157. ALDIZKARIA - 2023ko uztailaren 31

1. NAFARROAKO FORU KOMUNITATEA

1.7. BESTELAKOAK

98/2023 EBAZPENA, uztailaren 5ekoa, Industriaren, Energiaren eta S4 Proiektu Estrategikoen zuzendari nagusiak emana, zeinaren bidez aurretiazko administrazio baimena ukatzen baita Orkoiengo eta Oltza Zendeako udal mugarteetan jarri gogo den "Orkoien FF1 eguzki-instalazio fotovoltaikoa" energia elektrikoa ekoizteko instalazioarentzat (4 MW-eko potentzia instalatua) eta haren ebakuazio-azpiegiturentzat.

1.–2022ko azaroaren 26ko eskaera.

2022ko azaroaren 26an, Mundo Energía 2021 SLk aurretiazko administrazio baimenaren eskaera aurkeztu zuen eguzki-instalazio fotovoltaiko honetarako:

–Izena: "Orkoien FF1" eguzki-instalazio fotovoltaikoa.

–Instalazioaren titularra: Mundo Energía 2021 SL.

–Instalazioaren kokapena: 2. poligonoko 273. eta 276. lurzatiak, Oltza Zendeako udal mugartean.

–Instalazioaren ezaugarri teknikoak: "Orkoien FF1" eguzki-planta fotovoltaikoa, 4 MW-ekoa, eta haren ebakuazio-azpiegiturak.

–Exekuzio materialaren aurrekontua: 2.117.624 euro.

Halaber, egun berean, Mundo Energía 2021 SLk "Orkoien FF1" eguzki-instalazio fotovoltaikoaren ingurumen ukipenak ebaluatzeko eskaera aurkeztu zuen. 2022ko abenduaren 15ean, Industria Antolamenduaren, Azpiegitura Energetikoen eta Meatzeen Zerbitzuak Ingurumen Eraginaren Atalera igorri zuen aipatutako eskaera.

Ondoren, 2022ko azaroaren 29an, Mundo Energía 2021 SLk eskaera bat aurkeztu zuen lurzoru urbanizaezinean "Orkoien FF1" eguzki-instalazio fotovoltaikorako jarduera baimengarriak baimentzeko. 2022ko abenduaren 15ean, Industria Antolamenduaren, Azpiegitura Energetikoen eta Meatzeen Zerbitzuak Lurraldearen Antolamenduaren Atalari igorri zion aipatutako eskaera.

2.–Jendaurreko informazioaren tramitea.

Bat etorriz Sektore Elektrikoari buruzko abenduaren 26ko 24/2013 Legearen 53. artikuluarekin eta abenduaren 1eko 1955/2000 Errege Dekretuaren 125. artikuluarekin (errege dekretu horren bidez, energia elektrikoa garraiatu, banatu, merkaturatu eta horniketa egiteko jarduerak arautzen dira), Industria Antolamenduaren, Azpiegitura Energetikoen eta Meatzeen Zerbitzuak jendaurrean jarri zuen Mundo Energía 2021 SLk egindako eskaera, iragarki bat argitaratuz 2023ko 6. Nafarroako Aldizkari Ofizialean, urtarrilaren 10ekoan, bai eta Nafarroako Gobernuaren Gobernu Irekia webgunean ere.

3.–Kontsulten tramitea.

2023ko urtarrilaren 9an, abenduaren 1eko 1955/2000 Errege Dekretuaren 127. artikuluarekin bat etorriz, Industria Antolamenduaren, Azpiegitura Energetikoen eta Meatzeen Zerbitzuak kontsulta egin zien ukitutako erakundeei. Horren ondorioz, taulan adierazitako txostenak jaso dira:

ERAKUNDEA

TXOSTENAREN DATA

1. txostena.–Oltza Zendeako Udala

2023/01/12

2. txostena.–Herri-lanen eta Azpiegituren Zuzendaritza Nagusia

2023/01/16

3. txostena.–Ondare Arkitektonikoaren Atala

2023/01/16

4. txostena.–Telefónica de España S AU

2023/01/19

5. txostena.–Enagás Transporte SAU

2023/01/23

6. txostena.–Iruñerriko Mankomunitatea

2023/01/31

7. txostena.–Red Eléctrica de España SAU

2023/02/20

8. txostena.–Orkoiengo Udala

2023/02/21

Txosten horien edukia espedientean jasota dago.

4.–Jasotako alegazioak.

Jendaurreko informazioaren tramitearen barruan, honako alegazio hauek jaso ziren:

ALEGAZIOA

1. alegazioa.–Aratzuriko Kontzejua

2. alegazioa.–Jesús María Lezaun Labiano

3. alegazioa.–Artazkozko Kontzejua

4. alegazioa.–Luis María Garayoa Doncel

5. alegazioa.–Aratzuriko Kontzejuak partikularren 63 alegazio igorri ditu

6. alegazioa.–Erriberako Ekologistak Martxan

7. alegazioa.–Zangozako Ekologistak Martxan

Alegazio horien edukia espedientean dago.

5.–Jendaurreko informazioaren eta kontsulten emaitza sustatzaileari igortzea.

Abenduaren 1eko 1955/2000 Errege Dekretuaren 127. artikuluari jarraikiz, Industria Antolamenduaren, Azpiegitura Energetikoen eta Meatzeen Zerbitzuak Mundo Energía 2021 SLri igorri zizkion goian aipatutako txostenak eta alegazioak.

6.–Alegazioei eta txostenei emandako erantzuna.

Abenduaren 1eko 1955/2000 Errege Dekretuaren 127. artikuluan ezarritakoa betez, 2023ko martxoaren 22an, Mundo Energía 2021 SLk dokumentu bat aurkeztu zuen, non adierazten baitzuen, zenbait arrazoirengatik, proiektuaren egungo kokapena aldatuko dela (Oltza zendeako 2. poligonoa, 273. eta 276 lurzatiak), betiere 1955/2000 Errege Dekretuaren II. eranskinean ezarritakoa betez. Hori dela eta, proiektua berriro ebaluatu beharko da eta aurretiazko administrazio baimenaren prozesua berriz hasi beharko da.

Horregatik, sozietateak ez du beharrezkotzat jotzen jasotako alegazioei eta erantzunei erantzutea.

7.–Lurzoru urbanizaezinean jarduera baimengarriak egiteko baimena.

Espedientean jasota dago 224E/2023 Ebazpena, ekainaren 6koa, Lurralde eta Paisaia Zerbitzuko zuzendariak emana, zeinaren bidez ukatzen baita Oltza zendeako 2. poligonoko 273. eta 276. lurzatietan, Karrobide alderdian, "Orkoien FF1" eguzki-instalazioa instalatzeko baimena, Mundo Energía 2021 SLk sustatuta.

8.–Aurretiazko administrazio baimena ukatzeko proposamena.

Espedientea teknikoki aztertu ondoren, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatzen du prozedura behar bezala gauzatu dela, eta, lurzoru urbanizaezinean jarduteko baimena ukatu dela ikusita, Mundo Energía 2021 SLk eskatutako aurretiazko administrazio baimena ukatzea proposatzen du.

Era berean, abenduaren 29ko 1183/2020 Errege Dekretuaren arabera, bidezkoa da sarbide- eta konexio-baimenari lotutako abala itzultzea.

Adierazitakoarekin eta espedientean jasotako agiriekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabilita,

EBAZTEN DUT:

1. Mundo Energía 2021 SLk "Orkoien FF1" eguzki-instalazio fotovoltaikorako eskatutako aurretiazko administrazio baimena ukatzea.

2. Diruzaintza Atalari agintzea sarbide- eta konexio-prozedurari lotutako 160.000 euroko bermea itzul dezan; Mundo Energía 2021 SLk jarri zuen berme hori 2022ko otsailaren 26an (erregistro zenbakia: 5020000039 CFNA 2022 (Av-NAV-0494)).

3. Ebazpen hau igortzea Industria Antolamenduaren, Azpiegitura Energetikoen eta Meatzeen Zerbitzura, Lurraldearen Antolamenduaren Atalera, Ingurumen Eraginaren Atalera, Herri-lanen eta Azpiegituren Zuzendaritza Nagusira, Ondare Historikoaren Zerbitzura, Basoen eta Ehizaren Zerbitzura eta Ekonomia eta Ogasun Departamentuko Ekonomia eta Finantza Zerbitzuko Diruzaintza Atalera, behar diren ondorioak izan ditzan.

4. Ebazpen hau Nafarroako Aldizkari Ofizialean argitaratzea, orok jakin dezan.

5. Ebazpen hau honako hauei jakinaraztea: Mundo Energía 2021 SL, Telefónica de España SAU, Enagás Transporte SAU, Iruñeko Mankomunitatea, I-DE Redes Eléctricas Inteligentes SAU, Erriberako Ekologistak Martxan, Zangozako Ekologistak Martxan, Seobirdlife, Jesús María Lezaun Labiano, Luis María Garayoa Doncel, Red Eléctrica de España SAU (Tramitazioen Departamentua) eta Red Eléctrica de España SAU. Ohartarazten zaie ezen ebazpen honek ez diola amaiera ematen administrazio bideari, eta haren aurka gora jotzeko errekurtsoa jar daitekeela, Garapen Ekonomiko eta Enpresarialeko kontseilariari zuzendua, hilabeteko epean, jakinarazi eta biharamunetik hasita, espediente zenbakia adierazita.

6. Ebazpen hau Orkoiengo Udalari, Oltza Zendeako Udalari, Aratzuriko Kontzejuari, Artazkozko Kontzejuari, Trantsizio Ekologikorako eta Erronka Demografikorako Ministerioari eta Ebroko Konfederazio Hidrografikoari jakinaraztea, eta ohartaraztea ezen haren aurka administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, deusetan galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2023ko uztailaren 5ean.–Industriaren, Energiaren eta S4 Proiektu Estrategikoen zuzendari nagusia, Uxue Itoiz Mariñelarena.

Iragarkiaren kodea: F2310378