1. NAFARROAKO FORU KOMUNITATEA
1.7. BESTELAKOAK
1E/2023 EBAZPENA, urtarrilaren 3koa, Ekonomia Zirkularraren eta Klima Aldaketaren Zerbitzuko zuzendariak emana, zeinaren bidez onartzen baita Villatuertako udal mugartean erretxinak fabrikatzen dituen instalazio baten ingurumen baimen integratuan ezarritako funtzionamendu baldintzak aldatzea. Instalazioaren titularra Kemira Ibérica pertsona bakarreko sozietate anonimoa da.
Instalazio horrek badu ingurumen baimen integratua, Ingurumeneko eta Lurralde Antolamenduko zuzendari nagusiaren 619E/2016 Ebazpenaren bidez emana, gero Ekonomia Zirkularraren eta Uraren Zerbitzuko zuzendariaren 273E/2017 eta 408/2018 Ebazpenen bidez aldatu zena, Ekonomia Zirkularraren eta Klima Aldaketaren Zerbitzuko zuzendariaren 134E/2020 Ebazpenaren bidez berrikusi zena, eta, azkenik, Ekonomia Zirkularraren eta Klima Aldaketaren Zerbitzuko zuzendariaren 45E/2022 Ebazpenaren bidez aldatu zena.
2023ko abuztuaren 29an, titularrak bere ingurumen baimen integratuan dauden baldintzak aldatzeko eskatu du, zehazki, ingurumen baimen integratuaren III. eranskinean, instalazioan sortzen diren hondakinen zerrendan, hondakin mota gehiago sartzeko.
Ekonomia Zirkularraren eta Uraren Zerbitzuak berrikusi du aurkeztutako eskaera, eta balorazio hau egin:
EHZ KODEA | DESKRIBAPENA | BALORAZIOA |
19 08 06* | Ioi-trukaketako erretxina saturatuak edo erabiliak | Onartzen da kudeatu beharreko hondakinen zerrendan sartzea |
12 01 09* | Halogenorik gabeko mekanizazioko emultsio eta disoluzioak: garbiketa-urak | Onartzen da kudeatu beharreko hondakinen zerrendan sartzea |
16 05 06* | Substantzia arriskutsuak diren edo substantzia arriskutsuak dauzkaten laborategiko produktu kimikoak: laborategiko erreaktiboak | Onartzen da kudeatu beharreko hondakinen zerrendan sartzea |
08 04 10 | 08 04 09 kodean zehaztutakoen bestelakoak diren itsasgarrien eta zigilatzaileen hondakinak: trukagailua garbitzearen hondakina | Onartzen da kudeatu beharreko hondakinen zerrendan sartzea |
16 05 04* | Substantzia arriskutsuak dauzkaten presio-ontzietako gasak (haloiak barne). | Onartzen da kudeatu beharreko hondakinen zerrendan sartzea |
16 02 14 | Baztertutako ekipoak, 16 02 09tik 16 02 13ra bitarteko kodeetan zehaztutakoak ez direnak: ekipo elektroniko ez-arriskutsuak | Onartzen da kudeatu beharreko hondakinen zerrendan sartzea |
16 10 01* | Substantzia arriskutsuak dauzkaten hondakin likido urtsuak | Onartzen da kudeatu beharreko hondakinen zerrendan sartzea |
16 10 02 | Hondakin likido urtsuak, 16 10 01 kodean zehaztuta daudenez bestelakoak | Onartzen da kudeatu beharreko hondakinen zerrendan sartzea |
Onartutako aldaketek ez dute eragozten instalazioaren funtzionamendu egokia ingurumenari dagokionez, eta bat datoz ingurumen baimen integratuan isurketarako ezarritako gehieneko mugarekin eta gainerako eskakizunekin, bai eta teknika erabilgarri onenen aplikazioarekin ere.
Kasu honetan, Ingurumenean Eragina duten Jarduerak arautzen dituen abenduaren 16ko 17/2020 Foru Legea garatzeko Erregelamenduaren 35. artikuluan ezarritako inguruabarrak gertatzen direla uste da, eta, ondorioz, bidezkoa da ingurumen baimen integratuan ezarritako baldintzak ofizioz aldatzea, artikulu horretan aurreikusitako administrazio prozedurarekin bat etorriz, eta ez da egokitzat jotzen aldaketa-espediente hau jendaurrean jartzea.
Ebazpen proposamena instalazioaren titularrari entzunaldia emateko tramitean egon da hamabost egunez, eta hark ez du proposamenaren aurkako alegaziorik aurkeztu.
Adierazitakoarekin bat, eta Ingurumeneko zuzendari nagusiak azaroaren 8an emandako 107/2019 Ebazpenaren bidez eskuordeturik ditudan eskumenak erabiliz,
EBAZTEN DUT:
Lehena.–Villatuertako udal mugartean erretxinak fabrikatzeko dagoen instalazio baten ingurumen baimen integratuan ezarritako funtzionamendu baldintzen aldaketa onartzea, ebazpen honen eranskinean adierazitako hondakinak sar daitezen instalazioaren ingurumen baimen integratuaren III. eranskinean. Instalazioaren titularra Kemira Ibérica pertsona bakarreko sozietate anonimoa da.
Bigarrena.–Suteen aurkako segurtasuna dela eta (abenduaren 3ko 2267/2004 Errege Dekretua), instalazioan biltegiratutako hondakin kopuruak ez du handitu behar ingurumen baimen integratua emateko espedientearen dokumentazio teknikoan kalkulatutako arrisku intrintsekoaren maila.
Hirugarrena.–Ebazpen honetan jasotako baldintzak betetzen ez badira, Kutsaduraren Prebentzio eta Kontrol Integratuaren Legearen testu bateginaren IV. tituluan jasotako ingurumen-diziplinako neurriak hartuko dira (abenduaren 16ko 1/2016 Legegintzako Errege Dekretuaren bidez onetsi zen testu bategina), eta, subsidiarioki, Ingurumenean Eragina duten Jarduerak arautzen dituen abenduaren 16ko 17/2020 Foru Legearen III. tituluan ezarritako zehapen-araubidean jasotakoak, ezertan galarazi gabe legeria sektorialean ezarritakoa, aurrerantzean ere aplikatu beharko baita.
Laugarrena.–Ebazpen hau Nafarroako Aldizkari Ofizialean argitaratzea.
Bosgarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Ebazpen hau jakinarazi eta biharamunetik aurrera kontatuko dira epeak.
Seigarrena.–Ebazpen hau igortzea Kemira Ibérica pertsona bakarreko sozietate anonimoari eta Villatuertako Udalari, behar diren ondorioak izan ditzan.
Iruñean, 2023ko urtarrilaren 3an.–Ekonomia Zirkularraren eta Klima Aldaketaren Zerbitzuko zuzendaria, Pedro Zuazo Onagoitia.
Oharra: ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Klima Aldaketaren Zerbitzua) eta Nafarroako Gobernuaren webgune honetan: https://extra.navarra.es/InformacionPublicaPRTR/CentroPublicaciones.html#/CentroPublicaciones.
Iragarkiaren kodea: F2300267
