Iragarkia

14. ALDIZKARIA - 2024ko urtarrilaren 18a

1. NAFARROAKO FORU KOMUNITATEA

1.7. BESTELAKOAK

208/2023 EBAZPENA, abenduaren 14koa, Lanbide Heziketako, Digitalizazioko eta Hezkuntza Zerbitzuetako zuzendari nagusiak emana, zeinaren bidez dei egiten baita Lanbide Heziketako teknikari tituluak lortzeko probetarako, eta haietan izena emateko egutegia zehazten, 2023-2024 ikasturterako, Nafarroako Foru Komunitatearen eremuan.

Hezkuntzari buruzko maiatzaren 3ko 2/2006 Lege Organikoak 69.4 artikuluan ezartzen duenaren arabera, hezkuntza administrazioek aldian behin antolatuko dituzte proba libreak goi mailako teknikarien tituluen parte diren lanbide moduluak gainditu ahal izateko.

Lanbide Heziketako Sistemaren antolamendua garatzen duen uztailaren 18ko 659/2023 Errege Dekretuak 140. artikuluan ezartzen du Lanbide Heziketako tituluak lortzen ahal direla goi mailako teknikarien tituluen parte diren lanbide moduluetarako proba libreak gaindituz, eta 141. artikuluan xedatzen du hezkuntza administrazioei dagokiela proba horiek aldian behin antolatzea, eta, beren eskumenen esparruan, haietarako deia egitea gutxienez urtean behin, eta, orobat, zehaztea zein diren proba horien xedeko heziketa zikloetako lanbide moduluak, noiz den matrikulazio epea, zein egunetan eta zein ikastetxetan eginen diren eta zein izanen diren proben edukiei dagozkien curriculumak. Halaber, 147. artikuluan xedatzen dira proba horietan parte hartzeko bete beharrekoak.

Hezkuntzako kontseilariak ekainaren 27an emandako 76/2016 Foru Aginduak Lanbide Heziketako titulu ofizialak lortzeko proben deialdiak egiteko baldintza orokorrak ezarri zituen. Arau-esparru horrek deialdi orokorrak egiteko aukera jasotzen du, interesaturik egon daitezkeen pertsona guztientzat, eta baita berariazko deialdiak egitekoa ere, eremu edo kolektibo profesional jakin batzuei zuzenduak, zeinek, Nafarroako Foru Komunitatearentzat duten interes bereziagatik edo kasuan kasuko lanbide jarduera arautzen duten inguruabar bereziengatik, besteak beste, deialdi hauen bidez arreta berezia behar baitute.

Lanbide Heziketako, Digitalizazioko eta Hezkuntza Zerbitzuetako Zuzendaritza Nagusiari dagokio probetarako deia egitea, eta zehaztea horren xedeko lanbide moduluak eta heziketa zikloak, izena emateari eta matrikulari buruzko alderdiak, eta probak zein egunetan eta zein ikastetxe publikotan eginen diren.

Ikusirik Lanbide Heziketaren Plangintza eta Integraziorako Zerbitzuak aldeko txostena eman duela Nafarroako Foru Komunitatean Lanbide Heziketako teknikari tituluak lortzeko proba libreak egiteko deialdi orokor bat egiteari eta haietan izena emateko egutegiari buruz, 2023-2024 ikasturterako, eta Hezkuntza Departamentuaren egitura organikoa ezartzen duen azaroaren 15eko 245/2023 Foru Dekretuaren bidez esleitutako ahalmenak erabiliz,

EBAZTEN DUT:

1. Lanbide Heziketako teknikari tituluak lortzeko proben deialdi orokor bat egitea, 2023-2024 ikasturterako, ebazpen honen eranskineko oinarriekin bat.

2. Ebazpen hau eta eranskinak Nafarroako Aldizkari Ofizialean argitaratzea.

3. Ebazpen hau eta eranskinak igortzea, behar diren ondorioak izan ditzaten, Hezkuntzako Ikuskapen Zerbitzura, Lanbide Heziketaren Plangintza eta Integraziorako Zerbitzura, Lanbide Heziketaren Modernizaziorako eta Berrikuntzarako Zerbitzura, Kudeaketa Juridiko-administratiboaren Atalera, Ikastetxeetako Informazioa Kudeatzeko Bulegora eta ukitutako ikastetxeetara.

4. Ebazpen honen aurka gora jotzeko errekurtsoa jartzen ahalko da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

Iruñean, 2023ko abenduaren 14an.–Lanbide Heziketako, Digitalizazioko eta Hezkuntza Zerbitzuetako zuzendari nagusia, Luis Calatayud Yuste.

1. ERANSKINA.–LANBIDE HEZIKETAKO TITULUAK LORTZEKO PROBA LIBREETARAKO DEIALDI OROKORRA

2023-2024 ikasturtea

Xedea.

1. Ekainaren 27ko 76/2016 Foru Aginduaren 1. eranskinaren 2. oinarrian ezarritakoa garatzeko, Nafarroan Lanbide Heziketako tituluak lortzeko probetarako deialdi orokor bat eginen da.

Deialdi orokor hau interesa duen edonorentzat da, baldin eta eranskin honetako 13. oinarrian izena emateko ezarritako baldintzak betetzen baditu.

2. Ebazpen honen 2. eranskinean hau ezarri da:

–Deialdi honetako probak zer titulu eta modulutarako diren eta horien zerrenda.

–Lanbide modulu bakoitzeko eskainitako plaza kopurua.

–Probetako ikastetxe aztertzaileak.

3. Ebazpen honen 3. eranskinean jasotzen da Lanbide Heziketako tituluak lortzeko probetan izena emateko, onartua izateko eta matrikula egiteko prozesuaren egutegia, eta baita probak egiteko egutegia ere.

4. Koordinazio edo ebaluazio batzordeetan probak diseinatzeko, garatzeko eta kalifikatzeko lanetan parte hartzen duten pertsonei ordaintzeko frogagiriak, batzordeei igorriko dizkie Lanbide Heziketaren Antolamendu eta Ebaluaziorako Atalak.

Prozeduren bateraezintasuna.

5. Ezin izanen da matrikula egin, bateraezintasuna dela medio, deialdi honen xedeko lanbide moduluetarako proba libreetan, baldin eta inguruabar hauek gertatzen badira:

–Deialdiko lanbide moduluei dagokien lanbide prestakuntzako tituluaren baliokidetzat hartutako Lanbide Heziketako titulua edukitzea.

–Lanbide gaitasuna ebaluatu eta egiaztatzeko prozedura batean parte hartzea 2023-2024 ikasturtean, ebaluazio fasean zehazki, eta deialdiko lanbide moduluen ardurapeko gaitasun-unitateari edo -unitateei loturik.

–Proba libreak zer lanbide modulutarako eskatzen diren, horietan matrikulaturik egotea 2023-2024 ikasturtean, edozein modalitatetan –presentziala, erdipresentziala edo online urrunetik– eta edozein autonomia erkidegotan dela ere.

6. Ebazpen honen deialdiko tituluak lortzeko probetan matrikulatzeak eta aldi berean 5. oinarrian aipatutako egoeraren batean egoteak ofizioz ekarriko du dagokion moduluan egindako matrikula deuseztatzea, bai eta haietan atera daitezkeen emaitza akademikoak ere baliogabetzea.

Inskribatzeko bete beharreko baldintzak. Deialdi orokorra.

7. Ebazpen honen bidez deitutako teknikari tituluak lortzeko deialdi orokorreko probetan izena emateko, bi baldintza orokor hauek batera bete beharko dira:

a) Izena emateko epean 18 urte izatea gutxienez, eta, horrez gain,

b) Lanbide Heziketako erdi mailako heziketa zikloetara sartzeko eskatzen diren titulazioetako edo ziurtagirietako bat edukitzea.

Izena ematea.

8. Ziklo bakar bateko eta ikastetxe bakar bateko lanbide moduluen arabera egin beharko da izena emateko eskaera.

Honela ematen ahalko da izena:

a) Bertaratuta: zer ziklo hautatzen den, hartarako azterketa egiten duen ikastetxean.

b) Educa-Atariaren bidezko erregistro telematikoaren bitartez, ikastetxe aztertzaileari zuzenduta, "Lanbide Heziketako tituluak lortzeko proba libreak" izeneko fitxaren bidez, esteka honetatik abiatuta:

https://www.navarra.es/eu/tramiteak/on/-/line/Pruebas-libres-para-la-obtencion-de-titulos-de-Formacion-Profesional

9. Izangai bakoitzak izena emateko eskaera bakar bat aurkeztuko du, Nafarroako Gobernuaren tramiteen katalogoko "Lanbide Heziketako tituluak lortzeko proba libreak" izeneko tramiteen fitxako ereduei egokitua.

Pertsona batek izena emateko eskaera bat baino gehiago aurkezten baditu, horietako bakar bat ere ez da kontuan hartuko, eta deialdi honetan araututako onarpen prozeduratik kanpo geldituko da.

10. Izena emateko eskaeran sartzen diren lanbide moduluek, guztiak batuta, gehienez ere 1.000 irakastordu izaten ahal dute. Irakastordu horiek gainditzen dituen modulu kopuru bat eskatuz gero, ikastetxeak izena emateko eskaeran adierazitako ordenaren arabera inskribatuko du izangaia lanbide moduluetan, curriculumeko gehieneko ordu kopurura iritsi arte, hots, gehienez ere 1.000 ordura arte.

Lanbide moduluak aitortzeko eskatu nahi izanez gero, horiek ez dira adierazi behar izena emateko eskaeran.

11. Lantokiko Prestakuntza lanbide moduluko inskripzioa ebazpen honen 71. eta 72. oinarrietan arautzen da.

12. Izena emateko eskaerak bertaratuta aurkeztu nahi badira, aukeratutako ikastetxearen administrazio bulegoetara eramanen dira, ebazpen honen 3. eranskinean azaltzen den deialdirako egutegian ezarritako epean.

13. Eranskin honen 7. oinarrian aipatzen diren izena emateko baldintza guztiak eskaerak aurkezteko epea bukatzen den egunean bete beharko dira. Halaber, baremazioaren ondorioetarako aurkezten den dokumentazioa bat etorriko da deialdi honetan eskaerak aurkezteko ezarritako azken egunean frogatzen ahal diren egoerekin.

14. Era berean, Lantokiko Prestakuntza moduluko inskripzioa eskatzeko, frogatu beharko da eranskin honen 71. oinarrian ezarritako baldintzak aldi berean betetzen direla.

Onarpen irizpideak.

15. Honako lehentasun irizpide hauei jarraikiz ordenatuko da deialdi honen xedeko heziketa zikloetako moduluetan izena emateko eskatzen duten ikasleen hurrenkera-zerrenda:

–Lehenik: Aurreko ikasturteetan Nafarroan Lanbide Heziketako teknikari titulua lortzeko deitutako modulukako proba libreetan matrikulatuta egon direnak –orain izena eman nahi duten heziketa zikloko moduluetan– eta gainera, heziketa zikloko lanbide modulu bat edo gehiago gainditu eta/edo egiaztatu dituztenak.

–Bigarrenik: Beste autonomia erkidego batzuetako proba libreen deialdien bidez edo beste prestakuntza modalitate batzuen bidez, tituluko gaitasun unitateren bat edo gehiago badituztela edo tituluaren lanbide modulu batzuk gainditu dituztela frogatzen dutenak.

–Hirugarrenik: Lan-esperientzia frogatzen dutenak enpresa, elkarte edo erakunde batean; lan esperientzia hori lanaldi osoan egindako urtebeteko lanaren baliokidea izanen da, gutxienez.

–Laugarrena: Aurreko hiru taldeetako bakar batean ez daudenak.

16. Lan-esperientzia zehazteko, horrek zerikusia izan beharko du, LOGSEko zikloen kasuan, gaitasun orokorrarekin, gaitasun unitateekin, heziketa zikloaren errealizazioekin eta errealizazio irizpideekin; eta LOEko zikloen kasuan, gaitasun orokorrarekin, lanbide gaitasunekin, gaitasun pertsonal eta sozialekin, kualifikazioekin eta heziketa zikloko gaitasun unitateekin. Ikastetxe bakoitzaren ebaluazio batzordearen eskumena izanen da, ziklo bakoitzean, lan-esperientzia baloratzea eta horrek, aurreko paragrafoan adierazitakoari jarraikiz, zikloarekin zerikusirik ote duen edo ez erabakitzea.

Osasun arloko lanbideen antolamenduari buruzko azaroaren 21eko 44/2003 Legeak 3. artikuluan xedatzen duenaren arabera, Lanbide Heziketako osasun arloko profesionaltzat hartzen dira, erdi mailako taldean, erizaintzako zainketa lagungarrietako teknikari titulua dutenak. Hori horrela, ebazpen honen bidez arautzen den proba libreetarako deialdian onartua izateko ondorioetarako, erabaki da ez dela existitzen erizaintzako zainketa lagungarrietako gaitasun orokorren arloko lan- esperientziarik.

17. Lehentasun irizpide hauek kontuan izanda ezarriko da hurrenkera-zerrenda, aipatu lau taldeetako bakoitzerako:

a) Lehenengo taldea:

–Gainditutako eta/edo aitortutako moduluen kopuruaren arabera, handienetik txikienera.

–Gainditutako eta/edo aitortutako moduluen kopurua berdina izanez gero, gainditutako eta/edo aitortutako moduluen batez besteko notaren arabera, bi zifra hamartar adierazita, handienetik txikienera.

–Puntu-berdinketa hausten ez bada, hura ebazteko aplikatuko da 2023-2024 ikasturtean onartua izateko Hezkuntza Departamentuan egindako zozketaren emaitza.

b) Bigarren multzoa:

–Egiaztatzen diren gaitasun unitateen eta gainditutako eta/edo aitortutako moduluen kopuruaren arabera, gaitasun unitateen eta lanbide moduluen baturaren kopuru handienetik txikienera. Batura zenbatzearen ondorioetarako, balio berekotzat jotzen dira modulua eta gaitasun unitatea.

–Berdinketa baldin badago gaitasun unitate egiaztatuen eta lanbide modulu gainditu eta/edo aitortuen kopuruan, sartzeko alegatzen den baldintzaren batez besteko notaren arabera, bi zifra hamartar adierazita, handienetik txikienera. Batez besteko nota zenbaturik ez dutenak beren taldeko azken tokira pasatuko dira.

–Puntu-berdinketa hausten ez bada, hura ebazteko aplikatuko da 2023-2024 ikasturtean onartua izateko Hezkuntza Departamentuan egindako zozketaren emaitza.

c) Hirugarren taldea:

–Sartzeko alegatzen den baldintzaren batez besteko notaren arabera, bi zifra hamartar adierazita, handienetik txikienera. Batez besteko nota zenbaturik ez dutenak beren taldeko azken tokira pasatuko dira (ondorio horietarako, batez besteko nota "zero" dela adieraziko da).

–Berdinketarik bada, hura ebazteko aplikatuko da 2023-2024 ikasturtean onartua izateko Hezkuntza Departamentuan egindako zozketaren emaitza.

d) Laugarren taldea:

–Sartzeko alegatzen den baldintzaren batez besteko notaren arabera, bi zifra hamartar adierazita, handienetik txikienera. Batez besteko nota zenbaturik ez dutenak beren taldeko azken tokira pasatuko dira (ondorio horietarako, batez besteko nota "zero" dela adieraziko da).

–Berdinketarik bada, hura ebazteko aplikatuko da 2023-2024 ikasturtean onartua izateko Hezkuntza Departamentuan egindako zozketaren emaitza.

Izena emateko dokumentazioa.

18. Izena emateko eskaerarekin batera, ondoren aipatzen den dokumentazioa aurkeztu beharko da, onarpen talde batean sartzeko eta eranskin honetako 15., 16. eta 17. oinarrietan ezarritako irizpideen araberako hurrenkera-zerrenda ezartzeko.

18.1. Lehenengo taldea:

a) Nortasun Agiri Nazionalaren fotokopia, pasaportearena, nortasuna frogatzen duen bidaia agiri batena, bisarena edo atzerritarren identifikazio txartelarena.

b) Izena emateko eskaera hartzen duen ikastetxeak jaso beharko du gainditutako eta/edo aitortutako moduluen batez besteko notari buruzko informazioa.

18.2. Bigarren multzoa:

a) Nortasun Agiri Nazionalaren fotokopia, pasaportearena, nortasuna frogatzen duen bidaia agiri batena, bisarena edo atzerritarren identifikazio txartelarena.

b) Zikloan sartzeko titulazioa edo prestakuntza akademikoa egiaztatzen duen ziurtagiriaren fotokopia, batez besteko nota adierazita.

c) Zer ziklotarako egin den izena emateko eskaera, haren modulu batzuk gainditu izana frogatzen duen ziurtagiri akademikoaren fotokopia, kasu hori bada.

d) Zer modulutarako egin den izena emateko eskaera, haren tituluko gaitasun unitateak ofizialki frogatzen dituen dokumentuaren fotokopia, kasu hori bada.

18.3. Hirugarren taldea:

a) Nortasun Agiri Nazionalaren fotokopia, pasaportearena, nortasuna frogatzen duen bidaia agiri batena, bisarena edo atzerritarren identifikazio txartelarena.

b) Zikloan sartzeko titulazioa edo prestakuntza akademikoa egiaztatzen duen ziurtagiriaren fotokopia, batez besteko nota adierazita.

c) Hala badagokio, lan-esperientzia frogatzea, agiri hauek aurkeztuta:

c.1) Soldatapeko langileen eta langile autonomoen edo beren kontura ari direnen kasuan:

–Lan-esperientzia zer enpresa edo erakundetan eskuratu duen, haren ziurtagiria, datu hauek berariaz adierazita: kontratuaren iraupena, egindako jarduera eta zenbat denbora egin duen lan horretan. Beren kontura ari diren langileen kasuan, zergapekoen zentsuan gutxienez urtebeteko antzinatasuna duela dioen ziurtagiria eskatuko da, baita interesdunak jarduera ohikoenei buruz egindako aitorpena ere.

–Gizarte Segurantzako Diruzaintza Orokorraren edo Lan Mutualitatearen ziurtagiria, non enpresa, lanbide kategoria, kotizazio taldea eta kontratazioaldia adieraziko baitira, edo, kasua bada, Langile Autonomoen Araubide Berezian izandako kotizazioaldia, edo, bestela, zuzenbidearen araberakoa den beste edozein frogabide.

c.2) Boluntario gisa, bekadun gisa edo antzeko modu batean lan egin dutenen kasuan:

–Zerbitzuak zer erakundetan egin diren, hark emandako ziurtagiria, berariaz adierazita honako hauek urte natural bakoitzerako: egindako jarduerak eta eginkizunak, zer urtetan egin diren eta horietan guztira sartutako ordu kopurua.

18.4. Laugarren taldea:

a) Nortasun Agiri Nazionalaren fotokopia, pasaportearena, nortasuna frogatzen duen bidaia agiri batena, bisarena edo atzerritarren identifikazio txartelarena.

b) Zikloan sartzeko titulazioa edo prestakuntza akademikoa egiaztatzen duen ziurtagiriaren fotokopia, batez besteko nota adierazita.

18.5. Lau taldeetako bakoitzean, kasua bada, desgaitasunen bat edo goi mailako edo goi errendimenduko kirolari izaera frogatzen duen dokumentazioa.

19. Hezkuntza Departamentuak egiaztatzen ahalko du izena ema dutenek aurkeztutako datuak edo/eta dokumentuak benetakoak diren edo ez. Haietan faltsutasunik badela egiaztatuz gero, deialditik kanpo geldituko da eta, hartan kalifikaziorik lortu bada, deuseztatuko da.

Onartuen behin-behineko eta behin betiko zerrendak.

20. Ebazpen honen 3. eranskinean jasotako egutegian adierazten den egunean, ikastetxe aztertzaileko zuzendaritzak bertako iragarki-taulan eta web-orrian argitaratuko du onartuen behin-behineko zerrenda, lanbide modulu bakoitzerako.

21. Onartuen behin-behineko zerrenda horren aurka, erreklamazio bat jartzen ahalko da ikastetxeko zuzendariari zuzendua, ebazpen honen 3. eranskinean adierazitako egunetan.

22. Lanbide modulu bakoitzerako onartuen behin betiko zerrenda ebazpen honen 3. eranskinean adierazitako egunean argitaratuko du ikastetxe aztertzaileko zuzendaritzak, ikastetxeko iragarki-taulan eta web-orrian.

23. Eskatutako lanbide moduluren batean onartzen ez diren eskatzaileak itxaron zerrendan geldituko dira, aurretik ezarritako irizpideen arabera ordenaturik. Onartuak izan daitezke, hurrenkera ordenari jarraikiz betiere, baldin eta hutsik geratutako plazarik badago onartutako ikasleren bat matrikulatu ez delako.

24. Eskatzaile bat lanbide modulu batean onartua dagoela ulertuko da hala agertzen bada onartutako ikasleen behin betiko zerrendetan edo ikastetxe aztertzaileak plaza esleitzen badio ebazpen honen 3. eranskinean ezarritako matrikulazio epea bukatu ondoren plaza hutsak gelditu direlako.

Matrikulazioa.

25. Izangaiek ebazpen honen 3. eranskinean adierazitako egunetan egin beharko dute matrikula, onartuak dauden moduluetarako. Horretarako, dokumentazio hau aurkeztu beharko dute:

–Ordainketa-gutunaren egiaztagiria, hala badagokio, eranskin honen 31. eta 32. oinarrietan adierazitakoaren arabera.

–Familia ugariaren titulua izanez gero, horren fotokopia.

–Behar duen egokitzapen motaren eskaera, desgaitasuna dutela frogatu dutenen kasuan.

26. Lanbide modulu batean matrikula egiteak ebaluazio deialdi bakarrerako eskubidea dakar berekin, 2023-2024 ikasturteko proba libreetarako deialdi honetan.

27. Bateraezinak dira proba hauetako matrikula eta beste prozedura batzuk, ekainaren 27ko 76/2016 Foru Aginduaren 1. eranskinaren 4. oinarrian arautzen den moduan. Ez bada betetzen, deialdi honetako matrikula eta bertan lortzen diren emaitza akademikoak deuseztatuko dira, matrikularen tasa itzultzeko eskubiderik sortu gabe.

28. Izena emateko eskaeran desgaitasuna dutela frogatu duten izangaiek matrikula egiten duten unean adierazi beharko dute probak egiteko zer egokitzapen mota jotzen duten beharrezko.

29. Egokitzapen horiengatik ez dira tituluaren gaitasun orokorrean eragina duten ikasketa helburuak edo emaitzak kenduko.

Plazen erreserba.

30. Modulu bakoitzean, erreserba hauek eginen dira eskaintzen diren 30 plazako:

–Erreserbako 2 plaza, desgaitasuna dutela frogatu dutenentzat.

–Erreserbako 2 plaza, goi mailako edo goi errendimenduko kirolarientzat, Goi Mailako eta Goi Errendimenduko Kirolariei buruzko uztailaren 13ko 971/2007 Errege Dekretuan ezarritako lehentasun ordenaren arabera.

Moduluren batean desgaitasuna dutela egiaztatu duten bi pertsona baino gehiago edo goi errendimenduko bi kirolari baino gehiago suertatuz gero, deialdi honetan ezarritako onarpen irizpideei jarraikiz eratutako lehentasun-zerrendako lehen biei esleituko zaizkie plazak.

Ikasle jakin horientzat erreserbatutako plazak betetzen ez badira, eskaintza orokorrekoei gehituko zaizkie.

Matrikulazio tasak.

31. Honako hauek dira Lanbide Heziketako teknikari edo goi mailako teknikari titulua lortzeko modulukako proba libreetan matrikulatzeko tasak, lanbide modulu bakoitzerako, bat etorriz Nafarroako Foru Komunitateko Administrazioaren eta haren erakunde autonomoen tasei eta prezio publikoei buruzko otsailaren 11ko ko 2/2021 Foru Legearen 36. artikuluaren 17. tarifan xedatutakoarekin, kontuan harturik foru lege horren 36.5 artikuluan ezarritako onura fiskalak:

–Tarifa arrunta: 10 euro.

–Ehuneko 50eko hobaria: aipatu 36.5 artikuluan adierazten diren kolektiboetako pertsonentzat.

–Salbuespena: aipatu 36.5 artikuluan adierazten diren kolektiboetako pertsonentzat.

32. Lanbide Heziketako teknikari titulua edo goi mailako teknikari titulua lortzeko modulukako proba libreetako matrikulazio tasa ordaintzeko, Internet bitartez bete beharko da dagokion ordainketa-gutunaren inprimakia, Nafarroako Gobernuaren tramiteen katalogoko "Lanbide Heziketako tituluak lortzeko proba libreak" izeneko tramiteen fitxan, zeina helbide honetan baitago:

https://www.navarra.es/eu/tramiteak/on/-/line/Pruebas-libres-para-la-obtencion-de-titulos-de-Formacion-Profesional

Ordainketa-gutuna bete ondoren, eta aipatu fitxan dauden jarraibideekin bat, eskatzaileak ordainketa egiten ahalko du, pagatzeko bi modu hauetako baten bidez:

a) Dirua sartuta banku-entitate laguntzaile batean.

b) Ordainketa telematikoaz, banku-txartel baten bidez.

33. Tasaren kuota izena emateko ezarritako epean ez pagatzea edo osorik ez pagatzea baztertzeko arrazoia izanen da; orobat, bazterturik geldituko da tasa ordaintzetik erabat salbuetsita egoteko edo tasaren hobaria izateko behar diren agirietako bat aurkezten ez bada edo agiri horietan faltsukeriaren bat atzematen bada.

34. Deialdi honek finkatutako epeetan izena eman duen interesdunak eskaturik, tasa itzultzea bidezko izanen da, bakar-bakarrik, bitan ordaindu bada edo behar baino gehiago ordaindu bada.

35. Tasa itzultzeko eskaeretan, interesdunek Nafarroako Gobernuaren tramiteen katalogoko "Lanbide Heziketako tituluak lortzeko proba libreak" izeneko tramiteen fitxan dagoen eredua erabiltzen ahalko dute.

Hezkuntza Departamentuaren Erregistroan aurkeztuko da tasa itzultzeko eskaera, Lanbide Heziketaren Plangintza eta Integraziorako Zerbitzuko Lanbide Heziketaren Antolamendu eta Ebaluaziorako Atalari zuzendua. Eskaerarekin batera, bertan aipatzen den dokumentazioa aurkeztu beharko da nahitaez.

Moduluak baliozkotzea. Gainditutako moduluak aitortzea.

36. Bat etorriz abenduaren 9ko 1085/2020 Errege Dekretuaren 4. artikuluan ezarritakoarekin, haren bidez arautzen baitira Espainiako hezkuntza sistemako Lanbide Heziketako tituluen lanbide moduluen baliozkotzeak, ezin da lanbide modulurik baliozkotzea eskatu Lanbide Heziketako teknikari tituluak lortzeko probetarako deialdietan.

37. Lanbide moduluak aitortzeko eskatzen ahalko dute ebazpen honen bidez proba libreetarako egindako deialdiko lanbide moduluetan plaza lortu eta matrikulatzen direnek, indarreko araudian ezarritakoaren arabera.

38. Gainditutako moduluak aitortzea prozesu akademiko eta administratibo bat da, zeinaren bidez, ikasleak eskatuta, erabakitzen baita ikasleak ez dituela egin behar edo ez dituela azterketak egin behar (proba libreen deialdien kasuan) heziketa zikloko modulu bat edo gehiago, aurretik gainditutako beste modulu batzuen berdin-berdinak direlako eta horietan lortutako azken kalifikazioa 5 edo gehiago izan delako.

Moduluak aitortzeak ondorio hau izanen du: gainditutako moduluen kalifikazioa ikaslearen ikasketa-espedientera pasako da.

39. Hauxe da moduluak aitortzeko eskaerari erantsi beharko zaion dokumentazioa: gainditu diren moduluak jasotzen dituen ziurtagiri akademikoaren fotokopia.

40. Ikastetxe aztertzaileetako ebaluazio batzordeetako kideek beharrezko informazioa eta orientazioa emanen dizkiete moduluak aitortzeko eskatu nahi dutenei.

Proben nondik norakoari buruzko informazio saioa. Izangaientzako orientazioa.

41. Matrikulatutako izangaientzako informazio saio bat eginen du deialdi honen xedeko heziketa ziklo bakoitzeko ebaluazio batzordeak. Ikastetxe aztertzaileetan izanen da, ebazpen honen 3. eranskinean ezarritako egutegian aipatzen diren egunetan, ebaluazio batzordeak ezartzen duen orduan.

42. Saio horretan, besteak beste, honako hauei buruzko informazioa eta orientazioa emanen da:

–Ikasketaren emaitzak edo amaierako gaitasunak, bai eta proben xedeko lanbide moduluei dagozkien ebaluazio irizpideak ere.

–Ebaluazio sistema.

–Ebaluaziorako proba motak.

–Lanbide modulu bakoitzeko probak egiteko egutegia.

–Probekin zerikusia duten beste alderdi batzuk.

–Izangaiek proben nondik norakoari buruz dituzten zalantzak argituko dira.

43. Ikastetxe aztertzaileek beharrezko neurriak hartuko dituzte, deialdi honen xedeko Lanbide Heziketako teknikari tituluak lortzeko probetan ikastetxe horretan izena eman nahi dutenek bermatua izan dezaten ebaluazio batzordearen aldetik informazio eta orientazio egokia jasotzeko aukera, bai erreklamatzeko epe eta prozesuei dagokienez, bai proba libreak egiteko bestelako inguruabar batzuei buruz.

Ikastetxe aztertzaile bakoitzeko zuzendaritzak bermatuko ditu arreta eta orientazio horiek; dagokion ebaluazio batzordearen ardura izanen da hori, eta ikastetxe aztertzaileko Orientazio Departamentuko langileek laguntza ematen ahalko diote.

Proben prestaketa, egitura eta edukia.

44. Izendatzen diren ebaluazio batzordeek prestatuko dituzte deialdi honen xedeko lanbide modulu bakoitzerako probak; teoriko-praktikoak izan beharko dute.

45. Erizaintzako Zainketa Lagungarrietako erdi mailako heziketa zikloko moduluen kasuan, koordinazio batzordeak edo horretarako izendatutako aholkulariek prestatuko dituzte probak.

46. Probak Nafarroako Foru Komunitatean indarra duten heziketa zikloetako curriculumei eta haien lanbide gaitasunei buruzkoak izanen dira. Probek eduki teorikoak eta praktikoak izanen dituzte, halakoak non kasuan kasuko ebaluazio irizpideen bidez agerian geldituko baita ikasleek behar diren ikaskuntza emaitzak edo trebetasunak lortu dituztela, eta, hala dagokionean, lanbide moduluari lotutako gaitasunak.

47. Beren ezaugarriengatik eta bereizgarritasunarengatik beharrezkotzat jotzen den lanbide moduluetan, ebaluazio batzordeak bi zatitan antolatzen ahalko du proba, eta zehaztu, hala erabakiz gero, aurreko zatia gainditu beharko dela hurrengoa egiteko. Eranskin honen 41. oinarrian aipatutako informazio saioan emanen zaie horren berri matrikulatutako ikasleei.

48. Probak egiteko aurreikusitako egutegia ebazpen honen 3. eranskinean ezarritakoa da. Proba bat zenbait zatitan egiten bada, adierazitako data probaren lehen zatiari dagokio. Proben gaineko orientabideak eta ebaluazio eta kalifikazio irizpideak jendaurrean jarriko dira ikastetxe bakoitzeko iragarki-taulan eta web-orrian, ebazpen honen 3. eranskinean adierazitako egunetan.

Probak egitea.

49. Deialdi honen xedeko modulu bakoitzerako eginen dira ebazpen honen bidez araututako deialdiari dagozkion probak, ebazpen honen 3. eranskineko egutegiaren arabera.

50. Ebaluazio batzordeak azterketaren xedeko lanbide moduluen probak egiteko egutegia prestatuko du.

Egutegia halako eran prestatuko da non ebaluazio batzordeko irakasle arduradunei esleitutako lanbide moduluetako ariketak ez baitira eginen irakasle horien irakastorduetan. Orobat, ahaleginak eginen dira, jarduera horiek direla-eta, ikastetxeko gainerako ikasleei trabarik ez egiteko.

51. Probetan matrikulatuta daudenek aldean eraman beharko dute Nortasun Agiri Nazionala, pasaportea edo legez onartua den beste edozein dokumentu, identitatea behar adina frogatzen duena.

Ebaluazio batzordeak.

52. Ekainaren 27ko 76/2016 Foru Aginduaren eranskinaren 8. oinarrian ezartzen den bezala, ebaluazio batzorde bat eratuko da heziketa ziklo eta ikastetxe bakoitzerako. Lanbide Heziketaren Plangintza eta Integraziorako Zerbitzuko zuzendariak izendatuko ditu, irizpide orokor honekin: ikastetxe bakoitzean, deialdi honen xedeko lanbide modulu bakoitza irakasle arduradun bakar bati esleitzea.

Ebaluazio batzordeak, hala behar dela iruditzen bazaio, aholkularien laguntza eskatzen ahalko du probak garatzeko. Horretarako, eskaera arrazoitua egin beharko dio Lanbide Heziketaren Plangintza eta Integraziorako Zerbitzuko zuzendariari, eta hark erabakiko du onartzen den ala ez. Orobat, Lanbide Heziketaren Plangintza eta Integraziorako Zerbitzuko zuzendariak izendatuko ditu proposatutako eta onartutako aholkulariak.

53. Gainera, Erizaintzako Zainketa Lagungarrietako heziketa ziklorako, koordinazio batzorde bat eratuko da, Lanbide Heziketaren Plangintza eta Integraziorako Zerbitzuko zuzendariak izendatua, kide hauek izanen dituena: batzordeburu bat eta hiru batzordekide.

Lanbide Heziketaren Antolamendu eta Ebaluaziorako Ataleko kide bat izanen da batzordeburua. Hiru batzordekideak katedradunen kidegokoak, Bigarren Hezkuntzako irakasleen kidegokoak edo desagertzear den Lanbide Heziketako irakasle teknikoen kidegokoak izanen dira, Erizaintzako Zainketa Lagungarrietako zikloan irakasten den espezialitate batekoak, kanpo direla "Lanerako prestakuntza eta orientabideak" eta "Lantaldeko harremanak" moduluak; hiru ikastetxe aztertzaileetako bakoitzeko bat. Idazkari lanetan gazteena ariko da.

Halaber, koordinazio batzordeak aholkularien laguntza eska dezake beharrezkoa iruditzen zaionean lanbide moduluetako probak egiteko. Horretarako, eskaera arrazoitua egin beharko dio Lanbide Heziketaren Plangintza eta Integraziorako Zerbitzuko zuzendariari, eta hark erabakiko du onartu ala ez, irizpide honetan oinarrituz: deialdi honen xedeko lanbide modulu bakoitza irakasle arduradun bakar bati esleitzea. Orobat, Lanbide Heziketaren Plangintza eta Integraziorako Zerbitzuko zuzendariak izendatuko ditu proposatutako eta onartutako aholkulariak.

54. Ebaluazio batzordeak, ekainaren 27ko 76/2016 Foru Aginduaren eranskinaren 8. oinarrian aipatzen diren eginkizunez gain, honako hauek ere izanen ditu:

–Eranskin honen 41. eta 42. oinarrietan aipatu informazio saioa antolatu eta garatzea.

–Eranskin honen 73. oinarrian aipatzen diren orientazio eta informazio lanak egitea.

–Txostenak egitea, lanbide moduluak aitortzeko eskaerei buruz.

–Erizaintzako Zainketa Lagungarrietako zikloko ebaluazio batzordeen kasuan, koordinazio batzordearen eskumena izanen da probak prestatzea.

55. Lanbide modulu bakoitzeko ariketak eta probak prestatzeari eta horiek zuzendu eta kalifikatzeari dagokionez, kontuan hartu beharko da printzipio orokor hau: ikastetxe bakoitzean, ebaluazio batzordeko irakasle bakar batek prestatu, zuzendu eta kalifikatu behar ditu ariketak eta probak, betiere, Lanbide Heziketaren Plangintza eta Integraziorako Zerbitzuko zuzendariak egindako izendapenean bakoitzari esleitu zaizkion lanbide moduluen arabera.

56. Erizaintzako Zainketa Lagungarrietako zikloko koordinazio batzordeak eginkizun hauek izanen ditu:

–Probak deialdi honetan jasotako irizpideei jarraikiz prestatzea.

–Hiru ikastetxe aztertzaileetan aplikatuko diren kalifikazio irizpideak ezartzea.

–Proben antolaketa eta kudeaketa koordinatzea hiru ikastetxe aztertzaileetan.

–Lanbide Heziketaren Plangintza eta Integraziorako Zerbitzuko Zuzendaritzak, helburuak behar bezala betetzeko, esleitzen dion beste edozein, betiere bere jarduketa eremuaren barrenean.

57. Lanbide Heziketaren Plangintza eta Integraziorako Zerbitzuko zuzendariak izendatuko ditu Lanbide Heziketako teknikari titulua lortzeko probetan parte hartuko duten ebaluazio batzordeetako aholkulariak.

Aholkularien eginkizunak hauek izanen dira, oro har:

–Probak egiteko prozesua zaindu eta kontrolatzea.

–Proben kudeaketa prozesuan laguntzea.

58. Derrigorrezkoa da ebaluazio batzordeetan eta Erizaintzako Zainketa Lagungarrietako zikloko koordinazio batzordean parte hartzea eta aholkulari gisa parte hartzea.

59. Ebaluazio batzordeetako eta Erizaintzako Zainketa Lagungarrietako zikloko koordinazio batzordeko kideen eta aholkularien lanak Unibertsitateaz Kanpoko Irakaskuntza Hobetzeko Neurriei buruzko uztailaren 2ko 26/2002 Foru Legearen 12.2 artikuluan ezarritakoekin parekatuko dira, eta ezartzen diren konpentsazio ekonomikoak jasotzeko eskubidea sortuko dute, erabakitzen den prozedurari jarraikiz.

Horretarako, pertsona horiek diru konpentsazioak jasoko dituzte, Hezkuntzako zuzendari nagusiaren martxoaren 22ko 84/2016 Ebazpenean ezarritakoaren arabera, ebazpen horren bidez ezartzen baita zer konpentsazio jasoko duten Nafarroan Lanbide Heziketako tituluak lortzeko proba libreetako eta hezkuntza sistemako Lanbide Heziketako irakaskuntzetan eta Arte Plastikoetako lanbide irakaskuntzetan sartzeko probetako epaimahaietako kideek, bai eta araubide bereziko Kirol Irakaskuntzen probetakoek ere. Jarduera horiek justifikatuko dira Lanbide Heziketaren Antolamendu eta Ebaluaziorako Atalak emanen duen dokumentazioarekin eta aipatu ebazpeneko alderdi batzuk garatu eta zehazten dituzten jarraibide hauen arabera (atal desberdinak justifikazio dokumentazioarekin lotuta daude):

a) A atala. Koordinazio edo ebaluazio batzordean parte hartzea, karguarekin.

a1) Oro har, hauek izanen dira dedikazio-orduak, gehienez, koordinazio batzordean betetzen diren eginkizunen arabera:

–Batzordeburua: 18 dedikazio-ordu, gehienez.

–Idazkaria: 18 dedikazio-ordu, gehienez.

–Batzordeko kideak: 15 dedikazio-ordu, gehienez.

a2) Oro har, hauek izanen dira dedikazio-orduak, gehienez, ikastetxeetako ebaluazio batzorde bakoitzeko eginkizunetarako:

–Batzordeburua: 10 dedikazio-ordu, gehienez.

–Idazkaria: 10 dedikazio-ordu, gehienez.

–Batzordeko kideak: 5 dedikazio-ordu, gehienez.

b) B1 atala. Izangaien baremazioa.

Gehienez, 0,1 orduko dedikazioa ezartzen da barematutako izangai bakoitzeko. Baremaziorako esleitutako gehieneko dedikazio-orduak hartan parte hartzen duten pertsonen artean banatuko dira.

c) B2 atala. Proben antolaketa eta garapena.

4 dedikazio-ordu ezartzen dira, gehienez, proba edo proba zati bakoitzerako eta proba egiteko egun bakoitzeko.

d) B3 atala. Proben ebaluazioa eta kalifikazioa.

Gehienez, 0,2 orduko dedikazioa ezartzen da ebaluatzen eta kalifikatzen den proba edo proba zati (probak zati bat baino gehiago badu) bakoitzerako. Gogorarazi beharra dago ezen Lanbide Heziketaren Plangintza eta Integraziorako Zerbitzuko zuzendariak izendatutako pertsonari baino ez dagozkiola, kasuan kasuko lanbide moduluaren ardura duen aldetik, probaren edo probaren zatien ariketak ebaluatzeko eta kalifikatzeko esleitutako gehieneko dedikazio-orduak.

e) B4 atala. Azken ebaluazioa.

Oro har, 2 dedikazio-ordu ezartzen dira, gehienez, izangaiak ebaluatzeko amaierako saiorako. Parte-hartze hori amaierako ebaluazio saioko bilera aktaren kopiaren bitartez frogatuko da. Akta horretan, jaso beharko dira saioaren tokia, eguna, hasiera eta bukaera orduak, eta parte hartu duten irakasleen zerrenda. Amaierako ebaluazio saioko bilera aktaren kopia hori aipatutako gainerako dokumentazioari gehituko zaio.

f) "Bestelako gastuak" atala.

‘Bestelako konpentsazio’ gisa, kontuan hartuko dira probak antolatzeagatik eta egiteagatik izandako joan-etorrien gastuak, eta baita otordu gastuak ere.

Joan-etorrien gastuetarako, Lanbide Heziketaren Antolamendu eta Ebaluaziorako Atalak emanen duen justifikazio agiria bete beharko da, joan-etorrien datak eta orduak zehazturik; bidesarien gasturik izanez gero, horien egiaztagiriak erantsi beharko dira.

Otordu gastuak ordaintzeari dagokionez, proba egiteko egunean egindako gastuaren frogagiriak aurkeztu beharko dira (faktura edo faktura sinplifikatua –tiketa–). Gehienez, 20 euro ordainduko da pertsona eta eguneko.

60. Idazkariek edo batzordeburuek, idazkaririk ez bada, proba libreetan parte hartzearen ondoriozko esku-hartze eta gastuak justifikatzeko dokumentazioa bildu beharko dute, irakasle eta aholkulari bakoitzari buruz, eta Lanbide Heziketaren Plangintza eta Integraziorako Zerbitzuko Lanbide Heziketaren Antolamendu eta Ebaluaziorako Atalari igorri, Lanbide Heziketaren Antolamendu eta Ebaluaziorako Atalak horretarako emanen duen eredua beteta eta sinatuta.

Lanbide Heziketaren Antolamendu eta Ebaluaziorako Atalak jasotako dokumentazioa egiaztatu eta baliozkotuko du, ordainketa espedientea tramitatu ahal izateko eta, horretarako, beharrezkoa izanez gero, informazio gehigarria eskatzen ahalko die ebaluazio batzordeetako buruei.

61. Lanbide Heziketaren Antolamendu eta Ebaluaziorako Atalak dagokion unean jakinaraziko du zer egunetarako igorri behar zaion dokumentazio guztia.

Kalifikazioen ebaluazioa, erregistroa eta argitalpena.

62. Probak ebaluatzeko erreferentziak honako hauek izanen dira: lanbide modulu bakoitzeko gaitasunak, ikaskuntzaren emaitzak eta ebaluazio irizpideak, bai eta probak nola egiten diren eta egiteko ezartzen diren irizpideak ere.

Ikastetxe aztertzaileko iragarki-taulan kalifikazioak argitaratzea izanen da proben ariketa bakoitzean lortutako kalifikazioak jakinarazteko modu ofiziala.

Kalifikazioak proba baten zati bati dagozkionean, eta hurrengo zatia egin ahal izateko baldintza bada aurreko zatia gainditua izatea, modu berean argitaratuko dira kalifikazioak, hurrengo ariketa egin baino bost egun baliodun lehenago.

63. Lanbide modulu bakoitzeko ebaluazioaren zehaztapena eta, zein den kasua, heziketa zikloaren azken kalifikazioa martxoaren 5eko 21/2019 Foru Aginduaren 17. artikuluan ezarritako moduan eginen dira.

64. Lortutako kalifikazioen erregistroa Educa kudeaketa sisteman eginen da, martxoaren 5eko 21/2019 Foru Aginduaren 28. eta 29. artikuluetan xedatu bezala, foru agindu horretan finkatutako ebaluazio dokumentuetan, eta ebaluazio batzordearen baterako erantzukizuna izanen da.

65. Proba libreen deialdi honen amaierako ebaluazio saioa eginen da azken moduluari dagokion azken ariketa egin ondoko hamar egun baliodunean. Proba horretarako deia eginen da ebazpen honen 3. eranskinean ezarritako egutegiarekin bat.

Amaierako ebaluazio saio horretan, aktan jasoko da lanbide moduluetan lortutako kalifikazioa eta ikasleak titulua eskuratu duen ala ez. Ebaluazio akta horiek modulu bakoitzean sinatu beharko dira Lanbide Heziketaren zuzendari nagusiaren ebazpen bidez.

Heziketa zikloko amaierako ebaluazio saioan, kasuan kasuko kalifikazioak bete ondoren, akta itxiko da.

66. Amaierako ebaluazio saioa bukatu ondotik, ebaluazio batzordeko idazkariak emaitzaren berri emanen die ikasleei Educa sistemaren bidez edo beste plataforma informatiko batzuen bidez, eta ebaluazio saioko txostena helaraziko die. Txosten horretan, honako hauek zehaztu beharko dira gutxienez: ikastetxearen identifikazio datuak, ikaslearen identifikazioarenak eta ebaluazio prozesuari buruzko informazioa:

a) Ikastetxearen identifikazio datuak hauek dira, gutxienez: izena, titulartasuna, helbidea, posta kodea eta herria.

b) Ikaslearen identifikazio datuak hauek dira, gutxienez: izena, deiturak, NANa edo agiri baliokidea, egiten duen etapa, hizkuntza eredua, maila eta taldea.

c) Ebaluazio prozesuari buruzko gutxieneko informazio datuak dira: gaur egungo ebaluazioa, lanbide moduluen zerrenda eta haien kalifikazioa. Horrez gain, bidezkoa bada, adieraziko da Lantokiko Prestakuntzako moduluan sartu den ala ez, eta titulazioa eskuratu duen ala ez.

Kalifikazioen gaineko erreklamazioak.

67. Maiatzaren 21eko 49/2013 Foru Aginduan ezarritako prozeduraren arabera eginen dira kalifikazioen gaineko erreklamazioak (foru agindu horren bidez ezartzen baita Nafarroako Foru Komunitateko ikastetxeetan ematen diren unibertsitateaz kanpoko irakaskuntzetako ikasleak ebaluatzeko prozesuan erreklamazioak egiteko sistema).

Dokumentazio akademikoa.

68. Ikasleak matrikulatzen dituzten ikastetxeek ikasketa-espediente bana irekiko diete ikasleei, Lanbide Heziketako teknikari tituluak eskuratzeko probak egiteko.

69. Ebaluazioko dokumentuak eta ikasketen ziurtagiriak martxoaren 5eko 21/2019 Foru Aginduaren VIII. kapituluan ezarritakoak izanen dira.

Titulazioa.

70. Deialdiaren xedeko probak bukatuta, heziketa ziklo jakin bateko lanbide modulu guztiak gainditzen dituztenek dagokien titulua eskatzen ahalko dute, martxoaren 5eko 21/2019 Foru Aginduaren IX. kapituluan ezarri bezala.

Lantokiko Prestakuntza modulua.

71. Lantokiko Prestakuntza (LP) modulua aurrez aurre egin beharko da, titulu bakoitzeko Nafarroako curriculuma osatzen duten gainerako moduluak gainditu ondoren, eta honako bi baldintza hauek aldi berean betetzen dituzten ikasleek soilik egiten ahalko dute:

–Nafarroako curriculumean ezarritako zikloko gainerako moduluak gaindituak izatea, eta gainera

–Horietako azkenak Nafarroan titulua lortzeko proba libreen azken deialdian gaindituak izatea, dagokion titulazioan.

Lantokiko Prestakuntza moduluan egindako inskripzioak ez dira inola ere onartuko, baldin eta ezarritako bi baldintza horiek betetzen ez badira.

Ekainaren 27ko 76/2016 Foru Aginduaren eranskinaren 15.2 oinarrian ezarritakoaren arabera, Lantokiko Prestakuntza moduluan, deialdi honetan inskripzio orokorrerako adierazitako datetan eta baldintza hauek betetzen dituztenek soilik eman dezakete izena: hasteko, zikloko gainerako moduluak gaindituak izan behar dira, eta, gainera, horietako azkenak Nafarroan titulua lortzeko proben azken deialdian gaindituak izan behar dute.

Ez dira inola ere onartuko Lantokiko Prestakuntza moduluko inskripzioak, baldin eta pertsona horiek aipatutako baldintzak betetzen ez badituzte.

72. Era berean, 2023-2024 ikasturtean, norbait deialdi honen xedeko moduluetan matrikulatua egon, eta, ebazpen honen bidez deitutako moduluen azken kalifikazioak argitaratu ondoren, prestakuntza zikloko modulu guztiak gainditu baditu Lantokiko Prestakuntza modulua izan ezik, aukera hauetako bat egin beharko du:

a) Apirilaren 2ko 45/2009 Foru Aginduan xedatutakoaren arabera zikloarekin zerikusia duen beharrezko lan-esperientzia badu, Lantokiko Prestakuntza modulutik salbuesteko eskatu beharko du. Salbuespen eskaera hori bost egun balioduneko epean aurkeztu beharko da, ebaluazio saioaren emaitza ebaluazio txostenaren bidez jasotzen denetik edo Educa kudeaketa sisteman argitaratzen denetik zenbatzen hasita.

–Salbuespen eskaeraren aldeko ebazpena ematen bada, pertsona horrek Lantokiko Prestakuntza moduluan matrikulatu beharko du ikastetxe bakoitzak zehaztutako datetan, espedientean Lantokiko Prestakuntza modulutik salbuetsia dagoela sartu ahal izateko eta 2023-2024 ikasturtean titulua atera ahal izateko.

–Salbuespen eskaerari ezezkoa ematen bazaio edo zati batean bakarrik onartzen bada, eta, beraz, dagokion Lantokiko Prestakuntza aldia egin behar badu, pertsona horrek Lanbide Heziketako teknikari titulua lortzeko proben hurrengo deialdian izena eman eta matrikulatu beharko du, aipatu modulua modu presentzialean egin ahal izateko.

b) Lan-esperientziarik ez badu, pertsona horrek Lanbide Heziketako teknikari titulua lortzeko proben hurrengo deialdian izena eman eta matrikulatu beharko du, Lantokiko Prestakuntza modulua modu presentzialean egin ahal izateko.

Izangaientzako orientazioa.

73. Ikastetxe aztertzaileek beharrezko neurriak hartuko dituzte, deialdi honen xedeko Lanbide Heziketako teknikari tituluak lortzeko probetan ikastetxe horretan izena eman nahi dutenek bermatua izan dezaten ebaluazio batzordearen aldetik informazio eta orientazio egokia jasotzeko aukera, bai erreklamatzeko epe eta prozesuei dagokienez, bai proba libreak egiteko bestelako inguruabar batzuei buruz.

74. Ikastetxe aztertzaileetako zuzendaritzak bermatuko ditu arreta eta orientazio horiek; dagokion ebaluazio batzordearen ardura izanen da hori, eta ikastetxe aztertzaileko Orientazio Departamentuko langileek laguntza ematen ahalko diote.

Informazioaren tratamendua.

75. Ikastetxe aztertzaileek Educa aplikazioa erabiliko dute matrikulatuta dauden ikasleen datu pertsonal eta akademiko guztiak grabatu, prozesatu eta tratatzeko. Orobat, Lanbide Heziketaren Plangintza eta Integraziorako Zerbitzuaren eskura jarriko dute aipatu aplikaziotik zuzenean lortu ezin den informazio osagarria.

76. Prozedura tramitatzean datu pertsonalekin egiten den edozein tratamendutan, Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan xedatutakoa bete beharko da.

Deialditik kendu diren zikloak.

76. 2022-2023ko proba libreen deialdiaz geroztik, azken deialdietan matrikulazio apala izan duten heziketa zikloak eskaintzeari utzi zaio: Beroa Sortzeko Instalazioen teknikariena, Mekanizazioko teknikariena, Elektromekanikako Mantentze-lanetako teknikariena eta Administrazio Kudeaketako teknikariena. Halere, heziketa ziklo horien moduluren bat gainditu dutenek aurreko ikasturteetan, Nafarroan, Lanbide Heziketako teknikarien tituluak lortzeko proben deialdietan, ziklo horren barneko beren aukerako moduluetan izena ematea eskatzen ahalko dute, moduluak zer ikastetxetan gainditu zituzten, hartara eskaera bat igorriz.

77. Egoera horretan diren ikasleei aplikatuko zaizkie proba hauetan izena ematen duten gainerako ikasleei aplikatzen zaizkien oinarri berberak. Aukera hori 2023-2024 ikasturteko proba libreen deialdian baliatu daiteke, baina aurrerantzean ez da aukera hori izanen.

2. ERANSKINA.–ZER HEZIKETA ZIKLOTARAKO EGITEN DEN PROBEN DEIALDIA, LANBIDE HEZIKETAKO TEKNIKARI ETA GOI MAILAKO TEKNIKARI TITULUAK LORTZEKO 2023-2024 IKASTURTEAN

Titulua: ERIZAINTZAKO ZAINKETA LAGUNGARRIETAKO teknikaria.

Lanbide arloa: Osasuna.

Zikloaren maila: erdi mailakoa.

Nafarroako curriculuma: 153/1996 Foru Dekretua, martxoaren 18koa (1996ko maiatzaren 31ko Nafarroako Aldizkari Ofiziala).

Plaza kopurua, modulu eta ikastetxe bakoitzeko: 30 plaza gehienez, oro har.

Ikastetxe aztertzaileak (izena emateko eta probak egiteko ikastetxeak):

–Nafarroako Lanbide Eskola Tekniko Sanitarioa IB -ESTNA.

Irunlarrea 3 (Nafarroako Ospitalegunea). 31008 Iruña.

Tel.: 848 431060.

http://escuelasanitaria.educacion.navarra.es/web/

escuela.sanitaria@educacion.navarra.es

–Lizarrako IB Politeknikoa.

San Pol 8. 31200 Lizarra.

Tel.: 948 550412.

http://politecnicoestella.educacion.navarra.es/web/index.php/es/

politecnicoestella@educacion.navarra.es

–ETI IBP

Tarazona etorb. z.g. 31500 Tutera.

Tel.: 848 430140.

https://eti-paginaweb.blogspot.com.es/

cipeti@educacion.navarra.es

Zikloko modulu guztiak eskaintzen dira:

Titulua: OSASUN LARRIALDIETAKO teknikaria.

Lanbide arloa: Osasuna.

Zikloaren maila: erdi mailakoa.

Nafarroako curriculuma: 43/2009 Foru Dekretua, maiatzaren 4koa (2009ko abuztuaren 21eko Nafarroako Aldizkari Ofiziala); azken aldaketa: 27/2018 Foru Dekretua, apirilaren 25ekoa (2018ko ekainaren 28ko Nafarroako Aldizkari Ofiziala).

Plaza kopurua, modulu eta ikastetxe bakoitzeko: 30 plaza gehienez, oro har.

Ikastetxe aztertzailea (izena emateko eta probak egiteko ikastetxea):

–Nafarroako Lanbide Eskola Tekniko Sanitarioa IB - ESTNA.

Irunlarrea 3 (Nafarroako Ospitalegunea). 31008 Iruña.

Tel.: 848 431060

http://escuelasanitaria.educacion.navarra.es/web/

escuela.sanitaria@educacion.navarra.es

Zikloko modulu guztiak eskaintzen dira:

Titulua: MENDEKOTASUNA DUTEN PERTSONEI ARRETA EGITEKO teknikaria.

Lanbide arloa: Gizarte eta Kultura Zerbitzuak eta Komunitatearentzako Zerbitzuak.

Zikloaren maila: erdi mailakoa.

Nafarroako curriculuma: 82/2012 Foru Dekretua, abuztuaren 1ekoa (2012ko abenduaren 27ko Nafarroako Aldizkari Ofiziala); azken aldaketa: 27/2018 Foru Dekretua, apirilaren 25ekoa (2018ko ekainaren 28ko Nafarroako Aldizkari Ofiziala).

Plaza kopurua, modulu eta ikastetxe bakoitzeko: 30 plaza gehienez, oro har.

Ikastetxe aztertzailea (izena emateko eta probak egiteko ikastetxea):

–Hezitzaile Eskola IB.

Kale Nagusia 65 (Ezpeleta Jauregia). 31001 Iruña.

Tel.: 848 430970.

http://escuelaeducadores.educacion.navarra.es/eu/

escuela.educadores@educacion.navarra.es

Zikloko modulu guztiak eskaintzen dira:

Modulu eta ikastetxe bakoitzeko 30 plaza eskaintzen dira.

3. ERANSKINA.–NAFARROAN, 2023-2024 IKASTURTEAN, LANBIDE HEZIKETAKO TEKNIKARI TITULUAK LORTZEKO PROBA LIBREETARAKO DEIALDI OROKORRAREN EGUTEGIA

Iragarkiaren kodea: F2317808