148. ALDIZKARIA - 2024ko uztailaren 19a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

202E/2024 EBAZPENA, ekainaren 27koa, Landa Garapeneko zuzendari nagusiak emana, "Nafarroako nekazaritzako elikagaien kalitate figuren, BJD edo AGB gisa aitortuta edo aitortzeko prozesuan daudenen, kontrol eta ziurtapen jardueretarako laguntzen" 2024ko oinarri arautzaileak eta deialdia onesten dituena. Laguntza horiek "de minimis" araubidearen babesean emanen dira. DDBN identifikazioa: 771322.

Elikadura produktuen, edari hordigarrien eta ardogintzako produktuen jatorri deitura eta adierazpen geografiko babestuetarako esparru juridikoa erkidegoko arau hauetan ezarrita dago, hurrenez hurren: Europako Parlamentuaren eta Kontseiluaren apirilaren 11ko 2024/1143 (EB) Erregelamendua, ardoen, edari hordigarrien eta nekazaritzako produktuen adierazpen geografikoei, eta espezialitate tradizional bermatuei nahiz nekazaritza produktuen kalitate araubideari buruzkoa, zeinaren bidez aldatzen baitira 1308/2013 (EB), 2019/787 (EB) eta 2019/1753 (EB) erregelamenduak eta indarrik gabe uzten baita 1151/2012 (EB) Erregelamendua; Europako Parlamentuaren eta Kontseiluaren 2019/787 (EB) Erregelamendua, zeinaren bidez zehazten baitira edari hordigarrien definizioa, izendapena, aurkezpena eta etiketatzea, beste elikagai batzuen aurkezpen eta etiketatzeetan edari hordigarrien izenak erabiltzeko modua, edari hordigarrien adierazpen geografikoen babesa, eta alkohol etilikoaren eta nekazaritzatik ateratako destilatuen erabilera, eta indarrik gabe uzten baita 110/2008 (EB) Erregelamendua; eta Europako Parlamentuaren eta Kontseiluaren 1308/2013 (EB) Erregelamendua, nekazaritzako produktuen merkatuen antolakunde erkidea sortzen duena.

Erregelamendu horietan ezartzen da, Europako Parlamentuaren eta Kontseiluaren 2017ko martxoaren 15eko 2017/625 (EB) Erregelamenduaren 29. artikuluan ezarritakoari jarraikiz, kontrol erakunde batek edo gehiagok egiazta dezaketela operadoreek betetzen ote duten jatorri deitura eta adierazle geografiko babestuen baldintzen agiria, bai eta Europar Batasunaren jatorrizko produktuak izendatzen dituzten espezialitate tradizional bermatuena. UNE-EN ISO/IEC 17065:2012 arauaren araberako akreditazioa izan behar dute aipatu erakundeek. Baldintzen agiria betetzen dela egiaztatzeak eragiten dituen kostuak kontrol horien mende dauden operadoreek ordaintzen ahalko dituzte, eta Batasuneko estatuek ere kostu horiek ordaintzen laguntzen ahalko dute.

Bestalde, Nafarroan, nekazaritzako elikagaien ekoizpenaren sustapena erkidegoko esparru juridikoan onartutako figuren babesa duten kalitateko ekoizpenei bideratuta dago bereziki, eta zuzenean bultzatzen ditu ekoizpen sektore primarioa, nekazaritzako industriaren sektorea eta elikaduraren merkataritzaren azpisektorea, Nafarroako nekazaritzako elikagaien kate osoari behar duen sendotasuna emanez, horrela ziurtatzeko ekoizpen ahalmena mantendu eta garatzen dela, lanpostuak finkatu eta sortzen direla, eta Nafarroako Foru Komunitateko BPGa eratzen laguntzen duela.

Kalitatezko ekoizpenak babestu eta sustatzeko interesaren isla, Nafarroako Gobernuak, besteak beste, elikagaien kalitate figurak kudeatzen dituzten entitateei laguntzeko lerroak ezarri ditu.

Kontuan hartuta Nafarroako kalitate bereiziko ekoizpenek gure nekazaritzako elikagaien sektorearen, lehen mailako ekoizleen, nekazaritzako industriaren sektorearen eta elikaduraren merkataritzaren azpisektorearen gainean duten eragina, beharrezkotzat jotzen da Nafarroako Gobernuaren babesa handitzea kalitate bereiziko figuren kontrol eta ziurtapen jardueretarako laguntzen bidez.

Kalitate figurak kudeatzeko entitateek zenbait jarduera egiten dituzte ekoizleek baldintzen agirian xedatutakoa betetzen dutela bermatzeko. Horretarako, kontrolak egiten dituzte, dela zuzenean –baldin eta kontrol erakunde baimenduak badira–, dela agintaritza eskudunak behar bezala baimendutako kontrol erakundeak kontratatuz.

Mahastizaintza eta ardogintza arautzeari buruzko abenduaren 5eko 16/2005 Foru Legearen arabera Nafarroan onartutako lur-eremuko ardoak berezko berezitasunak dituzten jatorrizko deitura babestuaren forma bat dira. Lur-eremuko ardoek ez dute kudeaketa entitaterik; upategiak berak arduratzen dira agiriak egiaztatzeaz.

Jatorri deituren, adierazle geografikoen eta espezialitate tradizional bermatuen balio erantsia kontsumitzailearen konfiantzan datza. Balio erantsi hori sinesgarria da, bakar-bakarrik, baldin eta horrekin batera ziurtapen eta kontrol sistema eraginkor bat egiten bada.

Xedapen honetan ezarritako laguntzak "de minimis" izaera du, eta Batzordeak 2023ko abenduaren 13an emandako 2023/2381 (EB) Erregelamenduaren aplikazio eremuan sartzen da. Erregelamendu horrek Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko modua arautzen du, eta Europar Batasunaren 2023ko abenduaren 15eko Aldizkari Ofizialean argitaratu zen.

Ebazpen honen bidez ezartzen dira Nafarroako nekazaritzako elikagaien kalitate figuren, BJD edo AGB gisa aitortuta daudenen, kontrol eta ziurtapen jardueretarako laguntzen oinarri arautzaileak, eta, horrekin batera, laguntza horien deialdia onesten da, Nafarroako Foru Komunitatean 2024. urtean egindako jarduerei dagokiena.

Badago halako interes publiko, sozial eta ekonomiko bat dirulaguntza hauek emateko, nekazaritzako elikagaien kalitate figurak Foru Komunitateko titulartasuneko jabari publikoko ondasuntzat jotzen baitira.

Hala, ikusirik Nekazaritzako Ustiategien eta Elikagaien Sustapenerako Zerbitzuko zuzendariak emandako aldeko txostena.

Adierazitakoarekin bat, eta Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legeak eta Landa Garapeneko eta Ingurumeneko Departamentuaren egitura organikoa onesten duen azaroaren 15eko 255/2023 Foru Dekretuak ematen dizkidaten eskudantziak erabiliz,

EBAZTEN DUT:

1. Nafarroako nekazaritzako elikagaien kalitate figuren, BJD edo AGB gisa aitortuta edo aitortzeko prozesuan daudenen, kontrol eta ziurtapen jardueretarako laguntzak, "de minimis" araubidearen babesekoak, emateko oinarri arautzaileak eta, horrekin batera, 2024rako laguntzen deialdia onestea. Oinarri horiek ebazpen honen I. eranskinean jasota daude.

2. Deialdi honen ondoriozko gastuei aurre egiteko, 610.000 euroko gastua baimendu da 2024ko ekitaldian, 2024ko gastu-aurrekontuko partida honen baliokide den partidaren kargura: "720003 72200 4701 413103: "Laguntzak kalitateko ekoizpenen kontrol eta ziurtapen jardueretarako".

3. Laguntzak ebazpen honen I. eranskinaren hamargarren oinarria ezarritakoaren arabera ordainduko dira.

4. Gardentasun betebeharrari buruzko adierazpenaren eredua onestea, bai eta entitatearen gobernu organoen osaerari eta kargudunen ordainsariei buruzko ereduak ere. Gardentasun betebeharrari buruzko adierazpenaren ereduaren I. eta II. eranskinetan daude jasota eredu horiek, eta bederatzigarren oinarrian, 8. puntuan, ezarritako esteken bidez eskura daitezke.

5. Laguntzen deialdi hau eta honi dagozkion oinarri arautzaileak Nafarroako Gobernuaren Dirulaguntzen Datu Basean (NGDDB) erregistratzea.

6. Ebazpen hau eta I. eranskina Nafarroako Aldizkari Ofizialean argitaratzea.

7. Ebazpen honek ez du administrazio bidea amaitzen, eta haren aurka gora jotzeko errekurtsoa jar daiteke, Landa Garapeneko eta Ingurumeneko kontseilariari zuzendua, ebazpen hau Nafarroako Aldizkari Ofizialean argitaratu eta biharamunetik hilabeteko epean.

Iruñean, 2024ko ekainaren 27an.–Landa Garapeneko zuzendari nagusia, Rubén Goñi Urroz.

I. ERANSKINA.–NAFARROAKO NEKAZARITZAKO ELIKAGAIEN KALITATE FIGUREN, BJD EDO AGB GISA AITORTUTA EDO AITORTZEKO PROZESUAN DAUDENEN, KONTROL ETA ZIURTAPEN JARDUERETARAKO LAGUNTZAK EMATEKO OINARRI ARAUTZAILEAK. LAGUNTZAK "DE MINIMIS" ARAUBIDEAREN BABESEAN EMANEN DIRA

Lehen oinarria.–Laguntzaren xedea, onura publikoa eta aplikazio eremua.

1. Oinarri arautzaile hauen xedea da Nafarroako nekazaritzako elikagaien kalitate figuren, BJD edo AGB gisa aitortuta edo aitortzeko prozesuan daudenen, kontrol eta ziurtapen jardueretarako ematen den finantza laguntzaren esparrua definitzea.

2. Batasuneko esparru juridikoan aitortutako figuren babesa duten kalitateko ekoizpenek zuzenean bultzatzen dituzte ekoizpen sektore primarioa, nekazaritzako industriaren sektorea eta elikaduraren merkataritzaren azpisektorea. Hala, Nafarroako nekazaritzako elikagaien kate osoari behar duen sendotasuna ematen zaio, ziurtatua geldi dadin ekoizpen ahalmena mantendu eta garatzen dela, lanpostuak indartu eta sortzen direla, eta Nafarroako Foru Komunitateko BPGa eratzen laguntzen duela.

3. Laguntza hauek bat datoz, batetik, Batzordeak 2023ko abenduaren 13an emandako 2023/2381 (EB) Erregelamenduaren xedearekin, definizioarekin eta aplikazio eremuarekin; erregelamendu horrek, hain zuzen, Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko modua arautzen du. (2023ko L 2831 EBAO, abenduaren 15ekoa).

4. Laguntza lerro hau Nafarroako Gobernuak 2023ko apirilaren 26an hartutako Erabakiaren barruan dago; erabaki horren bidez, Nafarroako Foru Komunitateko Administrazioaren 2023-2025 aldiko Dirulaguntzen Plan Estrategikoa berrikustea eta eguneratzea onartu zen.

Bigarren oinarria.–Entitate onuradunak eta betekizunak.

1. Honako hauek izaten ahal dira laguntza hauen entitate onuradunak:

a) Nafarroako jatorri deitura eta adierazpen geografiko babestuak (BJD eta AGB, hurrenez hurren) kudeatzen dituzten entitateak, aitortuak edo Babes Nazional Iragankorra dutenak, baldintza agiriak betetzeari lotutako kontrol eta ziurtapen jarduerak gauzatzen badituzte beren kabuz, baimendutako kontrol erakundeak diren aldetik, edo baimendutako kanpoko kontrol erakundeak kontratatzen badituzte jarduera horietarako.

b) Aurreko letran aipatutako entitate kudeatzaileak lur-eremuko ardoaren upategiak badira, ardoa beren BJDan ziurtatuta izan beharko dute 2022. edo 2023. urteetan, eta kontrol eta ziurtapen jarduerak kontratatuta izan beharko dituzte, kanpoko kontrol erakunde baimenduei baldintza agiriak betetzeari dagokionez.

c) Nafarroan kokatuak eta legez eratuak egonik, kalitate figuren elaborazioa eta merkaturatzea bultzatzeko, sustatzeko, defendatzeko eta zabaltzeko helburua duten enpresak, BJD edo AGB bat aitortzeko prozesua hasia badute; kasu horretan, laguntzak erabiliko dira elkartea BJD edo AGB baten funtzionamendu ereduaren ondoriozko eginbeharretara egokitzeko zerbitzuak kontratatzeko.

2. Onuradun izan nahi duten pertsona edo entitate eskatzaileek betekizun hauek bete beharko dituzte:

a) Zerga betebeharrak eta Gizarte Segurantzakoak eguneratuak izatea.

b) Urteko aurrekontua 2,5 milioi eurotik beherakoa duten kudeaketa entitateek baizik ez dute lortzen ahalko laguntza hau.

c) Dirulaguntzei buruzko azaroaren 9ko 11/2005 Foru Legearen 13. artikuluan aipatzen diren egoeretako batean dauden pertsona eta entitateak ezin izanen dira ebazpen honen xede diren dirulaguntzen onuradun izan.

d) Ezin izanen dute laguntzarik eskuratu sexuan edo generoan oinarritutako diskriminaziotzat hartutako lan praktikak egiteagatik edo onartzeagatik, administrazio ebazpen irmo edo kondena-epai irmo baten bidez, zehapena edo zigorra jaso duten entitate eskatzaileek.

e) Aurreko letran aipatutako egoeran dauden entitateak laguntza horien onuradun izaten ahalko dira berriz, baldin eta ezarritako zehapena edo zigorra beteta badute eta berdintasun plan bat prestatu badute indarreko legerian ezarritako baldintzetan, halakorik exijitzen ahal bazaie.

Hirugarren oinarria.–Gastu diruz lagungarriak.

1. Diruz lagungarriak izanen dira entitate onuradunek 2024ko urtarrilaren 1etik abenduaren 31ra bitartean egiten dituzten gastuen %100era arte, baldin eta gastu horiek egiten badira kanpoko zerbitzu profesionalak kontratatzeko baldintza-agiriak betetzen direla egiaztatzeko –baldintza-agiriak arautzen dituzten Europako araudien arabera–, Kontseilu Arautzailearen Idazkaritza Teknikoaren jarduerak egiteko, eta erregistroak mantentzeko, bai eta kontrol eta ziurtapen jarduerekin zuzenean lotutako langileei ordaintzeko ere, betiere egindako kontrol eta ziurtapen jardueren gastu hautagarri guztiaren %15, gehienez ere. Azken jarduera horiei dagokienez, pertsona horiek egiaztagiri bat aurkeztu beharko dute ekintza planeko jarduera horietan zer dedikazio izan duten, zenbat denbora igaro duten edo zer funtzio izan duten adierazteko.

2. Bigarren oinarriko 1.c) atalean adierazitako entitateen kasuan, diruz lagungarriak izanen dira, orobat, 2024ko urtarrilaren 1etik 2024ko abenduaren 31ra bitartean kanpoko zerbitzu profesionalak kontratatzeko egiten dituzten gastuak, zerbitzu horien xedea baldin bada elkartea eta operadoreak egokitzea BJD edo AGB baten funtzionamendura, eta, bereziki, aholkularitza ematea aitortze prozesuan dagoen kalitate figuraren baldintza-agiria betetzeari buruz, erregistroen kudeaketari buruz eta elkarteak kalitate bereiziko figura bat kudeatzeko organo gisa izan behar duen funtzionamenduari buruz.

3. Eskuordetutako kontrol eta ziurtapen organoek Europako arauaren arabera akreditatuak egon beharko dute. UNE-EN ISO/IEC 17065:2012. BJD edo AGB baten aitortze prozesuan dauden elkarteei aholkularitza zerbitzuak ematen dizkieten entitateek Europako arauaren arabera akreditatuak egon beharko dute. UNE-EN ISO/IEC 17065:2012 Nafarroako kalitate figuraren batean.

4. Dirulaguntzei buruzko 11/2005 Foru Legearekin bat etorriz, gastu diruz lagungarria 12.000 eurotik gorakoa denean, onuradunak, hiru eskaintzatan oinarrituta, frogatu beharko du hornitzailea efizientziaren eta ekonomiaren irizpideen arabera hautatu dela; bestela, frogatu beharko du zergatik ezin diren irizpide horiek aplikatu.

5. Ez dira diruz lagungarritzat jotzen eta, hortaz, ezin dira aukeratu, ez balio erantsiaren gaineko zerga (BEZa), ezta beste zerga batzuk ere, salbu eta, foru araudiarekin bat, balio erantsiaren gaineko zerga berreskuratu ezin duten onuradunen kasuan. Horri dagokionez, entitate eskatzaileek salbuespen horri heltzeko asmoa dutela adierazi behar dute laguntza eskabidean, bai eta baldintza hori betetzetik salbuetsiak izanaren justifikazioa aurkeztu ere.

Laugarren oinarria.–Laguntzaren zenbatekoa.

1. Onuradun bakoitzari aplika dakiokeen laguntzaren zenbatekoa kalkulatzeko, oinarri honen 2. zenbakian aurreikusitakoa eskaturiko gastu hautagarriaren zenbatekoari aplikatzetik ateratzen den ehunekoa aplikatuko zaio. Ordaindu beharreko azken laguntza, exekuzioa justifikatzen duten fakturen arabera egokituko da. Beste autonomia erkidego batzuetan ere ezarrita dauden kalitate figuren kasuan, diruz lagungarria izan daitekeen gastua gutxituko da, Nafarroan ziurtatutako produktuak kasuan kasuko kalitate figura osoarekin alderatuta daukan pisuaren edo bolumenaren arabera. Horretarako, deialdia argitaratzen denean bukatu den azken kanpainako datuak hartuko dira aintzat.

2. Oro har, laguntzaren portzentajea %51koa izanen da, eta laguntzaren intentsitatea %66tik gorakoa izan gabe gehituko da honako egoera hauetan:

–Behi eta ardi haragien abeltzaintza produkzioetako kalitate figurei dagokienez, ehuneko 15 puntu gehiago.

–Aitortutako edo aitortzeko prozesuan dauden kalitate figuren kasuan, babes nazional iragankorra onartu zenetik hiru urte igaro ez badira, ehuneko 10 gehiago.

3. Onuradun bakoitzaren laguntza gehienez ere 100.000 euro izanen da. Enpresa bakoitzari ematen ahal zaion "de minimis" laguntza gehienez ere 300.000 eurokoa izanen da hiru ekitaldi fiskaletako edozein alditan, eta, hala badagokio, deialdi honen arabera ordaindu beharreko laguntza muga horretara egokituko da.

Bosgarren oinarria.–Dirulaguntza emateko modua.

1. Ebazpen honek arautzen dituen laguntzak norgehiagokako prozeduraren bidez emanen dira.

2. Hauek izanen dira eskaerak lehenesteko irizpideak:

–Lehendabizi, kalitate figurak kudeatzeko entitate aitortuak edo babes nazional iragankorra dutenak, jardun esparru geografikotzat Nafarroa soilik dutenak.

–Bigarrenik, aitortzeko prozesuan dauden elkarteak, bigarren oinarriko 1. zenbakiko c) letran adierazitakoaren arabera.

–Hirugarrenik, kalitate figurak kudeatzeko entitateak, ziurtatutako ekoizpenaren %75 baino gehiago Nafarroan sortu dutenak.

–Laugarrenik, kalitate figurak kudeatzeko entitateak, ziurtatutako ekoizpenaren %25 eta %50 artekoa Nafarroan sortu dutenak.

3. Eskaerak aurreko puntuaren arabera ordenatu ondoren, aurrekontua banatuko da, lehendabizi, lehentasun handieneko taldeko eskaeren artean. Talde bateko eskaeren artean berdinketa izanez gero, operadore erregistratu gehien dituen kudeaketa entitateak egindako eskaerari erantzunen zaio.

4. Gertatzen bada deialdiko aurrekontuko kreditua aski ez izatea laguntzarako eskubidea daukaten eskaera guztiei dirulaguntza emateko, ebaketa pasatzen duen azken espedienteari emanen zaion laguntzaren zenbatekoa izanen da lehentasun handiena duten eskaerei aurreko puntuetan ezarritakoaren arabera erantzun ondoren geratzen dena, eta deialdirako baimendutako gehienekoa gainditu gabe, betiere.

Seigarren oinarria.–Eskaerak aurkeztea.

1. Entitate eskatzaileek laguntza eskaerak aurkezteko epea hilabetekoa izanen da, ebazpen hau Nafarroako Aldizkari Ofizialean argitaratu eta biharamunetik aurrera zenbatuta.

2. Eskaerak Landa Garapeneko eta Ingurumeneko Departamentuko Nekazaritzako Ustiategien eta Elikagaien Sustapenerako Zerbitzuari zuzenduko zaizkio, eta bitarteko elektronikoen bidez baino ezin izanen dira aurkeztu, Nafarroako Foru Komunitateko Administrazioaren erregistro orokor elektronikoaren bitartez, bat etorriz Administrazio Publikoen Administrazio Prozedura Erkideari buruzko urriaren 1eko 39/2015 Legearen 14.2 artikuluarekin.

3. Eskaera berariaz prestatutako ereduan aurkeztuko da (eredua eskura daiteke Nafarroako Gobernuaren Interneteko Atariko Zerbitzuen Katalogoan, www.nafarroa.eus helbidean), honako agiri hauekin batera:

a) Diruz lagungarria den epean (hau da, 2024ko urtarriletik abendura bitartekoan) kudeaketa entitateek egindako kontrol eta ziurtapen zerbitzuen kostuen fakturak, proformakoak edo benetakoak.

b) Kontrol entitatea akreditatzeko azken ziurtagiriaren kopia, UNE-EN ISO/IEC 17065:2012 arauaren araberakoa. Kontrol entitatea akreditatzeko prozesuan baldin badago, dagokion baldintza agirirako akreditazio eskaeraren kopia ziurtatua edo agiri baliokidea aurkeztu beharko da; eskaerak akreditazio erakunde nazionalak onartua egon behar du, eta espediente zenbakia esleitua izan behar du.

c) Zerga arloko eta Gizarte Segurantzarekiko betebeharrak egiaztatzeko baimena, hitzez hitz honako hau dioena: "Nik, XXX naizen honek, nire izenean / XXXX ordezkatuz, baimena ematen diot Landa Garapeneko eta Ingurumeneko Departamentuari nik neuk / ordezkatzen dudan entitateak egunean dituela zerga betebeharrak eta Gizarte Segurantzarekiko betebehar guztiak, betiere Nafarroako nekazaritzako elikagaien kalitate figurak kudeatzeko entitateei kontrol eta ziurtapen jardueretarako "de minimis" laguntzak emateko deialdia tramitatzeko prozeduraren ondorioetarako".

Aurreko paragrafoan ezarritakoarekin ados ez badago, pertsonak edo entitateak berak aurkeztu beharko ditu zerga arloko eta Gizarte Segurantzarekiko betebeharrak betetzeari buruzko datuak.

d) Idatzizko edo bitarteko elektronikoen bidezko adierazpen bat, hiru urteko edozein alditan jasotako beste edozein "de minimis" laguntzei buruzkoa, hau da, erregelamendu honi nahiz beste "de minimis" erregelamendu batzuei lotuak aintzat hartuta.

e) Eskatzaileak idatziz edo euskarri elektronikoan egindako adierazpen bat, helburu bererako eskatutako bestelako dirulaguntza publikoei buruzkoa.

f) Adierazpen bat, dirulaguntzei buruzko 11/2005 Foru Legearen 13. artikuluan ezarritako baldintzak betetzeari buruzkoa.

g) Beste autonomia erkidego batzuetan ere ezarrita dauden kalitate figuren kasuan, eskuragai dagoen azken kanpainan Nafarroan ziurtatutako produktuak kasuan kasuko kalitate figura osoarekin alderatuta daukan pisuari edo bolumenari buruz egindako ziurtagiria.

h) Entitatearen 2024. urteko sarreren eta gastuen aurrekontu onartua, behar bezala sinatua eta zigilatua, non kontrol eta ziurtapen lanetarako aurreikusitako gastuak egiaztatuko diren.

i) Erantzukizunpeko adierazpena, zehazten duena ez dagoela zehapen administratiborik edo kondena-epairik betetzen, edo, hala bada, ez dagoela zehapen eta kondena-epai bat bete zain, sexuan edo generoan oinarritutako diskriminazioa dakarten lan arloko jardunbideak gauzatu edo toleratzeagatik.

j) Nafarroako Foru Komunitateko Administrazioak agiri horietakoren bat baldin badu jadanik, interesdunak, nahi izanez gero, eskabidean hala azaldu beharko du, adieraziz zein agiri den eta zein artxibotan dagoen. Agiriak datu babestuak baldin baditu, eskatzaileak baimena eman beharko dio Landa Garapeneko eta Ingurumeneko Departamentuari datu horiek ikusteko.

4. Onuradunak nahi badu laguntza zuzenean ordaintzea zerbitzuak ematen dituen entitateari, berariaz adierazi beharko du eskaera-orrian.

Zazpigarren oinarria.–Ebaluazio organoa.

Nekazaritzako Elikagaien Kalitatearen eta Sustapenaren Atalak ebaluatuko ditu eskaerak.

Zortzigarren oinarria.–Deialdiaren antolamendua, instrukzioa eta ebazpena.

1. Eskaera harturik, seigarren oinarrian aipatzen den dokumentazio guztia aurkeztu ote den egiaztatuko da. Dokumentazio guztia ez badago, eskatzaileari eskatuko zaio gehienez ere hamar eguneko epean osatu dezala, eta adieraziko zaio, hala egin ezean, eskaeran atzera egin duela ondorioztatuko dela, eta espedientea artxibatzeko ebazpena emanen dela. Ebazpen hori jakinarazi eginen zaio.

2. Agiri guztiak bildu ondoren, baldintza guztiak betetzen dituztela egiaztatuko da. Horretarako, bidezko diren kontrolak egiten ahalko dira.

3. Eskaerak ebaluatu ondoren, Nekazaritzako Ustiategien eta Elikagaien Sustapenerako Zerbitzuak dirulaguntza emateko ebazpena proposatuko du.

4. Araubide honen araberako laguntzak emanen dira, bakar-bakarrik, behin organo kudeatzaileak frogatu ondoren kasuan kasuko enpresari emandako "de minimis" laguntzen zenbateko osoak ez duela gainditzen 300.000 euroko muga hiru ekitaldi fiskaleko edozein alditan eta, orobat, 407/2831 (EB) Erregelamenduan ezarritako baldintza guztiak betetzen direla (Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeari buruzko Erregelamendua). Kontuan hartu beharreko hiru urteko aldia etengabe ebaluatu behar da, eta, "de minimis" laguntza bat ematen den bakoitzean, aurreko hiru urteetan emandako "de minimis" laguntzen zenbateko osoa hartuko da kontuan.

5. Landa Garapeneko zuzendari nagusiak ebazpen arrazoitua emanen du laguntzak emateari buruz, eta espresuki adieraziko du zer eskaera ezetsi diren.

6. Prozeduraren gainean ebazteko, 30 eguneko epea izanen da, eskaerak aurkezteko epea bukatzen denetik hasita. Epea berariazko ebazpenik eman gabe bukatzen bada, eskaera ezetsitzat jotzen ahalko da, isiltasun administratiboaren ondorioz.

Bederatzigarren oinarria.–Onuradunen betebeharrak.

1. Ekintzak ebazpen honetan xedatzen denarekin bat gauzatzea, eta bertan eta laguntza emateko ebazpenean adierazten diren betebeharrak betetzea.

2. Hartutako funtsak dirulaguntzak emateko oinarri izan zen helbururako eta ezarritako moduan eta epeetan erabili direla frogatzea Landa Garapeneko eta Ingurumeneko Departamentuan, baita zer gastu egin diren ere hartutako funtsak aplikatuz.

3. Laguntza egoki eman dela egiaztatzeko behar diren kontrolak onartzea.

4. Helburu bererako beste dirulaguntza publiko batzuk eskatu edo jaso badira, horren berri ematea Landa Garapeneko eta Ingurumeneko Departamentuari.

5. Zerga betebeharrak eta Gizarte Segurantzarekikoak egunean izatea.

6. Jasotako funtsen aplikazioari buruzko frogagiriak gordetzea hamar ekitaldi fiskaletan, laguntza ematen den egunetik aurrera.

7. Dirulaguntzei buruzko 11/2005 Foru Legearen 13. artikuluan ezarritako baldintzak betetzea.

8. Entitate onuradunaren gardentasun betebeharrak betetzea.

Entitate onuradunak, Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 3. artikuluan aipatutako entitate diren aldetik, behartuta daude gardentasun betebeharra betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak urteko beren sarrera guztien %20 edo gehiago badira eta, gutxienez, 5.000 euro. Horretarako, esteka honetan dagoen eredua bete beharko dute, gardentasun betebeharrari buruzko adierazpena, alegia:

https://www.navarra.es/documents/48192/5726243/1+Declaracion+de+obligacion_eus.pdf

Aurreko atalean ezarritako muga kuantitatiboak gainditzen diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako dirulaguntza guztien kopuruak batuko dira. Urte batean baino gehiagotan ordaintzen diren dirulaguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez denen batura. Negozio zifra honako hauetako txikiena izanen da:

a) Aurreko urteko negozio zifra.

b) Hala badagokio, dirulaguntza ematen den ekitaldian entitatearen organo eskudunak onartutako negozio zifra.

Aipatu diren inguruabarrak gertatzeagatik gardentasun betebeharrak dituzten entitate onuradunek jarraian adierazten den informazioa eman beharko dute hilabeteko epean, dirulaguntza emateko ebazpena jakinarazten denetik kontatzen hasita:

–Entitatearen gobernu, administrazio eta zuzendaritza organoen osaera.

–Organo horiek osatzen dituzten kargudunen zerrenda.

–Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak. Sortu berriak diren entitateen kasuan, informazioa izanen da haien aurrekontuetan edo plan ekonomiko-finantzarioan jasotakoa.

–Entitatearen gobernu, administrazio eta zuzendaritza funtzioetan ematen den dedikazioaren araubidea.

–Entitate onuradunaren urteko azken kontuen kopia bat.

Informazio hori entitate onuradunaren legezko ordezkariak sinatuta eta telematikoki aurkeztuko da, Nafarroako Gobernuaren Erregistro Orokor Elektronikoaren bidez, eta laguntza kudeatzen duen administrazio unitateari bidaliko zaio, honako eredu hauen arabera (gardentasun betebeharrari buruzko adierazpenaren ereduaren I. eta II. eranskinak):

https://www.navarra.es/documents/48192/5726243/2+Declaracion+de+cargos+y+dedicacion_cas_eus.pdf

https://www.navarra.es/documents/48192/5726243/3+Declaracion+de+retribuciones+cas_eus.pd

Entitateak ez badu gardentasun betebeharra bete beharrik, aurreikusitako egoerak gertatzen ez direlako, horren gaineko adierazpena aurkeztu beharko du.

Onuradunak dirulaguntza bat baino gehiago jasotzen badu ekitaldi berean, ez du informazioa errepikatu beharko dirulaguntza bakoitzerako, salbu eta hasieran eman zituen datuak aldatu badira. Horretarako, entitateak identifikatu beharko du Foru Komunitateko Administrazioaren zein organoren aurrean aurkeztu zuen informazioa, eta noiz.

Betebehar hori bete ezean, ez da ordainduko onetsitako dirulaguntza.

Aurrekoa galarazi gabe, onuradun guztiak behartuak daude Administrazioari behar den informazio guztia ematera, aurretiazko errekerimendua eginda eta hamar eguneko epean, frogatzeko betetzen dituztela Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen II. tituluan jasotako gardentasun betebeharrak.

Errekerimenduan emandako epea bukatzen bada eskatutakoa bete gabe, hertsapen isunak ezartzea erabakitzen ahalko da, 500 eurotik 5.000 eurora bitartekoak, interesdunari ohartarazpena egin ondoren eta entzunaldia emanda. Isuna hamabost egunetik behin errepikatuko da, errekerimendua bete arte. Isunaren zenbateko osoa ez da izanen dirulaguntzaren zenbatekoaren ehuneko bost baino handiagoa. Zenbatekoa zehazteko, ez betetzearen astuntasuna eta proportzionaltasunaren printzipioa hartuko dira kontuan.

9. Enpresa deslokalizaziorik ez egitea, Enpresen sustraitzearen aldeko eta enpresen deslokalizazioaren aurkako neurriei buruzko abenduaren 16ko 18/2020 Foru Legearen 4. artikuluan ezarritakoari jarraikiz.

Hamargarren oinarria.–Laguntza ordaintzea.

1. Onuradunek 2024ko azaroaren 8a baino lehen aurkeztu beharko dute dirulaguntza ordaintzeko eskaera, honako agiri hauekin batera:

a) Dirulaguntza jaso dezakeen aldiaren kontrol eta ziurtapen jardueren azalpen memoria.

b) Kontratatutako kontrol eta ziurtapen jardueren fakturak, hirugarren oinarrian ezarritakoaren arabera diruz lagungarria den aldiari dagozkionak. Langileen gastuak eskatzen badira, jarduera horietan aritzen diren langileen nominak aurkeztu beharko dira.

c) 2024ko urtarrilaren 1etik abenduaren 31ra bitarteko aldian, gastu diruz lagungarri guztiak ordaindu izanaren frogagiriak. Laguntza zuzenean zerbitzuaren emaileari ordaintzea eskatzen bada, kontratu sinatua aurkeztu behar da, non zehaztapen hori jasoko baita, eta berariazko eskaera egin beharko da, haren datuak jakinaraziz, ordainketa egin ahal izateko.

d) Itxitako azken ekitaldiari dagozkion urteko kontuak, behar bezala sinatuak eta zigilatuak.

2. Nekazaritzako Ustiategien eta Elikagaien Sustapenerako Zerbitzuak eskatutako agiri guztiak ikuskatuko ditu, eta erabakiko du ea aurkezturiko gastuak hautagarriak diren, frogagiriak baliozkoak diren eta gainerako dokumentazioa aski den. Halaber, Ekonomia eta Ogasun Departamentuko kontu-hartzaile delegatuari justifikazio kontuaren dokumentazio osoa aurkeztuko dio, berak ikuska dezan.

3. Nolanahi ere, Nekazaritzako Ustiategien eta Elikagaien Sustapenerako Zerbitzuak frogagiri osagarriak eskatzen ahalko ditu, egoki baderitzo, aurkeztutako dokumentazioa zehazteko, argitzeko edo osatzeko, eta Administrazioaren datu-baseak kontsultatzen ahalko ditu, Nafarroako Ogasun Publikoarekiko eta Gizarte Segurantzarekiko betebeharrak egunean dituela egiaztatzeko.

Hamaikagarren oinarria.–Garapena eta jarraipena.

Laguntzaren kontrolaren eta jarraipenaren ondorioetarako, Nekazaritzako Ustiategien eta Elikagaien Sustapenerako Zerbitzuak bidezkotzat jotzen duen informazio osagarria eskatzen ahalko die onuradunei, laguntzaren xedeko jarduerei eta ekintzei dagokienez, entitateak eskatu diren baldintzak ezarritako epeetan betetzen dituela egiaztatzeko eta dagozkien egiaztapenak egiteko.

Hamabigarren oinarria.–Dirulaguntzaren bateragarritasuna.

1. Ebazpen honen arabera emandako "de minimis" laguntzak Batzordearen 2023/2832 (EB) Erregelamenduaren arabera emandako "de minimis" laguntzekin metatzen ahalko dira.

2. Ebazpen honen arabera emandako "de minimis" laguntzak Batzordearen 1408/2013 (EB) Erregelamenduaren eta 717/2014 (EB) Erregelamenduaren arabera emandako "de minimis" laguntzekin metatzen ahalko dira, Batzordearen 2023ko abenduaren 13ko 2023/2381 (EB) Erregelamenduaren 3. artikuluaren 2. apartatuan ezarritako gehieneko mugaraino.

3. Laguntza hauek ez dira estatuko inolako laguntzarekin metatzen ahalko, gastu diruz lagungarri berberei dagokienez, ez eta arriskuaren finantzaketa neurri berberaren estatuko laguntzekin ere, baldin eta metaketa horrek gainditzen baldin badu kategorien arabera salbuesteko erregelamendu baten bidez edo Europako Batzordeak hartutako erabaki baten bidez kasu zehatz bakoitzerako finkatzen den laguntzen gehieneko zenbatekoa edo laguntzen intentsitatea.

4. Betiere, jarduera bererako emandako dirulaguntzen zenbatekoak, bakarrik edo denak baturik, ez du gainditzen ahalko egin beharreko jardueraren kostua.

Hamahirugarren oinarria.–Itzulketak, arau hausteak eta zehapenak.

1. Laguntzaren onuradunek dirulaguntza emateko baldintza eta konpromisoak betetzen ez badituzte, dirulaguntza oso-osorik itzuli beharko dute, bai eta dagozkien berandutze interesak ere, Dirulaguntzei buruzko azaroaren 9ko 11/2005 Foru Legearen 35. eta 37. artikuluetan xedatutakoarekin bat.

2. Aplikatu beharreko arau-hausteen eta zehapenen araubidea azaroaren 9ko 11/2005 Foru Legean xedatutakoa izanen da.

3. Inguruabar bereziren bat edo ezinbesteko egoeraren bat gertatu dela dakien onuradunak idatziz jakinarazi beharko dio Landa Garapeneko eta Ingurumeneko Departamentuko Nekazaritzako Ustiategien eta Elikagaien Sustapenerako Zerbitzuari, organo kudeatzaileak egiaztapenak egin baino lehen.

Hamalaugarren oinarria.–Publiko egitea eta informazioa.

1. Ebazpen honetan ezarritako laguntzen onuradunen zerrenda Nafarroako Gobernuaren atarian argitaratuko da, tramiteen katalogoan, hain zuzen, Nafarroako nekazaritzako elikagaien kalitate figurak kudeatzeko entitateek kalitatezko ekoizpenen kontrol eta ziurtapen jarduerak egiteko laguntzei dagokien fitxan, zeinak "de minimis" araubideari lotuta baitaude.

2. Dirulaguntzei buruzko azaroaren 17ko 38/2003 Lege Orokorraren 20.8 artikuluan xedatutakoarekin bat, Dirulaguntzen Datu-base Nazionalean argitaratuko dira emandako dirulaguntzak, artikulu horretan bertan adierazitako baldintzetan.

3. Batasuneko estatuek, laguntza eman eta hogei egun balioduneko epean, "de minimis" laguntzei buruzko informazioa gordeko dute estatu kideko edozein agintaritzak emandako "de minimis" laguntzen erregistro nagusian.

4. Batasuneko estatuek neurri egokiak hartuko dituzte erregistro nagusian jasotako datuak zehatzak direla bermatzeko, eta "de minimis" laguntzei buruzko informazioaren erregistroak gordeko dituzte hamar urtez, laguntza ematen den egunetik aurrera.

5. Batzordeak, idatziz, beharrezkotzat jotzen duen informazio guztia eskatuko du zehaztu ahal izateko, batetik, erregelamendu honetan ezarritako baldintzak bete diren edo ez eta, bereziki, zein den erregelamendu honetan eta beste "de minimis" erregelamendu batzuetan ezarritakoa betez edozein enpresak jaso duen "de minimis" laguntzaren guztizko zenbatekoa. Kasuan kasuko estatuak eman egin beharko dio informazio hori Batzordeari, hogei egun balioduneko epean, edo, eskaeran hala ezarrita dagoenean, hori baino handiagoa den epean.

Iragarkiaren kodea: F2410447