Iragarkia

93. ALDIZKARIA - 2023ko maiatzaren 4a

1. NAFARROAKO FORU KOMUNITATEA

1.7. BESTELAKOAK

47/2023 EBAZPENA, apirilaren 17koa, Industriaren, Energiaren eta S4 Proiektu Estrategikoen zuzendari nagusiak emana, zeinaren bidez aurretiazko administrazio baimena ematen baita energia elektrikoa ekoizteko "Cascante II" 50 MW-eko haize-parkearen instalazioa jartzeko Cascante, Murchante eta Tuterako udal mugarteetan.

1.–2020ko uztailaren 13ko eskaera, 38,4 MW-erako.

2020ko uztailaren 13an, Eólica Cascante SLk, Nafarroan parke eolikoetarako baimena arautzen duen maiatzaren 8ko 56/2019 Foru Dekretuan ezarritakoa aplikatuz, eskabidea aurkeztu zion Industria Antolamenduaren, Azpiegitura Energetikoen eta Mehatzeen Zerbitzuari, eskatzeko aurretiazko administrazio baimena, eraikitzeko administrazio baimena eta onura publikoaren deklarazioa Cascante, Murchante eta Tuterako udal mugarteetako "Cascante II" haize-parkerako eta haren energia ateratzeko azpiegituretarako.

2020ko uztailaren 26an, Eólica Cascante SLk eskaera osatzeko dokumentazioa aurkeztu zuen.

Aurkeztutako dokumentazioaren arabera, honela osatuko litzateke "Cascante II" haize-parkea: 8 haize-sorgailu, guztira 38,4 MW-eko potentzia instalatuarekin, eta energia ateratzeko azpiegiturak, hau da, 30/66 kV-eko "Eólica Cascante 2" azpiestazioa eta aireko eta lurpeko 66 kV-eko linea elektrikoa, azpiestazio horretan hasi eta Tuterako "La Cantera" transformazio azpiestazioan amaitzen dena, egungo "L062 Eólica de Navarra 2" posizioan.

2.–Proiektua eta ingurumen inpaktuaren azterketa jendaurrean jartzea.

Maiatzaren 8ko 56/2019 Foru Dekretuaren 7. artikuluarekin bat etorriz, Industria Antolamenduaren, Azpiegitura Energetikoen eta Meatzeen Zerbitzuak jendaurrean jarri zuen eskaera hori, iragarkia argitaratuz 2020ko abuztuaren 19ko Nafarroako Aldizkari Ofizialean (185. zenbakia) eta 2020ko abuztuaren 21eko Diario de Navarra egunkarian, bai eta Nafarroako Gobernuaren Gobernu Irekia webgunean ere.

Era berean, iragarkia bidali zitzaien Cascante, Murchante eta Tuterako udalei, iragarki-oholetan jendaurrean jartzeko.

3.–Kontsulten izapidea.

Maiatzaren 8ko 56/2019 Foru Dekretuaren 8. artikulua aplikatuz, Zerbitzuak kontsulta egin zien ukitutako erakunde hauei, eta taulan adierazten diren txostenak jaso zituen:

Aurreko txostenen edukia ebazpen honen I. eranskinean laburbiltzen da.

4.–Jasotako alegazioak.

Jendaurrean jartzeko izapidearen esparruan, Industria Antolamenduaren, Azpiegitura Energetikoen eta Meatzeen Zerbitzuak alegazio hauek jaso zituen:

Alegazio horien edukia ebazpen honen II. eranskinean laburbiltzen da.

5.–Jendaurreko informazioaren eta kontsulten emaitza sustatzaileari igortzea.

Maiatzaren 8ko 56/2019 Foru Dekretuaren 9. artikuluari jarraikiz, aurreko txosten eta alegazio horiek Eólica Cascante SLri igorri zitzaizkion.

6.–2020ko abenduaren 22ko eskaera, 50 MW-erako.

2020ko abenduaren 22an, Eólica Cascante SLk eskabidea aurkeztu zuen, eskatzeko aurretiazko administrazio baimena, eraikitzeko administrazio baimena eta onura publikoaren deklarazioa Cascante, Murchante eta Tuterako udal mugarteetako "Cascante II" haize-parkerako eta haren energia ateratzeko azpiegituretarako.

2020ko abenduaren 23an, 2021eko urtarrilaren 28an, 2021eko uztailaren 23an eta 2021eko urriaren 8an, Eólica Cascante SLk dokumentazio gehiago aurkeztu zuen 2020ko abenduaren 22ko eskaera osatzeko.

Honela osatuko litzateke "Cascante II" haize-parkea: 10 haize-sorgailu, guztira 50 MW-eko potentzia instalatua dutenak, eta energia ateratzeko azpiegiturak, hau da, 30/66 kV-eko "Eólica Cascante 2" azpiestazioa, eta aireko eta lurpeko 66 kV-eko linea elektrikoa, azpiestazio horretan hasi eta Tuterako "La Cantera" transformazio azpiestazioan amaitzen dena, egungo "L062 Eólica de Navarra 2" posizioan.

Aireko eta lurpeko 66 kV-eko linea elektrikoaren trazadura honela osatuko litzateke:

1. Aireko 1. tartea: 1. euskarria - 33. euskarria (8.773 metro).

2. Lurpeko 1. tartea: 33. euskarritik MURCHANTE TAEraino (1.525 metro).

3. Lurpeko 2. tartea: MURCHANTE TAEtik 34. euskarriraino (377 metro).

4. Aireko 2. tartea: 34. euskarria - 35. euskarria (284 metro).

5. Lurpeko 3. tartea: 35. euskarritik CANTERA TAEraino (4.628 metro).

7.–Proiektua eta ingurumen inpaktuaren azterketa jendaurrean jartzea.

Maiatzaren 8ko 56/2019 Foru Dekretuaren 7. artikuluarekin bat etorriz, jendaurrean jarri zen Eólica Cascante SL egindako eskaera, iragarkia argitaratuz 2021eko azaroaren 9ko Nafarroako Aldizkari Ofizialean (256. zenbakia) eta 2021eko azaroaren 12ko Diario de Navarra egunkarian, bai eta Nafarroako Gobernuaren Gobernu Irekia webgunean ere.

Era berean, iragarkia bidali zitzaien Cascante, Murchante eta Tuterako udalei, iragarki-oholetan jendaurrean jartzeko.

8.–Kontsulten izapidea.

Maiatzaren 8ko 56/2019 Foru Dekretuaren 8. artikulua aplikatuz, kontsulta egin zitzaien ukitutako erakunde hauei, eta taulan adierazten diren txostenak jaso ziren:

Aurreko txostenen edukia ebazpen honen I. eranskinean laburbiltzen da.

9.–Jasotako alegazioak.

Jendaurrean jartzeko izapidearen esparruan honako alegazio hauek jaso ziren:

Alegazio horien edukia ebazpen honen II. eranskinean laburbiltzen da.

10.–Jendaurreko informazioaren eta kontsulten emaitza sustatzaileari igortzea.

Maiatzaren 8ko 56/2019 Foru Dekretuaren 9. artikuluari jarraikiz, Industria Antolamenduaren, Azpiegitura Energetikoen eta Meatzeen Zerbitzuak Eólica Cascante SLri igorri zizkion aurreko txosten eta alegazioak.

11.–Ingurumen inpaktuaren ebaluazio arrunta hasteko eta lurzoru urbanizaezinean jarduerak egiteko baimena eskuratzeko eskaera.

2022ko maiatzaren 6an Eólica Cascante SLUk eskatu zuen ingurumen ebaluazioa hasteko, batetik, eta lurzoru urbanizaezinean jarduerak egiteko baimena emateko, bestetik. Dokumentazioa jendaurrean jartzeko izapideak iraun zuten bitartean jasotako alegazio eta txostenei emandako erantzuna gehitu zuen.

Eskaera hori aztertuta, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak errekerimendua bidali zion Eólica Cascante SLUri, eta 2022ko ekainaren 13an erantzun zitzaion.

Eólica Cascante SLUk aurkeztutako dokumentazio teknikoan, proiektua jasotako txostenei egokitzeko xedez, zenbait alderdi doitu ziren, 2021eko uztailaren 23an aurkeztutako hasierako dokumentazioarekin alderatuta, eta horrek aldaketa batzuk eragin zituen ukitutako ondasun eta eskubideen zerrendan, hasieran jendaurrean jarritakoan.

Horregatik, 2022ko ekainaren 16an, Industria Antolamenduaren, Azpiegitura Energetikoen eta Meatzeen Zerbitzuak txosten eskaera bidali zion Cascanteko Udalari, izan ere udal horren titulartasunekoak baitira aldaketaren eraginpeko lurzati guztiak.

Laburbilduz, proiektuak egokitu egin zituen sarbideak eta 6. eta 7. haize-sorgailuen arteko barne bidearen trazadura, Herri Lan Zuzendaritza Nagusiko Zainketa Atalaren eta Baso Plangintzarako eta Ingurumen Hezkuntzarako Atalaren txostenei erantzuteko, abelbideen gaineko ukipenari dagokionez. Ingurumen inpaktuaren azterketan zenbait akats zuzendu ziren eta informazioa osatu egin zen, Ingurumen Eraginaren Atalaren txostenean adierazitakoa kontuan hartuta.

Aldaketek ez dute hasieran ezarritakoez gain bestelako ingurumen ondorio adierazgarririk eraginen.

Maiatzaren 8ko 56/2019 Foru Dekretuaren 10. artikuluan ezarritakoa betez, Industria Antolamenduaren, Azpiegitura Energetikoen eta Meatzeen Zerbitzuak eskaera igorri zien Ingurumen Eraginaren Atalari eta Lurraldearen Antolamenduaren Atalari.

12.–Ingurumen inpaktuaren adierazpena.

2022ko irailaren 12an, Ingurumen Eraginaren Atalak informazio errekerimendua eman zuen. Errekerimendu hori 2022ko irailaren 14an helarazi zitzaion Eólica Cascante SLUri eta enpresak 2022ko azaroaren 11n erantzun zion.

2022ko azaroaren 20an Eólica Cascante SLUk Industria Antolamenduaren, Azpiegitura eta Energetikoen eta Meatzeen Zerbitzuan dokumentazioa aurkeztu zuen Basoen eta Ehizaren Zerbitzuko Baso Plangintzarako eta Ingurumen Hezkuntzarako Atalaren 2022ko apirilaren 20ko txostenari erantzunez. Dokumentazio hori Ingurumen Eraginaren Atalari igorri zitzaion 2022ko irailaren 21ean.

2023ko urtarrilaren 10ean, Eólica Cascante SLUk Industria Antolamenduaren, Azpiegitura eta Energetikoen eta Meatzeen Zerbitzuan dokumentazioa aurkeztu zuen non erdi tentsioko sarearen trazadura eguneratu zen "Tarazonako Adarra" abelbidearekiko paralelismoa saihesteko. Dokumentazio hori Ingurumen Eraginaren Atalari igorri zitzaion 2023ko urtarrilaren 11n.

Ingurumeneko zuzendari nagusiaren urtarrilaren 23ko 52E/2023 Ebazpenaren bidez aldeko ingurumen inpaktuaren adierazpena egin zen, adieraziz CA-09 eta CA-10 haize-sorgailuak izan ezik "Cascante II" haize-parkearen proiektua gauzatzen ahal zela Cascanteko udalerrian, energia ateratzeko lotutako azpiegiturak ere barne, hau da, Cascante II instalazioko transformazio azpiestazioa eta "La Cantera" azpiestaziorainoko ebakuazio linea elektrikoa barne, Cascante, Murchante eta Tuterako udalerrietan.

Txosten horretan, besteak beste, honako hauek zehazten dira:

a) Ingurumen organoaren ondorioak eta balorazioa:

Espedientearen azterketa teknikoa egin ondoren, Biodibertsitatearen Zerbitzuak bere txostenean dio behar bezala egin dela ingurumen inpaktuaren ebaluazioaren prozedura.

Ingurumen organoak uste du egiaztaturik dagoela Cascante II haize-parkea ezarri nahi den eremua Bonelli arranoaren ale heldugabeen barreiatze eta jalkitze zona garrantzitsu bat dela. Ingurumen organoaren iritziz, CA-09 eta CA-10 haize-sorgailuak bigarren lerrokadura batean ezartzen badira, Cascanteko haize-parkerako aldeko ingurumen inpaktuaren adierazpena egiten duen Ingurumeneko eta Lurraldearen Antolamenduko zuzendari nagusiaren azaroaren 22ko 757E/2017 Ebazpenean aldeko txostena jaso zuen lerrokadura baino ipar-mendebalderago, nabarmen handituko da haize-parkeak Bonelli arranoarengan sortzen duen huts-efektua, baita hesi-efektua ere, harrapakin ugariko eremu ireki batean, La Canterako gainean landatutako basoetatik urrun; eremu hori oso aktiboki erabiltzen dute bai Bonelli arranoak bai eguzki arrano iberiarraren eta arrano beltzaren ale ia helduek.

Ingurumen organoak uste du La Canterako gaineko ipar-mendebaldeko hegalean goi tentsioko (66 kV) aireko linea elektriko bat jartzeak talka egiteko edota elektrokutatzeko arrisku handia sortuko liekeela eremua erabiltzen duten tamaina ertaineko eta handiko hegaztiei. Ebakuaziorako goi tentsioko linearen lehenbiziko tartea airetik diseinatzeari dagokionez, ingurumen organoak uste du talka arrisku handia dagoela hegazti espezie nekrofago fakultatiboen edo oportunisten populazio batzuentzat, egunero beren ugaltze edota atseden lekuetatik joan-etorriak egiten dituztelako El Culebrete parajera, Erriberako Mankomunitateak bertan daukan hondakinen tratamendu instalaziora eta hondakindegira. Aurreikus daitekeen inpaktu adierazgarri hori eta paisaiaren gaineko inpaktua ezabatzeko, Cascante II TAEtik La Cantera TAErainoko ebakuazio linearen aireko lehen tartearen trazadura lurpean egin beharko da.

b) Ezarritako ingurumen baldintzak:

34 baldintza ezarri dira, batetik proiektuaren baldintza orokorrak, eta bestetik inpaktu adierazgarrienetarako prebentzio eta zuzenketa neurriei dagozkien baldintzak. Hauek dira nagusiak:

–Exekuzio proiektuan, malda txikieneko eta lur mugimendu txikieneko eremuetan diseinatu behar dira haize-sorgailuen, muntaketa plataformen eta bideen maniobra eremuen kokapenak. Arreta berezia jarriko da lur mugimendu gutxi egiteko eta lur erauzketetan eta betelanetan ezponda etzanak egiteko, CA-04, CA-05 eta CA-06 haize-sorgailuen exekuzioan. Egin beharreko lur erauzketa eta betelanetarako, gehienez 2H:1B-ko maldak izanen dira onargarriak, landareztatzeak emaitza onargarria izan dezan.

–Cascante II haize-parkean ekoitzitako energia ateratzeko linea elektrikoan (Cascante TAEtik La Cantera TAErainoko 66 kV-eko goi tentsioko linea) airetik doan lehenbiziko tartea (1. euskarritik 33. euskarrira, 8.773 m) zanga batean lurperatuta diseinatu eta gauzatu beharko da.

–Eraikitzeko administrazio baimenaren eskaerarekin batera, sustatzaileak ingurumena lehengoratzeko eta paisaian integratzeko proiektu xehakatu bat aurkeztu beharko du, aurrekontu eta guzti. Biodibertsitatearen Zerbitzuak gainbegiratu eta balidatu beharko du.

–Lurpeko linea elektrikoaren trazadura tarteka abelbideen ondotik doa edo haiek gurutzatzen ditu. Horregatik, Baso Plangintzarako eta Ingurumen Hezkuntzarako Atalaren aldeko txostena beharko da trazadura hori gauzatzeko.

–Abuztutik urrira bitartean (biak barne), iluntzetik egunsentira arte, 6 m/s-ra handituko da haize-sorgailuak abiatzeko haizearen abiaduraren atalasea, horiek baitira kiropteroen jarduera handieneko egunak eta orduak. Neurri hori berrikusten ahalko da saguzarren altuerako jarduera aztertzen bada, egiten dituzten hegaldiak noiz eta zer egoeratan egiten dituzten zehatz-mehatz zehazteko (egunak, baldintza atmosferikoak…); horretarako, Biodibertsitatearen Zerbitzuaren aldeko txostena izan beharko da.

–Talkaren aurkako gailuak jarriko dira, detekzioaren eta geldialdiaren bidezkoak, Cascante II haize-parkeko haize-sorgailu guztietarako. Gailu eraginkorrenak 3D-ko zaintza sistemak dira.

–IIAn "Aireko 2. tartea: 34. euskarria - 35. euskarria (284 m)" deritzon aireko tarteak eta Cascante II transformazio azpiestazio jasotzaileak 2022ko IIAren 8.5.2.3 apartatuan adierazitako prebentzio eta zuzenketa neurriak eduki behar dituzte eta hegazti-faunaren babesari buruzko araudian ezarritakoa bete behar dute. Hegaztiak salbatzeko baliza birakari islatzaileak instalatuko dira aireko tarte guztietan, edo ingurumen organoak aurrez onartutako antzeko funtzionaltasuna duten beste baliza batzuk.

–Ingurumena zaintzeko planak –eraikuntza proiektuarekin batera aurkeztu behar da– espazioaren erabilera aztertzeko eta hegaztien eta kiropteroen hilkortasuna kontrolatzeko metodologiari eta jarduketei buruzko gutxieneko jarraibideak jasoko ditu.

13.–Lurzoru urbanizaezineko baimena.

2022ko ekainaren 29an, Lurraldearen Antolamenduaren Atalak informazio errekerimendua eman zuen. Errekerimendu hori egun berean helarazi zitzaion Eólica Cascante SLUri, eta enpresak 2022ko irailaren 13an erantzun zion.

2022ko urriaren 10ean, Lurraldearen Antolamenduaren Atalak bigarren informazio errekerimendu bat eman zuen. Errekerimendu hori urriaren 18an helarazi zitzaion Eólica Cascante SLUri eta enpresak 2022ko azaroaren 15ean erantzun zion.

2022ko abenduaren 20an, Lurraldearen Antolamenduaren Atalak hirugarren informazio errekerimendu bat eman zuen. Errekerimendu hori abenduaren 22an helarazi zitzaion Eólica Cascante SLUri.

2023ko urtarrilaren 10ean, Eólica Cacante SLUk Industria Antolamenduaren, Azpiegitura eta Energetikoen eta Meatzeen Zerbitzuan dokumentazioa aurkeztu zuen non erdi tentsioko sarearen trazadura eguneratu zen "Tarazonako adarra" abelbidearekiko paralelismoa saihesteko. Dokumentazio hori Lurraldearen Antolamenduaren Atalari igorri zitzaion 2023ko urtarrilaren 11n.

Lurralde eta Paisaia Zerbitzuaren zuzendariaren martxoaren 29ko 135E/2023 Ebazpenaren bidez, lurzoru urbanizaezinean jarduerak eta erabilerak egitea baimendu zen Cascante II haize-parkearen eta lotutako ebakuazio azpiegituren proiekturako, Cascante, Murchante eta Tuterako udal mugarteetan. Horretarako, ebazpen horretan zehazten diren determinazioak bete behar dira.

14.–Alegazioei eta txostenei emandako erantzuna.

Espedientean dagoen dokumentazio guztia aintzat hartuz, Industria Antolamenduaren, Azpiegitura Energetikoen eta Meatzeen Zerbitzuak ebazpen honen I. eta II. eranskinetan adierazitakoaren arabera informatu du.

15.–Aurretiazko administrazio baimenaren proposamena.

2023ko apirilaren 14an, kontuan hartuta ingurumen inpaktuaren adierazpenean eta lurzoru urbanizaezineko jardueretarako eta erabileretarako baimenean ezarritakoa, Eólica Cascante SLUk adierazi du "Cascante II" haize-parkeak 8 haize-sorgailu izanen dituela, bakoitza 163 metroko errotorearekin, 122 metroko abatz-altuerarekin eta 6,25 MW-eko potentzia unitarioarekin, edo antzeko ezaugarriekin, eta guztizko potentzia instalatua 50 MW izanen dela.

Maiatzaren 8ko 56/2019 Foru Dekretuaren 5. artikuluarekin bat etorriz, espedientean Eólica Cascante SLUren gaitasun tekniko, ekonomiko eta juridikoaren ziurtagiria dago.

Era berean, Sektore Elektrikoari buruzko abenduaren 26ko 24/2013 Legearen 53. artikuluak ezartzen duenarekin bat, Eólica Cascante SLUk banaketa sarearen kudeatzailearen baimena du sarbidea eta konexioa egiteko.

Horregatik guztiagatik, aurkeztu den dokumentazioa aztertu ondoren, eta Nafarroan parke eolikoetarako baimena arautzen duen maiatzaren 8ko 56/2019 Foru Dekretuan ezarritakoari jarraikiz, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak, prozedura behar bezala egin dela iritzita, proposatzen du Eólica Cascante SLUri aurretiazko administrazio baimena ematea.

Adierazitakoarekin eta espedientean jasotako agiriekin bat, eta Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. Aurretiazko administrazio baimena ematea Eólica Cascante SLUri, energia elektrikoa ekoizteko "Cascante II" haize-parkea instala dezan, 8 haize-sorgailurekin eta 50 MW-eko guztizko potentziarekin, baita energia ateratzeko azpiegiturak ere, Cascante, Murchante eta Tuterako udal mugarteetan, Lurralde eta Paisaia Zerbitzuko zuzendariaren martxoaren 29ko 135E/2023 Ebazpenean eta Ingurumeneko zuzendari nagusiaren urtarrilaren 23ko 52E/2023 Ebazpenean ezarritako baldintzen arabera.

2. Baimen hau emanda ere, instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, aplikatzekoak diren beste xedapen batzuekin bat.

3. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzura, Ingurumen Eraginaren Atalera, Lurraldearen Antolamenduaren Atalera, Ondare Historikoaren Zerbitzura, Herri-lanen eta Azpiegituren Zuzendaritza Nagusira, Baso Plangintzarako eta Ingurumen Hezkuntzarako Atalera, Ureztalurren eta Lurzati Berrantolamenduaren Atalera eta Herri-lurren Atalera, behar diren ondorioak izan ditzan.

4. Ebazpen hau Nafarroako Aldizkari Ofizialean argitaratzea, orok jakin dezan.

5. Ebazpen hau jakinaraztea Eólica Cascante SLUri, Nafarroako Ubidea SAri, Autopista Vasco Navarra AP-68ri, Eólica Montes de Cierzo SLUri, Enerfín Renovables SLri, Eólica Ablitas SLri, Eólica Navarra SLri, Eólica Pestriz SLri, Eólica Valdetellas SLri, Solen Energía Ribera SLri, Iberdrola Renovables La Rioja SAri, i-DE Redes Eléctricas Inteligentes SAUri, Molinos de la Rioja SAUri, Nedgia Navarra SAri, Red Eléctrica de España SAUri (Tramitazio Saila), Red Eléctrica de España SAU (Sarbide Saila), Sistemas Energéticos El Valle SAri, Sistemas Energéticos Loma del Viento SAri, Cascanteko Ureztatzaileen Sindikatuari, Murchanteko Ureztatzaileen Sindikatuari, Nafarroako Paisaiak eta Mahastiak elkarteari, Sustrai Erakuntza Fundazioari, SECEMUri, Ongaiz-Zangozako Ekologistak Martxan elkarteari, Erriberako Ekologistak Martxan elkarteari, Miguel Escudero del Castillo jaunari eta María Teresa Aguado Chueca andreari. Ohartaraziko zaie ebazpen honek ez duela administrazio bidea amaitzen eta beraren aurka gora jotzeko errekurtsoa jartzen ahal dela, Garapen Ekonomiko eta Enpresarialeko kontseilariari zuzendua, ebazpen hau jakinarazi eta biharamunetik hilabeteko epean, errekurtsoan espedientearen zenbakia adierazita.

6. Ebazpen hau jakinaraztea Cascanteko Udalari, Murchanteko Udalari, Tuterako Udalari eta Ebroko Konfederazio Hidrografikoari, eta ohartaraztea ebazpen honen kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2023ko apirilaren 17an.–Industriaren, Energiaren eta S4 Proiektu Estrategikoen zuzendari nagusia, Uxue Itoiz Mariñelarena.

I. ERANSKINA

Jasotako txostenak

Jarraian, Industria Antolamenduaren, Azpiegitura Energetikoen eta Meatzeen Zerbitzuak hurrenez hurreneko kontsulten izapideetan jasotako txostenak laburbiltzen eta aztertzen dira:

1. eta 1 bis txostenak.–Cascanteko Udala.

Jendaurreko informazioaren eta kontsulten lehen eta bigarren izapideetan, udalak jakinarazi zuen egin nahi den jarduera hirigintzako udal planeamendu indardunarekin bateragarritzat jotzen zela.

2. eta 2 bis txostenak.–Tuterako Udala.

Jendaurreko informazioaren eta kontsulten lehen eta bigarren izapideetan udalak hau adierazi zuen:

–Hirigintzako Zerbitzu Teknikoak:

1. Linea elektrikoak zeharkatuko dituen lurrak lurzoru orokorraren kalifikazioa dute, eta, hirigintzaren ikuspegitik, esan behar da inpaktua sortzen duela lurzoru urbanizaezinean zehar hainbeste linea elektrikoren azpiegiturak izateak, bai egungo azpiegiturak, bai baimentze prozesuan dauden eguzki- eta haize-instalazioetarako proiektatu direnak.

2. Baliteke proiektu hau Nafarroako Ubidearen Proiektu Sektorialaren eraginpean egotea.

3. Proiektua kokatu nahi den lurzatiak Tuterako Udalaren herri-lurretakoak dira. Beraz, haren baimena izapidetu beharko da.

–Nekazaritza, Abeltzaintza eta Mendiak:

1. Eskertzekoa da sustatzailea prest egotea inpaktu ahalik eta txikienak sortuko dituen trazadura adosteko Tuterako Udalarekin.

2. Ez da eragozpenik ikusten onura publikoa aitortzeko, "Cascante II goi tentsioko linearen okupaziorako baldintzen agiria" betetzen bada, betiere.

Erantzuna: txostena sustatzaileari bidali zaio, eta ez du eragozpenik jarri.

3. eta 3 bis txostenak.–Lurraldearen Antolamenduaren Atala.

Atalak honako txosten hauek egin ditu:

–0003-OT12-2020-000098 espedientea, 2020ko urriaren 9koa.

–0003-OT12-2021-000234 espedientea, 2021eko otsailaren 18koa.

4. txostena.–Nafarroako Ubidea SA.

Kontsulten lehen izapidean, Nafarroako Ubidea SAk hau adierazi zuen:

1. Ez dago zuzeneko ukipenik "Cascante II" haize-parketik energia ateratzeko azpiegituren eta Nafarroako Ubidearen trazaduraren artean.

2. Nolabaiteko erreparoa agertzen da goi tentsioko dorreen behin betiko kokalekua dela-eta, ubidearen trazaren inguruetan, 1. gurutzagunean (8. gurutzagunea, proiektuaren sustatzailearen arabera).

3. Adierazten da gerta litekeela "El Volandín" eta "Cascante II" haize-parkeen proiektuetako goi tentsioko lineek bat egitea Tuterako "La Cantera" transformazio azpiestazioaren inguruetan.

Erantzuna: txostena sustatzaileari bidali zaio, eta ez du eragozpenik jarri.

5. eta 5 bis txostenak.–Ondare Historikoaren Zerbitzua.

Ondare Historikoaren Zerbitzuko Ondare Arkitektonikoaren Atalak jendaurreko lehen eta bigarren izapideetan jakinarazi zuen proiektuak ez ziola bere eskumeneko ezeri eragiten.

6. eta 6 bis txostenak.–Herri-lanen eta Azpiegituren Zuzendaritza Nagusia.

Zainketa Zerbitzuak jendaurreko informazioaren lehen eta bigarren izapideetan emandako txostenetan zenbait baldintza tekniko ezarri zituen. Gogorazi zuen nola sustatzaileak, baimen-eskaerarekin batera, egin beharreko obrak behar bezala zehazten dituen dokumentazio teknikoa aurkeztu behar duen aipatutako zuzendaritza nagusian.

Erantzuna: txostenak sustatzaileari bidali zaizkio, eta hark adierazi du espedientean jasorik dagoela abenduaren 10eko 944/2020 Ebazpena, Herri-lanen eta Azpiegituren zuzendari nagusiak emana, Cascante-Fitero NA-6900 errepideko 2+240 kilometro puntuan, ezkerreko aldean, sarbide berri bat egiteko baimena ukatzen duena, eta goi tentsioko linea elektrikoarekin aireko lau gurutzatze egiteko baimena ematen duena (AOP 2020/465 espedientea). Sarbideari dagokionez, sustatzaileak esan du Lurralde Kohesiorako Departamentuko Zainketa Zerbitzuarekin hitz egiten ari dela baimentzeko moduko konponbide onena bilatzeko.

7. eta 7 bis txostenak.–Nekazaritzako Azpiegituren Zerbitzuko Ureztalurren eta Lurzati Berrantolamenduaren Atala.

Ureztalurren eta Lurzati Berrantolamenduaren Atalak bi txosten eman zituen.

Jendaurreko informazioaren eta kontsulten bigarren izapidean emandako txostenak hau dio:

1. "Cascante II" haize-parkea eta haren ebakuazio azpiegiturak instalatzeak eragin arina du egungo ureztalurretan eta Nafarroako Foru Komunitateko Ureztatze Planean.

2. Lurzati batzuk Nafarroako Ubidearen bigarren fasean sartuta daudenez, beharrezkoa izanen da Landa Garapeneko, Nekazaritzako eta Abeltzaintzako Zuzendaritza Nagusiaren berariazko baimena.

Erantzuna: txostenak sustatzaileari igorri zaizkio, eta hark esan du 2022ko abuztuaren 25ean Ingurumen Zuzendaritza Nagusiaren baimena lortu zela.

8. eta 8 bis txostenak.–Ingurumen Eraginaren Atala.

Atalak honako txosten hauek egin ditu:

–0003-0215-2020-000214 espedientea, 2021eko maiatzaren 18koa.

–0003-0226-2021-000077 espedientea, 2022ko apirilaren 22koa.

9. eta 9 bis txostenak.–Ebroko Konfederazio Hidrografikoa.

Kontsulten lehen izapidean, erakunde honek aditzera eman zuen, ur jabari publikoaren ukipenei eta korronteen erregimenari dagokienez, proiektuko obrak baimentzen ahal direla, espedienteko dokumentazioaren arabera, baldin eta legezko arauak betetzen badira.

Jendaurreko informazioaren eta kontsulten bigarren izapidean jakinarazi zuen, erakundearen Informazio Geografikoko Sistemaren arabera, haize-parkearen poligonalaren zati bat Queiles ibaiaren azpiarro hidrografikoan dagoela, eta, ondorioz, zenbait baldintza ezarri zituen, eta jabari publiko hidraulikoan jarduketak baimentzeko irizpide teknikoak erantsi.

Erantzuna: txostenak sustatzaileari igorri zaizkio, eta hark esan du martxoaren 22an berariazko baimena eskatu zitzaiola Ebroko Konfederazio Hidrografikoari, ebakuazio lineak sortzen dituen ukipenak direla-eta.

10. txostena.–Autopista Vasco Aragonesa AP-68.

Kontsulten bigarren izapidean erakunde honek adierazi zuen nola 2021eko azaroaren 3an kontzesiodun horrek zegokion txostena bidali zion AP-68 autobideko ustiapenaren ikuskatzaileari.

Erantzuna: txostena sustatzaileari igorri zaio, eta hark adierazi du AP-68 autobideko ustiapenaren ikuskatzailearen txosten hori jasotzeko zain dagoela.

11. txostena.–Eólica Ablitas SL.

Kontsulten bigarren izapidean, Eólicas Ablitas SLk adierazi zuen ez zuela inolako eragozpenik jartzen proiektua garatzeko.

12. txostena.–Eólica Navarra SL.

Kontsulten bigarren izapidean, Eólicas Navarra SLk adierazi zuen ez zuela inolako eragozpenik jartzen proiektua garatzeko.

13. txostena.–Eólica Pestriz SL.

Kontsulten bigarren izapidean, Eólicas Pestriz SLk adierazi zuen ez zuela inolako eragozpenik jartzen proiektua garatzeko.

14. txostena.–Eólica Valdetellas SL.

Kontsulten bigarren izapidean, Eólicas Valdetellas SLk adierazi zuen ez zuela inolako eragozpenik jartzen proiektua garatzeko.

15. txostena.–Molinos de la Rioja SAU.

Kontsulten bigarren izapidean, Molinos de la Rioja SAUk baldintzak ezarri zituen eta eskatu zuen dokumentazioa eguneratzeko eraikuntza fasean dauden makinekin eta distantziekin.

Erantzuna: txostena sustatzaileari bidali zaio, eta hark adierazi du betetzen dela otsailaren 15eko 223/2008 Errege Dekretuko ITC-LAT 06 jarraibidearen 5. apartatua; berariazko apartatu bat gehituko dela hondeatze lanetarako eta kablea jartzeko behar den makineriarekin; eta Molinos de la Riojari abisua emanen zaiola eraikuntza hasten denean, onartutakoa betetzen dela eta azken emaitza egokia dela egiaztatzeko.

16. txostena.–Nedgia Navarra SA.

Kontsulten bigarren izapidean, Nedgia Navarra SAk adierazi zuen ez dagoela bere jabetzako gas instalaziorik eremuan eta, hortaz, ez daukala baldintza teknikorik ezarri beharrik.

17. txostena.–Red Eléctrica de España SAU.

Kontsulten bigarren izapidean, Red Eléctrica de España SAUk hau adierazi zuen:

1. "Cascante II" haize-parkeari, 30 kV-eko ebakuazio lineari eta REEren "Cascante II" TAEari dagokienez ez du eragozpenik, ez dutelako bere jabetzako instalaziorik ukitzen.

2. 66 kV-eko ebakuazio lineari dagokionez, 400 kV-eko Santa Engracia-Serna lineako 357. euskarritik hurbil dago haren kanalizazioa, eta, beraz, euskarri horren inguruetan egiten diren lanak REEko langileek gainbegiratu behar dituzte, euskarrietako lur-konexioko sistema ukitu ez dadin.

Erantzuna: txostena sustatzaileari bidali zaio, eta ez du eragozpenik jarri.

18. txostena.–Nekazaritzako Azpiegituren Zerbitzuko Herri-lurren Atala.

Kontsulten bigarren izapidean, Herri-lurren Atalak jakinarazi zuen proiektuak herri-lurretako lurzatiak ukitzen dituela eta eragindako udalek ukituko diren lurretako herri-ondasunak okupatzeko espedienteak izapidetu behar dituztela, Nafarroako Toki Administrazioari buruzko uztailaren 2ko 6/1990 Foru Legearen 172. artikuluan xedatutakoaren arabera.

Erantzuna: espedientea sustatzaileari igorri zaio, eta hark adierazi du Eólica Cascante SL udalerri bakoitzean okupazio/desafektazio egokia kudeatzen ari dela Cascante II haize-parkea eta hari lotutako azpiegiturak eraikitzeko lurrak eskuratu ahal izateko.

Gogoratu behar da Sektore Elektrikoari buruzko abenduaren 26ko 24/2013 Legearen 54. artikuluak elektrizitatea sortzeko, garraiatzeko eta banatzeko instalazio elektrikoen onura publikoa deklaratzen duela, haiek ezartzeko behar diren ondasun eta eskubideen nahitaezko desjabetzearen ondorioetarako eta bide zorra ezarri eta erabili ahal izateko.

19. txostena.–Cascanteko Ureztatzaileen Sindikatua.

Kontsulten bigarren izapidean, Cascanteko Ureztatzaileen Sindikatuak oniritzia eman zien berak kudeatutako erretenetan egin beharreko jarduketei, eta aintzat hartu beharreko baldintza batzuk adierazi zituen.

Erantzuna: txostena sustatzaileari bidali zaio, eta ez du eragozpenik jarri.

20. txostena.–Solen Energía Ribera SL.

Kontsulten bigarren izapidean, Solen Energía Ribera SLk adierazi zuen ez zuela inolako eragozpenik jartzen proiektua garatzeko.

21. txostena.–Basoen eta Ehizaren Zerbitzua.

Kontsulten bigarren izapidean, Baso Plangintzarako eta Ingurumen Hezkuntzarako Atalak hau adierazi zuen:

1. Tarazonako Adarrean haize-parkeko bidea tarteka 11. iraganbidearen ondotik edo gainetik joatea proposatu dela-eta, horri buruzko txostena kontrakoa da.

2. Aireko goi tentsioko linea 11. iraganbidearen ondotik joatea baimengarritzat jotzen da.

3. Haize-sorgailuen kokalekuari buruz aldeko txostena ematen da, baina zenbait baldintza ezarrita, abelbideei dagokienez.

Erantzuna: txostena sustatzaileari igorri zitzaion, eta 2022ko irailaren 20an dokumentu hau aurkeztu zuen, Tarazonako Adarraren gainetik zihoan trazaduraren aldaketarekin: "Abelbideei buruzko eranskina: CASCANTE II HAIZE-PARKEA: 2022ko ekaineko aldaketaren eranskina".

II. ERANSKINA

Jasotako alegazioak

Jarraian, jendaurreko bi izapideetan jasotako alegazioak laburtzen eta aztertzen dira.

1. eta 1 bis alegazioak.–Gurelur.

Elkarren antzekoak direla iritzita, batera aztertu dira jendaurreko lehen eta bigarren izapideetan aurkeztutako idazkiak. Horietan Gurelurrek adierazten du Cascante II parke eolikoa ez litzatekeela baimendu behar, paisaiaren, Europar Batasunaren intereseko habitaten eta espezie babestuen gainean inpaktu handia izanen lukeelako hura eraikitzeak eta ez delako betetzen horrelako instalazioei buruzko araudia; azpimarratzen du ez dela kiropteroen urteko zikloari buruzko azterketarik aurkeztu, besteren datuak baliatu direla, eta IIAk akatsak dituela, ez baitu betetzen Ingurumen Ebaluazioari buruzko Legean ezarritakoa.

Erantzuna: ingurumen edukia duten alderdiak ingurumen inpaktuaren adierazpenaren esparruan ebaluatu dira (52E/2023 Ebazpena, urtarrilaren 23koa, Ingurumeneko zuzendari nagusiak emana).

Argitu behar da kiropteroen urteko ziklo osoaren azterketa jendaurrean jarri zela jendaurreko bigarren izapidean.

2. alegazioa.–Miguel Escudero del Castillo.

Jendaurreko lehen izapidean Miguel Escudero jaunak alegatu zuen proiektuak Murchanteko 1. poligonoko 184., 186. eta 187. lurzatiak ukitzen dituela eta lurzati horietan nekazaritzako jarduera egiten dela makina handiak erabiliz, proiektuko lineen segurtasun distantzia baino altuera handiagokoak. Eskatu zuen linearen trazadura aldatzeko edo/eta linearen ezaugarriak aldatzeko.

Erantzuna: ebakuazio linearen trazadura aldatu egin da eta ukipena murriztu; hori jendaurrean jarri da 2021eko azaroaren 12an.

3. Alegazioa.–Nafarroako Paisaiak eta Mahastiak elkartea.

Jendaurreko lehen izapidean, Nafarroako Paisaiak eta Mahastiak elkarteak 19 alegazio jasotzen zituen idazkia aurkeztu zuen. Hona alegazioen zerrenda:

1. Bera interesduna da.

2. Informazioaren eskuragarritasuna.

3. Txostenen eskuragarritasuna.

4. Proiektuaren ingurumen inpaktuaren adierazpenaren iraungitzea.

5. Ingurumen baimen integraturik eza.

6. Ez da behar bezalako dokumenturik aurkeztu sustatzaileari eta haren gaitasun ekonomikoari buruz.

7. Eólica Cascantek ez ditu betetzen haize-parkeei buruzko Nafarroako araudiak ezartzen dituen baldintza ekonomiko eta finantzarioak.

8. Ez da egiaztatu hegaztien urteko ziklo oso baten azterketa egin denik.

9. Espezie babestuen gaineko inpaktuaren balorazio oso kaskarra.

10. Arriskuan dauden espezieen presentziaren baloraziorik eza.

11. Hesi efektua eta hegaztiek talka egiteko arriskua gutxiesten dituen balorazioa.

12. Kiropteroei buruzko informazio nahikorik eza.

13. Kiropteroen gaineko hots-inpaktuaren baloraziorik eza.

14. Ugaztunen presentzia zehazteko daturik eza.

15. Ingurumen inpaktuen balorazio onartezina.

16. Lorko aintzirako hezegunearen gaineko ukipena.

17. Nekazaritzako eremuek paisaiarako eta espezieen iraupenerako duten garrantzia aintzat ez hartzea.

18. Hegazti-faunaren gaineko inpaktuaren balorazioan IIAk ez ditu aintzat hartu ezarritako metodo zientifikoak.

19. Kutsadura akustikoaren baloraziorik eza.

Azkenik, alegazioaren egileak ondorio batzuk adierazi zituen, eta espedientean sortutako txostenak eta alegazioak bidaltzeko eskatu zuen.

Erantzuna: ingurumen edukia duten alderdiak ingurumen inpaktuaren adierazpenaren esparruan ebaluatu dira (52E/2023 Ebazpena, urtarrilaren 23koa, Ingurumeneko zuzendari nagusiak emana).

Sustatzaileak behar bezala frogatu du bere lege gaitasuna, gaitasun teknikoa eta ekonomikoa, maiatzaren 8ko 56/2019 Foru Dekretuaren 24. artikuluan ezartzen den bezala.

Azkenik, adierazi behar da 2020ko azaroaren 5ean alegatzaileari igorri zitzaiola eskatutako dokumentazioa, eta espedientean jasota dagoela hartu izana.

4. alegazioa.–Sustrai Erakuntza Fundazioa.

Jendaurreko bigarren izapidean Sustrai Erakuntza Fundazioak hau adierazi zuen:

1. Aurkeztutako proiektuak energia berriztagarrien produkzioa handitzea du xede, baina ez du Nafarroako energia egoera aztertzen.

2. Ez da aztertzen proiektua eraikitzearen eta landare estalkia kentzearen ondorioz sortzen den CO2 isuria.

3. Aurkeztutako proiektuak ingurumen balioa duten eremuetan lur mugimenduak egitea dakar.

4. Aurkeztutako proiektuak eragin larriak ditu naturaguneetan.

5. Aberastasun natural handiko eremua da.

6. "Cascante II" haize-parkeak ez ditu betetzen ez Cascanteko udalerriko hirigintzako arauak ez LAP 5 Ebroko Ardatza planeko lurralde antolamendua.

7. Aurkeztutako proiektuak ingurumen eragin larriak ditu faunan.

Erantzuna: ingurumen edukia duten alderdiak ingurumen adierazpenaren esparruan ebaluatu dira.

Proiektua Nafarroako egoera energetikorako egokia izateari dagokionez, proiektuan Sektore Elektrikoari buruzko abenduaren 26ko 24/2013 Legeak ezartzen dituen baldintzak eta helburuak betetzen dira, eta bat dator Estatuko sektore elektrikoaren planarekin eta 2030erako Nafarroako Energia Planarekin. Era berean, adierazi behar da 2030erako Nafarroako Energia Planak aurreikuspen orientagarri batzuk biltzen dituela, eta Nafarroak energiaren gaian eramanen duen estrategia markatzen badu ere, ez dela erregelamendu bat.

Hirigintzako araudia betetzen ote den aztertu da lurzoru urbanizaezinean baimentzen ahal diren jarduerak baimentzeko esparruan.

5 alegazioa.–SECEMU.

Jendaurreko bigarren izapidean aurkeztutako idazkian, kiropteroei buruzko alegazioak aurkeztu ziren.

Erantzuna: ingurumen edukia duten alderdiak ingurumen adierazpenaren esparruan ebaluatu dira.

6. alegazioa.–Ongaiz-Zangozako Ekologistak Martxan elkartea, eta 7. alegazioa, Erriberako Ekologistak Martxan elkartea.

Horien edukia ia berbera denez, elkarrekin aztertu dira aipatutako elkarteek jendaurreko bigarren izapidean aurkeztutako alegazio idazkiak:

1. Nafarroako egoera energetikoa. Oro har, adierazten du parke eolikoak 2030erako Nafarroako Energia Planean energia eolikorako desegokitzat jotako edo ingurumen eta lurralde mugak dituzten eremuetan daudela.

2. Energia berriztagarrien proiektuen ingurumen inpaktuak.

3. Klima-aldaketaren ondorioak/ekarpena. Proiektuak fase guztietan klima-aldaketan eta CO2 emisioetan eta beste kutsatzaile batzuen emisioetan edukiko duen eragina kuantifikatu beharko litzateke.

4. "Cascante II" haize-parkearen eta haren ebakuazio linearen inguruneko ingurumen balioak, eta proiektatutako haize-parkeak eta haren ebakuazio lineak izanen dituzten inpaktuak.

5. Energia kontsumoa murrizteko alternatibak; efizientzia energetikoa; autokontsumoa; erregai fosilen ordez energia berriztagarriak erabiltzea.

6. Lehendik dauden parkeak birpotentziatu behar dira proiektu berriak saihesteko.

7. Ingurumen Erantzukizunari buruzko Legea aldatzea.

Erantzuna: ingurumen edukia duten alderdiak ingurumen adierazpenaren esparruan ebaluatu dira.

Proiektua Nafarroako egoera energetikorako egokia izateari dagokionez, proiektuan Sektore Elektrikoari buruzko abenduaren 26ko 24/2013 Legeak ezartzen dituen baldintzak eta helburuak betetzen dira, eta bat dator Estatuko sektore elektrikoaren planarekin eta 2030erako Nafarroako Energia Planarekin. Era berean, adierazi behar da 2030erako Nafarroako Energia Planak aurreikuspen orientagarri batzuk biltzen dituela, eta Nafarroak energiaren gaian eramanen duen estrategia markatzen badu ere, ez dela erregelamendu bat.

8. alegazioa.–María Teresa Aguado Chueca.

Jendaurreko bigarren izapidean, María Teresa Aguado Chueca andreak alegatu zuen ez zegoela ados linea elektrikoa bere jabetzako finketatik igarotzearekin, eta ez zegoela ados bere jabetzako lurrak Udalak herri-lur bilakatzearekin.

Erantzuna: sustatzaileak adierazi du María Teresa Aguado andrearekin harremanetan jarriko dela haren jabetzako lurretan edozein jarduketa egin aurretik.

Gogoratu behar da Sektore Elektrikoari buruzko abenduaren 26ko 24/2013 Legearen 54. artikuluak elektrizitatea sortzeko, garraiatzeko eta banatzeko instalazio elektrikoen onura publikoa deklaratzen duela, haiek ezartzeko behar diren ondasun eta eskubideen nahitaezko desjabetzearen ondorioetarako eta bide zorra ezarri eta erabili ahal izateko.

Iragarkiaren kodea: F2306053