Iragarkia

269. ALDIZKARIA - 2023ko abenduaren 29a - BEREZIA

1. NAFARROAKO FORU KOMUNITATEA

1.1. XEDAPEN OROKORRAK

1.1.1. Foru legeak eta legegintzako foru dekretuak

22/2023 FORU LEGEA, abenduaren 26koa, zenbait zerga aldatu eta beste tributu-neurri batzuk hartzekoa.

NAFARROAKO FORU KOMUNITATEKO LEHENDAKARIA NAIZEN HONEK.

Aditzera ematen dut Nafarroako Parlamentuak onetsi duela honako:

FORU LEGEA, ZENBAIT ZERGA ALDATU ETA BESTE TRIBUTU-NEURRI BATZUK HARTZEKOA.

HITZAURREA

Foru lege honen xedea da honako arau hauek aldatzea: Pertsona Fisikoen Errentaren gaineko Zergari buruzko Foru Legearen testu bategina, Ondarearen gaineko Zergari buruzko Foru Legea, Sozietateen gaineko Zergari buruzko Foru Legea, Oinordetza eta dohaintzen gaineko zergaren xedapenak biltzen dituen testu bategina, Ondare eskualdaketen eta egintza juridiko dokumentatuen gaineko zergaren xedapenak biltzen dituen testu bategina, Hondakinei eta Haien Fiskalitateari buruzko Foru Legea, Tributuei buruzko Foru Lege Orokorra, Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bategina, Nafarroako Foru Komunitateko Administrazioaren eta haren erakunde autonomoen tasa eta prezio publikoei buruzko Foru Legea, Nafarroako Toki Ogasunei buruzko Foru Legea eta Nafarroako Lurralde Aberastasunaren Erregistroari eta Katastroei buruzko Foru Legea.

Arauen aldaketen helburua da, alde batetik, inflazio-tasa handia duen egungo testuinguru ekonomikoari erantzutea, eta, bestetik, doikuntza teknikoak egitea, Zerga Administrazioak kontrol handiagoa eta kudeaketa hobea izan dezan; azken helburua eta asmo iraunkorra da zerga arloko ekitatea eta iruzur fiskalaren aurkako borroka hobetzea.

Herritarren zerga-karga orokorrean murrizteko helburuarekin, pertsona fisikoen errentaren gaineko zergaren likidazio-oinarri orokorrari aplikatu beharreko tarifaren deflaktazioa egiten da, %4koa 2023an eta %3koa 2024ko urtarrilaren 1etik aurrera. Era berean, 2023an aplikatu beharreko gutxieneko pertsonalak eta familiarrak %3 igotzen dira, eta beste %3 2024ko urtarrilaren 1etik aurrera aplikatu beharrekoak.

Ildo beretik, baina kolektibo jakin batzuei zuzendutako neurri gisa, bi salbuespen nabarmen daitezke: alde batetik, 200 euroko ordainketa bakarreko laguntza, araututa dagoena abenduaren 27ko 20/2022 Errege Lege Dekretuaren 74. artikuluan, helburu duena prezioen igoeraren eragina arintzea, eta, bestetik, NPB berriaren ordainketaren parte diren eko-araubideen laguntzak, bai laguntzak jasotzen dituena pertsona fisikoa bada, bai sozietateen gaineko zerga pagatzen duen entitatea bada. Nabarmentzekoa da, halaber, handitu direla etxebizitza eskuratzeko errentamenduagatiko kenkariak (David) eta emantzipaziorako errentamenduagatiko kenkariak (Emanzipa), eta, aldi berean, azken horiek 2024an aplikatzeko aukera luzatzen zaie langabeei, gazteak ez izan arren.

Bestalde, Kontseiluaren 2016ko uztailaren 12ko 2016/1164 (EB) Zuzentarauaren transposizioa osatzen da (zuzentarau horren bidez, zenbait arau ezarri ziren barne merkatuaren funtzionamenduan zuzeneko eragina duten saiheste fiskaleko jardunbideen kontra), sozietateen gaineko zergan finantza gastuen kengarritasunari dagokionez.

Foru legearen egitura hauxe da: hamaika artikulu, xedapen gehigarri bat eta bost azken xedapen.

Pertsona fisikoen errentaren gaineko zergaren esparruan, arestian aipatutako neurriez gain (besteak beste, likidazio-oinarri orokorrari aplika dakiokeen tarifaren deflaktazioa eta gutxieneko pertsonal eta familiarrengatiko kenkarien igoerak), zergaren koherentzia hobetzen duten doikuntza teknikoak egiten dira eta atzemandako akats batzuk zuzentzen dira.

Segurtasun juridikoa dela eta, zergari buruzko foru legean administrazio-doktrinak finkatutako irizpide bat sartzen da; horren arabera, Gizarte Segurantzaren pentsio jakin batzuk eta epai judizial bidez aitortutako bi urte baino gehiagoko beste prestazio pasibo batzuk jasotzen badira, epaia irmo bihurtzen den zergaldiari egotziko zaizkio, %30eko murrizketa aplikatuta.

NASUVINSAren bitarteko errentamendua sustatzeko eta alokairura bideratutako etxebizitzen parkea handitzeko, %60tik %70era igotzen da kapital higiezinaren etekin garbia murrizteko ehunekoa, sozietate publiko instrumentalaren bitarteko etxebizitzen errentamendutik datorrenean.

Kapital higiezinaren etekin garbiaren murrizketen esparruan ere, %40ko murrizketaren aplikazioa atzeratu egin behar da, alokairu jasangarritasunaren indizea zehazten ahal den zergaldira arte. Murrizketa aplikatzeko baldintzetako bat da errentamenduaren zenbatekoak ez gainditzea alokairu jasangarritasunaren indizearen (AJI) balioa; beraz, indize hori zehaztu eta ezarri arte, ezinezkoa da murrizketa aplikatzea.

Bestalde, ex lege argitzen da ulertuko dela ondarea ez dela handitu edo gutxitu, baldin eta diruzko konpentsazioak edo ondasunen esleipenaren bidezkoak egiten badira ezkontideen edo bikote egonkorreko kideen arteko konpentsazio-pentsioa ez den beste arrazoi batengatik, hori gertatzen bada legezko inposizioagatik edo ebazpen judizialagatik ondasunen banaketaren ezkontzaren ondasun-eraentza (Bildumaren 101. Legea) edo bikote egonkorrari aplikatu beharreko ekonomia- eta ondare-eraentza (Bildumaren 112. Legea) azkentzen denean.

Bestalde, bizi-aseguru kolektiboetara egindako ekarpenengatiko zerga-oinarriaren murrizketen esparruan, ekarpen horiek gauzatzen baldin badituzte enpresek pentsioengatik beren gain hartutako konpromisoak, 4.250 euroko berariazko muga ezartzen da, entitate batek bere bazkide langileentzat bakarrik enpresa-ekarpenak aseguru kolektiboaren bidez egiten dituen kasurako, hori baita langile batzuei bakarrik ekarpen horiek egiteko bide ematen duen figura bakarra. Ekarpenak langile batzuentzat bakarrik egiten badira, aplikatu beharreko muga langile autonomoentzat ezarritako bera izanen da.

Energia berriztagarrien instalazioetan egindako inbertsioengatiko eta errekarga-sisteman egindako inbertsioengatiko kenkariari dagokionez, non organo eskudunak emandako txostena behar baita, ezartzen da kenkaria aplikatuko dela txostena egin ondoren aurkeztu beharreko lehen autolikidazioan. Aldaketa horrekin, saihestu gogo da zergadunak txostena lortu ondoren eskatu behar izatea bere autolikidazioa berrikusteko.

Kuota diferentzialaren kenkarien eremuan, aurreko paragrafoetan adierazi den bezala, hobetu egiten dira etxebizitza eskuratzeko errentamenduagatiko eta emantzipaziorako errentamenduagatiko kenkariak, mugak handitzen baitira. Emantzipaziorako errentamenduagatiko kenkarien kasuan, kenkaria aplikatzeko aukera zehazten duen errenta-atalasea ere handitzen da, eta kenkariaren aplikazioa luzatzen zaie 2024an enplegu-eskatzaile gisa inskribatuta dauden langabeei, adinaren baldintza bete ez arren. Gainera, 675 eurotik 700 eurora handitzen da bi kenkari horiek eskuratu ahal izateko alokairuaren prezioaren muga.

Zergadunen segurtasun juridiko handiagoa lortzeko eta zergaren kudeaketa errazteko, aldatzen da zer zergalditara egotzi behar diren oro har laguntza publikoen ondoriozko ondare-gehikuntzak, laguntza horiek kobratzeko aldira eramaten baita.

Zergaren zenbait manu ere aldatzen dira, desgaitasuna duten pertsonen ondare babestuen (Nafarroako Foru Berrian xedatutakoaren arabera eratuak) tratamendu fiskala 41/2003 Legean araututako ondare babestuen tratamenduarekin parekatzeko.

Birgaitze babestutako obretarako dirulaguntza publikoen tratamendu fiskala Europako funtsen kargura finantzatutako laguntzen tratamenduarekin parekatzeko, aipatutako dirulaguntza publiko horien salbuespena ezartzen da Europako Next Generation funtsak jasoko diren aldirako, dirulaguntza zer subjektu pasibori esleitzen zaion, haren errenten zenbatekoa kontuan hartu gabe.

Bukatzeko, gure inguruko legerian xedatutakoaren ildotik, eta konkurtso-prozedurak ez zigortzeko, Konkurtso Legearen esparruan zorren kitapen eta ordainean emateen ondorioz agertzen diren errenten salbuespena ezartzen da, betiere zorrak jarduera ekonomikoen ondoriozkoak ez badira.

Ondarearen gaineko zergan, egindako aldaketen helburua da argitzea betebehar pertsonalagatik zergaren mende dauden zergadunek soilik aplika ditzaketela kuota osoaren muga eta nazioarteko zergapetze bikoitzagatiko kenkaria.

Sozietateen gaineko zergari dagokionez, aldaketarik garrantzitsuenaren helburua da Kontseiluaren 2016ko uztailaren 12ko 2016/1164 (EB) Zuzentarauaren transposizioa osatzea (zuzentarau horren bidez, zenbait arau ezarri ziren barne merkatuaren funtzionamenduan zuzeneko eragina duten saiheste fiskaleko jardunbideen kontra). Interesak mugatzeari buruzko arauari dagokionez, Nafarroako Foru Komunitateak Zuzentarauaren 11.6 artikuluan araututako salbuespenari heldu zion, zeinak ezartzen baitzuen 2016ko abuztuaren 8an BEPS arloko arriskuak saihesteko arau nazional espezifikoak zituzten estatu kideek arau horiek aplikatzen ahalko zituztela 2024ko urtarrilaren 1era arte, baldin eta arau horiek eraginkorrak baziren aipatutako zuzentarauan ezarritako interesak mugatzeko.

Ezarritako epea igarota, une honetan beharrezkoa da foru araudia aipatutako zuzentarauaren 4. artikulura egokitzea.

Horretarako, aldatzen da nola zehaztuko den zein mozkin operatibori aplikatuko zaion finantza-gastuen kengarritasuna zehazten duen muga, mozkin operatibo horren kalkulutik berariaz baztertzeko sozietateen gaineko zergaren zerga-oinarrian sartzen ez diren diru-sarrerak, gastuak eta errentak, Zuzentarauaren 4.2 in fine artikuluan xedatutakoari jarraituz.

Era berean, 24. artikulu horren 6.a) apartatuaren azken paragrafoa ezabatzen da, titulizazio-funtsak gastu finantzarioen muga aplikatzearen salbuespenetik kanpo uzteko, ez baitaude sartuta Zuzentarauak salbuespen hori aplikatzeko aukera ematen dien "sozietate finantzarioak" izenekoen barruan, bertan dagoen "sozietate finantzarioa" definizioaren arabera.

Bestalde, eta pertsona fisikoen errentaren gaineko zergan bezala, sozietateen gaineko zergan salbuetsitzat jotzen dira NPB berriaren ordainketaren parte diren eko-araubideetarako laguntzak; laguntza horiek ingurumena errespetatzeko eta hobetzeko jarduerekin lotuta daude.

Gainera, babesletza jarduerek eragindako publizitate gastuengatiko kenkaria aplikatzeko, entitate babes-hartzaileak dagokion informazio-eredua aurkeztu beharko du, non babesletza kontratuaren arabera jasotako zenbatekoak jasoko baitira.

Bukatzeko, hamabigarren xedapen iragankorra aldatzen da, aplikatzeko dauden kenkariak aplikatu ez daitezen kuotaren erregularizazioa tributu arloko arau-haustea denean, kontuan izan gabe zer zergalditan sortu diren.

Oinordetza eta dohaintzen gaineko zergan terminologia egokitzapenak egiten dira, beharrezkoak baitziren Nafarroan desgaitasuna dutenei arreta emateari eta beren eskubideak bermatzeari buruzko azaroaren 28ko 31/2022 Foru Legearen hirugarren xedapen gehigarriak ezarritakoaren arabera, eta dagoeneko indargabetuta dagoen artikulu baten aipamena zuzentzen da.

Ondare eskualdaketen eta egintza juridiko dokumentatuen gaineko zergan, argitzen da ezen etxebizitzaren jabari osoa eskuratzen denean baino ez dela bidezkoa despopulazio arriskuan dagoen udalerri batean kokatutako ohiko etxebizitzaren eskualdaketari aplikatzen zaion zerga-tasa murriztua, hau da, ez dela aplikagarria usufruktu eskubideak edo jabetza soila eratzen direnean, ezta lehenago usufruktuan eta jabetza soilean banaturiko jabaria kontsolidatzen denean ere. Halaber, aurrerantzean ez da ezinbestekoa izanen etxebizitzaren eskurapenaren dokumentu publikoan ohiko etxebizitzarako erabiliko dela berariaz agertzea, betekizun hori kentzen baita.

Bestalde, ezartzen da hipoteka bermea duten maileguak aldatzen diren kasuetan ere, nobazioarekin gertatzen den bezala, pertsona edo erakunde mailegu-emailea izanen dela zergaren subjektu pasiboa.

Azkenik, zergatik salbuesten dira Sociedad Anónima Estatal de Caución Agraria Estatuko merkataritza sozietatearekin izenpetutako abal-kontratua, era horretako eragiketak sustatu nahi baitira, diruzaintzako tentsio uneak gainditzean helburua dutenak.

Hitzarmen Ekonomikoan xedatutakoa betetzeko, hondakinak hondakindegietan uztearen eta hondakinen errausketaren eta koerrausketaren gaineko zergaren araudia aldatzen da, guztiz egokitu dadin Hondakin eta Lurzoru Kutsatuei buruzko eta Ekonomia Zirkularra Bultzatzeko apirilaren 8ko 7/2022 Legean ezarritakora.

Zehazki, Nafarroako Hondakinen Erakunde Publikoak zuen egiteko bat kentzen da, toki entitateen ordezkaria izatekoa hondakinen zergaren autolikidazioari eta sarrerari buruz haiek dituzten betebeharretan, eta ezartzen da hondakindegien edo hondakinak errausten edo koerrausten dituzten instalazioen kudeatzaileak izanen direla zergadunen (Nafarroako toki entitateak barne) ordezkoak, eta ez titularrak (foru arauak ezartzen zuen moduan).

Gainera, nahiz eta Hitzarmen Ekonomikoaren arabera Nafarroako Foru Komunitateak ezarri ditzakeen Estatuko araudiak ezartzen dituenak baino karga-tasa handiagoak, egokitzat jo da eduki geldoa duten eta hondakin ez-arriskutsuen hondakindegietan utz daitezkeen hondakin jakin batzuen karga-tasak murriztea (zepenak eta galdaketako hondarrenak, besteak beste) eta, horrela, 7/2022 Legearen arabera lurralde erkidean aplikatzekoak direnekin parekatzea. Neurri horren bidez, hondakin geldoak sortzen dituzten enpresek hondakinak Nafarroatik kanpoko hondakindegietara bidaltzea saihestu nahi da, haietan zerga-tasa 1,5 euro/t izanen bailitzateke, 15 euro/t izan beharrean.

Tributuei buruzko Foru Lege Orokorrean aldaketa teknikoak egiten dira, tributuen kontrola eta kudeaketa hobetzeko. Era berean, zergapekoen lankidetza handiagoa lortzeko eta frogak ezkutatzea saihesteko, beste kasu bat tipifikatzen da arau-hauste astunen artean, gutxienez 20.000 euroko zehapena dakarrena, hain zuzen ere, jarduera ekonomiko bat garatzen duen zergapekoak Zerga Administrazioko funtzionarioei finka edo lokaletan sartzea edo egotea, edo zerga-betebeharrekin lotutako lokalak, makinak, instalazioak eta ustiategiak aztertzea bidegabe ukatzen edo galarazten dien kasuetarako.

Betebehar jakin batzuen kontrol eta jarraipen lanak egin ahal izateko, Zerga Administrazioak jakin beharra du zein diren sozietate-figuren akzio edo partaidetzen titularrak. Informazio hori eskuratzea, maiz, zaila gertatzen da, merkataritza eta finantza egitura jakin batzuen konplexutasuna dela-eta. Beharrezkoa da, beraz, tresnak izatea pertsona edo entitate juridiko baten gaineko azken kontrol eraginkorra egiten duten pertsonei buruzko informazioa eskuratzeko, hau da, horien benetako titularrak ezagutzeko. Helburu horrekin, laguntzeko eginbehar berri bat ezartzen da: horren arabera, entitateek Zerga Administrazioari informazioa eman beharko diote haien benetako titularrak diren pertsonei buruz, zerga-aitorpen jakin batzuetan sartuta.

Egiaztapen laburtuko prozeduraren erregulazioa argitzen da, idazkera nahasgarri samarra baitzuen; izan ere, alde batetik, kudeaketa organoen eskumenetatik kanpo uzten zuen kontabilitate-liburuak aztertzeko aukera, eta, ondoren, merkataritzako kontabilitatearen kopia eska zezaketela adierazten zuen.

Idazketa berriarekin argi geratzen da kudeaketa organoek kontabilitatea azter dezaketela, Zerga Administrazioak duen informazioarekin bat datorrela egiaztatzeko. Era berean, ezartzen da azterketa horrek ez dituela eragotziko edo mugatuko gerora ikuskapen prozedura batean egin daitezkeen jarduketak.

Bestalde, paragrafo bat gehitzen da, egiaztapen laburtuko prozeduretan zergapekoari eskatzen ahal dakion zerga-betebehar bat zehaztean eragina duten finantza-eragiketak agiri bidez justifikatzeko.

Zerga-egintzak eta zehapenak jartzeko egintzak errebokatzea sartzen da egintzak berrikusteko prozedura berezien artean; zergapekoak horien bidez eskatzen ahalko du bidegabeko sarrerak itzultzeko, sarrera bidegabea eragin zuen egintza irmoa denean.

Halaber, hogeita zortzigarren xedapen gehigarria aldatzen da, isiltasun negatiboa arautzeko produktuak gordailu fiskaletatik ateratzen dituztenen erregistroan eta ekintzaileen erregistroan alta eskatzeko prozeduretan eta, orobat, identifikazio fiskaleko zenbakia birgaitzeko prozeduretan.

Azkenik, 2024ko urtarrilaren 1etik aurrera ere mantenduko dira zorra geroratzeko edo zatikatzeko eskaerei aplikatu beharreko neurri berariazkoak, 2022an eta 2023an ezarri zirenak.

Aldaketak egin dira Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginean, eta aldaketa horien helburua da, lehenik, ikusgarritasuna ematea genero-indarkeriarekin lotutako jarduketei, nahiz eta jada ulertzen zen sarturik zeudela gizarte mezenasgoaren entitate onuradun izan daitezkeen helburu sozialen artean.

Bigarrenik, aldaketa horien bidez argitu nahi da nola kalkulatzen den kenkarien zenbatekoa pertsona fisikoen errentaren gaineko zergan eta sozietateen gaineko zergan; horretarako, adierazten da mugak desberdinak direla mezenasgo mota bakoitzerako (soziala, ingurumenekoa edo kirolekoa), eta mezenasgo mota bakoitzaren barnean muga aplikatzen zaiola ekarpenen baturari (dohaintza, erabilera maileguak eta komodatua etab.).

Orobat, aldatzen da bigarren xedapen gehigarria, Nafarroako zergadunek aukera izan dezaten testu bateginean ezarritako pizgarri fiskalak aplikatzeko, ekarpenak egiten dizkietenean entitate batzuei eta entitate horiei aplikatu behar bazaie, beste zerga administrazio batean, aipatutako testu bateginean ezarritako tributu-araubidearen baliokidea den bat. Betiere, aipatutako testu bategineko I. tituluan ezarritako tributu-araubidearen onuradun izan nahi duten entitateek komunikatu behar dute araubide hori aplikatzea nahi dutela, eta komeni da zehaztea aurreko neurriak ez diola betebehar horri batere eragiten.

Azkenik, bateratzen da lehentasuna duten jarduerak eta proiektuak deklaratzeko arauketa, edozein izanik ere mezenasgo mota. Aldaketa honekin, foru lege baten bidez deklaratuko dira lehentasuna duten jarduerak eta proiektuak, mezenasgo mota guztietarako, baita kultura mezenasgorako ere, foru dekretu bidez ezartzen baitzen orain arte.

Administrazio-zerbitzuak emateagatiko tasei dagokienez, salbuesten dira departamentuko berariazko aplikazio informatikotik datuak deskargatuz ikastetxe publikoek ematen dituzten ziurtagiriak.

Elkarteen Erregistroaren, Fundazioen Erregistroaren eta Lanbide Elkargoen Erregistroaren jarduketengatiko tasak ere erregistro horien eskumenetara egokitzen dira. Hala, liburuen gaikuntzari buruzko aipamena kentzen da, eta bizilekua aldatzeko inskripzioak tarifatik kanpo uzten dira.

Teknologia berrien bilakaerak kartografiaren munduari eragiten dio, eta gaur egun ez dago inprimaketa bidez egindako aleen eskaerarik, ezta CD eta DVDenik ere. Horregatik guztiagatik, kendu egiten dira produktu batzuengatiko tasak eta dagozkien tarifak, eta beste batzuk gehitzen dira. Proposatutako tarifak bat datoz beste administrazio batzuetakoekin. Kontuan hartuta produktu horiek Administrazioaren beharrengatik egin behar direla, asmoa da tasa batzuk ezartzea produktuen hedapena errazteko, produktu horietatik ahalik eta gizarte-erabilgarritasun handiena lor dadin, eta kopien (digitalak edo analogikoak) erreprodukzioari egotz dakizkiokeen gastuetara doi daitezen.

Barrutietan arrantza egiteko baimenagatiko tasaren tarifa batzuk igotzen dira, baina azken hogei urteetan ez dira aldatu. Langile-kostuak handitzeak zerbitzuaren kostua handitzea dakar urteekin, eta horri gehitu behar zaio zerbitzuaren erabiltzaileen kopurua murriztu dela, eta, beraz, arrantza-egun bakoitzeko emandako paseen kopurua ere bai. Hori dela eta, kostu finko orokorrak pase gutxiagoren arten banatu behar dira, eta, ondorioz, pasearen kostua handitu. Hori guztia oinarri hartuta, hauei dagozkien tarifak handitzen dira: arraina harrapatu eta askatzeko modalitatea, karramarroak modu kontrolatuan harrapatu eta eramatekoa eta tarifa murriztua.

Azkenik, 5 urterako lizentzia kentzen da arrantza kontinentalerako lizentziaren tasan.

Nafarroako Toki Ogasunei buruzko Foru Legean eguneratu egiten dira, 2024ko urtarrilaren 1etik aurrera aplikatzeko, hirilurren balio-gehikuntzaren gaineko zergaren oinarria zehazteko aplikatu beharreko gehieneko koefizienteak, 175.2 artikuluan biltzen direnak. Toki Ogasunei buruzko Foru Legean xedatutakoari jarraikiz, koefiziente horiek urtero eguneratu behar dira.

Azkenik, Nafarroako Lurralde Aberastasunaren Erregistroari eta Katastroei buruzko azaroaren 21eko 12/2006 Foru Legeko laugarren xedapen gehigarria aldatzen da, Nafarroako Lurralde Aberastasunaren Erregistroaren informazioa Internet bidez eskuratzea arautzeko.

Azken xedapen gehigarriak berariazko zerga-pizgarri batzuk jasotzen ditu, 2024an eta 2025ean aplikatuko direnak, "Santiago Ramón y Cajal ikerketa urtea 2022" aparteko interes publikoko gertakariarekin loturiko programa eta jardueren finantzaketan parte hartzeagatik. Hala, uztailaren 31ko PCM/742/2022 Aginduaren bidez sortu zen departamentuarteko kide anitzeko organoak (hots, "Santiago Ramón y Cajal ikerketa urtea 2022" AIPGaren kudeatzaileak) onetsitako programa eta jardueretan ekarpenak egiten dituztenek kultura mezenasgorako pizgarriak aplikatzen ahalko dituzte; Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginean ezarrita daude horiek. Gainera, aipatutako programa eta jarduerak lehentasunezkotzat joko dira irabazi-asmorik gabeko entitateek egiten badituzte eta, horrez gain, entitate horiek aipatu testu bategineko I. tituluko zerga-araubidea edo haren baliokidea den beste Zerga Administrazio baten zerga-araubidea aplikatzen dutenean eta, hala, ehuneko bost puntu goratuko dira aplikatu beharreko kenkarien ehunekoak eta mugak.

Azken xedapenetako lehenengoak eguneratzen ditu, 2024ko urtarrilaren 1etik aurrerako ondorioekin, Nafarroako Hondakin Uren Saneamenduari buruzko Foru Legean ezarritako saneamendu kanonaren tarifak. Nafarroako Ibaien Saneamendurako Plan Gidaria, Nafarroako Hiri Erabilerarako Uraren Ziklo osoaren Plan Gidariaren barnean dagoena, ziklo berri batean sartu da, egoera ekonomiko-finantzarioari dagokionez. Tarifak igotzeko arrazoia da plan gidariak oreka bilatu nahi duela progresiboki epe luzean.

Hala kostu operatiboak, energia elektrikoaren kostua bereziki, nola sustatu beharreko obren kostua ehuneko hogeita hamar baino gehiago handitu dira azken ekitaldietan. Hori guztia 2023-2029 aldirako Inbertsio Planaren esparruan sustatu beharreko inbertsioen bolumena handitzen ari den testuinguru batean.

Gaur egun, etxekoa ez den tarifa (1.b) etxekoa (1.a) baino %13,85 handiagoa da. "Kutsatzen duenak ordaindu egiten du" printzipioa aplikatu dadin araudian indarrean dagoen karga kutsatzaileari dagokion indize zuzentzailearen bidez soilik, tarifa-igoera desberdinak proposatzen dira (%9,2 1.a tarifarentzat eta %4,7, aldiz, 1.b tarifarentzat), etorkizunean bi tarifek bat egin dezaten lortzeko.

Bestalde, azken xedapenetako bigarrenak eta hirugarrenak langileen arloko neurriak jasotzen dituzte. Ekainaren 21eko 13/2012 Foru Legearen bidez, Nafarroako Parlamentuak presako zenbait neurri onetsi zituen Nafarroako administrazio publikoen zerbitzuko langileen arloan. Aipatu neurriak, funtsean, ekonomiaren eta aurrekontuen orduko egoeran oinarriturik hartu ziren, eta horietako gehienen indarraldiari dagokionez, erabaki zen 2012. urtera mugatu zela, eta gerora erabakiko zela hurrengo urteetan luzatuko zen ala ez.

Neurri horietako batzuk urtez urte luzatu dira, eta, une honetan, beharrezkotzat jotzen da 2024ra arte luzatzea, eta 2024rako Nafarroako Aurrekontu Orokorrei buruzko Foru Legea onetsi arte, 2023rako Nafarroako Aurrekontu Orokorrei buruzko abenduaren 28ko 35/2022 Foru Legearen lehenengo xedapen gehigarrian eta zazpigarren xedapen gehigarrian jasotakoak; haien indarraldia 2023ko abenduaren 31n amaituko da.

Bukatzeko, azken xedapenetako laugarrenak Nafarroako Gobernua gaitzen du beharrezkoak diren xedapen guztiak eman ditzan foru lege hau garatu eta aplikatzeko, eta azken xedapenetako bosgarrenak arautzen du foru legeak indarra hartuko duela Nafarroako Aldizkari Ofizialean argitaratu eta biharamunean, bertan aurreikusitako ondorioekin.

Proiektu hau egitean aintzat hartu dira arauketa onaren printzipioak, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 129. artikuluan ezarriak. Horrela, foru lege honek, lehen adierazi diren arrazoiengatik, beharrizanaren eta eraginkortasunaren printzipioak betetzen ditu: justifikatuta dago interes orokorraren arrazoiengatik, hainbat zerga-arau aldatzen duenez; lortu nahi diren helburuen identifikazio argian (aurreko paragrafoetan definitutakoak) oinarritzen da; eta, azkenik, helburuok lortzeko tresna egokia da, zerga arloan lege erreserbak agintzen baitu, Tributuei buruzko abenduaren 14ko 13/2000 Foru Lege Orokorraren 11. artikuluan ezarrita.

Foru lege honek beste foru lege batzuen zenbait artikulu aldatzen ditu, ahalik eta zehaztasun handienarekin; horrela, ba, proportzionaltasun-printzipioa ere errespetatzen da. Bai eta, horrexegatik, segurtasun juridikoaren printzipioa ere. Izan ere, zehatz-mehatz zaindu dira ordenamendu juridikoaren gainerakoarekiko koherentzia, egonkortasuna, eta pertsona nahiz enpresentzako aurreikusgarritasuna eta zalantzagarritasunik eza, oreka egokia lortze aldera legegilearen borondatearen eta gainerako errealitate juridikoaren artean, barne harturik jurisprudentziarik berriena ere. Foru lege honekin lortu nahi diren zenbait helburu betetzeko, oso kontuan hartu da sinpletasun eta efizientzia printzipioa ere, zeinak xede baitu karga administratibo ez-beharrezkoak edo bigarren mailakoak ekiditea eta baliabide publikoen kudeaketa arrazionalizatzea.

Gardentasunaren eta irisgarritasunaren printzipioak errespetatuz argitaratzen da foru legea Nafarroako Parlamentuaren Aldizkarian, Nafarroako Aldizkari Ofizialean eta www.nafarroa.eus web-orrian.

Bukatzeko, kontuan izan da gizonezkoen eta emakumezkoen berdintasunaren printzipioa, eta aldaketak egin dira, arauetan hizkera inklusiboa eta ez-sexista erabiltzearren.

Lehen artikulua.–Pertsona Fisikoen Errentaren gaineko Zergari buruzko Foru Legearen testu bategina.

Pertsona Fisikoen Errentaren gaineko Zergari buruzko Foru Legearen testu bateginaren manu hauek (testu bategina ekainaren 2ko 4/2008 Legegintzako Foru Dekretuaren bidez onetsi zen) honela idatzita geldituko dira:

Bat.–7.h) artikulua, lehen paragrafoa.

"h) Beka publikoak, Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginaren (maiatzaren 24ko 2/2023 Legegintzako Foru Dekretuaren bidez onetsi zen) I. tituluan ezarritako zerga-araubide berezia aplikatu behar zaien entitateek emandako bekak, eta Aurrezki-kutxei eta Banku-fundazioei buruzko abenduaren 27ko 26/2013 Legearen II. tituluan araututako banku-fundazioek beren gizarte-ekintzako jarduera garatzeko emandako bekak, jasotzen direnak ikasketa arautuak egiteko, Espainian zein atzerrian, hezkuntza-sistemaren maila eta gradu guztietan, doktoretzara barne, erregelamenduz ezartzen den moduan".

Bi.–7.z) artikulua, lehen paragrafoa, 2023ko urtarrilaren 1etik aurrerako ondorioekin.

"z) Landa Garapenerako Europako Nekazaritza Funtsekin kofinantzatutako Nafarroako landa garapenerako programako laguntzen %100, eta Europar Batasunaren nekazaritza politikak klimaren eta ingurumenaren aldeko araubideetarako ematen dituen laguntzen %100 (eko-araubideak)".

Hiru.–17.2.a) artikulua, bigarren paragrafoa, bigarren paragrafoaren egungo edukia hirugarren paragrafo berri batera pasatzen baita.

"Lehenengo paragrafoan ezarritakoa gorabehera, murrizketa 14.2.a) 1. eta 2. artikuluan ezarritako prestazioei aplikatuko zaie, baldin eta epai judizial bidez aitortuta badaude eta bi urte baino gehiagokoak badira, prestaziorako eskubidea aitortzen den egunetik epaiaren egunera arte zenbatuta".

Lau.–25.2 artikulua, bigarren paragrafoa, 2024ko urtarrilaren 1etik aurrerako ondorioekin.

"%70, etxebizitzatarako erabiltzen diren etxebizitzen errentamendutik ateratzen denean, errentamendu hori arau hauetan jasotako sozietate publiko instrumentalaren bitartez egina bada: Nafarroan Etxebizitza izateko Eskubideari buruzko maiatzaren 10eko 10/2010 Foru Legearen 13. artikulua, eta Etxebizitzaren arloko jarduketa babesgarriak arautzen dituen irailaren 18ko 61/2013 Foru Dekretuaren 77. artikulua".

Bost.–39.4 artikuluari f) letra gehitzea, 2023ko urtarrilaren 1etik aurrerako ondorioekin.

"f) Ondasunen banaketaren ezkontzaren ondasun-eraentza edo bikote egonkorrari aplikatu beharreko ekonomia- eta ondare-eraentza azkentzean, legezko inposizioagatik edo ebazpen judizialagatik diruzko konpentsazioak edo ondasunen esleipenaren bidezkoak egiten direnean ezkontideen edo bikote egonkorreko kideen arteko konpentsazio-pentsioa ez den beste arrazoi batengatik.

f) letra honetan aipatutako konpentsazioek ez dute eskubiderik emanen ordaintzailearen zerga-oinarria murrizteko, eta ez dira errenta izanen hartzailearentzat.

Letra honetan aipatutako kasuak ezin izanen du, inola ere, esleitutako ondasunen edo eskubideen balioak eguneratzea eragin".

Sei.–55.1 artikulua, 1.d) ordinalaren bigarren paragrafoa eta 2.b) ordinalaren bigarren paragrafoa aldatzea, eta 7.a).b’).1 ordinalari paragrafo bat gehitzea.

"Zuzentarau horren arabera egindako ekarpenen edo kontribuzioen kasuan, horiek, osorik edo zati batean, pentsio-planetarako aurreikusitakoez bestelako kasuetan izanez gero, subjektu pasiboak lan-etekin gisa sartu beharko ditu jasotako zenbatekoak, 83.4 artikuluan ezarritakoaren arabera".

"Finkatutako eskubide horiek, osorik edo zati batean, beste kasu batzuetan izanez gero, subjektu pasiboak lan-etekin gisa sartu beharko ditu jasotako zenbatekoak, 83.4 artikuluan ezarritako baldintzetan".

"Lehenengo paragrafoan adierazitako muga gehigarria 4.250 eurokoa izanen da, baldin eta enpresaren kontribuzioak edo langilearen ekarpenak egiten badira enpresako langile guztiak hartzen ez dituzten pentsioengatiko konpromisoak bideratzen dituzten aseguru kolektiboetara".

Zazpi.–55.3 artikulua.

"3. Artikulu honetan aipatzen diren murriztapenak hamargarren, hamahirugarren, hamalaugarren eta hamabosgarren xedapen gehigarrietan ezarritakoekin batera eginen dira".

Zortzi.–59. artikulua, 1. paragrafoa, eta 3. apartatuari paragrafo bat gehitzea, 2024ko urtarrilaren 1etik aurrerako ondorioekin.

"1. Likidazio oinarri orokorrari ondoko eskalan adierazten diren karga-tasak aplikatuko zaizkio:"

"Apartatu honetan ezarritakoa aplikatzeko, banku-agiri bidez justifikatzen diren ordaindutako kopuruak bakarrik hartuko dira kontuan".

Bederatzi.–62.2. artikulua; 2024ko urtarrilaren 1etik aurrerako ondorioekin.

"2. Etxebizitzaren alokairuagatiko kenkaria.

Ehuneko 15, gehienez ere 1.500 euro urteko, subjektu pasiboak zergaldian bere ohiko helbidea den etxebizitzaren alokairuagatik ordaindu dituen diru kopuruena, betiere ondoko baldintzak tarteko baldin badira:

–Subjektu pasiboak zergaldian ez izatea 30.000 euro baino gehiagoko errentarik, salbuetsiak bazter utzita.

–Zergaldian alokairu kontzeptuan ordaindutako diru-kopuruak, salbuetsiak kenduta, subjektu pasiboaren errenten 100eko 10 gainditzea.

Kenkari hori 100eko 20koa izanen da, gehienekoa urteko 1.600 eurokoa izanik, zergaldian zehar subjektu pasiboaren ohiko bizileku den etxebizitzaren alokairuagatik ordaindutako kopuruen gain, baldin eta subjektu pasibo horrek, aurreko baldintzak beterik, 30 urte baino gutxiagoko adina badauka edo 71.1.c) artikuluak aipaturiko familia-unitate bateko kide bada, salbu eta, azken kasu horretan, aita eta ama elkarbizitzan badaude edo seme-alaba amankomunen gaineko zaintza partekatua badute".

Hamar.–62.4 artikulua.

"4. Dohaintzengatiko kenkariak.

Maiatzaren 24ko 2/2023 Legegintzako foru dekretuaren bidez onetsi zen Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginean ezarritakoak.

Trataera bera izanen dute beren seme-alabek ikasten duten ikastetxe itunduetako irakaskuntza-kooperatibei subjektu pasiboek eginiko dohaintzek. Dohaintza horiek aipatutako testu bateginaren 15., 16. eta 48. artikuluetan aurreikusitako baldintzak bete beharko dituzte".

Hamaika.–62.8 artikulua, bigarren paragrafoa, 2023ko urtarrilaren 1etik aurrerako ondorioekin.

"Kenkaria aplikatzeko, subjektu pasiboek ordaindutako kuotek alderdi politikoek, federazioek, koalizioek edo hautesle-elkarteek administrazioan aurkezten dituzten aitorpenetan agertu beharko dute, zerga arloko araudian ezarritako ereduetan".

Hamabi.–62.9.a), b) eta c) artikulua, 2024ko urtarrilaren 1etik aurrerako ondorioekin.

"a) Gutxieneko pertsonalarengatik:

Oro har, gutxieneko pertsonalarengatiko kenkaria subjektu pasibo bakoitzeko 1.084 eurokoa izanen da urtean. Zenbateko horri kopuru hauek gehituko zaizkio:

a’) 264 euro, hirurogeita bost urte edo gehiagoko adina duten subjektu pasiboentzat. Zenbateko hori 585 eurokoa izanen da subjektu pasiboak hirurogeita hamabost urte edo gehiagoko adina baldin badu.

b’) 766 euro, desgaitasuna duten subjektu pasiboentzat, frogatzen badute %33ko desgaitasuna edo handiagoa eta %65ekoa baino txikiagoa dutela. Zenbateko hori 2.757 eurokoa izanen da subjektu pasiboak frogatzen duenean %65eko edo gehiagoko desgaitasuna duela.

c’) 150 euro, zergaldian 30.000 euro baino gutxiagoko errentak, salbuetsiak barne, dituzten subjektu pasiboentzat.

b) Gutxieneko familiarrengatik:

Gutxieneko familiarrengatiko kenkariak hauek izanen dira:

a’) Subjektu pasiboarekin bizirik, urtean ondorio askotarako errenta-adierazle publikoa (IPREM) baino errenta altuagorik, errenta salbuetsiak kenduta, jasotzen ez duen aurreko ahaide bakoitzeko, zenbateko hauetako bat:

Lehena.–264 euro, aurreko ahaideak hirurogeita bost urte edo gehiagoko adina badu edo, gazteagoa izan arren, apartatu honetako c’) letran aurreikusitako kenkariak aplikatzeko eskubidea badu.

Bigarrena.–585 euro, baldin eta aurreko ahaideak hirurogeita hamabost urte edo gehiagoko adina badu.

Baldin aurreko ahaide horiek familia-unitate baten parte badira, letra honetan aurreikusitako errenta-muga izanen da, familia-unitate osorako, ondorio askotarako errenta-adierazle publikoa (IPREM) halako bi.

Ulertuko da subjektu pasiboarekin bizi direla zentro espezializatuetan bizi diren aurreko ahaideak, ekonomikoki haren menpekoak badira.

b’) Lehena. Hogeita hamar urte baino gutxiagoko ondorengo ahaide ezkongabe bakoitzeko, baldin eta subjektu pasiboarekin bizi bada eta ondorio askotarako errenta-adierazle publikoa (IPREM) baino gehiagoko errentarik ez badu urtean jasotzen, salbuetsiak bazter utzirik:

–483 euro urtean, lehenbizikoagatik.

–512 euro urtean, bigarrenagatik.

–732 euro urtean, hirugarrenagatik.

–981 euro urtean, laugarrenagatik.

–1.111 euro urtean, bosgarrenagatik.

–1.286 euro seigarrenagatik eta ondokoengatik.

Zenbateko horiek orobat aplikatuko dira ondorengo ahaide ezkongabe bakoitzeko, haren adina zein ere den, baldin eta eskubidea ematen badu ondoko c’) letran aurreikusitako kenkariak baliatzeko.

Horretaz gain, letra honetan ezarritako zenbatekoak aplikatzeko eskubidea ematen duten hiru urte baino gutxiagoko ondorengo ahaide edo haur adoptatu bakoitzeko, 644 euro urtean. Zenbateko hori 1.170 eurokoa izanen da urtean, baldin eta, aplikatzekoak diren arauen eta hitzarmenen arabera, adopzioak nazioartekoak badira. Adopzio kasuetan, kasuko kenkaria aplikatuko da Erregistro Zibileko izen-ematearen zergaldian eta hurrengo bietan.

Bigarrena. Zergaldian 30.000 euro baino gehiagokoak ez diren errentak, salbuetsiak barne, dituzten subjektu pasiboentzat, 1. ordinaleko kenkariaren zenbatekoa, subjektu pasibo bakoitzari dagokiona, honako eskala hau aplikatzetik suertatzen den zenbatekoan handituko da:

a) 20.000 euro arteko errentak dituzten subjektu pasiboak: %40.

b) 20.000,01 eurotik 30.000 euro arteko errentak dituzten subjektu pasiboak: %40, ken subjektu pasiboak 20.000 eurotik gora duen errenta-gaindikinak azken kopuru horrekiko egiten duen proportzioa 50ekin biderkatzearen emaitza.

Emaitza gisa lortzen den portzentajea bi hamarrenetara biribilduta adieraziko da.

3) Subjektu pasiboarekiko elkarbizitzaren parekotzat joko da haren ondorengo ahaideek harekiko duten menpekotasun ekonomikoa, salbu eta aplikatzekoa bada 59.3 artikuluan xedatutakoa.

c’) Subjektu pasiboarekin bizi den ondorengo ahaide ezkongabe edo aurreko ahaide bakoitzeko, haien adina zein ere den, 674 euro urtean, aurreko letren arabera bidezkoak diren zenbatekoez gain, baldin eta haiek urtean dituzten errentak, salbuetsiak kanpo, ez badira, kasuko zergaldian, ondorio askotarako errenta-adierazle publikoa (IPREM) baino handiagoak, frogatzen badute %33 edo gehiagoko eta %65 baino gutxiagoko desgaitasun-gradua. Zenbateko hori 2.360 eurokoa izanen da urtean, frogatutako desgaitasun-gradua %65 edo gehiagokoa bada.

Aurreko ahaide horiek familia-unitate baten parte badira, aurreko paragrafoan ezarritako errenta-muga izanen da ondorio askotarako errenta-adierazle publikoaren (IPREM) halako bi, familia unitate osorako.

Aurreko b’) eta c’) letretan xedatutakoaren ondorioetarako, ondorengo ahaideekin parekatuko dira aplikatzekoa den legedi zibilean ezarritako terminoetan egindako tutoretza, harrera edo ordezkaritzako kuradoretza kasuengatik subjektu pasiboarekin lotura duten pertsonak, aurreko edo ondorengo ahaideak ez direnak. Halaber, ondorengo ahaideekin parekatuko dira urtarrilaren 19ko 7/2009 Foru Dekretuaren 50.1 artikuluan ezarritako baldintzak beteta harreran izan zituztenekin adin-nagusitasunera edo emantzipaziora arte elkarbizitzen jarraitzea libreki adosten duten pertsonak ere. Aipatu foru dekretuaren bidez, Haurrentzako eta nerabeentzako sustapenari, laguntzari eta babesari buruzko abenduaren 5eko 15/2005 Foru Legearen garapen partzialerako Erregelamendua onetsi zen. Egoera hori eskubide sozialen arloko eskumena duen departamentuak egiaztatu beharko du. Ondorengo ahaideekin parekatuko dira, halaber, subjektu pasiboak ebazpen judizial bidez esleiturik zaintza eta jagoletzaren araubidean dituen pertsonak, aurreko egoerez bestelakoetan daudenak.

Baldin bi subjektu pasibok edo gehiagok badute gutxieneko familiarrengatiko kenkariak aplikatzeko eskubidea, horien zenbatekoa haien artean hainbanatuko da zati berdinetan, salbu eta b’) 2) letran ezarritako igoera. Ondorengo ahaideei dagokienez berdin jokatuko da zaintza partekatuaren kasuetan.

Nolanahi ere, subjektu pasiboek ahaidetasun gradu desberdina baldin badute aurreko ahaidearekin edo ondorengoarekin, gutxieneko familiarrarengatiko kenkaria gradurik hurbilenekoei aplikatuko zaie, non eta horiek ez duten ondorio askotarako errenta-adierazle publikoa (IPREM) baino gehiagoko errentarik (salbuetsiak alde batera utzita), kasu horretan hurrengo gradukoei aplikatuko baitzaie.

"c) Ondorengo eta aurreko ahaideak, beste ahaide batzuk eta desgaitasuna duten pertsonak zaintzeagatik:

Kengarria izanen da subjektu pasiboak zergaldian ordaindu dituen kopuruen ehuneko 75, kopuru horiek dagozkienean honako pertsonak etxean zaintzeko lanetan diharduten pertsonekin formalizatutako kontratuen ondorioz enplegatzailearen kargura suertatzen diren Gizarte Segurantzarako kotizazioei:

a’) Hamasei urte baino gutxiagoko ondorengo ahaideak. Ondorio hauetarako, ondorengo ahaideekin parekatuko dira aplikatzekoa den legedi zibilean ezarritako moduan egindako tutoretza edo harreragatik subjektu pasiboarekin lotura duten hamasei urte baino gutxiagokoak. Ondorengo ahaideekin parekatuko dira, halaber, ebazpen judizial bidez subjektu pasiboaren zaintza eta jagoletzaren pean edo ordezkaritzako kuradoretzaren pean dauden pertsonak, lehengo egoeretan ez daudenak.

b’) Subjektu pasiboari eskubidea ematen diotenak artikulu honetako b) letrako a’) edo c’) letretan aurreikusitako gutxieneko familiarrarengatiko kenkaria aplikatzeko, edo hamahirugarren xedapen iragankorrean ezarritako baldintzetan pertsona lagunduaren izaera duten ahaideengatiko kenkaria aplikatzeko.

c’) Aurreko ahaideak, ezkon-ahaidetasunezkoak direnak; anai-arrebak; osaba-izebak. Betiere, artikulu honen b) letrako a’) edo c’) letretan aurreko ahaideentzat ezarritako baldintzak betetzen badituzte.

Kenkari hori ere aplikatzen ahalko da subjektu pasiboa bera zaintzeko formalizatutako kontratuen kasuan, hirurogeita bost urte edo gehiago baditu edo ehuneko 65eko edo gehiagoko desgaitasuna frogatzen badu".

Hamahiru.–62. artikulua, 12.e) apartatuaren azken paragrafoa eta 14.d) apartatuaren azken paragrafoa, foru lege honek indarra hartzean txostena egiteko duten inbertsioetarako ondorioekin.

"Kenkariaren oinarria txosten horretan egiaztatutako inbertsioen zenbatekoaren araberakoa izanen da, eta kenkaria txostena egiten den egunetik aurrera aurkeztu beharreko lehenengo autolikidazioan aplikatuko da".

"Kenkariaren oinarria txosten horretan egiaztatutako inbertsioen zenbatekoaren araberakoa izanen da, eta kenkaria txostena egiten den egunetik aurrera aurkeztu beharreko lehenengo autolikidazioan aplikatuko da".

Hamalau.–62.13 artikulua, a) letraren lehen paragrafoa aldatzea eta b) letraren azken paragrafoa kentzea.

"a) Ibilgailu berrietan egindako inbertsioek eskubidea emanen dute 100eko 30eko kenkaria egiteko, baldin eta ibilgailu elektrikoak badira, eta 100eko 5eko kenkaria, berriz, ibilgailu hibrido entxufagarriak badira, baldin eta Europako Parlamentuaren eta Kontseiluaren 2018ko maiatzaren 30eko 2018/858 (EB) Erregelamenduan eta Europako Parlamentuaren eta Kontseiluaren 2013ko urtarrilaren 15eko 168/2013 (EB) Erregelamenduan zehaztutako kategoria hauetakoren batekoak badira:"

Hamabost.–68. quinquies artikulua, letrak: A.1, A.3 lehen paragrafoa, B.3 eta C.5, 2024ari oso-osorik dagokion lehen hilekotik aurrerako ondorioekin.

"1. Dagokion kuota diferentziala finkatu ondoren, ohiko bizileku iraunkorra duen etxebizitzaren errentamendu-kontratu baten titularra den subjektu pasiboak, 23 urte eta 35 urte (horiek barne) bitarteko adina duenean, eskubidea izanen du errentamenduagatik zergaldian ordaindu duen errentaren 100eko 50eko kenkaria aplikatzeko, hilean 280 euroko gehieneko mugarekin".

"3. Subjektu pasiboak ez du kenkari horretarako eskubiderik izanen baldin eta haren errentak, salbuetsiak barne, 22.000 euro baino gehiagokoak badira, eskatzailea familia-unitate bateko kidea ez bada banaka zenbatuta, edo, bestela, 33.000 euro baino gehiagokoak badira, familia-unitateko kide guztien errentak batera hartuta.

"3. 1.a) apartatuan ezarritako kenkariak ezin izanen ditu honako muga hauek gainditu:

a) Hilean 340 euro, subjektu pasiboaren familia-dirusarrera haztatuak Errenta Egokiagatiko Erosahalmen Nahikotasuna (ERREGEROSNA) adierazlearen zenbatekoa baino gutxiagokoak badira.

b) Hilean 280 euro, subjektu pasiboaren familia-dirusarrera haztatuak Errenta Egokiagatiko Erosahalmen Nahikotasuna (ERREGEROSNA) adierazlearen zenbateko berekoak edo handiagoak badira eta adierazle horren zenbatekoaren 1,4 halako baino txikiagoak badira.

c) Hilean 220 euro, subjektu pasiboaren familia-dirusarrera haztatuak Errenta Egokiagatiko Erosahalmen Nahikotasuna (ERREGEROSNA) adierazlearen 1,4 halako edo gehiagokoak badira eta adierazle horren 1,7 halako baino txikiagoak badira".

"5. Aipatutako etxebizitzaren alokairu-prezioa ezin izanen da hilean 700 euro baino gehiagokoa izan".

Hamasei.–75. artikulua, 4. araua; 2024ko urtarrilaren 1etik aurrerako ondorioekin.

"4. 71.1.c) artikuluan aipatzen diren familia-unitateen kasuan, aitari edo amari dagokion gutxieneko pertsonalarengatiko kenkaria, 62.9.a) artikuluan ezarria, 668 euro handituko da. Handitze hori ez da gertatuko aita eta ama elkarrekin bizi direnean, ez eta zaintza partekatua dagoenean ere".

Hamazazpi.–78.3 artikulua, bigarren paragrafoa.

"Laguntza publikoen ondoriozko ondare-gehikuntzak kobrantza gertatzen den zergaldiari egotziko zaizkio. Hori hala izanik ere, nekazari gazteen lehen instalaziorako Espainiako Landa Garapenerako Esparru Nazionalean ezarritako laguntza publikoak, erabiltzen badira nekazaritzako sozietate-enpresen kapitalean partaidetza bat eskuratzeko, laurdenetan egozten ahalko dira, lortzen diren zergaldian eta hurrengo hiruretan".

Hemezortzi.–80.2. artikulua, azken paragrafoa.

"Ez zaie atxikipenik eginen beka publikoen ondoriozko errentei eta Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginaren (maiatzaren 24ko 2/2023 Legegintzako Foru Dekretuaren bidez onetsi zen) I. tituluan ezarritako zerga-araubide berezia aplikatu behar zaien entitateek emandakoei, baldin eta, urtebetetik beherakoak badira eta, foru lege honen 7.h) artikuluaren arabera salbuetsita egon gabe, lan-etekintzat jotzen badira eta ordaindutako zenbatekoa urteko lanbide arteko gutxieneko soldata baino txikiagoa bada".

Hemeretzi.–85. artikulua, 1. apartatuko lehen paragrafoa eta 2. apartatua.

"1. Hurrenez hurren 66. artikuluaren b) eta d) letretan aipatu diren atxikipenen, konturako sarreren, ordainketa zatikatuen eta kuoten batura, bai eta, kasua bada, IV. tituluaren III. kapituluan jasotzen diren kuota diferentzialerako kenkariena ere, handiagoa bada epearen barrenean aurkeztutako autolikidazioaren kuota baino, zerga gaietan eskuduna den departamentuak, kasua bada, behin-behineko likidazioa eginen du aitorpena aurkezteko epea bukatu eta ondoko sei hilabeteetan."

"2. Autolikidazioaren edo, hala badagokio, behin-behineko likidazioaren ondoriozko kuota txikiagoa bada benetan atxikitako diru-kopuruen, kontura egindako ordainketen eta, hurrenez hurren, 66. artikuluaren b) eta d) letretan aipatu diren kuoten eta, halakorik bada, IV. tituluaren III, kapituluan aurreikusten diren kuota diferentzialeko kenkarien batura baino, zerga gaietan eskuduna den departamentuak ofizioz itzuliko du kuota horren gaineko gaindikina, deusetan galarazi gabe bidezkoak diren behin-behineko edo behin betiko likidazioak gero egiteko aukera".

Hogei.–86.5. artikulua, 2023ko urtarrilaren 1etik aurrerako efektuekin.

"5. Zerga honen subjektu pasiboek, baldin eta azaroaren 18ko 41/2003 Legean (desgaitasuna duten pertsonen ondarea babesteko eta, xede berberarekin, Kode Zibila, Prozedura Zibileko Legea eta zerga arloko araudia aldatzeko) edo Nafarroako Zuzenbide Zibilaren Konpilazioa onesten duen martxoaren 1eko 1/1973 Legearen 44. eta 45. legeetan araututako ondare babestu baten titular badira, aitorpen bat aurkeztu beharko dute, non adieraziko baita ondare horren osaera, jasotako ekarpenak eta zergaldian egindako xedapenak, erregelamenduz ezartzen den moduan".

Hogeita bat.–Laugarren xedapen gehigarria, 5. puntua, 2023ko urtarrilaren 1etik aurrerako ondorioekin.

"5. Pertsona batek parte hartzen badu ondare babestuei ekarpenak egiteko egintzen formalizazioan, azaroaren 18ko 41/2003 Legearen 3. eta 4. artikuluetan eta Nafarroako Zuzenbide Zibilaren Konpilazioaren 44. legean xedatutakoaren arabera, ekarpen horiei buruzko aitorpena aurkeztu beharko du, erregelamendu bidez ezartzen diren baldintzetan. Zerga arloan eskumena duen departamentuaren titularrak ezarritako tokian, moduan eta epean eginen da aitorpena".

Hogeita bi.–Hamargarren xedapen gehigarria, c) letra, 2023ko urtarrilaren 1etik aurrerako ondorioekin.

"c) Pentsio-plan eta -funtsen gaineko araudian aurreikusitakoez bestelako kasuetan, banakako pentsioen produktu paneuroparrei egindako ekarpenen ondoriozko eskubide ekonomikoak xedatzeak, osorik edo zati batean, 55.1.2.b) artikuluaren bigarren paragrafoan ezarritako ondorioak izanen ditu".

Hogeita hiru.–Hamalaugarren xedapen gehigarria, 2023ko urtarrilaren 1etik aurrerako ondorioekin.

"Hamalaugarren xedapen gehigarria.–Ezgaitasunak dituzten pertsonen ondare babestuari egindako ekarpenen araubide fiskala.

Desgaitasuna duten pertsonen ondare babestura egindako ekarpenei, zeinak araututa baitaude azaroaren 18ko 41/2003 Legean (desgaitasuna duten pertsonen ondarea babesteko eta, xede berberarekin, Kode Zibila, Prozedura Zibileko Legea eta zerga arloko araudia aldatzeko) edo Nafarroako Zuzenbide Zibilaren Konpilazioa onesten duen martxoaren 1eko 1/1973 Legearen 44. eta 45. legeetan, honako zerga-araubide hau aplikatuko zaie:

1. Desgaitasuna duen subjektu pasiboan.

a) Ekarleak pertsona fisikoen errentaren gaineko zergaren subjektu pasiboak direnean, urtean ekarle bakoitzeko 10.000 euro bitarteko kopurua eta, osotara, 24.250 bitarteko kopurua lan etekintzat hartuko da.

Horrez gainera, aurreko paragrafoan ezarritako mugak gorabehera, ekarleak sozietateen gaineko zergaren subjektu pasiboak direnean, urtean 10.000 euro arteko kopurua lan-etekintzat hartuko da, betiere sozietateen gaineko zergan gastu hori kenkari gisa agertu bada.

Etekin horiek desgaitasuna duen subjektu pasiboaren zerga-oinarrian sartuko dira, ondare babestuaren titularrarenean, hain zuzen. Etekinetako zenbatekoa eta, honelakorik badago, hamahirugarren xedapen gehigarriaren 1.b) apartatuan aipatzen diren errenta gisako prestazioak batu ondoren, ondorio askotarako errenta-adierazle publikoaren (IPREM) halako hiru gainditzen duen zenbatekoa hartuko da aintzat. Ekarpenak sozietateen gaineko zergaren subjektu pasiboek egiten dituztenean, eta haien enplegatuen ahaideen, ezkontideen edo enplegatuek tutoretza edo harrera araubidean beraien kargu dituzten pertsonen ondare babestuaren alde badira, lan-etekinen izaera izanen dute, bakar-bakarrik ondare babestuaren titularrarentzat.

Letra honetan azaldu diren etekinetan ez da atxikipenik edo konturako dirusarrerarik egin beharko.

b) Diruzkoak ez diren ekarpenen kasuan, ondare babestuaren titularra den eta desgaitasuna duen subjektu pasiboa ekarlearen tokian subrogatuko da kasuko ondasun eta eskubideen erosketaren balioa eta eguna finkatzeari dagokienez, baina ondorengo eskualdaketetan ezin izanen zaio aplikatu zazpigarren xedapen iragankorrean ezarritakoa.

Diruzkoa ez den ekarpenetik oinordetza eta dohaintzei buruzko zergaren menpe dagoen zatiari 42. artikuluan ezarritakoa aplikatuko zaio.

c) Eskuratzailearentzat lan etekinen izaera duen ekarpenen zatia ez da oinordekotzen eta dohaintzen gaineko zergaren menpe egonen.

2. Ekarleari.

a) Gradu guztietako zuzeneko ahaideek edo hirugarren gradura bitarteko alboko ahaideek desgaitasuna duen subjektu pasibo baten ondare babestuari egindako ekarpenek eskubidea emanen dute ekarleak zerga-oinarrian kenkaria egiteko, urtean 10.000 euro gehienez. Berdin jokatuko da ekarpena subjektu pasiboaren ezkontideak egiten badu edo hura beraien kargu duten beste pertsona batzuek, tutoretza araubidean, harrera araubidean (Kode Zibilaren 172. artikuluan eta hurrengoetan arautua) edo beste autonomia erkidego bateko antolamendu juridiko zibilean izaera bera duten beste instituzio batzuen araubidean. Ondare babestu bakoitzari diru-ekarle guztien artean egindako ekarpenei dagozkien kenkariak, urtean, ezin dira 24.250 eurotik gorakoak izan. Kopuru hori gaindituz gero, ekarpen bakoitzari dagokion kenkaria gutxitu beharko da, modu proportzionalean.

Aurreko paragrafoan aipatzen diren murriztapenak 55.1 artikuluan ezarritakoekin batera aplikatuko dira.

b) Aurreko letran aurreikusitako mugatik goitiko ekarpenek kenkaria izateko eskubidea emanen dute hurrengo bost zergaldietan, harik eta, haietako bakoitzean, kenkariaren gehieneko mugara ailegatu arte.

Zergaldi berean baldin badaude ekitaldi horretan egindako ekarpenengatiko kuota-kenkariak eta aurreko ekitaldietatik egiteko dauden beste kenkari batzuk, lehenbizi aurreko ekitaldietako ekarpenen ondoriozko kenkariak eginen dira, kenkariaren gehieneko muga iritsi arte.

c) Diruzkoak ez diren ekarpenak direnean, ekarpenaren zenbatekotzat hartuko da Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginaren (maiatzaren 24ko 2/2023 Legegintzako Foru Dekretuaren bidez onetsi zen) 16. eta 19. artikuluetan ezarritakoa.

d) Pertsona fisikoen errentaren gaineko zergako subjektu pasiboek egiten dituzten ekarpenak beren enpresa edo lanbide jarduerei atxikita dauden elementuak direnean, ez dute kenkaria egiteko eskubiderik sortuko.

Ondare babestuaren titularra den eta desgaitasuna duen subjektu pasiboak berak egindako ekarpenek ez dute kenkaria egiteko eskubidea emanen, inolaz ere.

3. Ondasun edo eskubideen erabilera.

Desgaitasunen bat duen pertsonaren ondare babestuari egindako ekarpeneko ondasun edo eskubideak ekarpena egin den zergaldi berean edo hurrengo lau zergaldietan erabiliz gero, beharkizun fiskal hauek sortuko dira:

a) Ekarlea pertsona fisikoen errentaren gaineko zergaren subjektu pasiboa baldin bada, zerga-oinarrian egindako murrizketei dagozkien kopuruak sartu beharko ditu ondasun-eskubideak erabiltzen hasten den zergaldiko zerga-oinarrian, hots, egindako erabiltzeei eta bidezko berandutza-korrituei dagozkienak.

b) Ekarlearen izaera edozein delarik ere, ekarpena jaso duen ondare babestuaren titularrak ekarpena jaso zuen zergaldian 1. apartatuan xedatutakoaren arabera sartu gabe utzi zuen kopurua sartu beharko du ondasun-eskubideak erabiltzen diren zergaldiko zerga-oinarrian, gehi bidezko diren berandutza korrituak.

Sozietateen gaineko zergaren subjektu pasibo baten ekarpena denean, bere langileen ahaideen, ezkontideen edo -xedapen gehigarri honen 1.a) apartatuan aipatzen den tutoretza edo harrera araubidean- beraien kargu duten beste pertsona baten ondare babestuan alde egindakoa, aurreko paragrafoan azaldutako beharkizuna kasuan kasuko langileak izanen du.

Letra honetan eta a) letran ezarrita dagoen integratzeko betebeharraren ondorioetarako, 55.1.2.b) artikuluaren bigarren paragrafoan xedatutakoa aplikatuko da.

4. 3. apartatuan ezarritako ondorioetarako, ondasun edo eskubideetan homogeneotasuna gertatzen bada, lehenbizi eman zirenak erabili direla ulertuko da.

Ondare babestuaren titularra edo ondasun-ekarlea hiltzen bada ez da apartatu honetan ezarritakoa aplikatuko.

5. Foru lege honen ondorioetarako, ulertuko da ezen, desgaitasuna duen zer subjektu pasiboren onurarako eratzen den ondare babestua, huraxe dela ondare hori osatzen duten ondasun eta eskubideen titularra, eta titular hori ez diren beste pertsona batzuek ondare horri egindako ekarpenak harentzako irabazizko eskualdaketak direla".

Hogeita lau.–Hogeita hamargarren xedapen gehigarria, 2023ko urtarrilaren 1etik aurrerako ondorioekin.

"Hogeita hamargarren xedapen gehigarria.–Kapital higiezinaren etekin garbi positiboaren murriztapena.

Foru lege honen 25.2 artikuluaren hirugarren paragrafoan xedatutako murriztapena, Babestutako etxebizitza ordainerrazen parke bat Nafarroako Foru Komunitatean sustatzeko uztailaren 1eko 20/2022 Foru Legearen laugarren artikuluak emandako idazketan, ez da aplikatuko harik eta 20/2022 Foru Legearen 90. artikuluan jasotzen den Nafarroako Etxebizitza Errentamenduko Kontratuen Erregistroa abiatzen den zergaldia hasi arte eta Nafarroan Etxebizitza Izateko Eskubideari buruzko maiatzaren 10eko 10/2010 Foru Legearen 3 quinquies artikuluan aipatzen den alokairu jasangarritasunaren indizea zehaztu ahal izan arte".

Hogeita bost.–Berrogeita batgarren xedapen gehigarria, 2023ko urtarrilaren 1etik aurrerako ondorioekin.

"Berrogeita batgarren xedapen gehigarria.–2023an likidazio-oinarri orokorrari aplikatu beharreko eskala.

2023ko zergaldian, likidazio-oinarri orokorrari honako eskala honetan adierazten diren tasak ezarriko zaizkio:

Hogeita sei.–Berrogeita hamabosgarren xedapen gehigarria, 1. eta 2.b) puntuak, 2023ko urtarrilaren 1etik aurrerako ondorioekin.

"1. Salbuetsirik egonen dira Nafarroako Foru Komunitateko Administrazioak birgaitze babestuko obretarako emandako dirulaguntza publikoak, Etxebizitzaren arloko jarduketa babesgarriak arautzen dituen irailaren 18ko 61/2013 Foru Dekretuan xedatuaren indarrez, bai eta beste administrazio publiko batzuetatik kontzeptu berengatik jasotzen diren dirulaguntzak ere, baldin eta dirulaguntza horiek esleitzen bazaizkie zergaldian 30.000 eurotik gorako errentarik (salbuetsiak kontuan hartu gabe) ez duten subjektu pasiboei.

Hala ere, dirulaguntza horiek salbuetsita egonen dira 2023ko urtarrilaren 1etik 2026ko abenduaren 31ra arte, aurreko paragrafoan ezarritako errenta-mugarik aplikatu gabe".

"b) Ekainaren 29ko 477/2021 Errege Dekretua, zeinaren bidez onesten baita zuzeneko laguntzak ematea autonomia erkidegoei eta Ceuta eta Melilla hiriei pizgarri-programak gauzatzeko, lotuta daudenak autokontsumoarekin eta energia-iturri berriztagarrien bidez biltegiratzearekin, baita bizitegi-sektorean energia berriztagarriak erabiltzen dituzten sistema termikoak ezartzearekin ere, Europako Suspertze, Eraldatze eta Erresilientzia Planaren esparruan".

Hogeita zazpi.–Hirurogeigarren xedapen gehigarria, 2023ko urtarrilaren 1etik aurrerako ondorioekin.

"Hirurogeigarren xedapen gehigarria.–Diru-sarrera eta ondare gutxi dituzten pertsona fisikoentzako zuzeneko laguntza-lerroa.

Zergatik salbuetsita egonen da ordainketa bakarreko 200 euroko laguntza, araututa dagoena abenduaren 27ko 20/2022 Errege Lege Dekretuaren 74. artikuluan (errege lege dekretu horrek hizpide ditu Ukrainako gerraren ondorio ekonomiko eta sozialei erantzuteko, La Palma uhartearen berreraikuntzari laguntzeko eta beste zaurgarritasun egoera batzuetarako neurriak)".

Hogeita zortzi.–Hirurogeita batgarren xedapen gehigarria, 2023ko urtarrilaren 1etik aurrerako ondorioekin.

"Hirurogeita batgarren xedapen gehigarria.–Zordunak konkurtso-prozeduretan lortutako errenten salbuespena.

Zerga honetatik salbuetsita egonen dira zorrak ordaintzeko kitatze eta emateen ondorioz zordunek lortutako errentak, baldin eta zorrak jarduera ekonomikoak gauzatzetik ez badatoz eta honako hauetan ezarri badira: judizialki onartutako hitzarmen batean, judizialki homologatutako berregituratze-plan batean, ordainketen judizioz kanpoko akordio batean edo ordaindu gabeko pasibotik libratzearen ondorioz, hori guztia maiatzaren 5eko 1/2020 Legegintzako Errege Dekretuak onetsitako Konkurtso Legearen testu bateginean ezarritakoaren arabera".

Hogeita bederatzi.–Hirurogeita laugarren xedapen gehigarria, 2024ko urtarrilaren 1etik aurrerako ondorioekin.

"Hirurogeita laugarren xedapen gehigarria.–Etxebizitza bat alokairu-araubidean eskuratzea errazteko kenkaria 2024an.

2024. urtean zehar, honako hauek aplikatzen ahalko dute emantzipaziorako errentamenduagatiko kenkaria, 68. quinquies.A artikuluan zehazten dena: Nafarroan erroldaturik egonda eta kenkariaren onuradun izateko gainerako baldintzak beteta, adinari dagokiona salbu, 2022ko urtarrilaren 1ean edo geroagoko data batean enplegu eskatzaile langabetu gisa inskribaturik agertzen diren pertsonek.

Kenkaria 2024ko abenduaren 31ra arte emanen da".

Hogeita hamar.–Hirurogeita seigarren xedapen gehigarria, 2023ko urtarrilaren 1etik aurrerako ondorioekin.

"Hirurogeita seigarren xedapen gehigarria.–2023an aplikatu beharreko gutxieneko pertsonal eta familiarrengatiko kenkaria.

2023an, honako hauek izanen dira kenkari pertsonalak eta familiarrak:

a) Gutxieneko pertsonalarengatik:

Oro har, gutxieneko pertsonalarengatiko kenkaria subjektu pasibo bakoitzeko 1.052 eurokoa izanen da urtean. Zenbateko horri kopuru hauek gehituko zaizkio:

a’) 256 euro, hirurogeita bost urte edo gehiagoko adina duten subjektu pasiboentzat. Zenbateko hori 568 eurokoa izanen da subjektu pasiboak hirurogeita hamabost urte edo gehiagoko adina baldin badu.

b’) 744 euro, desgaitasuna duten subjektu pasiboentzat, frogatzen badute %33ko desgaitasuna edo handiagoa eta %65ekoa baino txikiagoa dutela. Zenbateko hori 2.677 eurokoa izanen da subjektu pasiboak frogatzen duenean %65eko edo gehiagoko desgaitasuna duela.

c’) 100 euro, zergaldian 30.000 euro baino gutxiagoko errentak, salbuetsiak barne, dituzten subjektu pasiboentzat.

b) Gutxieneko familiarrengatik:

Gutxieneko familiarrengatiko kenkariak hauek izanen dira:

a’) Subjektu pasiboarekin bizirik, urtean ondorio askotarako errenta-adierazle publikoa (IPREM) baino errenta altuagorik, errenta salbuetsiak kenduta, jasotzen ez duen aurreko ahaide bakoitzeko, zenbateko hauetako bat:

Lehena.–256 euro, aurreko ahaideak hirurogeita bost urte edo gehiagoko adina badu edo, gazteagoa izan arren, apartatu honetako c’) letran aurreikusitako kenkariak aplikatzeko eskubidea badu.

Bigarrena.–568 euro, baldin eta aurreko ahaideak hirurogeita hamabost urte edo gehiagoko adina badu.

Baldin aurreko ahaide horiek familia-unitate baten parte badira, letra honetan aurreikusitako errenta-muga izanen da, familia-unitate osorako, ondorio askotarako errenta-adierazle publikoa (IPREM) halako bi.

Ulertuko da subjektu pasiboarekin bizi direla zentro espezializatuetan bizi diren aurreko ahaideak, ekonomikoki haren menpekoak badira.

b’) Lehena) Hogeita hamar urte baino gutxiagoko ondorengo ahaide ezkongabe bakoitzeko, baldin eta subjektu pasiboarekin bizi bada eta ondorio askotarako errenta-adierazle publikoa (IPREM) baino gehiagoko errentarik ez badu urtean jasotzen, salbuetsiak bazter utzirik:

–469 euro urtean, lehenbizikoagatik.

–497 euro urtean, bigarrenagatik.

–711 euro urtean, hirugarrenagatik.

–952 euro urtean, laugarrenagatik.

–1.079 euro urtean, bosgarrenagatik.

–1.249 euro seigarrenagatik eta ondokoengatik.

Zenbateko horiek orobat aplikatuko dira ondorengo ahaide ezkongabe bakoitzeko, haren adina zein ere den, baldin eta eskubidea ematen badu ondoko c’) letran aurreikusitako kenkariak baliatzeko.

Horretaz gain, letra honetan ezarritako zenbatekoak aplikatzeko eskubidea ematen duten hiru urte baino gutxiagoko ondorengo ahaide edo haur adoptatu bakoitzeko, 625 euro urtean. Zenbateko hori 1.136 eurokoa izanen da urtean, baldin eta, aplikatzekoak diren arauen eta hitzarmenen arabera, adopzioak nazioartekoak badira. Adopzio kasuetan, kasuko kenkaria aplikatuko da Erregistro Zibileko izen-ematearen zergaldian eta hurrengo bietan.

Bigarrena) Zergaldian 30.000 euro baino gehiagokoak ez diren errentak, salbuetsiak barne, dituzten subjektu pasiboentzat, 1. ordinaleko kenkariaren zenbatekoa, subjektu pasibo bakoitzari dagokiona, honako eskala hau aplikatzetik suertatzen den zenbatekoan handituko da:

a) 20.000 euro arteko errentak dituzten subjektu pasiboak: %40.

b) 20.000,01 eurotik 30.000 euro arteko errentak dituzten subjektu pasiboak: %40, ken subjektu pasiboak 20.000 eurotik gora duen errenta-gaindikinak azken kopuru horrekiko egiten duen proportzioa 50ekin biderkatzearen emaitza.

Emaitza gisa lortzen den portzentajea bi hamarrenetara biribilduta adieraziko da.

3) Subjektu pasiboarekiko elkarbizitzaren parekotzat joko da haren ondorengo ahaideek harekiko duten menpekotasun ekonomikoa, salbu eta aplikatzekoa bada 59.3 artikuluan xedatutakoa.

c’) Subjektu pasiboarekin bizi den ondorengo ahaide ezkongabe edo aurreko ahaide bakoitzeko, haien adina zein ere den, 654 euro urtean, aurreko letren arabera bidezkoak diren zenbatekoez gain, baldin eta haiek urtean dituzten errentak, salbuetsiak kanpo, ez badira, kasuko zergaldian, ondorio askotarako errenta-adierazle publikoa (IPREM) baino handiagoak, frogatzen badute %33 edo gehiagoko eta %65 baino gutxiagoko desgaitasun-gradua. Zenbateko hori 2.291 eurokoa izanen da urtean, frogatutako desgaitasun-gradua %65 edo gehiagokoa bada.

Aurreko ahaide horiek familia-unitate baten parte badira, aurreko paragrafoan ezarritako errenta-muga izanen da ondorio askotarako errenta-adierazle publikoaren (IPREM) halako bi, familia unitate osorako.

Aurreko b’) eta c’) letretan xedatutakoaren ondorioetarako, ondorengo ahaideekin parekatuko dira aplikatzekoa den legedi zibilean ezarritako terminoetan egindako tutoretza, harrera edo ordezkaritzako kuradoretza kasuengatik subjektu pasiboarekin lotura duten pertsonak, aurreko edo ondorengo ahaideak ez direnak. Halaber, ondorengo ahaideekin parekatuko dira urtarrilaren 19ko 7/2009 Foru Dekretuaren 50.1 artikuluan ezarritako baldintzak beteta harreran izan zituztenekin adin-nagusitasunera edo emantzipaziora arte elkarbizitzen jarraitzea libreki adosten duten pertsonak ere. Aipatu foru dekretuaren bidez, Haurrentzako eta nerabeentzako sustapenari, laguntzari eta babesari buruzko abenduaren 5eko 15/2005 Foru Legearen garapen partzialerako Erregelamendua onetsi zen. Gizarte-gaien arloko eskumena duen departamentuak eskaini beharko du egoera horren froga. Halaber parekatuko dira ondorengo ahaideekin subjektu pasiboaren zaintza eta babesaren pean epailearen ebazpen bitartez dauden pertsonak, aurreko egoerez bestelakoetan daudenak.

Baldin bi subjektu pasibok edo gehiagok badute gutxieneko familiarrengatiko kenkariak aplikatzeko eskubidea, horien zenbatekoa haien artean hainbanatuko da zati berdinetan, salbu eta b’)2) letran ezarritako igoera. Ondorengo ahaideei dagokienez berdin jokatuko da zaintza partekatuaren kasuetan.

Nolanahi ere, subjektu pasiboek ahaidetasun gradu desberdina baldin badute aurreko ahaidearekin edo ondorengoarekin, gutxieneko familiarrarengatiko kenkaria gradurik hurbilenekoei aplikatuko zaie, non eta horiek ez duten ondorio askotarako errenta-adierazle publikoa (IPREM) baino gehiagoko errentarik (salbuetsiak alde batera utzita), kasu horretan hurrengo gradukoei aplikatuko baitzaie.

c) 75. artikuluko laugarren erregelak aipatzen duen gutxieneko pertsonalarengatiko kenkariaren gehikuntza 649 eurokoa izanen da".

Bigarren artikulua.–Ondarearen gaineko Zergari buruzko Foru Legea.

Ondarearen gaineko Zergari buruzko azaroaren 19ko 13/1992 Foru Legearen manu hauek aldatzen dira, eta aurrerantzean testu hau izanen dute:

Bat.–31. artikuluko 1. apartatuaren lehen paragrafoa aldatzea eta 4. apartatua kentzea.

"1. Betebehar pertsonalengatik zergaren mende dauden subjektu pasiboen kasuan, zerga honen kuota osoa, pertsona fisikoen errentaren gaineko zergaren kuota osoarekin batera, ez da azken horren zerga-oinarriko baturaren %65etik goitikoa izaten ahal, eta, ondorio hauetarako, ez da kontuan hartuko izaeragatik edo xedeagatik pertsona fisikoen errentaren gaineko zergaren kargapean dauden etekinak sortzeko ahalmenik ez duten ondare-elementuei dagokien kuotaren zatia".

Bi.–32.1 artikulua, lehenengo paragrafoa aldatzea eta azkena kentzea.

"1. Ekarpenak egiteko betebehar pertsonalaren kasuan, eta ezertan galarazi gabe barne ordenamendua osatzen duten nazioarteko itun edo hitzarmenetan xedatutakoa, bi zenbateko hauetatik txikiena kenduko da zerga honen kuotatik, Espainiatik kanpo dauden ondasunengatik eta Espainiatik kanpo erabili edo bete behar diren eskubideengatik:"

Hiru.–Lehen xedapen gehigarria. Ondarearen gaineko Zergaren 2024ko eskala.

2024ko zergaldian zergaren likidazio-oinarriari ondoko eskalan adierazten diren karga-tasak aplikatuko zaizkio:

Hirugarren artikulua.–Sozietateen gaineko Zergari buruzko Foru Legea.

Sozietateen gaineko Zergari buruzko abenduaren 28ko 26/2016 Foru Legearen manu hauek testu hau izanen dute:

Bat.–13.2.a) artikulua.

"a) Irabazi-asmorik gabeko entitate eta erakundeak, aplikatu behar bazaie Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginaren I. tituluan ezarritako zerga-araubide berezia (maiatzaren 24ko 2/2023 Legegintzako Foru Dekretuaren bidez onetsi zen testu bategin hori)".

Bi.–23.1.e) artikulua, lehenbiziko paragrafoa.

"e) Dohaintzak eta eskuzabaltasunak, ezertan galarazi gabe fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginean aurreikusitakoa (maiatzaren 24ko 2/2023 Legegintzako foru dekretuaren bidez onetsi zen testu bategin hori)".

Hiru.–24. artikulua, 1. apartatua, hirugarren paragrafoa, eta 6.a) apartatua, azken paragrafoa kentzea, 2024ko urtarrilaren 1etik aurrera hasten diren zergaldietarako ondorioekin.

"Mozkin operatiboa zehaztuko da abiapuntutzat harturik ekitaldiko galera-irabazien kontuko ustiapen-emaitza, Merkataritza Kodeari eta garapena egiteko gainerako kontabilitate-araudiari jarraikiz zehaztua, eliminatuz ibilgetuaren amortizazioa, ibilgetu ez-finantzarioaren dirulaguntzen eta besteren egozpena eta ibilgetuaren narriadura eta besterentzeengatiko emaitza, eta gehituz ondare-tresnetako partaidetzetatiko diru-sarrera finantzarioak, baldin eta badagozkie dibidenduei edo halako entitateetako partaidetzei non partaidetza-portzentajea, zuzenekoa edo zeharkakoa, gutxienez ere ehuneko 5ekoa baita, salbu eta partaidetza horiek eskuratu direnean halako zorrekin zeinen gastu finantzarioak ez baitira kengarri 23.1.g) artikuluaren aplikazioa tarteko. Ez dira inola ere mozkin operatiboaren parte izanen zerga honen zerga-oinarrian sartu ez diren diru-sarrerak, gastuak edo errentak".

Lau.–40.1.a) artikulua, f’) letra aldatzea, egungo edukia g’) letrara pasatuko baita, 2023ko urtarrilaren 1etik aurrera jasotzen diren laguntzetarako ondorioekin.

"f’) Klimaren eta ingurumenaren aldeko araubideetarako laguntzak (eko-araubideak)".

Bost.–41.5 artikulua.

"5. Artikulu honetan adierazitakoa ez zaie aplikatuko banku-fundazioei, baldin eta atxikitzen bazaizkio Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginaren I. tituluan ezarritako zerga-araubide bereziari (maiatzaren 24ko 2/2023 Legegintzako Foru Dekretuaren bidez onetsi zen testu bategin hori)".

Sei.–45.2 artikulua, lehen paragrafoa aldatzea; 2024ko urtarrilaren 1etik aurrera hasten diren zergaldietan izanen ditu ondorioak.

"2. Aipatu erreserbara bideratutako diru-kopurua 3. apartatuan aipatzen diren ondare-elementuen eskurapenean gauzatuko da, erreserba hornitzeko erabili diren mozkinak zer ekitalditakoak izan eta ekitaldi horren aurreko urtebetetik ekitaldia itxi ondoko bi urteetara bitarteko epean".

Zazpi.–51.4 artikulua.

"4. %10eko tasa ordainduko dute baldintzak betetzen dituzten entitateek, baldin eta aukeratu badute Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginaren I. tituluan ezarritako zerga-araubide berezia aplikatzea (maiatzaren 24ko 2/2023 Legegintzako Foru Dekretuaren bidez onetsi zen testu bategin hori)".

Zortzi.–63. artikuluari 5. idatz-zatia gehitzea.

"5. Artikulu honetan ezarritako kenkaria aplikatzeko, entitate babes-hartzaileek Zerga Administrazioari jakinarazi beharko diote, zerga-araudian ezarritako ereduetan, babesletza kontratuaren ondoriozko publizitate-gastuen balorazioa".

Bederatzi.–64.B).1.a artikuluaren lehen paragrafoa.

"a) Entitatearen jarduera ekonomikoari atxikitako ibilgailu berrietan egindako inbertsioek eskubidea emanen dute %30eko kenkaria egiteko, baldin eta ibilgailu elektrikoak badira, eta %5eko kenkaria, berriz, ibilgailu hibrido entxufagarriak badira, baldin eta Europako Parlamentuaren eta Kontseiluaren 2018ko maiatzaren 30eko 2018/858 (EB) Erregelamenduan eta Europako Parlamentuaren eta Kontseiluaren 2013ko urtarrilaren 15eko 168/2013 (EB) Erregelamenduan zehaztutako kategoria hauetakoren batekoak badira:"

Hamar.–92.1 artikulua, paragrafo bat gehitzea; 2024ko urtarrilaren 1etik aurrera hasten diren zergaldietan izanen ditu ondorioak.

"93. artikuluan aurreikusitako hobariak aplikatzeko, ulertuko da ezen Nafarroan Etxebizitza Izateko Eskubideari buruzko maiatzaren 10eko 10/2010 Foru Legearen 13. artikuluan eta Etxebizitzaren arloko jarduketa babesgarriak arautzen dituen irailaren 18ko 61/2013 Foru Dekretuaren 77. artikuluan araututako sozietate publiko instrumentalaren bitartekotzazko errentamenduari eskainitako etxebizitzetatik lorturiko errentak eratorriak direla etxebizitza-errentamenduko jarduera ekonomiko batean aritzetik".

Hamaika.–Hamabigarren xedapen iragankorra, bigarren paragrafoa, 2023ko urtarrilaren 1etik aurrera hasten diren zergaldietarako ondorioekin.

"Egin gabe dauden kenkariak aplikatzeko, 67.4 5 eta 7 artikuluetan xedatutakoa errespetatuko da".

Hamabi.–Hamazazpigarren xedapen gehigarria, errubrika.

"Hamazazpigarren xedapen gehigarria. 2024an hasten diren zergaldietan likidazio oinarri negatiboak murrizteko mugak".

Laugarren artikulua.–Oinordetzen eta dohaintzen gaineko zergaren xedapenak biltzen dituen testu bategina.

Abenduaren 16ko 250/2002 Legegintzako Foru Dekretuaren bidez onetsitako oinordetzen eta dohaintzen gaineko zergaren xedapenen testu bategineko manu hauek testu hau izanen dute:

Bat.–11. c) artikuluaren b’) letra aldatzea; 2024ko urtarrilaren 1etik aurrerako ondorioekin.

"b’) Eskuraketa mantentzea kausatzailea hil eta hurrengo bost urteetan, salbu eta eskuratzailea epe horren barruan hiltzen bada edo enpresa edo erakundea konkurtso-prozedura baten ondorioz likidatzen bada".

Bi.–12. d) artikuluko 1. apartatuaren c’) letra aldatzea; 2024ko urtarrilaren 1etik aurrerako ondorioekin.

"1. Eskurapena bost urtez jarraian eduki beharko du, eragiketa dokumentatzen duen eskritura publikoaren datatik aurrera, salbu eta eskuratzailea epe horren barruan hiltzen bada edo enpresa edo erakundea konkurtso-prozedura baten ondorioz likidatzen bada".

Hiru.–32 bis artikulua, izenburua.

"32 bis artikulua. Desgaitasuna duten subjektu pasiboen "mortis causa" eskurapenak".

Lau.–46.5. artikulua, lehenbiziko lerroaldea.

"5. Fideikomisoetan, jaraunsle fiduziarioari jaraunspeneko ondasunak jabetzan uzten bazaizkio, kargaren bat kendu behar bada ere, Kode Zibilaren 788. artikuluan xedatu bezala, jaraunspen bidez jabetza eskuratzeagatik likidatuko da zerga. Horrelakoetan, karga kenduko da, kendu ahal bada, eta horregatik zerga ordainduko du jaraunsleari ezarritako kargaren ondoriozko onura eskuratzen duenak, ezaguna bada, egintzari juridikoki dagokion tituluarengatik edo kontzeptuarengatik; onuraduna ezaguna ez bada, jaraunsleak ordainduko du kontzeptu horri dagokion zerga, eta, aldiz, onuraduna ezaguna bada, hari jasanarazten ahalko zaio kargagatik ordaindutako Zerga".

Bost.–Bigarren xedapen gehigarria, izenburua eta 1. paragrafoa.

"Bigarren xedapen gehigarria.–Pertsona batek desgaitasuna duela jotzea eta desgaitasunaren gradua egiaztatzea.

1. Zerga honen ondorioetarako, desgaitasuna duten pertsonatzat joko dira 100eko 33ko edo gehiagoko desgaitasuna dutenak".

Bosgarren artikulua.–Ondare eskualdaketen eta egintza juridiko dokumentatuen gaineko zergaren xedapenak biltzen dituen testu bategina.

Apirilaren 26ko 129/1999 Legegintzako Foru Dekretuaren bidez onetsitako ondare eskualdaketen eta egintza juridiko dokumentatuen gaineko zergari buruzko xedapenen testu bateginaren manu hauek testu hau izanen dute:

Bat.–8.1.b) 2. artikulua.

"2. 100eko 4ko tasa aplikatuko da, etxebizitza subjektu pasiboaren ohiko etxebizitza denean eta despopulazio arriskuan dagoen udalerri batean kokatuta dagoenean, baldin eta eskualdaketaren ondorioz etxearen jabari osoa eskuratzen bada, eta inoiz ez lehenago usufruktuan eta jabetza soilean banaturiko jabariaren kontsolidazioaren ondorioz; toki administrazioaren eta despopulazioaren arloko eskumena duen departamentuko titularraren foru agindu bidez ezarriko da zein diren udalerri horiek".

Bi.–21. artikulua, bigarren paragrafoa.

"Bermedun mailegua eratzeko edo nobazioko eskriturak direnean, mailegua ematen duen pertsona edo entitatea izanen da subjektu pasiboa".

Hiru.–35.I.B) artikuluari 35. idatz-zatia gehitzea.

"35. Sociedad Anónima Estatal de Caución Agraria Estatuko merkataritza sozietatearekin izenpetutako abal-kontratua".

Lau.–35.II.16. artikulua.

"16. Maiatzaren 24ko 2/2023 Legegintzako foru dekretuaren bidez onetsi zen Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bategineko 11. artikulua".

Seigarren artikulua.–Hondakinei eta haien Fiskalitateari buruzko Foru Legea.

2024ko urtarrilaren 1etik aurrerako ondorioekin, Hondakinei eta haien Fiskalitateari buruzko ekainaren 18ko 14/2018 Foru Legearen manu hauek testu hau izanen dute:

Bat.–34.1. eta 2. artikulua.

"1. Subjektu pasiboak dira, zergadun gisa, hondakinak hondakindegian ezabatzeko edo errausteko edo koerrausteko entregatzen dituztenak. Izaten ahal dira pertsona fisikoak edo juridikoak edo Tributuei buruzko abenduaren 14ko 13/2000 Foru Lege Orokorraren 25. artikuluan aipatzen diren nortasun juridikorik gabeko entitateak.

2. Zergadunen ordezko izanen dira hondakindegien edo hondakinen errausketarako edo koerrausketarako instalazioen kudeatzaileak. Izaten ahal dira pertsona fisikoak edo juridikoak edota 13/2000 Foru Legearen 25. artikuluan aipatzen diren nortasun juridikorik gabeko entitateak".

Bi.–37.1.a) 3. artikulua.

"3. Aurreko 1. eta 2. zenbakietan zehaztutakoak ez diren hondakinak badira:

a’) Oro har: 15 euro tona metrikoko.

b’) Hondakinak aldez aurreko tratamendutik salbuetsitakoak badira, uztailaren 7ko 646/2020 Errege Dekretuaren 7.2 artikuluan ezarritako baldintzen arabera, %75 baino gehiagoko hondakin geldoen osagaia dutenak: 3 euro tona metrikoko hondakin geldoen zatia, eta 15 euro tona metrikoko gainerakoa.

c’) Beste mota bateko hondakinak badira, %75 baino gutxiagoko hondakin geldoen osagaia dutenak: 1,5 euro tona metrikoko hondakin geldoen zatia, eta 15 euro tona metrikoko gainerakoa".

Hiru.–37.2 artikulua.

"2. Hondakinen errausketarako instalazioen titularrek, 1. apartatuko d) eta e) letretan ezarritako zerga-tasak aplikatzeko, Nafarroako Gobernuak egindako jakinarazpena izan beharko dute. Jakinarazpen horretan adieraziko dira energia-efizientziaren balioa eta eragiketaren sailkapena (D10 edo R01 gisa sailkatua dagoen), Kutsaduraren Prebentzio eta Kontrol Integratuari buruzko uztailaren 1eko 16/2002 Legea garatzeko eta industria isuriei buruzko Erregelamenduko 40.2 artikuluan ezarritakoaren arabera".

Lau.–38.1.4. artikulua, lehen paragrafoa eta 5. lehen paragrafoa.

"1. Zergadunaren ordezkoek edo, hala dagokionean, zergadunek zergaren autolikidazioa aurkeztu beharko dute, zerga kuota kalkulatu, eta dagokion diru-sarrera egin, betiere tributuen arloko eskumena duen departamentuko titularrak foru agindu baten bidez ezarritako moduan, tokian eta epeetan".

"4. Hondakindegien edo hondakinen errausketarako edo koerrausketarako instalazioen kudeatzaileak diren subjektu pasiboek datadun erregistro bat eraman beharko dute utzitako, erraustutako eta koerraustutako hondakinei buruz. Betebehar hori betetzat joko da Ekonomia zirkularrerako hondakinei eta lurzoru kutsatuei buruzko apirilaren 8ko 7/2022 Legearen 64. artikuluan aipatzen den artxibo kronologikoa eramaten bada".

"5. Hondakindegien eta errausketarako edo koerrausketarako instalazioen kudeatzaileak behartuta daude instalazio publiko edo pribatuetan, errausteko edo koerrausteko edo bertan isurtzeko, entregatzen diren hondakinen pisaketa-datuak deklaratu eta frogatzera".

Bost.–Lehen xedapen iragankorra.2

"2. Nafarroako Hondakinen Erakunde Publikoa sortu bitartean, Nafarroako Hiri Hondakinen Tratamendurako Partzuergoak bere gain hartuko ditu foru lege honek aipatu erakundeari esleitzen dizkion eginkizunak eta betebeharrak Hondakinen Funtsa urtero banatzeko nahitaezko kontsultari eta gainerako lankidetza- eta aholku-eginkizunei dagokienez".

Zazpigarren artikulua.–Tributuei buruzko Foru Lege Orokorra.

Tributuei buruzko abenduaren 14ko 13/2000 Foru Lege Orokorraren manu hauek honako testu hau izanen dute:

Bat.–9.1.b) artikulua.

"b) Eskubidea du itzul dakizkion zuzenez kontra egindako diru sarrerak eta ofizioz tokatzen direnak, eta orduan foru lege honetako 50.2.c) artikuluak aurreikusten duen berandutza interesa paga dakion, hartarako errekerimendurik egin gabe ere.

59. artikuluan xedatutakoa gorabehera, Nafarroako Foru Ogasunak ordainketa atzeratu eginen du, baldin eta subjektu pasiboak ez baditu bere tributu-betebeharrak egunean; hain zuzen ere, betebehar horiek bete arte atzeratuko du ordainketa.

Itzulketa horiei dagokienez, subjektu pasiboak Nafarroako Foru Ogasunarekiko bere tributu-betebeharrak egunean ez dituen epeetan, ez da berandutze-interesik sortuko. Era berean, prozeduran subjektu pasiboari egotz dakizkiokeen gainerako atzerapen guztiak ez dira kontuan hartuko sortutako berandutze-interesen epea kontatzeko orduan. Zehazki, ikuskapen prozeduretan erabakitako itzulketetan, ez dira zenbatuko 139. artikuluaren 4. eta 5. apartatuetan zehazten diren etenaldien eta luzapen aldien egunak".

Bi.–65 bis b) artikulua.

"b) Zentsu eta erregistroko datuak ofizioz zuzentzea, egiazkoak edo zehatzak ez direla frogatuz gero. Zuzenketa hori izan daiteke aipatu zentsu eta erregistroetan baja ematea, kautelaz edo behin betiko".

Hiru.–68. artikulua, i) letra gehitzea; foru lege honek indarra hartzen duenetik aurrera egiten diren arau-hausteetarako izanen ditu ondorioak.

"i) Jarduera ekonomikoak garatzen dituen pertsona edo entitate bat xede duen ikuskapen prozedura baten barnean, Zerga Administrazioko funtzionarioei bidegabe ukatzea edo galaraztea finka edo lokaletan sartzea edo haietan egotea, edo zerga betebeharrekin zerikusia duten lokal, makina, instalazio eta ustiategiak aztertzea".

Lau.–77. artikulua, 6. apartatua gehitzea; foru lege honek indarra hartzen duenetik aurrera egiten diren arau-hausteetarako izanen ditu ondorioak.

"6. 68.i) artikuluan ezarritako arau-haustea diru-isun proportzional batekin zehatuko da: arau-haustea egiten den unean aitorpen aldia bukatua duen azken ekitaldiari dagokion negozio zifraren ehuneko 2 halakoa; gutxienez 20.000 euro eta gehienez 600.000 euro".

Bost.–88 artikulua.

"88. artikulua. Ofiziozko itzulketak.

Zerga Administraziok ofizioz itzuliko ditu bidezko diren zenbatekoak, tributu bakoitzaren araudian ezarritakoaren arabera. Iragan baldin bada tributu bakoitzaren araudian ezarritako epea, eta, edozein kasutan, sei hilabeteko epea, eta, Zerga Administrazioari egoztekoa den motibo bat tarteko, ez bada agindu itzuli beharrekoa pagatzea, zergadunak eskubidea izanen du 50.2.c) artikuluan araututako berandutze interesa kobratzeko, horretarako errekerimendurik egin beharrik gabe. Horri dagokionez, interes hori sortuko da Zerga Administrazioak behin-behineko likidazioa egiteko duen epea bukatzen denetik dagokion itzulketa pagatzea agintzen den egunera arte.

59. artikuluan xedatutakoa gorabehera, Nafarroako Foru Ogasunak ordainketa atzeratu eginen du, baldin eta subjektu pasiboak ez baditu bere tributu-betebeharrak egunean; hain zuzen ere, betebehar horiek bete arte atzeratuko du ordainketa.

Ez da berandutze-interesik sortuko subjektu pasiboak Nafarroako Foru Ogasunarekiko tributu-betebeharrak egunean izan ez dituen epeetan. Era berean, ordainketa-prozeduraren gainerako atzerapen guztiak, subjektu pasiboari egotz dakizkiokeenak, ez dira kontuan hartuko berandutze-interesen sortzapen-epea kontatzeko orduan. Zehazki, ikuskapen prozeduretan erabakitako itzulketetan, ez dira zenbatuko 139. artikuluaren 4. eta 5. apartatuetan zehazten diren etenaldien eta luzapen aldien egunak".

Sei.–103.1 artikulua, e) letra gehitzea.

"e) Pertsona juridikoek edo entitateek beren benetako titularren identifikazioa jakinarazi beharko diote Zerga Administrazioari. Horretarako, benetako titulartzat hartuko dira Kapital Zuriketari eta Terrorismoaren Finantzaketari Aurrea Hartzeko apirilaren 28ko 10/2010 Legearen 4.2 artikuluaren arabera definitutakoak".

Zazpi.–105.1.m) artikulua.

"m) Aktiboak Berreskuratu eta Kudeatzeko Bulegoarekin lankidetzan aritzea, prozesu penal jakin batean enbargatu edo konfiskatu daitezkeen ondasunak eta eskubideak aurkitzeko beharrezkoak diren datuak, txostenak edo aurrekariak lagatzeko, inguruabar hori frogatu ondoren".

Zortzi.–113.3 artikulua.

"3. Likidazio horiek egiteko, kudeaketa organoek behar diren egiaztapen laburtu guztiak egiten ahal dituzte.

Zerga Administrazioak bidezkoak diren egiaztapenak egiteko, zergapekoak erakutsi beharko ditu, horrela eskatzen bazaio, tributu arauetan ezarritako erregistro eta dokumentuak, izaera ofizialeko beste edozein liburu, erregistro edo dokumentu eta liburu, merkataritzako kontabilitatearen kopia barne dela, bai eta liburu, erregistro edo dokumentu horietako eragiketak frogatzeko balio duten fakturak eta dokumentuak ere.

Kontabilitatearen azterketa mugatuko da hartan agertzen dena eta Zerga Administrazioaren esku dagoen informazioa, prozeduran lortutakoa barne, bat datozela egiaztatzera.

Kontabilitatearen azterketak ez du eragotziko, ezta mugatuko ere, haren xede diren eragiketak aurrerago egiaztatu ahal izatea ikuskapen prozedura batean.

Kudeaketa organoek ezin izanen diete, inolaz ere, hirugarrenei eskatu finantza-mugimenduei buruzko informaziorik, baina zergapekoari eskatzen ahalko diote zerga-betebehar baten oinarrian edo kuotan eragina duten finantza-eragiketak agiri bidez justifikatzeko".

Bederatzi.–150.3 artikulua.

"3. Sarrera bidegabea eragin zuen egintza administratiboa irmoa denean, itzulketa eskatzeko bide bakarra egintza horren berrikuspena eskatu edo sustatzea izanen da, eta horretarako, 145. artikuluko a), c) eta d) letretan jasotzen diren berrikuspen prozedura bereziak erabiliko dira, edo 159. artikuluan araututako berrikuspeneko errekurtso berezia".

Hamar.–Hogeita zortzigarren xedapen gehigarria, B).1, h) letra gehitzea; B).3, c) letra gehitzea; eta B).4, d) letra gehitzea; foru lege honek indarra hartzen duenetik aurrera hasten diren prozeduretan izanen ditu ondorioak.

"h) Alkoholaren eta edari eratorrien gaineko edo hidrokarburoen gaineko zergen eremu objektiboetako produktuak gordailu fiskaletatik ateratzen dituztenen erregistroan alta eskatzeko prozedura".

"c) Pertsona edo entitate ekintzaileen erregistroan inskribatzea eskatzeko prozedura".

"d) Identifikazio fiskaleko zenbakia birgaitzea eskatzeko prozedura".

Hamaika.–Hogeita hemeretzigarren xedapen gehigarria gehitzea, 2024ko urtarrilaren 1etik aurrerako ondorioekin.

"Hogeita hemeretzigarren xedapen gehigarria.–Tributu-zorra geroratzeko edo zatikatzeko 2024ko urtarrilaren 1etik aurrera egiten diren eskaerei aplikatu beharreko neurri berariazkoak.

Tributu-zorra geroratzeko edo zatikatzeko egiten diren eskaerei, baldin eta diru-bilketaren kudeaketa lana tributuen arloan eskumena duen departamentuari badagokio, hogeita hamazazpigarren xedapen gehigarrian ezarritakoa aplikatuko zaie".

Zortzigarren artikulua.–Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bategina.

Ondotik ematen den bezala geldituko dira idatzirik Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien Testu Bategineko ondoko manuak (testu bategin hori onetsi zen maiatzaren 24ko 2/2023 Legegintzako Foru Dekretuaren bidez):

Bat.–34.b) artikulua.

"b) Helburu sozialak izatea, gizarte zerbitzuen, garapenerako lankidetzaren edo emakumeen eta gizonen arteko berdintasunaren arlokoak. Betiere ulertuko da gai hauei lotutako xedeak edo jarduketa-eremuak dituzten entitateek helburu sozialak dituztela: desgaitasuna, mendekotasuna, bazterketa, adingabeentzako arreta gizarte zerbitzuetan, presoak eta preso ohiak, etxegabeak, etorkinak, gutxiengoak, droga-mendekotasunen eta beste adikzio batzuen prebentzioa eta tratamendua, adineko pertsonak, garapenerako lankidetza, emakumeen eta gizonen arteko berdintasuna, eta emakumeen kontrako indarkeriaren biktima diren emakumeei arreta ematea eta arlo horretako ikerketa, prebentzioa, sentsibilizazioa eta detekzioa. Betiere, gai horiek direla eta, inskribaturik egon behar dute gizarte zerbitzuen eta baimen berariazkoen erregistroan, garapenerako lankidetzaren arloan eskuduna den Ministerioko Gobernuz Kanpoko Erakundeen Erregistroan edo Nafarroako Foru Komunitateko Emakume Elkarteen Zentsuan".

Bi.–35.3.b) artikulua, lehenbiziko paragrafoa.

"b) Nafarroako Berdintasunerako Institutuko zuzendari orokorra, baldin entitate sozialen helburu soziala bada emakumeen eta gizonen berdintasunaren arloa, eta emakumeen kontrako indarkeriaren biktima diren emakumeei arreta ematea eta arlo horretako ikerketa, prebentzioa, sentsibilizazioa eta detekzioa".

Hiru.–43.1 artikulua.

"1. Pertsona fisikoen errentaren gaineko zergaren zergadunek eskubidea izanen dute mezenasgo mota bakoitzari ematen zaion balioaren lehen 150 euroen ehuneko 80 kentzeko zergaren kuotatik. 150 eurotik gorako zenbatekoei ehuneko 35eko kenkaria aplikatzen ahalko zaie. Subjektu pasibo bakoitzeko eta zergaldi bakoitzeko aplikatuko da 150 euroko muga".

Lau.–44.1 artikulua, a) eta b) letren lehen paragrafoak.

"a) Zerga-oinarria zehazteko, mezenasgo mota bakoitzaren balorazioaren zenbatekoa hartuko da partida kengarritzat. Zerga-oinarrian kentzen ahal den zenbatekoa izanen da honako muga hauetako handiena adinakoa, gehienez ere:"

"b) Gainera, eskubidea izanen dute, zergaren kuota likidoan, ehuneko 20ko kenkaria aplikatzeko mezenasgo mota bakoitzeko modalitateak balioesten diren zenbatekoan".

Bost.–Lehen xedapen gehigarria, lehen paragrafoa.

"I. tituluko II. kapituluko 1. eta 3. ataletan aurreikusitako araubidea honako hauei aplikatuko zaie:"

Sei.–Bigarren xedapen gehigarria, f).

"f) 1.2 artikuluan zerrendatzen diren entitateak, beste tributu-administrazio batean aplikatzen dutenak I. tituluan aurreikusitako tributu-araubidearen baliokide bat".

Zazpi.–Laugarren xedapen gehigarria.

"Laugarren xedapen gehigarria. Lehentasuna duten jarduerak eta proiektuak, mezenasgo kulturalekoak, sozialekoak, ingurumenekoak eta kirolekoak.

1. Foru lege bidez ezartzen ahalko da lehentasunezkoak direla jarduera eta proiektu batzuk, mezenasgo kulturalekoak, sozialekoak, ingurumenekoak eta kirolekoak, eta ezartzen ahalko da, orobat, zein diren mezenasgo sozialeko eta ingurumeneko jardueren entitate onuradunak.

2. Jarduera horiei eta entitate onuradunei dagokienez, foru legeak ehuneko bost igotzen ahalko ditu, gehienez, testu bategin honetan ezarritako kuota-kenkarien ehunekoak eta mugak".

Zortzi.–Bosgarren xedapen gehigarria, indargabetzea.

Bederatzigarren artikulua.–Nafarroako Foru Komunitateko Administrazioko eta haren erakunde autonomoetako Tasa eta Prezio Publikoei buruzko Foru Legea.

2024ko urtarrilaren 1etik aurrerako ondorioekin, Nafarroako Foru Komunitateko Administrazioko eta haren Erakunde Autonomoetako Tasa eta Prezio Publikoei buruzko otsailaren 11ko 2/2021 Foru Legearen manu hauek testu hau izanen dute:

Bat.–22.5.d) eta f) artikuluak.

"d) Internet bidez deskargatzen diren ziurtagiriak ematea, bai eta Hezkuntza Departamentuaren mendeko ikastetxe publikoek emandakoak ere, baldin eta aldez aurreko prestakuntzarik behar ez badute eta automatikoki jaulkitzen edo deskargatzen badira".

"f) Hezkuntza Departamentuaren menpeko irakaskuntza arautuko ikastetxe publikoek agiriak konpultsatzea kategoria bereziko familia ugarietako kideei eta kategoria bereziko guraso bakarreko familietako kideei edo gurasobakartasun egoeran dauden familietakoei".

Bi.–25. artikulua, 1. apartatua, eta 4. apartatuko 1.3 tarifaren izena.

"1. Zerga-egitatea.

Tasa honen zerga-egitatea da indarreko xedapenekin bat Elkarteen Erregistroan, Fundazioen Erregistroan eta Lanbide Elkargoen Erregistroan gordailutu eta inskribatu behar diren egintza, egitate eta agirien inskripzioa eta egiaztapena egitea".

"Beste edozein motatako inskripzio bakoitzeko, salbu eta zuzendaritza-batzordeko edo ordezkaritza-organoko kideak aldatzeko inskripzioak eta jarduera nagusiaren lurralde-eremu estatutarioaren barruko egoitza-aldaketak".

Hiru.–28.4 artikulua, a, b eta c letrak aldatzea eta d) letra kentzea, e) letraren egungo edukia d) letra izatera pasatuko baita.

"a) Inprimategian editatutako kartografia.

b) Kartografia ploteatua:

c) Kartografia digitala:

Lau.–34.4 artikulua.

"4. Tarifak.

Nafarroako Foru Komunitateko Administrazioaren titulartasuna duten barrutietan arrantza-baimenei dagozkien tasen zenbatekoa honako hau izanen da:

Tarifa murriztua izan dezakete, beren gorabehera sozialak direla-eta, landa garapenaren eta ingurumenaren arloan eskumena duen departamentuak erabakitzen dituen pertsona fisikoek".

Bost.–35. artikulua, 3. eta 4. idatz-zatiak.

"3. Sortzapena.

Lizentziak eskatzen diren unean sortuko eta eskatuko da tasa; lizentzia horiek urtebeteko balio-aldia izanen dute.

4. Tarifak.

Tarifa 12 eurokoa izanen da lizentzia bakoitzeko".

Hamargarren artikulua.-Nafarroako Toki Ogasunei buruzko Foru Legea.

2024ko urtarrilaren 1etik aurrerako ondorioekin, Nafarroako Toki Ogasunei buruzko martxoaren 10eko 2/1995 Foru Legearen 175.2 artikuluan ezarritako gehieneko koefizienteak honako hauek izanen dira:

Hamaikagarren artikulua.–Nafarroako Lurralde Aberastasunaren Erregistroari eta Katastroei buruzko Foru Legea.

Nafarroako Lurralde Aberastasunaren Erregistroari eta Katastroei buruzko azaroaren 21eko 12/2006 Foru Legeko laugarren xedapen gehigarria honela geldituko da:

"Laugarren xedapen gehigarria.–Katastroari buruzko informazio indarrik gabea eskuratzea.

1. Nafarroako Lurralde Aberastasunaren Artxibo Historikoa sortzen da, Lurralde Aberastasunaren Zerbitzuaren menpe, non Nafarroako Lurralde Aberastasunaren Erregistroarena ez den katastroari buruzko informazio indarrik gabe guztia bilduko den.

Nafarroako Foru Ogasunak behar beste datu-base sortuko ditu, Artxibo Historikoan dagoen informazioaren eskuragarritasuna edo sarbide publikoa bermatzeko xede bakarrarekin, eta haietan Internet bidezko sarbidea ahalbidetuko da.

2. Era berean, katastroari buruzko informazio historikoaren eskuragarritasuna eraginkorra izan dadin, herritarrek kasuko administrazioari eskatu ahalko diote Nafarroako Lurralde Aberastasunaren Artxibo Historikoan dauden agirien zerrenda edo udal entitatearen bulegoetan dauden katastroko agiri historikoen zerrenda.

3. Aurreko apartatuan adierazitako informazioa eskuratzeko eskaera ezetsi eginen da, Lurralde Aberastasunaren Zerbitzuko zuzendariaren edo kasuko udaleko alkatearen ebazpen arrazoitu baten bidez, baldin eta eskatzaileak ez badu sinesgarriro frogatzen eskatu duen informazioaren gaineko bidezko interesa duela, eskatu den informazioa adierazitako helburuetarako nabarmen desegokia bada edo, datu gehiegi eskatzeagatik, eskaera tokiz kanpo badago, eskaera bera behin eta berriz errepikatzen bada edo eskaerak zerbitzuaren funtzionamendu egokia baldintzatzen ahal badu".

Xedapen gehigarri bakarra.–Zerga-pizgarriak "Santiago Ramón y Cajal ikerketa urtea 2022" AIPGrako.

1. 2024an eta 2025ean, "Santiago Ramón y Cajal ikerketa urtea 2022" aparteko interes publikoko gertakariarekin loturiko programa eta jardueren finantzaketan parte hartzeagatik zerga-pizgarri batzuk lortzen ahalko dira, maiatzaren 24ko 2/2023 Legegintzako Foru Dekretuak onetsi zuen Fundazioen eta irabazi-asmorik gabeko bestelako entitateen zerga-araubide bereziko xedapenen eta mezenasgorako zerga-pizgarrien testu bateginean ezarrita daudenak. Horretarako, programa eta jarduera horiek uztailaren 31ko PCM/742/2022 Aginduaren bidez sortu zen departamentuarteko kide anitzeko organoak onetsi beharko ditu, hura baita "Santiago Ramón y Cajal ikerketa urtea 2022" AIPGaren kudeatzailea.

Aurreko paragrafoan aipatutako programa eta jarduerak lehentasunezkotzat joko dira irabazi-asmorik gabeko entitateek egiten badituzte eta, horrez gain, entitate horiek aipatu testu bategineko I. tituluko zerga-araubidea edo haren baliokidea den beste Zerga Administrazio baten zerga-araubidea aplikatzen dutenean eta, hala, ehuneko bost puntu goratuko dira aplikatu beharreko kenkarien ehunekoak eta mugak.

2. Zerga-pizgarrien aplikazioak honako baldintza hau izanen du: entitate onuradunek Zerga Administrazioari informazioa ematea jasotako dohaintzei eta ekarpenei buruz, zerga arloko araudian ezarritako ereduen arabera.

Era berean, entitate onuradunak ziurtagiri bat egin beharko du, finantzaketan izandako parte-hartzearen baliozkotasuna egiaztatzeko, honako hauek jasota:

a) Izen-deiturak edo sozietatearen izena, eta identifikazio fiskaleko zenbakia, bai pertsona edo entitate emaile edo mezenasarena, bai onuradunarena.

b) Aipatu departamentuarteko kide anitzeko organoak programa edo jarduera baimendu duela dioen aipamena.

c) Dohaintzaren edo ekarpenaren data eta balorazioa.

3. Xedapen gehigarri honetan ezarritako zerga-pizgarriek aipatutako testu bateginaren 49. eta 50. artikuluetan ezarritako mugak eta bateraezintasunak bete beharko dituzte.

Azken xedapenetako lehena.–Nafarroako Hondakin Uren Saneamenduari buruzko Foru Legea.

2024ko urtarrilaren 1etik aurrerako ondorioekin, Nafarroako Hondakin Uren Saneamenduari buruzko abenduaren 29ko 10/1988 Foru Legearen 13. artikulua aldatzen da 1.a), b) eta c) letretan eta 4. apartatuan araututako tarifei dagokienez:

"a) Saneamenduko sare publikoetara konektatutako etxeko ur-erabilerei aplikatu beharreko karga tasak: 0,71 euro metro kubiko bakoitzeko.

b) Saneamenduko sare publikoetara konektatutako ur-erabilerei, etxekoak ez direnei, aplikatu beharreko karga tasak: 0,775 euro metro kubiko bakoitzeko. Karga kutsatzaileari dagokion indize zuzentzailea aplikatuko da, hala behar denean, apirilaren 5eko 82/1990 Foru Dekretuan eta abenduaren 28ko 19/2011 Foru Legearen zazpigarren xedapen gehigarrian araututako moduan.

c) Saneamenduko sare publikoei konektaturik ez dauden baina erakunde eskudunek emandako baimen administratibo beharrezkoak dituzten erabiltzaileak: 0,093 euro metro kubiko bakoitzeko. Ibilgu publikora isurtzeko baimenean ezarritako baldintzak betetzen ez badira, a) edo b) letretan ezarritakoaren arabera dagokion tarifa aplikatuko da.

"4. Arazketa-instalazio pribatuetatik datozen lohiei tarifa hauek aplikatuko zaizkie tratatuak izateagatik, baldin eta onartzen badira Nafarroako Ibaien Saneamendurako Plan Zuzendariari atxikitako hondakin-uren araztegietako lohien lerroetan:

Azken xedapenetako bigarrena.–Nafarroako Administrazio Publikoen zerbitzuko langileen arloko presako neurriak.

2024rako Nafarroako Aurrekontu Orokorrei buruzko Foru Legea onesten ez den bitartean, 2024ra luzatzen dira Nafarroako Administrazio Publikoen zerbitzuko langileen arloko presako neurriak, ezarrita daudenak ekainaren 21eko 13/2012 Foru Legearen 1. artikuluan.

Erretiroa hartzeko gehieneko adinari dagokionez aurreko paragrafoan aipatutako 1. artikulua funtzionario guztiei aplikatuko zaie, funtzionarioa atxikita dagoen gizarte-aurreikuspeneko sistema zein den ere, barne harturik Nafarroako administrazio publikoen montepioetako funtzionarioen eskubide pasiboen araubide iragankorrari buruzko martxoaren 5eko 10/2003 Foru Legearen aurreko sistemari atxikiak, bai eta araubide horri atxikiak ere.

Hala ere, eta salbuespen gisa, Osasun Departamentuak zilegi izanen du bere zenbait langileren zerbitzu aktiboa 2024. urtean zehar luzatzea zerbitzuaren premiengatik eta profesionalik ezarengatik; betiere, arrazoi horiek behar bezala justifikatu beharko dira. Halatan, zilegi izanen da zerbitzu aktiboaren luzapena baimendu dakien, Gizarte Segurantzak xedaturiko legezko erretirorako adinera iritsi ondoren, Nafarroako Osasun Zerbitzua-Osasunbideari atxikitako langileen berariazko erregimenari buruzko 11/1992 Foru Legearen A.1 eta A.2.5. estamentuetako profesional fakultatiboei, bai eta estamentu horietakoak izanik zerbitzuburu edo laguntza-ataleko buruaren eginkizunak betetzen ari diren profesionalei ere, baldin eta, betiere, norbere espezialitateko kontratazio-zerrenda irekita badago. Luzapena baimentze aldera inguruabar hori egiaztatzeko momentua izanen da legezko erretirorako aurreikusita dagoen data iritsi baino hilabete lehenago.

Luzapena urtebeterako eginen da, eta luzagarria izanen da baimen-ematearen baldintzei eutsiz gero, interesdunak horretarako eskaera aurretiaz eginik eta hirurogeita hamar urteko adina mugatzat harturik.

Azken xedapenetako hirugarrena.–Jarduneko zerbitzuan jarraitzeko salbuespena.

Salbuespen gisa, baimena ematen da jarduneko zerbitzuan jarraitzeko 70 urteko adinetik aurrera, Lurralde Kohesiorako Departamentuari Herri-lanen eta Azpiegituren Zuzendaritza Nagusiaren barnean atxikitako langileentzat, 2023. urtean zehar, urtebeteko eperako, arrazoiak izanik zerbitzuen beharrizanak, profesionalen gabezia edo berehala egin beharreko proiektu eta/edo obren konplexutasun teknikoa, guztiz garrantzitsua Nafarroako Foru Komunitatearen lurralde garapenerako. Edonola ere arrazoi horiek behar bezala justifikatu beharko dira.

Azken xedapenetako laugarrena.–Arauak emateko ahalmena.

Nafarroako Gobernuak foru lege hau garatu eta aplikatzeko behar diren xedapen guztiak emanen ditu.

Azken xedapenetako bosgarrena.–Indarra hartzea.

Foru lege honek Nafarroako Aldizkari Ofizialean argitaratu eta biharamunean hartuko du indarra, legean berean aurreikusitako efektuekin.

Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta Estatuko Aldizkari Ofizialera igor dadila agintzen dut eta herritar eta agintariei bete eta betearaz dezatela manatzen diet.

Iruñean, 2023ko abenduaren 26an.–Nafarroako Foru Komunitateko lehendakaria, María Chivite Navascués.

Iragarkiaren kodea: F2318370