Iragarkia

243. ALDIZKARIA - 2023ko azaroaren 23a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

234/2023 FORU DEKRETUA, urriaren 31koa, honako arau hauek aldatzen dituena: Pertsona fisikoen errentaren gaineko zergaren Erregelamendua, maiatzaren 24ko 174/1999 Foru Dekretuaren bidez onetsia; Sozietateen gaineko zergaren Erregelamendua, abenduaren 20ko 114/2017 Foru Dekretuaren bidez onetsia; Balio erantsiaren gaineko zergaren Erregelamendua, martxoaren 8ko 86/1993 Foru Dekretuaren bidez onetsia; 8/2010 Foru Dekretua, otsailaren 22koa, identifikazio fiskaleko zenbakia eta hari lotutako zenbait errolda arautzen dituena; 50/2006 Foru Dekretua, uztailaren 17koa, bitarteko elektroniko, informatiko eta telematikoen erabilera arautzen duena Nafarroako Foru Ogasunaren esparruan, eta 177/2001 Foru Dekretua, uztailaren 2koa, Nafarroako Foru Komunitateko Diru-bilketa Erregelamendua onesten duena.

Dekretu honen barruan, lehenengo artikuluan, Pertsona Fisikoen Errentaren gaineko Zergaren (PFEZ) Erregelamenduaren aldaketa jasotzen da.

Lehenik eta behin, haren 2. eta 3. artikuluetan Fundazioen eta babes jardueren tributu araubidea arautzen duen uztailaren 2ko 10/1996 Foru Legeari buruz egiten diren aipamenak zuzentzen dira. Arau hori indargabetu zuen 2/2023 Legegintzako Foru Dekretuak, maiatzaren 24koak, zeinaren bidez onesten baita fundazioen eta irabazi asmorik gabeko bestelako entitateen zerga araubide bereziko xedapenen eta mezenasgorako zerga pizgarrien testu bategina. Horregatik, artikulu horiek aldatu dira, indarra duen arauaren aipamena eransteko.

Bestalde, eguneratu egin dira garraio gastuetarako eta ostalaritza establezimenduetako ohiko mantenu eta egonaldi gastuetarako enpresek langileei ordaintzen dizkieten zenbatekoetatik kargatik salbuesten direnak. Nafarroako Gobernuak bere langileei ordaintzen dizkien kilometrajeko dietei %9,375ko igoera aplikatzearen ondorioz, kilometroko 0,32 eurotik 0,35 eurora pasatzen da. Portzentaje bera aplikatuko zaie gainerako kontzeptuei, PFEZaren Erregelamenduaren 8.A).5 artikuluan xedatutakoa betez.

Era berean, erregelamenduaren zenbait artikuluren testua egokitzen da, Zergari buruzko Foru Legea aldatzen zuen abenduaren 28ko 36/2022 Foru Legean (zenbait zerga eta tributu neurri aldatzen zituen) onetsitako aldaketak jasotzeko. Alde batetik, aitortu beharra ezartzen duen lan etekinen atalaseari dagokionez, eta etekin horiei dagokien atxikipen taulari dagokionez. Beste alde batetik, inbertsio-funts edo inbertsio kotizatuko sozietatetzat (ETF ingelesez) hartzen diren inbertsio kolektiboko instituzioetako partaidetzen edo akzioen itzulketatik edo transmisiotik heldu diren ondare gehitzeen gaineko atxikipenetik salbuesteari dagokionez, kotizatzen duten merkatu nazionala edo atzerritarra edozein dela ere. Azken aldaketa hori Sozietateen gaineko Zergaren (SZ) Erregelamenduan ere jaso da, bigarren artikuluan.

Gainera, informazio betebehar berriak jasotzen dira, edo lehendik zeudenak aldatzen dira, PFEZari buruzko Foru Legearen testu bateginean aurreikusitako araudira egokitzeko:

–Pentsio funtsen erakunde kudeatzaileek zerga informazioari dagokionez dituzten betebehar berak ezartzen zaizkie banakako pentsioekiko produktu paneuroparren sustatzaileei.

–Bizi aseguruei buruzko informazioa emateko betebeharra aldatu da, erreskate eskubiderik gabeko bizi aseguruei buruzko aipamenak jasotzeko, Ondarearen gaineko Zergari buruzko azaroaren 19ko 13/1992 Foru Legearen 17. artikuluan aurreikusitako arauekin bat etorriz.

–"Plataforma operadoreentzat" informazio betebehar berria ezartzen da, Kontseiluaren 2021eko martxoaren 22ko 2021/514 (EB) Zuzentarauaren transposiziotik sortua, (haren bidez aldatu zen 2011/16/EB Zuzentaraua (DAC 7), fiskalitatearen arloko administrazioen arteko lankidetzari buruzkoa).

Azkenik, jarduera artistikoetatik sortzen diren etekinen gaineko atxikipenak murrizten dira, lanaren etekin gisa kalifikatu nahiz jarduera ekonomikoen etekin gisa kalifikatu, baldin eta hartzailearen jarduera nagusia hori bada, eta etekin horiek kopuru jakin batzuetatik gorakoak ez badira. Era berean, aldaketa tekniko bat egiten da jabetza intelektualetik eratorritako etekinen atxikipenei dagokienez, erregulazioa artikulu bakar batean bateratuz.

Bigarren artikuluak, ETFen esparruko atxikipen salbuespenari buruz aipatu den aldaketaz gain, SZren Erregelamenduan eguneratzen du salbuespen bat: sozietateek eta balore agentziek etorkizunekoen, aukeren eta bestelako tresna eratorrien bigarren mailako merkatu ofizialeko kide gisa jarduteko eratutako bermeen kontraprestazioan jasotzen dituzten interesen gainean atxikipena edo konturako sarrera egin beharri dagokiona. Eguneratze hori justifikatzen da azken urteotan baloreen merkatuak eta gainerako finantza tresnak osatzen dituzten azpiegituren erregulazioan, bai Europar Batasuneko Zuzenbidean, bai antolamendu nazionalean, izan diren araudi aldaketengatik.

Aurrekoaz gainera, 49. artikulua indargabetu da, ez baitu zentzurik, abenduaren 29ko 21/2020 Foru Legeak Zergari buruzko Foru Legearen 69.2 artikulua kendu ondoren, eta III. titulua berrantolatu da, ez baita beharrezkoa kapitulutan zatitzea, eta titulu horretan zuzenean sartuko dira 41.tik 48.era bitarteko artikuluak.

Hirugarren artikuluak aldatzen du Balio Erantsiaren gaineko Zergari (BEZ) buruzko Erregelamendua.

Erregelamenduz garatu dira Balio Erantsiaren gaineko Zergari buruzko Foru Legean urtarrilaren 25eko 1/2023 Legegintzako Foru Dekretuaren bidez sartutako aldaketak.

Lehenik eta behin, aduanei buruzko araudiaren arabera esportatzaile jardueran ari diren pertsonek, ondasuna saltzen edo erosten dutenak izan gabe, egiten dituzten ondasun esportazioei aplikagarri zaizkien salbuespenei dagokienez, bai eta aldi baterako gordailu egoeren eta aduana eta zerga araubideen erregulazio berriari dagokionez ere.

Bigarrenik, kreditu kobraezinen kasuan zerga oinarria aldatzeari dagokionez. Zehazki, beste estatu kide bateko organo jurisdikzional batek deklaratutako kaudimengabezia prozesuak jasotzen dira, eta, gehigarri gisa, erreklamazio judizialaren edo notario-errekerimenduaren ordez beste edozein bitarteko erabiltzea aurreikusten da, zordunari kobrantzaren erreklamazioa egin zaiola modu frogagarrian erakusten badu.

Hirugarrenik, higiezinen errentamendu zerbitzuen prestazioak, zergari lotuak eta salbuetsi gabeak, hartzen dituen subjektu pasiboa inbertsio erregelaren aplikaziotik kanpo uztea jasotzen da, eta orobat, higiezinen errentamenduan bitartekaritza zerbitzuen prestazioen hartzailea ere, bi kasuetan, zerga aplikatzen den lurraldean ezarrita ez dauden pertsonek edo entitateek egiten badituzte.

Era berean, erregelamendu bidez garatzen dira Zergari buruzko Foru Legearen 111 quater artikuluak (ekainaren 21eko 3/2023 Legegintzako Foru Dekretuak aipatu Foru Legean sartu zuen artikulu hori berriki) ordainketa zerbitzuen hornitzaileei ezartzen dizkien betebeharrak. 53 ter artikulu berriak erregistratzeko betebeharra garatzen du eta 70 bis artikulu berriak informazioa emateko betebeharra garatzen du.

Gainera, apirilaren 4ko 249/2023 Errege Dekretuak Estatuko araudian egindako aldaketarekin bat etorriz, Balio Erantsiaren gaineko Zergan jaulkitako fakturen erregistro liburuetan gaitzen da zerga oinarrian eta kuotan egindako aldaketen erregistroa, haietarako faktura zuzentzailerik egin beharrik ez dagoenean, esate baterako, zerga oinarria etekin tartearen arabera zehazten den araubide berezietatik eratorritako kuota doikuntzak. Era berean, dokumentatuta ez dauden oharpenak faktura zuzentzailean bidaltzeko epea ere arautzen da.

Azkenik, erregelamenduaren zenbait artikulu eguneratu dira, Zergari buruzko Foru Legearen edukira egokitzeko, eta araudien aipamen batzuk zuzendu dira. Azpimarratzekoa da dirulaguntzak kenkariaren hainbanaketaren izendatzailean sartzeari buruzko aipamena kendu dela, eta orobat, eguneratu dela araubide erraztuan dauden garraio sektoreko subjektu pasiboek jasandako BEZaren itzulketaren ondorioetarako garraiobideen gainean aplikatu beharreko araudi europarraren aipamena.

Laugarren artikuluak aldatzen du identifikazio fiskaleko zenbakia (IFZ) eta horri lotutako errolda zehatz batzuk arautzen dituen Foru Dekretua.

Aldatu egin da, establezimendu iraunkorrik gabe Espainian jarduten duten entitate ez-egoiliarren kasuan, ordezkariaren helbideari buruzko aipamena kentzeko; izan ere, Europako araudiaren arabera, ez daude beharturik ordezkari bat izendatzera.

Bestalde, IFZ errebokatzeko beste kasu bat jaso da, hau da, entitateek beren kontuak edo kontabilitateko agiriak erregistroan lau ekitaldi jarraituetan aurkezteko betebeharra ez dutela bete egiaztatzen den kasua, eta kendu egiten da IFZ birgaitzeko kapital sozialaren titulartasuna aldatzeko eskakizuna.

Bosgarren artikuluak aldatzen du bitarteko elektroniko, informatiko eta telematikoen erabilera Nafarroako Zerga Ogasunaren esparruan arautzen duen Foru Dekretua, pertsona fisiko batzuk jakinarazpen elektronikoa jasotzeko betebeharretik salbuesteko. Aldaketa horrekin, zifraren irizpidea kentzen da, jakinarazpen elektronikoa jasotzeko betebeharraren determinatzaile gisa, egiaztatu baita irizpide horrek zergadunarentzat segurtasun falta eta tributuen kudeaketan arazoak eragiten dituela.

Azkenik, seigarren artikuluak aldatzen du uztailaren 2ko 177/2001 Foru Dekretua, Nafarroako Foru Komunitateko Dirubilketaren Erregelamendua onesten duena, helbideratze kontua dirubilketan laguntzen duen erakunde batean egon behar duelako baldintza kentzeko, era horretan betetzeko Europako Parlamentuaren eta Kontseiluaren 2012ko martxoaren 14ko 260/2012 (EB) Erregelamenduan xedatutakoa.

Nafarroako Foru Komunitateko Administrazioari eta Sektore Publiko Instituzionalari buruzko martxoaren 11ko 11/2019 Foru Legean xedatutakoarekin bat, foru agindu hau prestatu da beharraren, eraginkortasunaren, proportzionaltasunaren, segurtasun juridikoaren, gardentasunaren eta efizientziaren printzipioen arabera.

Beharraren eta eraginkortasun juridikoaren printzipioak betetzen dira, lege arauaren garapena eta garapen horretarako tresna egokia direlako.

Proportzionaltasun printzipioa ere betetzen da, hura onartzea justifikatzen duten helburuak lortzeko beharrezko erregulazioa jasotzen duelako.

Segurtasun juridikoaren printzipioari dagokionez, bermatu da testua foru ordenamendu juridikoarekin koherentea dela.

Gardentasun printzipioa bermatu da zioen azalpen honek modu argian identifikatzen dituelako foru dekretuaren xedea eta helburua, eta orobat, proiektua Nafarroako Gobernu Irekiaren Atarian argitaratzen delako, herritarrek testua ezagutu ahal izan dezaten, entzunaldiaren eta jendaurreko informazioaren izapidean.

Azkenik, efizientziaren printzipioari dagokionez, ahalegina egin da arauak ahalik eta administrazio karga gutxien eragin ditzan herritarrentzat, eta zeharkako kostu gutxien ere bai, baliabide publikoen arrazoizko erabilera sustatzeko bidean.

Horrenbestez, Ekonomia eta Ogasuneko kontseilariak proposaturik, Nafarroako Kontseiluaren irizpena aintzat hartuta, eta bat etorriz Nafarroako Gobernuak bi mila eta hogeita hiruko urriaren hogeita hamaikako bilkuran hartutako erabakiarekin,

DEKRETATZEN DUT:

Lehenengo artikulua. Pertsona fisikoen errentaren gaineko zergari buruzko Erregelamendua aldatzea.

Maiatzaren 24ko 174/1999 Foru Dekretuaren bidez onetsitako Pertsona Fisikoen Errentaren gaineko Zergaren Erregelamenduaren manu batzuk aldatzen dira, eta honela idatzita geldituko dira:

Bat.–2. artikulua; 2. apartatuko 1. paragrafoa eta 3. apartatua aldatzea.

"2. Ikasketetarako beken kasuan, Fundazioen eta irabazi asmorik gabeko beste entitate batzuen eta mezenasgoaren pizgarri fiskalen zerga araubide bereziei buruzko xedapenen testu berreginean (maiatzaren 24ko 2/2023 Legegintza Foru Dekretuaren bidez onetsia) aurreikusitako zerga araubidea aplikatzen duten irabazi asmorik gabeko entitateek emanak direnean; edo Aurrezki kutxei eta banku fundazioei buruzko abenduaren 27ko 26/2013 Legearen II. tituluan araututako banku fundazioek emanak direnean, beren gizarte ekintza aurrera eramateko, aurreko printzipioak betetzen direla ulertuko da, baldintza hauek betetzen direnean:"

"3. Administrazio publikoen zerbitzuko funtzionario eta langileei eta unibertsitateko irakasle eta ikerlariei modu espezifikoan ikerketarako emandako bekak direnean, horiei dagozkien deialdietako oinarrietan aurreikusi beharko da, espresuki, baldintza edo merezimendu gisa, bekaren hartzaileak halakoak direla. Gainera, bekak emateko deialdia egiten duten entitateak arestian aipatutako testu berreginean aurreikusitako zerga araubide berezia aplikatzen duten irabazi asmorik gabeko entitateak direnean, edo 26/2013 Legearen II. tituluan araututako banku fundazioak direnean, beren gizarte ekintza gauzatzeko bidean, artikulu honetako bigarren apartatuan aurreikusitako baldintzak ere bete beharko dira."

Bi.–3.b) artikulua; aldaketa.

"b) Beka horiek zuzenean edo zeharka honako erakunde hauek finantzatuak izatea: Foru Komunitateko Administrazioa, Kirol Kontseilu Gorena, Kirol Olinpikoen Elkartea, Espainiako Batzorde Olinpikoa, Espainiako Batzorde Paralinpikoa, Kirol Federazioak, edo Fundazioen eta irabazi asmorik gabeko beste entitate batzuen eta mezenasgoaren pizgarri fiskalen zerga araubide bereziei buruzko xedapenen testu berreginean aurreikusitako zerga araubidea aplikatzen duten fundazioak."

Hiru.–8.A) artikulua; hauek aldatzea: 2.b) apartatua; 3.a).1. apartatuko bigarren eta hirugarren paragrafoak; eta 3.a).2. apartatuko lehen eta bigarren paragrafoak.

"b) Beste kasu batean, kilometroko 0,35 euro biderkatzetik ateratzen den kantitatea, joan-etorria egin dela frogatzen bada, gehi bidesarien eta aparkalekuaren gastuak, justifikatzen badira''.

"Egonaldi gastuengatik, faktura bidez justifikatzen diren zenbatekoak. Salgaiak errepidez garraiatzen dituzten ibilgailuetako gidarien kasuan, ez da justifikatu beharko, zenbatekoari dagokionez, egunean 16,41 eurotik gorakoak ez diren egonaldi gastuak, Espainiako lurraldean egindako joan-etorriengatik eginak badira, edo egunean 27,34 eurotiko gorakoak ez direnean, atzerriko lurraldera egindako joan-etorriengatik.

Mantenu gastuengatik, 58,34 euro egunean, baldin eta joan-etorria Espainiako lurraldearen barruan egin bada, edo 99,91 euro egunean, atzerriko lurraldean egin bada.

2. Gaua ordaina jasotzen duen langilearen ohiko lanlekua eta bizilekua kokatzen diren udalerritik kanpo igaro ez bada, 29,17 edo 52,59 eurotik gorakoak ez diren mantenu gastuak, Espainiako lurraldearen barruan edo atzerrira egindako joan-etorriak diren, hurrenez hurren.

Hegazkin konpainietako hegaldi langileen kasuan, mantenu gastu arruntetarako esleipentzat hartuko dira egunean 39,44 eurotik gorakoak ez diren zenbatekoak, Espainiako lurraldearen barruko joan-etorriei badagozkie, edo egunean 72,31 eurotik gorakoak, atzerrira egindako joan-etorriei badagozkie. Egun berean bi inguruabar horiek batera gertatzen badira, egindako hegaldi kopuru handienari dagokion zenbatekoa aplikatuko da."

Lau.–8.B) artikulua; hauek aldatzea: 1.a) apartatuko bigarren paragrafoa, 1.b) apartatuko lehen paragrafoa eta 3. apartatua.

"Beste kasu batean, kilometroko 0,35 euro biderkatzetik ateratzen den kantitatea, joan-etorria egin dela frogatzen bada, gehi bidesarien eta aparkalekuaren gastuak, justifikatzen badira.

b) Mantenu gastuengatik 29,17 edo 52,59 euro egunean, joan-etorria Espainiako lurraldean edo atzerrira egin den, horren arabera."

"3. Zinpekogaiek eta zinpeko titular eta ordezkoek beren eginkizunak betetzeko jardunean jasotzen dituzten diru kopuruak ez dira zergapetuko, martxoaren 1eko 385/1996 Errege Dekretuan ezarritakoarekin bat etorriz, ez eta Hauteskunde mahaietako kideek jasotzen dituztenak ere, Hauteskunde mahaietako kideen dieta arautzen duen martxoaren 1eko INT/212/2023 Aginduan ezarritakoarekin bat etorriz."

Bost.–56.a) artikulua; aldaketa.

"a) Urteko guztira 14.500 eurotik beherako lan etekinak.

Sei.–57 bis.1 artikulua; aldaketa.

«1 Alargun pentsioengatik aplikatu beharreko kenkariaren zenbatekoa bat ez badator aurrez ordaindutakoarekin, subjektu pasiboak bere egoera erregularizatu beharko du zerga horren autolikidazioaren kuota diferentzialean, eta aurrez emandako ordainketa okerra edo gehiegizkoa izan bada, horren barnean sartu behar ditu aldez aurreko ordainketa egitetik aurrera sortutako berandutza interesak. Zerga horren autolikidazioa egiten ez duten subjektu pasiboek erregularizazioa eta itzulketa egin beharko dituzte abenduaren 13ko 110/2017 Foru Dekretuaren 10. artikuluan ezarritako moduan, Foru dekretu horren bidez arautzen baita alarguntza pentsioengatiko eta kotizazio gabeko erretiro pentsioengatiko kenkariak aldez aurretik ordaintzeko prozedura."

Zazpi.–62.9 artikulua; aldaketa.

"9. Pentsio funtsak kudeatzen dituzten entitateek aitorpen informatibo bat aurkeztu beharko dute urtero, eta bertan banan-banan zerrendatuko dituzte funts horiei atxikitako planen partaideak eta funts horietara egin dituzten ekarpenen zenbatekoak, dela haiek zuzenean eginak, dela plan horien sustatzaileek eginak.

Pentsio indibidualen produktu paneuroparren sustatzaileak, Europako Parlamentuaren eta Kontseiluaren 2019/1238 (EB) Erregelamenduan (2019ko ekainaren 20koa, pentsio indibidualen produktu paneuropar –PEPP– bati buruzkoa) arautzen baitira, urteko aitorpen informatibo bat aurkeztu beharko dute, banan-banan zerrendatuz beren aurrezkiak plan horietan ematen dituzten pertsonak, bai eta PEPP delako kontu bakoitzean irekitako azpikontuetan egin dituzten ekarpenen zenbatekoak ere.

Pentsio planen sustatzaileek, plan horietara ekarpenak eginez gero, urteko aitorpen informatibo bat aurkeztu beharko dute, banan-banan zerrendatuz ekarpenak zer partaiderentzat egin dituzten, eta partaide bakoitzak egindako ekarpenaren zenbatekoak ere bai.

Pentsioengatiko konpromisoei aurre egiteko kontribuzioak edo ekarpenak Pentsio Planak eta Funtsak arautzeko Legearen testu bateginaren lehen xedapen gehigarrian eta hura garatzeko araudian aurreikusitako moduan egiten dituzten enpresek edo entitateek, alde batera utzita enpresen gizarte aurreikuspeneko planetarako kontribuzioak egiten dituztenak, urteko aitorpen informatibo bat aurkeztu beharko dute, banan-banan zerrendatuz kontribuzioak edo zuzkidurak zer partaiderentzat egin dituzten eta haietako bakoitzari dagozkien zenbatekoak.

Gizarte aurreikuspeneko mutualitateek urteko aitorpen informatiboa aurkeztu beharko dute, banan-banan zerrendatuz mutualitateko kideak eta kontingentzien estaldurarako haiek ordaindutako kopuruak, zerga horren araudian ezarritakoarekin bat, zergaren zerga oinarrian murriztapen edo gutxitzearen xede izan daitezkeen kopuruak badira.

Europar Batasuneko kide den beste estatu batean helbideratutako pentsio funtsek, Espainiako legeriaren menpeko enplegu pentsio planak garatzen badituzte Espainian, urteko aitorpen informatibo bat aurkeztu beharko dute, banan-banan zerrendatuz funts horiei atxikitako planen partaideak eta haietan egin dituzten ekarpenen zenbatekoak, dela haiek zuzenean eginak, dela baimendutako pertsonek edo plan horien sustatzaileek eginak.

Apartatu honetan aipatzen diren aitorpenetan aurreko urte naturaleko datuak eman behar dira."

Zortzi.–62.17.C) artikulua; aldaketa.

"C) Aseguru entitateek, barne direla egoitza Europako Esparru Ekonomikoko kide den beste estatu batean dutenak, Espainian lanean ari badira zerbitzuak aske emateko araubidean, eta berdin finantza entitateek, urteko aitorpen bat aurkeztu beharko dute, bertan informazio hau adierazita:

a) Abenduaren 31ko datan, bizi asegurua hartu duten pertsonen izen-abizenak edo sozietate izena edo izen osoa eta identifikazio fiskalerako zenbakia, data horretan duen erreskate balioa adierazita. Hala ere, hartzaileak ez badauka ahalmenik abenduaren 31n erreskate osoko eskubidea gauzatzeko, data horretan onuradunak lortu beharko lukeen kapitalaren balioa adieraziko da, Ondarearen gaineko Zergari buruzko azaroaren 19ko 13/1992 Foru Legearen 17. artikuluarekin bat etorriz, salbu eta kontratu horiek aldi baterako kontratuak badira, soilik heriotza edo baliaezintasunagatiko edo bestelako arriskuetarako berme osagarriengatiko prestazioak ematen dituztenak, edo kontrasegururik gabeko bizi osoko errentak eta aldi baterakoak.

b) Urte bakoitzeko abenduaren 31n aldi baterako edo bizi arteko errenta baten onuradun direnen izen-deiturak eta identifikazio fiskaleko zenbakia, errenta hori kapital bat dirutan, ondasun higigarrietan edo higiezinetan eman izanaren ondorioa denean, egun horretan duen kapitalizazio balioa adieraziz, Ondarearen gaineko Zergari buruzko azaroaren 19ko 13/1992 Foru Legearen 17. artikuluan xedatutakoarekin bat.

Bederatzi.–62. ter artikulua; aldaketa.

"62. ter artikulua. Plataformetako operadoreek jarduera jakin batzuei buruzko informazioa eman beharra.

A) Informazio betebeharra.

1. "Informazio betebeharra duten plataforma operadoreek" "informazio betebeharra duten saltzaileek" "erreferentziako aldian" egindako "jarduera egokiei" buruzko informazioa, B) letran aipatzen dena, eman beharko diote Zerga Administrazioari.

2. Artikulu honetan aipatzen den informazio betebeharrari dagozkion terminoek Kontseiluaren 2011ko otsailaren 15eko 2011/16/EB Zuzentarauaren V. eranskineko I. sekzioan jasotzen den esanahia izanen dute. Zuzentarau hori fiskalitatearen arloko lankidetza administratiboari buruzkoa da eta 77/799/EEE Zuzentaraua indargabetzen du.

3. Espainiako araudien arabera, estatuko zerga administrazioarekiko "informazio betebeharra duten plataforma operadoreek" Nafarroako Foru Ogasunean aurkeztuko dute aitorpena hala dagokionean, bat etorriz Estatuaren eta Nafarroako Foru Komunitatearen arteko Hitzarmen Ekonomikoaren 46.2 artikuluan ezarritakoarekin.

4. Ondoko hauek ez daude artikulu honetan aipatzen den informazio betebeharrari atxikiak:

a) "Salbuetsitako plataforma operadoreak", baldin eta, legeria nazionalari jarraiki, frogatzen badute beren plataformaren enpresa ereduak ez duela "informazio betebeharra duen saltzailerik".

b) "Europar Batasunetik kanpoko plataforma operadore kualifikatuak", "dagozkion jarduera kualifikatuei" buruzko informazioari dagokionez.

B) Aitorpen informatiboa.

1 Artikulu honetan aipatzen den informazioa emateko aitorpen informatiboak datu hauek emanen ditu:

a) "Informazio betebeharra duen plataforma operadoreari" dagokionez:

1. Pertsona fisikoaren izen-abizenak edo entitatearen sozietate izena.

2. Identifikazio fiskaleko zenbakia eta, hala badagokio, Espainiako Zerga Administrazioak esleitutako identifikazio zenbaki indibiduala.

3. Plataformaren identifikazioa.

b) "Jarduera egokia" egin duen "informazio betebeharra duen saltzaile" bakoitzari dagokionez:

1. Estatuko araudian eginbide arduratsuei buruz ezarritako arau eta prozeduren arabera lortu behar diren datuak.

2. "Kontraprestazioa" ordaindu edo abonatzen den "finantza kontuaren identifikatzailea". Datu hori emanen da baldin eta "informazio betebeharra duen plataforma operadorearen" esku badago, eta "informazio betebeharra duen saltzaileak" egoitza duen Europako estatu kideko agintaritza eskudunak edo "Jurisdikzio kideak" ez badu jakinarazi "finantza kontuaren identifikatzailea" ez duela erabiliko helburu horietarako.

3. "Informazio betebeharra duen saltzailearen" izena eta "finantza kontuaren identifikatzailea" desberdinak direnean, "kontraprestazioa" ordaintzen edo abonatzen den finantza kontuaren titularraren izena eman behar da, "informazio betebeharra duen plataforma operadorearen" esku dagoen neurrian; horrez gain, "plataforma operadore" horrek kontuaren titular horri buruz duen finantza identifikazioaren inguruan eskura izaten ahal duen beste edozein informazio ere emanen da.

4. 2011/16/EB Zuzentarauaren V. eranskinaren II. sekzioaren D apartatuaren arabera, "informazio betebeharra duen saltzaileak" egoitza duen estatu kide edo "jurisdikzio kide" bakoitza.

5. "Erreferentzia aldiko" hiruhileko bakoitzean ordaindu edo abonatu den "kontraprestazioaren" guztirakoa, eta "kontraprestazioa" ordaindu edo abonatu beharra sortu duten "jarduera egokien" kopurua ere bai.

Moneta fiduziario batean ordaindu edo abonatu den "kontraprestazioari" buruzko informazioa ordaindu edo abonatu den monetan emanen da. Hala ez bada, eurotan jakinaraziko da, "informazio betebeharra duen plataforma operadoreak" uniformeki aplikatutako irizpide baten bidez bihurtua edo baloratua.

"Kontraprestazioari" eta beste zenbateko batzuei buruzko informazioa emanen da ordaindu edo abonatu den "erreferentzia aldiaren" hiruhilekoa kontuan hartuta.

6. "Informazio betebeharra duen plataforma operadoreak" "erreferentzia aldiko" hiruhileko bakoitzean atxiki edo kobratutako komisio, fidantza, tarifa, zerga eta bestelako kantitate guztiak.

c) Ondasun higiezinen errentamendua edo aldi baterako lagapena dakarren "jarduera egoki" bat egin duen "informazio betebeharra duen saltzaile" bakoitzari dagokionez, b) letran aipatzen den informazioaz gain, honako hauek ere eman behar ditu:

1. "Merkaturatutako ondasun higiezin" bakoitzaren helbidea, bidezkotasun eginbidearen prozeduren arabera zehaztua, eta dagokion katastroko erreferentzia zenbakia, edo haren baliokidea dagokion estatu kideko edo "jurisdikzio kideko" legerian, ezagutzen badu.

2. "Merkaturatutako ondasun higiezin" bakoitza "erreferentzia aldian" alokatu edo laga den egunen kopurua eta "merkaturatutako ondasun higiezin" bakoitzaren mota, jakinez gero.

Gainera, B).1.b).5. paragrafoan "kontraprestazioari" eta "jarduera egokiei" buruz aipatutako informazioa, "merkaturatutako ondasun higiezin" bakoitzari dagokionez jakinaraziko da.

2. Zerga arloan eskumena duen departamentuko titularrak "informazio betebeharra duten plataforma operadoreek" aurkeztu behar duten informazioa zehazten ahalko du, operadore horiek frogatzen ahal badute, legeria nazionalarekin bat etorriz, informazio hori bera jakinarazia duela "informazio betebeharra duen beste plataforma operadore" batek.

3. Aitorpena aurkeztuko da zerga arloan eskumena duen departamentuko titularrak ezartzen dituen epeetan eta moduan.

4. 13/2000 Foru Legearen III. tituluko VI. kapituluan ezarritakoaren ondorioetarako, datu desberdinak dira B).1 apartatuko letretako ordinal bakoitzak aipatzen dituen informazioak, informazio bakoitzak aipatzen duen "informazio betebeharra duen plataforma operadore" eta "informazio betebeharra duen saltzaile" bakoitzari dagokionez.

Arestian esandakoa hala izanda ere, B).1.b).1. apartatuan jasotzen den kasuan, ordinal horren arabera lortu beharreko datu guztiak hartuko dira datutzat."

Hamar.–64.3 artikulua; i) letra aldatzea eta j) letra gehitzea.

"i) Inbertsio kolektiboko erakundeetan partaidetzak edo akzioak itzuli edo eskualdatzearen ondoriozko ondare gehikuntzak, Zergari buruzko Foru Legearen 52. artikuluan ezarritakoaren arabera, horiek konputatzea bidezkoa ez denean.

j) Inbertsio kolektiboko erakunde hauek jaulkitako partaidetzak edo akzioak itzuli edo eskualdatzearen ondoriozko ondare gehikuntzak:

1. Funts kotizatuak eta SICAV erako inbertsio sozietate kotizatuak, 35/2003 Legea garatzeko Erregelamenduaren 79. artikuluan arautzen direnak.

2. Atzerrian eratutako inbertsio kolektiboko erakundeak, 1. puntuan aipatutakoen antzekoak, eta Zergari buruzko Foru Legearen 52.4 artikuluan aurreikusitakoak ez direnak, merkatu arautu batean nahiz negoziazio sistema aldeaniztun batean kotizatzen dutenak, edozein dela ere erreproduzitzen, errepikatzen edo erreferentziatzat hartzen duten indizearen osaera, baldin eta, gainera, itzulketa edo eskualdaketa ez bada egiten jurisdikzio ez lankidetzat jotzen den herrialde edo lurralde bateko merkatu batean".

Hamaika.–71.Bat, artikulua; aldaketa.

71. artikulua. Bat, atxikipen portzentajeen taula orokorra:

Hamabi.–71.Bi.4 artikulua; lehen paragrafoaren aldaketa.

"4. Aurreko apartatuetan xedatutakotik ateratzen den atxikipen portzentajea ez da ehuneko 2 baino txikiagoa izanen, urtebetekoak edo lanaldi osokoak izatera iristen ez diren kontratuak edo harremanak direnean, edo arte eszenikoetan, ikus-entzunezkoetan eta musikaletan aritzen diren artisten lan harreman berezi batetik heldu direnean, ezta jarduera hori garatzeko beharrezkoak diren jarduera teknikoak edo osagarriak egiten dituzten pertsonen lan harremanetatik heldu direnean ere; eta ehuneko 15 baino txikiagoa ere ez, lanaren etekinak mendetasunezko beste lan harreman berezi batzuetatik heldu direnean.

Hamahiru.–73. artikulua; aldaketa.

"73. artikulua. Kapital higigarriaren etekinen gaineko atxikipenen zenbatekoa.

Kapital higigarriaren etekinen gaineko atxikipena edo konturako sarrera %19koa izanen da.

Hamalau.–78.1 artikulua; d) letra gehitzea.

"d) Maiatzaren 28ko 7/1996 Foru Legeak onartutako Jarduera Ekonomikoen gaineko Zergaren Tarifetan eta Instrukzioan jasota dauden bigarren sekzioko 851, 852, 853, 861, 862, 864 eta 869 taldeetan eta hirugarren sekzioko 01, 02, 03 eta 05 taldeetan jasotzen diren jarduerak garatzen dituzten zergadunak; edo jarduera profesional horren kontraprestazioa eratortzen denean zerbitzu-prestazio batetik, eta prestazio hori, besteren kontura eginez gero, sartuko balitz arte eszenikoetan. ikus-entzunezkoetan eta musikaletan aritzen diren artisten edo jarduera hori garatzeko beharrezkoak diren jarduera teknikoak edo osagarriak egiten dituzten pertsonen lan harreman berezien aplikazio esparruan, betiere, letra honetan aurreikusitako kasuetatik edozeinetan, jarduera horien etekin guztien bolumena, aurreko ekitaldiari dagokionez, 15.000 euro baino txikiagoa bada, eta zergadunak ekitaldi horretan lanetik eta jarduera ekonomikoetatik lortu dituen etekin guztien %75 baino gehiago bada. Atxikipen mota hori aplikatzeko, zergadunek etekinen ordaintzaileari jakinarazi beharko diote inguruabar horiek gertatzen direla, eta ordaintzaileak jakinarazpena gorde beharko du, behar bezala sinatuta."

Hamabost.–V. titulua, II. kapitulua, 5. sekzioa; errubrika aldatzea.

"5. sekzioa Errenta jakin batzuen gaineko atxikipenen zenbatekoa, haien kalifikazioa edozein dela ere".

Hamasei.–84. artikulua; errubrika aldatzea.

"84. artikulua. Irudi eskubideen, jabetza intelektualaren eta industrialaren eta beste errenta batzuen gaineko atxikipenen zenbatekoa".

Hamazazpi.–84. artikulua; 2. apartatua aldatzea eta 3. apartatu bat gehitzea.

"2. 64.2.b) artikuluan jasotako gainerako kontzeptuetatik heldu diren etekinen gainean egin beharreko atxikipena, kalifikazioa gorabehera, jabetza intelektualetik eratorritakoak izan ezik, ordaindutako sarrera guztiei %19ko atxikipen tasa aplikatzearen emaitza izanen da.''

3. Jabetza intelektualetik eratorritako etekinak badira, haien kalifikazioa edozein dela ere, atxikipenaren portzentajea %15 izanen da. Ondoko kasu hauetan, ordea, %7ko portzentajea aplikatuko da:

a) Lanaren etekin gisa kalifikatzen direnean, eta aurreko ekitaldiari dagokion etekin oso horien bolumena 15.000 eurotik beherakoa denean, eta zergadunak ekitaldi horretan bere jarduera ekonomikotik eta lanetik lortu dituen etekin osoen baturaren %75 baino gehiago osatzen duenean.

b) 78.1.d) artikuluan aipatzen diren lanbide jardueren etekinak direnean eta han ezarritako baldintzak betetzen direnean.

c) Zenbait urtetan sortuko diren egile eskubideen ustiapenaren lagapenetik eratorritako konturako aurrerakinak direnean.

Atxikipen mota hori a) eta b) letretan jasotako kasuetan aplikatzeko, zergadunek etekinen ordaintzaileari jakinarazi beharko diote inguruabar horiek gertatzen direla, eta ordaintzaileak komunikazioa gorde beharko du, behar bezala sinatuta."

Bigarren artikulua. Sozietateen gaineko zergaren Erregelamendua aldatzea.

Abenduaren 20ko 114/2017 Foru Dekretuaren bidez onetsitako Sozietateen gaineko Zergaren Erregelamenduaren manu hauek jarraian agertzen den testua izanen dute:

Bat.–42.5, artikulua; aldaketa.

"5. Balore sozietateek jasotako interesak, urriaren 23ko 4/2015 Legegintzako Errege Dekretuaren bidez onetsitako Balore Merkatuari buruzko Legearen testu bategineko 141.b) artikuluan aipatzen den balore erosketa edo salmenta eragiketekin lotuta emandako kredituen ondorioz; eta orobat, inbertsio zerbitzuetako enpresek jasotako interesak, Inbertsio zerbitzuen enpresen eta inbertsio zerbitzuak ematen dituzten gainerako entitateen araubide juridikoari buruzko otsailaren 15eko 217/2008 Errege Dekretuaren 50.2 artikuluan aipatzen diren mailegu edo gordailuen eragiketa aktiboekin lotutakoak direnean (haren bidez partzialki aldatzen da Inbertsio Kolektiboetako Instituzioei buruzko azaroaren 4ko 35/2003 Legearen Erregelamendua).

Era berean, ez da atxikipenik egin beharko kontrapartida zentraleko entitateek eta kontrapartida zentraleko entitate bateko kide diren entitateek jaso dituzten interesen gainean, Balore Merkatuaren Legearen testu bateginaren 109.3 artikuluan aurreikusitakoa aplikatuz, Europako Parlamentuaren eta Kontseiluaren 648/2012 Erregelamenduaren 41. eta 42. artikuluetan ezarritakoa aplikatuz (burtsatik kanpoko eratorriak, kontrapartida zentraleko entitateak eta eragiketen erregistroak arautzen ditu); eta orobat, kontrapartida zentraleko entitatearen beraren erregelamenduan ezarritakoa aplikatuz, eratutako bermeen kontraprestazio gisa."

Bi.–42.25 artikulua; aldaketa.

"25) Inbertsio kolektiboko erakunde hauek jaulkitako partaidetzak edo akzioak itzuli edo eskualdatzearen ondoriozko errentak:

a) Inbertsio kolektiboko instituzioei buruzko azaroaren 4ko 35/2003 Legea garatzeko Erregelamenduaren 79. artikuluan aipatzen diren funts kotizatuak eta SICAV erako sozietate kotizatuak.

b) Atzerrian eratutako inbertsio kolektiboko erakundeak, a) letran aipatutakoen antzekoak eta Zergari buruzko Foru Legearen 97. artikuluan aurreikusitakoez bestelakoak, merkatu arautu batean kotizatu nahiz negoziazio sistema aldeaniztun batean kotizatu, edozein dela ere erreproduzitzen, errepikatzen edo erreferentziatzat hartzen duten indizearen osaera, baldin eta, gainera, itzulketa edo eskualdaketa ez bada egiten jurisdikzio lankidetzat jotzen ez den herrialde edo lurralde batean kokatutako merkatu batean".

Hiru.–III. titulua; I. eta II. kapituluak kentzea eta 49. artikulua indargabetzea, 41.etik 48.era bitarteko artikuluak III. tituluan sartuta.

Lau.–51. artikulua; aldaketa.

"51. artikulua. Zerga kontsolidaziorako araubideari atxikitako entitateak: aplikazioa eta informazio betebeharrak.

1. Kontsolidazio fiskaleko araubidearen aldeko hautuaren erabilera Nafarroako Foru Ogasunari jakinaraziko zaio.

2. Datu hauek izan behar ditu jakinarazpen horrek:

a) Talde fiskala osatzen duten sozietateen identifikazioa.

Entitate nagusia Espainiako lurraldean ez-egoiliarra bada edo, Espainiako lurraldean egoiliarra izanik, araubide komuna bete behar badu banakako tributu araubidean zerga honetan, horrez gain, haren identifikazioa ere eskatuko da.

Espainiako lurraldean ez-egoiliarrak diren entitateen establezimendu iraunkorren kasuan, gainera, lurralde espainiarrean egoiliarrak ez diren eta beraiek barne dauden entitate hori ere identifikatzeko.

b) Talde fiskaleko entitateek kontsolidazio fiskaleko araubidea hautatzeko hartutako erabakien kopia, eta, entitate nagusia ez bada Espainiako lurraldeko egoiliarra, edo bertako egoiliarra izanda ere, zerga honetan banakako tributu araubideko araudi erkidearen menpe badago, entitate ordezkaria izendatzen duen agiria.

c) Talde fiskala osatzen duten entitate guztiekiko entitate nagusiak duen zuzeneko nahiz zeharkako partaidetzaren portzentajeen zerrenda, horien gainean dituen boto eskubideen portzentajea eta partaidetza horiek eskuratu dituen data.

Entitate ordezkariak adieraziko du zergari buruzko foru legearen 100. artikuluan ezarritako baldintza guztiak betetzen direla."

Hirugarren artikulua. Balio erantsiaren gaineko zergaren Erregelamenduaren aldaketa.

Martxoaren 8ko 86/1993 Foru Dekretuaren bidez onetsitako Balio Erantsiaren gaineko Zergaren Erregelamenduaren betebehar hauek era honetan idatzita geratuko dira:

Bat.–9. artikuluan aldatzen dira: 1. apartatuan, 1. paragrafoko 1. ordinala; 2. ordinaleko A) letra; 3. ordinaleko 1.-etik 5.-era bitarteko paragrafoak eta a), e) eta f) letrak; eta 4. ordinaleko hirugarren paragrafoa; eta 2. apartatua ere aldatzen da.

"1. Eskualdatzaileak edo esportatzaile den pertsonak, aduana arloko araudian xedatutakoaren arabera, eskualdatzailea bera ez bada, edo haien izenean eta kontura ari den beste pertsona batek esportatu edo bidali dituen ondasunen entregak.

Kasu horietan, salbuespena aplikatzeko baldintza izanen da ondasunak egiaz ateratzea Komunitatearen lurraldetik, eta hala dela ulertuko da, aduanetako legeriatik hala ondorioztatzen denean.

Salbuespena aplikatu dela justifikatzeko, eskualdatzaileak edo esportatzaile izaera duen pertsonak Administrazioari eskuratzeko moduan gorde beharko ditu, zergaren preskripzio epean, fakturak, kontratuak edo eskaera oharrak, garraio agiriak, ondasunen irteera egiaztatzen duten agiriak eta eragiketaren gainerako frogagiriak edo haien kopiak.

2. Zergaren aplikazio lurraldean ezarririk ez dagoen eskuratzaileak edo esportatzaile izaera duen pertsonak, aduanetako araudiaren arabera, ezarririk ez dagoen eskuratzailea bera ez bada, edo aurrekoen izenean eta kontura ari den beste pertsona batek esportatu edo bidalitako ondasun entregak, honako kasu hauetan:

A) Merkataritza araubideko entregak.

Entregen objektu diren ondasunak bidalketa komertzial bat direnean, salbuespena aplikatzeko baldintza hauek bete beharko dira:

a) 1. ordinalean ezarritakoak.

b) Ukatu gabe, kasua hori bada, 3.d) ordinaleko bigarren paragrafoan xedatutakoa, ondasunak aduanara eraman beharko dira eskura jarri eta hilabeteko epean, eta erosleak horren esportazioari buruzko aduana agiria aurkeztuko du.

Agiri horretan Komunitatean ezarrita dagoen hornitzailearen izena ere jasoko da, eta, hark izanen du, kasua bada, esportatzaile izaera, bere identifikazio fiskaleko zenbakiarekin eta hark emandako fakturaren erreferentziarekin; erosleak hornitzaile horri bidali behar dio agiriaren kopia, irteerako aduanak izapidetuta.

Aurreko baldintzak, hala badagokio, esportatzaile izaera duenak bete beharko ditu; aduana araudian xedatutakoaren arabera, zerga aplikatzen den lurraldean finkatu gabeko eskuratzailea ez den beste batek."

"3. Esportatzen diren ondasun higigarrietan egindako lanak.

Zergari buruzko Foru Legearen 21.1.3.g) artikuluan ezarritakoa ukatu gabe, ondasun higigarrien gainean egindako lanak salbuetsita daude, ondasun horiek eskuratu edo inportatu badira lan horiek egiteko, eta ondoren esportatu edo eramaten baditu pertsona hauetako batek: lan horiek egin dituenak; horien hartzaileak, zerga aplikatzen den lurraldean establezimendurik ez duenak; edo beste pertsona batek, aduana arloko araudian xedatutakoaren arabera esportatzailea bada; edo beste batek, aurreko horietako edozeinen izenean eta haren kontura ari denak.

Lan horiek izaten ahal dira ondasunak hobetu, eraldatu, mantendu edo konpontzeko, edo ondasun horiei edozein jatorritako beste ondasun batzuk eransteko, ondasun horiek Zergari buruzko Foru Legearen 21. artikuluan jasotako aduana araubideei lotu beharrik gabe.

Ordinal horretatik salbuesteak ez ditu barne hartzen aldi baterako inportazioko aduana araubideen babesean dauden ondasunen gainean egindako lanak, inportazio eskubideen osoko edo zatiko salbuespenarekin, ezta aldi baterako inportazioko araubide fiskala ere.

Lan horiek salbuesteko baldintza izanen da honako eskakizun hauek betetzea:

a) 2. ordinalean ezarritakoak, lanen hartzaileak beteak, zergaren aplikazio lurraldean finkatu gabekoa bada, edo haien prestazioa eman duenak beteak, dagokionaren arabera."

"e) Lanak bukatu ondoren, ondasunak aduanara bidali beharko dira, hilabeteko epean, esportatuak izan daitezen.

Esportazioa lanen hartzaileak edo zerbitzu horien prestazioa eman duen pertsonak egin beharko du, edo, bestela, esportatzaile den beste pertsona batek, aduanei buruzko araudian xedatutakoarekin bat etorriz, eta esportazioari buruzko agirian jaso beharko dira Komunitatean ezarritako hornitzailearen identifikazioa eta hark emandako fakturaren erreferentzia.

Hirugarren batek ere egiten ahalko du, aurrekoen izenean eta kontura.

f) Finkatu gabeko hartzaileak edo, kasua bada, lanen prestazioa egiten duenak, edo bi izaera horiek gabe, esportatzaile izaera duen pertsonak, aduana araudian xedatutakoarekin bat etorriz, esportazio dokumentuaren kopia bat bidali beharko diote ondasunen hornitzaileari, irteerako aduanak izapidetuta."

"Entrega horiei dagokienez, 1. ordinalean xedatutakoa ere aplikagarria izanen da."

"2. 1. paragrafoan ezarritako baldintzak betetzen ez badira, subjektu pasiboak nahitaez likidatu eta jasanarazi beharko dio zerga egindako eragiketen hartzaileari."

Bi.–11. artikulua, errubrika eta 2. apartatua aldatzea eta 1. apartatua indargabetzea.

"11. artikulua. Aldi baterako gordailu egoerei dagozkien salbuespenak.

2. Aldi baterako gordailu egoeran dauden ondasunen entregak eta ondasun horiei dagozkien zerbitzu prestazioak salbuetsita egonen dira, ondasun horiek, aduanako legeriaren arabera, egoera horretan dauden bitartean."

Hiru.–12. artikulua; errubrika aldatzea.

"12. artikulua. Aduana eta zerga araubideei dagozkien salbuespenak".

Lau.–15.2 artikulua; lehenengo paragrafoa eta a).2. letra aldatzea; eta c’’) letra gehitzea b).3.).b’) letran.

"2. Zerga oinarriaren aldaketa, zerga bete behar duten eragiketen hartzailearen konkurtsoa deklaratzeko auto judiziala eman denean, edo hartzaile hori Kaudimen gabeziaren prozedurei buruz Europako Parlamentuak eta Kontseiluak 2015eko maiatzaren 20an emandako 2015/848 (EB) Erregelamendua aplikagarria zaion kaudimen gabeziaren prozedura batean sartua dagoela deklaratu denean, eta jasanarazitako kuotei dagozkien kredituak osorik edo hein batean kobraezinak diren gainerako kasuetan, jarraian ematen diren arauak betez eginen da:"

"2. Hartzekodunak hilabeteko epean komunikatuko du, zuzenketa faktura igortzen denetik aurrera, bide elektronikoen bidez, Interneten bidez, horretarako prestatutako inprimakia erabilita, zerga oinarriari egindako aldaketa, eta adieraziko du aldaketa horrek ez dituela ukituko kreditu bermatuak, finkatuak edo aseguratuak, ez eta elkarri lotutako pertsonen edo entitateen arteko kredituak ere, eta eragiketen hartzailea finkatua ez dagoenean zergaren aplikazio lurraldean, ez Kanarietan, ez Ceutan edo ez Melillan ere, eragiketa horiek ere ez dituela ukitzen aldaketak, salbu eta, finkatua ez dagoen hartzaile hori sartuta baldin badago kaudimen gabeziaren prozedura batean, eta hari aplikagarria bazaio Kaudimengabeziaren prozedurei buruz Europako Parlamentuak eta Kontseiluak 2015eko maiatzaren 20an emandako 2015/848 (EB) Erregelamendua, Zergari buruzko Foru Legearen 28. artikuluan aurreikusitako moduan, eta kreditu kobraezinen kasuan, zorduna ez dagoela konkurtsoan sartua deklaratu denean, edo, kasua bada, faktura zuzentzailea konkurtsoa deklaratu zuen autoa baino lehen eman bada, edo 2015/848 (EB) Erregelamendua aplikagarria zaion kaudimengabeziaren prozeduraren ebazpena baino lehen.

Jakinarazpen horri, jarraian adierazten diren agiriak erantsiko zaizkio, Nafarroako Zerga Ogasunaren erregistro telematikoaren bidez bidalita:

a’) Faktura zuzentzaileen kopiak, zuzendutako fakturak eman ziren datak adieraziz.

b’) Kreditu kobraezinen kasuan, hartzekoduna zordunari erreklamazioa egin diola frogatzen duten erreklamazio judizialaren agiria, edo notarioaren aginduaren agiria, edo kreditua kobratzen saiatu dela frogatzen duen bestelako agiriren bat.

c’) Erakunde publikoek zorretan dituzten kredituei dagokienez, erakunde publiko zordunaren organo eskudunak egindako ziurtagiria, Zergari buruzko Foru Legearen 28.4.A) artikuluaren 4. baldintzari dagokiona.

"c´´) Eragiketen hartzailea kaudimengabezia prozedura batean sartu dela deklaratu da, eta Kaudimengabezia prozedurei buruz Europako Parlamentuak eta Kontseiluak 2015eko maiatzaren 20an emandako 2015/848 (EB) Erregelamendua aplikatu behar zaio."

Bost.–19.1.5. artikulua; bigarren paragrafoa aldatzea.

"Ez da beharrezkoa izanen aipatutako eskaera aurkeztea, hasten diren jardueren xede izanen diren ondasun emateak edo zerbitzu prestazioak, eta, kasua bada, lehendik egiten ziren jardueren xede direnak, Zergari buruzko Foru Legearen 40.1 artikuluan zerrendatutako eragiketen multzokoak bakarrik direnean, eta eragiketa horiek kenkarirako eskubidea sortzen badute."

Sei.–20 bis.1 artikulua; bigarren paragrafoa aldatzea.

Aurreko paragrafoan aipatzen diren garraiobideak, salgaien garraioa errepidez egiten dituzten subjektu pasiboek erosten dituztenean, N1 kategorian sartuta egon behar dute, eta 2.500 kiloko gehieneko masa baimendua izanen dute gutxienez, edo N2 eta N3 kategorietan. Kategoria horiek guztiak jasota daude Europako Parlamentuak eta Kontseiluak Ibilgailu motordunak eta horietarako atoi, sistema, osagai eta unitate tekniko independenteak homologatzeari eta zaintzeari buruz 2018ko maiatzaren 30ean emandako 2018/858 (EB) Erregelamenduaren 4. artikuluan. Erregelamendu horren bidez aldatu ziren 715/2007 (EE) eta 595/2009 (EE) Erregelamenduak eta indargabetu zen 2007/46/EE Zuzentaraua".

Zazpi.–53. ter artikulua; gehitzea.

"53. ter artikulua. Ordainketa zerbitzuen hornitzaileen erregistroen edukiak.

1. Ordainketa zerbitzuen hornitzaileen erregistroak Zergari buruzko Foru Legearen 111. quater.1 artikuluan aurreikusten dira, eta informazio hau jaso behar dute:

a) BIC kodea edo entitatearen beste edozein kode identifikatzaile, ordainketa zerbitzuen hornitzailea zalantzarik gabe identifikatzen duena;

b) onuradunaren izena edo izen komertziala, ordainketa zerbitzuen hornitzailearen erregistroetan agertzen dena;

c) halakorik izanez gero, Balio Erantsiaren gaineko Zergaren ondorioetarako edozein identifikazio zenbaki edo onuradunaren identifikazio fiskaleko beste zenbaki nazional bat;

d) IBAN zenbakia edo, halakorik ez bada, onuraduna argi eta garbi identifikatzeko eta haren kokapena eskainiko duen beste edozein identifikazio bitarteko.

e) BIC kodea edo entitatearen beste edozein identifikazio kode, onuradunaren izenean ari den ordainketa zerbitzuen hornitzailea zalantzarik gabe identifikatzen duena eta haren kokapena eskaintzen duena, onuradunak funtsak jasotzen dituenean ordainketa konturik gabe;

f) halakorik izanez gero, onuradunaren helbidea, ordainketa zerbitzuen hornitzailearen erregistroetan agertzen den moduan;

g) Zergari buruzko Foru Legearen 111 quater.1 artikuluak aipatzen dituen mugaz gaindiko edozein ordainketaren xehetasunak;

h) Ordainketen edozein itzulketaren xehetasunak, halakotzat aitortu direnak, g) letran aipatzen diren mugaz gaindiko ordainketei dagokienez.

2. 1. apartatuko g) eta h) letretan aipatutako informazioak datu hauek jasoko ditu:

a) ordainketaren edo haren itzulketaren eguna eta ordua;

b) ordainketaren edo haren itzulketaren zenbatekoa eta dibisa;

c) onuradunak edo haren izenean jasotako ordainketaren jatorrizko estatu kidea, itzulketaren destinoko estatu kidea, hala badagokio, eta ordainketaren edo haren itzulketaren jatorria edo destinoa zehazteko erabilitako informazioa, Zergari buruzko Foru Legearen 111.quinquies artikuluari jarraiki;

d) ordainketa zalantzarik gabe identifikatzen duen edozein erreferentzia;

e) hala badagokio, ordainketa merkatariaren lokal fisikoetan hasi dela agertzen duen datua.

3. Zergari buruzko Foru Legearen 111. ter artikuluan aurreikusitako definizioak ere aplikagarriak izanen dira, artikulu honen ondorioetarako."

Zortzi.–54.3 artikulua; bigarren paragrafo bat gehitzea, eta oraingo bigarren paragrafoa hirugarrena izatea.

"Faktura zuzentzailea ematea egokia ez denean, egindako fakturen erregistro liburuan jasoko dira zerga oinarriaren eta kuotaren erregularizazioak edo doikuntzak, bidaia agentzien araubide bereziaren edo ondasun erabilien, arte objektuen, antigoaleko gauzen eta bilduma objektuen araubide bereziaren babesean egindako eragiketetan hasiera batean kalkulatuak, deskontuen edo eragiketa sortu ondoko beste inguruabar batzuen ondorioz."

Bederatzi.–60 bis.1.a) artikulua; bigarren paragrafo bat gehitzea.

"Faktura zuzentzailea ematea egokia ez den kasuetan, eta emandako fakturen erregistro liburuan jaso behar direnean zerga oinarriaren eta kuotaren erregularizazioak edo doikuntzak, bidaia agentzien araubide bereziaren edo ondasun erabilien, arte objektuen, antigoaleko gauzen eta bilduma objektuen araubide bereziaren babesean egindako eragiketetan hasiera batean kalkulatuak, ohar horiek erregistratu beharko dira erregularizazio edo doikuntza horiek atzeman diren hilaren hurrengo hilabetearen 16a baino lehen."

Hamar.–68.1.4. artikulua; aldaketa.

"4. Europar Batasunaren barruko zerbitzu eskurapenak.

Erregelamendu honen ondorioetarako, Batasunaren barruko zerbitzu eskurapenak izanen dira enpresaburu edo profesional batek ematen dituenak eta zergaren aplikazio lurraldean zergari lotuta daudenak eta salbuetsita ez daudenak, enpresaburu edo profesional horren jarduera ekonomikoaren egoitza edo zerbitzuak emateko establezimendu iraunkorra edo, bestela, haren helbidea edo ohiko egoitza Batasunean dagoenean, baina zergaren aplikazio lurraldetik kanpo, eta subjeku pasiboa horien hartzailea denean."

Hamaika.–69.1.3. artikulua; lehenengo paragrafoa aldatzea.

"3. 68.1.5. artikuluan aipatzen diren eragiketetan bereiz adierazi behar dira hurrengo entregak; eta, horiei dagokienez, datu hauek eman behar dira:"

Hamabi.–XI. titulua; III. bis kapitulua gehitzea.

"III. bis kapitulua. Ordainketa zerbitzuen hornitzaileen erregistroei buruzko aitorpena.

70.bis artikulua. Ordainketa zerbitzuen hornitzaileen erregistroei buruzko aitorpena aurkezteko betebeharra, epea, modua eta eredua.

1. Zergari buruzko Foru Legearen 111. quater artikuluan aipatzen diren ordainketa zerbitzuen hornitzaileek artikulu horretan ezarritakoa betez mantendu behar dituzten erregistroei buruzko aitorpena aurkeztu behar dute.

2. Aitorpen hori aurkeztu behar da dagokion hiruhileko naturalaren hurrengo hilaren lehen hogei egun naturaletan.

3. Aipatutako aitorpena aurkeztu behar da zerga arloko eskumena duen departamentuko titularrak ezartzen duen moduan eta ereduan."

Laugarren artikulua. Identifikazio fiskaleko zenbakia eta horri lotutako errolda zehatz batzuk arautzen dituen Foru Dekretua aldatzea.

Identifikazio fiskaleko zenbakia eta horri lotutako errolda zehatz batzuk arautzen dituen otsailaren 22ko 8/2010 Foru Dekretuko manuetatik, ondoren aipatzen direnen testuak era honetan geratuko dira:

Bat.–2. artikulua; aldaketa.

"2. artikulua. Nafarroako Foru Ogasunaren eskumena.

Estatuaren eta Nafarroako Foru Komunitatearen arteko Hitzarmen Ekonomikoan ezarritakoaren esparruan, Nafarroako Zerga Ogasunak eskumena izanen du identifikazio fiskaleko zenbakia esleitzeko, errebokatzeko eta birgaitzeko, honako kasu hauetan:

1. Pertsona fisikoei, beren ohiko bizilekua Nafarroan badute.

2. Pertsona juridikoei eta nortasun juridikorik gabeko erakundeei, helbide fiskala Nafarroan badute.

3. Espainiako lurraldean egoitza ez duten pertsona fisikoei edo entitateei:

a) Espainiako lurraldean lan egiten badute establezimendu iraunkor baten bidez, establezimendu iraunkorraren helbide fiskala Nafarroan izanez gero.

b) Espainiako lurraldean lan egiten badute establezimendu iraunkorrik izan gabe, Nafarroan zerga arlokoak diren edo zerga arloko ondorioak dituzten egintzak edo eragiketak egin behar dituztenean, eta lehendik beste administrazio batek identifikazio fiskaleko zenbakirik esleitu ez badie."

Bi.–11.2.b) artikulua; bigarren paragrafoa aldatzea.

"b) Baloreak eskuratu edo transmititu nahi direnean, tituluen edo kontuko oharren bidez ordezkatuak eta Espainian kokatzen direnak. Kasu horietan, baloreak eskuratu edo transmititu nahi duten pertsonek edo entitateek, dagokion agindua ematearekin batera, beren identifikazio fiskaleko zenbakia komunikatu beharko diete entitate emaileari edo dagozkion bitartekari finantzarioei, eta haiek ez dute agindua aintzat hartuko betebehar hori bete arte, Balore Merkatuari buruzko Legearen testu berreginaren 315. artikulua betez (urriaren 23ko 4/2015 Legegintzako Errege Dekretuaren bidez onetsi zen)."

Hiru.–13. artikulua; errubrika eta 1.b), 7. eta 8. apartatuak aldatzea; eta 1. apartatuan h) letra bat gehitzea.

"13. artikulua. Identifikazio fiskaleko zenbakia errebokatzea eta birgaitzea."

"b) Sozietateen gaineko Zergari buruzko abenduaren 28ko 26/2016 Foru Legearen 71.1 artikuluan aipatutako kasuak gertatzen direnean".

"h) Ondoz ondoko lau ekitalditan egiaztatzea ez dela bete urteko kontuak Merkataritza Erregistroan gordailutzeko betebeharra, edo, kasua bada, aplikagarri zaien araudiaren arabera, nahitaez gordailutu beharreko dokumentuak dagokion babesletzan edo erregistroan gordailutu betebeharra bete ez bada."

"7. Identifikazio fiskaleko zenbakia errebokatzeak ekarriko du baja ematea erregistro hauetan: Europar Batasunaren barruko operadoreen erregistroan, Balio Erantsiaren gaineko Zergaren hileko itzulketaren erregistroan, zerga bereziei buruzko araudian ezarritako lurralde erregistroetan, berotegi efektuko gas fluoratuen gaineko zergaren lurralde erregistroan, eta alkoholaren eta edari deribatuen edo hidrokarburoen gaineko zergen esparru objektiboetan sartutako produktuen gordailu fiskalen erauzleen erregistroan.

8. Zerga Administrazioak identifikazio fiskaleko zenbakia birgaitzen ahalko du, erabaki baten bidez, betiere, errebokazioa egiteko artikulu honen 3. paragrafoan ezarritako publizitate baldintza berdinak betez.

Identifikazio fiskaleko zenbakia birgaitzeko eskaerak tramitatuko dira soilik errebokazioa eragin zuten arrazoiak desagertu direla frogatzen denean eta, sozietateen kasuan, horrez gain, komunikatzen denean nor diren sozietatearen kapitalaren titulartasuna dutenak, legezko ordezkarien identifikazio osoarekin, haren helbide fiskala, eta sozietatearen jarduera ekonomikoa zein izanen den erakusten duen dokumentazioa aurkezten denean.

Identifikazio fiskaleko zenbakia birgaitzeko eskatu ondoren, hiru hilabeteko epean, berariazko ebazpena eman ezean, eskaera ukatutzat joko da".

Bosgarren artikulua. Bitarteko elektroniko, informatiko eta telematikoen erabilera Nafarroako Zerga Ogasunaren esparruan arautzen duen Foru Dekretua aldatzea.

Bitarteko elektroniko, informatiko eta telematikoen erabilera Nafarroako Zerga Ogasunaren esparruan arautzen duen uztailaren 17ko 50/2006 Foru Dekretuan jaso eta hemen aipatzen diren aginduak era honetan idatzita geratuko dira:

Bat.–31. artikulua; aldaketa.

"31. artikulua. Jakinarazpen elektronikoa jasotzera behartuta daudenak.

1. Nafarroako Zerga Ogasunak bere eskumenak erabiliz bidaltzen dizkien jakinarazpen administratiboak bide elektronikotik jasotzera behartuta egonen dira pertsona juridikoak eta nortasun juridikorik gabeko entitateak.

2. Gainera, Nafarroako Zerga Ogasunak bere eskumenak erabiliz bidaltzen dizkien jakinarazpen administratiboak bide elektronikotik jasotzera behartuta egonen dira ondoko pertsona fisiko hauek:

1.a. Hirugarren pertsonen izenean aitorpen likidazioen, autolikidazioen, informazio aitorpenen, edo Balio Erantsiaren gaineko Zergaren erregistro liburuak eramateko modua ematen duen fakturazioaren erregistro elektronikoen aurkezpena egiteko, Ogasuneko eta Finantza Politikako Departamentuak onetsitako kanpo lankidetzako hitzarmenei atxikia izatearen ondorioz, baimenduta dauden pertsonak.

2.a. Balio erantsiaren gaineko zergan, beren alde duten saldoa likidazio aldi bakoitzaren bukaeran itzultzeko eskatu dutenak.

3.a. Jarduera Ekonomikoen gaineko Zergaren edo Lizentzia Fiskalaren tarifak eta instrukzioa onesten dituen maiatzaren 28ko 7/1996 Foru Legearen I. eranskineko Bigarren Sekzioko 41., 42. eta 73. multzoetan, edo 722., 723., 726., 741., 747., 831., 832., 833., 834. eta 835. taldeetan alta emanik daudenak.

4. Hirugarren pertsonen izenean Nafarroako Zerga Ogasunak, edozein tributu jarduketa eta prozedura komunikatzeko, bidalitako jakinarazpen elektronikoak jasotzeko baimenduta dauden pertsonak.

Zerga arloko eskumena duen departamentuaren titularrari baimena ematen zaio, foru agindu bat erabiliz, jakinarazpen elektronikoa jasotzera behartuta dauden pertsona fisikoen eta entitateen multzoak aldatzeko".

3. Jakinarazpena hartzera behartuta dauden pertsona fisikoak jakinarazpen elektronikoko sistematik kanpo geratuko dira, sistema horretan sartzeko baldintzak desagertzen direnean; aurretik eskaera egin behar du, Nafarroako Zerga Ogasunaren web-orrian, https://hacienda.navarra.es helbidean, eskura dagoen zerbitzu telematikoaren bidez. Jakinarazpen elektronikoko sistematik kanpo geratzeko eskaera bide horretatik egiteak berekin dakar baja berehala ematea sisteman.

Hala ere, baldin eta aplikazio informatikoak hautematen badu ez direla desagertu jakinarazpen elektronikoko sisteman ezinbestean sartzeko baldintzak, jakitera emanen da, bide beretik, eskaera ukatu dela.

Sistematik atera ondoren, berriz agertuko balira jakinarazpen elektronikoko sisteman ezinbestean sartzeko baldintzak, bestelako tramiterik gabe, berriro hasiko da jakinarazpenen bidalketa elektronikoa."

Bi.–Xedapen gehigarri bakarra; gehitzea.

"Xedapen gehigarri bakarra. Jakinarazpen elektronikoen sistematik kanpo ofizioz uztea.

31.3 artikuluan xedatutakoa gorabehera, Nafarroako Foru Ogasunak jakinarazpen elektronikoen sistematik kanpo utziko ditu, ofizioz, arau aldaketa baten ondorioz jakinarazpen elektronikoa jasotzera behartuta izatetik salbuetsita geratzen diren pertsona fisikoak."

Seigarren artikulua. Nafarroako Foru Komunitateko Diru-bilketaren Erregelamenduaren aldaketa.

Uztailaren 2ko 177/2001 Foru Dekretuaren bidez onetsitako Nafarroako Foru Komunitateko Diru-bilketaren Erregelamenduaren 59.2 artikuluaren lehenengo paragrafoa aldatzen da, era honetan idazteko:

"2. Geroratzeak edo zatikatzeak eskatzen dituztenek, dagokion baimenaren bidez, eskaeran adierazi behar dute zein kontutan helbideratuko diren ordainketak, onarpenean emandako epemugak betetzen direnean."

Azken xedapen bakarra.–Indarra hartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Hala ere, xedapen hauek ondoren aipatzen diren ondorioak izanen dituzte:

1. Lehenengo artikuluko laugarren apartatuan aipatzen den produktu paneuroparren inguruko lehen aitorpen informatiboa 2024ko urtarrilaren 1etik aurrera aurkeztuko da, 2023. urteari buruzko informazioari dagokionez.

2. Lehenengo artikuluko bosgarren apartatuan aipatzen den plataforma operadoreen lehen aitorpen informatiboa, 2024ko urtarrilaren 1etik aurrera aurkeztuko da, 2023. urteari buruzko informazioari dagokionez.

3. Hirugarren artikuluko zortzigarren eta bederatzigarren apartatuen aldaketek 2023ko uztailaren 1etik aurrera izanen dituzte ondorioak, eta data horretatik aurrera hasten diren zergaldiei dagozkien autolikidazioetan jaso beharreko doikuntzei aplikatuko zaizkie.

4. Hirugarren artikuluko zazpigarren eta hamabigarren apartatuetan ordainketa zerbitzuen hornitzaileek aurkeztu beharreko erregistroen eta aitorpenaren edukiari buruz gehitutako zehaztasunak 2024ko urtarrilaren 1etik aurrera aplikatuko dira.

Iruñean, 2023ko urriaren 31n.–Nafarroako Gobernuko lehendakaria, María Chivite Navascués.–Ekonomia eta Ogasuneko kontseilaria, José Luis Arasti Pérez.

Iragarkiaren kodea: F2315561