Iragarkia

102. ALDIZKARIA - 2024ko maiatzaren 17a

1. NAFARROAKO FORU KOMUNITATEA

1.7. BESTELAKOAK

89/2024 EBAZPENA, apirilaren 25ekoa, Nafar Lansare-Nafarroako Enplegu Zerbitzuko zuzendari kudeatzaileak emana, onesten duena Nafarroako Merkataritza, Industria eta Zerbitzu Ganbera Ofizialari eginiko kudeaketa-esleipena formalizatzeko hitzarmenaren testua, Enplegurako Orientazio, Ekintzailetza eta Berrikuntzarako Zentroaren Lan eta Jarduera Planaren barneko "Enpresetara hurbiltzea" proiektua egikaritzeko Suspertze, Eraldatze eta Erresilientzia Planaren esparruan.

Estatuko Enplegu Zerbitzu Publikoaren Zuzendaritza Nagusiaren 2022ko maiatzaren 12ko Ebazpenaren bidez, Nafarroako Foru Komunitateko Orientazio eta Ekintzailetza Zentroa kalifikatzen da (Estatuko Aldizkari Ofiziala, 181. zk., 2022ko uztailaren 29koa).

Enplegu Sistema Nazionaleko enplegua aktibatzeko programa komunak arautzen dituen irailaren 28ko 818/2021 Errege Dekretuaren 88. artikuluak autonomia-erkidegoetako Orientazio eta Ekintzailetza Zentroei esleitzen die, besteak beste, lan-prospekzioaren eta -bitartekaritzaren arloko ekintza berritzaileak diseinatzeko eta proiektu esperimentalak garatzeko eginkizuna. Horretarako, adierazten du autonomia-erkidegoetako enplegu-zerbitzu publikoek urteko lan-programa bat egin behar dutela.

2024ko urtarrilaren 23an, Estatuko Enplegu Zerbitzu Publikoaren Zuzendaritza Nagusiak aldeko txostena egin dio Nafarroako Orientazio eta Ekintzailetza Zentroak 2024ko ekitaldirako aurkeztutako programari.

Nafar Lansare-Nafarroako Enplegu Zerbitzuak ez ditu eginkizun hori garatzeko behar diren bitartekoak, eta, beraz, Lan Aktibaziorako eta Lurralde Koordinaziorako Zerbitzuak proposatu du Nafarroako Merkataritza, Industria eta Zerbitzu Ganbera Ofizialaren esku uztea eginkizun hori.

Nafarroako Merkataritza, Industria eta Zerbitzu Ganbera Ofiziala zuzenbide publikoko korporazio bat da, nortasun juridikoa eta bere helburuak betetzeko jardute-gaitasun osoa dituena; administrazio publikoen aholkularitza eta lankidetzarako organo gisa taxutu da, dituen interes pribatuak alde batera utzi gabe.

Nafarroako Merkataritza, Industria eta Zerbitzu Ganbera Ofizialari buruzko apirilaren 10eko 17/2015 Foru Legearen 7. artikuluak jasotzen duenez, administrazio publikoari ahalmena ematen zaio Ganberari bere eskumeneko jarduera material edo tekniko batzuk edo zerbitzu batzuk esleitzeko, izan eraginkortasun-arrazoiengatik, izan ez duelako jarduera horiek egiteko baliabide tekniko egokirik, betiere aurretik Parlamentuari jakinarazita.

7. artikulu horretako 3. apartatuan jasotzen denez, kudeaketa-esleipen hori Nafarroako Foru Komunitateko Administrazioaren eta Ganberaren arteko hitzarmen baten bidez gauzatuko da, zeina Nafarroako Aldizkari Ofizialean argitaratuko baita. Honako hauek agertuko dira hitzarmen horretan: esleipenaren xedeko jarduerak, esleipenaren indarraldia, esleituriko kudeaketaren izaera eta hedadura eta, bidezko bada, bi alderdiek jartzen dituzten bitarteko ekonomikoak.

Ikusi da Lan Aktibaziorako eta Lurralde Koordinaziorako Zerbitzuaren zuzendariak emaniko txostena, zeinak justifikatzen baitu beharrezkoa dela esleipena egitea. Era berean, ikusi dira Kontu-hartzailetza Delegatuaren adostasuna eta horretarako eginiko administrazio-espedientea ere.

Horrenbestez, eta Nafar Lansare-Nafarroako Enplegu Zerbitzuaren estatutuak onesten dituen otsailaren 7ko 13/2024 Foru Dekretuaren 14. artikuluak ematen dizkidan eskudantziak erabiliz,

EBAZTEN DUT:

1. Onestea Nafarroako Merkataritza, Industria eta Zerbitzu Ganbera Ofizialari eginiko kudeaketa-esleipena formalizatzeko hitzarmenaren testua, Enplegurako Orientazio, Ekintzailetza eta Berrikuntzarako Zentroaren Lan eta Jarduera Planaren barneko "Enpresetara hurbiltzea" proiektua egikaritzeko Suspertze, Eraldatze eta Erresilientzia Planaren esparruan, ebazpen honen eranskinean jasotako moduan.

2. 31.218,00 euroko gastua baimentzea eta xedatzea Nafarroako Merkataritza, Industria eta Zerbitzu Ganbera Ofizialaren alde (IFZ: Q3173001C), 2024ko gastuen aurrekontuko 950003-96400-2276-241305 "Orientazio- eta ekintzailetza-jardueretan laguntzeko Suspertze eta Erresilientzia Mekanismoak" partidaren barruan (PEP E-21/000442-01 MRR. OEZ jarduerak), aipatutako kudeaketa-esleipena gauzatzeko.

3. Ebazpen hau eta eranskina helaraztea Nafar Lansare-Nafarroako Enplegu Zerbitzuko Ekonomia eta Ogasuneko kontu-hartzaileari, Lan Aktibaziorako eta Lurralde Koordinaziorako Zerbitzuari eta Lehendakaritza eta Berdintasun Departamentuko Foru Erakundeekiko Prozeduren Kudeaketarako Atalari, Nafarroako Parlamentura bidal ditzan, Nafarroako Merkataritza, Industria eta Zerbitzuen Ganbera Ofizialari buruzko apirilaren 10eko 17/2015 Foru Legearen 7. artikuluarekin bat etorriz.

4. Ebazpen hau eta eranskina Nafarroako Merkataritza, Industria eta Zerbitzu Ganbera Ofizialari jakinaraztea, behar diren ondorioak izan ditzaten.

5. Nafarroako Aldizkari Ofizialean argitaratzea ebazpen hau eta kudeaketa-esleipena, bi alderdiek sinatu ondotik.

6. Foru-agindu honek ez du amaitzen administrazio-bidea, eta beronen aurka gora jotzeko errekurtsoa aurkezten ahal da, Eskubide Sozialetako, Ekonomia Sozialeko eta Enpleguko kontseilariari zuzendurik, argitaratu eta biharamunetik hilabeteko epean, bat etorriz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 126. artikuluan eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 122. artikuluan xedatutakoarekin.

Iruñean, 2024ko apirilaren 25ean.–Nafar Lansare-Nafarroako Enplegu Zerbitzuko zuzendari kudeatzailea, Miriam Martón Pérez.

2024. NAFARROAKO MERKATARITZA, INDUSTRIA ETA ZERBITZU GANBERA OFIZIALARI EGINIKO KUDEAKETA-ESLEIPENAREN HITZARMENA, "ENPRESETARA HURBILTZEA" PROIEKTUA GAUZATZEKO, ZEINA JASOTA BAITAGO ENPLEGURAKO ORIENTAZIO, EKINTZAILETZA, LAGUNTZA ETA BERRIKUNTZA ZENTROAREN LAN-PLANEAN, SUSPERTZE, ERALDATZE ETA ERRESILIENTZIA PLANAREN ESPARRUAN GARATUTA (C23.I5)

BILDU DIRA:

Alde batetik, Mirian Martón Pérez andrea, Nafar Lansare-Nafarroako Enplegu Zerbitzuko zuzendari kudeatzailea, abuztuaren 30eko 130/2023 Foru Dekretuaren bidez izendatua (Nafarroako Aldizkari Ofiziala, 184. zk., 2023ko irailaren 1ekoa), Nafar Lansare-Nafarroako Enplegu Zerbitzuaren izenean eta hura ordezkatuz, kontuan izanik eskumena duela hitzarmen hau sinatzeko, Nafarroako Foru Komunitateko Administrazioaren eta Foru Sektore Instituzionalaren martxoaren 11ko 11/2019 Foru Legean eta Sektore Publikoaren Araubide Juridikoari buruzko urriaren 1eko 40/2015 Legean ezarritakoaren arabera.

Eta, bestetik, Nafarroako Merkataritza, Industria eta Zerbitzu Ganbera Ofiziala (IFZa: Q3173001C; helbidea: Chinchilla kalea 4, 31002, Iruña), Javier Taberna Jiménez jaunak ordezkatuta, korporazio horretako Osoko Bilkurak 2022ko apirilaren 25eko saioan korporazioko presidente izendatu ondotik, eta Nafarroako Merkataritza, Industria eta Zerbitzuen Ganbera Ofizialari buruzko apirilaren 10eko 17/2015 Foru Legearen 19. artikuluan xedatutakoaren arabera esleituta dauzkan eginkizunak betez.

Alderdiek, esleituta dauzkaten ordezkariekin, jarduteko eta, bereziki, esleipen-hitzarmen hau sinatzeko gaitasun osoa aitortzen diote elkarri, eta

ADIERAZTEN DUTE:

Nafar Lansare-Nafarroako Enplegu Zerbitzua (aurrerantzean, NL-NEZ) Nafarroako Gobernuaren Eskubide Sozialetako, Ekonomia Sozialeko eta Enpleguko Departamentuari atxikitako erakunde autonomo bat da, berezko nortasun juridikoa eta bere helburuak betetzeko kudeaketa-autonomia dituena, departamentuaren oinarrizko egitura ezartzen duen abuztuaren 30eko 71/2023 Foru Dekretuan eta erakunde horren estatutuak onesten dituen otsailaren 7ko 13/2024 Foru Dekretuan aurreikusitakoaren arabera.

Alde batetik, 2021eko otsailaren 12an, Suspertze eta Erresilientzia Mekanismoa (SEM) onetsi zen, Europar Batasunak, COVID-19aren pandemiaren ondotik, Europa suspertzeko gaitu dituen Next Generation funtsen zenbatekorik handiena duen blokea. Suspertze eta Erresilientzia Mekanismoaren finantzaketa Europako ekonomian aldaketa eraginen duten inbertsio eta aldaketa jakin batzuk egitera dago bideraturik. Suspertze eta Erresilientzia Mekanismoaren helburua da, besteak beste, Batasunaren kohesio ekonomikoa, soziala eta lurraldekoa sustatzea, erresilientzia, krisiei aurre egiteko prestasuna, egokitzeko gaitasuna eta Europako estatuen hazkunde potentziala hobetze aldera, horrela arintzeko krisiak gizartean eta ekonomian izan duen eragina, emakumeenganakoa bereziki, eta ekarpena egiteko Europako oinarri diren eskubide sozialak aplikatu daitezen.

Suspertze eta Erresilientzia Mekanismoaren finantzaketa Suspertze, Eraldatze eta Erresilientzia Plana (SEEP) oinarri hartuta gauzatzen da. Plan hori Europako Batzordeari aurkeztu zion Espainiako Gobernuak, eta 2021eko uztailean onetsi zen; elkarren artean lotuta dauden inbertsio eta egiturazko aldaketen agenda garrantzitsua ezartzen du plan horrek, lau helburu transbertsal erdietsi nahi baititu: Espainia berdeagoa izan dadin lortzea, digitalago bihurtzea, kohesionatuagoa izatea gizartearen eta lurraldearen ikuspegitik, eta berdinzaleago bilakatzea.

Europako Suspertze, Eraldatze eta Erresilientzia Planak erreforma- eta inbertsio-sorta bat jasotzen du, Espainiako produkzio-sarea modernizatzera bideratua, eta, aldi berean, haren desoreka estruktural batzuk zuzentzea xede harturik, kalitatezko enplegua sortzeko, produktibitatea areagotzeko eta gizarte-, lurralde- eta genero-arrakalak murrizteko. Suspertze Planak inbertsio eta erreforma estrukturalez osaturiko agenda garrantzitsu bat jasotzen du –elkarri lotuak eta bata bestearekin elikatzen direnak guztiak ere–, eta eragile zein osagai guztiak egituratzen dituzten lau helburu transbertsal lortu nahi ditu: Espainia berdeagoa izatea, digitalago bihurtzea, kohesionatuagoa izatea gizartearen eta lurraldearen ikuspegitik, eta berdinzaleago bilakatzea.

Lan-merkatu dinamiko, erresiliente eta inklusibo baterako politika publiko berrien C23.I5 proiektuaren bidez, Enplegurako Orientazio, Ekintzailetza, Laguntza eta Berrikuntza Zentroen Sare bat eratu eta abian jarri nahi da, eta, helburu hori lortzeko, 90 milioi euroko aurrekontua bideratu da 2021etik 2023ra bitarteko aldirako. Horietatik, 30 milioi banatzen dira urtean: 12 milioi inbertsioetarako, eta beste 18 milioi lan-planak egiteko.

Enplegu eta Lan Gaietarako LXXIX. Konferentzia Sektorialean, eta Enplegu Sistema Nazionalaren Kontseilu Nagusiak 2021eko apirilaren 28an Madrilen eginiko ezohiko bileran, Enplegurako Orientazio, Ekintzailetza, Laguntza eta Berrikuntza Zentroak (aurrerantzean, Orientazio eta Ekintzailetza Zentroak) sortzeko protokoloa onetsi zuten. Hala erantzuten zaio autonomia-erkidego guztietan orientazioaren eta ekintzailetzaren arloko erakundeen eta proiektuen artean ahaleginak partekatzeko beharrari, helburu gisa harturik laneratzea eta kalitatezko enplegua sustatzen duten proiektu berritzaileak bultzatzea. Zentro horien sarea Enplegu Sistema Nazionalaren espazio partekatu bat da, enplegurako orientazioaren eta ekintzailetzaren arloan berrikuntza eta esperimentazioa bultzatzea xede duena.

Estatuko Enplegu Zerbitzu Publikoaren Zuzendaritza Nagusiaren 2022ko maiatzaren 12ko Ebazpenaren bidez, Nafarroako Foru Komunitateko Orientazio eta Ekintzailetza Zentroa kalifikatzen da (Estatuko Aldizkari Ofiziala, 181. zk., 2022ko uztailaren 29koa).

Bestalde, Enplegu Sistema Nazionalaren enplegua aktibatzeko programa komunak arautzen dituen irailaren 28ko 818/2021 Errege Dekretuak Orientazio eta Ekintzailetza Zentroak garatutako funtzioak ezartzen ditu. Besteak beste, ekintza berritzaileak diseinatzea eta proiektu esperimentalak garatzea lan-orientazioaren, -prospekzioaren eta -bitartekaritzaren arloan.

Funtzio horiek betetzeko, Errege Dekretu horren 88. artikuluan aurreikusten den bezala, autonomia-erkidego bakoitzeko enplegu-zerbitzu publiko eskudunak urteko lan-programa bat egin behar du, eta, horretaz gainera, Estatuko Enplegu Zerbitzu Publikoaren Zuzendaritza Nagusiaren aldeko txostena jaso behar du, zentroa kalifikatzeko oinarrizko baldintzak betetzen diren egiaztatzeko, eta, hala, programa hori behar bezala gauzatzen dela bermatzeko.

Nafarroaren kasuan, 2023ko abenduaren 28an aurkeztu zen programa hori, eta Estatuko Enplegu Zerbitzu Publikoaren Zuzendaritza Nagusiak 2024ko urtarrilaren 23an eman zion aldeko txostena Nafarroako Foru Komunitateko Enplegurako Orientazio, Ekintzailetza eta Berrikuntza Zentroaren 2024ko lan- eta jarduera-planaren proposamenari –proposamen horretan, besteak beste, xehaturik daude egin beharreko ekintzak eta proiektuak, baita ekintza bakoitzaren aurrekontu ekonomikoa ere–, iritzi baitzion jasotzen dituela Orientazio eta Ekintzailetza Zentroa kalifikatzeko ebazpen-proposamenerako kontuan hartutako oinarrizko baldintzak, eta, beraz, bermaturik dagoela Enplegurako Orientazio, Ekintzailetza eta Berrikuntza Programa behar bezala gauzatzea.

Hitzarmen honen bidez, Nafarroako Merkataritza, Industria eta Zerbitzu Ganbera Ofizialaren esku utzi nahi da lan-prospekzio eta -bitartekaritzako ekintza berritzaileak eta proiektu esperimentalak garatzeko laguntza.

Nafarroako Merkataritza, Industria eta Zerbitzu Ganbera Ofiziala zuzenbide publikoko korporazio bat da, nortasun juridikoa eta bere helburuak betetzeko jardute-gaitasun osoa dituena; administrazio publikoen aholkularitza eta lankidetzarako organo gisa taxutu da, dituen interes pribatuak alde batera utzi gabe. Lege hori Nafarroako Merkataritza, Industria eta Zerbitzu Ganbera Ofizialari buruzko apirilaren 10eko 17/2015 Foru Legeak arautzen du, hark ezartzen baititu Ganbera Ofizialaren funtzio publiko-administratiboak. Hain zuzen, eginkizun horiek ahalbidetzen dute Nafarroako Foru Komunitateko Administrazioak Merkataritza Ganberari agindu ahal izatea bere eskumeneko jarduera materialak, teknikoak edo zerbitzuei loturikoak egitea, dela eraginkortasun arrazoiengatik, dela ez izateagatik jarduera horiek egiteko baliabide tekniko egokirik.

Apirilaren 10eko 17/2015 Foru Legearen 7. artikuluaren bidez, Administrazioari ahalmena ematen zaio Ganberari bere eskumeneko jarduera material edo tekniko batzuk edo zerbitzu batzuk esleitzeko, eraginkortasun arrazoiengatik edo jarduera horiek egiteko baliabide tekniko egokirik ez izateagatik, betiere aurretik Parlamentuari jakinarazita. Kudeaketa-esleipen hori Nafarroako Foru Komunitateko Administrazioaren eta Ganberaren arteko hitzarmen baten bidez gauzatuko da, zeina Nafarroako Aldizkari Ofizialean argitaratuko baita. Honako hauek agertuko dira hitzarmen horretan: esleipenaren xedeko jarduerak, esleipenaren indarraldia, esleituriko kudeaketaren izaera eta hedadura eta, bidezko bada, bi alderdiek jartzen dituzten bitarteko ekonomikoak.

Bestalde, Enpleguari buruzko otsailaren 28ko 3/2023 Legearen 32. artikuluak aurreikusten duenez, enplegu-zerbitzu publikoek zuzenean kudeatzen ahalko dituzte enplegu-politika planifikatzeko eta koordinatzeko tresnetan sartutako zerbitzuak eta programak, edo, bestela, lankidetza publiko-pribatura jotzen ahalko da, zenbait eratako figurak baliatuz, hala nola programa-kontratuak sinatzea, dirulaguntza publikoak ematea edo administrazio-kontratazioa –bereziki esparru-akordioak edota hitzarmenak sinatuz edo zuzenbidearekin bat datorren beste edozein forma juridiko erabiliz–.

Horrenbestez, aipatutako araudiak eta erakunde sinatzaile bakoitzari esleitutako eskumenek aukera ematen dute kudeaketa-esleipen hau formalizatzeko. Eta berau eraentzeko, kontuan hartuko dira honako

KLAUSULAK

Lehenbizikoa.–Xedea eta aplikazio-eremua.

Hitzarmen honen xedea da Nafarroako Merkataritza, Industria eta Zerbitzu Ganbera Ofizialari kudeaketa-esleipena ematea, lan-prospekzioko eta -bitartekaritzako ekintza berritzaileak eta proiektu esperimentalak garatzeko, eta, horretarako, NL-NEZen "Enpresetara hurbiltzea" proiektuan jasotako jarduerak kudeatzea eta gauzatzea.

Hitzarmen hau Nafarroako Foru Komunitate osoan aplikatuko da.

Bigarrena.–Garatu beharreko jarduketak.

Hauek dira Ganberak hitzarmen honen esparruan gauzatu beharreko jarduerak:

1.–Komunikazio- eta zabalkunde-jarduerak.

2.–Networking-jarduerak.

3.–Enpresa-errolda eguneratzea.

1.–Komunikazio- eta zabalkunde-jarduerak. Ganberak lau (4) komunikazio eginen ditu e-mailing bidez Ganberako enpresen datu-basera, NL-NEZek lan-eskaintzetan, prestakuntzan, kontrataziorako laguntzetan eta abarretan eskaintzen dituen zerbitzuei buruzko informazioa helarazteko.

2.–Networking-jarduerak.

Jarduera honetan bi eratako ekintzak proposatzen dira:

2.1. Lan-gosariak enpresetako giza baliabideen arduradunarekin eta NL-NEZeko teknikariekin, enpresen beharrak eta NL-NEZen eskaintzak hurbildu ahal izateko. Bi ekintza planteatzen dira: bata, Iruñean, eta bestea, berriz, Tuteran. Parte hartzen duten enpresak nekazaritzako elikagaien eta siderometalurgiaren sektorekoak izanen dira lehentasunez.

2.2. Dibulgazio-jardunaldiak, NL-NEZek bere zerbitzu eta jarduerei buruzko informazio nagusiak eskaintzeko Nafarroako enpresa-ehuneko sozietateei. Lau jardunaldi eginen dira, Iruñean, Tuteran eta Lizarran banatuta.

3.–Enpresa-errolda eguneratzea.

2.000 enpresaren datuak eguneratuko dira, NL-NEZek emandako irizpideen arabera.

Hirugarrena.–NL-NEZen betebeharrak.

NL-NEZek konpromiso hauek hartzen ditu:

a) Hitzartutako jarduerak egiteko behar den informazioa bidaltzea Ganberari.

b) Hitzartutako jarduerak gauzatzeko jarraibide teknikoak ezartzea.

c) Hitzarmena gauzatzeagatik adostutako prezioa ordaintzea.

Laugarrena.–Ganberaren betebeharrak.

Ganberak konpromiso hauek hartzen ditu:

a) Hitzarmen hau gauzatzeko emandako jarraibide tekniko espezifikoak ez ezik, informazioa emateko eta datuak jakinarazteko NL-NEZen eskakizunak betetzea.

b) Datu pertsonalen babesari buruz indarra duen araudian jasotako eskakizunak betetzea, bereziki, apirilaren 27ko 2016/679 Erregelamendua (EB), Datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa; Datu Pertsonalak Babesteko Espainiako araudia, eta gainerako xedapen osagarriak.

c) Hitzarmen hau garatzeko beharrezko baliabide teknikoak, giza baliabideak eta materialak izatea.

Bosgarrena.–Finantzaketa.

5.1. Zenbatekoak:

Esleipen-hitzarmenaren zenbatekoa 25.800,00 eurokoa izanen da, BEZik gabe (31.218,00 euro, BEZa barne). 2024ko gastuen aurrekontuko 950003 96400 2276 241305 "Orientazio- eta ekintzailetza-jardueretan laguntzeko Suspertze eta Erresilientzia Mekanismoak" partidaren barruan finantzatuko da gastu hori (PEP E-21/000442-01 MRR. OEZ jarduerak).

5.2. Ordainketak:

Ordainketa azken likidazio bakarrean eginen da, erakundeak egindako jardueren amaierako memoria aurkeztu ondotik, betiere 2024ko irailaren 30a baino lehen egiten eta eskatzen bada.

Ordainketa horiek adostutako zenbatekoaren arabera eginen dira, NL-NEZen zuzendari kudeatzaileak dagokion ebazpena onetsi ondotik.

Seigarrena.–Jarraipena eta ebaluazioa.

NL-NEZen aldetik, Berrikuntzaren eta Proiektu Esperimentalen Atalari dagokio esleipen-hitzarmen honen betearazpenaren jarraipena eta kontrola egitea.

Ganberak arduradun bat izendatuko du NL-NEZekin koordinatzeko, eta hura arduratuko da hitzarmena garatzean sortzen ahal diren gorabeherak jakinarazteaz, ahalik eta lasterren konpontzeko.

Hitzarmena amaitzen den egunean, eginiko jardueren ebaluazioa aurkeztuko du Ganberak.

Era berean, NL-NEZek beharrezko ekintza guztiak gauzatuko ditu hitzarmenaren barneko jarduketen jarraipena eta ebaluazioa egiteko, bai alderdi kualitatiboan, bai kuantitatiboan.

Zazpigarrena.–Ingurumenari kalte nabarmenik ez egiteko konpromisoa.

Nafarroako Merkataritza, Industria eta Zerbitzu Ganbera Ofizialak bermatu beharko du, proiektuen diseinu- eta exekuzio-fase guztietan eta banakako jarduketa bakoitzerako, osotara betetzen dela "kalte nabarmenik ez eragiteko printzipioa" (Do No Significant Harm, DNSH), bai eta klima arloko etiketatzea eta etiketatze digitala ere, honakoetan aurreikusitakoarekin bat: Suspertze, Eraldatze eta Erresilientzia Plana, Espainiako Suspertze eta Erresilientzia planaren ebaluazioa onesteari buruzko Kontseiluaren Betearazpen Erabakia (Council Implementing Decision-CID), eta Europako Parlamentuaren eta Kontseiluaren 2021eko otsailaren 12ko 2021/241 (EB) Erregelamendua eta hura garatzeko araudia. Horretarako, I. eranskineko erantzukizunpeko adierazpena sinatzen du.

Zortzigarrena.–Publizitatea.

Enpresak ikusgaitasuna eman beharko diote jasotako funtsen jatorriari, eta beraz, kontratuaren xede den dokumentazioan eta hedabideetan jarri beharko dute "Europar Batasunak-Next Generation EU"k finantzatua dela.

Betetzekoak izanen dira, orobat, araudi nazionalak eta aplikatu beharreko Europar Batasuneko araudiak ezartzen dituzten publizitate-betebeharrak.

Bederatzigarrena.–Dokumentazioa artxibatzea eta zaintzea.

Egiaztatze-jarduketak betetzeko, eta Europako Parlamentuaren eta Kontseiluaren 2021eko otsailaren 12ko 2021/241 (EB) Erregelamenduaren 22.2.f) artikuluan eta Europako Parlamentuaren eta Kontseiluaren 2018ko uztailaren 18ko 2018/1046 (EB, Euratom) Erregelamenduaren 132. artikuluan ezarritakoarekin bat etorriz, enpresak, Suspertze eta Erresilientzia Bitartekoaren funtsen azken hartzailea den aldetik, honako hauek gorde beharko ditu: kontratu honi dagozkion frogagiriak, datu estatistikoak eta gainerako dokumentuak, baita erregistroak eta dokumentuak ere, formatu elektronikoan, hiru urteko epean fakturak ordaintzen direnetik aitzina.

Hamargarrena.–Datu pertsonalen tratamendua.

Sinatzaileek konpromisoa hartzen dute ezen, hitzarmena gauzatzean eskuratu ditzaketen datu pertsonalak tratatzean, kontuan hartuko dituztela Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan eta arlo horretan aplikatzekoak diren gainerako arauetan xedatutakoak.

Nolanahi ere, Ganbera izanen da kudeaketa-esleipena gauzatzean eskuratzen ahal dituen datu pertsonalen tratamenduaren arduraduna, eta datu pertsonalak babesteko araudian xedatutakoa aplikatuko zaio, Sektore Publikoaren Araubide Juridikoaren urriaren 1eko 40/2015 Legearen 11.2 artikuluan aurreikusitakoarekin bat etorriz.

Sekretu-betebeharraren arabera, alderdiek lanbide-sekretua gorde beharko dute jarduera garatzean eskuratzen duten informazioari dagokionez, eta, edozein dokumentazio erabiltzean eta zaintzean, konpromisoa hartuko dute ahalik eta arreta eta konfidentzialtasun handiena emateko, informazio hori ez jakinarazteko eta hirugarrenei ez lagatzeko.

Klausula honetan ezarritako konfidentzialtasun-betebeharrak baliozkoak izanen dira hitzarmen hau indarrean dagoen bitartean eta berau amaitu ondotik.

Hamaikagarrena.–Aldaketa.

Alderdi sinatzaileetako edozeinek sustatzen ahalko du hitzarmenaren baldintzaren bat aldatzea, eta aho batez onetsi beharko dira aldaketa horiek. Aldaketak hitzarmenari erantsi eta aldeek sinatu eginen dituzte.

Hamabigarrena.–Azkentzea.

Hitzarmen hau arrazoi hauetako batengatik azkenduko da:

–Xede gisa ezarritako jarduketak betetzeagatik.

–Iraupen-epea igarotzeagatik.

–Sinatzaileek hala adostu dutelako.

–Ez direlako bete bertan ezarritakoak, aldez aurretik aldeetako edozeinek eskatuta.

–Erabaki judizialagatik.

–Aurreko horietatik desberdina den legeetan ezarritako beste edozeinengatik.

Sinatzaileetako batek onartutako betebehar edo konpromisoetako bat ez betetzeagatik suntsiarazten bada, edozein alderdik errekerimendua helarazten ahalko dio beste alderdiari, 30 egun naturaleko epean bete dezan bete gabeko betebeharra edo konpromisoa. Bete gabekoa ez bada betetzen errekerimenduan emandako epealdian, hura egin duen alderdiak beste alderdiari jakinaraziko dio badela arrazoirik hitzarmena suntsiarazteko, eta suntsiarazitzat joko da hitzarmena.

Hitzarmen hau suntsiaraztearen ondorioz hirugarrenei egiten ahal zaizkien kalte-galerak erdi bana egotziko dira, eta ez-betetzeren bat bada, berriz, betetzen ez duen alderdiari egotziko zaizkio.

Hamahirugarrena.–Indarraldia.

Hitzarmen honek sinatzen denetik 2024ko irailaren 30era bitartean izanen du indarra.

Hamalaugarrena.–Izaera juridikoa.

Kudeaketa-esleipena administratiboa da, eta alderdiek hitzarmen honetan eta aplikatu beharreko gainerako araudi orokor eta sektorialean xedatutakoa bete beharko dute. Bereziki, betetzekoak izanen dira: Sektore Publikoaren Araubide Juridikoari buruzko urriaren 1eko 40/2015 Legearen 11. artikulua; Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Legearen 14. artikulua; Nafarroako Merkataritza, Industria eta Zerbitzu Ganbera Ofizialari buruzko apirilaren 10eko 17/2015 Foru Legearen 7. artikulua; eta Nafarroako Merkataritza, Industria eta Zerbitzu Ganbera Ofizialaren Barne Araubidearen Erregelamendua onesten duen 2016ko azaroaren 9ko Nafarroako Gobernuaren Erabakiaren 11. artikulua.

Esleipen hau salbuetsita dago Kontratu Publikoei buruzko apirilaren 13ko 2/2018 Foru Legearen aplikazio-eremutik, lege horretan bertan Nafarroako Foru Komunitateko Administrazioari eta Foru Sektore Publiko Instituzionalari buruzko martxoaren 11ko 11/2019 Legearen 14.7 artikuluari lotuta xedatutakoaren arabera. Hori horrela, bere araudi espezifikoak eraenduko du.

Hamabosgarrena.–Jurisdikzio eskuduna.

Alderdien artean sortzen diren auziak administrazioarekiko auzien gaineko jurisdikzio-ordenari jakinaraziko zaizkio, eta haren eskumenean geldituko dira, jurisdikzio hori arautzen duen uztailaren 13ko 29/1988 Legean xedatutakoari jarraikiz.

Hamaseigarrena.–Publizitatea.

Eraginkorra izan dadin, hitzarmena osorik argitaratu beharko da Nafarroako Aldizkari Ofizialean, xedapen hauetan aurreikusitakoaren arabera: Gardentasunari, informazio publikoa eskuratzeko bideari eta gobernu onari buruzko maiatzaren 17ko 5/2018 Foru Legearen 18. eta 25. artikuluak; Nafarroako Merkataritza, Industria eta Zerbitzu Ganbera Ofizialari buruzko apirilaren 10eko 17/2015 Foru Legearen 7.3 artikulua; Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Legearen 14.6 artikulua; eta Sektore Publikoaren Araubide Juridikoari buruzko urriaren 1eko 40/2015 Legearen 11.3 artikulua.

Eta aurreko guztiarekin ados egotearen frogagarri, alderdiek hitzarmen honen bi ale sinatu dituzte, adierazitako tokian eta egunean:

I. ERANSKINA.–ERANTZUKIZUNPEKO ADIERAZPENA, EB-REN SUSPERTZE- ETA ERRESILIENTZIA-MEKANISMOAREN FINANTZAKETARI ETA DNSH PRINTZIPIOA BETETZEARI BURUZKOA

Javier Taberna Jiménez jaunak, Nafarroako Merkataritza, Industria eta Zerbitzuen Ganbera Ofizialaren Osoko Bilkurak 2022ko apirilaren 25eko saioan korporazioko presidente izendatu ondotik, eta Nafarroako Merkataritza, Industria eta Zerbitzuen Ganbera Ofizialari buruzko apirilaren 10eko 17/2015 Foru Legearen 19. artikuluan xedatutakoaren arabera esleituta dauzkan eginkizunak betez, erantzukizunpeko adierazpen hau sinatzen du, eta adierazten du:

1. Badakiela kontratu honen finantzaketa Europar Batasuneko Berreskuratze eta Erresilientzia Mekanismotik datorrela.

Pertsona edo erakunde adjudikatzaile den heinean, bere gain hartzen dituela Berreskuratze eta Erresilientzia Mekanismoa ezarri zuen Europako Parlamentuaren eta Kontseiluaren 2021eko otsailaren 12ko 2021/241 (EB) Erregelamendutik eratorritako betebehar guztiak eta Batasunak gai horri buruz emaniko gainerako arauak, baita horien garapen edo transposizioa egiteko gainerako estatu mailako arauak ere, bereziki ingurumenari kalte nabarmenik ez eragiteko printzipioa betetzeko eskakizunari dagokionez.

2. Kontratu hori gauzatzeak betetzen duela "kalte nabarmenik ez eragiteko printzipioa" (Do No Significant Harm, DNSH), eta, ondorio horietarako, Suspertze eta Erresilientzia Mekanismoari buruzko Erregelamenduari (2021/C 58/01) jarraikiz, ez duela kalte nabarmenik eragin behar DNSH printzipioa aplikatzeko Gida Teknikoan xedatutakoarekin bat etorriz. Ildo horretan, hauxe adierazten du:

Eskabidearen xede den jarduerak ez die "kalte nabarmenik" egiten EBko taxonomia-erregelamenduak biltzen dituen sei ingurumen-helburuei, DNSH azterketa honetatik ondorioztatzen denez (Gida Teknikoaren 1. zatia):

Eta horrela jasota geldi dadin eta behar diren ondorioak izan ditzan, honako hau luzatzen eta sinatzen dut.

Iruñean, _____(e)ko _____________aren _____ (e)(a)n

Iragarkiaren kodea: F2406956