumitzaileen beharretara egokitzeko segurtasun, kalitate, efizientzia, objektibotasun, gardentasun eta gutxieneko kostuaren aldetik. Horretarako, energia elektrikoaren hornidura ezarri da interes ekonomiko orokorreko zerbitzu gisa.

Sektore Elektrikoari buruzko Legeak 53. artikuluaren 6. paragrafoan xedatzen duenez, baimentzeko administrazio prozedurak arautuak dira, eta objektibotasunaren, proportzionaltasunaren, gardentasunaren, berdintasunaren eta diskriminaziorik ezaren printzipioak errespetatuko dituzte; nolanahi ere, baimena emateko, ez da inola ere ezartzen ahalko kostuak ordaindu behar direnik edo jarduera bakoitzaren garapenarekin loturarik ez duten baldintzak bete behar direnik. Administrazio eskudunak emanen ditu. Hala ere, ez dira alde batera utzi behar aplikatzekoak diren bestelako xedapenak, eta, bereziki, lurraldearen antolamenduari eta ingurumenari buruzkoa kontuan izanik beharrezkoak diren kontzesioak eta baimenak.

Sektore Elektrikoari buruzko Legeak, energia elektrikoaren hornidura jardueraren interes orokorreko zerbitzu ekonomikoaren izaerarekin bat etorriz, onura publikokotzat jotzen ditu, besteak beste, energia elektrikoa sortzeko instalazioak. Adierazpen orokor hori kasu zehatz bakoitzeko aitorpen batekin osatu behar da. Horretarako, lege horrek enpresa interesdunak aitorpen hori zehazki eskatu behar duela adierazten du. Eskaera hori jendaurrean jarriko da eta ukitutako organoen txostena eskatuko da, espediente honetarako egin den bezala.

Sektore Elektrikoari buruzko Legeak, 55. artikuluaren 3. paragrafoan, xedatzen du, tramitazioa bukatuta, Nafarroako Foru Komunitateko Administrazioan energiaren arloko eskumena duen organoak "eginen" duela onura publikoaren deklarazioa. Kontuan hartuta "eginen duela" esamoldea, eta aitorpen hori instalazioa eraikitzeko eta martxan jartzeko beharrezkoa dela, baimenak emateko duen izaera arautu bera izan behar du deklarazioak ere.

Sektore Elektrikoari buruzko Legearen 56. artikuluaren arabera, onura publikokotzat jotzeak berekin dakar ukitutako ondasunak okupatu beharra edo ukitutako eskubideak eskuratzea, eta horrek presako okupazioa ekarriko du, Nahitaezko Desjabetzeari buruzko Legearen 52. artikuluaren ondorioetarako. Beraz, okupatzekoak diren ondasunak zehaztuta geratzen dira, hau da, onartutako proiektutik eratorritakoak. Horien afekzioak enpresak aurkeztu duen ondasun eta eskubideen zerrendan jasotzen dira, eta enpresak berehala okupatzeko eskubidea du. Okupazio akta egin, okupatu aurreko gordailua egin eta okupazioa azkar egitearen ondoriozko kalteengatiko kalte-ordaina ordaindu edo kontsignatu ondoren gauzatuko da okupazio hori. Okupazioa egin ondoren, desjabetze espedientea izapidetuko da balio justuaren eta ordainketaren faseetan, erregulazio orokorraren arabera.

Gogoratu behar da, gainera, ekainaren 23ko 23/2020 Errege Lege-dekretuak, energiaren arloko eta ekonomia suspertzeko beste esparru batzuetako neurriak onartzen dituenak, proiektuen sustatzaileei eskatzen diela aldez aurreko administrazio baimenak, eraikuntzakoak eta behin betiko ustiapenekoak epe jakin batzuetan lortzea. Lursailetarako sarbidea bermatuta egon behar da, lanak egin ahal izateko eta behin betiko ustiapenerako administrazio baimena lortzeko (zerbitzuan jartzea).

Bestalde, azpimarratzekoa da abenduaren 1eko 1955/2000 Errege Dekretuaren 143. artikuluak honako hau adierazten duela: "Herri-onurakotzat deklaratzeko eskaera, zehazki, administrazio-baimenaren eta/edo egikaritze-proiektuaren onarpen-eskaeraren aldi berean edo administrazio-baimena lortu ondoren egiten ahalko da". Dagokigun kasuan, enpresak batera eskatu du eraikitzeko administrazio baimena ematea eta zehazki onura publikokoa dela aitortzea, eta, horretarako, dagokion egikaritze proiektua aurkeztu du. Dokumentu hau jendearen eskura jarri da, herri-onurako deklarazio eskaera jendaurrean jartzeko izapidearen esparruan.

Herri-lurren Atalaren eragozpenei dagokienez, adierazi behar da okupatu beharreko ondasun edo eskubideak auzigaiak izan daitezkeela berariaz jasota dagoela Nahitaezko Desjabetzeari buruzko Legean, zeinak ezartzen baititu legezko jabeen eskubideak zaintzeko mekanismoak, dela Fiskaltzaren esku-hartzearen bidez, dela zenbatekoak Gordailuen Kutxa Orokorrean kontsignatzearen bidez.

Legezko aurreikuspen horrekin bat etorriz, auzigaiak diren lurzatiei dagozkien zenbatekoak esleituko dira, Nekazaritza eta Abeltzaintzako zuzendari nagusiaren txostenean proposatzen den bezala.

Onura publikoko mendietako ebakuazio azpiegiturek duten kokapenari buruz, Nafarroako Oihan Ondarea Babestu eta Garatzeari buruzko abenduaren 31ko 13/1990 Foru Legean xedatutakoari jarraituko zaio. Gogorarazten da administrazio baimen hori administrazio eskudunak ematen duela, aplikatzekoak diren beste xedapen batzuen arabera beharrezkoak diren emakidak eta baimenak alde batera utzi gabe.

Azkenik, Kasedako 7. poligonoko 64., 65., 90. eta 146. lurzatiei dagokienez, adierazi behar da 146. lurzatia ingurumen eraginaren adierazpenean sartuta dagoela. Gainerako lurzatiak ukitutako ondasun eta eskubideen zerrendan sartu dira akats baten ondorioz. Zerrenda horrek ez du islatzen jendaurrean jarritako egikaritze proiektuan jasotakoa. Ebazpen honen eranskin gisa argitaratu da ondasun eta eskubideen zerrenda hori.

6. alegazioa. Héctor Miguel Nagore Sorabilla, Francisco Javier Mauleón Lafitaren izenean, 2024ko maiatzaren 31koa.

Zangozako 7. poligonoko 95. eta 135. lurzatien jabe denez, bi aldeek sinatutako errentamendu kontratua aipatu du, eta aipatutako finkak ukitutako ondasun eta eskubideen zerrendatik kanpo uzteko eskatu du, desjabetze prozedura ez delako beharrezkoa.

Erantzuna:

2024ko ekainaren 19ko idazkiaren bidez, erakunde sustatzaileak argitu zuen onura publikoko deklarazioa eskatzeko prozesuak ez duela esan nahi nahitaez lursailak okupatu behar direnik, eta, kasu horri dagokionez, adierazi zuen aipatu kontratua betetzeko asmoa zuela.

7. alegazioa. Héctor Miguel Nagore Sorabilla, Ángel eta Francisco Javier Rada Arlegui anaien izenean, 2024ko maiatzaren 31koa.

Zangozako 7. poligonoko 105., 108., 133. eta 141. lurzatien jabe gisa, bi aldeek sinatutako errentamendu kontratua aipatu dute, eta aipatutako finkak ukitutako ondasun eta eskubideen zerrendatik kanpo uzteko eskatu dute, desjabetze prozedura ez delako beharrezkoa.

Erantzuna:

Erakunde sustatzaileak 6. alegazioari erantzun dion modu berean erantzun du.

8. alegazioa. Héctor Miguel Nagore Sorabilla, Teodoro Máximo Zulet Solaren izenean, 2024ko maiatzaren 31koa.

Zangozako 7. poligonoko 172. eta 185. lurzatien jabe denez, bi aldeek sinatutako errentamendu kontratua aipatu du, eta aipatutako finkak ukitutako ondasun eta eskubideen zerrendatik kanpo uzteko eskatu du, desjabetze prozedura ez delako beharrezkoa.

Erantzuna:

Erakunde sustatzaileak 6. eta 7. alegazioei erantzun dien modu berean erantzun du.

II. ERANSKINA.–JASOTAKO TXOSTENAK

Jasotako txosten guztien laburpena eta analisia azalduko dira jarraian:

1. txostena. Ingurumen Ebaluaziorako Atala.

2024ko maiatzaren 15eko txostenean, besteak beste, obrak hasi baino lehen eta organo substantiboaren bidez, ebakuazio linearen egikaritze lanek eragindako landaredi naturaleko eremuetan eta zuhaitz landaketetan egindako prospekzio botanikoari buruzko txostena eta ingurumena lehengoratzeko edo integratzeko plan bat aurkezteko eskatzen da.

Gainera, txostenean alderdi tekniko jakin batzuk berriz aztertzeko eskatzen da; hala nola: perimetro hesiaren atzeraemangunea, 151B landa-lurzatiari ez eragiteko; % 10etik gorako maldak zituzten eremuetan jartzea aurreikusita zeuden modulu fotovoltaikoak birkokatzea; eta proiektua gauzatzean argi baldintza jakin batzuk kontuan hartzea.

Erantzuna:

2024ko ekaineko dokumentuaren bidez, txostenari erantzun zitzaion esanez prospekzio botanikoari buruzko txostenari eta ingurumena lehengoratzeko edo integratzeko planari dagokienez, horretan ari direla lanean, eta kontuan hartzen ari direla ingurumen eraginaren adierazpenean horri buruz jasotako baldintzak.

Txostenean aintzat hartutako alderdi teknikoei dagokienez, erakunde sustatzaileak erantzun du kontuan hartuko direla eta proiektua alderdi horiek kontuan hartuta gauzatuko dela.

2. txostena. Zangozako Udala.

2024ko maiatzaren 13ko txostenean, Zangozako Udalak alegazioak egin zituen. Alegazio horietan eskatu zuen, batetik, 2. poligonoko 739., 746., 763., 804. eta 843. lurzatiak (herri-lurra) proiektutik kanpo uzteko, onura publikoko mendi gisa katalogatuta baitaude, eta, bestetik, Udal Planean biztanleria ingurune gisa katalogatutako lurzoru urbanizaezinean sartutako lursailetatik igarotzen den lerro zatia lurperatzeko.

Erantzuna:

2024ko ekaineko dokumentuaren bidez, 804. eta 803. lurzatiei dagokienez erantzun zen planteatutako trazadurak, Z-n, zeharkatzen dituen bide publikoa erabili nahi duela lurpeko tipologia mantentzeko eta eraginak minimizatzeko, eta, 739., 746. eta 763. lurzatiei dagokienez, planteatutako proposamena Ingurumen Departamentuarekin adostu dela, eta eremu horretarako trazadura eta linearen tipologia jada baliozkotu direla Viscofan SLren jabetzako linearako. Linea horretarako onura publikoko deklarazioa lortu zen 2009ko irailean, eta haren jatorria Zangoza I eguzki instalazioaren ondoko zentro operatiboan dago, 220 kV-ko Zangozako azpiestazioan.

Udal Planean biztanleria ingurune gisa katalogatutako lurzoru urbanizaezinean sartzen diren eraginpeko lurzatiei dagokienez, erakunde sustatzaileak erantzun du Udalaren eskaerari erantzunen diola eta, beraz, alegazioan identifikatutako tarteari dagokion linearen zatia lurperatuko duela.

3. txostena. Viscofán SA.

2024ko apirilaren 15ean 2 txosten aurkeztu ziren. Lehenengoa, VISCOFANen 66 kV-ko linearen eta 14 eta 15 zenbakietako euskarrien artean proiektatutako ebakuazio linea berriaren arteko 16 zenbakiko gurutzaketari buruzkoa da. Bertan, dagokion araudian ezarritako gutxieneko distantziak (horizontala eta bertikala) uneoro betetzeko eskatzen da. Bigarren txostenak eguzki instalazioaren proiektua aipatzen du, eta adostasuna adierazten du, baldin eta Viscofán-Zangoza transformazio azpiestazioko linearen mantentze lanetarako sarbide librea baimentzen bada lineak eguzki plaken gainean duen hegal eremuan, kokaleku horretan perimetro itxierarik egin gabe.

Erantzuna:

2024ko ekainaren 19ko bi idazkiren bidez, erantzuna eman zen, eta adierazi zen ezarritako gutxieneko distantziak errespetatuko zirela, eta adierazi zen une oro bermatuko zela Viscofan-Zangoza transformazio azpiestazioko linearen mantentze lanetarako sarbide librea. Horretarako, perimetroko hesian sartzeko bi ate jarriko dira, eta haien giltzak emanen zaizkio VISCOFANi.

4. txostena. Trantsizio Ekologikorako eta Erronka Demografikorako Ministerioa (MITECO).

2024ko apirilaren 1eko txostenaren bidez, agerian uzten du aztertu beharreko eremua garraio, banaketa edo sorkuntza azpiegitura elektrikoen eraginpean egon daitekeela, eta, proiektuak azpiegitura horietan izanen dituen eraginak jasotzeko, inguruan garraio, banaketa eta sorkuntza jarduerak egiten dituzten enpresei galdetu beharko dietela. Horretarako, 1. eranskin gisa, Estatuko Administrazio Orokorraren eskumeneko instalazioen zerrenda jasotzen da, Nafarroako Foru Komunitatean izapidetzen ari dena, identifikatutako sustatzaileekin, dagozkien kontsultak egin daitezen.

Erantzuna:

2024ko ekaineko idazkiaren bidez, erakunde sustatzaileak adierazten du proiektuaren xede den eremuko garraio, banaketa edo sorkuntza azpiegitura elektriko guztiei buruzko informazioa bildu duela, eta zonan inplikatutako enpresa bakoitzari dagokion separata kontsultatu eta aurkeztu duela, dagozkion alegazioak edo txostenak egiteko.

5. txostena. Ondare Historikoaren Zerbitzuko Ondare Arkitektonikoaren Atala.

2024ko apirilaren 2ko txostenean adierazten denez, aurkeztutako dokumentazio berrian ikus daitekeenez, 13 zenbakiko euskarria ebakuazio linearen trazaduraren hegoalderantz mugitu da, 2021eko uztailaren 15ean aurkeztutako dokumentazioan adierazitako posizioari dagokionez, eta lekualdaketa horren ondorioz, trazadura 30 metroko babes zerrendaren barruan geratuko da, bidearen bi aldeetatik zenbatuta (3 metroko zabalera du), ebakuazio linea bidera gehien hurbiltzen den puntuan.

Erantzuna:

Bidearen bi aldeetan 30 metroko babes zerrenda betetzeko, 13 zenbakiko euskarria ebakuazio linearen trazadura beraren gainean mugituko da, metro batzuk iparralderantz. Jarduketa honekin, 13 zenbakiko euskarria (x-640.517; eta -4.716.809) Donejakue Bidetik 43 metrora egonen da. Honekin batera doa oinplano kotatuko plano bat, non euskarriaren eta Donejakue bidearen arteko distantzia ikusten den.

6. txostena. Nedgia SA.

2024ko ekainaren 9ko txostenean adierazten du ez dagoela aurkeztutako proiektuarekin ados, harik eta separatetan ukitutako gas kanalizazioekiko gurutzaketetarako ezarritako gutxieneko distantziak betetzen direla ikusi arte, bai aireko linearen aldetik, bai lurpeko linearen aldetik.

Erantzuna:

2024ko abuztuaren 19ko idazkiarekin batera, gas naturaleko hodiei eragiten dien separata aurkeztu zen. Bertan, dauden hiru gurutzaketetarako errespetatu beharreko gutxieneko distantziei buruzko araudia betetzen dela justifikatzen da (2k aireko linea tartea dute eta 1ek lurpeko linea tartea).

7. txostena. Telefónica de España SAU.

2024ko apirilaren 3ko txostenean adierazten da dokumentazioa aztertuta Telefónica de España SAUk ez duela aipatu proiektuaren exekuzioaren kontrako eragozpenik, indarreko araudia betetzen bada telekomunikazioko lineen paralelismo eta gurutzaketei dagokienez, eta, bereziki, Goi eta Behe Tentsioko Erregelamendu Elektroteknikoak betetzen badira.

Erantzuna:

2024ko ekaineko idazkiaren bidez, erakunde sustatzaileak adierazten du ez dela aldaketa garrantzitsurik planteatzen aurkeztutako proiektuarekiko euskarrien kokapenean, telekomunikazio lineekiko 2 gurutzaketak aurreikusten direla oraindik, eta obrak gauzatzean ITC-BT-07 «Eroale biluzidun aireko lineak» kontuan hartuko direla, bereziki 5.6.1 atala (linea elektrikoekiko gurutzaketei buruzkoa) eta 5.6.2 atala (linea elektrikoekiko paralelismoei buruzkoa).

Horrez gain, obrak bukatu ondoren, obra bukaerako planoak prestatuko dira, eta horietan, dauden linea elektrikoekiko euskarrien eta kableen distantziak islatuko dira.

8. txostena. i-DE Redes Eléctricas Inteligentes SA.

2024ko apirilaren 4ko txostenean ez da aurreikusten baldintzatzaile garrantzitsurik proiektatutako eguzki instalazio berriarekin sortzen diren afekzioen aurrean, betiere ez bada beharrezkoa lanak egin ondorengo linearen txostena, ITC-BT-07ren 5.6.1 artikuluaren a) eta b) idatz-zatiak betetzen direla justifikatzeko.

Erantzuna:

Txosten honi emandako erantzuna 7. txostenari emandakoaren ildo berekoa da.

III. ERANSKINA.–"ZANGOZA I" EGUZKI INSTALAZIO FOTOVOLTAIKOAK ETA HARI ATXIKITAKO TRANSFORMAZIO ETA EBAKUAZIO AZPIEGITUREK UKITUTAKO ONDASUN ETA ESKUBIDEEN ZERRENDA

TRANSFORMAZIO AZPIESTAZIOA 66 / 30 kV "Zangoza I eta II eguzki instalazioa"

EBAKUAZIOKO LURPEKO LINEA ELEKTRIKOA, 66 kV-KOA

EBAKUAZIORAKO AIREKO LINEA ELEKTRIKOA 66kV-RA

Iragarkiaren kodea: F2416275