Iragarkia

55. ALDIZKARIA - 2023ko martxoaren 17a

1. NAFARROAKO FORU KOMUNITATEA

1.7. BESTELAKOAK

179E/2023 EBAZPENA, otsailaren 23koa, Ingurumeneko zuzendari nagusiak emana, ingurumen eraginaren adierazpena ematen duena La Nava (A, B, C eta D azpisistemak) eguzki instalazio fotovoltaikoaren proiektu aldatuaren zati batentzat, Solen Energía La Nava SLU enpresak sustatua, Castejongo udalerrian, eta haren ebakuazio sistemarentzat, SET-La Navaraino, Tuterako udalerria ukitzen duena, Castejonez gain.

Proiektuaren ezaugarriak direla eta, Ingurumen Ebaluazioari buruzko abenduaren 9ko 21/2013 Legearen I. eranskinaren barnean sartzen da. Aipatu arauak 7.1 artikuluan ezartzen du I. eranskinean sartutako proiektuei ingurumen eraginaren ebaluazio arrunta eginen zaiela.

Era berean, Ingurumeneko, Lurraldearen Antolamenduko eta Etxebizitzako kontseilariak otsailaren 24an emandako 64/2006 Foru Aginduan ezarritakoa aplikatu behar da, horren bidez arautzen baitira lurzoru urbanizaezinean eguzki energia aprobetxatzeko instalazioak ezartzeko aintzat hartuko diren ingurumen eta hirigintza arloko irizpide eta baldintzak.

1. Ingurumen eraginaren ebaluazio arruntaren prozedura izapidetzea.

Sustatzaileak 2020ko abenduaren 18an organo eskudunaren aurrean aurkeztu zituen proiektua eta ingurumen eraginaren azterketa, 21/2013 Legearen 36. eta 37. artikuluetan xedatutakoaren arabera.

Organo eskudunak 30 eguneko epean jarri du espedientea jendaurrean, 2021eko maiatzaren 10eko Nafarroako Aldizkari Ofizialean (108. zk.) argitaratuta. Aldi berean, kontsultak egin zitzaizkien proiektuak ukitzen zituen administrazio publikoei eta pertsona interesdunei.

Ezarritako epea igarota, zortzi alegazio jaso dira, honako hauek aurkeztuak: EDP Renovables España SL, ENERFÍN Sociedad de Energía SLU, Fundación Sustrai Erakuntza (bi alegazio), Gurelur, Nafarroako Ekologistak Martxan, Ongaiz/Zangozerriko Ekologistak Martxan eta OPD Energy.

Egindako kontsultei dagokienez, txostena egin dute Ingurumen Eraginaren Atalak, Lurralde eta Paisaia Zerbitzuak, Ondare Historikoaren Zerbitzuak, Kontserbazio Zerbitzuak (Herri Lanen Zuzendaritza Nagusiak) eta Nekazaritzako Azpiegituren Zerbitzuak, bai eta Red Eléctrica de España sozietateak ere.

Jendaurreko epea 2021eko irailaren 14an bukatu ondoren, Industria Antolamenduaren, Energia Azpiegituren eta Meatzeen Zerbitzuak sustatzaileari igorri zizkion jasotako alegazio eta txosten sektorialak.

Txosten sektorialak eta alegazioak aztertu ondoren, sustatzaileak La Nava eguzki instalazioaren proiektu aldatua aurkeztu du 2022ko azaroaren 29an organo eskudunaren aurrean, espedientearen izapideei jarraipena emate aldera. Dokumentazio berriak kontuan hartzen ditu egindako kontsultei emandako alegazioen eta erantzuteko txostenen edukia, eta jatorrizko proiektua lurraldearen eta ingurumenaren aldetik bideraezin bihurtzen zuten funtsezko alderdiak konpontzen ditu.

2022ko abenduaren 1ean, Industria Antolamenduaren, Energia Azpiegituren eta Meatzeen Zerbitzuak Biodibertsitate Zerbitzuari bidali zion La Nava eguzki instalazio fotovoltaikoaren proiektu aldatuaren ingurumen eraginaren ebaluazio arrunta hasteko eskaera, Ingurumen Ebaluazioari buruzko abenduaren 9ko 21/2013 Legearen 39. artikuluan jasotakoa oinarri hartuta.

Eguzki instalaziorako proiektuaren aldaketak 103,38ren bat hektareako azalera okupatzea proposatzen du. Gainazal hori bost azpisistema elektrikok osatzen dute, lau Castejóngo udal-mugartean daude eta beste bat Tuterako udal-mugartean, AP-15 autobidearen hego-ekialdean. Castejóngo udal-mugartean kokatutako azpisistema batzuk hasierako proiektuko azpisistemetatik bi kilometrotara baino gehixeagora daude (azpisistema horiek Tuterako udal-mugartean daude kokatuta oso-osorik).

Aldatutako proiektuaren ezaugarriak ikusita, Biodibertsitatearen Zerbitzuaren Ingurumen Eraginaren Atalak uste du proiektuaren ingurumen ondorioak ez datozela bat jatorrizko proiektuan aurreikusitakoekin, eta, beraz, Ingurumen Ebaluazioari buruzko abenduaren 9ko 21/2013 Legearen 40.1 artikuluan adierazitakoarekin bat etorriz, zuzentzeko errekerimendua egin zuen 2022ko abenduaren 23an, jendaurreko informazioaren eta kontsulten izapide berri bat egin behar zela adieraziz, 38. artikuluan aurreikusitako baldintzei jarraiki.

Errekerimenduaren erantzuna sustatzailearen ofizio bidez iritsi zen (ofizioaren data: 2022ko abenduaren 30a). Bertan, proiektuaren funtsezko aldaketak laburbildu ondoren, sustatzaileak desadostasuna adierazten zuen, eta ez zuen nahitaezkotzat jotzen aldatutako proiektua jendaurrean jartzeko izapide berria; 21/2013 legearen 38. artikuluan funtsatzen zuen bere argudioa. Zehazki, erantzun gisako ofizioaren arabera, aldaketak ez du eraginik izanen jatorrizko proiektuan aurreikusitakoez besteko ondorio kaltegarri esanguratsurik ingurumenean, 7.2 c) artikuluan jasotako kasuak kontuan hartuta.

Sustatzaileak errekerimenduari emandako erantzuna aztertu ondoren, Ingurumen Eraginaren Atalak berretsi du 2022ko abenduko errekerimenduan azaldutakoa, ez dator bat sustatzaileak aurkeztutako argudioarekin, eta, gainera, jakinarazten du jatorrizko proiektuari, aldeko ingurumen eragin adierazpenik ez duenez (ezta behar den baimenik ere), ez zaiola aplikatzen aipatutako 7.2 c) artikulua. Nolanahi ere, sustatzaileak honako hau eskatzen zuen laugarren alegazioan:

... Komunikazio hau zuzentzen diogun organoak beharrezkotzat jotzen badu aldatutako proiektua jendaurrean jartzea, subsidiarioki eskatzen dugu proiektuaren zati batentzat ematea ingurumen eraginaren adierazpena, alegia, Tuterako udal-mugartean kokaturikoarentzat, zati hori jendaurrean jarri baitzen jada, eta ez da aldatu proiektuaren aldaketarekin.

Gauzak horrela, sustatzailearen eskaera onartu zen, eta proiektuaren aldaketak ukitu ez eta jendaurreko epea igaro zuen zatiaren ingurumen eraginaren ebaluazioa egin zen (E azpisistema), aldeko adierazpena emanez, Ingurumen zuzendari nagusiaren urtarrilaren 23ko 50E/2023 Ebazpenaren bidez.

La Nava eguzki instalazio fotovoltaikoaren proiektu aldatuaren gainerako alderdiei dagokienez, (Castejongo udal mugapean kokatutako lau azpisistema elektriko), organo eskudunak 30 eguneko epean jendaurrean jartzen du espedientea, 2023ko urtarrilaren 10eko 6. Nafarroako Aldizkari Ofizialean iragarkia argitaratuta. Aldi berean, kontsultak egin zitzaizkien proiektuak ukitzen zituen administrazio publikoei eta pertsona interesdunei.

Ezarritako epea iraganik, hainbat txosten eta alegazio jaso dira erakunde hauetatik: Ondare Historikoaren Zerbitzuak, Baso Plangintzaren eta Ingurumen Hezkuntzaren Atalak, Eólica Montes del Cierzo, Gelaserna, Renovables de la Ribera, Renovables del Cierzo, Gurelur, Erriberako Ekologistak Martxan, Zangozako Ekologistak Martxan, Sustrai Erakuntza Fundazioa, Buganvilla Solar PV SL eta OPD Energy.

Nafarroako Gobernuko Industria Antolamenduaren, Energia Azpiegituren eta Meatzeen Zerbitzuak sustatzaileari igorri dizkio jendaurreko bigarren aldia bukatu arte jaso dituen alegazio eta txosten sektorialak. Ondoren, sustatzaileak txosten eta alegazio horiei erantzuteko idazki bat aurkeztu dio organo eskudunari, La Nava eguzki instalazio fotovoltaikoaren proiektuari eta ingurumen eraginaren azterketari beste aldaketarik egin gabe.

Industria Antolamenduaren, Energia Azpiegituren eta Meatzeen Zerbitzuak Biodibertsitate Zerbitzuari bidali dio La Nava eguzki instalazio fotovoltaikoaren proiektu aldatuaren zatiari (A, B, C eta D azpisistemak) dagokion ingurumen eraginaren ebaluazio arrunta hasteko eskaera, zati hori ez baitzegoen ebaluatua, ez sartua ere, Ingurumen zuzendari nagusiaren urtarrilaren 23ko 50E/2023 Ebazpenaren bidez emandako ingurumen eraginaren adierazpenean, Ingurumen ebaluazioari buruzko abenduaren 9ko 21/2013 Legearen 39. artikuluan ezarritakoaren arabera.

2. Ingurumen eraginaren ebaluazioaren irismena.

2020ko abenduko jatorrizko proiektua, jendaurrean jartzeko eta ukituriko administrazio publikoei eta pertsona interesdunei kontsultak egiteko izapidearen xede zena, instalazio fotovoltaiko bat zen, "Cabezoburro" izeneko aurkintzaren lur eremuan kokatua, Tuterako udal-mugarteko 40. poligonoan. Ukitutako lurzati batzuk Agua Salada-Montes del Cierzo-Plana de Santa Ana Estepako Hegaztien Kontserbaziorako Intereseko Eremuan (EHKIE) zeuden. Instalazio fotovoltaikoa hiru azpisistemarekin (A, B eta C) proiektatu zen, 106 hektareako okupazioarekin, barne hartuta energia ebakuatzeko azpiegitura, 66 kV-eko goi tentsioko lurrazpiko linearen bidez, La Cantera estazioraino, La Nava estaziotik igaro ondoren.

2022ko azaroaren 29an aurkeztutako La Nava eguzki instalazio fotovoltaikoaren proiektuaren aldaketak aldatu egin du 2020ko abenduko jatorrizko proiektua, jendaurrean jartzeko eta proiektuak ukitzen dituen administrazio publikoei eta interesdunei kontsultak egiteko lehen tramitearen emaitza kontuan hartuta, esaterako, ureztalurretan eta lurralde-konektibitatean duen eragina eta proiektuak estepako faunan eta floran dituen ingurumen eraginak.

Proiektu aldatuak bost barruti ditu, horietako lau Castejongo udal-mugartean (A, B, C eta D azpisistemak), eta bosgarrena (E azpisistema), Tuterako udal-mugartean kokatua, jatorrizko proiektuan dagoen bakarra da. Gainera, proiektu aldatuak barne hartzen ditu La Nava 66/30kV SET estaziorainoko ebakuazioa, jatorrizko kokalekutik 350 metrora ipar-ekialdera, eta antzeko ezaugarriak dituen lurzoruan, eta hortik La Cantera 400/66 kV SET estaziorainoko ebakuazio azpiegitura, 66kV SC goi-tentsioko lurrazpiko 2.276 metroko linearen bidez. La Cantera 400/66kV SET estazioan, potentzia 400 kV-era igotzen da, ondoren, 400 kV-eko La Serna SETean entregatzeko (REEren jabetzakoa).

Lehenago esan bezala, Ingurumeneko zuzendari nagusiaren urtarrilaren 23ko 50E/2023 Ebazpenaren bidez, E azpisistemaren aldeko ingurumen eraginaren adierazpena egin zen, La Nava instalazio fotovoltaikoaren proiektu aldatuaren zati hori baitzen informazio publikoaren lehen izapidean sartu zena, eta orobat, La Nava 66/30 kV SET estaziorako eta haren ebakuazioko La Cantera 400/66kV SET estaziorainoko lurrazpiko linearako ere, kokalekuen aldaketa txikiak aurkezten baitzituzten, informazio publikoan jarritako lehenengo proiektuaren aldean.

Beraz, ingurumen eraginaren ebaluazio honen irismenak Castejongo mugapean dauden gainerako lau barrutiei (A, B, C eta D azpisistemak) eta La Nava 66/30kV SET bitarteko lurpeko ebakuazio azpiegiturari bakarrik eragiten die, 2022ko azaroaren 29an aurkeztutako ingurumen eraginaren proiektuaren eta azterketaren arabera.

3. Proiektuaren deskribapena.

Azaldutakoaren arabera, ebaluazio honen irismenak modu independentean hesitutako lau esparruak hartzen ditu, Castejongo udalerrian kokatuak (A, B, C eta D azpisistemak). Horien gutxi gorabeherako azalera jarraian ageri da, eta La Nava 66/30kV SET estaziorainoko 30kV-eko lurpeko ebakuazio azpiegitura ere bai:

A eta B azpisistemak AP-15aren mendebaldean eta N-232 errepidearen iparraldean daude, eta nagusiki ureztalurreko mahastien azalera hartzen dute, tartean direla almendrondo eta bestelako lehorreko laborantza eremu batzuk. Sarbidea N-232 errepidetik egiten da, 83 kilometro puntuan iparralderantz ateratzen den bidea hartuta.

C eta D azpisistemak (DC 400 kV Castejón-La Serna linearen korridoreak bereizten ditu) AP-15en ekialdean eta A-68ren iparraldean daude, lehengo mailegu-eremu batean, eta, beraz, inguruko lur eremuaren berezko sestraren azpitik daude. Sarbidea A-68aren 86. irteera hartuta eginen da, eta ondoren jarraitu behar da Montes de Cierzo industrialdeko zerbitzu-bidetik.

Instalazioa hainbat modulu fotovoltaikok osatuko dute, eguzki-jarraitzaile gainean muntatuta ardatz batean, lurrean tinkatuta. Modulu fotovoltaikoek hornitutako korronte zuzena behe tentsioko korronte alterno bihurtuko dute inbertsoreek, eta korronte hori erdi tentsiora (30kV) igoko da planifikatutako zortzi transformazio zentroetan. Inbertsoreak eta transformadoreak kokatzen diren transformazio zentroetatik, ekoitzitako energia lur azpitik ebakuatzen da, La Nava 66/30kV SET azpiestaziora arte.

Proiektuaren beste ekintza batzuk hauek dira: bideak eraiki edo hobetzea, 5 m-ko zabaleraraino; zangak zulatzea, sortutako energia lurpetik ebakuatzeko; eguzki jarraitzaileak eta transformazio zentroak jartzeko behar diren lur mugimenduak; eta itxitura perimetrala jartzea, 2 metroko altuerako ehiza hesiekin. Itxitura hori plaka islatzaileen bidez seinaleztatuko da 10 metrotik behin, fauna hegalariaren talka saihesteko.

4. Espedientearen azterketa teknikoa eta proiektuaren eragin nagusien tratamendua.

Jatorrizko proiektuaren ingurumen eraginaren azterketak alternatiben analisi bat jasotzen du, lau aukera biltzen dituena, 0 Alternatiba barne harturik, zeina ez baita onartzen klima aldaketaren aurka borrokatzera bideratutako helburuak ez dituelako betetzen, Nafarroako 2030 Horizontea Energia Planean xedatutakoaren arabera.

Hasiera batean, 2. Alternatiba hautatu da, 106 hektareako azalerarekin, Tuterako "Cabezoburro" eremuan. Jendaurreko informazio eta kontsulten aldiaren ondoren, lurralde eta ingurumen arloko zenbait ohar jaso dira, eta horiek aintzat hartuta, sustatzaileak proiektuaren aldaketa bat aurkeztu du, alternatiba horretatik kenduta ureztalurrak, Nafarroako Ubidearen 2. fasean sartzen ahal direnak, eta Agua Salada-Montes de Cierzo-Plana de Santa Ana kontserbazio bereziko eremuan sartzen zen instalazio zatia ere bai, eta gehitzen ditu 3. alternatiba osatzen zuten eremuak, guztiak ere Castejongo udalerrian kokatuak.

Ezarpen eremuaren morfologia funtsean laua da, eta, Ingurumen Eragin Azterketaren arabera, ez da aldaketa garrantzitsurik espero, jarraigailuen ezarpenerako eta funtzionamendurako behar den lursaila birmoldatzeagatik. Gainera, transformazio zentroetako zelaiguneetan, perimetroko hesien zutoinetan, behe eta erdi tentsioko zangetan eta drainatze bide eta areketan lur mugimenduak ez dira oso garrantzitsuak.

Landarediaren gaineko eraginari dagokionez, ingurumen eraginaren azterketak adierazi du ebaluatu beharreko plaken ezarpen eremuak ukitzen dituela erabiltzen ari diren belarkien eta zurezkoen zenbait laborantza eremu, eta abandonatutako zenbait eremu ere bai, landaredi nitrofilo-erruderalaren garapen maila desberdinarekin. Era berean, horren arabera, instalaziotik La Nava estaziora arteko linea elektrikoa landaredi naturaleko bi eremutatik hurbil igarotzen da (erromero, ezkai eta artemisia), eta eremu horiek ukitzea saihestu behar da. Gainera, inguruan, sastrakadi gaziak, erromero, ezkai, artemisia, sisalla eta orgaza sastrakadi txikiak daude, baita putzuen eta sakanen inguruan urpean dauden eremuetako landareak ere (Phragmitis australis, Typha angustifolia, Scirpus lacustris eta beste ihi batzuk, Tamarix canariensis, etab.). Zenbait errepideren inguruan ere (A-68 eta AP-15) eta La Sernako azpiestazio elektrikoaren inguruetan, Aleppo pinuaren (Pinus halepensis) baso landaketak daude.

Interes komunitarioko habitatei dagokienez, IEAk lehentasunezko habitatik ez dagoela jakinarazi du, eta interes komunitarioko habitatak daudela onartu du. Gainera, berresten du ez dagoela flora espezie katalogaturik, edo 1992ko maiatzaren 21eko Kontseiluaren 92/43/EEE zuzentarauak (habitat naturalak eta basafauna eta flora kontserbatzeari buruzkoa) babestutakorik. Sustrai Erakuntza Fundazioak proiektuak habitat horietan duen eraginaren balorazioan hutsuneak ikusi dituela adierazi badu ere, horietako bat ere ez da ingurumen eraginaren ebaluazio honen xede den eremuan kokatzen.

IEAk geomorfologian, lurzoruan, floran eta habitatetan duen eragina bateragarritzat jotzen du, proposatutako prebentzio eta zuzenketa neurriak aplikatu ondoren.

Kontuan hartuta orografia funtsean laua dela, egitura fotovoltaikoak zuzenean lurrean sartuta jarriko direla, instalazioak eta ebakuazio azpiegiturak okupatuko dituzten eremuak erabiltzen ari diren nekazaritza alorrak direla, edo abandonatuak, landaredia nitrofilo-erreduralaren garapen maila desberdinekin, aurkeztutako IEAn proposatutako neurriak, eta ingurumen eraginaren deklarazio hau, espero izatekoa da geomorfologia, lurzorua, landaredia naturala eta interes komunitarioko habitaten gainean ebaluatzen ari den instalazioren zatiak (A, B, C, eta D azpisistemak) izanen duen ukipena bateragarria izatea instalazioarekin.

2020ko urritik 2021eko urrira bitartean estepako abifaunari astero egindako jarraipena azaltzen duen azterlan espezifiko bat jaso du ingurumen eraginaren azterketak. Han jasotzen dira hezegune nagusien inguruan kokatutako hainbat trantsektu eta kontrolgunetatik egindako ikustaldiak, hezegune horiek izan daitezkeelako etorkizuneko instalazio fotovoltaikotik hurbil samar dauden estepako hegaztiak hartzeko leku egokiak (Ur Gaziko Baltsa eta Balsetea, Valdelafuenteko sakaneko lezkadia, Valdelafuenteko sakanaren bokalea Ebro ibaian, etab.). Hala ere, Gurelurrek adierazi duenez, azterlanak ez du proiektuak ukitzen duen eremu osoa hartzen, baina bai ingurumen aldetik zaindu beharreko leku nagusiak, eta ukipen horiek identifikatzeko aski dira.

Instalaziotik kilometro eskas batera, Valdelafuenteko sakana dago, Ebroko Kontserbazio Bereziko Eremuaren barruan (ES2200040) sartzen dena; oso hurbil dago Estepako Abifaunaren Garrantzi Handiko Eremua, "Agua Salada- Montes de Cierzo-Plana de Santa Ana" eta egiaz, ebakuazioaren azpiegiturak leku hori zeharkatzen du, La Nava estaziora iritsi aurretik, 2,5 km-ra dago Ur Gaziaren Erreserba Naturaletik, eta 5. Lurralde Antolamenduko Planaren eremu kategorizatuaren barruan sartzen da haren zati bat (C eta D azpisistemak): Ebroko ardatza, "Lurralde Konektibitateagatik duen Ingurumen Balioagatik Babestu beharreko Lurzoru Urbanizaezina".

Hala ere, landarearen ingurunea oso antropizatuta dago: landaredi naturaleko eremu gutxi dituzten laborantza lurrak, ondoan zenbait errepide (A-68, AP-15 eta N-232) eta Montes de Cierzo industrialdea dituztenak, eta mugakideak han dauden eta tramitatzen ari diren eguzki parkeekin; hurbil samar aerosorgailuetatik, aireko linea elektrikoen dentsitate handiko eremu batean, agregakin-ustiategi baten ondoan, eta gainera, lehen esan den moduan, C eta D azpisistemak lehenagoko mailegu eremu baten gainean kokatzen dira. Horrek, neurri handi batean, baldintzatzen du faunak instalazioaren eremuaz egiten ahal duen erabilera.

Ebro ibaia Kontserbazio Bereziko Eremuari dagokionez (ES2200040), nabarmena da instalazioak mugakide izatea KBE horren barruko Valdelafuenteko sakana, espezie askok negualdia eta/edo ugalketa egiten duten lekua, haien artean azpimarragarriak txori zezena (Botaurus stellaris), Nafarroan eta Iberiar Penintsulan dauden uretako hegazti arraro eta mehatxatuenetakoa; zingira mirotza (Circus aeruginosus); eta koartza gorria (Ardea purpurea). Era berean, inguruan hezegune ugari izateak eta instalazioek hezegune horiekiko lotura nabarmena izateak, (Ur Gaziko baltsa eta baltsetea, Pulguerreko baltsa, La Torreko lezkadia, Cardeteko baltsa, Ebro ibaia, Corellako eta Cintruenigoko la Estanca eta la Estanquilla, La Nava, Lor urmaela, etab.), han bizi den abifaunari kalteak eragitea ekar dezake. Horiek guztiak, eta horiez gain, eguzki plakek uretako hegazti batzuentzat eragin dezaketen "laku efektua" ere agerian jarri ditu Sustrai Erakuntza Fundazioak. Valdelafuenteko sakanarekiko distantziak, itxiturak 10 metrotik behin seinale islatzaileez seinalatzeak, ingurunearen egungo ezaugarriek eta instalazioaren ezarpen eremuko faunak egiten duen erabilerak nabarmen murrizten dute Ebro ibaiaren Kontserbazio Bereziko Eremuari lotutako faunari kaltea eragiteko arriskua.

Bestalde, hurbil dagoen "Agua Salada-Montes de Cierzo-Plana de Santa Ana" estepako abifauna kontserbatzeko intereseko eremuaren barruan estepako faunaren ingurune eta komunitate garrantzitsu bat dago, eguzki instalazioak osatzen dituzten elementuekiko kalteberatasun handia duten espezie babestu ugarirekin. Gurelur, Erriberako Ekologistak Martxan eta Zangozako Ekologistak Martxan eta Sustrai Erakuntza Fundazioa elkarteek La Nava estaziotik hurbil Naumann belatzaren ugalketa kolonia txiki bat dagoela adierazi dute, eta, gainera, Gurelurrek adierazi du eztei ondoko lo-leku historiko bat ere badela, La Serna azpiestazio elektrikoan, eta horiek kaltetuak izan litezkeela. Hala ere, distantzia eta ebaluatu beharreko instalazioaren zatiaren ezarpen eremuan (A, B, C eta D azpisistemak) dagoen giro antropizatuaren ondorioz, kontserbazio bereziko eremuan dauden estepako hegazti espezie nagusientzat eremuak egokitasuna galdu du, eta hori berretsi egin da hegaztien urteko ziklo osoari buruz egindako azterketan. Gainera, instalazioa eta estepako abifauna kontserbatzeko intereseko eremua bereizten duten bide azpiegiturek eta pinu birpopulaketek, azken batean, bi horien arteko hesia osatzen dute, eta are gehiago murriztuko lukete instalazioak estepako abifauna kontserbatzeko intereseko eremu horretan izanen lukeen eragina. Ebakuazio azpiegiturak kontserbazio bereziko eremua lurrazpitik zeharkatzeak ere eragina maila bateragarri batera murrizteko aukera ematen du.

Halaber, lehen esan bezala, instalazioko C eta D azpisistemak 5. Lurraldearen Antolamendurako Planean kalifikatutako lurzoruetan ezarrita daude: Ebroko Ardatza: "Lurralde konektagarritasunagatik ingurumen balio handia dutelako babestu beharreko lurzoru urbanizaezinak". Lurzoru horien barruan planteatzen diren erabilerek lurraldearen jarraitasuna bermatu beharko lukete. Beraz, interes handikotzat jotzen da azpisistema horien artean plakarik eta hesirik gabe utzi den korridore zabala. Gainera, Ingurumeneko zuzendari nagusiaren urtarrilaren 23ko 50E/2023 Ebazpenean ezartzen den bezala, ebazpen horren bidez, ingurumen eraginari buruzko aldeko deklarazioa ematen da La Nava eguzki instalazio fotovoltaikoaren proiektu aldatuaren lehenengo informazio publikoaren prozesuan sartutako zatiaren alde (E azpisistema), proiektu aldatua ikusita eta dauden eta izapidetzen ari diren energia berriztagarriko instalazio guztiak kontuan hartuta, beharrezkotzat jotzen da ingurune horren konektibitate ekologikoa indartzea, kaltetuta gerta baitaiteke. Horregatik, eta proiektuaren ingurumen integrazioa hobea izan dadin, haren lotura-funtzioa indartzea proposatzen da, Sasillo eta Valdelafuente sakanetan aplikatu beharreko konpentsazio neurriak aplikatuz. Errekasto horrek Balsa y Balsete de Agua Salada delako sistema Ojo de Valdelafuente delako hezegunearekin ("Ebro Ibaia" ES2200040 KBA) lotzen du. Horiek oso aldatuta daude, landaredi zerrenda urriarekin; beraz, neurri horren bidez, ingurumena lehengoratu nahi da. Ildo beretik, egokitzat jotzen da Ingurumen eraginaren azterketaren eranskinaren 10. puntuan jasotako konpentsazio neurria, hau da, fauna ubideetatik eta/edo sakanetatik igarotzeko bideak egokitzea, hilkortasuna areagotu ez dadin.

Bestalde, instalazioaren eremuak halako habitatetan ohikoak diren harrapakin espezieen dentsitate handia mantentzen du eta, beraz, harrapari espezie ugarik erabiltzen dute larreratze eta sakabanatze eremu gisa, horietako asko interesgarriak edo babestuak (Bonelli arranoa, arrano beltza, miru gorria, miru beltza, arrano sugezalea, arrano txikia, aztore arrunta, etab.), babes eta habiak egiteko lekuak aurkitzen dituztenak Valdelafuente sakanean, Ebroko ibaibasoetan edo Montes del Cierzoko magaletako pinudietan. Proiektuaren instalazioak zenbait espezieren larreratze habitat erabilgarriaren hedadura galtzea eta beste espezie batzuen ehizarako aukerak murriztea ekartzen ahalko luke, baina kaltea berdintzeko aukera ematen ahal dute, alde batetik, ingurunean antzeko propietateak dituzten eremuak izateak, eta bestetik, ingurumen eraginaren azterketan proposatutako neurriak, alegia, lugorriak mantentzea instalazioaren inguruan, ingurumen eraginaren aldeko adierazpenean, gainera, baldintza jartzen baita lugorri horien proportzioa handitzea, kaltetutako eremuaren aldean. Prebentzio, zuzenketa eta konpentsazio neurriak aplikatu ondoren, ingurumen eraginaren azterketak bateragarritzat jotzen ditu faunaren gaineko eraginak.

Biodibertsitatearen Zerbitzuaren ustez, habitataren ezaugarriak eta ezarpen eremuaren antropizazio handia kontuan izanik, eta aurkeztutako ingurumen eraginaren azterketan jasotzen diren neurriak eta ingurumen eraginaren adierazpen honetan ezarritako gainerako kondizioak beteta, faunari eta Natura 2000 Sareko Guneei eragiten zaizkien inpaktuak nabarmen murrizten dira, eta bideragarria da La Nava eguzki instalazio fotovoltaikotik ebaluatu beharreko zatia (A, B, C, eta D azpisistemak).

IEAk "paisaia azterketa" bat jasotzen du, instalazioaren eremuaren inguruko paisaia mota aztertzen duena, "Planas" eta "Grandes Terrazas y Glacis" paisaia-eremua, Ebroko Ardatza 5. LAParen paisaia dokumentuaren arabera. Bereziki, A eta B azpi-unitateek "Alhama ibarra" paisaia unitatea hartuko lukete, eta C eta D azpi-unitateek, berriz, "Montes del Cierzo" paisaia unitatea.

Oro har, nekazaritzarako oso eraldatutako paisaia da, nekazaritzarako labore-lurrak gehienak, haietako batzuk bertan behera utzitakoak, inguruko eremuak ere arrunt eraldatuta daudela, errepideak, eguzki instalazioak, aerosorgailuak, linea eta azpiestazio elektrikoak, harrobiak, Montes de Cierzo industrialdea eta abarren ondorioz. Hori guztia erliebe ia lauan, non instalaziotik ikusten ez den azaleraren portzentajea handia den.

Paisaiaren azterketak haren ezaugarriak aztertu ditu, haren kalitatea eta hauskortasuna, lurraldearen kalteberatasuna zehazteko; emaitza da kalitatea ertaina edo altua dela eta ikusizko hauskortasuna aldakorra, eta horien konbinazioa hauskortasunaren 3. klasean sartzen dela.

Bestalde, instalazioaren inguruan 10 km-ko erradioan izanen den ikuspen-maila zehazten da. Azterketaren emaitzen arabera, instalazioa edo haren zati bat ikus daiteke ikus-arroa deitzen den azaleraren %28,06tik. Arroko herriguneetatik dagoen ikuspen-maila kontuan hartuta, eguzki-instalazioa ez da ikusiko bederatzi hiriguneetatik lautatik, Cadreitatik ikuspen txikia dago, eta Corella, Cintruenigo, Arguedas eta Valtierratik ikuspen handia izanen da, eta eragina murriztu eginen da, herri horien eta instalazioaren arteko distantziari esker. Bestalde, azterlanaren eremuan dauden errepideen erditik goratik, instalazioa ez da ikusiko, baina ikuspena duten errepideetatik, ikuspena handia izanen da. Errepide batzuetan landaredi-pantailak ezartzeak instalazioa osorik edo zati batean ezkutatuko du.

Proiektuaren paisaia integrazioa lortzeko, praktika egokiak aplikatu behar dira proiektua gauzatzen den bitartean, inguruko berezko landaredi erruderaleko bideak mantendu behar dira, sastrakadi txikiak landatu edo ereintzak eta landaketak egiten ahal dira, ingurumena lehengoratzeko atalean ezarritakoari jarraiki.

Ingurumen eraginaren azterketak eragin sinergikoak eta metagarriak aztertzen ditu, dauden haize eta eguzki energiako instalazioak eta inguru hurbilean izapidetzen ari direnak kontuan hartuta. IEAren arabera, eragin horiek dituzten antzemandako inpaktu gehienak ez dira nabarmenak edo bateragarriak dira.

Instalazio fotovoltaikoek eragindako inpaktu sinergikoak nabarmentzen dira, ustiapenaren fasean faunaren habitata galtzea eragiten baita, zehazki, zenbait hegazti espezierentzat, hala nola, eremu irekietan, mugetan edo zuhaitz-laboreetan (olibondoa edo almendrondoa) bizi diren estepako hegaztientzat, hegazti harraparientzat eta hegazti txiki eta/edo ertainentzat. Hala ere, ingurumen eraginaren azterketaren arabera eragina txikia eta bateragarria da, kontuan izanik aztertutako ingurunean lehorreko laboreek hedadura handia hartzen dutela gaur egun. Balorazio hori kontuan hartuta, eta IEAn proposatutako neurriarekin batera, hau da, lugorriak instalaziotik gertu mantentzearekin batera, eta neurri hori indartu delarik ingurumen eraginaren deklarazio honen baldintzetan, kaltetutako azalerarekiko konpentsazio neurriaren proportzioa handituz, neurri batean konpentsatzen ahal da eragindako kaltea.

Instalazioaren lurralde konektibitateak eraginiko inpaktu sinergikoari dagokionez, batez ere gunearen okupazioak eta hesi efektuak eraginikoa, perimetroko hesiaren eta jarraitzaileen presentziaren ondorioz, IEAk bateragarritzat jotzen du, faunaren desplazamenduak oraindik errazten dituzten elementuak daudela iritzita. Azpisistemen artean plakarik eta hesirik gabe utzi diren korridoreek, Sasillo eta Valdelafuenteko sakanak berreskuratzeko proposatutako neurriarekin batera, lurraldearen konektibitatea hobetu eta inpaktua murrizten dute.

Gurelurrek adierazi du zenbait hutsune daudela sinergiei buruz egindako azterketan. Hala ere, ebaluazioaren xede diren lau azpisistemen ezarpen eremuaren ezaugarriak direla-eta, batetik, azpisistemen arteko bereizketa korridoreak ezartzea, eta bestetik, IEAn jasotako gainerako neurriak edo deklarazio honen baldintzatzailean ezarritakoak, horien artean azpimarragarriak lugorriak kudeatzeko eta Sasillo eta Valdelafuente sakanak lehengoratzeko neurriak, gure ustez horiek nabarmen murrizten dituzte ebaluazioaren xede den instalazio zatiak eragiten dituen inpaktu metagarriak eta sinergikoak.

5. Proposamena.

Espedientearen azterketa teknikoa egin ondoren, Ingurumen Zuzendaritza Nagusiko Biodibertsitatearen Zerbitzuak ondorioztatu du ingurumen eraginaren ebaluaziorako prozedura behar bezala egin dela, eta ingurumenaren ikuspegitik, uste du La Nava eguzki instalazio fotovoltaiko aldatuaren A, B, C eta D azpisistemak egikaritzea, hori baita ebaluatu beharreko zatia, bideragarria dela ingurumenaren ikuspegitik, eta beraz, ingurumen eraginaren aldeko adierazpena egitea proposatu da, eta beraz, baimena ematen da La Nava eguzki instalazio fotovoltaikoaren azpisistema horiek eta hari lotutako La Nava estaziorainoko ebakuazio azpiegiturak egiteko, betiere aurkeztutako dokumentazioan ezarritako neurriak eta kondizioak eta ebazpen honetan ezarritako gainerako kondizioak betetzen badira.

Adierazitakoarekin bat, eta Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikuluak, Nafarroako Foru Komunitateko Administrazioaren departamentuen egitura ezartzen duen Nafarroako Foru Komunitateko lehendakariaren abuztuaren 6ko 22/2019 Foru Dekretuak eta Landa Garapeneko eta Ingurumeneko Departamentuaren egitura organikoa onesten duen urriaren 23ko 258/2019 Foru Dekretuak ematen dizkidaten eskudantziak erabiliz, honako hau

EBAZTEN DUT:

1. Ingurumen eraginaren aldeko adierazpena ematea La Nava eguzki instalazio fotovoltaikoaren proiektu aldatuaren A, B, C eta D azpisistemei buruz, Castejongo udalerrian, eta haren La Nava estaziora arteko ebakuazio azpiegiturari buruz, Castejon eta Tuterako udalerrietan. Solen Energía La Nava SLU enpresak sustatu du proiektua.

2.a Adieraztea jarduera horiek aurrera eramateko bete beharreko baldintzak goiburuan aipaturiko espedienteari erantsitako dokumentazio teknikoan jasotzen direla, eta horiez gain, honako baldintza hauek:

–Ondare arkeologikoaren gaineko ukipenei dagokienez, aldeko txostena lortu beharko da Vianako Printzea Erakundea-Kultura Zuzendaritza Nagusiko Erregistroaren, Ondasun Higigarrien eta Arkeologiaren Ataletik, obrak egiten hasi aurretik.

Lanak egin bitartean lur azpian aztarna arkeologikoren bat agertuko balitz, ordura arte ezezaguna, sustatzaileari gogorarazi behar zaio legezko betebeharra duela horren berri berehala ematea Nafarroako Gobernuaren Ondare Historikoaren Zerbitzuari.

–Euskarri egitura fotovoltaikoa lurrean zuzenean tinkatuz ezarriko da lehentasunez.

–Eguzki instalazio fotovoltaikoa lursailaren topografia naturalaren arabera egokitu beharko da, obrak egin bitartean ukipenak guztiz ezinbestekoak diren zonei soilik eragiteko moduan eta lur mugimenduak ahalik eta txikienak izan daitezen. Plakak ezartzeko eremuan egin beharreko sasi garbitzea eta nibelazioa ez dira eremu osoak ukituz eginen; aitzitik, jarraitzaileen zutoinek osatzen dituzten lerroei bakarrik eraginen diete, haiek ezartzeko eta haien erabilerarako doi beharrezkoa denean, baita bideei, kanalizazioei, transformazio zentroei eta Azpiestazio Elektriko Transformatzaileei ere.

–Ahal den neurrian, lurzatien eta bertan dagoen landaredia naturalaren artean banaketa ezpondak kontserbatu beharko dira. Era berean, makineria eta materialak biltzeko guneak ez dira kokatzen ahalko landaredi naturalak estalitako lekuetan.

–IEAn ezartzen den bezala, ebakuazioko linea lur azpitik doan zatietan, landaretza naturaleko zonak hurbil daudenean, haien gaineko eragina saihestu behar da.

–Ingurumen eraginaren azterketan ezartzen den bezala, antzinako lur erretenak eta lurrean sakabanatuta dauden harri pila ugariak mantendu egin beharko dira, eta lekuz aldatuko dira, ingurune hurbil batean, beharrezkoa izanez gero.

–Lanak egin bitartean katalogo nazional edo autonomikoetan arriskuan dagoelako jasotzen den espezieren baten presentzia detektatzen bada, lanek kaltetuko luketena, berehala jakinaraziko zaio Biodibertsitatearen Zerbitzuari, eta hark xedatzen duena bete beharko da.

–Inguruko hesia zutoinen bidez bakarrik tinkatuko da lurrean, fauna txikiari azpitik igarotzeko aukera uzteko, eta horretarako, azpitik tarte bat utzi beharko du, lurretik 15-20 cm-ra altxatuta.

–Ingurumen eraginaren azterketan ezartzen den bezala, hesia plaka ikusgarriez seinaleztatuko da, abifaunak talka egin ez dezan. Hesien trazadura osoan jarri beharko dira horiek, 10 metrotik behin tartekatuta.

–Plakak ezartzeko eremuan dagoen landaredia kontrolatzeko eta mantentzeko ohiko metodo gisa, abeltzaintza estentsiboa erabiliko da eta, behar berezia izanez gero, sasi garbitze mekanikoa baimenduko da. Herbizidak erabiltzea espresuki debekatua dago.

–Panelak garbitzeko ezarriko den sistemak ez du erabiliko gai kimiko kutsagarri edo arriskugarririk.

–Lagomorfoak, karraskariak eta bestelako animaliak kontrolatu behar badira, egokiak diren baimenak eskuratu ondoren, baliabide mekanikoak eta biologikoak erabiliko dira eta guztiz debekaturik egonen da pestizidak, intsektizidak, errodentizidak eta bestelako pozoiak erabiltzea.

–Argiunerik jartzen bada instalazioan, ezinbestekoak direnak bakarrik jarriko dira, talka eremu potentzialetatik urrun (hesiak, tentsoreak, aireko linea elektrikoak, etab.). Argi kutsadura txikiagotzen duten luminariak erabiliko dira, intentsitate txikikoak eta lurrera begira jarriak.

–Ingurumen eta paisaia integrazioa:

–Obrak hasi aurretik, zehaztu eginen dira lan eremuak, makinak pasatzeko eremuak eta materialak pilatzekoak. Landaredi naturala ahalik eta gutxien ukitzeko, lan eremua ahal den txikiena izanen da eta uki ez daitezkeen eremuak balizatuko dira.

–Lurra berdintzeko lanek, beharrezkoak badira, ez dute sortuko 2 metro baino gehiagoko lur maila edo ezpondarik, eta halakorik sortzen bada, etzanak izanen dira, 3H/2V baino gutxiagoko maldarekin, haien goialdeak biribilduak izanen dira, eta lubeta-ezponden gainean gutxienez lur begetalezko 30 cm-ko geruza jarriko da.

–Lurra kendu edo hondeatu aurretik, obren eragina jasanen duen azalera guztian kenduko da landare lurra, gutxienez 30 cm-ko sakonerako profil batean (modu iraunkorrean edo aldi baterako okupatuko diren azalerak). Material hori propio horretarako hautatutako guneetan metatuko da, 2,0 metrotik beherako altuera duten kabailoiak osatuz, geroago zaharberritze lanetan berrerabiltze aldera.

–Lur mugimenduetako soberakinak ahal bezainbeste aprobetxatzeko ahalegina eginen da, obran berean erabiliz. Lur soberakinak hondakinen kudeatzaile baimendu batek kudeatuko ditu, eta lehentasunez erabiliko dira hurbileko gune narriatuak edota El Culebrete hondakindegia leheneratzeko. Nolanahi ere, lurren lekualdaketa eskatzen duten operazio guztiek Ekonomia Zirkularraren eta Klima Aldaketaren Zerbitzuko Hondakinen Atalaren aldeko txostena beharko dute.

–Obrak bukatutakoan, behin-behineko instalazioak desmuntatu eta kenduko dira eta obra hondarrak garbituko dira okupatu den eremu osoan, hondakinak kudeatuz indarreko legediaren arabera.

Eguzki-instalazio fotovoltaikoaren eremu osoa eta obrek ukitutako beste edozein eremu, aldi batez ukitu bada ere, eta bereziki jarraitzaileen arteko lur zatiak, harrotu eta ereintzarako prestatuko dira, eta belardi autoktonoen hazien nahasketa bat ereinen da; belar horiek egin beharreko jarduerarekin bateragarriak izan beharko dute, eta agente polinizatzaileen presentzia errazten dutenak. Obrak egin bitartean landare lurrezko geruza kendu edo hondatu bada edo halakorik ez badago, erein baino lehen landare lurrezko geruza bat jarriko da, gutxienez 30 cm-koa, aurretik behar bezala erauzi eta metatua.

–Ingurumena lehengoratzeko proiektua, IEAren 12. puntuan ("Ingurumena lehengoratzea") aipatzen dena, obrak hasi aurretik aurkeztu beharko da, eta bertan zehatz azalduko dira planteatzen diren ereintza eta landaketen kokapena, antolaera eta osaera. Edonola ere, espezie autoktonoak erabiliko dira, garaiaren arabera egokienak, eta debekatuta dago espezie exotikoak erabiltzea.

Ingurumena lehengoratzeko proiektuan, Aleppo pinua (Pinus halepensis) landatuko da errepide ertzean, dauden "hutsuneek" instalazioaren zuzeneko ikuspegia ematen duten tokietan, bide horien jabari publikoa ukitu gabe.

–Obrak amaitu eta hurrengo 6 hilabeteetan landareztatu beharko da. Landaketak, behar den garaian egin beharrekoak izanik, klima baldintzen arabera, etab., lanak amaitu eta hurrengo landaketa garaian eginen dira. Landaketa horiek jarraipena behar dute, eta bideragarriak direla ziurtatzea, eguzki instalazioaren erabilerak irauten duen aldi osoan.

–Erabilerari lotutako eraikinen diseinua ingurunearekiko harmonia errespetatuz eginen da, eskualdeko eraikinen tipologiarekin bat eginez, eta paisaian integratzea ekarriko duten kolore ez nabarmenak erabiliz.

–Cabezoburroko eskortan habia egiten duten Neumann belatzez osaturiko koloniari inpakturik ez eragiteko, apirilaren 1etik ekainaren 30era bitartean egin beharko dira A-68 errepidearen hegoaldera ebakuazioko azpiegitura gauzatzeko egin beharreko lanak.

–Estepako abifauna faboratzeko prebentzio eta zuzenketa neurri gisa, IEAk ezartzen du lugorriak mantendu behar direla aztergai den eremuan, instalazioa erabiltzen den bitartean, eguzki instalazioaren hedadura berean. Gainera, azalera horrek inguruko estepako hegaztientzako intereseko eremuekin lotuta egon beharko lukeela ezartzen da.

Inguruaren ingurumen balioak eta gunean jada existitzen diren edo proiektatuta dauden beste eguzki parke batzuen ondorio metagarriak kontuan hartuta, beharrezkotzat jotzen da proportzioa baimendutako azaleraren %125 izatea, sustatzaileak proposatutako 1:1 proportzioa izan beharrean. Azalera hori lehorreko laborantzako lurzatietan banatuko da, estepako hegaztientzat habitat egokia izanik, baldin eta ingurumen eraginaren adierazpen hau ebazten den egunean laborantzan edo lugorri badaude, urteko eta aldiko erregimenaren arabera, eta estepako abifauna kontserbatzeko intereseko eremuan badaude (Agua Salada-Montes de Cierzo-Plana de Santa Ana).

Azalera, ahal dela, 2-3 hektarea inguruko eremuetan banatuko da, eta hura aukeratzeko eta kudeatzeko modua zehazteko, Nafarroako Gobernuko Biodibertsitatearen Zerbitzuari kontsultatzen ahalko zaio, eta hari aurkeztu beharko zaio azkenean horretarako erabiliko diren lursailen zerrenda, baliozkotu dezan. Lurzati horiek erabiltzeko eskubidearen erabilgarritasuna egiaztatu egin beharko da, bai eta lursailen jabeekin eta/edo nekazariekin hitzartutako akordioak ere. Lanei ekin aurretik aurkeztu beharreko jarraipen eta zaintza planean zehaztu beharko da lurzati horien kudeaketa; hona hemen aukera posibleetako zenbaitzuk, lugorri uztea eta 2-3 urtetik behin kontrolatzea landarediaren garapena, azarorik otsailera gainazaleko labore lan bat eginez, edo lugorrien kudeaketarako beste hainbat eredu, betiere fitosanitarioen erabilera baztertuz eta labore lanak ugaltzeko garaitik (martxotik abuztura) kanpo eginez. Ez dira erabiltzen ahalko energia berriztagarrietarako beste proiektu batzuengatiko konpentsazio neurri gisa ezarritako nekazaritza eta ingurumen alorreko neurriak dituzten lurzatiak.

Eguzki parke hori edo Ebro I eguzki parkea eraikitzeagatik (bi proiektuak enpresa talde berarenak dira) eremu horren konektibitatea konpentsatzeko eta hobetzeko neurri gisa, Valdelafuente sakanaren burua eta Sasillo sakana leheneratu egin beharko dira, gutxi gorabeherako X1 koordenatuen arteko lotura ekologiko funtzionala bermatze aldera: 608.124, Y1:4.663.575, X2: 608.779, Y2: 4.664.783, eta X3: 609.511, Y3: 4.665.062.

Leheneratzean, gutxienez 100 metroko zabalerako zerrenda bat sortuko da, ahal dela 50 metro ibilguaren alde banatan, laborea bertan behera uzten den lekuan, eta bertako landaredia eta topografia naturala leheneratzen den lekuan. Korridore ekologiko hori leheneratzeko, obrak hasi aurretik, leheneratze proiektu bat aurkeztuko da. Proiektu horretan, gutxienez, leheneratutako gunea zedarritzeko neurriak eta gune hori lurraldean mantentzeko beharrezkoak direnak zehaztuko dira. Proiektu horrek memoria, planoak eta aurrekontu xehatua izan beharko ditu, eta Biodibertsitatearen Zerbitzuaren oniritzia jaso beharko du.

Halaber, leheneratutako eremuaren eta inguruko lurren arteko jarraitasun topografikoa ziurtatu beharko da, eta sakanaren luzetarako jarraitasuna ziurtatzeko, ez da inolako itxituren barruan sartu beharko.

–Sustatzaileak proposatu dituen neurriei dagokienez, hau da, animaliak erreten eta/edo sakanetatik igarotzeko bidea egokitzeko, hilkortasuna handitu ez dadin, eta aztertutako eremuko Naumann belatz koloniatik hurbil dauden estalpe batzuen teilatuak hobetu eta egokitzeko neurriei dagokienez, obrak hasi aurretik aurkezten den Ingurumenaren Jarraipena, Zaintza eta Leheneratzeko Planean egin beharreko jarduerak zehaztu beharko dira. Biodibertsitatearen Zerbitzuaren oniritzia eta beharrezkoak diren gainerako baimenak izan beharko ditu.

–Jarraipen, zaintza eta leheneratzeko plana: obrak hasi aurretik, obren fasean eta funtzionamenduaren fasean jarraipena eta zaintza egiteko plan bat entregatu beharko da, bertan jasoz egin beharreko jarduketen metodologia, eta halaber, ebazpen honetan aipatutako gainerako informazioa, bereziki, estepako abifauna faboratzeko eta Sasillo sakanaren eta Valdelafuente sakanaren konektibitatea hobetzeko neurrien zehaztapena. Hor sartu behar da sustatzaileak duen betebeharra, urtean behin eta eguzki parkeak funtzionatzen duen bitartean, aurreikusitako neurriak betetzen direla egiaztatzeko dokumentu bat aurkezteko, batez ere estepako abifaunari eta Sasillo sakanaren konektibitatea mantentzeari buruzko neurriei dagokienez. Jarraipena egiteko, zaintzeko eta leheneratzeko planak jasoko ditu, halaber, eguzki parkearen funtzionatze aldiaren amaieran aurreikusitako leheneratze lanak, urtebetetik beherako epean egin beharrekoak. Ingurumen Eraginaren Atalaren aldeko txostena lortu beharko da, eta hori gabe eguzki parkea ez da sarera konektatzen ahalko.

–Obrak hasi aurretik, zuinketa bat egin beharko da, eta horretarako Ingurumen Eraginaren Ataleko langileak egon beharko dira, bereziki Valdelafuente sakanaren eta Sasillo sakanaren konektibitatea hobetzeari dagokienez, behar bezala seinalez hornitu beharko direnak.

–Obrak hasi baino gutxienez 72 ordu lehenago, Ingurumen Jarraipenaren Bulegoari jakinarazi beharko zaio (seguimiento.ambiental@navarra.es).

3. Ebazpen hau Nafarroako Aldizkari Ofizialean argitaratzea, Ingurumen Ebaluazioari buruzko abenduaren 9ko 21/2013 Legearen 41.3 artikuluan ezarritakoari jarraikiz.

4. Ebazpen hau Industria Antolamenduaren, Azpiegitura Energetikoen eta Meatzeen Zerbitzura, Ingurumen Zaintzara (Iruñeko Barrutira) eta sustatzaileari igortzea, behar diren ondorioak izan ditzan.

Iruñean, 2023ko urtarrilaren 23an.–Ingurumeneko zuzendari nagusia, Pablo Muñoz Trigo.

Iragarkiaren kodea: F2303303