Iragarkia

122. ALDIZKARIA - 2024ko ekainaren 13a

1. NAFARROAKO FORU KOMUNITATEA

1.7. BESTELAKOAK

221/2024 EBAZPENA, maiatzaren 27koa, Lanbide Heziketako, Digitalizazioko eta Hezkuntza Zerbitzuetako zuzendari nagusiak emana, jarraibideak onesten dituena 2024-2025 ikasturtean Nafarroako Foru Komunitateko hezkuntza sistemaren lanbide heziketako irakaskuntzak eta arte plastikoetako eta diseinuko lanbide irakaskuntzak ematen dituzten ikastetxeei dagozkien eskola egutegia eta ordutegi orokorra prestatzeko.

Ikusirik Lanbide Heziketaren Plangintza eta Integraziorako Zerbitzuko zuzendariak emandako aldeko txostena, zeinean proposatzen baita onestea Nafarroako Foru Komunitateko hezkuntza sistemaren lanbide heziketako irakaskuntzei eta arte plastikoetako eta diseinuko lanbide irakaskuntzei dagokien eskola egutegia eta ordutegia prestatzeko jarraibideak 2024-2025 ikasturterako.

Hezkuntza Departamentuaren egitura organikoa ezartzen duen azaroaren 15eko 245/2023 Foru Dekretuak emandako ahalmenak erabiliz,

EBAZTEN DUT:

1. Jarraibideak onestea Nafarroako Foru Komunitateko hezkuntza sistemaren lanbide heziketako irakaskuntzak eta arte plastikoetako eta diseinuko lanbide irakaskuntzak ematen dituzten ikastetxe publikoetan, ikastetxe pribatu itunduetan eta erakundeetan 2024-2025 ikasturteko eskola egutegia eta ordutegia prestatzeko. Eranskinean zehaztu dira.

2. Ebazpen hau eta eranskina Nafarroako Aldizkari Ofizialean argitaratzea.

3. Ebazpen honen aurka gora jotzeko errekurtsoa jartzen ahalko da, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

4. Ebazpen hau eta eranskina honako hauei igortzea, behar diren ondorioak izan ditzaten: Hezkuntza Zuzendaritza Nagusira, Langileriaren eta Azpiegituren Zuzendaritza Nagusira, Lanbide Heziketaren Plangintza eta Integraziorako Zerbitzura, Lanbide Heziketaren Modernizaziorako eta Berrikuntzarako Zerbitzura, Hezkuntzako Informazio Sistemen Zerbitzura, Hezkuntzako Teknologien eta IKT Azpiegituren Zerbitzura, Hezkuntza Zerbitzuen eta Ikasketetarako laguntzen Zerbitzura, Hezkuntzako Ikuskapen Zerbitzura, Inklusio, Berdintasun eta Bizikidetza Zerbitzura, Antolamendu, Prestakuntza eta Kalitate Zerbitzura, Ikastetxeetako Informazioa Kudeatzeko Atalera eta Eskolatze Bulegora.

Iruñean, 2024ko maiatzaren 27an.–Lanbide Heziketako, Digitalizazioko eta Hezkuntza Zerbitzuetako zuzendari nagusia, Luis Calatayud Yuste.

ERANSKINA.–JARRAIBIDEAK, NAFARROAKO FORU KOMUNITATEAN HEZKUNTZA SISTEMAREN LANBIDE HEZIKETAKO IRAKASKUNTZETAN ETA ARTE PLASTIKOETAKO ETA DISEINUKO LANBIDE IRAKASKUNTZETAN 2024-2025 IKASTURTEAN IZANEN DEN ESKOLA EGUTEGIA ETA ORDUTEGI OROKORRA PRESTATZEKO

Egutegia

Nafarroako eskola egutegiak baldintza hauek beteko ditu:

1. Hezkuntza sistemaren lanbide heziketako irakaskuntzak eta arte plastikoetako eta diseinuko lanbide irakaskuntzak ematen dituzten ikastetxeetan, 2024-2025 ikasturtea 2024ko irailaren 1ean hasiko da, eta 2025eko ekainaren 30ean bukatuko.

Etengabeko lanbide prestakuntzako ikastaroen eta langabe eta langileentzako ikastaroen prestakuntzaldia urte guztian zehar egin daiteke, Lanbide Heziketako, Digitalizazioko eta Hezkuntza Zerbitzuetako zuzendari nagusiaren ebazpen batean garatuko den egutegi eta ordutegi orokor berariazko batekin.

2. Ikastetxeek egutegi proposamen espezifiko bat egin beharko dute hezkuntza sistemaren lanbide heziketako irakaskuntzetarako eta arte plastikoetako eta diseinuko lanbide irakaskuntzetarako, baldintza hauei jarraikiz:

a) Eguberrietako oporrak: abenduaren 21etik urtarrilaren 7ra arte, biak barne.

b) Aste Santuko oporrak: apirilaren 17tik 27ra arte, biak barne.

c) Jaiegunak, Nafarroako lan egutegi arruntaren arabera: urriaren 12a, azaroaren 1a, abenduaren 3a, abenduaren 6a eta maiatzaren 1a. Lanbide Heziketaren Plangintza eta Integraziorako Zerbitzuak behar diren jarraibideak emanen ditu erabakitzen bada beste jaiegunen bat ezartzea eta, horrenbestez, eskola egutegia aldatzea.

d) Hezkuntzako zaindariaren jaieguna: urtarrilaren 31 hezkuntza sistemaren lanbide heziketako irakaskuntzetarako, eta urriaren 22a arte plastikoetako eta diseinuko lanbide irakaskuntzetarako. Ikastetxeek zilegi izanen dute ospakizun hori beste egun batera pasatzea.

e) Herriko jaieguna: Nafarroako Foru Komunitateko herrietako jaiegunak zehazten dituen arauan ezarritakoa. Data hori eskola eguna ez den egun batean egokitzen bada, ikastetxeak beste egun bat hautatzen ahalko du.

f) Aukeratutako eskola egunez gainerako egunak, aurreko ataletan jaiegun gisa finkatu ez direnak, eskola gabeko lanegunak izanen dira, gehienez ere 5 egun, eskolak hasten direnetik bukatzen diren arte.

g) Ezin izanen dira erabili d), e) eta f) letretan aipatzen diren egunak Eguberrietako eta Aste Santuko oporraldiak luzatzeko.

h) Irakaskuntza mota bat baino gehiago ematen duten ikastetxeek egun bakar batean bateratzen ahalko dituzte irakaskuntza mota desberdinei dagozkien zaindarien jaiegunak, baina ez dituzte inolaz ere ezarriko zaindarien jaiegun guztiak ikasle guztientzat.

3. Modalitate presentzialean, eskolak honako egun hauetan hasi eta amaituko dira:

–Oinarrizko zikloak: lehenbiziko eskola eguna 2024ko irailaren 5a izanen da, eta azkena, berriz, 2025eko ekainaren 18a.

–Erdi mailako zikloak: lehenbiziko eskola eguna 2024ko irailaren 9a izanen da (erdi mailako ikaspostu hutsak esleitzeko prozedura amaitu ondoren), eta azkena, berriz, 2025eko ekainaren 18a.

–Goi mailako zikloak: lehenbiziko eskola eguna 2024ko irailaren 11 izanen da (goi mailako ikaspostu hutsak esleitzeko prozedura amaitu ondoren), eta azkena, berriz, 2025eko ekainaren 18a.

–Irakaskuntzako curriculum jarduerak ingurune naturaletan egin behar dituzten heziketa zikloetan, eskolak maila horretarako ezarritako eguna baino lehenago hasten ahalko dira.

4. Horrez gain, ikastetxeek prestatuko duten egutegi proposamen espezifikoak baldintza hauek bete beharko ditu, ikasmailaren eta eskaintza modalitatearen arabera:

a) Modalitate presentzialeko eskola egunen kopurua: Oinarrizko mailako zikloak.

–Eskola egunak 175 izanen dira, Hezkuntzari buruzko maiatzaren 3ko 2/2006 Lege Organikoaren bosgarren xedapen gehigarrian ezarritakoari jarraikiz.

–Oinarrizko mailako zikloetako lehenbiziko kurtsoan, ez dutenez LP modulurik egiten, 175 eskola egunak beteko dituzte.

–Oinarrizko mailako zikloetako bigarren kurtsoan, baldin eta LP modulua ikasturtean zehar egiten badute, 175 eskola egun horiek berdin-berdin beteko dituzte.

–Oinarrizko mailako zikloetako bigarren kurtsoan, baldin eta LP modulua ikasturtearen azken hiruhilekoan egiten badute, eskola egunak, oro har, honela kalkulatuko dira: ikastetxeko prestakuntzarako curriculumean adierazitako orduak zati egunean bete beharreko 5,5 eskola orduak. Hala, eskola egunen kopurua egokitu beharko da; izan ere, oro har, lantokiko prestakuntza ekainaren 13an amaituko da.

b) Modalitate presentzialeko eskola egunen kopurua: Lanbide Heziketako eta Arte Plastikoetako eta Diseinuko erdi mailako zikloak.

–LP modulurik edo enpresetan, estudioetan eta lantegietan prestakuntzaldi praktikorik egiten ez duten erdi mailako zikloetako kurtsoan: 173 eskola egun.

–LP modulua edo enpresetan, estudioetan eta lantegietan prestakuntzaldi praktikoa ikasturtean zehar egiten duten erdi mailako zikloetako kurtsoan: 173 eskola egun horiek berdin-berdin beteko dituzte.

–LP modulua edo enpresetan, estudioetan eta lantegietan prestakuntzaldi praktikoa ikasturtearen azken hiruhilekoan egiten duten erdi mailako zikloetako kurtsoan, eskola egunak honela kalkulatuko dira: ikastetxeko prestakuntzarako curriculumean adierazitako orduak zati egunean bete beharreko 5,5 eskola orduak, eta horri 2 egun kenduko zaizkio. Lantokietan egiten den prestakuntza, oro har, ekainaren 13an bukatuko da.

c) Modalitate presentzialeko eskola egunen kopurua: Goi mailako Lanbide Heziketako eta Arte Plastikoetako eta Diseinuko zikloak:

–LP modulurik edo enpresetan, estudioetan eta lantegietan prestakuntzaldi praktikorik egiten ez duten goi mailako zikloetako kurtsoan: 171 eskola egun.

–LP modulua edo enpresetan, estudioetan eta lantegietan prestakuntzaldi praktikoa ikasturtean zehar egiten duten goi mailako zikloetako kurtsoan: 171 eskola egun horiek berdin-berdin beteko dituzte.

–LP modulua edo enpresetan, estudioetan eta lantegietan prestakuntzaldi praktikoa ikasturtearen azken hiruhilekoan egiten duten goi mailako zikloetako kurtsoan, eskola egunak honela kalkulatuko dira: ikastetxeko prestakuntzarako curriculumean adierazitako orduak zati egunean bete beharreko 5,5 eskola orduak, eta horri 4 egun kenduko zaizkio. Lantokietan egiten den prestakuntza, oro har, ekainaren 13an bukatuko da.

d) Eskola egunen kopurua, modalitate dualean (ikastetxean): ikastetxeek egokituko dute ziklo, talde eta ikasle mota bakoitzarentzako eskola egunen kopurua, kontuan harturik, horretarako, bai aipatu modalitatea garatzeko enpresa laguntzaileekin sinatutako hitzarmenak, bai kasuan kasuko prestakuntza planean xedatutakoa. Betiere, Lanbide Heziketaren Plangintza eta Integraziorako Zerbitzuak ontzat eman beharko du. Enpresa edo entitate batean eginiko prestakuntza, oro har, ekainaren 13an amaituko da.

e) Ikastetxean ematen diren moduluen amaierako ebaluazioaren deialdiei dagozkien probak egiteko egunak eskola eguntzat joko dira.

5. Amaierako ebaluazio partzialari eta azken ebaluazioari dagozkionak:

a) Lanbide Heziketako eta Arte Plastikoetako eta Diseinuko zikloetako modalitate presentziala: lantokiko prestakuntza (LP) modulurik edo enpresetan, estudioetan eta lantegietan prestakuntzaldi praktikoko faserik egiten ez den kurtsoan:

–Ebaluazio partzialeko azken saioari dagozkion ebaluazio probak eginen dira ebaluazio partzialeko azken saio hori ekainean egitea ahalbidetzen duten egunetan, kontuan hartuta ekainaren 3a dela azken eguna ikasleei jakinarazteko ebaluazio partzialeko azken saio horretan gainditu diren moduluen edo gainditu gabe gelditu diren moduluen berri.

–Ikastetxeak egun batzuk aurreikusiko ditu moduluaren programazioan ezarritako berreskurapen programa eta jarduerak aurrera eramateko, hain zuzen, azken ebaluazio partzialean gainditu diren eta gainditu gabe gelditu diren moduluen berri emateko azken egunaren biharamunetik hasi eta eskolak amaitzeko finkatutako azken egunera bitarte, egun horietan ikasleek aukera izan dezaten "gainditu gabe" kalifikazioa lortu duten moduluetan izandako zailtasunak gainditzeko eta amaierako ebaluazioa egokiago prestatzeko eta egiteko.

Ikastetxeak, halaber, curriculumeko jarduerak antolatuko ditu egun horietan oinarrizko mailako zikloetako ikasleentzat.

Aldi hori antolatzeko orduan, bete beharko da Lanbide Heziketako, Digitalizazioko eta Hezkuntza Zerbitzuetako zuzendari nagusiak ezartzen duena hezkuntza sistemaren lanbide heziketako irakaskuntzak eta arte plastikoetako eta diseinuko lanbide irakaskuntzak ematen dituzten ikastetxeen antolaketa eta funtzionamendurako jarraibideak onesteko ebazpenean.

–Amaierako ebaluazioari dagozkion ebaluazio probak eta jarduerak ekainean eginen dira, kontuan izanda ekainaren 18a dela azken eguna ikasleei amaierako ebaluazio horri dagozkion kalifikazioak emateko.

b) Hezkuntza sistemaren Lanbide Heziketako Arte Plastikoetako eta Diseinuko irakaskuntzen modalitate presentziala: Lantokiko Prestakuntza modulua edo enpresetako, estudioetako eta lantegietako prestakuntzaldi praktikoa ikasturtearen hirugarren hiruhilekoan egiten den kurtsoa:

–Lantokiko Prestakuntza modulua edo enpresetako, estudioetako eta lantegietako prestakuntzaldi praktikoa egin aurreko ebaluazio partzialaren probak eginen dira modulu edo prestakuntzaldi hori hasi baino lehen. Ebaluazio partzialeko saio horretan erabakiko da ikasleek moduluak gaindituak edo gainditu gabe dituzten, eta, horretaz gain, Lantokiko Prestakuntza modulura edo enpresetako, estudioetako eta lantegietako prestakuntzaldi praktikora igaroko diren edo ez.

–Ikastetxeak egun batzuk aurreikusiko ditu moduluen programazioan ezarritako berreskurapen programa eta jarduerak aurrera eramateko, bai modulu edo prestakuntzaldi horretara igarotzen ez diren ikasleentzat, bai gainditu gabeko moduluekin igarotzen diren ikasleentzat, egun horietan ikasleek aukera izan dezaten "gainditu gabe" kalifikazioa lortu duten moduluan izandako zailtasunak gainditzeko eta amaierako ebaluazioa egokiago prestatzeko. Denboraldi hori hasiko da Lantokiko Prestakuntza modulua edo prestakuntzaldi praktikoa egin aurreko ebaluazio partzialaren gaineko erabakiak entregatu eta jakinarazi eta biharamunean, eta eskolak amaitzeko finkatu den azken egunean bukatuko.

Aldi hori antolatzeko orduan, bete beharko da Lanbide Heziketako, Digitalizazioko eta Hezkuntza Zerbitzuetako zuzendari nagusiak ezartzen duena hezkuntza sistemaren lanbide heziketako irakaskuntzak eta arte plastikoetako eta diseinuko lanbide irakaskuntzak ematen dituzten ikastetxeen antolaketa eta funtzionamendurako jarraibideak onesteko ebazpenean.

–Amaierako ebaluazioari dagozkion ebaluazio probak eta jarduerak, oro har, ekainean eginen dira, kontuan izanda ekainaren 18a azken eguna dela ikasleei amaierako ebaluazioari dagozkion kalifikazioak emateko.

–Epe horien salbuespena honako hau izanen da: LP modulura edo enpresetako, estudioetako eta lantegietako prestakuntzaldi praktikora igaro diren goi mailako zikloetako ikasleek, unibertsitatera sartzeko ebaluazioa (USEa) egin nahi badute, USEaren deialdi arruntean izena emateko garaiz eman beharko zaie ikastetxean eginiko moduluen amaierako ebaluazioko kalifikazioa. Beraz, USEaren deialdi arruntean izena emateko garaiz eman beharko da ikastetxean irakasten diren moduluen amaierako kalifikazioa.

c) Lanbide heziketa dualaren modalitatea: ikasleak enpresako prestakuntza jarduerara joaten diren kurtsoan:

–Ebaluazio partzialeko azken saioko probak egiteko egunak egokituko dira, ziklo, talde eta ikasle bakoitzerako, modalitate hori gauzatzeko enpresa laguntzaileekin izenpetutako hitzarmenetan xedatutakora eta kasuan kasuko prestakuntza planean xedatutakora. Proba horiek antolatzeko orduan, bete beharko da Lanbide Heziketako, Digitalizazioko eta Hezkuntza Zerbitzuetako zuzendari nagusiak ezartzen duena hezkuntza sistemaren lanbide heziketako irakaskuntzak eta arte plastikoetako eta diseinuko lanbide irakaskuntzak ematen dituzten ikastetxeen antolaketa eta funtzionamendurako jarraibideak onesteko ebazpenean.

–Amaierako ebaluazioari dagozkion ebaluazio probak eta jarduerak, oro har, ekainean eginen dira, kontuan izanda ekainaren 18a azken eguna dela ikasleei amaierako ebaluazioari dagozkion kalifikazioak emateko.

–Epe horien salbuespena honako hau izanen da: LP modulura edo enpresetako, estudioetako eta lantegietako prestakuntzaldi praktikora igaro diren goi mailako zikloetako ikasleek, unibertsitatera sartzeko ebaluazioa (USEa) egin nahi badute, USEaren deialdi arruntean izena emateko garaiz eman beharko zaie ikastetxean eginiko moduluen amaierako ebaluazioko kalifikazioa. Beraz, USEaren deialdi arruntean izena emateko garaiz eman beharko da ikastetxean irakasten diren moduluen amaierako kalifikazioa.

Ikasturtea hasteko egunaren eta eskolak hasi aurreko egunaren arteko tartea eta eskolak amaitzeko egunaren eta ikasturtea amaitzeko egunaren arteko tartea

6. Irailaren 1etik eskolak hasi bitarteko egunetan, ikasturtearen antolaketarekin zerikusia duten jarduerak eginen dituzte irakasleek.

7. Eskolak bukatu eta ekainaren 30era arte, lan hauek eginen dira: ikasturtearen berrikusketa eta ebaluazio lan berariazkoak, modulu bakoitzaren memoria didaktikoak, departamentuen memoriak, amaierako memoria, orientazioa, erreklamazioak, ikasleak eta familiak hartzea eta beharrezkoak diren administrazio egintza guztiak, baita hurrengo ikasturtea antolatzearekin lotutako jarduerak ere.

Eskola egunak

8. Oro har, eskola egunetan prestakuntza jarduerak eginen dira, eta horien artean egonen dira ebaluaziorako prestakuntza jarduerak.

9. Eskola egunetan eskolak eteten ahalko dira Lanbide Heziketako, Digitalizazioko eta Hezkuntza Zerbitzuetako Zuzendaritza Nagusiak lehentasunezko jardueratzat jotzen dituenak gauzatzeko.

10. Oro har, ebaluazio bilerak eta klaustroak ezin izanen dira eskola orduetan egin.

LP modulua, enpresetako, estudioetako eta lantegietako prestakuntzaldi praktikoa eta proiektua

11. Lantokiko Prestakuntza modulua, Lanbide Heziketako zikloen kasuan, eta enpresetako, estudioetako eta lantegietako prestakuntzaldi praktikoa, Arte Plastikoetako eta Diseinuko zikloen kasuan, hasiko da ikastetxean egindako moduluen ebaluazio partziala egin eta gero, prestakuntza modulu edo fase hori baino lehen egin beharrekoa; salbuespen dira, horri dagokionez, beste epe batzuk baimenduta dituzten modalitate edo heziketa zikloak.

12. Orobat, Lanbide Heziketako zikloetan, Proiektua izeneko lanbide modulua, oro har, Lantokiko Prestakuntza modulua egin bitartean eginen da, eta hori bukatu ondoren ebaluatuko da.

13. Azkenik, Arte Plastikoetako eta Diseinuko erdi eta goi mailako heziketa zikloen Amaierako Obra eta Amaierako Proiektua modulua hasiko da egiten, oro har, ikastetxean egindako moduluen ebaluazio partziala egin eta gero, prestakuntzaldi praktikoa egin baino lehen.

Ordutegi orokorra

Nafarroako Foru Komunitateko ikastetxeetako ordutegiak baldintza hauek beteko ditu:

14. Eskolak, oro har, goizez eta/edo arratsaldez emanen dira, astelehenetik ostiralera.

–Astean 30 eskola saio emanen dira. Goiz edo arratsalde erdian, hogeita hamar minutuko atsedenaldia izanen da. Nolanahi ere, ikasle talde batek edo irakasleek goiz eta arratsaldeko saioak badituzte, orokorrean, gutxienez ordu eta erdiko atsedenaldia utzi beharko bi eskolaldien artean.

–Lanbide heziketa dualaren modalitatean, eskolaldia egokituko da modalitate hori garatzeko enpresa laguntzaileekin sinatutako hitzarmenetan xedatutakora eta kasuan kasuko prestakuntza programetan xedatutakora.

–Ikasteko metodologia berriak aplikatzen dituzten ziklo eta moduluetan, eskola saioak metatzen ahalko dira, edo saio laburragoetan zatitu, proiektu metodologikoak ezartzen duena modu koherentean egokitzeko ikasketen inguru berrira. Metatze eta zatitze horiek egiten ahalko dira 258/1998 Foru Aginduaren 2.1.b) artikuluak ezartzen duena aplikatuz, egun bakoitzeko moduluak irizpide pedagogikoen arabera banatuz.

15. Uztailaren 16ko 258/1998 Foru Aginduaren 2.1.b) artikuluarekin bat, eskola saioek gutxienez ere 55 minutu iraunen dute.

16. Ikastetxeek eskola ordutegia handitzeko eskatzen ahalko dute, zenbatean luzatu nahi duten proposatuta, ordubete gehienez ere egunean. Luzapen horrek ez du behin ere ekarriko ituna handitzea ikastetxe pribatu itunduetan, ez eta plantilla ere ikastetxe publikoetan. Hezkuntzako Ikuskapen Zerbitzuak onetsi edo ukatuko du, bideragarritasunaren arabera.

17. Eskola garraio bera partekatzen duten ikastetxe guztiek, nahitaez, zerbitzu horrekin bateragarriak diren egutegia eta ordutegia aurkeztu beharko dituzte.

18. Lanbide Heziketa, Arte Plastikoetako eta Diseinuko lanbide irakaskuntzak, Batxilergoa edo Derrigorrezko Bigarren Hezkuntza ematen duten ikastetxeak herrigune berean edo eskola garraioaren ibilbide berean baldin badaude, eta guraso elkarteen eta Nafarroako Gobernuaren artean partekaturiko garraioaz baliatu ohi badira, beren artean koordinatuko dituzte sarrera-irteerako ordutegiak.

Gainera, eskola garraioaren zerbitzu horrekin bateragarria den egutegi eta ordutegi bat aurkeztu beharko dute nahitaez.

19. Egutegia eta ordutegi orokorra, onetsi ondoren, Nafarroako Foru Komunitateko ikastetxe publiko eta pribatu itundu guztiek nahitaez bete beharko dituzte. Ikastetxeko zuzendariaren erantzukizuna izanen da horiek betearaztea, eta haien aplikazioa gainbegiratzea eta kontrolatzea, aldiz, Hezkuntzako Ikuskapen Zerbitzuaren gain egonen da.

20. Ikastetxe bakoitzaren egutegia eta ordutegi orokorra ikastetxeko iragarki taulan eta web-orrian jarri beharko dira, eta aldaezinak izanen dira, non eta Hezkuntzako Ikuskapen Zerbitzuak ez duen horretarako baimena ematen.

Salbuespenak

21. Aurreko edozein atalen gaineko salbuespenak Hezkuntzako Ikuskapen Zerbitzuari eskatu beharko zaizkio, hark aztertu eta onar edo bazter ditzan.

Tramitazioa

Tramitazioa egiteko, honela jokatuko da:

22. Ikastetxe bateratuetako zuzendariek (BHIen kasuan, institutuko zuzendariek, eskola kontseiluaren iritzia entzun ondoren) beren egutegi eta eskolaldi proposamenak bidaliko dituzte Hezkuntzako Ikuskapen Zerbitzura 2024ko ekainaren 14an beranduenez, EDUCA kudeaketa programa erabiliz.

23. Hezkuntzako Ikuskapen Zerbitzuak egutegiak eta ordutegiak onetsi edo ukatuko ditu, aztertu ondoren. EDUCA kudeaketa programak ematen duen informatikako euskarriaren bidez iritsiko zaie ikastetxeei Hezkuntzako Ikuskapen Zerbitzuaren jakinarazpena. 2024ko ekainaren 24rako inolako jakinarazpenik jaso ez duten ikastetxeetako egutegiak eta ordutegiak onetsitzat joko dira.

24. Ikastetxeren batek bere egutegiaren proposamena aipatu epean bidaltzen ez badu, Hezkuntzako Ikuskapen Zerbitzuak ofizioz esleituko dio eranskin honetako 1. atalean (Egutegia) ezarritako baldintzak betetzen dituen egutegi bat.

25. Ikastetxeetako zuzendariek, baldin eta egutegia onetsi eta gero hitzarmenen bat egiten badute enpresekin Lanbide Heziketa Dualeko proiektuak garatzeko, egutegiaren eta eskolaldiaren beste proposamen bat bidaliko dute Hezkuntzako Ikuskapen Zerbitzura, hitzarmena sinatu baino lehen betiere, hitzarmen horren ondoriozko aldaketen berri emateko. Hezkuntzako Ikuskapen Zerbitzuak, proposatutako aldaketak aztertu ondoren, aldeko txostena emanen du, edo, bestela, onartzeko behar diren oharrak eginen ditu.

26. Egutegia onartu eta gero ikastetxeren batean onartzen bada metodologia aktiboko proiektuak erabiltzea, zuzendariek egutegiaren eta eskolaldiaren beste proposamen bat bidaliko dute Hezkuntzako Ikuskapen Zerbitzura, non jasoko baitira garatu asmo den proiektu metodologikoaren ondoriozko aldaketak. Hezkuntzako Ikuskapen Zerbitzuak, proposatutako aldaketak aztertu ondoren, aldeko txostena emanen du, edo, bestela, onartzeko behar diren oharrak eginen ditu.

Iragarkiaren kodea: F2408599