Iragarkia

206. ALDIZKARIA - 2024ko urriaren 10a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

216E/2024 EBAZPENA, irailaren 24koa, Unibertsitateko zuzendari nagusiak emana, zeinaren bidez onesten baita 2024-2025 ikasturtean unibertsitateko ikasketak egiten dituzten ikasleentzako beken deialdi orokorra. DDBN identifikazioa: 786989.

Ikusirik departamentu honetako Unibertsitateko Zerbitzuak 2024-2025 ikasturterako beken deialdi orokorrari buruz aurkeztutako txostena.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32.1.d) artikuluak ematen dizkidan ahalmenak erabiliz.

EBAZTEN DUT:

1. Unibertsitateko ikasketak egiten dituzten ikasleentzako beken deialdi orokorra onestea, 2024-2025 ikasturterako. Testua ebazpen honen eranskin bakarrean ageri da.

2. 3.350.000 euroko gastua baimentzea, Unibertsitateko, Berrikuntzako eta Eraldaketa Digitaleko Departamentuaren 2024ko aurrekontuko G10001-G1100-4800-323100 partidaren ("Unibertsitateko ikasketetarako bekak eta laguntzak") baliokide izateko asmoz 2025eko gastuen aurrekontuan horretarako sortuko den partidaren kargura finantzatuko dena, horretarako kreditu egoki aski baldin badago.

Salbuespenez, aurkezten diren eskaera kopurua kontuan izanik, 100.000 euroraino handitzen ahalko da deialdi honetara zuzendutako diru kopurua, deialdi berririk egin beharrik gabe, baldin eta Dirulaguntzei buruzko Foru Legearen 31. artikuluan ezarritakoa betetzen bada.

3. Ebazpen hau eta eranskina Nafarroako Aldizkari Ofizialean argitara daitezela agintzea.

4. Ebazpen honen aurka gora jotzeko errekurtsoa jar daiteke, Unibertsitateko, Berrikuntzako eta Eraldaketa Digitaleko kontseilariari zuzendua, Nafarroako Aldizkari Ofizialean argitaratu eta biharamunetik hilabeteko epean.

Sarrigurenen, 2024ko irailaren 24an.–Unibertsitateko zuzendari nagusia, Ana Burusco Juandeaburre.

ERANSKINA.–BEKEN ETA LAGUNTZEN DEIALDI OROKORRA, 2024-2025 IKASTURTEAN UNIBERTSITATEKO IKASKETAK EGITEN DITUZTEN IKASLEENTZAT

1. oinarria.–Deialdiaren xedea eta izaera.

Deialdi honen xedea da bekak eta laguntzak ematea Espainiako unibertsitate sistemako unibertsitateko ikasketa ofizialetan matrikulatutako ikasleei. Ikasketa horiek Espainiako zentroetan egin behar dira, eta lurralde nazional osoan izan behar dute balioa.

Bekak eta laguntzak emateko prozedura norgehiagokako araubidea izanen da. Aurrekontu-kreditua izateak mugatzen du bekak eta laguntzak ematea eta ordaintzea. Hori horrela, ematen litezkeen guztiak ordaintzeko aurrekontu krediturik aski ez balego, familiaren per capita errenta erabilgarriaren arabera ordainduko lirateke, txikienetik handienerako ordenan, kreditua bukatu arte. Kreditu faltagatik ordaindu ezin diren eskaerak ezetsi eginen dira.

Nafarroako Gobernuak ikasketetarako eskaintzen dituen beka eta laguntzak Hezkuntzako, Lanbide Heziketako eta Kiroleko Ministerioak dei egindakoen osagarri dira. Hortaz, horien zenbatekoa zehazteko, kontuan hartuko da ministerio horri aurkeztutako eskaerak eman ala ukatu diren.

Laguntza eta beka hauek dirulaguntza izaera dute eta Nafarroako Dirulaguntzen Plan Estrategikoan sartuta daude.

2. oinarria.–Deialdian sartzen diren ikasketak eta ikastetxeak.

Deialdi honek arautzen dituen bekak eta laguntzak eskatzen ahalko dituzte 2024-2025 ikasturtean oinarri honetan ezarritako ikasketetan eta zentroetan matrikulatuta dauden ikasle guztiek.

2.1. Ikasketak.

Deialdi honetako bekak edo laguntzak honako ikasketa hauetarako eman daitezke:

–Unibertsitateko ikasketak, graduko eta masterreko titulu ofizialak lortzeko direnak.

–Unibertsitatean sartzeko 25 urtetik gorakoendako eta 45 urtetik gorakoendako prestakuntza ikastaroak, unibertsitate publikoek emanak.

Ez da laguntzarik ematen honetarako:

–Ikasketak aldatzeko, horrek ikasmailetan gora egitea ez badakar.

–Matrikula bat egiten denean maila bereko beste titulazio batekin batera, salbu eta unibertsitateak ikasketa bakar gisa eskaintzen dituen gradu edo titulazio bikoitzen kasuan.

–Ikasleak bekaren edo laguntzaren xede diren ikasketen maila bereko edo goragoko titulu bat duenean, edo hori eskuratzeko legezko baldintzak betetzen dituenean.

2.2. Unibertsitateak.

Ikasketak egin beharko dira Espainiako lurraldean dauden eta Unibertsitateen, Zentroen eta Tituluen Erregistroan inskribatuta dauden unibertsitate publiko edo pribatuetan, baldintza hauetan:

–Nafarroako Unibertsitate Publikoa, titulazio ofizialetan.

–Nafarroako Unibertsitatea, titulazio ofizialetan.

–Nafarroako Foru Komunitatetik kanpoko unibertsitateetan, kasu hauetan:

• Nafarroako Unibertsitate Publikoak ematen ez dituen titulazio ofizialetan.
• Nafarroako Unibertsitate Publikoan emandako titulazio ofizialetan, ikaslearen bizilekua hurbilago badago titulua ematen den campusetik.
• Euskaraz ematen diren titulazio ofizialak badira eta Foru Komunitatean eskaintzen ez badira.
• Nafarroako Unibertsitate Publikoak ematen dituen titulazio ofizialetan, bertan ikaspostua lortu ez denean ez delako lortu onartua izateko eskatzen den nota.

Baldintza hori betetzen dela egiaztatzeko, NUPek argitaratutako bigarren onarpen-zerrendako gutxieneko nota hartuko da kontuan.

• Urrutiko Hezkuntzarako Unibertsitate Nazionala (UHUN), titulazio ofizial guztietan.

3. oinarria.–Ematen diren beka edo laguntza motak.

Bekak edo laguntzak honako kontzeptu hauetarako eskatzen ahalko dira:

–Matrikula.

–Bizitegia.

–Garraioa.

–Ikasketa espedientea.

–Berezia (kasu bakanetan bakarrik; ikus 7.5 oinarria).

–Digitalizaziorako laguntza.

4. oinarria.–Betebeharrak.

4.1. Betebehar orokorrak.

Laguntzak eskatzen dituen ikasleak eta familia-unitateko gainerako kide konputagarriek baldintza hauek bete beharko dituzte:

–Nafarroan erroldatuak egotea eta Nafarroan bizitzea 2023ko urtarrilaren 1etik, gutxienez, baita beka eskatzen denean ere.

–2023. urtean Nafarroako PFEZaren zergadun izatea, errenta aitorpena egitera behartuak badaude.

–Laguntza emateko ebazpen-proposamena ematen denean, egunean izatea Foru Komunitateko Administrazioarekiko zerga betebeharrak.

–Itzuli gabe ez edukitzea aurreko ikasturteetako beken edo laguntzen zenbatekoak.

Beka eskatzen duen ikaslea:

–Hezkuntzako, Lanbide Heziketako eta Kiroleko Ministerioari beka eskatu izana, 2024-2025 ikasturterako, horretarako baldintzak edukiz gero, deialdi hori arautzen duten oinarrien arabera, eta hauetakoak gertatu ez izana:

• Deialditik kanpo gelditzea.
• Beka ukatua izatea deialdian agiriak aurkezteko epeak ez betetzeagatik.
• Beka ukatua izatea eskaerako oinarrizko datuak ez betetzeagatik edo eskaera ebazteko beharrezkoa den dokumentazioa ez aurkezteagatik, eskatu bazaio ere.

–Matrikula egitea eta 2024-25 ikasturtean 2.1 oinarrian jasotako ikasketaren bat egitea.

Dirulaguntza hauen izaera kontuan hartuta, eskatzailea bekaren edo laguntzaren onuradun izan daiteke nahiz eta ez bete Dirulaguntzei buruzko azaroaren 9ko 11/2005 Foru Legearen 13.2 e) artikuluan ezartzen diren gainerako betebeharrak.

4.2. Bateraezintasunaren baldintza.

Unibertsitateko ikasketak egiteko bekak bateraezinak dira diru-sarrera txikiko inguruneetatik datozen gazteak goi mailako hezkuntzan sartzeko ekitate bekekin.

4.3. Betebehar akademikoak.

4.3.1. Matrikulatu beharreko gutxieneko kredituak.

–Matrikula osoa:

Ikaslea 60 kreditutan edo gehiagotan matrikulatuta dagoenean 2024-2025 ikasturtean, baldin eta ikasketa planaren parte badira.

Gradu- eta master-titulazio bikoitzen kasuan, ulertuko da matrikula osoa egiten dela ikaslea titulazio bikoitzaren ikasmaila osoa osatzen duten kreditu guztietan matrikulatzen denean, unibertsitateak proposatutako ikasketa planari jarraituz.

Deialdi honen ondorioetarako, egoera hauek ere matrikula osotzat hartuko dira:

• Matrikularen kreditu kopurua 60tik beherakoa denean unibertsitatearen araudiak matrikula daitekeen kreditu kopurua mugatzen duelako.
• Ikaslea ikasturtean titulazioa amaitzeko falta zaizkion kreditu guztietan matrikulatzen denean. Salbuespen hori behin bakarrik aplikatuko da.
• Ikasleak bere irakastorduak murriztu baditu, %50eraino gehienez, legez aitortutako %65eko edo gehiagoko desgaitasuna izateagatik.

–Matrikula partziala:

Matrikularen kreditu kopurua 30etik gorakoa eta 60tik beherakoa denean. Titulazio bikoitzen kasuan, titulazio bikoitzaren matrikula osoa osatzen duten kredituen erdietan matrikulatu beharko dira gutxienez, unibertsitateak proposatutako ikasketa planari jarraituz.

Inoiz ere ez dira izanen aurreko apartatuetan aipatzen diren minimoen parte ikasketa planetan sartuta ez dauden irakasgaien kredituak, edo tituluak ezarrita duen iraupena gainditzen dutenak. Ez dira kontuan hartuko, ezta ere, irakasgai edo kreditu baliozkotuak, egokituak, transferituak edo antzekoak.

Matrikula aldatzen edo handitzen bada, agiri bidez frogatu beharko da hori Unibertsitateko Zerbitzuan, egin bezain laster.

4.3.2. Aurreko ikasturtean matrikula osoa izan zuten bigarren mailako eta ondorengo mailetako ikasleen errendimendu akademikoa.

–Zientzien adarreko eta Ingeniaritzaren eta Arkitekturaren adarreko graduko ikasketetan matrikulatutako ikasleek frogatu beharko dute 2023-2024ko ikasturtean matrikulatutako kreditu guztien %65 gutxienik gainditu dutela. Gainerako adarretan (Osasun Zientziak, Gizarte Zientziak eta Zientzia Juridikoak, Arteak eta Giza Zientziak), frogatu beharko da gutxienez kredituen %80 gainditu dela.

–Titulazio bikoitzetako ikasleen kasuan, egiten diren bi titulazioak adar berekoak ez direnean, beka edo laguntza lortzeko behar den errendimendu akademikoa izanen da Osasun Zientziei, Gizarte Zientziei eta Zientzia Juridikoei, Arteei eta Giza Zientziei dagozkien adarretarako ezarritakoa.

–Masterreko ikasketetan matrikulatutako ikasleek frogatu beharko dute lehenbiziko mailan matrikulatutako kreditu guztiak gainditu dituztela.

–Ikasturteren bat igaro bada unibertsitateko ikasketarik egin gabe, egindako azken ikasturteari dagokionez eskatuko dira adierazitako baldintzak.

4.3.3. Aurreko ikasturtean matrikula partziala izan zuten bigarren mailako eta ondorengo mailetako ikasleen errendimendu akademikoa.

–Aurreko ikasturtean, matrikula partziala izan zuten ikasleek orduan matrikulatutako kreditu guztiak gaindituak izan behar dituzte.

4.3.4. Desgaitasuna duten ikasleen errendimendu akademikoa.

–Legez aitortutako %65eko desgaitasuna edo handiagoa duten ikasleek, beka berritzeko, aurreko ikasturtean matrikulatutako kredituen %50 gaindituak izan behar dituzte.

Kasu guztietan, errendimendu akademikoari dagokionez, ulertuko da ikasleak ikasgai bat gainditu gabe duela haren deialdiren batean azterketari uko egin badio.

4.4. Bekadun izaeraren iraupena.

–Zientzien adarreko eta Ingeniaritza eta Arkitekturaren adarreko unibertsitateko graduko ikasleen kasuan, ikasketa planean ezarritako urteetan eta bi urte gehiagotan lortzen ahalko dute beka.

–Osasun Zientzien, Gizarte Zientzien eta Zientzia Juridikoen, Arteen eta Giza Zientzien adarretako unibertsitateko graduko ikasleen kasuan, ikasketa planean ezarritako urteetan eta beste urtebete batean lortzen ahalko dute beka.

–Masterreko ikasketen kasuan, beka lortzen ahalko da ikasketa planak dituen ikasturteak adina deialditan.

–Titulazio bikoitzetarako (gradukoak zein masterrekoak), ikasketa planaren ikasmailak zenbat, horrenbeste urtetan eskuratzen ahalko da beka. Hala ere, titulazio bat (edo biak) Ingeniaritzako eta Arkitekturako edo Zientzietako adarretakoa bada, urte bat gehiagoz izaten ahalko da beka.

–%65eko edo hortik gorako desgaitasun legez aitortua izan eta eskola-karga murriztea erabaki duten bekadunek kasuan kasuko ikasketa planak ezarritako iraupena baino bi urte gehiagotan lortzen ahalko dute beka, Ingeniaritza eta Arkitekturako adarraren kasuan izan ezik, horretan epe hori lau urtekoa izaten ahalko baita.

–Unibertsitate publiko batek hogeita bost edo berrogeita bost urtetik goitikoak unibertsitatera sartzeko antolatzen duen prestakuntza ikastaroa egiten duten ikasleek urte bakarrean izaten ahalko dute ikastaro horretarako beka.

5. oinarria.–Betebehar ekonomikoak.

5.1. Honako hauek dira sostengatzaile ekonomiko nagusiak:

a) Ikaslearen gurasoak.

b) Ikaslearen aitarekin edo amarekin bizi den ezkontide edo bikotekide egonkorra, gurasoak bananduta badaude.

c) Ikaslea, beregaina dela adierazten badu.

d) Ikaslearen ezkontidea edo bikotekide egonkorra, baldin eta familia- edo bizikidetza-unitate propioa badu (beregaina familiarekin).

e) Beste pertsona batzuk, familiakoak izan edo ez, ikaslea hartzen dutenak salbuespenezko zirkunstantziengatik (legezko harrera egoera).

5.2. Kide konputagarriak zehaztea.

Eskatzailea zer familia-unitatetan erroldatuta dagoen 2023ko abenduaren 31n, hura osatzen duten kide erroldatu guztien multzoa da familia-unitatea.

5.2.1. Ikaslea familiaren bizilekuan bizi bada bizikidetza- edo familia-unitate batean eta unitate horren sostengatzaile nagusia ez bada, honako hauek izanen dira kide konputagarriak bekaren ondorioetarako:

a) Beka eskatzen duen ikaslea.

b) Bi gurasoak, legez bananduta edo dibortziatuta ez badaude, edo guraso bakar bat, legez halakotzat aitortutako pertsona bakarra badago. Gurasoetako bat hila bada, bizikidetza-unitateko kidetzat hartuko da.

c) Ohiko bizilekuan bizi diren anai-arreba ezkongabeak, baldin eta 2023ko abenduaren 31n 30 urte baino gutxiago badituzte, edo adin horretatik gorakoen kasuan, baldin eta %33ko edo gehiagoko desgaitasun fisikoa, psikikoa edo sentsoriala badute eta gurasoen mende bizi badira. Harreran dauden adingabeak gainerako anai-arrebak bezala tratatuko dira.

d) Gurasoen aurrekoak, baldin eta 2023ko abenduaren 31n ohiko bizilekuan bizi badira, udal erroldaren bidez justifikatuta.

e) Eskatzailearekin ahaidetasun harremanik izan gabe bizileku berean bizi dena, baldin eta diru-sarrera berekiak baditu, etxebizitzaren alokairu partekatua justifikatu ezin denean.

f) Beste pertsona batzuk, familiakoak izan edo ez, ikaslea hartzen dutenak salbuespenezko zirkunstantziengatik (legezko harrera egoera).

Gurasoak dibortziaturik edo legez banandurik egonez gero:

Seme-alaben araubidea zaintza partekatua denean, honako hauek hartuko dira kide konputagarritzat:

a) Ikaslea.

b) Beka eskatzen duen ikaslearen gurasoak.

c) Seme-alaba komunak, ikaslearen familiaren etxe berean bizi direnak, baldin eta ezkongabeak eta 30 urtetik beherakoak badira 2023ko abenduaren 31n, eta adin horretatik gorakoak, baldin eta %33ko edo gehiagoko desgaitasun fisikoa, psikikoa edo sentsoriala badute. Kontsiderazio horri eutsiko zaio, halaber, eskatzaileak adin-nagusitasuna eskuratzen duenetik aurrera, baldin eta lehendik zegoen familia-egoerak bere horretan jarraitzen duelako zantzuak badaude. Familia-harreran dauden adingabeak gainerako anai-arrebak bezala tratatuko dira.

d) Gurasoen aurrekoak, baldin eta 2023ko abenduaren 31n ohiko bizilekuan bizi badira, udal erroldaren bidez justifikatuta.

e) Eskatzailearekin ahaidetasun harremanik izan gabe bizileku berean bizi dena, baldin eta diru-sarrera berekiak baditu, etxebizitzaren alokairu partekatua justifikatu ezin denean.

Seme-alaben araubidea zaintza esklusiboa denean, honako hauek hartuko dira kide konputagarritzat:

a) Beka eskatzen duen ikaslearekin bizi den aita edo ama.

b) Aitaren edo amaren ezkontide berria edo bikotekide egonkor berria, beka eskatzen duen ikaslearekin bizi bada.

c) Haietako bakoitzaren seme-alaba ezkongabeak (komunak izan nahiz bakarrik bikotekide berriarenak), beka eskatzen duen ikaslearen bizileku berean bizi direnak, baldin eta 30 urte baino gutxiago badituzte 2023ko abenduaren 31n, edo, adin horretatik gorakoen kasuan, %33ko edo gehiagoko desgaitasun fisikoa, psikikoa edo sentsoriala badute. Familia-harreran dauden adingabeak gainerako anai-arrebak bezala tratatuko dira.

d) Gurasoen aurrekoak, baldin eta 2023ko abenduaren 31n ohiko bizilekuan bizi badira, udal erroldaren bidez justifikatuta.

e) Eskatzailearekin ahaidetasun harremanik izan gabe bizileku berean bizi dena, baldin eta diru-sarrera berekiak baditu, etxebizitzaren alokairu partekatua justifikatu ezin denean.

Kasu horietan guztietan, beraz, haien errentak eta ondarea zenbatuko dira, eta, hala badagokio, deialdi honen II. eranskinean adierazitako kenkariak aplikatuko dira.

5.2.2. Ikaslea jatorrizko familiatik independizatu bada eta sostengatzaile nagusia bada eratu duen bizikidetza- edo familia-unitate propioan, bekaren ondorioetarako, honako hauek izanen dira kide konputagarriak:

a) Ikaslea.

b) Ezkontidea edo bikotekide egonkorra.

c) Haren seme-alaba ezkongabeak, baldin eta 30 urte baino gutxiago badituzte 2023ko abenduaren 31n, eta adin horretatik gorakoak, baldin eta %33ko edo gehiagoko desgaitasun fisikoa, psikikoa edo sentsoriala badute. Harreran dauden adingabeak gainerako seme-alabak bezala tratatuko dira.

d) Haren kargura dauden senitartekoak (gurasoak eta/edo anai-arrebak...), baldin eta egoera hori dokumentu bidez egiaztatzen bada.

e) Eskatzailearekin ahaidetasun harremanik izan gabe bizileku berean bizi dena, baldin eta diru-sarrera berekiak baditu, etxebizitzaren alokairu partekatua justifikatu ezin denean.

5.2.3. Ikaslea jatorrizko familiatik independizatu bada edo aitarik eta amarik ez badu eta pertsona bakarreko bizikidetza-unitate bat osatzen badu, beregaintzat hartzeko, honela frogatu beharko du beregaintasun ekonomikoa eta familiarra duela:

a) Beregaintasun familiarra: egiaztatu beharko du erroldatuta dagoela gurasoena ez den beste bizileku batean, dela bere jabetzako bizileku batean, dela alokairuan hartutako batean, bakarrik edo beste norbaitekin partekaturik, eta bizileku hori ez dela odol bidezko 4. mailara arteko edo ezkontza bidezko 2. mailara arteko ahaideren batena.

Edo, hala badagokio, erabateko umezurztasun absolutua egiaztatzen duen agiria.

b) Beregaintasun ekonomikoa: Ikaslea ekonomikoki beregaintzat jotzeko, haren guraso edo legezko tutoreetako batek ere ezin du zerga-desgrabaziorik egin harengatik PFEZaren aitorpenean edo likidazioan. Gainera, modu frogagarrian egiaztatu beharko du behar adinako baliabide ekonomikoak dituela beregaintasuna ahalbidetzen duten elikadurako, etxebizitzako, garraioko eta abarretako gastuei aurre egiteko (ikus 5.4.2 oinarria).

Beregaintasun familiarraren eta ekonomikoaren baldintza betetzen ez bada, gurasoak bizikidetza-unitatean sartuko dira, nahiz eta eskatzailearekin erroldatuta ez egon.

5.3. Familiaren errenta erabilgarria.

Beka edo laguntza ematea lotuta dago familiaren errenta erabilgarriarekin eta familiaren ondarearekin. Errenta kalkulatzeko, deialdi honen II. eranskinean ezartzen den prozedurari jarraikiko zaio. Familiaren errenta kalkulatzeko, kontuan hartuko dira bizikidetza-unitateko kide bakoitzaren errenta indibidualak eta dagozkien kenkariak. Familia-ondarea kalkulatzeko, kontuan hartuko dira familiaren ondarea adierazten duten mugak, eranskin horretan zehaztutakoak.

Baldin eta 2023. urteari buruz aitortutako inguruabar ekonomikoak –familia-unitate osoarenak– modu egiaztagarrian eta larrian urritu badira beka edo laguntza aurkezteko datan, familia-unitateko kide errenta-hartzaileren bat hil delako edo lanerako desgaitasunaren edo langabeziaren egoerara iragan delako, ikasleak espresuki adieraziko du eskaeran eta egoera hori frogatzen duten agiriak erantsi beharko dizkio nahitaez, baita 2024. urteko PFEZaren aitorpenaren kopia osoa ere, hura egiten den unean.

Inguruabar ekonomikoak aldatzen badira bekaren edo laguntzaren eskaera aurkezteko epea amaitzen denetik 2024ko abenduaren 31ra bitarte (egun horretatik aurrera gertatzen diren aldaketak ez dira kontuan hartuko ikasturte honetarako), modu berean jokatuko da, eta interesdunak Unibertsitateko Zerbitzuari zuzendutako eskaera bat aurkeztu beharko du.

Behin betiko ebazpena eman ondoren ez da onartuko 2023. urtean diru-sarrerak larri urritu direla frogatzeko beste dokumentaziorik.

5.4. Errenta tarteak.

5.4.1. Errenta tarteak familia-unitateko.

Bekaren edo laguntzaren zenbatekoa zehazteko, eskaerak familiaren errenta erabilgarriaren arabera ordenatuko dira, tarte hauek eginez:

Ikasleen familiaren errentak gehieneko muga gainditzen badu, ez zaie inolako laguntzarik emanen. Kasu horretan, eskaerak ezetsi eginen dira, gainerako betekizunak edo baldintzak baloratu gabe.

5.4.2. Beregainak direla adierazten duten ikasleak.

Kalkulatzeko zenbateko diru-sarrerek ematen dioten beregaintasun ekonomikoa ikasle bati, erabiliko den adierazlea izanen da OAEAPtik (Ondorio Askotarako Errenta-adierazle Publikoa; 7.200 euro 2023. urterako) Nafarroan 45 metro koadroko babes ofizialeko etxebizitza bat alokatzeko ezarritako preziora (3.407,40 euro) dagoen aldea. 3.793 eurokoa da zenbateko hori.

Ikasleak aitortutako diru-sarreretatik etxebizitzaren kostura dagoen aldea kopuru hori baino handiagoa bada, pertsona horren beregaintasuna egiaztatuta geratuko da.

5.5. Ondarearen mugak.

Alde batera utzita II. eranskinean xedatutakoaren arabera kalkulatutako familiaren errenta, beka ukatu eginen da baldin eta gainditzen badira familiaren ondarea adierazten duten muga hauek:

–Familia-unitateko kide konputagarrien hiri finken katastroko balioen baturak, kenduta, halakorik bada, Nafarroako Foru Komunitateko etxebizitza baten katastroko balioa, ezin izanen du gainditu 108.966 euroko kantitatea.

–Familia-unitateko kide konputagarrien landa finken katastroko balioen baturak ezin izanen du gainditu 16.675 euroko zenbatekoa kide konputagarri bakoitzeko.

–Kapital higigarriaren etekinen saldo positiboa eta familia-unitateko kide konputagarrien ondare-irabazi eta -galeren saldo positiboa, batuta, etxebizitza erosteko edo birgaitzeko jasotako dirulaguntzak kendu ondoren, ezin izanen dira 2.159 eurotik gora izan.

Ondarearen adierazgarri diren elementu horiek kontatuko dira 2023ko abenduaren 31n duten balioaren arabera, Pertsona Fisikoen Errentaren gaineko Zergari buruzko araudian xedatutakoarekin bat.

Era berean, beka ukatuko da egiaztatzen bada familia-unitateko kide konputagarrien diru-sarrera hauen baturak 449.746 euroko zenbatekoa gainditzen duela, balio erantsiaren gaineko zerga alde batera utzita:

–Jarduera ekonomikoen ondoriozko diru-sarrerak, zuzeneko zenbatespenaren bidez edo zenbatespen objektiboaren bidez zehaztuak.

–Nortasun juridikorik gabeko entitateen edo bestelako entitate juridikoen bidez garatutako jarduera ekonomikoetan familiako kide konputagarri guztiek ehuneko berrogeita hamarreko edo hortik gorako partaidetza izateagatik dituzten diru-sarrerak, behin jardueren guztizko diru-sarrerei jarduera horietako partaidetzaren ehunekoa aplikatu ondoren.

6. oinarria.–Ordaindu beharreko zenbatekoaren zehaztapena.

Nafarroako Gobernuaren bekaren zenbatekoa prozedura hauen arabera kalkulatuko da kasu bakoitzean:

6.1. Hezkuntzako, Lanbide Heziketako eta Kiroleko Ministerioaren beka bat lortu dutenen kasuan:

–Ulertuko da Ministerioak emandako zenbatekoa dela kontzeptu guztiengatik emandako zenbatekoen batura, matrikulagatiko laguntza barne, eta alde batera utzita bikaintasun akademikoari lotutako zenbateko finkoa (IMIN).

–Nafarroako Gobernuaren irizpideei jarraikiz legokiokeen bekaren zenbatekoa zehaztuko da (IGN).

–Kalkulatuko da zenbateko aldea dagoen Nafarroako Gobernuaren deialdian kalkulatutako zenbatekotik Ministerioak emandakora (barnean sartuta Ministerioak unibertsitateei matrikula bakoitzeko ematen dien laguntza). Alde hori da Nafarroako Gobernuak ematen duen zenbateko osagarria: ICOMPL = IGN-IMIN.

Aldea zero denean, edo Nafarroako Gobernuaren beka Ministerioarena baino txikiagoa denean (ICOMPL ≤ 0), onuradunari ordainduko zaio aparteko laguntzaren zenbatekoa gehi espediente akademikoarena (halakorik balego).

–Nafarroako Gobernuaren beka Ministerioarena baino handiagoa denean (ICOMPL > 0), onuradunari ordainduko zaio hauetatik balio handiena duen zenbatekoa:

–ICOMPL (zenbateko osagarria).

–Aparteko laguntzaren eta espediente akademikoaren zenbatekoen batura.

Alde hori kalkulatzeko xede bakarrerako, berdintzat joko dira Nafarroako Gobernuak matrikularengatik ematen duen bekaren zenbatekoa eta Hezkuntzako, Lanbide Heziketako eta Kiroleko Ministerioarena, Nafarroako Unibertsitatean matrikulaturiko ikasleen kasuan izan ezik. Haien kasuan, 7.1.2 oinarrian ezarritakoa aplikatuko da.

6.2. Hezkuntzako, Lanbide Heziketako eta Kiroleko Ministerioaren beka bat lortu ez dutenen kasuan.

Deialdi honen irizpideen arabera dagokion zenbatekoa ordainduko zaio.

Ikasketarako laguntza edo beka lortzen dutenei, 2023-2024 ikasturtean matrikulako kreditu guztiak gainditu ez badituzte, bakarrik %70 ordainduko zaie eskubidez dagozkien kontzeptu guztietan. Salbuespen bakarra matrikularako beka izanen da, hori osorik emanen baita, 4. oinarrian eskatzen den errendimendua betez gero.

7. oinarria.–Beken eta laguntzen zenbatekoak.

7.1. Matrikularako beka edo laguntzak.

Matrikularako bekaren zenbatekoak estaliko du ikasleak 2024-2025 ikasturtean lehen aldiz matrikulatutako kredituen zenbatekoa, bazter utzita bigarren eta ondorengo matrikuletan formalizatzen direnak. Baliozkotu, egokitu eta parekatutako kredituak ez dira ordaindu beharreko kreditutzat hartuko.

Nafarroako Gobernuak Nafarroako Unibertsitate Publikoaren kredituetarako 2024-2025 ikasturterako onesten duen prezio ofiziala izanen da matrikularako laguntzaren zenbatekoa kalkulatzeko aplikatuko den kredituaren prezioa. Ez dira matrikularen bekaren parte izanen kasuan kasuko titulazioa lortzeko behar den minimoa gainditzen duten kredituak.

Matrikula bakoitzeko laguntzaren zenbatekoa kalkulatzeko, ez dira kontuan hartuko administrazio zerbitzu hauen prezioak: espedientea irekitzea ikasketak hasteagatik, lekualdaketak, identitate txartelak egitea, baliozkotzeak, egokitzapenak eta abar.

Edozein kontzeptu dela-eta, matrikulak merkeago ateratzen badira, edo doan, onura horiek matrikularengatik emandako laguntzaren zenbatekotik deskontatuko dira, salbuespen hauekin: Nafarroako Unibertsitatearen prezioak sustatzeko planarengatik egindako deskontua, familia ugarikoa edo guraso bakarreko familiakoa izateagatik egindako murrizketak eta ohorezko matrikulak ateratzeagatik egindako murrizketak.

Nolanahi ere, matrikularako emandako zenbatekoa ezin izanen da matrikularen benetako kostua baino handiagoa izan.

7.1.1. Ikasketak Nafarroako Unibertsitate Publikoan edo Nafarroako Foru Komunitatetik kanpoko unibertsitateetan egiten direnean, 2.2 oinarrian biltzen diren kasuetan, hauek izanen dira bekak edo laguntzak, errenta tarteen arabera:

–1. tartea: Nafarroako Gobernuak onetsitako prezio akademikoaren %100.

–2. tartea: Nafarroako Gobernuak onetsitako prezio akademikoaren %80.

–3. tartea: Nafarroako Gobernuak onetsitako prezio akademikoaren %60.

–4. tartea: Nafarroako Gobernuak onetsitako prezio akademikoaren %50.

7.1.2. Ikasketak Nafarroako Unibertsitatean egiten badira, Iruñeko egoitzan, eta Nafarroako Unibertsitate Publikoak ez baditu ikasketa horiek ematen edo, bestela, nahiz eta Nafarroako Unibertsitate Publikoak ere eman, ikasleek bertan ikasteko posturik lortu ez dutela egiaztatzen badute, hauek izanen dira bekak edo laguntzak, errenta tarteen arabera:

–1. tartea: Nafarroako Gobernuak esperimentaltasun bereko ikasketetarako onetsitako prezio akademikoa halako 4.

–2. tartea: Nafarroako Gobernuak esperimentaltasun bereko ikasketetarako onetsitako prezio akademikoa halako 2,7.

–3. tartea: Nafarroako Gobernuak esperimentaltasun bereko ikasketetarako onetsitako prezio akademikoa halako 1,5.

–4. tartea: Nafarroako Gobernuak esperimentaltasun bereko ikasketetarako onetsitako prezio akademikoa halako 1,3.

7.1.3. Ikasketak Nafarroako Unibertsitatean egiten badira, 2024-2025 ikasturtean, eta aurreko kasuaren baldintzak betetzen ez badira, edo eskatzaileek beren ikasketak beste unibertsitate batean hasi badituzte, hauek izanen dira bekak edo laguntzak, errenta tarteen arabera:

–1. tartea: Nafarroako Gobernuak onetsitako prezio akademikoaren %100.

–2. tartea: Nafarroako Gobernuak onetsitako prezio akademikoaren %80.

–3. tartea: Nafarroako Gobernuak onetsitako prezio akademikoaren %60.

–4. tartea: Nafarroako Gobernuak onetsitako prezio akademikoaren %50.

7.2. Bizitegirako bekak edo laguntzak.

Bizitegirako laguntzaren helburua da laguntzea pisu baten alokairu-gastuak edo ikasleen egoitza baten gastuak ordaintzen.

Beka edo laguntza hau jasotzen ahalko dute deialdi honetako baldintza orokorrak betetzen dituzten eskatzaileek, baldin eta egiaztatzen badute ikasturtean zehar familiaren bizilekutik kanpo bizi behar dutela, familiaren bizilekuaren eta ikastetxearen arteko distantziagatik, dauden garraiobideengatik eta eskolen orduak aldatzeko aukera ezagatik. Egiaztapen hori 8.2 oinarrian ezartzen den bezala egin beharko da.

Ondorio horietarako, ikastetxetik hurbilen dagoena hartuko da familiaren bizilekutzat, baldin eta familia-unitateko kide konputagarriren bat haren titularra bada edo hartan bizi bada, nahiz eta eskatzailearen legezko bizilekuarekin bat ez etorri.

Ezin izanen dute beka edo laguntza hau jaso:

–Matrikula partziala duten ikasleak.

–Erabat presentzialak ez diren irakaskuntzetan matrikulatutako ikasleak.

–Deialdi honetako garraio-laguntzen onuradunak.

–Nazioarteko mugikortasun programa batean parte hartzen ari direnak (Erasmus, Palafox, etab.).

–Beregaintasun familiarra eta ekonomikoa aitortzen duten ikasleak: halakoetan, ikasleak ikasturtean zehar duen bizilekua hartuko da familiaren etxetzat, eta, beraz, ez da bidezkoa izanen laguntza hau ematea, kasu horietan ikasleak ikasturtean duen bizilekua eta familiaren etxea bat direlako.

–Ministerioaren laguntzen onuradunak, bizitegitarako laguntza jaso ez badute eta horretarako baldintza ekonomikoak betetzen badituzte.

Bizitegirako laguntzaren zenbatekoa, errenta tarteen arabera ezartzen da:

1. tartea: 3.000 euro.

2. tartea: 2.400 euro.

3. tartea: 1.800 euro.

4. tartea: 1.500 euro.

Frogatu beharko da ikasturtean bizileku den etxebizitzaren titulartasuna edo errentamendua. Errentamendua Nafarroan bada, Nafarroako Etxebizitzen Errentamenduko Kontratuen Erregistroko inskripzioa aurkeztu beharko da. Laguntza honen zenbatekoa ez da inola ere zerbitzuaren benetako kostua baino handiagoa izanen.

Graduko ikasketetan eta titulazio bikoitzetan, ikasketa planaren iraupen ofizialetik kanpoko epe gehigarrian, laguntzaren zenbatekoa egokitu zaionaren %50 izanen da.

Bi ikasturtetako masterreko ikasketetan, 120 kreditu baino eskola-karga txikiagoa dutenetan, bigarren urtearen bekaren zenbatekoa egokitu zaionaren %50 izanen da.

%65eko edo hortik gorako desgaitasun legez aitortua duen ikasleak ez badu erabiltzen matrikula murriztua, bekaren zenbatekoa %50 handiagoa izanen da.

Bizitegiari dagokionez, egiaztatutako egonaldia ikasturte osoa ez bada, emandako laguntza aldi horren proportzionala izanen da.

7.3. Garraiorako bekak.

Garraiorako laguntzak aurreikusten dira, asmoa baita laguntzea ikasleak familiaren bizilekutik (errolda kolektiboan agertzen dena) Nafarroako Foru Komunitateko ikastetxera joan-etorriak egitearen gastuak ordaintzen, betiere hiri-garraioko zerbitzurik ez badago eta astean gutxienez 4 joan-etorri egiten badira (joateko bi eta itzultzeko bi).

Garraiorako laguntza eskatzen ahalko da, halaber, ikaslea Nafarroako Foru Komunitatetik kanpoko unibertsitate batera joateko, baldin eta ikastetxe hori familiaren bizilekutik hurbilen badago.

Garraioaren kostua kalkulatzeko, herrien arteko distantzia (km) bider astean egin beharreko bidaia kopurua (joan-etorriak) eginen da. Eta gero, hortik ateratzen dena bider 2,8 eginen da.

Eskatzailearen ohiko bizilekutik ikastetxearen kokapenerainoko distantzia automatikoki kalkulatuko da Unibecas aplikazioaren bidez; izan ere, bi puntuen koordenatu geografikoen artean lerro zuzenean dauden kilometroen kopurua emanen du.

Pirinio aldeko ikasleen kasuan (Erronkaribar, Zaraitzu, Erroibar eta Aezkoa ibarretakoak, eta Luzaide, Auritz eta Orreagako udalerrietakoak), bider 3,1 eginen da.

Ordaindu beharreko zenbatekoa ateratzeko, kalkulatutako kostuari familiaren errenta erabilgarriaren tarteari dagokion koefizientea aplikatuko zaio:

1. tartea: %100.

2. tartea: %80.

3. tartea: %60.

4. tartea: %50.

Laguntza hau eskatzen dutenek agiri bidez frogatu beharko dute eskatutako bidaien kopurua (eskola-ordutegiak, etab.).

Graduko ikasketetan eta titulazio bikoitzetan, ikasketa planaren iraupen ofizialetik kanpoko epe gehigarrian, laguntzaren zenbatekoa egokitu zaionaren %50 izanen da.

Bi ikasturtetako masterreko ikasketetan, 120 kreditu baino eskola-karga txikiagoa dutenetan, bigarren urtearen bekaren zenbatekoa egokitu zaionaren %50 izanen da.

%65eko edo hortik gorako desgaitasun legez aitortua duen ikasleak ez badu erabiltzen matrikula murriztua, laguntza honen zenbatekoa %50 handiagoa izanen da.

Matrikula partziala daukaten ikasleek ere jasotzen ahalko dute beka edo laguntza hau.

Ezin izanen dute beka edo laguntza hau lortu deialdi honetako bizitegirako laguntzen onuradunek, ezta beregainak direla adierazten dutenek ere.

7.4. Beka, ikasketa-espedientearengatik.

Laguntza hau 8,5 puntuko edo gehiagoko nota frogatzen duten graduko edo gradu bikoitzeko ikasleei emanen zaie:

–Gradura sartzeko proba.

Batxilergotik sartzen direnentzat, formula honen arabera kalkulatuko da: sartzeko nota = 0,6 BBN + 0,4 USBE. (BBN= Batxilergoko batez besteko nota, eta USBE= Unibertsitatean sartzeko Batxilergoaren ebaluazioa).

–Gainerako sarbideetarako, graduan sartzeko bidea eman dien nota.

–Graduko hurrengo ikasmailetara pasatu ahal izateko aurreko ikasmailan atera duten batez besteko nota.

Batez besteko nota kalkulatzeko, I. eranskinean ezartzen den prozedura erabiliko da.

Beka edo laguntza honen zenbatekoa errenta tarteen arabera ezartzen da.

1. tartea: 400 euro.

2. tartea: 300 euro.

3. tartea: 200 euro.

4. tartea: 200 euro.

Ezin izanen dute beka edo laguntza hau jaso:

• Matrikula partziala duten ikasleak.
• Masterreko ikasleak.

7.5. Laguntza berezia.

Laguntza hau jasotzen ahalko dute behar ekonomiko larria aitortu eta frogatzen duten eskatzaileek, deialdiaren baldintza orokorrak betetzen badituzte.

Laguntza bereziak 1.800 eurokoak izanen dira.

Laguntza berezia jasotzeko eskubidea izateko beharrezkoa izanen da familiaren per capita errenta erabilgarria 4.800 eurotik beheiti izatea. Gainera, beharrezkoa izanen da ondoko baldintzetariko bat gutxienez betetzea:

–Errenta hartzaile nagusia 2023. urte osoko 10 hilabetetan langabezian eduki duten familiak.

–2023an errenta bermatua jaso duten familiak.

–Erabateko zurztasuna.

–Aita edo ama ezkongabeen edo dibortziatu edo legez bereizitako ezkontidearen seme-alabak, diru-sarrera bakarra kasu bakoitzean mantenu-sariengatik sortutako pentsioak direnean.

–Familian, ikaslearen gurasoek edo seme-alabaren batek, edo ikasleak berak %33ko edo hortik gorako desgaitasun legez aitortua dutenean.

–Errenta-hartzaile nagusia pentsioduna duten familiak.

7.6. Digitalizaziorako laguntza.

Laguntza honen helburua da ikasleak irakaskuntza eta ikaskuntza digitaleko metodologietara egokitzeko bere gain hartzen dituen gastuetan laguntzea.

200 euroko laguntza emanen zaie unibertsitateko graduko lehen ikasturtean edo gradu bikoitzean lehen aldiz matrikulatutako ikasleei, betiere baldintza orokorrak betetzen badituzte eta errentaren 1. tartean badaude (5.4.1 oinarria).

7.7. Emandako gehieneko zenbatekoa.

Beka edo laguntzaren kontzeptu guztiak baturik, guztira ordainduko den kopurua ez da izanen lanbide arteko gutxieneko soldatak deialdia argitaratzen den egunean egiten duen kopurua baino handiagoa.

Garraiorako laguntzaren zenbatekoa ezin da bizitegirako laguntzaren zenbatekoa baino handiagoa izan; salbuespenez, garraiorako beketan Pirinio aldeko ikasleei ematen zaien zenbatekoa muga horren %10eraino handitzen ahalko da.

Edozein kontzepturengatik emandako zenbatekoa ez da izanen haren kostua baino handiagoa.

7.8. Beken araubidea genero-indarkeriaren, sexu-indarkeriaren eta terrorismoaren biktimentzat.

Familia-unitatearen kideren batek genero indarkeriaren biktima izan dela aitortua duenean, Emakumeen kontrako indarkeriari aurre egiteko 14/2015 Foru Legean xedatutakoari jarraituz, edo ekintza terrorista baten ondorioz ikaslearentzat berarentzat edo bere gurasoentzat, tutoreentzat edo zaintzaileentzat kalte pertsonalak eratorri badira, Terrorismoaren Biktimei Laguntzeari buruzko apirilaren 28ko 9/2010 Foru Legean ezarritakoarekin bat, deialdi honetan agertzen diren bekak jasotzen ahalko ditu irizpide hauei jarraituz:

–Ez zaizkie aplikatuko betekizun hauek: gainditutako eskola-kargaren betekizuna, lorturiko batez besteko nota edo ikasturtean matrikulatutako kreditu edo irakasgaien gutxieneko kopurua.

–Beste betekizun akademiko hauek ere ez zaizkie aplikatuko: ikasketa aldaketarena, bekadun izaerarako urteen muga eta kredituen edo irakasgaien ehuneko jakin bat gainditu beharra.

Araubide bera aplikatuko zaie sexu-indarkeriaren biktima direla egiaztatzen duten pertsonei, bat etorriz Sexu Askatasunaren Berme Integralari buruzko irailaren 6ko 10/2022 Lege Organikoaren 37. artikuluan eta Bortxazko delituen eta sexu askatasunaren kontrako delituen biktimei laguntzak eta sorospena emateari buruzko abenduaren 11ko 35/1995 Legearen 2.1 artikuluan xedatutakoarekin.

8. oinarria.–Eskaerak aurkeztea: epea eta eskatutako dokumentazioa.

Hilabeteko epea dago eskaerak aurkezteko, deialdia Nafarroako Aldizkari Ofizialean argitaratzen denetik hasita.

2024-2025 ikasturteko beketarako edo laguntzetarako eskaerak "nafarroa.eus" web atariko datu-orria betez egiten ahalko dira soilik. Beharrezkoa da aldez aurretik identifikatzea cl@ve sistemaren kredentzialekin edo erabiltzailearen ziurtagiriarekin (ziurtagiri digitala edo NAN elektronikoa).

Beka jasoko duen ikasleak berak eginen du eskaera. Legezko ordezkariak egin behar badu eskaera, aldez aurretik bete beharko da ordezkaritzaren egiaztagiria, izapidetze-prozeduran aurreikusi bezala.

Bekaren eskaera bete eta ezarritako prozedura telematikoaren bidez igorri ondoren, aurkeztuta eta sinatuta geldituko da, ondorio guztietarako. Eskaeraren frogagiria gorde beharko da, frogatzeko, beharrezkoa bada, eskaera ezarritako epean eta moduan aurkeztu dela. Ez da beharrezkoa eskaera hori fisikoki inon aurkeztea.

Ez dira kontuan hartuko telematikoki ez beste modu batez betetako eskaerak.

Eskatutako dokumentazioa erantsiko da eskaera orriaren bitartez, adierazitako formatuetan.

Prozeduraren edozein unetan eska daiteke alegatutako inguruabarrak justifikatzen dituzten jatorrizko dokumentuak aurkezteko.

8.1. Datuak egiaztatzeko baimena.

Ikasleak baimena ematen ahalko du bere datuak eta bizikidetza-unitateko gainerako kideenak telematikoki kontsultatzeko, baita Estatuko Administrazio Orokorrean eta beste administrazio publiko batzuetan eskuragarri daudenak ere, identifikazio-datu guztiak eta inguruabar pertsonal, akademiko eta familiarrak zehazteko, ezagutzeko eta egiaztatzeko, bai eta bekaren eskaera ebazteko beharrezkoak diren errenta eta ondarea ere. Aurka egonez gero, berariaz adierazi beharko du eskaeran, eta ezarritako baldintzak egiaztatzeko beharrezkoa den dokumentazioa aurkeztu beharko du.

8.2. Aurkeztu beharreko agiriak:

8.2.1. Eskaera egiteko unean, ikasle guztiek: egungo ikasturteko matrikularen kopia, bai gradukoa, bai masterrekoa.

8.2.2. Zirkunstantzia pertsonalen arabera nahitaezkoa den dokumentazioa:

–Dibortzioaren edo banantzearen kasuan, gurasoetako bat ikasleekin bizi ez bada ere: haren baldintzak zehazten dituen hitzarmen arauemailearen kopia, eta/edo epai judizialarena eta/edo notarioaren erabakiarena.

–2024-25 ikasturtean ikasketak direla-eta ohiko bizilekutik kanpo bizitzeagatik bizitegirako laguntza eskatzen bada:

• Alokairu-kontratuaren kopia osoa, eskatzailearen izena jasotzen duena, eta 2024ko irailetik aurrera hileko bat ordaindu izanaren egiaztagiria.
• Ikasleen egoitzako plazaren erreserbaren ziurtagiria, kostua adierazita, bai eta lehen hilekoa ordaindu izanaren egiaztagiria ere (7.2 oinarria).
• Kasu guztietan, administrazioak alokairuaren hilekoen ordainagiri gehiago eskatzen ahalko ditu, beharrezkotzat joz gero.

–Beregainak direla adierazten duten ikasleen kasuan:

• Ohiko bizilekua alokatzeko kontratuaren kopia, 2023ko abenduaren 31koa.
• Ohiko bizilekua den etxebizitzaren titulartasuna edo errentamendua egiaztatzen duen dokumentua (Nafarroako Etxebizitza Errentamenduko Kontratuen Erregistroko inskripzioa).

–Guraso bakarreko familia izatea egiaztatzen duen dokumentazio ofiziala.

–Erabateko zurztasuna justifikatzen duen agiria.

–Laguntza berezia ematea justifikatzeko behar den dokumentazioa (ikus 7.5 oinarria).

–Diru-sarreren murrizketa larria justifikatzen duen dokumentazioa: familia-unitate osoaren 2023ko eta 2024ko errenta-aitorpenak, eskaeran hala adierazi bada.

–Garraiorako laguntzaren beharra justifikatzen duten dokumentuak (eskola-ordutegia) (7.3 oinarria).

–Genero indarkeriaren, sexu-indarkeriaren edo terrorismoaren biktima dela frogatzen duen agiria.

–30 urtetik beherako anai-arrebek Espainiako hezkuntza sistemako unibertsitateko ikasketetan matrikula dutela eta familiaren bizilekutik kanpo daudela egiaztatzen duen dokumentua (matrikula).

–Baldin eta Nafarroatik kanpoko unibertsitateren batean matrikulatu bada, hark nahi duen titulazioa ez delako euskaraz ematen Nafarroako Unibertsitate Publikoan, titulazioa zer hizkuntzatan emanen den frogatzen duen egiaztagiria.

–Bidezkotzat jotzen diren dokumentu eta ziurtagiri guztiak.

8.2.3. Datuak kontsultatzea baimentzen ez dutenak:

–IFZa egiaztatzea ahalbidetzen duen ziurtagiria.

–Familia-unitatearen 2023ko diru-sarrerak eta ondarea frogatzen dituzten agiriak.

–Zerga betebeharrak egunean dituela egiaztatzen duen agiria.

–Desgaitasunaren ziurtagiria, ikaslearena edo familia-unitateko edozein kiderena, hala badagokio.

–Erroldatze eta bizikidetza ziurtagiria.

–Familia ugariaren ziurtagiriaren fotokopia, hala badagokio.

–Guraso bakarreko familiaren ziurtagiria, hala badagokio.

–Bidezkotzat jotzen diren dokumentu eta ziurtagiri guztiak.

8.2.4. Aurkeztu beharreko informazio ekonomikoa, familia-unitatea PFEZaren aitorpena egitera legez behartuta ez badago. Dokumentazio hau aurkeztu beharko dute datuen kontsulta baimentzen duten eskatzaileek eta baimentzen ez dutenek.

–Erroldatze eta bizikidetza ziurtagiria, 2023. urteari dagokiona, udalak emanda.

–Besteren konturako langileen edo pentsiodunen kasuan, 2023. urtean izandako diru-sarreren frogagiria.

–Enpresaburu edo profesional liberalen kasuan, 2023. urtean izandako diru-sarrera gordinen aitorpena.

–Kenkarien frogagiri eguneratuak (desgaitasuna...).

9. oinarria.–Datuak bildu eta lagatzea.

Eskatzaileak eskaera aurkezteak honako hau esan nahi du:

–Onartzen dituela deialdiaren oinarriak.

–Baimena ematen duela komunikazioak bitarteko elektronikoen bidez jasotzeko.

–Badituela eskaerarekin batera aurkeztutako datu guztiak egiaztatzen dituzten jatorrizko frogagiriak, eta horiek ere aurkeztuko dituela horretarako errekerimendua egiten bazaio.

–Eskaerari erantsitako datu guztiak egiazkoak direla.

–Jakitun dela ezen, deklaratutako inguruabarretan zerbait zuzena ez bada, egia ez bada edo ezkutatu bada, beka ukatuko zaiola edo itzuli beharko duela.

–Eskatzailea dela bekaren ordainketa eskuratzeko adierazitako kontu korrontearen titularra edo titularkidea.

–Baimena ematen diola Unibertsitateko, Berrikuntzako eta Eraldaketa Digitaleko Departamentuari argitara emateko bekadunen zerrendak, haien identifikazio datuak eta emandako laguntzen zenbatekoak zehaztuta, bat etorriz dirulaguntzei buruzko arauetan eta datu pertsonalen babesari buruzko arauetan ezarritakoarekin.

Eskaeran jarritako datu pertsonalak, eta bekak edo laguntzak emateko eskatzen diren gainerako agiriak, Unibertsitateko, Berrikuntzako eta Eraldaketa Digitaleko Departamentuko Unibertsitateko Zerbitzuaren ardurapeko fitxategi automatizatu batean jasoko dira.

Aipatu unitate organikoak edozein unetan erabiltzen ahalko ditu fitxategi horretako datuak, egiazkoak diren baieztatzeko.

10. oinarria.–Izapidetzea eta ebazteko prozedura.

10.1. Eskaerak berrikustea, izapidetzeko onartzea eta errentaren eta ondarearen gehieneko muga gainditzen duten eskaerak ezestea.

Beka edo laguntza ikaslearen alde emanen da legezko ondorio guztietarako.

Unibertsitateko, Berrikuntzako eta Eraldaketa Digitaleko Departamentuko Unibertsitateko Zerbitzuari dagokio espedientearen instrukzioa. Hark begiratuko du laguntzak jasotzeko baldintzak betetzen diren, eta ofizioz baloratuko ditu eskaerak, oinarri hauetan ezarritako irizpideen arabera. Era berean, Unibertsitateko Zerbitzuak, prozedurako edozein unetan, eskaerak behar bezala baloratzeko beharrezkotzat jotzen dituen agiri osagarriak eskatzen ahalko ditu.

Behin egiaztatuta ikaslearen baldintza pertsonalak eta haren familiarenak eta familia-unitatearen osaera, bai eta familiaren errentaren kenkariak jasotzeko eskubidea ematen duten inguruabarrak ere, informazio hori Nafarroako Foru Ogasunean errentari eta ondareari buruz dauden datuekin alderatuko da, zehazteko betetzen diren edo ez deialdian ezarritako baldintza ekonomikoak.

Deialdiaren baldintza orokorrak betetzen ez badira edo deialdian ezarritako errentaren eta ondarearen gehieneko mugak gainditzen badira, Unibertsitateko Zerbitzuak eskaera horiek ezestea proposatuko du, eta behin-behineko ebazpen bat argitaratuko. Ebazpen hori nafarroa.eus atarian argitaratuko da. Banaka ere kontsultatzen ahalko da, bekak kudeatzeko aplikazioaren bidez. Behin-behineko ebazpena argitaratu eta 10 eguneko epean, interesdunek alegazioak egin eta egokitzat jotzen duten dokumentazioa aurkezten ahalko dute.

Epe hori igarotakoan, aurkeztutako alegazioak edo dokumentazioa aztertu ondoren, halakorik badago, Unibertsitateko Zuzendaritza Nagusiak behin betiko ebazpena emanen du, non ezetsiko baitira deialdiaren baldintza orokorrak betetzen ez dituzten eskaerak eta gehieneko errenta eta ondarearen muga gainditzen dutenak, eta gainerako eskaeren ebaluazio-prozedurak aurrera egin dezan aginduko baita.

10.2. Laguntza ematea eta ukatzea.

Deialdiko betekizun orokorrak eta ekonomikoak ez betetzeagatik ezetsi ez diren eskaeren baldintzak eta betekizunak ebaluatuta, Unibertsitateko Zerbitzuak deialdiaren behin betiko ebazpena proposatuko du, Beken Batzordeari kontsulta egin ondoren.

Eman eta ezetsi diren beken eta laguntzen zerrenda dakarren behin betiko ebazpena Unibertsitateko zuzendari nagusiak onetsiko du, Unibertsitateko Zerbitzuak proposatuta, eta nafarroa.eus atarian argitaratuko da. Banaka ere kontsultatzen ahalko da, bekak kudeatzeko aplikazioaren bidez. Ebazpen horrekin ados ez dauden eskatzaileek gora jotzeko errekurtsoa aurkezten ahalko dute, Unibertsitateko, Berrikuntzako eta Eraldaketa Digitaleko Departamentuko kontseilariari zuzendua, hilabeteko epean, proposamena nafarroa.eus atarian argitaratzen denetik hasita. Zerbitzu horrek, hala berean, ofizioz berrikusten ahalko ditu espedienteak, deialdian aurreikusitakoaren aurkako arau-hausterik edo akatsik atzematen badu.

11. oinarria.–Beken edo laguntzen ordainketa.

Ikaslearen aldeko beka edo laguntzen ordainketa eginen da eskaeran adierazi den banketxearen bidez. Banketxeko kontua aktibo egon beharko da laguntza emateko prozesua bukatu arte.

Behin betiko ebazpena argitaratzean ordainduko dira bekak edo laguntzak.

12. oinarria.–Onuradunen betebeharrak.

Ebazpen honen bidez deitzen diren beken onuradunek honako betebehar hauek izanen dituzte:

a) Beka zertarako ematen den, horretarako erabiltzea, hau da, matrikula egiteko, klasera joateko, azterketetan aurkezteko eta, hala badagokio, laguntzaren xede diren gastuak ordaintzeko.

b) Beka emateko eta ordaintzeko baldintza eta betebeharrak betetzen direla frogatzea.

c) Beka emateko erabakigarriak diren baldintzak betetzen direla egiaztatzeko beharrezkoak diren egiaztapen-jarduerak onartzea, eta bizikidetza-unitateko pertsona konputagarri guztiei jakinaraztea Unibertsitateko Zerbitzuak eskuragarri dauden elkarreragingarritasun-zerbitzu guztietan egiaztatuko dituela bekaren eskaera izapidetzeko errentari eta ondareari buruz beharrezkoak diren datuak, baldin eta datuak kontsultatzeko berariazko baimena badago.

d) Ikasleak ikasketak aldatzen baditu, berariaz adieraztea aurreko urteetan bekaduna izan dela, eta bekaren xedeko ikasketa-maila bereko edo handiagoko titulu akademiko bat duela edo lortzeko legezko baldintzetan dagoela, hala baldin bada.

e) Matrikula ezeztatzen bada, edo beka emateko kontuan hartutako baldintzaren bat aldatzen bada, erakunde emaileari horren berri ematea.

13. oinarria.–Kobratzeko eskubidea galtzea eta beka itzultzea.

1. Unibertsitateko zuzendari nagusiak ondotik zehazten diren arrazoiengatik adieraziko du emandako beka kobratzeko eskubidea galdu dela edo, hala badagokio, jasotako zenbatekoak itzuli behar direla, espedienteko interesdunari entzun ondoren:

a) Beka jasotzeko, ikasleak datuak ezkutatu edo faltsutu baditu.

b) Egiaztatzen bada beka eman zaiela ezarritako baldintzaren bat betetzen ez duten pertsonei edo behar bezala frogatu ez dituztenei.

c) Bekaren zenbatekoa erabili ez bada eman zen helbururako.

Ulertuko da beka edo laguntza ez dela erabili eman zen helbururako baldin eta ondoko kasuren bat gertatzen bada:

I. Matrikula deuseztatzea.

II. Beka zer ikasmailatarako eman zaion eta hartan zer kreditutan matrikulatu den, orokorrean gutxienez ere horien %50 ez gainditzea. Zientzietako, Osasun Zientzietako eta Ingeniaritza eta Arkitekturako adarretan, %40 izanen da. Ehuneko hori kalkulatzeko aparte utziko dira kreditu baliozkotuak, aitortuak, egokituak, transferituak edo gisakoak.

III. Ikastetxeak emandako zerbitzuak ez ordaintzea, beka zerbitzu horiek finantzatzeko eman bazen.

I. kasuan, beka zer kontzeptutarako eman zaion, horiek guztiak itzuli beharko ditu.

II. kasuan, beka zer kontzeptutarako eman zaion, horiek guztiak itzuli beharko ditu, matrikularako eta digitalizaziorako beka izan ezik.

III. kasuan, ordaindu gabeko zerbitzuei dagozkien laguntzak itzuli beharko ditu.

d) Edo beka hau arautzen duen araudian jasotako beste edozein ez-betetze.

Ikaslea ikasturtean zehar hiltzen bada, ez da baliogabetuko emandako beka edo laguntza.

2. Espedientea izapidetzean ondorioztatzen bada itzuli egin behar direla jasotako zenbatekoak eta, hala badagokio, legezko interesak, ebazpen bat emanen da, itzulketa egin ahal izateko behar den informazioa jasoko duena.

3. Borondatezko epean itzultzen ez bada, Ekonomia eta Ogasun Departamentuari jakinaraziko zaio, premiamendu bideari ekin diezaion, indarreko xedapenek ezartzen dutenari jarraituz.

4. Itzulpena ordaintzeko betebeharrak ez du eragotziko Dirulaguntzei buruzko azaroaren 9ko 11/2005 Foru Legearen 42. artikuluan eta hurrengoetan arau-hausteen eta zehapenen arloan xedatutakoa.

14. oinarria.–Administrazioaren kontrola.

1. Unibertsitateko, Berrikuntzako eta Eraldaketa Digitaleko Departamentuak zilegi izanen du, edozein unetan, eskaera-espedienteak ikuskatzea, egiaztatzeko ea egiazkoak diren espediente horietan jasotzen diren eta beka edo laguntza emateko kontuan hartu diren datuak, eta baieztatzeko laguntzaren zenbatekoa eman den helbururako erabiltzen dela.

2. Laguntzak esleitzeko orduan familiaren errenta eta ondare erreala kalkulatzeko mekanismorik egokienak zehazte aldera, eta bekak lortzeko aitorpenetan iruzurra saihesteko kontrola areagotze aldera, Unibertsitateko, Berrikuntzako eta Eraldaketa Digitaleko Departamentuak laguntza eskatzen ahalko dio Foru Administrazioko edozein departamenturi edo organori.

15. oinarria.–Datu pertsonalen tratamendu automatizatua.

Datu pertsonalen babesari dagokionez, Unibertsitateko, Berrikuntzako eta Eraldaketa Digitaleko Departamentuaren jarduketa bat etorriko da Datuak Babesteko Erregelamendu Orokorrean (2016/679 EB Erregelamendua) eta Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan xedatutakoarekin. Unibertsitateko Zuzendaritza Nagusiak bekak emateko prozesuetan parte hartzearen ondorioz jasotako datu pertsonalak "Unibertsitateko ikasketetarako dirulaguntzak, bekak eta laguntzak" izeneko tratamenduko jardueran sartuko dira.

Bildutako datu pertsonalen tratamenduaren xedea izanen da ebazpen honetan aurreikusitako laguntzak kudeatzea eta helburu estatistikoetarako erabiltzea. Datu horiek beharrezkoak dira interes publikoaren mesederako misio bat betetzeko, Unibertsitateko, Berrikuntzako eta Eraldaketa Digitaleko Departamentuari emandako ahal publikoak betez. Datuak lagatzen ahalko zaizkie Nafarroako Gobernuko beste organo batzuei, baita beste administrazio publiko batzuei edo kontroleko agintari, epaitegi eta erakunde publikoei ere, beren egitekoak bete ditzaten.

Datuen titularrek datuak eskuratzeko, zuzentzeko, mugatzeko, ezabatzeko eta transferitzeko eskubideak baliatzen ahal dituzte; horretarako, idatzizko komunikazio bat bidali beharko dute Unibertsitateko, Berrikuntzako eta Eraldaketa Digitaleko Departamentuari zuzendua (Cabárceno kalea 6, Sarriguren, edo sgt.uitd@navarra.es). Datuen babesari buruzko informazio osagarria eta zehatza laguntzen fitxan kontsultatzen ahalko da.

16. oinarria.–Baliabide elektronikoen bidezko harremanak.

Interesdun guztiek elektronikoki egin beharko dituzte Administrazioarekiko tramiteak administrazio prozeduraren fase guztietan. Era berean, administrazio errekurtsoak jarri nahi izanez gero, elektronikoki jarri beharko dituzte, eta hala egin beharko dituzte beharrezko tramite guztiak errekurtsoak jarri ondorengo prozeduraren fase guztietan. Baliabide elektronikoen bidez tramitatuko dira, orobat, errebokatzeko eta dirua itzultzeko prozedurak.

Aurkeztu beharreko dokumentu guztiak telematika bidez aurkeztuko dira, Nafarroako Gobernuak Interneten duen Atariko (www.nafarroa.eus) tramiteen katalogoko fitxa erabiliz (hemendik aurrera, laguntzen fitxa). Beharrezkoa da aldez aurretik identifikatzea cl@ve sistemaren kredentzialekin edo erabiltzailearen ziurtagiriarekin (ziurtagiri digitala edo NAN elektronikoa).

Jakinarazpenak laguntzen fitxan argitaratuko dira. Banakako jakinarazpenak telematika bidez eginen dira eta eskatzailearen gaitutako helbide elektroniko bakarrera (GHEB) igorriko dira. Jakinarazpen edo komunikazioaren bidalketaren berri emanen da eskaera-orrian jarritako helbide elektronikoaren bitartez.

Jakinarazpena elektronikoki egiten bada ere, abisu bat bidaliko da eskatzaileak emandako posta elektronikoko helbidera, jakin dezan jakinarazpen bat duela administrazio honetako egoitza elektronikoan. Abisu hori egin gabe ere, jakinarazpena guztiz baliozkoa izanen da.

17. oinarria.–Errekurtsoak.

Deialdi honen eta oinarrien aurka gora jotzeko errekurtsoa paratzen ahal da, Unibertsitateko, Berrikuntzako eta Eraldaketa Digitaleko Departamentuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

Bekak eta laguntzak emateko edo ukatzeko behin betiko ebazpenaren aurka gora jotzeko errekurtsoa aurkezten ahal da, Unibertsitateko, Berrikuntzako eta Eraldaketa Digitaleko Departamentuari zuzendua, hilabeteko epean, ebazpena eta haren eranskinak "nafarroa.eus" atarian argitaratu eta biharamunetik hasita.

18. oinarria.–Beken Batzordea.

Beken Batzordeak kide hauek izanen ditu:

–Burua: Unibertsitateko zuzendari nagusia.

–Buruordea: Unibertsitateko Zerbitzuko zuzendaria.

–Kideak:

• Unibertsitateko Atalaren ordezkari bat.
• Nafarroako Foru Komunitateko Hezkuntzako Goi Mailako Ikuskatzailetzaren Arlo Funtzionaleko zuzendaria.
• APT bat (arlo ekonomikoa), Unibertsitateko, Berrikuntzako eta Eraldaketa Digitaleko Departamentukoa.
• Ekonomia eta Ogasun Departamentuko ikuskatzaile, kudeatzaile edo teknikari bat.
• Unibertsitate mailako bi ikasle, bata Nafarroako Unibertsitate Publikokoa eta bestea Nafarroako Unibertsitatekoa.
• Unibertsitateetako bi ordezkari, bata Nafarroako Unibertsitate Publikokoa eta bestea Nafarroako Unibertsitatekoa.
• Idazkaria: APT bat (arlo juridikoa), Unibertsitateko, Berrikuntzako eta Eraldaketa Digitaleko Departamentukoa.

I. ERANSKINA.–IKASKETA-ESPEDIENTEARENGATIK LAGUNTZA ESKURATZEKO BATEZ BESTEKO NOTAREN KALKULUA

Gainditu ez diren irakasgaien edo kredituen kalifikazioak ere sartzen dira, halakorik bada.

1. Batez besteko nota kalkulatzeko, ikasleen ikasturteko zenbakizko kalifikazioak erabiliko dira, 0tik 10erako eskalan. Aurkeztu gabeko irakasgaietan 2,50 puntuko nota jarriko da.

2. Zenbakizko kalifikaziorik ez dagoenean, eskuraturiko kalifikazioak honako baremo honi jarraikiz zenbatuko dira:

a) Ohorezko matrikula = 10 puntu.

b) Bikain = 9 puntu.

c) Oso ongi = 7,5 puntu.

d) Nahikoa edo gai = 5,5 puntu.

e) Ez gainditua, ez aurkeztua edo ez gai = 2,50 puntu.

3. Irakasgaien arabera antolaturiko ikasketa planak izanez gero, batez besteko nota kalkulatzeko, guztira lorturiko puntuak irakasgai guztien artean zatituko dira.

4. Kredituen arabera antolatutako ikasketa planen kasuan, irakasgai bakoitzean lortzen den puntuazioa haztatuko da irakasgaiaren kreditu kopurua kontuan hartuta, formula honi jarraikiz:

B = (P x IKK) / EKK

B = Irakasgai bakoitzean lortutako notaren haztapenaren balioa.

P = Irakasgai bakoitzaren puntuazioa.

IKK = Irakasgaiaren kreditu kopurua.

EKK = Eginiko kredituen kopurua; ebazpen honen arabera konputagarriak direnak hartuko dira kontuan.

Zenbateko hau adjudikatzeko, unibertsitateko graduetako bigarren, hirugarren edo laugarren ikasmailetan matrikulatutako ikasleen kalifikazioaren kasuan, 1,17ko koefiziente zuzentzailea aplikatuko da Arkitektura edo Ingeniaritzaren arloko ikasketetatik datozen kalifikazioen kasuan, 1,11koa Zientziaren arlotik datozenentzat, eta 1,05ekoa Osasun Zientzien arlotik datozenentzat.

II. ERANSKINA.–DATU EKONOMIKOAK

1.–Familiaren errenta erabilgarriaren kalkulua.

1.1. Familia-unitateko kide bakoitzaren banakako errenta nola kalkulatu.

Familia-unitateko kide konputagarrien kasuan, 2023ko PFEZaren aitorpena aurkezteko betebeharra badute, hau hartuko da banakako errentatzat:

–Zerga-oinarriaren zati orokorra.

–Ken ezkontidearen aldeko konpentsazio pentsioak eta mantenuko urteko sariak, bi-biak epailearen erabakiz ezarriak, eta bikotekide egonkorraren alde ordaindutako zenbateko legez galdagarriak.

–Gehi zerga-oinarriaren aurrezkiaren zati berezia, kenduta 2019tik 2022ra bitarteko ondareko irabazi eta galeren saldo garbi negatibo guztiak eta aurrezkiaren zerga-oinarrian sartu beharreko 2019tik 2022ra bitarteko kapital higigarriaren etekinen saldo garbi negatiboa.

–Gehi PFEZaren ondorioetarako salbuetsitzat jotzen diren gainerako errenta eskuratuak, hala nola baliaezintasun iraunkor absolutuko pentsioak edo baliaezintasun handikoak, kalte-ordainak, loteria sariak, aitak edo amak seme-alaben mantenurako ematen dituen urteko sariak, kontuan hartu gabe jasotako ikasketa beka edo laguntzak. Errenta salbuetsi horiek ez dira kontuan hartuko haien batura, familia-unitateko kide guztiak kontuan izanda, ez bada 10.000 eurora iristen.

PFEZaren aitorpena egitera beharturik ez dauden familia-unitateko kideen kasuan, bakoitzaren errenta honela kalkulatuko da: 2023. urtean eskuratutako diru-sarrera gordinen batura, edozein dela ere beren iturria, barnean sarturik ondasun higiezinak alokatzeagatik jasotako errentak eta enpresa, lanbide eta nekazaritza jardueren ondoriozko etekin garbiak. Ateratzen den zenbatekotik kendu beharko dira besteren konturako langileen Gizarte Segurantzako kotizazioak.

1.2. Familiaren errenta erabilgarriaren kalkulua.

Familiaren errenta erabilgarritzat hartuko da sostengatzaile nagusien banakako errenten batura, gehi familia-unitateko gainerako kideen banakako errenten %50, aurreko atalean adierazi bezala kalkulaturik. Guztira ateratzen den zenbatekoari kenduko zaio aurretiazko kuota diferentziala, familia-unitateko kide konputagarrien 2023ko ekitaldiko pertsona fisikoen errentaren gaineko zergako aitorpenetakoa.

Kalkulu hori egiteko, beregainak direla adierazten duten ikasleak sostengatzaile nagusitzat hartuko dira.

1.3. Familiaren errenta erabilgarriaren kenkariak.

Bekaren edo laguntzaren ondorioetarako familiaren errenta erabilgarria arestian ezarri denaren arabera kalkulaturik, errenta horretatik kontzeptu hauei dagozkien zenbatekoak kentzen ahalko dira:

1.–Familia ugaria:

–Orokorra. Familia-unitateko seme edo alaba konputagarri bakoitzeko, 654 euro.

–Berezia. Familia-unitateko seme edo alaba konputagarri bakoitzeko, 874 euro.

Familia ugariak dira halakoak direnak eta titulu ofizialaren bidez frogatzen dutenak, bat etorriz Familia Ugariak Babesteko azaroaren 18ko 40/2003 Legean ezarritakoarekin.

2.–Familia-unitateko kideren baten desgaitasun aitortua:

–2.078 euro, %33ko edo hortik gorako desgaitasun aitortua duen kide bakoitzarengatik.

–3.325 euro, %65eko edo hortik gorako desgaitasun aitortua duen kide bakoitzarengatik.

3.–Familia-unitateko bi anai-arrebak edo gehiagok Espainiako hezkuntza sistemako unibertsitateko ikasketak egiten badituzte eta familiaren bizilekutik kanpo bizi badira ikasketengatik:

–1.296 euro egoera horretan den anai-arreba bakoitzeko, betiere familia-unitateko kide konputagarria bada.

4.–Kenkaria, guraso bakarreko familia dela (edo gurasobakartasun egoeran dagoela) aitortua duen familia bateko kidea izateagatik:

–600 euro familia bakoitzak.

Nafarroako Foru Komunitatean zerga arloan aplikagarria den araudiak agintzen duenari men eginen zaio honako kontzeptu hauei dagokienez: oinarri orokorra, berezia, zerga-oinarria, likidazio-oinarria, konpentsazioak, murriztapenak, errenta salbuetsiak, pentsio planak, gizarte aurreikuspeneko sistema alternatiboak, gizarte aurreikuspeneko mutualitateak, atxikipenak, PFEZaren konturako ordainketak, aurretiazko kuota diferentziala eta PFEZaren aitorpena egin beharra.

Ekonomia eta Ogasun Departamentuak egindako PFEZaren likidazio behin-behineko edo behin betikoa badago, hori erabiliko da familiaren per capita errenta zehazteko.

2.–Familiaren ondarea adierazten duten mugak.

Alde batera utzita aurreko zenbakietan xedatutakoaren arabera kalkulatutako familiaren errenta, 2024-2025 ikasturterako beka ukatu eginen da, baldin eta gainditzen badira familiaren ondarea adierazten duten muga hauek:

–Familia-unitateko kide konputagarrien hiri finken katastroko balioen baturak, kenduta, halakorik bada, Nafarroako Foru Komunitateko etxebizitza baten katastroko balioa, ezin izanen du gainditu 108.966 euroko kantitatea.

–Familia-unitateko kide konputagarrien landa finken katastroko balioen baturak ezin izanen du gainditu 16.675 euroko zenbatekoa kide konputagarri bakoitzeko.

–Kapital higigarriaren etekinen saldo positiboa eta familia-unitateko kide konputagarrien ondare-irabazi eta -galeren saldo positiboa, batuta, etxebizitza erosteko edo birgaitzeko jasotako dirulaguntzak kendu ondoren, ezin izanen dira 2.159 eurotik gora izan.

Ondarearen adierazgarri diren elementu horiek kontatuko dira 2023ko abenduaren 31n duten balioaren arabera, Pertsona Fisikoen Errentaren gaineko Zergari buruzko araudian xedatutakoarekin bat.

Era berean, beka ukatuko da egiaztatzen bada familia-unitateko kide konputagarrien diru-sarrera hauen baturak 449.746 euroko zenbatekoa gainditzen duela, balio erantsiaren gaineko zerga alde batera utzita:

–Jarduera ekonomikoen ondoriozko diru-sarrerak, zuzeneko zenbatespenaren bidez edo zenbatespen objektiboaren bidez zehaztuak.

–Nortasun juridikorik gabeko entitateen edo bestelako entitate juridikoen bidez garatutako jarduera ekonomikoetan familiako kide konputagarri guztiek ehuneko berrogeita hamarreko edo hortik gorako partaidetza izateagatik dituzten diru-sarrerak, behin jardueren guztizko diru-sarrerei jarduera horietako partaidetzaren ehunekoa aplikatu ondoren.

Aurreko paragrafoetan ageri diren elementuen balioaren konputuaren ondorioetarako, familiako edozein kide konputagarrirenak diren elementuen balioaren %50 kenduko da, sostengatzaile nagusienak izan ezik.

Kalkulu hori egiteko, beregainak direla adierazten duten ikasleak sostengatzaile nagusitzat hartuko dira.

Iragarkiaren kodea: F2413843