148. ALDIZKARIA - 2023ko uztailaren 17a

1. NAFARROAKO FORU KOMUNITATEA

1.7. BESTELAKOAK

650E/2023 EBAZPENA, ekainaren 23koa, Ingurumeneko zuzendari nagusiak emana; honen bidez formulatzen da ingurumen eraginari buruzko txostena, Serena Solar 2, 46,709 MW-ko eguzki instalazioaren ebakuazio azpiegituren proiekturako (proiektu aldatua), Barasoain, Biurrun-Olkotz eta Tebas-Muru Artederreta udal mugarteetan; sustatzailea Solaria Promoción y Desarrollo Fotovoltaico SL da.

Ingurumen eraginaren ebaluazio sinplifikatua egiteko prozedura hasteko, Industria Antolamenduaren, Azpiegitura Energetikoen eta Meatzeen Zerbitzuak, dokumentazioak sektoreko legedian ezarritako baldintzak eta ingurumen ebaluazioari buruzko abenduaren 9ko 21/2023 Legearen 45.1 artikuluan xedatutakoa betetzen dituela egiaztatu ondoren, ekainaren 6an aurkeztu du, Biodibertsitate Zerbitzuan, ingurumen eraginari buruzko txosten honen hasieran aipatzen den proiektua.

Izapidetzen ari den proiektuaren aldaketaren ezaugarriengatik eta Ingurumen ebaluazioari buruzko abenduaren 9ko 21/2013 Legearen 7.2 c) artikuluaren arabera, proposatutako aldaketak ingurumen eraginaren ebaluazio sinplifikatua behar du.

AURREKARIAK

Eguzki parkearen proiektuak badu aldeko ingurumen eraginaren deklarazioa, Ingurumeneko zuzendari nagusiak abenduaren 16an emandako 1320E/2022 Ebazpenaren bidez emana, eta ondoren argitaratua Nafarroako Aldizkari Ofizialean, 11. zenbakian, 2023ko urtarrilaren 17an.

2022ko abenduaren 22an, Lurraldea eta Paisaia Zerbitzuko Lurralde Antolamenduaren Atalak emandako errekerimendu baten bidez, proposatutako linea elektrikorako trazadura berri bat bilatzeko eskatu zen, haren trazadura, Untzueko udal mugartean barna, ez zelako bateragarria udal plangintzarekin.

2023ko martxoaren 21ean, sustatzaileak aurkeztu zuen, Industria Antolamenduaren, Azpiegitura Energetikoen eta Meatzeen Zerbitzuan, erakunde eskuduna bera baita, Serena Solar 2 instalazioaren ebakuazioko azpiegituraren (ebakuazioko linea eta La Majada azpiestazioa) aurreproiektu aldatua.

2023ko apirilaren 25ean, erakunde eskudunak sustatzaileari jakinarazi zion, Ingurumen Eraginaren Atalari (Biodibertsitate Zerbitzua) kontsulta egin ondoren, Serena Solar 2 instalazio fotovoltaikoaren ebakuazioko linearen marraketan planteatutako aldaketak ingurumen ebaluazio sinplifikatua behar duela, uste dutelako eragin nabarmenak izaten ahal dituela ingurumenean, jatorrizko proiektuaren ingurumen eraginaren ebaluazio arrunta tramitatu zenean ebaluatu zirenetatik bestelakoak.

PROIEKTUAREN DESKRIBAPENA

Tramitatzen ari den aurreproiektuak jasotzen du ebakuazioko linea berri bat eraikitzea, jatorrizko proiektuko linearen trazadura aldatuz, hark zeharkatzen baitzituen Barasoain, Oloritz, Untzue eta Tebas-Muru Artederreta udalerriak, eta oraingoak, berriz, Barasoain, Biurrun-Olkotz eta Tebas-Muru Artederreta.

Zirkuitu sinpleko lur azpiko linea trifasiko bat da, eroale isolatua duena, 66 kV-koa, zangan sartutako hodi batean lurperatua. Hasiera puntua du La Majada 66/30 kV azpiestazioan, Serena Solar 2 Eguzki Parkearen SS2-2 inguratzailean kokatzen dena, Barasoaingo udal mugartean, 2. poligonoan, 131. lurzatian, eta bukaera puntua, berriz, Muruarte Promotores 400/220/66 kV azpiestazioan, Tebas-Muru Artederreta udal mugartean, guztira 9,05 km-ko luzerarekin.

Obra zibilerako zanga bat ireki behar da, 1000 mm-ko zabalerakoa eta 1600 mm-ko sakonerakoa, zirkuitu sinple batentzat, non instalatuko den potentziako kableen eta azpiestazioen arteko komunikazioek behar dituzten fibra optikoko kableen hoditeria. Bai potentzia kableen hodiak, bai telekomunikazioen hodiak, hormigoiz guztiz inguratuta geratuko dira. Kanalizazioa hormigoiz estali ondoren, zanga beteko da indusketatik aterako den lurrez, hareaz edo %95 PM-ko zabor-legar arruntez. Azkenik, lurzorua lehengoratuko da, instalazioak zeharkatzen duen eremuaren arabera.

Goi-tentsioko linearen zati bat, SET Promotores eta SET Muruarte 400/220 KV (REE) bitartekoa, Tebas-Muru Artederreta udal mugartean, airekoa da, lerrokadura batez osatua, eta 0,06 km-ko luzera du. Aurreikusia dago linea horrek lotzea SE Muruarte Promotores-eko irteerako portikoa eta SE Muruarte-ko iritsierako portikoa, bitarteko euskarri beharrik gabe.

INGURUMEN ERAGINAREN EBALUAZIO SINPLIFIKATUA IZAPIDETZEA

2023ko ekainaren 5ean, sustatzaileak, 21/2013 Legearen 45. artikuluari jarraiki, ingurumen eraginaren ebaluazio sinplifikatua hasteko eskaera aurkeztu zion Industria Antolamenduaren, Azpiegitura Energetikoen eta Meatzeen Zerbitzuari. Eskaera hori Biodibertsitatearen Zerbitzuari bidali zitzaion espedienteko dokumentazio osoarekin batera, 45 artikuluaren a) eta h) bitarteko apartatuei jarraiki.

Aurretik, Industria Antolamenduaren, Azpiegitura Energetikoen eta Meatzeen Zerbitzuak, espedientea izapidetzeko tramitean dokumentazioa jendaurrean jarri zuen 30 egunez, eta iragarkia Nafarroako Aldizkari Ofizialean jarri zen, 96 zenbakian, 2023ko maiatzaren 9an. Gainera, kontsultak egin zaizkie hauei: Barasoain, Biurrun-Olkotz eta Tebas-Muru Artederreta udalak, Nekazaritzako eta Abeltzaintzako Zuzendaritza Nagusia, Ondare Historikoaren Zerbitzua, ADIF, Ebroko Konfederazio Hidrografikoa, Hidrokarburoen Konpainia Logistikoa, Enagas Transporte, I-DE Redes Eléctricas Inteligentes SAU, Red Eléctrica de España eta Telefónica de España.

Erantzuna eman dute hauek: ADIF, Ureztalurren eta Lurzati Antolamenduaren Atala, Ondare Historikoaren Atala, Telefónica España, eta Enagas Transporte; ingurumen edukirik gabeko erantzunak guztiak ere, eta Ondare Historikoaren Atalak bakarrik aintzat hartu du ingurumen eraginaren ebaluazio sinplifikatua.

Proiektuari atxikitako ingurumen dokumentuak alternatiben analisia egiten du, eta hautatzen ditu hainbat pasabide edo korridore eguzki instalazioaren ebakuazioko linearako, lurralde murrizketako eredu baten gainean. 5 alternatiba aztertzen dira, barne dela "0" alternatiba, eta 1. alternatiba hautatu da, puntuaziorik onena erakusten duelako, gainerakoen aldean, ikuspegi teknikotik eta gizarte eta ingurumen ikuspegitik ere bai. Ingurumen dokumentu honek modu egokian aurkezten ditu proiektutik eratortzen diren ingurumen eragin nagusiak, eta ondorioztatzen du proiektuak natura baliabideen zaintzaren gainean eta eragin ingurunearen bizi kalitatea gordetzearen gainean duen eragin orokorra BATERAGARRIA dela. Gainera, ingurumen eraginaren azterketak prebentzio eta zuzenketa neurriak ezartzen ditu, eta ingurumena begiratzeko Plan bat, ingurumen eragin adierazgarririk eragiten ez dela bermatzeko.

PROIEKTUAREN ANALISI TEKNIKOA, 21/2013 LEGEAREN III. ERANSKINEKO IRIZPIDEAK KONTUAN HARTUTA

Proiektua erdialdeko Nafarroako hegoaldean kokatzen da, eta lurraldea partekatzen du Orbaibar eta Izarbeibar paisaia azpiunitateekin. Uhindura leuneko lurraldea da, Artaxoako eta Puiuko mendien artean kokatua, eta nekazaritza da nagusi eremu osoan, batez ere lehorreko belar laboreak. Baina basoak ere badira, proiektuak ukitzen duen hedaduran, ametz (Quercus farginea) eta karraska baso mistoekin, eta haien inguruko sastrakadiarekin, eta nekazaritza-baso mosaiko bat eratzen du, laborantza nagusi den eremu baten barnean.

Linearen 500 metroko inguruan, buffer-ean agertzen den landaretza naturala unada isolatuetan irudikatzen da, eta Europar Batasunaren intereseko habitat (BIH) hauei dagokie: 9240 Quercus faginearen eta Q. canariensisen harizti iberikoak, 9340 Quercus ilex eta Q. rotundifolia basoak, 4090 Sastrakadi mediterraneo eta oromediterraneo primarioak eta sekundarioak, non genistak nagusi izaten diren, eta 5210 Frutizedak eta Juniperus zuhaiztiak. Zuhaitz eta zuhaixkaz osatutako landaredi unaden gainean izaten ahal diren eraginak saihesteko modukoak dira, trazaduran aldaketa txiki batzuk eginez, beti ere 5 metroko babes zerrenda bat utziz.

Eremuko fauna aberastasunari dagokionez, nekazaritza eta baso paisaiaren edo Mediterraneoko landazabalaren garrantzia eta balioa ez da paisaia hutsera mugatzen; izan ere, eremu biogeografiko mediterraneoaren iparraldeko mugan dago kokatuta, eta eragin kantauriarrak ditu; basoak eta nekazaritza lurrak txandakatzen direnez, biodibertsitate handiko eremua da, eta animalia espezie ugari bizi da bertan, besteak beste, "harrapakin espezieak", eta horiei esker, espezializatuagoak diren beste batzuk ere badira. Mosaiko erako lurralde mota horretan espezie eta populazio desberdinak elkartzen dira, habitat bera partekatzen ez dutenak, eta bizitzeko erabiltzen duten eremuaren parte bat izaten da haientzat (ugaltzeko, ehizarako eta elikatzeko eremua). Beraz, eremua espezie ugarik erabiltzen dute, eta haietako batzuk jasota daude Babes Bereziko Araubidean dauden Espezie Basatien Zerrenda eta Espezie Mehatxatuen Katalogo Espainiarra garatzen dituen otsailaren 4ko 139/2011 Errege Dekretuan. Miru gorria (Milvus milvus) da aipagarria, desagertzeko arriskuan katalogatua; haietako batzuek han egiten dute habia, beste batzuek ugaltzeko eremu gisa erabiltzen dute, inguru gertu samarretik etorrita, eta beste batzuek elikatzeko eremutzat dute.

Ugaltzeko garaian eta/edo negualdian, katalogatutako beste espezie batzuk izaten dira: mirotz urdina (Circus pygargus), mirotz zuria (Circus cyaneus) edo sai zuri arrunta (Neophron percnopterus), sai arrea (Gips fulvus), miru beltza (milvus migrans), arrano sugezalea (Circaetus gallicus) zapelatza (Buteo buteo), arrano beltza (Aquila chrisaetus), arrano txikia (Hieratus pennatus) edo belatz gorria (Falco tinunculus), besteak beste.

Tramitatzen ari den linea elektrikoa lur azpikoa denez, eta haren trazadurak ukitzen duen lur eremuaren ezaugarriak kontuan hartuta, lehenengo 2,3 kilometroetan erabat nekazaritzako bide batetik baitoa (Tirapuko bidea) eta ondoren nekazaritzako ibarbide leun baten hondotik, La Cocinilla errekaren ur-ibilgu ia antzemanezinetik, NA 6020 errepidearekin paralelo jarri arte, eta ondoren AP-15 autobidearekin, ez da espero faunaren gaineko eragin nabarmenik izatea, salbu eta lanek irauten duten bitartean, ingurugiroa aztoratzen duten eraginak handiagoak izaten direlako.

Paisaiaren gaineko eraginari dagokionez, proiektuak ukitutako eremua LAP 3aren (Eremu Zentrala) barruan dago, LAP 4aren (Erdialdeko Eremuak) mugan. PN9-Paisaia eranskinaren arabera, kontserbazioko lurzoru urbanizaezin gisa sailkatuta dago eremua. Paisaia aldetik balioa duen lurzorua, nekazaritzako eta abeltzaintzako kultur paisaiak, "Artederreta mendatearen ingurua errepidearen bi aldeetan eta Puiuraino". Mendi eta laborantza mosaiko dibertsifikatua da, ustiapen naturaleko erabilera nagusia duena, eta paisaia osagai nabarmena duena, eta horregatik, LAP4ak berak proposatzen du eremu horietan egiten diren jarduerek ez sinplifikatzea haren konfigurazioa, eta laboreen artean dauden landaredi naturaleko masak ez direla luberritu behar. Proiektuan linea lur azpian eramatea proposatzen denez, lanak egin bitartean inpaktuak murrizteko prebentzio neurriak hartuta, ez da aurreikusten paisaiaren gaineko eragin nabarmenik izatea.

Erreka sareari dagokionez, lehen esan den moduan, goi tentsioko linearen marraketa lur azpitik eramaten denez, zuzeneko ukipena eragiten dio La Cocinilla errekari, zati batean zeharkatzen duelako, hari atxikitako erriberako landaredi gabeko gune batean. Azken zatian, Intxaurreta erreka zeharkatzen du lineak, ingurumen alderik oso sinplifikatua, NA 6020 errepidearekin paralelo, Artederretako kuartel militar abandonatuaren inguruan. La Majada azpiestazioaren ekialdeko albotik, Olkotzarana erreka jaisten da; haren gaineko ingurumen eraginak ez dira ikusten orain arte Serena Solar 2 eguzki instalazioaren proiektuaren ingurumen ebaluazioan ebaluatutakoen aldean desberdinak.

Lur azpiko ebakuazioko linea, NA-6020 errepidearen paralelo doan zatian, P-6 Iraganbide kontrastatu gabeko abelbidearekin gainjartzen da, 3,7 km-ko zati batean. Tarte hori bat dator beste ebakuazioko linea batekin; hura ere lur azpikoa da, beste eguzki proiektu batena, eta aldeko txostena eskuratu zuen, abelbideei dagokienez, Baso Plangintzarako eta Ingurumen Hezkuntzarako Atalaren aldetik, Nafarroako Abelbideei buruzko abenduaren 15eko 19/1997 Foru Legean ezarritakoaren arabera. Atal horrek jakinarazi duenaren arabera, abelbidea NA-6020 errepidearekin gainjartzen denez, lehentasuna du Nafarroako Foru Komunitateko Administrazioaren titulartasuneko errepideak, eta beraz, Nafarroako Errepideei buruzko martxoaren 23ko 5/2007 Foru Legea bete behar da.

Proiektuak ez du agertzen Natura 2000 Sarearekiko ukipenik, ez Nafarroako Naturagune Babestuen Sarearekiko, ez Nafarroako estepako abifaunaren eremu kritikoekiko, ez Linea elektrikoetako zuzenketa neurrien ondoriozko abifauna babesteko eremuekiko (Ingurumen eta Ur zuzendari nagusiaren abenduaren 31ko 1150/3013 Ebazpena), ez eta babestutako bestelako natura edo paisaia guneekiko ere.

Zaratari dagokionez, eta ingurumen eraginaren azterketak adierazten duenez, zarata egitea espero da lanek irauten duten garaian bakarrik. Nolanahi ere, babestu beharreko faunaren populazioekiko urruntasuna aski da, alde horretatik inongo eraginik izatea saihesteko. Eremu elektriko eta magnetikoek eragindako kutsadura ere ez da handia, linea lur azpitik doalako.

Goi tentsioko lineak Barasoaingo "El Monte" izeneko 652. eta Biurrun-Olkotzeko "Zuastia" izeneko 589. Onura Publikoko Mendiak zeharkatzen ditu, zuhaitz masarik ukitu gabe.

Proiektuak ukitzen duen eremuko balio kulturalei dagokienez, Ondare Historikoaren Zerbitzuko Ondare Arkitektonikoaren Atalak jakinarazi du, 2023ko apirilaren 28an, proiektuak ez duela ukipenik eragiten, haien eskumeneko gaiei dagokienez. Ez da jaso Erregistroaren, Ondasun Higigarrien eta Arkeologiaren Atalaren txostenik, aztarna arkeologikorik izateari eta ukitzeari dagokienez.

Aurkeztutako dokumentazioa ikusita eta proiektua gauzatzearen, ustiatzearen eta bertan behera uztearen ondorioz sortzen ahal den ingurumen inpaktua aztertuta, Ingurumen Eraginaren Atalak zehaztu du ezen, kontsulten emaitza kontuan izanda eta abenduaren 9ko 21/2013 Legearen III. eranskinean horri dagokionez jasotzen diren irizpideetan oinarrituta, proiektuak ez duela eragin kaltegarri nabarmenik izanen ingurumenean, aurkeztutako ingurumen dokumentuetan eta ingurumen inpaktuaren txosten honetan jasotako zehaztapenak betetzen badira.

Ingurumen eraginaren ebaluazio sinplifikatuaren prozedura modu egokian bete dela iritzita, adierazitakoarekin bat, eta dauzkadan eskudantziak erabiliz (Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legearen 32. artikulua; Nafarroako Foru Komunitateko lehendakariaren 22/2019 Foru Dekretua, abuztuaren 6koa, Nafarroako Foru Komunitateko Administrazioaren departamentuen egitura ezartzen duena; eta 258/2019 Foru Dekretua, urriaren 23koa, Landa Garapeneko eta Ingurumeneko Departamentuaren egitura organikoa onesten duena), honako hau

EBAZTEN DUT:

1. Serena Solar 2, 46,709 MW-ko eguzki instalazioaren ebakuazio azpiegituren proiektuak (proiektu aldatua), Barasoain, Biurrun-Olkotz eta Tebas-Muru Artederreta udal mugarteetan, Solaria Promoción y Desarrollo Fotovoltaico SL sustatzen duenak, ez du eragin nabarmenik ingurumenean, ingurumen eraginaren txosten honetan adierazten diren baldintzetan, eta, beraz, ez da hari buruzko 21/2013 Legearen II. tituluko I. kapituluko 1. atalean aurreikusitako ingurumen eraginaren ebaluazio arruntik egin behar.

2. Aurrekoa gorabehera, baimentzeak berekin ekarriko du baldintza hauek betetzea:

1. Lanen zuinketa egiten den bitartean, zintaz eta ikusteko moduko markez balizatuko dira energia ebakuatzeko linearen laneko kalean eta bi azpiestazio elektrikoenean (La Majada eta Muruarte Promotores) dagoen edozein unada edo heskairekin muga egiten duten obrek eragindako azalera guztiak. Sarbide iraunkorren eta aldi baterakoen azalerak, eta azalera osagarriak ere balizatuko dira. Baso unaden ingurunean, tamaina handiko zuhaitzondoak daudenez, banakako babesa emanen zaie, 2 cm-ko lodierako zurezko oholan erabiliz, 2 mm-ko alanbrearekin helduta.

2. Energia ebakuatzeko lurpeko linearen trazadura bere ibilbidetik aldatuko da landaredi natural baliotsuak eragina jasaten ahal duen zatietan (Quercus rotundifolia eta Quercus faginea), 9240 eta 9340 EB kodedun BIH gisa identifikatuak. Beraz, linearen trazadurak gutxienez 5 metroko babes zerrenda gordeko du Biurrun-Olkotzeko 4. poligonoko 64., 65., 120. eta 129. lurzatiekiko, Barasoaingo 2. poligonoko 139.arekiko eta Tebas-Muru Artederretako 4. poligonoko 21.arekiko.

3. Lurra kendu edo hondeatu aitzinetik, obrek ukitutako azalera guztietatik landare lurra kenduko da, gutxienez 30 cm-ko sakonerako profil batean (okupazio iraunkorreko edo aldi baterako azalerak). Material hori berariaz hautatutako tokietan metatuko da, 2 m-tik beherako altuera duten kabailoiak osatuz, obrak amaitutakoan lehengoratze lanetan erabiltzeko.

4. Lur mugimenduetako soberakinak ahal bezainbeste aprobetxatzeko ahalegina eginen da, obran berean erabiliz. Lur soberakinak, halakorik balitz, hondakinen kudeatzaile baimendu batek kudeatuko ditu, eta lehentasunezko helburua izanen da inguruko espazio narriatuak lehengoratzea. Lehengoratzeko lanetan erabiliko ez diren lurrak zabortegi baimendu batera lekutuko dira. Nolanahi ere, lurren lekualdaketa eskatzen duten operazioek Ekonomia Zirkularraren eta Klima Aldaketaren Zerbitzuko Hondakinen Atalaren aldeko txostena beharko dute. Sortzen diren gainerako hondakin guztiak era egokian kudeatu behar dira, haien ezaugarrien arabera, bat etorriz hondakinei buruz indarrean den araudiarekin.

5. Proiektuaren kokapena espezieek, hala nola, mirotz zuriak) eta mirotz urdinak (Circus cyaeneus), habiak egiteko habitat onuragarriekin bat datorrenez, makinak obra eremuan sartu aitzinetik habiak miatuko dira, betiere obrak martxoaren hasieratik uztailaren erdialdera bitartean egiten badira.

6. Kableendako zangak estali aitzinetik, ikuskapena eginen da, nahigabe barrura erori den fauna alerik ez dagoela egiaztatzeko.

7. Lanek ukitutako bideak lehengoratu eta hasi aitzinetik zuten egoeran utziko dira. Nekazaritzako bideekin bat ez datozen azaleretan, lurzorua lehengoratuko da laborantzarako egoerarik egokienean uzteko moduan, nekazaritzako eremuen kasuan, eta landare-berrituko dira, belar eta zuhaixka espezie autoktonoak eta berezkoak ereinez, landaredia naturaleko eremu ukituen kasuan. Lanak bukatu ondoren, eremua hondakin eta zaborrez garbi geratuko da.

8. Ondare Historikoaren Zerbitzuaren Txostena eskatuko da, proposamena bateragarria den jakiteko, inguru horretan izaten ahal diren aztarna arkeologikoen babesarekin. Hartan ematen diren xedapenak, halakorik bada, bete beharko ditu proiektuak. Lanei ekin aitzinetik Basozainekin kontaktatuko da, gutxienez 5 egun aitzinetik, Aezkoa-Kintoa barrutiko koordinazio unitatearekin (telefonoa 686 50 29 27; gmaaezkoa@navarra.es).

9. Sustatzaileak zerbaiten berri eman behar badio Basozainak/Ingurumena Zaintzeko Taldeari (obren hasiera, eta abar), mezu elektronikoa bidaliko die Tafalla-Zangoza barrutiari (gmatafalla@navarra.es) eta Iruñeko barrutiari (ogfopamp7@cfnavarra.es).

3. Ingurumen Ebaluazioari buruzko abenduaren 9ko 21/2013 Legearen 47.6 artikuluak adierazten duenari jarraiki, ingurumen txostenaren aurka ez da errekurtsorik jartzen ahalko, proiektua onesteko xedapen orokorraren aurka auzibidean jartzen ahal direnak ukatu gabe, edota plan edo programa onesteko egintzaren aurka administrazio bidean jartzen ahal direnak ukatu gabe.

4. Ebazpen hau Nafarroako Aldizkari Ofizialean argitaratzea.

5. Ebazpen hau Industria Antolamenduaren, Azpiegitura Energetikoen eta Meatzeen Zerbitzura eta Biodibertsitatearen Zerbitzura bidaltzea (Tafalla-Zangozako eta Iruñeko barrutiak), behar diren ondorioak izan ditzan.

Iruñean, 2023ko ekainaren 23an.–Ingurumeneko zuzendari nagusia, Pablo Muñoz Trigo.

Iragarkiaren kodea: F2309860