Iragarkia

61. ALDIZKARIA - 2023ko martxoaren 27a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

IRUÑA
–IRUÑEKO UDALAREN HAUR ESKOLAK–

2023ko plantilla organikoa. Behin betiko onespena

Nafarroako Administrazio Publikoen Zerbitzuko Langileen Estatutuaren testu bategina onetsi zuen abuztuaren 30eko 251/1993 Legegintzako Foru Dekretuaren 19. eta 20. artikuluetan aurreikusitakoa garatuz, eta Nafarroako Toki Administrazioari buruzko uztailaren 2ko 6/1990 Foru Legea eta horiekin bat heldu diren arauak betez, Iruñeko Udalak erabaki hau hartu du 2023ko martxoaren 2ko osoko bilkuran:

IKUSI DA Haur Eskolak erakunde autonomoaren plantilla organikoa hasiera batez onesteko erabakia, Iruñeko Udalak hartu zuena 2022ko abenduaren 21eko osoko bilkuran –PLE 21-DIC-22 (4/CC)– eta argitaratu zena 2023ko 10. Nafarroako Aldizkari Ofizialean, urtarrilaren 16an. IKUSI DIRA, orobat, onespen horren kontra jarritako alegazioak, bai eta espedientean jasota dauden txostenak ere, eta hortaz

ERABAKITZEN DA:

1.–CCOOk aurkeztutako alegazioa ezestea: 3 zuzendari lanposturi (gaztelaniako hizkuntza eredua ingelesezko jarduerekin eta euskarako hizkuntza eredua ingelesezko jarduerekin) bere horretan eustea, funtzionarioen araubidean, lanpostua betetzen duen pertsonaren araubidea edozein dela ere. Izan ere, horrela jasota dago lehen bi kasuetan (Printzearen Harresi eta Lezkairu haur-eskolako lanpostuak dira). Hello Buztintxuri haur-eskolakoak, ordea, lan-araubidekoa izaten jarraituko duela erabaki da. Etorkizunean, lanpostu horien araubide juridikoa homogeneizatzeko balizko prozesu bati ekin beharko zaio.

2.–CCOOk aurkeztutako alegazioa ezestea: E-C1 betekizuna sartzea administrari-ofizialaren lanpostu batean, euskarazko arreta emateko hori nahi duten erabiltzaileei. Ikusi da lanpostuen eta zerbitzuak emateko ereduen azterketa bat egin behar dela, eta horregatik atzeratzen da, etorkizuneko plantilla organikoetan aztertzeko, antolaketa- eta egokitasun-arrazoiak direla eta.

3.–CCOOk aurkeztutako alegazioa ezestea: E-C1 hizkuntza-eskakizuna duen psikologo lanpostu berri bat sortzea, adingabeei eta haien familiei arreta, aholkularitza eta laguntza emateko beharrak nabarmen handitu baitira eskoletan, ikusita, gainera, ziurrenik eskoletan dagoen haur kopurua are gehiago handituko dela. Ezetsi da, hain zuzen, nahikoa aurrekonturik ez dagoelako eta gaia aldez aurretik aztertu behar delako Nafarroako Gobernuarekin.

4.–CCOOk aurkeztutako alegazioa ezestea: 123 lanpostua (administrari-ofiziala) lan-araubidekoa izatetik funtzionarioen araubidekora izatera igarotzea, izan dezan erakunde autonomoko administrari-ofizialen lanpostu huts guztiek daukaten araubidea. Lanpostu huts hori betetzen duena lan-araubidekoa izan daiteke nahiz eta lanpostua funtzionarioen araubidekoa izan. Hain zuzen, hori gertatzen da 1002, 1003 eta 1013 lanpostuetan. Dena den, etorkizunean, lanpostu horien araubidea homogeneizatzeko balizko prozesu bati ekin beharko zaio.

5.–CCOOk aurkeztutako alegazioa ezestea: Edurne Lekunberri Urmenetaren egoera zuzentzea. Hezitzaile gisa ageri da Donibanen, baina berez ezin du eskola horretan lanposturik bete, eskola horrek gaztelaniaz aritzeko lanpostuak soilik eskaintzen dituelako eta Edurne funtzio publikora sartu baitzen euskarazko lanpostuak soilik deitzen ziren oposizio baten bidez (aplikatzea abuztuaren 30eko 251/1993 Legegintzako Foru Dekretuaren 33. artikulua).

Ezetsi da, batetik, erakunde autonomoan, gaur egun, hizkuntzen arloa aldatzen ari delako eta, gainera, eskola hori laster itxiko delako, han obrak egin behar dituzte eta. Bestalde, pertsona horrek lekualdatze-lehiaketan parte hartzen ahalko du, eta, hortaz, bere borondatez aukeratzen ahalko du funtzio publikora sarbidea eman zioten irizpideak betetzen dituen lanpostu bat. Horregatik guztiagatik, ez da komeni aldaketak egitea egonkortze-prozesuak amaitu aurretik.

6.–CCOOk aurkeztutako alegazioa ezestea: 712 lanpostua (sukaldaria Mendebaldean) lan-araubidekoa izatetik funtzionarioen araubidekora izatera igarotzea, izan dezan erakunde autonomoko sukaldarien lanpostu huts guztiek daukaten araubidea. Lanpostu hori betetzen zuena ari zen lan-araubidean, enpresa pribatu bateko subrogatua baitzen, eta araubide horri eutsi zaio. Dena den, lanaldi osoko lanpostu hutsa izanik, ez du zentzurik hura betetzen zuenaren araubideari eusteak. Antolakuntzari lotutako arrazoiak direla-eta ezetsi da alegazioa, eta egonkortze-prozesuak amaitu eta gero aztertuko da gaia.

7.–CCOOk aurkeztutako alegazioa ezestea: Inmaculada Ajona San Joséren egoera erregularizatzea, Iruñeko Udaleko Laneko Arriskuen Prebentziorako Zerbitzuak ez-gaitzat jo duelako zuzendariaren lanpostuan aritzeko. Pertsona hori laneko bajan dago, eta lanpostura itzultzen ez den bitartean ez da neurririk hartuko.

8.–CCOOk aurkeztutako alegazioa ezestea: 1218 lanpostua (sukaldaria Hello Egunsentin) lan-araubidekoa izatetik funtzionarioen araubidekora izatera igarotzea, izan dezan erakunde autonomoko sukaldarien lanpostu huts guztiek daukaten araubidea. Lanpostu hori betetzen zuena ari zen lan-araubidean, enpresa pribatu bateko subrogatua baitzen, eta araubide horri eutsi zaio. Dena den, lanaldi osoko lanpostu hutsa izanik, ez du zentzurik hura betetzen zuenaren araubideari eusteak. Antolakuntzari lotutako arrazoiak direla-eta ezetsi da alegazioa, eta egonkortze-prozesuak amaitu eta gero aztertuko da gaia.

9.–CCOOk aurkeztutako alegazioa ezestea: Hello Buztintxuri eskolak plazen %50 gaztelaniaz eskaintzen ditu eta beste %50, berriz, euskaraz (ingelesezko jarduerekin bi ereduetan). Hortaz, plantilla organikoan agertu beharko lirateke hizkuntza-eskakizun horiek eta hezitzaileen %50entzat nahitaezkoak izan beharko lukete euskarazko C1 mailak eta ingelesezko B1 mailak. Gainerako %50arentzat, berriz, ingelesezko B1 mailak soilik izan beharko luke nahitaezkoa. Alegazio hori ez da onartu, batetik, arrazoi operatiboengatik (zaila da bi hizkuntzak dakizkiten hezitzaileak eskaintzea), eta, bestetik, legezko arrazoiengatik (kontratazio-zerrendak kudeatzeko araudiak ez du bide ematen mota horretako planteamenduak egiteko).

10.–CCOOk aurkeztutako alegazioa ezestea: 1401, 1402, 1403, 1404, 1406, 1408 eta 1206 zenbakidun lanpostuak betetzen dituztenen egoera erregularizatzea, ez baitute betetzen lanpostu horietako hizkuntza-eskakizunaren betekizuna. Ezetsi da, hain zuzen, uste delako hobe dela, antolakuntzako arrazoiak direla eta, egonkortze-prozesuak amaitu arte itxarotea.

11.–CCOOk aurkeztutako alegazioa ezestea: Lezkairuko eskolak plazen %50 gaztelaniaz eskaintzen ditu eta beste %50, berriz, euskaraz (ingelesezko jarduerekin bi ereduetan). Hortaz, plantilla organikoan agertu beharko lirateke hizkuntza-eskakizun horiek eta hezitzaileen %50entzat nahitaezkoak izan beharko lukete euskarazko C1 mailak eta ingelesezko B1 mailak. Gainerako %50arentzat, berriz, ingelesezko B1 mailak soilik izan beharko luke nahitaezkoa. Ezetsi da, hain zuzen, arrazoi operatiboak eta legezko arrazoiak direla eta, kontratazio-zerrendak kudeatzeko araudiak ez baitu bide ematen mota horretako planteamenduak egiteko.

12.–LABek aurkeztutako alegazioa ezestea: euskarazko E-C1 hizkuntza-eskakizuna jartzea 103 lanpostuari (erizaina). Lanpostu hori betetzen duenak eskola guztietako ikasleekin du harremana, hau da, D eredukoekin eta A/G eredukoekin, baita langile guztiekin ere. Horrekin bat, gainera, kontuan hartu behar da euskaraz jakiteko betekizuna zer lanposturi ezarriko zaien erabakitzeko, aintzat hartu behar dela zein diren lanpostu horien betebehar espezifikoak. Euskara jakitea lanpostuaren profilean sartzea edo ez sartzea ez da Administrazioaren aukerako ahalmen hutsa –diskrezionalitate handiena daukana, bidenabar–; izan ere, baldintza hori sartzeko betebeharra lanpostu bakoitzaren profiletik ondorioztatzen da, eta jurisprudentziak horrela interpretatu du, eta kasu honetan ezinbestekoa da euskara jakitea.

Ezetsi egin da, erabaki bat hartu aurretik lanpostuen eta zerbitzuak emateko ereduen azterketa bat egin behar delako. Horregatik, gai hau atzeratzen da, etorkizuneko plantilla organikoetan aztertzeko, antolaketa- eta egokitasun-arrazoiak direla eta.

13.–LABek aurkeztutako alegazioa ezestea: psikologiako lanpostu berri bat sartu behar da, E-C1 hizkuntza-eskakizunarekin. Pertsona horrek arreta zuzena eskainiko lieke eskola guztietako ikasleei, eta, horregatik lanpostuaren ezaugarri espezifikoek eskatzen dute euskara jakitea. Orobat, kontuan izan behar da ikasturte honetan beste bi eskolari eman behar zaiela arreta. Ezetsi da, hain zuzen, nahikoa aurrekonturik ez dagoelako eta gaia aldez aurretik aztertu behar delako Nafarroako Gobernuarekin.

14.–LABek aurkeztutako alegazioa ezestea: lantegigile lanpostu bat sortzea (txostena erantsi da), E-C1 hizkuntza-eskakizunarekin, eta harreman eta esku-hartze zuzena izango lukeena eskola guztietako ikasleekin eta langileekin. Ezetsi da, hain zuzen, nahikoa aurrekonturik ez dagoelako eta gaia aldez aurretik aztertu behar delako Nafarroako Gobernuarekin.

15.–LABek aurkeztutako alegazioa ezestea: 1006 eta 1114 lanpostuetako profil zehatza kontuan hartuta (telefono bidezko arreta langileentzat) beharrezkoa da horietan euskarazko E-C1 hizkuntza-eskakizuna ezartzea. Izan ere, laneko osasun arloak bulegoetan birkokatu dituen hezitzaileen kasua salbuespena da, eta egoera horrek ezin ditu baldintzatu ez bulegoetako lana ez eta hizkuntza-eskaintza ere.

16.–LABek aurkeztutako alegazioa ezestea: birkotatutako hezitzaileak ari dira betetzen 1006, 1114 eta 1115 lanpostuak, eta horregatik eskatzen dugu alderdi hori aipatzea plantilla organikoan. Horren harira, kontuan izan behar dugu honako hau dagoela xedatuta plantilla organikoei buruz Nafarroako Toki Administrazioari buruzko uztailaren 2ko 6/1990 Foru Legearen 235. artikuluko 1. apartatuan: "Toki erakundeek plantilla organikoan jaso beharko dituzte lanpostuen ezaugarriak". Horregatik uste dugu agertu egin behar dela birkokatutako langileak ari direla lanpostu horiek betetzen.

Alegazioa ez da onartu; izan ere, 2022ko plantilla organikoan ezaugarri horrekin agertu zen, eta behin betiko bilakatu zen 2023ko plantilla organikoan. Bi lanpostuetako ezaugarriak jasota daude, eta beste edozein informazio pertsonal ematea plantilla organiko baten funtsetik at egonen litzateke.

17.–LABek aurkeztutako alegazioa ezestea: egun 1013 lanpostuan (C1 hizkuntza-eskakizuna du) ari denak ez ditu betetzen lanpostuko baldintzak. Hortaz, eskatzen dugu antzeko beste lanpostu batean birkokatzea (eta lanpostu horretako baldintzak betetzea) eta 1013 lanpostuan jartzea baldintzak betetzen dituen pertsona bat. Izan ere, uste dugu hezitzailea betetzen ari den lanpostuaren hizkuntza-eskakizuna indarrean dagoela, erabaki judizial baten ondorio da eta, beste aldagai batzuk gorabehera.

18.–LABek aurkeztutako alegazioa ezestea: eskatzen da ez kentzea "inklusio" eta "prestatzaile" hitzak bulegoetako hezitzaileen deskribapenetik. Batetik daude bulegoetan birkokatu diren hezitzaileak, eta horien lana lotuago dago administrazio zereginekin (5. alegazioa). Baina, bestetik, uste dugu hezitzaile prestatzailearen lanpostua beharrezkoa dela eta besteetatik bereizi behar dela. Gainera, E-C1 hizkuntza-eskakizuna dauka (6. alegazioa). Azkenik, denbora bat daramagu erakunde autonomoko zuzendaritza teknikoarekin hitz egiten inklusioko hezitzaileei buruz eta aztertzen, besteak beste, zer prestakuntza izan beharko luketen. Horregatik, eskatzen dugu II. eranskineko 1. apartatuko hezitzaile lanpostu horietan –edozein eskolatako haurrekin egonen diren hezitzaileek beteko dituzten horietan, hain zuzen– ez kentzea "inklusio" hitza, eta beste lanpostuetatik bereiztea.

Ezetsi da, uste delako eraginkorragoa dela lanpostuen izenak homogeneizatzea, eta, gainera, koherentziaz egitea. Orobat, kontuan hartu behar da izen horiek ez datozela bat espezializazioko titulazio akademikoen profilekin.

19.–LABek aurkeztutako alegazioa ezestea: II. eranskineko 1. apartatuko lanpostuak eskola guztietan aritzeko dira –euskaraz zein gaztelaniaz jarduteko, alegia–. Hortaz, lanpostu horiek dituzten ezaugarri espezifikoak ikusita, eskatzen dugu lanpostu batzuetan E-C1 hizkuntza-eskakizuna ezartzea, eta beste batzuetan I-B1 ezartzeko aukera aztertzea.

Alegazioa ez da onartu arrazoi operatiboengatik. Egiten diren kontratazioak zerbitzuaren beharretara eta une bakoitzean behar diren profil zehatzetara egokitzen dira. Ez da ahaztu behar plaza horiek errefortzu- eta laguntza-kontratazioak estaltzeko direla, eta ikasturte bakoitzeko premien araberakoak. Hezkuntza eskaintzan oinarrituta, eta haur-eskoletan dagoen plaza-eskariaren arabera zehazten da kontratazioen kopuru zehatza.

20.–LABek aurkeztutako alegazioa ezestea: eskatzen da Printzearen Harresi haur-eskolan euskarazko 6 unitate egotea hurrengo ikasturtean, hori erabaki baitzen aurtengo 2022-2023 ikasturteko desoreka konpontzeko. Eskari horren harira, gogorarazi nahi dugu eskolaren eskaintzaren %50 euskaraz dela, eta beste %50a gaztelaniaz (ingelesarekin). Gainera, gai hori hezkuntza eskaintzaren arlokoa da.

21.–LABek aurkeztutako alegazioa ezestea: eskatzen da III. eranskinari gehitzea beste plantilla batzuetan ageri ziren puntuak.

Printzearen Harresi, Goiz Eder eta Buztintxuri (%50 bi hizkuntzetan).

Printzearen Harresin, ikasturte honetan 6 gaztelaniaz; hurrengo ikasturtean, alderantziz.

6. puntua gehitzea (Buztintxuriri buruzkoa).

8. puntua gehitzea (zuzendaritzako lanpostuak egokitzea hizkuntza-eskakizunera).

Laguntzaileak bi hizkuntza-eredu dituzten eskoletarako (E-C1 eta I-B1).

Alegazioa ezetsi da, gai horiek ez baitira plantilla organikoan jorratzekoak.

22.–LABek aurkeztutako alegazioa ezestea: alegazioan eskatzen da hezkuntza-eredu mistoak (gaztelania-ingelesa eta euskara-ingelesa) eskaintzen dituzten haur-eskoletan honako hizkuntza-eskakizuna ezartzea hezkuntza-laguntzako lanpostu guztiei: euskarazko C1 eta ingelesezko B1. Horrek ekarriko luke giza baliabideen antolaketa eta eskolen funtzionamendua hobetzea. Euskarazko C1 eta ingelesezko B1 hizkuntza-eskakizunak dauzkaten hezitzaileak gai izanen dira bai gaztelaniazko taldeetan bai euskarazkoetan sortzen diren premiei erantzuteko. Alegazio hori ez da onartu, batetik, arrazoi operatiboengatik (zaila da bi hizkuntzak dakizkiten hezitzaileak eskaintzea), eta, bestetik, legezko arrazoiengatik (kontratazio-zerrendak kudeatzeko araudiak ez du bide ematen mota horretako planteamenduak egiteko).

23.–LABek aurkeztutako alegazioa ezestea: 1212 lanpostuan (laguntzako hezitzailea Buztintxurin, lanaldi partzialeko lan-araubidea), I.B1+E-C1 hizkuntza-eskakizuna ezartzea, lanpostuak dauzkan ezaugarri partikularrak direla medio. Ezetsi da; planteatutako aldaketa ez da zilegi, epaian adierazi baita pertsona horrek lanpostu horretan jarraitu behar duela.

24.–LABek aurkeztutako alegazioa ezestea: eskatzen da 111, 112, 115, 116, 1002, 1003 eta 1012 lanpostuak, eskola batzuetan sobera diren hezitzaile lanpostuak (2 Haurtzaron, 1 Mendillorrin, 2 Buztintxurin eta 3 Lezkairun) eta bete gabe dagoen laguntzaile plaza bat (1017) eskola guztien artean banatzea, plantillaren egituran sar daitezen laguntzako hezitzaile gisa. Guztira, 16 lanpostu daude libre plantillan (+110+118). Eskari hau egiten da Administrazioak bere burua antolatzeko duen ahalmenean oinarrituta, hau da, bere egitura eratzeko dauzkan ahalmenen multzoan oinarrituta, legeriak ezartzen dituen mugen barruan, eta jardunez objektibotasunez zerbitzatuz interes orokorrak, eta eraginkortasunaren, hierarkiaren, deszentralizazioaren, deskontzentrazioaren eta koordinazioaren printzipioen arabera. Printzipio horietan oinarrituta, bada, egun dauden baliabideak berregituratzea da horiek modu eraginkorrenean kudeatzeko modua.

Ezetsi da; izan ere, gaur egun ez dago aurrekontu marjinarik kokapen maila –eta, ondorioz, gastua– handitzea dakarten aldaketak egiteko lanpostuetan.

25.–LABek aurkeztutako alegazioa ezestea: eskatzen da I-B1 ereduarekin sobera dauden lanpostuetako bat Hello Egunsentiko plantillara pasatzea, han lanpostu bat falta da eta. Ezetsi da, hain zuzen, aldaketa hori egitea ez delako zilegi egonkortze-prozesua amaitu arte. Orobat, aldez aurretik azterketa xehatu bat egin behar da eskoletan lanpostu berriak sortzeari edo lanpostuak birkokatzeari buruz.

26.–LABek aurkeztutako alegazioa ezestea: eskatu da euskarazko hizkuntza-eskakizuna jartzea erizainaren, nutrizionistaren eta psikologoaren lanpostuetan. Ezetsi da, hain zuzen, uste delako lanpostuei eta zerbitzua emateko ereduei buruzko azterlan bat egin behar dela; horregatik atzeratzen da gai hau, etorkizuneko plantilla organikoetan aztertzeko, antolaketa- eta egokitasun-arrazoiak direla eta.

27.–LABek aurkeztutako alegazioa ezestea: eskatzen da nutrizionistaren lanpostuaren (122 zenbakiduna) lanaldia %75era zabaltzea, ikusita ikasturte honetan beste bi eskola daudela martxan eta lan-bolumena –aurretik ere handia zena– hazi egin dela. Ezetsi da, hain zuzen, eskatutakoa giza baliabideen barne-antolaketaren arlokoa delako eta ez dagokiolako plantilla organikoari.

28.–LABek aurkeztutako alegazioa ezestea: eskatu da I. eranskina aldatzea (onartutako alegazioen datuak sartuta), bat etor dadin II. eranskinarekin. Ez da zilegi I. eta II. eranskinak aldatzea, ez baita alegaziorik onartu.

29.–Aldatzea hezitzailearen 1604 lanpostua (María Teresa Huerto Calerorena), lan-harreman finkoa aitortua baitu 2016ko abuztuaren 16az geroztik, Lan Arloko Epaitegiaren 2022ko azaroaren 22ko Epaiaren bidez (000420/2022 zenbakia). Hortaz, lanpostu hori egonkortzeko LPEtik kenduko da. Behar diren aldaketak eginen dira 2023ko plantilla organikoaren 1. eta 2. eranskinetan.

30.–Behin betikoz onestea 2023ko plantilla organikoa. Haren testua, behar bezala eginbidetua, eranskinean agertzen da, espedientearen atal gisa.

31.–Eman bekio espedienteari arauzko izapidea.

Haur Eskolak erakunde autonomoaren 2023. urterako plantilla organikoa behin betiko onetsi du osoko bilkurak PLE 02-MAR-23 (5/CC) erabakiaren bidez, eta Nafarroako Aldizkari Ofizialean argitaratzen da, nahitaezkoa baita.

Iruñean, 2023ko martxoaren 8an.–Haur Eskolak erakunde autonomoko lehendakaria, Fernando Sesma Urzaiz.

I. ERANSKINA

PLANTILLA ORGANIKOA

Lanpostuen zerrenda

II. ERANSKINA

Haur Eskolak erakunde autonomoak dituen funtzionario eta lan-kontratudun finkoen zerrenda

III. ERANSKINA

Iruñeko Udalaren Haur Eskolak erakunde autonomoaren 2023rako plantilla organikoa betearazteko arau osagarriak

1. Haur Eskolak erakunde autonomoko lehendakariak alda ditzake "Inklusioko hezitzaile"aren lanpostuaren plazak ikasturtearen hasieran, kontuan izanik Hezkuntza Departamentuak zer xedatzen duen hezkuntza premia bereziak dituzten ikasleen banaketari eta kokapenari buruz.

2. Iruñeko Udalaren plantilla organikoan xedatutakoaren eta Administrazio Publikoetan behin-behinekotasuna murrizteko aplikatzekoak diren arauetan xedatutakoaren arabera jokatuko da Nafarroako Administrazio Publikoen Zerbitzuko Langileen Estatutuaren testu bategineko 15. artikuluaren 6. puntuan ezarritako prozedura murriztua aplikatzearen ondoriozko lanpostuei dagokienez, baita haien amaierari eta aldi baterako betetzeko egiten diren kontratazioei dagokienez ere.

3. Iruñeko Udalaren haur-eskoletan hezitzaile eginkizunetan, edozein aldaeratan, jarduteko, eskatuko da izatea Haur Hezkuntzako maisu-maistren graduko edozein titulu edo baliokidea, edo Haur Hezkuntzako goi mailako teknikariaren titulua edo baliokidea.

4. Plantilla organiko honetan aurreikusitakoa 2023ko ekitaldian zehar egokituz joanen da, 2023ko ekitaldirako ezarritako plantilla-aurreikuspenek 2022-2023 ikasturtearen amaierara arte jarraituko dutela bermatzeko, eta 2023-2024 ikasturtearen hasieratik aurrera berreginen da 2023rako plantilla honetan aurreikusitakoaren arabera; hori guztia, eskolen hezkuntza-eskaintzaren arabera.

5. Modu progresiboan, 2022-2023 ikasturtetik aurrera, haur-eskoletako zuzendarien lanpostuak egokituko dira plantilla organiko honetako I. eranskinean eskola bakoitzerako ezarritako hizkuntza-eskakizun zehatzera. Hala, langileak birbanatuko dira, eta birbanaketa horren ondoriozko destino berrietan egungo titularren araubide juridikoak eta eskubideak bermatuko dira une oro. Edonola ere, haur-eskoletako zuzendarien lanpostuetan aritzeko, beharrezkoa da titulu hauetako bat edukitzea: oinarrizko hezkuntza orokorreko irakasle titulua, eskolaurreko espezialitatearekin; maisu-maistra haur-hezkuntzako espezialitatearekin edo Haur Hezkuntzako maisu-maistraren lanbidean aritzeko gaikuntza ematen duen beste gradu-titulu baliokide bat.

Iragarkiaren kodea: L2304106