Iragarkia

240. ALDIZKARIA - 2024ko azaroaren 26a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

174C/2024 EBAZPENA, urriaren 28koa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Bolsas Osés SL enpresaren hitzarmen kolektiboa erregistratzea, gordailutzea eta Nafarroako Aldizkari Ofizialean argitaratzea.

Ikusi da Bolsas Osés SL enpresak aurkeztutako hitzarmen kolektiboa (kode zenbakia: 31102262012024), erregistro honetan sartu baitzen 2024ko irailaren 5ean, 2024ko uztailaren 5ean enpresaren eta sindikatuen ordezkaritzek sinatu ondotik.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz,

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau,

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea Bolsas Osés SL enpresak aurkeztutako hitzarmen kolektiboa (kode zenbakia: 31102262012024).

Bigarrena.–Nafarroako Aldizkari Ofizialean argitara dadila xedatzea, orok jakin dezaten.

Hirugarrena.–Ebazpen hau eskatzaileari jakinaraztea, eta ohartaraztea ebazpenak ez diola bukaera ematen administrazio-bideari eta, honen aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko urriaren 28an.–Ekonomia Sozialeko eta Laneko zuzendari nagusia, Iñaki Mendióroz Casallo.

BOLSAS OSÉS SL ENPRESAREN HITZARMEN KOLEKTIBOA

1 artikulua. Lurralde eremua eta eremu funtzionala.

Bolsas Osés SL enpresako langileen legezko ordezkariek eta zuzendaritzak sinatzen dute hitzarmen hau, eta aplikatzekoa izanen zaie ontzi malguak fabrikatzen eta inprimatzen jarduten duen Bolsas Osés SL enpresako langile guztiei, eta, zehazki, I. eta II. eranskinetan jasotako lanbide-taldeetako eta mailetako langile guztiei.

2. artikulua. Denbora-eremua.

Hitzarmen honek 2024ko urtarrilaren 1etik 2027ko abenduaren 31 arte izanen du indarra.

3. artikulua. Hitzarmena salatzea eta indarraldia luzatzea.

Hitzarmena automatikoki salatutzat joko da indarraldia bukatu bezain pronto.

Itundutako iraupena bukatu ondotik, indarrean jarraituko du hitzarmen honek, harik eta ordezkoak indarra hartu arte.

4. artikulua. Urteko lanaldia.

Hau izanen da hitzarmenaren indarraldiko urte bakoitzeko urteko lanaldia:

–2024. urtea: 1.760 ordu.

–2025. urtea: 1.736 ordu.

–2026. urtea: 1.720 ordu.

–2027. urtea: 1.700 ordu.

Aurrekoa gorabehera, hitzarmen honek indarra hartu aurretik artikulu honetan ezarritakoa baino lanaldi laburragoan ziharduten langileek eutsi eginen diote urteko lanaldi horri.

Langileek norberaren eginkizunetarako bi egun baliatzen ahalko dituzte, zeinak benetako laneguntzat hartuko baitira urteko orduak zenbatzeari dagokionez. Egun horiek gozatu ahal izateko, 72 ordu lehenago jakinarazi beharko dute. Egunok hartzeko, gainera, inguruabar hauek bete beharko dira:

– Ez dituzte hartzen ahalko aldi berean funtzio berberak betetzen dituzten bi pertsonak edo gehiagok, eta ez dira egoten ahalko oporretan batera plantilla osoaren % 30 baino gehiago egun edo txanda bakoitzeko.

– Ez dira eskatzen ahalko oporraldien aurreko edo ondoko asteetan.

– Bi pertsonak edo gehiagok data berean eskatzen badituzte, eskabidearen hurrenkeraren arabera ezarriko da lehentasuna.

– Enpresak ukatzen ahalko du egunak hartzea baldin eta ezezkoa justifikatzeko adina ekoizpen-gailur gertatzen badira eta ezinezkoa bada lanpostu hori plantillako norbaitekin betetzea.

Gehiegizko lanaldiko orduak hitzarmen honen 6. artikuluan aurreikusitakoaren arabera baliatuko dira.

5. artikulua. Oporrak.

Urtean 22 lanegun izanen dira opor, eta horietatik 20 ekainetik irailera bitartean hartuko dira, batez ere enpresa udan ixten den asteetan (halakorik gertatzen bada). Gainerako 2 egunak elkarren segidan hartuko dira langile bakoitzaren lan-egutegian, urteko gainerako garaietan.

6. artikulua. Gehiegizko lanaldiko egunak.

Enpresan lehenago egin den bezala hartuko dira gehiegizko lanaldiko egunak.

Hartara, enpresak 48 orduko aurrerapenarekin adierazten ahalko ditu gehiegizko lanegunak. 48 ordu lehenago abisatzea eragozten duten ustekabeko inguruabarren kasuan, 24 ordu lehenago abisatzen ahalko da.

Hori gorabehera, langileek baldintza hauei jarraikiz eskatzen ahalko dute gehiegizko lanaldiko egunak hartzea:

a) Egunok idatziz eskatuko dira, ahalik eta aurreabisu-eperik handienarekin. Horretarako, mezu bat bidaliko da produccion@bolsasoses.com helbide elektronikora.

Enpresak justifikazio gehiagorik gabe ukatzen ahalko ditu gutxienez 5 laneguneko aurreabisua betetzen ez duten egun bateko opor-eskaerak (enpresak gutxienez 48 lehenago erantzun beharko du, salbu eta aurrerapen txikiagoarekin eskatzen badira), eta justifikazio gehiagorik gabe ukatzen ahalko ditu, orobat, gutxienez 15 egun naturaleko aurreabisua betetzen ez duten ondoz ondoko 2 egun edo gehiagoko opor-eskaerak (enpresak gutxienez 5 egun lehenago erantzun beharko du, salbu eta aurrerapen txikiagoarekin eskatzen badira).

b) Ez dituzte egunok hartzen ahalko aldi berean funtzio berberak betetzen dituzten bi pertsonak, eta ez dira batera egoten ahalko plantilla osoaren % 30 baino gehiago egun edo txanda bakoitzeko.

c) Ez dira egunok eskatzen ahalko oporraldien aurreko edo ondoko asteetan.

d) Enpresak aukeran izanen du egunok ukatzea, baldin eta dagokion datan ukatzea justifikatzeko adinako garrantzia duen ekoizpen-inguruabarrak gertatzen badira.

e) Bi pertsonak edo gehiagok data berean eskatzen badituzte egunok, eskaeraren hurrenkeraren arabera ezarriko da lehentasuna.

7. artikulua. Soldatak.

–Kontzeptu hauek osatzen dute soldaten egitura:

• Oinarrizko soldata.
• Antzinatasunagatiko osagarria.
• Osagarri pertsonala.

– Zenbateko eta baldintza hauek zehaztuko dute soldata-kontzeptu bakoitza:

• Oinarrizko soldata.

– Talde eta lanbide-maila bakoitzari I. eranskineko soldata-tauletan esleitutako soldata da.

• Antzinatasuneko osagarri pertsonala.

Antzinatasun-osagarria hirurtekoen arabera ordainduko da, eta enpresan sartu zen eguna hartuko da antzinatasun-zenbaketaren hasierako datatzat.

Antzinatasun-osagarriaren zenbatekoa kalkulatzeko, II. eranskinean (antzinatasun-osagarrirako erreferentzia-taula) lanbide-kategoria bakoitzerako ezarritako zenbatekoa hartuko da erreferentzia-oinarritzat. Antzinatasun-osagarri pertsonala zenbateko horren % 3 izanen da hirurteko bakoitzerako. Hirurteko edo bosturteko bakoitzaren zenbatekoa epe horiek bete eta hurrengo hilaren 1etik hasita sortuko da.

Enpresatik behin betiko alde egin ondotik berriro itzultzen den langileari bigarren aldiz sartu izandako egunetik aurrerako antzinatasuna baino ez zaio kontatuko, eta lehendik eskuratutako antzinatasun eskubideak galduko ditu.

–Plus pertsonala.

Batetik, hitzarmen hau sinatzen den egunean langileek jasotzen duten soldataren eta, bestetik, hitzarmen honetan ezarritako soldatak (I. eta II. eranskinak) zuzenean aplikatzearen ondoriozko aldea da. Plus hori ez da konpentsagarria izanen, ezta xurgagarria ere.

8. artikulua. Soldata-igoerak.

I. eranskinean jasota daude 2024rako soldata-taulak. Taula horiek % 7ko igoera dakarte estatuko hitzarmeneko soldata-taulekin alderatuta, eta sektoreko estatu-hitzarmena erreferentziatzat izan duten pertsonengan izanen du eragina. Gainerako langileentzat 2023ko Nafarroako KPIa + % 1eko igoera ezarri da.

Hurrengo urteetarako, soldata errealei eta I. eta II. eranskinetako soldata-taulei dagokienez, zenbateko hauek igoko dira:

–2025. urtea: Nafarroako 2024ko KPI erreala + % 1.

–2026. urtea: Nafarroako 2025eko KPIa.

–2027. urtea: Nafarroako 2026ko KPIa.

Hitzarmen hau sinatzen den egunean indarrean diren soldata-kontzeptu guztiei aplikatuko zaizkie igoerak.

KPIa negatiboa bada, 0 hartuko da urte guztietan.

9. artikulua. Lanerako aldi baterako ezintasunaren osagarria.

Aldi baterako ezintasuneko egoeran dauden langileei osagarri bat ordainduko die enpresak, harik eta soldata errealaren % 100era iritsi arte.

Nolanahi ere, aldeek, absentismoak dakarren arazo larriaren jakitun, konpromisoa hartzen dute soluzio posibleak aztertzeko eta bilatzeko prozesu bat abiarazteko, baldin eta absentismoa gehiegizko mailara iristen bada.

10. artikulua. Lanbide-sailkapena.

Jarraian jasotzen da lanbide-sailkapena. Horrek ez du esan nahi beharrezkoa denik lanbide-talde eta lotutako maila guztietako lanpostuak izatea; aitzitik, enpresaren beharren arabera definituko dira horiek guztiak.

Sailkapenak bi lanbide-talde ditu (batetik, inprimaketa, eta, bestetik, eraldaketa, manipulatuak eta logistika), eta lanbide bakoitza, berriz, hiru mailatan dago banatuta (ofizial kualifikatua, ofizial espezialista eta ofiziala). Lanpostu bakoitzak, beraz, talde bati eta maila jakin bati atxikita egon beharko du. Mailaz aldatzeko azterketa edo proba bat eskatzen den kasuetan, langileen ordezkari bat egoten ahalko da proba edo azterketan, hala eskatzen bada.

Lanaren benetako edukiaren arabera zehaztuko da zer lanbide-talderi eta mailari atxiki. Horretarako, langileak denbora gehienean betetzen dituen eginkizunak hartuko dira kontuan. Talde bakoitzean deskribatzen diren eginkizunak oinarrizkoak eta aipamen mailakoak dira, eta ez zehatzak; lanaren edukia modu orokorrean definitzen dute, beste zeregin lagungarri edo osagarriak baztertu gabe.

A.–Inprimaketako talde profesionala.

Talde honetan sartzen dira nagusiki inprimaketa-lanetan jarduten duten langileak.

–1. maila: Ofizial kualifikatua.

• Maila honetan sartzen diren langileek:
  • Badakite nola funtzionatzen duen inprimagailuak eta modu autonomoan betetzen dituzte dagozkien lanak.
  • Hasieratik bukaerara egiten dituzte agindutako lanak, kanpoko laguntzarik gabe, eta beharrezko koloreak sortzen dituzte –eskaera bakoitzeko, 8 kolore izaten dira posible–.
  • Gaituta daude lanak ontzat emateko –berriak, aldatuak edo errepikatuak–, eta eskura dituzten tresna guztiak baliatzen dituzte horretarako.
  • Pantoneen erabilera optimizatzen dute eta sortu ere sortzen dituzte.
  • Ezarritako batez besteko abiaduretan egiten dute produkzioa.
  • Badakite eraginkortasunez kudeatzen eta konpontzen makinaren funtzionamenduan edo produktuan sortzen ahal diren arazoak eta gorabeherak, kanpoko babes-baliabideetan oinarrituta.
  • Makinaren mantentze-lan prebentibo eta zuzentzaileak kudeatzen eta gauzatzen dituzte.
  • Enpresak esleitzen dizkien langileen prestakuntza zuzentzen eta gauzatzen dute, ezarritako epeetan.
  • Edozein anomaliaz arduratzen dira eta berri ematen diote nagusiari; matxura-parteak eta/edo desadostasun-parteak egiten dituzte haiek behar bezala kudeatzeko.
  • Laguntzen dute auditoretzak egiten, eta ardura hartzen dute instalazioen mantentze-lanetan, tokiak garbi eta egoera onean egon daitezen eta makinak puntu-puntuan.
  • Aldezten eta sustatzen dute helburuak lortzea eta enpresak ezarritako arauak betetzea (barne-funtzionamenduko arauak, BRC araudia, etab.).

–2. maila: Ofizial espezialista.

Maila honetan sartzen dira inprimagailuaren funtzionamenduaren berri baduten langileak, nahiz eta lanak mendekotasunez eta kanpoko laguntzarekin egin, helarazten zaizkien jarraibideen arabera.

2. mailako ofizial espezialista izatetik 1. mailako ofizial kualifikatu izatera igarotzeko, langileak baldintza hauek bete beharko ditu:

• Gutxienez urtebeteko esperientzia izatea ofizial espezialista gisa.
• Bost proba hauek dituen azterketa bat gainditzea:
  • 8 tintako lan bat egitea ezarritako denboran.
  • 3 pantone sortzea lehendik zeudenetatik abiatuta denbora jakin batean, tinta-kantitateak optimizatuz eta soberakinik sortu gabe.
  • Materialak aldatzea haustura bidez edo inprimaketa-mota aldatzea.
  • Matxura bat behar bezala kudeatzea kanpo-euskarriarekin.
  • Barneko mantentze-proba bat behar bezala egitea.

Salbuespen gisa, maila horretan urtebetez azpiko esperientzia duen ofizial espezialistak, funtzio horietan sei hilabete baino gehiago badaramatza, 1. mailara pasatzeko eskatzen ahalko du (hau da, ofizial kualifikatu postura), baldin eta aurrez gainditzen badu maila horretara sartzeko azterketa. Ofizial espezialistak gehienez ere bi aldiz egiten ahalko du proba hori ofizial espezialistaren lanpostuan urtebete bete baino lehen.

–3. maila: Ofiziala.

Maila honetan sartzen dira inprimagailuak nola funtzionatzen duen jakin gabe eta inprimaketa-lanak egiten aldez aurretik esperientziarik izan gabe, helarazten zaizkien jarraibide espezifikoen arabera lan errazak edo oinarrizkoak egiten dituzten langileak, mendekotasun-maila handiarekin eta, behar izanez gero, kanpoko laguntzarekin.

2. mailako ofizial espezialistara igarotzeko pausoa taldean eta mailan urtebeteko esperientzia iristean emanen da.

B.–Eraldatuen eta manipulatuen lanbide-taldea, eta logistikakoa.

Talde honetan sartzen dira batez ere eraldaketa- eta manipulazio-arloan (birbobinaketan, ijezten eta klixeak jartzen jarduten dutenak) eta logistika-arloan lan egiten duten langileak.

–1. maila: ofizial kualifikatua.

–1.a maila: Birbobinaketako ofizial kualifikatua.

Maila honetan sartzen diren langileek:

• Badakite nola funtzionatzen duen birbobinatzeko makinen lineak, eta modu autonomoan betetzen dituzte lanok.
• Ebaketa- eta toleste-lanak egiten dituzte birbobinatzeko makina guztietan, kanpoko laguntzarik gabe.
• Ebaketa- eta toleste-lanak egiten dituzte askotariko materialetan, kanpoko laguntzarik gabe.
• 6 ebaketatik gorako lanak egiten dituzte kanpoko laguntzarik gabe.
• Edozein anomaliaz arduratzen dira eta berri ematen diote nagusiari; matxura-parteak eta/edo desadostasun-parteak egiten dituzte haiek behar bezala kudeatzeko.
• Laguntzen dute auditoretzak egiten, eta ardura hartzen dute instalazioen mantentze-lanetan, tokiak garbi eta egoera onean egon daitezen eta makinak puntu-puntuan.
• Aldezten eta sustatzen dute helburuak lortzea eta enpresak ezarritako arauak betetzea (barne-funtzionamenduko arauak, BRC araudia, etab.).

–1.b maila: Ijezketako ofizial kualifikatua.

Maila honetan sartzen diren langileek:

• Grabaketa- eta bilaketa-lanak egiten dituzte, kanpoko laguntzarik gabe.
• Makinaren funtzio guztiak gauzatzen dituzte (ijeztea, tratatzea eta abar), kanpoko laguntzarik gabe.
• Esleitzen zaizkien mantentze-lanak egiten dituzte, kanpoko laguntzarik gabe.
• Mota guztietako materialak ijezten dituzte geruza batean edo batzuetan, kanpoko laguntzarik gabe.
• Makinak egoki ixtea eta arrankatzea geldialdi luze baten ondotik.
• Edozein anomaliaz arduratzen dira eta berri ematen diote nagusiari; matxura-parteak eta/edo desadostasun-parteak egiten dituzte haiek behar bezala kudeatzeko.
• Laguntzen dute auditoretzak egiten, eta ardura hartzen dute instalazioen mantentze-lanetan, tokiak garbi eta egoera onean egon daitezen eta makinak puntu-puntuan.
• Aldezten eta sustatzen dute helburuak lortzea eta enpresak ezarritako arauak betetzea (barne-funtzionamenduko arauak, BRC araudia, etab.).

–1.c maila: Klixeak jartzeko ofizial kualifikatua.

Maila honetan sartzen diren langileek:

• Klixeak blokean nahiz moztuta jartzeko lanak egiten dituzte, kanpoko laguntzarik gabe.
• Modu autonomoan hartzen dituzte itsasgarriei eta klixeak jartzeko moduari buruzko erabakiak.
• Ongi kudeatzen dituzte bat ez datozen klixeak eta aldaketak.
• Edozein anomaliaz arduratzen dira eta berri ematen diote nagusiari; matxura-parteak eta/edo desadostasun-parteak egiten dituzte haiek behar bezala kudeatzeko.
• Laguntzen dute auditoretzak egiten, eta ardura hartzen dute instalazioen mantentze-lanetan, tokiak garbi eta egoera onean egon daitezen eta makinak puntu-puntuan.
• Aldezten eta sustatzen dute helburuak lortzea eta enpresak ezarritako arauak betetzea (barne-funtzionamenduko arauak, BRC araudia, etab.).

–1.d maila: Logistikako ofizial kualifikatua:

Maila honetan sartzen diren langileek:

• Modu eraginkor eta autonomoan kudeatzen dute salgaien harrera, enpresaren barne-arauei jarraikiz, eta jasotako eta biltegiratutako materialak egiaztatzen dituzte.
• Behar bezala kontrolatzen dituzte bezeroei eskaerak entregatzeko datak, eta fabrikazioa produkzioarekin koordinatzen dute data horiek betetzeko.
• Biltegia behar bezala kontrolatzen dute, eta kokapenak, ordena eta garbitasuna kudeatzen dituzte.
• Edozein anomaliaz arduratzen dira eta berri ematen diote nagusiari; matxura-parteak eta/edo desadostasun-parteak egiten dituzte haiek behar bezala kudeatzeko.
• Laguntzen dute auditoretzak egiten, eta ardura hartzen dute instalazioen mantentze-lanetan, tokiak garbi eta egoera onean egon daitezen eta makinak puntu-puntuan.
• Aldezten eta sustatzen dute helburuak lortzea eta enpresak ezarritako arauak betetzea (barne-funtzionamenduko arauak, BRC araudia, etab.).

–2. maila: ofizial espezialista.

–2.a maila: Birbobinaketako ofizial espezialista.

Maila honetan sartzen dira birbobinagailu-linearen funtzionamendua ezagutzen duten langileak eta ebaketa- eta toleste-lanak egiten dituztenak, nahiz eta lanak mendekotasunez eta kanpoko laguntzarekin egin, helarazten zaizkien jarraibideen arabera.

Birbobinaketako 2. mailako ofizial espezialista izatetik birbobinaketako 1. mailako ofizial kualifikatu izatera igarotzeko, langileak baldintza hauek bete beharko ditu:

• Gutxienez urtebeteko esperientzia izatea ofizial espezialista gisa;
• Azken urtean ez eragin izana 2.000 eurotik gorako ez-adostasunik.
• Azterketa bat gainditzea, lau proba hauekin:
  • Birbobinaketa-lan bat behar bezala egitea birbobinatzeko makina bakoitzean, askotariko materialekin (konplexua, poliolefina, zelofana...), ezarritako denboretan.
  • Toleste-lan bat behar bezala egitea ezarritako denboran.
  • Materiala behar bezala pasatzea makina osoan zehar.
  • Lotuneak eta haien saneamendua behar bezala kudeatzea.

Salbuespen gisa, maila horretan urtebetez azpiko esperientzia duen ofizial espezialistak, funtzio horietan sei hilabete baino gehiago badaramatza, 1. mailara pasatzeko eskatzen ahalko du (hau da, ofizial kualifikatu postura), baldin eta aurrez gainditzen badu maila horretara sartzeko azterketa. Ofizial espezialistak gehienez ere bi aldiz egiten ahalko du proba hori ofizial espezialistaren lanpostuan urtebete bete baino lehen.

–2.b maila: Ijezketako ofizial espezialista.

Maila honetan sartzen dira ijezteko makinak nola funtzionatzen duen badakiten langileak eta grabatzeko, ijezteko, tratatzeko lanak eta abar egiten dituztenak, nahiz eta lanak mendekotasunez eta kanpoko laguntzarekin egin, helarazten zaizkien jarraibideen arabera.

Ijezketako 2. mailako ofizial espezialista izatetik ijezketako 1. mailako ofizial kualifikatu izatera igarotzeko, langileak baldintza hauek bete beharko ditu:

• Gutxienez urtebeteko esperientzia izatea ofizial espezialista gisa.
• Bost proba hauek dituen azterketa bat gainditzea:
  • Ijezketa-lan bat behar bezala egitea, hiru geruza edo gehiagotan, ezarritako denboretan.
  • Materialei aplikatu beharreko kolaren portzentajea jakitea.
  • Materiala behar bezala pasatzea makina osoan zehar.
  • Inprimaketatik edo lehengaietatik datozen loturak behar bezala kudeatzea.
  • Makinak egoki ixtea eta arrankatzea geldialdi luze baten ondotik.

Salbuespen gisa, maila horretan urtebetez azpiko esperientzia duen ofizial espezialistak, funtzio horietan sei hilabete baino gehiago badaramatza, 1. mailara pasatzeko eskatzen ahalko du (hau da, ofizial kualifikatu postura), baldin eta aurrez gainditzen badu maila horretara sartzeko azterketa. Ofizial espezialistak gehienez ere bi aldiz egiten ahalko du proba hori ofizial espezialistaren lanpostuan urtebete bete baino lehen.

–2.c maila: Klixeak jartzeko ofizial espezialista.

Maila honetan sartzen dira klixeak jartzeko lanak egiten badakiten eta lanok egiten dituzten langileak, nahiz eta mendekotasunez eta kanpoko laguntzarekin egin, helarazten zaizkien jarraibideen arabera.

Klixeak jartzeko 2. mailako ofizial espezialista izatetik klixeak jartzeko 1. mailako ofizial kualifikatu izatera igarotzeko, langileak baldintza hauek bete beharko ditu:

• Gutxienez urtebeteko esperientzia izatea ofizial espezialista gisa;
• Azken urtean ez eragin izana 2.000 eurotik gorako ez-adostasunik.
• Azterketa bat gainditzea, hiru proba hauekin:
  • Behar bezala adieraztea nola jarri klixeak lamina-birbobinaketako bost norabidetan eta erdi-hodiko birbobinaketako batean.
  • Behar bezala jartzea klixe-lan indibidual bat ezarritako denboran.
  • Behar bezala jartzea lan berri bat ezarritako denboran.

Salbuespen gisa, maila horretan urtebetez azpiko esperientzia duen ofizial espezialistak, funtzio horietan sei hilabete baino gehiago badaramatza, 1. mailara pasatzeko eskatzen ahalko du (hau da, ofizial kualifikatu postura), baldin eta aurrez gainditzen badu maila horretara sartzeko azterketa. Ofizial espezialistak gehienez ere bi aldiz egiten ahalko du proba hori ofizial espezialistaren lanpostuan urtebete bete baino lehen.

–2.d maila: Logistikako ofizial espezialista.

Maila honetan sartzen dira alor horretako lanak egiten badakiten langileak eta lan horiek egikaritzen dituztenak, nahiz eta mendekotasunez eta kanpoko laguntzarekin egin, helarazten zaizkien jarraibideen arabera.

2. mailako ofizial espezialista izatetik 1. mailako ofizial kualifikatu izatera igarotzeko, langileak bi baldintza hauek bete beharko ditu:

• Gutxienez urtebeteko esperientzia izatea ofizial espezialista gisa.
• Bere lanaren ikuskapen bat gainditzea, eta zehazki:
  • Lehengaien etiketak berrikustea: etiketa daukaten 20 material berrikustea, eta taulan eta programako stockean kokatzea, IT arloak zehazten duenari jarraikiz.
  • Biltegiko ordena eta identifikazioa: bukatutako 20 produktu-material berrikustea, programan definituriko etiketekin, kokapenarekin eta stockarekin bat etorriz, IT arloak zehazten duenari jarraikiz.
  • Lan-aginduetarako lehengaien kontrola: 20 lan-agindu berrikustea eta harrera kudeatu dela baieztatzea, etiketa kenduta eta produkzioa jakinaren gainean jarrita (email bat helarazi behar da produccion@bolsasoses.com helbide elektronikora).
  • Epeak kontrolatzea eta bezeroarentzako entregak multzokatzea: bezeroren 20 albaran berrikustea, entregak eskaeraren arabera betetzen diren ikusteko eta/edo horien jarraipena egiteko produkzio-sailarekin posta elektronikoz komunikatzea.
  • Abian diren gailurrak eta/edo produktuak berrikustea: 5 lan-agindu berrikustea stockean dagoen materialarekin, eta egiaztatzea jarraitzen zaiola FIFO metodologiari kudeaketan eta badela aldez aurreko komunikaziorik produkzio-sailarekin posta elektronikoz.

Salbuespen gisa, maila horretan urtebetez azpiko esperientzia duen ofizial espezialistak, funtzio horietan sei hilabete baino gehiago badaramatza, 1. mailara pasatzeko eskatzen ahalko du (hau da, ofizial kualifikatu postura), baldin eta aurrez gainditzen badu maila horretara sartzeko azterketa. Ofizial espezialistak gehienez ere bi aldiz egiten ahalko du proba hori ofizial espezialistaren lanpostuan urtebete bete baino lehen.

–3. maila: Ofiziala.

–3.a maila: Birbobinaketako ofiziala.

Maila honetan sartzen dira birbobinaketa-lerroak nola funtzionatzen duen jakin gabe eta ebaketa- eta toleste-lanak egiten aldez aurretik esperientziarik izan gabe, helarazten zaizkien jarraibide espezifikoen arabera lan errazak edo oinarrizkoak egiten dituzten langileak, mendekotasun-maila handiarekin eta, behar izanez gero, kanpoko laguntzarekin.

2. mailako ofizial espezialistara igarotzeko pausoa taldean eta mailan urtebeteko esperientzia iristean emanen da.

–3.b maila: Ijezketako ofiziala.

Maila honetan sartzen dira ijezteko makinak nola funtzionatzen duen jakin gabe eta grabaketak, ijezketak, tratatze-lanak eta bestelako eginkizunak egiten aldez aurretik esperientziarik izan gabe, helarazten zaizkien jarraibide espezifikoen arabera lan errazak edo oinarrizkoak egiten dituzten langileak, mendekotasun-maila handiarekin eta, behar izanez gero, kanpoko laguntzarekin.

2. mailako ofizial espezialistara igarotzeko pausoa taldean eta mailan urtebeteko esperientzia iristean emanen da.

–3.c maila: Klixeak jartzeko ofiziala.

Maila honetan sartzen dira klixeak jartzen aldez aurretik esperientziarik ez izanik ere, helarazten zaizkien jarraibide espezifikoen arabera lan errazak edo oinarrizkoak egiten dituzten langileak, mendekotasun-maila handiarekin eta, behar izanez gero, kanpoko laguntzarekin.

2. mailako ofizial espezialistara igarotzeko pausoa taldean eta mailan urtebeteko esperientzia iristean emanen da.

–3.d maila: Logistikako ofizial jartzailea.

Maila honetan sartzen dira arloak nola funtzionatzen duen jakin gabe eta administrazio- eta logistika-lanak egiten aldez aurretik esperientziarik izan gabe, helarazten zaizkien jarraibide espezifikoen arabera lan errazak edo oinarrizkoak egiten dituzten langileak, mendekotasun-maila handiarekin eta, behar izanez gero, kanpoko laguntzarekin.

2. mailako ofizial espezialistara igarotzeko pausoa taldean eta mailan urtebeteko esperientzia iristean emanen da.

11. artikulua. Hitzarmena ez aplikatzea.

Enpresak hitzarmen kolektibo hau aldi batean ez aplikatzea nahi izanez gero (arrazoi ekonomikoak, teknikoak, antolakuntzakoak edo produkziokoak direla-eta), asmo horren berri eman beharko dio Batzorde Paritarioari, kontsulta-aldia hasi baino 15 egun lehenago gutxienez.

Aplikatzekoak diren lanbidearteko akordioetako gatazkak konpontzeko prozedurek ez badute konpontzen desadostasuna (arbitrajea bi alderdiak ados jarrita bakarrik eginen da), beharrezkoa izanen da bi alderdien arteko akordioa (enpresaren ordezkaritza eta langileen ordezkaritzaren gehiengoa), eta beharrezkoa izanen da ez aplikatzeari buruzko desadostasuna Lan Hitzarmenen Kontsulta Batzorde Nazionalaren edo Foru Komunitateko hiru aldeko organoaren esku uztea.

12. artikulua. Interpretazio eta jarraipenerako batzordea.

Hitzarmen honetan ezarritakoa aplikatzen eta betetzen den interpretatzeko eta zaintzeko, batzorde paritario bat sortuko da, langileen ordezkariek izendatutako kide batek eta enpresak izendatutako beste batek osatua.

Bi aldeak bost eguneko epean jarriko dira ados batzorde paritarioa zer egun eta ordutan elkartuko den zehazteko.

Batzordearen barnean desadostasunak sortzen badira, alderdiek Nafarroako Lan Auzitegian ezarritako prozeduren mende utziko dituzte desadostasun horiek.

13. artikulua. Egutegia.

Enpresak abenduan eginen du hurrengo urterako lan-egutegia, Langileen Estatutuaren 34. artikuluaren 6. apartatuarekin bat etorriz. Lan-egutegiaren ale bat ikusgai jarri beharko da lantokiko eremu guztietan, eta hitzarmen honetan ezarritako urteko gehieneko lanaldia errespetatu beharko da.

AZKEN XEDAPENA

Hitzarmen honetan aurreikusi ez den orotan, betetzekoa izanen da aplikatzekoak diren hitzarmen kolektibo sektorialetan (Nafarroako Hitzarmen Sektoriala barne, halakorik bada), Langileen Estatutuan eta aplikatu beharreko gainerako legeetan xedatutakoa.

I. ERANSKINA.–SOLDATA-TAULAK

Urteko oinarrizko soldata, lanbide-talde eta maila bakoitzeko

II. ERANSKINA. – ANTZINATASUN-OSAGARRI PERTSONALA KALKULATZEKO ERREFERENTZIA-TAULA

Iragarkiaren kodea: F2415679