Iragarkia

199. ALDIZKARIA - 2023ko irailaren 22a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

178E/2023 EBAZPENA, abuztuaren 16koa, Landa Garapeneko zuzendari nagusiak emana, Nafarroako 2023-2027 NPEPEaren esparruan 7119.02.01 azpineurria "Partaidetzazko toki garapenaren estrategiaren esparruan (PTGE) hautatutako eragiketen exekuzioa: sustatzaile publiko eta pribatuak" izenekoa, arautuko duten oinarri arautzaileak onesten dituena. DDBN identifikazioa: 712835.

Europako Parlamentuaren eta Kontseiluaren ekainaren 24ko 2021/1060 (EB) Erregelamenduak, zenbait funtsi buruzko xedapen komunak ezartzen dituenak, III. tituluaren barruan (Programazioa), II. kapituluak partaidetzazko toki garapena du hizpide. Araudi horrek definitzen ditu izan daitezkeen finantza laguntzak, finkatzen du toki garapenaren estrategien edukia eta haien hautapena, tokiko ekintza taldeen zereginak eta baldintzak ezartzen ditu –horiek baitira estrategiak eratzeko eta gauzatzeko entitate arduradunak– eta, azkenik, laguntza motak zehazten ditu. Era berean, aukera ematen die tokiko ekintza taldeei kudeaketa-agintaritzak edo Erakunde Ordaintzaileak eskuordetutako zeregin osagarriak garatzeko, eta xedatzen du ezen partaidetzazko toki garapenerako laguntzaren barnean sartuko dela etorkizuneko estrategia diseinatzen eta gauzatzen laguntzeko prestaketa-neurrien eta gaitasunen garapena.

Europako Parlamentuaren eta Kontseiluaren 2021eko abenduaren 2ko 2021/2115 (EB) Erregelamenduaren bidez, arauak ezartzen dira Batasuneko estatuek Nekazaritza Politika Erkidearen esparruan egin behar dituzten plan estrategikoei (NPEaren plan estrategikoak) laguntzeko, Nekazaritza Bermatzeko Europako Funtsaren (NBEUF) eta Landa Garapenerako Europako Nekazaritza Funtsaren (LGENF) kontura finantzatuta baitago, eta 1305/2013 (EB) eta 1307/2013 (EB) erregelamenduak indargabetzen dira. Erregelamendu horren 2. artikuluan ezartzen denez, partaidetzazko toki garapena LGENFk finantzatutako laguntzari aplikatuko zaio. Hori, zehazki, erregelamenduaren 77. artikuluaren bidez arautzen da, hartan agintzen baita lankidetzarako laguntzak emanen direla. Laguntza horien artean daude partaidetzazko toki garapenaren estrategiak prestatu eta gauzatzekoak, 2021/1060 R(EB) Erregelamenduaren arabera definituta.

Espainiako NPEaren 2023-2027 Plan Estrategikoa Europako Batzordeak onetsi zuen 2022ko abuztuaren 31ko C (2022) 6017 Azken Betearazpen Erabakiaren bidez. Agiri horretan jasotako neurrietako bat partaidetzazko toki garapena da, aurreko aldietako Nafarroako LEADER ekimen erkideen luzapen eta eguneratzean datzana.

Dokumentu horrek barne hartzen du 7119 LEADER lankidetzarako esku-hartzea, "Partaidetzazko toki garapenerako laguntza" izenekoa, atal hauekin: 7119.1 "LEADER prestatzeko laguntza", 7119.2 "Estrategiaren esparruan hautatutako eragiketen exekuzioa", 7119.3 "Tokiko ekintza taldeen arteko lankidetza-jarduerak" eta 7119.4 "Tokiko ekintza taldeen kudeaketa, jarraipena, ebaluazioa eta animazioa"; baita horiek gauzatzeko kredituak ere, finantzabidearen arabera banakatuta: Nafarroako Gobernua eta Europar Batasuna. Ez dago laguntza publiko osagarririk edo estatu-laguntzarik aipatutako eragiketa horietarako eta haien gastu publikoaren %45 LGENFk kofinantzatzen du.

Era berean, horiek gauzatzeko kredituak zein diren ezartzen du, bakoitzaren finantzabidearen arabera banakatuta: Nafarroako Gobernua eta Europar Batasuna. Ez dago laguntza publiko osagarririk edo estatu-laguntzarik aipatutako azpineurri horietarako eta haien gastu publikoaren %45 LGENFk kofinantzatzen du.

Parlamentuaren eta Kontseiluaren 2021eko abenduaren 2ko 2021/2115 (EB) Erregelamenduaren 86. artikuluak ezartzen duenez, diruz lagungarriak izanen dira programan 2023ko urtarrilaren 1etik 2029ko abenduaren 31ra benetan ordaindutako gastuak, eta, hortaz, "n+2" erregela aplikatuko da.

Landa Garapeneko zuzendari nagusiaren martxoaren 22ko 70E/2022 Ebazpenaren bidez, tokiko ekintza taldeak izateko hautagai diren erakundeak hautatzeko deialdiaren oinarri arautzaileak onetsi ziren, Nafarroako 2023-2027 NPEPEaren esparruan. Ondoren, Landa Garapeneko zuzendari nagusiaren abuztuaren 26ko 201E/2022 Ebazpenaren bidez, deialdi hori ebatzi zen, honako hauek hautatu eta tokiko ekintza taldea izateko hautagaiaren izaera emanda: Cederna-Garalur, EDER Partzuergoa, TEDER Elkartea eta Nafarroako Erdialdea Garatzeko Partzuergoa; horrekin batera, haietako bakoitzaren lurralde esparrua onetsi zen eta esleitu ziren guztizko gastu publikoaren behin-behineko finantza zuzkidurak 2023-2027 aldirako partaidetzazko toki garapenaren estrategiak egiteko; horien guztizko gastu publikoa 20.700.000,00 eurokoa da, eta horietatik 11.385.000,00 euro Nafarroako Gobernuko aurrekontuek jartzen dituzte eta 9.315.000,00 euro, berriz, LGENFk.

Ondoren, urriaren 15eko 252E/2022 Ebazpenaren bidez, partaidetzazko toki garapenaren estrategiak (LEADER) hautatzeko deialdia onetsi zen, Nafarroako 2023-2027 aldirako NPEaren Plan Estrategikoaren (NPEPE) esparruan. Deialdia 228. Nafarroako Aldizkari Ofizialean eman zen argitara, azaroaren 17koan. Landa Garapeneko zuzendari nagusiaren martxoaren 29ko 59E/2023 Ebazpenaren bidez, partaidetzazko toki garapenaren estrategiak onetsi ziren, eta tokiko ekintza taldearen izaera eman zitzaien Cederna-Garalur Elkarteari, EDER Partzuergoari, TEDER Elkarteari eta Nafarroako Erdialdea Partzuergoari, Nafarroako 2023-2027 NPEPEaren esparruan.

Ebazpen horren arabera, hautatutako tokiko ekintza talde berrien konpromisoetako bat da Landa Garapeneko eta Ingurumeneko Departamentuarekin lankidetza-hitzarmen bat izenpetzea, estrategia kudeatzeko eta beren estrategietan proposatzen dituzten finantza zuzkidurak nola eman arautzeko.

Landa Dibertsifikaziorako eta Garapenerako Zerbitzuko zuzendariak aldeko txostena egin du ebazpen honi buruz.

Horrenbestez, erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskumenak eta Landa Garapeneko eta Ingurumeneko Departamentuaren egitura organikoa ezartzen duen urriaren 23ko 258/2019 Foru Dekretuak ematen dizkidanak,

EBAZTEN DUT:

1. Onestea "Partaidetzazko toki garapenaren estrategiaren esparruan (PTGE) hautatutako eragiketen exekuzioa: sustatzaile publikoak eta pribatuak" izeneko 7119.02.01 azpineurria arautuko duten oinarri arautzaileak 2023-2027 aldirako, kontuan hartuta tokiko ekintza taldeekin, haien partaidetzazko landa garapenaren estrategiak (LEADER) gauzatzeko, sinatutako lankidetza-hitzarmenetan xedatutakoa, Nafarroako 2023-2027 NPEPEaren esparruan. Ebazpen honen I. eranskinean daude jasota, dagozkien eranskinekin batera.

2. Laguntzen urteko deialdia tokiko ekintza talde bakoitzak onetsiko du, tokiko ekintza talde bakoitzak Landa Garapeneko eta Ingurumeneko Departamentuarekin izenpetutako lankidetza-hitzarmenetan ezarritako baldintzetan.

3. Finantza zuzkidurak baimendu eta tokiko ekintza taldeei eman zaizkie Nafarroako Gobernuaren 2023ko ekitaldiko Gastuen Aurrekontu Orokorreko NPEPE LGENF 2023-2027. Partaidetzazko toki garapena (Leader) izeneko 720007 72300 7819 412103 partidaren kargura eta 2024tik 2029ra bitarteko aurrekontuetan horren baliokide diren partiden kargura, departamentuarekin izenpetutako hitzarmenaren bidez eta Gobernuak 2023ko maiatzaren 10eko bilkuran hartutako 32122 Erabakiarekin bat.

4. 7119 LEADER "Partaidetzazko toki garapenerako laguntza" izeneko esku-hartzea kudeatzeko oinarri arautzaileak Nafarroako Gobernuaren Dirulaguntzen Datu-basean erregistratuko dira, laguntza hauek arautzen dituen hitzarmenari esleitutako identifikazio-kodearekin.

5. Ebazpen hau eta haren eranskinak Nafarroako Aldizkari Ofizialean argitaratzea.

6. Ebazpen honen aurka gora jotzeko errekurtsoa jartzen ahal da, Landa Garapeneko eta Ingurumeneko kontseilariari zuzendua, argitaratu eta biharamunetik hasita hilabeteko epean. Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, jakinarazi eta bi hilabeteko epean. Horrek ez du galarazten aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2023ko abuztuaren 16an.–Landa Garapeneko zuzendari nagusia, Fernando Santafe Aranda.

I. ERANSKINA.–OINARRI ARAUTZAILEAK, 7119.02.01 AZPINEURRIA (ESTRATEGIAREN ESPARRUAN HAUTATUTAKO ERAGIKETEN EXEKUZIOA: SUSTATZAILE PUBLIKO ETA PRIBATUAK) ARAUTZEN DUTENAK 2023TIK 2027RA BITARTEKO EXEKUZIO-ALDIRAKO

(7119 PARTAIDETZAZKO TOKI GARAPENA-LEADER.
NAFARROAKO 2023-2027KO NPEAREN PLAN ESTRATEGIKOA)

Atarikoa

Europako Parlamentuaren eta Kontseiluaren ekainaren 24ko 2021/1060 (EB) Erregelamenduak, zenbait funtsi buruzko xedapen komunak ezartzen dituenak, III. tituluaren barruan (Programazioa), II. kapituluak partaidetzazko toki garapena du hizpide. Araudi horrek definitzen ditu izan daitezkeen finantza laguntzak, finkatzen du toki garapenaren estrategien edukia eta haien hautapena, tokiko ekintza taldeen zereginak eta baldintzak ezartzen ditu, horiek baitira estrategiak eratzeko eta gauzatzeko entitate arduradunak eta, azkenik, laguntza motak zehazten ditu. Era berean, aukera ematen die tokiko ekintza taldeei kudeaketa-agintaritzak edo Erakunde Ordaintzaileak eskuordetutako zeregin osagarriak garatzeko, eta xedatzen du ezen partaidetzazko toki garapenerako laguntzaren barnean sartuko dela etorkizuneko estrategia diseinatzen eta gauzatzen laguntzeko prestaketa-neurrien eta gaitasunen garapena.

Europako Parlamentuaren eta Kontseiluaren 2021eko abenduaren 2ko 2021/2115 (EB) Erregelamenduaren bidez, arauak ezartzen dira Batasuneko estatuek Nekazaritza Politika Erkidearen esparruan egin behar dituzten plan estrategikoei (NPEaren plan estrategikoak) laguntza emateko, Nekazaritza Bermatzeko Europako Funtsaren (NBEUF) eta Landa Garapenerako Europako Nekazaritza Funtsaren (LGENF) kontura finantzatuta baitago, eta 1305/2013 (EB) eta 1307/2013 (EB) erregelamenduak indargabetzen dira. Erregelamendu horren 2. artikuluan ezartzen denez, partaidetzazko toki garapena LGENFk finantzatutako laguntzari aplikatuko zaio. Hori, zehazki, erregelamenduaren 77. artikuluaren bidez arautzen da, hartan agintzen baita lankidetzarako laguntzak emanen direla. Laguntza horien artean daude partaidetzazko toki garapenaren estrategien prestaketa eta exekuziokoak, 2021/1060 R(EB) Erregelamenduaren arabera definituta.

Aldi honen berritasuna da plan estrategikoak Batasuneko estatu bakoitzaren mailan gauzatuko direla, eta ez erkidegoen mailan. Programa nazionala denez, erkidegoek NPEaren bigarren zutabean baizik ez dituzte garatzen esku-hartzeak (LGENFk kofinantzatuak).

2022ko abuztuaren 31ko C (2022) 6017 Azken Betearazpen Erabakiaren bidez, Espainiako 2023-2027 NPEPE onartu zen. Egiturazko nekazaritza-politikaren tresna nagusia da, garapen jasangarria lortzeko eta landa-eremuen lehiakortasuna indartzeko. Haren jarduera-eremuak honako hauek dira: jarduera ekonomikoa eta enplegua sortzea, ingurumena eta klima zaintzea, landa-inguruneko bizi-kalitatea eta ezagutzaren eta berrikuntzaren transferentzia. Bere esku-hartzeen artean 7119 esku-hartzea dago (Partaidetzazko toki garapena-LEADER), Nafarroan ere ezarrita dagoena.

Dokumentu horrek barne hartzen du 7119 LEADER lankidetzarako esku-hartzea, "Partaidetzazko toki garapenerako laguntza" izenekoa, atal hauekin: 7119.01 "LEADER prestatzeko laguntza", 7119.02 "Estrategiaren esparruan hautatutako eragiketen exekuzioa", 7119.03 "Tokiko ekintza taldeen arteko lankidetza-jarduerak" eta 7119.04 "Tokiko ekintza taldeen kudeaketa, jarraipena, ebaluazioa eta animazioa"; baita horiek gauzatzeko kredituak ere, finantzabidearen arabera banakatuta: Nafarroako Gobernua eta Europar Batasuna. Ez dago laguntza publiko osagarririk edo estatu laguntzarik aipatutako eragiketa horietarako eta haien gastu publikoaren %45 LGENFk kofinantzatzen du.

Landa Garapeneko zuzendari nagusiaren martxoaren 22ko 70E/2022 Ebazpenaren bidez, tokiko ekintza taldeak izateko hautagai diren erakundeak hautatzeko deialdiaren oinarri arautzaileak onetsi ziren, Nafarroako 2023-2027 NPEPEaren esparruan. Ondoren, Landa Garapeneko zuzendari nagusiaren abuztuaren 26ko 201E/2022 Ebazpenaren bidez, deialdi hori ebatzi zen, honako hauek hautatu eta tokiko ekintza taldea izateko hautagaiaren izaera emanda: Cederna-Garalur, EDER Partzuergoa, TEDER Elkartea eta Nafarroako Erdialdea Garatzeko Partzuergoa; horrekin batera, haietako bakoitzaren lurralde esparrua onetsi zen eta esleitu ziren guztizko gastu publikoaren behin-behineko finantza zuzkidurak 2023-2027 aldirako partaidetzazko toki garapenaren estrategiak egiteko; horien guztizko gastu publikoa 20.700.000,00 eurokoa da, eta horietatik 11.385.000,00 euro Nafarroako Gobernuko aurrekontuek jartzen dituzte eta 9.315.000,00 euro, berriz, LGENFk.

Ondoren, urriaren 15eko 252E/2022 Ebazpenaren bidez, partaidetzazko toki garapenaren estrategiak (LEADER) hautatzeko deialdia onetsi zen, Nafarroako 2023-2027 aldirako NPEaren Plan Estrategikoaren (NPEPE) esparruan. Deialdia 228. Nafarroako Aldizkari Ofizialean eman zen argitara, azaroaren 17koan. Landa Garapeneko zuzendari nagusiaren martxoaren 29ko 59E/2023 Ebazpenaren bidez, partaidetzazko toki garapenaren estrategiak onetsi ziren, eta tokiko ekintza taldearen izaera eman zitzaien Cederna-Garalur Elkarteari, EDER Partzuergoari, TEDER Elkarteari eta Nafarroako Erdialdea Garatzeko Partzuergoari, Nafarroako 2023-2027 NPEPEaren esparruan.

Agiri honen xedea da 7119.02.01 azpineurria ("Partaidetzazko toki garapenaren estrategiaren esparruan hautatutako eragiketen exekuzioa: kanpoko sustatzaileak") arautzea; tokiko ekintza taldeen bitartez kudeatzen da, kasuko erakundearen eta Landa Garapeneko eta Ingurumeneko Departamentuaren artean izenpetutako hitzarmenean ezarritako xedapenei jarraikiz.

Nafarroak, bere foru araubidea dela eta, eskumen esklusiboak ditu nekazaritzaren eta abeltzaintzaren arloan, bai eta jarduera ekonomikoaren plangintzan eta garapen ekonomikoaren sustapenean ere, Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren (LORAFNA) 50.1.a) eta 56.1.a) artikuluetan ezarritakoaren arabera.

Arau hau maiatzaren 24ko 49/2023 Foru Dekretuaren azken xedapenetako lehenaren babesean ematen da. Dekretu horrek Nekazaritza Politika Erkidearen Plan Estrategikoaren gobernantza-sistema, antolaketa eta funtzionamendua arautzen ditu, eta Nafarroan NPEPE kudeatu eta gauzatzeko eskualdeko agintaritza izendatzen du, eta NBEUFk eta LGENFk Nafarroan finantzatutako gastuen Erakunde Ordaintzailearen baimenari eusten dio, bai eta haren antolaketa eta funtzionamendua ezartzen ere.

Azkenik, 7119.02.01 azpineurriari ("Estrategiaren esparruan hautatutako eragiketen exekuzioa: kanpoko sustatzaileak") Dirulaguntzei buruzko azaroaren 9ko 11/2005 Foru Legea aplikatzen zaio.

I. ATALA.–JARDUKETAREN XEDEA ETA LURRALDE-ESPARRUA

1. oinarria.–Esku-hartzearen deskribapena.

Nafarroako 2023-2027 NPEren Plan Estrategikoan (aurrerantzean, Nafarroako 2023-2027 NPEPE) jasota dago 7119 esku-hartzea, (LEADER-Partaidetzazko toki garapenerako laguntza) (2021/2115 (EB) Erregelamenduaren 77. artikulua), azpineurri hauetan banatuta:

–7119.02. Estrategiaren esparruan hautatutako eragiketen exekuzioa:

• 7119.02.01. PTGEaren exekuzioa: sustatzaile publiko eta pribatuak.
• 7119.02.02. PTGEaren exekuzioa: tokiko ekintza taldeak.

–7119.03. Tokiko ekintza taldeen arteko lankidetza jarduerak.

–7119.04. Tokiko ekintza taldeen kudeaketa, jarraipena, ebaluazioa eta animazioa.

Agiri honen helburua da 7119.02.01 azpineurria (PTGEaren exekuzioa: sustatzaile publiko eta pribatuak) arautzen duten oinarriak ezartzea; horien deialdiak Nafarroako tokiko ekintza taldeek egin eta elkarrekin kudeatuko dituzte, Landa Garapeneko zuzendari nagusiaren martxoaren 29ko 59E/2023 Ebazpenarekin bat, haren bidez onetsi baitziren partaidetzazko toki garapenaren estrategiak eta tokiko ekintza taldearen izaera eman baitzitzaien Cederna-Garalur elkarteari, EDER Partzuergoari, TEDER elkarteari eta Nafarroako Erdialdearen Garapen Partzuergoari, Nafarroako 2023-2027 NPEPEaren eta departamentuarekin izenpetutako hitzarmenaren esparruan.

2. oinarria.–Lurralde-esparrua.

1. oinarrian adierazitako azpineurria tokiko ekintza talde bakoitzari esleitutako lurralde esparruan aplikatzen ahal da, tokiko ekintza taldearen eta departamentuaren arteko lankidetza-hitzarmenean ezarritakoari jarraikiz, Nafarroako 2023-2027 NPEPEaren 7119 esku-hartzearen esparruan (LEADER-partaidetzazko toki garapena). Tokiko ekintza talde bakoitzerako lurralde-esparrua oinarri arautzaile hauen 1. eranskinean jasota dago.

II. ATALA.–PARTAIDETZAZKO TOKI GARAPENAREN ESTRATEGIAREN EXEKUZIOA: SUSTATZAILE PUBLIKO ETA PRIBATUENTZAKO LAGUNTZAK

3. oinarria.–Laguntzaren xedea.

7119.02.01 azpineurriak (PTGEaren exekuzioa: sustatzaile publiko eta pribatuentzako laguntzak) xede du partaidetzazko toki garapenaren estrategiak aplikatzen erraztea, tokiko ekintza taldeez bestelako sustatzaile publiko eta pribatuen proiektuei lagunduz.

4. oinarria.–Laguntzaren xede diren pertsonak.

1. Laguntza hau honako hauek jasotzen ahalko dute:

a) Proiektu produktiboetarako:

–Pertsona fisikoak.

–Sozietate zibilak, eraldaketarako nekazaritza-sozietateak, kooperatibak, lan-sozietate anonimoak, enplegu-zentro bereziak eta merkataritza izaerako beste edozein.

–Nortasun juridiko aitortua duten beste entitate batzuk: fundazioak, elkarteak, partzuergoak, sindikatuak, nekazaritzako erakunde profesionalak eta beste edozein elkarte.

b) Proiektu ez-produktiboetarako:

–Toki entitate publikoak: kontzejuak, udalak edo udalez gaindikoak.

–Nortasun juridiko aitortua duten beste entitate batzuk: fundazioak, elkarteak, partzuergoak, sindikatuak, nekazaritzako erakunde profesionalak eta beste edozein elkarte.

2. 2023-2027 aldirako tokiko ekintza taldeari atxikitzeko akordiorik ez duten toki entitateak ezin izanen dira laguntzen zuzeneko eskatzaile izan, Landa Garapeneko zuzendari nagusiaren abuztuaren 26ko 201E/2022 Ebazpenean xedatutakoaren arabera.

5. oinarria.–Aurreikusitako proiektu motak.

1. Proiektuaren helburuaren arabera, honelakoak izan daitezke:

a) Produktiboak: salmentarako ondasun edo/eta zerbitzu pribatuen ekoizpena dute helburu, edo merkaturatzen ahal direnak edo titulartasun pribatuko jabegoen balioa handitzen dutenak. Proiektu produktiboek enplegua sortu edo mantendu behar dute.

b) Ez-produktiboak: ondasun edo zerbitzu publikoetako gastu eta inbertsioak direnak edo saldu ezin direnak, eta entitate publikoek emandakoak, beren eginkizunak betetzeko gastu arruntei eragiten ez badiete.

2. Proiektu diruz lagungarri guztiek dagokion tokiko ekintza taldearen PTGEan zehaztutako ekintza-planean jasota egon behar dute, eta plan horretan ezarritako muga eta baldintzekin bat etorri, tokiko ekintza taldearen eta departamentuaren arteko lankidetza-hitzarmenaren arabera. Tokiko ekintza talde bakoitzaren ekintza plana 2. eranskinean aurkezten da, eta tokiko ekintza taldeari dagokion deialdi bakoitzean argitaratuko da, ekintza-ildoen araberako dirulaguntzen baldintza bereziak gehituta.

3. Diruz lagundutako proiektuak ahalbidetu behar du proposatutako jardueraren funtzionamendu osoa, eta, beraz, ez dira diruz lagunduko faseetako edo zatitutako proiektuak, modu independentean funtzionatu ezin dutenak. Dirulaguntzaren xedeko proiektua proiektu handiago baten zatia bada, dirulaguntza jasotzeko baldintza izanen da berezko entitatea eta izaera finalista izatea, modu independentean eta bera bakarrik hartuta.

4. Honako proiektu mota hauek ez dira diruz lagunduko:

a) Farmaziak, finantza-erakundeak eta loteria-administrazioak.

b) Nekazaritza- eta abeltzaintza-ekoizpenarekin zuzenean lotutako proiektu produktiboak.

c) Diruz lagundu daitekeen inbertsio osoa 50.000 eurotik gorakoa duten nekazaritzako elikagaien eraldaketa-proiektuak.

d) Nekazaritza-zerbitzuak, hau da, hirugarrenentzako nekazaritza-lanak egitea.

e) Apartamentu turistikoak, erabilera turistikoko etxebizitzak eta landa-turismoko etxebizitzak edo etxeak, zuzeneko enplegua sortzen dutenak izan ezik.

f) Pertsona/entitate eskatzailearen erabilera pribatuko ondasunen gainean egindako jarduketak.

g) Energia berriztagarri garbiak instalatzearekin lotutako jarduerak, autokontsumorako soilik erabiltzen direnak izan ezik.

6. oinarria.–Laguntza jasotzeko baldintzak.

1. Laguntzen araubide honetan sartzeko, eskatzaileek honako beharkizun hauek bete beharko dituzte:

a) Pertsona fisikoen kasuan, laguntza eskatzeko unean 18 urte beteta izatea.

b) Dirulaguntzei buruzko azaroaren 9ko 11/2005 Foru Legearen 13.2 artikuluan adierazitako debeku-egoeretan ez egotea.

c) Proiektua produktiboa bada, enpresa txiki edo ertaina izatea, mikroenpresen eta enpresa txiki eta ertainen definizioari buruz Batzordeak 2003ko maiatzaren 6an emandako 2003/361/EE Gomendioaren arabera, eta enplegua sortzea edo mantentzea.

2. Gainera, gauzatu beharreko proiektuari dagokionez, honako betebehar hauek bete beharko dira:

a) Talde deitzailearen PTGEan sartutako udalerri batean edo batzuetan egotea.

b) Talde deitzailearen PTGEaren helburu/ekintza-ildoetako batean laguntzea.

c) Honelako jarduerei lotutako proiektuen kasuan:

–Turismoa, ostatu-zerbitzuak, aisialdikoak eta antzekoak. Departamentu eskudunak emandako aldeko txostena behar da.

–Landa- eta kultura-ondarea eta antzekoak: departamentu eskudunak emandako aldeko txostena behar da.

Hala badagokio, ingurumen-inpaktuaren balorazioa egin beharko da, Ingurumenean Eragina duten Jarduerak arautzen dituen abenduaren 16ko 17/2020 Foru Legearen arabera. Era berean, proiektu motagatik egokia den beste edozein txosten.

Nolanahi ere, unitate arduradunek eta, hala badagokio, obra-lizentziaren eskaerak zehazten dituzten neurri zuzentzaileak aplikatuko dira.

d) Laguntza eskaeraren xedeko inbertsioak/gastuak hasita ez egotea eskaera aurkezten den eguna baino lehen, kostu orokorrak eta/edo proiektua garatzeko lizentziak kenduta, betiere 2022ko abuztuaren 31ren ondorengoak badira (Batzordeak egun horretan eman zuen 6017(2022) C Azken Betearazpen Erabakia, Nafarroako 2023-2027 NPEPE onesten duena).

e) Deskripzio-memoria aurkeztea, gutxienez honako eduki honekin:

–Entitate fisiko edo juridiko sustatzailearen deskribapena.

–Proiektuaren xedea: jarduketaren izaera, dimentsioa eta kokapena.

–Proiektuaren ezaugarriak: hasierako egoeraren xehetasuna eta proposatutako jardueren justifikazioa.

–Proiektuaren mugarriak eta helburuak, tokiko ekintza talde deitzailearen PTGEaren esparruan definitutako eta neurgarriak diren adierazleen bidez.

–Inplementazio-plana, proiektua gauzatzeko jarduera bakoitza egiteak dakartzan faseen egutegia eta banakapena barne.

–Aurreikusitako inbertsio/gastuaren aurrekontu xehatua, zerga-oinarriari eta BEZari dagozkien zenbatekoak banakatuta.

–Araudi aplikagarriaren xehetasunak eta betetzearen justifikazioa.

f) Proiektua produktiboa denean, aurrekoez gain:

–Eragiketa diruz lagungarriaren iraunkortasun-konpromisoen arabera, inbertsioen eta gastuen bideragarritasun teknikoa, komertziala, ekonomikoa eta finantzarioa egiaztatzen duen enpresa-plana aurkeztea. Besteak beste, alderdi hauek deskribatuko ditu:

• Zenbat lanpostu sortu edo mantentzen dituen jarduerak.
• Marketin plana: merkatuaren azterketa, merkataritzako helburua eta salmenta, prezio, banaketa eta merkaturatzeari buruzko aurreikuspena.
• Eragiketa plana: ekoizpen prozesua, teknologia maila, baliabide materialak (makinak, lanabesak, ibilgailuak...) eta giza baliabideak, ekoizteko, hornitzeko eta biltegiratzeko ahalmena.
• Ekonomia- eta finantza-plana, behin-behineko ustiapen-kontua, behin-behineko balantzea eta finantzabideak.

7. oinarria.–Pertsona edo entitate onuradunen konpromisoak eta betebeharrak.

Pertsona edo entitate onuradunek konpromiso hauek hartuko dituzte:

a) Gardentasun betebeharraren gaineko aitorpena aurkeztea dirulaguntza eman zaiola jakinarazi eta hilabeteko epean, Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legean eta irailaren 11ko 59/2013 Foru Dekretuan ezarritakoari jarraikiz eta 26. oinarrian ezarritakoarekin bat.

b) Zerga betebeharrak eta Gizarte Segurantzarekikoak egunean izatea.

c) Proiektua gauzatzea aplikatzen ahal zaizkion arauekin bat, Europar Batasunekoak, Espainiakoak nahiz tokikoak; batez ere, honako arlo hauen gaineko arauei jarraikiz: gastu diruz lagungarriak, bateraezintasuna, estatu-laguntzak, kontratazio publikoa, publizitatea, ingurumenaren babesa eta aukera berdintasuna.

d) Eragiketa talde deitzailearen PTGEak estalitako lurraldean garatzea.

e) Proiektua gauzatzea dirulaguntza emateko ebazpenean adierazten den epean, deusetan galarazi gabe bidezko arrazoiak daudenean onartzen ahal diren luzapenak, 16. oinarrian ezarritakoarekin bat.

f) Laguntzak jasotzeko gastuak eta ordainketak justifikatzea, proiektua gauzatzeko eta justifikatzeko ezarritako epeetan, eta dagozkion dokumentuak gordetzea, elektronikoak barne.

g) Kostuen moderazioari dagokiona betetzea, 14. oinarrian ezarritakoari jarraikiz.

h) Bidezkoa denean, jasotako dirulaguntzaren kobrantza erregistratzea kontabilitatean edo erregistro liburuan, Europar Batasunaren (LGENF) eta Nafarroako Gobernuaren partaidetza adierazita, testu hau aipatuz: 2023-2027 NPEPE (LGENF-NG).

i) Xede bererako beste dirulaguntza batzuk eskatu edo jaso izanaren berri ematea.

j) Bost urtez mantentzea laguntzaren xedeko inbertsioak, dirulaguntzaren azken ordainketaren ebazpenaren egunetik hasita, ezinbesteko kasuetan izan ezik. Enpresa txiki eta ertainek hiru urtez mantendu beharko dituzte sortutako inbertsioak eta lanpostuak, azken ordainketaren ebazpenaren egunetik hasita, ezinbesteko kasuetan izan ezik.

k) Jendeari eragiketaren helburuaren berri eta LGENFek emandako laguntzaren berri ematea, 27. oinarrian ezarritako errekerimenduak betez.

l) Landa Garapeneko eta Ingurumeneko Departamentuari helaraztea azpineurriaren ebaluaziorako eta jarraipenerako adierazleak prestatzeko behar diren datuak.

m) Laguntza ongi eman dela eta gerora konpromisoei eutsi zaiela egiaztatzeko behar diren kontrolak eta egiaztapenak onartzea. Egiaztapen lan horiek honako hauek egin ditzakete: Europako Batzordeak, NBEUF-LGENF laguntzen Erakunde Ordaintzaileak, Nafarroako 2023-2027 NPEPEaren kudeaketa-agintaritzak, Estatuko Administrazioaren Kontu-hartzailetza Nagusiak, Kontuen Auzitegiak, Nafarroako Kontuen Ganberak eta Nafarroako Gobernuaren fiskalizazio-organoek.

n) Nafarroako 2023-2027 NPEPEaren kudeaketa-agintaritzak zehazten duen beste edozein.

8. oinarria.–Kostu diruz lagungarriak.

1. Kostu diruz lagungarriak honako hauek dira:

a) Ondasun higiezinak eskuratzea (laguntza jaso dezakeen inbertsio osoaren %25era mugatuta), baldin eta tasazio-txostena aurkezten bada. Txosten horretan, behar bezala justifikatu beharko da zein den merkatuko prezioa, ondasuna eta kokatuta dagoen lursaila bereizita, eta ondasunak ez duela aldez aurretik beste dirulaguntzarik jaso.

b) Ondasun higiezinak eraikitzea edo hobetzea: premia berrietara egokitzeko inbertsioak, ez konponketa hutsak edo mantentze lanak.

c) Ekipamendu-ondasunen zuzkidura: makinak eta ekipamenduak erostea, makineriarako eta ekipamenduetarako instalazioak barne.

d) Kostu orokorrak, b) eta c) ataletan jasotako kostu diruz lagungarriei lotutakoak (atal horien gaineko %12ra mugatuta): proiektuak idaztea, obra-zuzendaritzak, analisiak, saiakuntzak, muntaketa- eta eragiketa-ingeniaritza eta obra-lizentziak, jarduera sailkatuetarako lizentziak, lehen erabilerako lizentzia, irekitzeko lizentzia eta udal-tasak.

e) Inbertsio ukiezinak: programa informatikoen erosketa, garapena eta lizentziak.

f) Proiektuaren sustapena eta zabalkundea.

g) Proiektuaren xedearekin zerikusia duten bestelako laguntza teknikoak.

2. Honako hauek ekarritako kostuak ez dira diruz lagungarriak:

a) Lurrak erostea eta erosketarekin lotutako gastuak, baita urbanizazio-obrak ere.

b) Ordezpen huts diren inbertsioak, salbu eta erosten diren makinak edo ekipamendua aurrekoak ez bezalakoak badira, erabilitako teknologiagatik, haien errendimenduagatik edo 10 urtetik gorako antzinatasuna izateagatik.

c) Errentamendu finantzarioa eta/edo erosteko aukera duen errentamendua makinak eta ekipamenduak eskuratzeko.

d) Bigarren eskuko makinak eta ekipamenduak erostea, faktura, ordainagiri eta tasazio-txostenaren bidez justifikatuta ez badago. Txosten horretan merkatu-prezioa justifikatu beharko da, eta ondasunak ez duela aldez aurretik beste dirulaguntzarik jaso.

e) Ibilgailuak, salbu eta proiektuaren helburua lortzeko egokitzapenen bat –teknikoa nahiz erabilerarena– egina dutenak, dauzkaten ezaugarriengatik helburu horretarako bakarrik erabil badaitezke.

f) Material suntsikorra.

g) Udal zerbitzu teknikoek proiektuak idatzi eta gauzatzeagatiko ordainsariak.

h) Eskudiruzko ordainketak.

i) Enpresa baten ohiko funtzionamendua, hornidurak, interesak eta horien birfinantzaketa, langileria-gastuak, dietak eta kilometrajea, aseguruak eta beste gastu orokor batzuk.

j) Gastu orokorrak eta industria mozkina.

k) BEZa eta pertsona edo entitate onuradunak berreskura ditzakeen zergak ordaintzeko gastuak, interes zordunak eta eragiketa finantzarioen gastuak. Laguntzaren xede den jarduerarengatik BEZaren aitorpena egiten ez duten pertsona juridikoentzat baino ez da diruz lagunduko BEZa. Hori hala dela egiaztatzeko, pertsona juridikoek salbuespen-ziurtagiria aurkeztu beharko dute, salbuespenaren kasuistika guztiekin. Pertsona juridiko horrek BEZaren aitorpena egitera behartzen duen beste jarduera mota bat egiten badu, kontrolatu beharko da ez dela zerga horren kenkaria egin diruz lagundutako fakturengatik. Kasu horretan, entitate onuradunak dagokion BEZaren aitorpena aurkeztu beharko du.

l) Ondasunak eskualdatzea ezkontideen artean eta lehen eta bigarren mailako ahaideen artean, eskualdatzeko prozedura edo modua edozein dela ere, bai eta pertsona fisiko eta juridikoen artean ere, lehenengoak bigarrenen bazkideak badira.

m) Laguntza eskaera aurkeztu aurretik egindako inbertsioak eta/edo gastuak, 1.d) atalean definitutako kostu orokorrak eta proiektua garatzeko lizentziak izan ezik, 2022ko abuztuaren 31ren ondorengoak badira, hori baita 2023-2027 NPEPEak indarra hartzeko data.

n) Ikuspuntu tekniko, ekonomiko eta finantzariotik eta enpresa planean garatutako jarduerarekiko koherentziarenetik, gauzatzeko beharra eta bideragarritasuna behar bezala egiaztatuta ez dauden inbertsioak. Gainera, inbertsioak, egin nahi den jarduerarekin alderaturik, tamaina eta/edo edukiera aldetik gehiegizkoak direnean, justifikatu gabeko inbertsiotzat hartzen ahal dira; berdin jardueraren ekoizpen-orientazioari egokiak ez zaizkionak. Proiektuak etxebizitza partikularra eta/edo langileek erabiltzeko eremuak baditu, eskaerak argi bereiziko du jarduera ekonomikoari dagokion zatia. Kasu horretan, diruz lagunduko da bakarrik jarduera ekonomikorako erabiltzen diren inbertsioen zati proportzionala, jarduera ekonomikoarekin lotura zuzena eta zalantza gabea duena.

o) Diruz lagunduriko jarduerarekin bat ez datozenak.

p) Animaliak erosteko eta landaketak egiteko gastuak.

3. Azpikontratazioak. Nortasun juridiko aitortua duten entitate eskatzaileei dagokienez (fundazioak, elkarteak, partzuergoak, sindikatuak, nekazaritzako erakunde profesionalak), azpikontrataziotzat hartuko da entitate onuradunak hirugarrenekin hitzartzen duenean proiektuaren zati bat gauzatzea, jarduera horiek bere kabuz egiten ahal baditu ere, horretarako baliabide berekiak dituelako. Dirulaguntzaren xedeko gastuaren zenbatekoaren %20 azpikontratatzen ahalko da hirugarrenekin, gehienez, baldin eta:

a) Deialdi honetan definitutako gastu diruz lagungarriak badira.

b) Laguntzen eskaeran adierazten bada eta organo emaileak baimentzen badu gastu hori gastu diruz lagungarrien artean sartzea, 14. oinarrian ezarritako kostuen moderazioa betetzen dela ziurtatuta betiere.

c) Dirulaguntzak jasotzeko desgaiturik dauden entitateak ez badira.

d) Ez badira deialdi berean dirulaguntzak eskatu eta horiek lortu ez dituzten entitateak, beharkizunak ez betetzeagatik edo gutxieneko puntuazioa ez lortzeagatik.

e) Gastu horiek justifikatzen badira faktura eta ordainagiria aurkeztuta.

9. oinarria.–Laguntza kalkulatzeko sistema.

1. Laguntzaren zenbatekoa kalkulatzeko, kostu diruz lagungarriei laguntza portzentaje edo intentsitate bat aplikatzen zaie, betiere Nafarroako 2023-2027 NPEPEan ezarritako mugen barruan:

a) Aplikatu beharreko laguntza intentsitate edo portzentajea:

–Proiektu produktiboak: zenbateko diruz lagungarriaren %40 gehienez.

–Proiektu ez-produktiboak, inbertsio eta/edo gastu diruz lagungarriaren zenbatekoaren %75 gehienez.

b) Laguntzaren gehieneko zenbatekoa: 200.000 euro proiektuko.

2. Laguntzaren portzentaje zehatza eta tokiko ekintza taldeak proposatutako gehieneko zenbatekoak partaidetzazko toki garapenaren estrategian aurreikusitako ekintzetan zehaztutakoak dira, eta dagozkien deialdietan argitaratuko dituzte, dirulaguntzetarako baldintzen ezaugarri bereziekin, oinarri arautzaile hauen esparruan.

3. LGENFk laguntza osoaren %45eko parte-hartzea izanen du kostu publiko diruz lagungarrian.

10. oinarria–Deialdia.

1. Tokiko ekintza taldeak eginen du 7119.02.01. azpineurrirako (PTGEaren exekuzioa: sustatzaile publiko eta pribatuak) laguntzaren deialdia, Nafarroako Aldizkari Ofizialean argitaratuta. Hilabeteko epea egonen da eskaerak aurkezteko, deialdia Nafarroako Aldizkari Ofizialean argitaratzen denetik hasita.

2. Ematen diren laguntzak aurrekontu-baliabide erabilgarrietara egokitzeko, tokiko ekintza taldeak objektibotasunaren, inpartzialtasunaren, eraginkortasunaren, efizientziaren, gardentasunaren, publizitatearen eta lehia askearen printzipioak aplikatuko ditu. Dirulaguntzak norgehiagokako prozeduraz emanen dira, eta aurkeztutako proiektuen artean hurrenkera ezarriko da, hautaketa-irizpide batzuen arabera.

3. Deialdian, aurrekontu ekitaldi bakar baterako erabilgarria den aurrekontu osoa ezarriko da. Eskaera nahikorik aurkezten ez bada eta Landa Garapeneko Departamentuak baimena ematen badu, bigarren deialdi bat egiten ahalko da konprometitu gabeko funtsekin. Nolanahi ere, deialdian zuzkidura zatituta ezarriko da, proiektu produkiboetarako eta ez-produkiboetarako. Zuzkidura osoaren %50 gutxienez proiektu produktiboetarako izanen da, hasiera batean. Proiektu produktiboetarako ezarritako zuzkidura nahikoa ez bada laguntza onartu zaien proiektuen zerrendarako, ez-produktiboen zerrendan gelditzen den zuzkidura erabilgarria baliatzen ahalko da, eta alderantziz.

4. Deialdia Nafarroako Aldizkari Ofizialean argitaratuko da, eta gutxienez informazio hau izanen du:

a) Herritarrek non eta nola egin ditzaketen beren kontsultak, eta argitaratutako oinarri arautzaileen esteka.

b) Partaidetzazko toki garapenaren estrategiaren (PTGE) lurralde-esparrua.

c) Eragiketak hautatzeko irizpideak. Taldeak proiektu produktiboetarako eta ez-produktiboetarako irizpideen taula bereiziak argitaratuko ditu, 11. oinarriaren arabera.

d) Ekintza plana eta lehentasunezko ildoak, adierazita proiektu diruz lagungarrien laguntza eta inbertsio mugak eta dirulaguntzak emateko baldintza partikularrak, ekintza ildoen arabera, departamentuarekin izenpetutako hitzarmenari jarraikiz.

e) Aurrekontu-partidak eta ekitaldirako konprometitzen den finantza-zuzkidura, oinarri honen 3. atalaren arabera. Tokiko ekintza taldeak diru-kopuru jakin bat erreserbatu badu proiektu bereki baterako, departamentuarekin izenpetutako lankidetza-hitzarmenaren bederatzigarren klausularen 1.b atalaren arabera, proiektuaren izenburua eta erreserbatutako zenbatekoa jaso beharko dira.

f) Nafarroako Gobernuaren eta LGENFren informazioa eta publizitatea, laguntzen finantzatzaile diren aldetik.

g) Deialdiari eta aurkeztutako eta emandako proiektuei eragiten dieten epeak, hala proiektuak aurkezteko nola gauzatzeko.

h) Beharrezko dokumentazioa eta eskaerak aurkezteko prozedura-eskuliburuan ezarritako formularioak.

5. Tokiko ekintza taldeak deialdia Nafarroako Aldizkari Ofizialean argitaratu aurretik:

a) Nafarroako 2023-2027 NPEPEaren jarraipen batzordeak ontzat emanen ditu oinarri arautzaile honetan aplikatzekoak diren hautaketa-irizpideak.

b) Landa Dibertsifikaziorako eta Garapenerako Zerbitzuak aztertuko du tokiko ekintza taldeak proposatutako deialdien edukia oinarri arautzaileetan eta departamentuarekiko lankidetza-hitzarmenean ezarritakora egokitzen den.

11. oinarria.–Eragiketak hautatzeko irizpideak.

1. Norgehiagokako prozedurari jarraikiz emanen dira 7119.02.01. azpineurriaren (PTGEaren exekuzioa: sustatzaile publiko eta pribatuak) laguntzak, aurkeztutako eskaerak alderatuz, haien arteko lehentasuna ezartzeko.

2. Eragiketak hautatzeko irizpideak, tokiko ekintza taldearen deialdian argitaratzen direnak, bat etorriko dira dagokion PTGEan eta oinarri arautzaile hauen 3. eranskinean ezarritako tauletan ezarritakoarekin.

Deialdi bakoitzean, taldeak taula horiek argitaratu beharko ditu, deialdian aplikatu beharreko irizpideei buruzko informazioarekin, eta honako gutxieneko informazio honekin osatu: irizpidearen aldaketak eta mailaketak, irizpide bakoitzerako aplikatu beharreko gehieneko puntuazioa eta pertsona/entitate eskatzaileak horiek betetzen direla justifikatzeko aurkeztu beharreko dokumentuak. Argitaratu aurretik, deialdi bakoitzean aplikatu beharreko irizpideen taula osoa unitate kudeatzaileak berrikusiko du eta Nafarroako 2023-2027ko NPEPEaren jarraipen batzordeak onetsiko du.

3. Eskaeren lehentasuna eskatutako eragiketa bakoitzari emandako puntuen baturatik aterako da, ezarritako balorazio-irizpideen arabera, gehienez 100 punturekin.

4. Laguntza eskuratzeko gutxieneko puntuazioa gehieneko puntuazioaren %30 izanen da gutxienez. Hortik beherako puntuazioa lortzen duten eskaerak ezetsi eginen dira.

5. Berdinketa gertatuz gero, puntuazio handiena duen proiektuak izanen du lehentasuna, hurrenkera honetan:

1.–C multzoa: Enplegua, ekintzailetza eta lankidetza.

2.–D multzoa: Proiektuak PTGEaren helburuei egiten dien ekarpena.

3.–A multzoa: Pertsona/entitate eskatzailearen ezaugarriak.

4.–B multzoa: Proiektua kokatzen den udalerriak/eremuak despopulazioa izateko zer arrisku eta ezaugarri duen.

5.–Azkenik, eta berdinketak irauten badu, guztizko gastu diruz lagungarri handiena eskatu duen proiektua lehenetsiko da.

6. Entitate/pertsona eskatzaileak bere eskaeran adierazi beharko du, berariaz, aurreko baremoa zer hautapen-irizpideren arabera aplika dakiela eskatzen duen. Eskaera hori erantzukizunpeko adierazpentzat hartuko da laguntza eskaera aurkeztean irizpideak betetzeari dagokionez, edo, behar denean, eskaerak aurkezteko epea bukatzean betetzeari dagokionez.

7. Eskatutako hautapen-irizpideek ekarritako puntuak bakarrik emanen dira. Baldin betetzeko zenbait modu onartzen dituen irizpide bat ezarri bada, puntu gehien ematen dituen egoera hartuko da aintzat, eskura dagoen informazioarekin egiaztatzen ahal dena.

12. oinarria.–Laguntza eskaerak aurkeztea.

1. Laguntza eskaerak aurkezteko epea hilabetekoa izanen da gutxienez, deialdia Nafarroako Aldizkari Ofizialean argitaratu eta hurrengo egunetik aurrera.

2. Interesa duten pertsonek/entitateek tokiko ekintza taldeak deialdian horretarako ezartzen dituen epean eta bulegoetan aurkeztu beharko dituzte eskaerak, tokiko ekintza taldeak erabiltzen duen aplikazio informatikoaren bidez.

3. Eskaerarekin batera, 4. eranskinean adierazitako dokumentazioa aurkeztu beharko da.

13. oinarria.–Laguntza eskaerak egiaztatu eta baliozkotzea.

1. Laguntza eskaera jaso ondoren, tokiko ekintza taldeko talde teknikoak egiaztatuko du osorik dagoela eskatutako dokumentazioari dagokionez. Akatsen bat atzemanez gero, 10 eguneko gehieneko epea emanen zaio interesdunari akatsa zuzen dezan, eta adieraziko zaio ezen, hala egin ezean, eskaeran atzera egin duela ulertuko dela, eta taldeko erabaki-organoak espedientea artxibatzeko ebazpena emanen duela. Ebazpen hori interesdunari jakinaraziko zaio.

2. Dokumentazioa oso-osorik dagoenean, behar diren kontrolak eginen dira, eskatzen diren baldintzak betetzen diren egiaztatzearren. Bereziki, tokiko ekintza taldeko teknikariek honako hauek egiaztatuko dituzte:

a) Eskaera behar den epean eta moduan aurkeztu den.

b) Eskatutako inbertsioak/gastuak hasi gabe dauden, eta hasi ez izanaren akta eginen da, hala dela frogatzen duena.

c) Laguntzaren xede den eragiketaren eta pertsona/entitate eskatzailearen onargarritasuna.

d) Laguntzak jasotzeko betebeharrak.

e) Hautapen-irizpideak betetzen diren.

f) Eragiketaren kostuen onargarritasuna.

g) Proposaturiko kostu moderazioa.

h) Eragiketak Espainiako, Europar Batasuneko eta tokiko xedapenak betetzen dituen, bereziki kontratazio publikoari, estatu-laguntzei eta gainerako nahitaezko arauei dagokienez, bidezkoa bada.

3. Taldeko talde teknikoak honako hauek idatziko ditu:

a) Hautagarritasunaren eta bideragarritasunaren kontrol-zerrenda, non egiaztatzen baita proiektua estrategiarekin bat datorrela eta haren bideragarritasun ekonomikoa, lurraldekoa edo soziala, dagokionaren arabera.

b) Dirulaguntzarako baldintzen kontrol-zerrenda, Landa Garapeneko eta Ingurumeneko Departamentuak eskuordetuta egina. Proiektua Nafarroko 2023-2027 NPEPEra egokitzeari eta oinarri arautzaileetan ezarritako administrazio-kontrolak betetzeari buruzkoa da.

4. Tokiko ekintza taldeko (aurrerantzean, TET) administrazio- eta finantza-arduradunak talde teknikoak egindako lana gainbegiratuko du, eta taldearen eta Landa Garapeneko eta Ingurumeneko Departamentuaren artean izenpetutako hitzarmenaren klausula orokorretan jasotako alderdiak egiaztatuko ditu, gutxienez.

14. oinarria.–Kostuen moderazioa.

Dirulaguntzak ematean gastu publikoaren efizientzia bilatzen duen ekonomia-printzipioaren arabera, Plan Estrategikoaren esku-hartzeak eta Nekazaritza Politika Erkidearen beste laguntza batzuen kudeaketa- eta kontrol-sistema arautzen duen abenduaren 27ko 1047/2022 Errege Dekretuaren 72. artikuluak eta Dirulaguntzei buruzko azaroaren 9ko 11/2005 Foru Legearen 28. artikuluak exijitzen dute proposatutako kostuen moderazioa egiaztatzea, eta horren ebaluaziorako metodologia zehazten dute.

1. Ondorio horietarako, eta kostuen moderazioaren printzipioa aplikatzen dela bermatzeko, tokiko ekintza taldeak honako sistema hauek erabiltzen ditu, bere PTGEaren ekintza-planaren arabera eta erabileraren lehentasun-ordena honetan:

1.1. Erreferentziako kostuak: zenbateko diruz lagungarria izanen da entitate eskatzaileak aurkeztuaren eta modulu hauek aplikatzearen ondoriozkoaren arteko txikiena:

1.1.2. Proiektu teknikoaren edo memoria baloratuaren gainean:

1.1.2.1. Honela kalkulatzen da erreferentziako kostuaren balioa, euro/m² eraikitan neurtzen dena: eraikuntzako oinarrizko modulua (520 euro/m² eraikia) aurkeztutako proiektuaren bi koefizienterekin ponderatua –bata establezimenduaren tipologiari dagokiona (TK) eta bestea obra-intentsitateari dagokiona (IK)–, taula honetan agertzen den bezala:

1.1.2.2. Proiektuan sartutako instalazio fotovoltaikoen kasuan, gehieneko kostu hautagarria bi osagai hauen batura izanen da:

–Panel fotovoltaikoetan (P) instalaturiko potentziari dagokion erreferentziako kostua, formula honen arabera:

–P instalatutako potentzia gorena da, eta B bateriak erabiliz gero gehitu behar den batura, erabilitako bateria motaren araberakoa:

1.1.2.3. Ibilbideak eta bidezidorrak eraikitzeko edo hobetzeko (seinaleak barne): 1.675,00 euro/km.

1.1.3. Proformako fakturen gainean:

1.1.3.1. Ekipamendu-ondasunak (metro koadro erabilgarria, proiektu teknikoan edo memoria baloratuan ezarritako azaleraren arabera):

1.1.3.2. Web-orria (web diseinua eta sorrera, edukien edizioa, ostatatzea eta mantentze-lanak): 2.150,00 euro.

1.1.3.3. Dibulgazio-materiala sortzea (diseinua, maketazioa eta inprimatzea: flyerrak, triptikoak, kartelak, roll-upak, biniloak...): 2.150,00 euro.

1.1.3.4. Branding-a (diseinua: irudi korporatiboa, logotipoa, paper-gauzak, sare sozialak...): 1.900,00 euro.

1.1.3.5. Jardunaldien edo prestakuntza-ekintzen cateringa: 300,00 euro unitate bakoitzeko.

1.1.3.6. Autobusa alokatzea dibulgazio jardunaldi, azoka, mintegi edo kongresu baterako: 380 euro unitate bakoitzeko.

1.1.3.7. Aurrekoak ez diren beste ordainsari batzuk, laguntza teknikoa emateagatik proiekturako behar ziren lanei, ikerketei eta prozedurei: 45 euro/ordu.

1.2. Eskaintza desberdinak alderatzea: erreferentziako kostuak aplikatzekoak ez direnean erabiltzen da. Gutxienez hiru eskaintzaren artean (proformako fakturak eta/edo proiektua edo memoria teknikoa, dagokiona) hautatzean datza. Entitate eskatzaileak horiek aurkeztu beharko ditu eskaerarekin batera, baldin eta proiektuaren gastu diruz lagungarrien zenbatekoa 5.000 eurotik gorakoa bada.

Eskaintzak enpresa hornitzaile independenteek eginak izan beharko dira, eta obra, ondasun edo zerbitzu proiektu beraren gainean justifikatu behar dira, merkatuko preziora egokituta dagoela justifikatzeko.

Horrez gain, proforma fakturek eta/edo aurrekontuek izan behar dute legeak eskatzen duen informazioa, enpresa hornitzailea identifikatzen duten datuen informazio fidagarria bilduta eta, orobat, zehatz-mehatz azalduta entregatu beharreko ondasunaren ezaugarri teknikoak, lan egiteko gaitasunak, tamaina eta abar.

Zenbateko diruz lagungarria finkatzeko, ikuspuntu ekonomikotik onuragarriena den proposamenean agertzen den zenbatekoa hartuko da oinarri.

1.3. Ebaluazio batzordea: eskatutako gastuari ezin bazaizkio aplikatu erreferentziako kostuak ez eta eskaintza desberdinen alderaketa ere, edo haren ezaugarri bereziak direla-eta ezinezkoa baldin bada xedeko lana edo hornidura egiten duten enpresa bat baino gehiago aurkitzea, eta, hortaz, entitate eskatzaileak memoria bat aurkeztu behar duenean eskaintza bakarra justifikatzeko. Tokiko ekintza taldeko talde teknikoko hiru kidek osatutako ebaluazio batzorde batek txosten bat eginen du azaltzeko ebaluazioa nola egin den eta zein aurrekontu onartu duen: aurkeztutakoa edo beste bat.

1.4. Eskatzailea entitate publiko bat edo parekagarria denean, egin beharreko kontratazio prozeduraren konpromisoa aurkeztu beharko du laguntza eskaerarekin batera. Kostuen moderazioaren ondorioetarako, honako kasu hauek ezartzen dira:

1.4.1. Munta txikiko kontratuetarako, aplikatzekoa ez denean oinarri honen 1.1 atalean ezarritako erreferentziako kostuetako bakar bat ere, eskatuko da aurkez dadila hiru eskaintza alderatu izanaren egiaztagiria, 1.2 atalean adierazitakoaren arabera, edo, bidezkoa bada, ebaluazio batzordearen txostena, 1.3 atalean adierazitakoaren arabera.

1.4.2. Gainerako kontratazioetarako, aplikatzekoa ez denean oinarri honen 1.1 atalean ezarritako erreferentziako kostuetako bakar bat ere, kostuen moderazioa frogatuko da adjudikazio prozeduraren adierazpenaren bitartez, Kontratu Publikoei buruzko 2/2018 Foru Legeari jarraikiz. Halakoetan, proforma faktura edo aurrekontuaren ordez fede-emaile publikoak izenpetutako kontratuaren unitate kudeatzaileak egindako txosten arrazoitu bat aurkezten ahalko da, zeinean azalduko baitira ase nahi diren beharren izaera eta neurria, xedearen egokitasuna beharrak asetzeko, kontratuaren xede diren prestazioen ezaugarriak eta balio zenbatetsia, prezioa merkatuarekin bat datorren, kontrataziorako prozeduraren hautaketa eta, kasua bada, kaudimen irizpideak, adjudikazio irizpideak, eta kontratuaren xedearekin duten lotura, bai eta ondasun edo zerbitzuen hartzaile diren pertsonen beharrizan zehatzak eta haien inguruabarrak ere, eta beharrezkotzat jotzen diren beste guztiak.

Ondoren, gastua justifikatzeko orduan, fede-emaile publikoaren txosten bat aurkeztuko da, kontratazio publikoaren araudia bete dela adierazteko, honako hauek aipatuta: aplikatutako prozedura, prozeduraren justifikazioa, argitalpenaren inguruko datuak eta, halakorik bada, kontratua formalizatzeko agiria eta behin betiko esleipena egiteko aintzat hartutako proposamenak.

2. Kasuan kasuko akats zuzenketak egin ondoren, entitate eskatzaileak aurkeztutako agiriak nahikotzat jotzen ez badira, kostuen moderazioa behar den bermearekin aplikatu ezin zaien kostuak ez dira diruz lagungarritzat joko.

3. Nolanahi ere, kostuen moderazioa behar bezala aplikatu dela egiaztatzeko kontrolak laguntza esleitu aurretik eginen dira, laguntza eskaeran oinarrituta, eta, beharrezkoa bada, azken ordainketa egin aurretik osatuko dira, entitate onuradunak aurkeztutako ordainketa eskaeran oinarrituta. Entitate onuradunak eskatutako aldaketen kasuan ere eginen da egiaztapena.

15. oinarria.–Laguntza emateko ebazpena.

1. Taldeko talde teknikoak baliozkotu eta ebaluatu ondoren aurkeztutako eskaerak, lehentasun-ordena ezarriko da 11. oinarriaren esparruan ezarritako hautaketa-irizpideen arabera, eta laguntzak emateko ebazpen-proposamena eginen da.

2. Landa Dibertsifikaziorako Atalak aztertuko du laguntzak emateko proposamena hitzarmen honekin bat datorren, baita taldeko talde teknikoak egindako kontrolak ere. Horretarako, espedienteen portzentaje adierazgarri bat aukeratuko du, prozedura-eskuliburuetan zehaztutakoa, eta horren gainean eginen ditu 13. oinarriko 2. puntuan ezarritako administrazio-kontrolak. Desadostasunik atzemanez gero, laguntzak emateko proposamena taldeari bidaliko zaio, erabat zuzen dezan.

3. Laguntzak emateko proposamena berrikusi ondoren, taldeko talde teknikoak tokiko ekintza taldeko erabaki-organoari aurkeztuko dio proposamena, zeinak honako hauek jasoko baititu:

–Aurkeztutako laguntza eskaera guztien zerrenda, hautaketa-irizpideak aplikatzean lortutako puntuazioaren arabera ordenatuta, bereizita, alde batetik, baldintzak ez betetzeagatik ezetsitako espedienteak eta, bestetik, baja emandakoak.

–Pertsona/entitate onuradunen zerrenda eta dagozkien laguntzen zenbatekoa, baita proiektuak zer aurrekontu-ekitaldiren kargura finantzatuko diren ere.

4. Ordainketa bakar batean emanen dira laguntzak, deialdian adierazten diren ekitaldietako aurrekontuaren kargura.

5. Tokiko ekintza taldeko erabaki-organoak ebatziko du dirulaguntzak ematea, aurkezteko epea amaitu eta gehienez ere hiru hilabeteko epean. Epe hori iragan eta ebazpena jakinarazi ez bada, eskaerak ezetsitzat joko dira. Erabaki-organo horrek idatziz jaso beharko ditu, akta gisa, hartutako erabakiak, betiere erabaki-organoei laguntzen dieten langileen interes-gatazkak saihesteari buruzko xedapenetan oinarrituta, botoen %50 gutxienez entitate publiko ez diren bazkideenak direla bermatzeko.

6. Norgehiagokako prozedura aplikatuta eskaeren hurrenkera lortu ondoren, deialdiaren aurrekontu-kreditua ez bada nahikoa laguntza eskaera guztiei erantzuteko, aurrekontu-zuzkidura duten eskatzaileek berretsi beharko dute emandako laguntza nahi dutela, edo hari uko egin beharko diote, jakinarazi eta 10 eguneko epean.

7. Gerta daiteke, aurrekontu zuzkidura falta dela-eta, aipatutako hurrenkerako azken entitate eskatzaileari eskatutakoa baino zenbateko txikiagoa egokitzea. Horrelakoetan, eskatzaile horrek 10 eguneko gehieneko epea du, jakinarazten zaionetik, eman zaion laguntza onartzen duela berresteko edo hari uko egiteko. Berretsiz gero, konpromisoak eta baldintzak egokituko dira eman daitekeen dirulaguntzara. Onartzen duela berresten badu, entitate onuradunak jasotzen ahalko du hartu gabe duen laguntzaren zatia, baldin eta beste batzuek laguntza jasotzeari uko egin badiote edo laguntza jaso duten beste proiektu batzuek gastu txikiagoak izan badituzte. Horretarako, unitate emaileak laguntza aldatu beharra dago aurretik.

8. Ezetsi eginen dira aurrekontuan zuzkidura nahikoa ez izateagatik erantzun ezin diren gainerako eskaerak. Gerta daiteke emandako laguntzaren onarpena berresteko epean onuradunen batek uko egitea laguntzari eta, horrenbestez, nahikoa kreditu askatzea. Horrelakoetan, kreditu hori bideratzen ahalko da aurrekontu nahikoa ez egoteagatik ezetsi diren eskaeretara. Lehentasun hurrenkerari jarraituko zaio eta, lehenik, dirulaguntza osatuko zaio hura osorik jaso ez duen eskatzaileari. Izapide horrek berekin ekarriko du unitate emaileak espedientea berriz ebaztea.

9. Ebazpena entitate onuradunari igorri beharko zaio, eta, gutxienez, laguntza hartuko duten eskatzaileen zerrenda jaso beharko du. Bertan, besteak beste, honako hauek jasoko dira: konpromisoa zer aurrekontu-ekitaldiren kargura ezartzen den, laguntzaren portzentajea, zenbatekoa eta finantzaketaren jatorria, kontzeptu diruz lagungarriak eta inbertsioak amaitzeko eta justifikatzeko azken eguna, deialdian ezarritako epeen arabera. Ezetsitako gainerako eskaerak ezesteko arrazoia ere berariaz adieraziko da. Dirulaguntza jasotzeko baldintza bereziak ezartzen badira, pertsona/entitate onuradunari jakinaraziko zaizkio, baldintza horiek bete ahal izan ditzan.

10. Laguntzaren berri ematean adieraziko da pertsona edo entitate onuradunak aukera duela Landa Garapeneko eta Ingurumeneko kontseilariari zuzendutako gora jotzeko errekurtsoa jartzeko, jakinarazten denetik hilabeteko epean.

11. Tokiko ekintza taldeak Landa Dibertsifikaziorako Atalari igorriko dio bere erabaki-organoak laguntzak emateko hartutako erabakien akta, aurkeztutako espedienteen zerrenda batekin batera, onartutako baremazioaren emaitzarekin.

16. oinarria.–Dirulaguntza emateko ebazpenaren ondoko aldaketak.

1. Justifikatutako arrazoiengatik laguntzak ematean onartutako kostuetan aldaketa nabarmenak egin behar badira, pertsona edo entitate onuradunak aldaketa-eskaera aurkeztu beharko du. Eskaera egiteko gehieneko epea exekuzio-epea amaitu baino hilabete lehenagokoa izanen da.

2. Aldatzeko eskaera ondasun eta/edo konpromiso berriak eskuratu aurretik aurkeztuko da, behar bezala arrazoituta egonen da eta ez du ekarriko:

a) Laguntzak ematearen emaitza urratzea.

b) Hasieran emandako laguntza handitzea.

3. Aldaketa hasierako eskaerarekin baliatutako irizpide tekniko eta ekonomiko berberen arabera onartuko da, eta, hala badagokio, laguntza doitu eginen da, tokiko ekintza taldeko erabaki-organoak onartuta.

4. Proiektuaren aldaketa nabarmentzat hartuko da ondorio hauetako bat duena:

a) Ekoizpenaren orientazioa aldatzea.

b) Pertsona/entitate onuradunaren titulartasuna aldatzea. Onuradunak proiektuaren titulartasuna lagatzen ahalko dio entitate onuradunaren fusioaren, xurgapenaren edo eraldatzearen ondoriozko beste bati.

c) Onetsitako kontzeptu eta unitate diruz lagungarrien funtsezko aldaketa.

d) Laguntza emateko kontuan hartu den inbertsio/gastu lagungarriaren %60 edo gutxiago gauzatzea aurreikusten bada.

e) Inbertsioen kokapenaren aldaketa, udalerriz aldatzea dakarrena.

f) Exekuzio epea luzatzea, laguntza zer ekitaldiren kargura eman zen, ekitaldi horretako irailaren 1era arte gehienez; laguntza emateko ebazpenean ezarritako azken exekuzio data baino hilabete lehenago eskatzen ahalko da. Epea luzatzeko, Landa Dibertsifikaziorako Zerbitzuaren aldez aurreko baimena beharko da.

5. Aldaketa onartu ondoren, entitate onuradunari jakinaraziko zaio. Jakinarazpen horretan, gutxienez, 15. oinarriko 9. eta 10. ataletan eskatutako informazioa jaso beharko da.

17. oinarria.–Ordainketa eskaera.

1. Laguntza ematean ezarritako epean, pertsona edo entitate onuradunak laguntza ordaintzeko eskatuko dio taldeari, horretarako ezarritako formularioaren bidez, 5. eranskinean ezarritako dokumentazioarekin batera.

2. Ordainketa eskaera aurkezten ez bada laguntza emateko ebazpenean ezartzen den egunaren aurretik, ondorioztatuko da berariaz uko egiten zaiola emandako laguntzari, deusetan galarazi gabe Dirulaguntzei buruzko 11/2005 Foru Legearen 35. artikuluan ezarritakoari jarraikiz bidezko diren erantzukizunak.

18. oinarria.–Ordainketa aurreko administrazio-kontrola.

1. Laguntza eskaera jaso ondoren, tokiko ekintza taldeko teknikariek egiaztatuko dute osorik dagoen, eskatutako dokumentazioari dagokionez. Akatsen bat baldin badago, pertsona/entitate onuradunari eskatuko zaio 10 eguneko gehieneko epean zuzendu dezala, eta adieraziko zaio, zuzendu ezean, eskaerari uko egiten diola ondorioztatuko dela eta espedientea artxibatzeko ebazpena emanen dela.

2. Tokiko ekintza taldeak pertsona/entitate onuradunak aurkeztutako ordainketa eskaera aztertuko du, eta kontrol nahikoak eginen ditu hartutako konpromisoak bete diren eta inbertsioa emandako laguntzarekin bat datorren egiaztatzeko. Bereziki, honako hau egiaztatuko da:

a) Eskaera behar den epean eta moduan aurkeztu den.

b) Eskatutako inbertsioak/gastuak amaitu eta behar bezala gauzatu diren. Berrikuspen hori laguntzaren xede den eragiketaren lekura bisita eginez osatzen ahalko da.

c) Gauzatutako eragiketa eta onartutakoa bat etortzea: gauzatzeari buruzko memoria, gauzatu diren eta ematearekin bat datozen gastu-kontzeptuak eta -unitateak deskribatuta, eta aurreikuspen-memoria.

d) Eragiketaren kostuen onargarritasuna, baita kostu horiek laguntza ematean ezarritako epean egin direla eta gauzatu direla justifikatzea ere.

e) Kostuen moderazioa, hala badagokio.

f) Hartutako kostuak eta egindako ordainketak, fakturen eta ordainagirien kontrola barne.

g) Eragiketak Espainiako eta Europar Batasuneko xedapenak betetzen dituen, bereziki kontratazio publikoari, estatu-laguntzei eta gainerako nahitaezko arauei dagokienez, bidezkoa bada.

3. Gastu diruz lagungarritzat hartzeko, inbertsioak/gastuak benetan ordaindutzat joko dira baldin eta horiek gauzatu direla eta laguntzaren xede diren kontzeptuengatik egindako ordainketak gauzatu direla justifikatzen bada dagozkien fakturekin eta/edo froga-balio baliokidea duten agiriekin.

4. Laguntzaren xede den jarduketa egin dela eta harekin ados dagoela egiaztatu ondoren, tokiko ekintza taldeak, dirulaguntza eman den ekitaldiko urriaren 1a baino lehen, ordainketa-proposamen bat igorriko dio Landa Dibertsifikaziorako Atalari. Proposamen horretan, honako hauek jasoko dira: justifikatutako inbertsioa, inbertsio diruz lagungarria eta ordaindu beharreko zenbatekoa, ordainketa egin aurreko txosten tekniko eta ekonomiko baten bidez. Halakorik ezean, taldeak dirulaguntza ordaintzeari uko egitea aurkeztuko du.

19. oinarria.–Ordainketa egin aurretik bertatik bertara egin beharreko kontrola.

1. Landa Dibertsifikaziorako Atalaren ardura izanen da bertatik bertara kontrolak egitea, proiektuan gauzatutako inbertsioen/gastuen ziurtagiriak eta egindako egiaztapenak zuzenak diren egiaztatzeko, Plan Estrategikoaren esku-hartzeak eta Nekazaritza Politika Erkidearen beste laguntza batzuen kudeaketa- eta kontrol-sistema arautzen duen abenduaren 27ko 1047/2022 Errege Dekretua betez.

2. Kontrol-planak Landa Dibertsifikaziorako Atalak idatziko ditu eta Erakunde Ordaintzailearen Zerbitzuko Zuzendaritzaren ebazpen bidez onetsiko dira, Koordinazio Atalak eta Landa Dibertsifikaziorako eta Garapenerako Zerbitzuak oniritzia eman ondoren. Horietan, kontrol-prozedurak ezarriko dira eta bertatik bertara kontrolatu beharreko espedienteen lagina aterako da.

3. Bertatik bertara egin beharreko kontrolak, ahal den guztietan, proiektuen azken ordainketa egin aurretik eginen dira, eta, gutxienez, LGENFk kofinantzatutako eta Erakunde Ordaintzaileak urte natural bakoitzean ordaindutako gastu publikoaren %5 adinakoak izanen dira.

20. oinarria.–Bateraezintasunak eta finantzaketa bikoitza.

1. Landa Dibertsifikaziorako Atala arduratuko da laguntzen bateraezintasuna eta finantzaketa bikoitza egiaztatzeaz, ordainketa egin aurretik.

2. Laguntzak bateraezinak dira Nafarroako 2023-2027 NPEPEaren beste edozeinekin; beraz, ordainketa egin aurretik, Landa Dibertsifikaziorako Atalak aztertuko du bateraezintasuna, bereziki esku-hartze hauetarako: 6841 (inbertsioak nekazaritza-ustiategietan), 6842 (inbertsioak nekazaritza-industrietan), 6468 (inbertsioak landa dibertsifikazioan), 6961 (nekazaritza-enpresa berriak sortzea), 6962 (landa-eremuetan nekazaritzakoak ez diren enpresa berriak sortzea).

3. Pertsona edo entitate onuradunek ezin izanen dute xede eta helburu bererako beste laguntzarik jaso, salbu eta deialdian berariaz eta esplizituki adierazten bada laguntza honekin bateragarria dela; kasu horretan, laguntzaren guztizko zenbatekoak, bakarka hartuta edo beste dirulaguntza batzuekin batera, ezin izanen du egindako inbertsioaren eta gastuaren kostua gainditu.

21. oinarria.–Murrizketak eta zehapenak ordainketetan.

1. Nekazaritza Politika Erkidearen Plan Estrategikoan jasotako esku-hartzeetan zigorrak aplikatzeko arauak ezartzen dituen otsailaren 28ko 147/2023 Errege Dekretuaren arabera, pertsona/entitate onuradunak eskatutako zenbatekoaren eta onargarritasuna aztertu ondoren ordaindu beharreko laguntzaren zenbatekoaren arteko diferentziek eragindako murrizketa honela aplikatuko da:

Administrazio-kontrolak eta bertatik bertara egin beharreko kontrolak egin ondoren, ordainketa eskaeran azaltzen den zenbatekoa %10 handiagoa bada onargarritasun azterketa egin ondoren ordaindu beharreko zenbatekoa baino, ordaintzeko zehaztutako zenbatekoa beste horrenbeste murriztuko da.

Murrizketa hori aplikatzearen ondorioetarako, espedientean aurkeztutako ordainketa eskaera guztien balioen batura hartuko da kontuan, eta, ordainketa eskaeran adierazten den zenbatekoa ematen den laguntzarena baino handiagoa bada, ematen den zenbatekoa hartuko da aurkeztutakotzat.

2. Onartutako inbertsioaren eta justifikatutakoaren arteko diferentziek eragindako murrizketa honela aplikatuko da:

a) Justifikatzen den inbertsioa, espedientean aurkeztutako ordainketa eskaera guztien balioen batura eginda, emandako laguntzaren zenbatekoaren %30etik %60ra bitartekoa bada, ordaindu beharreko dirulaguntza doitu eginen da, benetan gauzatu den proiektu zatiaren zenbatekoaren arabera, %25eko murrizketa aplikatuta, betiere proiektuaren helburua aldatzen ez bada.

b) Justifikatzen den inbertsioa emandako zenbatekoaren %30etik beherakoa bada, emandako laguntza kobratzeko eskubidea galduko da.

3. Ez da murrizketarik eta zehapenik aplikatuko baldin eta pertsona/entitate onuradunak frogatzen badu, unitate kudeatzaileak onartzeko moduan, bera ez dela onargarri ez den zenbatekoa sartu izanaren erantzulea, edo agintari eskuduna beste nonbaitetik jabetzen bada pertsona/entitate onuraduna ez dela horren erantzulea. Ez eta, oinarri arautzaile hauen arabera, ezinbestean gertatu direla frogatu daitekeenean ere, edo pertsona/entitate onuradunari egotzi ezin zaizkion eta gerora sortu diren arrazoien frogei buruzko justifikazioa aurkezten denean.

22. oinarria.–Ordaintzeko ebazpena.

1. Dibertsifikaziorako Atalak, tokiko ekintza taldeak egindako kontrolen emaitzak ikusita, laguntza ordaintzeko ebazpen-proposamena eginen du. Pertsona edo entitate onuradunak eskatutako zenbatekoa murriztea aurreikusten denean, tokiko ekintza taldeari jakinaraziko zaio, horren berri eman diezaion interesdunari eta, 15 egun naturaleko epean, jakinarazpena egin eta hurrengo egunetik hasita, dagozkion alegazioak aurkez ditzan Nafarroako Gobernuaren erregistroetan edo Administrazio Publikoen Araubide Juridikoaren eta Administrazio Prozedura Erkidearen 39/2015 Legearen 16.4 artikuluan jasotako tokietako batean. Kasu horietan, honako hau eginen da:

a) Alegaziorik aurkezten ez badu, pertsona edo entitate onuraduna behin-behineko proposamenarekin ados dagoela ulertuko da, eta proposamen hori behin betiko bihurtuko da.

b) Alegazioak aurkezten baditu, Landa Dibertsifikaziorako Atalak aztertu eginen ditu eta behin betiko ebazpen proposamena eginen du.

2. Landa Garapeneko zuzendari nagusiak, Landa Dibertsifikaziorako eta Garapenerako Zerbitzuak proposatuta, laguntza ordaintzeko edo ukatzeko ebazpena emanen du. Ebazpen hori arrazoitua izanen da, eta oinarriak egiaztatuak egonen dira. Laguntza hartuko duen pertsona edo entitatea jasoko da bertan. Administrazio-egintza hori espedientea kudeatu duen taldeari igorriko zaio, eta Erakunde Ordaintzaileak laguntza ordainduko du haren kontuan, hala badagokio.

3. Taldeak pertsona/entitate onuradunari igorriko dio ordainketa-ebazpena, gutxieneko informazio hau erantsita:

–Laguntzaren zenbateko orokorra.

–LGENFren finantzaketari eta ekarpenari buruzko informazioa.

–Errekurtsoa aurkezteko aukera hilabeteko epean, jakinarazpena egiten denetik hasita, Landa Garapeneko eta Ingurumeneko Departamentuko kontseilariari zuzenduta.

4. Landa Garapeneko eta Ingurumeneko Departamentuaren funtsak jaso ondoren, gehienez ere bost eguneko epean, tokiko ekintza taldeak dagokion ordainketa eginen dio pertsona edo entitate onuradun bakoitzari banku-transferentzia bidez.

23. oinarria.–Ondorengo kontrola.

1. Landa Dibertsifikaziorako Atala arduratuko da ondorengo kontrolak egiteaz, egiaztatzeko inbertsio diruz lagungarriei –produktiboak, ez-produktiboak eta azpiegituretan eginikoak– dagozkien eragiketetan ez dela aldaketa garrantzitsurik izan azken ordainketa ebatzi eta hurrengo 5 urteetan, Plan Estrategikoko esku-hartzeen eta Nekazaritza Politika Erkidearen beste laguntza batzuen kudeaketa- eta kontrol-sistema arautzen duen abenduaren 27ko 1047/2022 Errege Dekretua eta NBEFk ezarritako kontrol-plan nazionalak betez.

2. Konpromiso-aldiaren barruan aldaketa garrantzitsutzat jotzen dira:

–Ekoizpen jarduera bertan behera uztea, edo LGPtik kanpoko beste toki batera eramatea.

–Azpiegitura-elementu baten jabetzaren aldaketa, enpresa edo erakunde publiko bati abantaila bidegabea ematen diona.

–Funtsezko aldaketa bat, eragiketaren izaera, helburuak edo gauzatzeko baldintzak halako moduz ukitzen badira non jatorrizko helburuak kaltetzen diren.

–Dagokion aldian hartutako konpromisoei eusteko modua aldatzea.

3. Kontrol-planak Landa Dibertsifikaziorako Atalak idatziko ditu eta Erakunde Ordaintzailearen Zerbitzuko Zuzendaritzaren ebazpen bidez onetsiko dira, Koordinazio Atalak eta Landa Dibertsifikaziorako eta Garapenerako Zerbitzuak oniritzia eman ondoren. Horietan, kontrol-prozedurak ezarriko dira eta bertatik bertara kontrolatu beharreko espedienteen lagina aterako da.

4. Ondorengo kontrolek, urte natural bakoitzean, LGENFk kofinantzatzen duen gastu publikoaren %1 estaliko dute gutxienez, Erakunde Ordaintzaileak azken ordainketa ordaindu duen kasuetan. Ezarritako konpromisoak betetzen ez direla atzematen bada, jasotako laguntza osorik edo hein batean itzuli beharko da.

24. oinarria.–Ez-betetzeen mailakatzea, murrizketak eta salbuespenak.

1. Ezarritako konpromiso eta betebeharrak betetzen ez badira, laguntza doitu edo itzuli beharko da. Ez-betetzea nolakoa den, laguntza honenbeste murriztu edo itzuli beharko da:

a) Proiektua gauzatzen ez bada Europar Batasuneko, Espainiako eta tokiko araudiaren arabera: %100.

b) Proiektua gauzatzen ez bada laguntza emateko ebazpenean ezarritako epean edo onartzen diren luzapenen barrenean: %100.

c) Kostuen moderazioari buruz ezarritakoa betetzen ez bada: horrek eragindako kostuei dagokien laguntzaren %100.

d) C taldeko (Enplegua, ekintzailetza eta lankidetza) eta D taldeko (Proiektuak PTGEaren helburuei egindako ekarpena) ordainketa-konpromisoa duten hautaketa-irizpideekin lotutako konpromisoak betetzen ez badira, puntuazio berriak pertsona/entitate onuradun gisa baztertzea ekarri balu: %100.

e) Eragiketa beste udalerri batera eramaten bada, laguntza emateko oinarritzat hartu zen puntuazioaz bestelakoa duen edo aplikazio-eremutik kanpo dagoen batera: %100.

f) Proiektuaren izaera aldatzen bada, jatorrizko helburu eta baldintzei eraginda: %100.

g) Jarduera bertan behera uzten bada: %100. Ulertuko da jarduera ez dela bertan behera utzi baldin eta, azken ordainketaren ebazpena eman ondoren, pertsona edo entitate onuradunak jardueraren titulartasuna beste pertsona edo entitate bati laga badio, betiere lehenbizikoari onuradunaren izaera eman zizkioten baldintza guztiak betetzen baditu eta hasierako onuradunak hartutako konpromisoak onartzen baditu, edo sozietate onuradunaren fusioaren, xurgapenaren edo eraldatzearen ondoriozko bati, titulartasun berriari bidegabeko abantailarik ematen ez badio.

h) Ekoizpen-jardueraren iruzurrezko porrota: %100.

i) Erakunde Ordaintzaileak eta/edo kudeaketa-unitateak egiten dituen kontrolak onartzen ez badira: %100.

j) Erakunde Ordaintzaileari edo kudeaketa-unitateari jarraipen- eta ebaluazio-adierazleei buruzko datuak ematen ez bazaizkio: %25.

k) Publizitatearen gainean ezarritakoa betetzen ez bada: %25, eta ez-betetze hori errepikatzen bada, %50.

l) Gainerako betebeharrak betetzen ez badira: %10.

2. Kontratu Publikoei buruzko 2/2018 Foru Legea betetzen ez bada: Batzordearen 2019ko maiatzaren 14ko Erabakiaren 2. atalean ezarritakoaren arabera aplikatuko dira laguntzaren zuzenketa-portzentajeak. Erabaki horren bidez ezartzen eta onesten dira zenbait jarraibide, Batasunak, kudeaketa partekatuaren esparruan, finantzatutako gastuei Batzordeak aplikatu behar dizkien zuzenketa finantzarioak zehazteko, kontratazio publikoaren arloan arauak betetzen ez diren kasuetan.

3. Egiaztatzen bada pertsona/entitate onuradunak nahita egin duela gezurrezko adierazpen bat, emandako laguntza bertan behera utziko da, eta ordaindutako zenbateko guztiak berreskuratuko dira. Gainera, neurri horretarako laguntzetatik kanpo geratuko da irregulartasuna detektatu zen urte naturalean eta hurrengo bietan, 147/2023 Errege Dekretuaren 6. artikuluaren arabera, alde batera utzi gabe Dirulaguntzei buruzko azaroaren 9ko 11/2005 Foru Legean ezarritako zehapenak edo adierazpen hori aurkezteko unean indarrean zeuden iruzurraren aurkako borrokaren ondoriozkoak.

4. Oinarri honen 1. eta 2. ataletako xedapenak aplikatuko dira galarazi gabe NBEFaren zirkularretan ezarrita dagoena landa garapenerako laguntzen murrizketak eta bazterketak aplikatzeko irizpideei buruz.

25. oinarria.–Itzulketak, arau-hausteak eta zehapenak.

1. Europar Batasuneko araudian xedatutakoa galarazi gabe, itzulketak, arau-hausteak eta administrazio zehapenak Dirulaguntzei buruzko azaroaren 9ko 11/2005 Foru Legean xedatutakoaren arabera ezarriko dira.

2. Gaiaren arabera, arau-hausteak zehazteko eta zehapenak ezartzeko prozedura izanen da Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatzen dena.

3. Tokiko ekintza taldea, unitate kudeatzailea den aldetik, Landa Garapeneko eta Ingurumeneko Departamentuarekin elkarlanean arituko da LGENFk finantzatutako kopuruak berreskuratzeko prozeduretan.

26. oinarria.–Onuradunen betebeharrak gardentasunari dagokionez.

1. Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen aplikazio eremu subjektiboko entitate onuradunak behartuak daude gardentasun betebeharra betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak beren urteko diru-sarrera guztien %20 edo gehiago badira eta, gutxienez, 5.000 euro. Horretarako, honako esteka honetan dagoen eredua bete beharko dute, gardentasun betebeharrari buruzko adierazpena, alegia:

https://www.navarra.es/documents/48192/5726243/1+Declaracion+de+obligacion_eus.pdf

Betebehar horretatik kanpo geratzen dira pertsona fisikoak, sozietate zibilak eta toki entitate publikoak.

2. Aurreko atalean ezarritako muga kuantitatiboak gainditzen diren jakiteko, batuko dira Nafarroako Foru Komunitateko Administrazioak edo haren erakunde publikoek urte naturalean emandako dirulaguntza guztien kopuruak. Urte batean baino gehiagotan ordaintzen diren dirulaguntzen kasuan, aurrekontuko ekitaldi bakoitzean emandako kopurua hartuko da kontuan ondorio horietarako, ez guztizko batura. Negozio zifra honako hauetako txikiena izanen da:

a) Aurreko urteko negozio zifra.

b) Hala badagokio, dirulaguntza ematen den ekitaldian entitatearen organo eskudunak onartutako negozio zifra.

3. Aipatu diren inguruabarrak gertatzeagatik gardentasun betebeharra duten entitate onuradunek eman beharko dute propio eginiko txantiloietan eskatzen den informazioa hilabeteko epean, dirulaguntza emateko ebazpena jakinarazten denetik aurrera.

4. Adierazitako informazioa entitate onuradunaren legezko ordezkariak sinatuta aurkeztuko da, tokiko ekintza taldeari zuzenduko zaio, laguntzak kudeatzeko unitate den aldetik, honako eredu hauen arabera (gardentasun adierazpenari buruzko ereduaren I. eta II. eranskinak):

–Gardentasun ereduaren I. eranskina: https://www.navarra.es/documents/48192/5726243/2+Declaracion+de+cargos+y+dedicacion_cas_eus.pdf.

–Gardentasun ereduaren II. eranskina: https://www.navarra.es/documents/48192/5726243/3+Declaracion+de+retribuciones+cas_eus.pdf.

Entitateak ez badu gardentasun betebeharra konplitu beharrik, aurreikusitako egoerak gertatzen ez direlako, horren gaineko adierazpena aurkeztu beharko du.

Entitateak dirulaguntza bat baino gehiago jasotzen badu ekitaldi berean, ez du informazioa errepikatu beharko dirulaguntza bakoitzerako, salbu eta hasieran eman zituen datuak aldatu badira. Horretarako, entitateak identifikatu beharko du Foru Komunitateko Administrazioaren zein organoren aurrean aurkeztu zuen, eta noiz.

27. oinarria.–Publizitatea.

1. Oinarri arautzaile hauen esparruan ematen diren laguntzen publizitateari dagokionez, 2022/129 (EB) Erregelamenduan eta Europar Batasuneko, Espainiako eta eskualdeetako arauetan ezarritakoari jarraikiko zaio. Horretarako, entitate onuradunek Batasunaren laguntza finantzarioaren berri eman beharko dute:

–Eragiketaren exekuzioarekin lotutako informazio- eta komunikazio-jarduera guztietan.

–Onuradunaren webgune ofizialean, webgune hori baldin badago, bai eta sare sozialetako kontu ofizialetan ere.

–Baldin laguntza publikoa 10.000 eurotik gorakoa bada, gutxienez A3 neurriko informazio panel bat jarri beharko da, jendeak ongi ikusteko moduko toki batean.

Informazio hau agertu beharko da: proiektuaren azalpen laburra; Batasunaren ikurra, web-orri honetan dauden arau grafikoekin bat: http://europa.eu/european-union/about-eu/symbols/flag_es. Ikurraren ondoan, Batasunaren eginkizunaren azalpena agertuko da, adierazpen honen bidez: "Landa Garapenerako Europako Nekazaritza Funtsa: Europak landa eremuetan inbertitzen du"; eta Nafarroako Gobernuaren logotipoa.

2. Laguntza hauen onuradunen datuak honako arau honekin bat argitaratuko dira: Nekazaritzako Politika Bateratuaren finantzaketari, kudeaketari eta jarraipenari buruzko Europako Parlamentuaren eta Kontseiluaren abenduaren 2ko 2116/2021 (EB) Erregelamenduaren 98.1 artikulua.

Onuradunen datu pertsonalak erakunde nazionalek eta Europar Batasuneko erakundeek erabiltzen ahalko dituzte, baldin zerikusirik badute administrazioen kudeaketa, kontrol eta ikuskaritzako nahiz jarraipen eta ebaluazio betebeharrekin, bat etorrita Europako Parlamentuaren eta Kontseiluaren abenduaren 2ko 2116/2021 (EB) Erregelamenduaren 101. artikuluan ezarritakoarekin.

3. Ondorio horietarako, onuradunek honako arau hauetan ezarritako eskubideak dituzte: Europako Parlamentuaren eta Kontseiluaren 2016/679 (EB) Erregelamendua, 2016ko apirilaren 27koa, Datu pertsonalen tratamenduari eta zirkulazio askeari dagokionez pertsona fisikoak babesteari buruzko arauak ezartzen dituena; Europako Parlamentuaren eta Kontseiluaren 2018/1725 (EB) Erregelamendua, 2018ko urriaren 23koa, Batasuneko instituzio, organo eta organismoek datu pertsonalak tratatzeari eta datu horiek aske zirkulatzeari dagokionez pertsona fisikoak babesteari buruzkoa, eta 3/2018 Lege Organikoa, abenduaren 5ekoa, Datu pertsonalak babesteari eta eskubide digitalak bermatzeari buruzkoa.

28. oinarria.–Ezinbesteko arrazoiak eta salbuespenezko inguruabarrak.

1. Konpromisoak ez dira urratutzat joko Kode Zibilaren 1105. artikuluan aurreikusitako ezinbesteko arrazoiren bat gertatzen denean, hau da, Europako Parlamentuaren eta Kontseiluaren 2021eko abenduaren 2ko 2021/2116 (EB) Erregelamenduaren 3. artikuluan aurreikusitako ezinbesteko arrazoiren bat gertatzen denean. Agintaritza eskudunak ezinbesteko beste arrazoi batzuk eta salbuespenezko inguruabarrak ezar baditzake ere, honako hauek hartuko dira halakotzat beti:

a) Onuraduna hiltzea.

b) Onuradunak lanerako ezintasun luzea izatea.

c) Ezbehar klimatikoa, hondamendi naturala, ingurumen-hondamendia edo gertakaria.

d) Jardueraren eraikinen eta/edo instalazioen suntsitzea, istripuz.

e) Enpresa osoa edo haren zati handi bat desjabetzea, baldin eta eskaera aurkeztu zenean ezin bazen desjabetzea aurreikusi.

2. Onuradunak edo haren eskubidedunak idatziz jakinaraziko ditu ezinbesteko arrazoiak edo salbuespenezko inguruabarrak, zuzenbidean onartutako bitartekoen arabera egokiak diren frogak erantsita, egitate horiek gertatu eta hurrengo hamabost egunen barruan, edo, haien izaeragatik komunikazioa modu larrian eragotzi edo zaildu bada, onuraduna edo haren ordezkaria hori egiteko moduan dagoen egunean.

1. ERANSKINA.–LURRALDE-ESPARRUA

1. Lurraldeko udalerrien zerrenda: Cederna-Garalur Elkartea.

(*) Tokiko Ekintza Taldeari atxikitzeko akordiorik ez duten udalerriak. Kontuan hartuta erakundeak dinamizatu eta kudeatu beharko dituela partikularrek eta atxiki gabeko udalerrietatik datozen entitate pribatuek aurkeztutako laguntza eskaerak, "uhartetasunaren" eta "lurralde jarraitutasuna" irizpideen arabera atxikiko dituzte. Uhartetasuna: udalerri bat erakunde bereko beste batzuek inguratzen badute, hari atxikiko zaio. Lurralde jarraitutasuna: udalerri bat atxikitzeko, zein erakundetan dagoen, NLEn eskualdeko gainerako udalerriek duten pisua baloratuko da.

2. Lurraldeko udalerrien zerrenda: EDER Partzuergoa.

3. Lurraldeko udalerrien zerrenda: TEDER Elkartea.

(*) Tokiko Ekintza Taldeari atxikitzeko akordiorik ez duten udalerriak. Kontuan hartuta erakundeak dinamizatu eta kudeatu beharko dituela partikularrek eta atxiki gabeko udalerrietatik datozen entitate pribatuek aurkeztutako laguntza eskaerak, "uhartetasunaren" eta "lurralde jarraitutasuna" irizpideen arabera atxikiko dituzte. Uhartetasuna: udalerri bat erakunde bereko beste batzuek inguratzen badute, hari atxikiko zaio. Lurralde jarraitutasuna: udalerri bat atxikitzeko, zein erakundetan dagoen, NLEn eskualdeko gainerako udalerriek duten pisua baloratuko da.

4. Lurraldeko udalerrien zerrenda: Erdialdeko Partzuergoa.

(*) Tokiko ekintza taldeari atxikitzeko akordiorik ez duten udalerriak. Kontuan hartuta erakundeak dinamizatu eta kudeatu beharko dituela partikularrek eta atxiki gabeko udalerrietatik datozen entitate pribatuek aurkeztutako laguntza eskaerak, "uhartetasunaren" eta "lurralde jarraitutasuna" irizpideen arabera atxikiko dituzte. Uhartetasuna: udalerri bat erakunde bereko beste batzuek inguratzen badute, hari atxikiko zaio. Lurralde jarraitutasuna: udalerri bat atxikitzeko, zein erakundetan dagoen, NLEn eskualdeko gainerako udalerriek duten pisua baloratuko da.

1. mapa. Leader lurraldearen mugapena tokiko ekintza talde bakoitzeko.

2. ERANSKINA.–EKINTZA PLANAK TOKIKO EKINTZA TALDEEN ARABERA

1. Cederna Garalur Elkartearen partaidetzazko toki garapenaren estrategian aurreikusitako ekintzak.

2. Eder Partzuergoaren partaidetzazko toki garapenaren estrategian aurreikusitako ekintzak.

3. Teder Elkartearen partaidetzazko toki garapenaren estrategian aurreikusitako ekintzak.

4. Nafarroako Erdialdeko Partzuergoaren partaidetzazko toki garapenaren estrategian aurreikusitako ekintzak.

3. ERANSKINA.–ERAGIKETAK HAUTATZEKO IRIZPIDEAK

1.1. taula. Proiektu produktiboak hautatzeko irizpideak.

1.2. taula. Proiektu ez-produktiboak hautatzeko irizpideak.

1.3. taula. Proiektu produktiboetarako eta proiektu ez-produktiboetarako hautaketa-irizpide komunak.

4. ERANSKINA.–LAGUNTZA ESKAERAREKIN BATERA AURKEZTU BEHARREKO DOKUMENTAZIOA

Egin beharreko jardueraren, diruz lagundu beharreko inbertsioaren/gastuaren, laguntza eskatzen duen pertsonaren forma juridikoaren eta abarren arabera, hemen zerrendatutako dokumentazio guztia edo haren zati bat aurkeztu beharko du. Inbertsioa/gastua eskatzeko behar diren dokumentuen zerrenda hori ez da zehatza, eta, zenbait kasutan, Tokiko Ekintza Taldeak edo Landa Dibertsifikaziorako Atalak eskatuko dute zerrenda horretan jasotzen ez diren beste dokumentu batzuk aurkezteko, beharrezkoak direnak espedientea behar bezala izapidetzeko.

1. 7119.02.01 azpineurria. PTGEaren exekuzioa: sustatzaile publiko eta pribatuak.

–Nortasuna frogatzen duen dokumentazioa:

• Sustatzailearen edo ordezkariaren IFZ, eta ordezkaritza izendatzeko agiria.
• Merkataritza-sozietatearen estatutuak eta eratze-eskriturak.

–Laguntza eskatzeko akordioa, ereduaren arabera.

–Egin beharreko proiektuaren deskribapen-memoria, ereduaren arabera.

–Proiektu teknikoa edo gauzatzeko oinarrizko proiektua.

–Jabetzaren frogagiriak, edo hura erabiltzeko eta gozatzeko legezko gaitasunarenak:

• Lurzati zedula.
• Errentamendu kontratua.
• Beste modalitate batzuk: erabilera-lagapena, etab.

–Salerosketa-eskriturak edo entrega-konpromisoa.

–Tasatzaile independente baten ziurtagiria.

–Lizentziak eta baimenak, edo horiek eskatu izanaren agiriak.

–EJZ egunean izatearen ziurtagiria, enpresak zabaldu eta/edo dibertsifikatzeko denean.

–BEZetik salbuesteko ziurtagiria, salbuesteko kasuistika guztiak banakatuta, hala dagokionean.

–Proiektuak ukitutako eremuetan eskumena duten erakundeek emandako aldeko txostena.

–Inbertsioen proforma fakturak eta hornitzaileen hautaketa.

–Enpresa-plana edo bideragarritasun-plana.

–ETE aitorpena, ereduaren araberakoa.

–Transferentzia bidezko ordainketa eskaera, ereduaren araberakoa.

–Baremazioa egiaztatzeko dokumentazioa.

5. ERANSKINA.–LAGUNTZA ESKAERAREKIN BATERA AURKEZTU BEHARREKO DOKUMENTAZIOA

Egin beharreko jardueraren, diruz lagundu beharreko inbertsioaren/gastuaren, laguntza eskatzen duen pertsonaren forma juridikoaren eta abarren arabera, hemen zerrendatutako dokumentazio guztia edo haren zati bat aurkeztu beharko du. Inbertsioa/gastua eskatzeko behar diren dokumentuen zerrenda hori ez da zehatza, eta, zenbait kasutan, Tokiko Ekintza Taldeak edo Landa Dibertsifikaziorako Atalak eskatuko dute zerrenda horretan jasotzen ez diren beste dokumentu batzuk aurkezteko, beharrezkoak direnak espedientea behar bezala izapidetzeko.

1. 7119.02.01 azpineurria. PTGEaren exekuzioa: sustatzaile publiko eta pribatuak.

–Proiektua gauzatzeari buruzko memoria, ereduaren araberakoa.

–Jardueraren gastuen eta inbertsioen zerrenda banakatua.

–Egindako inbertsioa edo gastua justifikatzen duten jatorrizko agiriak eta horien kopiak, ordainketa egin dela egiaztatzen duten banku-agiriekin batera.

–Prestakuntza-jarduerak antolatzen badira: ikasleen fitxak, irakasleen eta ikasleen bertaratzea kontrolatzekoak, eta prestakuntza-jardueraren memoria bat, ereduen araberakoak.

–Merkataritza-sozietatearen eraketa egiaztatzen duten agiriak.

–Kontratazio publikoaren araudia betetzen dela justifikatzeko dokumentazioa. Obra edo zerbitzua esleitzeko eta/edo kontratatzeko espediente osoaren kopia.

–Enplegua sortzeko eta mantentzeko konpromisoak egiaztatzen dituen dokumentazioa:

• Lan bizitzaren ziurtagiria.
• Langile Autonomoen Araubide Bereziko azken kotizazio-agiria.
• RLC eta RNT kotizazioaren azken buletinak.
• Formalizatutako lan-kontratuak.

–Egindako obra zibila egiaztatzen duen dokumentazioa:

• Emandako obra-lizentzia.
• Proiektu teknikoaren aldaketak, bisatuak.
• Gauzatutako obraren azken ziurtagiria, obraren zuzendariak sinatua eta dagokion elkargoak ikus-onetsia.

–Jarduera garatzeko eska daitezkeen baimenak, erregistroak eta lizentziak:

• Erantzukizunpeko adierazpena eskatzea (irekitzeko lizentzia).
• Jarduera sailkaturako lizentzia.
• Beste erregistro eta baimen batzuk (zehaztu).

–Laguntza eskaeran adierazitako baldintza guztiak, hartutako konpromisoekin puntuak lortzeko balio izan zuten eta egiaztatzeke geratu zirenak agiri bidez justifikatzea (sortutako lanpostuak, lankidetza-hitzarmenak, eta abar).

–Organismo edo erakunde profesional edo asoziatibo bati atxikitzeko konpromisoak egiaztatzen dituen dokumentazioa.

–Informazioa eta publizitatea, NRAren arabera.

Iragarkiaren kodea: F2312051