1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
173/2024 FORU AGINDUA, maiatzaren 27koa, Eskubide Sozialetako, Ekonomia Sozialeko eta Enpleguko kontseilariak emana, zeinaren bidez aldatzen baita Garapen Ekonomikorako kontseilariaren azaroaren 3ko 222/2016 Foru Agindua. Foru agindu horren bidez, erakunde sindikalek eta enpresaburuen erakundeek Elkarrizketa Sozialaren Kontseiluan eta Nafar Lansare-Nafarroako Enplegu Zerbitzuan parte hartzeagatik jasoko dituzten konpentsazioak arautu ziren.
Garapen Ekonomikorako kontseilariak azaroaren 3an emandako 222/2016 Foru Aginduaren bidez, erakunde sindikalek eta enpresaburuen erakundeek Elkarrizketa Sozialaren Kontseiluan eta Nafar Lansare-Nafarroako Enplegu Zerbitzuan parte hartzeagatik jasoko dituzten konpentsazioak arautu ziren.
Arau horren 1.2.b) artikuluaren arabera, Nafar Lansare-Nafarroako Enplegu Zerbitzuko ondoko bilkura hauetara joateagatik emanen zaie konpentsazioa erakunde sindikalei eta enpresaburuen erakundeei: Gobernu Kontseiluaren bilerak, Enplegu politiken jarraipena egiteko batzordearen bilerak eta Orientazioaren, enplegu sustapenaren eta enpresentzako zerbitzuen arloko lan batzordearen bilerak.
Otsailaren 7ko 13/2024 Foru Dekretuaren bidez, Nafar Lansare-Nafarroako Enplegu Zerbitzuaren estatutuak onetsi ziren. Arau horren bigarren atalak lan batzordeak arautzen ditu, eta bi berrikuntza jasotzen ditu 222/2016 Foru Aginduan aipatutakoekin alderatuta.
Batetik, 9. artikuluan, Enplegurako Orientazio, Ekintzailetza, Laguntza eta Berrikuntza Zentroko Gizarte Kontseilua arautzen da, zeina sartu baita Nafar Lansare-Nafarroako Enplegu Zerbitzuko lan batzordeen artean. Bestetik, 10. artikuluan, Betetzeko zailak diren lanbideen Katalogoko Batzordea arautzen da. Horren xedea da Estatuko Enplegu Zerbitzu Publikoak eta Nafar Lansare-Nafarroako Enplegu Zerbitzuak emandako informazioa aztertzea, bai eta lan merkatuari buruzko informazioa ere, gero proposamenak egiteko Betetzeko zailak diren lanbideen Katalogoan sar litezkeen lanbideei buruz. Horretarako, Nafar Lansare-Nafarroako Enplegu Zerbitzuko lan batzordeen artean sartu da batzorde hori.
Erakunde sindikal eta enpresaburuen erakunde guztiei bi organo horietan parte hartzeko gonbidapena egin ondotik, honako hau da Enplegurako Orientazio, Ekintzailetza, Laguntza eta Berrikuntza Zentroko Gizarte Kontseiluaren eta Betetzeko zailak diren lanbideen Katalogo batzordearen osaera: UGT, CCOO eta CEPESeko ordezkari 1 eta Nafarroako Enpresaburuen Konfederazioko (CEN) bi ordezkari.
Enplegurako Orientazio, Ekintzailetza, Laguntza eta Berrikuntza Zentroko Gizarte Kontseilua urtean bitan biltzen da, gutxienez, bilkura arruntean, eta bilkura berezian, aldiz, kontseilukideren batek eskatzen duenean.
Betetzeko zailak diren lanbideen Katalogo batzordea hiru hilean behin biltzen da, gutxienez, bilkura arruntean, eta beharrezkoa denean, aldeetako edozeinek proposatuta.
Nafar Lansare-Nafarroako Enplegu Zerbitzuko zuzendari kudeatzailearen ustez beharrezkoa da Garapen Ekonomikorako kontseilariaren azaroaren 3ko 222/2016 Foru Aginduaren 1.2.b) artikulua aldatzea, halako moduz non Enplegurako Orientazio, Ekintzailetza, Laguntza eta Berrikuntza Zentroko Gizarte Kontseilua eta Betetzeko zailak diren lanbideen Katalogo batzordea dirulaguntza jasotzen ahal duten erakundetzat hartuko diren, legeak eragile sozial eta ekonomikoetarako aurreikusitako partaidetza organoak baitira. 222/2016 Foru Aginduaren bidez, erakunde sindikalek eta enpresaburuen erakundeek Elkarrizketa Sozialaren Kontseiluan eta Nafar Lansare-Nafarroako Enplegu Zerbitzuan parte hartzeagatik jasoko dituzten konpentsazioak arautu ziren.
Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1 e) artikuluak ematen dizkidan eskudantziak erabiliz,
AGINTZEN DUT:
1. Aldatzea Garapen Ekonomikorako kontseilariaren azaroaren 3ko 222/2016 Foru Aginduaren 1.2.b) artikulua (foru agindu horren bidez arautu ziren erakunde sindikalek eta enpresaburuen erakundeek Elkarrizketa Sozialaren Kontseiluan eta Nafar Lansare-Nafarroako Enplegu Zerbitzuan parte hartzeagatik jasoko dituzten konpentsazioak). Honela idatzita geldituko da:
"b) Nafar Lansare-Nafarroako Enplegu Zerbitzua: Gobernu Kontseiluaren, Enplegu politiken jarraipena egiteko batzordearen, Orientazioaren, enplegu sustapenaren eta enpresentzako zerbitzuen arloko lan batzordearen, Enplegurako Orientazio, Ekintzailetza, Laguntza eta Berrikuntza Zentroko Gizarte Kontseiluaren eta Betetzeko zailak diren lanbideen Katalogoko batzordearen bilerak".
2. Xedatzea ezen, foru agindu honetan araututako konpentsazioak ordaintzeko, aintzat hartuko direla Enplegurako Orientazio, Ekintzailetza, Laguntza eta Berrikuntza Zentroko Gizarte Kontseiluak eta Betetzeko zailak diren lanbideen Katalogoko batzordeak 2024ko urtarrilaren 1etik 2024ko abenduaren 31ra bitarte egindako bilerak.
3. Agintzea Nafarroako Aldizkari Ofizialean argitara dadila, behar diren ondorioak izan ditzan.
Iruñean, 2024ko maiatzaren 27an.–Eskubide Sozialetako, Ekonomia Sozialeko eta Enpleguko kontseilaria, M.ª Carmen Maeztu Villafranca.
Iragarkiaren kodea: F2408598
