Iragarkia

236. ALDIZKARIA - 2023ko azaroaren 14a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

359E/2023 EBAZPENA, urriaren 31koa, Trantsizio Energetikorako, Proiektu Estrategikoen eta S4ren zuzendari nagusiak emana, dirulaguntza honen deialdia onesten duena: "2023ko deialdia, I+G+b arloa finantzatzen duten Europar Batasuneko programetarako proiektuak prestatu eta aurkezteko laguntzetarako". DDBN identifikazioa: 724504.

Deialdi honetako laguntzen helburua da Nafarroako ETEek eta SINAIko (Nafarroako I+G+b Sistema) eragileek I+G+b finantzatzeko erabiltzen diren Europar Batasuneko programetan parte har dezaten bultzatzea.

Horretarako, diruz lagunduko da entitate horiek aholkularitza enpresak kontratatzea, I+G+b proiektuak prestatzeko eta programa horietan aurkezteko. Horrela, aurkezten diren proposamenen kopurua eta kalitatea handitu nahi da, bai eta dirulaguntza honen onuradunei baliabide ekonomiko gehiago eskuratuko dituztela ziurtatzea.

Adierazitakoarekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. 2023ko deialdia onestea, I+G+b arloa finantzatzen duten Europar Batasuneko programetarako proiektuak prestatu eta aurkezteko laguntzetarako.

2. Dirulaguntzak emateko oinarri arautzaileak onestea. Ebazpen honen eranskinean bildu dira.

3. Deialdi honen konpromisoei aurre egiteko, jarraian adierazten den aurrekontuko kreditua baimendu da:

4. Ebazpen hau eta eranskina Nafarroako Aldizkari Ofizialean argitaratzea.

5. Ebazpen honek ez du administrazio bidea amaitzen, eta zilegi da haren aurka gora jotzeko errekurtsoa jartzea, Industriako eta Enpresen Trantsizio Ekologiko eta Digitalerako kontseilariari zuzendua, argitaratu eta hurrengo egunetik hilabeteko epean.

Iruñean, 2023ko urriaren 31n.–Trantsizio Energetikorako, Proiektu Estrategikoen eta S4ren zuzendari nagusia, Uxue Itoiz Mariñelarena.

ERANSKINA.–OINARRI ARAUTZAILEAK

1. oinarria.–Xedea.

Laguntza hauen helburua da Nafarroako ETEek eta SINAIko (Nafarroako I+G+b Sistema) eragileek I+G+b finantzatzeko erabiltzen diren Europar Batasuneko programa hauetan (aurrerakoan, Batasuneko programak) parte har dezaten bultzatzea, programa horien bidez finantzatzen baitira ikerketa zientifikoa, garapen teknologikoa eta berrikuntza (I+G+b):

A.–Horizon Europe programa.

B.–EURATOM ikerketa eta prestakuntza programa.

C.–Konektatu Europa mekanismoa.

D.–Europa Digitala.

E.–Merkatu bakarra.

F.–Europako Espazio Programa.

G.–LIFE: Ingurumenerako eta Klima Ekintzarako programa.

Horrela, programa horietatik laguntzarik lortzen ez badute, I+G+b proiektuaren proposamena aurkezteko kontratatu zuten aholkularitza enpresaren gastua diruz lagunduko da.

2. oinarria.–Entitate onuradunak.

1. Honako hauek dira laguntza hauek jaso ditzaketenak:

a) 2014ko ekainaren 17ko 651/2014 (EB) Erregelamenduaren I. eranskinean, enpresa txiki eta ertainaren definizioari egokitzen zaizkion enpresak. Kategorien araberako Salbuespenari buruzko Erregelamendu Orokor horren bidez (aurrerakoan KSEO) zenbait laguntza-kategoria barne merkatuarekin bateragarritzat jotzen dira, Tratatuaren 107. eta 108. artikuluak aplikatuz.

b) SINAIko (Nafarroako I+G+b Sistemako) exekuzio eragileak, halakotzat egiaztaturik daudenak Unibertsitateko, Berrikuntzako eta Eraldaketa Digitaleko kontseilariaren otsailaren 28ko 2E/2020 Foru Aginduak araututako erregistroan (hemendik aurrera, SINAIko eragileak).

2. Hauek dira onuradun izateko betebeharrak:

a) Nafarroan lantokia izatea eta lantoki horretan garatzea diruz lagundutako proiektua.

b) Dirulaguntzei buruzko azaroaren 9ko 11/2005 Foru Legearen 13.2 artikuluan onuradun izateko ezarritako debeku-kasuetan ez egotea.

Zerga-betebeharrak eta Gizarte Segurantzarekikoak egunean dituztela egiaztatzeko, eskatzaileak baimena ematen dio departamentu honi egoera hori egiaztatzen duten datuak kontsultatzeko, hala dagokionean. Eskatzaileak berariaz uko egiten badio baimen hori emateari, betebehar horietan egunean dagoela frogatzen duten ziurtagiriak aurkeztu beharko ditu.

c) Inolako administrazio zehapen irmorik edo kondena epai irmorik betetzen ez egotea sexu edo genero diskriminaziotzat hartutako lan praktikak egiteagatik edo onartzeagatik, eta, kasua bada, ez egotea arrazoi horiek direla-eta ezarritako epai edo zehapen bat betetzeko zain.

d) Haren jarduera ekonomikoak ez dezala kalte nabarmenik eragin Europako Parlamentuaren eta Kontseiluaren 2020ko ekainaren 18ko 2020/852 (EB) Erregelamenduaren 17. artikuluan adierazitako ingurumen-helburuetan. Erregelamendu hori inbertsio jasangarriak errazteko esparrua ezartzeari buruzkoa da eta 2019/2088 (EB) Erregelamendua (Taxonomiari buruzko Erregelamendua) aldatzen du.

e) Enpresa bada, Nafarroako Industria Erregistroan inskribaturik edo inskripzioa eskatuta egon beharko du, hala badagokio Ekonomia, Ogasun, Industria eta Enpleguko kontseilariak Nafarroako Industria Erregistroa sortzeko apirilaren 30ean emandako 152/2013 Foru Aginduaren 3. artikuluan xedatutakoaren arabera.

f) SINAIko eragilea bada eta jarduera ekonomikoak eta ez-ekonomikoak egiten baditu, bi jarduera mota horiek eta bakoitzaren kostuak eta finantzaketa argi bereizten dituen kontabilitatea izan beharko du.

2. Eskatutako baldintzak laguntza osorik ordaindu arte bete beharko dira, eta eskabidean jasotako erantzukizunpeko adierazpenaren bidez egiaztatuko da hala dela.

3. Ezin dira onuradun izan:

a) Bete gabe dagoen berreskuratze agindu baten mende daudenak, Europako Batzordeak laguntza legez kanpokotzat eta merkatu erkidearekin bateraezintzat jo ondoren; ez eta, Kategorien araberako Salbuespenari buruzko Erregelamendu Orokorraren 2. artikuluko 18. atalean definitzen den gisan, krisian dagoen enpresa gisa sailkaturik daudenak ere.

b) Krisian dauden enpresak, Kategorien araberako Salbuespenari buruzko Erregelamendu Orokorraren 2. artikuluko 18. ataleko definizioaren arabera. Salbuespena dira 2019ko abenduaren 31n krisian ez zeudenak baina 2020ko urtarrilaren 1etik 2021eko abenduaren 31ra bitartean krisian dauden enpresak izatera pasatu direnak.

3. oinarria.–Gastu diruz lagungarriak.

1. I+G+b proiektuen proposamenak egin dituzten aholkularitza enpresen kontratazio-gastuak lagunduko dira diruz, baldin eta baldintza hauek betetzen badituzte:

a) Batasuneko programa hauetara aurkeztu izana:

A.–Horizon Europe programa.

B.–EURATOM ikerketa eta prestakuntza programa.

C.–Konektatu Europa mekanismoa.

D.–Europa Digitala.

E.–Merkatu bakarra.

F.–Europako Espazio Programa.

G.–LIFE: Ingurumenerako eta Klima Ekintzarako programa.

b) Aurkeztu ziren Batasuneko programan finantzaketarik lortu ez izana, baina nota ona lortu izana Europako Batzordeak egindako ebaluazioan, 5. oinarrian ezartzen den bezala.

c) 2022ko abuztuaren 31tik aurrerako ebaluazio-txostena (ESR Evaluation Summary Report edo antzekoa) izatea.

d) Batasuneko programan aurkeztu izana deialdi hau argitaratu baino lehen.

e) Aholkularitza enpresaren gastuak ordaindu izana deialdi hau argitaratu baino lehen.

2. Honako gastu hauek ez dira diruz lagungarriak izanen:

a) Aholkularitza enpresak laguntza-eskatzaileari egiten dizkion etengabeko edo aldizkako aholkularitza jarduerak.

b) Balio erantsiaren gaineko zerga, salbu eta kostu hori onuradunarentzat berreskuraezina denean; kasu horretan, onuradunak frogatu egin beharko du.

4. oinarria.–Aholkularitza enpresen betekizunak.

1. Aholkularitza enpresek eginen dituzte I+G+b proiektuen proposamenak, baldin eta beren helburu sozialean jasota badute jarduera horiek egitea.

Baldintza hauek ere bete beharko dituzte:

a) Laguntza eskatzen duen enpresari lotutako edo atxikitako enpresa bat ez izatea, Batzordearen 2003ko maiatzaren 6ko Gomendioaren ETEaren definizioan agertzen diren terminoen arabera.

b) Proiektuaren proposamenean ez agertzea sozio edo koordinatzaile bezala.

c) Deialdi honen babespeko laguntzarik ez eskatzea.

d) Ez azpikontratatzea dirulaguntzaren xedeko lanen exekuzioa.

2. Laguntzak kudeatzen dituen organoak beharrezkotzat jotzen duen informazio gehigarria eskatzen ahalko du aholkularitza enpresak emandako datuak eta haien kualifikazioa egiaztatzeko.

Halaber, diruz lagundutako proiektuak prestatzen parte hartu duten aholkularitza entitateen zerrenda argitaratzen ahalko du Nafarroako Gobernuaren Atarian (www.nafarroa.eus) edo intereseko beste web-orri batzuetan.

5. oinarria.–Baldintzak eta laguntzaren zenbatekoa.

1. Laguntzaren zenbatekoa diruz lagungarria den gastuaren (aholkularitza enpresa kontratatzea) %80 izanen da, baina ezin izanen ditu gainditu ondoren ezartzen diren gehieneko kopuruak, ETEentzat eta SINAIko eragileentzat, hiru faktoreren arabera:

a) Batasuneko programak zenbat fase dituen: Horren arabera, 1.1 eta 1.2 apartatuak bereizten dira.

b) Eskatutako erreferentzia-atalasea gainditzea, zeina ebaluazio-txostenean ("Evaluation Summary Report" edo antzekoa) zehaztuko baita, edo deialdian hurrengo fasera igarotzeko ezarritako irizpidea: 1.1 apartatuaren kasuan, aski da atalasea berdindu edo gainditzearekin; baina 1.2 apartatuaren kasuan, beharrezkoa da atalasearen %80 edo gehiagora iristea, edo bikaintasun zigilua edukitzea.

c) Proiektuan parte hartzen dutenen kopurua eta izaera (sozioak edo koordinatzaileak): 1.1 apartatuaren kasuan, laguntza lortzen ahal dute proiektuen koordinatzaileek, bakarrik, eta 1.2 apartatuaren kasuan, laguntza aldatuko da proiektuan parte hartzen duten entitate kopuruaren arabera, eta parte-hartzearen nolakoaren arabera, sozio gisa edo koordinatzaile gisa.

1.1. Gehieneko laguntza, bi fase edo fase gehiago dituzten Batasuneko programetako aldez aurretiko faseetan parte hartzen duten proiektuen kasuan:

Proiektuen koordinatzaile gisa parte hartzen duten eta hurrengo fasera igarotzea lortzen duten entitateak soilik izan daitezke laguntza honen onuradunak.

1.2. Gehieneko laguntza, deialdiaren azken fasea lortu duten proiektuen kasuan, edo fase bakarra dutenen kasuan:

2. 1.1 eta 1.2 apartatuetako laguntzak bateraezinak dira elkarren artean.

Entitateek laguntzak lortu bazituzten, aurreko deialdietan, aldez aurretiko faseetan proposamenak aurkezteko (oinarri honen 1.1 apartatua), laguntza horren zenbatekoa kenduko zaie deialdi honen babesean azken faserako laguntzarik (1.2 apartatua) lortzen badute.

3. Entitate batek proposamen eta programa bakar baterako jasotzen ahalko du laguntza.

6. oinarria.–Eskaerak aurkezteko epea eta modua.

1. Eskaerak aurkezteko epea deialdi hau Nafarroako Aldizkari Ofizialean argitaratu eta biharamunean hasi, eta 2023ko azaroaren 20an bukatuko da, egun hori barne.

2. Eskaerak telematikaz aurkeztuko dira nahitaez, Nafarroako Gobernuak Interneten duen Atariaren (www.nafarroa.eus) tramiteen katalogoko fitxa erabiliz (hemendik aurrera, laguntzen fitxa).

7. oinarria.–Eskaerarekin batera aurkeztu beharreko dokumentazioa.

1. Laguntza-eskaerarekin batera, honako dokumentazio hau aurkeztu beharko da, laguntzen fitxan eskuragarri dauden ereduetara egokituta (artxibo digital bereizi gisa aurkeztu beharko dira, beren izenarekin behar bezala identifikatuta):

a) 2.3 oinarrian adierazitako betekizunei buruzko erantzukizunpeko adierazpena.

b) Europako deialdira aurkeztutako proposamena, aurkeztu izanaren frogagiriarekin, proiektuaren aurrekontua barne.

c) Aurkeztutako proposamenari buruz erakunde eskudunak emandako balorazio txostenaren kopia (Evaluation Summary Report edo antzekoa), non egiaztatzen ahalko baita zein den proiektuaren balorazioa, deialdian ezarritako onespen atalaseei dagokienez, edo faseak gainditu diren.

d) Eskatzailearen eta aholkularitza enpresaren artean egindako kontratua, hitzartutako baldintzak adierazten dituena, ekonomikoak zein teknikoak. Kontratu horrek deialdi hau argitaratu aurreko data izanen du.

e) Aholkularitza enpresak egindako fakturak eta ordainketen frogagiriak (bankuko ziurtagiriak edo laburpenak, behar bezala identifikatuak, edo ordainketaren trazabilitatea egiaztatzeko moduko beste edozein merkataritza-dokumentu). Ordainketa egunak deialdi hau argitaratzen den eguna baino lehenagokoa izan behar du.

f) ETEen kasuan: itxitako, sinatutako eta Merkataritza Erregistroan edo Kooperatiben Erregistroan gordailututako urteko kontuak eta, horiekin batera, itxitako azken hiru ekitaldiei buruzko memoriak eta Erregistroak egindako txostenak (digitalki autentifikatuta edo zigilatuta, eta ikuskatuta, nahitaezkoa denean), bai eskatzailearenak, bai haren enpresa elkartu eta lotutakoenak. Erregistro horretan kontuak aurkeztera behartuta ez dauden ETEek eta langile autonomoek PFEZaren aitorpena aurkeztuko dute.

Enpresaren neurria zehazte aldera, eskatzaileak dokumentazio hori edo Nafarroako Merkataritza Ganberaren ziurtagiria aurkezten ahalko du. Hala egin ezean, 5. oinarrian SINAIko eragileentzat adierazitakoa izanen da emanen zaien laguntzaren intentsitatea.

g) Dirulaguntzen onuradunen gardentasun-betebeharrari buruzko dokumentazioa, araututa dagoena Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 12.4 artikuluan, atarian eskuragarri dagoen laguntzen fitxako ereduaren araberakoa.

2. Aurkezten den dokumentazioak ez baditu biltzen eskatzen diren baldintzak, laguntza ukatu eginen da. Aurkezten den dokumentazioa ezin da zuzendu.

8. oinarria.–Dirulaguntza emateko irizpideak.

1. Laguntza hauek norgehiagokako prozeduraren bidez emanen dira. Hartara, aurkeztutako eskaerak konparatuko dira, haien artean lehentasun-hurrenkera bat ezartzeko, oinarri honetan ezarritako balorazio irizpideekin bat.

Baloraziorik handiena lortu duten eskaerei 5. oinarrian ezarritako laguntza-intentsitatea (edo oinarri berean ezarritako gehienekoa) aplikatzearen emaitza izanen da laguntzen zenbatekoa, deialdi honetarako erabilgarri dagoen aurrekontu-kreditua agortu arte (150.000 euro), honela banatuta:

–5. oinarriaren 1.1 apartatuko laguntzak: 37.500 euro.

–5. oinarriaren 1.2 apartatuko laguntzak: 112.500 euro.

Modalitate bateko eskaera guztiei erantzun ondoren krediturik badago, beste modalitateko proiektuak diruz laguntzeko erabiltzen ahalko da, lehentasun-hurrenkerari jarraituz. Aurrekontuetan behar adina diru ez egoteagatik kontuan hartzen ez diren eskaerak ezetsitzat joko dira.

2. Eskaerak baloratzeko irizpideak honako hauek izanen dira, eta gehienez ere 16 puntu lortzen ahalko dira:

a) Bi fase edo gehiago dituzten Batasuneko programetako aldez aurretiko faseetan parte hartzen duten proiektuen kasuan, eskatzaile motaren arabera:

b) Deialdiaren azken fasea lortu duten proiektuen kasuan, edo fase bakarra dutenen kasuan, eskatzaile motaren arabera:

c) Proiektuaren aurrekontuaren balorazioa, formula honen arabera:

Puntuazioa = atalaseari dagokionez lortutako notaren % / atalaseari dagokionez lortutako notaren % handiena.

3. Lortutako puntuazioan berdinketa gertatzen bada, honela ebatziko da:

a) Parte hartzen den Batasuneko programa, lehentasun-ordena honako hau dela:

A.–Horizon Europe programa.

B.–EURATOM ikerketa eta prestakuntza programa.

C.–Konektatu Europa mekanismoa.

D.–Europa Digitala.

F.–Europako Espazio Programa.

E.–Merkatu bakarra.

G.–LIFE: Ingurumenerako eta Klima Ekintzarako programa.

b) Berdinketak irauten badu, zer eskaera aurkeztu den lehenago, horrexek edukiko du lehentasuna.

9. oinarria.–Dirulaguntza ematea eta ordaintzea.

1. Laguntzak kudeatzen dituen organoak, hots, S4 Proiektu Estrategikoen Zerbitzuak, oinarri arautzaile hauetan ezarritako irizpideei jarraituz ebaluatuko ditu eskaerak, eta organo eskudunari laguntza emateko eta ordaintzeko ebazpen proposamena igorriko dio, non adieraziko baita onuradunek dirulaguntza lortzeko betebehar guztiak betetzen dituztela.

2. Trantsizio Energetikorako, Proiektu Estrategikoen eta S4ren zuzendari nagusia izanen da organo eskuduna dirulaguntzaren kontzesioa eta ordainketa ebazteko.

Ebazpena gehienez bi hilabeteko epean eman eta jakinaraziko da eskatzaileen gaitutako helbide elektroniko bakarrean (GHEb), eskaerak aurkezteko epea bukatzen denetik hasita.

Ezarritako gehieneko epea bukatzen bada berariazko ebazpenik eman eta jakinarazi gabe, eskaerak administrazio isiltasunez ezetsitzat jotzen ahalko dira. Hala ere, organo eskuduna behartua dago dirulaguntzak onartu edo ukatzeko berariazko ebazpena ematera eta jakinaraztera, oinarri hauetan xedatutakoari jarraikiz.

Ebazpena arrazoitua izanen da, eta bertan azalduko dira, gutxienez ere, dirulaguntza jasoko duten eskatzaileen zerrenda eta, hala badagokio, ezetsi diren eskaerak, eta, horien artean, aurrekontuko mugagatik ezetsitakoak.

10. oinarria.–Onuradunen betebeharrak eta horiek ez betetzearen ondorioak.

1. Dirulaguntza jasotzen duten onuradunek honako betebehar hauek izanen dituzte:

a) Oinarri arautzaile hauetan ezarritako moduan egin eta justifikatu beharko dituzte dirulaguntzaren xedeko jarduerak.

b) Proiektuaren proposamena prestatu eta aurkeztu izanaren aipamen publikoa egiten bada, jaso beharko da Nafarroaren Gobernuak finantzatu duela.

c) Proiektuaren emaitzak zabaltzeko materialetan ez da emakumea diskriminatzen duen irudirik azalduko, eta emakumeen eta gizonen arteko berdintasuna eta rol aniztasuna sustatuko dira. Halaber, prestatzen den dokumentazioan ez da erabiliko hizkuntza sexistarik.

d) Enpresa-deslokalizaziorik ez egiteko konpromisoa hartzea, Enpresen sustraitzearen aldeko eta enpresa-deslokalizazioaren aurkako neurriei buruzko abenduaren 16ko 18/2020 Foru Legearen 4. artikuluan ezartzen dena kontuan hartuta (http://www.lexnavarra.navarra.es/detalle.asp?r=53320).

e) Dirulaguntzei buruzko Foru Legearen 9. artikuluan ezarritako betebehar orokorrak.

2. Oinarri arautzaile hauetan edo Dirulaguntzei buruzko Foru Legean ezarritako betebehar guztiak betetzen ez badira, ordaindutako dirulaguntza itzuli egin beharko da, foru lege horren 35. artikuluan xedatutakoarekin bat.

Halaber, aurreko betebeharretako bat hein batean betetzen ez bada, ordaindu beharreko dirulaguntzaren zenbatekoa berriro ere zehazten ahalko da, proportzionaltasun printzipioari jarraikiz.

11. oinarria.–Baliabide elektronikoen bidezko harremanak.

1. Laguntzen eskaera eta aurkeztu beharreko dokumentazio guztia modu telematikoan aurkeztuko da, laguntzen fitxaren bitartez.

2. Administrazio egintzen jakinarazpena eta laguntza hauek emateko prozeduraren barruan egiten diren jarduketa guztien komunikazioak telematika bidez eginen dira, entitate eskatzaileen gaitutako helbide elektroniko bakarraren bidez (GEHb). Jakinarazpen edo komunikazioaren bidalketaren berri emanen da eskatzaileak jarritako helbide elektronikoaren bitartez.

12. oinarria.–Dirulaguntzaren bateraezintasuna.

Deialdi honetako dirulaguntzak bateraezinak dira Nafarroako Foru Komunitateko Administrazioak, beste administrazio publiko batzuek, beste entitate publiko nahiz pribatu batzuek edo partikularrek, Espainiakoek nahiz nazioartekoek, gastu beretarako emandako beste dirulaguntza batzuekin.

13. oinarria.–De minimis laguntza.

1. Deialdi honetako dirulaguntzak "de minimis" laguntzak dira, Europako Batzordeak 2013ko abenduaren 18an emandako 1407/2013 Erregelamenduan xedatutakoaren arabera. Erregelamendu horren xedea da Europar Batasunaren Funtzionamenduari buruzko Tratatuaren 107. eta 108. artikuluak "de minimis" laguntzei aplikatzeko modua xedatzea (2013ko L 352 EBAO, abenduaren 24koa). Erregelamendu horren aplikazio aldia 2023ko abenduaren 31ra arte luzatu da Batzordearen 2020ko uztailaren 2ko 2020/972 (EB) Erregelamenduaren bidez (2020ko L 215/3 Europar Batasunaren Aldizkari Ofiziala, uztailaren 7koa).

2. Erregelamendu horrekin bat, enpresa bakar bati hiru zerga-ekitaldiko edozein alditan emandako "de minimis" laguntza guztien batura ezin da 200.000 eurotik gorakoa izan. Aipatu erregelamenduaren 2.2 artikuluan ezarrita dago enpresa bakarraren definizioa.

Horretarako, interesdunek kasuan kasuko zerga ekitaldian eta aurreko bi zerga ekitaldietan hartutako bestelako "de minimis" laguntzak aitortu beharko dituzte eskaera-orrian.

14. oinarria.–Emandako dirulaguntzen publizitatea.

Laguntzak kudeatzen dituen organoak jendaurrean jarriko ditu emandako dirulaguntzak, Ogasun Ministerioaren Dirulaguntzen Datu Base Nazionalean argitaratuz (http://www.pap.minhap.gob.es/bdnstrans/GE/eu/index ), honako datu hauek adierazita: deialdia, laguntza zein aurrekontu kredituri egozten zaion, onuradunak eta emandako diru kopurua.

Deialdi honen emaitzak argitaratuko dira, orobat, Nafarroako Gobernuak Interneten duen Atariko (www.navarra.es) izapideen katalogoko laguntzen fitxan.

15. oinarria.–Oinarri arautzaileen aurkako errekurtsoa.

Interesdunek gora jotzeko errekurtsoa jartzen ahal dute oinarri arautzaile hauen aurka, Industriako eta Enpresen Trantsizio Ekologiko eta Digitalerako kontseilariari zuzendua, hilabeteko epean, argitaratu eta biharamunetik.

Iragarkiaren kodea: F2315553