1. NAFARROAKO FORU KOMUNITATEA
1.7. BESTELAKOAK
62E/2023 EBAZPENA, otsailaren 24koa, Ekonomia Zirkularraren eta Klima Aldaketaren Zerbitzuko zuzendariak emana, zeinaren bidez partez onartzen baita Allingo udal-mugartean ehun-piezak tindatu eta akabera ematen dien instalazio baten ingurumen baimen integratuan ezarritako funtzionamendu baldintzak aldatzeko eskaera. Instalazioaren titularra Arneactive SLU da.
Instalazioak badu ingurumen baimen integratua, Landa Garapeneko eta Ingurumeneko kontseilariak azaroaren 23ko 2363/2007 Ebazpenaren bidez emana, ondoren Ingurumenaren eta Uraren zuzendari nagusiaren abuztuaren 13ko 366E/2014 Ebazpenak eguneratua, eta Ekonomia Zirkularraren eta Uraren Zerbitzuko zuzendariaren abuztuaren 13ko 288E/2018 Ebazpenaren bidez eta apirilaren 5eko 92E/2019 Ebazpenaren bidez aldatua.
2022ko uztailaren 26an, titularrak instalazioaren ingurumen baimen integratuan dauden baldintzak aldatzeko eskatu zuen. Zehazki, honako hauek:
1. EHZ kode hauek dituzten hondakinak sartzea sortutako hondakinen zerrendan (ingurumen baimen integratuaren III. eranskinean):
–080112, tindatzeko erretxinen eta koloragarrien hondarrak
–150104, ehuna hartu, prestatu, tolestu eta paketatzeko prozesuetako metalezko ontziak
–160107*, konpresoreen mantentze-lanetako prozesuetako olio erabilien iragazkiak
2. Aldatzea honako EHZ kode hau duen hondakinaren amaierako kudeaketako eragiketa:
–150110*, kartoizko ontzi kutsatuen hondakinak; R3tik R1era aldatzea.
Ekonomia Zirkularraren eta Klima Aldaketaren Zerbitzuak berrikusi du aurkeztutako eskaera, eta balorazio hau egin:
HONDAKINAREN EHZ | HONDAKINAREN
DESKRIPZIOA | BALORAZIOA |
080112 | Tindatze erretxinen eta koloragarrien hondarrak | Hondakin horiek 04 02 17 EHZ kodearekin sartzea onartzen da (04 02 16 kodean aipatutakoez besteko koloragarri eta pigmentuak), Batzordearen 2014ko abenduaren 18ko Erabakiaren hondakinen zerrendako kapitulu hori egokiagoa dela iritzi baita |
150104 | Metalezko ontziak | Hondakin hori ingurumen baimen integratuan sartzea onargarria da, bat datorrelako bai instalazioaren funtzionamendu egokiarekin –ingurumenari dagokionez–, bai teknika erabilgarri onenen aplikazioarekin |
160107* | Olio erabilien iragazkiak | Hondakin honetarako egokiagoa da Erabakiaren hondakinen zerrendako 15 02 02* EHZ kodea, zeina baimenduta baitago, dagoeneko, ingurumen baimen integratuan. Hala ere, konpresoreen berariazko prozesurako sortutako hondakina txertatzen da. |
150110* | Kartoizko ontzi kutsatuak | Eskatu den amaierako kudeaketako eragiketa (R1) hondakin horretarako baimenduta dago dagoeneko. |
200301 | Udal hondakinen nahasketak | Baimena deuseztatzen da, 15 01 kapituluan industriako hondakinen gaikako bilketarako zehaztuta dauden kodeak dituelako. |
Kasu honetan, Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 35. artikuluan ezarritako inguruabarrak gertatzen direla uste da, eta, ondorioz, bidezkoa da ingurumen baimen integratuan ezarritako baldintzak ofizioz aldatzea, artikulu horretan aurreikusitako administrazio prozedurarekin bat etorriz, eta ez da egokitzat jotzen aldaketa-espediente hau jendaurrean jartzea.
Ebazpen proposamena instalazioaren titularrari entzunaldia emateko tramitean egon da hamabost egunez, eta hark ez du proposamenaren aurkako alegaziorik aurkeztu.
Adierazitakoarekin bat, eta Ingurumeneko zuzendari nagusiak azaroaren 8an emandako 107/2019 Ebazpenaren bidez eskuordeturik ditudan eskumenak erabiliz,
EBAZTEN DUT:
Lehendabizikoa.–Partez onartzea Allingo udal-mugartean ehun-piezak tindatu eta akabera ematen dien instalazio baten ingurumen baimen integratuan ezarritako funtzionamendu baldintzak aldatzeko eskaera. Instalazioaren titularra Arneactive SLU da. Horrenbestez, instalazioak eta hango jarduerak ebazpen honen eranskinean adierazitako baldintzak bete beharko dituzte.
Bigarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen-diziplinako neurriak hartuko dira (abenduaren 16ko 1/2016 Legegintzako Errege Dekretuaren bidez onetsi zen testu bategina), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen-araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute haren kontra, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.
Bosgarrena.–Ebazpen hau igortzea Arneactive SLUra eta Allingo Udalera, behar diren ondorioak izan ditzan.
Iruñean, 2023ko otsailaren 24an.–Ekonomia Zirkularraren eta Klima Aldaketaren Zerbitzuko zuzendaria, Pedro Zuazo Onagoitia.
Oharra: ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Klima Aldaketaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones
Iragarkiaren kodea: F2303356
