Iragarkia

240. ALDIZKARIA - 2024ko azaroaren 26a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

4568E/2024 EBAZPENA, urriaren 18koa, Nafar Lansare-Nafarroako Enplegu Zerbitzuko zuzendari kudeatzaileak emana, "Nafarroako Foru Komunitatean enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzak" deialdia onesten duena. DDBNeko identifikazioa: 792860.

Enplegu Sistema Nazionalean enplegua aktibatzeko programa komunak arautzen dituen irailaren 28ko 818/2021 Errege Dekretuak (otsailaren 28ko 3/2023 Legeak aldatua), 88. artikuluan, arautzen du enplegurako orientazioko, ekintzailetzako eta berrikuntzako zentroak abian jartzea, eta honako eginkizun hauek esleitzen dizkie:

a) Jardunbide egokitzat jotzen ahal diren lanerako eta ekintzailetzarako orientazioko, prospekzioko eta bitartekotzako programak ebaluatzea, bai berezko programei dagokienez –haien ezagutza gainerako enplegu-zerbitzu publikoei helarazteko–, bai kanpoko programei dagokienez –hala badagokio, zein bere lurraldean aplikatzeko–.

b) Ekintza berritzaileak diseinatzea, eta proiektu esperimentalak gauzatzea lan-orientazioaren, -prospekzioaren eta -bitartekaritzaren arloan.

c) Enplegurako lanbide-orientazioko eta autoenplegurako laguntzako eta enpresa-prospekzioko eta lan-bitartekaritzako eginkizunak betetzen dituzten enplegu-zerbitzu publikoko langileei zuzendutako etengabeko prestakuntzako berariazko plan bat garatzea eta gauzatzea. Planak berariazko prestakuntza jaso behar du emakumeen eta gizonen arteko tratu- eta aukera-berdintasunaren arloan eta desgaitasuna duten pertsonen eta bazterketa-arriskuan dauden gainerako gizarte-taldeen gizarte-inklusioaren arloan.

d) Ekintzailetza-ereduak diseinatzea eta proiektu pilotuak aplikatzea.

e) Langabezia-prestazioaren kapitalizazioari (ordainketa bakarra) lotutako ekintzailetza-proiektuak koordinatzen laguntzea.

f) Enplegu autonomoa sustatzeko eta kooperatiba eta lan-sozietateak sortzen eta haietan enplegatzen laguntzeko eskumena duten erakundeek egiten dituzten jarduketa guztien jarraipena egitea ikuspegi integratzailearekin, jardun-eremu beraren barruan.

g) Dagokion lurralde-eremuan langile autonomoen eta gizarte-ekonomiaren ordezkari diren elkarteekin hitz egitea. Horrek ez du galarazten, nolanahi ere, beste eragile ekonomiko eta sozial batzuekin hitz egitea enplegurako orientazioaren eta berrikuntzaren arloan.

Aipatutako eginkizunak betetzean, enplegu-zerbitzu publikoek genero-ikuspegia integratuko dute modu eraginkorrean.

Eginkizun horiek gauzatzeko, urteko lan-programa bat egin behar da.

Estatuko Enplegu Zerbitzu Publikoaren Zuzendaritza Nagusiaren 2022ko maiatzaren 12ko Ebazpenaren bidez, Nafarroako Foru Komunitateko Orientazio eta Ekintzailetza Zentroa kalifikatzen da (Estatuko Aldizkari Ofiziala, 181. zk., 2022ko uztailaren 29koa).

2022., 2023. eta 2024. urteetan, NL-NEZen Orientazio eta Ekintzailetza Zentroaren urteko lan-planak egin dira, Suspertze, Eraldatze eta Erresilientzia Planean jasotako «Konpetentzia Digitalen Plan Nazionala» «Lan-merkatu dinamiko, erresiliente eta inklusibo baterako Politika Publiko Berriak» inbertsio-proiektuak gauzatzeko Suspertze eta Erresilientzia Mekanismoaren funtsek finantzaturik.

Nafar Lansare-Nafarroako Enplegu Zerbitzua erakunde autonomoaren estatutuak onesten dituen otsailaren 7ko 13/2024 Foru Dekretuak, 2. artikuluan, Nafar Lansare-Nafarroako Enplegu Zerbitzuaren eskumen-eremua ezartzen du. Zehazki, adierazten du Nafar Lansare-Nafarroako Enplegu Zerbitzuari dagokiola gizarte-eragileekin adostutako enplegu-politikak planifikatzearekin, gauzatzearekin, ebaluatzearekin eta kontrolatzearekin lotuta Nafarroako Foru Komunitateko Administrazioari esleitutako eskumenak erabiltzea, gai hauei dagokienez ezartzen diren zerbitzu eta programak modu koordinatuan kudeatuz: enplegurako prestakuntza, lanbide-orientazioa, enpresei bitartekaritza- eta aholkularitza-zerbitzuak ematea, lana aurkitzea; enplegua sustatzea; nork bere lana sortzeko eta ekintzailetzarako aholku ematea; lanpostua goratzea; aukera-berdintasuna eta lan-munduan sartzea; eta Nafarroako enpleguaren egoeraren eta enplegu-politiken azterketa.

2022tik 2024ra bitarteko lan-planen kudeaketan lortutako esperientzian oinarriturik, deialdi hau egiten da, zeinaren xedea baita Nafarroako Foru Komunitatearen eremuan enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzak arautzea.

Horrenbestez, Nafar Lansare-Nafarroako Enplegu Zerbitzuaren estatutuak onesten dituen otsailaren 7ko 13/2024 Foru Dekretuaren 14. artikuluan emandako ahalmenak erabiliz,

EBAZTEN DUT:

1. Nafarroako Foru Komunitatean enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzak emateko deialdia onestea.

2. Dirulaguntza emateko oinarri arautzaileak onestea. Ebazpen honen eranskinean bildu dira.

3. Deialdi honen konpromisoak betetzeko, aurrekontu-kreditu hauek baimentzen dira:

4. Ebazpena eta eranskinak Nafarroako Aldizkari Ofizialean argitaratzea, eta ohartaraztea deialdiak ez duela ondoriorik sortuko harik eta ebazpena aipatu aldizkarian argitaratu arte.

5. Ebazpen hau Lan Aktibaziorako eta Lurralde Koordinaziorako Zerbitzuari jakinaraztea.

6. Ebazpen honek ez du administrazio-bidea amaitzen, eta haren aurka gora jotzeko errekurtsoa jar daiteke, Eskubide Sozialetako, Ekonomia Sozialeko eta Enpleguko kontseilariari zuzendua, hilabeteko epean, argitaratu eta biharamunetik hasita. Administrazio publikoek zilegi dute administrazioarekiko auzi-errekurtsoa jartzea, eskumena duen ordena jurisdikzionalari zuzendua, bi hilabeteko epean, argitaratu eta biharamunetik hasita; eta horrek ez du galarazten Nafarroako Gobernuan aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan xedatutako moduan eta epeetan.

Iruñean, 2024ko urriaren 18an.–Nafar Lansare-Nafarroako Enplegu Zerbitzuko zuzendari kudeatzailea, Mirian Martón Pérez.

ERANSKINA.–OINARRI ARAUTZAILEAK

ENPLEGUAREN ETA EKINTZAILETZAREN ARLOKO PROIEKTU BERRITZAILE ETA ESPERIMENTALAK GAUZATZEKO DIRULAGUNTZEN DEIALDIAREN OINARRI ARAUTZAILEAK

1.–Xedea.

Oinarri hauen xedea da, Nafar Lansare-Nafarroako Enplegu Zerbitzuaren (NL-NEZ) Enplegurako Orientazio, Ekintzailetza, Laguntza eta Berrikuntza Zentroaren jardueren esparruan, Nafarroako Foru Komunitatearen eremuan enpleguaren eta ekintzailetzaren arloko proiektu berritzaile eta esperimentalak gauzatzeko dirulaguntzak emateko araubidea arautzea.

Deialdi honen xedea da esperimentatu eta ebaluatu ondotik enplegu-zerbitzuetara eskalatzen ahal diren enplegu eta ekintzailetzaren esparruko berrikuntza-proiektu pilotuak sustatzea, enplegu eta ekintzailetzaren arloko esku-hartzea eraldatzen lagundu dezaten.

2.–Dirulaguntzen entitate onuradunak.

Deialdi honen onuradun izan eta laguntzak eskatzen ahal dituzte erakunde hauek:

a) Nafarroako Toki Administrazioari buruzko uztailaren 2ko 6/1990 Foru Legearen 3.1 artikuluan aurreikusitako Nafarroako toki-entitateek, bai eta haien erakunde autonomoek eta enplegu-politika aktiboen arloan eskumenak dituzten entitateek ere.

b) Berezko nortasun juridikoa duten irabazi-asmorik gabeko entitate publiko edo pribatuek. c) Langile autonomoek, enpresek eta enpresa-elkarteek.

3.–Entitate onuradunek bete beharrekoak.

Deialdi honetan aipatzen diren dirulaguntzen onuradun izateko, entitateek baldintza hauek bete beharko dituzte:

a. Egoitza soziala eta fiskala Nafarroako Foru Komunitatean izatea.

b. Gutxienez 2 urteko esperientzia izatea enplegu- eta/edo ekintzailetza-jarduerak gauzatzen.

c. Zerga-arloko eta Gizarte Segurantzako betebeharrak egunean izatea, baita Nafarroako Foru Komunitateko Administrazioari edo haren erakunde autonomoei zorrak ordaintzeko betebeharrak ere.

d. Ez egotea dirulaguntzak eskuratzeko gaitasunaz gabeturik ebazpen irmoan ezarritako zehapenaren ondorioz, emakumeen eta gizonen arteko berdintasunaren arloko legeetan, Dirulaguntzei buruzko Foru Legean edo zergei buruzko lege orokorretan ezarritakoaren arabera.

e. Dirulaguntzen onuraduna izateko gainerako debeku-egoeretan ez egotea, zeinak jasotzen baitira Dirulaguntzei buruzko azaroaren 9ko 11/2005 Foru Legearen 13. artikuluko 2. eta 3. apartatuetan.

Eskaerak aurkezteko epea bukatzen den egunean bete beharko dira baldintza guztiak, eta, orobat, diruz laguntzen den jarduerak irauten duen bitartean.

4.–Proiektu diruz lagungarriak.

Ekintzailetzaren eta enpleguaren arloan ideia berriak, egiteko modu berriak edo metodologia berritzaileak dakartzaten proiektuak diseinatu, garatu eta gauzatzeko dirulaguntzak emanen dira, betiere NL-NEZen eskumen-esparruarekin eta haren Enplegurako Orientazio, Ekintzailetza, Laguntza eta Berrikuntza Zentroaren eginkizunekin bat badatoz.

Aurkeztutako proiektuak honelako ekimen berritzaileei buruzkoak izaten ahal dira:

–Ekintzailetzaren arloko metodologia eta tresna berrien diseinua eta prototipoak egitea dakartenak.

–Nafarroako ekintzailetza-ekosistemako eragileen arteko koordinazioan, dinamizazioan eta lankidetzan laguntzen dutenak.

–Enpleguaren arloko metodologia eta tresna berrien diseinua eta prototipoak egitea dakartenak.

–Nafarroako enplegu-ekosistemako eragileen arteko koordinazioan, dinamizazioan eta lankidetzan laguntzen dutenak.

–NL-NEZen eskumeneko den enpleguaren eta ekintzailetzaren arloko beste edozein ekimen berritzaile, betiere erakundearen helburu bererako beste deialdi batzuek diruz laguntzen ez badute.

Proiektuak dirulaguntza emateko ebazpenaren dataren eta 2025eko urriaren 31ren artean gauzatu beharko dira.

5.–Proiektuak baloratzeko eta dirulaguntzak emateko irizpideak.

Proiektuak baloratzeko irizpideak honako hauek izanen dira, eta gehienez ere 100 puntu lortzen ahalko dira:

1. Proiektuaren helburuak. Erantzun beharreko erronka eta proiektuaren helburu orokorra identifikatzeari dagokionez, argitasuna, zehaztasuna eta egokitasuna baloratuko dira.

10 puntu gehienez.

2. Proiektua gauzatzeko aplikatuko den proposamen metodologikoa. Proposatutako metodologiaren zehaztasuna eta egokitasuna baloratuko dira.

10 puntu gehienez.

3. Ekintza-plana. Helburuak lortzeko proiektuan proposatutako jardueren egokitasuna eta koherentzia baloratuko dira.

20 puntu gehienez.

4. Erabili behar diren aurrekontua eta baliabideak. Baloratuko da aurrekontua egokia eta koherentea den jarduerak egiteko eta proiektuan aurreikusiriko emaitzak lortzeko.

Gehienez: 10 puntu.

5. Izaera berritzailea. Proposatutako proiektuaren sormena eta berrikuntza baloratuko dira: ikuspegia, antolaketa, metodologia, produktua, teknologiak, onuradunek proiektuaren diseinuan eta gauzatzean parte hartzea, zer motatako kolektiboa izanen den proiektuaren hartzailea…

25 puntu gehienez.

6. Ebaluazio sistema. Proiektua ebaluatzeko proposamena baloratuko da. Aurreikusitako adierazleen identifikazioa eta kuantifikazioa jaso beharko ditu, baita horiek egiaztatzeko iturriak ere.

Gehienez ere 10 puntu.

7. Transferentzia. Proiektua transferitzeko proposamena baloratuko da. 5 puntu gehienez.

8. Lurralde-irismena: Koherentzia egotea lurralde-diagnostikoaren, proposatutako neurrien eta proiektuaren eraginaren artean.

5 puntu gehienez.

9. Ingurumen-jasangarritasunerako neurriak. 5 puntu gehienez.

Dirulaguntzaren xedea proiektu berritzaile eta esperimentalak gauzatzea denez, diruz lagundu beharreko proiektuek gutxienez 15 puntu lortu beharko dituzte izaera berritzailearen atalean, eta, guztira, gutxienez 50 puntu. Gutxieneko puntuazio hori lortzen ez duten proiektuak ukatu eginen dira.

Horretaz gain, genero-ikuspegia sartu beharko dute proiektu guztiek, egite-fasean zein gauzatze-fasean, eta proiektuaren memorian dagokion atalean adierazi beharko da.

6.–Gastu diruz lagungarriak.

Honako gastu hauek dira diruz lagungarriak:

a) Langile-kostuak Langile-gastuen kontzeptuan honako zenbateko hauek ordainduko dira modulu gisa:

–Koordinatzaileak: 29 euro/ordu; gehienez, proiekturari esleitutako pertsonal-orduen % 10.

–Teknikariak: 24 euro/ordu.

–Laguntzaileak: 19 euro/ordu; gehienez, proiekturari esleitutako pertsonal-orduen % 20.

b) Kostu orokorrak: proiektuari egotzitako langile-kostu guztien % 25 ordainduko da, gehienez ere. Gastu horiek behar bezala justifikatu beharko dira, eta kontzeptu hauei dagozkie:

–Proiektuak gauzatzeko sortzen diren materialak eta hornidurak.

–Proiektuaren xede diren jarduerak gauzatzearekin lotura zuzena duten langileen bidaiak eta dietak.

–Proiektuan jasota dauden onuradunentzako jarduera puntualak egiteko aretoak alokatzea, baldin eta ez badira egiten ahal proiektua sustatzen duen entitateak Nafarroako Foru Komunitatean izan behar dituen instalazioetan.

Entitateaz kanpoko profesionalak proiektuan jasotzen den jarduera jakin bat egiteko kasu puntualetan kontratatzeari loturiko zerbitzu tekniko eta profesionalak.

Proiektuen hartzaileen istripu-aseguruak. Gastuek bat etorri beharko dute proiektua gauzatzeko datekin.

7.–Dirulaguntzaren zenbatekoa eta banaketa.

Dirulaguntzaren zenbatekoa gehienez ere 30.000 eurokoa izanen da proiektu bakoitzeko. Entitate bera ez da izaten ahalko bi proiektu baino gehiagoren onuradun, salbu eta aurrekontu aski bada eta ez badago onetsita beste entitateren baten proiekturik.

Proiektuak aurkeztu ondotik, unitate kudeatzaileak dirulaguntza lehentasun-ordenari jarraikiz banatuko du proiektuen artean, 5. oinarrian ezarritako puntuazio-irizpideen arabera, harik eta dirulaguntzaren zenbatekoa agortu arte, betiere proposamenek 5. oinarri horretan ezarritako gutxieneko puntuazioa erdietsi badute.

Gerakinik balego, baina ez nahikoa puntuazioaren arabera dirulaguntza jaso beharko lukeen hurrengo proiektuak eskatutako dirulaguntzari erantzuteko, eskatzaileari eskatuko zaio proiektua berregin dezan, gelditzen den zenbatekoari doitzeko. Eskatzaileak proiektua berregiten ahalko du, edo eskaera bertan behera utzi; bertan behera uzten badu, puntuazioan hurrengo den eskatzaileari, halakorik badago, gauza bera eskatuko zaio, baldin eta gainerako irizpideak betetzen baditu.

Nolanahi ere, proiektua berregitean dirulaguntzaren xedea, baldintzak eta helburuak errespetatu beharko dira, bai eta eskaeretarako ezarritako balorazio irizpideak ere.

8.–Eskaerak egiteko modua eta aurkezteko epea.

8.1. Eskaerak aurkezteko epea 15 egun baliodunekoa izanen da, deialdi hau Nafarroako Aldizkari Ofizialean argitaratu eta biharamunetik hasita.

8.2. Eskaerak elektronikoki tramitatuko dira Nafarroako Atarian, "Tramiteak" atalean dagoen deialdiaren fitxan, "Tramitatu" aukeratuz. (aurrerantzean, laguntzen fitxa).

Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.8 eta 66.6 artikuluetan xedatutakoari jarraikiz, ez dira aurkeztutzat hartuko laguntzen fitxan dagoen eredura egokitzen ez diren eskaerak, ez eta telematikoki eta aipatutako fitxaren bitartez aurkezten ez direnak ere. Horrenbestez, ez-aurkeztutzat jotzen direnez, eskaera horiek ez dira zuzentzen ahalko.

Dokumentazio hau aurkeztu beharko da eskaerarekin batera, laguntzen fitxan eskura dauden ereduen araberakoa, betiere:

a) Proiektuaren memoria.

b) Proiektuaren aurrekontua:

c) Erantzukizunpeko adierazpenen inprimakia.

8.3. Eskaera aurkezteak berekin dakar deialdi hau arautzen duten oinarriak onartzea. Halaber, eskaera aurkeztean baimena ematen zaio Nafar Lansare-Nafarroako Enplegu Zerbitzuari eskaera ebazteko behar den informazioa kontsultatzeko eta administrazio publikoek egiten edo gordetzen duten dokumentazioa eskuratzeko. Horren aurka berariaz egonez gero, dagokion dokumentazio aurkeztu beharko da.

8.4. Ez dira berriz aurkeztu beharko entitate eskatzaileak edozein administraziori lehendik aurkeztu dizkion agiriak, ez eta administrazioak berak eginak direnak ere. Ondorio horietarako, interesdunak adierazi beharko du noiz eta zer administrazio-organoren aurrean aurkeztu zituen dokumentu horiek, eta Nafar Lansare-Nafarroako Enplegu Zerbitzuak elektronikoki eskatu beharko ditu, salbu eta interesdunak espresuki kontra egin duela adierazten bada; kasu horretan, dagokion dokumentazioa aurkeztu beharko du, Administrazio Publikoen Administrazio Prozedura Erkidearen urriaren 1eko 39/2015 Legearen 28.3 artikuluan aurreikusita dagoenaren arabera. Salbuespen gisa, aipatu organoak ezin baditu agiri horiek eskuratu, berriz aurkez ditzan eskatzen ahalko dio entitate interesdunari.

9.–Instrukzioa eta tramitazioa.

9.1. Prozeduraren instrukzioa eta tramitazioa Nafar Lansare-Nafarroako Enplegu Zerbitzuko Lan Aktibaziorako eta Lurralde Koordinaziorako Zerbitzuari dagozkio.

9.2. NL-NEZeko Lan Aktibaziorako eta Lurralde Koordinaziorako Zerbitzuak ebaluatuko ditu aurkeztu diren proiektuak, deialdi honen 5. oinarrian zehaztu diren irizpideen arabera.

Egindako ebaluazioa ikusirik, organo kudeatzaileak NL-NEZeko zuzendari kudeatzaileari helaraziko dio ebazpen-proposamen bat. Horretan, zerrendatuko da zer entitate eskatzaileri eta zenbateko dirulaguntza ematea proposatzen den eta zer puntuazio esleitu zaien.

10.–Dirulaguntzak emateko prozedura.

Dirulaguntzak emateko prozedura norgehiagokako araubidearen bidez tramitatuko da, Dirulaguntzei buruzko Foru Legearen 17.1 artikuluan xedaturikoari jarraikiz. Prozedura honen funtsa aurkezturiko eskabideen konparaketa egitea da, proiektuak baloratzea, beraien artean lehentasunen bat ezartze aldera. Baloraziorik hoberena lortu dutenei adjudikatzen zaizkie dirulaguntzak, deialdian adieraziriko kreditu erabilgarriaren baitan zehazturiko mugetan.

11.–Dirulaguntza emateko ebazpena.

11.1. NL-NEZko zuzendari kudeatzaileak, instrukzio-organoak egindako proposamena jasorik, ebatziko du dirulaguntza eman edo ukatzen den.

Ebazpena gehienez ere bi hilabetean eman eta jakinaraziko da, eskaera aurkezten denetik hasita. Epe hori berariazko ebazpenik jakinarazi gabe bukatzen bada, aurkezturiko eskaera ezetsi egin dela ulertuko da, deusetan galarazi gabe organo eskudunak ebazpena emateko duen betebeharra.

11.2. Ebazpena entitate eskatzaileari jakinaraziko zaio, dirulaguntza eman edo ukatzearen arrazoiak adierazita.

11.3. Eskaeraren gaineko presuntziozko edo berariazko ebazpenaren aurka gora jotzeko errekurtsoa aurkezten ahalko da Nafarroako Gobernuko Eskubide Sozialetako, Ekonomia Sozialeko eta Enpleguko kontseilariari zuzendua, jakinarazi eta biharamunetik hasita hilabeteko epean. Ebazpena berariazkoa ez bada, noiznahi aurkezten ahalko da errekurtsoa, ebazteko gehieneko epea bukatu eta biharamunetik hasita.

11.4. Instrukzio-organoak egiaztatu ondotik eskaeraren xedeko jarduketa egin dela eta enplegatzailea egunean dagoela bere zerga-arloko eta Gizarte Segurantzaren arloko betebeharretan, dirulaguntza ordainduko da.

12.–Dirulaguntzaren ordainketa eta justifikazioa.

Dirulaguntza ordain dakion, entitate onuradunak justifikazio-agiri hauek aurkeztu beharko ditu 2025eko azaroaren 22a baino lehenago:

a. Dirulaguntza emateko orduan ezarritako baldintzak betetzen dituela frogatzeko jarduketa-memoria bat, laguntzen fitxan eskuragarri dagoen ereduaren araberakoa.

b. Justifikazio-memoria ekonomikoa, laguntzen fitxan eskuragarri dagoen ereduaren araberakoa.

c. Proiektuan aurreikusitakoaren arabera entregatzeko diren agiriak.

13.–Erakunde onuradunaren betebeharrak:

13.1. Onuradunek Dirulaguntzei buruzko azaroaren 9ko 11/2005 Foru Legearen 9. artikuluan ezarritako betebehar orokorrak bete beharko dituzte.

13.2. Zehazki, beranduenez ere proiektua hasten den egunean, honako hauek bidali behar dituzte NL-NEZera:

a) Proiektua hasiko delako jakinarazpena. Ezarritako epean ez jakinarazteak zigor bat ekarriko du berekin, emandako zenbatekoa txikitzea, hasiera jakinarazi behar zen egunetik jakinarazi gabe iragan diren egunen zati proportzionala kenduta.

b) Proiektuari atxikitako lantaldearen aurkezpena, parte-hartzaile bakoitzaren titulazio akademikoa eta lanbide-esperientzia adierazita.

c) Proiektua hastean, proiektuan zehar egin beharreko jarduera osoaren plangintza eta egutegi zehatza aurkeztea.

13.3. Aldez aurreko betebehar horiez gain, entitate onuradunek honako betebehar hauek izanen dituzte:

a) Dirulaguntzaren xedeko jarduera deialdian eta entitateak aurkeztutako memorian ezarritako moduan eta epean egitea.

b) Talde teknikoaren altak, bajak eta ordezkapenak NL-NEZi jakinaraztea.

c) Egindako jarduerak NL-NEZen aplikazioetan (Orientare, SISPE…) grabatzea, hala badagokio.

d) NL-NEZak edo beste kontrol-erakunde batzuek egin beharreko egiaztapen-, jarraipen- eta kontrol-lanak onartzea.

e) Nafar Lansare-Nafarroako Enplegu Zerbitzuari ezagutzera ematea ea beste administrazio edo entitate publiko edo pribatu batzuek, nazionalek nahiz nazioartekoek, xede bererako emandako bestelako dirulaguntzarik, laguntzarik, diru-sarrerarik edo baliabiderik jaso den, bai eta dirulaguntzak emateko kontuan harturiko xedeak edo baldintzak aldatu diren ere.

f) Aurreikusitako adierazleak betetzen direla NL-NEZi behar bezala justifikatzea.

g) Jasotako diruaren erabilerari buruzko frogagiriak gordetzea, agiri elektronikoak barne, egiaztatze- eta kontrol-lanen xede izaten ahal diren bitartean.

h) Diruz lagundutako jarduerak izaera publikoa duela agerraraztea. Diruz laguntzen diren programen hedapen eta garapenarekin zerikusia duten jarduketa guztietan, gutxienez, Nafarroako Gobernuaren ikurra sartu beharko da, eta NL-NEZarekiko lankidetza aipatu. Horiek guztiak lehentasunezko tokian jarriko dira, eta ez dira inola ere entitate onuradunaren ikurra baino txikiagoak izanen. Betiere proportzioak eta jatorrizko gama kromatikoa errespetatuko dira.

Entitateak deialdi hau jakinarazi eta zabaltzeko erabiltzen dituen dokumentazio, publizitate, irudi edo material guztietan, hizkuntzaren erabilera ez-sexista egin beharko da, emakumeak diskriminatzen dituen edozein eredu edo estereotipo sexista baztertu, eta berdintasun-balioetan, presentzia orekatuan eta rolen eta genero-identitateen aniztasunean oinarrituriko irudia sustatu.

i) Nafar Lansare-Nafarroako Enplegu Zerbitzuari jakinaraztea laguntzen jarraipena egiteko behar duen informazio guztia.

j) Istripu-aseguruko poliza bat izenpetzea, proiektuak hasi baino lehen. Poliza hori gauzapen-aldiari, egin asmo diren jarduketei eta eguneroko ordutegiari egokituko zaizkie. "In itinere" istripuen gastuak eta proiektuko parte-hartzaileekin egindako mugikortasun-jardueretatik eratorritako arriskuak estali beharko ditu eta jarduketak gauzatzeko laguntza eman.

Polizak hirugarrenen aurreko erantzukizun zibila ere estali beharko du, programa gauzatu bitartean parte-hartzaileek eragindako kalteak estaltzeko eta Nafar Lansare-Nafarroako Enplegu Zerbitzua horren gaineko erantzukizun orotatik salbuesteko. Aseguru-poliza kolektibo bat sinatzen ahalko da, adierazitako baldintzekin, parte-hartzaile guztiak estaltzeko.

Parte-hartzaileek ez diote proiektuari hasiera ematen ahalko istripu-aseguruko poliza sinatu ez bada. Polizak, gutxienez, honako estaldura hauek izanen ditu:

–Heriotza, istripuagatik.

–Baliaezintasun iraunkorra (partziala, osoa edo absolutua) eta baliaezintasun handia istripuagatik. Baremoaren araberakoa izanen da.

–Osasun-laguntza mugagabea, istripuagatik.

14.–Gardentasun-betebeharrak.

Gardentasunari, Informazio Publikoa Eskuratzeari eta Gobernu Onari buruzko maiatzaren 17ko 5/2018 Foru Legearen 3.c) artikuluan aipatutako entitate pribatuak behartuak daude gardentasun-betebeharra betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak beren urteko diru-sarrera guztien % 20 edo gehiago badira eta, gutxienez, 5.000 euro.

Aipatu diren inguruabarrak gertatzeagatik gardentasun-betebeharrak dituzten erakunde onuradunek jarraian adierazten den informazioa eman beharko dute hilabeteko epean, dirulaguntza emateko ebazpena jakinarazten denetik kontatzen hasita:

a) Entitatearen gobernu-, administrazio- eta zuzendaritza-organoen konposizioa.

b) Organo horiek osatzen dituzten kargudunen zerrenda.

c) Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak, kontzeptuz kontzeptu. Sortu berriak diren erakundeen kasuan, informazioa izanen da haien aurrekontuetan edo plan ekonomiko-finantzarioan adierazitakoa.

d) Entitatearen gobernu-, administrazio- eta zuzendaritza-eginkizunetan gertatzen den dedikazioaren araubidea.

e) Onuradunaren urteko azken kontuen kopia bat.

Informazio hori entitate onuradunaren legezko ordezkariak sinatuta aurkeztuko da, telematikoki, Nafarroako Gobernuaren Erregistro Orokor Elektronikoaren bidez, eta dirulaguntza kudeatzen duen administrazio-unitateari zuzenduko zaio.

Entitateak gardentasun-betebeharra bete behar ez badu, aurreikusitako inguruabarrak gertatzen ez direlako, horren gaineko aitorpena aurkeztu beharko du.

Entitateak dirulaguntza bat baino gehiago jasotzen badu ekitaldi berean, ez du informazioa errepikatu beharko dirulaguntza bakoitzerako, salbu eta hasieran eman zituen datuak aldatzen badira. Horretarako, entitateak identifikatu beharko du Foru Komunitateko Administrazioaren zein organoren aurrean aurkeztu zuen, eta noiz.

Betebehar hori bete ezean, emandako dirulaguntza ez da ordainduko, ezta aurrerakinak ere, eta, kasua bada, kobratutako zenbatekoak itzuli egin beharko dira, Dirulaguntzei buruzko azaroaren 9ko 11/2005 Foru Legearen 35.1.c) artikuluan ezarritakoari jarraikiz.

Aurrekoa galarazi gabe, errekerimendua eginez gero, onuradun guztiak behartuta egonen dira unitate kudeatzaileari behar den informazio guztia ematera hamar eguneko epean, frogatzeko betetzen dituztela Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen II. tituluan jasotako gardentasun-betebeharrak.

Errekerimenduan emandako epea bukatzen bada eskatutakoa bete gabe, hertsapen-isunak ezartzea erabakitzen ahalko da, 500 eurotik 5.000 eurora bitartekoak, interesdunari ohartarazpena egin ondotik eta entzunaldia emanda. Isuna hamabost egunetik behin errepikatuko da, errekerimendua bete arte. Isunaren zenbateko osoa ez da izanen dirulaguntzaren zenbatekoaren ehuneko bost baino handiagoa. Zenbatekoa zehazteko, ez betetzearen astuntasuna eta proportzionaltasunaren printzipioa hartuko dira kontuan.

15.–Dirulaguntzen bateragarritasuna.

Deialdi honen xedeko dirulaguntzak ez dira bateragarriak helburu berarekin jarduera berak garatzeko ematen diren beste dirulaguntza batzuekin, administrazio honek edo eskualdeko, tokiko, nazioko edo Europako beste administrazio publiko batzuek edo erakunde publiko zein pribatuek eman.

16.–"De minimis" laguntza.

Enplegu-zentro berezientzat eta laneratzeko enpresentzat izan ezik, langile autonomoentzat, enpresentzat eta enpresa-elkarteentzat (2.c oinarrian aurreikusita) "de minimis" laguntzen izaera dute deialdi honetan aurreikusitako dirulaguntzek, bai eta prestakuntzarako laguntzek eta kontrataziorako pizgarriek ere, Batzordearen 2023ko abenduaren 13ko 2023/2831 Erregelamenduan aurreikusitakoarekin bat (Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeari buruzkoa –2023ko abenduaren 15eko EBAO, 2831 zk.–).

Erregelamendu horrekin bat, enpresa bakar bati hiru urteko zerga-ekitaldiko edozein alditan emandako "de minimis" laguntza guztien batura ezin da 300.000 eurotik gorakoa izan. Enpresa bakarraren definizioa aipatu erregelamenduaren 2.2 artikuluan ezarrita dago.

Horretarako, entitate interesdunek kasuan kasuko urteko ekitaldian eta aurreko bi urteetako ekitaldietan hartutako bestelako "de minimis" laguntzak aitortu beharko dituzte eskaeran.

Entitate publikoentzat eta irabazi-asmorik gabeko entitateentzat (2.a eta 2.b oinarrietan aurreikusita), berriz, Enplegu Sistema Nazionalean enplegua aktibatzeko programa komunak arautzen dituen irailaren 28ko 818/2021 Errege Dekretuaren zazpigarren xedapen gehigarriak ezartzen du barne-merkatuarekin bateragarriak direla entitate publikoei eta irabazi-asmorik gabeko entitateei ematen zaizkien araudi horretan araututako laguntzak.

17.–Azpikontratazioa.

Entitate onuradunek ez dute hirugarrenekin azpikontratatzen ahalko.

18.–Onetsiriko proiektuen aldaketak.

18.1. Proiektuak edo dirulaguntzak ematerakoan kontuan hartutako baldintzak aldatu aurretik, horren berri eman beharko zaio Nafar Lansare-Nafarroako Enplegu Zerbitzuari, haietarako baimena eman dezan.

18.2. Aldaketa egiteko eskaeretan behar bezain ongi azaldu beharko da aldaketarako arrazoia, edo zer arazo sortu den proiektua hasieran pentsatu bezala ez egiteko. Horrelako eskaerak proposatu nahi den aldaketa hasi baino gutxienez 5 egun natural lehenago aurkeztu beharko dira.

18.3. Aldaketa horiek funtsezkotzat jotzen badira, NL-NEZek ebazpen bat emanen du onartutako dirulaguntzaren zenbatekoa gutxitu edo bertan behera uzten ahalko duena, kasua bada, egindako aldaketen garrantziaren proportzioan betiere.

19.–Jarraipena eta ebaluazioa.

19.1. Nafar Lansare-Nafarroako Enplegu Zerbitzuak beharrezko zeregin guztiak eginen ditu programak ebaluatu eta haiei jarraipena egiteko. Entitate onuradunek behar diren datu, agiri eta informazio guztiak emanen dituzte egindako jarduketa ebaluatzeko, justifikatzeko, jarraipena egiteko eta kontrolatzeko.

19.2. NL-NEZek laguntzaren xedeko jarduketak ikuskatzen ahalko ditu, dirulaguntzak ematean aintzat hartutako eta ezarritako baldintza eta zehaztapenekin bat ote datozen egiaztatzeko. Horretarako, beharrezkoak diren bisitak eginen ditu, baita dirulaguntza jaso duten jarduerak egiten diren tokietara ere, beharrezkoa bada, horien betetze-maila ebaluatze aldera.

19.3. Jarraipen Batzorde bat osatuko da, organo kudeatzaileko eta erakunde onuraduneko profesionalek osatua, zehazten den aldizkakotasunez elkartuko dena.

Uneoro, aitzinetik bi aldeek hala adostuta, Batzorde horren konposizioa areagotzen ahalko da, eta lanbide-profil jakinak izatea eskatzen ahalko da, jorratzeko gaien arabera.

Hauek izanen dira Batzordeari esleitutako zeregin nagusiak:

–Helburuak eta jarduerak berrikustea.

–Egokiak diren aurreikuspenak egitea.

–Proiektuan egindako lana NL-NEZekin koordinatzea.

–Proiektua egikaritzean sortzen ahal diren zailtasunak ebaztea.

Saio horietan, erakunde onuradunak garatutako ekintzen jarraipena egiteko txostenak eta eskatzen ahal zaion beste edozein dokumentazio helaraziko du. Horretarako, hori egiteko maiztasuna eta modua erakundearekin adostuko da.

20.–Dirulaguntzen publizitatea.

Dirulaguntzei buruzko azaroaren 9ko 11/2005 Foru Legearen 15. artikuluan xedatutakoarekin bat, Lan Aktibaziorako eta Lurralde Koordinaziorako Zerbitzuak jendaurrean jarriko ditu emandako dirulaguntzak Nafarroako Atarian (www.nafarroa.eus), eta bertan adieraziko dira deialdia, aurrekontuko zein programari eta kredituri egotzi zaizkien, onuraduna, emandako zenbatekoa eta dirulaguntzaren xedea. Estatuko Administrazioko Kontu-hartzailetza Nagusiak ere argitaratuko ditu datu horiek bere web-orrian, Dirulaguntzei buruzko azaroaren 17ko 38/2003 Lege Orokorraren 20.8 artikuluan xedatutakoarekin bat.

21.–Datuen babesa.

Deialdi honek ezartzen duena betetzeko beharrezkoak diren datu pertsonalen tratamendua honako arau hauen arabera eginen da: 2016/679 (EB) Erregelamendua, apirilaren 27koa, Europako Parlamentuarena eta Kontseiluarena, datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa, eta 95/46/EE Zuzentaraua indargabetzen duena; 3/2018 Lege Organikoa, abenduaren 5ekoa, Datu Pertsonalak Babesteko eta Eskubide Digitalen Bermatzekoa; eta garapenerako gainerako arauak, hari aurka egiten ez dioten heinean.

Entitate onuradunen ardura izanen da programetan parte hartzen duten pertsonei aipatu Erregelamenduaren (EB) 13. artikuluan adierazitako informazioa ematea.

Halaber, organo kudeatzaileak programetako parte-hartzaileen lan-bizitzak kontsultatu ditzan, entitate onuradunek dagozkien baimenak eskatu behar dizkiete horiei.

22.–Betebeharrak ez betetzea eta dirulaguntzak itzultzea.

22.1. Hartutako zenbatekoa itzuli egin beharko da, osorik edo partez, baldin eta programa gauzatzen ez bada, dirulaguntza emateko ezarritako baldintzak betetzen ez badira, Dirulaguntzei buruzko Foru Legearen 35. artikuluan aipatzen diren zergatikoak gertatzen badira edo oinarri hauetan berariaz aipatzen diren betebeharrak betetzen ez badira. Legez ezarritako kasuetan, gainera, bidezkoa izanen da dirulaguntza ordaindu zenetik itzuli beharraren gaineko ebazpena ematen den arte sortutako berandutze-interesak ordaintzeko eskatzea.

22.2. Ezarritako epean justifikatzen ez bada, onartutako dirulaguntza kobratzeko eskubidea galduko da eta aurreratutako zenbatekoak itzuli beharko dira, berandutze-interesak barne.

22.3. Dirulaguntza erabiltzen baldin bada eman zen helburuetarako ez beste batzuetarako, eta aldaketa horren berri NL-NEZi ematen ez bazaio, dirulaguntza osoa itzuli beharko da, berandutze-interesak barne, ezar daitekeen zehapena galarazi gabe.

Entitate onuradunak dirulaguntza emateko aintzat harturiko baldintzen edo programen aldaketa jakinarazi eta Nafar Lansare-Nafarroako Enplegu Zerbitzuak onartu badu, dirua itzultzea beharrezkoa bada, ez da berandutze-interesik eskatuko.

22.4. Entitate onuraduna ezarritako baldintza guztiak arras betetzetik aski hurbil gelditu bada eta egiaztatzen badu konpromisoak betetzera bideratu duela bere jarduna, baldintzak ez betetzearen bolumenaren eta mailaren araberakoa izanen da emandako dirulaguntzaren kenkaria, proportzionaltasun-irizpideari jarraikiz. Deialdi honen ondorioetarako, "esanguratsutzat" joko da onetsitako proiektuaren % 75 betetzea.

Entitateak ez baditu betetzen proiektuan aurreikusitako adierazleak, emandako zenbatekoaren ehuneko jakin bat itzultzea ekartzen ahal du ez betetzeak:

–% 5, adierazlean islatutako zenbatekoa ez betetzea % 26rainokoa bada.

–% 10, ez betetzea % 27ren eta % 50en artekoa bada.

–% 15, ez betetzea % 51ren eta % 75 artekoa bada. Eta % 20, ez betetzea % 75etik gorakoa bada.

22.5. Erakunde onuradunak organo kudeatzaileari eskatzen ahalko dio dirulaguntzaren zati bat bere borondatez itzultzeko. Entitateak bere borondatez itzultzen badu dirua eta, Dirulaguntzei buruzko azaroaren 9ko 11/2005 Foru Legearen 35. artikuluan xedatutakoa aplikatuz, bidezkoa bada berandutze-interesak aplikatzea, horiek kalkulatuko dira dirua itzultzen duen arte.

23.–Zehapen araubidea.

Arau-hauste eta zehapenen araubideari dagokionez, Dirulaguntzei buruzko azaroaren 9ko 11/2005 Foru Legearen IV. tituluan xedaturikoa aplikatuko da.

24.–Errekurtsoak.

Pertsona edo entitate interesdunek gora jotzeko errekurtsoa jartzen ahalko dute oinarri arautzaile hauen aurka eta haien aplikazioaren ondoriozko egintzen aurka, Eskubide Sozialetako, Ekonomia Sozialeko eta Enpleguko kontseilariari zuzendua, hilabeteko epean, Nafarroako Aldizkari Ofizialean argitaratu edo jakinarazi eta biharamunetik hasita, bat etorrita Administrazio Publikoen Administrazio Prozedura Erkideari buruzko urriaren 1eko 39/2015 Legearen 122.1 artikuluan eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 126.3 artikuluan xedatutakoarekin. Errekurritutako egintza berariazkoa ez bada, edozein unetan jartzen ahalko da gora jotzeko errekurtsoa, isiltasun administratiboaren ondorioak hasi eta biharamunetik aurrera.

Iragarkiaren kodea: F2415596