128. ALDIZKARIA - 2024ko ekainaren 21a

1. NAFARROAKO FORU KOMUNITATEA

1.7. BESTELAKOAK

221/2024 EBAZPENA, ekainaren 6koa, Hezkuntzako zuzendari nagusiak emana, zeinaren bidez onesten baitira Nafarroako Foru Komunitatean Haur Hezkuntzako, Lehen Hezkuntzako, Derrigorrezko Bigarren Hezkuntzako, Batxilergoko eta Hezkuntza Bereziko irakaskuntzak ematen dituzten ikastetxeen antolaketa eta funtzionamendua 2024-2025 ikasturtean arautuko dituzten jarraibideak.

Ebazpen honen xedea jarraibide batzuk onestea da, indarreko araudiko zenbait alderdiren xehetasunak eman eta garatzeko balio dutenak, ikastetxeen antolaketa egokia eta funtzionamendu ona lortzeko, 2024-2025 ikasturtean.

Antolamendu, Prestakuntza eta Kalitate Zerbitzuko zuzendariak aurreko puntuan adierazitako jarduketak arautzeko ebazpen hau onestearen aldeko txostena aurkeztu du.

Hezkuntza Departamentuaren egitura organikoa ezartzen duen azaroaren 15eko 245/2023 Foru Dekretuak emandako ahalmenak erabiliz,

EBAZTEN DUT:

1. Ebazpen honen eranskinetan ageri diren jarraibideak onestea. Jarraibide horiek arautuko dituzte, 2024-2025 ikasturtean, Nafarroako Foru Komunitatean Haur Hezkuntzako, Lehen Hezkuntzako, Derrigorrezko Bigarren Hezkuntzako, Batxilergoko eta Hezkuntza Bereziko irakaskuntzak ematen dituzten ikastetxeen antolaketa eta funtzionamendua.

2. Ebazpen honetan aipatutako jarraibideak ikastetxe pribatuei eta ikastetxe pribatu itunduei aplikatuko zaizkie, dagozkien afera orotan, ikastetxe horien titularrek dituzten eskumenen kalterik gabe.

3. Ebazpen honen eta haren eranskinen aurka gora jotzeko errekurtsoa jar daiteke, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

4. Ebazpen hau eta haren eranskinak Nafarroako Aldizkari Ofizialean argitaratzea.

5. Ebazpen hau eta haren eranskinak igortzea, behar diren ondorioak izan ditzaten, Langileriaren eta Azpiegituren Zuzendaritza Nagusira; Lanbide Heziketako, Digitalizazioko eta Hezkuntza Zerbitzuetako Zuzendaritza Nagusira; Antolamendu, Prestakuntza eta Kalitate Zerbitzura; Haur Eskolen Zerbitzura; Eleaniztasunaren eta Arte Ikasketen Zerbitzura; Inklusio, Berdintasun eta Bizikidetza Zerbitzura; Hezkuntzako Ikuskapen Zerbitzura; Hezkuntzako Teknologien eta IKT Azpiegituren Zerbitzura; Hezkuntzako Informazio Sistemen Zerbitzura, eta Ikastetxeetako Informazioa Kudeatzeko Atalera.

Iruñean, 2024ko ekainaren 6an.–Hezkuntzako zuzendari nagusia, Gil Sevillano González.

I. ERANSKINA.–HAUR HEZKUNTZAKO ETA LEHEN HEZKUNTZAKO IRAKASKUNTZAK EMATEN DITUZTEN IKASTETXEEN ANTOLAKETA ETA FUNTZIONAMENDUA 2024-2025 IKASTURTEAN ARAUTZEKO JARRAIBIDEAK

Ikasturte hasierako jarraibideek indarreko araudiaren alderdi batzuk zehaztu eta argitzen dituzte, eta arautu gabeko beste batzuk arautzen, ikastetxeen antolaketa eta funtzionamendua hobetzeko. Horrez gain, ikasturtean lehentasunez landu behar diren ildoak ezartzen dituzte.

Jarraibideak hiru kapitulutan daude bereizita:

Lehenbizikoa, Urteko Programazio Orokorrari buruzkoa da. Hor, beste batzuen artean, ikastetxearen hobekuntza planak prestatzeko argibideak ematen dira, bai eta ebaluazioetan duten parte-hartzearen gainekoak ere, hobetu daitezkeen eremuak detektatzeko.

Bigarrenean, antolaketaren alderdi batzuk zehazten dira, ikastetxearen funtzionamendurako beharrezkoak direnak.

Hirugarrenean, gehien erabiltzen diren LOEren ondoriozko arauak zerrendatzen dira.

I.–URTEKO PROGRAMAZIO OROKORRA

A) Alderdi orokorrak

1.–Xedapen orokorrak.

Urteko Programazio Orokorra (UPO) ikastetxearen plangintzarako, antolaketarako eta funtzionamendurako oinarrizko tresna da. Haren bidez, ikasturtean zehar garatuko diren hezkuntza proiektua, antolaketa eta funtzionamendu arauak eta kudeaketa proiektua zehaztea errazten da.

Dokumentu hori prestatzeko orduan, zorroztasuna, erraztasuna eta erabilgarritasuna hartuko dira kontuan.

UPOa prestatzeko, segimendua egiteko eta ebaluatzeko orientazio gida eskola kudeaketako EDUCA sisteman egonen da eskuragai (adibideak jasotzen ditu).

2024-2025 ikasturtean, proiektu pilotu bat martxan jarri da, Haur eta Lehen Hezkuntzako ikastetxe batzuetan Haur Hezkuntzako lehen zikloa eskaini dadin.

Ikastetxe horiek Haur Hezkuntzako lehen zikloa sartuko dute hezkuntza proiektuan eta UPOan, eta, betiere, bete eginen dute Hezkuntzako zuzendari nagusiak eman apirilaren 12ko 117/2024 Ebazpenean ezarritakoa (ebazpen horren bidez jarraibide batzuk onesten dira 2024-2025 ikasturteko egutegia eta ordutegia prestatzeko, Nafarroako Foru Komunitateko Haur Hezkuntzako lehen zikloko ikastetxeetarako).

2.–Informazioa biltzeko iturriak.

UPOa prestatzeko, iturri hauek aztertzearen ondoriozko jarduketa ildoak hartuko dira kontuan:

a) Aurreko ikasturte bukaerako memorian proposatutako hobekuntza eremuak.

b) Barneko eta kanpoko proben emaitzen analisia, baita hobetzeko proposamenak ere.

c) 2023-2026 aldirako hobekuntza plana, autoebaluazio prozesutik eratorria.

d) Zuzendaritza proiektua edo plan estrategikoa.

e) Aurreko ikasturteko gainbegiratze prozesuen ondorioz Hezkuntzako Ikuskapen Zerbitzuak nabarmendutako alderdiak eta gomendioak.

f) Hezkuntza Departamentuak ematen dituen ikasturte hasierako jarraibideak.

g) Ikastetxean ezarritako bestelako programak. Bereziki jorratuko dira ikastetxeko berrikuntza eta eraldatze orokorreko programak.

h) Ikastetxearen kalitatea kudeatzeko sistemaren autodiagnostikoa, halakorik bada.

i) Ikastetxeko Plan Digitala.

3.–Edukia: atalak eta garapena.

Urteko Programazio Orokorrean honako alderdi hauek formalizatu beharko dira, indarreko araudiarekin bat:

a) Sarrera.

b) Ikastetxearen Urteko Plana.

c) Zikloetako eta beste talde batzuetako planak.

d) Urteko Inklusio Plana.

e) Urteko Tutoretza Plana / Orientazio Akademikoaren Urteko Plana.

f) Urteko Bizikidetza Plana.

g) Hezkidetza Plana.

h) Ikastetxearen Hizkuntza Proiektua, ikasturtekoa.

i) Irakaskuntza-programazioak.

j) Ikastetxearen beste plan batzuk.

k) Proiektu eta programa instituzionalak.

l) Ikastetxearen Prestakuntza Plana.

m) Ikastetxeko Plan Digitala.

n) Jarduera osagarrien eta eskolaz kanpokoen programazioa.

o) Urteko Programazio Orokorraren jarraipena eta ebaluazioa.

p) Eranskinak.

Ikastetxearen urteko plana da UPOaren elementu garrantzitsuenetako bat; izan ere, hortik abiatuta, organo eta taldeen jarduketa ildo nagusiak ezarri behar dira. Ikasturterako lehentasunez lortu nahi diren helburuak jasoko ditu, baita proposatutako helburuak eta jomugak lortzeko abian jarri behar diren ekintza garrantzitsuenak ere. Gauzatu beharreko ekintza edo zeregin horiek konponbide teknikoak eta neurri zehatzak eskaintzen dizkiete zikloei.

Zikloek eta gainerako lantaldeek (Hezkuntzarako Laguntza Unitatea, ikastetxeko Bizikidetza Batzordea eta abar) helburuen eta ekintzen plan propioa izanen dute, eta, horren bidez, urteko planean zehaztutako lehentasunezko helburuak ez ezik, ikastetxeko beste plan espezifiko batzuetatik ateratako helburuak ere formalizatuko dituzte.

Horrez gainera, ikastetxean ikasturtean ezarri gogo diren beste jarduketa plan espezifiko batzuk jasoko dira, bai eta ezarri behar diren beste proiektu eta programa propio batzuk ere.

Planen egitura operatiboari dagokionez, haien gauzatzea eta segimendua errazteko modukoa izanen da, eta honako hauek zehaztuko ditu: helburuak, adierazleak, noraino iritsi nahi den, ekintzak, arduradunak, denbora-plangintza eta ebaluazioa.

Ikastetxeko Plan Digitala kanpoan aurkezteko esportatu behar den dokumentua denez, EDUCAn horretarako prestatu den txantiloian sartu beharko da.

4.–Prestaketa.

UPOaren prestaketa koordinatzearen erantzukizuna zuzendaritza-taldeak izanen du, baina lan hori beste pertsona edo batzorde batzuen esku utz dezake.

Dokumentuaren eskema bat emanen da, parte hartu behar duten taldeak eta pertsonak finkatuko dira, talde bakoitzaren eginkizunak zehaztuko dira, tresna eta baliabideak jarriko dira eta denbora emanen da.

Kasuan kasuko ikasturtean dauden beharrak eta aurreikuspenak azterturik, eta kontuan harturik organo bakoitzaren deliberoak eta erabakiak eta egindako oharrak eta ekarpenak, UPOaren atalak idatziko dira.

UPOa EDUCA aplikazioarekin eginen da; horretarako, ikastetxearen plan digitalaren eta hobekuntza planaren antzeko txantiloia eta jardunbidea izanen ditu.

5.–Tramitazioa, jarraipena eta ebaluazioa.

Behin onetsirik, UPOa EDUCA aplikazioan argitaratuko da, urriaren 31 baino lehen. Ikastetxean ere utziko da, hezkuntza komunitateak eskura izan dezan.

Ikastetxeko zuzendaritza-taldeak eta arduradunek aldizka eginen dute, EDUCA aplikazioaren bidez, UPOa osatzen duten planen, proiektuen eta programen garapen mailaren jarraipena.

Hori baino lehen, segitu beharreko prozedura finkatuko da (nola), informazioa biltzeko irizpideak zehaztuko dira (zer), arduradunak izendatuko dira (nork) eta epeak finkatuko dira (noiz).

Aztertu eta baloratuko da zenbateraino garatu diren proposatutako ekintzak, erantzukizunak nola bete diren, denbora-plangintza konplitu den eta proposatutako helburuak lortu diren.

Ikasturtea amaitzean, ikastetxeko eskola kontseiluak, irakasleen klaustroak eta zuzendaritza-taldeak UPOaren betetze mailari buruzko amaierako ebaluazioa eginen dute. Horretarako, arduradun bakoitzak dagokion planaren, proiektuaren edo programaren emaitzak aztertuko ditu.

Atal bakoitzaren ebaluazio prozesuan, datu esanguratsuak jasoko dira bateko eta besteko iturrietatik (datuak, iritziak, ohartarazpenak eta abar), eta gero, datu horiek aztertu eta interpretatuko dira aurreikusitako irizpideei jarraikiz.

Amaierako hausnarketa eta balorazioa ez da kuantitatiboa soilik izanen, emaitza horien arrazoiak baloratuko baitira.

EDUCA aplikazioan bertan, ikasturte bukaerako memorian bilduko dira UPOaren jarraipen eta ebaluazio prozesuan lortutako ondoriorik eta proposamenik garrantzitsuenak.

Dokumentuak bi dimentsio izanen ditu. Lehenik, ebaluazioaren dimentsioa, ikastetxeko urteko plangintzaren garapenari buruzko balantzea erakutsiko duena. Honako alderdi hauek nabarmenduko dira: proposatutako ekintzak zenbateraino bete diren, erantzukizunak nola bete diren, denbora-plangintza egokia izan den, aldizkako jarraipena egin den eta helburuak zenbateraino bete diren (adierazleen eta helmugen arabera). Bigarrenik, dimentsio proiektiboa izanen du, etorkizunean esku hartzeko ildoak eskainiko baititu, zentzuzko hobekuntza proposamenak zehaztuta.

Azkenik, ikasturte bukaerako memoriaren eranskin gisa, txosten bat gehituko da, barne ebaluazioetan (emaitza akademikoak) eta kanpo ebaluazioetan (diagnostikoak eta abar) ikasleek lortutako ikaskuntza-emaitzen analisi zehatza biltzen duena, eta, horrekin batera, hausnarketa bat eginen da emaitza horiek eragin dituzten zergatiei buruz eta, hala badagokio, curriculum-elementuen, materialen, antolaketa-elementuen eta baliabide pertsonalen funtzionamenduan atzeman diren gabezia eta disfuntzioei buruz.

Behin onetsita, ikasturte bukaerako memoria ikastetxeko erreferentziazko ikuskatzailearen eskura jarriko da, EDUCA plataformaren bidez, uztailaren 10a baino lehen.

6.–Gainbegiratzea.

Ikastetxeko erreferentziazko ikuskatzaileak UPOa eta ikasturte bukaerako memoria gainbegiratuko ditu, egiaztatzeko bat datozela indarreko araudiarekin eta ikastetxearen behar eta emaitzekin, eta, hala badagokio, behar diren zuzenketak eta doikuntzak egitea eskatuko du.

7.–UPOaren eranskinak.

Eranskin gisa sartuko dira irakaskuntza programazioen adostasun agiriak.

UPOarekin batera, irakaskuntza programazioen adostasun agiriak aurkeztuko dira, ziurtatzearren programazioak egoki jaso dituela eskatzen diren atal guztiak. Hortaz, programazio horiek gordetzeko ardura ikastetxeei dagokie. Dena dela, beharrezkoa den kasuetan, Hezkuntza Departamentuko dagokion zerbitzuak programazioa berariaz eskatzen ahalko du, irakaskuntza ikuskatzeko prozesuetan sartzen direlako, kalifikazioen erreklamazio kasuetan, analisi estatistikoak egiteko edo beste arrazoi batzuengatik.

Irakaskuntza programazioen adostasun ereduak eskuragarri egonen dira, eranskin gisa, UPOan, EDUCAn.

B) UPOari buruzko argibideak

1.–Autoebaluazioa eta ikastetxearen hobekuntza plana.

2022-2023 ikasturtean zehar, autoebaluazioaren esparruan, ikastetxeetan baterako hausnarketako prozesu bat egin zen, eta horren ondorioz, haien jarduna hobetzeko zenbait eremu detektatu ziren. Ondoren, eta hautemandako beharrei erantzunez, hobekuntza planak egin ziren. Plan horiek EDUCA plataforman erregistratu ziren (Ikastetxea > Dokumentazio instituzionala > Hobekuntza plana).

Plan horiek prestatu ondoren, bai ikastetxearen Hobekuntza Orokorreko Plana, bai zikloetako Hobekuntza Planak, 2023-2026 aldian jarriko dira abian, eta haien jarraipena eta ebaluazioa eginen da.

Horretarako, 2023-2024 ikasturtean, Hobekuntza Planetan jasotako beharrei ikastetxeek lehenengo erantzun bat eman zieten UPOaren planen bidez. Planak abian jartzeko bigarren ikasturte honetan, ikastetxeko zuzendaritzak, 2024-2025 ikasturteko Urteko Programazio Orokorrean ikastetxearen urteko planaren urteko helburuak ezartzeko garaian, Hobekuntza Orokorreko Planean ezarritako helburuak hartuko ditu kontuan, besteak beste. Bestalde, UPOan sartutako zikloen urteko planetan, taldeek jaso beharko dituzte, helburuak zehaztean, autoebaluazio-prozesutik eratorritako zikloen hobekuntza planen helburuak.

Halaber, aipatzekoa da Hobekuntza Orokorreko Planen eta zikloen planen ebaluazioa egin beharra dagoela 2023-2026 aldiko ikasturte bakoitzaren amaieran, 2024., 2025. eta 2026. urteetan. Hau da, baloratu beharko da noraino lortu diren helburuak nahiz noraino gauzatu diren planteatutako ekintzak, eta hobetzeko proposamenak eginen dira. Ebaluazio hori EDUCAn erregistratuko da, horretarako diseinatutako txantiloi digitaleko ataletan (ebaluazioa, balorazioa eta hobekuntzak).

Hezkuntzako Ikuskapen Zerbitzuak 2024-2025 ikasturtean gainbegiratuko du ikastetxearen urteko planak eta zikloen planek jasotzen dituztela hobekuntza planean ikasturterako adostutako helburuak.

Hezkuntza Departamentuak lagunduko du ikastetxeen hobekuntza planaren helburuak garatzen eta lortzen, departamentuko zerbitzuen bidez, orientabideak, proposamenak, jardunbide egokien adibideak eta, hala badagokio, prestakuntza emanez irakasle-taldeari.

Ikastetxearen prestakuntza plana funtsezko elementua da prestakuntza instituzionalerako. Zuzendaritza-taldeak ezarriko du haren edukia eta, betiere, hobekuntza planaren ondoriozko premiei erantzun beharko die. Landa eskoletan, zuzendaritza-taldeek adostuko dute Eremuko Prestakuntza Planaren edukia. Eremuko koordinatzaileari dagokio zuzendaritzek onetsitako jarduerak eta ekintzak kudeatzea.

2.–Aniztasunari erantzutea.

Ikastetxea da, bere osotasunean, bertako ikasle guztien aniztasunari erantzun inklusiboa eta hezkidetzan oinarritua emateko arduraduna, haien presentzia, parte-hartzea eta ikaskuntza bermatuz, eta, horretarako, konpromiso irmoa erakutsi behar du bikaintasunaren, ekitatearen eta genero-berdintasunaren printzipioekin, hezkuntza inklusiboaren oinarri diren aldetik.

Ikasleen aniztasunari ahalik eta egokien erantzuteko, funtsezkoa da irakasle-talde osoaren lana. Ikaskuntzarako sarbidea oztopatzen duten trabak hautematea izanen du ardatz, eta horiek ezabatzeko helburuak zein diren adierazi behar du (hobekuntza planean jaso beharko dira helburuok). Erantzun hori ikasturtea antolatzeko alderdi nagusietako bat izan behar da.

Hezkuntza premiaren bat duten ikasleei lagundu ahal izateko ezarriko diren ikaskuntzan sartzeko neurriak jaso beharko dira.

Inklusio Plana Hezkuntza Departamentuko Inklusio, Berdintasun eta Bizikidetza Zerbitzura bidaliko da, urriaren 31 baino lehen.

Arreta handiz zainduko da Hizkuntzaren Estimulazio eta Prebentzio Programa garatzea haur hezkuntzako etapan eta lehen hezkuntzako lehen zikloan.

2.1. Antolaketari dagozkion alderdiak.

Ikastetxeak koordinazio bide eraginkor bat ezarriko du bermatzeko irakasle-talde osoak modu koherentean jokatzen duela ikasleei hezkuntza arreta inklusiboa eta hezkidetzan oinarritutakoa ematean, eskola-ibilbide osoan. Arreta inklusiboa ikastetxeen antolaketa egitura guztietan landu beharko da.

Ikaskuntza eta irakaskuntza prozesuetako hasierako ebaluazioa baterako berrikuspen tresna da, ikasleentzako hezkuntza erantzun inklusiboa eta hezkidetzakoa planifikatzeko eta diseinatzeko. Irakasle-taldeak zehaztuko ditu, tutorea haren buru izanik eta elkarren artean ados jarrita, hezkuntzaren arloko esku-hartzeari erantzuna emanen dioten hezkuntza neurriak, neurri metodologikoak, antolamendukoak edo curriculumekoak.

Koordinazioa jarraitua izanen da, garatutako jarduketen jarraipen xehea, doikuntza eta ebaluazioa egiteko, kontuan hartuz edozein unetan detektatzen ahal direla ikasle guztiek aurrera egitea eragozten duten oztopoak.

Neurrien ezarpenak testuinguruko paradigmari erantzunen dio Ikaskuntzaren Diseinu Unibertsalaren (IDU) ikuspegitik, hala, curriculumaren malgutasuna sustatuz, curriculuma irekia eta inklusiboa izateko hasieratik, etorkizuneko beharrezko eta ekidin ezinezko egokitzapenak murrizten saiatuz.

Salbuespenezkoagoak diren bestelako neurriak antolatuko dira jarduketa oso zehatz eta justifikatuei erantzuna emateko soilik, ohiko testuinguruan egin ezin daitezkeenak, hain zuzen ere.

Premiak goiz hauteman ahal izateko, gomendatzen da Nafarroako Hezkuntza Ekitaterako Baliabide Zentroak horren beharra duten ikasleentzat prestatutako protokolo berriak erabiltzea.

Espezialistek (PTa, EH, Lehen Hezkuntzako laguntza irakasleak) partekatutako irakaskuntza gauzatuko dute, zenbait helburu indartzeaz gain, ikasle guztiek parte hartzeko. Partekatutako irakaskuntza koordinatzeko plan bat ezarriko da, ikaskuntza prozesuan profil bakoitzari esleitutako funtzioak eta zereginak zedarrituko dituena, eta Inklusio Planean jasoko da.

Salbuespen gisa ohiko ikasgelatik kanpoko laguntza ezarri beharra justifikatu behar denean, honako hauek zehaztuko dira: erabaki horren arrazoia eta xedea, lortu nahi diren helburuak eta testuinguru arruntean horiei erantzuteko dagoen ezintasunaren zergatia. Era berean, zehaztu eginen da zenbat denborarako aurreikusi den halako esku-hartzea, kontuan hartuz ikasgelatik kanpoko saio kopurua ahalik eta txikiena izan behar dela.

Ikasle sartu berrien kasuan, ikasturte honetarako kendu ezin direnean ikaskuntzan sartzeko egun dauden hezkuntzako oztopo zehatzak, aztertuko da, ezarritako prozedurari jarraituz, ea ikasleak eskolatu daitezkeen ikastetxearen egituretan. Egitura horiek (Egitura Espezifikoak) aukera ematen dute hezkuntzaren arloko oztopo horiek murrizteko, testuinguruak ematen baitu ikasleei egokitutako erantzun bat. Ikastetxeek bultzatuko dute egitura horietako ikasleak sar daitezen bai erreferentziazko taldeetan baita ikastetxeko jarduera guztietan ere.

Kasu horietan guztietan, bideratze txostenetan zehaztu beharko da proposatutako egiturak zer eskaintzen dien ikasleei, ohiko esparruan bete ezin dena, hain zuzen ere.

Ikastetxea aldatzea dakarren neurri edo egitura bat proposatzeko, kasu oso berezia izan behar da, eta aniztasunari erantzuteko bide arrunt guztiak agortu ondoren ezarriko da hori. Eskolatze-aldi arruntean kudeatu beharko da, horretarako ezarritako protokoloak zehatz-mehatz beteta.

Egitura espezifikoen programazio didaktikoak ikasgelako tutoreen erantzukizuna dira.

Curriculumaren egokitzapen esanguratsuak arlo bakoitzeko irakasleen erantzukizuna dira; horien berri eman behar diote egokitzapenak dituzten ikasleen taldeko tutoreari.

Hezkuntza orientazioko langileek programazioak eta curriculum egokitzapenak egiten lagunduko diete irakasleei, eta aholkuak emanen dizkiete.

Irakasle-talde osoari dagokio ikasleen autonomia garatzea. Ingurunean oztopo zehatz batzuk egoteagatik, zenbait ikaslek talde osoaren laguntza behar dute.

Hezkuntza laguntzako langile espezialistekin elkarlanean zehaztu eta aplikatuko da "Autonomia pertsonaleko eta gizarte integrazioko programa", ikaslearen autonomia, garapen pertsonala eta curriculumean sartzeko aukerak sustatze aldera. Programa horretan ikastetxe osoa dago sartuta.

Ikasle horien autonomia behar bezala garatzeko, koordinazio egokia egin beharko da hezkuntza laguntzako espezialisten eta irakasle-taldea osatzen duten gainerako kideen artean.

Oro har, lanaldi osoa ez duten hezkuntza laguntzako espezialisten ordutegiaren eguneroko saioak jarraian antolatuko dira, zerbitzuaren beharrizanengatik behar bezala justifikatzen diren ohiz kanpoko kasuetan izan ezik.

Espezialista horien ordutegia EDUCAn jakinarazi behar da, AZLei esleitutako postua deskribatzeko atalean.

Ikasleen beharrei aurre egiteko, sareko bilera bat egin behar da osasuneko eta eskubide sozialetako hezkuntza eragileen artean, osasun-diagnostikoa duten kasuak aztertzeko, edo zaintza edo arreta espezifikoak behar dituzten gizarte-kalteberatasunekoak eta/edo ikastetxeetan prestakuntza jarduerak egitekoak, 2024-2025 ikasturtean.

2.2. Esku hartzea absentismoaren aurrean.

Absentismoari aurre egin behar zaio lehen zantzuak agertzen direnean, epe laburrean arrakasta izateko bermeren bat izan nahi badugu. Eskolatzea erabatekoa izan dadila lortzeko eta derrigorrezko hezkuntzaren etapan absentismoa murrizteko, batera eta testuinguruari helduta jardun behar dute hezkuntza komunitate osoak, oinarrizko gizarte zerbitzuek, Adingabearen Babes eta Sustapenerako Atalak eta Fiskaltzak.

Arazoa diagnostikatu eta hari aurre egiteko tresnetako bat da ikastetxeek erabili behar duten absentismoaren protokoloa. Bertan, esku hartzeko lau maila zehazten dira, absentismoaren larritasunaren edo jarraitutasunaren arabera, baita maila bakoitzean gauzatu beharreko ekintzak ere. Esku hartzeko maila guztietan, ikastetxeak kasuen jarraipena egin beharko du, aldian behin egoeraren berri emanez eta koordinazio bilerak eginez sareko kideekin.

Jarraipen hori eraginkorra izan dadin, oso garrantzitsua da EDUCAn erregistra daitezela, ikasturte osoan, bidezko arrazoirik gabe ikastetxera ez agertzeak. Era berean, protokoloan ezarritako 2. mailara igarotzean, horren berri emanen zaio Inklusio Proiektuetarako Bulegoari helbide elektroniko honen bidez: proyectos.de.inclusion@navarra.es.

2.3. Nafarroako Hezkuntza Ekitaterako Baliabide Zentroa (NHEBZ).

Nafarroako Hezkuntza Ekitaterako Baliabide Zentroa (NHEBZ) hezkuntza inklusioaren arloko erreferentziazko kalifikazio handiko zentroa izanen da.

Arlo eta programetan egituratuta egoteak lagundu eta sustatuko ditu ikasle guztiek ikastetxeetan duten presentzia, parte-hartzea eta ikaskuntza.

Hezkuntza orientazioko langileen bitartez eskatuko da aholkularitza, eskaera hezkuntza komunitateetako zeinek egiten duen kontuan izan gabe.

Baliabide zentroa osatzen duten programek erantzun desberdinak emanen dizkiete ikastetxeen eskaerei, eta akonpainamendua eginen diete haien eraldaketan, aldaketa metodologikoetan, Ikaskuntzarako Diseinu Unibertsaleko (IDU) tresnen aurrerapenean eta beharrezkoa den banakako arreta espezializatuan.

3.–Inklusio, berdintasun eta bizikidetza programak.

3.1. Inklusioa: PROA+ programa.

PROA+ programa (hezkuntza bideratu, bilakatu eta aberasteko lurralde lankidetzako programa) finantzaturik dago Hezkuntzako eta Lanbide Heziketako Ministerioaren Europako Plus Gizarte Funtsen bidez. Programaren helburu nagusia da hezkuntza konplexutasun handieneko ikastetxeei laguntza instituzionala ematea, eta ikastetxe hauek dira programaren hartzaileak: funts publikoekin mantentzen diren eta Haur Hezkuntzako bigarren zikloa, Oinarrizko Hezkuntza (Lehen Hezkuntza, Derrigorrezko Bigarren Hezkuntza eta oinarrizko mailako heziketa zikloak) eta Batxilergoa ematen dutenak.

Horretarako, berrogeita hamalau ikastetxe hautatu dira, publikoak zein itunduak, deialdi bidez. Ikastetxe horiek aparteko zuzkidura jasotzen dute, sareetan biltzen dira eta aholkularitza eta prestakuntza jasotzen dute Hobekuntza Plan Estrategiko bat eta zenbait jarduera garatzeko eta ezartzeko. Jarduera horiei palanka-jarduerak deritze, eta helburu dute antolakuntza-kulturan beharrezkoak diren aldaketak bultzatzea, bermatu ahal izateko ikasle guztiek eskola arrakasta izanen dutela, arreta jarrita, bereziki, ikasle guztien artetik egoera ahulenean dauden horietan.

3.2. Berdintasuna eta hezkidetza: Hezkidetza Plana eta SKOLAE Programa.

SKOLAE programaren helburua da hezkidetza eraldatzea ikastetxeetan. Hezkuntza Departamentuak prestakuntza, baliabideak eta laguntza ematen ditu prozesu hori errazteko, eta, horrela, bermatzen du, hezkuntza etapa guztietan, irakasleek eskuratzen dutela hezkidetzarako konpetentzia profesionala, eta ikasleek, berdintasunez bizitzeko konpetentzia.

SKOLAE Programa ikastetxe batean ezartzeko, antolaketa-egitura bat sortu behar da ikastetxe barnean, eta, horretarako, nahitaezko prestakuntza egin beharra dago, lau ikasturtez, gutxienez ere, eta bete beharko dira araudian ezarritako lau faseak.

Ikastetxe bakoitzean talde bultzatzaile bat eratuko da, zeinen kide izanen baitira zuzendaritza-taldeko kide bat eta hainbat ziklo edo arlotako irakasle batzuk. Pertsona horietako bat koordinatzaile izendatuko da eta sareko bost saiotan parte hartuko du. Saioak astearteetan izanen dira, Hezkuntza Departamentuko SKOLAE taldeak ezarritako egunetan. Bestalde, ikastetxeko zuzendaritzak ordutegi bat ezarriko du, astean behin bil daitezen talde bultzatzaileko irakasle guztiak.

Klaustroko irakasle guztiek ikastetxeko prestakuntza instituzionaleko 12 ordu gordeko dituzte hezkidetzari buruzko prestakuntzarako. Ikastetxea programa ezartzeko zer fasetan dagoen, prestakuntza hori banakakoa edo taldekoa izan daiteke, online eta tutoretzapean, edo ikastetxean bertan.

Talde bultzatzaileko irakasleek prestakuntza edo aholkularitza espezifikoa jasoko dute, ikastetxean Hezkidetza Nortasunaren Plana garatzeko.

2024-2025 ikasturtean, programa orokortzen jarraituko da, ikastetxe berriak sartuko baitira.

Lau faseetako ibilbidea amaitu duten ikastetxeek modu autonomoan jarraituko dute Hezkidetza Nortasunaren Plana garatzen, talde bultzatzailearen egiturari eta funtzioei eutsiz. Koordinatzaileak liberazio-orduari eutsiko dio bere lana egiteko eta egoera berean dauden ikastetxeen sarearen bileretara joateko.

Ikastetxe horietan ez da beharrezkoa izanen klaustro osoak gordetzea hezkidetzako 12 prestakuntza-ordu. Hala ere, SKOLAE Ien edo SKOLAE IIn banakako prestakuntza egina ez duten irakasleek gorde beharko dituzte prestakuntza hori egiteko beharrezkoak diren orduak.

3.3. Bizikidetza: Laguntza programa.

Hezkuntza Departamentuak, Laguntza programaren eta ikastetxeen eskura jartzen diren beste baliabide batzuen bidez, bizikidetza planak egiteko orientazioa, prestakuntza eta aholkularitza emanen du.

Laguntza programaren bidez laguntza emanen da irakasleak pixkanaka-pixkanaka treba daitezen emozioen hezkuntzan, gatazken konponketan eta eskola bitartekaritzaren arloan, tratu on falta edo ongieza sor dezaketen egoeren aurrean modu prebentiboan eta kalitatez esku hartu ahal izateko.

Ikastetxe bakoitzaren Bizikidetza Planean curriculum eta antolaketa neurriak jasoko dira bizikidetza, tratu ona eta eskola giroa hobetzeko. Nabarmenduko da zein garrantzitsua den hezkuntza komunitate osoa inplikatzea arlo horretan prebentzio lana egin eta tratu onak eta hezkuntza emozionala ikasteko, gatazkak konpontzeko, emozioen aldetik seguruak eta osasungarriak diren inguruneak sortzeko eta eskola jazarpena eta indarkeria modu guztiak desagerrarazteko konpromisoaren ikuspegitik.

Ikastetxe guztiek izan beharko dute ikasleen ongizaterako eta babeserako koordinatzaile bat, zeina jardunean arituko baita ikastetxeko zuzendariak edo titularrak gainbegiratuta.

Ongizaterako eta babeserako koordinatzaileak eginkizun hauek izanen ditu, gutxienez ere:

a) Sustatzea haurren eta nerabeen prebentzioari, detekzio goiztiarrari eta babesari buruzko prestakuntza-planak, ikastetxeetan lan egiten duten langileentzat zein ikasleentzat.

b) Koordinatzea, bat etorrita hezkuntza administrazioek onetsitako protokoloekin, gizarte zerbitzu eskudunen esku-hartzea behar duten kasuak, eta, beharrezkotzat jotzen bada, dagokien agintaritzak jakinaren gainean jartzea. Horrez gain, jakinarazteko betebeharra ere bete beharko du legeetan ezarritako kasuetan.

c) Erreferente gisa agertzea ikasleen, ikastetxeko langileen eta, oro har, hezkuntza komunitatearen aurrean, ikastetxean eta ikastetxearen ingurunean izan daitezkeen indarkeria kasuekin lotutako komunikazioetarako.

d) Sustatzea haurrek eta nerabeek ahalik eta ongizaterik handiena izanen dutela bermatuko duten neurriak, bai eta haur eta nerabeei tratu ona emateko kultura ere.

e) Gatazkak bakebidez ebazteko metodo alternatiboak erabil daitezen sustatzea ikastetxeko langileen eta ikasleen artean.

f) Ikastetxeko langileei jakinaraztea zer protokolo dauden, udalerrian edo autonomia erkidegoan, edozer eratako indarkeriari aurrea hartzeko eta hartatik babesteko.

g) Errespetua sustatzea desgaitasuna duten ikasleekiko edo kalteberatasun nahiz aniztasun bereziko beste edozein egoeratan diren ikasleekiko.

h) Bizikidetza Plana koordinatzea ikastetxeko zuzendaritzarekin.

Ongizaterako eta babeserako koordinatzaileak, jardutean, bete eginen du datuen babesaren arloan indarrean dagoen araudian ezarritakoa.

Izan daiteke ikastetxeko bizikidetza-arduraduna bera, edo zuzendaritza-taldeak izendatutako beste pertsona bat.

Bizikidetzaren arloko Aholkularitza Bulegoaren webguneak zenbait baliabide, eredu, protokolo eta iradokizun jartzen ditu ikastetxeen eskura beren jarduketa plana zehazten laguntzeko eta berariazko erantzuna bideratzeko zenbait kasuren aurrean (suizidioak, dolua, ziberbizikidetza eta abar). Ikastetxe guztietan, Bizikidetza Plana eta haren urteko zehaztapena eguneratu beharko dira, eta egokituko dira gure orrian bildu den bizikidetzari eta indarkeriaren prebentzioari buruzko indarreko araudira.

2023-2024 ikasturtean, hainbat ikastetxek Laguntza programa garatu dute, ekologia emozionalaren ikuspuntutik. 2024-2025 ikasturtean, parte hartzen ari diren ikastetxeetan proiektu hau ezartzen jarraituko da.

Aldi berean, borondatez eskatzen duten ikastetxeetan Laguntza programa ezartzen jarraituko da.

Ideia autolitikoak eta jokabide suizida dituzten ikasleen egungo testuinguruan, Hezkuntza Departamentuak prestakuntza jarduerak eskaintzen dizkie ikastetxeetako langileei, suizidioaren prebentzioari buruz.

Prestakuntza eskaintza hori beren prestakuntza plan instituzionaletan sartzea gomendatzen zaie ikastetxeei.

4.–Ebaluazio diagnostikoak.

Ebaluazioa etengabeko hobekuntzari lotuta dago, eta funtsezko laguntza eta baliabidea da, gainera, errealitatea eta ikastetxeetan aurrera eramaten diren hezkuntza jarduketen ondorioak hobeki ezagutzeko. Alde horretatik, hobekuntza ildoak ezartzeko orduan, ikasleen barneko emaitzak (behar diren neurriak hartzeko informazio eta hausnarketa iturri izan beharko baitira) eta hurrengo puntuetan zehaztuko diren ebaluazioen emaitzak hartuko dira kontuan.

4.1. Lehen Hezkuntzako 4. mailako ebaluazio diagnostikoa.

Hezkuntzari buruzko maiatzaren 3ko 2/2006 Lege Organikoaren 144. artikuluan xedatutakoaren arabera, Hezkuntza Departamentuak Lehen Hezkuntzako 4. mailan diagnostiko helburua duen ebaluazio bat garatzea ezarri du.

Ikastetxeek ebaluazio diagnostikoa eginen diete Lehen Hezkuntzako laugarren mailako ikasle guztiei. Konpetentziak ebaluatzeko probak kanpoan prestatuko dira, eta ikastetxeetan aplikatu eta zuzenduko. Ebaluazio Atalak koordinatuko du ebaluazio hori.

Ikastetxeko zuzendaritza plangintzan arituko da eta behar diren neurriak hartuko ditu, bai proben aplikazioan bai zuzenketan, datu grabaketan eta txostenak entregatzean parte hartu behar duten irakasleek zeregin horiek beren lan ordutegian bete ahal izan ditzaten.

Ebaluazio horrek ikastetxeentzat prestakuntza eta orientazio izaera duela kontuan hartuta, proben eta emaitzen azterketaren erantzukizuna irakasle guztiena da. Azterketa horretatik informazio garrantzitsua aterako da hezkuntza arretan detektatutako premietara egokitzeko.

Probak, oro har, maiatzaren 8, 9, 12 eta 13an eginen dira eta horien ordena behar adina denborarekin zehaztuko da. Hezkuntza Departamentuak jarraibideak emanen ditu proben aplikazioa eta zuzenketa arautzeko.

Ebaluazio diagnostikoan lortutako emaitzak ikastetxeen eskura jarriko dira, EDUCAn, bi informazio iturriren bitartez:

1.–Emaitzen urteko txostena: txosten horri esker, ikastetxeak aztertu ahal izanen du zer puntuazio lortu duen konpetentzia bakoitzean eta zein izan den item bakoitzaren erantzun zuzenen ehunekoa. Gainera, ISEKaren arabera zenbatetsitako puntuak ezagutzen ahalko ditu.

2.–Azken ikasturteetako emaitzen bilakaerari buruzko txostena: grafiko horiei esker ikastetxeak ikusi ahal izanen du zein izan den konpetentzia bakoitzaren emaitzen joera azken ikasturteotan.

Ikasturtea bukatu aurretik, behar bezalako aurrerapenaz, zuzendaritza-taldeak iturri horietatik bildutako informazioa transmitituko du koordinazio pedagogikorako batzordearen bileran, gerora, zikloko koordinatzaileek ikastetxeko emaitzen berri eman diezaieten gainerako irakasleei.

Konpetentziak hobetzeko ardura ez da Lehen Hezkuntzako 4. mailako ikasleak zuzenean prestatzen dituzten irakasleena soilik, guztiena baizik. Horregatik, ziklo guztiek aztertuko dituzte emaitzak, eta egoki irizten dizkioten hobekuntza proposamenak bilduko. Azterketa hori errazago egiteko, item bakoitzari buruzko informazio gehigarria egonen da horretarako prestatutako zuzenketa koadernoetan.

Hautemandako hobekuntza eremuak zein diren adieraziko da bai ikastetxearen hobekuntza planean bai eta zikloetako urteko lan planetan ere.

Eskola kontseiluari emanen zaio horren guztiaren eta hartutako neurrien berri.

Ikastetxeek erabakiko dute noiz eta nola helarazi ikasleen txosten indibiduala familiei ikasturtea amaitu baino lehen. Gomendagarria da hori tutoretzaren testuinguruan egitea.

4.2. Barneko ebaluazioak ikasturtea bukatzean.

Aipatu ebaluazioez gainera, ikastetxeek barneko ebaluazio probak egin ahal izanen dituzte, etapa bukaerakoak Haur Hezkuntzan, eta ikasmaila bukaerakoak Lehen Hezkuntzan. Ikastetxeek pixkanaka-pixkanaka beteko dute barne ebaluazioa Hezkuntza Departamentuak mailaren edo etaparen ebaluaziorik egiten ez duen mailetan, eta aurreko ikasturteetan erabilitako probak egokitu ahal izanen dituzte.

Proba horiek bi helburu izanen dituzte:

a) Alde batetik, ikaskuntzen koherentzia eta progresioa bermatuko dira etapan zehar.

b) Bestetik, hiru hilean behin eginen den etengabeko ebaluazioaren ondorioz eta ikasturte bukaerako ebaluazio horien ondorioz, identifikatuko da zein ikasle dauden arriskuan eta jarraipen zorrotza eginen zaie etapan zehar.

5.–Eskolako liburutegia, AbiesWeb eta Abies+.

Ikastetxeek eskura dute AbiesWeb programa, eskolako liburutegien kudeaketa informatizatua egiteko. AbiesWeb erabiltzeko oinarrizko ikastaro bat antolatuko da, eta ikastetxeak programaren arduradun izateko aukeratzen dituen pertsonak joaten ahalko dira. Halaber, ikasturtean zehar, interesa duten ikastetxeei Abies+ probatzeko eskainiko zaie, AbiesWeb programaren bertsio berria.

Era berean, informazio saioak antolatuko dira "Odisea" plataformaren erabilerari eta aukera pedagogikoei buruz (eskolako liburutegi digitala).

Eskolako liburutegiaren kudeaketaren arduradunei eskola-ordu gisa kontatuko zaizkien ordu batzuk esleitu ahal izanen zaizkie eskola liburutegiarekin loturiko kudeaketa informatikoa eta dinamizatze proiektuak egiteko, betiere, ikastetxeko ordutegia kontuan hartuta.

Eskolako liburutegiko arduradunen eginkizuna izanen da honako zeregin hauek egitea:

a) Funts bibliografikoak eta bestelako materialak automatizatzea eta antolatzea.

b) Mailegu sistema antolatzea.

c) Irakurketaren sustapenari eta irakurzaletasuna bultzatzeko ikastetxeko planari lotutako ekintzen sustapena.

d) Liburutegiaren aldetik laguntza ematea ikastetxean antolatzen diren programak eta proiektuak egiteko orduan.

e) Liburutegiko ordutegia antolatzea bai eskola-orduetan bai eskolaz kanpokoetan.

f) Ikasleen eta irakasleen artean sustatzea formatu digitaleko irakurketa eta irakurriaren ulermenaren hobekuntza "Odisea" eskolako liburutegi digitalaren bidez.

6.–Ikastetxeko Hizkuntza Proiektua.

Otsailaren 19ko 16/2019 Foru Aginduak Ikastetxeko Hizkuntza Proiektua arautzen du, eta lau urteko epea ezarri zuen proiektua prestatzeko. Epe hori amaitzean, Ikastetxeko Hizkuntza Proiektua etengabe berrikusi eta eguneratu beharreko dokumentua izanen da; horretarako, ikastetxeek Eleaniztasunaren eta Arte Ikasketen Zerbitzuaren laguntza izanen dute. Era berean, honako esteka honetan orientazio gida bat izanen dute eskura:

https://sites.google.com/educacion.navarra.es/plcnavarra/plcihp

Curriculumeko hizkuntzei dagokienez, ikastetxeek EDUCA kudeaketa sisteman honako hauek zehaztu beharko dituzte:

a) Maila bakoitzean arlo bakoitza zein hizkuntzatan ematen den (Ikastetxea menua > Ikasketa plana > Ikasgaiaren hizkuntza).

b) IHPa nork koordinatzen duen (Langileak menua > Irakasleak > Lanpostu osagarriak).

c) Atzerriko hizkuntzak ikasteko programa nork koordinatzen duen: Atzerriko hizkuntzetan ikasteko programa (Langileak menua > Irakasleak > Lanpostu osagarria).

7.–Atzerriko hizkuntzak ikasteko programak.

Apirilaren 26ko 43/2023 Foru Dekretuan ezarritakoari jarraikiz, Lehen Hezkuntzako etapa amaitzean ikasleei beren hizkuntza konpetentziari buruzko orientaziorako aholku bat emanen zaie, DBHn hautatu beharreko atzerriko hizkuntzetan ikasteko programei dagokienez (foru dekretu horrek Nafarroako Foru Komunitateko Haur Hezkuntzako, Lehen Hezkuntzako eta Derrigorrezko bigarren Hezkuntzako ikastetxeetan atzerriko hizkuntzetan ikasteko programen oinarrizko alderdiak arautzen ditu). Berariaz horretarako diseinatutako tresna bat, EDUCAn txertatua, erabiliko dute atzerriko hizkuntzetan ikastetxeko programak dituzten Lehen Hezkuntzako ikastetxeek erabiliko dute horretarako diseinatzen eta EDUCAn txertatzen den tresna, Bigarren Hezkuntzako aurreinskripzioak egiteko prozesuaren aurreko epe batean. Orobat, familiei aholku orientatzaile horren berri emanen zaie, tutoretzen bitartez.

II.–ANTOLAKETA ALDERDIAK

1.–Lehen Hezkuntzako etaparen antolamendua: zikloak, arloak eta esparruak.

Lehen Hezkuntzako etapa ziklotan antolatuta dago, eta horiek ikastetxeko zuzendariak hautatutako koordinatzaile batek zuzenduko ditu.

Ziklo bakoitzeko koordinatzaileak, ikasketaburuak gainbegiratuta, hartan irakasten duten irakasleen talde lana sustatu, koordinatu eta garatuko du.

Zikloko koordinatzaileak ziklo horretan irakasten duten irakasleak izanen dira, eta, lehentasunez, ikastetxe horretan behin betiko destinoa eta ordutegi osoa dituztenak.

Oro har, etapako ikasmailak arloka antolatuko dira. Hala ere, ikastetxeek, beren autonomia baliatuta, esparruka lan egin ahal izanen dute, irakasleen klaustroak aldez aurretik onetsita. Ondorio horietarako, 2025-2026 ikasturtean curriculum antolaketa esparruka hasi nahi duten ikastetxe guztiek Ikasketak Antolatzeko Atalari jakinarazi beharko diote 2025eko apirilaren 15a baino lehen (ordenacion.academica@navarra.es), honako hauek kontuan izanik:

–Esparruka lan egiteko modalitate horri heltzen dioten ikastetxeek ezarri beharko dituzte, batera ezarri ere, "Esparru Linguistikoa" edo, hala badagokio, "Esparru Linguistikoa, Atzerriko Bigarren Hizkuntzarekin", eta "Esparru Matematikoa eta Zientzietakoa".

–Esparruka lan egiteko aukera etapako edozein mailatan aplikatzen ahalko da, eta maila bereko talde guztietan aplikatu beharko da.

–Ikasketak Antolatzeko Atalari zuzendutako jakinarazpenean, adierazi beharko da zein den ikastetxearen izena eta zer ikasmailan edo ikasmailatan eginen duten lan esparruka.

Era berean, eta arestian deskribatutako baldintza berberei jarraikiz, 2024-2025 ikasturtean antolamendua esparruka ezarrita duten ikastetxeek, epe berean eta modu berean jakinarazi beharko dute horri buruzko edozein aldaketa. Horren gaineko berririk jasotzen ez bada, ulertuko da ez dela aldaketarik izan antolamenduan, eta 2025-2026 ikasturtean aplikatuko da.

2.–Programazio didaktikoak.

2024-2025 ikasturtean, ikastetxeek Haur eta Lehen Hezkuntzako ikasketak 3/2020 Lege Organikoan ezarritakoaren arabera ezarri ondoren, programazio didaktikoak LOMLOEren curriculumari jarraikiz eguneratzen eta garatzen jarraitu beharko dute.

Orientatzeko gida bat eta programazio-eredu irekiak izanen dira eskura eskola kudeaketako EDUCA sisteman (Ikastetxea > Dokumentazio instituzionala > Ikuskapen-dokumentuak > Programazioak).

Programazio didaktikoak, ahal dela, EDUCAren aplikazioan bertan eginen dira, horretarako prestatutako txantiloi bat erabiliz.

Hezkuntzako Ikuskapen Zerbitzuak arloen eta, hala badagokio, arloen programazio didaktikoen prestaketa gainbegiratuko du, eta bereziki begiratuko du LOMLOEn aurreikusten diren elementu berriak sartzen diren (konpetentzia espezifikoak, oinarrizko jakintzak, ikaskuntza-egoerak, etab.).

3.–Lanaldia.

225/1998 Foru Dekretuaren 1. artikuluan xedatutakoaren arabera, irakasleek, oro har, Nafarroako Gobernuaren mendeko funtzionarioentzat finkatzen den lanaldi bera izanen dute, beren eginkizunetara egokitua.

Ekaineko eta iraileko eskola gabeko lan egunetan, egunean ikastetxean egon beharreko bost orduko lanaldi jarraitua egin beharko dute irakasleek.

4.–Irakasleen ordutegia prestatzea eta onartzea.

Uztailaren 6ko 225/1998 Foru Dekretuak, zeina aldatu baitzuen uztailaren 16ko 60/2014 Foru Dekretuaren bosgarren xedapen gehigarriak, ezartzen du ezen irakasleen ordutegiak ikasketaburuak prestatu behar dituela, ikastetxeko zuzendariak onetsi behar dituela eta EDUCA kudeaketa programaren bitartez jakinarazi behar direla irailaren 30erako. Horren gaineko erreklamazio guztiak Hezkuntzako Ikuskapen Zerbitzuak ebatziko ditu, eta, horretarako, hamabost eguneko epea izanen du.

Ordutegiak prestatzeko, eskola kudeaketako EDUCA sisteman eskuragarri daude laguntza dokumentuak, kontratuen ordutegi-taula eta irakasleen ordutegiaren kontzeptuak (Ikastetxea > Dokumentazio instituzionala > Ikuskapen-dokumentuak > Irakasleen ordutegia).

Hezkuntzako Ikuskapen Zerbitzuak irakasleen asteko ordutegiaren banaketa zuzena den ikuskatuko du (zuzeneko irakaskuntzan emandako orduak, eskola-orduak eta jarduera osagarrien orduak).

5.–Zuzendaritza-taldeen koordinazioa.

Ikastetxeen arteko koordinazioa handitzeko eta prestakuntza programetan parte hartzea areagotzeko, zuzendariak, ikastetxeko aukeren arabera, astearte goizak eskola-ordurik gabe izan ditzake, zeregin horiek gauzatzeko.

6.–Irakasleak lanera ez agertzea.

Aldi baterako ezintasun batengatik irakaslea lanera joaten ez denean, ikastetxeko zuzendaritzak egin behar duen kontrolean Hezkuntza Departamentuko webgunean ezarritakoari jarraituko zaio:

https://www.educacion.navarra.es/eu/web/dpto/incapacidad-temporal

Aldi baterako ezintasun egoeran dauden MUFACEko langileek bajaren frogagiria aurkeztu behar dute gehienez ere 3 eguneko epean, lanera huts egindako lehen egunetik zenbatzen hasita. Hurrengo berrespen parteak hamabostean behin edo hilean behin aurkeztuko dira, medikuak zer erabakitzen duen. Alta-agirien kasuan, agiria egin eta gehienez 24 orduko epean jakinaraziko da.

MUFACEko langileen jatorrizko parteak Erregistro Orokor Elektronikoaren bidez bidal daitezke Hezkuntza Departamentura, aurrez aurre aurkeztu Nafarroako Gobernuaren Erregistro Ofizialeko edozein bulegotan, edo posta arrunta erabili.

Era berean, nahitaezkoa da ikastetxeko zuzendaritza-taldeari kopia bat bidaltzea edo aurkeztea ahalik eta lasterren, ikastetxeak jakin dezan zehatz-mehatz bajak zenbat iraunen duen, bajaren bilakaera edo bukaeraren berri izan dezan eta, orobat, ordezkapen bat eskatu ahal izan dezan.

Alta agiriari dagokionez, horren berri emateko epea betetzen ez bada irakaslea ikastetxera itzultzen den egunetik hasita 2 egun naturaleko epean, zuzendaritzak horren berri emanen dio Hezkuntzako Ikuskapen Zerbitzuari, indarreko araudian ezarri bezala jokatzeko. Irakasleari ere jakinaraziko zaio idatziz.

Ordezkapenetarako, kotizazioetarako eta nominan eragina duten bestelako elementuetarako dauden epeak ongi betetzearren, proposatzen da komunikazioak Erregistro Orokor Elektronikoaren bidez egitea.

Parteak bidaltzean izandako edozein gorabeheraren berri emateko, helbide elektroniko hau erabil daiteke modu osagarrian: planificacionrheducacion@navarra.es.

Gaixotasuna edo istripua dela-eta aldi baterako ezintasuna duten Gizarte Segurantzako langileek jakinarazi behar dute zer iraupen duen baja-parteak lanera joaten ez diren lehen egunetik. Baja berresteko parteak medikuak erabaki bezain maiz jakinarazi beharko dira. Era berean, baja amaitutzat emateko eta langilea bere lanpostura itzultzeko, ezinbestekoa da alta medikoaren partea jakinaraztea lantokiari egun berean.

Horrez gain, ezinbestekoa izanen da ikastetxeko zuzendaritza-taldeari ahalik eta azkarren horien guztien berri ematea, zehatz-mehatz jakin dezan bajak zenbat iraunen duen, egoera hobera doan eta/edo baja noiz amaituko den. Hala, ordezkapena beharren arabera kudeatu ahal izanen dute.

Ikastetxeetan ezarriko da zer bidetatik eginen dituzten jakinarazpenak MUFACEko nahiz Gizarte Segurantzako langileek, zuzendaritza-talde bakoitzak zehazten duen funtzionamenduaren arabera.

Garrantzitsua da adieraztea ezen, gaixotasun bajengatiko egoerak jakinarazteaz gainera, erditzeagatiko lizentzia edo ama ez den gurasoarentzako lizentzia tramitatzeko komunikazioa bost eguneko epean egin behar dela gehienez, ezarritako prozedurari jarraikiz.

Ordezkapen egoeretan, ordezkoa ez bada egokitu zaion lanpostuan hasten, eta Kontrataziorako Atalari ez badio erregistro orokorraren bidez jakinarazi lanpostuari uko egin diola, ikastetxeko zuzendaritzak ez-agertzearen txosten bat bidaliko du contratoseducacion@navarra.es helbidera, lanpostua berriz eskain dadin.

Ikastetxeetan EDUCA aplikazioko kudeaketa sisteman erregistratu beharko dira ikastetxeak berak emandako baimenak. Norberaren aferetarako baimen bat emateko, EDUCA kudeaketa sisteman ikus daitezke irakasle bakoitzak hartutako orduak (Langileak menua > Irakasleak > Berria / Hutsegiteak ikusi). Irakasle ibiltariei eta ikasturte bakoitzean ikastetxe batean baino gehiagoan kontratua duten irakasleei dagokienez, pantaila horretan ikusiko dira ikastetxe bakoitzean eta kontratu bakoitzeko hartutako orduak. AZLen kasuan, urte natural bakoitzean osotara hartutakoak zenbatuko dira.

7.–Zaintza.

Zaintzako irakaslearen eginkizun nagusiak hauek dira:

a) Arreta ematea irakasleak huts egiteagatik edo beste edozein arrazoirengatik libre gelditzen diren ikasleei.

b) Korridoreetan ordena zaintzea, eta, oro har, ikasleek gelaz kanpo duten portaera zaintzea. Horrek ez du esan nahi beste irakasleek eginkizun hori bete behar ez dutenik.

c) Beren zaintza orduetan sortzen diren gorabehera guztiak konpontzea, bai eta ikastetxeko norbait mediku beharrean gertatuz gero hartarako kudeaketak egitea ere, eta ikasketaburua lehenbailehen jakinaren gainean jartzea.

d) Beren zaintza orduetan, irakasleak eskoletara, zaintza txandetara, liburutegira edo bestelako jardueretara berandu joan izanaren edo joan ez izanaren berri ematea ikasketaburuari, idatziz.

e) Ikastetxeko zuzendariak bere eskumeneko esparruan agintzen dion beste edozein eginkizun.

Ikastetxeko zuzendaritzak baimena eman dezake irakasleren baten zaintza orduak berariazko beste jarduera batzuekin trukatzeko, baldin eta zaintza ordu guztiak beteta badaude.

EDUCA aplikazioak modulu bat du irakasleen zaintza orduak kudeatzeko, eta hura erabiltzea gomendatzen dugu. Ikasgelako koadernoaren agendarekin lotuta dago, egin beharreko jarduerak jakinaraztea errazten du, zaintzako irakasleak izendatzeko aukera ematen dio zuzendaritza-taldeari eta prozesuaren estatistika bat eskaintzen du.

8.–Irakasle ibiltarien joan-etorrien gastuak.

Oinarrizko ikastetxeetako zuzendaritzek Hezkuntzako Ikuskapen Zerbitzuari jakinaraziko diote, epe barruan jakinarazi ere, zer joan-etorri egiten dituzten beren irakasle ibiltariek (irakasleek, orientatzaileek eta logopedek) ikastetxekoaz bestelako herrietara, funtzionamenduaren txantiloian jasotako plangintzari jarraikiz.

Egoera orria edo fitxa urriaren 31 baino lehen igorriko da, oinarrizko ikastetxeko zuzendariak eta irakasle ibiltariak beteta.

Gainerako joan-etorriak bileretarako deialdia egiten duen zerbitzuak kudeatuko ditu, eta joan-etorri horien artean egonen dira orientazioa koordinatzeko bilerak eta landa eskolen eremuko talde koordinatzailearen bilerak.

Irakasleen ibiltaritzak jakinarazteko dokumentazioa, jarraibideak eta hileko joan-etorrien fitxa eta formularioa eskuragarri egonen dira eskola kudeaketako EDUCA sisteman (Ikastetxea > Dokumentazio instituzionala > Ikuskapen-dokumentuak > Ibiltaritzak).

9.–Hezkuntza digitalizatzea.

9.1. Konpetentzia digitala eta hezkuntza teknologia.

2022-2023 ikasturtean, ikastetxeko plan digitalak egin dira, eta EDUCAn horretarako prestatutako egituran jaso dira.

2024-2025 ikasturtean, Ikastetxearen Plan Digitala erantsi zaie Urteko Programazio Orokorrean dauden plan guztiei, eta zuzendaritza-taldeak izendatzen duen pertsona izanen da plan horren jarraipenaren arduraduna.

Ikastetxe guztiek SELFIE galdetegia bete beharko dute Ikastetxeko Plan Digitalean jasotako ekintzak ebaluatzeko.

Ikastetxe publiko bakoitzak hezkuntza teknologiaren koordinatzailea izanen du, eta pertsona hori hala identifikatuta egonen da EDUCAn.

Koordinatzaileak honako funtzio hauek izanen ditu: ekipo informatikoak kudeatu eta horien mantentze-lanak egitea, arazo teknikoak konpontzea eta langileei zein ikasleei laguntzea.

Ikastetxeek, ordu horiek esleitzean, proposatutako ordutegia errespetatu beharko dute (asteazken goizetan 09:00etatik 10:30era), bermatu beharra baitago, beharrezkoa denean, hizpide dugun arduradun horrek parte har dezan, aurrez aurre edo telematika bidez eta ordutegi orokorraren barruan, bai prestakuntza jardueretan, bai esperientzia trukeetan bai eta prozesu komunen jarraipena eta ebaluazioa egiteko jardueretan ere.

Ikastetxeek ikasNOVA programako arduradun bat izaten ahalko dute, eta pertsona hori hala identifikatuta egonen da EDUCAn. IkasNOVAko arduradunak ikaskuntza eta irakaskuntza prozesuak landuko ditu eta honako arlo hauetan teknologiaren integrazio pedagogikoa gauzatuko du:

–Konpetentzia digitala.

–STRAM-AI pentsamendu konputazionalaren sarea.

–IkasNOVA ikasgelak.

–Eduki digitalak.

IkasNOVAko arduradunari dagokionez, ikastetxeek, ordu horiek esleitzean, proposatutako ordutegia errespetatu beharko dute (ostegun goizetan 09:00etatik 10:30era), bermatu beharra baitago, beharrezkoa denean, hizpide dugun arduradun horrek parte har dezan, aurrez aurre edo telematika bidez eta ordutegi orokorraren barruan, bai prestakuntza jardueretan, bai esperientzia trukeetan bai eta prozesu komunen jarraipena eta ebaluazioa egiteko jardueretan ere.

IkasNOVAko arduraduna ordu batzuez izanen duten ikastetxeek justifikatu beharko dute zer arlo landuko den. IkasNOVAko irakaskuntza arloko aholkulari teknikoak harremanetan jarriko dira ikastetxearekin ikasturte hasieran informazio hori jasotzeko. Ikasturtea amaitzean, ikastetxeek eginiko ekintzen justifikazio memoria bat aurkeztu beharko dute.

Hezkuntza teknologiaren koordinatzaileak eta ikasNOVAko arduradunak izanen dituzten funtzio zehatzak argitaratuko dira ikasNOVAren webgunean (https://ikasNova.digital).

Suspertze eta Erresilientzia Mekanismoaren (SEM) funtsekin finantzatutako ekipamendu digitala jasotzen duten ikastetxeetako irakasleek konpromisoa hartuko dute ekipamendu hori erabiltzeko gaitzen duen prestakuntza egiteko.

Ikastetxeko Plan Digitalaren barnean eta Bizikidetza Planarekin bat, ikastetxeek zerrenda bat eginen dute ikasleei erabiltzen utziko dieten gailu digital pertsonalekin (telefono adimendunak, tabletak, erloju adimendunak, entzungailuak, etab.). Nolanahi ere, horiek erabiltzea posible izanen da soilik ikastetxeak baimendutako eta programatutako jardueretan.

9.2. IKT zerbitzuen katalogoa.

Hezkuntza teknologiako koordinatzaileak edo zuzendaritza-taldeak ikastetxeko langile guztiei –irakasleei eta AZLei– ezagutaraziko diete IKT zerbitzuen katalogoa. IKT zerbitzuen katalogora sartzeko, zuzeneko sarbide bat izanen da ordenagailu guztien mahaigainean. Eskola kudeaketako EDUCA sistemaren "Aplikazioak" izeneko menutik ere sartzeko modua izanen da.

9.3. Erabiltzailearen Laguntza Zentroa (CAU).

Erabiltzailearen Laguntza Zentroak (CAU) erantzunen die ekipamendu informatikoen, sarearen eta konektagarritasunaren gorabeherei, bai eta IKT zerbitzuen katalogoan adierazitako zerbitzu-eskaerei ere.

IKT zerbitzuen katalogoko "Hardwarearekin, softwarearekin edo sarearekin loturiko gorabeherak" izeneko atalean azalduta dago CAUren funtzionamendua eta haiei nola jakinarazi arazoak. Halaber, "Zerbitzuaren eskaerak CAUri" atalean jakinarazpenak egiteko inprimakiak daude.

9.4. IKT ekipamenduaren inbentarioa.

Ikastetxeetako ekipo informatiko guztiek etiketa izanen dute eta inbentariatuta egonen dira dagokien etiketa edo identifikazio serigrafiarekin.

Eranskailu horiek desagertzen badira, ikastetxeak zenbaki berdineko beste batzuk jarri beharko ditu, edo errotuladore ezabaezin batekin idatzi beharko du ekipamendu zenbakia (zenbaki hori inbentarioaren online aplikazioan bila daiteke).

Inbentarioko online aplikazioan (GLPI), edo horretarako gaitzen den aplikazio baliokidean, ikastetxe bakoitzak bere ekipamendu informatikoen inbentarioa ikusi ahal izanen du, baita horien gorabeherak ere, berriak zein amaitutakoak, eta egokitzat jotzen duen informazioa gehitu edo jarraipena egin ahal izanen du.

IKT zerbitzuen katalogoko "Inbentarioa" atalean dago aplikaziorako sarbidea eta hori erabiltzeko eskuliburu laburra.

Ikastetxeko hezkuntza teknologiako koordinatzaileak aldizka berrikusi beharko du online aplikazioaren inbentarioa, eta bermatuko du ez dela falta ekipamendu bat ere eta ez dela ageri aurretiaz kendutako ekipamendurik.

9.5. IKT ekipamenduko matxurak konpontzeko kontratua.

Kontratu bat dago ikastetxeetako IKT ekipamenduko matxurak konpontzeko, eta haren bidez egunean bertan edo hurrengo egunean konpontzen dira gorabeherak, edo ordezko ekipamendu bat uzten da ikastetxean, inolako kosturik gabe.

IKT zerbitzuen katalogoko "Hardwarearekin, softwarearekin edo sarearekin loturiko gorabeherak" atalean daude jasota konpondutako arazoak eta oraindik konpondu gabe daudenak. Gainera, kontratuaren laburpen bat ere badago, ikastetxeak hori ezagutu behar baitu kontratua bete dezan exijitu ahal izateko zerbitzua eskaintzen duen enpresari.

9.6. Ekipamendua erostea. IKT zerbitzuen kontratuak, lizentzia digitalenak eta bestelako IKT hornidurenak.

Ekipamendu informatikoa eta softwarea erosteko, 69/2023 Ebazpena aintzat hartu behar da.

Ebazpenean jasotako erosteko prozedura eta homologatutako ekipo eta hornitzaileen zerrenda (ikastetxeek horietara mugatu behar dute) jasota eta azalduta daude IKT zerbitzuen katalogoko "Ikastetxeak ekipo informatikoak eta softwarea erostea" atalean. Ikasturtean zehar espazio bat gaituko da ikastetxeek IKT aktiboen erosketa kudeatu eta izapidetu ahal izateko.

Ikastetxeak ezin izanen du onartu dohaintzan emandako bigarren eskuko ekipamendurik, arazoak sortzen baitituzte mantentze-lanetan eta segurtasunean, Hezkuntzako Sistemen, Sareen eta Euskarrien Atalak baimendutako salbuespenak izan ezik.

9.7. Softwarea.

Gogorarazten da ezen ikastetxeek obligazioa dutela ekipamenduetan erabiltzen duten eta haietan instalatuta dagoen softwarea legezkoa dela ziurtatzeko.

Ikastetxe batek software jabeduna erabiltzen badu ekipamenduren batean, dagokion lizentzia eta hori egiaztatzen duten agiriak izan beharko ditu.

Hezkuntza Departamentuak prestatutako Windowsak instalatutako aplikazio asko ditu. Ikastetxeak ekiporen batean beste aplikazioren bat instalatzea behar badu, eskaera bat egin beharko du IKT zerbitzuen katalogoaren bidez, edo hezkuntza teknologien koordinatzaileak instala dezake, ordenagailu guztien mahaigainean dagoen "Ikastetxearen panela" izeneko aplikazioaren bidez.

9.8. Chromebookak.

Baldin ikastetxeak 1:1 ereduaren alde egin badu, zeinetan ikasleek chroomebooka etxera eramaten duten, talde bakoitzeko tutoreak arduratuko dira gailuak eta horien kargagailuak emateaz, baita ikasturte bukaeran horiek jasotzeaz ere.

Hezkuntza teknologiaren koordinatzailea ez da arduratuko ikastetxearen gailuak gordetzeaz eta kargatzeaz. Eskoletan chromebookak edo beste gailu batzuk erabiltzen dituen irakaslea arduratuko da horiek biltzeaz eta kargatzeaz, beharrezkoa bada.

Ikasleen chromebookak noizean behin berrikusi beharko dira (lehentasunez, tutoretza-saioetan), hautemandako akatsak konpontzeko, ikasturtea amaitu arte zain egon gabe.

Ikasleen chromebookekin lotutako trataera orokorrari buruzko jarraibideak eskuragarri daude ikasNOVAren webgunean (https://ikasNova.digital) zein IKT zerbitzuen katalogoko "Chromebookak" atalean.

9.9. Hezkuntza teknologien koordinatzaileen prestakuntza.

Ikasturte hasieran, lehenengo aldiz hezkuntza teknologien koordinatzaile lanpostuan arituko diren irakasleek, prestakuntza egin beharko dute, nahitaez, berdin aurrez aurre edo telematika bidez izan, horretarako gordetako ordutegian (asteazkenetan 09:00etatik 10:30era arte). Prestakuntza saio horietan azalduko zaie, beste eduki batzuen artean, zein den haien egitekoa, zer tresna dauden, nola jokatu beharra dagoen eta Hezkuntza Departamentuko zer baliabide jarri diren ikastetxeen eskura.

Era berean, prestakuntza saio horietara joan daitezke, hala nahi izanez gero, lanpostu horretan ari diren pertsonetatik aurreko ikasturteetan eginkizun hori bete izan dutenak.

Prestakuntza horretarako deia eginen da Irakasleentzako Laguntza Zentroetako hezkuntza teknologiaren arloko aholkularitzen bitartez.

9.10. Ikastetxearen prozesuetan datu pertsonalak babestea eta praktika onak gauzatzea.

Hezkuntza teknologietako koordinatzaileak DBEDBLO (3/2018 Lege Organikoa) bete dadin ere sustatuko du, ikastetxeko prozesuetan datu pertsonalak babesteari dagokionez.

Hezkuntza Departamentuan web-orri bat dago datu pertsonalak babesteari buruzko informazio espezifikoarekin, eta informazio hori zuzendaritza-taldeek jakin behar dute, ikastetxeetako prozeduretan datu pertsonalak tratatzeko arduradunak baitira, eta, horrez gain, datu pertsonalak kudeatu behar dituzten ikastetxeko langileen artean ere hedatu behar da:

https://www.educacion.navarra.es/eu/web/dpto/informacion-sobre-proteccion-de-datos

Web-orri horretan honako atal hauek daude:

a) Datu pertsonalak babesteari buruzko informazioa: atal honetan Hezkuntza Departamentuak tratatutako datu pertsonalak babesteari buruzko araudiak eskatzen duen informazio guztia dago jasota.

b) Tratamendu jardueren erregistroa: atal honetan tratamenduko jardueren erregistro bat zer den azaltzen da eta Hezkuntza Departamentuak sortu eta argitaratutakoarekin lotzen da.

c) Ohiko galderak. Ohiko galderak: atal honetan azaltzen dira ikastetxeetan datu pertsonalak jasotzeari eta tratatzeari buruz egin ohi diren galderak.

d) Intereseko agiriak: atal honetan datuen babesarekin lotutako ereduak eta intereseko agiriak deskargatu daitezke, bereziki hezkuntzaren alorrekoak.

Horrez gain, irakasleak prestatzeko planaren baitan, online ikastaro bat eskainiko da, "Nafarroako Administrazio Publikoetarako datuak babesteari buruzko oinarrizko ikastaroa" izenekoa, zeinetan irakasle guztiek parte hartu ahal izanen duten. Prestakuntza hori sartuko da, era berean, zuzendaritza-taldeen akreditaziorako ikastaroan.

Ikasturtean zehar, segurtasuna bermatzeko, zenbait funtziotan eta lanpostutan pasahitzak iraungitzeko politikak ezarriko dira eta faktore anitzeko autentifikazio sistemak (MFA) gaituko dira. Horrez gain, ekipoetan egiten diren lan guztiak (Windows ekipoak barne) autentifikatuta egin beharko dira. Izan ere, hala inguru segurua bermatuko da eguneroko datuak eta operatiba kudeatzeko.

9.11. Ikastetxeen webguneak.

Kode irekiko edukien kudeatzaile bat jarri da ikastetxe guztien eskura, webgunean argitaratzeko. Webgune berri bat sortzea eskatzen ahal da formulario honen bitartez:

https://ikasNova.digital/group/guest/solicitud-sitio-web-de-centro-con-liferay

Webgune berriak sortzeko, txantiloi korporatibo bat erabiliko da, eta ikastetxe bakoitzak nahi bezala pertsonalizatu ahal izanen du.

Hezkuntza komunitatea EDUCAko kredentzialak erabilita sartu ahal izanen da ikastetxeen webgunera.

Bada tresna bat, zeinak errazten baitu webguneetako edukietako batzuk, lehendik daudenak, plataforma berri honetara ekartzea.

Plataformari eta txantiloiari buruzko informazio gehiago lor daiteke artikulu honetan:

https://ikasnova.digital/w/nueva-plataforma-para-los-sitios-web-de-centro

Ikastetxe batek departamentuak haren eskura jartzen dituen plataformez bestelakoetan daukanean bere webgunea, laguntza emanen zaio aurrerantzean ere, webgunearen segurtasuna eta erabilgarritasuna bermatzeko. Kasu horretan, mantentze-lan zuzentzailea eginen da, baina ez da eginen mantentze-lan ebolutiborik, eta ez da emanen arreta pertsonalizaturik.

10.–Nahitaezko prestakuntza.

Etengabeko prestakuntza irakasleen eskubide eta betebehar bat da, baita Hezkuntza Departamentuaren eta ikastetxeen ardura bat ere; izan ere, azken helburua da Nafarroako hezkuntza sistemaren kalitatea hobetzea irakasleen lanbidea garatuz.

Hala, ikastetxeetako zuzendaritza-taldeak ikastetxeko prestakuntza instituzionaleko plan bat prestatuko du. Horretarako, Hezkuntza Departamentuak proposatutako proiektu estrategiko, plan eta lehentasunezko ildoen ondorioz sortutako prestakuntzarako beharrak aintzat hartuko ditu, baita ikastetxeko klaustroetan eta irakasle-taldeetan eginiko lanaren ondorioz sortutako prestakuntzarako beharrak eta Irakasleentzako Laguntza Zentroek eginiko hautemate prozesuetan jasotako prestakuntzarako beharrak ere.

Prestakuntza ekintzak klaustro osoari edo irakasle-talde jakin bati zuzentzen ahalko zaizkio. Hezkuntza Departamentuaren edo ikastetxeen proiektu estrategikoak, planak eta lehentasunezko ildoak gauzatzeko prestakuntza ekintzen proposamenak lehentasunezkoak izanen dira eta irakasleek nahitaez egin beharko dituzte.

Nahitaezko prestakuntza instituzionala ikasturte bakoitzean 35 ordukoa izanen da, baina ordu gehiagokoa izaten ahalko da ikastetxeak edo Hezkuntza Departamentuak ezarritako beharrak asetzeko beharrezkoa bada. Kasu horretan, nahitaezko prestakuntza instituzional horretako 35 orduez gaindiko ekintzak borondatezkoak izanen dira.

Ikastetxe bakoitzak Irakasleentzako Laguntza Zentro (ILZ) bat du esleituta eta erreferentziazko aholkulari bat du, ikastetxeko prestakuntza instituzionaleko plana egiten laguntzeko. Ikastetxeek prestakuntzaren arduradun bat izendatuko dute, Irakasleentzako Laguntza Zentroko (ILZ) aholkulariarekin harremanetan egon dadin. Ez bada inor izendatzen, ikasketaburuak bere gain hartuko du zeregin hori.

Ikasturte beraren barnean, ikastetxez aldatzen diren irakasleek ikastetxe berriko zuzendariari aurkeztu beharko diote eginiko prestakuntza instituzionalari dagokion ziurtagiria. Prestakuntza instituzionaleko ekintzaren bat hasi eta amaitu gabe izanez gero, ez da dagokion ziurtagiria jasoko. Hala, irakasleak, egin dituen prestakuntza orduen kopurua egiaztatu ondoren (jatorrizko ikastetxeko zuzendariak emandako ziurtagiri baten bidez), prestakuntza orduak osatzen ahalko ditu jatorrizko ikastetxean hasitako prestakuntzarekin jarraituz edo, bestela, destinoko ikastetxeko prestakuntza ekintzak eginez.

Kontratu partziala duten irakasleek egin beharreko nahitaezko prestakuntza instituzionaleko orduak ezartzeko, nahitaezko prestakuntza instituzionaleko 35 orduei kontratuaren ehunekoa aplikatuko zaie.

Ez dute nahitaezko prestakuntza egin beharko lanaldiaren hereneko edo gutxiagoko kontratua duten irakasleek. Halere, prestakuntza hori borondatez egiteko aukera izanen dute. Interesdunak ez badu prestakuntza egiten, indarrean dagoen araudiak jasotako zereginak egiteko erabiliko ditu bere kontratuari dagozkion ordu osagarriak.

Nahitaezko prestakuntza instituzionaleko orduen zenbaketa malgutzeko, ikasturte bakoitzean gutxienez 25 ordu egin beharko dira, eta, beraz, bi ikasturteko aldian egiten ahalko dira gainerako orduak. Edonola ere, bi urte horietan nahitaezko prestakuntza instituzionalari dagozkion 70 orduak bete beharko dira. Nolanahi ere, Hezkuntza Departamentuaren edo ikastetxeen proiektu estrategikoei, planei eta lehentasunezko ildoei buruzko prestakuntza bete beharko da.

Irakasleek ikastetxeko zuzendaritzaren aurrean akreditatu beharko dituzte eginiko prestakuntza ekintzak, eta Hezkuntzako Ikuskapen Zerbitzuak ikuskatu beharko ditu.

35 orduko prestakuntza instituzionalaz gain, irakasleek prestakuntzarako eskubideaz baliatzen segitzen ahalko dute, nahi izanez gero.

11.–Haur Hezkuntzako egokitzapen aldia.

Haur eta Lehen Hezkuntzako ikastetxeetako Haur Hezkuntzako lehenengo zikloan matrikulatutako haurren egokitzapen aldia apirilaren 12ko 117/2024 Ebazpenean ezarritakoaren araberakoa izanen da (ebazpen horren bidez jarraibide batzuk onesten dira 2024-2025 ikasturteko egutegia eta ordutegia prestatzeko, Nafarroako Foru Komunitateko Haur Hezkuntzako lehen zikloko ikastetxeetarako).

Halaber, duten autonomia baliaturik, ikastetxeek Haur Hezkuntzako bigarren zikloko lehen mailan sartzen diren ikasleak egokitzeko aldia programatu ahal izanen dute, eta hori Urteko Programazio Orokorrean sartuko da.

Programazio horrek honako alderdi hauek hartu beharko ditu aintzat, besteak beste: egokitzea errazteko berariazko jarduerak diseinatzea, banakako beharrak kontuan hartzea, familiakoen parte-hartzea eta laguntza, ordutegien malgutasuna eta ikastetxearen antolaketa.

Ikasleak pixkana sartzea erabakitzen bada, gehienez ere hiru asteko epea izanen dute horretarako, eta, betiere, bermatu beharko da ikasleei arreta denbora guztian ematea, hala eskatzen duten familien kasuan.

12.–Eskola informazioaren kudeaketa: EDUCA. Kontabilitate sistema: ECOEDUCA.

12.1. Eskola informazioaren kudeaketa: EDUCA.

Ikastetxeetan, eskola informazioa EDUCA aplikazioaren bidez kudeatuko da.

Hezkuntza Departamentuaren webgunean, EDUCAri eta posta elektronikoari buruzko atalaren barnean, bai eta IKT zerbitzuen katalogoan ere, zenbait jarraibide eta bideotutorial argitaratzen dira, aplikazioaren moduluetara ohitzen laguntzen dutenak. Halaber, EDUCA taldearekin harremanetan jartzeko prozedura azaltzen da, funtzionalitate berriak eskatu, gorabeherak jakinarazi edo laguntza eskatzeari begira. EDUCA aplikaziotik bertatik egin daitezke eskaerak, goiburuko gorabeheren (@) ikonoan klik eginez. Atari horretatik bilaketak egiten ahalko dira ohiko prozedurei, zalantzei eta tutorialei dagokienez.

Hezkuntza Departamentuak prestakuntza eta informazio saioak antolatuko ditu koordinatzaileei, zuzendaritza-taldeei eta administrazioko langileei EDUCA plataformaren berri emateko.

Zuzendaritza-taldeak edo hark eskuordetutako pertsonak aholkuak emanen dizkie ikastetxeko erabiltzaileei EDUCA kudeaketa sistemari buruz. Horrez gain, sistema horren aldaketen eta funtzionalitate berrien informazioa jasoko du, eta haiek ikastetxean erabil daitezen sustatu eta koordinatuko du.

Zuzendaritza-taldeak bermatu beharko du, horretarako bideak jarriz, ikasturtea hasi ondoren ikastetxean kudeaketa eta irakaskuntza lanetan hasten diren pertsonek EDUCA ezagutzen dutela eta badakitela hura erabiltzen.

Ikastetxeetan EDUCAren koordinatzaile lanetan ariko direnen erregistro bat izateko, zuzendariak EDUCAren ikastetxeko koordinatzailea izendatuko du, eta, aplikazioan, "EDUCA koordinatzailea" lanpostu osagarria esleituko dio.

Zuzendariak berrikusiko ditu EDUCAtik ikastetxeen direktorioan (Ikastetxearen menua > Ikastetxearen datuak > Ikastetxearen informazioa) argitaratzen diren datuak (hala nola helbidea, telefono zenbakia, helbide elektronikoa eta webgunea), eta aurkitzen dituen akatsen berri emanen dio EDUCAren laguntza zerbitzuari. Gogoan izan beste datu interesgarri batzuk gehi ditzakeela, adibidez, ikastetxearen helburuak, balioak, sariak eta abar.

Ikastetxeen ardura da eguneratuta edukitzea ikastetxeko langileen –irakaskuntza nahiz kudeaketa lanetan aritzen direnen–, ikasleen eta familien datu pertsonalak. Aplikazioak Cl@ve sistemaren bidez sartzeko aukera ematen badu ere (ziurtagiri elektronikoa, NAN elektronikoa, Cl@ve Iraunkorra), gogoan izan oso garrantzitsua dela, EDUCA egiaztagiria lortzeko, helbide elektroniko pertsonal bat erregistratzea fitxan.

Era berean, ikastetxe bakoitzaren ardura izanen da bere informazio akademikoa eskuratzeko asmoz programara jotzen dutenen sarbidea kudeatzea. Horrela, bada, ikasleek eta haien familiakoek informazio hori eskuratzeko dituzten arazoei ikastetxeak erantzunen die lehenbizi; eta arazo horiek ezin baditu modu autonomoan konpondu, EDUCA euskarriarekin harremanetan jarriko da.

Komeni da ikastetxeetako langileek jakin dezaten nola erabili EDUCAk gaiturik dituen funtzio guztiak; horien artean, honako hauek nabarmentzen dira: ikasgelako koadernoa, ikasleen jarraipena, ebaluazio saioaren kudeaketa (informazio fluxua, akta), emaitzak (Kudeaketa akademikoa > Kalifikazioak > Ebaluazio txosten berriak), zaintzen kudeaketa, informazio garrantzitsua, ikasturte bukaerako txostenak, elkarrizketak, bizikidetzaren kudeaketa eta abar.

EDUCA aplikazioaren barruan, mezularitza sistema bat dago hezkuntza komunitateko kideen artean informazioa trukatzeko. Dena dela, helbide elektronikoko kontuak erabili beharra dagoenean, oroitarazten da sare publikoko irakasleek eta ikasleek @educacion.navarra.es helbide elektronikoak erabili behar dituztela jarduera akademikoan, tutoretza lanetan eta harreman profesionaletan.

Ikastetxe publikoek funtzio espezifikoetarako dituzten helbide elektronikoak EDUCAren bitartez kudeatzen dira (Ikastetxea > ikasNOVA posta eta zerbitzuak > Kontuen kudeaketa). Kontu berriak ireki beharra dagoenean, zuzendariak eskatu beharko du Erabiltzailearen Laguntza Zentroaren bidez. Kontu korporatibo horiek karguei lotutako zereginetarako dira, eta ez dira eskoletan baliatuko ikasleekin. Posta kontuen alternatiba gisa, gomendatzen da Googleko taldeak eta unitate partekatuak erabiltzea.

EDUCA Ataria aplikazio bat da, zeina prestatu baita herritarrek beren datu akademikoak eskuratu eta kudeaketa telematikoak egin ditzaten: behin-behineko izen-ematea, esaterako, ikasleak onartzeko prozesuan. Gomendatzen da ikastetxeek susta dezatela familiek eta ikasle adinez nagusienek aplikazioa erabiltzea.

12.2. Kontabilitate sistema: ECOEDUCA.

Nafarroako Foru Komunitateko Administrazioaren ikastetxe publiko guztiek, Hezkuntzari buruzko maiatzaren 3ko 2/2006 Lege Organikoan jasotako irakaskuntzak ematen dituztenek, ECOEDUCA kontabilitate aplikazioa erabiliko dute aurrekontua egiteko, onesteko, aldatzeko eta betearazteko. Aurrekontuan jasoko dira ikastetxearen ohiko funtzionamendua, mantentzea eta kontserbazioa bermatzeko diru-sarrerak eta gastuak.

Ikastetxearen kudeaketa ekonomikoari eragiten dioten kontabilitate-eragiketa guztiak irailaren 6ko 153/2023 Foru Dekretuaren arabera eginen dira (foru dekretu horrek Nafarroako Foru Komunitateko unibertsitateaz kanpoko ikastetxe publikoen kudeaketa ekonomikoa arautzen du).

13.–Zerbitzu osagarriak.

Garraioko eta jantokiko zerbitzu osagarriak dituzten ikastetxeek zerbitzu horiei buruzko informazioa etengabe eguneratuko dute EDUCA aplikazioaren bidez eta horretarako gaitutako sistema informatikoen bidez.

–Eskualdeko eskola jantokia: EDUCAren bidez konfiguratuko da jantokiaren modulua eta jantokira doazen ikasleen datuak etengabe eguneratuko dira, ikasleek dirulaguntza jasotzen duten zein ez.

–Eskola jantoki arrunta: EDUCAren bidez konfiguratuko da jantokiaren modulua eta jantokira doazen eta dirulaguntza jasotzen duten ikasleen datuak etengabe eguneratuko dira.

–Eskola garraioa: EDUCAren bidez konfiguratuko da eskola garraioa erabiltzen duten edo/eta garraiorako banako laguntzak jasotzen dituzten ikasleen garraioaren modulua.

14.–Unibertsitateko ikasleen praktikak ikastetxeetan.

Hezkuntza Departamentuak zenbait hitzarmen sinatu ditu hainbat unibertsitaterekin unibertsitateko praktikak egin ahal izateko Nafarroako Gobernuko Hezkuntza Departamentuaren funts publikoak jasotzen dituzten ikastetxeetan.

Unibertsitateko ikasle batek curriculumeko praktikak egin ahal izateko, indarrean egon behar da Hezkuntza Departamentuaren eta dagokion unibertsitatearen arteko lankidetza hitzarmena.

Ikasturte bakoitzean ikasle horien tutoretza lana egiten duten irakasleek aintzatespen bikoitza izanen dute Hezkuntza Departamentuaren aldetik:

–Tutoretza: ikasturteko tutoretza lana ziurtagiri bidez jasoko da. Lekualdatze-lehiaketetan merezimendutzat joko da.

–Prestakuntza: praktiken tutoretza lana norberaren prestakuntza ordu gisa kontabilizatuko da. Orduak kalkulatzeko, tutoretzapeko praktiken ikasketa-planean aipatzen diren ECTS kredituen kopurua hartuko da aintzat.

Praktiken tutoretzagatiko eta prestakuntzagatiko ziurtagiriak lortu ahal izateko, beharrezkoa da prestakuntza zentro gisa aitortutako ikastetxeko zuzendariak tutore lanetan aritu diren irakasleen datuak jakinaraztea Hezkuntza Departamentuari, Hezkuntzaren atarian dagoen inprimakia betez (https://www.educacion.navarra.es/web/dpto/estudios-universitarios), ekainaren 1a baino lehen.

Adingabea Babesteko Legearen arabera, curriculumeko praktikak egiten dituzten ikasleek sexu-izaerako delituen ziurtagiri negatiboa izan beharko dute. Baldintza hori betetzea Hezkuntza Departamentuak unibertsitate bakoitzarekin sinatzen duen hitzarmenean jasota dago, eta ikastetxeak agiri hori eskatzen ahalko dio ikasleari praktikak hasi baino lehen.

15.–Kalitatea kudeatzeko sistema.

Kalitatea kudeatzeko sistemak (KKS) ezarri eta mantentzeko programa, Antolamendu, Prestakuntza eta Kalitate Zerbitzuak gidatzen duena, Nafarroako unibertsitateaz kanpoko ikastetxe publikoei dago zuzendua.

Programan parte hartzen duten ikastetxeek ikastetxearen egoerari buruzko txosten bat jasoko dute iraileko Programari dagokionez.

15.1. Ikastetxeen konpromisoak eta erantzukizunak.

Programan parte hartzen duten ikastetxeek klaustroko kide bat izendatuko dute kalitate arloko arduradun. Kalitate arduraduna EDUCAn erregistratuko da.

Programan kalitate sareko mintegiaren bidez parte hartzen duten ikastetxeen kasuan, zuzendariak eta kalitatearen arduradunak gutxienez 6 prestakuntza-saio laburretara eta koordinazio presentzialerako 2 bileretara joan beharko dute.

Programan modu autonomoan parte hartzen duten ikastetxeen kasuan, zuzendariak eta kalitatearen arduradunak gutxienez 5 prestakuntza-saio laburretara joan beharko dute.

Zuzendaritza-taldean kide berriak badaude edo kalitatearen arduradun berri bat badago, pertsona horiek ikastetxeko autodiagnostikoari, prozesuei/sistemei aztertu eta dokumentuen kudeaketari buruzko prestakuntza egin beharko dute, ikasturteko lehen hiruhilekoan.

15.2. Aholkularitza eta baliabideak.

Programaren informazio eta baliabide eguneratuak Kadineten web-orrian argitaratuko dira.

IKKS-2020 Arauaren atal bakoitzari lotutako dokumentuak, tresnak eta bideotutorialak "Baliabideak" site-an argitaratuko dira.

Baliabide horiek eskura izanen dituzte ikastetxeko Autodiagnostikoan irailaren 15a baino lehen erregistratzen diren pertsona guztiek.

15.3. Eskaerak.

Ikastetxeek, Programan sartu, geratu edo hori utzi nahi badute, eta, hala badagokio, KKSaren kanpo ebaluazioa jaso nahi badute, 71/2020 Foru Aginduan onetsitako dagozkion eranskinak erabili beharko dituzte.

Eskaerak Antolamendu, Prestakuntza eta Kalitate Zerbitzuari bidaliko zaizkio, soieduca@navarra.es helbide elektronikora, 2025eko martxoaren 31 baino lehen.

Martxoan Programari buruzko zabalkunderako informazio saio bat eginen da, kalitate sareetan parte hartzen ez duten ikastetxeei zuzenduta egonen dena.

16.–Laneko arriskuen prebentzioa.

Arriskuen ebaluazioren bat egin bada, ikasturte bukaerako memorian azaldu beharko dira Laneko Arriskuen Prebentziorako Atalak proposaturik hartu diren prebentzio neurriak, eta, horrekin batera, bete ez diren eta aurreikusitako gauzatze-epea iraungita duten neurriak arrazoituko dira.

Nafarroako Foru Komunitateko ikastetxeetako irakaskuntzako eta irakaskuntzaz kanpoko langileren bati eraso egiten diotenean, ikastetxeetako zuzendaritzek kanpoko erasoen aurkako protokoloa jakinarazi eta ofizioz aktibatuko dute.

https://www.educacion.navarra.es/eu/web/dpto/riesgos-laborales/protocolos-de-actuacion

Ikastetxeetako zuzendaritzek klaustroetan jakinaraziko dute, nahitaez, badagoela kanpoko erasoen aurkako jarduketa protokoloa. Halaber, horren berri emanen zaie irakaskuntzaz kanpoko langileei ikasturtean hasierako berariazko bilera batean.

Nafarroako Foru Komunitateko ikastetxe guztien webguneetan kanpoko erasoen aurkako jarduketa protokolo hori bistaratuko da erraz ikusteko modukoa den lehentasunezko toki batean. Era berean, ikastetxeen barne-agirietan agertuko da: Internet, Drive eta abar.

Hezkuntza Departamentuko prebentzioko ordezkarien eginkizunei eta harremanetarako datuei buruzko informazioa Nafarroako Foru Komunitateko ikastetxe guztien webguneetan argitaratuko da, erraz ikusteko modukoa den lehentasunezko toki batean.

Ikastetxeetako zuzendaritzek kanpoko erasoen aurkako jarduketa protokolo horren berri eman beharko dute familiekin egindako bileretan.

17.–Eskolak sarean.

Hezkuntza Departamentuak lankidetza hitzarmenak ditu Nafarroako Gobernuko hainbat departamenturekin. Hitzarmen horietan ezarritako gomendioei jarraikiz, honako sare hauek sortu dira:

–Osasuna Sustatzen duten Eskolen Sarea.

–Eskola Jasangarrien Sarea.

–Eskola Solidarioen Sarea.

–Eskolak eta Memoria, Bakearen eta Bizikidetzaren Aldeko Sarea.

2024-2025 ikasturtean, Hezkuntza Departamentuak, Landa Garapeneko eta Ingurumeneko Departamentuarekin lankidetzan, ingurumen hezkuntzako plan bat eginen du, irakasleek energiari eta klima-aldaketari buruzko oinarrizko ezagutzak eskuratu ditzaten.

Halaber, ikastetxe guztiek jasangarritasun koordinatzaile bat izan beharko dute, zeina ikastetxeko irakasle-taldeko kideetako bat izanen baita. Zuzendariak edo ikastetxeko titularrak ikuskatuko du koordinatzailearen lana.

18.–Landa eskolak.

Landa eskolatzat hartzen dira 9 unitate baino gutxiago dituzten eta nekazaritza eremuetan kokatuta dauden Haur Hezkuntzako eta Lehen Hezkuntzako ikastetxe publikoak.

Landa eremu bakoitzean erreferentziazko eskola bat izendatuko da, eta haren kontu korrontearen bidez eginen dira eremuari dagozkion kudeaketa ekonomikoak.

Eremu guztietako landa eskolek Landa Eskolen Sarea osatuko dute, eta hor Haur Eskolen eta Landa Eskolen Atalak ere parte hartuko du. Parte-hartze hori eremu bakoitzeko koordinatzailearen bidez eginen da, eta hura sareko bileretara joanen da (online edo aurrez aurre), zeinak gutxi gorabehera hilean bi ostegunetan izanen baitira. Hori aintzat hartuko da ordutegiak antolatzean, eta, ahal dela, ostegun goiza gordeko da eremuko koordinatzailearen eginkizunetarako.

Halaber, koordinatzaileak eta parte hartzen duten gainerako eskolen zuzendariek eremuko koordinazio taldea osatuko dute; aldian behin bilduko dira eremuko lan proiektu komuna sortu, martxan jarri eta horren jarraipena egiteko. Bilera horiek taldeak berak ezarritako ordutegian eta maiztasunarekin eginen dira.

Eremu bakoitzeko landa eskolek Urteko Programazio Orokor (UPO) partekatu bat egin ahal izanen dute eskola guztientzat edo batzuentzat. Programazio horretan parte hartzen duten ikastetxe guztien izena adierazi beharko da. Berariaz aipatuko dira eskola guztiek partekatzen ez dituzten plangintza edo antolamendu irizpideak agertzen dituzten atalak, ikastetxeen arabera bereizita. Programazioa egitearen ardura parte hartzen duten zuzendaritza guztiena da, nahiz eta horietako bat Hezkuntza Departamentuaren solaskide izendatu daitekeen. Halaber, adieraziko da zein den eremuko landa eskolak koordinatzen dituen pertsonaren izena eta zenbat ordu eskaintzen dizkion zeregin horri.

Urteko programazio orokor bera partekatzen duten eskolek berariazko plan komun bat izanen dute, esperientzien eta jardueren trukea sustatzeko ikasleen, irakasleen eta, oro har, hezkuntza komunitateko kideen artean. Eremuko koordinazio taldeak, halaber, eremuko koordinazio pedagogikorako batzordea osatuko du, eta planaren garapena bermatuko du.

Eremu bakoitzeko landa eskolek ikasleen emaitzen baterako ebaluazioa eginen dute, bai eta ikastetxe bakoitzaren ebaluazio bereizia ere. Programazioak berrikusi eta eguneratuko dituzte, antolaketa premietara egokitzeko, koordinazio pedagogikorako batzordearen bidez.

UPOa partekatzen duten edo zeregin koordinatuak egiten dituzten eskoletan, eremurako antolatu ahal izanen da ikastetxearen prestakuntza. Prestakuntza planaren edukia ikastetxeetako zuzendaritzen eta eremuaren koordinatzailearen artean adostuko da.

Zaintzako irakaslerik ez duten landa eskoletan ikastetxeko zuzendaritzari dagokio irakasleen absentziak konpentsatzeko behar diren aldaketak antolatzea.

III.–ARAUDIA

1.–Orokorra.

1/2004 Lege Organikoa, genero indarkeriaren aurka babes integrala emateko neurriei buruzkoa.

3/2007 Lege Organikoa, emakumeen eta gizonen berdintasunari buruzkoa.

14/2015 Foru Legea, Emakumeen kontrako Indarkeriari aurre egitekoa.

8/2017 Foru Legea, LGTBI+ pertsonen berdintasun sozialari buruzkoa.

17/2019 Foru Legea, Emakumeen eta Gizonen arteko Berdintasunari buruzkoa.

47/2010 Foru Dekretua, Bizikidetzari eta ikasleen eskubide eta betebeharrei buruzkoa.

66/2010 Foru Dekretua, Ikasketa eta lanbide orientazioari buruzkoa.

72/2021 Foru Dekretua, Hezkidetzari buruzkoa.

1/2023 Foru Dekretua, Curriculumari buruzkoa.

43/2023 Foru Dekretua, Atzerriko hizkuntzetan ikasteko programari buruzkoa.

139/2009 Foru Agindua, Programa eleaniztunetan ingelesez irakasteko behar diren hizkuntza betebeharrei buruzkoa.

204/2010 Foru Agindua, Bizikidetzari buruzkoa.

49/2013 Foru Agindua, Erreklamazioei buruzkoa.

112/2013 Foru Agindua, Banatze, dibortzio edo desadostasun egoeran dauden gurasoei buruzko jarraibideei buruzkoa.

71/2020 Foru Agindua, Kalitatearen kudeaketari buruzkoa.

35/2022 Foru Agindua, Eskola garraioari buruzkoa.

69/2023 Foru Agindua, Hezkuntza inklusioari buruzkoa.

106/2023 Foru Agindua, Eskola ordutegi motei buruzkoa.

329/2019 Ebazpena, Nafarroako Foru Komunitateko Landa Eskolen Sarea sortzeko oinarriei buruzkoa.

2.–Haur Hezkuntza.

28/2007 Foru Dekretua, Haur Hezkuntzako lehenengo zikloari buruzkoa.

61/2022 Foru Dekretua, Haur Hezkuntzako curriculumari buruzkoa.

62/2022 Foru Agindua, Haur Hezkuntza ezartzeari eta ordutegiari buruzkoa.

59/2023 Foru Agindua, Haur Hezkuntzako ebaluazioari buruzkoa.

Hona hemen ziklo honetako araudia eta baliabideak dituen webgunerako helbidea:

https://sites.google.com/educacion.navarra.es/curriculos-de-navarra-eu/etapak/haur-hezkuntza

3.–Lehen Hezkuntza.

67/2022 Foru Dekretua, Lehen Hezkuntzako curriculumari buruzkoa.

63/2022 Foru Agindua, Lehen Hezkuntza ezartzeari eta ordutegiari buruzkoa.

52/2023 Foru Agindua, Lehen Hezkuntzako ebaluazioari eta mailaz igotzeari buruzkoa.

Hona hemen etapa honetako araudia eta baliabideak dituen webgunerako helbidea:

https://sites.google.com/educacion.navarra.es/curriculos-de-navarra-eu/etapak/lehen-hezkuntza

II. ERANSKINA.–DERRIGORREZKO BIGARREN HEZKUNTZAKO ETA BATXILERGOKO IRAKASKUNTZAK EMATEN DITUZTEN IKASTETXEEN ANTOLAKETA ETA FUNTZIONAMENDUA 2024-2025 IKASTURTEAN ARAUTZEKO JARRAIBIDEAK

Ikasturte hasierako jarraibideek indarreko araudiaren alderdi batzuk zehaztu eta argitzen dituzte, eta arautu gabeko beste batzuk arautzen, ikastetxeen antolaketa eta funtzionamendua hobetzeko. Horrez gain, ikasturtean lehentasunez landu behar diren ildoak ezartzen dituzte.

Jarraibideak hiru kapitulutan daude bereizita:

Lehenbizikoa, Urteko Programazio Orokorrari buruzkoa da. Hor, beste batzuen artean, ikastetxearen hobekuntza planak prestatzeko argibideak ematen dira, bai eta ebaluazioetan duten parte-hartzearen gainekoak ere, hobetu daitezkeen eremuak detektatzeko.

Bigarrenean, antolaketaren alderdi batzuk zehazten dira, ikastetxearen funtzionamendurako beharrezkoak direnak.

Hirugarrenean, gehien erabiltzen diren LOEren ondoriozko arauak zerrendatzen dira.

I.–URTEKO PROGRAMAZIO OROKORRA

A) Alderdi orokorrak

1.–Xedapen orokorrak.

Urteko Programazio Orokorra (UPO) ikastetxearen plangintzarako, antolaketarako eta funtzionamendurako oinarrizko tresna da. Haren bidez, ikasturtean zehar garatuko diren hezkuntza proiektua, antolaketa eta funtzionamendu arauak eta kudeaketa proiektua zehaztea errazten da.

Dokumentu hori prestatzeko orduan, zorroztasuna, erraztasuna eta erabilgarritasuna hartuko dira kontuan.

UPOa prestatzeko, segimendua egiteko eta ebaluatzeko orientazio gida eskola kudeaketako EDUCA sisteman egonen da eskuragai (adibideak jasotzen ditu).

2.–Informazioa biltzeko iturriak.

UPOa prestatzeko, iturri hauek aztertzearen ondoriozko jarduketa ildoak hartuko dira kontuan:

a) Aurreko ikasturte bukaerako memorian proposatutako hobekuntza eremuak.

b) Barneko eta kanpoko proben emaitzen analisia, baita hobetzeko proposamenak ere.

c) 2023-2026 aldirako hobekuntza plana, autoebaluazio prozesutik eratorria.

d) Zuzendaritza proiektua edo plan estrategikoa.

e) Aurreko ikasturteko gainbegiratze prozesuen ondorioz Hezkuntzako Ikuskapen Zerbitzuak nabarmendutako alderdiak eta gomendioak.

f) Hezkuntza Departamentuak ematen dituen ikasturte hasierako jarraibideak.

g) Ikastetxean ezarritako bestelako programak. Bereziki jorratuko dira ikastetxeko berrikuntza eta eraldatze orokorreko programak.

h) Ikastetxearen kalitatea kudeatzeko sistemaren autodiagnostikoa, halakorik bada.

i) Ikastetxeko Plan Digitala.

3.–Edukia: atalak eta garapena.

Urteko Programazio Orokorrean honako alderdi hauek formalizatu beharko dira, indarreko araudiarekin bat:

a) Sarrera.

b) Ikastetxearen Urteko Plana.

c) Departamentuen eta beste talde batzuen planak.

d) Urteko Inklusio Plana.

e) Urteko Tutoretza Plana / Orientazio Akademikoaren Urteko Plana.

f) Urteko Bizikidetza Plana.

g) Hezkidetza Plana.

h) Ikastetxearen Hizkuntza Proiektua, ikasturtekoa.

i) Irakaskuntza-programazioak.

j) Ikastetxearen beste plan batzuk.

k) Proiektu eta programa instituzionalak.

l) Ikastetxearen Prestakuntza Plana.

m) Ikastetxeko Plan Digitala.

n) Jarduera osagarrien eta eskolaz kanpokoen programazioa.

o) Urteko Programazio Orokorraren jarraipena eta ebaluazioa.

p) Eranskinak.

Ikastetxearen urteko plana da UPOaren elementu garrantzitsuenetako bat; izan ere, hortik abiatuta, organo eta taldeen jarduketa ildo nagusiak ezarri behar dira. Ikasturterako lehentasunez lortu nahi diren helburuak jasoko ditu, baita proposatutako helburuak eta jomugak lortzeko abian jarri behar diren ekintza garrantzitsuenak ere. Gauzatu beharreko ekintza edo zeregin horiek konponbide teknikoak eta neurri zehatzak eskainiko dizkiete departamentuei.

Departamentuek eta gainerako lantaldeek (Orientazio Departamentua, ikastetxeko Bizikidetza Batzordea, eta abar) helburuen eta ekintzen plan propioa izanen dute, eta, horren bidez, urteko planean zehaztutako lehentasunezko helburuak ez ezik, ikastetxeko beste plan espezifiko batzuetatik ateratako helburuak ere formalizatuko dituzte.

Horrez gainera, ikastetxean ikasturtean ezarri gogo diren beste jarduketa plan espezifiko batzuk jasoko dira, bai eta ezarri behar diren beste proiektu eta programa propio batzuk ere.

Planen egitura operatiboari dagokionez, haien gauzatzea eta segimendua errazteko modukoa izanen da, eta honako hauek zehaztuko ditu: helburuak, adierazleak, noraino iritsi nahi den, ekintzak, arduradunak, denbora-plangintza eta ebaluazioa.

Ikastetxeko Plan Digitala kanpoan aurkezteko esportatu behar den dokumentua denez, EDUCAn horretarako prestatu den txantiloian sartu beharko da.

4.–Prestaketa.

UPOaren prestaketa koordinatzearen erantzukizuna zuzendaritza-taldeak izanen du, baina lan hori beste pertsona edo batzorde batzuen esku utz dezake.

Dokumentuaren eskema bat emanen da, parte hartu behar duten taldeak eta pertsonak finkatuko dira, talde bakoitzaren eginkizunak zehaztuko dira, tresna eta baliabideak jarriko dira eta denbora emanen da.

Kasuan kasuko ikasturtean dauden beharrak eta aurreikuspenak azterturik, eta kontuan harturik organo bakoitzaren deliberoak eta erabakiak eta egindako oharrak eta ekarpenak, UPOaren atalak idatziko dira.

UPOa EDUCA aplikazioarekin eginen da; horretarako, ikastetxearen plan digitalaren eta hobekuntza planaren antzeko txantiloia eta jardunbidea izanen ditu.

5.–Tramitazioa, jarraipena eta ebaluazioa.

Behin onetsirik, UPOa EDUCA aplikazioan argitaratuko da, urriaren 31 baino lehen. Ikastetxean ere utziko da, hezkuntza komunitateak eskura izan dezan.

Ikastetxeko zuzendaritza-taldeak eta arduradunek aldizka eginen dute, EDUCA aplikazioaren bidez, UPOa osatzen duten planen, proiektuen eta programen garapen mailaren jarraipena.

Hori baino lehen, segitu beharreko prozedura finkatuko da (nola), informazioa biltzeko irizpideak zehaztuko dira (zer), arduradunak izendatuko dira (nork) eta epeak finkatuko dira (noiz).

Aztertu eta baloratuko da zenbateraino garatu diren proposatutako ekintzak, erantzukizunak nola bete diren, denbora-plangintza konplitu den eta proposatutako helburuak lortu diren.

Ikasturtea amaitzean, ikastetxeko eskola kontseiluak, irakasleen klaustroak eta zuzendaritza-taldeak UPOaren betetze mailari buruzko amaierako ebaluazioa eginen dute. Horretarako, arduradun bakoitzak dagokion planaren, proiektuaren edo programaren emaitzak aztertuko ditu.

Atal bakoitzaren ebaluazio prozesuan, datu esanguratsuak jasoko dira bateko eta besteko iturrietatik (datuak, iritziak, ohartarazpenak eta abar), eta gero, datu horiek aztertu eta interpretatuko dira aurreikusitako irizpideei jarraikiz.

Amaierako hausnarketa eta balorazioa ez da kuantitatiboa soilik izanen, emaitza horien arrazoiak baloratuko baitira.

EDUCA aplikazioan bertan, ikasturte bukaerako memorian bilduko dira UPOaren jarraipen eta ebaluazio prozesuan lortutako ondoriorik eta proposamenik garrantzitsuenak.

Dokumentuak bi dimentsio izanen ditu. Lehenik, ebaluazioaren dimentsioa, ikastetxeko urteko plangintzaren garapenari buruzko balantzea erakutsiko duena. Honako alderdi hauek nabarmenduko dira: proposatutako ekintzak zenbateraino bete diren, erantzukizunak nola bete diren, denbora-plangintza egokia izan den, aldizkako jarraipena egin den eta helburuak zenbateraino bete diren (adierazleen eta helmugen arabera). Bigarrenik, dimentsio proiektiboa izanen du, etorkizunean esku hartzeko ildoak eskainiko baititu, zentzuzko hobekuntza proposamenak zehaztuta.

Azkenik, memoriaren eranskin moduan, txosten bat sartuko da, xeheki aztertzen dituena ikasleek barneko (emaitza akademikoak) eta kanpoko (diagnostikoak, USE, etab.) ebaluazioetan izandako ikaskuntza emaitzak. Horrez gain, emaitza horiek eragin dituzten arrazoiei buruzko hausnarketa eginen da, eta, hala badagokio, curriculumeko elementuen, materialen eta alderdi pertsonalen eta antolamendukoen funtzionamenduan hautemandako gabeziei eta disfuntzioei buruzko gogoeta.

Behin onetsita, ikasturte bukaerako memoria ikastetxeko erreferentziazko ikuskatzailearen eskura jarriko da, EDUCA plataformaren bidez, uztailaren 10a baino lehen.

6.–Gainbegiratzea.

Ikastetxeko erreferentziazko ikuskatzaileak UPOa eta ikasturte bukaerako memoria gainbegiratuko ditu, egiaztatzeko bat datozela indarreko araudiarekin eta ikastetxearen behar eta emaitzekin, eta, hala badagokio, behar diren zuzenketak eta doikuntzak egitea eskatuko du.

7.–UPOaren eranskinak.

Eranskin gisa sartuko dira irakaskuntza programazioen adostasun agiriak.

UPOarekin batera, irakaskuntza programazioen adostasun agiriak aurkeztuko dira, ziurtatzearren programazioak egoki jaso dituela eskatzen diren atal guztiak. Hortaz, programazio horiek gordetzeko ardura ikastetxeei dagokie. Dena dela, beharrezkoa den kasuetan, Hezkuntza Departamentuko dagokion zerbitzuak programazioa berariaz eskatzen ahalko du, irakaskuntza ikuskatzeko prozesuetan sartzen direlako, kalifikazioen erreklamazio kasuetan, analisi estatistikoak egiteko edo beste arrazoi batzuengatik.

Irakaskuntza programazioen adostasun ereduak eskuragarri egonen dira, eranskin gisa, UPOan, EDUCAn.

B) UPOari buruzko argibideak

1.–Autoebaluazioa eta ikastetxearen hobekuntza plana.

2022-2023 ikasturtean zehar, autoebaluazioaren esparruan, ikastetxeetan baterako hausnarketako prozesu bat egin zen, eta horren ondorioz, haien jarduna hobetzeko zenbait eremu detektatu ziren. Ondoren, eta hautemandako beharrei erantzunez, hobekuntza planak egin ziren. Plan horiek EDUCA plataforman erregistratu ziren (Ikastetxea > Dokumentazio instituzionala > Hobekuntza plana).

Plan horiek prestatu ondoren, bai ikastetxearen Hobekuntza Orokorreko Plana, bai zikloetako Hobekuntza Planak, 2023-2026 aldian jarriko dira abian, eta haien jarraipena eta ebaluazioa eginen da.

Horretarako, 2023-2024 ikasturtean, Hobekuntza Planetan jasotako beharrei ikastetxeek lehenengo erantzun bat eman zieten UPOaren planen bidez. Planak abian jartzeko bigarren ikasturte honetan, ikastetxeko zuzendaritzak, 2024-2025 ikasturteko Urteko Programazio Orokorrean ikastetxearen urteko planaren urteko helburuak ezartzeko garaian, Hobekuntza Orokorreko Planean ezarritako helburuak hartuko ditu kontuan, besteak beste. Bestalde, UPOan sartutako zikloen urteko planetan, taldeek jaso beharko dituzte, helburuak zehaztean, autoebaluazio-prozesutik eratorritako zikloen hobekuntza planen helburuak.

Halaber, aipatzekoa da Hobekuntza Orokorreko Planen eta zikloen planen ebaluazioa egin beharra dagoela 2023-2026 aldiko ikasturte bakoitzaren amaieran, 2024., 2025. eta 2026. urteetan. Hau da, baloratu beharko da noraino lortu diren helburuak nahiz noraino gauzatu diren planteatutako ekintzak, eta hobetzeko proposamenak eginen dira. Ebaluazio hori EDUCAn erregistratuko da, horretarako diseinatutako txantiloi digitaleko ataletan (ebaluazioa, balorazioa eta hobekuntzak).

Hezkuntzako Ikuskapen Zerbitzuak 2024-2025 ikasturtean gainbegiratuko du ikastetxearen urteko planak eta zikloen planek jasotzen dituztela hobekuntza planean ikasturterako adostutako helburuak.

Hezkuntza Departamentuak lagunduko du ikastetxeen hobekuntza planaren helburuak garatzen eta lortzen, departamentuko zerbitzuen bidez, orientabideak, proposamenak, jardunbide egokien adibideak eta, hala badagokio, prestakuntza emanez irakasle-taldeari.

Ikastetxearen prestakuntza plana funtsezko elementua da prestakuntza instituzionalerako. Zuzendaritza-taldeak ezarriko du haren edukia eta, betiere, hobekuntza planaren ondoriozko premiei erantzun beharko die. Landa eskoletan, zuzendaritza-taldeek adostuko dute Eremuko Prestakuntza Planaren edukia. Eremuko koordinatzaileari dagokio zuzendaritzek onetsitako jarduerak eta ekintzak kudeatzea.

2.–Irakurtzeko konpetentziaren hobekuntza.

Derrigorrezko Bigarren Hezkuntzako arlo guztietan irakurriaren ulermena hobetzeko, Hezkuntza Departamentuak irakurtzeko konpetentziak hobetzeko planak sustatuko ditu. 2024-2025 ikasturtean, DBHko 3. eta 4. mailakoentzako planak izanen dira.

Planak egin ahal izateko, Hezkuntza Departamentuak ur-jauzi moduko prestakuntza bat antolatuko du: kanpoko aditu batzuek prestakuntza emanen diete Nafarroa osoko Gaztelania eta Literatura / Euskal Hizkuntza eta Literatura ikasgaietako zortzi irakasleri, eta irakasle horiek izanen dira ikastetxeetan sortzen diren taldeen tutore. Tutore horiek aurretiaz izendatuko dira eta bakoitzak 9 orduko murrizketa izanen du zuzeneko irakaskuntza orduetan tutore lan horiek egiteko haien ardurapean izanen diren ikastetxe gutxi batzuetan.

Halaber, ikastetxe bakoitzean zuzendariak, ahal dela, Gaztelaniako edo Euskarako Departamentuko burua izendatuko du planeko koordinatzaile izan dadin. Pertsona horrek 2 eskola-orduko murrizketa izanen du eta DBHko institutu bakoitzean 2024-2025 ikasturte hasieran sortuko den irakurtzeko konpetentziak hobetzeko lantaldea koordinatu beharko du. Lantalde horretan koordinatzailea eta arlo eta departamentu didaktiko bakoitzeko irakasle bana egonen dira. Lantaldeak esparru guztietako testuak ustiatzeko ereduak prestatuko ditu, eta ikastetxean izendatutako tutoreak berrikusiko ditu. Lantalde horiei nahitaezko prestakuntza instituzionaleko 35 orduko prestakuntza egiaztatuko zaie ikasturte bukaeran.

Testuak hautatu eta berrikusi ondoren, ikastetxe guztien eskura jarriko dira jardunbide egokien trukerako plataforma digital batean.

3.–Aniztasunari erantzutea.

Ikastetxea da, bere osotasunean, bertako ikasle guztien aniztasunari erantzun inklusiboa eta hezkidetzan oinarritua emateko arduraduna, haien presentzia, parte-hartzea eta ikaskuntza bermatuz, eta, horretarako, konpromiso irmoa erakutsi behar du bikaintasunaren, ekitatearen eta genero-berdintasunaren printzipioekin, hezkuntza inklusiboaren oinarri diren aldetik.

Ikasleen aniztasunari ahalik eta egokien erantzuteko, funtsezkoa da irakasle-talde osoaren lana. Ikaskuntzarako sarbidea oztopatzen duten trabak hautematea izanen du ardatz, eta horiek ezabatzeko helburuak zein diren adierazi behar du (hobekuntza planean jaso beharko dira helburuok). Erantzun hori ikasturtea antolatzeko alderdi nagusietako bat izan behar da.

Inklusio Plana Hezkuntza Departamentuko Inklusio, Berdintasun eta Bizikidetza Zerbitzura bidaliko da, urriaren 31 baino lehen.

3.1. Antolaketari dagozkion alderdiak.

Ikastetxeak koordinazio bide eraginkor bat ezarriko du bermatzeko irakasle-talde osoak modu koherentean jokatzen duela ikasleei hezkuntza arreta inklusiboa eta hezkidetzan oinarritutakoa ematean, eskola-ibilbide osoan. Arreta inklusiboa ikastetxeen antolaketa egitura guztietan landu beharko da.

Ikaskuntza eta irakaskuntza prozesuetako hasierako ebaluazioa baterako berrikuspen tresna da, ikasleentzako hezkuntza erantzun inklusiboa eta hezkidetzakoa planifikatzeko eta diseinatzeko. Irakasle-taldeak zehaztuko ditu, tutorea haren buru izanik eta elkarren artean ados jarrita, hezkuntzaren arloko esku-hartzeari erantzuna emanen dioten hezkuntza neurriak, neurri metodologikoak, antolamendukoak edo curriculumekoak.

Koordinazioa jarraitua izanen da, garatutako jarduketen jarraipen xehea, doikuntza eta ebaluazioa egiteko, kontuan hartuz edozein unetan detektatzen ahal direla ikasle guztiek aurrera egitea eragozten duten oztopoak.

Neurrien ezarpenak testuinguruko paradigmari erantzunen dio Ikaskuntzaren Diseinu Unibertsalaren (IDU) ikuspegitik, hala, curriculumaren malgutasuna sustatuz, curriculuma irekia eta inklusiboa izateko hasieratik, etorkizuneko beharrezko eta ekidin ezinezko egokitzapenak murrizten saiatuz.

Salbuespenezkoagoak diren bestelako neurriak antolatuko dira jarduketa oso zehatz eta justifikatuei erantzuna emateko soilik, ohiko testuinguruan egin ezin daitezkeenak, hain zuzen ere.

Irakasleek partekatutako irakaskuntzaren bidez hartuko dute parte, helburu jakin batzuk indartzeaz gain, ikasle guztien parte-hartzea ahalbidetzeko. Partekatutako irakaskuntza koordinatzeko plan bat ezarriko da, ikaskuntza prozesuan profil bakoitzari esleitutako funtzioak eta zereginak zedarrituko dituena, eta Inklusio Planean jasoko da.

Salbuespen gisa ohiko ikasgelatik kanpoko laguntza ezarri beharra justifikatu behar denean, honako hauek zehaztuko dira: erabaki horren arrazoia eta xedea, lortu nahi diren helburuak eta testuinguru arruntean horiei erantzuteko dagoen ezintasunaren zergatia. Era berean, zehaztu eginen da zenbat denborarako aurreikusi den halako esku-hartzea, kontuan hartuz ikasgelatik kanpoko saio kopurua ahalik eta txikiena izan behar dela.

Ikasle sartu berrien kasuan, ikasturte honetarako kendu ezin direnean ikaskuntzan sartzeko egun dauden hezkuntzako oztopo zehatzak, aztertuko da, ezarritako prozedurari jarraituz, ea ikasleak eskolatu daitezkeen ikastetxearen egituretan. Egitura horiek (egitura espezifikoak eta curriculum bereziko unitateak –CBU–) aukera ematen dute hezkuntzaren arloko oztopo horiek murrizteko, testuinguruak ematen baitu ikasleei egokitutako erantzun bat. Ikastetxeek bultzatuko dute egitura horietako ikasleak sar daitezen bai erreferentziazko taldeetan baita ikastetxeko jarduera guztietan ere.

Kasu horietan guztietan, bideratze txostenetan zehaztu beharko da proposatutako egiturak zer eskaintzen dien ikasleei, ohiko eremuan bete ezin dena, hain zuzen ere.

Ikastetxea aldatzea dakarren neurri edo egitura bat proposatzeko, kasu oso berezia izan behar da, eta aniztasunari erantzuteko bide arrunt guztiak agortu ondoren ezarriko da hori. Eskolatze-aldi arruntean kudeatu beharko da, horretarako ezarritako protokoloak zehatz-mehatz beteta.

Egitura espezifikoen programazio didaktikoak ikasgelako tutoreen erantzukizuna dira.

Curriculumaren egokitzapen esanguratsuak arlo bakoitzeko irakasleen erantzukizuna dira; horien berri eman behar diote egokitzapenak dituzten ikasleen taldeko tutoreari. Horrez gain, irakasle-taldearen ardura izanen da sartzeko neurriak hautatu eta martxan jartzea, baita horiek ebaluatu eta egokitzea ere.

Hezkuntza-orientazioko langileek irakasleekin lan eginen du eta aholku emanen die programazioak, curriculum-egokitzapen esanguratsuak eta sartzeko neurriak egiterakoan.

Irakasle-talde osoari dagokio ikasleen autonomia garatzea. Ingurunean oztopo zehatz batzuk egoteagatik, zenbait ikaslek talde osoaren laguntza behar dute.

Hezkuntza laguntzako langile espezialistekin elkarlanean zehaztu eta aplikatuko da "Autonomia pertsonaleko eta gizarte integrazioko programa", ikaslearen autonomia, garapen pertsonala eta curriculumean sartzeko aukerak sustatze aldera. Programa horretan ikastetxe osoa dago sartuta.

Ikasle horien autonomia behar bezala garatzeko, koordinazio egokia egin beharko da hezkuntza laguntzako espezialisten eta irakasle-taldea osatzen duten gainerako kideen artean.

Oro har, lanaldi osoa ez duten hezkuntza laguntzako espezialisten ordutegiaren eguneroko saioak jarraian antolatuko dira, zerbitzuaren beharrizanengatik behar bezala justifikatzen diren ohiz kanpoko kasuetan izan ezik.

Espezialista horien ordutegia EDUCAn jakinarazi behar da, AZLei esleitutako postua deskribatzeko atalean.

Ikasleen beharrei aurre egiteko, sareko bilera bat egin behar da osasuneko eta eskubide sozialetako hezkuntza eragileen artean, osasun-diagnostikoa duten kasuak aztertzeko, edo zaintza edo arreta espezifikoak behar dituzten gizarte-kalteberatasunekoak eta/edo ikastetxeetan prestakuntza jarduerak egitekoak, 2024-2025 ikasturtean.

3.2. Esku hartzea absentismoaren aurrean.

Absentismoari aurre egin behar zaio lehen zantzuak agertzen direnean, epe laburrean arrakasta izateko bermeren bat izan nahi badugu. Eskolatzea erabatekoa izan dadila lortzeko eta derrigorrezko hezkuntzaren etapan absentismoa murrizteko, batera eta testuinguruari helduta jardun behar dute hezkuntza komunitate osoak, oinarrizko gizarte zerbitzuek, Adingabearen Babes eta Sustapenerako Atalak eta Fiskaltzak.

Arazoa diagnostikatu eta hari aurre egiteko tresnetako bat da ikastetxeek erabili behar duten absentismoaren protokoloa. Bertan, esku hartzeko lau maila zehazten dira, absentismoaren larritasunaren edo jarraitutasunaren arabera, baita maila bakoitzean gauzatu beharreko ekintzak ere. Esku hartzeko maila guztietan, ikastetxeak kasuen jarraipena egin beharko du, aldian behin egoeraren berri emanez eta koordinazio bilerak eginez sareko kideekin.

Jarraipen hori eraginkorra izan dadin, oso garrantzitsua da EDUCAn erregistra daitezela, ikasturte osoan, bidezko arrazoirik gabe ikastetxera ez agertzeak. Era berean, protokoloan ezarritako 2. mailara igarotzean, horren berri emanen zaio Inklusio Proiektuetarako Bulegoari helbide elektroniko honen bidez: proyectos.de.inclusion@navarra.es.

3.3. Nafarroako Hezkuntza Ekitaterako Baliabide Zentroa (NHEBZ).

Nafarroako Hezkuntza Ekitaterako Baliabide Zentroa (NHEBZ) hezkuntza inklusioaren arloko erreferentziazko kalifikazio handiko zentroa izanen da.

Arlo eta programetan egituratuta egoteak lagundu eta sustatuko ditu ikasle guztiek ikastetxeetan duten presentzia, parte-hartzea eta ikaskuntza.

Hezkuntza orientazioko langileen bitartez eskatuko da aholkularitza, eskaera hezkuntza komunitateetako zeinek egiten duen kontuan izan gabe.

Baliabide zentroa osatzen duten programek erantzun desberdinak emanen dizkiete ikastetxeen eskaerei, eta akonpainamendua eginen diete haien eraldaketan, aldaketa metodologikoetan, Ikaskuntzarako Diseinu Unibertsaleko (IDU) tresnen aurrerapenean eta beharrezkoa den banakako arreta espezializatuan.

4.–Inklusio, berdintasun eta bizikidetza programak.

4.1. Inklusioa: PROA+ programa.

PROA+ programa (hezkuntza bideratu, bilakatu eta aberasteko lurralde lankidetzako programa) finantzaturik dago Hezkuntzako eta Lanbide Heziketako Ministerioaren Suspertze eta Erresilientzia Mekanismoko funtsez. Programaren helburu nagusia da hezkuntza konplexutasun handieneko ikastetxeei laguntza instituzionala ematea, eta ikastetxe hauek dira programaren hartzaileak: funts publikoekin mantentzen diren eta Haur Hezkuntzako bigarren zikloa, Oinarrizko Hezkuntza (Lehen Hezkuntza, Derrigorrezko Bigarren Hezkuntza eta oinarrizko mailako heziketa zikloak) eta Batxilergoa ematen dutenak.

Horretarako, berrogeita hamalau ikastetxe hautatu dira, publikoak zein itunduak, deialdi bidez. Ikastetxe horiek aparteko zuzkidura jasotzen dute, sareetan biltzen dira eta aholkularitza eta prestakuntza jasotzen dute Hobekuntza Plan Estrategiko bat eta zenbait jarduera garatzeko eta ezartzeko. Jarduera horiei palanka-jarduerak deritze, eta helburu dute antolakuntza-kulturan beharrezkoak diren aldaketak bultzatzea, bermatu ahal izateko ikasle guztiek eskola arrakasta izanen dutela, arreta jarrita, bereziki, ikasle guztien artetik egoera ahulenean dauden horietan.

4.2. Berdintasuna eta hezkidetza: Hezkidetza Plana eta SKOLAE Programa.

1SKOLAE programaren helburua da hezkidetza eraldatzea ikastetxeetan. Hezkuntza Departamentuak prestakuntza, baliabideak eta laguntza ematen ditu prozesu hori errazteko, eta, horrela, bermatzen du, hezkuntza etapa guztietan, irakasleek eskuratzen dutela hezkidetzarako konpetentzia profesionala, eta ikasleek, berdintasunez bizitzeko konpetentzia.

SKOLAE Programa ikastetxe batean ezartzeko, antolaketa-egitura bat sortu behar da ikastetxe barnean, eta, horretarako, nahitaezko prestakuntza egin beharra dago, lau ikasturtez, gutxienez ere, eta bete beharko dira araudian ezarritako lau faseak.

Ikastetxe bakoitzean talde bultzatzaile bat eratuko da, zeinen kide izanen baitira zuzendaritza-taldeko kide bat eta hainbat ziklo edo arlotako irakasle batzuk. Pertsona horietako bat koordinatzaile izendatuko da eta sareko bost saiotan parte hartuko du. Saioak astearteetan izanen dira, Hezkuntza Departamentuko SKOLAE taldeak ezarritako egunetan. Bestalde, ikastetxeko zuzendaritzak ordutegi bat ezarriko du, astean behin bil daitezen talde bultzatzaileko irakasle guztiak.

Klaustroko irakasle guztiek ikastetxeko prestakuntza instituzionaleko 12 ordu gordeko dituzte hezkidetzari buruzko prestakuntzarako. Ikastetxea programa ezartzeko zer fasetan dagoen, prestakuntza hori banakakoa edo taldekoa izan daiteke, online eta tutoretzapean, edo ikastetxean bertan.

Talde bultzatzaileko irakasleek prestakuntza edo aholkularitza espezifikoa jasoko dute, ikastetxean Hezkidetza Nortasunaren Plana garatzeko.

2024-2025 ikasturtean, programa orokortzen jarraituko da, ikastetxe berriak sartuko baitira.

Lau faseetako ibilbidea amaitu duten ikastetxeek modu autonomoan jarraituko dute Hezkidetza Nortasunaren Plana garatzen, talde bultzatzailearen egiturari eta funtzioei eutsiz. Koordinatzaileak liberazio-orduari eutsiko dio bere lana egiteko eta egoera berean dauden ikastetxeen sarearen bileretara joateko.

Ikastetxe horietan ez da beharrezkoa izanen klaustro osoak gordetzea hezkidetzako 12 prestakuntza-ordu. Hala ere, SKOLAE Ien edo SKOLAE IIn banakako prestakuntza egina ez duten irakasleek gorde beharko dituzte prestakuntza hori egiteko beharrezkoak diren orduak.

4.3. Bizikidetza: Laguntza programa.

Hezkuntza Departamentuak, Laguntza programaren eta ikastetxeen eskura jartzen diren beste baliabide batzuen bidez, bizikidetza planak egiteko orientazioa, prestakuntza eta aholkularitza emanen du.

Laguntza programaren bidez laguntza emanen da irakasleak pixkanaka-pixkanaka treba daitezen emozioen hezkuntzan, gatazken konponketan eta eskola bitartekaritzaren arloan, tratu on falta edo ongieza sor dezaketen egoeren aurrean modu prebentiboan eta kalitatez esku hartu ahal izateko.

Ikastetxe bakoitzaren Bizikidetza Planean curriculum eta antolaketa neurriak jasoko dira bizikidetza, tratu ona eta eskola giroa hobetzeko. Nabarmenduko da zein garrantzitsua den hezkuntza komunitate osoa inplikatzea arlo horretan prebentzio lana egin eta tratu onak eta hezkuntza emozionala ikasteko, gatazkak konpontzeko, emozioen aldetik seguruak eta osasungarriak diren inguruneak sortzeko eta eskola jazarpena eta indarkeria modu guztiak desagerrarazteko konpromisoaren ikuspegitik.

Ikastetxe guztiek izan beharko dute ikasleen ongizaterako eta babeserako koordinatzaile bat, zeina jardunean arituko baita ikastetxeko zuzendariak edo titularrak gainbegiratuta.

Ongizaterako eta babeserako koordinatzaileak eginkizun hauek izanen ditu, gutxienez ere:

a) Sustatzea haurren eta nerabeen prebentzioari, detekzio goiztiarrari eta babesari buruzko prestakuntza-planak, ikastetxeetan lan egiten duten langileentzat zein ikasleentzat.

b) Koordinatzea, bat etorrita hezkuntza administrazioek onetsitako protokoloekin, gizarte zerbitzu eskudunen esku-hartzea behar duten kasuak, eta, beharrezkotzat jotzen bada, dagokien agintaritzak jakinaren gainean jartzea. Horrez gain, jakinarazteko betebeharra ere bete beharko du legeetan ezarritako kasuetan.

c) Erreferente gisa agertzea ikasleen, ikastetxeko langileen eta, oro har, hezkuntza komunitatearen aurrean, ikastetxean eta ikastetxearen ingurunean izan daitezkeen indarkeria kasuekin lotutako komunikazioetarako.

d) Sustatzea haurrek eta nerabeek ahalik eta ongizaterik handiena izanen dutela bermatuko duten neurriak, bai eta haur eta nerabeei tratu ona emateko kultura ere.

e) Gatazkak bakebidez ebazteko metodo alternatiboak erabil daitezen sustatzea ikastetxeko langileen eta ikasleen artean.

f) Ikastetxeko langileei jakinaraztea zer protokolo dauden, udalerrian edo autonomia erkidegoan, edozer eratako indarkeriari aurrea hartzeko eta hartatik babesteko.

g) Errespetua sustatzea desgaitasuna duten ikasleekiko edo kalteberatasun nahiz aniztasun bereziko beste edozein egoeratan diren ikasleekiko.

h) Bizikidetza Plana koordinatzea ikastetxeko zuzendaritzarekin.

Ongizaterako eta babeserako koordinatzaileak, jardutean, bete eginen du datuen babesaren arloan indarrean dagoen araudian ezarritakoa.

Izan daiteke ikastetxeko bizikidetza-arduraduna bera, edo zuzendaritza-taldeak izendatutako beste pertsona bat.

Bizikidetzaren arloko Aholkularitza Bulegoaren webguneak zenbait baliabide, eredu, protokolo eta iradokizun jartzen ditu ikastetxeen eskura beren jarduketa plana zehazten laguntzeko eta berariazko erantzuna bideratzeko zenbait kasuren aurrean (suizidioak, dolua, ziberbizikidetza eta abar). Ikastetxe guztietan, Bizikidetza Plana eta haren urteko zehaztapena eguneratu beharko dira, eta egokituko dira gure orrian bildu den bizikidetzari eta indarkeriaren prebentzioari buruzko indarreko araudira.

2023-2024 ikasturtean, hainbat ikastetxek Laguntza programa garatu dute, ekologia emozionalaren ikuspuntutik. 2024-2025 ikasturtean, parte hartzen ari diren ikastetxeetan proiektu hau ezartzen jarraituko da.

Aldi berean, borondatez eskatzen duten ikastetxeetan Laguntza programa ezartzen jarraituko da.

Ideia autolitikoak eta jokabide suizida dituzten ikasleen egungo testuinguruan, Hezkuntza Departamentuak prestakuntza jarduerak eskaintzen dizkie ikastetxeetako langileei, suizidioaren prebentzioari buruz.

Prestakuntza eskaintza hori beren prestakuntza plan instituzionaletan sartzea gomendatzen zaie ikastetxeei.

5.–Ebaluazio diagnostikoak.

Ebaluazioa etengabeko hobekuntzari lotuta dago, eta funtsezko laguntza eta baliabidea da, gainera, errealitatea eta ikastetxeetan aurrera eramaten diren hezkuntza jarduketen ondorioak hobeki ezagutzeko. Alde horretatik, hobekuntza ildoak ezartzeko orduan, ikasleen barneko emaitzak (behar diren neurriak hartzeko informazio eta hausnarketa iturri izan beharko baitira) eta hurrengo puntuetan zehaztuko diren ebaluazioen emaitzak hartuko dira kontuan.

5.1. Ebaluazio diagnostikoa DBHko 2. mailan.

Hezkuntzari buruzko maiatzaren 3ko 2/2006 Lege Organikoaren 144. artikuluan xedatutakoaren arabera, Hezkuntza Departamentuak Derrigorrezko Bigarren Hezkuntzako 2. mailan diagnostiko helburua duen ebaluazio bat garatzea ezarri du.

Ikastetxeek ebaluazio diagnostikoa eginen diete Derrigorrezko Bigarren Hezkuntzako bigarren ikasturteko ikasle guztiei. Konpetentziak ebaluatzeko probak kanpoan prestatuko dira, eta ikastetxeetan aplikatu eta zuzenduko. Ebaluazio Atalak koordinatuko du ebaluazio hori.

Ikastetxeko zuzendaritza plangintzan arituko da eta behar diren neurriak hartuko ditu, bai proben aplikazioan bai zuzenketan, datu grabaketan eta txostenak entregatzean parte hartu behar duten irakasleek zeregin horiek beren lan ordutegian bete ahal izan ditzaten.

Ebaluazio horrek ikastetxeentzat prestakuntza eta orientazio izaera duela kontuan hartuta, proben eta emaitzen azterketaren erantzukizuna irakasle guztiena da. Azterketa horretatik informazio garrantzitsua aterako da hezkuntza arretan detektatutako premietara egokitzeko.

Probak, oro har, apirilaren 11, 14 eta 15ean eginen dira eta horien ordena behar adina denborarekin zehaztuko da. Hezkuntza Departamentuak jarraibideak emanen ditu proben aplikazioa eta zuzenketa arautzeko.

Ebaluazio diagnostikoan lortutako emaitzak ikastetxeen eskura jarriko dira, EDUCAn, bi informazio iturriren bitartez:

1.–Emaitzen urteko txostena: txosten horri esker, ikastetxeak aztertu ahal izanen du zer puntuazio lortu duen konpetentzia bakoitzean eta zein izan den item bakoitzaren erantzun zuzenen ehunekoa. Gainera, ISEKaren arabera zenbatetsitako puntuak ezagutzen ahalko ditu.

2.–Azken ikasturteetako emaitzen bilakaerari buruzko txostena: grafiko horiei esker ikastetxeak ikusi ahal izanen du zein izan den konpetentzia bakoitzaren emaitzen joera azken ikasturteotan.

Ikasturtea bukatu aurretik, behar bezalako aurrerapenaz, zuzendaritza-taldeak iturri horietatik bildutako informazioa transmitituko du koordinazio pedagogikorako batzordearen bileran; horrela, gerora, saileko edo arloko buruek ikastetxeko emaitzen berri emanen diete irakasleei.

Gaitasunak hobetzea ez da DBHko 2. mailako ikasleak zuzenean prestatzen dituzten irakasleena soilik, guztiena baizik. Horregatik, sail edo arlo guztiek aztertuko dituzte emaitzak, eta egoki irizten dizkioten hobekuntza proposamenak bilduko. Azterketa hori errazago egiteko, item bakoitzari buruzko informazio gehigarria egonen da horretarako prestatutako zuzenketa koadernoetan.

Hautemandako hobekuntza eremuak zein diren adieraziko da bai ikastetxearen hobekuntza planean bai eta sailetako edo arloetako urteko lan planetan ere.

Eskola kontseiluari emanen zaio horren guztiaren eta hartutako neurrien berri.

Ikastetxeek erabakiko dute noiz eta nola helarazi ikasleen txosten indibiduala familiei ikasturtea amaitu baino lehen. Gomendagarria da hori tutoretzaren testuinguruan egitea.

6.–Eskolako liburutegia, AbiesWeb eta Abies+.

Ikastetxeek eskura dute AbiesWeb programa, eskolako liburutegien kudeaketa informatizatua egiteko. AbiesWeb erabiltzeko oinarrizko ikastaro bat antolatuko da, eta ikastetxeak programaren arduradun izateko aukeratzen dituen pertsonak joaten ahalko dira. Halaber, ikasturtean zehar, interesa duten ikastetxeei Abies+ probatzeko eskainiko zaie, AbiesWeb programaren bertsio berria.

Era berean, informazio saioak antolatuko dira "Odisea" plataformaren erabilerari eta aukera pedagogikoei buruz (eskolako liburutegi digitala).

Eskolako liburutegiaren kudeaketaren arduradunei eskola-ordu gisa kontatuko zaizkien ordu batzuk esleitu ahal izanen zaizkie kudeaketa informatikoa egiteko eta eskolako liburutegia dinamizatzeko proiektuak egiteko, betiere, ikastetxeko ordutegia kontuan hartuta.

Eskolako liburutegiko arduradunen eginkizuna izanen da honako zeregin hauek egitea:

a) Funts bibliografikoak eta bestelako materialak automatizatzea eta antolatzea.

b) Mailegu sistema antolatzea.

c) Irakurketaren sustapenari eta irakurzaletasuna bultzatzeko ikastetxeko planari lotutako ekintzen sustapena.

d) Liburutegiaren aldetik laguntza ematea ikastetxean antolatzen diren programak eta proiektuak egiteko orduan.

e) Liburutegiko ordutegia antolatzea bai eskola-orduetan bai eskolaz kanpokoetan.

f) Ikasleen eta irakasleen artean sustatzea formatu digitaleko irakurriaren ulermena hobetzea, "Odisea" eskolako liburutegi digitalaren bitartez.

7.–Ikastetxeko Hizkuntza Proiektua.

Otsailaren 19ko 16/2019 Foru Aginduak Ikastetxeko Hizkuntza Proiektua arautzen du, eta lau urteko epea ezarri zuen proiektua prestatzeko. Epe hori amaitzean, Ikastetxeko Hizkuntza Proiektua etengabe berrikusi eta eguneratu beharreko dokumentua izanen da; horretarako, ikastetxeek Eleaniztasunaren eta Arte Ikasketen Zerbitzuaren laguntza izanen dute. Era berean, honako esteka honetan orientazio gida bat izanen dute eskura:

https://sites.google.com/educacion.navarra.es/plcnavarra/plcihp

Curriculumeko hizkuntzei dagokienez, ikastetxeek EDUCA kudeaketa sisteman honako hauek zehaztu beharko dituzte:

a) Maila bakoitzean ikasgai bakoitza zein hizkuntzatan ematen den (Ikastetxea menua> Ikasketa plana> Ikasgaiaren hizkuntza).

b) Ikastetxeko hizkuntza proiektua nork koordinatzen duen (Langileak menua > Irakasleak > Datu profesionalak).

c) Atzerriko hizkuntzak ikasteko programa nork koordinatzen duen: Atzerriko hizkuntzetan ikasteko programa (Langileak menua > Irakasleak > Lanpostu osagarria).

8.–Atzerriko hizkuntzak ikasteko programak.

Apirilaren 26ko 43/2023 Foru Dekretuan ezarritakoari jarraikiz, Lehen Hezkuntzako etapa amaitzean ikasleei beren hizkuntza konpetentziari buruzko orientaziorako aholku bat emanen zaie, DBHn hautatu beharreko atzerriko hizkuntzetan ikasteko programei dagokienez (foru dekretu horrek Nafarroako Foru Komunitateko Haur Hezkuntzako, Lehen Hezkuntzako eta Derrigorrezko bigarren Hezkuntzako ikastetxeetan atzerriko hizkuntzetan ikasteko programen oinarrizko alderdiak arautzen ditu). Bigarren Hezkuntzako ikastetxeek EDUCAn kontsultatu ahal izanen dute zer txosten egin dituzten, horretarako berariaz, atzerriko hizkuntzetan ikasteko programak dituzten Lehen Hezkuntzako ikastetxeek.

II.–ANTOLAKETA ALDERDIAK

1.–Derrigorrezko Bigarren Hezkuntzako etaparen antolamendua: ikasgaiak eta esparruak.

Oro har, etapako ikasmailak ikasgaika antolatuko dira. Hala ere, ikastetxeek, beren autonomia baliatuta, esparruka lan egin ahal izanen dute, irakasleen klaustroak aldez aurretik onetsita. Ondorio horietarako, 2025-2026 ikasturtean curriculum antolaketa esparruka hasi nahi duten ikastetxe guztiek Ikasketak Antolatzeko Atalari jakinarazi beharko diote 2025eko apirilaren 15a baino lehen (ordenacion.academica@navarra.es), honako hauek kontuan izanik:

–Esparruka lan egiten duten ikastetxeek "hizkuntzaren eta gizartearen esparrua" edo "esparru zientifiko eta matematikoa" bietako bat aplikatu beharko dute, edo, bestela ere, bi esparruak aldi berean.

–Esparruka lan egiteko aukera etapako edozein mailatan aplikatzen ahalko da, eta maila bereko talde guztietan aplikatu beharko da.

–Ikasketak Antolatzeko Atalari zuzendutako jakinarazpenean, adierazi beharko da zein den ikastetxearen izena eta zer ikasmailan edo ikasmailatan eginen den lan esparruka ("hizkuntzaren eta gizartearen esparrua" edo "esparru zientifiko eta matematikoa", edo biak aldi berean).

Era berean, eta arestian deskribatutako baldintza berberei jarraikiz, 2024-2025 ikasturtean antolamendua esparruka ezarrita duten ikastetxeek, epe berean eta modu berean jakinarazi beharko dute horri buruzko edozein aldaketa. Horren gaineko berririk jasotzen ez bada, ulertuko da ez dela aldaketarik izan antolamenduan, eta 2025-2026 ikasturtean aplikatuko da.

2.–Programazio didaktikoak.

2024-2025 ikasturtean, ikastetxeek 3/2020 Lege Organikoan ezarritakoaren arabera Derrigorrezko Bigarren Hezkuntzako eta Batxilergoko ikasketak ezarri ondoren, programazio didaktikoak LOMLOEren curriculumari jarraikiz eguneratzen eta garatzen jarraitu beharko dute.

Orientatzeko gida bat eta programazio-eredu irekiak izanen dira eskura eskola kudeaketako EDUCA sisteman (Ikastetxea > Dokumentazio instituzionala > Ikuskapen-dokumentuak > Programazioak).

Programazio didaktikoak, ahal dela, EDUCAren aplikazioan bertan eginen dira, horretarako prestatutako txantiloi bat erabiliz.

Hezkuntzako Ikuskapen Zerbitzuak arloen eta, hala badagokio, arloen programazio didaktikoen prestaketa gainbegiratuko du, eta bereziki begiratuko du LOMLOEn aurreikusten diren elementu berriak sartzen diren (konpetentzia espezifikoak, oinarrizko jakintzak, ikaskuntza-egoerak, etab.).

3.–Lanaldia.

225/1998 Foru Dekretuaren 1. artikuluan xedatutakoaren arabera, irakasleek, oro har, Nafarroako Gobernuaren mendeko funtzionarioentzat finkatzen den lanaldi bera izanen dute, beren eginkizunetara egokitua.

Nafarroako irakaskuntza publikoaren kalitatea hobetzeko itunaren ondorioz, zeina argitaratu baitzen irailaren 14ko 86/2018 Foru Aginduaren bidez, zuzeneko irakaskuntza-orduak murriztu dira, eta murriztutako ordu horiek honela erabiliko dira: ordu bat ikastetxeko koordinazio lanetarako eta plangintza instituzionaleko agiriak prestatzeko, eta beste ordua ikastetxeak parte hartzen duen proiektuak, programak eta planak egiteko, bai eta aipatu foru aginduan adierazten diren zereginetarako ere.

Horretarako, zuzendaritza taldea arduratuko da lan plana ezartzeaz eta betetzen dela bermatzeaz. Lan plan hori nahitaezkoa izanen da, eta irakasleen gainerako aukera guztien aurretik lehenetsiko da. Planak "edukiak" eta "egikaritzeko egutegia" izeneko atalak izanen ditu, eta azken horren barrenean, bileren maiztasuna zehaztuko da.

Horretarako, ikastetxeko zuzendaritza taldeak lanerako plan horretarako erabiliko diren orduak zehaztuko ditu, eta horiek ikasleen ordutegiarekin bat ez datorren ordutegian antolatzen ahalko dira.

Jarraian agertzen den taulan lanaldi osoko irakasleen lanaldiaren laburpena azaltzen da.

IRAKASLEEN LANALDIAREN LABURPEN TAULA (lanaldi osoa): BIGARREN HEZKUNTZA

URTEKO LANALDIA: 1592 ordu

IKASTETXEAN BERTAN EMAN BEHARREKO ORDUAK, ASTEAN 30

18 ordu.

a) ZUZENEKO IRAKASKUNTZA + b) ESKOLA-ORDUAK (zuzeneko irakaskuntza orduak murriztean gelditzen diren orduak)

Ikasleei eskola edo irakaskuntza emateko.

225/1998 Foru Dekretuaren 22. artikuluan zehaztutako lanetarako.

2 ordu.

ESKOLA-ORDUAK (Ordutegia berreskuratzea. 2018ko hitzarmena)

Ebazpen honetako "Lanaldia" atalean zehaztutako lanetarako.

Ibiltaritzak.

5 ordu.

ASTEAN ZENBATU BEHARREKO ORDU OSAGARRIAK

Zaintzak.

Departamentua.

Tutoretzak.

Koordinazio bilerak.

5 ordu.

HILABETEAN ZENBATU BEHARREKO ORDU OSAGARRIAK

Klaustroa.

Ebaluazioko eta irakasleen taldeko bilerak.

Familiak.

Beste jarduera osagarri eta ikasketez kanpoko batzuk.

Plangintza instituzionaleko tresnak.

35 ordu prestakuntzan.

URTEKO LANALDIA OSATU ARTEKO GAINERAKO ORDUAK

Irakaskuntza jarduerak prestatzea eta irakasleen lanbide gaitasunak perfekzionatzea, hautaketa batzorde eta epaimahaietan edo antzeko jardueretan parte hartzeko irakasleek duten betebeharraren kalterik gabe, jarduera horietarako izendatu badituzte.

Ekaineko eta iraileko eskola gabeko lan egunetan, egunean ikastetxean egon beharreko bost orduko lanaldi jarraitua egin beharko dute irakasleek.

4.–Irakasleen ordutegia prestatzea eta onartzea.

Uztailaren 6ko 225/1998 Foru Dekretuak, zeina aldatu baitzuen uztailaren 16ko 60/2014 Foru Dekretuaren bosgarren xedapen gehigarriak, ezartzen du ezen irakasleen ordutegiak ikasketaburuak prestatu behar dituela, ikastetxeko zuzendariak onetsi behar dituela eta EDUCA kudeaketa programaren bitartez jakinarazi behar direla irailaren 30erako. Horren gaineko erreklamazio guztiak Hezkuntzako Ikuskapen Zerbitzuak ebatziko ditu, eta, horretarako, hamabost eguneko epea izanen du.

Ordutegiak prestatzeko, eskola kudeaketako EDUCA sisteman eskuragarri daude laguntza dokumentuak, kontratuen ordutegi-taula eta irakasleen ordutegiaren kontzeptuak (Ikastetxea > Dokumentazio instituzionala > Ikuskapen-dokumentuak > Irakasleen ordutegia).

Hezkuntzako Ikuskapen Zerbitzuak irakasleen asteko ordutegiaren banaketa zuzena den ikuskatuko du (zuzeneko irakaskuntzan emandako orduak, eskola-orduak eta jarduera osagarrien orduak).

5.–Zuzendaritza-taldeen koordinazioa.

Ikastetxeen arteko koordinazioa handitzeko eta prestakuntza programetan parte hartzea areagotzeko, zuzendariak, ikastetxeko aukeren arabera, astearte goizak eskola-ordurik gabe izan ditzake, zeregin horiek gauzatzeko.

6.–Irakasleak lanera ez agertzea.

Aldi baterako ezintasun batengatik irakaslea lanera joaten ez denean, ikastetxeko zuzendaritzak egin behar duen kontrolean Hezkuntza Departamentuko webgunean ezarritakoari jarraituko zaio:

https://www.educacion.navarra.es/eu/web/dpto/incapacidad-temporal

Aldi baterako ezintasun egoeran dauden MUFACEko langileek bajaren frogagiria aurkeztu behar dute gehienez ere 3 eguneko epean, lanera huts egindako lehen egunetik zenbatzen hasita. Hurrengo berrespen parteak hamabostean behin edo hilean behin aurkeztuko dira, medikuak zer erabakitzen duen. Alta-agirien kasuan, agiria egin eta gehienez 24 orduko epean jakinaraziko da.

MUFACEko langileen jatorrizko parteak Hezkuntza Departamentura helarazteko, Erregistro Orokor Elektronikoaren bidez bidal daitezke, aurrez aurre aurkeztu Nafarroako Gobernuaren Erregistro Ofizialeko edozein bulegotan, edo posta arruntaren bidez bidali.

Era berean, nahitaezkoa da ikastetxeko zuzendaritza-taldeari kopia bat bidaltzea edo aurkeztea ahalik eta lasterren, ikastetxeak jakin dezan zehatz-mehatz bajak zenbat iraunen duen, bajaren bilakaera edo bukaeraren berri izan dezan eta, orobat, ordezkapen bat eskatu ahal izan dezan.

Alta agiriari dagokionez, horren berri emateko epea betetzen ez bada irakaslea ikastetxera itzultzen den egunetik hasita 2 egun naturaleko epean, zuzendaritzak horren berri emanen dio Hezkuntzako Ikuskapen Zerbitzuari, indarreko araudian ezarri bezala jokatzeko. Ukitutako irakasleari ere jakinaraziko zaio idatziz.

Ordezkapenetarako, kotizazioetarako eta nominan eragina duten bestelako elementuetarako dauden epeak ongi betetzearren, proposatzen da komunikazioak Erregistro Orokor Elektronikoaren bidez egitea.

Parteak bidaltzean izandako edozein gorabeheraren berri emateko, helbide elektroniko hau erabil daiteke modu osagarrian: planificacionrheducacion@navarra.es.

Gaixotasuna edo istripua dela-eta aldi baterako ezintasuna duten Gizarte Segurantzako langileek jakinarazi behar dute zer iraupen duen baja-parteak lanera joaten ez diren lehen egunetik. Baja berresteko parteak medikuak erabaki bezain maiz jakinarazi beharko dira. Era berean, baja amaitutzat emateko eta langilea bere lanpostura itzultzeko, ezinbestekoa da alta medikoaren partea jakinaraztea lantokiari egun berean.

Horrez gain, ezinbestekoa izanen da ikastetxeko zuzendaritza-taldeari ahalik eta azkarren horien guztien berri ematea, zehatz-mehatz jakin dezan bajak zenbat iraunen duen, egoera hobera doan eta/edo baja noiz amaituko den. Hala, ordezkapena beharren arabera kudeatu ahal izanen dute.

Ikastetxeetan ezarriko da zer bidetatik eginen dituzten jakinarazpenak MUFACEko nahiz Gizarte Segurantzako langileek, zuzendaritza-talde bakoitzak zehazten duen funtzionamenduaren arabera.

Garrantzitsua da adieraztea ezen, gaixotasun bajengatiko egoerak jakinarazteaz gainera, erditzeagatiko lizentzia edo ama ez den gurasoarentzako lizentzia tramitatzeko komunikazioa bost eguneko epean egin behar dela gehienez, ezarritako prozedurari jarraikiz.

Ordezkapen egoeretan, ordezkoa ez bada bere lanpostura itzultzen, eta Kontrataziorako Atalari ez badio erregistro orokorraren bidez jakinarazi lanpostuari uko egin diola, ikastetxeko zuzendaritzak ez-agertzearen txosten bat bidaliko du contratoseducacion@navarra.es helbidera, lanpostua berriz eskain dadin.

Ikastetxeetan EDUCA aplikazioko kudeaketa sisteman erregistratu beharko dira ikastetxeak berak emandako baimenak. Norberaren aferetarako baimen bat emateko, EDUCA kudeaketa sisteman ikus daitezke irakasle bakoitzak hartutako orduak (Langileak menua > Irakasleak > Berria / Hutsegiteak ikusi). Irakasle ibiltariei eta ikasturte bakoitzean ikastetxe batean baino gehiagoan kontratua duten irakasleei dagokienez, pantaila horretan ikusiko dira ikastetxe bakoitzean eta kontratu bakoitzeko hartutako orduak. AZLen kasuan, urte natural bakoitzean osotara hartutakoak zenbatuko dira.

7.–Zaintza.

Zaintzako irakaslearen eginkizun nagusiak hauek dira:

a) Arreta ematea irakasleak huts egiteagatik edo beste edozein arrazoirengatik libre gelditzen diren ikasleei.

b) Korridoreetan ordena zaintzea, eta, oro har, ikasleek gelaz kanpo duten portaera zaintzea. Horrek ez du esan nahi beste irakasleek eginkizun hori bete behar ez dutenik.

c) Beren zaintza orduetan sortzen diren gorabehera guztiak konpontzea, bai eta ikastetxeko norbait mediku beharrean gertatuz gero hartarako kudeaketak egitea ere, eta ikasketaburua lehenbailehen jakinaren gainean jartzea.

d) Beren zaintza orduetan, irakasleak eskoletara, zaintza txandetara, liburutegira edo bestelako jardueretara berandu joan izanaren edo joan ez izanaren berri ematea ikasketaburuari, idatziz.

e) Ikastetxeko zuzendariak bere eskumeneko esparruan agintzen dion beste edozein eginkizun.

Ikastetxeko zuzendaritzak baimena eman dezake irakasleren baten zaintza orduak berariazko beste jarduera batzuekin trukatzeko, baldin eta zaintza ordu guztiak beteta badaude.

EDUCA aplikazioak modulu berri bat du irakasleen zaintza orduak kudeatzeko, eta hura erabiltzea gomendatzen dugu. Ikasgelako koadernoaren agendarekin lotuta dago, egin beharreko jarduerak jakinaraztea errazten du, zaintzako irakasleak izendatzeko aukera ematen dio zuzendaritza-taldeari eta prozesuaren estatistika bat eskaintzen du.

8.–Irakasle ibiltarien joan-etorrien gastuak.

Oinarrizko ikastetxeetako zuzendaritzek Hezkuntzako Ikuskapen Zerbitzuari jakinaraziko diote, epe barruan jakinarazi ere, zer joan-etorri egiten dituzten beren irakasle ibiltariek (irakasleek, orientatzaileek eta logopedek) ikastetxekoaz bestelako herrietara, funtzionamenduaren txantiloian jasotako plangintzari jarraikiz.

Egoera orria edo fitxa urriaren 31 baino lehen igorriko da, oinarrizko ikastetxeko zuzendariak eta irakasle ibiltariak beteta.

Gainerako joan-etorriak bileretarako deialdia egiten duen zerbitzuak kudeatuko ditu, eta joan-etorri horien artean egonen dira orientazioa koordinatzeko bilerak.

Irakasleen ibiltaritzak jakinarazteko dokumentazioa, jarraibideak eta hileko joan-etorrien fitxa eta formularioa eskuragarri egonen dira eskola kudeaketako EDUCA sisteman (Ikastetxea > Dokumentazio instituzionala > Ikuskapen-dokumentuak > Ibiltaritzak).

9.–Hezkuntza digitalizatzea.

9.1. Konpetentzia digitala eta hezkuntza teknologia.

Ikasturte honetan ikasNOVA Hezkuntzako Eraldaketa Digitalaren estrategia lantzen jarraituko da, 1:1 ereduan (ikasle bat, gailu bat).

Gainera, 2024-2025 ikasturtean, Ikastetxearen Plan Digitala erantsi zaie Urteko Programazio Orokorrean dauden plan guztiei, eta zuzendaritza-taldeak izendatzen duen pertsona izanen da plan horren jarraipenaren arduraduna.

Ikastetxe guztiek SELFIE galdetegia bete beharko dute Ikastetxeko Plan Digitalean jasotako ekintzak ebaluatzeko.

Ikastetxe publiko bakoitzak hezkuntza teknologiako koordinatzailea izanen du, EDUCA aplikazioan hala identifikatuta egonen dena.

Bi figura horien egitekoa da hezkuntzako teknologiak txertatzea ikastetxeko eta ikasgelako prozesuetan, helburu nagusi izanik, betiere, tresna horiek ikaskuntzaren zerbitzura jartzea.

–Hezkuntza teknologiako koordinatzailea. Honako funtzio hauek izanen ditu: ekipo informatikoak kudeatu eta horien mantentze-lanak egitea, arazo teknikoak konpontzea eta langileei zein ikasleei laguntzea.

Hezkuntza teknologiako koordinatzaile lanposturako, ikastetxeak ordu esleipena errespetatu beharko du proposatutako ordutegian (asteazken goizetan 09:00etatik 10:30era), bermatu beharra baitago, beharrezkoa denean, koordinatzaile horrek parte har dezan, aurrez aurre edo telematika bidez eta ordutegi orokorraren barruan, bai prestakuntza jardueretan, bai esperientzia trukeetan bai eta prozesu komunen jarraipena eta ebaluazioa egiteko jardueretan ere.

–IkasNOVAko arduradunak ikaskuntza eta irakaskuntza prozesuak landuko ditu eta honako arlo hauetan teknologiaren integrazio pedagogikoa gauzatuko du:

  • Konpetentzia digitala.
  • STRAM-AI pentsamendu konputazionalaren sarea.
  • IkasNOVA ikasgelak.
  • Eduki digitalak.

IkasNOVAko arduradunari dagokionez, ikastetxeek, ordu horiek esleitzean, proposatutako ordutegia errespetatu beharko dute (ostegun goizetan 09:00etatik 10:30era), bermatu beharra baitago, beharrezkoa denean, hizpide dugun arduradun horrek parte har dezan, aurrez aurre edo telematika bidez eta ordutegi orokorraren barruan, bai prestakuntza jardueretan, bai esperientzia trukeetan bai eta prozesu komunen jarraipena eta ebaluazioa egiteko jardueretan ere.

IkasNOVAko arduraduna ordu batzuez izanen duten ikastetxeek justifikatu beharko dute zer arlo landuko den. IkasNOVAko irakaskuntza arloko aholkulari teknikoak harremanetan jarriko dira ikastetxearekin ikasturte hasieran informazio hori jasotzeko. Ikasturtea amaitzean, ikastetxeek eginiko ekintzen justifikazio memoria bat aurkeztu beharko dute.

Bi figura horien eginkizun zehatzak ikasNova atarian argitaratuko dira (https://ikasnova.digital/eu/inicio).

Suspertze eta Erresilientzia Mekanismoaren (SEM) funtsekin finantzatutako ekipamendu digitala jasotzen duten ikastetxeetako irakasleek konpromisoa hartuko dute ekipamendu hori erabiltzeko gaitzen duen prestakuntza egiteko.

Ikastetxeko Plan Digitalaren barnean eta Bizikidetza Planarekin bat, ikastetxeek zerrenda bat eginen dute ikasleei erabiltzen utziko dieten gailu digital pertsonalekin (telefono adimendunak, tabletak, erloju adimendunak, entzungailuak, etab.). Nolanahi ere, horiek erabiltzea posible izanen da soilik ikastetxeak baimendutako eta programatutako jardueretan.

9.2. IKT zerbitzuen katalogoa.

Hezkuntza teknologiako koordinatzaileak edo zuzendaritza-taldeak ikastetxeko langile guztiei –irakasleei eta AZLei– ezagutaraziko diete IKT zerbitzuen katalogoa. IKT zerbitzuen katalogora sartzeko, zuzeneko sarbide bat izanen da ordenagailu guztien mahaigainean. Eskola kudeaketako EDUCA sistemaren "Aplikazioak" izeneko menutik ere sartzeko modua izanen da.

9.3. Erabiltzailearen Laguntza Zentroa (CAU).

Erabiltzailearen Laguntza Zentroak (CAU) erantzunen die ekipamendu informatikoen, sarearen eta konektagarritasunaren gorabeherei, bai eta IKT zerbitzuen katalogoan adierazitako zerbitzu-eskaerei ere.

IKT zerbitzuen katalogoko "Hardwarearekin, softwarearekin edo sarearekin loturiko gorabeherak" izeneko atalean azalduta dago CAUren funtzionamendua eta haiei nola jakinarazi arazoak. Halaber, "Zerbitzuaren eskaerak CAUri" atalean jakinarazpenak egiteko inprimakiak daude.

9.4. IKT ekipamenduaren inbentarioa.

Ikastetxeetako ekipo informatiko guztiek etiketa izanen dute eta inbentariatuta egonen dira dagokien etiketa edo identifikazio serigrafiarekin.

Eranskailu horiek desagertzen badira, ikastetxeak zenbaki berdineko beste batzuk jarri beharko ditu, edo errotuladore ezabaezin batekin idatzi beharko du ekipamendu zenbakia (zenbaki hori inbentarioaren online aplikazioan bila daiteke).

Inbentarioko online aplikazioan (GLPI), edo horretarako gaitzen den aplikazio baliokidean, ikastetxe bakoitzak bere ekipamendu informatikoen inbentarioa ikusi ahal izanen du, baita horien gorabeherak ere, berriak zein amaitutakoak, eta egokitzat jotzen duen informazioa gehitu edo jarraipena egin ahal izanen du.

IKT zerbitzuen katalogoko "Inbentarioa" atalean dago aplikaziorako sarbidea eta hori erabiltzeko eskuliburu laburra.

Ikastetxeko hezkuntza teknologiako koordinatzaileak aldizka berrikusi beharko du online aplikazioaren inbentarioa, eta bermatuko du ez dela falta ekipamendu bat ere eta ez dela ageri aurretiaz kendutako ekipamendurik.

9.5. IKT ekipamenduko matxurak konpontzeko kontratua.

Kontratu bat dago ikastetxeetako IKT ekipamenduko matxurak konpontzeko, eta haren bidez egunean bertan edo hurrengo egunean konpontzen dira gorabeherak, edo ordezko ekipamendu bat uzten da ikastetxean, inolako kosturik gabe.

IKT zerbitzuen katalogoko "Hardwarearekin, softwarearekin edo sarearekin loturiko gorabeherak" atalean daude jasota konpondutako arazoak eta oraindik konpondu gabe daudenak. Gainera, kontratuaren laburpen bat ere badago, ikastetxeak hori ezagutu behar baitu kontratua bete dezan exijitu ahal izateko zerbitzua eskaintzen duen enpresari.

9.6. Ekipamendua erostea. IKT zerbitzuen kontratuak, lizentzia digitalenak eta bestelako IKT hornidurenak.

Ekipamendu informatikoa eta softwarea erosteko, 69/2023 Ebazpena aintzat hartu behar da.

Ebazpenean jasotako erosteko prozedura eta homologatutako ekipo eta hornitzaileen zerrenda (ikastetxeek horietara mugatu behar dute) jasota eta azalduta daude IKT zerbitzuen katalogoko "Ikastetxeak ekipo informatikoak eta softwarea erostea" atalean. Ikasturtean zehar espazio bat gaituko da ikastetxeek IKT aktiboen erosketa kudeatu eta izapidetu ahal izateko.

Ikastetxeak ezin izanen du onartu dohaintzan emandako bigarren eskuko ekipamendurik, arazoak sortzen baitituzte mantentze-lanetan eta segurtasunean, Hezkuntzako Sistemen, Sareen eta Euskarrien Atalak baimendutako salbuespenak izan ezik.

9.7. Softwarea.

Gogorarazten da ezen ikastetxeek obligazioa dutela ekipamenduetan erabiltzen duten eta haietan instalatuta dagoen softwarea legezkoa dela ziurtatzeko.

Ikastetxe batek software jabeduna erabiltzen badu ekipamenduren batean, dagokion lizentzia eta hori egiaztatzen duten agiriak izan beharko ditu.

Hezkuntza Departamentuak prestatutako Windowsak instalatutako aplikazio asko ditu. Ikastetxeak ekiporen batean beste aplikazioren bat instalatzea behar badu, eskaera bat egin beharko du IKT zerbitzuen katalogoaren bidez, edo hezkuntza teknologien koordinatzaileak instala dezake, ordenagailu guztien mahaigainean dagoen "Ikastetxearen panela" izeneko aplikazioaren bidez.

9.8. Chromebookak.

Baldin ikastetxeak 1:1 ereduaren alde egin badu, zeinetan ikasleek chroomebooka etxera eramaten duten, talde bakoitzeko tutoreak arduratuko dira gailuak eta horien kargagailuak emateaz, baita ikasturte bukaeran horiek jasotzeaz ere.

Hezkuntza teknologiaren koordinatzailea ez da arduratuko ikastetxearen gailuak gordetzeaz eta kargatzeaz. Eskoletan chromebookak edo beste gailu batzuk erabiltzen dituen irakaslea arduratuko da horiek biltzeaz eta kargatzeaz, beharrezkoa bada.

Ikasleen chromebookak noizean behin berrikusi beharko dira (lehentasunez, tutoretza-saioetan), hautemandako akatsak konpontzeko, ikasturtea amaitu arte zain egon gabe.

Ikasleen chromebookekin lotutako trataera orokorrari buruzko jarraibideak eskuragarri daude ikasNOVAren webgunean (https://ikasNova.digital) zein IKT zerbitzuen katalogoko "Chromebookak" atalean.

9.9. Hezkuntza teknologien koordinatzaileen prestakuntza.

Ikasturte hasieran, lehenengo aldiz hezkuntza teknologien koordinatzaile lanpostuan arituko diren irakasleek, prestakuntza egin beharko dute, nahitaez, berdin aurrez aurre edo telematika bidez izan, horretarako gordetako ordutegian (asteazkenetan 09:00etatik 10:30era arte). Prestakuntza saio horietan azalduko zaie, beste eduki batzuen artean, zein den haien egitekoa, zer tresna dauden, nola jokatu beharra dagoen eta Hezkuntza Departamentuko zer baliabide jarri diren ikastetxeen eskura.

Era berean, prestakuntza saio horietara joan daitezke, hala nahi izanez gero, lanpostu horretan ari diren pertsonetatik aurreko ikasturteetan eginkizun hori bete izan dutenak.

Prestakuntza horretarako deia eginen da Irakasleentzako Laguntza Zentroetako hezkuntza teknologiaren arloko aholkularitzen bitartez.

9.10. Ikastetxearen prozesuetan datu pertsonalak babestea eta praktika onak gauzatzea.

Hezkuntza teknologietako koordinatzaileak DBEDBLO (abenduaren 5eko 3/2018 Lege Organikoa) bete dadin ere sustatuko du, ikastetxeko prozesuetan datu pertsonalak babesteari dagokionez.

Hezkuntza Departamentuan web-orri bat dago datu pertsonalak babesteari buruzko informazio espezifikoarekin, eta informazio hori zuzendaritza-taldeek jakin behar dute, ikastetxeetako prozeduretan datu pertsonalak tratatzeko arduradunak baitira, eta, horrez gain, datu pertsonalak kudeatu behar dituzten ikastetxeko langileen artean ere hedatu behar da:

https://www.educacion.navarra.es/eu/web/dpto/informacion-sobre-proteccion-de-datos

Web-orri horretan honako atal hauek daude:

a) Datu pertsonalak babesteari buruzko informazioa: atal honetan Hezkuntza Departamentuak tratatutako datu pertsonalak babesteari buruzko araudiak eskatzen duen informazio guztia dago jasota.

b) Tratamendu jardueren erregistroa: atal honetan tratamenduko jardueren erregistro bat zer den azaltzen da eta Hezkuntza Departamentuak sortu eta argitaratutakoarekin lotzen da.

c) Ohiko galderak. Ohiko galderak: atal honetan azaltzen dira ikastetxeetan datu pertsonalak jasotzeari eta tratatzeari buruz egin ohi diren galderak.

d) Intereseko agiriak: atal honetan datuen babesarekin lotutako ereduak eta intereseko agiriak deskargatu daitezke, bereziki hezkuntzaren alorrekoak.

Horrez gain, irakasleak prestatzeko planaren baitan, online ikastaro bat eskainiko da, "Nafarroako Administrazio Publikoetarako datuak babesteari buruzko oinarrizko ikastaroa" izenekoa, zeinetan irakasle guztiek parte hartu ahal izanen duten. Prestakuntza hori sartuko da, era berean, zuzendaritza-taldeen akreditaziorako ikastaroan.

Ikasturtean zehar, segurtasuna bermatzeko, zenbait funtziotan eta lanpostutan pasahitzak iraungitzeko politikak ezarriko dira eta faktore anitzeko autentifikazio sistemak (MFA) gaituko dira. Horrez gain, ekipoetan egiten diren lan guztiak (Windows ekipoak barne) autentifikatuta egin beharko dira. Izan ere, hala inguru segurua bermatuko da eguneroko datuak eta operatiba kudeatzeko.

9.11. Ikastetxeen webguneak.

Kode irekiko edukien kudeatzaile bat jarri da ikastetxe guztien eskura, webgunean argitaratzeko. Webgune berri bat sortzea eskatzen ahal da formulario honen bitartez:

https://ikasNova.digital/group/guest/solicitud-sitio-web-de-centro-con-liferay

Webgune berriak sortzeko, txantiloi korporatibo bat erabiliko da, eta ikastetxe bakoitzak nahi bezala pertsonalizatu ahal izanen du.

Hezkuntza komunitatea EDUCAko kredentzialak erabilita sartu ahal izanen da ikastetxeen webgunera.

Bada tresna bat, zeinak errazten baitu webguneetako edukietako batzuk, lehendik daudenak, plataforma berri honetara ekartzea.

Plataformari eta txantiloiari buruzko informazio gehiago lor daiteke artikulu honetan:

https://ikasnova.digital/w/nueva-plataforma-para-los-sitios-web-de-centro

Ikastetxe batek departamentuak haren eskura jartzen dituen plataformez bestelakoetan daukanean bere webgunea, laguntza emanen zaio aurrerantzean ere, webgunearen segurtasuna eta erabilgarritasuna bermatzeko. Kasu horretan, mantentze-lan zuzentzailea eginen da, baina ez da eginen mantentze-lan ebolutiborik, eta ez da emanen arreta pertsonalizaturik.

10.–Nahitaezko prestakuntza.

Etengabeko prestakuntza irakasleen eskubide eta betebehar bat da, baita Hezkuntza Departamentuaren eta ikastetxeen ardura bat ere; izan ere, azken helburua da Nafarroako hezkuntza sistemaren kalitatea hobetzea irakasleen lanbidea garatuz.

Hala, ikastetxeetako zuzendaritza-taldeak ikastetxeko prestakuntza instituzionaleko plan bat prestatuko du. Horretarako, Hezkuntza Departamentuak proposatutako proiektu estrategiko, plan eta lehentasunezko ildoen ondorioz sortutako prestakuntzarako beharrak aintzat hartuko ditu, baita ikastetxeko klaustroetan eta irakasle-taldeetan eginiko lanaren ondorioz sortutako prestakuntzarako beharrak eta Irakasleentzako Laguntza Zentroek eginiko hautemate prozesuetan jasotako prestakuntzarako beharrak ere.

Prestakuntza ekintzak klaustro osoari edo irakasle-talde jakin bati zuzentzen ahalko zaizkio. Hezkuntza Departamentuaren edo ikastetxeen proiektu estrategikoak, planak eta lehentasunezko ildoak gauzatzeko prestakuntza ekintzen proposamenak lehentasunezkoak izanen dira eta irakasleek nahitaez egin beharko dituzte.

Nahitaezko prestakuntza instituzionala ikasturte bakoitzean 35 ordukoa izanen da, baina ordu gehiagokoa izaten ahalko da ikastetxeak edo Hezkuntza Departamentuak ezarritako beharrak asetzeko beharrezkoa bada. Kasu horretan, nahitaezko prestakuntza instituzional horretako 35 orduez gaindiko ekintzak borondatezkoak izanen dira.

Ikastetxe bakoitzak Irakasleentzako Laguntza Zentro (ILZ) bat du esleituta eta erreferentziazko aholkulari bat du, ikastetxeko prestakuntza instituzionaleko plana egiten laguntzeko. Ikastetxeek prestakuntzaren arduradun bat izendatuko dute, Irakasleentzako Laguntza Zentroko (ILZ) aholkulariarekin harremanetan egon dadin. Ez bada inor izendatzen, ikasketaburuak bere gain hartuko du zeregin hori.

Ikasturte beraren barnean, ikastetxez aldatzen diren irakasleek ikastetxe berriko zuzendariari aurkeztu beharko diote eginiko prestakuntza instituzionalari dagokion ziurtagiria. Prestakuntza instituzionaleko ekintzaren bat hasi eta amaitu gabe izanez gero, ez da dagokion ziurtagiria jasoko. Hala, irakasleak, egin dituen prestakuntza orduen kopurua egiaztatu ondoren (jatorrizko ikastetxeko zuzendariak emandako ziurtagiri baten bidez), prestakuntza orduak osatzen ahalko ditu jatorrizko ikastetxean hasitako prestakuntzarekin jarraituz edo, bestela, destinoko ikastetxeko prestakuntza ekintzak eginez.

Kontratu partziala duten irakasleek egin beharreko nahitaezko prestakuntza instituzionaleko orduak ezartzeko, nahitaezko prestakuntza instituzionaleko 35 orduei kontratuaren ehunekoa aplikatuko zaie.

Ez dute nahitaezko prestakuntza egin beharko lanaldiaren hereneko edo gutxiagoko kontratua duten irakasleek. Halere, prestakuntza hori borondatez egiteko aukera izanen dute. Interesdunak ez badu prestakuntza egiten, indarrean dagoen araudiak jasotako zereginak egiteko erabiliko ditu bere kontratuari dagozkion ordu osagarriak.

Nahitaezko prestakuntza instituzionaleko orduen zenbaketa malgutzeko, ikasturte bakoitzean gutxienez 25 ordu egin beharko dira, eta, beraz, bi ikasturteko aldian egiten ahalko dira gainerako orduak. Edonola ere, bi urte horietan nahitaezko prestakuntza instituzionalari dagozkion 70 orduak bete beharko dira. Nolanahi ere, Hezkuntza Departamentuaren edo ikastetxeen proiektu estrategikoei, planei eta lehentasunezko ildoei buruzko prestakuntza bete beharko da.

Irakasleek ikastetxeko zuzendaritzaren aurrean akreditatu beharko dituzte eginiko prestakuntza ekintzak, eta Hezkuntzako Ikuskapen Zerbitzuak ikuskatu beharko ditu.

35 orduko prestakuntza instituzionalaz gain, irakasleek prestakuntzarako eskubideaz baliatzen segitzen ahalko dute, nahi izanez gero.

11.–Saileko burutza.

Departamentu bakoitzeko buruak Erregelamendu Organikoan eta 258/1998 Foru Aginduan aipatzen diren eginkizunak bere gain hartuko ditu, eta departamentuko urteko lan plana gidatu eta garatzeaz arduratuko da; plan horretan zuzeneko eta zeharkako eragina duten hobekuntza arloen gaineko jarduketak sartuko dira.

12.–NUHEOko irakasle laguntzaileak.

Irakasle laguntzaileak dira Nafarroako Urrutiko Hizkuntza Eskola Ofizialarekiko lankidetza programa Bigarren Hezkuntzako ikastetxeetan ematen dutenak.

Irakasle laguntzaileek eginkizun eta betebehar hauek izanen dituzte:

–Programan matrikulatutako ikasleak prestatzea kasuan kasuko hizkuntza irakaskuntzen ziurtagiria lortzeko.

–Koordinazio jardueretan parte hartzea eta programatutako estandarizazio lanak egitea.

–Ikasleen ebaluazioan parte hartzea, bai proba orientagarrietan (idatzizkoak eta ahozkoak), bai ziurtapen probetan (zaintza, idatzizko proben zuzenketa eta ahozko probetarako epaimahaiak).

–Ikasleei matrikulazio eta ebaluazio prozesuetan informazioa emateko lanean laguntzea.

Programa honetan lankidetzan aritzeak konpentsazio hauek ekarriko ditu, taula honekin bat:

MAILA BAKOITZEKO

10 ikasletik 25 ikaslera bitarte

ordu bat

26 ikasletik 50 ikaslera bitarte

+ ordu bat

51 ikasletik 75 ikaslera bitarte

+ ordu bat

76 ikasletik 100 ikaslera bitarte

+ ordu bat

Horrela, hurrenez hurren, 25 ikasletik behin

+ ordu bat

Arestian adierazitakoa gorabehera, Nafarroako Urrutiko Hizkuntza Eskola Ofizialarekin lankidetzan aritzen diren eta 10 ikaslera iristen ez diren hizkuntza departamentuetan, gutxienez eskola-ordu bat emanen da hizkuntza bakoitzeko.

Azkenik, hizkuntza batean bi hizkuntza maila baino gehiago ematen badira, ezin izanen ditu bi eskola-ordu baino gutxiago izan.

Sare publikoko ikastetxeetako irakasle laguntzaile guztiek, gutxienez ere, 5 lanordu eman beharko dituzte urtean HEOren ziurtagiria lortzeko probetan (zainketa lana ziurtapen azterketetan, idatzizko ziurtapen azterketen zuzenketa eta ahozko ziurtapen proben epaimahaiko lana) bakoitzak konpentsatua duen asteko eskola-ordu bakoitzeko.

Nafarroako Gobernuaren epaimahaiei buruzko araudian ezarritakoaren arabera konpentsatuko dira ekonomikoki gutxieneko kopuru hori gainditzen duten orduak.

NUHEOren departamentu bakoitzeko buruak bere irizpidearen arabera esleituko ditu goian aipatutako zereginak.

13.–Eskola informazioaren kudeaketa: EDUCA. Kontabilitate sistema: ECOEDUCA.

13.1. Eskola informazioaren kudeaketa: EDUCA.

Ikastetxeetan, eskola informazioa EDUCA aplikazioaren bidez kudeatuko da.

Hezkuntza Departamentuaren webgunean, EDUCAri eta posta elektronikoari buruzko atalaren barnean, bai eta IKT zerbitzuen katalogoan ere, zenbait jarraibide eta bideotutorial argitaratzen dira, aplikazioaren moduluetara ohitzen laguntzen dutenak. Halaber, EDUCA taldearekin harremanetan jartzeko prozedura azaltzen da, funtzionalitate berriak eskatu, gorabeherak jakinarazi edo laguntza eskatzeari begira. EDUCA aplikaziotik bertatik egin daitezke eskaerak, goiburuko gorabeheren (@) ikonoan klik eginez. Atari horretatik bilaketak egiten ahalko dira ohiko prozedurei, zalantzei eta tutorialei dagokienez.

Hezkuntza Departamentuak prestakuntza eta informazio saioak antolatuko ditu koordinatzaileei, zuzendaritza-taldeei eta administrazioko langileei EDUCA plataformaren berri emateko.

Zuzendaritza-taldeak edo hark eskuordetutako pertsonak aholkuak emanen dizkie ikastetxeko erabiltzaileei EDUCA kudeaketa sistemari buruz. Horrez gain, sistema horren aldaketen eta funtzionalitate berrien informazioa jasoko du, eta haiek ikastetxean erabil daitezen sustatu eta koordinatuko du.

Zuzendaritza-taldeak bermatu beharko du, horretarako bideak jarriz, ikasturtea hasi ondoren ikastetxean kudeaketa eta irakaskuntza lanetan hasten diren pertsonek EDUCA ezagutzen dutela eta badakitela hura erabiltzen.

Ikastetxeetan EDUCAren koordinatzaile lanetan ariko direnen erregistro bat izateko, zuzendariak EDUCAren ikastetxeko koordinatzailea izendatuko du, eta, aplikazioan, "EDUCA koordinatzailea" lanpostu osagarria esleituko dio.

Zuzendariak berrikusiko ditu EDUCAtik ikastetxeen direktorioan (Ikastetxearen menua > Ikastetxearen datuak > Ikastetxearen informazioa) argitaratzen diren datuak (hala nola helbidea, telefono zenbakia, helbide elektronikoa eta webgunea), eta aurkitzen dituen akatsen berri emanen dio EDUCAren laguntza zerbitzuari. Gogoan izan beste datu interesgarri batzuk gehi ditzakeela, adibidez, ikastetxearen helburuak, balioak, sariak eta abar.

Ikastetxeen ardura da eguneratuta edukitzea ikastetxeko langileen –irakaskuntza nahiz kudeaketa lanetan aritzen direnen–, ikasleen eta familien datu pertsonalak. Aplikazioak Cl@ve sistemaren bidez sartzeko aukera ematen badu ere (ziurtagiri elektronikoa, NAN elektronikoa, Cl@ve Iraunkorra), gogoan izan oso garrantzitsua dela, EDUCA egiaztagiria lortzeko, helbide elektroniko pertsonal bat erregistratzea fitxan.

Era berean, ikastetxe bakoitzaren ardura izanen da bere informazio akademikoa eskuratzeko asmoz programara jotzen dutenen sarbidea kudeatzea. Horrela, bada, ikasleek eta haien familiakoek informazio hori eskuratzeko dituzten arazoei ikastetxeak erantzunen die lehenbizi; eta arazo horiek ezin baditu modu autonomoan konpondu, EDUCA euskarriarekin harremanetan jarriko da.

Komeni da ikastetxeetako langileek jakin dezaten nola erabili EDUCAk gaiturik dituen funtzio guztiak; horien artean, honako hauek nabarmentzen dira: ikasgelako koadernoa, ikasleen jarraipena, ebaluazio saioaren kudeaketa (informazio fluxua, akta), emaitzak (Kudeaketa akademikoa > Kalifikazioak > Ebaluazio txosten berriak), zaintzen kudeaketa, informazio garrantzitsua, ikasturte bukaerako txostenak, elkarrizketak, bizikidetzaren kudeaketa eta abar.

EDUCA aplikazioaren barruan, mezularitza sistema bat dago hezkuntza komunitateko kideen artean informazioa trukatzeko. Dena dela, helbide elektronikoko kontuak erabili beharra dagoenean, oroitarazten da sare publikoko irakasleek eta ikasleek @educacion.navarra.es helbide elektronikoak erabili behar dituztela jarduera akademikoan, tutoretza lanetan eta harreman profesionaletan.

Ikastetxe publikoek funtzio espezifikoetarako dituzten helbide elektronikoak EDUCAren bitartez kudeatzen dira (Ikastetxea > ikasNOVA posta eta zerbitzuak > Kontuen kudeaketa). Kontu berriak ireki beharra dagoenean, zuzendariak eskatu beharko du Erabiltzailearen Laguntza Zentroaren bidez. Kontu korporatibo horiek karguei lotutako zereginetarako dira, eta ez dira eskoletan baliatuko ikasleekin. Posta kontuen alternatiba gisa, gomendatzen da Googleko taldeak eta unitate partekatuak erabiltzea.

EDUCA Ataria aplikazio bat da, zeina prestatu baita herritarrek beren datu akademikoak eskuratu eta kudeaketa telematikoak egin ditzaten: behin-behineko izen-ematea, esaterako, ikasleak onartzeko prozesuan. Gomendatzen da ikastetxeek susta dezatela familiek eta ikasle adinez nagusienek aplikazioa erabiltzea.

13.2. Kontabilitate sistema: ECOEDUCA.

Nafarroako Foru Komunitateko Administrazioaren ikastetxe publiko guztiek, Hezkuntzari buruzko maiatzaren 3ko 2/2006 Lege Organikoan jasotako irakaskuntzak ematen dituztenek, ECOEDUCA kontabilitate aplikazioa erabiliko dute aurrekontua egiteko, onesteko, aldatzeko eta betearazteko. Aurrekontuan jasoko dira ikastetxearen ohiko funtzionamendua, mantentzea eta kontserbazioa bermatzeko diru-sarrerak eta gastuak.

Ikastetxearen kudeaketa ekonomikoari eragiten dioten kontabilitate-eragiketa guztiak irailaren 6ko 153/2023 Foru Dekretuaren arabera eginen dira (foru dekretu horrek Nafarroako Foru Komunitateko unibertsitateaz kanpoko ikastetxe publikoen kudeaketa ekonomikoa arautzen du).

14.–Zerbitzu osagarriak.

Garraioko eta jantokiko zerbitzu osagarriak dituzten ikastetxeek zerbitzu horiei buruzko informazioa etengabe eguneratuko dute EDUCA aplikazioaren bidez eta horretarako gaitutako sistema informatikoen bidez.

–Eskualdeko eskola jantokia: EDUCAren bidez konfiguratuko da jantokiaren modulua eta jantokira doazen ikasleen datuak etengabe eguneratuko dira, ikasleek dirulaguntza jasotzen duten zein ez.

–Eskola jantoki arrunta: EDUCAren bidez konfiguratuko da jantokiaren modulua eta jantokira doazen eta dirulaguntza jasotzen duten ikasleen datuak etengabe eguneratuko dira.

–Eskola garraioa: EDUCAren bidez konfiguratuko da eskola garraioa erabiltzen duten edo/eta garraiorako banako laguntzak jasotzen dituzten ikasleen garraioaren modulua.

15.–Unibertsitateko ikasleen praktikak ikastetxeetan.

Hezkuntza Departamentuak zenbait hitzarmen sinatu ditu hainbat unibertsitaterekin unibertsitateko praktikak egin ahal izateko Nafarroako Gobernuko Hezkuntza Departamentuaren funts publikoak jasotzen dituzten ikastetxeetan.

Unibertsitateko ikasle batek curriculumeko praktikak egin ahal izateko, indarrean egon behar da Hezkuntza Departamentuaren eta dagokion unibertsitatearen arteko lankidetza hitzarmena.

Ikasturte bakoitzean ikasle horien tutoretza lana egiten duten irakasleek aintzatespen bikoitza izanen dute Hezkuntza Departamentuaren aldetik:

–Tutoretza: ikasturteko tutoretza lana ziurtagiri bidez jasoko da. Lekualdatze-lehiaketetan merezimendutzat joko da.

–Prestakuntza: praktiken tutoretza lana norberaren prestakuntza ordu gisa kontabilizatuko da. Orduak kalkulatzeko, tutoretzapeko praktiken ikasketa-planean aipatzen diren ECTS kredituen kopurua hartuko da aintzat.

Praktiken tutoretzagatiko eta prestakuntzagatiko ziurtagiriak lortu ahal izateko, beharrezkoa da prestakuntza zentro gisa aitortutako ikastetxeko zuzendariak tutore lanetan aritu diren irakasleen datuak jakinaraztea Hezkuntza Departamentuari, Hezkuntzaren atarian dagoen inprimakia betez (https://www.educacion.navarra.es/web/dpto/estudios-universitarios), ekainaren 1a baino lehen.

Adingabea Babesteko Legearen arabera, curriculumeko praktikak egiten dituzten ikasleek sexu-izaerako delituen ziurtagiri negatiboa izan beharko dute. Baldintza hori betetzea Hezkuntza Departamentuak unibertsitate bakoitzarekin sinatzen duen hitzarmenean jasota dago, eta ikastetxeak agiri hori eskatzen ahalko dio ikasleari praktikak hasi baino lehen.

16.–Kalitatea kudeatzeko sistema.

Kalitatea kudeatzeko sistemak (KKS) ezarri eta mantentzeko programa, Antolamendu, Prestakuntza eta Kalitate Zerbitzuak gidatzen duena, Nafarroako unibertsitateaz kanpoko ikastetxe publikoei dago zuzendua.

Programan parte hartzen duten ikastetxeek ikastetxearen egoerari buruzko txosten bat jasoko dute iraileko Programari dagokionez.

16.1. Ikastetxeen konpromisoak eta erantzukizunak.

Programan parte hartzen duten ikastetxeek klaustroko kide bat izendatuko dute kalitate arloko arduradun. Kalitate arduraduna EDUCAn erregistratuko da.

Programan kalitate sareko mintegiaren bidez parte hartzen duten ikastetxeen kasuan, zuzendariak eta kalitatearen arduradunak gutxienez 6 prestakuntza-saio laburretara eta koordinazio presentzialerako 2 bileretara joan beharko dute.

Programan modu autonomoan parte hartzen duten ikastetxeen kasuan, zuzendariak eta kalitatearen arduradunak gutxienez 5 prestakuntza-saio laburretara joan beharko dute.

Zuzendaritza-taldean kide berriak badaude edo kalitatearen arduradun berri bat badago, pertsona horiek ikastetxeko autodiagnostikoari, prozesuei/sistemei aztertu eta dokumentuen kudeaketari buruzko prestakuntza egin beharko dute, ikasturteko lehen hiruhilekoan.

16.2. Aholkularitza eta baliabideak.

Programaren informazio eta baliabide eguneratuak Kadineten web-orrian argitaratuko dira.

IKKS-2020 Arauaren atal bakoitzari lotutako dokumentuak, tresnak eta bideotutorialak "Baliabideak" site-an argitaratuko dira.

Baliabide horiek ikastetxeko pertsona guztiek izanen dute eskuragarri, baldin eta irailaren 15a baino lehen ikastetxeko autodiagnostikoan erregistratzen badira.

16.3. Eskaerak.

Ikastetxeek, Programan sartu, geratu edo hori utzi nahi badute, eta, hala badagokio, KKSaren kanpo ebaluazioa jaso nahi badute, 71/2020 Foru Aginduan onetsitako dagozkion eranskinak erabili beharko dituzte.

Eskaerak Antolamendu, Prestakuntza eta Kalitate Zerbitzuari bidaliko zaizkio, soieduca@navarra.es helbide elektronikora, 2025eko martxoaren 31 baino lehen.

Martxoan Programari buruzko zabalkunderako informazio saio bat eginen da, kalitate sareetan parte hartzen ez duten ikastetxeei zuzenduta egonen dena.

17.–Laneko arriskuen prebentzioa.

Arriskuen ebaluazioren bat egin bada, ikasturte bukaerako memorian azaldu beharko dira Laneko Arriskuen Prebentziorako Atalak proposaturik hartu diren prebentzio neurriak, eta, horrekin batera, bete ez diren eta aurreikusitako gauzatze-epea iraungita duten neurriak arrazoituko dira.

Nafarroako Foru Komunitateko ikastetxeetako irakaskuntzako eta irakaskuntzaz kanpoko langileren bati eraso egiten diotenean, ikastetxeetako zuzendaritzek kanpoko erasoen aurkako protokoloa jakinarazi eta ofizioz aktibatuko dute.

https://www.educacion.navarra.es/eu/web/dpto/riesgos-laborales/protocolos-de-actuacion

Ikastetxeetako zuzendaritzek klaustroetan jakinaraziko dute, nahitaez, badagoela kanpoko erasoen aurkako jarduketa protokoloa. Halaber, horren berri emanen zaie irakaskuntzaz kanpoko langileei ikasturtean hasierako berariazko bilera batean.

Nafarroako Foru Komunitateko ikastetxe guztien webguneetan kanpoko erasoen aurkako jarduketa protokolo hori bistaratuko da erraz ikusteko modukoa den lehentasunezko toki batean. Era berean, ikastetxeen barne-agirietan agertuko da: Internet, Drive eta abar.

Hezkuntza Departamentuko prebentzioko ordezkarien eginkizunei eta harremanetarako datuei buruzko informazioa Nafarroako Foru Komunitateko ikastetxe guztien webguneetan argitaratuko da, erraz ikusteko modukoa den lehentasunezko toki batean.

Ikastetxeetako zuzendaritzek kanpoko erasoen aurkako jarduketa protokolo horren berri eman beharko dute familiekin egindako bileretan.

18.–Eskolak sarean.

Hezkuntza Departamentuak lankidetza hitzarmenak ditu Nafarroako Gobernuko hainbat departamenturekin. Hitzarmen horietan ezarritako gomendioei jarraikiz, honako sare hauek sortu dira:

–Osasuna Sustatzen duten Eskolen Sarea.

–Eskola Jasangarrien Sarea.

–Eskola Solidarioen Sarea.

–Eskolak eta Memoria, Bakearen eta Bizikidetzaren Aldeko Sarea.

2024-2025 ikasturtean, Hezkuntza Departamentuak, Landa Garapeneko eta Ingurumeneko Departamentuarekin lankidetzan, ingurumen hezkuntzako plan bat eginen du, irakasleek energiari eta klima-aldaketari buruzko oinarrizko ezagutzak eskuratu ditzaten.

Halaber, ikastetxe guztiek jasangarritasun koordinatzaile bat izan beharko dute, zeina ikastetxeko irakasle-taldeko kideetako bat izanen baita. Zuzendariak edo ikastetxeko titularrak ikuskatuko du koordinatzailearen lana.

19.–Matrikulak bateragarri egitea.

19.1. DBHrekin bateragarri egitea.

Gerta daiteke DBHko graduatu titulua ez duten eta erdi mailako heziketa ziklo batean matrikulaturik dauden ikasleek aldi berean Derrigorrezko Bigarren Hezkuntzako irakaskuntzak egin nahi izatea. Hori egitea posible izanen dute baldin eta, sartzeko baldintza guztiak betetzeaz gain, Félix Urabayen Nafarroako Helduentzako Bigarren Hezkuntzako Institutuan matrikulatzen badira, urrutiko araubidean.

19.2. Batxilergoarekin bateragarri egitea.

Teknikari edo goi mailako teknikari izateko ikasketak egiten ari diren ikasleek 2024-2025 ikasturtea hastean ez badute Batxilergoko titulua ikasketa horiek egin izan arren, Batxilergoa amaitzeko aukera izanen dute helduentzako irakaskuntzak eskaintzen dituzten ikastetxeetan, baldin eta adinari dagozkion baldintzak betetzen badituzte. Arteen modalitateko ikasleek hura amaitzen ahal dute 22. puntuan aipatzen diren proba libreen bidez (Araubide arrunteko egonaldia agortu duten ikasleek edo adin nagusiko ikasleek Batxilergoko titulua lortzea).

20.–DBHko eta Batxilergoko ikasgai batzuk Musikako lanbide ikasketetako ikasgai jakin batzuekin baliozkotzea.

Musikako lanbide irakaskuntzak baliozkotzean, otsailaren 27ko 242/2009 Errege Dekretuan xedatutakoa beteko da (urtarrilaren 17ko 14/2023 Errege Dekretuak aldatu zuen). Baliozkotze prozeduran ekainaren 1eko 123/2009 Foru Aginduaren 5. artikuluan xedatutakoari jarraituko zaio, eta honako atal hauei egokituko zaie:

20.1. DBHko baliozkotzeak.

BALIOZKOTZEN DEN DERRIGORREZKO BIGARREN ­HEZKUNTZAKO IKASGAIA ETA IKASMAILA

MUSIKAKO LANBIDE IKASKETETAKO ZEIN ­IKASGAIREKIN BALIOZKOTZEN DEN

1. mailako eta 3. mailako Musika (biak baliozkotzen dira).

Musika-tresna nagusiaren edo ahotsaren ikasgaiaren 1. maila.

4. mailako Musika.

Musika-tresna nagusiaren edo ahotsaren ikasgaiaren 2. maila.

DBHko lehen mailako aukerakoen blokea:

Atzerriko Bigarren Hizkuntza, Kultura Klasikoa edo ikastetxeak diseinatutako ikasgaia.

Beste baliozkotze batean erabili ez den edozein ikasgai.

DBHko bigarren mailako aukerakoen blokea:

Atzerriko Bigarren Hizkuntza, Kultura Klasikoa edo ikastetxeak diseinatutako ikasgaia.

Beste baliozkotze batean erabili ez den edozein ikasgai.

DBHko hirugarren mailako aukerakoen blokea:

Atzerriko Bigarren Hizkuntza, Kultura Klasikoa, Konpetentzia Digitala edo ikastetxeak diseinatutako ikasgaia.

Beste baliozkotze batean erabili ez den edozein ikasgai.

DBHko laugarren mailako aukerakoen blokea:

Atzerriko Bigarren Hizkuntza, Filosofia edo ikastetxeak diseinatutako ikasgaia.

Beste baliozkotze batean erabili ez den edozein ikasgai.

20.2. Baliozkotzeak Batxilergoan.

BATXILERGOKO 1. MAILA

BALIOZKOTZEN DEN BATXILERGOKO IKASGAIA

MUSIKAKO LANBIDE IKASKETETAKO ZEIN IKASGAIREKIN ­BALIOZKOTZEN DEN

Musika Analisia I.

Lehenengo mailako Harmonia.

Arte eszenikoak I.

Antzeko edukia duen ikasgai baten ikasmaila.

Ikus-entzunezko Kultura.

Antzeko edukia duen ikasgai baten ikasmaila.

Musika Hizkuntza eta Praktika.

2. mailako Musika Hizkuntza.

Korua eta Ahots Teknika I.

Lehengo mailako Korua edo antzeko edukia duen ikasgaia.

Literatura Unibertsala.

Antzeko edukia duen ikasgai baten ikasmaila.

1. blokeko aukerakoak (*) (2 ordu).

Ez DBHn ez Batxilergoan beste baliozkotze baterako erabili gabeko edozein ikasgai.

2. blokeko aukerakoak (*) (4 ordu).

Ez DBHn ez Batxilergoan beste baliozkotze baterako erabili gabeko edozein ikasgai.

(*) Ikasleek aukerako ikasgai bakar bat baliozkotzen ahalko dute, 1. blokekoa edo 2. blokekoa. A ereduko ikasleek, G/A ikastetxe batean, 1. blokekoa baino ezin izanen dute baliozkotu.

BATXILERGOKO 2. MAILA.

BALIOZKOTZEN DEN BATXILERGOKO IKASGAIA

MUSIKAKO LANBIDE IKASKETETAKO ZEIN IKASGAIREKIN ­BALIOZKOTZEN DEN

Musika Analisia II.

2. mailako Harmonia.

Arte Eszenikoak II.

Antzeko edukia duen ikasgai baten ikasmaila.

Korua eta Ahots Teknika II.

Bigarren mailako Korua edo antzeko edukia duen ikasgaia.

Artearen Historia.

Antzeko edukia duen ikasgai baten ikasmaila.

Musikaren eta Dantzaren Historia.

Antzeko edukia duen ikasgai baten ikasmaila.

Literatura Dramatikoa.

Antzeko edukia duen ikasgai baten ikasmaila.

Aukerakoak (*).

Ez DBHn ez Batxilergoan beste baliozkotze baterako erabili gabeko edozein ikasgai (*).

Aukerako gisa ikasitako edozein ikasgai baliozkotzen ahalko da, Euskal Hizkuntza eta Literatura II ikasgaia izan ezik, ikasgai komuna baita.

Baliozkotzen diren ikasgaiak ez dira kontuan hartuko batez besteko notaren kalkuluan.

2024ko azaroaren 16a izanen da baliozkotze horien eskariak aurkezteko azkeneko eguna.

21.–Ikastetxeek diseinatutako ikasgaiak.

DBHren kasuan, ikastetxeek diseinatutako ikasgaiak eratu ahal izanen dira baita lan monografiko, diziplinarteko proiektu edo komunitatearentzako zerbitzu batekiko lankidetza proiektu gisa ere. Ikastetxeek, beraiek diseinatutako ikasgaien programazio didaktikoetan, curriculumeko terminologia berria baliatuko dute: helburuak, funtsezko konpetentziak, konpetentzia espezifikoak, oinarrizko jakintza moduan adierazitako edukiak, metodo pedagogikoak, ebaluazio irizpideak eta ikaskuntza egoerak. Terminologia hori ekainaren 29ko 71/2022 Foru Dekretuan ezarri da, zeinaren bidez ezartzen baitira Derrigorrezko Bigarren Hezkuntzako etaparen irakaskuntzak Nafarroako Foru Komunitatean.

Batxilergoaren kasuan, ikastetxeek, beraiek diseinatutako ikasgaien programazio didaktikoetan, curriculumeko terminologia berria baliatuko dute: helburuak, funtsezko konpetentziak, konpetentzia espezifikoak, oinarrizko jakintza moduan adierazitako edukiak, metodo pedagogikoak, ebaluazio irizpideak eta ikaskuntza egoerak. Terminologia hori ekainaren 29ko 72/2022 Foru Dekretuan ezarri da, zeinaren bidez ezartzen baitira Batxilergoko etaparen irakaskuntzak Nafarroako Foru Komunitatean.

Ikastetxeek, beren autonomia baliatuta, beraiek diseinaturiko ikasgaiak eskaini ahal izanen dituzte, inolako mugarik gabe, eskaini daitezkeen ikasgaien kopuruari dagokionez. Eskaintza hori ikastetxearen ezaugarrien eta ikasleen behar eta itxaropen orokorren araberakoa izanen da.

Ikasgai horiei EDUCAn alta eman ahal izateko, nahikoa izanen da ikastetxeek 2025-2026 ikasturterako planifikatutako ikasgaien eskaintzaren berri ematea Ikasketak Antolatzeko Atalari. Informazio hori posta elektronikoz igorriko da, ordenacion.academica@navarra.es helbidera, 2025eko apirilaren 1ean beranduenez. Ikasgai bakoitzeko honako hauek zehaztu beharko dira:

–Zer etapa eta mailatan emanen den.

–Ikasgaiaren izena (EZIN dira izen bereko bi ikasgai izan etapa bateko ikasketa planean).

–Zer hizkuntza-eredutan emanen den.

–Aukerako zer bloketan –bloke zenbakia– emanen den (Batxilergoko 1. ikasmailarako besterik ez).

–Koordinazio didaktikoko zer departamentu arduratuko den hura emateaz edo, bestela, zer espezialitateko irakasleak.

Ikastetxeak onartuta daukan eskaintzan aldaketaren bat egiten bada, nahitaezkoa izanen da Ikasketak Antolatzeko Atalari horren berri ematea. Horren gaineko berririk jasotzen ez bada, ulertuko da ez dela aldaketarik izan ikasgai horien eskaintzan, eta 2025-2026 ikasturtean aplikatuko da.

22.–Araubide arrunteko egonaldia agortu duten ikasleek edo adin nagusiko ikasleek Batxilergoko titulua lortzea.

Ikasleek agortzen dutenean araubide arrunteko egonaldia Batxilergoko titulua lortu gabe, edo agortu gabe ere adin nagusikoak direnek ikasten jarraitu ahal izanen dute helduentzako Batxilergoko irakaskuntzak eskaintzen dituzten ikastetxeetan.

Baldin ikasle batek ezin baditu ikastetxe horietan Batxilergoko ikasketak amaitu ez dituztelako eskaintzen araubide arrunteko bere egonaldiari lotutako modalitatearen nahitaezko ikasgaiak, Félix Urabayen NHBHIn matrikulatzeko aukera izanen du ikastetxe horretan eskaintzen diren eta gainditu gabe dituen ikasgaiak gainditzeko; gainera, bere espedientea dagoen ikastetxean proba libreak egiteko aukera izanen du, Felix Urabayen NHBHI ikastetxean eskaintzen ez diren ikasgaiak gainditzeko. Beste aukera bat litzateke gainditu gabe dituen ikasgai guztiak gainditzeko proba libreak egitea, bere espedientea dagoen ikastetxean.

Proba libre horietan deialdi arrunta eta aparteko deialdia izanen dira, eta eguneko araubide ofizialaren deialdiekin batera izan daitezke.

Proba libreak egiteko, bere espedientea dagoen ikastetxean egin beharko du matrikula. Matrikula apirilaren 1etik 15era bitartean egin beharko da, eta inolaz ere ez du eskubidea emanen ikasturtean laguntza akademikoa jasotzeko.

23.–Batxilergoko batez besteko nota.

23.1. Modalitatea aldatu ez duten ikasleak edo, Arteen kasuan, ibilbidea aldatu ez dutenak.

a) Tituluaren batez besteko nota:

Batxilergoko tituluaren batez besteko nota zehazteko, etapa osoan zehar eginiko eta gainditutako ikasgai guztien kalifikazioen batezbesteko aritmetikoa kalkulatuko da, Erlijio ikasgaia ere barne hartuz, berau egin bada. Ateratzen den emaitza hurbilen dagoen ehunenera biribilduko da edo, distantziak berdinak izanez gero, goragokora. EDUCA aplikazioak batez besteko nota hori automatikoki kalkulatuko du.

Salbuespenez, amaierako ezohiko ebaluazio saioan proposatzen ahalko da ikasleari titulua ematea, baldin eta bat izan ezik ikasgai guztiak gainditurik baditu, 45/2023 Foru Aginduaren 15.2 artikuluan ezarritako baldintzei jarraikiz. Halakoetan, batez besteko nota kalkulatzeko, aintzat hartu beharko da gainditu gabeko ikasgaiaren nota. EDUCA aplikazioak batez besteko nota hori automatikoki kalkulatuko du.

b) Espedienteen lehiarako batez besteko nota.

Berdintasunaren printzipioa eta lehia librea bermatu beharrez, Erlijio ikasgaiaren ebaluazioan lortutako kalifikazioak ez dira zenbatuko espedienteen lehiarako batez besteko nota kalkulatzeko. Nota hori erabiliko da beste ikasketa batzuetan sartzeko, bai eta bekak eta ikasteko laguntzak lortzeko deialdietan ere, horietan ikasketa espedienteen arteko lehia egin behar denean.

23.2. Modalitatea aldatu duten ikasleak edo, Arteen kasuan, ibilbidea aldatu dutenak.

a) Tituluaren batez besteko nota:

Batxilergoko tituluaren batez besteko nota zehazteko, kontuan hartuko da ikasleak zer modalitatetan edo, kasua bada, zer ibilbidetan amaitu dituen Batxilergoko ikasketak, eta modalitate edo ibilbide horretako ikasgai guztietan izan dituen kalifikazioen batezbesteko aritmetikoa kalkulatuko da, Erlijio ikasgaia ere barne hartuz, berau egin badu. Ateratzen den emaitza hurbilen dagoen ehunenera biribilduko da edo, distantziak berdinak izanez gero, goragokora.

Kalkulu horretatik kanpo geldituko dira utzitako modalitateko edo, Arteen kasuan, ibilbideko ikasgaiak, baldin eta ez badira erabili aukerakoen tokia betetzeko. Beraz, batez besteko nota kalkulatzeko, kanpo utzitako ikasgaiak EDUCAn markatu beharko dira "baliogabeak" markarekin, eta batez besteko nota hori eskuz kalkulatu beharko da.

b) Espedienteen lehiarako batez besteko nota.

Berdintasunaren printzipioa eta lehia librea bermatu beharrez, Erlijio ikasgaiaren ebaluazioan lortutako kalifikazioak ez dira zenbatuko espedienteen lehiarako batez besteko nota kalkulatzeko. Nota hori erabiliko da beste ikasketa batzuetan sartzeko, bai eta bekak eta ikasteko laguntzak lortzeko deialdietan ere, horietan ikasketa espedienteen arteko lehia egin behar denean.

23.3. Batxilergoko titulua beste irakaskuntza batzuen bidez lortzen duten ikasleak (ikasgai komunak bakarrik egiten dituzten ikasleak).

45/2023 Foru Aginduaren 18. artikuluan ezarritakoari jarraikiz eta Batxilergoko titulua beste irakaskuntza batzuen bidez lortuko duten ikasleei dagokienez, aintzat hartu beharko da Batxilergoko tituluan agertuko den nota haztapen hau eginez kalkulatuko dela:

–Batxilergoan ikasitako ikasgai komunetan lortutako kalifikazioen batez besteko notaren %60.

–Titulua lortzeko erabiltzen diren irakaskuntzetan lortutako batez besteko notaren %40, irakaskuntza horiek antolatzeko errege dekretuetan ezarritakoaren arabera kalkulatuta.

Ikastetxeak batez besteko nota eskuz kalkulatuko du.

23.4. Salbuespenak eta baliozkotzeak.

Ikasgaien salbuespen (SL) eta baliozkotze (BL) kasuetan, ikasgai horiek ez dira aintzat hartuko tituluaren batez besteko nota kalkulatzeko, ezta espediente akademikoen arteko lehia dagoen deialdietan ere.

24.–Ohorezko matrikula.

Ohorezko matrikulak emateko prozedura 45/2023 Foru Aginduaren 19. artikuluan ezarritakoari jarraikiz eginen da.

Hizkuntza eredu (D, G/A) bakoitzeko modalitate bakoitzean ematen ahal den matrikula kopurua kalkulatzeko, aintzat hartuko da ohorezko matrikula bat ematen ahal dela Batxilergoko 2. mailan hizkuntza eredu bakoitzeko modalitate bakoitzean matrikulatutako 25 ikasleko edo zatikiko.

Halaber, aintzat hartu beharko da ez dela kontuan hartuko Erlijio ikasgaian lortutako kalifikazioa Batxilergoko 2. mailan ohorezko matrikula jasotzeko ikasleak proposatzerakoan; izan ere, hala ezartzen du aipatu foru aginduaren bigarren xedapen gehigarriko 2. apartatuak.

25.–USEa prestatzea.

Helduen irakaskuntzako ikastetxeetan USEa prestatzeko ikastaroetan matrikulatzen ahalko dira 2024-2025 ikasturtea hastean Batxilergoko titulua edo Lanbide Heziketako Goi mailako teknikari titulua, Arte Plastikoetako eta Diseinuko Goi mailako teknikari titulua, Kiroleko Goi mailako teknikari titulua edo akademikoki baliokidea den beste edozein titulu ofizial duten ikasleak.

Ikastaro horretan matrikulatzen diren ikasleek eskubidea izanen dute ikaskuntzaren bilakaera egiaztatzeko ebaluazio prozesuan parte hartzeko. Halere, ebaluazio prozesu horretan lortutako kalifikazioek ez dute eskubidea emanen dagokion titulua lortzean izandako ikasketa espedientea aldatzeko.

Hezkuntza Departamentuak egutegi bat ezartzen du urtero, Batxilergoko irakaskuntzen ordutegi orokorra eta eskola-egutegia prestatzeko ematen duen ebazpenean. Egutegi horri segitu beharko diote hizpide ditugun irakaskuntzek.

26.–25 urtetik gorakoak unibertsitatera sartzeko proba prestatzea.

Iruñeko Félix Urabayen NHBHIk 25 urtetik gorakoak unibertsitatera sartzeko proba prestatzeko ikastaroa eskainiko du urrutiko irakaskuntzaren araubidean.

Ikastaro horretan matrikulatu ahal izanen dira 2024an 25 urte dauzkaten edo beteko dituzten eta unibertsitate ikasketak egitea ahalbidetzen duen titulurik ez duten pertsonak.

Ikastaro horretan prestatu daitezke bai fase orokorreko ariketak bai eta borondatezko faseko aukera guztietako ariketak ere.

Hezkuntza Departamentuak egutegi bat ezartzen du urtero, Batxilergoko irakaskuntzen ordutegi orokorra eta eskola-egutegia prestatzeko ematen duen ebazpenean. Egutegi horri segitu beharko diote hizpide ditugun irakaskuntzek.

27.–Erdi eta goi mailako heziketa zikloetan sartzeko ikastaroa.

Iruñeko Félix Urabayen NHBHIk erdi mailako zikloetan sartzeko ikastaro bat eskainiko du, modalitate presentzialean zein urrunekoan. Halaber, goi mailako zikloetan sartzeko ikastaro bat eskainiko du, modalitate presentzialean zein urrunekoan, Giza Zientziak, Zientziak eta Ingeniaritza eta Osasun Zientziak modalitateetan.

Benjamín de Tudela BHIk erdi mailako zikloetan sartzeko ikastaro bat eskainiko du irakaskuntza presentzialaren araubidean.

III.–ARAUDIA

1.–Orokorra.

1/2004 Lege Organikoa, genero indarkeriaren aurka babes integrala emateko neurriei buruzkoa.

3/2007 Lege Organikoa, emakumeen eta gizonen berdintasunari buruzkoa.

14/2015 Foru Legea, Emakumeen kontrako Indarkeriari aurre egitekoa.

8/2017 Foru Legea, LGTBI+ pertsonen berdintasun sozialari buruzkoa.

17/2019 Foru Legea, Emakumeen eta Gizonen arteko Berdintasunari buruzkoa.

47/2010 Foru Dekretua, Bizikidetzari eta ikasleen eskubide eta betebeharrei buruzkoa.

66/2010 Foru Dekretua, Ikasketa eta lanbide orientazioari buruzkoa.

72/2021 Foru Dekretua, Hezkidetzari buruzkoa.

1/2023 Foru Dekretua, NHEBZri buruzkoa.

43/2023 Foru Dekretua, Atzerriko hizkuntzetan ikasteko programari buruzkoa.

139/2009 Foru Agindua, Programa eleaniztunetan ingelesez irakasteko behar diren hizkuntza betebeharrei buruzkoa.

204/2010 Foru Agindua, Bizikidetzari buruzkoa.

49/2013 Foru Agindua, Erreklamazioei buruzkoa.

112/2013 Foru Agindua, Banatze, dibortzio edo desadostasun egoeran dauden gurasoei buruzko jarraibideei buruzkoa.

71/2020 Foru Agindua, Kalitatearen kudeaketari buruzkoa.

35/2022 Foru Agindua, Eskola garraioari buruzkoa.

69/2023 Foru Agindua, Hezkuntza inklusioari buruzkoa.

2.–Derrigorrezko Bigarren Hezkuntza.

71/2022 Foru Dekretua, DBHko curriculumari buruzkoa.

64/2022 Foru Agindua, DBH ezartzeari eta ordutegiari buruzkoa.

79/2022 Foru Agindua, DBH eta Batxilergoko aukerako ikasgaiei buruzkoa.

53/2023 Foru Agindua, DBHko ebaluazioari, mailaz igotzeari eta titulazioari buruzkoa.

Hona hemen etapa honetako araudia eta baliabideak dituen webgunerako helbidea:

https://sites.google.com/educacion.navarra.es/curriculos-de-navarra/etapas/eso

3.–Batxilergoa.

72/2022 Foru Dekretua, Batxilergoko curriculumari buruzkoa.

67/2022 Foru Agindua, Batxilergoa ezartzeari eta ordutegiari buruzkoa.

79/2022 Foru Agindua, DBHko eta Batxilergoko aukerako ikasgaiei buruzkoa.

15/2023 Foru Agindua, Helduentzako Batxilergoko ordenamenduari, antolaketari, ezarpenari eta ordutegiari buruzkoa.

45/2023 Foru Agindua, Batxilergoko ebaluazioari, mailaz igotzeari eta titulazioari buruzkoa.

Hona hemen etapa honetako araudia eta baliabideak dituen webgunerako helbidea:

https://sites.google.com/educacion.navarra.es/curriculos-de-navarra/etapas/bachillerato

III. ERANSKINA.–HEZKUNTZA BEREZIKO IKASTETXEEN ANTOLAMENDUA ETA FUNTZIONAMENDUA 2024-2025 IKASTURTEAN ARAUTUKO DITUZTEN JARRAIBIDEAK

Hezkuntza bereziko ikastetxeen errealitatea ikasle eskolatuen beharrek markatzen dute, eta behar horiek zehazten dute zer elementu behar diren kalitate goreneko hezkuntza erantzuna diseinatzeko: irakaskuntzen antolamendua, curriculuma, profesionalen profilak, ratioak, antolaketa pedagogikoa, hezkuntza kudeaketa, etab.

Honako hauek dira jarraibide hauek egiterakoan erreferente gisa balio duten printzipioak:

–Estatuko eta autonomia erkidegoko lege-esparrua errespetatzea.

–Ikastetxeak antolatzea egungo errealitatera egokituta eta ikasleen premiekin bat etorriz.

–Espezializazio maila handiko hezkuntza proiektuak eta ikastetxeen planak diseinatzea.

–Eraginkortasuna kudeaketan eta erabakiak hartzean.

–Hezkuntza komunitateko pertsona guztiek eskubide osoko kide gisa parte hartzea, taldean lan egitea eta bizikidetza-giro ona izatea.

Jarraibide hauek erreferenteak dira hezkuntza bereziko ikastetxeen autonomiaren garapen koherentea lortzeko, lege orokorrak ikastetxe guztientzat ezartzen duenetik abiatuta.

Autonomia horren arabera, hezkuntza bereziko ikastetxeek koordinazio-organoen osaera eta funtzionamendua egokitzen ahalko dituzte. Horretarako, proposamen arrazoitua eginen diote hezkuntza administrazioari, ikastetxearen hezkuntza proiektuaren esparruan.

1.–Hezkuntza bereziko ikastetxeetako lana zuzendu behar duten printzipioak.

Hezkuntza bereziko ikastetxeetako lana planifikatzeko orduan, printzipio hauek hartuko dira kontuan:

–Ikasleen bizi-kalitatea sustatzea.

–Ikasleen garapen integral handiagoa ahalbidetuko duen arreta pertsonalizatua gauzatzea.

–Ikasleek testuinguru guztietan ahalik eta parte-hartze osoena izan dezaten bultzatzea.

–Bide eraginkorrak eta egokiak bermatzea hezkuntza komunitateko kide guztiei (ikasleei, senideei eta profesionalei) parte hartzeko eta komunikatzeko.

–Hezkuntza administrazioarekin koordinatuta lan egitea hezkuntza espezializatuko ikastetxeak izateko, ikastetxe arruntentzat erreferentzia eta sostengu izan daitezen, inklusio-prozesuak erraztuz, komunitate osoarentzako ate irekiko zentroak izanik, printzipio hori bateragarri eginez ikastetxeko ikasleen hezkuntza arretarekiko errespetuarekin.

–Bertako profesionalen etengabeko prestakuntza sustatzea. Etengabeko hobekuntzarako metodologiak garatzea, ikastetxearen Urteko Programazio Orokorraren eta urteko memoriaren bidez, lan-tresna erabilgarriak eta praktikoak baitira.

2.–Irakaskuntzen antolamendua.

Honako irakaskuntza hauek ematen dira hezkuntza bereziko ikastetxeetan:

–Haur Hezkuntzako etapa: 3-6 urte (3 ikasmaila).

–Derrigorrezko Oinarrizko Hezkuntzako etapa: 6-16/18 urte (10/12 ikasmaila):

  • Derrigorrezko Oinarrizko Hezkuntza 1 (DOH 1): 6-12 urte (6 ikasmaila).
  • Derrigorrezko Oinarrizko Hezkuntza 2 (DOH 2): 12-16 urte (4 ikasmaila).

Ikastetxeek, beren autonomia pedagogikoaren esparruan, curriculuma garatzeko proposamen bat diseinatuko dute, ikasleen premietara eta ezaugarrietara egokitua eta egungo ildo pedagogikoekin bat datorrena.

–Derrigorrezko Hezkuntzaren Ondoko etapa. 16 eta 21 urte bitartean izanik sartzen ahalko da, etapa hasten den urteko abenduaren 31 baino lehen betez gero.

  • Helduarora Igarotzeko Programa desgaitasun intelektualagatik eta garapenaren desgaitasunagatik hezkuntza premia berezi iraunkorrak dituzten ikasleentzat da; ikasle horiek bestelako desgaitasuna ere izan dezakete, edo zenbait kasutan, jokabidearen nahasmendu larriak edo bestelako adimen nahasmenduak. Ikasle horiek euskarri handiak eta orokorrak behar dituzte moldatze-portaeraren arlo guztietan edo ia guztietan: komunikazioa, ikaskuntza esanguratsuak eta funtzionalak, osasuna eta segurtasuna, aisia eta astialdia, etxeko bizitza, komunitateko bizitza, norberaren zainketa, autodeterminazioa, harreman sozialak eta izaera okupazionaleko trebetasunak. Programa horietarako curriculumaren garapena NHEBZren webgunean argitaratuta dago.
  • Lanbide Heziketa Bereziko zikloak: B modalitatea da hezkuntza bereziko ikastetxeetan ematen dena. Derrigorrezko etaparen ondotik desgaitasunari lotutako hezkuntza behar bereziak dituztenentzat da, haien egokitzeko abileziek, autonomiak eta desgaitasun mailak laguntza orokor eta jarraituak eskatzen dituztelako, lanerako ikastegi batean, enplegu zentro berezi batean edo beste enplegu modalitate batzuetan sartzeko aukera arrazoizkoak izanik.

3.–Curriculum proposamenak.

Hezkuntza proiektuaren esparruan, ikastetxe bakoitzak zehaztuko ditu hezkuntza etapa bakoitzerako curriculumak.

Ikastetxeek curriculuma zehaztu ahal izateko jarraibideak ezartzean, erreferentziazko 3 printzipio hartu behar dira kontuan:

a) Curriculum zehaztapenak egin behar dira hezkuntza bereziko ikastetxeetan eskolatutako ikasleen beharrei, ezaugarriei eta aukerei behar bezala erantzuteko, eta horrek proposamen oso espezializatuak diseinatzea eskatuko du.

b) Beharrezkoa da koherentzia eta jarraitutasuna gordetzea curriculumaren funtsezko elementuetan hezkuntza etapa guztietan, horietako bakoitzaren ezaugarri bereizgarriak zainduz.

c) Legeria orokorrak eta autonomikoak Oinarrizko Hezkuntzarako ezarritakoa.

Oinarrizko Hezkuntzako curriculumaren zehaztapena diseinatzeko, kontuan hartuko dugu Adimen eta Garapen Desgaitasunen Amerikako Elkartearen (AAIDD) adimen-desgaitasunaren kontzeptua, zeinak zehazten baitu adimen-desgaitasuna dela adimen-funtzionamenduko eta egokitze jokabideko muga esanguratsuak dituena eta islatzen dena egokitze trebetasun kontzeptual, sozial eta praktikoetan. Desgaitasun hori 18 urte bete baino lehen sortzen da.

Desgaitasuna pertsonaren eta ingurunearen arteko interakzioaren adierazpentzat hartu behar dugu. Interakzioaren ikuspegi horretatik, harreman estuan dauden hiru elementu planteatzen dira:

–Haurraren trebetasunak, normalean parte hartzen duen inguruneei dagokienez.

–Ingurune horietan funtzionalki parte hartzeko aukerak.

–Jendeak eman diezaiekeen sostengua egokia izatea.

Funtsezko garrantzia hartzen du pertsona horiei eman diezaiekegun sostenguak; izan ere, haren bidez, ingurune bakoitzean duten parte-hartze funtzionala optimizatzen lagun dezakegu.

Adimen-desgaitasunaren definizioan, mugak aipatzen dira adimen-funtzionamenduan eta egokitze-portaeran (kontzeptuala, soziala eta praktikoa).

Adimen-desgaitasuna ez da pertsonaren ezaugarri absolutu bat; aitzitik, osatuta dago pertsonaren eta testuinguruaren alderdi desberdinak barne hartzen dituzten 5 dimentsioz. Dimentsio anitzeko ikuspegia da, adierazten duena giza funtzionamenduan eta adimen-desgaitasunean interakzio dinamikoa eta elkarrekikoa dutela trebetasun intelektualak, egokitze jokabideak, osasunak, parte-hartzeak, testuinguruak eta banakako laguntzek. Dimentsio horien gainean ebaluatuko dira ikaslearen gaitasunak eta mugak, eguneroko funtzionamendua hobetuko duten beharrezko laguntzak planifikatzeko.

Beraz, ikasleen banakako funtzionamendua hobetzeko curriculum bat ezarri behar da, adierazitako 5 dimentsioek markatuko dutena:

–I. dimentsioa: Funtzionamendu intelektuala.

–II. dimentsioa: Egokitze jokabidea.

–III. dimentsioa: Parte-hartzea, interakzioak eta rol sozialak.

–IV. dimentsioa: Osasuna.

–V. dimentsioa: Testuingurua.

I. eta II. dimentsioak. Banakako funtzionamendua eta egokitze jokabidea. Arreta ikasleengan jartzen duten dimentsioak dira. Zer ikasi behar dute ikasleek?

III. dimentsioa. Parte-hartzea, interakzioak eta rol sozialak. Ikasleek parte hartzeko dituzten inguruneak aztertzen dira, eta, horretarako, era guztietako neurriak hartzen dira parte hartzeko aukerak errazteko eta zailtasunak konpontzeko.

IV. dimentsioa. Osasuna. Garrantzitsua da ikasleek ikasi behar duten horretan ere agertzea, banakako funtzionamenduari eragiten baitio. Gainera, kontuan hartu eta partekatu behar dira osasunaren alderdi garrantzitsuak, norberaren funtzionamenduan eragin dezaketenak eta esku-hartzea hobetzen laguntzen dutenak.

V. dimentsioa. Testuingurua. Testuinguru ulergarria eta aurreikusgarria diseinatu behar da. Hezkuntza jardueran honako hauek eduki behar dira: denboraren egituraketa eta espazioaren egituraketa, ikasle guztientzako laguntza egokiekin, lan-sistemen egituraketa eta beharrezko egokitzapen fisikoak.

Planteamendu hori guztiz koherentea da Nafarroan helduarora igarotzeko programetarako curriculum proposamenarekin; izan ere, curriculum proposamen horren helburua da egokitze trebetasunak garatzea, beharrezkoak direnak ikasleen garapen pertsonala eta ongizate fisiko, emozional eta soziala errazteko, ikasleen bizi-kalitatea hobetu dadin. Beraz, curriculuma bizi-kalitateko eredu batetik garatzen da, zeinaren edukia antolatzen baita egokitze trebetasunak garatzen diren ikaskuntza-esparruetan.

3.1. Egokitze jokabidearen antolaketa eta haren curriculum-egituraketa.

Oinarrizko Hezkuntzarako legeria orokorrak ezarritakoa kontuan hartuta, proposatzen da egokitze jokabidea garapen-esparruen arabera antolatzea.

EGOKITZE JOKABIDEAREN ANTOLAKETA

GARAPEN KONTZEPTUALAREN ESPARRUA.

Eskola-trebetasun funtzionalen arloa.

Autogidaritzaren arloa.

Komunikazioaren arloa.

GARAPEN SOZIALAREN ESPARRUA.

Aisiaren eta denbora librearen arloa.

Trebetasun sozialen arloa.

Jokabidearen arloa.

GARAPEN PRAKTIKOAREN ESPARRUA.

Komunitatearen erabileraren arloa.

Etxebizitzan bizitzeko arloa.

Eguneroko bizitzako jardueren arloa.

Osasunaren eta segurtasunaren arloa.

Lanaren arloa.

Esparrukako antolaketa horretan, hura osatzen duten arloetako bakoitzaren curriculum-garapenak honako elementu hauek izanen ditu: konpetentzia espezifikoak, ebaluazio irizpideak eta horiek osatzen dituzten arloen oinarrizko jakintzak.

Ulertu behar da arloei edo, hala dagokionean, esparruei esleitutako eskola-orduak direla haietako bakoitzean lan egiteko beharrezkoa den denbora, etaparen izaera global eta integratzaileari kalte egin gabe. Ondorio horietarako, esparru bakoitzaren eskola ordutegia hura osatzen duten arlo guztien batura izanen da.

4.–Ratioak.

Araudi orokorraren arabera, ikastetxe arruntetan aniztasunari erantzuteko neurrien esparruan erantzun ezin zaien premiak dituzten ikasleak eskolatzen dira hezkuntza bereziko ikastetxeetan; oso arreta espezializatua behar duten ikasleak dira.

Taldekatzeen konfigurazioan, normalean, talde beraren barruan sartzen diren ikasleek desberdinak dituzte laguntza-premia handiak, adinak, ikaskuntza-estiloak eta abar.

Alderdi horiek kontuan hartuta, gutxieneko eta gehieneko ratioak ezartzen dira hezkuntza bereziko ikastetxe publikoetako ikasle-talde bakoitzeko:

–Haur Hezkuntzan, DOH 1en eta DOH 2n, gutxienez hiru eta gehienez bost.

–Helduarora igarotzeko programetan, gutxienez hiru eta gehienez bost.

–LHBan, gutxienez hiru eta gehienez zortzi.

5.–Barne koordinazioa.

Araudi orokorrak ikastetxeei ematen dien autonomiaren arabera, hezkuntza bereziko ikastetxe publikoek koordinazio-organoen osaera eta funtzionamendua egokitzen ahalko dituzte. Horretarako, proposamen arrazoitua eginen diote hezkuntza administrazioari, ikastetxearen hezkuntza proiektuaren esparruan.

Hezkuntza bereziko ikastetxe publikoetako profesionalen plantilla zabala eta askotarikoa da. Errealitate horren konplexutasuna dela eta, zuzendaritza-taldeek ahalegin handiena egin behar dute diziplinaz gaindiko lana behar bezala koordinatua, errespetuzkoa eta eraginkorra izanen dela bermatuko duen barne-antolamendua ezartzeko. Horretarako, zuzendaritza-taldeek lidergo positiboa izan behar dute, profesional bakoitzak bere onena eman dezan, ikasleen hezkuntza arretaren kalitatea ardatz nagusitzat izanen duten helburu komunak lortzeko.

Barne koordinaziorako organo hauek proposatzen dira (gainera, ikastetxeek beste talde batzuk izan ditzakete beren hezkuntza proiektuaren arabera):

–Hezkuntza laguntzako unitatea.

–Koordinazio Pedagogikorako Batzordea.

–Tutoretza taldeak.

–Etapako taldeak: DOH I; DOH II, HIP eta LHB.

–Hezkuntza laguntzako espezialisten taldea eta zuzendaritza-taldea.

–Lantaldeak eta/edo hezkuntza berrikuntzako taldeak.

Lantaldeak eta/edo hezkuntza berrikuntzako taldeak eratzen ahalko dira ikastetxe bakoitzaren hezkuntza proiektuekin eta planekin bat etorriz. Adibidez, entzumen eta hizkuntzako talde bat eratzen ahalko da, arlo horretako profesional espezialista guztiak bilduko dituena eta helburua izanik ikastetxeko ikasle guztientzako komunikazio proiektu orokor bat garatzea. Bestalde, diziplinarteko lantaldeak eratzen ahalko dira, hezkuntza espezializazioko proiektuak egiteko eta garatzeko, beharren profil bera duten ikasleentzat, hala nola askotariko desgaitasunak eta laguntza orokorreko premiak dituzten ikasleentzat.

Bileren osaera, arduradunak, eginkizunak eta maiztasuna ezartzeko, kontuan hartuko dira legeria orokorra, araudi autonomikoa, hezkuntza bereziko ikastetxe publiko bakoitzaren hezkuntza proiektuak eta planak, eta helburu izanen dute talde-lan erabat koordinatua, errespetuzkoa eta eraginkorra lortzea, ikastetxearen hezkuntza kalitatea eta espezializazioa hobetzeko.

6.–Bizikidetza.

Hezkuntza bereziko ikastetxe publikoetako plantillak konplexuak direnez, ezinbestekoa da bizikidetza-giro positiboa eta errespetuzkoa lortzea, diziplinaz gaindiko lan egokia errazteko. Horretarako, ikastetxe bakoitzak bere Bizikidetzaren Plan Orokorra egin behar du, lasaitasunez, hausnarketaz, sakontasunez, zintzotasunez eta eskuzabaltasunez, bai eta haren urteko zehaztapena ere. Plan hori Urteko Programazio Orokorrean txertatuko da, eta ikastetxean bizikidetza-giro ona sustatzeko programatzen diren jarduera guztiak jasoko ditu.

Era berean, ikastetxeek, araudi orokorrarekin bat etorriz, bizikidetzarako erregelamendu bat prestatuko dute, ikastetxean bizikidetza-giro ona sustatzeko. Erregelamendu horretan jasota geldituko dira bizikidetza-arauak, ikasleen eskubideen eta betebeharren zehaztapena eta, horiek betetzen ez badira, indarrean dagoen araudiaren arabera aplikatu beharreko neurri zuzentzaileak, kontuan hartuta ikasleen egoera eta baldintza pertsonalak, bai eta gatazkak modu baketsuan konpontzeko jarduerak egitea ere, genero-indarkeria, berdintasuna eta diskriminaziorik eza prebenitzeko jarduerei arreta berezia eskainiz. Ikastetxeetako bizikidetza- eta jokabide-arauak nahitaez bete beharko dira.

Neurri zuzentzaileak hezitzaileak eta lehengoratzaileak izanen dira, bermatu beharko dute gainerako ikasleen eskubideak errespetatzen direla, eta, ahal dela, hezkuntza komunitateko kide guztien harremanak hobetuko dituzte.

Neurri zuzentzaileak proportzionalak izanen dira egindako faltekiko. Falta oso astuntzat joko dira hezkuntza komunitateko beste kide batzuen duintasun pertsonalaren aurka egiten duten jokabideak, jatorri edo ondorio dutenak generoan, sexu-orientazioan edo sexu-identitatean, arrazan, etnian, erlijioan, sinesmenetan edo desgaitasunetan oinarritutako diskriminazio edo jazarpen bat, edo egiten direnak ezaugarri pertsonalak, sozialak edo hezkuntzakoak direla-eta ahulenak diren ikasleen aurka. Neurri zuzentzailea ikastetxetik kanporatzea izan daiteke.

Berehala betearaziko dira falta arinak egiteagatik neurri zuzentzaileak hartzeko erabakiak.

Hezkuntza administrazioak protokoloak arautzen ditu jarduteko eskola-jazarpenaren, ziberjazarpenaren, sexu-jazarpenaren, genero-indarkeriaren eta beste edozein indarkeria-motaren zantzuen aurrean, bai eta ongizatearen eta babesaren koordinatzaileak bete behar dituen baldintzak eta eginkizunak ere. Koordinatzaile hori ikastetxe guztietan izendatu behar da, titulartasuna edozein dela ere. Ikastetxeetako zuzendariak edo titularrak arduratuko dira hezkuntza komunitateak dauden jarduteko protokoloen berri izateaz, bai eta protokolo horietan aurreikusitako jarduerak gauzatzeaz eta horien jarraipena egiteaz ere.

IV. ERANSKINA.–NAFARROAKO FORU KOMUNITATEAN HAUR ESKOLEN ANTOLAKETA ETA FUNTZIONAMENDUA 2024-2025 IKASTURTEAN ARAUTUKO DITUZTEN JARRAIBIDEAK

Haur eskolak Haur Hezkuntzako lehen zikloa ematen duten ikastetxeak dira.

Martxoaren 26ko 28/2007 Foru Dekretuan ezarritakoari jarraikiz baimendutako ikastetxeak dira (foru dekretu horren bidez Nafarroako Foru Komunitatean Haur Hezkuntzako lehen zikloa arautu zen) eta ekainaren 1eko 61/2022 Foru Dekretuan ezarritakoa bete beharko dute (foru dekretu horrek Haur Hezkuntzako etapako irakaskuntzen curriculuma ezarri zuen Nafarroako Foru Komunitatean).

1.–Haur Hezkuntzako lehen zikloko ikastetxeetako hezkuntza proiektua eta proposamen pedagogikoa.

Haur eskolek, beren autonomia pedagogikoko esparruan, ikastetxeko hezkuntza proiektua eguneratuta izanen dute.

2024-2025 ikasturtean, haur eskolek EDUCA kudeaketa sisteman sartuko dute hezkuntza proiektua (Ikastetxea > Dokumentazio instituzionala).

2024-2025 ikasturtean, haur eskolek beren proposamen pedagogikoa curriculum berrira egokitzen eta garatzen jarraitu beharko dute, eta proposamena haur bakoitzaren ezaugarri pertsonaletara egokitu beharko dute, baita haur bakoitzaren gizarte- eta hezkuntza-errealitatera ere. Gainera, konpetentziak eskuratu eta garatzeko baliatuko diren ikaskuntza egoeren diseinua sartu beharko da proposamenean.

2023-2024 ikasturtean hasitako prozesuari jarraipena emateko, haurren ikaskuntza prozesuaren ebaluazioaren emaitza, ikasle bakoitzarena, EDUCA kudeaketa sistemaren bidez jasoko da eta txosten hori izanen da ikasturte amaierako ebaluazioaren txostena.

2.–Antolaketari dagozkion alderdiak.

2.1. Matrikulako datuak.

Haur eskola bakoitzeko matrikularen behin betiko datuak EDUCA kudeaketa programan sartuta egon beharko dira ikasturteko lehenengo astea amaitzean, haur eskola horretarako Hezkuntza Ikuskapen Zerbitzuak onetsitako egutegiari jarraikiz.

Matrikularen datu horiek erreferentzia gisa hartuko dira 2024-2025 ikasturtean haur eskola bakoitzerako errefortzuko hezitzaileak esleitzeko.

2.2. Langileen ordutegia.

2024-2025 ikasturtetik aurrera, hezitzaileen ordutegiak EDUCA kudeaketa programan sartu beharko dira.

Horretarako, Hezkuntza Departamentuak ikastetxeetako zuzendaritzentzako informazio saioak antolatuko ditu.

3.–Hazten proiektu pilotua.

Proiektua 2023-2024 ikasturtean hasi zen, hezkuntza hobetu eta berritzeko esparruan. Proiektuari esker, Nafarroako Gobernuaren Hezkuntza Departamentuaren zazpi haur eskoletan hezkuntza orientatzaileak egon dira lanean.

Hazten proiektu pilotuaren bidez Haur Hezkuntzako lehenengo zikloan (0-3 urte) hezkuntza orientatzaileek arreta eskaintzen diete haurrei. Programa 2024-2025 ikasturtean ere eginen da, eta, horretarako, aintzat hartuko da 2023-2024 ikasturtea amaitzean parte-hartzaileek eginiko ebaluazioa.

Iragarkiaren kodea: F2409190