Iragarkia
154. ALDIZKARIA - 2024ko uztailaren 30a
1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.2. Oposizioak eta lehiaketak. Lan publikoaren eskaintza
2321/2024 EBAZPENA, ekainaren 13koa, Funtzio Publikoko zuzendari nagusiak emana, deialdi bat onesten duena prestakuntzarako zerbitzu berezien egoeran ogasuneko teknikariaren lanpostuan aritzeko izangaien zerrenda bat hautaproben bidez osatzeko.
Nafarroako Foru Komunitateko Administrazioak dituen langile beharrak ikusirik, bidezkoa da deialdi bat onestea, ogasuneko teknikarien lanpostuak prestakuntzarako zerbitzu berezien egoeran betetzeko izangaien zerrenda bat hautaproben bitartez osatzeko, Nafarroako Foru Komunitateko Administrazioan eta haren erakunde autonomoetan sortzen diren beharrak betetzeko.
Deialdia honako bi arau hauen babespean onesten da: 96/1997 Foru Dekretua, apirilaren 14koa, administrazio publikoko langileen lanbide prestakuntza eta hobekuntza arautzen dituena eta 199/2004 Foru Agindua, abenduaren 30ekoa, Lehendakaritza, Justizia eta Barne kontseilariak emana, prestakuntzarako zerbitzu berezietako lanpostuetan aritzeko izangaien zerrendak osatu eta kudeatzeko prozedura ezartzen duena.
Horrenbestez, eta otsailaren 21eko 30/2005 Foru Dekretuaren bidez esleiturik ditudan eskudantziak erabiliz,
EBAZTEN DUT:
1. Deialdi bat onestea, prestakuntzarako zerbitzu berezien egoeran ogasuneko teknikariaren lanpostuan aritzeko izangaien zerrenda bat hautaproben bidez osatzeko. Zerrenda hori Nafarroako Foru Komunitateko Administrazioan eta haren erakunde autonomoetan sortzen diren beharrak aldi baterako betetzeko erabiliko da, Osasun Departamentuaren mendeko erakundeetan izan ezik.
2. Ebazpen hau eta dagozkion eranskinak Nafarroako Aldizkari Ofizialean argitara daitezela agintzea.
3. Ebazpen hau eta eranskinak jakinaraztea Egiturako, Plantillako eta Langileen Aldi Baterako Kontratazioetarako Zerbitzuari, Jendearentzako Argibideen eta Erregistro Orokorraren Bulegoari eta epaimahaiko kideei, behar diren ondorioak izan ditzaten.
Iruñean, 2024ko ekainaren 13an.–Funtzio Publikoko zuzendari nagusia, Rashid Mohamed Vázquez.
I.–DEIALDIA, IZANGAIEN ZERRENDA BAT OSATZEKO, OGASUNEKO TEKNIKARIAREN LANPOSTUAN ARITZEKO, PRESTAKUNTZARAKO ZERBITZU BEREZIETAN
Honako hauek dira deialdiaren
OINARRIAK
Lehenbizikoa.
Deialdia egiten da ogasuneko teknikariaren lanpostuan prestakuntzarako zerbitzu berezietan arituko diren izangaien zerrenda bat hautaproben bidez osatzeko. Zerrenda hori Nafarroako Foru Komunitateko Administrazioan eta haren erakunde autonomoetan sortzen diren beharrak aldi baterako betetzeko erabiliko da, Osasun Departamentuaren mendeko erakundeetan izan ezik.
Bigarrena.–Parte-hartzaileen betebeharrak.
2.1. Deialdi honetan parte hartu nahi duten izangaiek betebehar hauek bete beharko dituzte eskabidea aurkezteko epea bukatzen denean:
a) Nafarroako Foru Komunitateko Administrazioaren eta haren erakunde autonomoen zerbitzuko langile finkoa izatea, B, C edo D mailakoa edo taldekoa, eta eskubidez dagokien gehieneko prestakuntzaldia agorturik ez izatea.
b) Lanpostuan gutxienez hiru urteko zerbitzualdia benetan egin izana.
c) Ez egotea borondatezko edo nahitaezko eszedentzian.
d) Eskabideak aurkezteko epea bukatzen den egunean lizentziadun, ingeniari, arkitekto edo gradudun titulua edukitzea, edo horren baliokide aitortutako titulua, edo titulu hori eskuratzeko eskubideak ordaindu izanaren gordekina. Titulu hori ezin da izan langile finkoari jarduneko zerbitzuan aritzeko balio diona.
Atzerrian lortutako tituluak badira, homologazioaren egiaztagiria eduki beharko da.
e) Ogasuneko teknikari gisa zerbitzu berezietan prestakuntza jasotzeko zerrenda batean ez egotea.
2.2. Aurreko atalean jasotako baldintza guztiak eskabideak aurkezteko epea bukatzen den egunean bete beharko dira, baita hautapen prozedura osoan, dei egiten zaien unean eta prestakuntzaldiak iraun bitartean ere.
2.3. Deialdi honetan ezin dute parte hartu Hezkuntza Departamentuko irakasleek, Osasun Departamentuko erakunde autonomoei atxikitako langileek, Nafarroan Justizia Administrazioan ari diren langileek, ez eta Nafarroako Administrazio Publikoetako Langileen Estatutuaren aplikazio eremutik kanpo dauden langileek ere.
Hirugarrena.–Eskabideak eta agiriak.
3.1. Eskabideak aurkezteko epea.
Deialdiotan parte hartzeko eskabideak hamar egun balioduneko epean aurkeztu beharko dira, deialdiok Nafarroako Aldizkari Ofizialean argitaratu eta biharamunetik hasita. Eskabideak aurkezteko epea ezin izanen da luzatu.
3.2. Eskabidea aurkeztea eta formalizatzea.
Hautapen prozesu honetan parte hartu nahi dutenek telematikoki aurkeztu beharko dute eskabidea, Internet bitartez, https://www.navarra.es/eu/enplegu-publikoa helbidean, "Enplegu publikoko deialdiak" atalean, deialdi honen fitxan sartuz.
Eskabidean, interesdunek adierazi beharko dute baldintza guztiak betetzen dituztela eskabideak aurkezteko epea bukatzen den egunean.
%33ko desgaitasuna edo handiagoa izanik parte hartzen dutenek horren berri eman beharko dute eskabidean; gainera, organo eskudunak emandako agiriak erantsi beharko dituzte, eskaneaturik, hori frogatzeko.
%33ko desgaitasuna edo handiagoa duten izangaiek, hura frogatzeko, agiri hauetako bat aurkeztu behar dute:
–IMSERSOk edo autonomia erkidegoan eskumena duen organoak emandako ziurtagiria.
–Gizarte Segurantzako Institutu Nazionalaren ebazpena, prestazio bat jasotzeko eskubidea onartzen diona hauetakoren bat edukitzeagatik: ezintasun iraunkor osoa, ezintasun iraunkor absolutua edo baliaezintasun handia.
Desgaitasuna izanik, izangaiek egokitzapenen bat eskatzen badute probak egiteko denboretan eta bitartekoetan, hala adierazi beharko dute eskabidean, eta, horretarako prestatutako tokian, adierazi beharko dute zer egokitzapen behar duten, edo nola doitu behar diren denbora eta/edo bitartekoak. Horretarako, izangaiak egokitzat jotzen duen dokumentazioa aurkez dezake, eskabidea aurkeztean. Pertsona horiek Pertsonen Autonomiarako eta Garapenerako Nafarroako Agentziara bideratuko dira, proba egiteko denbora eta baliabide aldetik behar dituzten egokitzapenak zehazteko.
Nafarroako Foru Komunitateko Administrazioak, hautapen prozesua kudeatzen duen organoaren bidez, espedientea izapidetzeko eta ebazteko behar diren datuak kontsultatuko ditu (nortasuna, adina eta titulazioa). Datuetara sartuko da, hain zuzen, Datuak Egiaztatu eta Kontsultatzeko (SVCD) Estatuko Administrazio Orokorraren Zerbitzuen bidez edo sistema baliokideen bidez, salbu eta izangaiak uko egiten badio modu arrazoituan. Uko egiten badio, nortasun agiri nazionalaren kopia aurkeztu beharko du, eskaneaturik.
Aski izanen da agirien kopia arruntak aurkeztea, baina aurkeztutako datuak edo agiriak ez-zuzenak edo faltsuak badira, behar diren erantzukizun penal, zibil edo administratiboak eskatuko dira. Hala ere, Administrazioak noiznahi eskatzen ahalko dizkie izangaiei aurkeztutako agirien jatorrizkoak edo fotokopia konpultsatuak.
Desadostasunik sortzen bada ofizioz egiaztatutako datuen eta interesdunak deklaratzen dituenen artean, edo haien gaineko alderdiren bat argitu behar bada, behar den errekerimendua eginen da, Administrazio Publikoen Administrazio Prozedura Erkideari buruzko urriaren 1eko 39/2015 Legearen 68.1 artikuluan ezarritakoaren arabera.
Laugarrena.–Izangaiak onartzea.
4.1. Behin-behineko zerrendak.
Eskabideak aurkezteko epea bukaturik, Funtzio Publikoko zuzendari nagusiak ebazpen bat emanen du izangai onartu eta baztertuen behin-behineko zerrenda onesteko, eta aginduko du argitara dadila www.nafarroa.eus helbidean.
Behin-behineko zerrenda argitaratu eta biharamunetik hasita, izangai baztertuek hamar egun balioduneko epea izanen dute erreklamazioak aurkezteko eta, akatsik egin badute, haiek zuzentzeko. Erreklamazioak telematikoki aurkeztu beharko dira, Interneteko www.nafarroa.eus helbidearen bidez, deialdiaren fitxan.
4.2. Behin betiko zerrendak.
Erreklamazioak edo zuzenketak egiteko epea amaituta, eta horiek ebatzi ondoren, Funtzio Publikoko zuzendari nagusiak emandako ebazpen bidez onetsiko dira izangaien behin betiko zerrendak. Zerrendok www.nafarroa.eus helbidean argitaratuko dira, deialdian adierazitako hautaproba zer egun, ordu eta tokitan eginen den zehaztuta.
Onartuen zerrendan agertzea ez da aski deialdi honetan eskatutako baldintzak betetzen direla aitortzeko. Izangaiek aurkeztu behar duten dokumentazioa edo Administrazioak bere eskuetan daukana aztertuta, baldintzaren bat betetzen ez dela ohartuz gero, interesdunek deialdi hauetan parte hartzeagatik dituzten eskubide guztiak galduko dituzte.
Izangai onartu eta baztertuen zerrendak argitaratzearekin ulertuko da interesdunei egin beharreko jakinarazpena egin dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 45. artikuluan ezarritakoarekin bat.
Bosgarrena.–Kalifikazio epaimahaia.
5.1. Kalifikazio epaimahaia honako hauek osatuko dute:
Epaimahaiburua: Javier Miguéliz Andueza, Nafarroako Foru Ogasuneko Zerga Kudeaketa Zerbitzuko zuzendaria.
Ordezko epaimahaiburua: Cristina Lizarbe Bravo, Nafarroako Foru Ogasuneko Hitzarmen Ekonomikoaren, Analisi Fiskalen eta Administrazioaren Zerbitzuko zuzendaria.
Epaimahaikidea: Sonia Ruiz Millán, Nafarroako Foru Ogasuneko Diru-bilketa Zerbitzuko Derrigorrezko Diru-bilketaren Ataleko burua.
Ordezko epaimahaikidea: Gonzalo Rubio Ezquieta, Nafarroako Foru Ogasuneko Arauen Garapen eta Aholkularitza Juridikorako Zerbitzuko Tributuen arloko Aholkularitza eta Zabalkunderako Ataleko burua.
Epaimahaikidea: Teresa Sansa Villacampa, Nafarroako Foru Ogasunari atxikitako ogasuneko teknikaria.
Ordezko epaimahaikidea: Ana Cañas Palacios, Nafarroako Foru Ogasunari atxikitako ogasuneko teknikaria.
Epaimahaikidea: Jesús Javier Elizalde Esteban, Langileria Batzordeak hautatutako ordezkaria.
Ordezko epaimahaikidea: Alfonso Pérez Ruiz, Langileria Batzordeak hautatutako ordezkaria.
Idazkaria: Edurne Iturri Barreneche, Nafarroako Foru Ogasunari atxikitako ogasuneko teknikaria.
Ordezko idazkaria: Elena Vera Zarraluqui, Nafarroako Foru Ogasunari atxikitako ogasuneko teknikaria.
5.2. Sektore Publikoaren Araubide Juridikoari buruzko urriaren 1eko 40/2015 Legean abstentziorako aipatzen diren arrazoietako bat gertatzen denean, kalifikazio epaimahaiko kideek ezin izanen dute epaimahaian parte hartu, eta Funtzio Publikoko Zuzendaritza Nagusiari jakinarazi beharko diote.
Halaber, zilegi da epaimahaikideak errekusatzea, inguruabar horietako bat gertatzen denean.
5.3. Hautaproba egiten hasi aurretik eratuko da epaimahaia.
Epaimahaia ezin izanen da eratu, ez eta jardun ere, gutxienez kideen gehiengo osoa ez badago bertan. Halaber, epaimahaiaren eraketak eta jardunak balio izateko, epaimahaiburuak idazkariak egiten dituzten pertsonek edo haien ordezkoek bertan egon beharko dute.
Epaimahaiak gehiengoz ebatziko ditu deialdien oinarriak interpretatu eta aplikatzeko garaian sortzen diren arazoak.
Epaimahaiak aholkulari espezialistak hartzen ahalko ditu probarako, eta horiek beren espezialitate teknikoetan baizik ez dira ariko, eta haietan bakarrik emanen diete laguntza epaimahaiko kideei.
Seigarrena.–Proba.
6.1. Hautaketa-prozesuan ondoren adierazitako probak eginen dira, eta baliteke biak egun berean egin behar izatea.
a) Lehenengo proba: teorikoa izanen da eta I. eranskineko gaiei buruzko test motako 40 galderari erantzun beharko zaie; galdera bakoitzak lau aukera izanen ditu eta bakarra izanen da zuzena. Erantzun oker bakoitzak penalizazioa izanen du; hain zuzen ere, erantzun zuzenaren balioaren herena. Proba egiteko 2 ordu izanen dira, gehienez ere.
Proba egiteko ez da inolako testurik edo dokumentaziorik erabiltzen ahalko, ezta gailu elektronikorik edo bestelako materialik ere, mutur lodiko boligrafo urdina edo beltza izan ezik.
Proba honi dagokion puntuazioa 40 puntukoa izanen da gehienez ere. Bazterturik geldituko dira proba honetan ezarritako gehieneko puntuen %30 gutxienez lortzen ez duten izangaiak.
b) Bigarren proba: praktikoa, plika sistemaren bidez eginen da. Epaimahaiak ezarritako kasu praktiko bat edo gehiago ebatzi beharko dira, eta, horretarako, kasuari buruzko oharrak egin, iritzia eman edo irizpenak eman beharko dira I. eranskineko gaiei dagozkien alderdi juridikoei buruz. Proba egiteko 2 ordu izanen dira, gehienez ere.
Izangaiek kalkulagailua eta lege testuak erabiltzen ahalko dituzte, paperezko euskarrian, baldin eta horietan zuzenbide positiboaz besteko eduki gehigarririk ez badago. Ondorio horietarako, ez dira eduki gehigarritzat joko indizeak eta oin-oharrak, beste arau batzuetara eginiko igorpenak eta erreferentziak dituztenak. Aitzitik, ez dira onartuko jurisprudentziari edo administrazio-doktrinari eginiko aipamenak dauzkaten konpilazioak edo testuak, edo doktrinaren gaineko iruzkinak edo oposiziogileak berak egindako oharrak dauzkatenak. Epaimahaiak eskubidea izanen du edozein unetan izangaien testuak berrikusi eta kentzeko, baldin eta paragrafo honetan xedatutakoari kontra egiten badiote. Ezin izanen da beste edozein testu edo dokumentazio kontsultatu, ezta gailu elektronikorik edo bestelako materialik erabili ere, mutur lodiko boligrafo urdina edo beltza izan ezik.
Proba honi dagokion puntuazioa 25 puntukoa izanen da gehienez ere. Bazterturik geldituko dira proba honetan ezarritako gehieneko puntuen %30 gutxienez lortzen ez duten izangaiak.
6.2. Probarako dei bakarra eginen da. Parte-hartzaileek nortasun agiri nazionala, pasaportea, gidabaimena edo epaimahaiak askiesten duen beste nortasun agiri bat eraman beharko dute probara. Nor diren frogatzen ez dutenak edo agertzen ez direnak baztertuta geldituko dira.
6.3. Proba egiteko, bidezkoak diren denbora eta baliabide egokitzapenak eginen dira desgaitasun aitorturen bat dutenentzat, eskabidean eskatu badute.
Zazpigarrena.–Emaitzak.
7.1. Probaren kalifikazioa bukatu ondoren, epaimahaiak www.nafarroa.eus webgunean (deialdiaren fitxan) argitaratuko ditu izangaiek lortutako puntuazioak, eta bost egun balioduneko epea ezarriko du interesdunek eskubidezkotzat jotzen duten guztia alega dezaten telematika bidez.
7.2. Behin alegazioetarako epea iraganik, eta horiek ebatzirik, parte-hartzaileen artean berdinketarik izanez gero, kalifikazio epaimahaiak irizpide hauen arabera jokatuko du:
puntuetan berdinketarik gertatuz gero, kasuan kasuko deialdian eskabideak aurkezteko epea bukatzen den egunean izangaiek aitorturik daukaten antzinatasunaren arabera ebatziko da. Berdinketak jarraituz gero, kalifikazio epaimahaiak eginen duen berariazko zozketa bakar baten bidez ebatziko da. Berdindutako izangai guztien artean, bat ausaz hautatuko da. Berdinketa guztiak hurrenkera alfabetikoari jarraikiz deseginen dira, abiapuntu harturik zozketa horretan hautatzen den izangaiaren abizenak eta izena.
7.3. Jarritako alegazioak eta berdinketak ebatzita, epaimahaiak www.nafarroa.eus helbidean argitaratuko du prestakuntzarako zerbitzu berezietan aritzeko izangaiak hautatzeko deialdia gainditu duten pertsonen zerrenda, lotutako guztizko puntuazioaren arabera ordenatuta.
7.4. Oinarri honetan ezarritako jarduketak bukaturik, epaimahaiak Funtzio Publikoko zuzendari nagusiari igorriko dio proba gainditu duten izangaien zerrenda, onets ditzan. Zerrendekin batera, hautapen prozesuaren espediente osoa ere bidaliko dio.
Zortzigarrena.–Ogasuneko teknikariaren lanpostuan aritzeko izangaien zerrendak eta deia.
8.1. Hautapen prozesuaren espediente osoa jasota, Funtzio Publikoko zuzendari nagusiaren ebazpen bidez onetsiko da izangaien zerrenda. Ebazpen hori www.nafarroa.eus helbidean argitaratuko da.
8.2. Izangaiak prestakuntzan aritzeko deia eta, hala badagokio, prestakuntzarako zerbitzu berezietako egoeraren deklarazioa honako hauetan ezarritakoaren arabera eginen dira: apirilaren 14ko 96/1997 Foru Dekretua; Lehendakaritza, Justizia eta Barneko kontseilariaren abenduaren 30eko 199/2004 Foru Agindua, prestakuntzarako lanpostuetan aritzeko izangaien zerrendak osatu eta kudeatzeko prozedura ezarri zuena; eta aplikatzekoak diren gainerako arauak.
8.3. Lanerako deia jasotzen dutenek eskatutako betebeharrak betetzen dituztela frogatzeko agiriak aurkeztu beharko dituzte; horretarako, lizentziadun, ingeniari, arkitekto edo gradudun unibertsitateko tituluaren fotokopia aurkeztu beharko dute, edo horien baliokidetzat hartutako beste batena, edo titulua eskuratzeko eskubideak ordaindu izanaren gordekinarena, edo, bestela, eskabideak aurkezteko epea bukatu baino lehen titulua lortzeko moduan egon izanaren gaineko ziurtagiria.
Eskatutako baldintzak betetzen ez dituzten izangaiak hautapen prozesutik baztertu eginen dira, Funtzio Publikoko zuzendari nagusiaren ebazpen baten bidez, eta deialdi honetan parte hartzeagatik izan ditzaketen eskubide guztiak galduko dituzte.
Era berean, egiaztatu beharko dute betetzen dituztela, hala badagokio, deialdiarekin bete nahi den lanpostuaren betebehar espezifikoak.
Izangaiek aurkezten dituzten agiriek ez dute zertan izan jatorrizkoak edo fotokopia konpultsatuak; hortaz, agiri horien fotokopia arruntak aurkezten ahalko dira. Hala ere, Administrazioak noiznahi eskatzen ahalko dizkie izangaiei aurkeztutako agirien jatorrizkoak edo fotokopia konpultsatuak.
Bederatzigarrena.–Gehieneko denbora prestakuntzarako zerbitzu berezietan.
4 urteko bigarren prestakuntzaldian sartzen diren izangaiak ezin dira 10 urte baino gehiago egon prestakuntzarako zerbitzu berezietan, epe horretan lanpostu batean baino gehiagotan aritzen badira ere.
Prestakuntzarako zerbitzu berezietan 6 urte bitarte egoteko eskubidea duten izangaiek ezin izanen dute gehieneko epe hori gainditu, epe horretan lanpostu batean baino gehiagotan aritzen badira ere.
Hamargarrena.–Errekurtsoak.
Kalifikazio epaimahaiak ematen dituen egintzen eta ebazpenen kontra gora jotzeko errekurtsoa jartzen ahalko da, Funtzio Publikoko zuzendari nagusiari zuzendua, hilabeteko epean, errekurritu nahi den egintza argitaratu edo jakinarazi eta biharamunetik hasita.
Deialdien, oinarrien eta haiek aplikatzeko egintzen kontra, kalifikazio epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Barneko, Funtzio Publikoko eta Justiziako kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik hasita.
Hori guztia bat etorriz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 126. artikuluan xedatutakoarekin, eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.
I. ERANSKINA.–GAI-ZERRENDA
1. gaia.–Estatuaren eta Nafarroako Foru Komunitatearen arteko hitzarmen ekonomikoa. 28/1990 Foru Legea, abenduaren 26koa.
2. gaia.–13/2000 Foru Lege Orokorra, abenduaren 14koa, Tributuei buruzkoa.
3. gaia.–Pertsona fisikoen errentaren gaineko zerga. Pertsona Fisikoen Errentaren gaineko Zergari buruzko Foru Legearen testu bategina. 4/2008 Legegintzako Foru Dekretua, ekainaren 2koa.
4. gaia.–Pertsona fisikoen errentaren gaineko zerga. Pertsona Fisikoen Errentaren gaineko Zergari buruzko Erregelamendua. 174/1999 Foru Dekretua, maiatzaren 24koa.
5. gaia.–Ondarearen gaineko zerga. 13/1992 Foru Legea, azaroaren 19koa.
6. gaia.–Sozietateen gaineko Zerga. 26/2016 Foru Legea, abenduaren 28koa.
7. gaia.–Sozietateen gaineko Zerga. Sozietateen gaineko Zergaren Erregelamendua. 114/2017 Foru Dekretua, abenduaren 20koa.
8. gaia.–Ez-egoiliarren errentaren gaineko zerga. Ez-egoiliarren Errentaren gaineko Zergari buruzko Legearen testu bategina. 5/2004 Legegintzako Errege Dekretua, martxoaren 5ekoa.
9. gaia.–Oinordetzen eta dohaintzen gaineko zerga. Oinordetzen eta dohaintzen gaineko zergari buruzko xedapenen testu bategina onesten duen abenduaren 16ko 250/2002 Legegintzako Foru Dekretua.
10. gaia.–Balio erantsiaren gaineko zerga. 19/1992 Foru Legea, abenduaren 30ekoa.
11. gaia.–Balio erantsiaren gaineko zerga. Balio Erantsiaren gaineko Zergari buruzko 37/1992 Legearen artikulu hauek (araubide erkidea): 3.a, 17.etik 19.era bitartekoak, 27.etik 72.era bitartekoak, 77.a, 83.a, 86.a, 177.bis-etik 119.bis-era bitartekoak, 167.a eta V. eranskina.
12. gaia.–Balio erantsiaren gaineko zerga. Balio Erantsiaren gaineko Zergaren erregelamendua. 86/1993 Foru Dekretua, martxoaren 8koa.
13. gaia.–Ondare eskualdaketen eta egintza juridiko dokumentatuen gaineko zerga. 129/1999 Legegintzako Foru Dekretua, apirilaren 26koa, Zergari buruzko xedapenen testu bategina onesten duena.
14. gaia.–Zerga bereziak. 20/1992 Foru Legea, abenduaren 30ekoa.
15. gaia.–Zerga bereziak. 38/1992 Legea, abenduaren 28koa, Lurralde erkidean zerga bereziak arautzeari buruzkoa.
16. gaia.–Energia elektrikoaren ekoizpenaren balioaren gaineko zerga. 11/2015 Foru Legea, martxoaren 18koa.
17. gaia.–Berotegi efektuko gas fluordunen gaineko zergak. 11/2015 Foru Legea, martxoaren 18koa.
18. gaia.–Berrerabili ezin diren plastikozko ontzien gaineko zerga bereziak. 14/2023 Foru Legea, apirilaren 5ekoa.
19. gaia.–Finantza transakzioen gaineko zergak. 37/2022 Foru Legea, abenduaren 28koa.
20. gaia.–Zenbait zerbitzu digitalen gaineko zergak. 38/2022 Foru Legea, abenduaren 28koa.
21. gaia.–Kooperatiben zerga araubidea. 9/1994 Foru Legea, ekainaren 21ekoa.
22. gaia.–Fundazioen eta irabazi-asmorik gabeko bestelako entitateen zerga-araubide berezia eta mezenasgorako zerga-pizgarriak. 2/2023 Legegintzako Foru Dekretua, maiatzaren 24koa.
23. gaia.–Nafarroako Foru Komunitateko Diru-bilketaren Erregelamendua. 177/2001 Foru Dekretua, uztailaren 2koa.
24. gaia.–Nafarroako Foru Komunitateko Administrazioaren Tributu Ikuskapenari buruzko Erregelamendua. 152/2001 Foru Dekretua, ekainaren 11koa.
25. gaia.–Zerga gaietako diru-sarrera bidegabeak nola itzuli eta tributupekoen tributu jarduketen gaineko zuzenketa eskaeren, inpugnazioen eta eztabaiden arautzea. 188/2002 Foru Dekretua, abuztuaren 19koa.
26. gaia.–Tributuei buruzko Foru Lege Orokorra bide administratiboan egintzak berrikusteko arloan garatzeko erregelamendua. 85/2018 Foru Dekretua, urriaren 17koa.
Oharra: gai guztiak deialdi hau Nafarroako Aldizkari Ofizialean argitaratzen den egunean indarra duen legediaren arabera eskatuko dira.
Iragarkiaren kodea: F2409969
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50
