1. NAFARROAKO FORU KOMUNITATEA
1.7. BESTELAKOAK
2237/2024 EBAZPENA, irailaren 24koa, Nafarroako Unibertsitate Publikoko errektoreak emana. Haren bidez agintzen da argitara dadila "Erabakia, Nafarroako Unibertsitate Publikoko graduko eta unibertsitate masterreko ikasketen nazioarteko programen eta nazioarteko aipamenen arauak aldatzen dituena", Gobernu Kontseiluak 2024ko irailaren 24an hartu zuen erabaki baten bidez onetsia.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2024ko irailaren 24an onetsitako erabakia, Nafarroako Unibertsitate Publikoko graduko eta unibertsitate masterreko ikasketen nazioarteko programen eta nazioarteko aipamenen arauak aldatzen dituena.
GOBERNU KONTSEILUAREN ERABAKIA, NAFARROAKO UNIBERTSITATE PUBLIKOKO GRADUKO ETA UNIBERTSITATE MASTERREKO IKASKETEN NAZIOARTEKO PROGRAMEN ETA NAZIOARTEKO AIPAMENEN ARAUAK ALDATZEN DITUENA
Gobernu Kontseiluak, 2023ko urtarrilaren 23ko erabaki baten bidez, Nafarroako Unibertsitate Publikoko Graduko eta Unibertsitate Masterreko Ikasketen Nazioarteko Programen eta Nazioarteko Aipamenen Arauak onetsi zituen.
Arau horietan, besteak beste, Nazioarteko Programa bakoitzaren zuzendari izanen den Batzorde Akademikoaren osaera eta funtzioak ezartzen dira, eta xedatzen da gutxienez kide hauek izan behar dituela: ikastegiko dekanoa edo zuzendaria, tituluaren arduraduna, ikastegiko nazioartekotzearen arduraduna eta tituluaren nazioarteko mugikortasunaren koordinatzailea, zeina batzordearen idazkaria izanen baita.
Gobernu Kontseiluak, 2024ko uztailaren 30eko bileran, Nafarroako Unibertsitate Publikoko ikasleen mugikortasunari buruzko araudia aldatu zuen, mugikortasunaren arloko kudeaketa akademikoaren egitura sinplifikatzearren. Horretarako, mugikortasuneko arduradun akademikoaren eta tituluaren nazioarteko harremanetako koordinatzailearen figurak ordeztu dira mugikortasuneko tutore akademikoaren figurarekin.
Ondorioz, beharrezkoa da Graduko eta Masterreko Ikasketetako Nazioarteko Programen eta Nazioarteko Aipamenen Arauak aldatzea tituluaren nazioarteko mugikortasunaren koordinatzailearen figuraren erreferentzia ezabatzeko.
Erabaki proposamen hau Nafarroako Unibertsitate Publikoko Ikasketa Batzordeak aztertu du, 2024ko irailaren 16an egindako bileran.
Honako hau da Gobernu Kontseiluak, Irakaskuntzako errektoreordeak proposaturik, bere kideek aldez aurretik eztabaida eginda, 2024ko irailaren 24an egindako bileran, hartu duen
ERABAKIA:
Lehenbizikoa.–Aldatzea Nafarroako Unibertsitate Publikoko Graduko eta Unibertsitate Masterreko Ikasketen Nazioarteko Programen eta Nazioarteko Aipamenen Arauen 11.2 artikulua -arau horiek Gobernu Kontseiluaren 2023ko urtarrilaren 23ko bileran onetsi ziren-, honela idatziak gera daitezen:
"2.–Batzorde Akademikoak kide hauek izanen ditu gutxienez:
–Ikastegiko dekanoa edo zuzendaria, edo hark eskuordetutako pertsona, zeina buru izanen baita.
–Tituluaren arduraduna.
–Ikastegiko nazioartekotzearen arduraduna, zeina idazkari izanen baita."
Bigarrena.–Erabaki hau helaraztea Irakaskuntzako errektoreordeari, Ikasleen gaietarako, Enpleguko eta Ekintzailetzako errektoreordeari, Nazioartekotzeko eta Lankidetzako errektoreordeari, ikastegietako zuzendaritzei eta Irakaskuntza Zerbitzuko zuzendariari. Erabaki hau Unibertsitatearen iragarki ohol elektronikoan argitaratzea.
Hirugarrena.–Erabaki hau Nafarroako Aldizkari Ofizialean argitaratzeko agindua ematea.
Laugarrena.–2023ko martxoaren 22ko 2/2023 Lege Organikoaren 38.4 artikuluak eta Unibertsitatearen Estatutuen 144.1 artikuluak ezarritakoaren arabera, erabaki honek administrazio bidea agortzen du. Interesdunek zilegi dute erabaki honen aurka, aukeran, berraztertzeko errekurtsoa jartzea Gobernu Kontseiluaren aurrean, hilabeteko epean, edo administrazioarekiko auzi-errekurtsoa administrazioarekiko auzien epaitegietan, zuzenean.
Bosgarrena.–Nafarroako Aldizkari Ofizialean argitaratu eta biharamunean hartuko du indarra erabaki honek.
Iruñean, 2024ko irailaren 24an.–Errektorea, Ramón Gonzalo García.
Iragarkiaren kodea: F2413851
