1. NAFARROAKO FORU KOMUNITATEA
1.7. BESTELAKOAK
1/2023 EBAZPENA, urtarrilaren 9koa, Lehendakaritzako eta Gobernu Irekiko zuzendari nagusiak emana, zeinaren bidez xedatzen baita Nafarroako Aldizkari Ofizialean argitaratzea Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, 2022ko abenduaren 28koa, Klima-aldaketari eta Energia-trantsizioari buruzko martxoaren 22ko 4/2022 Foru Legearen gainekoa.
Aintzat hartuta Konstituzio Auzitegiari buruzko urriaren 3ko 2/1979 Lege Organikoaren 33. artikulua, urtarrilaren 7ko 1/2000 Lege Organikoak aldatu zuena,
EBAZTEN DUT:
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, ebazpen honi eranskin gisa gehitu zaiona, Nafarroako Aldizkari Ofizialean argitara dadila xedatzea.
Iruñean, 2023ko urtarrilaren 9an.–Lehendakaritzako eta Gobernu Irekiko zuzendari nagusia, Joseba Asiain Albisu.
ERANSKINA
ESTATUKO ADMINISTRAZIO OROKORRAREN ETA NAFARROAKO FORU KOMUNITATEAREN ARTEKO LANKIDETZA BATZORDEAREN ERABAKIA, KLIMA-ALDAKETARI ETA ENERGIA-TRANTSIZIOARI BURUZKO MARTXOAREN 22KO 4/2022 FORU LEGEAREN GAINEAN
Estatuko Administrazio Orokorraren eta Nafarroako Foru Komunitatearen arteko Aldebiko Lankidetza Batzordeak erabaki hau hartu du:
I.–Estatuko Administrazio Orokorraren eta Nafarroako Foru Komunitatearen arteko Aldebiko Lankidetza Batzordearen Erabakiaren bidez eratutako lantaldea Klima-aldaketari eta Energia-trantsizioari buruzko martxoaren 22ko 4/2022 Foru Legearen 31., 33., 51., 60., 66., 67., 68., 79. eta 88. artikuluen, zazpigarren eta hamahirugarren xedapen gehigarrien, azken xedapenetako bigarrenaren eta eranskinaren inguruan adierazitako desadostasunak aztertu eta konponbideak proposatzeko eratu zen, eta, lantalde horretan egindako negoziazioekin bat etorriz, bi alderdiek desadostasun horiek konpondutzat jotzen dituzte, honako konpromiso eta kontsiderazio hauen arabera:
1.–31. artikuluaren 1. eta 2. apartatuei eta 33. artikuluari dagokienez, zeinen bidez aurreikusten baita Nafarroako Gobernuak erregelamenduz zonifikazio bat ezarriko duela, energia eolikoko edo fotovoltaikoko instalazio bat paratzeko modukoak diren edo ez diren lurzoru baimengarriak nahiz debekatuak zehaztuta, bi alderdiek adosten dute interpretatu behar dela manu horietan ezarritako mugak ulertu behar direla oinarrizko legerian ezarritakoa ukatu gabe, bereziki, Sektore Elektrikoari buruzko abenduaren 26ko 24/2013 Legearen 3. artikuluan jasotakoa, eta Konstituzio Auzitegiaren jurisprudentziak 8/2018 eta 65/2018 epaietan finkatutako proportzionaltasun- eta arrazoizkotasun-irizpideak kontuan hartuta. Era berean, Nafarroako Gobernuak konpromisoa hartzen du 31. eta 33. artikuluetako 1. apartatuan aipatzen den erregelamenduaren proiektua Administrazio honetara igortzeko, onetsi aurretik.
2.–60. artikuluari dagokionez, bi alderdiek desadostasun horiek konpondutzat jotzen dituzte Foru Komunitateak dagokion lege-aldaketa sustatzeko konpromisoa hartu baitu, eta xedapen hori honela idatzita geldituko da:
"60. artikulua. Produktuen, zerbitzuen eta horniduren karbono aztarna kontratazio publikoan.
(...)
2.–Aurreko apartatuan ezarritakoa nahitaezkoa izanen da foru lege honek indarra hartzen duenetik bi urte iragandakoan, baldin eta kontratuaren xedearekin lotuta badago eta harekin proportzionala bada.
3.–68.3 artikuluari dagokionez, zeinak xedatzen baitu energia elektrikoa, edateko ura eta gasa banatzen eta merkaturatzen dituzten enpresek zaurgarritasun ekonomikoan dauden familiei hornidura eteterik ez dutela izanen, bi alderdiek adosten dute Nafarroako Foru Komunitateko Gobernuak lege-aldaketa bat sustatuko duela, gai horri buruz unean-unean indarrean dagoen estatuko araudian xedatutakora igorriz gai hori.
Era berean, 4/2022 Foru Legearen 88.2.f) artikuluari dagokionez, non 68. artikulua aipatzen baita, bi alderdiek adosten dute Nafarroako Foru Komunitateko Gobernuak lege-aldaketa bat sustatuko duela, eta gai horri buruz unean-unean indarrean dagoen Estatuko araudian xedatutakora igorriko du gai hori ere.
4.–79. artikuluko 1. apartatuko 4. paragrafoari dagokionez, bi alderdiek desadostasun horiek konpondutzat jotzen dituzte, Foru Komunitateak dagokion lege-aldaketa sustatzeko konpromisoa hartzen baitu. Beraz, xedapen horretako lehenengo apartatuko laugarren paragrafoa honela idatzita geldituko da:
"79. artikulua. Erabilera orokorreko ibilgailu elektrikoetarako kargaguneak.
Irisgarritasun unibertsal eta librea egonen da haiek erabiltzeko.
5.–Zazpigarren xedapen gehigarriari dagokionez, zeinak ezartzen baitu Foru Komunitateko zentral termikoen trantsiziorako, itxierarako edo ordezkapenerako prozedura eta epeak Nafarroako Gobernuak finkatuko dituela, bi alderdiek desadostasun horiek konpondutzat jotzen dituzte, Foru Komunitateak dagokion lege-aldaketa sustatzeko konpromisoa hartu baitu:
Zazpigarren xedapen gehigarria.–Nafarroan diren zentral termikoen trantsizioa, itxiera edo ordezkapena.
Nazioarteko itunetan isurketak murrizteko ezarri diren helburuekin bat, eta estatuko oinarrizko araudian berariaz hala xedatzen denean, Nafarroako Gobernuak, bere eskumenen baitan, Nafarroako Foru Komunitatean dauden zentral termikoen trantsizio, itxiera edo ordezkapenerako irizpideak, prozedurak eta epeak ezarriko ditu.
6.–Hamahirugarren xedapen gehigarriari dagokionez, zeinaren lehen apartatuak jasotzen baitu Ibilgailu elektrikoetarako kargaguneak instalatzea eta ezartzea erantzukizunpeko adierazpenaren araubideari loturik dagoela, bi alderdiek adosten dute manu hori interpretatzea Sektore Elektrikoari buruzko abenduaren 26ko 24/2013 Legearen 53.1 artikuluan aurreikusitakoa ukatu gabe (abenduaren 27ko Estatuko Aldizkari Ofiziala), 250 kW-etik gorako potentzia duten ibilgailu elektrikoak kargatzeko estazioen baimen-araubideari dagokionez.
7.–Azken xedapenetako bigarrenak Hondakinei eta haien fiskalitateari buruzko ekainaren 18ko 14/2018 Foru Legearen 19. artikuluaren hirugarren apartatuari emandako testuari dagokionez, bi alderdiek uste dute desadostasunak konponduta daudela, Foru Komunitateak dagokion lege-aldaketa sustatzeko konpromisoa hartu baitu, eta apartatu hori honela idatzita geldituko da:
"3. Nafarroako administrazio publikoen kontratazio publiko ekologikorako planak helburu progresiboak ezarri eta behar diren neurriak aurreikusiko ditu kontratu publikoetan bete daitezen, baldin eta kontratuen xedean, gutxienez, honako hauen erabilera sartuta badago:
a) Nekazaritzako elikagaiak, elikagai ekologikoak edo karbono aztarna txikiena sortzen duen ekoizpen edo garraio modua dutenak erosteko helburu progresiboak ezarrita. Kontratuak betetzeko kontratazioaren baldintza orokorretan adierazi beharko dira helburu horiek betetzen dituzten elikagaien erosketen ehunekoak. (...)"
8.–Azken xedapenetako bigarrenak Hondakinei eta haien fiskalitateari buruzko ekainaren 18ko 14/2018 Foru Legearen 19. artikuluaren bosgarren apartatuari emandako testuari dagokionez, bi alderdiek uste dute desadostasunak konponduta daudela, Foru Komunitateak dagokion lege-aldaketa sustatzeko konpromisoa hartu baitu, eta apartatu hori honela idatzita geldituko da:
"5. Administrazioek eta haiei lotutako organismo publikoek energia kontratatzeko egiten dituzten lizitazioetan exijituko da energia horrek, lehentasunez, %100 jatorri berriztagarrikoa izatearen ziurtapena izan dezala 2023ko urtarrilaren 1etik aurrera. Lizitazio horietan lehentasuna emanen zaio energia kontratatzeari PPA kontratuak eta autokontsumorako hornidura kontratuak erabiliz."
9.–Azkenik, 4/2022 Foru Legean bioerregaien definizioa jasotzen duen eranskinari dagokionez, bi alderdiek adosten dute Nafarroako Foru Komunitateko Gobernuak haren lege-aldaketa sustatuko duela, bat etor dadin Batasuneko legeria indardunarekin, zeina islaturik baitago Europako Parlamentuaren eta Kontseiluaren 2018ko abenduaren 11ko 2018/2001 (EB) Zuzentarauan, Iturri berriztagarrietatik sortutako energiaren erabilera sustatzeari buruzkoan.
II.–Lortutako akordioaren bitartez, bi alderdiek uste dute konpondu direla adierazitako desadostasunak eta bukatu dela agertutako auzia.
III.–Erabaki hau Konstituzio Auzitegiari jakinaraztea, Konstituzio Auzitegiari buruzko urriaren 3ko 2/1979 Lege Organikoaren 33.2 artikuluan aurreikusitako ondorioetarako, eta erabaki hau Estatuko Aldizkari Ofizialean eta Nafarroako Aldizkari Ofizialean argitaratzea. Lurralde Politikako ministroa, Isabel Rodríguez García.–Lehendakaritzako, Berdintasuneko, Funtzio Publikoko eta Barneko kontseilaria, Javier Remírez Apesteguía.
Iragarkiaren kodea: F2300308
