223. ALDIZKARIA - 2024ko azaroaren 4a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

ARAITZ

Gaintzako Kontzejuaren kudeaketa-esleipena, landa bide baten kudeaketarako

Sektore Publikoaren Araubide Juridikoari buruzko urriaren 1eko 40/2015 Legearen 11.3.b) artikuluan ezarritakoari jarraikiz, eta bi alderdiek 2024ko urriaren 1ean sinatu ondotik, argitara ematen da Nafarroako Aldizkari Ofizialean Gaintzako Kontzejuaren eta Araizko Udalaren arteko kudeaketa-esleipenaren hitzarmena, eranskinean agertzen baita.

Araitzen, 2024ko urriaren 14an.–Alkatea, Jose Manuel Zubillaga Muguerza.–Kontzejuko burua, Mikel Barberia Pellejero.

KUDEAKETA-ESLEIPENAREN HITZARMENA, GAINTZAKO KONTZEJUAREN ETA ARAIZKO UDALAREN ARTEAN

Gaintzan, 2024ko urriaren 1ean.

BILDURIK:

Alde batetik: Jose Manuel Zubillaga Muguerza, Araizko Udaleko alkate udalburua den aldetik, 2023ko ekainaren 17ko erabakiaren bidez ahaldundua.

Bestetik, Mikel Barberia Pellejero, Gaintzako Kontzejua ordezkatuz, P3145800C IFK duena eta helbidea Gaintzan.

Noren izenean ari diren kontuan hartuz, bi alderdiek elkarri aitortzen diote hitzarmen hau sinatzeko gaitasun juridikoa, eta, beraz,

ADIERAZTEN DUTE:

Lehendabizikoa.–Sektore Publikoaren Araubide Juridikoari buruzko urriaren 1eko 40/2015 Legearen 11. artikuluak xedatzen duenez, administrazio organoen edo zuzenbide publikoko entitateen eskumeneko jarduera material edo teknikoak administrazio bereko edo beste bateko organo edo zuzenbide publikoko entitate bati esleitu ahal izanen zaizkio, jarduera horiek haien eskumenen barruan badaude, dela eraginkorragoak izateko, dela jarduera horietarako baliabide tekniko egokiak ez dituztelako.

Kudeaketa-esleipenak ez dakar eskumenaren titulartasuna lagatzea; eta kudeatzeko esleipena ematen duen entitatearen ardura izanen da esleipenean emandako jarduera material zehatzari oinarria emanen dioten edo hura barne hartuko duten egintza edo erabaki juridiko guztiak hartzea.

Kudeaketa-esleipena administrazio desberdinetako organoen artean egiten denean, administrazio horien arteko hitzarmena sinatuta formalizatuko da.

Kudeaketa-esleipena formalizatzeko tresna dagokion aldizkari ofizialean argitaratu behar da, eraginkorra izan dadin.

Bigarrena.–Araizko Udalak bailarako ondare diren Malloako kablea (Gaintzan kokatua), Teilegia (Intzan) eta Galtzin labea (Intzan) zaintzeko eta ezagutarazteko asmoaren baitan, hiru elementu horietara doazen bideak txukuntzeko eta garbi mantentzeko helburua du.

Hirugarrena.–Nahiz eta bideen arloko eskumena kontzejuei dagokien, Nafarroako Toki Administrazioari buruzko uztailaren 2ko 6/1990 Foru Legearen 39.1.c) artikuluan xedatutakoari atxikiz, interesa dago bide horiek egokitzeko lanak eta haien mantenimendua Araizko Udalak egin ditzan; izan ere, proiektuak Intzako eta Gaintzako kontzejuei eragiten die, eta Udalak baliabide material eta pertsonal gehiago ditu, gai horretan auzotarrek dituzten beharrak modu eraginkorragoan asetzeko.

Horregatik guztiagatik, kudeaketa-esleipenaren hitzarmen hau sinatzea erabaki dute, lege hauetan ezarritako esparruaren barruan: Sektore Publikoaren Araubide Juridikoari buruzko urriaren 1eko 40/015 Legea, Toki-araubidearen Oinarriei buruzko Foru Legea, eta Nafarroako Toki Administrazioari buruzko 6/1990 Foru Legea; klausula hauen arabera.

KLAUSULAK:

Lehenbizikoa.–Hitzarmen honen helburua da kudeaketa-esleipena eratzea Araizko Udalaren eta Gaintzako Kontzejuaren artean, Sektore Publikoaren Araubide Juridikoari buruzko Legearen 11. artikuluaren, Toki-araubidearen Oinarriei buruzko Legearen eta Toki Administrazioari buruzko Legearen babespean.

Bigarrena.–Gaintzako Kontzejuak Araizko Udalaren esku utziko du Galtzin labea, Teilegia eta Malloako kableen behatokia arteko bideen mantenimendua, kontserbazioa eta ikuskaritza, eta horrek honako jarduketa hauek dakartza:

1. Araizko Udalak bideen egokitzapena eta mantenimendua egitea horretarako beharrezko diren garbiketak eginez.

2. Bideen egokitzapenerako eta mantenimendurako izan daitezkeen dirulaguntzen eskaeren kudeaketa Araizko Udalak egitea.

3. Bideen egokitzapenerako eta mantenimendurako egin daitezkeen kontratazioak Araizko Udalak egitea.

4. Bideen egokitzapenean eta mantenimenduan izandako gastuak Araizko Udalaren gaineko izanen dira.

Hirugarrena.–Jarraipen batzordea: Kudeaketa-hitzarmen honetan ezarritako neurrien betearazpenaren jarraipena antolatzeko eta interpretatzeko, jarraipen-batzorde bat sortuko da, honako osaera eta eginkizun hauekin:

Osaera: Udaleko alkatea eta Kontzejuko burua.

Eginkizunak: agindutako lanak behar bezala egiten diren berrikustea.

Batzorde honen funtzionamenduari buruz berariaz aurreikusi ez den guztian, aplikatuko dira Administrazio Publikoen Araubide Juridikoari buruzko Legearen atariko tituluaren II. kapituluaren 3. atalean ezarritako arauak (kide anitzeko organoei buruzkoak).

Laugarrena.–Kudeaketa-esleipen honek ez dakar Gaintzako Kontzejuaren titulartasuneko eskumenak lagatzea, ezta eskumen horretaz baliatzeko funtsezko elementuen lagapena ere.

Bosgarrena.–Hitzarmen honetako edozein klausula ez betetzeak hura suntsitzea ekar dezake.

Seigarrena.–Kudeaketaren ardura emateko hitzarmenak 10 urteko epea izanen du hitzarmena sinatzen denetik eta urtez urte berrituko da, epea bukatu aurreko hiru hilabeteetan aldeetako inork ez badu kontrakorik adierazten.

Zazpigarrena.–Aldaketa: kudeaketa-esleipenaren hitzarmen hau aldatzen ahalko da, bi alderdiak ados jarrita.

Zortzigarrena.–Hitzarmen honek izaera administratiboa du, ondorio guztietarako.

Eta ados daudela erakusteko, bi aldeek hitzarmen hau sinatu dute goian aipatutako tokian eta egunean.

Iragarkiaren kodea: L2415276