Iragarkia

107. ALDIZKARIA - 2024ko maiatzaren 24a

1. NAFARROAKO FORU KOMUNITATEA

1.7. BESTELAKOAK

52/2024 EBAZPENA, apirilaren 22koa, Energia, Enpresa I+G+b eta Ekintzailetzako zuzendari nagusiak emana, zeinaren bidez eraikitzeko administrazio-baimena ematen baita eta onura publikoa zehazki deklaratzen baita (2. fasea) energia elektrikoa ekoizteko 45 MW-eko (52,42 MWp) "La Nava eguzki-instalazio fotovoltaikoa" izeneko instalaziorako, Tuterako eta Castejongo udal-mugarteetan.

1. Onura publikoa zehazki deklaratzeko eskaera (2. fasea).

2023ko maiatzaren 22an, eta Argindarra garraiatu, banatu, merkaturatu eta hornitzeko jarduerak eta instalazioak baimentzeko prozedurak arautzen dituen abenduaren 1eko 1955/2000 Errege Dekretuaren 143. artikulua aplikatuz, Solen Energía La Nava SLk eskatu zuen onura publikoa zehazki deklaratzea (2. fasea) Tuterako udal-mugarteko 39. poligonoko 137. lurzatirako, energia elektrikoa ekoizteko "La Nava eguzki-instalazio fotovoltaikoa" izeneko instalazioak ukitzen baitu.

2. Aurrekariak.

Industriaren, Energiaren eta S4 Proiektu Estrategikoen zuzendari nagusiaren apirilaren 17ko 48/2023 Ebazpenaren bidez (2023ko 93. Nafarroako Aldizkari Ofiziala, maiatzaren 4koa), Solen Desarrollos SLri aurretiazko administrazio-baimena eman zitzaion energia elektrikoa ekoizteko 40,95 MW-eko (47,502 MWp) "La Nava eguzki-instalazio fotovoltaikoa" izeneko instalaziorako (A, B eta E izeneko azpisistemak) eta haren ebakuazio-azpiegituretarako, Tuterako eta Castejongo udal-mugarteetan.

Industriaren, Energiaren eta S4 Proiektu Estrategikoen zuzendari nagusiaren irailaren 20ko 126/2023 Ebazpenaren bidez (2023ko 210. Nafarroako Aldizkari Ofiziala, urriaren 9koa):

–Eraikitzeko administrazio-baimena eman zitzaion Solen Desarrollos SLri energia elektrikoa ekoizteko 45 MW-eko (52,42 MWp) "La Nava eguzki-instalazio fotovoltaikoa" izeneko instalaziorako eta haren ebakuazio-azpiegituretarako, Tuterako eta Castejongo udal-mugarteetan.

–Onetsi egin ziren instalazio fotovoltaikoaren proiektua eta La Nava TAEa-La Cantera TAEa ebakuazio linearena, 2023ko maiatzaren 18an aurkeztuak, bai eta La Nava TAEaren proiektu aldatua ere, 2022ko azaroaren 29an aurkeztua.

–Instalazio horretarako onura publikoa zehazki deklaratu zen (1. fasea), eta enpresa eskatzailea desjabetze-espedientearen onuradun bihurtu zen.

3. Onura publikoa zehazki deklaratzeko proposamena (2. fasea) jendaurrean jartzea.

2023ko abenduaren 1eko 1955/2000 Errege Dekretuaren 144. artikuluarekin bat etorriz, 2023ko abenduaren 19an eta 21ean, hurrenez hurren, iragarki bana argitaratu zen 261. Nafarroako Aldizkari Ofizialean eta Diario de Navarra egunkarian, Tuterako udal-mugarteko 39. poligonoko 13. lurzatiaren onura publikoa zehazki deklaratzeko eskaera (2. fasea) jendaurrean jartzekoa.

Era berean, 2023ko abenduaren 18an Tuterako eta Castejongo udaletara igorri zen.

Ez zen alegaziorik jaso.

4. Onura publikoa zehazki deklaratzeko proposamena (2. fasea).

Aurkeztutako dokumentazioa ikusita, eta abenduaren 1eko 1955/2000 Errege Dekretuan xedatutakoari jarraikiz, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatzen du prozedura behar bezala gauzatu dela, eta proposatzen du onura publikoa zehazki deklaratzea, eskatu bezala, soilik eranskineko zerrendan ageri diren ukitutako ondasun eta eskubideetara mugatuta.

Adierazitakoarekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. Instalazio horren onura publikoa zehazki deklaratzea (2. fasea), Sektore Elektrikoari buruzko abenduaren 26ko 24/2013 Legearen 54., 55. eta 56. artikuluetan, eta abenduaren 1eko 1955/2000 Errege Dekretuaren 148. eta 149. artikuluetan ezarritakoarekin bat; hori horrela, Solen Desarrollos SL enpresa onuraduna izanen da desjabetze-espedientean. Eranskinean jaso da ukitutako ondasun eta eskubideen behin betiko zerrenda (2. fasea).

2. Baimen hau emanda ere, instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, bat etorrita aplikatzekoak diren beste xedapen batzuekin.

3. Ebazpen hau Industria Antolamenduaren, Azpiegitura Energetikoen eta Meatzeen Zerbitzura igortzea, behar diren ondorioak izan ditzan.

4. Ebazpen hau Nafarroako Aldizkari Ofizialean argitaratzea, orok jakin dezan.

5. Ebazpen hau jakinaraztea Solen Desarrollos SLri, Solen Energía La Nava SLri eta ukitutako ondasun eta eskubideen titularrei, eta ohartaraztea ebazpen honek ez duela administrazio bidea amaitzen eta haren kontra gora jotzeko errekurtsoa aurkezten ahal dela Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, ebazpena jakinarazi eta hurrengo egunetik aurrera, espediente-zenbakia adierazita (idazpuruan ageri da, erreferentzia honetan: Espedientearen kodea).

6. Ebazpen hau Tuterako eta Castejongo udalei jakinaraztea, eta aditzera ematea honen kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, ezertan galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2024ko apirilaren 22an.–Energia, Enpresa I+G+b eta Ekintzailetzako zuzendari nagusia, Uxue Itoiz Mariñelarena.

ERANSKINA.–UKITUTAKO ONDASUN ETA ESKUBIDEEN ZERRENDA (2. FASEA)

Iragarkiaren kodea: F2406525