1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
25408E/2022 EBAZPENA, abenduaren 28koa, Nafar Lansare-Nafarroako Enplegu Zerbitzuko zuzendari kudeatzaileak emana, zeinaren bidez 2023rako gastua baimendu eta aldatzen baita Nafar Lansare-Nafarroako Enplegu Zerbitzuko zuzendari kudeatzailearen martxoaren 11ko 1316E/2022 Ebazpena, "Landa eta hiri eremuetako emakumeei laguntzeko programa" finantzatzeko dirulaguntza publikoak emateko deialdia eta oinarri arautzaileak onesten dituena, Suspertze, Eraldatze eta Erresilientzia Planaren esparruan. DDBN identifikazioa: 611539.
Nafar Lansare-Nafarroako Enplegu Zerbitzuaren estatutuetan ezarritakoaren arabera (azaroaren 6ko 302/2019 Foru Dekretuaren bidez onetsi ziren), haren helburua da enplegu politikak, eragile sozialekin adostutakoak, planifikatu, gauzatu eta kontrolatzea, honako arlo hauetan ezartzen diren zerbitzu eta programak modu koordinatuan kudeatuz: enpleguaren sustapena, lan merkatuan sartzeko aukera berdintasuna, enplegu ematea, enplegurako bitartekaritza, orientazioa eta prestakuntza eta Nafarroako enpleguaren egoeraren eta horren gaineko politiken azterketa. Horretarako, besteak beste, bere funtzioa da kolektibo zaurgarriei zuzendutako proiektuak garatzea; proiektu horiek laneratzeko programa integratuak izan beharko dira, banakako ibilbide pertsonalizatuen bidezkoak, zeinetan enplegua bilatzen laguntzeko ekintzak sartuko baitira, bai eta prestakuntza ekintzak ere, parte-hartzaile bakoitzaren ibilbide eta jarraipen pertsonalizatuarekin. Proiektu horien oinarri arautzaileak 2023. urtea baino lehenago onetsi dira.
Dirulaguntzei buruzko azaroaren 9ko 11/2005 Foru Legearen 30.1 artikuluak ezartzen duenez, dirulaguntzen deialdiek berekin ekarri beharko dute gasturako baimena, Nafarroako Ogasun Publikoari buruzko apirilaren 4ko 13/2007 Foru Legean ezarritakoari jarraikiz. Beraz, 2023rako gastua baimendu beharra dago "Landa eta hiri eremuetako emakumeei laguntzeko programa" finantzatzeko dirulaguntza publikoetarako, Suspertze, Eraldatze eta Erresilientzia Planaren esparruan.
Nafar Lansare-Nafarroako Enplegu Zerbitzuko zuzendari kudeatzailearen martxoaren 11ko 1316E/2022 Ebazpenaren bidez, "Landa eta hiri eremuetako emakumeei laguntzeko programa" finantzatzeko dirulaguntza publikoak emateko deialdia eta oinarri arautzaileak onetsi ziren, Suspertze, Eraldatze eta Erresilientzia Planaren esparruan.
Nafar Lansare-Nafarroako Enplegu Zerbitzuko zuzendari kudeatzailearen uztailaren 5eko 10764E/2022 Ebazpenaren bidez, aldatu egin zen Nafar Lansare-Nafarroako Enplegu Zerbitzuko zuzendari kudeatzailearen martxoaren 11ko 1316E/2022 Ebazpena, "Landa eta hiri eremuetako emakumeei laguntzeko programa" finantzatzeko dirulaguntza publikoak emateko deialdia eta oinarri arautzaileak onesten dituena, Suspertze, Eraldatze eta Erresilientzia Planaren esparruan.
Deialdi hori arautzen duten oinarri batzuk aldatu beharra dago. Zehazki, 3. eta 9. oinarriak aldatuko dira.
Horrenbestez, Nafar Lansare-Nafarroako Enplegu Zerbitzua erakunde autonomoaren estatutuak onesten dituen azaroaren 6ko 302/2019 Foru Dekretuaren 12. artikuluaren bidez emandako ahalmenak erabiliz
EBAZTEN DUT:
1. 2023ko ekitaldirako, 126.164 euroko gastua baimentzea Nafar Lansare-Nafarroako Enplegu Zerbitzuko zuzendari kudeatzailearen martxoaren 11ko 1316E/2022 Ebazpenak arautzen dituen "Landa eta hiri eremuetako emakumeei laguntzeko programa" finantzatzeko dirulaguntza publikoetarako (Dirulaguntzen Datu Base Nazionaleko 611539 zenbakia dute), Suspertze, Eraldatze eta Erresilientzia Planaren esparruan. NL-NEZeko 2023rako gastuen aurrekontuko "SEM Emakumeendako programa integralak" izeneko 950003 96400 4819 241104 aurrekontu partidaren edo gaitzen den antzeko partidaren kargura ordainduko da gastua, honela banaturik:
• 44.157,40 euro, gaitasun eta enplegu digitalak garatzera bideratutako programak egiteko, deialdiaren 3. oinarrian aurreikusitakoarekin bat. Etiketatze digitalaren ondoriozko betebeharrak betetzeko (108-Gaitasun digitalen garapena bultzatzea)
• 44.157,40 euro, gaitasun eta enplegu berdeak garatzera bideratutako programak egiteko, deialdiaren 3. oinarrian aurreikusitakoarekin bat. Etiketatze klimatikoaren ondoriozko betebeharrak betetzeko (01-Gaitasun eta enplegu berdeetarako laguntza)
• 37.849,20 euro programa horiek 5.000 biztanletik beherako udalerrietan gauzatzeko.
2. 2023ko ekitaldian, 1.150.705,40 euro gehiago baimentzen ahalko dira gehienez, baina, hori gauzatu ahal izateko, baimena beharko da, legez aurreikusitako inguruabarren bat gertatzen delako emandakoa. Kreditu gehigarri horretarako baimena, kasua bada, organo eskudunak emanen du, eta deialdiaren modu berean argitaratuko da. Horrek ez du ekarriko beste epe bat irekitzea eskaerak aurkezteko, ez eta ebazteko eta jakinarazteko gehieneko epe berririk hastea ere. Hori guztia Dirulaguntzei buruzko azaroaren 9ko 11/2005 Foru Legearen 31. artikuluaren 3. apartatuko a) erregelako 2. kasuan xedatutakoa aplikatuz, hau da, erabilgarri dagoen aurrekontu-kredituaren zenbatekoa handitu bada kreditua sortu, gehitu edo eranstearen ondorioz.
3. Aldatzea lehen aipatutako deialdiaren oinarri arautzaile hauek (aldaketak Nafarroako Aldizkari Ofizialean argitaratu eta biharamunetik aurrera izanen ditu ondorioak):
–Deialdiaren 3. oinarria honela idatzita geldituko da:
1. Diruz lagundutako programek honako ildo hauetakoren batekin bat etorri beharko dute:
a) Gaitasun eta enplegu digitalak garatzera bideratutako programak.
Programa hauek zerikusia daukate teknologia digital berriekin, zeinek aukera ematen baitute lan-prozesuak automatizatzeko, lanpostuak eraldatu eta haietan berrikuntzak txertatzeko, etab.
Asmoa izanen da programen hartzaileak trebatzea lanpostuko tresna informatiko eta teknologikoen erabileran, eta baliabideak ematea merkataritza jardunean, bezeroak kudeatzeko ereduetan, komunikazio prozesuetan eta abarretan izaten ari den bilakaera teknologikora moldatzeko.
Programa bakoitzean 30 parte-hartzaile izanen dira.
b) Honako arlo hauetara bideratutako programak: gaitasun eta enplegu berdeen garapena, ekonomia zirkularra, hondakinen tratamendua, energia aurrezpena edo efizientzia, energia berriztagarriak, garraioa eta mugikortasun jasangarria, uraren kudeaketa, birgaitze eta eraikuntza jasangarriak eta baso zein nekazaritza aprobetxamenduak.
Programa bakoitzean 30 parte-hartzaile izanen dira.
c) 5.000 biztanletik beherako udalerrietan garatutako programak.
Erroldan 5.000 biztanle baino gutxiago dituzten udalerrietan garatutako programak dira, 2020ko abenduaren 31ko datuen arabera. Programa hauek zerikusia izanen dute honako arlo hauekin: iraupen luzeko zaintza-lanak, ekintzailetza eta ekonomia soziala, eta tokiko landa-garapen jasangarria (lurralde kohesioa indartzen duena; esaterako, ondarearen kudeaketa, jarduera turistikoa, mendekotasunari arreta eta kolektibo kalteberekin esku-hartzeak).
Programa bakoitzean 20 parte-hartzaile izanen dira.
2. Entitateek gehienez hiru programa eskatzen ahalko dituzte, baldin eta dirulaguntza ildo desberdinetakoak badira.
3. Programek 12 hilabete iraunen dute, gehienez ere. Nolanahi ere, diruz lagundutako jarduerak ezin izanen dira luzatu 2025eko martxoaren 31tik harago.
–9. oinarrian 1. apartatua aldatzen da. Honela idatzita geldituko da:
"9. Eskaerak eta haiek aurkezteko epea.
1. Eskaerak aurkezten ahalko dira oinarri hauek Nafarroako Aldizkari Ofizialean argitaratu eta biharamunetik aurrera, 2024ko urtarrilaren 31ra arte".
4. Ebazpen hau Nafarroako Aldizkari Ofizialean argitaratzea.
5. Ebazpen honek ez du administrazio bidea amaitzen, eta haren aurka gora jotzeko errekurtsoa jartzen ahalko da, Eskubide Sozialetako kontseilariari zuzendua, hilabeteko epean, argitaratu eta biharamunetik hasita, Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 126.3. artikuluari jarraikiz.
Iruñean, 2022ko abenduaren 28an.–Nafar Lansare-Nafarroako Enplegu Zerbitzuko zuzendari kudeatzailea, Mirian Martón Pérez.
Iragarkiaren kodea: F2217872
