2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
AZKOIEN
Udal ordenantza, 2023ko ludotekaren prezio publikoa arautzen duena. Behin betiko onespena
Azkoiengo Udalak, 2023ko maiatzaren 26an egin osoko bilkuran, hasiera batez onetsi zuen 2023ko udako ludotekaren prezio publikoa arautzen duen udal ordenantza. Horren iragarkia 2023ko 121. Nafarroako Aldizkari Ofizialean argitaratu zen, ekainaren 8an.
Nafarroako Toki Administrazioari buruzko uztailaren 2ko 7/1985 Foru Legearen 49. artikuluan xedatutakoari jarraikiz, eta jendaurrean egoteko epea inork alegaziorik aurkeztu gabe iraganik, ordenantza hori behin betiko onetsi eta osorik argitaratzeko agindu da, behar diren ondorioak izan ditzan.
Azkoienen, 2023ko uztailaren 21ean.–Alkatea, Juan Carlos Castillo Ezpeleta.
2023ko UDAKO LUDOTEKAREN PREZIO PUBLIKOA ERREGULATZEN DUEN ARAUA
Azkoiengo Udalak, kontziliaziorako tokiko itunen harira, xede nagusi izan du baliabideak, proposamenak, eginahalak eta planteamendu berriak koordinatzea, hainbat ekimen abian jar daitezen geure herriko ikuspuntutik, bateragarri egite aldera familia, lana eta norberaren bizitza.
Oporraldietan haurrei zuzendutako zerbitzuen falta izan da atzemandako arazo nagusietako bat. Behar hori, gainera, udalerri honi buruzko hainbat azterlanetan agertu da. Hori dela eta, lehentasuneko erabakia izan zen sortzea udarako eta Eguberrietarako "ludoteka" kontziliazio zerbitzua, eta, emaitzak baloratu ondoan, haiek positiboak izanez gero, zerbitzuari eustea hurrengo oporraldietan. Horrenbestez, Azkoiengo Udalean finkatu egin da ludoteka zerbitzua, helburu nagusia izanik Azkoiengo herritarrek bateragarri egitea familia, lana eta norberaren bizitza.
Orain arte eskaini diren ludoteka zerbitzuak Gizarte Ongizate eta Berdintasuneko Batzordeak antolatu eta arautu ditu, eta osoko bilkuran onetsi ohi dira zerbitzuaren arauak eta prezio publikoak, batzorde horrek berak behin irizpena eman ondoan.
Arau erregulatzaile honen xedea da, hortaz, zerbitzua ematearen alderdi komunak arautzea, nahiz eta jakin banan-banan hartu eta zehaztu behar direla ludoteka bakoitzaren alderdiak.
ZERBITZUA
Zerbitzuaren deskribapena
1. artikulua. Xedea.
1. Xedapen honen helburua da oinarrizko alderdiak arautzea Azkoiengo Udalak antolatzen duen ludoteka zerbitzurako, zehaztuz printzipio sozialak, betiere bete behar direnak zerbitzua ematean, eta erregulatuz horren prezio publikoa ezartzeko arau orokorrak.
2. Arau honek ezarritako esparruaren barnean, Gizarte Ongizate eta Berdintasuneko Batzordeak erabakiko ditu ludoteka bakoitzaren ezaugarriak, eta ondotik Tokiko Gobernu Batzarrak onetsi.
2. artikulua. Ludoteka zerbitzuaren edukiak.
1. Azkoiengo Udalak ludoteka zerbitzua emanen du eskola oporraldi bakoitzean. Hasiera batean, aurreikusi da 2023. urteko udarako programatzea.
2. Ordutegi hau aurreikusi da zerbitzurako: astelehenetik ostiralera, ekainaren 26tik abuztuaren 31ra, 8:45etik 13:15era.
Ordutegi hori aldatzen ahalko da ludoteka bakoitzean, baldin eta eusten bazaie artikulu honetan ezarritako egiturari eta zerbitzu motei.
3. Ludoteka bakoitza programatuko da kontuan hartuta partaideen gutxieneko eta gehieneko ratioa, aldez aurretik zehaztua adin talde bakoitzerako.
Ratio horiek irizpidetzat hartuko dira, bermatze aldera emandako zerbitzuen kalitatea eta bideragarritasun ekonomikoa.
3. artikulua. Zerbitzuaren helburuak.
1. Zerbitzuaren antolakuntzak eta eskaintzak kalitatea izan beharko dute helburu, nahiz eta horretarako defizit ekonomikoa sortu. Hala izanez gero, jokatuko da jarraikiz Nafarroako Toki Ogasunei buruzko Foru Legearen 32. artikuluari.
2. Hona hemen zerbitzuaren helburu orokorrak:
a) Erraztea Azkoiengo emakumezkoak eta gizonezkoak laneratzea eta gizarteratzea, eta egoera horri eustea.
b) Babesa ematea bateragarri izan daitezen Azkoiengo gizonezkoen eta emakumezkoen familia, lana eta bizitza pertsonalak.
c) Herritarren parte-hartzea bultzatzea.
Orobat, honako hauek dira zerbitzuaren helburuak:
a) Seme-alabei kasu egiteko denbora faltagatik gurasoek izaten duten ezegonkortasun emozionala gutxitzea.
b) Seme-alabei kasu egiteak eta haiek zaintzeak familiari ekartzen dion gehiegizko zama arintzea, eta, hala, erraztasunak ematea aisialdiaz gozatzeko.
c) Udal instalazioen erabilera optimizatzea.
d) Jostatzeko eta hezteko zerbitzuen eskaintza handitzea 3 eta 12 urte bitartekoentzat.
e) Zerbitzuaren jarraitutasuna sendotzea.
f) Gizonezkoen eta emakumezkoen arteko aukera-berdintasuna bultzatzea.
g) Gizonezkoen eta emakumezkoen arteko erantzukizun partekatua bultzatzea.
h) Esparru bat sortzea haurrak pertsona moduan haz daitezen, jolas- eta heziketa-jardueretan parte hartuz eta jostaketaren bidez.
i) Umeen artean bultzatzea ingurumena babestearen eta kontsumo arduratsuaren aldeko balioak eta jarrerak.
Zerbitzua kudeatzeko arauak
4. artikulua. Eremu subjektiboa.
1. Ludoteka zerbitzuak xede ditu haur hezkuntzako 1. mailatik lehen hezkuntzako 6. mailara bitarteko haurrak. Lehenik eta behin, lehentasuna izanen dute Azkoienen erroldaturik dauden haurrek; bigarrenik, etxetik kanpo lan egiten duten gurasoak dituztenek, eta familia gurasobakarra dutenekin jokatuko da etxetik kanpo lan egiten duten bi guraso dituztenekin bezala. Gurasoetako batek bakarrik lan egiten badu, lehentasuna emanen da, bietako bakar batek ere lan egiten ez dutenen aurretik.
2. Inskripzio epea bukatu ondoren egiten diren eskaerak kontuan hartuko dira baldin eta hala ahalbidetzen badute ludotekaren antolakuntzan aldez aurretik finkatutako ratioek.
5. artikulua. Familiak.
10. artikuluan zehazten den bezala, ekonomikoki lagunduko zaie inskripzio bat baino gehiago egiten duten familia-unitateei.
6. artikulua. Elkarlana Udalarekin.
1. Udalak konpromisoa hartzen du errazteko zerbitzua bideragarria eta eskuragarria izateko, eta, horretarako, laguntza ekonomikoak emanen ditu, jarraikiz ordenantza honen 3.1 artikuluan eta arau honen I. eranskinean ezarri denari.
2. Orobat, lagunduko du ahalik eta hobekien egin dadin jarduera, antolatzaileen esku utziz udal instalazioak eta behar diren gainerako bitartekoak.
7. artikulua. Kontratazioa.
1. Ludoteka zerbitzuaren kontratazioak beteko ditu Kontratu Publikoei buruzko Foru Legearen xedapenak.
PREZIO PUBLIKOA
Ordainarazpenaren kudeaketa
8. artikulua. Oinarria.
Ordainarazpen hau ezarri da Nafarroako Toki Ogasunei buruzko Foru Legearen lehen tituluko III. kapituluaren 2. ataleko 2. azpiatalean xedatutakoari jarraikiz, eta haren 28. artikuluko baimenaren babesean.
9. artikulua. Zenbatekoa eta ordaintzeko beharra.
1. Udako ludoteka zerbitzuaren prezio publikoak honako hauek dira:
–Ekainaren 26tik abuztuaren 31ra: 230 euro.
–Ekainaren 26tik 30era: 25 euro.
–Uztailaren 3tik 31ra: 100 euro.
–Uztailaren 3tik 14ra: 50 euro.
–Uztailaren 17tik 31ra: 50 euro.
–Abuztuaren 1etik 31ra: 110 euro.
–Abuztuaren 1etik 11ra: 45 euro.
–Abuztuaren 16tik 31ra: 65 euro.
2. Zaintza zerbitzua, 7:45etik 8:45era: Prezioa erabiltzaile kopuruaren araberakoa izanen da; hartara:
–1-6 erabiltzaile bitarte: 75 euro/hilabete, haur bakoitzeko.
–7-15 erabiltzaile bitarte: 50 euro/hilabete, haur bakoitzeko.
–16 erabiltzailetik gora: 25 euro/hilabete, haur bakoitzeko.
Zaintza zerbitzua, 13:15etik 14:15era: Prezioa erabiltzaile kopuruaren araberakoa izanen da; hartara:
–1-6 erabiltzaile bitarte: 75 euro/hilabete, haur bakoitzeko.
–7-15 erabiltzaile bitarte: 50 euro/hilabete, haur bakoitzeko.
–16 erabiltzailetik gora: 25 euro/hilabete, haur bakoitzeko.
Zerbitzu honi ez zaio aplikatuko 10. artikuluan eta I. eranskinean ezarritakoa.
3. Zerbitzuaren kostu osoa betetzen ez bada, Nafarroako Toki Ogasunei buruzko Foru Legearen 32. artikuluaren 2. apartatuan xedatuari jarraikiko zaio, eta Udalak aldea ordainduko du, dela bere baliabideen bidez, dela horretarako jasotako dirulaguntzen zenbatekoa gastatuz, gorago adierazitakotik ondorioztatzen denez, hala jokatzera bultzatzen duten arrazoiak baitaude, gizarte-arloari, ongintzari, kulturari edo interes publikoari loturikoak.
4. Hala izanez gero, erakundearen aurrekontuetan kontsignatu beharko dira kasuan kasuko diru-zuzkidurak, ateratzen den aldea estaltzeko.
10. artikulua. Hobariak.
1. Familia-unitate beraren bigarren inskripziotik aurrera, prezio publikoak murriztu eginen dira. Murriztapen hori izanen da I. eranskinean ezarritakoa. Deskontu hori ez da metagarria izanen.
11. artikulua. Ordaintzera behartuta daudenak.
1. Arau honetako prezio publikoa ordaintzeko betebeharra sortzen da zerbitzua ematen hasten denetik. Hala ere, zerbitzua hasi aurretik zenbateko guztia ordaintzeko eskatuko da, Nafarroako Toki Ogasunei buruzko Foru Legearen 34. artikuluari jarraikiz.
2. Onuradun guztiek ordaindu beharko dute prezio publikoa, edo, bestela, gurasoek edo zerbitzuez baliatu diren adingabeen tutoreek edo haien legezko ordezkariek, Udalak zehaztutako finantza-erakundeen bidez.
3. Onuraduna bertaratzen ez bada, administrazioari leporatu ezin zaizkion arrazoiengatik, berdin egonen da tasa ordaintzera behartuta. Aldiz, baldin ikastaroa edo jarduera egiten ez bada prezio publikoa ordaintzera behartuta dagoenari leporatu ezin zaizkion arrazoiengatik, halakoetan dagokion zenbatekoa itzuliko zaio.
4. Aipatutako epeetan ordaintzen ez diren zorrak premiamendu-prozeduraren bidez eskatuko dira, bat etorriz uztailaren 2ko 177/2001 Foru Dekretuarekin.
5. Zerbitzua amaitzea edo etetea. Zerbitzua emateari uzten ahalko zaio honako arrazoi hauengatik:
–Erabiltzaileak eskatuta: Horrelakoetan, zerbitzuan baja ematen duenean, erabiltzailea behartuta egonen da 35 euro ordaintzera eragindako gastuak konpentsatzeko, eta, orobat, behartuta egonen da zerbitzua hasi zenetik erabiltzaileak baja eman arteko zenbatekoa ordaintzera.
–Prezio publikoa ez ordaintzeagatik, horrek galarazi gabe sortu eta ordaindu gabeko zenbatekoak kobratzea, premiamendu administratiboaren bidez.
–Zentroaren arauak behin eta berriz ez betetzeagatik.
–Zerbitzua guztiz kentzeagatik, Udaleko osoko bilkurak hala erabaki ondoren.
12. artikulua. Osoko bilkuraren eskumenak.
Udaleko osoko bilkurak izanen du onesteko eskumena.
I. ERANSKINA.–LUDOTEKA ZERBITZUA
1.–Eskaintzen den plaza kopurua.
90 plaza eskaintzen dira.
2.–Zerbitzuak emateko gutxieneko plaza kopurua.
- Uztailean: 40 erabiltzaile.
- Abuztuan: 10 erabiltzaile.
–Gehieneko ratioak:
• Haur hezkuntzako 1. maila: 15 ume monitore bakoitzeko.
• Haur hezkuntzako 2. eta 3. maila: 15 ume monitore bakoitzeko.
• Lehen hezkuntzako 1. mailatik 6.era: 20 ume monitore bakoitzeko.
Behin betiko taldeak zehaztuko dira inskripzio epea bukatu ondotik, inskripzio kopuruaren arabera. Adinaren araberako haurren kopuruak ez badu zehazki bat egiten ezarritako ratioekin, talde mistoak egiten ahalko dira, baldin eta haurren kopuru osoak ez baditu gainditzen ezarritako ratioak, zuzkitu beharreko unitateak kalkulatzeko.
3.–Prezioaren %20ko hobaria izanen da inskribatutako bigarren umearengatik eta hurrengoengatik.
4.–Udalaren ekarpenak.
–Espazioak:
- Udalak une bakoitzean eskura dauden instalazioen erabilera lagako du kanpalekuak egiteko.
–Ekarpen ekonomikoa:
- Udalak behar den zenbatekoa emanen du defizitei aurre egiteko, halakorik gertatzen bada.
- Udalak ordainduko du I. eranskinean ezarritako hobaria aplikatzearen ondoriozko zenbatekoa.
- Udalak ordainduko du ludotekan erabiltzen diren instalazioak garbitzeko zerbitzua (langileak eta produktuak).
5.–Izen emateak.
Erroldatuek lehentasuna izanen dute erroldatu gabeen aurretik.
Lehentasuna izanen du guraso biek etxetik kanpo lan egiteak. Bakar batek ere kanpoan lan egiten ez badu, lehentasuna izanen du batek lan egiteak bietako batek ere lan ez egitearen aurretik.
Familia gurasobakarren kasuan, aita edo ama horrek kanpoan lan egiten badu, jokatuko da bi gurasoek lan egiten duten familiekin bezala.
Iragarkiaren kodea: L2310996
