Iragarkia

95. ALDIZKARIA - 2023ko maiatzaren 8a

1. NAFARROAKO FORU KOMUNITATEA

1.7. BESTELAKOAK

40/2023 EBAZPENA, apirilaren 4koa, Ingurumeneko zuzendari nagusiak emana, Urbasa eta Andia ondare mendietako larreak erabiltzea baimentzen duena (2023ko kanpaina).

Urbasa eta Andia mendien jabaria –biak Onura Publikoko Mendien katalogoan sartuak– Nafarroari eskualdatu zitzaion, otsailaren 27ko 334/1987 Errege Dekretuari, Estatuaren titulartasuneko Mendien jabaria Nafarroako Foru Komunitateari eskualdatzekoari, jarraituz, zeina eman baitzen abuztuaren 10eko 13/1982 Lege Organikoaren, Nafarroako Foru Eraentza Berrezartzeari eta Hobetzeari buruzkoaren, laugarren xedapen iragankorraren babesean.

Nafarroako Ondareari buruzko apirilaren 4ko 14/2007 Foru Legearen 5. artikuluan xedatutakoari jarraituz, aipaturiko mendiak jabari publikoko ondasunak dira, eta bertako larreak laga eginen dira ("Nafarroako Foru Komunitateko ondasun eta eskubide inbentariagarrien katalogoa"n identifikatuak, 2961 zenbakia, Onura Publikoko 6 zenbakiko mendia –Urbasa mendia– eta 2962 zenbakia, Onura Publikoko 7 zenbakiko mendia –Andia mendia–).

1912ko Nafarroako Onura Publikoko Mendien Katalogoaren arabera, zeina partez eguneratu baitzen indarrean sartu zenean Landa Garapeneko eta Ingurumeneko kontseilariaren 2020ko apirilaren 17ko 6/5/2020 Foru Agindua, Onura Publikoko Mendien Katalogoaren kartografia eguneratzeko prozedura hastekoa, Nafarroako Foru Komunitatea da 6 zenbakiko mendiaren azaleraren % 99,3ren jabe (11.435,82 Ha ditu, guztira), eta 7 zenbakiko mendiaren azaleraren % 99,7ren jabe (4.358,86 Ha ditu, guztira). Biak dira besterenezinak, preskribaezinak, enbargaezinak, eta ez daude haien titulartasuna zergapetzen duen ezein tributuren mendean, Nafarroako Baso Ondarea Babesteko eta Garatzeko abenduaren 31ko 13/1990 Foru Legearen 8. artikuluak xedatzen duenez.

Nafarroako Ondareari buruzko apirilaren 4ko 14/2007 Foru Legearen 86. artikulua aplikatuz, Urbasa eta Andia mendietako larre erabilera "erabilera erkide berezia" da, eta horretarako "lizentzia edo baimena lortu beharko da aldez aurretik, kasuan kasuko ondasunak atxikiak dituen departamentuak edo erakunde publikoak emana; departamentu edo erakunde horrek berak zehaztuko ditu bete beharreko baldintzak". Manu berak honako hau xedatzen du: "Baimenak zuzenean emanen zaizkie eskatutako baldintzak betetzen dituzten eskatzaileei, kopurua mugatua dagoenean izan ezik, kasu horretan lehia egonen baita edo, halakorik egitea bidezkoa ez bada, eskatzaileengan baldintza berezirik baloratu behar ez delako, zozketa bidez edo arauetan ezarritako hautabidea erabiliz".

Hau da, onuradunen kopurua mugaturik ez badago, ezarritako betekizunak betetzen dituzten eskabide guztiak onartuko dira, ez da lehia prozedurarik ezarri beharko, eta ez du zentzurik izanen ezein baremo ezartzeak.

Uztailaren 1eko 267/1996 Foru Dekretuaren bidez onetsi zen Urbasa eta Andia mendietako natur baliabideen antolamendu plana. Antolamendu Planaren 31. artikuluko C) hizkiak jasotzen du "larre kudeaketako" gune bat dagoela, "zuhaitzik gabeko larreen eta larre zuhaiztunen" azalerak hartua, baina 34.2 artikuluko b) hizkian "zedarrituriko guneetan" artzaintza debekatzen du. 2. artikuluak, irailaren 7ko 198/2011 Foru Dekretuak bertan egindako erreformaren ondoren, 4.372,45 hektareako azalera ezartzen du Andian, eta 11.445,22 hektareakoa Urbasan.

Otsailaren 27ko 3/1997 Foru Legeak parke natural izendatu zuen Urbasa eta Andia mendiak, Limitaciones mendia eta Urederra ibaiaren iturburuko Natura Erreserba (RN-14) hartzen dituen lurralde eremua. 4.1 artikuluak xedatzen duenez, "Parke Naturalaren kudeaketa Urbasa eta Andian eta Urederra ibaiaren iturburuko Natura Erreserban, Limitaciones mendiaren lurretan izan ezik, Nafarroako Gobernuko Ingurumen, Lurralde Antolaketa eta Etxebizitza Departamentuari dagokio".

Abenduaren 4ko 340/2001 Foru Dekretuaren bidez onetsi zen Urbasa Parke Naturala Erabili eta Kudeatzeko Plan Zuzentzailea (EKPZ). Plan horren 4.1 artikuluaren arabera, eskubide tradizionalen erabilera, besteak beste larratzekoa, Ingurumen Zuzendaritza Nagusiak ezarri prozedurari jarraikiz eginen da.

Urriaren 8ko 228/2007 Foru Dekretuak "Urbasa eta Andia" izeneko Batasunaren Garrantzizko Lekua Kontserbazio Bereziko Eremu izendatu zuen eta haren kudeaketa plana onetsi. Foru dekretu horrek aipaturiko planaren testua jasotzen du; haren VIII. epigrafean, "Jarduketa programa"ri buruzkoan, "Erabileren eta aprobetxamenduan kudeaketa jasangarria" programan, 3. zenbakikoan, honako hau aipatzen du, 2012 kodearekin: "Larre antolamendua egitea Urbasa-Andian (LAP)".

Kudeaketa plan horri jarraituz, Ingurumeneko zuzendari nagusiaren abuztuaren 12ko 1259/2011 Ebazpena eman zen, eta haren xedea zen «"Urbasa eta Andia Mendietako larre eta oihanak antolatzeko proiektua" izeneko dokumentu teknikoa onestea». Ebazpen horrek aipatutako plana onetsi zuen, eta Urbasa eta Andia mendietako Larreen Aprobetxamendu Batzordeari jakinarazi zion.

2021eko irailaren 7an, Nafarroako Aldizkari Ofizialean argitaratu zen abuztuaren 12ko 140/2021 Foru Agindua, Landa Garapeneko eta Ingurumeneko kontseilariak emana, zeinaren bidez osasun programa bat ezartzen baita Urbasa eta Andia mendietako larreak erabiltzen dituzten abeltzaintza establezimenduetarako. Mendietako belarren onuradunek nahitaez bete behar dute.

Kontuan harturik Urbasa eta Andia mendietako Larreen Antolamendu Planean ez dela mugarik ezartzen mendietara bazkatzera sartuko diren AzLUen kopuruari dagokionez;

Ikusirik Baso eta Ehiza Zerbitzuak emaniko txostena;

Horrenbestez, erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32.1 artikuluan xedatutako eskumenak eta Landa Garapeneko eta Ingurumeneko Departamentuaren egitura organikoa onesten duen urriaren 23ko 258/2019 Foru Dekretuaren 43. artikuluko d) hizkiari lotuta ematen dizkidanak,

EBAZTEN DUT:

1. Baimentzea Urbasa eta Andia ondare mendietako erabilera erkideko larreak erabiltzea, Nafarroako Foru Komunitatearen jabetzakoak, 2023ko kanpainarako, zeina 2023ko apirilaren 15ean hasi eta 2023ko abenduaren 15ean bukatuko den, ebazpen honen I. eranskinean ezarritako baldintzak betetzen dituzten guztiei.

2. Onestea azienda Urbasa eta Andia ondare mendietan bertako larreak erabiltzeko sartzeko eskaeraren eredua, ebazpen honen II. eranskinean jaso dena izendapen honekin: "Azienda Urbasa eta Andia mendietara igotzeko eskaera".

3. Komunikazio eta kontrolerako sistema bat ezartzea, Urbasa eta Andia mendietako azienda bertatik noiz irteten den jakiteko, mendien produktibitatea eta azienda hartzeko duen gaitasuna hobeki ezagutzeko. Horretarako, III. eranskina aurkeztu beharko da, "Azienda Urbasa eta Andia mendietatik irtetearen jakinarazpena" izenekoa.

4. Ebazpen hau jakinaraztea Baso Plangintzarako eta Ingurumen Hezkuntzarako Atalari, Basozaintza Atalari, Nekazaritza Zerbitzuari eta Urbasa eta Andia mendietako Larreen Aprobetxamendu Batzordeari, behar diren ondorioak izan ditzan.

5. Ebazpen hau Nafarroako Aldizkari Ofizialean argitaratzea.

6. Ebazpen honek ez du administrazio bidea amaitzen, eta espedientean interesa dutenek gora jotzeko errekurtsoa jar dezakete, Landa Garapeneko eta Ingurumeneko kontseilariari zuzendua, hilabeteko epean.

Iruñean, 2023ko apirilaren 4an.–Ingurumeneko zuzendari nagusia, Pablo Muñoz Trigo.

I. ERANSKINA

2023ko kanpainarako Urbasa eta Andia ondare mendietako erabilera erkideko larreen aprobetxamendua baimentzeko baldintzak

Lehena.–Xedea.

Ebazpen honen xedea da ezartzea Urbasa eta Andia ondare mendietan erabilera erkideko larreak erabiltzeko baimena duten pertsona guztiek bete beharreko baldintzak, 2023ko kanpainarako.

Bigarrena.–Onuradunak.

Honako hauek izaten ahalko dira Urbasa eta Andia ondare mendietako erabilera erkideko larreen onuradun: abeltzaintza ustiategietako nafar auzotasun forala duten titularrak, beren jabetzako azienda mendi horietara larratzera eramaten dutenak eta belarren aprobetxamendua Urbasa eta Andia Parke Naturala Erabili eta Kudeatzeko Plan Zuzentzaileari jarraikiz egiten dutenak (abenduaren 4ko 340/2001 Foru Dekretuaren bidez onetsi zen plan hori), eta gainerako araudi aplikagarria betetzen dutenak.

Hirugarrena.–Eskaera eta jakinarazpena.

Larreen onuradun guztiek, behar bezala beterik eta dokumentuan bertan jasotzen diren epe eta lekuetan, ebazpen honen II. eranskina aurkeztu beharko dute, hots: "Azienda Urbasa eta Andia mendietara igotzeko eskaera", baita III. eranskina, "Azienda Urbasa eta Andia mendietatik irtetearen jakinarazpena" eta IV. eranskina ere, "Irudi-baimena".

Laugarrena.–Onuradunen konpromisoak.

1) Bete egin beharko dituzte Urbasa eta Andia Parke Naturala Erabili eta Kudeatzeko Planean abeltzaintza erabilerarako jasotakoak, baita Ingurumeneko Zuzendaritza Nagusiak ezarritakoak ere, hemen jasotako baldintzetan ageri direnak.

2) Eskatzen zaizkien abeltzaintzako ikuskapenak erraztu eta baimendu beharko dituzte, eta lagundu egin beharko dute.

3) Dagozkien abeltzaintzako garraio gidak izapidetu beharko dituzte, garaiz eta behar bezala, eta nahitaez eraman beharko dituzte azienda mendira eramatean.

4) Basozainei-Ingurumena Zaintzeko Taldeari jakinarazi beharko diete, horretarako ezarritako bitartekoen bidez, zehazki noiz sartuko den azienda, eta zenbat abelburu sartuko den, gutxienez hiru egun lehenago.

5) Azienda Urbasa eta Andia mendietan 2023an sartu nahi dutenek, aurretik inoiz egin ez badute, Basozainei-Ingurumena Zaintzeko Taldeari edo Ingurumeneko Departamentuari eskaera eginez (Baso Plangintzarako eta Ingurumen Hezkuntzarako Atala), azienda igotzeko eskaera eta NANaren/IFKren kopia aurkeztu beharko dituzte, eta foru auzotasun nafarra dokumentuz frogatu beharko dute. Dokumentazio hori aurrez aurre aurkezten ahalko da, otsailaren 15etik apirilaren 13ra (ordutegia: 9:30-14:00), Abeltzaintzako Eskualde Bulegoetan, Irurtzunen (astearteetan) edo Lizarran (ostegunetan). Apirilaren 14tik aurrera, eskaerak soilik jasoko dira erregistroan eta EKPZn ezarritako prozeduraren arabera.

6) Azienda mendietara sartzeko jakinarazpenak, eranskin honen 4. baldintzak aipatzen dituenak, Basozainei bidaliko zaizkie, honela: SMS bat edo Whatsapp mezu bat bidaliz 608-417635 (Basozainak) eta 629-260209 (NIKeko teknikaria) telefonoetara. Azienda ez da mendietara igotzen ahalko parkeko langileek jakinarazpena jaso dutela berretsi artean.

7) Basozainei eta/edo NIKeko teknikariari, III. eranskineko ereduaren arabera, jakinarazi beharko zaie azienda parketik aterako dela, irten baino astebete lehenagotik irten eta astebete beranduagora arte.

8) Sartu beharreko azienda desparasitatu beharko dute mendietan sartu aitzin.

9) Basozainei-Ingurumena Zaintzeko Taldeari jakinaraziko zaie osasun instalazioak edo azienda maneiatzekoak erabiliko direla, gutxienez 48 ordu lehenago.

10) Azienda ez da sartuko apirilaren 15a baino lehen, eta beranduenez abenduaren 15ean aterako da. EKPZren arabera, konpromiso horretatik kanpo gelditzen dira "bertako" gisa sailkatutako abeltzainen lau ustiategiak. Azienda Urbasa mendian soilik mantenduko dute, horretarako zehaztutako inguruetan/kortetan.

11) Baldintza hauek aipatzen duten dokumentazioa goian ageri den eran ez beste batean aurkeztu bada, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16. artikuluan jasotako edozein bitartekoren bidez, dokumentazioa aurkeztu izanaren gordekina aurkeztu beharko zaie Basozainei, eskatzen dutenean.

12) Hazteriaren aurkako tratamenduak. Urbasa-Andia Parke Naturaleko EKPZri jarraituz, nahitaezkoa da ektoparasitoen aurkako tratamendu bat mendian dauden bitartean, ahal dela, abuztuan, formulazioan konposatu organokloraturik ez duten produktuak erabilita. Beraz, 2023ko kanpainan, ardiak dituzten abeltzainei tratamendu hori egiteko eskatuko zaie, EKPZren xedapenak eta Landa Garapeneko eta Ingurumeneko kontseilariaren abuztuaren 12ko 140/2021 Foru Aginduak ezarritakoa betez (140/2021 Foru Agindua, zeinaren bidez osasun programa bat ezartzen baita Urbasa eta Andia mendietako larreak erabiltzen dituzten abeltzaintza establezimenduetarako).

13) Abere hilak. Mendian hiltzen diren abereak eremu gatazkatsuetatik (errepideak, bidexkak, leizeak, etab.) kendu beharko dira, eta parkeko langileek adierazitako lekuan utzi. 48 hilabete baino gehiagoko behi aziendako abelburuak hilez gero, jabeak inguruabar hori ahal bezain bizkor jakinarazi beharko du 848426200 telefonoan (Nasertic).

14) Azienda mendietan dagoen bitartean, nafar auzotasun forala eta aziendaren jabetza mantendu beharko dituzte.

Bosgarrena.–Urbasa-Andia mendietan ibiltzeko txartelak eta baimenak.

Urbasa eta Andia mendietan bazkatzen diren abeltzaintzako ustiategietako ENS/SZko titular eta bazkideei bi mendietako pistak abeltzaintzarako soilik erabiltzea baimentzeko txartel/agiri bat emanen zaie, apirilaren 15etik abenduaren 15era bitartean bertako belarrak aprobetxatzeko. Txartela pertsonala eta besterenezina izanen da, eta bost urteko indarraldia izanen du, ematen den egunetik aurrera zenbatzen hasita. Abeltzaintzako ustiategiaren titularrak mendietara igotzen ez direnean, baimena ustiategiaren kudeatzaileari* emanen zaio, zeina behar bezala identifikatu beharko baita eskaeran.

Ustiategiko titular bakoitzak txartel/agiri bat izanen du; ustiategiko kudeatzaile bakoitzak txartel/agiri bat izanen du, titularra mendira igotzen ez bada (kasu horretan ez zaio titularrari baimenik emanen); eta ENSko bazkide bakoitzak txartel/agiri bat izanen du, baldin eta mendietara igo nahi duela adierazten badu. Txartel/agiri bakoitza egiteko, onuradunaren argazki bat beharko da, txartelean jartzeko tamainakoa. Argazki hori eskaera egitearekin batera emanen da, eta irudia baimentzeko eranskina sinatuta gehitu beharko da.

Txartela duten eta azienda mendietara igotzeari uko egiten dioten pertsonek Basozainei edo NIKeko abeltzaintzako teknikariari itzuli beharko diote, uko egiten diotela jakinarazten duten unean bertan, salbu eta mendietara ez igotzea puntuala bada eta ezinbesteko arrazoiengatik bada. Nolanahi ere, arrazoi horiek aldez aurretik justifikatu beharko dira.

Abeltzaintzako ustiategietako laguntzaileentzat**, baimen bakarra emanen da ustiategi bakoitzeko, eta eskaera-inprimakian eskatu beharko da. Baimen hori paperean emanen da eta urtekoa izanen da.

Txartela eta baimena ibilgailuaren aurreko panelean jarri beharko dira, Urbasa-Andia mendietan zaintza lanak egiten dituzten agintaritza agenteek ikuskatzeko.

(*) Baldintza horiek betetze aldera, ustiategiko kudeatzailetzat hartuko da ustiategiko titularrak eskuordetuta jarduten duen pertsona fisikoa, baldin eta titularra ez bada mendietara igotzen, eta azienda zaindu eta gobernatzeko ardura hartzen duena.

(**) Baldintza horiek betetze aldera, ustiategiko laguntzailetzat hartuko da ustiategiko titularrari edo ustiategiko kudeatzaileari laguntzen dion pertsona fisikoa, aziendaren erantzukizuna eta azienda gobernatzea bere gain hartu gabe.

Seigarrena.–Baldintzak ez betetzearen erregimena eta zehapenak.

Baldintza hauek ez betetzeak, eta azienda mendira igotzeko eskaeran eta azienda handik irtetearen jakinarazpenean adierazitako baldintzak ez betetzeak, oihana eta jabari publikoko ondasunak baimenaren baldintzak bete gabe erabiltzea dakar, eta horrek dagokion zehapen prozedura irekitzea ekartzen ahal du. Zehapen prozedura horren bidez, besteak beste, isunak ezartzen ahalko dira, bai eta arau-hauslea zehapenaren ebazpenak ezarririko aldirako baimenen edo emakiden titular izateko desgaitzea ere, hala badagokio.

II. eranskina.–2023an azienda Urbasa eta Andia mendietara igotzeko eskaera.

III. eranskina.–Azienda Urbasa eta Andia mendietatik irtetearen jakinarazpena.

IV. eranskina.–Irudi-baimena.

Deskargatu II., III. eta IV. eranskinak (DOC).

Iragarkiaren kodea: F2306006