176. ALDIZKARIA - 2024ko abuztuaren 29a

3. ESTATUKO ADMINISTRAZIOA

TRANTSIZIO EKOLOGIKORAKO ETA ERRONKA DEMOGRAFIKORAKO MINISTERIOA

Ebazpena, Energia Politikako eta Meatzeetako Zuzendaritza Nagusiak emana, zeinaren bidez aurretiazko administrazio-baimena eta eraikitzeko administrazio-baimena ematen baitzaizkio Aixeindar SAri 40 MW-eko potentzia instalatuko Labraza haize-parkearen eta haren ebakuazio-azpiegituren aldaketetarako, Oiongo udal mugartean, Arabako probintzian, eta Aguilar Kodeseko udal mugartean, Nafarroako probintzian. SEE/DGPEM/SGEE/ Resolución PEol-459 AAP mod y AAC

Aixeindar SAk, 2020ko abenduaren 3an, eskaera aurkeztu zuen (geroago, 2020ko abenduaren 23an zuzendua), aurretiazko administrazio-baimena eta ingurumen-inpaktuaren adierazpena emateko 40 MW-eko potentzia instalatuko Labraza haize-parkeari eta haren ebakuazio-azpiegiturei, Oiongo udal mugartean, Arabako probintzian, eta Aguilar Kodesen, Nafarroako probintzian.

Energia Politikako eta Meatzeetako Zuzendaritza Nagusiaren 2023ko apirilaren 17ko Ebazpenaren bidez (aurrerantzean, aurretiazko administrazio-baimenaren ebazpena), aurretiazko administrazio-baimena eman zitzaion Aixeindar SAri 40 MW-eko potentzia instalatuko Labraza haize-parkerako eta haren ebakuazio-azpiegituretarako, Oiongo udal mugartean, Arabako probintzian, eta Aguilar Kodeseko udal mugartean, Nafarroako probintzian. Ebazpena 2023ko 101. Estatuko Aldizkari Ofizialean argitaratu zen, apirilaren 28koan.

Aurretiazko administrazio-baimenari buruzko ebazpen horretan xedatutakoarekin bat etorriz, eta Energia elektrikoko instalazioen garraio-, banaketa-, merkaturatze- eta hornidura-jarduerak eta baimen-prozedurak arautzen dituen abenduaren 1eko 1955/2000 Errege Dekretuaren 125. artikuluarekin eta hurrengoekin bat etorriz egindako tramitazioaren ondorioz, exekuzio-proiektuaren aldaketak aurkeztu dira, baina aldaketa horiek ez dituzte betetzen abenduaren 1eko 1955/2000 Errege Dekretuaren 115.2 artikuluko baldintzak, eta, beraz, beharrezkoa da egindako aldaketetarako aurretiko administrazio-baimena. Zehazkiago, 5. haize-sorgailuaren kokapen-aldaketarako.

Aurrekoa oinarri hartuta, Aixeindar SAk (aurrerantzean, sustatzailea) eskaera egin zuen 2023ko maiatzaren 12an (geroago, 2023ko maiatzaren 31n zuzendua), aurretiazko administrazio-baimena eta eraikitzeko administrazio-baimena emateko 40 MW-eko potentzia instalatuko Labraza haize-parkearen eta horren ebakuazio-azpiegituren lehen deskribatutako aldaketetarako, Oiongo udal mugartean, Arabako probintzian, eta Aguilar Kodeseko udal mugartean, Nafarroako probintzian; horretarako, dagokion exekuzio-proiektua eta erantzukizunpeko adierazpena aurkeztu zituen, aplikatzekoa den araudia betetzen dela egiaztatzen duena, Sektore Elektrikoari buruzko abenduaren 26ko 24/2013 Legearen 53.1 artikuluari jarraikiz.

Espedienteari hasiera eman zitzaion Gobernuaren Nafarroako Ordezkaritzako Industria eta Energia Arlo Funtzionalean eta Gobernuaren Arabako Ordezkariordetzako Industria eta Energia Arlo Funtzionalean, eta tramitatu da bat etorriz abenduaren 1eko 1955/2000 Errege Dekretuaren 127. eta 131. artikuluetan ezarritakoarekin; kasuan kasuko txostenak eskatu zitzaizkien administrazioei, erakundeei eta zerbitzu publikoko edo interes orokorreko zerbitzuetako enpresei, instalazioak haien kargurako ondasunak eta eskubideak ukitzen dituen zatian.

Gobernuaren Arabako Ordezkariordetzaren Industria eta Energia Arloak egindako tramitazioari dagokionez:

Honako hauen erantzunak jaso dira: Ebroko Konfederazio Hidrografikoa, URA-Uraren Euskal Agentzia, Arabako Foru Aldundiko Natura Ondarearen Zerbitzua, Mendi Zerbitzua eta Nekazaritza Garatzeko Zerbitzua. Horietan, baldintza teknikoak ezartzen dira, eta, hala badagokio, erakunde horiei baimena eskatzeko betebeharra, instalazioak haien eskumeneko ondasun edo zerbitzuak okupatzeagatik edo gurutzatzeagatik. Sustatzaileari igorri zaizkio erantzun horiek, eta ados dagoela jakinarazi du.

Labrazako Administrazio Batzordearen erantzuna jaso da, Labrazako Kontzejua ordezkatuz. Bertan, zenbait gogoeta egiten dira. Sustatzaileari igorri zaizkio erantzun horiek, eta erantzunean bere argudioak ematen ditu. Sustatzailearen azken erantzunari dagokionez erakunde horren erantzunik jaso ez denez, ulertzen da ados dagoela, halaxe xedatzen baitu abenduaren 1eko 1955/200 Errege Dekretuaren 127.4 artikuluak.

Labrazako Administrazio Batzordearen erantzuna jaso da. Bertan dio, alde batetik, adierazten du ez dagoela ados proiektuarekin eta baso-azaleraren jasangarritasunarekin eta ingurumen-orekarekin bateragarria izatearekin, eta, bestetik, proiektuak onura publikoko mendi bati eragiten diola eta mendi hori kudeatzen duen erakundeak, hau da, Labrazako Administrazio Batzordeak, emandako aldeko txostena lortu behar duela. Sustatzaileak, berriz, bere erantzunean adierazi du ez dagoela ados Batzordeak adierazitakoarekin, eta Batzordeak hasierako jarrera berretsi du sustatzaileari emandako bigarren erantzunean.

Aurrekoari dagokionez, egiaztatu da ezen, Ingurumen-ebaluazioari buruzko abenduaren 9ko 21/2013 Legearen 41.2 artikuluaren arabera, ingurumen-inpaktuaren ebaluazio-prozedura amaitu ondoren, proiektuari ezarritako baldintzak eta prebentzio-, konpentsazio- eta zuzenketa-neurriak, sustatzaileak nahitaez bete beharrekoak eta zuzendaritza nagusi honek edo, hala badagokio, Ministro Kontseiluak kontuan hartu beharrekoak, honako hauek izanen direla, Trantsizio Ekologikorako eta Erronka Demografikorako Ministerioaren Ingurumen Kalitatearen eta Ebaluazioaren Zuzendaritza Nagusiaren 2023ko urtarrilaren 3ko Ebazpenaren arabera: "ingurumen-inpaktuaren azterketan jasotako eta jendaurreko informazioaren ondoren onartutako prebentzio- eta zuzenketa-neurri guztiak, edo informazio osagarrian jasotakoak, ebazpen honetan ezarritakoaren aurkakoak ez diren heinean, bai eta IIAD honetan zehaztutako neurri gehigarriak ere".

Galdera eginda Eusko Jaurlaritzaren Industria Sailburuordetzaren Energiaren, Meatzeen eta Industriaren Administrazioaren Zuzendaritzari, Acciona SAri eta Oiongo Udalari, ez da haien erantzunik jaso, eta, beraz, ados daudela ulertzen da, abenduaren 1eko 1955/2000 Errege Dekretuaren 127.2 eta 131.1 artikuluetan xedatutakoari jarraituz.

Era berean, sustatzaileak espedienterako dokumentazio gehigarria aurkeztu du jendaurreko tramitearen bukaeran, zehazki, Itzalen Azterketa, Segurtasuneko Azterketa Aeronautikoa, AESAren baimen baldintzatua eta Ebroko Konfederazio Hidrografikoaren eta URA-Uraren Euskal Agentziaren erantzuna, obra eskaerari dagokionez.

Gobernuaren Nafarroako Ordezkaritzaren Industria eta Energia Arloak egindako tramitazioari dagokionez:

Lurralde Antolamenduko Zuzendaritza Nagusiaren, Barne Zuzendaritza Nagusiko Babes Zibileko eta Larrialdietako Zerbitzuaren eta Ingurumen Zuzendaritza Nagusiaren erantzunak jaso dira; horietan baldintza teknikoak ezartzen dira eta, kasuren batean, erakunde horietan baimena eskatzeko betebeharra, instalazioak haien eskumeneko ondasunak edo zerbitzuak okupatzen edo gurutzatzen dituelako. Sustatzaileari igorri zaizkio erantzun horiek, eta ados dagoela jakinarazi du.

Galdera egin zaie Industriaren, Energiaren eta S4 Proiektu Estrategikoen Zuzendaritza Nagusiari, Herri-lanen eta Azpiegituren Zuzendaritza Nagusiari, Aguilar Kodeseko Udalari eta Vianako Printzea Erakundea-Kultura Zuzendaritza Nagusiari, baina ez da haien erantzunik jaso; horrenbestez, ados daudela ulertzen da, abenduaren 1eko 1955/2000 Errege Dekretuaren 127.2 artikuluan ezarritakoari jarraikiz.

Era berean, eskaera jendaurrean jarri da, abenduaren 1eko 1955/2000 Errege Dekretuaren 125. artikuluan aurreikusitakoaren arabera, argitara emanez 2023ko 120. Estatuko Aldizkari Ofizialean, maiatzaren 20koan, 2023ko 107. Nafarroako Aldizkari Ofizialean, maiatzaren 23koan, eta 2023ko 59. Arabako Lurralde Historikoaren Aldizkari Ofizialean, maiatzaren 22koan. Zenbait alegazio jaso ziren, eta sus­tatzaileak erantzun egin zituen.

Gobernuaren Nafarroako Ordezkaritzako Industria eta Energia Arloak txostena eman zuen 2023ko abuztuaren 29an. Gobernuaren Arabako Ordezkariordetzako Industria eta Energia Arloak txostena eman zuen 2023ko abuztuaren 8an, eta ondoren osatu egin zuen.

Kontuan izanik ezen, abenduaren 9ko 21/2013 Legearen 42. artikuluak ezartzen duenez, organo substantiboak behar bezala kontuan hartu beharko duela egindako ingurumen-inpaktuaren ebaluazioa.

Ingurumen-inpaktuaren ebaluazioaren prozedura egin da instalazioaren proiektuaz eta hari lotutako ebakuazio-azpiegituraz, baita ingurumen-inpaktuaren azterketaz (IIAZ) ere, eta ingurumen-inpaktuaren adierazpena aldekoa (IIAD) izan da, zeina jaso baita Trantsizio Ekologikorako eta Erronka Demografikorako Ministerioaren Ingurumen Kalitatearen eta Ebaluazioaren Zuzendaritza Nagusiaren 2023ko urtarrilaren 3ko Ebazpenean. Ebazpen horretan ingurumen arloko baldintzak ezartzen dira, egindako ingurumen ebaluazioaren ondoriozko prebentzio-, zuzenketa- eta konpentsazio-neurriak barne. Ebazpena 2023ko 18. Estatuko Aldizkari Ofizialean argitaratu zen, urtarrilaren 21ekoan.

IIADan ezarritakoaren arabera, proiektuari aplikatuko zaizkio ezarritako ingurumen arloko baldintzak, bai eta ingurumen ebaluazioaren ondoriozko prebentzio-, zuzenketa- eta konpentsazio-neurriak eta, hala badagokio, IIAZan jasotako jarraipen-neurriak, jendaurreko informazioaren eta kontsulten ondotik onartutakoak, eta informazio gehigarrian proposatutakoak ere, baldin eta IIADan xedatutakoaren aurkakoak ez badira.

Proiektuari aurretiazko administrazio-baimena ematen dion ebazpenean xedatutakoari jarraikiz, IIADan proiektuari ezarritako baldintza guztiak bete behar badira ere, hura baita nahitaezko txosten erabakigarria, ezartzen duena, abenduaren 9ko 21/2013 Legearen 41. artikuluarekin bat, zer baldintzatan garatzen ahal den proiektua, bai gauzatzean bai ustiatzean, exekuzio proiektua definitzeko kontuan hartuko dira, bereziki eta besteak beste, IIADan xedatutako baldintza eta neurri hauek, betetzen direla egiaztatzen duen dokumentazioa aurkeztuta:

–Lur gerakinen kudeaketari dagokionez, kokaguneen gaineko eskaera egiteko beharrezkoa izanen da ingurune naturala babesteko eskumena duten ingurumen organoen balorazioa eta baimena. Nolanahi ere, eta 1.2.1.4 atalean jasota dagoenarekin bat, paisaia eta ingurumen intereseko plan bereziaren inguruan egon daitezkeen tokietatik kanpo kokatuko dira, eta bereziki, honako hauen esparrutik kanpo: bikain gisa katalogatutako "Labraza eta Pinar de Dueñas" paisaia eta "Arabako hegoaldeko mendilerroen KBE-HBBE" naturagune babestua.

–Sustatzaileak Ebroko Konfederazio Hidrografikoari aurkeztuko dio, uraren arloko arauetan ezarritakoarekin bat, amaierako proiektuaren nahitaezko dokumentazioa; beharrezkoa denean, proiektuaren barruko jarduketetarako aurretiazko baimena lortu beharko da, organo substantiboak proiektua onetsi baino lehen, 1.2.1.5 atalean jasota dagoenarekin bat.

–Azterlan akustikoa proiektuari erantsi beharko zaio proiekturako baimena lortu baino lehen, 1.2.2.1 atalean jasota dagoenarekin bat.

–1.2.2.4 atalean (Atmosferaren kalitatea, biztanleria eta osasuna) honako hau jasotzen da:

"Aireko segurtasunerako PBaren seinaleztapenari eta argiztapenari dagokienez, faunan eta paisaian ahalik eta eragin txikiena sortzen duena aukeratu beharko da, eta lehentasuna emanen zaie aldizkako seinaleei eta, gauez, argi gorriari, argi zuriaren aurretik, aireko nabigazioaren segurtasunarekin lotutako egoera saihetsezinetan izan ezik. Alde horretatik, seinaleztapena eta argiztapena AESAren "Turbinak eta haize-parkeak seinaleztatzeko eta argiztatzeko gida" delakora egokitzeko, ingurumen-inpaktuak minimizatzeko ezinbestekoak diren gutxienekoak bete beharko dira.

Haize-sorgailuen balizajea kudeatzeko sistema bat instalatuko da radar pasiboen bidez, posizio-argiak piztea kontrolatu eta behar diren egoeretan bakarrik aktibatu ahal izateko. Aireko nabigazioaren segurtasuna bermatzeko eta argi-kutsadurak inguruko hiriguneetan eta faunan duen inpaktua murrizteko gai den tresna bat izan beharko du".

–4. eta 8. haize-sorgailuen inguruko plataformaren kokagunea eta diseinua egokitu eginen dira, Europar Batasunaren intereseko 9240 eta 9340 BIHen gaineko ukipena ahalik eta txikiena izan dadin. Halaber, BIHak ukitzen diren eremuetan oro har murriztuko da lan-eremuen okupazioa, Eusko Jaurlaritzako Natura Ondare eta Klima Aldaketa Zuzendaritzak adierazten duenarekin bat, eta 1.2.3.3 atalean jasota dagoenarekin bat.

–Eraikuntza planaren barruan Landaredia Leheneratzeko eta Paisaia Integraziorako Plan bat txertatu beharko da, eskalan eta behar besteko xehetasunekin. Plan horretan bildu beharko dira sustatzaileak proiektuan sartu dituen leheneratze eta pantailatze jarduketa guztiak, ebazpen honetan adierazitakoak barne, honako hauek zehaztuta eta kuantifikatuta: lan-eremuak, lurzorua prestatzeko metodoak, erabiliko diren landare espezieak, ereintza edo landatze metodoak eta gainerako preskripzio teknikoak. Horiez gain, jarduketa guztien aurrekontua eta kronograma sartuko dira, eta autonomia erkidegoetako organo eskudunei bidali beharko zaizkie, obrak hasi aurretik, balorazioa eta onespena eman dezaten, 1.2.3.5 atalean jasota dagoenarekin bat.

–3. haize-sorgailua Bonelli arranoaren intereseko eremu batetik gertu dagoenez, eta espezie hori (Hieraaetus fasciatus) kaltebera denez eta galzorian dagoenez –Animalien Ongizaterako Etika Batzordearen eta Espezie Mehatxatuen Euskadiko Katalogoaren arabera, hurrenez hurren–, haize-sorgailu hori eta 2., 4. eta 5. haize-sorgailuak, sustatzailearen arabera abifaunarekin talka egiteko arrisku maila handiena baitute, bat etorriz autonomia erkidegoetako erakunde eskudunek adierazitakoarekin, erabat geldituko dira otsailaren 1etik uztailaren 15era, baldin eta belatz arrunt ar baten tamaina bereko edo handiagoko hegazti bat hurbiltzen bada haize-sorgailuetatik 500 metrora edo gutxiagora, edo daraman ibilbidea ikusita talka arriskua badago. Horren gaineko jarraipena bi urtez egin ostean, neurria berrikusiko da, eta neurri alternatiboak proposatzen ahalko dira, lortutako emaitzen arabera talka arriskua egokitzeko kudeaketa eginez. Arabako Foru Aldundiko Ingurumen eta Hirigintza Zuzendaritzak eta Nafarroako Gobernuko Ingurumen Zuzendaritza Nagusiak baliozkotu beharko dituzte lortutako emaitzak, 1.2.4.4 atalean jasotzen denarekin bat.

–Arabako Foru Aldundiak baloratuko ditu ikerketa arkeologikoaren emaitzak; zehazki, aztarnak azaleratuz gero haien garrantzia baloratu beharko du, 1.2.6.2 atalean jasota dagoenarekin bat.

–Onura publikoko mendia okupatzeko administrazio prozedura eta zortasunaren onespena izapidetu beharko dira, kasuan kasuko autonomia-erkidegoko administrazioarekin, 1.2.6.3 atalean jasota dagoenarekin bat.

–Ingurumen zaintzako programa prestatu beharko da, eta txostenak igorri organo eskudunei, 1.3 atalean jasota dagoenarekin bat.

IIAZan eta IIADan ezarritako baldintza eta neurri bakoitza zehaztu eta aurrekontuan sartu behar zituen sustatzaileak, proiektuan nahiz haren eranskin batean, xehakatuta, halako eran non aipatutako IIADan zehaztutako neurri bakoitza identifikatzen ahalko baita onetsi aurretik.

Proiektuaren aldaketetarako aurretiazko administrazio-baimen hau eta eraikitzeko administrazio-baimena lortzeko, sustatzaileak ingurumen-inpaktuaren gaineko adierazpenean eta aurretiazko administrazio-baimena emateko ebazpenean ezarritako baldintzak betetzen dituela egiaztatzen duten agiriak aurkeztu zituen 2023ko apirilaren 18an, baita erantzukizunpeko adierazpena ere, abenduaren 26ko 24/2013 Legearen 53.4 artikuluan xedatutakoa betez.

Haize-sorgailuen balizajea seinaleztatzeko, argiztatzeko eta kudeatzeko sistemei buruz IIADan ezarritako 1.2.2.4 baldintza betetzeari dagokionez, 2024ko uztailaren 18an, sustatzaileak baldintza horiek betetzen direla egiaztatzen duen dokumentazioa aurkeztu zuen, eta 2024ko uztailaren 19ko dokumentazioarekin osatu. Kalitate eta Ebaluazio Zuzendaritza Nagusiari kontsulta egin zitzaion ea, sustatzaileak aurkeztutako dokumentazioarekin, betetzen den IIADaren 1.2.2.4 baldintza, eta, 2024ko uztailaren 24an, zuzendaritza nagusi horrek egiaztatu zuen, proiektuaren sustatzaileak aurkeztutako dokumentazioa ikusita, proiektuak betetzen dituela 1.2.2 baldintzaren (Atmosferaren kalitatea, biztanleria eta osasuna) 4. ataleko bi paragrafoak, honi buruzkoak: "40 MW-eko Labraza haize-parkea eta haren ebakuazio-azpiegituraren zati bat, Arabako probintziako Oiongo udal mugartean eta Nafarroako probintziako Aguilar Kodeseko udal mugartean" proiektuko haize-sorgailuak seinaleztatzeko, argiztatzeko eta balizatzeko sistemak, ingurumen-inpaktuaren adierazpenean jasotakoak.

Abenduaren 26ko 24/2013 Legearen 21.5 artikuluaren arabera, ekoizpen-instalazioak ebakuazio-azpiegiturak izanen ditu, horien artean garraio- edo banaketa-sarearekiko konexioa eta, hala badagokio, energia elektrikoaren eraldaketa.

Ingurumen-inpaktuaren adierazpenean eta sustatzaileak tramitazioan onartutako baldintzen arabera, ebakuazio-azpiegiturak honako jarduketa hauek aurreikusten ditu:

–30 kV-eko lurpeko bi linea, Labraza haize-parkeko transformazio-zentroak "Las Llanas de Codés 30/220 kV-eko TA handitua" transformazio-azpiestazioarekin konektatzen dituztenak.

–"Las Llanas de Codés 30/220 kV-eko TA handitua" transformazio-azpiestazioa, Aguilar Kodeseko udal mugartean kokatua, Nafarroako probintzian.

Gainerako ebakuazio-azpiegitura, Red Eléctrica de España SAUren "Laguardia" 220 kV-eko azpiestazioarekiko konexioraino, zerbitzuan dago eta honako hauek osatzen dute:

–"Las Llanas de Codés TA" 12/20/220 kV-eko transformazio-azpiestazioa, Acciona Energiarena.

–Goi-tentsioko aireko linea (GTAL), 220 kV-ekoa, Acciona Energiarena, "Las Llanas de Codés TA" 12/20/220 kV-eko azpiestazioa "Laguardia TA" 220 kV-eko azpiestazioarekin lotzen duena.

Abenduaren 26ko 24/2013 Legearen 53.1 artikuluaren arabera, eraikitzeko administrazio-baimenak aukera ematen dio titularrari instalazioa eraikitzeko, eskatutako baldintza teknikoak betez gero.

Sustatzaileak, 2023ko apirilaren 21ean, erantzukizunpeko adierazpena sinatu zuen, aplikatu beharreko araudia betetzen duela egiaztatzen duena.

Sektore Elektrikoari buruzko abenduaren 26ko 24/2013 Legeak enpresa ekimen askea aitortzen du energia elektrikoaren hornidurarako jardueretan aritzeko.

Hala ere, abenduaren 26ko 24/2013 Legearen 53.4 artikuluaren arabera, sustatzaileak egiaztatu du proiektua egiteko gaitasun legal, tekniko eta ekonomiko-finantzarioa duela. Horretarako, Merkatuen eta Lehiaren Batzorde Nazionalak zegokion txostena egin eta 2023ko apirilaren 13ko bilkuran onetsi zuen, abenduaren 1eko 1955/2000 Errege Dekretuaren 127.6 artikuluan xedatutakoa kontuan hartuta.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 82. artikuluan ezarritakoarekin bat, zuzendaritza nagusi honen ebazpen proposamenari buruzko entzunaldia eman zaio sustatzaileari; sustatzaileak bere adostasuna adierazi du eta zenbait ohar egin ditu, aztertu eta, kasu batzuetan, ebazpen honi gehitu zaizkionak.

Aintzat hartuz Administrazioaren jarduera zuzendu behar duten printzipioak, prozesuaren azkartasuna eta ekonomia, alegia, bidezkoa da egintza bakar baten bidez ebaztea eskatzailearen eskaera, proiektuari aurretiazko administrazio-baimena eta eraikitzeko administrazio-baimena emateari buruzkoa.

Baimen horiek ematen badira ere, lurraldearen antolamenduari eta ingurumenari dagozkien eta beharrezkoak diren kontzesio eta baimenak beharko dira, bai eta aplikatzekoak diren xedapenek eragindako beste guztiak ere. Halaber, obra egiteko beharrezkoak diren gainerako baimen guztiak eskuratu beharko dira, abenduaren 26ko 24/2013 Legearen 53.6 artikuluan eta abenduaren 1eko 1955/2000 Errege Dekretuaren 120.2 artikuluan ezarritakoari jarraikiz.

Ebazpen honetan lehenago aipatu denez, Labrazako Administrazio Batzordeak proiektuaren aurkako jarrerari eusten dio.

Abenduaren 1eko 1955/2000 Errege Dekretuaren 131.6 artikuluan ezartzen denez, instalazioaren eskatzailearen eta administrazio edo erakunderen baten artean desadostasuna baldin badago baldintza teknikoei dagokienez, eta desadostasunari eusten bazaio, Energia Politikako eta Meatzeetako Zuzendaritza Nagusiak bi aukera izanen ditu: baldintza teknikoak jasotzen dituen ebazpena ematea, edo, horiekin ados ez badago, ebazpen-proposamena igortzea, Ministroen Kontseiluari helarazteko.

Hala ere, prozedura hau ebaztean ezin dira kontuan hartu Labrazako Administrazio Batzordeak egindako alegazioak, horien xedea gainditzen baitu Energia elektrikoko instalazioen garraio-, banaketa-, merkaturatze- eta hornidura-jarduerak eta baimen-prozedurak arautzen dituen abenduaren 1eko 1955/2000 Errege Dekretuaren 131. artikuluan xedatutakoa.

Horri dagokionez, Trantsizio Ekologikorako eta Erronka Demografikorako Ministerioko Estatuko Abokatutzak, uztailaren 9ko 1251/2024 irizpenean, honako hau ondorioztatzen du: "1955/2000 Errege Dekretuaren 131.6 artikuluaren irismenaren interpretazioak, gaur egun indarrean dagoen Sektore Elektrikoari buruzko 24/2013 Legearen 53.1.b) artikuluaren edukia kontuan hartuta, zehazten du ezen eraikitzeko administrazio-baimenen gaineko ebazpenak Ministro Kontseiluari igortzea dakarten desadostasunak izanen direla, soilik, desadostasun tekniko hutsak, baimenaren xede diren instalazioek administrazio horien jabetzako ondasunei edo eskubideei eragiten dietenean sortzen direnak".

Estatuko Abokatutzaren aipatu irizpenean berariaz jasotzen da honako hau:

"Ildo horretan, funtsezkoa da Sektore Elektrikoaren Legearen 53.1.b) artikuluaren edukia; izan ere, eraikitzeko administrazio-baimena (EAB) arautzean dio ezen, ebazpena emateko (baimena emateko, ulertu behar da), aztertu beharko direla zerbitzu publikoak edo interes ekonomiko orokorrekoak ematen dituzten administrazio publikoen, erakundeen edo enpresen baldintza teknikoak baino ez direnak, baina instalazioak ukitzen dituen haien jabetzako ondasun eta eskubideei dagokienez bakarrik [... ]

[... ] kontzeptu horri buruzko zalantza guztiak argitzen ditu, beste administrazio batzuen baldintza teknikoen azterketa mugatzen baitu, instalazioak ukitzen dituen haien jabetzako ondasun eta eskubideei "bakarrik" dagokiela dioenean. Arau-testu horietan (legea eta erregelamendua) erabilitako terminologia desberdina izatea ez da arraroa; izan ere, lehen esan dugunez, gogoratu behar da indarrean dagoen Sektore Elektrikoari buruzko Legea 2013koa dela, eta erregelamendua, berriz, askoz lehenago onetsi zela, 2000. urtean. Horrenbestez, Sektore Elektrikoari buruzko Legearen 53.1.b) artikuluaren eta 1955/2000 Errege Dekretuaren 131.6 artikuluaren baterako interpretazioak ondorio honetara garamatza: soilik hartzen ahalko dira kontuan baldintza teknikoak, instalazioak ukitzen dituen administrazio publikoen ondasunei eta eskubideei eragiten dietenak".

Ingurumen edo hirigintza arloko alegazioei dagokienez, irizpen horrek honako hau adierazten du:

"Ingurumen-araudia betetzeari buruzko alegazioei dagokienez, eta, bereziki, ingurumen-inpaktuaren adierazpena (IIAD) zalantzan jartzera bideratutakoei dagokienez, Sektore Elektrikoari buruzko Legearen 53. artikuluko baimen-prozeduraren barruan eman baitira, argitu behar da IIAD txosten bat baino ez dela, eta dagokion tramitazioa bete ondoren ematen dela (Ingurumen Ebaluazioari buruzko 21/2013 Legearen 33.1 artikulua), eta baimen-prozedura zabalago batean txertatzen dela, hainbesteraino non IIADaren kontra ezin baita modu autonomoan errekurritu, legegileak berariaz hala aginduta –21/2013 Legea, 41.4 art., 3–. Beraz, horrekin ados ez dagoen administrazioak IIADaren kontra errekurritzen ahalko du, elektrizitatea ekoizteko instalazioaren baimena aurkaratuz. 1955/2000 Errege Dekretuaren 131.6 artikuluaren araberako desadostasun gisa hartuta IIAD hori zalantzan jar daitekeela pentsatzeak ekarriko luke horretarako ezarritako prozedura aldatzea, hau da, gora jotzeko modu desegoki bat sortuko litzateke baimena onetsi aurretik ere, eta IIAD modu autonomoan aurkaratzeko aukera emanen luke, baimena onetsi aurretik edukia berrikusteko aukera emanen lukeelako, beharbada eskumena ez duen organo baten aldetik [... ]

[... ] Estatuko Administrazio Orokorraren, haren organismo publikoen eta udalen arteko gatazkak ebazteko legez ezarritako bidea, oro har, Lurzoruaren eta Hiri Birgaitzearen Legearen testu bategina onesten duen urriaren 30eko 7/2015 Legegintzako Errege-dekretuaren 10. xedapen gehigarrian ezarritakoa da (horrek ere Ministro Kontseiluari igortzea dakar, baina ez 1955/2000 Errege Dekretuaren 131.6 artikulua aplikatuta)".

Aurrekoa kontuan hartuta, eta kontuan hartuta aldi berean ez dagoela oposizio teknikorik eta proiektuak ez duela haren jabetzako ondasun edo eskubideen gaineko ukipenik, lehen aipatutako abenduaren 1eko 1955/2000 Errege Dekretuaren 131.6 artikuluan ezarritakoarekin bat, bidezkoa da Energia Politikako eta Meatzeetako Zuzendaritza Nagusiak ebazpena ematea.

Estatuko Abokatutzari berariaz galdetu zaio ebazpen-proposamena zuzenbidearekin bat datorren, eta aldeko irizpena eman du.

Azaldutakoaren ondorioz, Energia Politikako eta Meatzeetako Zuzendaritza Nagusi honek

EBAZTEN DU:

Lehena.–Aixeindar SAri aurretiazko administrazio-baimena ematea 40 MW-eko potentzia instalatuko Labraza haize-parkearen proiektuaren eta haren ebakuazio-azpiegituren aldaketetarako, Oiongo udal mugartean (Arabako probintzia) eta Aguilar Kodeseko udal mugartean (Nafarroako probintzian), ebazpen honetan jasotzen diren baldintzetan.

Bigarrena.–Eraikitzeko administrazio-baimena ematea Aixeindar SAri 40 MW-eko potentzia instalatuko Labraza haize-parkerako eta haren ebakuazio-azpiegituretarako, Oiongo udal mugartean (Arabako probintzia) eta Aguilar Kodeseko udal mugartean (Nafarroako probintzian), 2023ko martxoko "Labraza haize-parkea" egiteko proiektuan zehaztutako ezaugarriekin eta ebazpen honetan jasotzen diren berezitasunekin.

Proiektuaren xedea da haize-parke bat eraikitzea, energia elektrikoa sortzeko, eta energia horren ebakuazioa egitea.

Haize-parkearen ezaugarri nagusiak hauek dira:

–Teknologia mota: eolikoa.

–Instalatutako potentzia, ekainaren 6ko 413/2014 Errege Dekretuaren 3. artikuluaren arabera: 40 MW.

–Haize-sorgailuen modeloa: SIEMENS GAMESA (SG) 5.0.

–Haize-sorgailuen kopurua: 8 haize-sorgailu, 5 MW-ekoa bakoitza, hiru palako 145 metroko diametroko errotorearekin eta 97,5 metroko altuerako abatzekin.

–Sarbiderako ahalmena, Red Eléctrica de España SAUk emandako sarbide eta konexio baimenetan ezarritakoaren arabera: 40 MW.

–Ukitutako udal mugartea: Oiongo udal mugartean (Arabako probintzia) eta Aguilar Kodeseko udal mugartean (Nafarroako probintzia) kokatuta daude.

Baimendutako ebakuazio azpiegiturak honela daude osatuta:

–30 kV-eko lurpeko bi linea, haize-parkeko transformazio-zentroetatik "Las Llanas de Codés TA" 30/220 kV-eko transformazio-azpiestazioraino.

  • Edukiera eta/edo sekzioa: 150 mm².

–"Las Llanas de Codés TA" 12/20/220 kV-eko azpiestazioa Aguilar Kodeseko udal mugartean dago, Nafarroako probintzian. Azpiestazioa zerbitzuan dago eta "Las Llanas de Codés 30/220 kV-eko TA handitzea" baimentzen da, honela osatuta:

  • 220 kV-eko parkea: aire zabaleko transformadore konbentzionalaren posizioa, barra bakunaren konfigurazioarekin. Ezaugarri hauek ditu:
    • Barra-ebakigailu tripolar motorizatua.
    • Intentsitateko hiru transformadore.
    • Tentsioko hiru transformadore.
    • Etengailu automatiko bat, hiru polo unipolarrez osatua, SF6 mozketarekin.
    • Hiru tximistorratz.
  • 30 kV-eko parkea: barra bakunaren konfigurazioa du, 220/30 kV-eko transformadorearen sekundariotik elikatzen dena. Ezaugarri hauek ditu:
    • Transformadoreko posizio bat, barnetik blindatua, etengailuarekin.
    • Transformadoreko posizio bat, barnetik blindatua, etengailuarekin (erreserbako posizioa).
    • Lineako bi posizio, barnetik blindatuak, etengailuarekin.
    • Zerbitzu osagarrietako transformadoreko posizio bat, barnetik blindatua, etengailuarekin.
    • Barretako erdi-tentsioaren neurketarako posizio bat, barnetik blindatua, etengailurik gabea, zerbitzu osagarrien posizioari dagokion gelaxka fisikoan jarria.
    • Erreserba-espazioa, potentzia erreaktiboko konpentsazio-ekipoa elikatzeko etorkizuneko posizio baterako.

Ebakuazio-azpiegituraren gainerako zatia, Red Eléctrica de España SAUren jabetzako 220 kV-eko "Laguardia TA" azpiestazioan garraio-sarearekin lotu artekoa, zerbitzuan dago.

Sustatzaileak izapidetzean onartutako baldintzak bete beharko ditu, bai eta Ingurumen Kalitatearen eta Ebaluazioaren Zuzendaritza Nagusiaren ingurumen-inpaktuaren adierazpenean ezarritako baldintzak ere.

Era berean, bete beharko ditu Sistemaren Operadoreak ezartzen dituen arau teknikoak eta jarduteko prozedurak.

Baimen hau emateak ez du ezertan ukatzen aplikatu beharreko beste xedapen batzuen arabera beharrezkoak diren bestelako kontzesio eta baimenak lortzea, eta, bereziki, lurraldearen antolamenduari eta ingurumenari dagozkionak. Halaber, obra egiteko beharrezkoak diren gainerako baimen guztiak eskuratu beharko dira, abenduaren 26ko 24/2013 Legearen 53.6 artikuluan eta abenduaren 1eko 1955/2000 Errege Dekretuaren 120.2 artikuluan ezarritakoari jarraikiz.

Proiektuari aldaketak aurkezteko, abenduaren 1eko 1955/2000 Errege Dekretuaren 115. artikuluan ezarritakoa aplikatuko da.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan eta Sektore Publikoaren Araubide Juridikoari buruzko urriaren 1eko 40/2015 Legearen 62.2.i) artikuluan xedatutakoarekin bat, ebazpen honek ez du administrazio bidea amaitzen, eta haren kontra gora jotzeko errekurtsoa aurkezten ahalko da, Energiaren Estatuko idazkariari zuzendua, ebazpena jakinarazi edo argitaratu eta biharamunetik hasita hilabeteko epean (haietatik gertatzen azkena kontuan hartuta).

Epe hori iraganik errekurtsoa jarri gabe, ebazpena irmoa izanen da ondorio guztietarako. Epeak hilabeteka zenbatzeko, urriaren 1eko 39/2015 Legearen 30. artikuluan xedatutakoa bete beharko da.

2024ko uztailaren 24an.–Energia Politikako eta Meatzeetako zuzendari nagusia, Manuel García Hernández.

ERANSKINA.–BALDINTZA BEREZIAK

Eraikitzeko administrazio-baimena ematen da, abenduaren 1eko 1955/2000 Errege Dekretuan xedatutakoarekin bat eta baldintza berezi hauekin:

1. Lanak egin beharko dira aurkeztu den proiektuarekin eta aplikatzekoak zaizkion erregelamenduzko xedapenekin bat, eskatu eta baimentzen diren aldaketak eginda, beharrezkoak badira.

2. Abenduaren 1eko 1955/2000 Errege Dekretuaren 131.10 artikuluarekin bat, ustiapeneko baimena emateko epea izanen da ekainaren 23ko 23/2020 Errege Lege-dekretuaren 1. artikuluan ustiapeneko baimena lortzeko ezarritako epea proiektu honi aplikatzeak dakarrena. Errege lege-dekretu horren bidez ekonomia berpizteko energia arloko eta beste arlo batzuetako neurriak onesten dira.

Eraikitzeko administrazio-baimena lortu eta gehienez ere 3 hilabeteko epean, sustatzaileak epea luzatzeko eskatzen ahalko du, ekainaren 23ko 23/2020 Errege Lege-dekretuaren 1.1.b) Bosgarrena artikuluan jasotako xedea betetzeko, honako hauek adierazita, gutxienez: (i) instalazioak ustiapeneko administrazio-baimena lortuko duen urte naturalaren seihilekoa eta (ii) adierazitako seihilekoa hasi baino lehen honako hauek lortzeko ezintasuna espresuki onartzeko konpromisoa: behin-behineko edo behin betiko ustiapeneko administrazio-baimena eta energia elektrikoa ekoizteko instalazioen administrazio-erregistroko aurretiazko edo behin betiko inskripzioa.

Ukrainako eta Ekialde Hurbileko gatazken ondorio ekonomiko eta sozialei aurre egiteko eta lehortearen ondorioak arintzeko neurriak hartzen dituen abenduaren 27ko 8/2023 Errege Lege-dekretuaren 28. artikuluari jarraikiz, ustiapeneko administrazio-baimena izateko epea, guztira, ez da inoiz 8 urtetik gorakoa izanen.

3. Instalazio horren titularrak lanen amaieraren berri eman beharko dio probintziako organo eskudunari, ustiapeneko baimena behin betikoz onartu eta luzatzeko, abenduaren 1eko 1955/2000 Errege Dekretuaren 132. artikuluarekin bat.

4. Sustatzaileak bete beharko ditu IIADan ezarritako baldintza guztiak, Trantsizio Ekologikorako eta Erronka Demografikorako Ministerioko Ingurumen Kalitatearen eta Ebaluazioaren Zuzendaritza Nagusiaren 2023ko urtarrilaren 3ko Ebazpen baten bidez emanikoan, nahitaezko txosten erabakigarria den aldetik eta, abenduaren 9ko 21/2013 Legearen 41. artikuluaren arabera, proiektua gauzatzeko eta ustiatzeko baldintzak ezartzen baititu bereziki obretan:

–Lurzoruaren okupazioa eta landarediaren gaineko ukipena minimizatzeko, dauden sarbideak eta bide-sarea baliatuko dira, eta IIAZan sartutako bideak eta sarbideak besterik ez da eginen. Obren exekuzioak ukitzen dituen bideak eta gainerako bideak lehengoratuko dira, 1.2.1 baldintzetan (Lurzorua eta ura), 2. atalean jasota dagoen bezala.

–Lur gerakinen kudeaketari dagokionez, kokaguneen gaineko eskaera egiteko beharrezkoa izanen da ingurune naturala babesteko eskumena duten ingurumen organoen balorazioa eta baimena. Nolanahi ere, eta 1.2.1 baldintzetan (Lurzorua eta ura), 4. atalean jasota dagoenarekin bat, paisaia eta ingurumen interesari buruzko plan bereziaren inguruan egon daitezkeen tokietatik kanpo kokatuko dira, eta bereziki, honako hauen esparrutik kanpo: bikain gisa katalogatutako "Labraza eta Pinar de Dueñas" paisaia eta "Arabako hegoaldeko mendilerroen KBE-HBBE" naturagune babestua.

–Obrak egin aurretik, eremuaren prospekzioa eginen da, flora mehatxatuko espezierik eta/edo intereseko landaredirik dagoen identifikatzeko, eta arreta berezia emanen zaio Ononis fruticosa espezieari. Halakorik badago, aurkikuntzen berri emanen zaie Eusko Jaurlaritzako ingurumen agenteei, babes-neurri egokiak ezar ditzaten, 1.2.3 baldintzetan (Batasunaren intereseko flora, landaredia eta habitatak) 1. atalean jasota dagoen bezala.

–Obrak hasi aurretik, obra-eremu guztietan zuinketa eginen da, halako moduz non zehatz-mehatz zedarrituta geldituko baitira mugak; ahal dela, ez da eremu horiez kanpoko landaredi naturala ukituko beharrezkoa ez bada. Materialak biltzeko tokiak eta makinentzako parkea nekazaritza eremuetan eta baso-jabari publikotik kanpo kokatuko dira, landarerik gabeko eremuetan edo parkearen zein bideen instalazioak ukituko dituen eremuetan, horrela, landaredi naturalaren gaineko eragina ez da izanen behar baino handiagoa edo ez da eraginik izanen eremuko habitatetan. Ukipenak murrizteko, bideak ahal beste doituko zaizkie lur naturalei, malda handiko eremuak saihestuko dira, eta zeharkako drainatzeak eginen. Horrez gain, tamaina handiko erkametzen oinak zuinkatu beharko dira, eta haiek ukitzea saihestu, eta gauza bera zangatik Las Llanas TAraino dauden hostozabalen zuhaitzekin, hori guztia Nafarroako Gobernuko Ingurumen Zuzendaritza Nagusiak adierazten duenarekin bat.

Era berean, arte edo erkamezti garrantzitsuen aleak moztea saihestuko da. Nahitaez moztu behar badira, organo autonomiko eskudunaren adostasuna beharko da, 1.2.3 baldintzetan (Batasunaren intereseko flora, landaredia eta habitatak), 2. atalean jasota dagoen bezala.

–Obrak hasi aurretik eta obrak egiten diren bitartean, teknikari espezializatu batek prospekzioak eginen ditu fauna-espezie mehatxatuen alerik eta habiarik eta/edo babeslekurik dagoen identifikatzeko. Horrelakorik gertatuz gero, inguru horretako obrak geldiaraziko dira, eta Arabako Foru Aldundiko Ingurumen eta Hirigintza Zuzendaritzari eta Eusko Jaurlaritzako Ingurumen Zuzendaritza Nagusiari jakinaraziko zaie. Azken horrek jarraibide egokiak ezarriko ditu, 1.2.4 baldintzan (Fauna), 1. atalean, jasota dagoen bezala.

–Lanak hasi aurretik, obra-egutegi bat ezarriko da, non zehaztuko baitira denbora- eta espazio-mugak, espezie babestuen fenologiaren arabera, bai eta ugaltzeko eta hazteko hurbileko eremuen arabera ere. Ingurumen-organo eskudunak egutegi hori aldatzen ahalko du, 1.2.4 baldintzan (Fauna), 2. atalean, jasota dagoen bezala.

–Obrak hasi aurretik, prospekzioan identifikatutako intereseko elementu guztiak balizatuko dira, babesten direla bermatzeko. Balizak hondatzen direnean berriz jarriko dira, obren fase osoan makinen eta pertsonen joan-etorrietatik babesteko helburua betetzeko moduan, 1.2.6 baldintzan (Kultura-ondarea eta onura publikoko mendiak), 1. atalean, jasota dagoen bezala.

5. Halaber, Ingurumeneko Kalitatearen eta Ebaluazioaren Zuzendaritza Nagusiak egindako ingurumen-inpaktuaren adierazpenak, lehen aipatutakoak, baldintza espezifiko batzuk ezartzen ditu, ustiatzeko baimena lortu aurretik bete beharrekoak; horiek bete izanaren berri eman beharko zaio probintziako erakunde eskudunari, eskatzaileak proiektu batean edo horren eranskin batean zehaztu eta aurrekontuarekin batera jasotako neurriak aurkeztu ondoren.

6. Eraikitzeko administrazio-baimenak ez du inola ere instalazioaren titularra salbuesten instalazioek behar dituzten gainerako baimen osagarriak lortzetik; besteak beste, lortu beharko ditu industria segurtasunaren arloko legeriak, sistema laguntzaileei dagokienez, horiek instalatu edo abian jarri aurretik, eskatzen dituen baimenak, autonomia-erkidegoen eskumenekoak, edo, bestela, kontrolerako beste formalitate guztiak bete beharko ditu.

7. Administrazioak ondoriorik gabe utziko du ebazpen hau baldin eta ikusten bada, denboraren joanean, ebazpenean ezartzen diren eskubideen titularrak ez dituela betetzen bertan ezarritako baldintzak. Halakoetan, Administrazioak, interesdunari entzunaldia eman eta behar den espedientea bideratu ondoren, kasuko baimena errebokatzea erabakiko du, horrek dakartzan ondorio administratibo eta zibil guztiekin, indarra duten lege xedapenekin eta abenduaren 26ko 24/2013 Legearen 53.10 artikuluan ezarritakoarekin bat.

8. Instalazioaren titularrak kontuan hartuko du, exekuziorako, erakundeek ezarri dituzten baldintzak, zeinak jakinarazi zaizkion eta berak berariaz onartu dituen.

Iragarkiaren kodea: E2411912