2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
IGUZKITZA
Iguzkitzako Kontzejuaren kudeaketa-esleipena, administrazio-kudeaketarako
Sektore Publikoaren Araubide Juridikoari buruzko urriaren 1eko 40/2015 Legearen 11.3.b) artikuluan ezarritakoari jarraikiz, eta bi alderdiek 2024ko otsailaren 29an sinatu ondotik, argitara ematen da Nafarroako Aldizkari Ofizialean Iguzkitzako Kontzejuaren eta Iguzkitzako Udalaren arteko kudeaketa-esleipenaren hitzarmena, eranskinean agertzen baita.
Iguzkitzan, 2024ko ekainaren 25ean.–Alkatea, Miguel Ábrego Bujanda.–Kontzejuko burua, Raúl Galdeano Álvarez.
KUDEAKETA-ESLEIPENAREN HITZARMENA, IGUZKITZAKO KONTZEJUAREN ETA IGUZKITZAKO UDALAREN ARTEAN, ADMINISTRAZIO-KUDEAKETARAKO
Iguzkitzan, 2024ko otsailaren 29an.
BILDURIK:
Alde batetik: Miguel Ábrego Bujanda, Iguzkitzako Barrutiko Udaleko alkate udalburua den aldetik, 2023ko ekainaren 17ko erabakiaren bidez ahaldundua.
Bestetik, Raúl Galdeano Álvarez, Iguzkitzako Kontzejua ordezkatuz, P3149900G IFK duena eta helbidea Iguzkitzan.
Noren izenean ari diren kontuan hartuz, bi alderdiek elkarri aitortzen diote hitzarmen hau sinatzeko gaitasun juridikoa, eta, beraz,
ADIERAZTEN DUTE:
Lehendabizikoa.–Sektore Publikoaren Araubide Juridikoari buruzko urriaren 1eko 40/2015 Legearen 11. artikuluak xedatzen duenez, administrazio organoen edo zuzenbide publikoko entitateen eskumeneko jarduera material edo teknikoak administrazio bereko edo beste bateko organo edo zuzenbide publikoko entitate bati esleitu ahal izanen zaizkio, jarduera horiek haien eskumenen barruan badaude, dela eraginkorragoak izateko, dela jarduera horietarako baliabide tekniko egokiak ez dituztelako.
Kudeaketa-esleipenak ez dakar eskumenaren titulartasuna lagatzea; eta kudeatzeko esleipena ematen duen entitatearen ardura izanen da esleipenean emandako jarduera material zehatzari oinarria emanen dioten edo hura barne hartuko duten egintza edo erabaki juridiko guztiak hartzea.
Kudeaketa-esleipena administrazio desberdinetako organoen artean egiten denean, administrazio horien arteko hitzarmena sinatuta formalizatuko da.
Nolanahi ere, kudeaketa-esleipena formalizatzeko tresna eta bere ebazpena dagokion aldizkari ofizialean argitaratu behar dira, eraginkorra izan dadin.
Bigarrena.–Iguzkitzako Udalak bere eskumeneko gaiak kudeatzen ditu Azketan dituen udal bulegoetan eta baliabide informatiko nahikoak eta eguneratuak ditu, baita administrazio-kudeaketan espezializatutako langileak ere.
Hirugarrena.–Iguzkitzako Kontzejuak bere eskumeneko gaien administrazioa kudeatu behar du, baina ez dauka bide teknikorik, ezta azpiegiturarik ere, eskumena erabiltzeko.
Horregatik guztiagatik, kudeaketa-esleipenaren hitzarmen hau sinatzea erabaki dute, lege hauetan ezarritako esparruaren barruan: Sektore Publikoaren Araubide Juridikoari buruzko urriaren 1eko 40/015 Legea, Toki-araubidearen Oinarriei buruzko Foru Legea, eta Nafarroako Toki Administrazioari buruzko 6/1990 Foru Legea; klausula hauen arabera.
KLAUSULAK
Lehenbizikoa.–Hitzarmen honen helburua da kudeaketa-esleipena eratzea Iguzkitzako Udalaren eta Iguzkitzako Kontzejuaren artean, Sektore Publikoaren Araubide Juridikoari buruzko Legearen 11. artikuluaren, Toki-araubidearen Oinarriei buruzko Legearen eta Toki Administrazioari buruzko Legearen babespean.
Bigarrena.–Iguzkitzako Kontzejuak Iguzkitzako Udalaren esku uzten du ohiko administrazioaren kudeaketa, eta horrek honako jarduketa hauek dakartza:
1. Agiri guztien sarrera eta irteera erregistroa: posta arrunta eta posta elektronikoa kudeatzea.
2. Telefono bidezko arreta eta aurrez aurrekoa, Iguzkitzako Udalaren bulego ordutegi berean.
3. Kontzejuaren aktak idaztea eta dagozkion erabakien bidalketak kudeatzea.
4. Herri-ondasunak eta ondare-ondasunak kontratatzeko espedienteak egitea.
5. Likidazioak, kobrantzak eta kudeaketa Kontzejuaren ondareari dagokion guztian.
6. Obra eta hornidurak adjudikatzeko espedienteak egitea.
7. Berezko araudia idaztea: ordenantzak, erregelamenduak eta horiek betetzea.
8. Kontzejuaren intereseko gai guztien gaineko informazioa: kartelak prestatzea, zirkularrak, laguntzak eta dirulaguntzak.
Hirugarrena.–Finantzaketa eta ordaintzeko modua: Iguzkitzako Udalari agindutako lan guztien balorazioa, 7.260 eurokoa da, gehienez ere, honela banakatuta:
1. Iguzkitzako Udaleko langileei soldata osagarria ordaintzea beren eginkizunak handitu direlako: 6.000 euro.
2. Gizarte Segurantzako enpresa kuota ordaintzea: 1.260 euro.
3. Kopuru horiek Iguzkitzako Kontzejuak ordainduko dizkio Iguzkitzako Udalari, 9200 4622000 aurrekontuko partidaren kontura, ("Udalari ordaintzea, administrazio-kudeaketako lanak egiteagatik"), banku transferentzia eginez sei hilean behin, dagokion likidazioa aurkeztu ondoren, urtero agindutako lanak amaitu ondoren, eta idazkari kontu-hartzaileak aldeko txostena eman ondoren.
Laugarrena.–Jarraipen-batzordea: Kudeaketa-hitzarmen honetan ezarritako neurrien betearazpenaren jarraipena antolatzeko eta interpretatzeko, jarraipen-batzorde bat sortuko da, honako osaera eta eginkizun hauekin:
Osaera: Udaleko alkatea eta Kontzejuko burua.
Eginkizunak: agindutako lanak behar bezala egiten diren berrikustea.
Batzorde honen funtzionamenduari buruz berariaz jaso ez den guztian, aplikatuko dira Administrazio Publikoen Araubide Juridikoari buruzko Legearen atariko tituluaren II. kapituluaren 3. atalean ezarritako arauak (kide anitzeko organoei buruzkoak).
Bosgarrena.–Kudeaketa-esleipen honek ez dakar Iguzkitzako Kontzejuaren titulartasuneko eskumenak lagatzea, ezta eskumen horretaz baliatzeko funtsezko elementuak lagatzea ere.
Seigarrena.–Hitzarmen honetako edozein klausula ez betetzeak hura suntsitzea ekar dezake.
Zazpigarrena.–Hitzarmen honek gehienez ere lau urteko iraupena izanen du, sinatzen den egunetik zenbatzen hasita, eta automatikoki berrituko da lau urteko aldietan, sinatzen den egunetik zenbatzen hasita, alderdietako batek hitzarmenaren edo haren edozein luzapenen epemuga baino hilabete lehenago berariaz salatzen ez badu.
Zortzigarrena.–Aldaketa: Kudeaketa-esleipenari buruzko akordio hau aldatzen ahalko da, bi alderdiak ados jarrita.
Bederatzigarrena.–Hitzarmen honek izaera administratiboa du, ondorio guztietarako.
Eta ados daudela erakusteko, bi aldeek hitzarmen hau sinatu dute goian aipatutako tokian eta egunean.
Iragarkiaren kodea: L2410078
