1. NAFARROAKO FORU KOMUNITATEA
1.7. BESTELAKOAK
159/2023 EBAZPENA, urriaren 27koa, Trantsizio Energetikorako, Proiektu Estrategikoen eta S4ren zuzendari nagusiak emana, aurretiazko administrazio baimena eta eraikitzeko administrazio baimena ukatzen dituena Cintruenigoko, Fiteroko, Corellako eta Tuterako udal mugarteetan "Los Chopos haize-parkea" izeneko energia elektrikoa ekoizteko instalazioarentzat.
1.–2021eko maiatzaren 28ko baimen-eskaera.
2021eko maiatzaren 28an, eta Nafarroan haize-parkeetarako baimena arautzen duen maiatzaren 8ko 56/2019 Foru Dekretuan ezarritakoa aplikatuta, Enel Green Power España SLUk aurretiazko administrazio baimena eta eraikitzeko administrazio baimena eskatu zituen Cintruenigoko, Fiteroko, Corellako eta Tuterako udal mugarteetan energia elektrikoa ekoizteko 42 MW-eko instalazio batentzat eta haren ebakuazio-azpiegiturentzat, hots, "Los Chopos" izeneko haize-parkearentzat.
2.–Jendaurreko informazioa eta kontsulten tramitea.
Maiatzaren 8ko 56/2019 Foru Dekretuaren bidez Nafarroako haize-parkeetarako baimena arautzen da. Dekretu horren 7. artikuluarekin bat etorriz, Industria Antolamenduaren, Azpiegitura Energetikoen eta Meatzeen Zerbitzuak jendaurrean jarri zuen Enel Green Power España SLUk egindako eskaera 30 egunez. Horretarako, iragarki bat argitaratu zen Nafarroako Aldizkari Ofizialean (2021eko abenduaren 22an, 286. zenbakia) eta Diario de Navarra egunkarian, bai eta Nafarroako Gobernuaren Gobernu Irekiaren webgunean ere.
3.–Ingurumen inpaktuaren adierazpena eta lurzoru urbanizaezinetako jarduera baimengarrietarako baimena.
Lurralde eta Paisaia Zerbitzuko zuzendariaren uztailaren 31ko 294E/2023 Ebazpenaren bidez, Los Chopos haize-parkerako baimena ukatu zen. Parke hori Fiteroko eta Cintruenigoko udal mugarteetan jarri nahi da, eta haren ebakuazio- eta transformazio-azpiegiturek, aipatutako udalerriez gain, Corellako eta Tuterako udal mugarteetan ere dute eragina.
Ingurumeneko zuzendari nagusiaren abuztuaren 29ko 846E/2023 Ebazpenaren bidez, ingurumen inpaktuaren adierazpena egin zen, kontrakoa.
4.–Berme ekonomikoa itzultzeko eskaera.
2023ko urriaren 16an, Enel Green Power España SLUk eskatu du instalazioaren sarbide- eta konexio-baimenari lotutako bermea itzultzeko.
5.–Aurretiazko administrazio baimena ukatzeko eta bermea itzultzeko proposamena.
Espedientearen azterketa teknikoa egin ondoren eta bermea itzultzeko sustatzailearen eskaera azterturik, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatu du prozedura behar bezala gauzatu dela, eta proposatu du espedientea ebaztea, honela: aurretiazko administrazio baimena eta eraikitzeko administrazio baimena ukatzen dira eta instalazioaren sarbide- eta konexio-baimenari lotutako bermea itzuliko da.
Adierazitakoarekin eta espedientean jasotako agiriekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabilita,
EBAZTEN DUT:
1. Cintruenigoko, Fiteroko, Corellako eta Tuterako udal mugarteetan "Los Chopos haize-parkea" izeneko energia elektrikoa ekoizteko instalazioa jartzeko asmoz Enel Green Power España SLUk eskatutako aurretiazko administrazio baimena eta eraikitzeko administrazio baimena ukatzea.
2. Agindua ematea Diruzaintza Atalari sarbide- eta konexio-prozedurari lotutako 1.680.000 euroko bermea itzul dezan; Enel Green Power España SLUk jarri zuen berme hori 2020ko apirilaren 6an (erregistro zenbakia: 5020000094 CFNA 2020 (Av-NAV-0231)).
3. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzura, Ingurumen Eraginaren Atalera, Lurraldearen Antolamenduaren Atalera, Ureztalurren eta Lurzati Berrantolamenduaren Atalera, Ondare Historikoaren Zerbitzura, Herri-lanen eta Azpiegituren Zuzendaritza Nagusiko Zainketa Zerbitzura eta Ekonomia eta Ogasun Departamentuko Ekonomia eta Finantza Zerbitzuko Diruzaintza Atalera, behar diren ondorioak izan ditzan.
4. Ebazpen hau Nafarroako Aldizkari Ofizialean argitaratzea, orok jakin dezan.
5. Ebazpen hau jakinaraztea Enel Green Power España SLUri eta Red Eléctrica de España SAUko Sarera Lotzeko Departamentuari, eta ohartaraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Industriako eta Enpresen Trantsizio Ekologiko eta Digitalerako kontseilariari zuzendua, jakinarazi eta biharamunetik hilabeteko epean. Errekurtsoan espediente zenbakia adierazi beharko da.
6. Ebazpen hau Cintruenigoko, Fiteroko, Corellako eta Tuterako udalei jakinaraztea, eta aditzera ematea haren kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2023ko urriaren 27an.–Trantsizio Energetikorako, Proiektu Estrategikoen eta S4ren zuzendari nagusia, Uxue Itoiz Mariñelarena.
Iragarkiaren kodea: F2315410
