153. ALDIZKARIA - 2023ko uztailaren 24a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

BERRIOZAR

Alkateordeak eta Tokiko Gobernu Batzarreko kideak izendatzea. Alkatetzaren eskumenak Tokiko Gobernu Batzarraren esku uztea

Berriozarko Udaleko alkateak, 2023ko ekainaren 28an, 20230417 Ebazpena eman zuen, eta haren bidez Berriozarko Udaleko alkateorde izendatu zituen María Sagrario Ortigosa Lekunberri eta Félix José Puyo Rebollo, hurrenkera horretan.

Era berean, alkate udalburuak ekainaren 29ko 81/20230420 Ebazpena eman zuen, zeinaren bidez izendatzen baitira Tokiko Gobernu Batzarreko kideak eta Tokiko Gobernu Batzarraren esku uzten baitira alkatearen eskudantziak, beherago zerrendatuak. Hona hemen xedapen zatia, hitzez hitz:

"Lehena.–Honako zinegotzi hauek izendatzea Udal honetako Tokiko Gobernu Batzarreko kide:

–M.ª Sagrario Ortigosa Lekunberri.

–Félix José Puyo Rebollo.

–M.ª Carmen Nadales Ramírez.

–José Francisco Iraizoz Aguerri.

–Batzarreko burua: Iker Marriezcurrena Celaya (Berriozarko Udaleko alkate udalburua).

Bigarrena.–Alkatetzaren eskudantzia hauek uztea Tokiko Gobernu Batzarraren esku:

–Fakturak eta ordainketak onestea, 2.000 eurotik gorakoak direnean, salbu oporraldian, Tokiko Gobernu Batzarra biltzen ez den hilabeteetan; horietan eskumena ez da eskuordetuko.

–Diziplina-espedienteak ebaztea, salbu berekin baldin badakarte funtzionarioek Udalbatzaren zerbitzura lan egiteari uztea eta langileak kaleratzea.

–Planeamendu orokorra garatzeko tresnak onestea, espresuki Udalbatzaren esku utzi ez direnak, bai eta hirigintza-kudeaketako tresnak eta urbanizazio proiektuak onestea ere.

–Urteko kontratazioak, baldin haien zenbatekoak gainditzen ez badu aurrekontuko baliabide arrunten %10, eta urte anitzeko kontratazioak, baldin gastua aplikatzen bada gehienez lau ekitalditan eta urteko kuota guztien zenbateko metatuak ez badu gainditzen aipatutako portzentajea. Betiere, alkateak eutsiko dio kontratatzeko eskumenari baldin balio zenbatetsia 40.000 eurokoa bada gehienez, BEZa kanpo, hornidura eta zerbitzu kontratuetan, eta 150.000 eurokoa bada gehienez, BEZa kanpo, obra kontratuetan.

–Zerbitzuen eta obren proiektuak onestea, baldin eskumena badu haiek kontratatzeko edo kontzesioa egiteko eta aurrekontuan sartuta badaude.

–Diru-laguntzetarako deialdiak onestea, ez badira Osoko Bilkuraren eskumena.

–Behar diren oinarriak onestea, langileak hautatzeko probetarako eta lanpostu finkoak betetzeko lehiaketetarako.

–Jabari pribatuko ondasunak kostu bidez erabiltzea, baldin epea bost urtetik gorakoa ez bada eta zenbatekoa ez bada handiagoa lehen ekitaldiko aurrekontuko baliabide arrunten %5 baino.

–Ondasunak eta eskubideak eskuratzea, baldin eta haien balioa bada aurrekontuko baliabide arrunten %10 gehienez eta, betiere, ez denean 3 milioi euro baino gehiagokoa; halaber, ondasunak besterentzea honako kasu hauetan:

1. Baldin badira balio historiko edo artistikoaren deklarazioa duten ondasun higiezinak edo higigarriak, aurrekontuan aurreikusi gabeak.

2. Aurrekontuan aurreikusita egonik ere, gainditzen badituzte ondasunak eskuratzeko zehaztu diren portzentaje eta zenbatekoak.

Laugarren apartatuan aipatutako eskuordetzak errebokatuko edo aldatuko dira Alkatetzak horri buruzko beste ebazpen bat ematen duenean. Betiere, Alkatetzaren titulartasuna aldatzearekin batera errebokatuko dira.

Hirugarrena.–Eskuordetzak bere barnean biltzen ditu bai zuzendaritzako eta kudeaketako ahalmenak, bai hirugarrenengan eragina duten egintza administratiboen bitartez ebazteko ahalmena.

Laugarrena.–Alkatetza honek noiznahi bereganatzen ahalko du, banan-banan, eskuordetutako eskumenen esparruko edozein gai, eta horren gaineko ebazpena eman.

Bosgarrena.–Eskuordetzen diren eskumenak gorabehera, Alkatetza honek erabaki dezake berari dagokion edozein gai, eskuordetzeko modukoa bada, Tokiko Gobernu Batzarrari helaraztea –hura baita gaiak aztertzeko eta Alkatetza honi aholkua eta laguntza emateko organoa– eta gaiaren gaineko bozketa egitea.

Seigarrena.–Tokiko Gobernu Batzarreko kideen izendapenak, indarra izan dezan, beharko du izendatutako zinegotzien onarpena. Izendapena onartutzat joko da baldin eta hiru egun balioduneko epean, ebazpena jakinarazten denetik aitzina, izendatutako zinegotziek alkateari ez badiote berariaz adierazten ez dutela izendapena onartzen.

Zazpigarrena.–Eskumenak Tokiko Gobernu Batzarraren esku uzteak, indarra izan dezan, beharko du Batzar horren beraren onarpena. Eskuordetzea onartutzat joko da baldin eta hiru egun balioduneko epean, ebazpen hau jakinarazten denetik aitzina, Gobernu Batzordeak eskuordetze organoari ez badio berariaz adierazten ez duela eskuordetzea onartzen. Orobat, espresuki onartzen ahalko da, ebazpen hau Tokiko Gobernu Batzarrari jakinarazteko bilkuran berean.

Zortzigarrena.–Ebazpen hau izendatuei jakinaraziko zaie, eta argitaratatuko da Nafarroako Aldizkari Ofizialean eta Udaletxeko iragarki-taulan, denek jakin dezaten.

Bederatzigarrena.–Ebazpen honetan aurreikusten ez den orotan, aplikatuko dira Toki Araubidearen Oinarriei buruzko Legea, Antolaketaren eta Funtzionamenduaren gaineko Erregelamendua eta Herri Administrazioen Araubide Juridikoari eta Administrazio Prozedura Erkideari buruzko Legea, arau horiek eskuordetze hauetarako ezartzen dituzten erregelen esparruan.

Hamargarrena.–Ebazpen honen berri ematea Udalbatzari, egiten duen hurrengo ohiko osoko bilkuran."

Berriozarren, 2023ko uztailaren 3an.–Alkatea, Iker Mariezcurrena Celaya.

Iragarkiaren kodea: L2310286