Iragarkia

196. ALDIZKARIA - 2024ko irailaren 26a

1. NAFARROAKO FORU KOMUNITATEA

1.7. BESTELAKOAK

441/2024 EBAZPENA, irailaren 10ekoa, Toki Administrazioaren eta Despopulazioaren zuzendari nagusiak emana, Ziraukiko eta Girgillaoko udal mugarteen arteko muga jurisdikzionalaren marra onesten duena.

Toki Administrazioaren eta Despopulazioaren zuzendari nagusiaren azaroaren 13ko 423/2023 Ebazpenaren bidez, Girgillaoko udalerriko mugako marra batzuk berreskuratzeko eta haien hobekuntza geometrikoa egiteko lanen prozedura hastea xedatu zen, eta ukitutako udalei eskatu zitzaien udal batzordeak eratzeko, lan horietan laguntzeko eta horiek berresteko.

Ebazpen horren bidez, halaber, mugako marren zuzenketa eta hobekuntza geometrikoa egiteko oinarrizko proposamenak jendaurrean jarri ziren hilabeteko epean, ebazpena argitaratu zen egunetik hasita, lanekin lotutako informazioa edo ekarpenak biltzeko.

2024ko ekainaren 14an eta uztailaren 17an, Girgillaoko eta Ziraukiko udaletako osoko bilkurek, hurrenez hurren, baterako akta gehigarria onetsi zuten, horretarako izendatutako batzordeek sinatutakoa. Akta horren bidez, UTM koordenatuekin zehazten dira aitortutako mugarri-puntuak eta bi mugarteen arteko muga jurisdikzionalaren marraren trazadura geometrikoa, hori guztia Toki Entitateentzako Aholkularitza Juridikorako eta Lankidetzarako Zerbitzuko Laguntza Tekniko-administratiboaren Atalaren 2024ko maiatzaren 7ko txosteneko zehaztapenen arabera. Txosten hori baterako akta gehigarrian dago jasota eranskin gisa.

Era berean, uztailaren 5ean eta abuztuaren 23an, Gesalazko eta Mañeruko udalek, hurrenez hurren, baterako akta gehigarri bera onetsi zuten, batzordeek aldez aurretik sinatua, eragiten dieten 3 mugarteen mugarri-puntuei dagokienez.

Aztertu dira Toki Entitateentzako Aholkularitza Juridikorako eta Lankidetzarako Zerbitzuaren txosten teknikoa eta juridikoa, 2024ko irailaren 2koa eta 3koa, hurrenez hurren, espedientean jasota daudenak.

Kontuan hartuta Ziraukiko eta Girgillaoko udalek ezarri duten mugako marraren definizioak ez dituela aldatzen udal mugarteak, Nafarroako Toki Administrazioari buruzko 6/1990 Foru Legearen 13. artikulutik 20. artikulura bitartekoetan ezarritako definizioen, baldintzen eta prozedurekin bat.

Horrenbestez, erabiliz Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluaren bidez eta Lurralde Kohesiorako Departamentuaren egitura organikoa ezartzen duen azaroaren 15eko 249/2023 Foru Dekretuaren bidez ditudan eskudantziak,

EBAZTEN DUT:

1. Ziraukiko eta Girgillaoko udal mugarteen arteko muga jurisdikzionalaren marra onestea, eranskinean zehaztutako koordinatuetan oinarrituta osatu den geometriarekin.

2 Institutu Geografiko Nazionalari eskatzea mugako marra hori Kartografiaren Erregistro Zentralean inskribatzeko, Erreferentzia Nazionaleko Ekipamendu Geografikoan sartzeko, orain arte indarra izan duen erregistro orria eguneratu edo berrikusteko ondorioak izateko eta kasuan kasuko ziurtagiriak emateko.

3. Marra Kartografiaren Erregistro Zentralean inskribatzea lortu ondoren, Toki Entitateentzako Aholkularitza Juridikorako eta Lankidetzarako Zerbitzuak aipatutako udalei igortzea erregistro orriaren kopia bana.

4. Ebazpen hau eta behar den dokumentazioa Zerga Ogasuneko Lur-ondasunen Zerbitzura igortzea katastroetan behar diren lanak egin ditzan.

5. Ebazpen hau eta dagokion dokumentazioa Unibertsitateko, Berrikuntzako eta Eraldaketa Digitaleko Departamentuko Lurraldeko Informazio Sistemen Atalera igortzea, jakinaren gainean egoteko eta SITNAn ondorioak izan ditzan.

6. Halaber, ebazpen hau Lurralde Kohesiorako Departamentuko Kartografia, Topografia eta Geodesia Atalera eta Landa Garapeneko eta Ingurumeneko Departamentuko Herri-lurren Atalera igortzea, jakin dezaten.

7. Ebazpen hau Nafarroako Aldizkari Ofizialean argitaratzea eta Zirauki, Girgillao, Gesalatz eta Mañeruko udaletara eta Institutu Geografiko Nazionalaren Eskualde Zerbitzura igortzea.

8. Era berean, ebazpen hau Girgillaoko udalerriko Etxarren Girgillaoko eta Girgillaoko kontzejuetara igortzea.

Iruñean, 2024ko irailaren 10ean.–Toki Administrazioaren eta Despopulazioaren zuzendari nagusia, Jesús M.ª Rodríguez Gómez.

ERANSKINA.–KOORDENATUAK

Iragarkiaren kodea: F2413206