Iragarkia

101. ALDIZKARIA - 2024ko maiatzaren 16a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

79E/2024 EBAZPENA, apirilaren 11koa, Energia, Enpresa I+G+b eta Ekintzailetzako zuzendari nagusiak emana, I+G+b arloa finantzatzen duten Europar Batasuneko programetarako proiektuak prestatu eta aurkezteko laguntzen 2024ko deialdia onesten duena. Dirulaguntzen Datu Base Nazionalaren identifikazioa: 754424.

Deialdi honetako laguntzen helburua da Nafarroako ETEek eta SINAIko (Nafarroako I+G+b Sistema) eragileek I+G+b finantzatzeko erabiltzen diren Europar Batasuneko programetan parte har dezaten bultzatzea.

Horretarako, diruz lagunduko da entitate horiek aholkularitza enpresak kontratatzea, I+G+b proiektuak prestatzeko eta programa horietan aurkezteko. Horrela, aurkezten diren proposamenen kopurua eta kalitatea handitu nahi da, bai eta dirulaguntza honen onuradunei baliabide ekonomiko gehiago eskuratuko dituztela ziurtatzea.

Azaldutakoa ikusita, eta Industriako eta Enpresen Trantsizio Ekologiko eta Digitalerako Departamentuaren oinarrizko egitura ezartzen duen abuztuaren 30eko 70/2023 Foru Dekretuaren xedapen gehigarri bakarrean egindako eskumen-deskontzentrazioaz baliatuta, honako hau

EBAZTEN DUT:

1. 2024ko deialdia onestea, I+G+b arloa finantzatzen duten Europar Batasuneko programetarako proiektuak prestatu eta aurkezteko laguntzetarako.

2. Dirulaguntzak emateko oinarri arautzaileak onestea. Ebazpen honen eranskinean bildu dira.

3. Deialdi honen konpromisoei aurre egiteko, jarraian adierazten den aurrekontuko kreditua baimentzen da:

4. Ebazpen hau eta eranskinak Nafarroako Aldizkari Ofizialean argitaratzea, eta ohartaraztea deialdiak ez duela ondoriorik sortuko harik eta laburpena Nafarroako Aldizkari Ofizialean argitaratu arte.

5. Ebazpen honek ez du administrazio bidea amaitzen, eta zilegi da haren aurka gora jotzeko errekurtsoa jartzea, Industriako eta Enpresen Trantsizio Ekologiko eta Digitalerako kontseilariari zuzendua, argitaratu eta biharamunetik hilabeteko epean. Administrazio publikoek zilegi dute administrazioarekiko auzi-errekurtsoa jartzea, eskumena duen ordena jurisdikzionalari zuzendua, bi hilabeteko epean, argitaratu eta biharamunetik hasita, galarazi gabe Nafarroako Gobernuan aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan xedatutako moduan eta epeetan.

Iruñean, 2024ko apirilaren 11n.–Energia, Enpresa I+G+b eta Ekintzailetzako zuzendari nagusia, Uxue Itoiz Mariñelarena.

ERANSKINA.–OINARRI ARAUTZAILEAK

1. oinarria.–Xedea.

Laguntza hauen helburua da Nafarroako ETEek eta SINAIko (Nafarroako I+G+b Sistema) eragileek I+G+b finantzatzeko erabiltzen diren Europar Batasuneko programa hauetan (aurrerakoan, Batasuneko programak) parte har dezaten bultzatzea, programa horien bidez finantzatzen baitira ikerketa zientifikoa, garapen teknologikoa eta berrikuntza:

A. Horizon Europe programa.

B. EURATOM ikerketa eta prestakuntza programa.

C. Konektatu Europa mekanismoa.

D. Europa Digitala.

E. Merkatu Bakarra.

F. Europako Espazio Programa.

G. LIFE: Ingurumenerako eta Klima Ekintzarako programa.

H. Interreg Sudoe eta Eremu Atlantikoa.

I. Europa Sortzailea.

J. EU4Health.

K. Batasuneko Babes Zibileko Mekanismoa eta rescEU.

L. Europako lankideen I+G+b arloko norgehiagokako deialdiak (adibidez, European Partnerships, ur-jauzi bidezko finantzaketa).

Horrela, programa horietatik finantzaketarik lortzen ez badute, I+G+b proiektuaren proposamena aurkezteko kontratatu zuten aholkularitza enpresaren gastua diruz lagunduko da, baldin eta, ebaluatu ondoren, gutxieneko puntuazioa lortzen badute.

2. oinarria.–Entitate onuradunak.

1. Honako hauek dira laguntza hauek jaso ditzaketenak:

a) 2014ko ekainaren 17ko 651/2014 (EB) Erregelamenduaren I. eranskinean, enpresa txiki eta ertainaren definizioari egokitzen zaizkion enpresak. Kategorien araberako Salbuespenari buruzko Erregelamendu Orokor horren bidez (aurrerakoan KSEO) zenbait laguntza-kategoria barne merkatuarekin bateragarritzat jotzen dira, Tratatuaren 107. eta 108. artikuluak aplikatuz.

b) SINAIko (Nafarroako I+G+b Sistemako) exekuzio eragileak, halakotzat egiaztaturik daudenak Unibertsitateko, Berrikuntzako eta Eraldaketa Digitaleko kontseilariaren otsailaren 28ko 2E/2020 Foru Aginduak araututako erregistroan (hemendik aurrera, SINAIko eragileak).

2. Hauek dira onuradun izateko betebeharrak:

a) Nafarroan lantokia izatea eta lantoki horretan garatzea diruz lagundutako proiektua.

b) Aholkularitza enpresen kasuan, beren helburu sozialean jasota ez izatea I+G+b proiektuen proposamenak prestatzeko jarduerak egitea.

c) Dirulaguntzei buruzko azaroaren 9ko 11/2005 Foru Legearen 13.2 artikuluan onuradun izateko ezarritako debeku-kasuetan ez egotea.

Zerga-betebeharrak eta Gizarte Segurantzarekikoak egunean dituela egiaztatzeko, eskatzaileak baimena ematen dio departamentu honi egoera hori egiaztatzen duten datuak kontsultatzeko, hala dagokionean.

d) Inolako administrazio zehapen irmorik edo kondena epai irmorik betetzen ez egotea sexu edo genero diskriminaziotzat hartutako lan praktikak egiteagatik edo onartzeagatik, eta, kasua bada, ez egotea arrazoi horiek direla-eta ezarritako epai edo zehapen bat betetzeko zain.

e) Haren jarduera ekonomikoak ez dezala kalte nabarmenik eragin Europako Parlamentuaren eta Kontseiluaren 2020ko ekainaren 18ko 2020/852 (EB) Erregelamenduaren 17. artikuluan adierazitako ingurumen-helburuetan. Erregelamendu hori inbertsio jasangarriak errazteko esparrua ezartzeari buruzkoa da eta Taxonomiari buruzko 2019/2088 (EB) Erregelamendua aldatzen du.

f) Enpresa bada, Nafarroako Industria Erregistroan inskribaturik edo inskripzioa eskatuta egon beharko du, hala badagokio Ekonomia, Ogasun, Industria eta Enpleguko kontseilariak Nafarroako Industria Erregistroa sortzeko apirilaren 30ean emandako 152/2013 Foru Aginduaren 3. artikuluan xedatutakoaren arabera.

g) SINAIko eragilea bada eta jarduera ekonomikoak eta ez-ekonomikoak egiten baditu, bi jarduera mota horiek eta bakoitzaren kostuak eta finantzaketa argi bereizten dituen kontabilitatea izan beharko du.

2. Eskatutako baldintzak laguntza osorik ordaindu arte bete beharko dira, eta eskabidean jasotako erantzukizunpeko adierazpenaren bidez egiaztatuko da hala dela.

3. Ezin dira onuradun izan:

a) Bete gabe dagoen berreskuratze agindu baten mende daudenak, Europako Batzordeak laguntza legez kanpokotzat eta merkatu erkidearekin bateraezintzat jo ondoren; ez eta krisian dagoen enpresaren kalifikazioa dutenak ere, Kategorien araberako Salbuespenari buruzko Erregelamendu Orokorraren 2. artikuluko 18. atalean definitzen den gisan.

b) Krisian dauden enpresak, Kategorien araberako Salbuespenari buruzko Erregelamendu Orokorraren 2. artikuluko 18. ataleko definizioaren arabera. Salbuespena dira 2019ko abenduaren 31n krisian ez zeudenak baina 2020ko urtarrilaren 1etik 2021eko abenduaren 31ra bitarteko aldian krisian dauden enpresak izatera pasatu direnak.

3. oinarria.–Gastu diruz lagungarriak.

1. I+G+b proiektuen proposamenak egin dituzten aholkularitza enpresen kontratazio-gastuak lagunduko dira diruz, baldin eta baldintza hauek betetzen badituzte:

a) Batasuneko programa hauetara aurkeztu izana:

A. Horizon Europe programa.

B. EURATOM ikerketa eta prestakuntza programa.

C. Konektatu Europa mekanismoa.

D. Europa Digitala.

E. Merkatu Bakarra.

F. Europako Espazio Programa.

G. LIFE: Ingurumenerako eta Klima Ekintzarako programa.

H. Interreg Sudoe eta Eremu Atlantikoa.

I. Europa Sortzailea.

J. EU4Health.

K. Batasuneko Babes Zibileko Mekanismoa eta rescEU.

L. Europako lankideen I+G+b arloko norgehiagokako deialdiak (adibidez, European Partnerships, ur-jauzi bidezko finantzaketa).

Batasuneko programetan parte hartuz gero, haien oinarrietan argi eta garbi zehaztu beharko da I+G+b proiektuak egiteko finantzaketa dela.

b) Batasuneko programa batean aurkeztu ondoren hartan finantzaketarik lortu ez izana, baina 8. oinarrian ezarritako gutxieneko puntuazioa lortu izana.

c) Proposamenaren kalitatea baloratzeko ebaluazio-txostena izatea (ESR Evaluation Summary Report edo antzekoa), 2022ko abuztuaren 23tik aurrera egina.

d) Batasuneko programan deialdi hau argitaratu baino lehen aurkeztu izana.

e) Aholkularitza enpresaren gastuak deialdi hau argitaratu baino lehen ordaindu izana.

f) Proiektuen ebaluazioan fase bat baino gehiago duten Batasuneko programetan lehenengo fasea edo aurre-proposamenak gainditu izana.

2. Honako gastu hauek ez dira diruz lagungarriak izanen:

a) Aholkularitza enpresak laguntza-eskatzaileari egiten dizkion aholkularitza-jarduera jarraituak.

b) Balio erantsiaren gaineko zerga, salbu eta kostu hori onuradunarentzat berreskuraezina denean; kasu horretan, onuradunak frogatu egin beharko du hala dela.

4. oinarria.–Aholkularitza enpresen betekizunak.

1. Aholkularitza enpresek eginen dituzte I+G+b proiektuen proposamenak, baldin eta beren helburu sozialean jarduera horiek egitea jasota badute.

Betekizun hauek ere bete beharko dituzte:

a) Laguntza eskatzen duenarekin lotutako edo elkartutako enpresa bat ez izatea, Batzordearen 2003ko maiatzaren 6ko Gomendioan ETEaz dagoen definizioan agertzen denaren arabera.

b) Ez azpikontratatzea dirulaguntzaren xedeko lanen exekuzioa.

2. Laguntzak kudeatzen dituen organoak beharrezkotzat jotzen duen informazio gehigarria eskatzen ahalko du aholkularitza enpresak emandako datuak eta haien kualifikazioa egiaztatzeko.

Halaber, diruz lagundutako proiektuak prestatzen parte hartu duten aholkularitza entitateen zerrenda argitaratzen ahalko du Nafarroako Gobernuaren Atarian (www.nafarroa.eus) edo intereseko beste web-orri batzuetan.

5. oinarria.–Laguntzaren zenbatekoa.

1. Laguntzaren zenbatekoa gastu diruz lagungarriaren %80 izanen da (aholkularitza enpresaren kontratazioa), baina ezin izanen ditu gainditu honako gehieneko zenbateko hauek:

2. Entitate batek proposamen eta programa bakar baterako laguntza jasotzen ahalko du deialdi honen babesean.

6. oinarria.–Eskaerak aurkezteko epea eta modua.

1. Deialdiak eskaerak aurkezteko bi epe izanen ditu:

a) Lehen epea: deialdi hau Nafarroako Aldizkari Ofizialean argitaratu eta biharamunean hasi eta 2024ko maiatzaren 31n bukatuko da, egun hori barne.

b) Bigarren epea: 2024ko irailaren 1etik urriaren 31ra, biak barne.

2. Eskaerak telematikaz aurkeztuko dira nahitaez, Nafarroako Gobernuak Interneten duen Atariaren (www.nafarroa.eus) tramiteen katalogoko fitxa erabiliz (hemendik aurrera, laguntzen fitxa).

7. oinarria.–Eskaerarekin batera aurkeztu beharreko dokumentazioa.

1. Laguntza-eskaerarekin batera, honako dokumentazio hau aurkeztu beharko da, laguntzen fitxan eskuragarri dauden ereduetara egokituta (artxibo digital bereizi gisa aurkeztu beharko dira, beren izenarekin behar bezala identifikatuta):

a) 2.3 oinarrian adierazitako betekizunei buruzko erantzukizunpeko adierazpena.

b) Europako deialdira aurkeztutako proposamena, aurkeztu izanaren frogagiriarekin, proiektuaren aurrekontua barne.

c) Aurkeztutako proposamenari buruz Batasuneko erakunde eskudunak emandako balorazio-txostenaren kopia (Evaluation Summary Report edo antzekoa), non egiaztatzen ahalko baita zein den proiektuaren balorazio kuantitatiboa eta/edo kualitatiboa, deialdian ezarritako onarpen atalaseei dagokienez.

d) Eskatzailearen eta aholkularitza enpresaren artean egindako kontratua, hitzartutako baldintzak adierazten dituena, ekonomikoak zein teknikoak. Kontratu horrek eskaerak aurkezteko epea hasi baino lehenagoko data izanen du. Batasuneko programak fase bat baino gehiago baditu, kontratuak argi eta garbi adierazi behar du fase horietako bakoitza prestatzeko kostua.

e) Aholkularitza enpresak egindako fakturak eta ordainagiriak (bankuko ziurtagiriak edo laburpenak, behar bezala identifikatuak, edo ordainketaren trazabilitatea egiaztatzeko moduko beste edozein merkataritza-dokumentu). Ordainketa-datak eskaerak aurkezteko epea baino lehenagokoa izan behar du.

f) ETEen kasuan: itxitako, sinatutako eta Merkataritza Erregistroan edo Kooperatiben Erregistroan gordailututako urteko kontuak eta, horiekin batera, itxitako azken hiru ekitaldiei buruzko memoriak eta Erregistroak egindako txostenak (digitalki autentifikatuta edo zigilatuta, eta ikuskatuta, nahitaezkoa denean), bai eskatzailearenak, bai haren enpresa elkartu eta lotutakoenak. Erregistro horretan kontuak aurkeztera behartuta ez dauden ETEek eta langile autonomoek PFEZaren aitorpena aurkeztuko dute.

Enpresaren neurria zehazte aldera, eskatzaileak dokumentazio hori edo Nafarroako Merkataritza Ganberaren ziurtagiria aurkezten ahalko du.

Hala ere, enpresak 2024an aurkeztu badu dokumentazio hori departamentu honetan, ez da beharrezkoa izanen berriro aurkeztea. Kasu horretan, laguntzen deialdia edo dokumentazioa aurkeztu zuen administrazio-unitatea zein den adierazi beharko du.

Dokumentazioa aurkeztu ezean, ulertuko da enpresa ez dela ETE bat, eta, beraz, ezin izanen du laguntzarik jaso.

g) Dirulaguntzen onuradunen gardentasun-betebeharrari buruzko dokumentazioa, araututa dagoena Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 12.4 artikuluan, atarian eskuragarri dagoen laguntzen fitxako ereduaren araberakoa.

2. Aurkeztutako dokumentazioak betebehar horiek betetzen ez baditu, laguntzak kudeatzen dituen organoak eskatzaileari errekerimendua eginen dio 10 egun balioduneko epean zuzentzeko, eta ohartaraziko dio, hala egin ezean, eskaera bertan behera utzi duela ulertuko dela eta espedientea artxibatzeko ebazpena emanen dela. Ezin izanen da zuzendu 1. ataleko b), c), d) eta e) letretan adierazitako dokumentazioa aurkezten ez bada.

8. oinarria.–Dirulaguntza emateko prozedura eta irizpideak.

1. Laguntza hauek norgehiagokako prozeduraren bidez emanen dira. Hartara, epe bakoitzean aurkeztutako eskaerak alderatuko dira, haien artean lehentasuna ezartzeko, oinarri honetan ezarritako balorazio irizpideekin bat.

Laguntzen zenbatekoa kalkulatzeko, balorazio handiena eskuratzen duten eskaerei 5. oinarrian ezarritako laguntza intentsitatea aplikatuko zaie, deialdi honetarako aurrekontuan erabilgarri dagoen kreditua (80.000 euro) agortu arte, honela banatuta:

–Lehen epeko eskaerak: 40.000 euro.

–Bigarren epeko eskaerak: 40.000 euro.

Lehen epeko eskaera guztiei erantzun ondoren aurrekontu-kreditua badago, kreditu hori bigarren epeko eskaerak diruz laguntzeko erabiltzen ahalko da.

Halaber, krediturik ez izateagatik lehen epean dirulaguntzarik jaso ez duten eskaerak bigarren epeko eskaeren hurrenkeran sartuko dira, lortu duten puntuazioa zehazten duen ordenan.

2. Honako hauek izanen dira eskaerak baloratzeko irizpideak, dirulaguntza jasotzeko gehieneko eta gutxieneko puntuazioekin:

I. Entitate mota:

II. Proposatutako zereginen berrikuntza-maila:

II. irizpide honetan, ezinbestekoa da gutxienez 2 puntu lortzea.

III. Proposamenaren kalitatea ebaluatzea:

III.1. Balorazio kuantitatiboa egiten duten ebaluazio-txostenetan, formula hau aplikatuko da puntuazioa lortzeko:

Azalpena:

X= balorazio-txostenean lortutako nota.

Y= Batasuneko programan proiektuak onartzeko eskatutako atalasea.

III.1 irizpide honetan, ezinbestekoa da gutxienez 0.8 lortzea X/Y balioan.

III.2. Balorazio kualitatiboa egiten duten ebaluazio-txostenetan, ebaluazioa irizpide hauetan oinarrituta eginen da:

III.2.1. Proposamen onartua:

III.2.2. Ebaluazio-txostenaren iruzkinak (3 puntu). Puntuazioa emanen zaie Batasuneko programa ebaluatzen duen erakundeak ebaluazio-txostenean egiten dituen iruzkinei. Iruzkin positiboak eta negatiboak baloratuko dira, ebaluatutako gainerako proposamenekin alderatuta, deialdiaren baldintzetara egokitua, etab.

III.2 irizpide honetan ezinbestekoa da gutxienez 2 puntu lortzea.

3. Lortutako puntuazioan berdinketa gertatzen bada, honela ebatziko da:

1. I. irizpidean ("Entitate mota") lortutako puntuazioa.

2. III. irizpidean ("Proposamenaren kalitatea") lortutako puntuazioa.

3. Berdinketak irauten badu, lehenik aurkeztutako eskaera lehenetsiko da.

9. oinarria.–Dirulaguntza ematea eta ordaintzea.

1. Laguntzak kudeatzen dituen organoak, hots, S4 Proiektu Estrategikoen eta Ekintzailetzaren Zerbitzuak, oinarri arautzaile hauetan ezarritako irizpideei jarraituz ebaluatuko ditu epe bakoitzeko eskaerak, eta organo eskudunari laguntza emateko eta ordaintzeko ebazpen proposamena igorriko dio, non adieraziko baita onuradunek dirulaguntza lortzeko betebehar guztiak betetzen dituztela.

2. Energia, Enpresa I+G+b eta Ekintzailetzako zuzendari nagusia izanen da epe bakoitzeko laguntzak emateari eta ordaintzeari buruz ebazteko organo eskuduna.

Ebazpena arrazoitua izanen da, eta bertan jasoko dira, gutxienez ere, dirulaguntza jasoko duten eskatzaileen zerrenda eta, hala badagokio, ezetsi diren eskaerak, eta, horien artean, aurrekontuko mugagatik ezetsitakoak.

3. Ebazpena gehienez bi hilabeteko epean eman eta jakinaraziko da eskatzaileen gaitutako helbide elektroniko bakarrean, eskaerak aurkezteko epe bakoitza bukatzen denetik hasita.

Ezarritako gehieneko epea bukatzen bada berariazko ebazpenik eman eta jakinarazi gabe, eskaerak administrazio isiltasunez ezetsitzat jotzen ahalko dira. Hala ere, organo eskuduna behartua dago dirulaguntzak onartu edo ukatzeko berariazko ebazpena ematera eta jakinaraztera, oinarri hauetan xedatutakoari jarraikiz.

10. oinarria.–Onuradunen betebeharrak eta horiek ez betetzearen ondorioak.

1. Dirulaguntza jasotzen duten onuradunek honako betebehar hauek izanen dituzte:

a) Oinarri arautzaile hauetan ezarritako moduan egin eta justifikatu beharko dituzte dirulaguntzaren xedeko jarduerak.

b) Proiektuaren proposamena prestatu eta aurkeztu izanaren aipamen publikoa egiten bada, jaso beharko da Nafarroako Gobernuak finantzatu duela.

c) Proiektuaren emaitzak zabaltzeko materialetan ez da emakumea diskriminatzen duen irudirik azalduko, eta emakumeen eta gizonen arteko berdintasuna eta rol aniztasuna sustatuko dira. Halaber, prestatzen den dokumentazioan ez da erabiliko hizkuntza sexistarik.

d) Enpresa-deslokalizaziorik ez egiteko konpromisoa hartzea, Enpresen sustraitzearen aldeko eta enpresa-deslokalizazioaren aurkako neurriei buruzko abenduaren 16ko 18/2020 Foru Legearen 4. artikuluan ezartzen dena kontuan hartuta.

e) Dirulaguntzei buruzko Foru Legearen 9. artikuluan ezarritako betebehar orokorrak.

2. Oinarri arautzaile hauetan edo Dirulaguntzei buruzko Foru Legean ezarritako betebehar guztiak betetzen ez badira, ordaindutako dirulaguntza itzuli egin beharko da, foru lege horren 35. artikuluan xedatutakoarekin bat.

Halaber, aurreko betebeharretako bat hein batean betetzen ez bada, ordaindu beharreko dirulaguntzaren zenbatekoa berriro ere zehazten ahalko da, proportzionaltasun printzipioari jarraikiz.

11. oinarria.–Baliabide elektronikoen bidezko harremanak.

1. Laguntzen eskaera eta erantsi beharreko dokumentazio guztia telematika bidez aurkeztuko dira Nafarroako Foru Komunitateko Administrazioaren Erregistro Orokor Elektronikoan, laguntzen fitxaren bidez, Nafarroako Gobernuaren Interneteko Atariko (www.nafarroa.eus) tramiteen katalogoaren barnean.

2. Administrazio egintzen jakinarazpena eta laguntza hauek emateko prozeduraren barruan egiten diren jarduketa guztien komunikazioak eskatzaileen gaitutako helbide elektroniko bakarraren bidez (GEHb) eginen dira. Jakinarazpen edo komunikazioaren bidalketaren berri emanen da eskatzaileak jarritako helbide elektronikoaren bitartez.

12. oinarria.–Dirulaguntzaren bateraezintasuna.

Deialdi honetako dirulaguntzak bateraezinak dira Nafarroako Foru Komunitateko Administrazioak, beste administrazio publiko batzuek, beste entitate publiko nahiz pribatu batzuek edo partikularrek, Espainiakoek nahiz nazioartekoek, gastu beretarako emandako beste dirulaguntza batzuekin.

13. oinarria.–De minimis laguntza.

1. Deialdi honetako dirulaguntzak "de minimis" laguntzak dira, Europako Batzordeak 2023ko abenduaren 13an emandako 2023/2831 Erregelamenduan xedatutakoaren arabera. Erregelamendu horren xedea da Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko modua xedatzea (2023ko abenduaren 15eko L EBAO).

2. Erregelamendu horrekin bat, enpresa bakar bati hiru urteko zerga-ekitaldiko edozein alditan emandako "de minimis" laguntza guztien batura ezin da 300.000 eurotik gorakoa izan. Aipatu erregelamenduaren 2.2 artikuluan ezarrita dago enpresa bakarraren definizioa.

Horretarako, interesdunek uneko urtean eta aurreko bi urteetan hartutako bestelako "de minimis" laguntzak aitortu beharko dituzte eskabidean.

14. oinarria.–Emandako dirulaguntzen publizitatea.

S4 Proiektu Estrategikoen eta Ekintzailetzaren Zerbitzuak jendaurrean jarriko ditu emandako dirulaguntzak Ogasuneko Ministerioaren Dirulaguntzen Datu Base Nazionalaren bitartez (http://www.pap.minhafp.gob.es/bdnstrans/GE/eu/index), honako hauek adierazita: deialdia, laguntza zein aurrekontu kredituri egotzi zaion, onuradunak eta emandako diru kopurua.

Deialdi honen emaitzak argitaratuko dira, orobat, Nafarroako Gobernuak Interneten duen Atariko (www.nafarroa.eus) tramiteen katalogoko laguntzen fitxan.

15. oinarria.–Datu pertsonalen babesa.

Datuak babesteko indarrean dagoen araudiaren arabera, Industriako eta Enpresen Trantsizio Ekologiko eta Digitalerako Departamentuak tratatuko ditu datu pertsonalak, deialdi honetako laguntzak kudeatzeko. Era berean, jakinarazten da datuak babesteko eskubideak departamentu horretan balia daitezkeela, laguntzen fitxan adierazitako moduan.

16. oinarria.–Oinarri arautzaileen aurkako errekurtsoa.

Interesdunek gora jotzeko errekurtsoa jartzen ahal dute oinarri arautzaile hauen aurka, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, argitaratu eta biharamunetik.

Iragarkiaren kodea: F2406074