1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
5E/2023 FORU AGINDUA, urtarrilaren 11koa, Lurralde Antolamenduko, Etxebizitzako, Paisaiako eta Proiektu Estrategikoetako kontseilariak emana, behin betiko onesten duena Lizoainibar-Arriasgoitiko Udal Plan Orokorraren aldaketa, Oskarizko 9. poligonoko 17. eta 396. lurzatietan, Heraclio Jiménez Albak eta María Amparo Esparza Irigoyenek sustatua.
Lizoainibar-Arriasgotiko Udalak idazpuruan azaltzen den espedientea aurkeztu du Lurralde Antolamenduko, Etxebizitzako, Paisaiako eta Proiektu Estrategikoetako Departamentuan, behin betiko onets dadin.
Espedientearen xedea da aldatzea Lizoaingo (Oskaritz) 9. poligonoko 396. katastro-lurzatiaren parte den 821 m²-ko eremu bateko lurzoruaren sailkapena, lurzoru urbanizaezina izatetik hiri-lurzoru finkatua izatera pasatzeko. Horrela, familia bakarreko etxebizitza bat eraikitzen ahalko da, egungo hiri-lurra handituta, lurzati eta jabetza berekoa izanik.
Ingurumeneko zuzendari nagusiaren apirilaren 28ko 355E/2022 Ebazpenaren bidez, Lizoaingo (Arriasgoiti) Udal Plana Oskarizko 9. poligonoko 17. eta 396. lurzatietan aldatzearen aldeko ingurumen txosten estrategikoa egin zen, iritzita ez duela eraginen ingurumen ondorio nabarmenik eta aldaketa garatzeko prozesuan hiri-ertza paisaian integratzeko neurri egokiak hartuko direla.
Ebazpen hori 2022ko 98. Nafarroako Aldizkari Ofizialean argitaratu zen, maiatzaren 20koan.
Ikusirik aurkeztutako dokumentazioa, bai eta Lurralde eta Paisaia Zerbitzuaren txostena ere, bidezkoa da espedientea behin betiko onestea.
Adierazitakoarekin bat, eta Lurralde Antolamenduko, Etxebizitzako, Paisaiako eta Proiektu Estrategikoetako Departamentuaren egitura organikoa ezartzen duen urriaren 30eko 262/2019 Foru Dekretuari jarraikiz,
AGINTZEN DUT:
1. Behin betiko onestea Lizoainibar-Arriasgoitiko Udal Plan Orokorraren aldaketa, Oskarizko 9. poligonoko 17. eta 396. lurzatietan, Heraclio Jiménez Albak eta María Amparo Esparza Irigoyenek sustatua.
2. Adieraztea foru agindu honek ez duela administrazio bidea amaitzen. Administrazio publikoak ez diren interesdunek gora jotzeko errekurtsoa jartzen ahalko dute, Nafarroako Gobernuari zuzendua, legezkotasunaren kontrola onesteko egintza honen aurka, hilabeteko epean, foru agindu hau jakinarazi edo, hala badagokio, Nafarroako Aldizkari Ofizialean argitaratu eta biharamunetik hasita.
Onetsitako hirigintza araudiaren aurka administrazioarekiko auzi-errekurtsoa jartzen ahalko da, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, dagokion udalak eskaturik, edukia Nafarroako Aldizkari Ofizialean argitaratzen denetik aurrera.
Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
3. Foru agindu hau espedientearen sustatzaileari eta Ingurumen Eraginaren Atalari jakinaraztea, behar diren ondorioak izan ditzan.
4. Foru agindu hau Lizoainibar-Arriasgoitiko Udalari igortzea, jakinaren gainean egon dadin eta behar diren ondorioak izan ditzan, eta, zehazki, dagokion hirigintza-araudia Nafarroako Aldizkari Ofizialean argitara dezan eta, hala, onetsitako hirigintza-tresnak indarra har dezan.
5. Foru agindu hau Nafarroako Aldizkari Ofizialean argitaratzea, behar diren ondorioak izan ditzan.
Iruñean, 2023ko urtarrilaren 11n.–Lurralde Antolamenduko, Etxebizitzako, Paisaiako eta Proiektu Estrategikoetako kontseilaria, José María Aierdi Fernández de Barrena.
Iragarkiaren kodea: F2300748
