187. ALDIZKARIA - 2024ko irailaren 13a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

78/2024 FORU AGINDUA, abuztuaren 28koa, lurzatiak berrantolatzearen bidezko esku-hartzea onesten duena Girgillao eta Etxarren Girgillao eremuko nekazaritza azpiegituretan, eta proiektuaren onura publikoa eta premiazko exekuzioa deklaratzen duena.

Landa Garapeneko zuzendari nagusiaren ekainaren 3ko 741/2011 Ebazpenaren bidez, onetsi zen lurzatiak berrantolatzearen bidezko esku-hartzeak egitea Girgillao eta Etxarren Girgillaoko nekazaritza azpiegituretan.

Nekazaritzako azpiegituretan esku hartzearen helburua da landa jabetza ordenatzea ustiategiei egitura eta tamaina egokia emateko, lurzatiak berrantolatzearen bidez.

Ingurumeneko zuzendari nagusiaren apirilaren 2ko 255E/2024 Ebazpenaren bidez, ingurumen inpaktuaren adierazpena eman zen Girgillao eta Etxarren Girgillaoko nekazaritza azpiegituretan lurzatiak berrantolatzearen bidezko esku-hartzeak egiteari dagokionez. Proiektuaren sustatzailea Nekazaritza eta Abeltzaintza Zuzendaritza Nagusia da (Nekazaritzako Azpiegituren Zerbitzua).

Nekazaritzako Azpiegiturei buruzko martxoaren 7ko 1/2002 Foru Legearen 12. artikuluak ezartzen du Nafarroako Gobernuari dagokiola nekazaritzako azpiegituretako esku-hartze bat onestea, eta hori foru dekretu baten bidez eginen duela, Nekazaritza, Abeltzaintza eta Elikadurako kontseilariak proposatuta.

Horiek horrela, Landa Garapeneko eta Ingurumeneko kontseilariak proposaturik, eta Nafarroako Gobernuak 2024ko abuztuaren 28an egindako bilkuran harturiko erabakiarekin bat,

DEKRETATZEN DUT:

1. Onespena.

Onesten da esku-hartze bat egitea Girgillao eta Etxarren Girgillaoko nekazaritza azpiegituretan. Hain zuzen, esku-hartzea eginen da lurzatiak berrantolatzearen bidez, Nekazaritzako Azpiegiturei buruzko martxoaren 7ko 1/2002 Foru Legeak ezartzen duenari jarraikiz.

2. Erabili beharreko prozedura.

Eremu honetako lurzatiak berrantolatzeko, prozedura arrunta erabiliko da, Nekazaritzako Azpiegiturei buruzko martxoaren 7ko 1/2002 Foru Legearen I. tituluaren IV. kapituluan jasota dagoena.

3. Onura publikoaren eta presaz egin beharraren deklarazioa.

Girgillao eta Etxarren Girgillao eremuko lurzatiak berrantolatzearen bidez nekazaritzako azpiegituretan egin nahi den esku-hartzearen onura publikoa eta presako exekuzioa deklaratzen dira, ondasunak eta eskubideak desjabetzeko, aldi baterako okupaziorako eta okupazio iraunkorrerako, eta bidezko diren zortasunak sortzeko, aldi baterakoak nahiz iraunkorrak.

4. Proiektuaren deskribapena.

Lurzatiak berrantolatzeko egin beharreko lanei dagokionez, proiektu bat idatziko da Girgillao eta Etxarren Girgillao eremuko bide eta hustubideen sarea eraikitzeko, oinarrien eta erabakiaren ondoren.

Bideen sarea eginen da egun existitzen diren bideen arabera, bideek ezin hobeto mugatzen baitituzte laborantza eta baso masak, eta dauden desnibeletara egokitzen baitira. Kasu batzuetan, eraikuntza edo ingurumen beharrak direla-eta, hainbat bideren trazadurak alorrak zeharkatuko ditu. Sare horrek sarbidea emanen dio finka berri bakoitzari.

Bi bide mota bereizten dira:

–4 metroko errodadurako bideak (16.639 m).

–4 metroko errodadurako bideak, baso eremuan (4.935 m).

Bide sendoek 4 metroko errodadura izanen dute, eta finketarako sarbideek 7 metro inguru. Aurreikusten da harrobi artifizialeko zabor-legarra erabiliko dela, bai eta eraikuntzako eta eraispeneko hondakinen agregakin birrindutik eratorritako zagorra ere.

Gainera, %12tik gorako maldak dituzten bide zatiak hormigoituko dira.

Bideak eraikitzeko materialak baimendutako harrobietatik lortuko dira, Ingurumen Zuzendaritza Nagusiari eskaera eginez, bai eta eremutik beretik ere; kasu horretan, erauzketa eremua behar bezala egokitu eta berreskuratu beharko da.

Eraispenetatik eta beste edozein hondakinetatik datozen materialak, landare hondarrak barne, baimendutako zabortegietan utziko dira.

Hustubideen sareari dagokionez, bi zati baino ez dira berreskuratuko, nekazaritzako laborantzako masak lotzeko luberritu zirenak eta 728 metroko luzera dutenak.

Hala, Etxarren Girgillaon hustubide bat eraikiko da Zumedia errekaren trazaduratik, 271. lurzatitik 2. poligonoko 198. lurzatiraino, eta Girgillaon beste hustubide bat eraikiko da Girgillaoko sakanaren trazaduratik, 3. poligonoko 340A eta 387. lurzatien artean.

Gainera, aurreikusita dago Girgillao eta Etxarrentxulo sakanetako jabari publiko hidraulikoa berreskuratzea, baita Zumedia, Aparra, Arambea eta Ganbaragañeta errekak ere, 9.986 metro inguruko luzerarekin.

5. Ingurumen arloko alderdiak.

Ingurumeneko zuzendari nagusiaren apirilaren 2ko 255E/2024 Ebazpenaren bidez, ingurumen inpaktuaren aldeko adierazpena eman zen Girgillao eta Etxarren Girgillaoko nekazaritza azpiegituretan lurzatiak berrantolatzearen bidezko esku-hartzeak egiteari dagokionez. Proiektuaren sustatzailea Nekazaritza eta Abeltzaintza Zuzendaritza Nagusia da (Nekazaritzako Azpiegituren Zerbitzua). Adierazpen horretan ezartzen da jarduera garatu beharko dela espedienteari erantsitako dokumentazio teknikoan jasotzen diren baldintzen arabera, baina horrez gain, beste zenbait baldintza ere bete behar dira, arlo hauekin loturikoak: landaredi naturala; kontserbatu beharreko natura-balioak; bideen ukipenak; prebentzio-, zuzenketa- eta konpentsazio-neurriak; balio arkeologikoak; beharrezkoak diren obrako materialak; ingurumena zaintzeko programa eta ingurumenaren arloko balioei buruzko informazioa ematea titularrei.

6. Esku-hartzearen lurralde-eremua mugatzea.

Planteatutako proiektuak Girgillaoko udal-mugarteko 2. eta 3. katastro-poligonoak hartzen ditu, eta Etxarren Girgillao eta Girgillaoko kontzejuei dagokie, hurrenez hurren. Udalerri hori Iruñeko eskualdean dago, Arga ibaiaren mendebaldean eta Erreniega eta Sarbil mendilerroen hegoaldean.

Proiektuaren eremuak lehorreko laborantzarako eta landaredi naturalerako 843 hektarea hartzen ditu, mendiaren bi heren (basoa eta larreak), eta Arga ibaiaren zati txiki bat. Ibaiak aztertutako eremuaren ekialdeko muga egiten du, eta neurri handi batean Gesalazko iraganbidearen mendebaldeko muga marrazten du.

Eremu horrek 365 metroko altuera du ibaiaren inguruan, eta 800 metro hego-mendebaldeko muturrean. Arga ibaira isurtzen duten hainbat amildegi eta errekak zeharkatzen dute. Azterlan honen xederako garrantzitsuenak Girgillaoko sakana, Etxarrentxulo sakana eta haren ibaiadarra, Zumedia erreka, Aparra erreka eta Aranbea erreka dira.

Topografiak paisaia heterogeneoa izaten laguntzen du, eta eremuaren zati batean landaredi natural zabala dago, batez ere basokoa, eta gainerako eremuetan laboreen eta landaredi naturalaren mosaikoa. Gizakiak egindako eraikuntzak bi herrietan daude, landetxeen inguruan sakabanatutako etxola txikiren bat eta Etxarren ondoko hegazti-etxalde bat dituztela. Eraikin tradizionalen aztarnak ere daude.

Esku-hartzearen eremuko mugak dira:

–Iparraldean: Argiñarizko kontzeju-mugartea (Girgillao) eta Gorrizako toki bat (Girgillao).

–Hegoaldean: Ziraukiko udal-mugartea eta Sorakoitz eta Orendain-Zabalako toki batzuk (Girgillao).

–Ekialdean: Arga ibaia eta Garesko udal-mugartea.

–Mendebaldean: Arzotz-Muzkiko kontzeju-mugarteak eta Garisoain (Gesalatz).

Azpiegituretako esku-hartzearen perimetroa aldatzen ahalko da Nekazaritzako Azpiegiturei buruzko martxoaren 7ko 1/2002 Foru Legearen 13.4 eta 17.a artikuluetan xedatutakoaren arabera.

7. Ustiatzeko oinarrizko azalerak zehaztea.

Girgillao eta Etxarren Girgillao aldeko lehorreko ustiapen eremu oinarrizkoen goiko eta beheko mugak 200 eta 40 hektarea izanen dira, hurrenez hurren.

8. Laborantzako gutxieneko unitateak.

Laborantzako gutxieneko unitateen balioak 40 hektareakoak izanen dira lehorreko lurretarako.

9. Lurren balioa kalkulatzeko aplikatu beharreko moduluak.

Lurren Funtsaren esleipendunek ordaindu beharreko prezioa finkatzean lurren balioa ezartzeko, nekazaritza sozietateak eratzean ekarritako lursailak baloratzeko, bai eta ustiatzeko oinarrizko azalerak eratzeko eta nekazaritza ustiategiak elkartzeko dirulaguntzak kalkulatzeko ere, Nekazaritza Azpiegiturei buruzko martxoaren 7ko 1/2002 Foru Legearekin bat etorriz, lurzatiak berrantolatzeko oinarrietan lehenengo mailakotzat sailkatutako lurrei aplikatu beharreko modulua, eremu honetarako, izanen da ekainaren 17ko 39/2015 Foru Dekretuan adierazten den lehenengo mailako lurren balioa (foru dekretu horrek azaroaren 26ko 334/2001 Foru Dekretua aldatzen du, Nafarroako Foru Komunitatean dauden zenbait ondasun higiezin baloratzeko prozedura onetsi zuena, balorazioa egiteko merkatuan duten batez besteko prezioa egiaztatzeko metodoa erabiliz, oinordetza eta dohaintzen gaineko zergaren eta ondare eskualdaketen eta egintza juridiko dokumentatuen gaineko zergaren kudeaketan aplikatzeko). Bigarren mailatik aurrera sailkatutako lurrei aplikatu beharreko moduluak lortzeko, berriz, lehen mailako modulua biderkatuko da lurzatiak berrantolatzeari buruzko arauetan zehazten diren kasuan kasuko konpentsazio koefizienteekin.

10. Foru dekretu hau Nafarroako Aldizkari Ofizialean argitaratzea eta Landa Garapeneko eta Ingurumeneko Departamentuari jakinaraztea.

11. Foru dekretu honek Nafarroako Aldizkari Ofizialean argitaratu eta biharamunean sortuko ditu ondorioak.

12. Adieraztea foru dekretu honek administrazio bidea amaitzen duela eta haren aurka errekurtso hauetariko bat jartzen ahal dela:

–Berraztertzeko errekurtsoa, Nafarroako Gobernuari zuzendua, hilabeteko epean, jakinarazi edo Nafarroako Aldizkari Ofizialean argitaratu eta biharamunetik hasita.

–Administrazioarekiko auzi-errekurtsoa, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, foru dekretua jakinarazi edo Nafarroako Aldizkari Ofizialean argitaratu eta biharamunetik hasita.

Administrazio publikoek, berraztertzeko errekurtsoaren ordez, aurretiazko errekerimendua egiten ahal dute, Administrazioarekiko Auzien Jurisdikzioa arautzen duen ekainaren 13ko 29/1998 Legearen 44. artikuluan ezarritako moduan eta epean.

Iruñean, 2024ko abuztuaren 28an.–Nafarroako Gobernuko lehendakaria, María Chivite Navascués.–Landa Garapeneko eta Ingurumeneko kontseilaria, José María Ayerdi Fernández de Barrena.

Iragarkiaren kodea: F2412624