Iragarkia

231. ALDIZKARIA - 2023ko azaroaren 7a

1. NAFARROAKO FORU KOMUNITATEA

1.7. BESTELAKOAK

72/2023 FORU AGINDUA, urriaren 24koa, Lurralde Kohesiorako kontseilariak emana, zeinaren bidez proiektu hau behin betiko onesten baita: "Iruña eta Zizur Txikia Donejakue bidetik lotzeko oinezkoentzako eta bizikletetarako ibilbidea eraikitzea".

Lurralde Kohesiorako kontseilariaren uztailaren 5eko 41/2023 Foru Aginduaren bidez behin-behinekoz onetsi zen proiektu hau: "Iruña eta Zizur Txikia Donejakue bidetik lotzeko oinezkoentzako eta bizikletetarako ibilbidea eraikitzea".

Azterlan eta Proiektuen Zerbitzuak txosten batean aditzera eman du ezen jendaurreko aldia bukaturik alegazio bat jaso dela. Hona hemen alegazioa eta erantzuna:

2023-1142832 alegazioa, Ezequiel Urdangarín Ayestaránek Pedro José Eslava Zozaya jaunaren izenean aurkeztua.

Eskatu du ez dadila bere jabetzako lurzatia ukitu, eta adierazi du Zizurko 1. poligonoko 81B lurzatia hiri-lurzorua dela, nahiz eta zerrendan "larreak" agertu, eta hortaz, landa-lurzorutzat hartu; akatsa dago Nafarroako Lur-ondasunen Erregistroan.

Erantzuna:

Alegatutakoa baiesten da, "Iruña eta Zizur Txikia Donejakue bidetik lotzeko oinezkoentzako eta bizikletetarako ibilbidea eraikitzea" proiektuak bere jabetzako lurzatia ukitzeari dagokionez. Proiektuan aldaketa bat egin da, hasiera batean aurreikusitako ezpondaren ordez euste-horma bat eraikitzeko, eta horrek galaraziko du bere titulartasuneko lurrak ukitzea; hala islatu da ondasun eta eskubideen zerrenda berrian. Nafarroako Lur-ondasunen Erregistroan adierazten denari buruz, ez da zilegi horri buruz ezer esatea.

Aurkeztu den alegazioa ebatzita eta behar diren aldaketak eginda, ondasun eta eskubideen zerrenda aldatu da, eta eranskinean ageri dena izanen da.

Horrenbestez, bat etorriz Azterlan eta Proiektuen Zerbitzuak txostenean jaso eta proposatu duenarekin, eta Lurralde Kohesiorako Departamentuaren egitura organikoa ezartzen duen urriaren 30eko 263/2019 Foru Dekretuak xedatzen duenarekin,

AGINTZEN DUT:

1. Behin betiko onestea "Iruña eta Zizur Txikia Donejakue bidetik lotzeko oinezkoentzako eta bizikletetarako ibilbidea eraikitzea" izeneko proiektua.

2. Behin betiko onestea ondasun eta eskubideen zerrenda, zeina eranskinean jaso baita.

3. Foru agindu hau Nafarroako Aldizkari Ofizialean eta departamentuaren web-orrian argitaratzea, eta dagokion iragarkia bidaltzea Foru Komunitatean hedapen handiena duten egunkarietako bitara.

4. Foru agindu hau jakinaraztea Azterlan eta Proiektuen Zerbitzuari, Garraioen Plangintzaren eta Araubide Juridikoen Zerbitzuari, alegazio-egileari, eta Iruñeko eta Zizur zendeako udalei, eta azken horiek premiatzea beren iragarki-tauletan argitara ditzaten.

5. Adieraztea foru agindu honek ez duela administrazio bidea amaitzen, eta honen aurka gora jotzeko errekurtsoa jartzen ahal dela, Nafarroako Gobernuari zuzendua, jakinarazi eta biharamunetik hilabeteko epean.

Aurreko paragrafoan xedatutakoa ezertan galarazi gabe, foru agindu honek amaitzen du administrazio publikoentzako administrazio bidea. Dena dela, administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, hura jakinarazi edo Nafarroako Aldizkari Ofizialean argitaratu eta biharamunetik aitzina. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2023ko urriaren 24an.–Lurralde Kohesiorako kontseilaria, Óscar Chivite Cornago.

ERANSKINA.–"IRUÑA ETA ZIZUR TXIKIA DONEJAKUE BIDETIK LOTZEKO OINEZKOENTZAKO ETA BIZIKLETETARAKO IBILBIDEA ERAIKITZEA"

Ukitutako ondasun eta eskubideen banakako zerrenda zehatza

Iragarkiaren kodea: F2315091