1. NAFARROAKO FORU KOMUNITATEA
1.7. BESTELAKOAK
195E/2024 EBAZPENA, maiatzaren 17koa, Ekonomia Zirkularraren eta Berrikuntzaren Zerbitzuko zuzendariak emana, zeinaren bidez partez onartzen baita Lizarrako udal mugartean hondakinetatik abiatuta erregaiak elaboratzeko dagoen instalazio baten eta bertako hondakinen transferentziagunearen ingurumen baimen bateratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Chipala Medioambiente SL da.
Instalazio horrek badu ingurumen baimen integratua, Ingurumenaren eta Uraren zuzendari nagusiak azaroaren 4ko 2230/2009 Ebazpenaren bidez emana, gero Ingurumenaren eta Uraren zuzendari nagusiaren abuztuaren 13ko 369E/2014 Ebazpenaren bidez eguneratu zena.
2023ko irailaren 7an, titularrak bere ingurumen baimen integratuan dauden baldintzak aldatzeko eskatu du, zehazki, ingurumen baimen integratuaren III. eranskinean, instalazioan sortzen eta kudeatzen diren hondakinen zerrendan, hondakin mota berriak sartzeko.
Ekonomia Zirkularraren eta Berrikuntzaren Zerbitzuak berrikusi du aurkeztutako eskaera, eta honako hau ondorioztatu du eskatutako aldaketa bakoitzerako:
PROZESUA | ESKAERA | EHZ HONDAKINA | | BALORAZIOA |
R120802 Hondakinak egokitzea frakzio erregaiak lortzeko. Beste batzuk // Erregaiak elaboratzea hondakin ez-arriskutsuetatik abiatuta, R12 | Kudeatutako hondakin berria | Ehunak | 191208 | Onartu da |
R120802 Hondakinak egokitzea frakzio erregaiak lortzeko. Beste batzuk // Erregaiak elaboratzea hondakin arriskutsuetatik abiatuta, R12 | Sortutako hondakin berria | Burdinazko metalak | 200140 | Partez onartzen da, baldin eta kudeatutako hondakinaren sailkapenean sortzen den hondakin metalikoa 191202 kodearekin kodetzen bada. |
R120802 Hondakinak egokitzea frakzio erregaiak lortzeko. Beste batzuk // Erregaiak elaboratzea hondakin ez-arriskutsuetatik abiatuta, R12 | Sortutako hondakin berria | Burdinazko metalak | 200140 | Partez onartzen da, baldin eta kudeatutako hondakinaren sailkapenean sortzen den hondakin metalikoa 191202 kodearekin kodetzen bada. |
ZERBITZU OROKORRAK | Sortutako hondakin berria | Inprimatzeko tonerren hondakinak, substantzia arriskutsuak dituztenak | 080317* | Onartu da |
ZERBITZU OROKORRAK | Sortutako hondakin berria | Substantzia arriskutsuen hondarrak dituzten ontziak, edo haiekin kutsatuak daudenak | 150110* | Onartu da |
ZERBITZU OROKORRAK | Sortutako hondakin berria | Osagai arriskutsuak dituzten ekipo baztertuak [4], 16 02 09tik 16 02 12ra arteko kodeetan zehaztutakoak ez direnak | 160213* | Onartu da |
ZERBITZU OROKORRAK | Sortutako hondakin berria | Bazter utzitako ekipoak, 16 02 09tik 16 02 13ra arteko kodeetan zehaztutakoak ez direnak | 160214 | Onartu da |
ZERBITZU OROKORRAK | Sortutako hondakin berria | Pilak | 200133 | Partez onartzen da; izan ere, instalazioaren industria-prozesuan sortzen den pilen hondakina kode hauekin kodetuko litzateke: berunezko bateriak, 160601*; Ni-Cd metagailuak, 160602*; merkurioa duten pilak, 160603* |
Onartutako aldaketek ez dute eragozten instalazioaren funtzionamendu egokia ingurumenari dagokionez, eta bat datoz ingurumen baimen integratuan ezarritako gehieneko isurketa-balioekin eta gainerako eskakizunekin, bai eta teknika erabilgarri onenen aplikazioarekin ere.
Kasu honetan, Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 35. artikuluan ezarritako inguruabarrak gertatzen direla uste da, eta, ondorioz, bidezkoa da ingurumen baimen integratuan ezarritako baldintzak ofizioz aldatzea, artikulu horretan ezarritako administrazio prozedurarekin bat etorriz, eta ez da egokitzat jotzen aldaketa-espediente hau jendaurrean jartzea.
Ebazpen proposamena instalazioaren titularrari entzunaldia emateko tramitean egon da hamabost egunez, eta hark ez du proposamenaren aurkako alegaziorik aurkeztu.
Adierazitakoarekin bat, eta Landa Garapeneko eta Ingurumeneko Departamentuaren egitura organikoa ezartzen duen azaroaren 15eko 255/2023 Foru Dekretuak ematen dizkidan eskudantziak erabiliz,
EBAZTEN DUT:
Lehendabizikoa.–Partez onartzea Lizarrako udal mugartean hondakinetatik abiatuta erregaiak elaboratzeko dagoen instalazio baten eta bertako hondakinen transferentziagunearen ingurumen baimen bateratuan ezarritako funtzionamendu baldintzen aldaketa. Horren ondorioz, instalazioak eta hango jarduerak ebazpen honen eranskinean ezarritako baldintzak bete beharko dituzte. Instalazioaren titularra Chipala Medioambiente SL da.
Bigarrena.–Ebazpen honetan jasotako baldintzak betetzen ez baldin badira, Kutsaduraren Prebentzio eta Kontrol Integratuari buruzko Legearen testu bateginaren IV. tituluan jasotako ingurumen diziplinako neurriak hartuko dira (testu bategin hori abenduaren 16ko 1/2016 Legegintzako Errege Dekretuaren bidez onetsi zen), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen-araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren kontra, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.
Bosgarrena.–Ebazpen hau Chipala Medioambiente SLri eta Lizarrako Udalari igortzea, behar diren ondorioak izan ditzan.
Iruñean, 2024ko maiatzaren 17an.–Ekonomia Zirkularraren eta Berrikuntzaren Zerbitzuko zuzendaria, Raúl Salanueva Murguialday.
Oharra: ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Berrikuntzaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.
Iragarkiaren kodea: F2408132
