Iragarkia
24. ALDIZKARIA - 2023ko otsailaren 3a
1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
479E/2022 EBAZPENA, abenduaren 30ekoa, Nafarroako Berdintasunerako Institutuko zuzendari kudeatzaileak emana, deialdi bat onesten duena, dirulaguntza hauek eman daitezen norgehiagoka: dirulaguntza, Nafarroako toki-erakundeentzat, emakumeen eta gizonen arteko aukera-berdintasuneko agente teknikoak kontratatzeko, finkatzeko eta horien mantentzea babesteko, horiek 2023an finantzatzen lagunduz DDBN identifikazioa: 668657.
Nafarroako Berdintasunerako Institutuari (NABI), jarraikiz bere estatutuak arautzen dituen urriaren 30eko 260/2019 Foru Dekretuari, eskumen hau dagokio, besteak beste: emakumeen eta gizonen arteko berdintasun politikak koordinatu eta kudeatzea Nafarroako Foru Komunitatearen esparruan. Hala, bere eginkizunen artean dago genero berdintasuna sustatzeko deialdiak kudeatzea.
Emakumeen eta Gizonen arteko Berdintasunari buruzko apirilaren 4ko 17/2019 Foru Legearen 12. artikuluan ezartzen denez, toki-erakundeek beren eskumenak betetzean txertatuko dute emakumeen eta gizonen arteko berdintasun-printzipioa, eta, horretarako, Nafarroako Foru Komunitateko Administrazioarekin elkarlanean arituko dira. Halaber, xedatzen du Nafarroako Gobernuak laguntza eta babesa emanen diela toki-erakundeei, eta sustapena eginen duela berdintasun arloko teknikariak kontrata ditzaten.
Tokiko esparrua da herritarrengandik eta sare ekonomiko eta sozialetik hurbilen dagoena, eta, hortaz, esparru egokienetako bat da emakumeen eta gizonen aukera berdintasuna integratzeko.
Nafarroako Gobernuak, Nafarroako Berdintasunerako Institutuaren bidez, emakumeen eta gizonen arteko berdintasun-printzipioa lortzeko lehentasuntzat jotzen du genero berdintasunerako politikak Toki Administrazioarekin batera sustatzea. Horretarako, modu egituratu, koordinatu eta sistematikoan lan egin beharra dago, lurraldeko errealitate desberdinen premiei eta berezitasunei erantzunez.
Toki-erakundeetako errealitate desberdinen premia eta berezitasun horiei erantzuteko, Nafarroako Berdintasunerako Institutuak dirulaguntzen deialdi hau proposatzen du, bai toki-erakundeentzat, banan-banan, bai toki-erakundeen batasunentzat, dirulaguntza honen ondorioetarako akordioak eginez gero.
Deialdi honen xedea dirulaguntzak ematea da, Nafarroako Foru Komunitateko emakumeen eta gizonen arteko aukera-berdintasuneko agenteen lanpostuak sortu eta finka ditzaten toki-erakundeek, baita langile tekniko horien mantentzea babestu dezaten ere, finantzaketarako laguntza emanez.
Funtsezko baliabidetzat jotzen da berdintasun agenteen kontratazioa babestea, emakumeen eta gizonen arteko berdintasun helburuak egon eta bultza daitezen tokian-tokian. Berdintasun agenteen kontratazioa bultzatuta eta babestuta, lanbide-profil hori finkatu eta mantendu beharko litzateke toki administrazioetan. Halaber, helburua da figura profesional hori finantzatzeko laguntzak lagundu dezala toki-erakundeen finantza nahikotasuna osatzen, aipatutako Berdintasunari buruzko 17/2019 Foru Legeak esleitzen dizkien eginkizunei dagokienez, aipatutako 12. artikuluak adierazten duen bezala. Horregatik, ulertu behar da dirulaguntzen deialdi hau finantzaketa prozesu baten parte dela, emaitza hori lortzeko bidean.
Espedienteko txosten tekniko eta juridikoek adierazten dute, hurrenez hurren, onesten den dirulaguntzen deialdia egokia eta interes publikokoa dela, eta deialdia eta oinarri arautzaileak legearen araberakoak direla.
Horrenbestez, ematen zaizkidan eskudantziak erabiliz, honako arau hauek ematen dizkidatenak, hain zuzen: martxoaren 11ko 11/2019 Foru Legearen 51. artikulua (foru lege horrek hizpide ditu Nafarroako Foru Komunitateko Administrazioa eta foru-sektore publiko instituzionala) eta urriaren 30eko 260/2019 Foru Dekretuaren 12.h) artikulua (foru dekretu horren bidez onetsi ziren Nafarroako Berdintasunerako Institutua erakunde autonomoaren estatutuak),
EBAZTEN DUT:
1. Nafarroako toki-erakundeetarako dirulaguntzen deialdia onestea, emakumeen eta gizonen arteko aukera-berdintasuneko agente teknikoak sartzeko, finkatzeko eta horien mantentzea babesteko, 2023an horien finantzaketarako laguntza emanez.
2. Deialdiaren oinarri arautzaileak onestea, zeinak jaso baitira ebazpen honen I. eranskinean.
3. Deialdi honen konpromisoei aurre egiteko, 230.000 euroko gastua gorde eta baimentzen da, 2023ko aurrekontuetan honako partida honen baliokide gisa gaitzen den partidaren kargura: 2022ko aurrekontuko 080001 08100 4609 232200 partida, "Toki-erakundeetarako transferentziak, berdintasun politikak bultzatzeko" izenekoa. Gastu hori egiteko baldintza gisa, kreditu aski eta egokia egon behar da.
Baldin 2023rako Nafarroako Aurrekontu Orokorren Legean onetsitako kreditua bada deialdi honetan hasieran baimendutakoa baino handiagoa, eta jasotako eskabide guztiak kontuan hartu badira, 115.000 euro handitzen ahalko da deialdi honetara bideratutako zenbatekoa, Nafarroako Berdintasunerako Institutuko zuzendari kudeatzailearen ebazpenaren bidez, eta ez da beste deialdirik egin beharko, jarraikiz azaroaren 9ko 11/2005 Foru Legearen 31. artikuluari (Dirulaguntzei buruzko Foru Legea).
4. Ebazpen honek ez du administrazio bidea amaitzen, eta beraren aurka gora jotzeko errekurtsoa aurkezten ahal da, zuzenduko zaiona Lehendakaritzako, Berdintasuneko, Funtzio Publikoko eta Barneko kontseilariari, hilabeteko epean, argitaratu eta hurrengo egunetik aurrera.
5. Ebazpen hau eta oinarri arautzaileak Nafarroako Aldizkari Ofizialean argitaratzea eta Nafarroako Gobernuko Dirulaguntzen Datu Baseari komunikatzea.
Iruñean, 2022ko abenduaren 30ean.–Nafarroako Berdintasunerako Institutuko zuzendari kudeatzailea, Eva Istúriz García.
OINARRI ARAUTZAILEAK
1. oinarria. Xedea eta helburua.
Deialdiaren xedea da araubide bat ezartzea Nafarroako Berdintasunerako Institutuak 2023an Nafarroako toki-erakundeei dirulaguntzak emateko, erakunde horietan emakumeen eta gizonen berdintasuna bultzatu eta susta dezaten, emakumeen eta gizonen arteko aukera-berdintasuneko agenteko teknikariak sartuz, finkatuz eta horien mantentzea babestuz, eta horretarako, figura profesional horren finantzaketarako laguntza emanez. Laguntza horrek, zeina baita berdintasuneko teknikariak mantentzen laguntzekoa, ezin izanen du iraun inola ere zazpi urte baino gehiago.
2. oinarria. Entitate onuradunak.
Toki-erakundeak aurkezten ahalko dira deialdira, baldin izaera hori aitortua badute uztailaren 2ko 6/1990 Foru Legearen arabera (Nafarroako Toki Administrazioari buruzko Foru Legea), eta betetzen badituzte oinarri hauetan ezarritako baldintzak.
3. oinarria. Baldintzak.
3. oinarrian biltzen diren betekizun guztiak toki erakundeko idazkariaren ziurtagiriaren bidez frogatuko dira. Ziurtagiria III. eranskinean dagoen ereduaren arabera bete beharko da. Eranskin hau –eta oinarri hauetan aipatutako gainerako guztiak– eskuragarri dago dirulaguntzari buruzko fitxan, eta oinarri arautzaile hauen testuaren amaieran dago haren esteka.
3.1. Toki-erakundeek betekizun hauek bete beharko dituzte:
1. B mailako berdintasun agente bat lanaldi osoan kontratatua izatea eta Nafarroako Berdintasunerako Institutuaren dirulaguntza jaso izana 2022. urtean (salbu eta zazpigarren urteko kontratazioak) edo dirulaguntza jasotzeko aldian kontratazio bat hastea.
Kontratazioa lanaldi osokoa dela ulertuko da baita laurden bateko, seiren bateko edo zortziren bateko lanaldi murrizketa hartzen denean ere, apirilaren 4ko 27/2011 Foru Dekretuan xedatutakoaren arabera (haren bidez arautu zen Nafarroako administrazio publikoetako langile funtzionarioen lanaldiaren murrizketa) edo langileek lanaldia murrizteko duten eskubidea antzera biltzen duen edozein arauditan xedatutakoaren arabera.
Kontratazio bat dirulaguntza jasotzeko aldian hasten bada, dirulaguntza emateari begira, betekizun hori egiaztatutzat joko da baldin betetzen bada toki-erakundeko idazkariaren ziurtagiriari (III. eranskina) buruz eskatutakoa, non frogatuko baita toki erakundeak konpromisoa hartu duela berdintasun agente bat kontratatzeko; ondoren, diruz lagundutako kontratazioa egin izana frogatu beharko da.
2. Nolanahi ere, toki-erakundearen kontratazioa indarreko legeriaren arabera eginen da, eta une oro egokitu beharko da enplegu publikoaren arloko araudiak eskatutakora. Toki-erakundeak bakarrik izanen du legedi horretara ez egokitzearen erantzukizuna.
3. Aurreko deialdietan diruz lagundu den kontrataziorik eten ez izana, ohiz kanpoko kasuetan salbu; halakorik bada, behar bezala frogatu beharko da Nafarroako Berdintasunerako Institutuan.
4. Dirulaguntza jasotzeko aldian egitura organikoan izatea berdintasun esparruko zinegotzigoa, batzordea, edo berdintasun alorra edo berdintasun esparruko eginkizunak dituen alorra edo emakumeen alorra, edo alor horietako bat eratzeko konpromisoa hartzea.
Hainbat udalerrik (mankomunitateak, izaera tradizionaleko elkarteak, etab.) osatutako toki-erakundeen kasuan, bai eta oinarri hauetako 3.2 puntuan aipatzen diren toki-erakundeen elkarteen kasuan ere, lurraldean berdintasuna kudeatzeko lan mahai bat eratu beharko da. Mahai horretan nahitaez egon beharko dira ordezkatuta toki-erakunde hori edo erakundeen elkarte hori osatzen duten udalerri guztiak. Ordezkaritza hori zehazteko, mahaian integratuko dira berdintasun arloko eskudantziak dituzten alkatetzak edo zinegotzigoak –udalerri guztietakoak–. Lan mahai horren ardura izanen da lurralde osoan onestea emakumeen eta gizonen berdintasunaren arloko lanaren plangintza.
5. Aurrekontuko partidak edo aurrekontu esleipenak izatea kontratazioaren ondoriozko gastuak ordaintzeko.
6. Aukera berdintasunerako plana izatea, edo gizon eta emakumeen arteko berdintasunerako plan estrategikoa, edo genero berdintasunerako lan egitasmoa, honako agiri honetan oinarritua. "Udaletako berdintasun alorretako lana planifikatu, kudeatu eta ebaluatzeko ibilbidea". Ildo horretan, berdintasun teknikariek beteko dituzten eginkizunak egokitu beharko dira aipatutako "Ibilbide" horretan jasotakoetara, bai eta plan horietan jaso ere.
Berdintasun agentea lehen aldiz kontratatzen bada, betekizun hori frogatutzaat joko da baldin betetzen bada toki-erakundeko idazkariaren ziurtagiriari (III. eranskina) buruz eskatutakoa, non frogatuko baita toki erakundeak asmoa duela berdintasun plana edo urteko lan egitasmoa prestatzeko deialdi honek aintzat hartzen duen aldian, honako agiri honetan oinarritua. "Udaletako berdintasun alorretako lana planifikatu, kudeatu eta ebaluatzeko ibilbidea".
https://www.igualdadnavarra.es/imagenes/documentos/-48-f-eu.pdf
7. Erakunde eskatzailearen organo eskudunaren baimena, berdintasun agente gisa kontratatzen den pertsonak parte har dezan Nafarroako Berdintasunerako Institutuak generoaren eta berdintasunaren arloetan antolatzen duen etengabeko prestakuntzaren programan, horrelakorik antolatzen bada, deialdi honek aintzat hartzen duen aldian.
3.2. 2. oinarrian adierazitakoaren arabera onuradun izaten ahal diren eta eta 3. oinarriko baldintzak betetzen dituzten toki-erakundeek beste toki erakunde batzuekin elkartzeko akordioak egiten ahalko dituzte, lanaldi osoko berdintasun agente bat kontratatzeko, honako muga eta baldintza hauekin:
–5.000 biztanletik gorako toki-erakundeak ezin izanen dira elkartu.
–Elkartutako tokiko erakundeen guztizko populazioa ezin izanen da, inola ere, 12.000 biztanletik gorakoa izan.
–Gehienez ere, tokiko bost erakunde elkartzen ahalko dira. Lurralde despopulatuei laguntze aldera, edozein elkartze baimentzen ahalko da, baldin eta elkartutako erakundeen erdiak badu gutxienez kilometro karratuko 25 biztanleko edo gutxiagoko populazio dentsitatearen indizea. Dentsitate indizea zehazteko, erreferentziatzat hartuko dira Nafarroako Estatistika Institutuak prestatutako adierazle demografikoak; erakunde horren webgunean daude argitaratuta adierazle horiek:
–Elkartutako erakundeek ezin dute aldez aurretik lanaldi osoko berdintasun agentearen figura izan.
Dirulaguntzei buruzko azaroaren 9ko 11/2005 Foru Legearen 8. artikuluko 3. apartatuarekin bat, akordioko testuan espresuki agertu beharko dira batasuneko toki-erakunde bakoitzak hartutako egiteko konpromisoak eta horietako bakoitzari aplikatu beharreko dirulaguntzaren zenbatekoa. Horiek erakunde onuradun izanen dira. Nolanahi ere, batasunaren ordezkari edo ahaldun bakar bat izendatu behar da, nahiko ahalorde duena batasunari onuradun gisa dagozkion betebeharrak betetzeko.
Horrez gain, adierazi beharko da erakunde sinatzaileen artean zein toki-erakundek egiten duen kontratazioa.
Aurrekoa gorabehera, elkartze akordioaren testuan jasota geratu beharko da berdintasun agentearen lanak lurralde ikuspegia izan beharko duela, ziurtatze aldera berdintasun politikek eragina izanen dutela elkartutako erakundeei dagokien lurralde osoan, batera. Ildo horretan, oinarri hauetako 3.1.4 ataleko bigarren paragrafoan adierazitakoa hartuko da kontuan bereziki.
4. oinarria. Jarduketa diruz lagungarriak eta horiek gauzatzeko epea.
4.1. Toki-erakunde bakoitzak edo toki-erakunde batasun bakoitzak eskabide bakar bat aurkezten ahalko du dirulaguntzen deialdi honetan.
Dirulaguntza emanen da berdintasun agente baten langileria gastuak finantzatzen laguntzeko, 2023ko urtarrilaren 1etik 2023ko azaroaren 30era bitartean, honako kondizio hauen arabera:
a) B maila.
b) Lanaldi osoa.
Dena dela, agente titularraren lanaldia murriztuz gero, gastuak diruz lagungarriak izanen dira lanaldi osoa bi lagunek betetzen badute.
Agente titularrak laurden bateko, seiren bateko edo zortziren bateko lanaldi murrizketa hartzen duenean, lanaldi osoa dela ulertuko da, eta ez da eskatuko beste agente baten kontratazioa lanaldia osatzeko, apirilaren 4ko 27/2011 Foru Dekretuan xedatutakoaren arabera (haren bidez arautu zen Nafarroako administrazio publikoetako langile funtzionarioen lanaldiaren murrizketa) edo antzeko baldintzetan langileek lanaldia murrizteko duten eskubidea biltzen duen edozein arauditan xedatutakoaren arabera.
Orobat, 3. oinarrian ezarri bezala, toki-erakundeek beste erakunde batzuekin egiten ahalko dituzte behar diren akordioak, baldintza hori betetzearren. Kasu horretan, ulertuko da lanaldi osoa erakundeen batasunaren guztirako lanorduek osatzen dutela, nahiz batek bakarrik kontratua formalizatu; aurreko paragrafoan xedatutakoa ere aplikatuko da.
c) Diruz lagundutako kontratazioaren eraginpeko berdintasun agentea alta egoeran egon behar da, eta bete behar ditu egoki diren eginkizunak, hots, Nafarroako toki erakundeetako berdintasun teknikariekin lankidetzan NABIk egindako agiri honetan jasotakoak: "Udaletako berdintasun alorretako lana planifikatu, kudeatu eta ebaluatzeko ibilbidea":
–Ibilbidea ezagutzea eta berdintasun alorreko urteko plangintza diseinatzeko esparruetarako erabiltzea.
–Lan programak eta jarduketak koordinatu eta kudeatzea.
–Ekintza batzuk abian jartzea.
–Ibilbidea ezartzeko prozesua ebaluatzea, hobetu beharra duten alorrak hautematea eta haiek hobetzeko bideak sortzea.
–Bere erantzukizun alorretik, beste interes talde batzuei aholkuak eta prestakuntza ematea.
–Berdintasun alorrean egiten den lanaren berri ematea, eta hura ikusgarri egitea.
–Koordinaziorako bideak ezartzea lanean aritzeko bestelako elkarte eta erakundeekin, eta berdintasun alorrak dauzkaten beste toki erakunde batzuekin.
–Udaletako berdintasun agenteen eginkizunen artean ez dago indarkeria matxistaren biktimak diren emakumeak zuzenean artatzea.
Kontratazio berrien kasuan, alta egoera ezin izanen da hasi 2023ko azaroaren 30a baino geroago.
Ulertuko da berdintasun agente titularra alta egoeran dagoela soldatarik gabeko baimenetan, lizentzietan, eszedentzietan eta/edo ezintasunetan, edo lan arloko legerian aurreikusitako antzeko beste edozein kasutan.
d) Kontratua urtebetekoa izanen da gutxienez, kontratua lehen aldiz egiten denean izan ezik, orduan ez baita 2023ko abenduaren 31 baino lehen bukatuko. Nolanahi ere, kontratazioa indarreko legeriara egokituko da beti, bereziki kontuan hartuta 3.1.2 oinarrian adierazitakoa.
Hasieran kontratatutako pertsona aldi baterako ordezteko egiten diren kontratazioetan, kontratua bukatzeko betekizun hori ez da aplikatuko, baldin eta hasieran kontratatutakoa bere lanpostura itzultzen bada, eta orduan beteko da, hain zuzen, atal honen hasieran adierazitako betekizuna.
4.2. Gastu diruz lagungarriak.
Dirulaguntza izanen da Nafarroako Administrazio Publikoen zerbitzuko B mailako langileen hasierako soldata finantzatzeko (2022ko abenduaren 31ko zenbatekoan), bai eta Gizarte Segurantzako enpresa kuota finantzatzeko ere, lanaldi osoari dagokiona.
4.3. Diruz lagungarriak ez diren gastuak.
Kontratatutako pertsonari kontratua bukatzean dagozkion kalte-ordainak ez dira inoiz ere diruz lagungarriak izanen. Era berean, enplegu publikoaren araudian jasotako gehieneko kontratazio epeak betetzen ez badira, konpentsazioak ez dira inolaz ere diruz lagunduko.
5. oinarria. Eman beharreko dirulaguntzaren zenbatekoa.
5.1. Eman beharreko dirulaguntzaren zenbatekoa irizpide ekonomiko hauen arabera ezarriko da:
a) Erreferentzia gisa hartu dira Nafarroako Administrazio Publikoen zerbitzuko B mailako langileen hasierako soldata (2022ko abenduaren 31ko zenbatekoan) eta Gizarte Segurantzako enpresa-kuota, berdintasun agente baten lanaldi osoari dagokiona.
b) Aurreko paragrafoaren arabera finkatutako soldatari dagokionez, dirulaguntzaren ehuneko hauek aplikatuko dira:
–Dirulaguntza ematen deneko lehen eta bigarren urtea, langileen gastuen ehuneko 85, 5.1 a) atalean adierazitakoaren arabera.
–Dirulaguntza ematen deneko hirugarren, laugarren, bosgarren eta seigarren urteak, langileen gastuen ehuneko 70, 5.1 a) atalean adierazitakoaren arabera.
–Dirulaguntza ematen deneko zazpigarren urtea, langileen gastuen ehuneko 60, 5.1 a) atalean adierazitakoaren arabera.
c) Erakundeen batasunak eskatuz gero, proportzionaltasuna aplikatuko da, erakunde bakoitzean ematen den lan denboraren arabera.
d) Hasieran kontratatutako pertsona bat aldi baterako ordezteko egiten diren kontratazioetan, ordezten duen hasierako kontratazioari dagozkion ehunekoak aplikatuko dira, dirulaguntza kalkulatzeko.
e) Erakundeak aurreko deialdietan diruz lagundutako kontratazioa eten badu, dirulaguntzaren ehunekoak kalkulatzeko, kontuan hartuko da aurreko deialdietan diruz lagundutako denbora.
6. oinarria. Dokumentazioa.
6.1. Dirulaguntza eskatzen dute toki-erakundeek jarraian adierazitako dokumentazioa aurkeztu beharko dute, honako atal hauei dagozkien dokumentu bereizietan, eta eskuragarri dauden eranskinetara egokituta, halakorik egonez gero (eranskin horiek dirulaguntzaren fitxatik deskargatzen ahalko dira, eta horien esteka oinarri arautzaile hauen testuaren amaieran dago):
a) Eskabidea nahitaez aurkeztu beharko da horretarako diseinatutako eskabide ereduan (II. eranskina). Eskabide ereduak barne hartzen ditu urteko lan egitasmoa eta aurrekontua, eta nahitaez bete beharko dira biak.
Batera aurkezten diren toki-erakundeen kasuan, kontratazioa egiten duen toki-erakundearen ordezkariak sinatu beharko du eskabidea.
Eskabidea aurkezteko unean hasi gabe dagoen kontratazio berri baten kasuan, kontratazioa hasteko aurreikusitako eguna adierazi beharko da; data hori erabiliko da kalkulatzeko zenbateko dirulaguntza eman behar den.
b) Toki-erakundeko idazkariaren ziurtagiria (III. eranskina), ziurtatzen duena 3. oinarriko betekizun guztiak betetzen dituela.
c) Kontratazioa bi toki-erakundek edo gehiagok sinatutako akordio baten bidez gauzatzen bada, haien artean adostutako akordioaren kopia.
d) Toki-erakundeak eta berdintasun agente gisa kontratatutako pertsonak/ek sinatutako kontratuaren kopia, edo berdintasun agentearen lanpostuaren izendapena frogatzen duen dokumentuaren kopia. Eskabidea aurkezteko epea bukatzen den egunerako dokumentu hori aurkezterik ez badago, erakundeak formalizatu bezain laster bidaliko dio Nafarroako Berdintasunerako Institutuari. Kontratuaren kopia edo aipatutako frogagiria lehendik aurkeztu bada eta kontratuak baldintza berberen eraginpean jarraitzen badu indarrean, ez da beharrezkoa izanen dokumentazio hori aurkeztea.
e) Erantzukizunpeko gardentasun adierazpena (IV. eranskina), frogatzen duena Gardentasunari buruzko maiatzaren 17ko 5/2018 Foru Legearen 12.4 artikulua betetzen dela, 9.3 oinarrian ezarritakoari jarraikiz.
f) Aurreko kontratazio bat eten bada, egoera azaltzen duen txostena.
6.2. Agiri hauek ez dira eskatuko baldin eta Nafarroako Foru Komunitateko Administrazioko organoek ziurtatu behar badute baldintzak betetzen direla, edo agiriak Administrazioaren eskuetan badaude, honako hauekin bat: Dirulaguntzei buruzko azaroaren 9ko 11/2005 Foru Legearen 13.8 artikulua eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 28. artikulua. Hala bada, adierazi beharko da zer unetan eta zer administrazio organoren aurrean aurkeztu ziren aipatu agiriak.
6.3. Dirulaguntza egiaztatzeko eskumenak dituen administrazio organoak zehazten duenean erakunde eskatzaileak aurkeztutako justifikazioan badirela zuzentzen ahal diren akatsak, horren berri emanen dio eskatzaileari, bost egun balioduneko epean zuzendu ditzan.
Proiektua deskribatzeko eta haren aurrekontua zehazteko dokumentazioa ez da inola ere zuzentzen ahalko. Edonola ere, NABIk azalpenak eskatzen ahal ditu, aurkeztutako proiektua aldatzeko aukerarik gabe. Erantzuteko epea gehienez bost egun baliodunekoa izanen da.
7. oinarria. Eskabideak aurkezteko epea eta tokia.
Eskabideak elektronikoki izapidetuko dira deialdiaren fitxako "Tramiteak" aukeratik (oinarri hauen amaieran eskuragarri dago esteka).
Fitxa horretan, esteka bat izanen da Nafarroako Foru Komunitateko Administrazioko Erregistro Orokor Elektronikoan sartzeko, eta bertan identifikatzeko, ziurtagiri digitala eduki beharko da.
Eskabideak hilabeteko epean aurkeztuko dira, deialdi hau Nafarroako Aldizkari Ofizialean argitaratu eta hurrengo egunetik aurrera.
Dokumentazioa dokumentu bereizitan aurkeztuko da, 6. oinarrian zehaztutako eranskinen arabera, bakoitzak bere izena behar bezala dakarrela.
Gaitutako helbide elektroniko bat adieraziko da eskabideetan, eta horixe izanen da Nafarroako Berdintasunerako Institutuaren eta toki-erakunde eskatzaileen arteko jakinarazpen eta komunikazioetarako lehentasunezko bidea.
Eskatzaileak Nafarroako Gobernuak gaitutako jakinarazpen elektronikorako prozeduretan harpidetuta egon beharko du. Hauxe da gaituriko helbide elektronikoa eta jakinarazpen elektronikorako harpidetza lortzeko helbidea: http://notificaciones.060.es. Horretarako, ziurtagiri digitala beharko da.
Eskabidea aurrez aurre aurkezten bada, elektronikoki aurkezteko eskatuko zaio interesdunari. Ondorio horietarako, ulertuko da eskabidearen aurkezpen eguna zuzenketaren eguna dela.
8. oinarria. Balorazioa eta dirulaguntza emateko prozedura.
8.1. Nafarroako Berdintasunerako Institutuko Gai Juridikoen eta Kudeaketaren Zuzendariordetzari dagokio dirulaguntza emateko prozeduraren instrukzioa. Dirulaguntzak emateko prozedura norgehiagokako araubideari jarraikiz tramitatuko da.
8.2. Berdintasunerako Gobernantzaren Zuzendariordetzak baloratuko ditu eskabideak, eta, horretarako, Nafarroako Berdintasunerako Institutuko teknikarien edo bereziki kualifikatutako teknikarien laguntza izaten ahal du, eta egokiak iruditzen zaizkion jarduketak egiten ahal ditu, ebazpen proposamenaren oinarri izanen diren datuak zehazteko, ezagutzeko eta egiaztatzeko.
8.3. Eskabideak irizpide hauei jarraikiz baloratuko dira:
Eskabideen lehentasun hurrenkera:
–Lehenik, lehentasuna emanen zaie deialdi honen aurretik egindako eta 2022. urtean NABIk diruz lagundutako kontratazioei, eta, horien artean, antzinatasun handiena dutenei, ordena honetan: dirulaguntzaren zazpigarren, seigarren, bosgarren, laugarren, hirugarren, bigarren eta lehenbiziko urtea.
–Bigarrenik, diruz lagungarria den aldian hasitako kontratazioen artean, beren toki-erakundeetan berdintasuneko agenterik izan ez duten edo, izan badute ere, aurretik dirulaguntza hau jaso ez duten toki erakundeek egindakoak egonen dira.
–Hirugarrenik, diruz lagungarria den aldian hasitako kontratazioen artean, beren toki-erakundeetan aurretik berdintasuneko agentea izan duten, hura kontratatzeagatik dirulaguntza jaso duten eta arrazoi justifikatuak direla eta kontratua eten duten toki erakundeek egindako kontratazioak.
–Laugarrenik, beren toki-erakundeen berdintasun agente bat duten, hura kontratatzeagatik dirulaguntzarik jaso ez duten eta beste agente bat kontratatu nahi duten toki-erakundeek egindako kontratazioak.
–Azkenik, deialdi honen babesean diruz lagungarriak diren gainerako kontratazioak.
Kasu guztietan, talde bakoitzean berdinketa gertatuz gero, lehentasuna emanen zaie biztanleria handieneko toki-erakundeen eskabideei.
8.4. Gai Juridikoen eta Kudeaketaren Atalak ebazpen-proposamena igorriko dio Nafarroako Berdintasunerako Institutuko zuzendari kudeatzaileari. Proposamenari txosten bat gehituko zaio, non adieraziko baita erakunde onuradunek dirulaguntzak jasotzeko betekizun guztiak betetzen dituztela.
9. oinarria. Ebazpena.
9.1. Dirulaguntzak banatzen dituen ebazpena Nafarroako Berdintasunerako Institutuko zuzendari kudeatzaileak emanen du, eskabideak aurkezteko epea bukatu eta gehienez ere 3 hilabeteko epean. Ebazpena interesdunei jakinaraziko zaie, eta Nafarroako Gobernuaren atarian argitaratuko da, dirulaguntzaren fitxan. Hiru hilabeteko epe hori bukatuta, berariazko ebazpenik eman eta jakinarazi ez bada, eskabidea ezetsi egin dela ulertuko da, behar den errekurtsoa aurkeztu ahal izateko.
9.2. Dirulaguntzak emateari buruzko ebazpenean adieraziko dira erakunde eskatzaileen zerrenda, emandako dirulaguntzaren zenbatekoa, justifikatu beharreko zenbatekoa eta, kasua bada, zer eskabideri uko egin zaien.
Bat etorriz Dirulaguntzei buruzko Foru Legearen 15. artikuluarekin eta Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 26. artikuluarekin, Nafarroako Berdintasunerako Institutuak jendaurrean jarriko ditu, Nafarroako Gobernuaren Atarian, ematen dituen dirulaguntzak, honako hauek zehaztuta: deialdia, laguntza zer programari eta aurrekontu kredituri egotzi zaion, onuraduna, emandako diru kopurua eta dirulaguntzaren helburua.
Datu horiek, orobat, Estatuko Administrazioko Kontu-hartzailetza Nagusiak argitaratuko ditu bere web-orrian, Dirulaguntzei buruzko azaroaren 17ko 38/2003 Lege Orokorraren 20.8 artikuluan xedatutakoarekin bat.
9.3. Toki-erakunde onuradunek gardentasun betebeharra izanen dute, zeina ezarri baitzen maiatzaren 17ko 5/2018 Foru Legearen 12.4 artikuluan (foru lege horrek hizpide ditu gardentasuna, informazio publikoa eskuratzea eta gobernu ona), dirulaguntzak jasotzen dituztenean horien araudian jasotako baldintzetan, Nafarroako Aurrekontu Orokorren kargura. Betebehar hori bete dela frogatzeko nahikoa izanen da IV. eranskinean jasotako erantzukizunpeko adierazpena aurkeztea.
10. oinarria. Dirulaguntzak ordaintzea eta justifikatzea.
10.1. Dirulaguntzaren ordainketa:
Emandako dirulaguntza ordainketa bakarrean ordainduko da, berdintasun agente bati dagozkion langileria gastuei aurre egiteko –2023ko urtarrilaren 1etik 2023ko azaroaren 30era bitartekoei–. Aldez aurretik, 10.2 apartatuan bildutako agiri guztiak aurkeztu beharko dira, apartatu horretan adierazitako eranskinen arabera. Justifikazioa aurkezteko epea 2023ko azaroaren 30ean bukatuko da.
10.2. Dirulaguntzaren justifikazioa:
Erakunde onuradunek jarraian adierazitako dokumentazioa aurkeztu beharko dute, honako atal hauei dagozkien dokumentu bereizietan, eta eskuragarri dauden eranskinetara egokituta, halakorik egonez gero (eranskin horiek dirulaguntzaren fitxatik deskargatzen ahalko dira, eta horien esteka oinarri arautzaile hauen testuaren amaieran dago):
–Justifikazio memoria, dirulaguntza jasotzeko aldian berdintasun agenteak zer eginkizun eta jarduketatan parte hartu duen jasotzen duena. V. eranskineko ereduaren arabera egin behar da.
–Izenpetutako kontratu(ar)en edo edo berdintasun agentearen lanpostuaren izendapena egiaztatzeko dokumentuaren kopia, baldin eta aldez aurretik Nafarroako Berdintasunerako Institutura igorri ez bad(ir)a.
–Toki-erakundeko idazkariaren ziurtagiria (VI. eranskina), berdintasun agentearen kontratazioa indarreko legeriaren arabera egin dela adierazten duena, baldin eta aldez aurretik igorri ez bada.
Ziurtagirian berdintasun agenteei dagozkien langileria gastuak kostuaren eta orain arte ordaindutako gastuaren justifikazioa jasoko da, eta, gainera, gastua diruz lagundutako jarduerari egokiro aplikatu zaiola frogatuko da. Kontratazioaren kostuaren banakapena hilabeteka bete beharko da, aipatutako VI. eranskineko ereduan agertzen den bezala.
Oro har, egindako gastutzat hartuko da justifikazio epea bukatu baino lehen benetan ordaindutakoa, salbu eta finantza eta zerga gastuak eta Gizarte Segurantzari egin beharreko beste ordainketa batzuk, ordaindu ezin izan direnak haiek likidatzeko epea irekita ez egoteagatik.
Ziurtagiri horretan, dirulaguntzaren xederako hartutako diru-sarrera, laguntza, baliabide eta dirulaguntzak jasoko dira. Hori guztia, ezertan galarazi gabe 12. oinarriaren e) letran xedatutakoa.
–Agiri bat, frogatzeko betetzen dela Nafarroako Gobernuak eta Nafarroako Berdintasunerako Institutuak diruz lagundutako kontratazioan parte hartu dutela agerrarazteko betebeharra, egiten den publizitatean eta zabalkundean, bai eta horrekin lotuta egiten den dokumentazio guztian ere, Nafarroako Gobernuaren logotipo ofiziala txertatuz, Nafarroako Gobernuaren sinbolo ofiziala eta haren erabilera arautzen duen urtarrilaren 27ko 4/2016 Foru Dekretuan jasotako ezaugarri teknikoen arabera (4/2016 Foru Dekretua partzialki aldatu zuen urtarrilaren 12ko 8/2020 Foru Dekretuak).
Nafarroako Berdintasunerako Institutuaren sinbolo grafikoa ere txertatuko da, "Lagunduta" testuarekin batera. Halaber, Nafarroako Gobernuaren logotipo ofiziala, INAI/NABIren sinbolo grafikoarekin batera, deialdiaren fitxan egonen da eskuragarri, oinarri hauen testuaren amaieran. Hori guztia eskatzen ahalko da, dirulaguntza eman ondoren gauzatutako jarduerei dagokienez.
10.3. Instrukzio organoaren iritziz ez bada nahikoa gastuen justifikazioa eta haiek frogatzeko egindako ordainketena, errekerimendua eginen dio erakunde onuradunari, beharrezko frogagiriak erants ditzan bost egun balioduneko epean, gehienez. Toki-erakundeak eskabidean adierazten duen gaitutako helbide elektronikora eginen da errekerimendu hori.
10.4. Berdintasun agenteei dagozkien langileria gastuen behin betiko kostu osoa dirulaguntza kalkulatzeko kontuan hartu zena baino txikiagoa bada, edo gastuaren frogagirien bidez justifikatutako zenbatekoa emandako laguntza baino txikiagoa bada, murrizketa proportzionala ezarriko zaio dirulaguntzaren zenbatekoari. Nolanahi ere, deialdi honen 5. oinarrian ezarritako ehunekoak errespetatuko dira.
10.5. Aurrekoa galarazi gabe, honako hau hartuko da kontuan dirulaguntza ordaintzeko ezintasun, eszedentzia, lan lizentzia edo/eta soldatarik gabeko baimen egoeretan, edo lan arloko legeriak aintzat hartzen duen antzeko beste egoera batean:
a) Ordezkapenik eginez gero, kontuan hartuko dira laneko bajan dagoen pertsonaren benetako kostuak, bere gain hartuko dituenak toki-erakundeak, gehi hura ordezten duen pertsonaren kostua, ordainketa kalkulatzeko soilik, eta emandako zenbatekoa gainditzen ez bada.
b) Lanaldi-murriztapenaren kasuan, ordaindu beharreko kopurua proportzionalki gutxituko da.
c) Eszedentzietan, lizentzietan, baimenetan edo ordainsaririk ez duten egoeretan, proportzionalki gutxiagotuko da ordaindu beharreko kopurua.
11. oinarria. Bateragarritasuna.
Dirulaguntza hau bateragarria da Nafarroako Berdintasunerako Institutuak xede eta helburu bererako ematen dituen beste batzuekin, baldin eta horiek, guztira, ez badira oinarri hauetan ezarritako gehieneko zenbatekoak baino handiagoak.
Gainera, deialdi honetan arautzen diren dirulaguntzen erakunde onuradunek jasotzen ahalko dituzte, helburu eta xede bererako, bestelako edozein administrazio, entitate eta erakunde publiko edo pribaturen dirulaguntzak, laguntzak edo diru-sarrerak, baldin eta haien guztien batura ez bada dirulaguntzen deialdi honen xede den kontratazioaren kostuaren % 100 baino handiagoa.
12. oinarria. Erakunde onuradunen betebeharrak.
Halaber, Dirulaguntzei buruzko azaroaren 9ko 11/2005 Foru Legean eta oinarri hauetan ezarritako betebeharrez gain, toki-erakunde onuradunek betekizun hauek ere bete beharko dituzte:
a) Dirulaguntzaren xede den berdintasun agenteari dagozkion langileria gastuak gauzatzea, deialdiaren helburua betez.
b) Prestakuntza saioan parte hartzea, Nafarroako Berdintasunerako Institutuak prestakuntza saiorik antolatuz gero dirulaguntzaren onuradun diren toki entitateetako teknikarientzat, ebazpen honen babesean.
c) Nafarroako Berdintasunerako Institutuari dirulaguntzaren xedeko berdintasun agentearen kontratazioan edo lan egoeran sortzen den edozein aldaketaren edo gorabeheraren berri ematea, eta aldez aurreko baimena eskatzea balizko edozein aldaketarako.
d) Onartzea Nafarroako Berdintasunerako Institutuak emandako dirulaguntzen gainean egiten dituen egiaztapen eta kontrol tekniko eta ekonomikorako lanak.
e) Nafarroako Berdintasunerako Institutuari komunikatzea diruz lagundutako jarduerak finantzatzeko lortu direla bestelako laguntzak, dirulaguntzak, diru-sarrerak edo baliabideak. Jakinarazpenean honako informazio hau eman behar da: zenbat diru lortu den, diruz lagundutako jarduerak noiz egin diren eta zein diren beren kontzeptuak, ongi zehaztuta. Jakin bezain laster eman beharko da horren berri, eta, betiere, dirulaguntza ematearen gainean ebatzi baino lehen. Nolanahi ere, dirulaguntza emateko ebazpenaren ondoren jakinez gero, justifikazioaren unean eman beharko da haren berri, jasotako funtsa zertan aplikatu den adierazita.
f) Kontabilitate liburuak, erregistro eginbidetuak eta gainerako agiriak behar bezala auditatuak izatea, erakunde onuradunari aplikatzen zaion araudian eskatzen den bezala, bermatzeko egiaztapen eta kontrol ahalmenak behar bezala betetzen direla.
g) Jasotako funtsen aplikazioari buruzko frogagiriak gordetzea, agiri elektronikoak barne, egiaztapen eta kontrol lanen xede diren bitartean.
h) Nafarroako Gobernuaren parte-hartzea agertzea idatziz edo ahoz eta bidea edozein dela ere egiten den edozein informazio, komunikazio, publizitate edo zabalkundetan, bai eta emakumeen eta gizonen arteko aukera-berdintasuneko agentearen lanaren esparruan prestatzen den dokumentazio guztian ere, eta testu hau jartzea: «Nafarroako Berdintasunerako Institutuak lagunduta / Subvenciona Instituto Navarro para la Igualdad».
i) Betetzea xedatua dagoena maiatzaren 17ko 5/2018 Foru Legean (foru lege horrek hizpide ditu gardentasuna, informazio publikoa eskuratzea eta gobernu ona), haren bidez arautu baitziren Nafarroako Aurrekontu Orokorren kargurako dirulaguntzen toki-erakunde onuradunen gardentasun betebeharrak.
13. oinarria. Dirulaguntzak itzultzea.
13.1. Onuradunak ez baditu betetzen deialdi honen oinarrietan ezarritako betebeharrak eta Dirulaguntzei buruzko azaroaren 9ko 11/2005 Foru Legean ezarritakoak, dirulaguntza galduko du, eta jasotako dirua itzuli beharko du, bai eta ordainketaren dataz geroztikako berandutze-interesak ere, halakorik bada, Nafarroako Ogasun Publikoari buruzko Foru Legean ezarritakoaren arabera, eta horrek ez ditu deusetan galaraziko aipatutako 11/2005 Foru Legearen II. tituluaren arabera eskatzen ahal diren erantzukizunak.
–3.1.2 oinarria betetzen ez dela egiaztatzen bada, % 100eko ez-betetzea izan dela ondorioztatuko da.
–4.1 oinarrian ezarritako jarduerak gauzatzen ez badira, % 100eko ez-betetzea izan dela ondorioztatuko da.
–10. oinarrian ezarritakoak zehazten du zer egoeratan murriztuko den emandako zenbatekoa.
13.2. Aurrekoa gorabehera, bidezkoa izanen da eskubidea kentzea eta jasotako diru guztia itzularaztea, baldin eta toki-erakundeak, bere erabakiz eta bidezko arrazoirik gabe, berdintasun agentearen kontratazioa bukatzen badu, eta ez badu beste agente bat kontratatzen hilabeteko epean. Ildo horretan, erakunde onuradunek dirulaguntza emateko kontuan izandako baldintzetan gertatzen diren aldaketa guztien berri eman beharko diote Nafarroako Berdintasunerako Institutuari.
13.3. Diruaren itzulketa eskatzeko prozedura arautuko da jarraikiz Dirulaguntzei buruzko azaroaren 9ko 11/2005 Foru Legearen 35.6 artikuluari, eta abiarazten denetik 12 hilabeteko epean ebatzi beharko da.
14. oinarria. Arau-hausteak eta zehapenak.
Arau-hausteei eta zehapenei dagokienez, jarraituko zaie Dirulaguntzei buruzko azaroaren 9ko 11/2005 Foru Legearen 42. artikuluari eta hurrengoei.
15. oinarria. Errekurtsoak.
Deialdi honen eta beronen oinarri arautzaileen aurka, gora jotzeko errekurtsoa jartzen ahalko da, zuzenduko zaiona Lehendakaritzako, Berdintasuneko, Funtzio Publikoko eta Barneko kontseilariari, hilabeteko epean, argitaratu eta biharamunetik hasita, jarraikiz urriaren 1eko 39/2015 Legearen 121. artikuluari eta hurrengoei (Administrazio Prozedura Erkideari buruzko Legea) eta martxoaren 11ko 11/2019 Foru Legearen 126. artikuluari (foru lege horrek hizpide ditu Nafarroako Foru Komunitateko Administrazioa eta foru-sektore publiko instituzionala).
16. oinarria. Araudi gehigarria.
Oinarriotan ezartzen ez den guztian, jarraituko zaie Dirulaguntzei buruzko azaroaren 9ko 11/2005 Foru Legeari eta aplikatzekoa den gainerako araudiari.
DEIALDIAREN FITXA, NON ESKURAGARRI BAITAUDE OINARRI HAUETAN AIPATUTAKO ERANSKINAK; BERTATIK IZAPIDETU DAITEZKE ESKABIDEA ETA 8DIRULAGUNTZAREN ONDORENGO JUSTIFIKAZIOA
Iragarkiaren kodea: F2300317
Sarbidea
Nafarroako Aldizkari Ofiziala
Paseo Pablo Sarasate, 38, 2.º izda.
31001 - Iruña
848 42 12 50