169. ALDIZKARIA - 2024ko abuztuaren 20a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

124C/2024 EBAZPENA, uztailaren 5ekoa, Ekonomia Sozialeko eta Laneko zuzendari nagusiak emana, zeinaren bidez erabakitzen baita Lodosako TIMAC Agro España SA enpresaren hitzarmen kolektiboa erregistratu, gordailutu eta Nafarroako Aldizkari Ofizialean argitaratzea.

TIMAC Agro España SA enpresak aurkeztutako hitzarmen kolektiboa aztertu da (kode zenbakia: 31102241012024), zeina erregistro honetan sartu baitzen 2024ko ekainaren 12an, enpresaren ordezkariek eta sindikatuen ordezkariek 2024ko otsailaren 9n izenpetuta.

Langileen Estatutuaren Legearen testu bategina onesten duen urriaren 23ko 2/2015 Legegintzako Errege Dekretuaren 90. artikuluaren 2. eta 3. apartatuetan eta Hitzarmen kolektiboak, laneko akordio kolektiboak eta berdintasun planak erregistratu eta gordailutzeari buruzko maiatzaren 28ko 713/2010 Errege Dekretuan ezarritakoarekin bat etorriz,

Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz, eta Eskubide Sozialetako, Ekonomia Sozialeko eta Enpleguko Departamentuaren egitura organikoa ezartzen duen azaroaren 15eko 251/2023 Foru Dekretuak ematen dizkidanak, honako hau

EBAZTEN DUT:

Lehenengoa.–Nafarroako Hitzarmen Kolektiboen, Lan Akordio Kolektiboen eta Berdintasun Planen Erregistroan inskribatzea TIMAC Agro España SA enpresak aurkeztutako hitzarmen kolektiboa (kode zenbakia: 31102241012024).

Bigarrena.–Nafarroako Aldizkari Ofizialean argitara dadila xedatzea, orok jakin dezaten.

Hirugarrena. Ebazpen hau eskatzaileari jakinaraztea, eta ohartaraztea ebazpenak ez diola amaiera ematen administrazio bideari eta, honen aurka, gora jotzeko errekurtsoa aurkezten ahal diola Eskubide Sozialetako, Ekonomia Sozialeko eta Enpleguko kontseilariari, hilabeteko epean, ebazpena jakinarazi eta hurrengo egunetik aurrera.

Iruñean, 2024ko uztailaren 5ean.–Ekonomia Sozialeko eta Laneko zuzendari nagusia, Iñaki Mendióroz Casallo.

TIMAC AGRO ESPAÑA SA ENPRESAREN LAN HITZARMEN KOLEKTIBOA

Lodosako lantokia

2022-2023-2024-2025

I. KAPITULUA.–HEDADURA ETA ESPARRUA

1. artikulua. Lurralde eremua eta langile eremua.

Hitzarmen kolektibo honek Timac Agro SA enpresaren Lodosako lantokian, erantsitako ordainsarien tauletan aipatzen diren kategorietako bat dutela, zerbitzu ematen duten langile guztiengan du eragina.

2. artikulua. Indarrean jartzea.

Hitzarmen hau alderdiek sinatzen duten egunean jarriko da indarrean, indarrean jartzeko beste data bat berariaz adierazten den alderdietan izan ezik.

3. artikulua. Iraupena eta salaketa.

Hitzarmen honen iraupena ezarri da, 2022ko urtarrilaren 1etik 2025eko abenduaren 31 arte, eta bukatzean besterik gabe salatuta geldituko da.

Hitzarmen honen indarraldian, enpresa ez da hura ez aplikatzeko aukerez baliatuko, non ez dauden hitzarmenean aurreikusita edo ez diren adostu langileen ordezkariekin.

Mugaegunetik aurrera eta hitzarmen berri batek honako hau ordeztu arte, zaharraren arauek jarraituko dute indarra izaten, harik eta beste bat sinatu arte.

II. KAPITULUA.–ORDAINSARIEN ARAUBIDEA

4. artikulua. Soldatak eguneratzea.

Hitzarmena indarrean dagoen bitartean, urteko soldata-eguneratzea kalkulatzeko, Estatistikako Institutu Nazionalak hitzarmena indarrean dagoen urte bakoitzerako argitaratutako urteko Kontsumitzaileen Prezioen Indizea (KPI) hartuko da erreferentziatzat.

Soldata eguneratzeko, KPIaren datua ehunekotan hartuko da, eta soldata-kontzeptu guztiei aplikatuko zaie, dagokion urteko KPIaren datua jakiten denean.

Urte bakoitzeko urtarrilaren 1a arteko atzeraeragina izanen du, eta atzerapen-ordainsari bat sortuko du, urte horietako soldatei KPIaren zifra hori aplikatzearen ondoriozko zenbatekoarekin.

Atzeraeragina duen eguneratze hori eta, egoki denean, atzerapenen ordainsaria 2024. urtetik aplikatuko zaie hitzarmen hau sinatzean lehen aldiz indarrean sartzen diren ordainsari-kontzeptuei (ontziratze-plusa, hirugarren txandako dibertsifikazio- eta nahasketa-plusa eta mantentze-ekipoaren plusak).

KPIaren datua negatiboa bada, %0 dela ulertuko da.

5. artikulua. Oinarrizko soldata.

Langile bakoitzari bere lanbide kategorian dagokiona da; hitzarmen honen I. eranskineko ordainsarien taulako lehen zutabean agertzen da haren urteko zenbatekoa, eta bigarren zutabean hilabetekoa.

6. artikulua. Antzinatasunaren osagarria.

Langileek, antzinatasunaren osagarri pertsonal gisa, aldian aldiko igoera izanen dute enpresan emandako zerbitzualdiagatik; hain zuzen ere, bi hirurteko eta bost bosturteko.

Antzinatasun pertsonalaren osagarria %5ekoa izanen da hirurteko bakoitzerako, eta %10ekoa bosturteko bakoitzerako. Portzentaje horiek I. eranskineko 3. zutabean izen horren pean lanbide kategoria bakoitzerako ageri den oinarriaren gainean aplikatuko dira, 14 hilabetekotan banatuta. Enpresan noiz sartu ziren, egun horretatik aurrera kontatuko da antzinatasuna, lanbide kategoria batetik bestera egiteak eraginik izan gabe. Antzinatasunagatik jasotzen diren osagarriak haietako bakoitza izateko eskubidea ematen duen epea betetzen den egunean sorraraziko dira. Ezarri diren oinarriak urte osorako dira.

Enpresarekin aldez aurretik sinatutako kontratuek antzinatasun ondorioak izanen dituzte, baldin eta bi kontraturen artean 6 hilabetetik gorako jardun gabeko denborarik izan ez bada.

7. artikulua. Aparteko eskersariak.

Aparteko bi eskersari ezarri dira: uztailekoa eta abendukoa. Haietako bakoitzean hilabeteko oinarrizko soldata eta lanbide kategoria bakoitzari dagokion antzinatasuna sartuko dira.

Data hauetan ordainduko dira:

–Abenduko eskersaria, abenduaren 22aren aurreko lehen egun baliodunean.

–Uztailekoa, hilaren lehen zazpi egunean.

Uztaileko aparteko eskersaria urteko lehen sei hilabeteetan sorraraziko da, eta abendukoa hurrengo sei hilabeteetan.

Zerbitzuak ez badira aparteko eskersarietako bat sorrarazteko sei hilabete osoan eman, epe horretan lan egindako egunen proportzioan murriztuko da aparteko eskersari horren zenbatekoa.

8. artikulua. Asteburuko plusa.

Larunbatez eta igandez txandaka lan egiten duten langileek, soldataz gain, larunbateko lanaren plus bat eta igandeko lanaren plus bat jasoko dute. II. eranskina.

Zein den ere arrazoia, txandetako batean langilezainik ez bada, haren asteburuko plusa txandan lanean ari direnen artean banatuko da.

Hurrengo urteetan, oinarrizko soldata zer portzentajetan igotzen den, hura bera igoko dira, besterik ez.

9. artikulua. Asteburu ez diren jaiegunetako lana.

Asteburu ez den jaiegunean lan egiten duten langileek eskubide hauek izanen dituzte:

–Atseden egun bat, hurrengo 30 egunetan hartzekoa.

–Eskersari bat: asteburuko plusa (II. eranskina), halako bi.

Ahal dela, eta enpresak eta langileak adostuz gero, aipatu atseden horietako batzuk edo denak oporrekin metatzen ahalko dira.

10. artikulua. Herriko festak.

Zerbitzuaren beharrak direla-eta enpresak eskatuta, herriko festetan beren borondatez lan egiten dutenek, dagokien ohiko ordainsariaz gain, honako hau jasoko dute:

–Eguneko guztirako ordainsaria adinako diru kopurua edo,

–Aparteko orduak.

Xedapen honek uztailaren 30etik abuztuaren 4a arte izanen du indarra Lodosako lantokian eta, gainera, bi egunetan irailean, Doloreetako Amaren festetan.

11. artikulua. Gaueko lanaren plusa.

Goiz-arratsalde-gaueko txanda sisteman lan egiten duten langileei aplikatuko zaie plus hau, lanean emandako gau bakoitzeko.

Kalkulatzeko, formula hau aplikatuko da:

Hilabete bakoitzeko oinarrizko soldataren eta antzinatasunaren arteko baturaren %20, zati 30 eta bider zazpi bosten.

%20 (((O.S. + Antzin. / 30) × 7/5)

Ateratzen den zifrari 0,60 euro gehituko zaizkio.

Goiz-arratsalde-gaueko txandetan aritzen diren langileek, gaueko lanaren plusa hartzeaz gain, egiturazkoa ez den ordu bereziaren (HENE) %100 jasoko dute.

Honela kalkulatzen da egiturazkoa ez den ordu bereziaren (HENE) prezioa:

Gaueko plusa x 1,06.

12. artikulua. Lanpostuko plusa.

Osagarri bat ezarri da honako lanpostu hauetarako: pikortzailea, zakuratzailea (ongarri solidoak eta hidrodisolbagarriak), nahastailea, fabrikatzailea (likidoak eta hidrodisolbagarriak) eta ongarri likidoen eremuko 1 eta 2 ontziratzaileak. II. eranskina.

Lanpostu horretan zerbitzu ematen duten langileek aipatu osagarria jasoko dute, eta lanpostu horretan zerbitzuak emateari uzten diotenean ez dute halakorik jasoko.

13. artikulua. Hirugarren txandaren plusa: zama-lanak, bidalketa, dibertsifikazioa, nahasketa.

2024ko urtarriletik aurrera, bereizi eginen dira zama-lanen eta bidalketen ataletako hirugarren txandako plusa eta dibertsifikazio eta nahasketa ataletako hirugarren txandako plusa.

Dibertsifikazio eta nahasketa ataletako hirugarren txandako plusa eguneratu eginen da, hitzarmen kolektibo honen 4. artikuluan adierazitako moduan.

Zama-lanen eta bidalketen atalak.

Zama-lanen eta bidalketen atalek hiru txandatan eginen dute lana, eta, ahal dela, goizeko eta arratsaldeko erreleboak erabiliko dira. Antolamendu edo produkzioko arrazoiak direla-eta enpresako Zuzendaritzaren ustez behar den egun eta garaietan erabiliko da gaueko erreleboa.

Horregatik, atal horietan zerbitzuak ematen dituzten langileek "hirugarren txandaren plusa" jasoko dute, urtarrileko nominan ordainduko dena, galarazi gabe enpresak edozein garaitan eskatu ahal izatea zerbitzuak hirugarren txandan emateko. (II. eranskina).

Enpresak konpromisoa hartzen du atal horietako langileei zerbitzuak gaueko txandan emateko eskatzen zaienean, aste osokoak (naturalak) izan daitezen.

Hirugarren txandako urteko beharra 4 hilabetetik (16 aste) gorakoa denean, lanean emandako asteen proportzioan osatuko da soberakin hori.

Dibertsifikazio eta nahasketa atalak.

Dibertsifikazio eta nahasketa atalek hiru txandatan eginen dute lana, eta, ahal dela, goizeko eta arratsaldeko erreleboak erabiliko dira. Antolamendu edo produkzioko arrazoiak direla-eta enpresako Zuzendaritzaren ustez behar den garaietan erabiliko da gaueko erreleboa.

Horregatik, atal horietan lan egiten duten langileek 60 euro gordineko plusa jasoko dute hilean, eta prestazioa urteko zeinahi garaitan eskatzen ahalko da. (II. eranskina).

Atal horietako langileei zerbitzuak gaueko txandan emateko eskatzen zaienean, aste osokoetan (naturaletan) lan eginen dute.

14. artikulua. Helburuen araberako prima.

Enpresako Zuzendaritzak helburuen araberako prima bat ezarriko du urtero lantokiko produkzio atal guztietarako, barnean sartuta bulegoak eta laborategia.

15. artikulua. LANEren hitzarmenaren plusa.

Zuzendaritzaren eta Enpresa Batzordearen artean negoziatuko da LANEren hitzarmena, kopurua modu honetan zehaztuta atal bakoitzarentzat:

Pikortatze saileko zama-lana.

Martxoa, apirila eta maiatza hartuko dira erreferentzia gisa, eta Enpresa Batzordearen eta Zuzendaritzaren artean adostuko da. Atal horietako langile bakoitzak aipatu hilabeteetan guztira jasotako jaieguneko plusa, gaueko lanaren plusa, asteburuko plusa eta HENEa kalkulatuko da, eta ateratzen denaren herena izanen da langileek jaso beharrekoa.

Mantentze-lanak.

Mantentze-lanerako ezarritako egutegia kontuan hartuta kalkulatuko da. Ataleko enplegatu guztiek asteburuko plus eta jaieguneko plus gisa jasotako plusak eta jasoko dituztenak batzen dira. Ateratzen den kopurua hamabi artean zatitzen da. Emaitza hori izanen da jaso beharreko kopurua.

16. artikulua. Ordainsari berezia.

Dagozkien txandak direla-eta abenduaren 24an eta 31n gaueko erreleboan lan egin behar dutenek plus berezi bat (III. eranskina) jasoko dute, soldatari gehituta.

17. artikulua. Gabonsaria.

Abenduan Eguberrietako ohiko paketea emanen dio enpresak langile bakoitzari.

III. KAPITULUA.–LANALDIA, OPORRAK ETA LIZENTZIAK

18. artikulua. Lanaldia.

2024. urtetik aurrera lanaldi hau ezartzen da:

–Benetako 1.696 lanordu urtean, pikortatze atalerako (212 egun).

–Benetako 1.712 lanordu urtean, pikortatze atalerako (214 egun).

Horretarako, atalek etenik gabe egon beharko dute martxan, atsedenaldian gelditu gabe.

Lanaldiaren banaketa arautuko dute Lan Egutegia erregulatzeko arauek (III. eranskinean jasotzen dira).

19. artikulua. Erabilgarritasun poltsa.

Bezeroak, hornitzaileak edo barne konturen bat dela-eta edozein inguruabarrek sortutako produkzio programetako aldaketei aurre egiteko helburuz, urtean 48 orduko poltsa ezarri da enpresaren alde, egokia iruditzen zaionean erabiltzeko baldintza hauen arabera:

Erabilgarritasun poltsa horretako orduak ez dira urteko gehieneko lanaldirako kontatuko.

Honela arautuko da erabilgarritasun poltsako orduen erabilera: Lanaldi osoak: 8 ordukoak egunean, larunbatetan egiteko; enpresak gutxienez ere 7 egun lehenago eman beharko du abisua (aurreko ostiralean) zerbitzuak poltsa hori erabiliz emateko. Dena dela, enpresak bertan behera uzten ahalko du aipatu deia erabilerarako aurreikusitako eguna baino 24 ordu lehenago, beranduenez. Enpresak bertan behera uzten badu dei hori, dagokion larunbateko plusa ordainduko dio deitutako langile bakoitzari (8. artikulua).

Larunbatetako orduak txandaka eginen dira, eta goizeko orduetan bakarrik.

Enpresak erabilgarritasun poltsa erabiltzeagatik saldo bat sortuko da langilearen alde, lanaldi osoko atsedenaldiekin konpentsatu beharko dena; poltsa hori erabili eta hurrengo urteko martxoaren 31 baino lehen hartu beharko dira.

Enpresak konpentsazioko atseden egunen erdia finkatzen ahalko ditu; segidan izaten ahalko direnak edo ez, eta 4 egun aurretik eman beharko zaio abisua langileari. Langileak finkatuko ditu gainerako egunak, enpresaren ohiko martxa inola ere kaltetu gabe.

Konpentsazioko atsedenaldiak noiz hartu finkatzeko enpresak duen epea bukaturik, poltsatik erabilitako orduak konpentsatu gabe badaude, enpresak nahitaez aukeratu beharko du honako hau: orduak erabili eta hurrengo urteko laugarren hilabetean finkatzea konpentsazioa hartzeko data, edo diruz konpentsatzea, aparteko ordu gisa.

Poltsatik erabilitako orduak konpentsatzeko sistemari buruz aurreko lerroaldeetan ezarritakoa galarazi gabe, langileak edozein arrazoi dela-eta enpresa uzten badu, langileari konpentsatu beharreko ordu kopuruaren balantzea eginen da eta azken kitatzearekin batera ordainduko zaizkio, aurreko lerroaldean orduko adierazitako prezioaren arabera.

Erregulazio honek Langileen Estatutuaren 34.2 artikuluan ezarritakoa ordezten du. Ordu poltsaren sistema hau aplikatzen den lanpostuetan zerbitzuak ematen dituzten langileek, konpentsazio gisa, hileko plus bat jasoko dute, "erabilgarritasun poltsa" izenekoa, II. eranskinean ezarritakoa.

Mantentze-lanetako teknikariak erabilgarritasun poltsaren sistema horretatik kanpo geratuko dira 2024ko urtarrilaren 1etik aurrera.

20. artikulua. Oporrak.

Hitzarmen honen eraginpeko langile guztiek opor ordainduak izanen dituzte urtean, urteko ordu kopuruaren, 18. artikuluaren eta egutegi ofizialaren arabera. Enpresan sartu berriak diren langileek dagokien zati proportzionala jasoko dute.

Opor egunetatik, gutxienez 15 hartuko dira etenaldirik gabe. Aldi baterako ezinduta egoteagatik, egutegian urte naturalari dagokion oporraldia, zati batean edo osorik, ezin hartu duten langileek aldi baterako ezintasun egoera bukatutakoan hartzen ahalko dituzte egun horiek; betiere, ez dira hemezortzi hilabete baino gehiago iragan beharko opor egun horiek sortu ziren urtearen bukaeratik.

Lodosako lantokiko pikortatze saileko langileek uztailaren 7tik abuztuaren 4a arte, biak barne, hartuko dituzte oporrak. Gainerako oporrak (6 egun natural) abenduan hartuko dira.

21. artikulua. Lizentzia ordainduak.

Langileak baimena izanen du, aldez aurretik abisatuta eta justifikatuz gero, lanera ez agertzeko, ordaindua izateko eskubidea galdu gabe, denbora tarte hauetarako:

a) Ezkontza edo izatezko bikotea erregistratzean: 15 egun natural.

b) Egutegiko hiru egun; horietatik bi, gutxienez, lanegunak izanen dira ezkontidearen, izatezko bikotekidearen edo bigarren mailarainoko odol-ahaidetasun edo ezkontza-ahaidetasunezko ahaideen heriotzagatik. Arrazoi horrengatik langileak bidaia egin behar badu, epea 3 egunez luzatuko da.

c) Ezkontideak, izatezko bikotekideak edo odol edo ezkontza bidezko bigarren mailarainoko ahaideek (izatezko bikotekidearen odol bidezko ahaideak barne) edo langilearekin etxe berean bizi den eta haren zaintza behar duen beste edozein pertsonak istripu edo eritasun larria baldin badute, ospitaleratu behar badute edo etxean atseden hartzea eskatzen duen ospitaleratzerik gabeko ebakuntza kirurgikoa baldin badute: bost egun.

Egin beharreko bidaien ondorioetarako, honako lizentziak emanen dira:

–150 eta 250 km bitartean: egun bat.

–251 eta 350 km bitartean: 2 egun.

–350 km baino gehiago: 3 egun.

d) Ohiko bizilekua aldatzeagatik, egun bat.

e) Seme-alaben, anai-arreben eta koinatu-koinaten ezkontza: egun natural bat, ezkontzaren egunean.

f) Egun natural bat, ezkontide nahiz izatezko bikotekide bataren edo bestearen lehen graduko osaba edo izeba hilez gero.

g) Nahitaezko eginbehar publiko eta pertsonal bat betetzeko: behar-beharrezkoa den denbora. Lege edo hitzarmen baten arau batean denbora jakin bat ezarrita badago, arau horretan absentziaren iraupenari eta konpentsazio ekonomikoari buruz xedatutakoari jarraituko zaio.

h) Hezkuntza eskubide orokorrak eta lanbide prestakuntza jasotzeko ezarritako denbora, Langileen Estatutuan araututako kasuetan eta moduan.

i) Kasu bakoitzean, beharrezko denbora tarterako emanen dira baimenak, honako hauengatik direnean: ezkontza, izatezko bikotearen erregistroa, gurasoen, aitona-amonen, seme-alaben, biloben, ezkontidearen edo anai-arreben heriotza, emaztearen, seme-alaben edo gurasoen gaixotasun larria, eta behar bezala frogatutako egoera bereziak. Horrelakoetan, baimena zer baldintzatan emanen den adostuko da, eta, baldin baimenek urte naturalaren barruan osotara hilabete bat baino gehiago hartzen badute, ordainsariak ez kobratzea erabaki daiteke edo, are gehiago, baimenean izandako aparteko denbora ez zenbatzea antzinatasunerako.

Dagokion medikuak gaixotasun larri gisa kalifikatzen dituen kasu guztiak halatzat joko dira, bai hasierako ziurtagirian, bai alderdietako batek geroago eskatuta.

Zalantzarik izanez gero, xedapen gehigarrian ezarritako Batzorde Paritarioak erabakiko du honako irizpide orientatzaileak oinarri hartuta:

Ospitaleratu beharra, nolabaiteko garrantzia duen ebakuntza kirurgikoa, laguntzailea izateko premia, etab.

j) Gizarte Segurantzako kontsultarako bidaia egin behar duten langile guztiek, eskuorria aurkeztu ondoren, kontsultako eguna hartzeko eskubidea izanen dute.

k) Hitzarmen kolektibo honi atxikitako langileek 8 ordu izanen dituzte, norberak nahi bezala hartzeko, hitzarmen honen 18. artikuluan ezarritako benetako lanaldiaren barrenean.

Ordu horiek noiz hartu, zuzeneko nagusiak onetsi beharko du, enpresaren ohiko martxa inoiz kaltetu gabe, eta zatika hartzen ahalko dira, 2 orduko alditan.

Apartatu honetan arautu ez den orotan kimikarien sektoreko hitzarmenean eta Langileen Estatutuan ezarritakoa beteko da.

Horrelakoetan egin beharreko bidaien ondorioetarako, "c" letran ezarritako kasuan izan ezik, lizentzi hauek emanen dira:

–20 eta 100 km artean: egun bat.

–101 eta 300 km artean: 2 egun.

–300 km-tik gora: 3 egun.

22. artikulua. Esnea ematea.

Bederatzi hilabetetik beherako seme-alabei esnea emateko, emakumezko langileek lanetik ordubetez lekutzeko eskubidea dute. Denbora hori bi zatitan bana dezakete.

Eskubideaz baliatzen denak, hala nahi badu, eskubide hori lanaldiaren ordu erdiko murrizketarekin ordeztu dezake, helburu berbererako, edo denbora hori lanaldi osotan pilatzen ahal du (14 lanegun), amatasunagatiko edo aitatasunagatiko baimena amaitutakoan edo oporraldiaren ondoren hartu ahal izateko.

IV. KAPITULUA.–GIZARTE ONURAK

23. artikulua. Aldi baterako ezintasuna.

a) Laneko istripua eta eritasun profesionala.

Enpresak Gizarte Segurantzaren prestazioak osatuko ditu laneko istripu edo/eta gaixotasunagatik aldi baterako ezintasunak dirauen bitartean, baja aurreko hilabetean ordainsaritan jasotako kontzeptu guztien %100 arte, honako hauek izan ezik: borondatezko eskersari arrunta, borondatezko eskersari berezia, aparteko orduak eta 24., 26. eta 27. artikuluetan jasotako kontzeptuak.

b) Eritasun arrunta eta lanetik kanpoko istripua.

Aldi baterako ezintasun aldietan, enpresak Gizarte Segurantzaren prestazioen eta langileari egunero oinarrizko soldatagatik eta antzinatasunagatik dagozkion kontzeptuen %100en arteko aldea osatuko du. Hogeigarren baja-egunetik aurrera, eta ospitaleratzea eta/edo ospitaleratzerik gabeko ebakuntza kirurgikoa izan bada, enpresak %90 arte osatuko ditu baja aurreko hilabetean ordainsaritan jasotako kontzeptu guztiak, honako hauek izan ezik: borondatezko eskersari arrunta, borondatezko eskersari berezia, aparteko orduak eta 24., 26. eta 27. artikuluetan jasotako kontzeptuak.

Kalte-ordainaren osagarri hori izanen da baldin eta absentismo indizeak igoera nabarmenik ez badu eta Gizarte Segurantzatik edo ugazaben mutualitatetik gaur egun jasotzen diren portzentajeak (%60 edo 75, eta %75, hurrenez hurren) aldatzen ez badira. Absentismo igoera hori edo portzentajeen aldaketa gertatuz gero, enpresako Zuzendaritzak eta, langileak ordezkatuz, Enpresa Batzordeak gaia berriz aztertuko dute, absentismoa igo ez dadin neurriak hartzeko.

Hurrengo formularen emaitza hartuko da absentismoaren indize gisa:

(lan egiteko orduak - lan egindako orduak) / lan egiteko orduak

Bi alderdiek, langileen aldeak eta enpresarenak, %6,56ko indizea onartzen dute 2011rako, hurrengo urteetarako oinarria izan dadin.

Absentismoaren portzentajea kalkulatzeko, ez dira kontuan hartuko honako hauek:

–Aparteko orduak.

–Oporrak.

–Ordu sindikalak.

–Ezintasun espedienteetan dabiltzan langileen bajak.

–Medikuaren 6 hilabetetik gorako pronostikoa duten bajak.

24. artikulua. Fideltasun saria.

Kontzeptu hori dela-eta, behin bakarrik eta enpresan 25 urteko zerbitzua betetzen duten langileei baino ez, bi hilabeteko oinarrizko soldata eta antzinatasuna ordainduko zaizkie, eta hilabeteko soldata kontzeptu berekin, 35 urteko zerbitzua betetzen dutenean.

25. artikulua. Behin betiko bajak.

a) Langilearen heriotzagatik behin betiko bajaren kasuan, Timac Agrok 30.000 euroko kalte-ordaina emanen die eskubidedunei.

b) Ezintasun iraunkor oso, absolutu eta baliaezintasun handiaren ondoriozko behin betiko bajaren kasuan, Timac Agrok 30.000 euroko kalte-ordaina emanen dio langileari.

Timac Agrok edozein aseguru konpainiarekin aseguratzen ahalko du arrisku hori.

c) Baja behin betikoa bada eta langileak erretiro partziala hartu ez badu, ez dira artikulu honetako A) eta B) atalak aplikatuko, eta hurrengo diru-kopuruak ondoren aipatzen diren adinetan ordainduko zaizkie langileei edo haien eskubidedunei, behin betiko baja hartzen duten unean duten adinaren arabera:

–62 urte: 11 hileko soldata.

–63 urte: 8 hileko soldata.

–64 urte: 7 hileko soldata.

–65 urte: 5 hileko soldata.

–66 urte: 4 hileko soldata.

–67 urte: hilabeteko soldata.

Indarra duen Langileen Estatutuaren arabera, kontratua amaitzea eragiten duen arrazoiaren ondorioz hemen jasotako kalte-ordaina baino handiagoa ordaindu behar bada, Estatutuan finkatutakoa edo legearen arabera une bakoitzean aplikatu beharrekoa ordainduko da.

Hilabeteko soldata horiek oinarrizko soldataz eta antzinatasunaz osatzen dira.

Artikulu hau bertan behera geldituko da, baldin eta enpresak hartan kasu bakoitzerako ateratzen diren zifrak hobetzen dituzten eskaintzak baditu.

Artikulu honetan adierazitako kalte-ordainek ez dute ondoriorik izanen behin betiko baja bidezko kaleratze baten ondoriozkoa den kasuetan.

26. artikulua. Ikasteko laguntza.

Enpresak kopuru bat (II. eranskina) jarriko du helburu horretarako, eta oinarrizko soldata igotzen den proportzio berean igoko da.

Adierazitako kopurua langileen artean banatuko da, baldin haien seme-alabak araututako hezkuntzan ari badira, 6 urtetik DBH, LH eta unibertsitateko ikasketak arte; betiere, gurasoen kargura egon beharko dute. Enpresa Batzordeak proportzioan banatuko du abuztuaren 31n plantillan dauden eskatzaileen artean.

27. artikulua. Desgaitasunen bat duten pertsonentzako laguntzak.

Enpresak laguntza bat ordainduko du hilabetero desgaitasunen bat duten seme-alaben kasuan, desgaitasun hori dela-eta Gizarte Segurantzaren prestazioen babesa badute (II. eranskina).

V. KAPITULUA.–BESTELAKOAK

28. artikulua. Goragoko kategoriako lanak.

Timac Agroko langileren bat, enpresaren beharrak direla eta, goragoko kategoriako lan bat egiten ari bada 6 hilabetean edo epe handiago batean, Langileen Estatutuan horretarako jasotakoari jarraituko zaio. Edonola ere, enpresak konpromisoa hartzen du langile horren egoera 6 hilabetean berrikusteko, eta lanpostu horretarako gai dela ikusiz gero, besterik gabe onartuko zaio kategoria.

29. artikulua. Lanpostu hutsak.

Lantokiko lanpostu finko bat sortu edo hutsik gelditzen denean, langile finkoek lanpostu hori hartzeko aukera izanen dute.

Inguruabar horren berri emanen zaie langileei, baita lanpostua eskuratzeko baldintzen berri ere.

Lantokiko Zuzendaritzaren erantzukizuna izanen dira hautaketa eta azken erabakia.

30. artikulua. Larunbatetan lan egitea eta mantentze-lanetako teknikariak bilatzeko zerbitzua.

a) Larunbatetako lana.

Mantentze-lanetako teknikariaren lanpostua duten pertsonek urtean gehienez 10 larunbatetan lan eginen dute; horietatik 8 edo 9 urtero eginen den ataleko egutegian adieraziko dira, eta 1 edo 2 absentziak betetzeko izanen dira.

Beraz, mantentze-lanetako teknikari bakoitzak larunbat batean lan eginen du 6 astean behin, goizeko txandan, salbu eta absentziaren bat bete behar bada. Gertaera hori behar besteko aurrerapenaz jakinaraziko da, une bakoitzean zerbitzua bermatzeko betiere.

Geldialdi teknikoa dagoen aldietarako ez da larunbateko lanik planifikatuko.

Itundu diren 10 larunbat horiez gain beste larunbaten batean lan egiten bada, lan hori borondatezkoa izanen da eta borondatezko eskersari berezi moduan ordainduko da.

Egutegian sartutako larunbatei eragiten dieten oporrak eskatzen badira, eskaera onartu ahal izateko, beste mantentze-teknikari batek betetzen dituela ziurtatu behar da.

b) Bilatze-zerbitzua:

–Bilatze-zerbitzua berezkoa da mantentze-lanetako teknikariaren funtzioan, eta, beraz, lanpostu horretan dauden langile guztiek eginkizun hori bete beharko dute.

–Bilatze-zerbitzua eta nahitaezko larunbatetako lana aste bereko egutegian planifikatuko dira.

–Bilatze-zerbitzua larunbateko 06:00etatik hurrengo larunbateko 06:00ak arte emanen da, lantokian bertan mantentze-lanetako teknikaririk ez badago.

Bilatze-zerbitzua eta larunbatetako lana bermatuta egonen dira, III. eranskineko estaldura-taulan absentziak ordezkatzeko zehazten den lehentasun-hurrenkeraren arabera.

Estaldurak ezarri behar direnean, estaldura behar izan baino lehen eskatutako eta onartutako opor-egunak eta metatutako egunak errespetatuko dira.

Mantentze-lanetako teknikarien erabilgarritasuna eta bilatze-zerbitzuak II. eranskinean ezarritakoaren arabera ordainduko dira.

Larunbatetan lan egiteagatik eta bilatze-zerbitzuagatik metatutako egunak honela hartuko dira:

–Enpresak erabakiko du metatutako egunen %50 noiz hartu.

–Mantentze-lanetako teknikariek metatutako egunen %50 hartzeko eskatzen ahalko dute, eta oporrak hartu aurreko ostiraleko 12:00ak baino lehen hartu beharko dute. Eskaera onartzeko ezinbestean bermatu behar da txanda bakoitzean mantentze-lan elektrikoko 2 teknikari eta mantentze-lan mekanikoko 2 teknikari egonen direla.

31. artikulua. Erretiro partziala.

Timac Agrok erretiro partzialeko eskaerak onartuko ditu, erretiro partziala lortzeko ezarritako legezko baldintzak betetzen dituzten langileek aurkeztuak badira.

Orobat, lehendik betetzen zituen lanpostuak ez beste batzuk esleitzen ahalko dizkio enpresak erretiro partziala hartzen duen langileari.

Urtero, bereziki berrikusiko dira lanaldia garatzeko baldintzak eta, aurreko urtean %5etik gorako absentismoa izan bada, enpresak beste modu batez banatzen ahalko ditu erretiro partziala hartutako langileak egin beharreko orduak.

Erretiro partziala hartutako langileek hilabeteko soldata bat jasoko dute lana behin betiko uzten dutenean.

32. artikulua. Aldi baterako kontratazioa.

Iraupen mugatuko langile kontratazioak ezin dira kimikarien sektoreko hitzarmenean ezarritakotik harago luzatu.

33. artikulua. ABLE bidezko kontratazioa.

Enpresak aldi baterako laneko enpresekin langileak lagatzeko kontratuak eginez gero, badu konpromisoa haiek 90 hilabete jarraituen muga ez gainditzeko, eta kasu bakoitzean langileen ordezkariekin negoziatzen ahalko du denbora muga hori luzatzea.

34. artikulua. Mugigarritasun geografikoa.

Lantokiz aldatzeko erabakiak eragina izan baino sei hilabete lehenago, gutxienez ere, jakinarazi beharko dio enpresaburuak langileari erabaki hori; orobat, legezko ordezkariei.

VI. KAPITULUA.–LANEKO SEGURTASUNA ETA OSASUNA

35. artikulua. Laneko osasuna eta segurtasuna.

Osasunaren prebentzioan eta langileen segurtasunean eragina duten gai guztietan aplikatuko da indarreko legeria.

Laneko arropari dagokionez, ale bat urtean emanen da, arau orokor gisa; hala ere, behar handiagoa dagoen kasu guztietan edo nahi gabe hondatzen denean, behar adina aldiz emanen da. Laneko arropa garbitzeko zerbitzua izanen dute langileek, eta enpresak bere gain hartuko du zerbitzu horren kostua.

Oinetakoei dagokienez, eskuarki, pare bat emanen da urtean. Beharren arabera emanen dira segurtasuneko oinetakoak (bota babesgarriak eta gomazko botak), zenbatean behin finkatu gabe, ez gehienez, ez gutxienez.

Horren gainean Zuzendaritzak har ditzakeen erabakiak errekurritzen ahalko dira Segurtasun eta Osasun Batzordean, horrexek hartuko baitu behin betiko erabakia eta, betiere, laneko arropa lantoki barrenean erabiltzeko dela kontuan izanda.

Mutuara osasun-azterketak edo -balorazioak egitera egindako joan-etorrien gastuak honela arautuko dira:

1. Garraiobide kolektiboak erabiltzen badira, garraio txartelaren zenbateko osoa konpentsatuko da.

Garraio txartela aurkeztuz justifikatuko da gastu horien ordainketa.

2. Langileak bere ibilgailua erabiltzen badu, ez da inolako justifikaziorik beharko joan-etorrien gastuak ordaintzeko, nahikoa izanen baita onuraduna agertzea eta osasun-azterketa egiten dion medikuaren egiaztagiria. Garraiobide horretan egindako gastuaren balioa zehazteko, joan-etorrien kilometro kopurua hartuko da aintzat, 0,28 euro ordainduz kilometro bakoitzeko.

3. Taxia erabiltzen bada joan-etorrietarako, fakturaren edo horrek agertzen dituen datu fiskalak jasotzen dituen antzeko agiriaren bidez justifikatutako gastua ordainduko da; bi kasuetan adierazi beharko da ibilbidearen jatorria eta destinoa.

36. artikulua. Toxikotasuna eta arriskua.

Indarra duten legezko xedapenen arabera, eta horiek hobekiago bete daitezen, aldian behin ingurumen arloko datuen laginketak eginen dira eta, emaitzen arabera, enpresak behar diren bitartekoak ezarriko ditu edozein giro nekagarri, toxiko edo arriskutsu zuzentzeko, horrek langilearen lan egoeran kalterik eragin gabe.

Segurtasun eta Osasun Batzordeak gai horretan esku hartzeaz gain, Enpresa Batzordeak hartuko du parte, beharrezkoa denean.

VII. KAPITULUA.–AZKEN XEDAPENAK

1. xedapena.

Hitzarmen honen indarraldian ezartzen diren ordainketa kontzeptu guztietan edo batzuetan aldaketa ekonomikoa dakarren nahitaezko edozein xedapenek eraginkortasuna izateko, oro har eta urte osorako sortzen duen egoera baloratuta, hitzarmenak berak ezarritakoa gainditu beharko du.

2. xedapena.

Artikulu honetan arautu ez den orotan Langileen Estatutuan eta gai honetan indarra duten legezko xedapenetan ezarritakoa beteko da.

VIII. KAPITULUA.–XEDAPEN GEHIGARRIAK

38. artikulua. Batzorde paritarioa.

Batzorde Paritarioa eratu da, 6 kidez osatua gehienez ere: 3, enpresaren alderdia ordezkatuz eta 3, langileen alderdia ordezkatuz; azken horiek langileen legezko ordezkarien artean aukeratuko dira, enpresan ordezkaritza duten sindikatu bakoitzaren parte-hartze mailaren proportzioan, non ez duten besterik adosten hitzarmen hau sinatzen duten alderdiek.

Hauek izanen dira Batzorde Paritarioaren eginkizunak:

a) Hitzarmen honetan aurreikusitakoa interpretatzea eta aplikatzea.

b) Langileen Estatutuaren 41.6 eta 82.3 artikuluetan ezarritakoak; horretarako, Batzorde Paritario honen esku utziko dira negoziazio kolektiboan lan-baldintzak nabarmen aldatzeko eta hitzarmenaren edukia ez aplikatzeko sortzen diren desadostasunak, bitartekari-lanak egin ditzan. Nahiz Batzordeak bitartekari-lana egin, adostasunik lortzen ez bada, hark bitartekotza eta adiskidetze organoen menpe (Nafarroako Gobernuko Lan Departamentua eta Nafarroako Lan Auzitegia) uzten ahalko du desadostasuna.

Langileen Estatutuaren 82.3 artikuluari dagokionez, kontuan hartu beharko da hitzarmen honen 3. artikuluan ezarritakoa hitzarmenaren indarraldian hura ez aplikatzeko ezintasunari buruz.

c) Akordio guztien jarraipen lanak egitea.

Adierazitako eginkizunak betetzeko, Batzorde Paritarioa bilduko da esku hartzeko eskatzen zaionean.

Edozein kasutan, dituen eskumenen ondorioz, edozein ordezkaritzaren hirutik bik eskatuz gero bilduko da Batzorde Paritarioa.

Batzordearen bi aldeetako edozeinek eskatzen ahal du batzordea biltzeko, eta 15 eguneko epean bilduko da, beranduenez.

Bilera bakoitzaren akta eginen da eta bertaratzen diren guztiek sinatuko dute.

Batzorde Paritarioak 5 egun balioduneko epea izanen du ebazpen bat emateko, gairen bat azter dezan eskatu eta biharamunetik aurrera.

Erabakiak gehiengo soilaren bidez hartuko dira. Horretarako, boto kopuru bera izanen dute alderdiek. Batzorde paritarioaren akordioek balioa izateko, ordezkaritza bakoitzaren botoen %51ren babesa izan beharko dute.

Batzorde paritarioan dagoen sindikatuen ordezkaritza bakoitzak aholkulari baten laguntza izaten ahalko du, baita enpresa-ordezkaritzak ere. Aholkulariak hizpidea izanen du, baina botorik ez.

Batzordeak denen intereseko arloetan hartzen dituen akordioak hitzarmen kolektibo honen partetzat joko dira eta horiek ere betebeharrekoak izanen dira. Halako akordioak Lan arloko Agintaritzari igorriko zaizkio, erregistra ditzan.

Batzorde paritarioko kide titularrek eskubidea izanen dute bilkuretarako baimen ordaindua izateko hura biltzen den egunetan, eta eginkizun horretan sortzen diren gastuak enpresak ordainduko ditu.

I. ERANSKINA.–TIMAC AGRO SA ENPRESAREN HITZARMEN KOLEKTIBOA

2022. urteko soldata taulak

KATEGORIA

URTEKO ­SOLDATA
(euro)

HILEKO ­SOLDATA
(euro)

OINARRIA

%10

ANTZIN.

TEKNIKARIAK

110

LAGUNTZAILE TEKNIKOA 1

40.209,13

2.872,08

12.874,76

91,96

120

LAGUNTZAILE TEKNIKOA 2

36.426,57

2.601,90

10.829,25

77,35

150

LANGILEZAINA

35.871,02

2.562,22

9.529,74

68,07

170

TALDEBURUA

34.892,44

2.492,32

9.465,23

67,61

160

LABORAT. ANALISTA

31.527,33

2.251,95

9.465,23

67,61

ENPLEGATUAK

210

ADMIN. BURUA 1

43.538,13

3.109,87

11.802,69

84,30

220

ADMINISTRARI OFIZIALA 1

35.140,65

2.510,05

10.829,25

77,35

230

ADMINISTRARI OFIZIALA 2

34.725,69

2.480,41

9.746,30

69,62

240

ADMINISTRARI LAGUNTZAILEA

30.675,28

2.191,09

9.241,83

66,01

MENPEKO LANGILEAK

350

Biltegizaina

31.382,63

2.241,62

9.530,70

68,08

BEHARGINAK

480

MANTENTZE-LANETAKO OFIZIALA 1

32.505,70

2.321,84

9.465,23

67,61

460

PRODUKZIOKO OFIZIALA 1

32.505,70

2.321,84

9.465,23

67,61

470

PRODUKZIOKO OFIZIALA 2

31.745,00

2.267,50

9.465,23

67,61

410

1. MAILAKO OFIZIALA

31.527,33

2.251,95

9.465,23

67,61

420

OFIZIALA 2- PRF 1

30.766,61

2.197,62

9.277,14

66,27

430

OFIZIALA 3- PRF 2

29.486,57

2.106,18

9.092,08

64,94

440

LAGUNTZAILE ESPEZ.

29.092,63

2.078,04

9.027,35

64,48

450

PEOIA

28.074,63

2.005,33

8.965,67

64,04

II. ERANSKINA

2022KO KONTZEPTUAK

ZENBATEKOA

8. artikulua. Asteburuetako plusa

–Larunbatean

57,30

–Igandean

57,30

9. artikulua. Jaiegunetako plusa

114,60

12. artikulua. Lanpostuko plusa

61,72

13. artikulua. Hirugarren txandako plusa

–Zama-lanen eta bidalketen atalak

321,60

–Dibertsifikazio eta nahasketa atalak

60,00

16. artikulua. Ordainsari berezia

428,81

19. artikulua. Erabilgarritasun poltsa

28,42

23. artikulua. Ikasteko laguntza

15.082,94

27. artikulua. Desgaitasunen bat duten pertsonentzako laguntza

200,00

Mantentze-lanetako taldearen erabilgarritasunagatiko eta bilatze-zerbitzuagatiko ordainsaria

Mantentze-lanetako taldearen erabilgarritasuna eta bilatze-zerbitzua honela ordainduko da:

KONTZEPTUA

ZENBATEKOA

MANTENTZE-LANETARAKO ERABILGARRITASUNA

Hileko plus finkoa, bilatze-zerbitzua nahitaezkoa izateagatik + mantentze-lanetako egutegia (larunbatetan lan egitea)

115,00 euro hilean

BILATZE-ZERBITZUKO TXANDA

ASTELEHENETIK OSTIRALERA

Bilatze-zerbitzuko txanda

22,00 euro/txandako

BILATZE-ZERBITZUKO TXANDA

JAIEGUNAK ETA ASTEBURUA

Bilatze-zerbitzuko txanda larunbat arratsalde eta gauetan, igandeetan eta jaiegunetan

36,00 euro/txandako

IRTEERA

Lantokira joatea bilatze-zerbitzuan deia jasotzeagatik

20,00 euro irteera bakoitzeko

Lantokian agertutako ordu bakoitzagatik borondatezko eskersari bereziak ordainduko dira. Lantokira agertzen denean, gutxienez ordu 1 ordainduko da borondatezko eskersari berezi moduan.

Artikulu honetan taldeburuentzat eta mantentze-lanetako teknikarientzat deskribatutako ordainketa-sistema hitzarmena sinatzen den egunean jarriko da indarrean, eta hitzarmen honen 4. artikuluan adierazitakoaren arabera eguneratuko da.

III. ERANSKINA.–LAN-EGUTEGIA

Ikusita Nafarroako Foru Komunitatearen erkidegoko lan egutegiak jasotzen dituen urteko festak eta enpresaren hitzarmenak guztira jasotzen dituen benetako laneko orduak, hurrengo egutegiak izanen du indarra, ezarritako ordutegien arabera:

Pikortatze atala:

Urteko egun guztietan emanen da zerbitzua, atal honetan lan egiten dutenei igande eta jaiegunetako konpentsazioko atsedenaldia ematea galarazi gabe; hori guztia, hitzarmen honetako urte osoko benetako orduen arabera.

Zerbitzu horretatik kanpo daude egun hauek:

–Uztailaren 7tik abuztuaren 4a arte, biak barne, mantentze-lanen geldialdi teknikoa eta langileen oporrak direlako.

–6 egun natural abenduan.

–San Gregorio, asteburuko jaia.

–Doloreetako jaiak: osteguna, ostirala, larunbata eta igandea.

–Eguberriak eta Urteberri eguna: abenduaren 24a, 25a eta 31 eta urtarrilaren 1a.

Laneko orduak: 06:00 - 14:00, 14:00 - 22:00 eta 22:00 - 06:00.

Urtero onesten den egutegiaren arabera ezarriko dira oporrak.

Pikortatze ataleko langileek metatutako egunak baliatzeko eskaera:

Pikortatze ataleko langileek eska dezakete pikortatze ataleko lan-sistema aplikatzearen ondorioz sortzen diren metatze-egunak hartzea (gehienez 3 egun), baina honako baldintza hauek bete behar izanen dituzte:

–Hartuko diren egun horien aurreko asteko ostiraleko 12:00ak baino lehen egin behar da eskaera, lantaldeak eta lan-txandak antolatu ahal izateko.

–Metatutako egunak eskatzeko azken eguna urte bakoitzeko irailaren 15a da.

–Atalean 4 txandatan lan egiten ari badira, egun bakoitzeko pertsona batek soilik hartzen ahalko du eguna; eta 3 txandatan lan egiten ari badira, txanda bakoitzeko pertsona batek hartzen ahalko du.

–Ekoizpena bermatu behar da, eta, horregatik, eskaerak onartuko dira baldin eta langilea ez egoteak ez badio eragiten atalaren funtzionamenduari. Ahal den neurrian, langilearen eskaerari mesede egiten saiatuko da beti.

Langileak aukeratutako opor-egunetan ere dagokion plusa jasoko da.

Gainerako atalak. (Zama-lanak, mantentze-lana, bidalketa, nahasketa, bulegoak, hidrodisolbagarriak, likidoak eta laborategia).

Zama-lanetako, bidalketako, nahasketako eta likidoetako atalek lanegun guztietan eta larunbatetan emanen dituzte zerbitzuak (19. artikulua betez), benetako lanorduak osatzeko.

Bulegoen atalak lanegun guztietan emanen ditu zerbitzuak, astelehenetik ostiralera, benetako lanorduak osatzearren.

Mantentze-lanen atalak astelehenetik larunbatera bitarte emanen du zerbitzua, benetako lanorduak osatzeko, eta larunbat eta jaiegunak konpentsatzeko atsedenaldiak hartuko ditu.

Laborategiko langileek astelehenetik larunbatera bitarte emanen dute zerbitzua, benetako lanorduak osatzeko, eta larunbat, igande eta jaiegunak konpentsatzeko atsedenaldiak hartuko dituzte.

Herriko festetan eta Doloreetako Amaren jaietan, atal horietako langileak oporretan izanen dira, eta zama-lanetako eta bidalketako erretenaren beharrezko zerbitzua ohiko moduan mantenduko da.

Egun horietako bidalketak egiteko ezinbestekoak diren langileek osatuko dute erretena, eta, gehienez ere, ohiko bi erreleboetako bateko langileek osatuko dute.

Lanaldi zatituko errelebo bat antolatuko da, baina behar adina luzatuko da horren beharrik bada, ez dadin egin gabeko bidalketarik izan.

Erreteneko beharrezko langileei herriko festetako artikulua aplikatuko zaie.

Ordutegiak:

–Bulegoak:

  • 08:00-13:00 eta 14:00-17:00.

–Laborategia:

  • 06:00-14:00 eta 14:00-22:00.

–Mantentze lanak:

  • 06:00-14:00 eta 14:00-22:00.

–Zama-lanak, bidalketa, nahasketa eta dibertsifikazioa:

  • 06:00-14:00, 14:00-22:00 eta 22:00-06:00.

Hori guztia, hitzarmen honetako 13. eta 19. artikuluekin bat.

Lodosako festetan eta Doloreetako Amaren jaietan ohiko moduan funtzionatuko dute zama-lanen, bidalketen eta bulegoen kontrolaren zerbitzuek, behar duten langileen bitartez, hitzarmen honen 10. artikuluan adierazi den moduan.

Mantentze-lanetako teknikarientzako estaldura-taula. Beheko taulan zehazten diren lanpostuak betetzen dituzten pertsona zehatzak mantentze-lanetako arduradunak taldeak definitu ondoren ezarriko dira:

S1

S2

S3

S4

S5

S6

Elektrikaria 1

1,0

1,3

1,2

Elektrikaria 3

1,2

1,0

1,3

Elektrikaria 5

1,3

1,2

1,0

Mekanikaria 1

1,0

1,3

1,2

Mekanikaria 3

1,2

1,0

1,3

Mekanikaria 5

1,3

1,2

1,0

S1

S2

S3

S4

S5

S6

Elektrikaria 2

1,0

1,3

1,2

Elektrikaria 4

1,2

1,0

1,3

Elektrikaria 6

1,3

1,2

1,0

Mekanikaria 2

1,0

1,3

1,2

Mekanikaria 4

1,2

1,0

1,3

Mekanikaria 6

1,3

1,2

1,0

HITZARMENAREN SINADURAREN AKTA

2022-2023-2024-2025 urteetarako

Honako akta hau idatzi eta sinatzen da, 2024ko otsailaren 9an, eta hitzarmena sinatuta geratzen da Timac Agro SA enpresak Lodosan daukan lantokirako.

Lodosan, 2024ko otsailaren 9an.

Iragarkiaren kodea: F2410896