Iragarkia

103. ALDIZKARIA - 2024ko maiatzaren 20a

1. NAFARROAKO FORU KOMUNITATEA

1.7. BESTELAKOAK

69/2024 EBAZPENA, apirilaren 29koa, Industria Antolamenduaren, Azpiegitura Energetikoen eta Meatzeen Zerbitzuko zuzendariak emana, zeinaren bidez Lekunberriko udal-mugartean baterien bidez biltegiratzeko instalazioa (1.150 MVA-ko potentzia) eraikitzeko administrazio baimena ematen baita.

Industria Antolamenduaren, Azpiegitura Energetikoen eta Meatzeen Zerbitzuko zuzendariak 2023ko azaroaren 3an emandako 195/2023 Ebazpenaren bidez, aurretiazko administrazio baimena eman zitzaion IGNIS SMART SOLUTIONS SLUri Acadiems proiektua izeneko baterien bidez biltegiratzeko instalazioaren (1.000 kW) proiekturako, Lekunberrin.

2023ko azaroaren 22an, IGNIS SMART SOLUTIONS SLUk eraikitzeko administrazio baimena eskatu du biltegiratzeko instalazio honetarako:

–Izena: Acadiems proiektua izeneko baterien bidezko biltegiratzeko instalazioa (1,15 MVA).

–Instalazioaren titularra: IGNIS SMART SOLUTIONS SLU.

–Instalazioaren kokalekua: 3. faseko industria poligonoko hiri lurzatian, Lekunberriko udal-mugartean. Instalazioaren zentro geometrikoaren koordenadak, H30 N eremuko UTM ETRS89 formatuan (EPSG:25830), X: 588722,5198 eta Y: 4761728,5591.

–Instalazioaren ezaugarri teknikoak: Baterien bidez biltegiratzeko sistema 20"-ko edukiontzi batean ezarritako bateria multzo bat da; bateria horiek inbertsore batera konektatuta daude, eta azken hori, era berean, transformadore jasotzaile batera konektatuta, I-DE Redes Eléctricas Inteligentes SLUren jabetzako Lekunberriko 66/13 kV-eko TAEarekin konektatzeko. TAEan eginen da, bestalde, sistema elektrikorako konexioa. Proiektuak barne hartzen du instalaziotik azpiestazioraino energia ateratzeko linea. Besteak beste, azpiegitura elektriko hauek hartzen ditu barnean:

• 20"-ko bateria edukiontzia (6.058x2.438x2.897 mm³); nagusiki 16 moduluko 12 rack-eko bateria multzoa edukiko du (serieko rack-a), 1.786 kWh-ko gaitasun izendatua eta 870-1.210 V-eko tentsio-tartea.
• Transformazio zentroa, 1,2 MVA-ko potentziako transformadorearekin, zeinak tentsioa handituko baitu sarera konektatzeko, 13,2 kV-eko primarioko tentsioarekin eta 0,52 kV-eko sekundarioko tentsioarekin. Gainera, tentsio ertaineko babes gelaxka eta zerbitzu osagarrien transformadorea ditu.
• Behe tentsioko kableak elektrizitate-kuxetatik inbertsoreetaraino, eta inbertsoreetatik transformadoreraino.
• Energia ateratzeko linea, 13,2 kV-ekoa, lehendik dagoen hodiaren azpiko kanalizazioaren bidez, Lekunberri 66/13,2 kV-eko azpiestazioraino. Aluminiozko eroalea, 12/20 (24) kV-eko tentsioa, HEPR isolamendua eta 150 mm²-ko sekzioa.
• Lur konexioko sistema eta tximisten kontrako babes sistema.

–Gauzatze materialaren aurrekontua: 895.344,00 euro.

Proiektuak potentzia aldatu du aurretiazko administrazio baimena eskuratu ondotik, baina abenduaren 1eko 1955/2000 Errege Dekretuaren 115.2 artikuluari jarraikiz, eraikitzeko administrazio baimena eskuratzen ahal du aurretiazko administrazio baimen berririk behar izan gabe, artikulu horrek ezarritako baldintza guztiak betetzen baitira; besteak beste, ezarritako potentzia berriak ehuneko hamabost baino gehiago ez gainditzea jatorrizko proiektuan zehaztutako potentzia.

Nolanahi ere, 1 MW-eko potentzia gainditzen duenez, eta 4/2021 Foru Lege Dekretuaren 12. artikulua aplikatuz (4/2021 Foru Lege Dekretua, apirilaren 14koa, zeinaren bidez premiazko neurriak onesten baitira Suspertzerako Europako Bitartekoetatik heltzen diren funtsen bidez finantzatzen ahal diren jarduketak kudeatzeko eta betetzeko), eraikitzeko administrazio baimenaren eskaera jendaurrean jarri da, iragarkia jarriz 2024ko urtarrilaren 9ko Nafarroako Aldizkari Ofizialaren 6 zenbakian eta Nafarroako Gobernuaren Gobernu Irekiaren webgunean. 30 egun balioduneko epean ez zen inolako alegaziorik jaso.

Abenduaren 1eko 1955/2000 Errege Dekretuaren 127. artikulua betez, kontsulta egin zitzaien ukitutako erakunde hauei, eskatutako baimenaren alde edo aurka ager zitezen hogeita hamar eguneko epean, eta, taulan adierazitako datetan, honako txosten hauek jaso ziren:

Lekunberriko Udalak, txostenean, ondorioztatzen du proiektua bateragarria dela erabilera anitzeko ekipamendu publikorako erabilerarekin eta Udal Planean ezarritakoarekin.

Nedgia Navarra SA, txostenean, proiektuaren alde agertu da.

Espedientean sarbide eta konexiorako baimena eguneratuta dago azken sorkuntza potentziara. I-DE Redes Eléctricas Inteligentes SAUk emandako dokumentua, 2024ko apirilaren 17koa eta 9041939884 erreferentziakoa, instalazio horretarako sarbide- eta konexio-baimenak ematekoa. Instalazioak HPKU zenbaki hau du: ES0021000042701486MM.

Ikusirik aurkeztutako dokumentazioa, eta kontuan hartuta Energia elektrikoa garraiatu, banatu, merkaturatu eta horniketa egiteko jarduerak eta instalazioak baimentzeko prozedurak arautzen dituen abenduaren 1eko 1955/2000 Errege Dekretuan xedatua, bidezkoa da eskatutakoari heltzea.

Adierazitakoarekin bat, Energia, Enpresa I+G+b eta Ekintzailetzako zuzendari nagusiak otsailaren 1ean emandako 10/2024 Ebazpenaren bidez (2024ko 35. Nafarroako Aldizkari Ofiziala, otsailaren 16koa) eskuordetuak ditudan eskumenak erabiliz,

EBAZTEN DUT:

1. IGNIS SMART SOLUTIONS SLUri eraikitzeko administrazio baimena ematea aipatutako instalaziorako.

2. Onestea instalazio horiek egiteko aurkeztutako proiektua, Ander Lozano Perez industria ingeniariak sinatua. Hogeita lau hilabete eman zaizkio obrak burutzeko.

3. Instalazioak aurkeztutako proiektuari jarraikiz gauzatu beharko dira, eta bat etorri beharko dute honako hauetan xedatutakoarekin: Goi tentsioko instalazio elektrikoen baldintza teknikoei eta segurtasun bermeei buruzko erregelamendua onesten duen maiatzaren 9ko 337/2014 Errege Dekretua; Goi tentsioko linea elektrikoen baldintza teknikoei eta segurtasun bermeei buruzko erregelamendua onesten duen otsailaren 15eko 223/2008 Errege Dekretua; eta Behe tentsiorako Erregelamendu elektroteknikoa onesten duen abuztuaren 2ko 842/2002 Errege Dekretua.

4. Behin proiektua gauzaturik, eskatzaileak zerbitzuan jartzearen akta eskatu beharko du. Eskaera horri erantsiko zaizkio aipatutako araudian ezarritako agiriak eta obra bukaeraren ziurtagiria, teknikari eskudun batek sinatua.

5. Eraikitzeko administrazio baimen hau emanda ere, instalazioa gauzatzeko beharrezkoak diren emakida, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, aplikatzekoak diren beste xedapen batzuekin bat.

6. Ebazpen hau Industria Antolamenduaren, Azpiegitura Energetikoen eta Meatzeen Zerbitzura igortzea, behar diren ondorioak izan ditzan.

7. Ebazpen hau Nafarroako Aldizkari Ofizialean argitaratzea, orok jakin dezan.

8. Ebazpen hau IGNIS SMART SOLUTIONS SLUri eta Nedgia Navarra SAri jakinaraztea, eta ohartaraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, jakinarazi eta biharamunetik hilabeteko epean. Hartan espediente zenbakia adierazi beharko da.

9. Ebazpen hau Lekunberriko Udalari jakinaraztea, eta aditzera ematea honen kontra administrazioarekiko auzi errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, ezertan galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2024ko apirilaren 29an.–Industria Antolamenduaren, Azpiegitura Energetikoen eta Meatzeen Zerbitzuko zuzendaria, Laura Larraya Irigoyen.

Iragarkiaren kodea: F2407101