Iragarkia

60. ALDIZKARIA - 2023ko martxoaren 24a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

14/2023 FORU DEKRETUA, martxoaren 1ekoa, Nafarroako Foru Komunitateko Jardunbide Egokien aldeko eta Ustelkeriaren kontrako Bulegoaren Antolaketaren eta Funtzionamenduaren Erregelamendua onesten duena.

Nafarroako Foru Komunitateko Jardunbide Egokien aldeko eta Ustelkeriaren kontrako Bulegoa sortzeari buruzko maiatzaren 17ko 7/2018 Foru Legearen 33.8 artikuluaren arabera, Jardunbide Egokien aldeko eta Ustelkeriaren kontrako Bulegoaren titularrari dagozkio haren gobernamendu, barne araubide eta langileen inguruko gai guztien gaineko eskumen osoa.

Nafarroako Foru Komunitateko Jardunbide Egokien aldeko eta Ustelkeriaren kontrako Bulegoa sortzeari buruzko maiatzaren 17ko 7/2018 Foru Legearen bigarren xedapen iragankorrak ezartzen du Nafarroako Gobernuak onetsiko duela bulego horren antolaketaren eta funtzionamenduaren erregelamendua, bulegoko zuzendaritzaren proposamena aintzat hartuta.

Nafarroako Foru Komunitateko Jardunbide Egokien aldeko eta Ustelkeriaren kontrako Bulegoaren zuzendariak aurkezten du Nafarroako Foru Komunitateko Jardunbide Egokien aldeko eta Ustelkeriaren kontrako Bulegoaren Antolaketaren eta Funtzionamenduaren Erregelamendua, Nafarroako Gobernuak onets dezan.

Nafarroako Foru Komunitateko Jardunbide Egokien aldeko eta Ustelkeriaren kontrako Bulegoaren Antolaketaren eta Funtzionamenduaren arautegia ezartzen du erregelamenduak, hura sortzeko foru legean ezarritako printzipioetan eta zuzenbide publikoko entitate izaeran oinarrituta, haren jarduketa eremuan sartzen diren administrazio publikoetatik independentea, eta izaera juridiko propioa eta bere helburuak betetzeko jarduketarako gaitasun osoa duela.

Erregelamenduak zortzi titulu, hirurogeita bederatzi artikulu eta hiru xedapen gehigarri ditu.

Horrenbestez, Lehendakaritzako, Berdintasuneko, Funtzio Publikoko eta Barneko kontseilariak proposaturik, eta Nafarroako Gobernuak bi mila eta hogeita hiruko martxoaren 1ean egin bilkuran harturiko erabakiarekin bat,

DEKRETATZEN DUT:

Artikulu bakarra.–Erregelamendua onestea.

Onetsi egiten da Nafarroako Foru Komunitateko Jardunbide Egokien aldeko eta Ustelkeriaren kontrako Bulegoaren Antolaketaren eta Funtzionamenduaren Erregelamendua. Horren testua foru dekretu honi erantsi zaio.

Azken xedapena.–Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2023ko martxoaren 1ean.–Nafarroako Gobernuko lehendakaria, María Chivite Navascués.–Lehendakaritzako, Berdintasuneko, Funtzio Publikoko eta Barneko kontseilaria, Javier Remírez Apesteguía.

NAFARROAKO FORU KOMUNITATEKO JARDUNBIDE EGOKIEN ALDEKO ETA USTELKERIAREN KONTRAKO BULEGOAREN ANTOLAKETA ETA FUNTZIONAMENDUA

Atarikoa

Nafarroako Foru Komunitateko Jardunbide Egokien aldeko eta Ustelkeriaren kontrako Bulegoa sortzeari buruzko maiatzaren 17ko 7/2018 Foru Legearen bigarren xedapen iragankorrak ezartzen du Nafarroako Gobernuak onetsiko duela bulego horren antolaketaren eta funtzionamenduaren erregelamendua, bulegoko zuzendaritzaren proposamena aintzat hartuta.

Maiatzaren 17ko 7/2018 Foru Legearen ondorioetarako, ustelkeriatzat jotzen da etekin pribatuak norberarentzat edo hirugarrenentzat lortzeko asmoz egindako botere gehiegikeria; bulegoaren helburua da horiek prebenitzea, detektatzea, ikertzea eta errotik ezabatzea, bai Nafarroako foru administrazio publikoetan, bai haiek parte hartzen duten sozietate eta entitateetan, jardunbide egokiak sustatzea eta halakoak salatzen dituzten herritarrak babestea.

Maiatzaren 17ko 7/2018 Foru Legeak indarra hartu ondoren, Europako Parlamentuak eta Kontseiluak 2019ko urriaren 23ko 2019/1937 Zuzentaraua onartu dute, Batasuneko Zuzenbidearen gaineko arau-hausteak salatzen dituzten pertsonak babesteari buruzkoa, eta haren transposizio epea 2021eko abenduaren 17an amaitu zen.

2019/1937 Zuzentarauak eratutako babes esparru mugatuan, Batasuneko Zuzenbidearen zenbait arau-hauste eta arau-hausteen gaineko informazioa laneko testuinguruan lortzea jasotzen dira, baina estatu kideek babesa zabaltzen ahal dute, han jasotzen ez diren esparru edo egitateetara. Eta hori da, hain zuzen ere, maiatzaren 17ko 7/2018 Foru Legearen kasua, 9. eta 24. artikuluetan aurreikusten baitu salataria babestea, edonolako kalte edo bazterkeriaren aurrean.

Era berean, 2019/1937 Zuzentarauak barne eta kanpo salaketa egiteko bideak arautzen ditu. Kanpo salaketarako bidea zen 2/2018 Foru Legearen 12. artikuluan aurreikusitako posta-kutxa, han jasotzen zirelako administrazioetako eta haien jarduketaren eremuan sartutako entitateetako agintarien nahiz langileen jarduketa edo jokabideen inguruan herritarrek zituzten kexa, salaketa eta iradokizunak.

Jardunbide desegokiak eta ustelkeria prebenitzeko eta errotik ezabatzeko herritarren parte-hartze aktiborako estrategiak eratu eta garatu behar dira, eta egiazko babesa bermatu behar zaie beren herritar betebeharrak betez ustezko iruzur eta ustelkeria kasuak salatzen dituzten herritarrei. Horretarako, herritarren eskura jarri behar da aholkularitza zerbitzu konfidentziala, inpartziala eta doakoa, era horretan bermatzeko salaketak bide egokitik eta modu arduratsuan egiten direla eta irregulartasunak garaiz detektatzen direla, edo horiek saihesteko aukera izateko. Gainera, errepresalien debeku espresutik harago, funtsezkoa da salaketa egiten duten herritarrek babes egiazkoa eta eraginkorra izatea haien aurrean, barne direla jasandako kaltearen tamainako konpentsazio neurriak. Era berean, bermatu behar da salaketak ukitzen dituen pertsonek benetako babes judizialerako duten eskubidea osorik baliatzeko aukera izatea, errugabetasun presuntzioa eta defentsa eskubidea, barne direla beren ikuspuntua emateko eta espedientea ezagutzeko eskubideak.

Testuinguru horretan, Nafarroako Foru Komunitateko Jardunbide Egokien aldeko eta Ustelkeriaren kontrako Bulegoaren Antolaketaren eta Funtzionamenduaren arautegia ezartzen du erregelamenduak, hura sortzeko foru legean ezarritako printzipioetan eta zuzenbide publikoko entitate izaeran oinarrituta, haren jarduketa eremuan sartzen diren administrazio publikoetatik independentea, eta izaera juridiko propioa eta bere helburuak betetzeko jarduketarako gaitasun osoa duela.

Erregelamenduak zortzi titulu, hirurogeita bederatzi artikulu eta hiru xedapen gehigarri ditu.

I. tituluak bulegoaren izaera, araubide juridikoa eta helburua arautzen ditu.

II. tituluak bulegoaren egitura, antolaketa eta funtzionamendua garatzen ditu, haren zuzendariaren funtzioak eta haren zerbitzuan diren langileen araubidea.

III. tituluak azaltzen ditu bulegoak prebentzio eta prestakuntzaren arloan dituen funtzio garrantzitsuak, azpimarratuz arriskuen analisia eta prebentzio planak, publikotasunaren zintzotasuna eta etika, eta prestakuntza horretarako oinarri izaten ahal diren materialak eta programak prestatzea, interesdun izaten ahal diren entitate nahiz pertsonekin lankidetzan.

IV. tituluak arautzen du ikertzeko prozedura, ikerketa arautzen duten printzipioak, helburua, salaketen sinesgarritasuna aurrez ezartzeko irizpideak, ez onartzeko edo artxibatzeko kasuak, ikerketen garapena, ikerketei buruzko txostena eta prozedurari amaiera emateko moduak.

V. titulua salaketa egin duen herritarraren babesari dagokio, eta salaketa egiteko bideak eta herritarra babesteko neurriak arautzen ditu, azpimarratuz salaketen kanpoko posta-kutxa edo kanal bat arautu dela, haren bidez bermatzeko konfidentzialtasuna eta anonimotasuna, salaketa egin duen pertsonari informazioa ematea, babesa emateko eta babesa kentzeko kasuak, errepresalien debekua eta horiei aurre egiteko neurriak.

VI. tituluak garatzen du bulegoaren ahal zehatzailea, bulegoa sortzeko foru legeak ematen diona.

VII. tituluak bulegoaren ekonomiari, aurrekontuari eta kontratazioari dagozkien araubidea arautzen du.

VIII. tituluak bulegoak Nafarroako Parlamentuaren eta herritarren aurrean kontuak emateko araubidea jasotzen du, urteko memoriaren bidez.

Bukatzeko, lehen xedapen gehigarriak bulegoari esleitutako funtzioen garapen osoa gauzatzeko baldintza bat ezartzen du, alegia, horretarako behar diren langileak eta baliabide materialak izatea. Arestiko horrekin lotua, bigarren xedapen gehigarriak aurreikusten du bulegoaren antolaketa egitura urratsez urrats garatuko dela, aurrekontu baliagarriaren arabera. Azkenik, hirugarren xedapen gehigarriak ahala ematen dio bulegoko zuzendariari, erregelamendu hau aplikatu, interpretatu eta garatzeko, edo, behar bada, aldatzeko, beharrezkoak diren xedapenak emateko.

I. TITULUA

Xedapen orokorrak

1. artikulua. Erregelamendu honen xedea.

1. Erregelamendu honen xedea da Nafarroako Foru Komunitateko Jardunbide Egokien aldeko eta Ustelkeriaren kontrako Bulegoaren (aurrerantzean bulegoa) Antolaketa eta Funtzionamendua arautzea. Maiatzaren 17ko 7/2018 Foru Legearen bitartez sortu zen bulegoa.

2. Erregelamendu honek ezartzen du bulegoaren antolaketa egitura eta haren printzipio gidariak; haren funtzioak garatzen ditu prebentzio, ikerketa, ebaluazio eta herritar salatzaileak babesteko arloetan, eta orobat, kontratazio publikoa erregulatzeko eta gainbegiratzeko funtzioa eta ahal zehatzailea; arautzen du bulegoaren zerbitzura dauden langileen araubide juridikoa eta aurrekontu, kontratazio eta kudeaketa ekonomikoko araubidea, eta erregistro orokorrari, egoitza elektronikoari eta salaketen posta-kutxari buruzko arau orokorrak eransten ditu.

2. artikulua. Bulegoaren izaera juridikoa, araubide juridikoa eta helburua.

1. Nafarroako Foru Komunitateko Jardunbide Egokien aldeko eta Ustelkeriaren kontrako Bulegoa zuzenbide publikoko entitatea da, izaera juridiko propioa eta bere helburuak betetzeko jarduketarako gaitasun osoa duena.

2. Bulegoak, bere eskumenen jardunbidean, bere jardun-eremua osatzen duten administrazio publiko, organo, entitate eta pertsonen erabateko independentzia organiko eta funtzionalarekin lan eginen du.

3. Bulegoari aplikatzekoa den araubide juridikoa bulegoa sortzeari buruzko maiatzaren 17ko 7/2018 Foru Legean ezarritakoa da. Bulegoa sortzeari buruzko foru legean eta hura garatzeko arautegian aurreikusten ez den guztiari dagokionez, zuzenbide administratiboko gainerako arauak izanen dira aplikagarriak, aplikagarriak diren neurrian. Zehapenak ezartzeko, administrazio prozedura zehatzailearen espezialitateak aplikatuko dira.

4. Bulegoaren helburua da jardunbide iruzurtiak detektatzea, prebenitzea, ikertzea eta errotik ezabatzea bere jardun-eremuan; ustelkeria errefusatzea politika publikoen diseinuan, gauzapenean eta ebaluazioan; eta herritarren artean sustatzea jardunbide egokietan, balio zibikoetan eta gobernamendu onean oinarritutako kultura, arreta berezia jarriz salaketa egiten duten pertsonen babesean. Ondorio horietarako, ustelkeriatzat jotzen da norberarentzat nahiz hirugarrenentzat etekin pribatuak lortzeko asmoz egindako botere gehiegikeria.

5. Horrez gain, bulegoa da organo eskuduna Nafarroako Foru Komunitatearen lurralde esparruan kontratazioa arautzeari eta gainbegiratzeari dagokionez, maiatzaren 17ko 7/2018 Foru Legearen bigarren xedapen gehigarrian ezarritako terminoetan, helburua dela kontratazio publikoa gainbegiratzea, legediaren aplikazio egokia zaintzea, eta lehia eta jardunbide egokiak sustatzea kontratazio publikoaren eremuan.

3. artikulua. Bulegoaren jarduketa eremua.

Bulegoaren jarduketa eremua Nafarroako Foru Komunitateko Jardunbide egokien aldeko eta ustelkeriaren kontrako bulegoa sortzeari buruzko maiatzaren 17ko 7/2018 Foru Legearen 4. artikuluan aurreikusitakoa da.

4. artikulua. Bulegoaren eginkizunak.

1. Bulegoaren eginkizunak dira maiatzaren 17ko 7/2018 Foru Legearen 5. artikuluan aipatutakoak, hala nola unean uneko indarreko legeditik eratortzen ahal direnak.

2. Prebentzioari dagokion eginkizuna maiatzaren 17ko 7/2018 Foru Legearen 6. artikuluan aurreikusitako jarduketak bilduko ditu.

3. Ikerketaren arloko eginkizunak barne hartuko ditu, besteak beste, maiatzaren 17ko 7/2018 Foru Legearen 7. artikuluan jasotzen diren ikerketa, jarraipen eta egiaztapenari dagozkien jarduerak, batez ere sektore publikoko kontratazio publikoari, bitarteko erakundeen enkarguei, dirulaguntzei eta lanpostuen hornikuntzari dagokienez.

4. Ebaluazioari dagokion eginkizunak barne hartuko ditu ustelkeria prebenitzeko eta jardunbide egokiak sustatzeko neurrien eraginkortasunaren kontrola, jarraipena eta ebaluazioa egiteko lanak, maiatzaren 17ko 7/2018 Foru Legearen 8. artikuluan ezarritakoaren arabera, hala nola dagozkien ebaluazio txostenak ematea.

5. Pertsonak babesteko funtzioa eginen da Maiatzaren 17ko 7/2018 Foru Legearen 9. eta 24. artikuluetan eta Batasuneko Zuzenbidearen arau-hausteei buruzko informazioa ematen duten pertsonei buruz Europako Parlamentuak eta Kontseiluak 2019ko urriaren 23an emandako 2019/1937 (EB) Zuzentarauan ezarritakoa betez.

6. Kontratazio publikoa arautu eta gainbegiratzeko funtzioak barne hartuko du Sektore Publikoko Kontratuei buruzko azaroaren 8ko 9/2017 Legearen 332. artikuluaren 6., 7. eta 8. apartatuetan aurreikusitako funtzioak betetzea, Nafarroako Foru Komunitatearen lurralde eremuan.

Bulegoak, halaber, Estatuko organo eskudunekiko eta Europako erakundeekiko koordinazio eginkizunak beteko ditu, kontratazioa arautzeko eta gainbegiratzeko funtzioei dagokienez.

7. Nafarroako Foru Komunitateko Jardunbide Egokien aldeko eta Ustelkeriaren aurkako Bulegoaren atal batek beteko du obrak eta zerbitzuak esleitzeko kontratuen jasangarritasun finantzarioa aztertzeko eginkizuna, eta Sektore Publikoko Kontratuei buruzko azaroaren 8ko 9/2017 Legearen 333.3 artikuluaren arabera, botere eta entitate adjudikatzaileen obren emakidako eta zerbitzuen emakidako kontratuen lizitazioa egin aurretik, hala nola bere jarduketaren eremuan sartzen diren bestelako erakunde, organismo eta entitateek egin beharreko esleipenen kasuan ere, nahitaez eman beharreko txostena emanen du, kasu hauetan:

a) Ekarpen publikoak egiten zaizkionean emakidaren eraikuntzari edo ustiapenari, hala nola emakida hartzailearen finantzazioa laguntzeko beste edozein neurri hartzen denean ere.

b) Obren emakidak eta zerbitzuen emakidak, haien tarifa osorik edo zati batean bere gain hartzen badu emakida eman duen botere adjudikatzaileak, lehen ezarpenaren obren edo gastuen zenbatekoak milioi bat eurotik gorakoak direnean.

Era berean, kontratu oreka berrezartzeari buruzko erabakien inguruko txostena emanen du, Kontratu Publikoei buruzko apirilaren 13ko 2/2018 Foru Legearen 194.2 eta 211.3 artikuluetan aurreikusitako kasuetan, obren emakidei eta zerbitzuen emakidei dagokienez, lehenik txostenak eman badira haien inguruan arestiko a) eta b) letrekin bat eginez, edo, txostenik eman ez bada, kontratuari eransten bazaio haietan aurreikusitako elementuren bat.

8. Edonola ere, Bulegoaren eginkizunak beteko dira ezertan galarazi gabe Nafarroako Kontuen Ganberari, Nafarroako Arartekoari edo bestelako kontrol eta fiskalizazio erakunde batzuei dagozkienak.

9. Bulegoaren jarduketek ukitzen badituzte Nafarroako toki entitateak eta Nafarroako Unibertsitate Publikoa, erakunde horiek konstituzioan bermatuta duten independentzia errespetatuz gauzatuko dira.

10. Bulegoak ez du eskumenik agintaritza judizialari edo Fiskaltzari dagozkien gaietan, eta erakunde horiek ikertu dituzten egitate berak ezin ditu ikertu. Agintaritza judizialak edo Fiskaltzak jarduketak irekitzen badituzte egitate batzuei buruz, eta bulegoak ere egitate horiei buruzko jarduketak egin behar baditu, bulegoak bertan behera utziko ditu bere jarduketak, eta bere esku duen dokumentazio guztia haien esku utziko du, lankidetza erraztuz eskatzen zaionean.

5. artikulua. Baliabide materialen eta langileen hornikuntza.

Bere eginkizunak betetzeko, behar diren baliabide materialak eta pertsonalak izan behar ditu bulegoak, eta bere funtzionamendurako behar den diru hornikuntza ziurtatzeko Nafarroako Aurrekontu Orokorretan izen espezifikoa duen diru partida esleituko zaio.

6. artikulua. Beste organo eta instituzioekiko harremanak.

1. Instituzioen arteko lankidetzaren arloan, elkarlanerako formulak ezartzen ahalko ditu bulegoak administrazio, entitate edo instituzio publikoetako organoekin, unibertsitateekin, pertsona fisiko nahiz juridikoekin, bere jarduketa eremuari atxikiak izan edo ez, informazio trukea errazteko eta prebentzio eta prestakuntza jarduerak egiteko, edo bestelakoak, haiekin partekatzen dituzten helburuak lortzeko.

2. Jardunbide egokien aldeko eta ustelkeriaren kontrako Bulegoak elkarlanean eta lankidetzan ariko da iruzurraren eta ustelkeriaren aurkako lanean eskudun diren edo antzeko eginkizunak dituzten erkidego, estatu, Europa eta nazioarte mailako instituzioekin.

Lankidetza horren terminoak zehaztuko dira dagozkien planak, programa bateratuak, hitzarmenak edo protokoloak ezarriz, aplikagarria den araudiaren esparruan, eta publizitate aktiboaren bidez jakinaraziko dira, gardentasun ondorioetarako.

3. Bere eginkizunak betetzeko beharrezkoa duenean, Bulegoak laguntza eskatuko die, Nafarroako Parlamentuaren Mahaiaren bidez, Kontuen Ganberari edo Nafarroako Arartekoari.

4. Urtero, urtarrilaren 31 baino lehen, Bulegoak Nafarroako Arartekoari eta Kontuen Ganberari jakinaraziko die bere urteko jarduketa plana, izaten ahal diren bikoiztasunak eta interferentziak ekiditeko.

7. artikulua. Bulegoaren egoitza.

Bulegoak Iruñean izanen du egoitza.

8. artikulua. Izaera korporatiboa.

1. Bulegoaren logotipo instituzionalak irudi bidezko identifikazioa emanen dio, eta bulegoaren zuzendaritzaren ebazpen bidez onartuko da.

2. Logo horrek Espainiako Patente eta Marken Agentziak ematen duen babesa izanen du, erabilera esklusiboa izanen du, eta erabilera baimendu gabea izanez gero dagozkion jarduketak gauzatzen ahalko dira.

3. Bulegoak sortuko duen dokumentazioan Nafarroako Ustelkeriaren aurkako Bulegoa izen laburtua erabiltzen ahalko da, edo haren akronimo den "NUB".

9. artikulua. Konfidentzialtasuna.

Bulegoaren jarduketek izaera erreserbatua izanen dute, kalterik ez eragiteko, ez ikertutako pertsona nahiz entitateei, ez eta salaketa edo informazioa eman duten pertsonei ere, eta halaber, jaso den informazio edo salaketaren ondorioz ireki litekeen prozedura administratibo edo judizialaren eraginkortasuna bermatzeko.

10. artikulua. Gardentasuna.

Arestiko artikuluan ezarritakoa ukatu gabe, Gardentasunari, informazio publikoa eskuratzeari eta gobernamendu onari buruzko maiatzaren 17ko 5/2018 Foru Legean ezarritako betebeharrak beteko ditu bulegoak, eta bermatuko du jarduketa desberdinen ondorioz sortzen diren ebazpenen publizitatea.

11. artikulua. Datuen babesa.

1. Bulegoaren jarduketen ondorioz lortzen diren datuen tratamendua eta inoren eskura jartzea, batez ere datu pertsonalak badira, datuen babesaren inguruko indarreko araudia betez gauzatuko dira. Bulegoak ezin ditu datu horiek zabaldu, ez eta jakinarazi, beren eginkizunen jardunean eta indarreko araudia betez, datu horiek ezagutzeko eskubidea duten pertsonei edo entitateei izan ezean, eta ezin ditu datu horiek erabili, bulegoa sortzeari buruzko maiatzaren 17ko 7/2018 Foru Legean ezarritakoez bestelako helburuetarako.

2. Bulegoak lankidetza hitzarmenak ezartzen ahalko ditu bere eskumenen eremuan sartzen diren entitateen gainbegiratze eta kontrol eginkizunak dituzten organo eta instituzioekiko, beren eskumenen jardunean garrantzitsua izaten ahal den informazioa eta datuak komunikatzeko.

3. Ez dira bilduko datu pertsonalak, nabarmena ez bada beharrezkoak direla bulegoaren eginkizunak betetzeko, eta nahigabe biltzen badira, berehalakoan ezabatuko dira.

12. artikulua. Bulegoaren erregistroa eta egoitza elektronikoa.

1. Bulegoak erregistro propioa izanen du, salaketen posta-kutxatik bereizita. Bulegoaren funtzionamendu arauak ezartzea haren zuzendariari dagokio.

2. Bulegoaren zuzendariaren ebazpen baten bidez sortuko da Foru Komunitateko Jardunbide Egokien aldeko eta Ustelkeriaren aurkako Bulegoaren egoitza elektronikoa, erreferentziako helbide elektroniko batekin. Nolanahi ere, bulegoaren web-orrian esteka bat izanen da egoitza elektronikoarekin lotzeko.

II. TITULUA

Bulegoaren zuzendaritza, egitura, antolaketa eta funtzionamendua

1. KAPITULUA

Bulegoaren zuzendaritzaren antolaketa eta funtzionamendua

13. artikulua. Bulegoaren zuzendaritza.

1. Bulegoa zuzendari batek zuzenduko du; bera izanen da bulegoaren gobernu organo gorena eta ordezkaria; kargua independentzia eta objektibotasun osoz beteko du bulegoaren eskumenen esparruan, eta beti ariko da legea eta zuzenbidea erabat betez.

2. Bulegoaren zuzendaritzaren titularra Nafarroako Foru Komunitateko Jardunbide Egokien aldeko eta Ustelkeriaren kontrako Bulegoa sortzeari buruzko maiatzaren 17ko 7/2018 Foru Legearen 33. artikuluan ezarritakoaren arabera aukeratu eta izendatuko da.

3. Bulegoko zuzendaritzaren titularrak maiatzaren 17ko 7/2018 Foru Legearen 34. artikuluan ezarritako bateraezintasun araubidea bete beharko du.

4. Jardunbide egokien aldeko eta ustelkeriaren kontrako bulegoko zuzendariaren urteko ordainsaria izanen da Nafarroako Aurrekontu Orokorretan Nafarroako Gobernuko zuzendaritza nagusietarako finkatzen den berbera.

5. Bulegoko zuzendaritzaren titularrak kargua utziko du maiatzaren 17ko 7/2018 Foru Legearen 35. artikuluan ezarritako arrazoiak gertatzen badira.

6. Bulegoko zuzendaritzaren titularrak bere kabinetea sortzen ahalko du, aldi baterako berak aukeratutako langileez osatua, esleitutako aurrekontuaren arabera, eta kargua utziko dute bulegoaren zuzendariak kargua uzten duen une berean.

14. artikulua. Bulegoaren zuzendaritzaren eginkizunak.

1. Bulegoaren zuzendariaren eginkizunak hauek dira:

a) Nafarroako Foru Komunitateko jardunbide egokien aldeko eta ustelkeriaren kontrako Bulegoa ordezkatzea.

b) Haren organo eta administrazio unitate guztien jarduerak zuzentzea eta koordinatzea.

c) Bulegoaren antolaketa eta funtzionamendurako erregelamenduaren proiektua prestatzea eta aurkeztea, onartu ahal izateko, eta orobat haren aldaketak.

d) Etika eta jokabide kode berri bat prestatu eta Parlamentura bidaltzea han onar dadin, bulegoa sortzeko maiatzaren 17ko 7/2018 Foru Legearen 6. artikuluan ezarritakoa betez; onartu ondoren, haren aplikazioa sustatu, bultzatu eta bermatu beharko du.

e) Nafarroako Parlamentuari aurkeztea bulegoaren jardueren urteko memoria, eta orobat, hari bidaltzea prestatzen dituen txosten espezifikoak. Bulegoak bere jardueraren kontuen berri emanen du Nafarroako Parlamentuan, eta hari jakinaraziko dizkio bere jardueran izaten ahal diren gorabehera larriak.

f) Bulegoaren ikerketa arloko politikaren lehentasunak urtero ezartzea eta, argitaratu aitzin, Nafarroako Parlamentuko Mahaiari, Arartekoari eta Kontuen Ganberari igortzea, horien berri izan dezaten eta haien koordinazioa errazteko.

g) Bulegoan ari diren langileen buru gorena izatea, haien jarduketak zuzenduz eta koordinatuz; lanpostuak hornitu eta hautaketarako prozeduren deialdiak eta ebazpenak ematea; izendapenak eta kargu uzteak gauzatzea; aldi baterako lanpostuak hornitzea legean ezarritako prozedurak betez; bateragarritasun baimenak ematea, behar bada, eta egokia bada, ofizioz deklaratzea abstentzio edo errekusazio arrazoiak; eta orobat, gai honen gaineko bestelako eskumenak, bulegoaren funtzionamendu onari lotzen bazaizkio.

h) Bulegoaren plantilla organikoa eta lanpostuen zerrenda onartzea.

i) Bulegoan egin beharreko lanak esleitzea han ari diren langileei.

j) Aholkularitza eta kontroleko barne prozedura ezartzea; barne hartuko du legezkotasunaren jarraipena, lotura izanen duena, besteak beste, prozeduren bermeekiko eta pertsonen funtsezko eskubideekiko errespetuarekin.

k) Bulegoko langileen artean gerta daitezkeen interes gatazkak ebaztea, ikerketa batean independentzia eta objektibotasuna arriskuan jartzen ahal badira.

l) Hirugarren pertsonek aurkeztu eta bulegoko langileei dagozkien abstentzio eta errekusazio eskaerak ebaztea.

m) Babesa ematea salaketa aurkeztu duten pertsonei, eta kalterik jasotzen ez dutela ziurtatzeko neurriak ezartzea kasu bakoitzean.

n) Bulegoaren urteko aurrekontu proiektua prestatzea eta Nafarroako Parlamentura bidaltzea, ekitaldi bakoitzeko Nafarroako aurrekontu orokorren proiektuan izen espezifikoa duen diru partida gisa txertatu dadin.

o) Bulegoari dagozkion gastuetarako baimena ematea eta ordainketak egiteko agintzea.

p) Bulegoaren aurrekontuaren eta urteko kontuaren kitapena onartzea.

q) Bankuetako kontuak ireki eta ixtea.

r) Nafarroako Foru Komunitateko Gobernuko eta Administrazioko goi mailako kargudunen jarduera eta interesen erregistroaren kudeaketa gainbegiratzea.

s) Nafarroako Foru Komunitateko Jardunbide Egokien aldeko eta Ustelkeriaren kontrako Bulegoa sortzeari buruzko maiatzaren 17ko 7/2018 Foru Legean aurreikusten diren zehapenak ezartzea.

t) Diziplina eta zehapen prozedurak irekitzeko proposamena egitea, eskumena beste organo bati dagokionean.

u) Jarduketak igortzea, egokia denean, Fiskaltzari, agintari judizialari, Kontuen Ganberari edo Kontuen Auzitegiari.

v) Txostenak, irizpenak, proposamenak eta gomendioak ematea, bulegoaren jarduketa eremuan.

w) Ebazpenak ematea, komunikazioak igortzea, eta errekerimendu nahiz oroit-oharrak egitea, aztertzen ari den egitatearen izaeraren eta garrantziaren arabera.

x) Protokoloak, esparru hitzarmenak eta lankidetza hitzarmenak sinatzea, bulegoaren eskumeneko gaietan.

y) Jardunbide onak sustatzea kudeaketa publikoan, eta prestakuntza, irakaskuntza eta sentsibilizazio ekintzak sustatzea prebentzioaren eta iruzurraren nahiz ustelkeriaren aurkako lanaren arloan, eta, behar denean, haietako parte-hartzea egiaztatzea.

z) Informazioa eskuratzeko eskaerak ebaztea, jendeari emandako informazio guztia modu neutral eta inpartzialean ematen dela eta horren dibulgazioa ikerketen konfidentzialtasuna errespetatuz egiten dela bermatuz.

aa) Bulegoaren egitate administratiboen ondare-erantzukizunari, ofizioz berraztertzeri eta kaltegarritasun deklarazioari buruzko espedienteak ebaztea.

bb) Administrazio bidean ebaztea bulegoaren ebazpenen aurrean ezarritako errekurtsoak, berari dagozkionean.

cc) Legez ematen zaizkion beste edozein eginkizun, hala nola bulegoaren legezko eta instituzio mailako ordezkaritzari berez dagozkionak, eta bere eskumenen esparruan izaera betearazlea duten beste eginkizun guztiak.

2. Bulegoaren titularrak eskumen osoa izanen du bulegoaren gobernamenduari, barne araudiari eta bere zerbitzuko langileei dagozkien gaietan.

3. Bulegoaren zuzendaritzak bere egunkizunen jardunean ematen dituen xedapenek ebazpenen forma hartuko dute.

15. artikulua. Eginkizunak eskuordetzea.

Bulegoko zuzendariak bere eginkizunak eskuordetu ahal izaten ditu, salbu eta legeek eskuordetzea ezinezkoa dela jotzen dutenean.

Eskuordetzea idatziz egiten ahalko da, argi utziz nori eskuordetzen zaizkio, eta egokia bada, zenbat denboraz eskuordetzen den. Eskuordetzea erabilita egiten diren jarduketetan egoera hori espresuki adieraziko da.

Eskuordetzea noiznahi errebokatzen ahal da.

16. artikulua. Ordezkapena.

1. Bulegoko zuzendaritzaren titularra zuzendaritzako titular laguntzaileak ordeztuko du, lanpostu hutsa geratzen bada edo titularra kanpoan edo gaixo bada, eta halaber, haren abstentzioa edo errekusazioa deklaratu bada.

Titularraren heriotza, ezgaitasun deklarazio judiziala, kargua utzi, karguari uko egin edo legez ezarritako zernahi arrazoi tartean bada, karguari dagozkion funtzioak zuzendaritzako titular laguntzaileak beteko ditu, harik eta zuzendari berriaren izendapena gauzatzen den arte.

Zuzendaritzako titular laguntzaileak, zerbitzu buruak eta atal nahiz bulegoetako buruak ere ordeztzen ahalko dira, kasu horietan beretan, eta bulegoko zuzendaritzaren titularrak, horretarako emandako ebazpen bidez, ezarritako hurrenkerari jarraiki.

2. Ordezkatzeak ez du esan nahi eskumena aldatuko denik, eta baliozkoa izateko, ez da beharrezkoa izanen hura argitaratzea. Hala ere, argitaratuko da gardentasun ondorioetarako.

3. Ordezkotza erabiliz ematen diren ebazpen eta egintzetan, egoera hori adierazi beharko da, eta zehaztuko da zein den organoaren titularra eta zein haren ordez ari dena.

17. artikulua. Kudeaketa esleipena.

1. Bulegoko zuzendaritzak bere eskumeneko jarduera materialen edo teknikoen gauzapena esleitzen ahalko die beste administrazio publiko, instituzio, organo edo zuzenbide publikoko organismo nahiz entitateei, efikazia lehenetsita, edo horiek betetzeko baliabide tekniko egokirik ez badu eskura, beti ere erakunde horien eskumenen artean jarduera horiek sartzen badira.

2. Kudeaketa horren esleipena hitzarmen bat sinatuta formalizatuko da, aurrekontu baliagarri aski dagoela bermatu ondoren.

3. Hitzarmenean jasoko dira esleipenaren araubide juridikoa, zer jardueratan eragina duen espresuki adierazita, indarraldia, esleitutako kudeaketaren izaera eta hedadura, eta esleipenaren hartzaileak bere gain hartzen dituen betebeharrak.

4. Eraginkorra izan dadin, hitzarmena osorik argitaratuko da Nafarroako Aldizkari Ofizialean.

5. Ez dira kudeatze-esleipenen xede izaten ahalko indarreko kontratu-legedian arautzen diren kontratuek dituzten berezko prestazioak.

18. artikulua. Bulegoaren zuzendaritzaren bateraezintasunak.

Bulegoaren bateraezintasunen araubidea maiatzaren 17ko 7/2018 Lege Organikoaren 34. artikuluan ezarritakoa da.

19. artikulua. Kargua uztea.

Bulegoaren zuzendariak kargua utziko du maiatzaren 17ko 7/2018 Lege Organikoaren 35. artikuluan aurreikusitako arrazoiren bat gertatuz gero, eta han ezarritako prozedura betez.

2. KAPITULUA

Antolaketa egitura

20. artikulua. Bulegoaren egitura.

1. Eginkizunak bereizteko printzipioa aintzat hartuta, bulegoa hainbat zerbitzutan egituratzen da. Zerbitzuak sortu, aldatu eta ezabatzea, eta halaber, haietako bakoitzaren eskumenaren eremua zehaztea, bulegoaren zuzendariari dagokio.

2. Bere eginkizunak betetzeko, zerbitzu hauetan antolatuko da bulegoa:

a) Prebentzio, ebaluazio eta prestakuntza Zerbitzua.

b) Ikerketa, ikuskaritza eta zehapen araubideko Zerbitzua.

Zerbitzu honen barnean txertatuko da esleipen kontratuen jasangarritasun finantzarioaren analisiaren Atala, bulegoa sortzeko maiatzaren 17ko 7/2018 Foru Legearen hirugarren xedapen gehigarrian aurreikusitakoa.

c) Aholkularitza juridikoaren Zerbitzua.

Era berean, bulegoaren egitura osatzen dute, 13. artikuluan aipatutako kabineteaz gain, ondoko Atal hauek, bulegoaren zuzendaritzarekiko zuzeneko mendekoak direnak:

d) Administrazioaren, giza baliabideen, kudeaketa ekonomikoaren eta IKTen Atala.

e) Komunikazioaren eta parte-hartzearen Atala.

3. Zerbitzu bakoitzaren buruan zerbitzu buru bat ariko da, haren mendeko unitate organikoak planifikatu, koordinatu, zuzendu eta kontrolatzeko eginkizunak izanen dituena. Haien izendapena bulegoaren zuzendariari dagokio, bulegoari atxikia dauden langileen artean aukeratuta.

4. Zerbitzuak egituratzen ahalko dira atal eta bulegotan banatuta. Atal eta bulego bakoitzaren buruan pertsona bana ariko da hura zuzentzen, eta Foru Komunitateko funtzio publikoaren arloko legerian ezarritakoaren arabera izendatu eta kargutik kenduko da.

5. 13.6 artikuluan aurreikusitako kabineteak aholkularitza eta administrazio laguntzako eginkizunak beteko ditu. Kabineteko kideak nahi erara izendatuko ditu eta kargutik kenduko bulegoaren zuzendariak; aldi baterako langileak izanen dira, Nafarroako funtzio publikoaren legedian xedatutakoaren arabera, eta nolanahi ere, kargua utziko dute izendatu dituen bulego zuzendariak bere kargua uzten duenean. Maiatzaren 17ko 7/2018 Foru Legearen 35.3 artikuluan aurreikusten den jarduneko zuzendaritzaren kasuan, bulegoaren zuzendari berriak kargua hartzen duen arte jarraituko dute lanpostuan.

6. Zuzendariak ahalmen eta gaitasun tekniko frogatua duen pertsona bat izendatzen ahalko du, bulegoko langile ez-administrarien artetik, zuzendariaren laguntzaile kargurako, eta hari aplikatuko zaizkio bulegoaren zuzendariari dagozkion hautagarritasun eta bateraezintasun baldintza berak.

21. artikulua. Zuzendari laguntzailea.

1. Zuzendari laguntzaileak Nafarroako Foru Komunitateko Administrazioko zerbitzu buruen pareko maila izanen du; bulegoaren zuzendariari lagunduko dio haren eginkizunen jardunean, bulegoaren jardueren plangintzan eta zuzendaritzan, elkarlanean; bulegoaren zuzendaria ordeztuko du behar den kasuetan; eta hark eskuordetuko dizkion funtzioak beteko ditu.

2. Nolanahi ere, bulegoaren antolamendua osatzen duten zerbitzu, atal, bulego eta gainerako unitateen koordinazio lanak eginen ditu.

22. artikulua. Prebentzio, ebaluazio eta prestakuntza Zerbitzua.

Prebentzio, ebaluazio eta prestakuntza Zerbitzuak eginkizun hauek ditu:

a) Bulegoaren mendeko unitateen funtzionamendua eta antolaketa zuzendu, koordinatu eta gainbegiratzea.

b) Arriskuen prebentzio eta analisirako azterlanak eginen ditu, sektore publikoko iruzur tipologiak, zer esparrutan gertatzen diren eta horiek gertatzea errazten duten egoerak identifikatu ahal izateko.

c) Iruzurraren eta ustelkeriaren aurkako prebentzioaren eta borrokaren arloan dauden tresna juridikoen eta neurrien efikazia ebaluatzea.

d) Aldez aurretik irizpide argiak eta egonkorrak ezartzea ekintza publikoen kontrolerako, eta hobekuntzak sartzea administrazioaren prozeduretan eta jardunbideetan.

e) Iruzurraren eta ustelkeriaren inguruko azterlanak eta ikerketak sustatzea, haien sorreran dauden arrazoiak eta eragiten dituzten inpaktu sozial eta ekonomikoak ezagutzeko.

f) Txostenak egitea eta proposamenak eta gomendioak formulatzea zintzotasun eta etika publikoen arloan eta iruzurraren eta ustelkeriaren aurkako prebentzioan eta borrokan.

g) Zintzotasun publikoaren estrategiak osatzen dituzten elementuak prestatzeko eta ezartzeko aholkularitza ematea.

h) Indarrean dauden xedapen arautzaileen gaineko txostenak prestatzea eta proposamenak eta gomendioak formulatzea, haiek aldatzeko proposamenak barne, eta berdin onartzeko bidean diren xedapen arautzaileei buruz.

i) Prestakuntza ekintzak eta sentsibilizazio programak garatzea zintzotasun eta etika publikoaren arloan eta iruzurraren eta ustelkeriaren aurkako prebentzioan eta borrokan.

j) Bulegoaren zuzendaritzarekin lankidetzan aritzea, maiatzaren 17ko 7/2018 Foru Legearen 6. artikuluan aurreikusitako Etika eta Jokabide Kode berria prestatzeko lanean, eta haren aplikazioa sustatzea eta bultzatzea, Nafarroako Parlamentuan onartu ondoren.

k) Goi-karguen jardueren eta interesen erregistroa kudeatzea eta jardueren eta interesen deklarazioetan aurkeztu dituzten informazioak egiaztatzea; kargu publikoen ondarean izandako aldaketen justifikazioa egiaztatzea, esaterako ondare hazkundea izan bada; eta interes gatazka edo bateraezintasuna sortzen baldin bada, horien gaineko informazioa ematea.

l) Kontsulta ez lotesleei erantzuna ematea jardunbide egokien, eta zintzotasun eta etika publikoen arloan eta iruzurraren eta ustelkeriaren aurkako prebentzioan eta borrokan.

m) Bulegoari zuzentzen zaizkion informazio publikoaren eskaerak tramitatzea.

n) Bulegoaren zuzendariak esleitzen dizkion bestelako funtzioak.

23. artikulua. Ikerketa, ikuskapen eta zehapen araubideko Zerbitzua.

1. Ikerketa, ikuskaritza eta zehapen araubideko Zerbitzuak eginkizun hauek ditu:

a) Bulegoaren mendeko unitateen funtzionamendua eta antolaketa zuzendu, koordinatu eta gainbegiratzea.

b) Pertsona fisiko edo juridikoek, publiko nahiz pribatuek, organoek eta erakundeek aurkezten dituzten salaketak eta komunikazioak jasotzea eta aztertzea.

c) Bulegoaren salaketen posta-kutxa kudeatzea, haren funtzionamendu egokia bermatuko duten segurtasun neurriak hartuz, batez ere konfidentzialtasuna, eta kasua bada, salaketa aurkeztu duten pertsonen anonimotasuna ere bai.

d) Iristen zaion informazioaren tratamendua eta analisia egitea, ikerketa jarduketak abiarazteko modukoa dela ikusten bada.

e) Salaketen sinesgarritasuna ebaluatzea, horretarako behar diren jarduketak gauzatuz, eta salaketen edo komunikazioen sinesgarritasunari buruzko txostena prestatuz.

f) Proposamenak prestatzea, dela ikerketa jarduketak abiatzeko, dela organo eskudunari bidaltzeko edo artxibatzeko, eta bulegoaren zuzendaritzari aurkeztea.

g) Kasua bada, ikerketa espedienteak berrirekitzeko proposamenak prestatzea eta bulegoaren zuzendaritzari aurkeztea.

h) Analisiaren, ikerketaren eta ikuskaritzaren goi-mailako zuzendaritza teknikoa gauzatzea, barne direla bulegoa sortzeko maiatzaren 17ko 7/2018 Foru Legearen 20.1 artikuluan aurreikusitako jarduketa guztiak.

i) Ikerketa prozeduretako txostenak eta ebazpen proposamenak prestatzea eta bulegoaren zuzendaritzari aurkeztea.

j) Proposatutako jarduketen eta egindako gomendioen jarraipena egitea.

k) Iruzur edo ustelkeria izaten ahal diren jokabideak identifikatzeko aukera emanen duen informazioa lortu, bermatu eta haren bilketa eta tratamendua zentralizatzeko sistemak garatzea eta estrategiak planifikatzea.

l) Bulegoa sortzeko maiatzaren 17ko 7/2018 Foru Legean aurreikusitako zehapenen ezarpenari dagozkion prozedurak bideratu eta tramitatzea.

m) Bulegoaren zuzendariak esleitzen ahal dizkion bestelako funtzioak.

2. Zerbitzu honen barnean, maiatzaren 17ko 7/2018 Foru Legearen hirugarren xedapen gehigarrian aurreikusitako funtzioak beteko ditu esleipen kontratuen jasangarritasun finantzarioaren analisiaren Atalak.

24. artikulua. Aholkularitza juridikoaren Zerbitzua.

1. Honako hauek dira aholkularitza juridikoaren Zerbitzuaren eginkizunak:

a) Bulegoaren aholkularitza juridikoa egitea eta behar diren txosten juridikoak eta bulegoaren zuzendaritzak eskatzen ahal dituenak prestatzea.

b) Salaketa egin eta informazioa edo alerta eman duten pertsonak zaintzea, haien babesa bermatzeko neurriak hartzea eta, bereziki, kalte pertsonalik edo profesionalik ez dutela jasaten begiratzea.

c) Salaketa egin duen pertsonari babesa emateko proposamenak egitea, eta horrekin lotutako edozein gorabehera konpontzeko proposamenak ere bai.

d) Aholkularitza juridikoa eta abokatuen defentsa ematea salaketa egin duen pertsonari, bulegoa sortzeko maiatzaren 17ko 7/2018 Foru Legearen 24. artikuluan ezarritakoarekin bat.

e) Bulegoa ukitzen duten edo hari dagozkion lege nahiz erregelamendu aldaketak prestatzea eta proposatzea.

f) Bulegotik sortzen diren jarduketen egiaztapen funtzioa betetzea.

g) Bulegoak sinatu beharreko hitzarmenak tramitatzea, ukatu gabe proposamenak prestatzea, bultzatzea eta jarraipena egitea, dagokion administrazio unitatetik.

h) Bulegoa ordezkatzea eta defendatzea auzibideetan.

i) Ondare erantzukizunaren prozedurak tramitatzea.

j) Bulegoko langileen diziplina espedienteak abiaraztea eta tramitatzea.

k) Urteko memoria prestatzea, gainerako unitateekiko lankidetza ukatu gabe.

l) Bulegoaren zuzendariak esleitzen ahal dizkion bestelako funtzioak.

2. Bulegoaren ordezkaritza eta defentsa auzibideetan hango langile funtzionarioei dagokie; zuzenbidean lizentziadun edo zuzenbideko gradua izan beharko dute, eta ordezkaritza eta defentsa hori egiteko gaituta egon behar dute. Hala ere, ordezkaritza eta defentsa hori kanpoko profesionalen esku uzten ahalko da, modu motibatuan eta egoerak hala eskatzen duenean.

3. Aurreko apartatuan aipatu diren bulegoaren ordezkaritza eta defentsa egiteko funtzioak betetzeko, aholkularitza juridikoaren Zerbitzuan gutxienez aholkulari juridiko letradu baten lanpostu bat egon behar da.

25. artikulua. Administrazioaren, giza baliabideen, kudeaketa ekonomikoaren eta IKTen Atala.

1. Administrazioaren, giza baliabideen, kudeaketa ekonomikoaren eta IKTen Atalari dagozkio langileen eta baliabide materialen administrazioa eta kudeaketa; barne araubidea eta zerbitzu orokorrak; ondasunen eta administrazio kontratazioaren kudeaketa; ekonomiaren, aurrekontuen eta diru-kontuen kudeaketa; eta baliabide teknologikoen eta informazio teknologien kudeaketa, eta zehazki, hauek:

a) Lanpostuak betetzeko hautapen eta hornikuntza prozesuak kudeatzea, langileen nominak eta, oro har, bulegoaren zerbitzura dauden langileekin lotutako egitate eta tramite guztiak.

b) Plantilla organikoaren eta lanpostuen zerrendaren aldaketa espedienteak tramitatzea.

c) Arriskuen prebentzioa, laneko segurtasuna eta osasuna eta zerbitzuen barne araubidea kudeatzea.

d) Administrazio orokorreko eta bulegoaren kudeaketa materialeko eginkizunak kudeatzea.

e) Aldizkari ofizialetako argitalpenak kudeatzea.

f) Bulegoaren ondare ondasunak kudeatzea.

g) Bulegoaren administrazio kontratazioa kudeatzea.

h) Bulegoaren zuzendaritzarekin lankidetzan aritzea, haren aurrekontuaren aurreproiektua prestatzen, haren gauzapenaren jarraipena egiten eta haren aldaketak tramitatzeko lanean.

i) Bulegoaren ekonomiaren, finantzen eta kontuen kudeaketa, aurrekontuen gauzapena eta gastuen kudeaketa.

j) Aurrekontu kitapena eta urteko kontuen formulazioa.

k) Diruzaintza eta ordainketen eta diru-sarreren administrazioa.

l) Erregistro orokorra eta artxiboa antolatzea eta kudeatzea.

m) Datuen babesari buruzko indarreko legedia betearaztea.

n) Informazioaren eta komunikazioaren teknologien arloko gaiak bultzatzea.

o) Ekipoen funtzionamendu egokia eta antolaketa eta informazioaren eta telekomunikazioen segurtasuna zaintzea.

p) Informazio sistemak hedatzeko planak eta irizpideak proposatzea, informazioaren eta komunikazioen teknologiekin eta sistemekin lotuta.

q) Baliabide teknologikoak erabiltzeko arauak, segurtasun eta sistemen arteko informazio trukerako politikak, irisgarritasun unibertsala, eta informazioaren eta komunikazioen teknologiekin eta sistemekin lotutako bestelako irizpideak sustatzea eta haien aplikazioa gainbegiratzea.

r) Datu-baseen, aplikazio informatikoen eta komunikazioen mantentze lana kudeatzea, eta informazio sistemen segurtasuna kontrolatzea.

s) Bulegoaren zuzendariak esleitzen ahal dizkion bestelako funtzioak.

2. Segurtasun arrazoiengatik, eta baliabide eta zerbitzu publikoen erabilera bateratu hobea lortzeko, bulegoak hitzartzen ahalko du bere azpiegitura teknologikoen, sistema informatikoen eta erabiltzaileei ematen dien zerbitzuaren euskarrien kudeaketa Nafarroako Foru Komunitatearen Administrazioaren eskutik gauzatzea, haren bitartekoez edo haren enpresa publikoen bitartez.

26. artikulua. Komunikazioaren eta parte-hartzearen Atala.

Komunikazioaren eta parte-hartzearen Atalak bulegoaren komunikazio politika eramanen du eta haren web-orriaren edukiak eta bulegoak sare sozialetan duen presentzia kudeatuko ditu.

Era berean, bulegoak bere eskumenen jardunean zabaltzen ahal dituen parte-hartze prozesuak kudeatuko ditu.

27. artikulua. Emakidako kontratuen jasangarritasun finantzarioaren analisiaren Atala.

Arautegi batek arautuko du emakidako kontratuen jasangarritasun finantzarioaren analisiaren Atalari dagozkion osaera, funtzionamendua eta baliabideak.

3. KAPITULUA

Bulegoaren zerbitzuko langileak

28. artikulua. Araubide juridikoa.

1. Bulegoan zerbitzua ematen duten langileei dagozkien araudiak bulegoa sortzeko maiatzaren 17ko 7/2018 Foru Legearen V. tituluan, Erregelamendu honetan eta, modu osagarrian, Nafarroako Foru Komunitateko Funtzio Publikoari buruzko legedian ezarritakoak izanen dira.

2. Bulegoan zerbitzu ematen hasiko diren langileei aurrez finkatuta duten antzinatasuna eta gradu pertsonala aitortuko zaie.

3. Ikerketa edo ikuskapen eginkizunak esleituta dituzten langileek agintari izaera izanen dute, maiatzaren 17ko 7/2018 Foru Legearen 20. artikuluan ezarritakoaren arabera.

29. artikulua. Plantilla organikoa eta lanpostuen zerrenda.

1. Bulegoaren zuzendariak onartuko du bulegoaren plantilla organikoa eta lanpostuen zerrenda; haietan adieraziko ditu honako hauek: lanpostuari atxikitzen zaion maila; lanpostu horietara iristeko egiaztatu beharreko baldintzak eta hornidura gauzatzeko modua; izendapen libretik hornitzen ahal direnak; eta abuztuaren 30eko 251/1993 legegintza Foru Dekretuaren 40.3 artikuluan aurreikusitako ordainsari osagarriak esleituta dituztenak; Foru Dekretu horren bidez Nafarroako Administrazio Publikoen zerbitzura dauden langileen estatutua onetsi zen.

2. Bulegoaren zuzendariak onetsiko du urtero langile funtzionarioen, langile kontratatuen eta izendapen libreko zuzendaritza postuetan aldi baterako ari diren langileen zerrenda, urte bakoitzeko abenduaren 31n plantilla organikoan dagoen egoeraren arabera, eta Nafarroako Aldizkari Ofizialean argitaratuko da.

30. artikulua. Bulegoko langileen hautapena.

1. Bulegoko langileen hautapena publikotasun, berdintasun, merezimendu eta gaitasun printzipioetan oinarrituta eginen da, maiatzaren 17ko 7/2018 Foru Legean, Nafarroako Administrazio Publikoen zerbitzura dauden Langileen Estatutuan eta haren garapen arauetan ezarritako terminoetan.

2. Bulegoko langileak oposizio bidez hautatuko da, edo oposizio-lehiaketa bidez, espresuki hala adierazten denean.

31. artikulua. Lanpostu hornidura.

1. Nafarroako Foru Komunitateko Jardunbide Egokien aldeko eta Ustelkeriaren kontrako Bulegoko lanpostuak betetzen ahalko dituzte administrazio publikoetako funtzionarioek, bulegoko lanpostuen zerrendan ezarritako baldintzak betetzen badituzte.

2. Bulegoaren zerbitzura ariko diren langileen lanpostuak betetzeko modua izanen da, kasu bakoitzean, lanpostuen zerrendan ezarritakoa. Zerbitzu buruen lanpostuak betetzeko izendapen librea eginen da langile funtzionarioen artean.

3. Bulegoaren zuzendaritzaren titularra den pertsonak ezin atzeratuzko premia larria sumatzen badu, oraindik bete gabe dagoen lanpostu bat betetzeko, aldi baterako izendatzen ahalko du bulegoaren zerbitzura dagoen langile funtzionario bat, lanpostuen zerrendan zehaztutako baldintzak betetzen baditu, eta lanpostu hori betetzeko deialdi publikoa egin beharko du berehala, aplikagarriak diren arauetan zehaztutako epearen barruan.

4. Aldi baterako, bulegoak langile funtzionarioak hartzen ahalko ditu, zerbitzu-eginkizunetan.

32. artikulua. Bulegoko langileen babesa.

Bulegoko langileek defentsa juridikorako eta babeserako eskubidea izanen dute, beren eginkizunen jardun legitimoaren ondorioz, zeinahi jurisdikzio-ordenaren aurrean, sortzen ahal diren prozeduretan, lanpostua utzi ondoren ere.

33. artikulua. Lanbide eguneratzea eta praktika akademikoak.

1. Bulegoak bere langileen etengabeko prestakuntza eta gaikuntza teknikoa sustatuko ditu. Horretarako, ikaskuntzarako hitzarmen, akordio edo protokoloak lotzen ahalko ditu unibertsitateekin, goi-mailako heziketako entitateekin eta antzeko izaera duten bulegoekin, erkidego, estatu, Europa nahiz nazioarte mailan.

2. Unibertsitate edo lanbide ikasketekin lotutako praktikak egiten ari diren pertsonak hartzen ahalko ditu bulegoak, aldez aurretik zehaztutako epe baterako, horrek plantillako lanpostuak betetzea ekartzen ez badu.

34. artikulua. Ikuskatzaileak.

1. Ikuskatzaileek ikerketa eta ikuskapen eginkizunak beteko dituzte, eta dagokien neurrian, prebentzio eginkizunak ere bai.

2. Zehazki, ikuskatzaileen eginkizunak hauek dira:

a) Nafarroako Foru Komunitateko Jardunbide Egokien aldeko eta Ustelkeriaren kontrako Bulegoa sortzeari buruzko maiatzaren 17ko 7/2018 Foru Legearen 7. artikuluan zehaztutako ikerketa egitea, eta haren barnean jarduketa hauek:

–Jokabide irregularrei buruzko ikerketa egitea, jokabide horiek interes gatazkak eragiten ahal badituzte agintari edo goi-kargudunengan eta administrazio publikoen zerbitzuko langileengan, kode etikoaren kalterako badira edo Nafarroako sektore publikoari zuzenean nahiz zeharka kalte ekonomikoa edo ospe galera ekartzen ahal badiote.

–Ikertzea ea sektore publikoaren zerbitzuko langileen berezko eginkizunetatik heldu diren informazioak onura pribaturako erabili diren eta ondasun eta baliabide publikoak norberaren nahiz hirugarrenen onurarako baliatu diren.

–Ikertzea ea berdintasun, merezimendu, publizitate eta gaitasun printzipioak urratu diren, sektore publikoko lanpostuak betetzean, barne direla fundazio eta sozietate publikoak, gehiengodun partaidetzako edo jabari eraginkorrekoak, zuzenbide publikoak nahiz pribatuak arautuak.

–Jarraipena eta egiaztapena egitea espediente hauen gauzapenaren inguruan: dirulaguntzak ematekoak, ente instrumentalei egindako enkarguak eta 7/2018 Foru Legearen 4. artikuluko 1., 2. eta 3. zenbakietan adierazitako subjektuetako batek lizitatu eta esleitutako kontratu administratiboak.

b) Bulegoaren zuzendariari ikerketa txostenak eta horien balizko ondorioak proposatzea, azter eta onets ditzan.

c) Bulegoaren zuzendariari helaraztea beren eginkizunak hobeki egiteko beharrezkotzat jotzen dituzten proposamenak.

d) Bulegoaren zuzendariak esleitutako lana planifikatzea.

e) Bulegoaren zuzendariak agintzen ahal dien bestelako zeinahi eginkizun.

3. Desadostasunik bada ikuskatzailearen ebazpen proposamenaren eta behin betiko ebazpenaren artean, ikuskatzaileak eskubidea izanen du bere desadostasuna idatziz jasotzeko eta ebazpenaren eranskin gisa agertzeko. Gauza bera txostenak ematen direnean ere, desadostasunik sortzen bada, ikuskatzaileak prestatutako txostenaren eta behin betiko onetsitako txostenaren artean.

4. Jardunbide egokien aldeko eta Ustelkeriaren aurkako Bulegoko ikuskatzaileak oposizio-lehiaketa bidez aukeratuko dira; aurkezteko titulu hauetako bat behar da: Zuzenbide lizentzia, Ekonomia lizentzia, Enpresen Administrazioa eta Zuzendaritza lizentzia, Enpresa Zientzietako lizentzia, Zientzia Aktuarial eta Finantzarietako lizentzia edo orain arte esandakoen baliokide deklaratutako tituluren bat, edo zuzenbideko gradua, edo ekonomia, enpresa, kontabilitate edo finantza gradua (Zientzia Sozial eta Juridikoen adarra) edo titulu baliokideren bat.

5. Aldi baterako, ikuskatzaileen lanpostuak betetzeko, langile funtzionarioak hartzen ahalko ditu bulegoak, zerbitzu-eginkizunetan, beste administrazio batean lanpostu hauetako baten plaza baten titularrak badira: administrazio publikoko teknikaria (adar ekonomikoa), administrazio publikoko teknikaria (adar juridikoa) edo ogasuneko teknikaria.

6. Ikuskatzaileek agintari izaera izanen dute ondorio baterako, alegia, beraiek egiaztatu eta indarreko legediaren arabera formalizatutako dokumentuetan jaso dituzten egitateek egiazkotasun-presuntzioa izanen dute.

7. Ikuskariei bulegoko zuzendaritzari aplikatzen zaizkion bateraezintasun arrazoi berberak aplikatuko zaizkio.

8. Ikerketa, ikuskapen eta zehapen araubideko Zerbitzuan egiaz ikuskaritza eginkizunak betetzen ari diren langileek Nafarroako Administrazio Publikoen zerbitzuko Langileen Estatutuaren testu bategina onetsi zuen abuztuaren 30eko 251/1993 Legegintzako Foru Dekretuaren 40. artikuluko 4. apartatuan aurreikusten den produktibitate-sari osagarria hartzeko aukera izanen dute.

Osagarri horrek sarituko du haien eginkizunak betetzean izandako errendimendu berezia, aparteko jarduketa eta interesa edo ekimena.

Osagarri horren zenbatekoak ez du gainditzen ahalko, inolaz ere, dagokion mailaren hasierako soldataren % 55a.

Apartatu honetan aipatzen diren inguruabarrak antzeman badira, ikuskaritza eginkizunarekin lotutako elementu objektiboekin erlazionatu beharko dira, eta bulegoaren zuzendaritzak ezarritako helburu eta emaitzen lorpenarekin lotu beharko dira.

Produktibitate-osagarri gisa denbora tarte zehatz batez jasoko diren diru kopuruek ez dute eskuratutako eskubiderik sortuko.

35. artikulua. Prestakuntza/aholkularitzaren arduraduna.

1. Bulegoan gutxienez pertsona bat ariko da prestakuntza eta ebaluazio arloaren arduradun.

2. Prestakuntza/aholkularitzaren arduraduna oposizio-lehiaketa bidez hautatuko da eta goi-mailako ikasketen, lizentzia edo gradu titulua izan behar du.

3. Prestatzaile/aholkulariari zuzendariari aplikatzen zaizkion bateraezintasun-arrazoi berberak aplikatuko zaizkio.

4. Prestatzaile/aholkulariak ebaluazioaren prestakuntzaren eta, dagokion neurrian, prebentzioaren ardura izanen du, honako eginkizun hauekin:

a) Jardunbide okerren eta ustelkeriaren prebentziorako eta haien aurkako borrokarako neurrien eraginkortasunaren kontrola, jarraipena eta ebaluazioa, eta halaber, jardunbide egokien sustapena, arlo honetan.

b) Jardunbide irregularren prebentzioaren eta jardunbide egokien arloko prestakuntza eta sentsibilizazio politikak taxutzea, bai eta ebaluazio adierazleak taxutzea ere, bai administrazio publikoentzat edo haien mendeko entitateentzat, bai entitate pribatuentzat.

c) Zuzendariari helaraztea bere lana hobeki egiteko beharrezkotzat jotzen dituen proposamenak.

d) Bulegoaren zuzendariak esleitutako lana planifikatzea.

e) Bulegoaren zuzendariak esleitzen ahal dizkion bestelako eginkizunak.

36. artikulua. Bulegoko gainerako langileak.

1. Bulegoak bere eginkizunak betetzeko beharrezkoak diren teknikariak, administrariak, laguntzaileak eta mendeko langileak izanen ditu.

2. Langileak oposizio edo oposizio-lehiaketa bidez hautatuko dira.

37. artikulua. Kanpo kontratazioak.

1. Nafarroako Foru Komunitateko Jardunbide Egokien aldeko eta Ustelkeriaren kontrako Bulegoak kontrolatu beharreko arloetako espezialista, peritu eta adituen zerbitzuak kontratatzen ahalko ditu. Kontratu horiek Nafarroako kontratu publikoei buruzko legedia betez eginen dira.

2. Zerbitzu espezializatu horietarako kontratatutako langileak Bulegoko gainontzeko langileen zintzotasun, neutraltasun, erantzukizun, inpartzialtasun eta konfidentzialtasun araubide berari lotuta egonen dira.

III. TITULUA

Prebentzioa eta prestakuntza

38. artikulua. Prebentzio eginkizuna.

1. Nafarroako Foru Komunitateko Jardunbide Egokien aldeko eta Ustelkeriaren kontrako Bulegoarentzat maiatzaren 17ko 7/2018 Foru Legearen 6. artikuluan aurreikusitako prebentzio funtzioak barne hartuko ditu Erregelamendu honetako 22. artikuluan Prebentzio, ebaluazio eta prestakuntza Zerbitzuari esleitzen zaizkion funtzioak.

2. Prebentzio eginkizuna beteko da prebentzioarekin eta iruzurraren eta ustelkeriaren aurkako borrokarekin lotura duten gainerako entitate eta kontrol organoekiko lankidetzan.

39. artikulua. Prestakuntza.

1. Prebentzio eginkizunaren barnean, prestakuntzarako programak landuko ditu bulegoak, eta bere helburu diren gaien inguruko prestakuntzarako materialak prestatuko ditu.

2. Bulegoaren prestakuntza ekintzak zuzentzen ahalko dira haren jardun-eremua osatzen duten entitateetako langileentzat, Administrazioarekin harremana duten enpresa eta entitateentzat, bigarren hezkuntzako, batxilergoko eta unibertsitateko gradu eta gradu ondoko ikasleentzat eta, oro har, gaian interesa duten pertsona eta kolektiboentzat.

3. Prestakuntza jarduketak aurrera eramateko, lankidetza eratuko da Nafarroako administrazio publikoen zerbitzura ari diren langileen prestakuntzan eskudunak diren erakunde eta entitateekin, eta orobat, unibertsitatez kanpoko prestakuntza zentroekin eta horretarako gaitasuna duen bestelako zeinahi entitaterekin.

IV. TITULUA

Ikerketa prozedura

1. KAPITULUA

Jarduketen printzipioak eta xedea.

40. artikulua. Jarduketa printzipioak.

1. Nafarroako Foru Komunitateko Jardunbide Egokien aldeko eta Ustelkeriaren kontrako Bulegoak, legez esleitu zaizkion eginkizunak betetzeko jardunean, egiaztapen, ikerketa, ikuskapen eta jarraipenaren arloan eginen dituen jarduketak titulu honetan ezarritako prozedurari jarraiki eginen dira, ikertutako pertsonen errugabetasun-presuntzioaren eskubidea eta defentsarako funtsezko eskubidea bermatzeko eta defentsa-gabezia ez eragiteko.

2. Bulegoak egindako ikerketa jarduketetatik daturik edo frogarik sortzen bada, pertsona zehatz bat inplikatuta egoten ahal dela ezartzen duena, berehala jakinaraziko zaio hari, eta entzunaldiaren tramitea emanen zaio, salbu eta, ikerketa ongi burutzeko asmoz, sekretua mantendu behar bada, osorik edo partez, sortutako dokumentazioaren edo egindako jarduketen inguruan; kasu horretan, dagokion ebazpen arrazoitua emanen da, eta komunikazioa eta entzunaldiaren tramitea atzeratuko dira, ikerketa ongi burutzea ziurtatzeko behar den denboraz. Entzunaldiaren tramitean auziak ukitzen duen pertsonari jakinaraziko zaizkio egozten zaizkion egitateak. Auziak ukitzen dituen pertsonak beraiek agertzen ahalko dira, edo haien ordezkaritza eta defentsa letradua egin behar duen pertsonaren bidez. Nolanahi ere, ordezkaritza egiaztatu beharko da.

3. Egiazkotasunaren analisia eta ikerketa faseetan irizpide nagusiak dira bizkortasuna, ekonomia, sinpletasuna, efikazia eta erreserbarik handiena. Prozeduraren bi faseetan bulegoak gauzatzen ahalko ditu maiatzaren 17ko 7/2018 Foru Legearen 15.2 eta 20.1 artikuluetan aipatzen diren ahalak, eta aplikagarria izanen da foru lege horren 15.3 artikuluan aipatzen den informazioa emateko betebeharra, eta idatzizko erantzuna emateari uko eginez gero, edo justifikatu gabeko atzerapena bada, aplikagarria izanen da 20.2 artikulua.

4. Maiatzaren 17ko 7/2018 Foru Legearen 11. artikuluan espresuki aipatzen den lankidetza betebeharraren esparruan, bulegoaren eginkizunak betetzeko jarduna eragozten duten pertsonek, edo eskatutako txosten, dokumentu edo espedienteak emateari uko egiten diotenek, legez ezarritako erantzukizunak hartu beharko dituzte beren gain.

5. Bulegoaren jarduketek erreserbarik handiena bermatuko dute, kalterik ez eragiteko pertsona edo entitate ikertuei, eta jarduketa horien ondorioz hasten ahal diren prozedurak ongi burutu ahal izatea zaintzeko, maiatzaren 17ko 7/2018 Foru Legearen 22. artikuluan ezarritakoaren arabera.

41. artikulua. Ikerketa jarduketen helburua.

1. Bulegoaren ikerketa eta ikuskapen jarduketen helburua da egitate zehatzak egiaztatzea eta dokumentatzea, kasu hauetan: funts publikoen erabilera edo destino irregularrak, edo ordenamendu juridikoaren kontrako beste edozein aprobetxamendu; bere jardun-eremua osatzen duten entitateen zerbitzura ari diren pertsonen jokabideak, beren eginkizunen jardunean lortu dituzten informazioa onura pribaturako abusuz erabili badituzte; eta orobat, zintzotasun edo etika publikoarekin, edo objektibotasun, efikazia eta legeari eta zuzenbideari men egiteko printzipioekin bat ez datozen jokabideak.

2. Ikerketa eta ikuskapen jarduketak bulegoarentzat maiatzaren 17ko 7/2018 Foru Legearen 4. artikuluan zehaztutako jarduketa esparruan gauzatuko dira, eta haien xede izanen dira pertsona fisiko nahiz juridikoak, pribatu zein publikoak.

3. Bulegoak ez du eskumenik agintaritza judizialari, Fiskaltzari edo polizia judizialari dagozkien gaietan, eta erakunde horiek ikertu dituzten egitate berak ezin ditu ikertu. Agintaritza judizialak edo Fiskaltzak prozedura bat hasten badute egitate batzuen alderdi penala zehazteko, eta aldi berean bulegoa ari bada egitate horiek ikertzen, bulegoak bertan behera utziko ditu bere jarduketak, eta erakunde horien esku utziko du, berehalakoan, eskura duen informazio guztia.

2. KAPITULUA

Analisia eta aldez aurretiko ebaluazioa

42. artikulua. Salaketen, komunikazioen eta eskaeren sinesgarritasuna aurretiaz zehaztea.

1. Jarduketak hasi, salaketak artxibatu edo ez onartu, edo beste organo batzuen komunikazioei edo eskaerei erantzuna eman aurretik, egiazkotasunaren arrazoizko zantzuak daudela egiaztatu beharko da.

2. Egiazkotasunaren analisia inplementatzeko, bulegoak eskatzen ahalko dio salaketa egin edo informazioa eman duen pertsonari, edo eskaera egin duen organoari, garrantzitsua iruditzen zaion informazio edo dokumentazio gehigarria.

3. Gertaeren sinesgarritasuna egoki egiaztatzeko, administrazioaren bulego edo egoitza batera edo zerbitzu publiko bati atxikitako zentro batera joan beharko balitz bulegoko langile batek, akta batean jasoko da ikuskapen bisita horien emaitza, eta halaber, bisita horiek egin direnean izandako edozein gorabehera.

Sektore publikokoak ez diren pertsona fisiko edo juridiko pribatuen kasuan, haien baimena beharko da haien egoitzara sartzeko, edo bestela, epailearen baimena.

4. Era berean, deklarazioa hartzen ahalko zaio informazio garrantzitsua ematen ahal duen edonori, eta orobat, bulegoaren jarduketaren eremuan sartzen diren administrazioei, pertsonei eta entitateei eskatzen ahalko zaie beren esku duten informazioa.

5. Bulegoari salaketa, komunikazio edo eskaeren bidez jakinarazi zaizkion egitateen eta jokabideen sinesgarritasunaren aurretiazko egiaztapena behar den denbora doia erabiliz eginen da, eta nolanahi ere, bi hilabeteko epearen barnean, bulegoan aurkeztu denetik delako eskaera, salaketa edo komunikazioa, epe hori ezartzen baitu maiatzaren 17ko 7/2018 Foru Legearen 16. artikuluak, ikerketa prozedura hasteko edo salaketa artxibatzeko.

6. Eskaera, salaketa edo komunikazioa zuzentzen bada, edo haiekin lotutako datu edo egitate berriak eransten badira, aurreko apartatuan aipatutako bi hilabeteko epean, berriz irekiko da bi hilabeteko epe berri bat, egiaztatu ahal izateko sinesgarritasun zantzu arrazoizkoak ba al diren, salaketa, komunikazio edo ikerketa eskaeraren xede izan diren egitateen edo jokabideen inguruan. Salaketa egin duen pertsonari informazio gehigarria eskatzen badio bulegoak, bi hilabeteko epea eten eginen da, eta berriro jarraituko du eskatutako informazioa jaso orduko.

7. Ikerketa eta ikuskapen jarduketak abiaraztea erabakitzeko beharrezkoa izanen da aldez aurretik egitateen egiaztapena egitea eta haien egiazkotasun zantzu arrazoizkoak daudela frogatu ahal izatea.

8. Ikerketen lehentasunak bulegoaren zuzendaritzak onetsitako urteko jarduketa planaren bidez zehaztuko dira.

9. Bulegoaren zuzendaritzak egoki iruditzen zaizkion behin-behineko neurriak hartzen ahalko ditu, prozeduraren ondorioz sortzen ahal den ebazpenaren eraginkortasuna ziurtatzeko, indarra duen legedian ezarritakoa aintzat hartuta.

3. KAPITULUA

Ikerketa prozedura abiaraztea

43. artikulua. Abiarazteko moduak.

1. Bulegoaren ikerketa prozedura beti ofizioz hasiko da, bulegoaren zuzendariak erabakita, dela bere kabuz, dela aurkeztutako salaketa edo komunikazio bat aintzat hartuta, dela bestelako organo edo instituzio publiko batek helarazitako eskaera arrazoitu bati erantzunez.

2. Bulegoak bere ekimenez abiaraziko ditu ikerketa eta ikuskapen jarduketak, arriskuen aurretiazko analisi bat egin ondoren, adierazleek aholkatzen badute zenbait egitate edo jarduera ikertzea.

3. Beste organo, entitate edo instituzio publikoek formulatutako eskaerek ez dute behartuko bulegoaren zuzendaria jarduketak hastera, baina betiere erantzuna eman beharko die, erregelamendu honen 42.5 artikuluan ezarritako epean, ikerketak hastea ebatzi duen, edo ikerketarik ez abiarazteko hartutako erabaki arrazoitua helaraziz.

44. artikulua. Salaketak eta jakinarazpenak.

1. Pertsona guztiek dute bulegora jotzeko aukera, jarduketen edo jokabideen gaineko informazioa emateko, edo arau-hauste edo antolamendu juridikoaren gaineko urraketa eragiten ahal duten egitateak salatzera, interes orokorra ukitzen ahal dutelako, eta bulegoaren ikerketa eta ikuskapenerako gai izaten ahal direlako.

2. Agintariek, enplegatu publikoek eta entitate zein erakunde publikoetan lanean ari diren pertsona guztiek bulegoari jakinarazi behar dizkiote, ezagutu orduko, bulegoaren ikerketa edo ikuskapenaren xede izaten ahal diren egitateak, ukatu gabe zigor legedian aurreikusita dauden betebeharrak.

3. Salaketak ez badu aurkezten tramitatzeko behar den gutxieneko informaziorik, salaketa aurkeztu duen pertsonari eskatuko zaio akatsa zuzentzeko hamar eguneko epean, eta ohartaraziko zaio, hala egin ezean, atzera egin duela ulertuko dela, eta beste tramiterik gabe artxibatuko dela.

4. Bulegoak, salaketa jaso eta hurrengo zazpi egunetan, jaso izanaren adierazpena eginen du, salbu eta salaketa aurkeztu duenak espresuki besterik eskatzen badu, edo agintaritza eskudunak modu arrazoituan uste badu salaketa jaso izanaren adierazpenak salaketa aurkeztu duen pertsonaren nortasunaren babesa zailduko lukeela.

Salaketa jaso izanaren adierazpenean azalduko da salaketa aurkezteak ez duela automatikoki esan nahi bulegoari jakinarazitako egitateei eta jokabideei buruzko ikerketa jarduketak abiaraziko direnik, ez eta salaketa aurkeztu duen pertsonari interesdunaren izaera esleitzen zaionik ere. Jaso izanaren adierazpena salaketa edo informazioa aurkeztu duen pertsonak adierazitako bitartekoa erabiliz emanen da.

5. Salaketa aurkeztu eta hurrengo bi hilabeteko epean, ikerketa prozedura hasteko ebazpena eman beharko da, edo bestela, salaketa ez onartzeko edo artxibatzeko ebazpen arrazoitua, eta pertsona interesdunari jakinaraziko zaio.

Epe hori etenik geratuko da bulegoak informazio gehigarria eskatzen dionean salaketa egin duen pertsonari, erregelamendu honen 42.6 artikuluan ezarritako terminoetan.

6. Salaketa edo informazioa aurkeztu duen pertsonak bere nortasunaren gaineko konfidentzialtasuna gordetzeko eskatzen ahalko du, eta bulegoko langileek bermatu beharko dute hori, non ez den errekerimendu judizialik jasotzen.

7. Salaketa eta komunikazio izendunak eta anonimoak onartuko dira, azken horiek anonimotasunaren berme osoarekin, bulegoaren web-orrian eskura dagoen posta-kutxa elektronikoaren bidez.

8. Salaketa egitea bulegoaren aurrean ez dio galarazten aurkeztu duen pertsonari bestelako salaketak aurkeztea bestelako erakundeen aurrean, baina horren berri eman behar dio bulegoari.

9. Salaketak informazio faltsua, nahasia edo legez kontrako moduan lortutakoa ematen badu, erantzukizunak ondorioztatzen ahalko dira salaketa aurkeztu duenarentzat, legedi administratibo, zibil eta penalaren aldetik.

10. Ez dira tramitera onartuko, eta nolanahi ere, egiazkotasuna frogatzeko betebeharretik kanpo geratzen dira salaketa eta komunikazio hauek:

a) Funtsik gabeak direnak edo nabarmen faltsuak.

b) Bulegoaren jarduketa eremutik kanpo geratzen direnak.

c) Agintaritza judizialak, Fiskaltzak edo polizia judizialak ikertzen ari direnak.

d) Oinarrian iritziak edo funts gutxiko informazio orokorrak dituztenak, eta egitate edo datu konkretuen ingurukoak ez direnak.

11. Salaketa edo komunikazio bat artxibatzea egokia izanen da kasu hauetan:

a) Egitate eta jokabide horiei buruz dagoeneko ikerketa egiten ari bada edo lehen egin bada, agintaritza judizialaren edo Fiskaltzaren eskutik.

b) egitate eta jokabide horiei buruz lehendik ikerketa jarduketarik egin bada bulegoaren aldetik.

c) Salaketa edo eskaeraren xede diren egitate edo jokabideen inguruan egiazkotasun zantzu fidagarririk ez dagoenean.

d) Salaketa, komunikazioa edo eskaera arrazoitua osatu ez denean, haren sendotasuna ukitzen duten akatsak edo okerrak zuzentzeko errekerimendua egin ondoren.

12. Salaketa bat ez bada onartzen edo artxibatzen bada, salaketa egin duen pertsonari jakinaraziko zaio dagokion ebazpena.

13. Salatutako egitateen gaineko ikerketa bulegoaren eskumena ez denean, gai horren gainean eskuduna den entitatearen esku jarriko da salaketa.

14. Salatutako egitateak zigor arloko arau-hauste penala izaten ahal badira, Fiskaltzaren edo organo judizial eskudunaren esku jarriko dira.

15. Bulegoaren zuzendariak lehen artxibatutako espedienteak berriro irekitzea ebazten ahalko du, betiere 7/2018 Foru Legearen 21. artikuluan ezarritako epearen barruan, ikusten badu datu, elementu edo egoera erabakigarriren bat dagoela, artxibatzea erabaki zuenean ezagutzen ez zuena.

45. artikulua. Hasiera emateko ebazpena.

1. Maiatzaren 17ko 7/2018 Foru Legearen 19. artikuluan ezarritakoarekin bat, hasteko ebazpenak gutxienez eduki hauek izanen ditu:

a) Prozeduraren instruktorearen izendapena.

b) Prozedura abiaraztea eragin duten gertakariak.

c) Prozedura ebazteko organo eskuduna.

d) Prozeduran alegazioak aurkezteko eta entzuna izateko eskubideari eta horretarako epeei buruzko oharra, adierazita ezen, prozedura abiarazteko erabakiaren edukiari buruzko alegaziorik egiten ez bada ezarritako epean, eduki hori ebazpen proposamentzat hartzen ahalko dela, egotzitako erantzukizunari buruzko erabaki zehatz bat jasotzen duenean.

2. Hasteko ebazpena dagokion prozeduran interesdunak diren pertsonei eta salaketa egin duten pertsonei jakinaraziko zaie.

4. KAPITULUA

Ikerketen garapena

46. artikulua. Ikerketa prozeduraren garapena.

1. Ikerketa jarduketak bulegoaren zuzendariak bulegoko langileen artean izendatuko dituen langileek eginen dituzte, hasteko ebazpenetik gehienez sei hilabeteko epean, salbu eta kasuaren konplexutasunak luzatzea gomendatzen badu; orduan, erabaki espresua eta arrazoitua eman beharko da, gehienez beste sei hilabetez luzatzeko.

2. Ikerketa espedienteak jarduketa eta dokumentu multzo ordenatu batez osatuko dira, bertan jasota prozeduran emandako ebazpen, jakinarazpen, akta, izapide, irizpen, eta bestelako dokumentu guztiak. Dokumentuak idatziz emanen dira, bitarteko elektronikoen bidez, salbu eta haien izaerak eskatzen badu adierazteko eta jasotzeko beste modu egokiagoren bat.

3. Ikerketa espedientea tramitatzen ari denean, errekerimenduak egiten ahalko dira, prozeduraren gaineko ebazpena emateko, ikertzaileen iritziz, beharrezkoa bada dokumentuak eskuratzea edo elkarrizketa pertsonalak nahiz ikuskapen bisitak egitea. Elkarrizketa pertsonalak eta ikuskapen bisitak dokumentatuko dira, akta zehatz batean jasoz ikertzaileen eskutik, ukatu gabe grabaketa egiteko baimena ematea, formatu iraunkor eta eskuragarri batean.

4. Bulegoak elkarrizketa pertsonala eskatzen ahalko die jarduketen xede diren egitateei buruzko informazio adierazgarria ematen ahal dioten pertsona guztiei; bitarteko egokia erabiliz eginen da elkarrizketa. Bidean den jarduketa batetik ondorioztatzen bada egitate horiekiko inplikazio indibiduala duela pertsona batek, eta ikerketak eskatzen badu pertsona horri elkarrizketa egitea, bulegoaren aurrean agertzeko deia igortzen ahalko zaio pertsona horri, behar den aurrerapenarekin, betiere hogeita lau ordutik gorakoa, eta jakinarazi beharko zaio konfiantzako pertsona batekin edo egokia iruditzen zaion profesionalaren laguntzaz agertzen ahal dela. Elkarrizketa pertsonalera justifikaziorik gabe agertzen ez bada inor, dagozkion erantzukizunak eskatuko zaizkio, eta horrek ez du galaraziko jarduketekin aurrera jarraitzea.

5. Ikuskapen bisitak espresuki erabakiko ditu bulegoaren zuzendariak, eta bulegoko langileek egiten ahalko dituzte, behar bezala akreditatuta, eta aldez aurretik abisatu gabe, adierazgarria izaten ahal den informazio guztia lortu ahal izateko.

6. Ikertu beharreko egitate edo jokabideen konplexutasuna edo espezifikotasuna dela eta, bulegoaren zuzendariak behar den laguntza teknikoa emateko ezagutza espezializatuak dituzten pertsonak izendatzen ahalko ditu, eta esku hartzen ahalko dute, maiatzaren 17ko 7/2018 Foru Legearen 20.1 artikuluan aipatzen diren ikerketa ahaletako batekin, betiere indarra duen legediak horretarako aukera ematen badu.

7. Bulegoak eskuratu ahal izan dituen datuak ikerketaren helburu espezifikoetarako bakarrik erabiltzen ahalko dira, eta behar bada, salaketa aurkezteko agintari eskudunen aurrean, eta legez ezarritako konfidentzialtasunaren babesa izanen dute.

8. Ikerketak edo ikuskapenak ukitzen dituzten pertsonek aukera izanen dute, entzunaldiaren tramitea egin aurreko edozein unetan, alegazioak egiteko eta dokumentuak edo bestelako judizio-elementuak aurkezteko.

9. Prozedura izapidetu ondoren, eta ebazpen-proposamena idatzi aurreko unean doi, ikertutako entitateei edo ukitutako pertsonei jakinaraziko zaie ikerketaren behin-behineko txostena, 48.1 artikuluan aurreikusitako edukia izanen duena, beren alegazioak edo oharrak aurkez ditzaten, hamar egun balioduneko epean, salbu eta sekretua gordetzeko eskatzen bada, ikerketa ongi burutu ahal izateko.

Entzunaldiaren eskaintza egiten zaien administrazio, instituzio edo pertsonek nahitaez jakinarazi beharko diete tramite hori beren erakundekoak diren eta gaiak ukituak izan daitezkeen pertsonei.

47. artikulua. Kautelazko neurriak.

1. Bidean diren ikerketen eraginkortasunak eta emaitzak, edo interes publikoak, eskatzen dutenean, bulegoaren zuzendariak eskatzen ahalko du, arrazoiak azalduz, kautelazko neurri egokiak hartzeko, beste organo administratibo edo entitate bati. Era berean, neurriak bertan behera uzteko eskatzen ahalko du, horiek hartzea eragin zuen egoera aldatu bada.

2. Kautelazko neurriak hartzeko eskaerak ez du zertan eragotzi bulegoaren jarduketek aurrera jarraitzea.

48. artikulua. Ikerketaren azken txostena.

1. Ikerketa jarduketak amaituta, azken txosten bat prestatuko da, non jasoko diren salaketaren identifikazio kodea eta aurkezteko data, egiaztatutako egitateak, haietan parte hartu, lagundu edo esku hartu duten pertsonak, egitateen sinesgarritasuna frogatzeko egindako jarduketak, haien balizko kalifikazio juridikoa eta ondorioztatzen ahal diren erantzukizunak.

2. Ikerketaren azken txostenean jasoko dira, orobat, ikerketaren xede izan diren egitateetan inplikazio indibiduala izaten ahal duten pertsonek formulatutako alegazioak.

3. Azken txosten hori ikerketa eragin zuten egitateak salatu zituen pertsonari jakinaraziko zaio, salbu eta sekretua gordetzeko eskatzen bada, ikerketa ongi burutu ahal izateko.

5. KAPITULUA

Jarduketen amaiera

49. artikulua. Ebazpena.

1. Ikerketa prozeduraren tramitazioa bukatu ondoren, eta aurreko artikuluan aipatzen den azken ikerketa txostenean oinarrituta, ikerketaren ardura duen pertsonak ebazpen proposamena helaraziko dio bulegoaren zuzendariari, eta han proposatuko du honako jarduketa hauetako bat:

a) Prozedurari amaiera ematea, jarduketak artxibatuta.

b) Prozedura zehatzaile bat hastea, maiatzaren 17ko 7/2018 Foru Legearen VI. tituluan ezarritakoarekin bat.

c) Fiskaltzaren esku uztea hasitako jarduketa guztiak, egindako ikerketaren ondorioz antzematen badira ustez delitua izan daitezkeen jokabideak edo egitateak.

d) Kontuen Auzitegiaren jurisdikzioari berri ematea, Nafarroako Kontuen Ganberari buruzko abenduaren 20ko 19/1984 Foru Legean ezarritako bidetik, baldin eta egindako ikerketatik ustezko kontabilitate erantzukizun bat, zuzena nahiz subsidiarioa, ondorioztatzen ahal bada.

e) Organo eskudunari jakinaraztea, araudi sektorialaren gaineko arau-hauste zantzuren bat sumatu bada.

f) Erregelamenduak, zirkularrak eta jarraibideak taxutzeko edo aldatzeko proposatzea, bere eskumenaren esparruan.

g) Hainbat gomendio ematea administrazioei eta entitate publikoei, egoki irizten diren neurriak har ditzaten, eta haietan iradokiz irizpideak aldatu, deuseztatu edo berriak eranstea, disfuntzioak saihesteko edo jardunbide administratiboak hobetzeko, detektatu diren jokabide irregularren kasuetan eta haien arrisku eremuetan.

2. Ebazpen proposamena ikusirik, bulegoaren zuzendariak ebazpen arrazoitua emanen du, proposamena jaso eta hamar egun balioduneko gehieneko epean.

3. Ikerketa txostenak, ikerketa prozedurari amaiera emateko ebazpenak, gomendioak emateko ebazpenak, edo jarduketak organo eskudunaren esku uzteko ebazpenak ez dira errekurritzen ahalko. Ikerketa prozeduraren esparruan egiten diren komunikazioak edo errekerimenduak ere ez dira errekurritzen ahalko. Horiek guztiak, egindako ikerketaren ondorioz hasitako prozedura zehatzaileari amaiera ematen dion ebazpena aurkaratzeko aukera ukatu gabe.

4. Bulegoaren jarduketa eragin duten egitateen oihartzun sozialak edo garrantziak hala eskatzen badute, bulegoaren zuzendariak dagokion batzorde parlamentarioari aurkezten ahalko dizkio egokiak iruditzen zaizkion txostenak.

5. Bulegoak egiaztatuko du agintaritza eskudunek gomendatutako neurriak aplikatzen dituztela, eta horren jarraipena egiteko egokiak iruditzen zaizkion jarduketak eginen ditu. Horretarako, bulegoak oroit-oharrak igortzen ahalko dizkio entitate ukituaren agintari gorenari, eta emandako gomendioak inplementatzeko plan bat erakusteko eskatzen ahalko dio, non jaso beharko dituen ekintzak, epeak eta aurrera eraman beharreko jarduketa bakoitzaren ardura duten pertsonak, edo bestela, proposatutako neurriak hartzea galarazten dioten arrazoiak.

6. Agintari eskudunek proposatutako gomendioak aplikatzen ez badituzte, eta hori justifikatzen ez badute, bulegoak egoera hori jasoko du urteko memorian, edo Parlamentura bidaliko duen txosten berezi batean, hala badagokio. Nolanahi ere, ez-betetze hori espresuki agertu aurretik, bulegoak horren berri eman beharko dio ukitutako pertsonari edo organoari, memoria edo txosten proposamenarekin batera, egokia iruditzen zaion alegazioa egin ahal izan dezan.

V. TITULUA

Salaketa egin duen pertsona babestea

1. KAPITULUA

Bulegoaren aurrean salaketak jartzeko prozedurak eta bideak

50. artikulua. Salaketa aurkeztu duen pertsona.

1. Salatzaile izaera izanen dute, erregelamendu honen ondorioetarako, bulegoaren aurrean iruzur, ustelkeria edo interes gatazka eragiten ahal duten egitateak, edo interes orokorra kaltetzen ahal duen legez kanpoko beste edozein jarduera, salatzen dituzten pertsona fisiko nahiz juridikoek.

2. Salaketa jartzeak adierazten du salatzaileak uste arrazionala duela emandako informazioa egiazkoa dela eta aurreko apartatuan aipatutako egitateen arlokoa dela.

3. Bulegoari dagokio salaketa kalifikatzea, salaketa jartzen duen pertsonari babesa ematearen ondorioetarako, maiatzaren 17ko 7/2018 Foru Legearen 9. eta 24. artikuluak aintzat hartuta; babes hori emanen da pertsona salatzailea erregelamendu honen 56.4 artikuluan aipatutako inguruabarrak gertatzen direnean.

4. Egitate horiek salatzeak ez du adierazten urratzen denik langile enplegatuei beren eginkizunen jardunean ezagutu dituzten gaien gainean ezartzen zaien isiltasun betebeharra, eta erantzukizunik ere ez dio eraginen salatzaileari, betiere haren uste arrazoizkoak pentsarazten bazion salaketa jartzea beharrezkoa zela, artikulu honen 1. apartatuan aipatutako egitateak gertatzen ari zirela agerian jartzeko.

5. Ez du salatzailearen izaera izanen, titulu honetan aipatzen den babes eskubidearen ondorioetarako, justifikatu gabeko salaketa jartzen duen pertsonak, edo salaketa egiteko arrazoia izan bada gatazka pertsonalak edo lanekoak, laidoa, mendekua edo interes ustelak, edo engainua edo nahasmena eragiteko asmoz egina bada, edo haren arrazoia edo funtsa interes orokorra zaintzea ez den bestelakoren bat baldin bada.

6. Salaketak bulegoaren aurrean norberaren izenean jartzen ahal dira, edo salatzailea zerbitzuan ari den organo, entitate eta instituzioen izenean, edo modu anonimoan.

51. artikulua. Salaketen posta-kutxa edo kanala.

1. Iruzur, ustelkeria edo interes gatazka eragiten duten egitateen gaineko salaketa jarri edo informazioa ematen ahalko du pertsona salatzaileak, bulegoaren posta-kutxaren bitartez, hala aurreikusia baitago maiatzaren 17ko 7/2018 Foru Legearen 12. artikuluan, eta izena emanda nahiz izenik eman gabe egiten ahalko du.

2. Nafarroako Foru Komunitateko Jardunbide Egokien aldeko eta Ustelkeriaren kontrako Bulegoaren posta-kutxa edo kanala eratzen da kanpoko salaketa kanala izan dadin, independentea eta autonomoa, jasotako informazioa edo salaketak jaso eta tratatzeko, Batasuneko Zuzenbidearen gaineko arau-hausteei buruz informazioa ematen duten pertsonen babesari buruzko urriaren 23ko Europako 2019/1937 (EB) Zuzentarauaren 10. artikuluan eta hurrengoetan ezarritakoarekin bat.

3. Haren diseinuak, ezarpenak eta kudeaketak bermatuko dituzte informazioaren zehaztasuna, osotasuna eta konfidentzialtasuna, informazio hori eskuratzea galaraziko baitzaie baimenik ez duten langileei, eta arrastoa utziko dute informazioa eskuratu duten bulegoko langileek.

4. Salaketen posta-kutxak edo kanalak informazioa denbora luzez gordetzeko aukera emanen du, ikerketa berriak egin ahal izateko.

52. artikulua. Salaketak jasotzeari eta haien jarraipenari buruzko informazioa.

Bulegoak argitaratu behar du, bere web-orriaren atal bereizi, erraz identifikagarri eta eskuragarri batean, gutxienez informazio hauek:

a) Pertsona salatzaileak babesa eskatzeko bete behar dituen baldintzak.

b) Salaketen posta-kutxa edo kanalerako kontakturako datuak, bereziki posta helbidea eta posta elektronikoa eta telefono zenbakia, elkarrizketak grabatzen diren ala ez adieraziz.

c) Salaketari aplikatu beharreko prozedurak, horien artean azalduz, besteak beste, pertsona salatzaileari berak emandako informazioari buruzko argitasunak edo informazio gehigarria eskatzeko bulegoak duen modua, pertsona salatzaileari erantzuna emateko epea, eta erantzun horren mota eta edukia.

d) Salaketei aplikatu beharreko konfidentzialtasun araubidea, eta bereziki, datu pertsonalen tratamenduari buruzko informazioa.

e) Salaketei eman beharreko jarraipenaren izaera.

f) Errekurtso bideak.

g) Errepresalietatik babesteko prozedurak eta aholkularitza konfidentziala izateko aukera, salaketa jartzea baloratzen ari diren pertsonentzat.

h) Adierazpen bat, argi azalduz zein baldintzatan egonen diren konfidentzialtasuna urratzearen erantzukizunetik babestuta bulegoaren aurrean salaketa jartzen duten pertsonak.

i) Laguntza neurriak emateko eskumena duen administrazio agintaritzarekin kontaktua egiteko datuak.

53. artikulua. Salaketen erregistroa.

1. Bulegoak jasotzen dituen salaketen erregistroa eraman behar du, eta beharrezkoa den denboraz bakarrik gordeko dira.

2. Jasotzen diren salaketa guztiak erregistratu eta kudeatuko dira bulegoaren posta-kutxaren edo kanalaren bidez, aurkezteko modua edozein dela ere.

3. Maiatzaren 17ko 7/2018 Foru Legearen 17. artikuluan ezarritakoarekin bat, salaketak idatziz dokumentatu behar dira.

Salaketa jartzeko telefono linea bat edo ahots mezuak emateko beste sistemaren bat, grabaketarekin, erabiltzen denean, salatzailearen adostasuna adierazi zain, salaketaren tratamenduaren ardura duten langileek salaketa dokumentatuko dute, haren transkripzio osoa eta zehatza eginez, eta salatzaileari eskainiko diote transkripzioa egiaztatu, zuzendu eta onartzeko aukera, bere sinaduraz berretsi dezan.

Salaketa jartzeko telefono linea bat edo ahots mezuak emateko beste sistemaren bat, grabaketarik gabe, erabiltzen denean, salaketaren tratamenduaren ardura duten langileek salaketa dokumentatuko dute, elkarrizketaren akta zehatza eginez, eta salatzaileari eskainiko diote elkarrizketaren akta egiaztatu, zuzendu eta onartzeko aukera, bere sinaduraz berretsi dezan.

Pertsona batek eskatzen duenean bulegoko langileekin elkartzea salaketa jartzeko asmoa duelako, salaketaren tratamenduaren ardura duten langileek bilera dokumentatuko dute, haren akta zehatza eginez, eta salatzaileari eskainiko diote bileraren akta egiaztatu, zuzendu eta onartzeko aukera, bere sinaduraz berretsi dezan.

Kasu horietan, salatzaileari jakinarazi behar zaio bere sinaduraz balioztatu behar duela aurreko paragrafoetan aipatutako transkripzioa edo aktak, salaketa erregistratu ahal izateko.

2. KAPITULUA

Salaketa egin duen pertsonaren babesa

54. artikulua. Konfidentzialtasun betebeharra.

1. Salaketa egilearen nortasuna ez da agertuko haren baimen espresurik gabe, bulegoan salaketak jaso edo tratatzeko baimena duten langileentzat baizik.

Ez da agertuko, ezta ere, haren baimen espresurik gabe, salaketa egilearen nortasuna, zuzen edo zeharka, ondorioztatzeko bidea ematen ahal duen beste inongo informaziorik.

2. Salbuespen gisa, salaketa egin duen pertsonaren nortasuna, eta aurreko apartatuan aipatutako beste edozein informazio, ezagutzen ahalko dira, horiek ezagutzea betebehar nahitaezkoa eta proportzionatua bada, indarra duen legediak ezarria, administrazio prozedura edo prozesu judizial baten esparruan egiten ari den ikerketa baten testuinguruan, bereziki salatutako pertsonaren defentsa eskubidea zaintzeko.

Nolanahi ere, salaketa jarri duen pertsonari aurretik jakinaraziko zaio bere nortasuna agertu beharra, idatziz eta arrazoia azalduz, salbu eta informazio hori emateak ikerketa edo prozesu judiziala eragozten ahal badu.

3. Salaketa jaso bada salaketen posta-kutxa edo kanala ez den beste bideren batetik, edo salaketak jaso edo jarraipena egiteko baimenik ez duten langileen eskutik, langile horiek debekatua izanen dute salaketa egilea edo auziak ukitutako pertsona identifikatzen ahal dituen zeinahi informazio ematea, eta salaketa berehala, aldaketarik gabe, utzi behar dute bulegoan salaketak tratatzeko ardura duten langileen esku.

55. artikulua. Salaketa egilearen eskubideak.

1. Salaketa egiten duen pertsona, erregelamendu honen 45. artikuluan aipatzen dena, eskubide hauen jabe izanen da:

a) Aholkularitza osoa, independentea, eskuragarria eta doakoa izateko eskubidea, prozedurei buruz eta eskura dauden baliabideei buruz, errepresalien aurkako babesari buruz, eta gaiak ukitutako pertsonaren eskubideei buruz.

b) Bere salaketak eragindako ikerketa prozeduraren tramitazioaren egoera ezagutzeko eskubidea, eta halaber, prozedura horretan emandako egintzen eta ebazpenen berri izatekoa, salbu eta sekretua gordetzeko agindua ematen bada, ikerketa ongi burutu ahal izateko.

c) Bulegoaren aurrean aurkeztutako salaketaren amaieran ebazpen espresua eta arrazoitua izateko eskubidea, maiatzaren 17ko 7/2018 Foru Legean ezarritako terminoetan eta epeetan.

d) Errepresaliarik edo inolako kalterik edo bazterketarik ez izateko eskubidea, aurkeztutako salaketaren ondorioz, eta haien aurrean babesa izateko eskubidea. Bulegoaren zuzendariak agintari eskudunen aitzinean sustatzen ahalko ditu egoera zuzentzeko edo berrezartzeko ekintza egokiak, eta jasota utziko ditu urteko oroitidazkian.

e) Bulegoaren aholkularitza juridikoa eta abokatuaren defentsa izateko eskubidea, aurkeztutako salaketaren ondorioz salaketa egilearen aurka hasten ahal diren prozedura administratibo, zibil nahiz zigor arlokoetan.

f) Laguntza finantzarioa eta psikologikoa izateko eskubidea, bulegoak hala ebazten badu, salaketa jarri ondorengo egoera baloratu ondoren.

2. Aurreko e) letran aurreikusitako eskubidea aplikatuko zaie, orobat, salaketa egilearekin harremana duten hirugarren pertsonei ere, laneko testuinguruan errepresaliak jasateko arriskua badute.

56. artikulua. Babesa ematea salaketa egileari.

1. Babesa emanen da bulegoaren zuzendariaren ebazpen baten bidez, ikerketa eta ikuskapen prozedura hasteko ebazpena eman ondoren, salaketa egilearen eskaera arrazoituari erantzunez, eta eskatutako babesa emateko garrantzitsutzat jotzen diren egitateak eta inguruabarrak egiaztatu ondoren, maiatzaren 17ko 7/2018 Foru Legearen 24. artikuluan ezarritakoarekin bat.

2. Ebazpena eman behar da babes eskaera jaso eta hurrengo hiru hilabeteko epean, baina epe hori etenik geratzen ahal da, Administrazio Publikoen Administrazio Prozedura Erkideari buruzko urriaren 1eko 39/2015 Legearen 22. artikuluan aurreikusten diren kasuetan. Auziaren konplexutasuna aintzat hartuta gomendagarritzat jotzen bada, epe hori luzatzen ahalko da, gehienez beste hiru hilabetez.

3. Salaketa egileari babesa emateko ebazpenak jasotzen ahalko du, salaketa aurkeztearen ondorioz errepresaliarik sortu baldin bada, bulegoaren agindu bat, egokiak iruditzen zaizkion ekintzak abiarazteko, egoera zuzentzeko edo berrezartzeko.

4. Salaketa aurkeztu duen pertsonak babesa eskatzen ahalko du kasu hauetan:

a) Behar den zintzotasunaz aritu bada eta arrazoizko motiboak baditu pentsatzeko iruzurra, ustelkeria edo interes gatazka eragiten ahal duten egitateei buruzko informazioa egiazkoa dela salaketa jartzeko unean.

b) Informazioa maiatzaren 17ko 7/2018 Foru Legearen aplikazio eremuan sartzen bada.

c) Salaketa aurkeztu badu barne kanaletatik, kanpo kanaletatik edo salaketa plazaratu badu.

5. Salaketaren egilea babesteko neurrietatik kanpo geratzen dira informazio faltsua, nahasia edo era ez-zilegian lortutakoa ematen duten pertsonak, edo herritar guztientzat osorik eskuragarri dagoen informazioa ematen dutenak.

6. Motibaziorik ez izatea ez da izanen salaketa ez onartzeko arrazoia, ez eta babesik ez hartzeko arrazoia ere.

7. Babesa izateko denbora luzatzen ahalko da, era arrazoituan, ikerketa prozedurak amaitu ondoren ere, beharrezkotzat jotzen bada, kasuan kasuko egoera aintzat hartuta.

8. Babes horrek ez du inoiz salaketa jarri duen pertsona salbuetsiko salatutako egitateak ez diren bestelako egitate batzuengatik bere gain hartu behar dituen erantzukizunetatik.

9. Babesa ematen ahalko zaie ondoren aipatzen diren pertsonei: erregelamendu honen 50. artikuluan aipatzen den salaketa-egilea, lekukoak eta perituak, eta orobat, haien ezkontideak edo antzeko harreman afektibo batez haiekin lotura dutenak, bai eta haien ondorengoak ere, errepresaliak edo ekintza kaltegarriak jasateko arriskua badute, aurkeztutako salaketaren ondorioz, emandako lekukotzaren ondorioz edo peritu-txostena ematearen ondorioz.

10. Artikulu honetan ezartzen den babesa ematen duen ebazpena salaketaren egileari jakinaraziko zaio. Era berean, jakinaraziko zaie salaketa egin duen pertsonak zerbitzua ematen duen administrazio publikoari edo entitate publiko edo pribatuari, eta halaber, egoera aintzat hartuta, beharrezkotzat jotzen denean, beste hainbat pertsona fisiko nahiz juridikori.

Komunikazio horiek ez egitea erabakitzen ahalko da, aurrera eramaten ari den ikerketa era egokian egin eta burutu ahal izateko.

11. Ebazpen horren berri emanen zaie, orobat, Fiskaltzari eta agintaritza judizialari, baldin eta, salaketa aurkeztearen ondorioz, edo errepresaliak jasan izanaren ondorioz, zigor arloko ikerketako izapideak abiarazi badira, edo dagokion prozedura judiziala ireki bada.

12. Babesa eskaera ukatuko da, eta interesdunari jakinaraziko zaio, kasu hauetan:

a) Salaketarik ez dagoenean.

b) Salaketa egonik ere, horren helburu ez direnean iruzur, ustelkeria edo interes gatazka ustez eragiten ahal duten egitateak edo jokabideak.

c) Salaketak legezkontrakotasunaren motibo arrazoiturik edo sinesgarritasunaren arrazoizko susmorik aurkezten ez duenean.

d) Salaketa sartzen ahal denean erregelamendu honen 50.5 artikuluan jasotako kasuetako batean.

e) Aurkeztu den salaketak informazio faltsua, nahasia edo era ez-zilegian lortutakoa ematen badu.

13. Babes eskaera ez da onartuko eskumenik eza argudiatuta, eskaeraren oinarrian dagoen salaketaren helburu maiatzaren 17ko 7/2018 Foru Legearen 4. artikuluan aipatzen diren instituzio, administrazio publiko eta pertsona fisiko nahiz juridikoak ez direnean.

57. artikulua. Salaketaren egileari emandako babesa galtzea.

1. Salaketa egin duen pertsonari babesa emateko ebazpena eragin zuten arrazoiak zuzendu direla egiaztatuta, emandako babesa kentzeko ebazpena emanen du bulegoaren zuzendariak.

2. Salaketa egin duen pertsonak emandako babesa galduko du, arrazoizko zantzuak badaude uste izateko haren salaketa erregelamendu honen 50.5 artikuluaren kasuetako batean sartzen dela, edo 60. artikuluan jasotzen den salaketa faltsua denean.

3. Salaketa egin duen pertsonaren babesa galtzea jakinaraziko zaie babesa eman izana jakinarazi zitzaien guztiei.

58. artikulua. Salaketa egin duen pertsonaren aurkako errepresalien debekua.

1. Maiatzaren 17ko 7/2018 Foru Legearen 24. artikuluan aurreikusitakoarekin bat, salaketa egin duten pertsonek ez dute jasanen, ez isolamendurik, ez jazarpenik, ez haien laneko edo lanbideko baldintzen okertzerik, ez eta inolako kalte, bazterketa, larderia edo errepresaliarik, zuzen edo zeharka, adierazten duen neurririk, ez salatutako egitateen inguruko ikerketa egiten ari denean, ez ondoren ere.

2. Errepresaliatzat jotzen da legez debekatutako zeinahi egintza edo ez-egiteak, edo, zuzen edo zeharka, tratu kaltegarria adierazten dutenak, pertsonak desabantaila berezian kokatzen dituztelako beste inoren aldean, laneko edo lanbideko testuinguruan, salaketa egin edo informazioa eman duen pertsona izate hutsagatik.

3. Salaketa egiteagatik kaltetu zaizkion eskubideak defendatzeko edo berrezartzeko salaketa egin duen pertsonak abiarazten dituen prozesu judizialetan, eskubidea izanen du bere alde alegatzeko salaketa aurkeztu edo informazioa eman duela bulegoaren jarduketarako interesekoak diren gaiei buruz.

4. Salaketa aurkeztu eta bulegoaren babesa hartu duten pertsonek bulegoari eskatuko diote, errepresaliak jasan orduko, beren eskubideak ekintzaz edo ez-egitez urratzen dituzten jarduketei aurre egiteko babes neurriak ezartzeko; bulegoak egoera zuzentzeko edo berrezartzeko egokiak iruditzen zaizkion ekintzak ezartzen ahalko ditu, eta urteko memorian jasoko ditu.

Kasu horretan, salaketa egin duen pertsonak errepresaliaren berri emanen dio bulegoari, eta babesa emateko 56. artikuluan ezarritako prozeduraren antzeko baten bidez, bulegoak erabakitzen ahalko du, beste neurri batzuen artean, salaketa egin duen pertsonaren eskubideak edo lanbide karrera kaltetzen duten erabakiak, akordioak edo ebazpenak bertan behera uztea; erabakia hartu aurretik, entzunaldia eman behar die ebazpen horren eragina hartzen ahal duten pertsonei edo organoei, eta pertsona edo organo horiek frogatu beharko dute pertsona horri eragindako kaltea ez dela izan salaketa aurkeztearen ondorio, eta arrazoi objektibo hutsetan oinarritu zela, behar bezala justifikatuta, eta inongo irregulartasunik ez dela eragin.

Bulegoak, salaketa egin duen pertsonaren eskubideak babesteko egokia iruditzen zaionean, agintaritza edo organo eskudunari eskatzen ahalko dio maila bereko beste lanpostu batera aldatzeko pertsona hori.

59. artikulua. Salaketa jarri duen pertsonaren erantzukizuna.

1. Salaketaren helburu diren egitateak egiaztatzeko erantzukizuna, kasu guztietan, ikerketaren ardura bere gain hartzen duen agintaritzari dagokio.

2. Salaketaren helburu diren egitateen ikerketari amaiera emanen dion ebazpenak ondorioztatzen badu ez dagoela zigor arloko zuzenbidearen aurkako irregulartasunik, jardunbide okerrik edo egitaterik, salaketa egin zuen pertsonak emandako babesa luzatzen ahalko du, egoerak hala eskatzen badu, eta inongo zehapenik ez du jasoko, salbu eta, prozeduraren amaierako ebazpenak era fidagarrian frogatzen badu salaketa egin duenak bazekiela informazioa ez zela fidagarria edo zuzena, edo faltsua zela, edo salaketa faltsuagatik zigortua bada.

3. Aurreko apartatuan adierazitako salbuespena eginda, salaketaren egileak ez du haren ustez egiazkoa zen salaketa batek eragindako kalte-galeren erantzukizunik.

60. artikulua. Salaketa faltsuak.

Salaketak informazio faltsua, nahasia edo legez kontrako moduan lortutakoa ematen badu, erantzukizunak ondorioztatzen ahalko dira salaketa aurkeztu duenarentzat, legedi administratibo, zibil eta penalaren aldetik. Bulegoak horretaz ohartarazi eta horren ondorioak azalduko dizkio, maiatzaren 17ko 7/2018 Foru Legearen 24.5. artikuluan ezarritakoarekin bat.

VI. TITULUA

Zehatzeko ahala

61. artikulua. Arau-hausteak eta zehapenak.

1. Arau-hauste arinak, astunak eta oso astunak dira Nafarroako Foru Komunitateko Jardunbide Egokien aldeko eta Ustelkeriaren kontrako Bulegoa sortzeari buruzko maiatzaren 17ko 7/2018 Foru Legearen 49. artikuluan ezarritakoak.

2. Aurreko zenbakian aipatutako arau-hausteei aplikatuko zaizkie maiatzaren 17ko 7/2018 Foru Legearen 50. artikuluan ezarritako zehapenak.

3. Arau-hausteak eta zehapenak iraungiko dira maiatzaren 17ko 7/2018 Foru Dekretuaren 53. artikuluan aurreikusitako epeetan.

4. Arau-hausteen erantzule dira, baita ez-betetze soilaren mailan ere, maiatzaren 17ko 7/2018 Foru Legearen 4. artikuluan aurreikusitako entitateetako agintariak, zuzendaritzako kideak eta langileak, foru lege horretan aurreikusitako ekintzak edo ez-egiteak egiten badituzte.

62. artikulua. Zehatzeko ahalmena.

1. Bulegoaren zuzendariari dagokio aurreko artikuluan adierazitako zehapenak ezartzeko eskumena, maiatzaren 17ko 7/2018 Foru Legearen 4. artikuluaren, Administrazio Prozedura Erkidearen arauen eta zehapen prozeduraren espezialitateen arabera; horiek ezarrita daude Administrazio Publikoetako Administrazio Prozedura Erkideari buruzko urriaren 1eko 39/2015 legean, eta sektore publikoaren araubide juridikoari buruzko urriaren 1eko 40/2015 Legean, edo haiek ordezten dituzten arauetan.

2. Diziplina zehapenak ezartzeko eskumena, maiatzaren 17ko 7/2018 Foru Legean aurreikusitako arau-hausteak eragiten dituzten egitateen kasuan, beste organo bati badagokio, bulegoaren zuzendariak organo horri eskatuko dio dagokion diziplina prozedura abiaraz dezan.

3. Aurreko zenbakian adierazitako errekerimendutik hilabeteko epean, organo eskudunak bulegoaren aurrean aurkeztu behar du txosten bat, bertan azalduz hartutako edo hartu beharreko neurriak, edo bestela, neurririk ez hartzeko justifikazioa. Bulegoak, bere urteko memorian, espedienteak abiarazteko eskaerak eta Administrazioak edo erakunde eskudunak egindako jarduketak jasoko ditu.

4. Zehapen prozedura beti abiaraziko da ofizioz, bulegoaren zuzendariaren ebazpen bidez, Administrazio Publikoen Administrazio Prozedura Erkideari buruzko urriaren 1eko 39/2015 Legearen 63. eta 64. artikuluetan ezarritakoaren arabera.

5. Zehapen prozedura abiarazteko erabakia hartu ondoren, bulegoak sei hilabeteko epean ebatzi beharko du, salbu eta auziaren konplexutasuna aintzat hartuta, gomendagarritzat jotzen bada epea luzatzea, gehienez beste sei hilabetez. Epe hori iragan eta ebazpen espresurik eman ez bada, espedientea iraungiko da eta jarduketak artxibatuko dira.

6. Instrukzio-organoak bulegoaren zuzendaritzari helaraziko dion ebazpen-proposamena pertsona interesdunei jakinarazi behar zaie, Administrazio Publikoen Administrazio Prozedura Erkideari buruzko urriaren 1eko 39/2015 Legearen 89. artikuluan ezarritako moduan.

7. Zehapen prozeduraren ebazpena Administrazio Publikoen Administrazio Prozedura Erkideari buruzko urriaren 1eko 39/2015 Legean ezarritakoaren arabera eginen da.

8. Zehapen prozeduraren tramitazio sinplifikatua hautatzen ahalko da, bulegoaren zuzendariaren iritziz judizio-elementu aski daudenean arau-haustea arintzat jotzeko, urriaren 1eko 39/2015 legearen 96.5, 96.6 eta 96.7 artikuluetan ezarritakoaren arabera.

9. Zehapen prozeduraren ebazpenaren aurka hautazko berrezartze-errekurtsoa jartzen ahal da. Errekurtsoa jartzeko epea iragan bada hura aurkeztu gabe, edo ebazpena eman ondoren, ebazpena berehala betearazlea izanen da.

10. Maiatzaren 17ko 7/2018 Foru Legeak arautzen duen zehapen espedientearen helburu ez dira inoiz izanen zigor prozedura batean zehatu diren egitateak, ez eta lehentasunez aplikatu beharreko araudiak lan edo zerga arloko legedia edo funtzionario publikoei aplikatzeko araudia direnean ere.

VII. TITULUA

Ekonomikoa, aurrekontu eta kontratazioei buruzko araubidea

63. artikulua. Aurrekontua eta kontabilitatea.

1. Maiatzaren 17ko 7/2018 Foru Legearen 43.1. artikuluarekin bat, Nafarroako Foru Komunitateko Jardunbide Egokien aldeko eta Ustelkeriaren kontrako Bulegoak behar dituen baliabide ekonomiko egokiak izanen ditu eskura, esleitu zaizkion eginkizunak eraginkortasunez bete ahal izateko.

2. Bulegoaren funtzionamendurako beharrezkoa den zuzkidura ekonomikoak partida bat izanen du, izen espezifikoarekin, Nafarroako aurrekontu orokorretan.

3. Bulegoaren zuzendariak urtero prestatuko du haren aurrekontuaren proiektua, eta Nafarroako Gobernura igorriko du, urteko ekitaldiari dagozkion Nafarroako aurrekontu orokorretan txertatu dezan.

4. Bulegoaren aurrekontu, ekonomia eta finantza araubidea Nafarroako Ogasun Publikoari buruzko apirilaren 4ko 13/2007 Foru Legean ezarritakoa izanen da.

5. Bulegoaren kontabilitatea kontabilitate publikoaren printzipioen arabera eramanen da.

6. Bulegoaren ondare eta kontratazio araubidea bere organo propioen bidez beteko da, eta Foru Komunitateko Administrazioko araubide bera izanen da.

7. Bulegoaren zuzendariari dagokio aurrekontuaren kitapena eta urteko kontua onartzea.

8. Bulegoaren urteko memorian jasoko da aurrekontuaren kitapena.

64. artikulua. Kreditu aldaketak.

1. Bulegoaren zuzendariari dagokio bulegoaren gastuen aurrekontuko hasierako kredituen aldaketak onartzea, kreditu transferentzia bidez.

2. Kredituak sortzen ahalko dituzte aurrekontuen gastuen estatuan, aurreikusi gabeko edo hasierako aurrekontuan jasotakoetatik gorako diru-sarrerek.

3. Bulegoaren aurrekontuaren hazkunde orokorra ekartzen duten bestelako kreditu aldaketak tramitatzeko, bulegoaren zuzendariak proposamena bidaliko dio Nafarroako Gobernuan aurrekontuen gaian eskumena duen Departamentuari.

65. artikulua. Gastuen eta diru-sarreren araubidea.

1. Bulegoak bere diruzaintza izanen du, eta zuzendariaren eginkizuna izanen da banku kontuak ireki eta ixtea, eta halaber, ordainketak agintzeko gaien inguruko eskumenak.

2. Ordainketak egiteko aurrez aurrekontu esleipena eta haiek eragiten dituzten eragiketen kontabilitate-erregistroa eginen da.

3. Diru-sarrerak zuzendariak baimendu behar ditu, kontabilitatean jaso aurretik.

66. artikulua. Kontratazioen araubide orokorra.

1. Bulegoaren kontratazio araubidea Nafarroako kontratu publikoei buruzko legedian aurreikusitakoa izanen da.

2. Bulegoaren zuzendaria da haren kontratazio organoa.

3. Bulegoa Nafarroako Foru Komunitateko Administrazioaren obra, zerbitzu eta horniduren kontratazio sistemetara atxikitzen ahalko da, eta halaber, beste hainbat instituzio, administrazio eta entitateekiko hitzarmenak egiten ahalko ditu, efikazia eta efizientzia arrazoiengatik, ondasunak elkar hartuta eskuratzeko edo zerbitzuak emateko.

67. artikulua. Kanpo kontratazioak.

1. Maiatzaren 17ko 7/2018 Foru Legearen 44. artikuluarekin bat, Nafarroako Foru Komunitateko Jardunbide Egokien aldeko eta Ustelkeriaren kontrako Bulegoak zilegi izanen du kontrolaren xede diren arloetan espezialista eta peritu edo aditu direnen zerbitzuak kontratatzea. Egiten diren kontratuak Nafarroako kontratu publikoei buruzko legediari egonen dira lotuta.

2. Zerbitzu horiek emanen dituzten pertsonak bulegoko gainerako langileek bete beharreko zintzotasun, neutraltasun, erantzukizun, inpartzialtasun eta konfidentzialtasun araubide berari lotuta egonen dira.

VIII. TITULUA

Kontuak ematea

68. artikulua. Urteko memoria.

1. Maiatzaren 17ko 7/2018 Foru Legearen 30. artikuluarekin bat, Nafarroako Foru Komunitateko Jardunbide Egokien aldeko eta Ustelkeriaren kontrako Bulegoak urtero kontu emanen du egin duen jarduerari buruz, memoria edo txosten bat eginez; hartan jasoko du ondoko arlo hauetan egin dituen jarduketak: prebentzioa, ikerketa, ebaluazioa, babesa, kontratazioen ikuskapena eta obren eta zerbitzuen kontratuen jasangarritasun finantzarioaren analisia, barne direla prestakuntza eta aholkularitza bereziko ekintzak.

2. Urteko txostenak, gutxienez, honako informazio hau jasoko du:

a) Bulegoaren aurrean aurkeztutako salaketen kopurua eta izaera, ezetsi zirenak eta ikertu zirenak adieraziz, eta ikerketa horien emaitzak, eta zehaztuko dira Administrazioari zuzendu zaizkion gomendioak edo iradokizunak.

b) Bulegoaren ekimenez abiarazitako prozeduren kopurua, bai administrazio arlokoak bai judizialak, sektore publikoaren zerbitzuan ari diren langileen edo kargu publikoen aurka.

c) Ikuskatzaileek idatziz adierazi dituzten desadostasunak.

d) Arauak aldatzeko bulegoak egin dituen proposamenak.

e) Prestatzaileek egin dituzten ebaluazioak.

f) Salaketa aurkeztu duten pertsonen laneko ingurunean baldintzak okertu diren edo edozein kalte edo bazterkeria jasan duten kasuetan, bulegoak egoera zuzentzeko edo berrezartzeko agintaritza eskudunen aurrean sustatu dituen ekintzak.

g) Bulegoan jasotako iradokizunak, era arrazoituan zehaztuz onetsi edo ezetsi diren.

3. Txostenean ez da jasoko ikerketa prozeduran interesa dutenak publikoki identifikatzea ahalbidetzen duen datu eta aipamen pertsonalik, ikerketa abian den bitartean. Datu pertsonalen babesari buruzko araudi indardunaren arabera tratatuko dira datu pertsonalak.

4. Bulegoaren zuzendariak urteko memoriaren laburpen bat azalduko dio Parlamentuari, Legebiltzarreko Erregelamenduan ezarritako moduan.

69. artikulua. Herritarrei kontu ematea.

1. Nafarroako Foru Komunitateko Jardunbide Egokien aldeko eta Ustelkeriaren kontrako Bulegoak herritarrei kontu emanen die bere jarduketa eremuan sartzen diren administrazioetako eta gainerako entitateetako iruzurrari eta ustelkeriari buruzko politikak eta jardunbideak prebenitu, ikertu eta ebaluatzearen arloan egindako kudeaketa dela-eta.

2. Horretarako, bulegoak komunikabideei helaraziko dizkie bere jardueraren emaitzak.

3. Era berean, gizarte zibilarekiko topaketak antolatuko ditu, aurrera eramandako jarduketak eta lortutako emaitzak harekin partekatzeko, aurkitu dituen zailtasunak edo susmoak aipatuz.

Lehen xedapen gehigarria.–Bulegoaren funtzioen eraginkortasun osoa.

Maiatzaren 17ko 7/2018 Foru Legearen aurreikuspenen eraginkortasun osoa, bulegoaren eginkizunen garapen osoari lotua, zuzendariaren ebazpen bidez erabakiko da, bulegoak lanean hasteko behar dituen langileak eta baliabide materialak izan orduko.

Bigarren xedapen gehigarria.–Antolaketa egituraren garapena.

Erregelamendu honek Nafarroako Foru Komunitateko Jardunbide Egokien aldeko eta Ustelkeriaren aurkako Bulegoarentzat ezartzen duen antolaketa egitura modu progresiboan garatuko da, aurrekontu baliagarriaren arabera.

Hirugarren xedapen gehigarria.–Erregelamendu honen garapena eta aldaketa.

Nafarroako Foru Komunitateko Jardunbide Egokien aldeko eta Ustelkeriaren aurkako Bulegoari behar duen ahala ematen zaio haren antolaketari eta funtzionamenduari buruzko erregelamendu hau aplikatu, interpretatu eta garatzeko behar diren xedapenak eman ditzan.

Era berean, Nafarroako Foru Komunitateko Jardunbide egokien aldeko eta Ustelkeriaren aurkako Bulegoaren zuzendaritzari ahala ematen zaio Nafarroako Gobernuari proposatzeko antolaketa eta funtzionamendurako erregelamendu honen aldaketa.

Iragarkiaren kodea: F2303656