Iragarkia

146. ALDIZKARIA - 2023ko uztailaren 13a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

30/2023 FORU AGINDUA, ekainaren 14koa, Ekonomia eta Ogasuneko kontseilariak emana, diru birtualaren saldoei eta diru birtualarekin egindako eragiketei buruz informatzeko betebeharrak garatzen dituena, eta 172 eredua ("Diru birtualeko saldoen gaineko aitorpen informatiboa") eta 173 eredua ("Diru birtualarekin egindako eragiketen gaineko aitorpen informatiboa") onartzen dituena.

Abenduaren 29ko 21/2020 Foru Legeak, zenbait zerga aldatu eta beste tributu-neurri batzuk hartu zituenak eta Lurraldearen Antolamenduari eta Hirigintzari buruzko Foru Legearen testu bategina aldatu zuenak, Pertsona Fisikoen Errentaren gaineko Zergari buruzko Foru Legearen Testu Bategina aldatu zuen (4/2008 Legegintzako Foru Dekretua, ekainaren 2koa) informazio betebehar berriak ezartzeko diru birtuala edukitzearen eta harekin egindako eragiketen gainean, diru birtuala izatearen edo harekin operatzearen ondoriozko zerga-egitateen tributu kontrola hobetzeko.

Pertsona Fisikoen Errentaren gaineko Zergari buruzko Foru Legearen testu bateginean diru birtuala izateari eta horrekin eragiketak egiteari buruz informazioa emateko sartutako betebehar berri horiek foru lege horren laugarren xedapen gehigarriaren 8. eta 9. apartatuetan daude jasota, hurrenez hurren. Apartatu horietan, tributuen arloan eskumena duen departamentuko titularra gaitzen da foru agindu bidez ezar ditzan apartatu horietan aipatzen diren aitorpenen ereduak, epeak, aurkezteko modua eta edukia.

Aitorpen informatibo berri horien aurkezpena gaitzeko asmoz, foru agindu honetan onartzen dira 172 eredua ("Diru birtualeko saldoen gaineko aitorpen informatiboa") eta 173 eredua ("Diru birtualarekin egindako eragiketen gaineko aitorpen informatiboa"), bai eta eman beharreko informazioa normalizatzeko erregistro diseinuak ere.

Nafarroako Foru Komunitateko Administrazioari eta Sektore Publiko Instituzionalari buruzko martxoaren 11ko 11/2019 Foru Legean xedatutakoarekin bat, foru agindu hau premiaren, eraginkortasunaren, proportzionaltasunaren, segurtasun juridikoaren, gardentasunaren eta efizientziaren printzipioen arabera egin da.

Beharraren eta eraginkortasun juridikoaren printzipioak betetzen dira, lege arauaren garapena eta garapen horretarako tresna egokia direlako.

Proportzionaltasun printzipioa ere betetzen da, hura onartzea justifikatzen duten helburuak lortzeko beharrezko erregulazioa jasotzen duelako.

Segurtasun juridikoaren printzipioari dagokionez, bermatu da testua foru ordenamendu juridikoarekin koherentea dela.

Gardentasun printzipioa bermatu da azalpen honen xedea eta helburua argi identifikatzean, bai eta proiektua Nafarroako Gobernu Irekiaren Atarian argitaratzean ere, herritarrek testua ezagutu ahal izan dezaten entzunaldiaren eta jendaurreko informazioaren izapidean.

Azkenik, efizientziaren printzipioari dagokionez, ahalegina egin da arauak ahalik eta administrazio karga gutxien izan dezan herritarrentzat eta zeharkako kostu gutxien ere bai, eta baliabide publikoen arrazoizko erabilera sustatu da.

Horrenbestez,

AGINTZEN DUT:

1. artikulua. Diru birtualeko saldoei buruz informazioa emateko betebeharra.

1. Pertsona Fisikoen Errentaren gaineko Zergari buruzko Foru Legearen testu bateginaren –ekainaren 2ko 4/2008 Legegintzako Foru Dekretuak onartua– laugarren xedapen gehigarriaren 8. zenbakian aurreikusitakoarekin bat, Espainiako lurraldean egoitza duten pertsonek eta erakundeek eta atzerrian egoitza duten pertsonek edo erakundeek Espainiako lurraldean dituzten establezimendu iraunkorrek hirugarrenen izenean zerbitzuak ematen badituzte gako kriptografiko pribatuak gordetzeko, eta diru birtuala edukitzeko, biltegiratzeko eta eskualdatzeko, izan zerbitzu hori izaera nagusikoa edo beste jarduera batekin lotua, beharturik egonen dira zaintzen duten diru birtual guztiari buruzko urteko aitorpen informatibo bat ematera.

2. Zerga Administrazioari eman beharreko informazioaren barruan sartuko dira urteko uneren batean diru birtuala –titular, baimendu edo onuradun gisa– dagozkien pertsonen edo erakundeen izen-deiturak edo sozietate izena edo izendapen osoa, bizilekua eta identifikazio fiskaleko zenbakia, eta abenduaren 31ko saldoak.

Saldoei buruzko informazioan, diru birtual bakoitzaren kasuan, diru birtual mota, abenduaren 31n dauden diru birtualeko unitateen kopurua eta eurotako balorazioa jasoko dira.

Balorazioa eurotan egiteko, behartutako subjektuek negoziazio plataforma nagusiek edo prezioen jarraipenerako webguneek eskaintzen duten abenduaren 31ko kotizazioa hartuko dute edo, bestela, diru birtualaren abenduaren 31ko merkatuko balioaren arrazoizko estimazioa emanen dute eurotan. Horri dagokionez, balorazioa egiteko zer kotizazio edo balio erabili den adieraziko da.

Era berean, abenduaren 31n hirugarrenen kontura dagoen diru fiduziarioaren saldoen berri eman beharko da. Saldo horiei dagokienez, apartatu honen lehen paragrafoan aipatzen diren titular, baimendu edo onuradunaren identifikazio datu berberak emanen dituzte, bai eta eurotako balorazioa ere, dirua euroa ez denean.

3. Baldin eta, abenduaren 31 baino lehen, 1. apartatuan aipatzen diren pertsonek edo erakundeek 2. apartatuan aipatzen diren pertsonei edo erakundeei dagokien diru birtuala zaintzeari utzi badiote, eman beharreko informazioa inguruabar hori gertatu den egunari buruzkoa izanen da.

4. Artikulu honetan aipatzen den urteko aitorpen informatiboa Nafarroako Foru Ogasunean aurkeztuko da, Estatuaren eta Nafarroako Foru Komunitatearen arteko hitzarmen ekonomikoaren 46.2 artikuluan aurreikusitako eskumen irizpideen arabera.

2. artikulua. 172 eredua ("Diru birtualeko saldoen gaineko aitorpen informatiboa") onartzea.

172 eredua ("Diru birtualeko saldoen gaineko aitorpen informatiboa") onartzen da. 1. artikuluan adierazitako aitorpena egin behar dutenek aurkeztu beharko dute, I. eranskinean adierazitako edukiarekin, gako publiko bakoitzean sartutako diruari dagokienez, baldin eta hura aitortzeko betebeharra badute.

3. artikulua. Diru birtualarekin egindako eragiketei buruz informazioa emateko betebeharra.

1. Pertsona Fisikoen Errentaren gaineko Zergari buruzko Foru Legearen testu bateginaren laugarren xedapen gehigarriaren 9. zenbakian aurreikusitakoarekin bat, Espainian egoitza duten pertsonek eta erakundeek eta atzerrian egoitza duten pertsonen edo erakundeen Espainiako lurralde iraunkorretako establezimenduek, baldin eta diru birtualaren eta diru fiduziarioen arteko edo diru birtual desberdinen arteko truke zerbitzuak ematen badituzte, eragiketa horiek egiteko bitartekari lanak egiten badituzte edo hirugarrenen izenean zerbitzuak ematen badituzte gako kriptografiko pribatuak gordetzeko, eta diru birtuala edukitzeko, biltegiratzeko eta eskualdatzeko, diru birtuala eskuratu, eskualdatu, trukatu eta transferitzeko eragiketen gaineko urteko aitorpen informatibo aurkeztu beharko dute, hitzartutako kontraprestazioa edozein dela ere, hala badagokio, baita diru horretan egindako kobrantzak eta ordainketak ere, horietan esku hartzen badute edo bitartekotza egiten badute.

Aurreko paragrafoan ez dira sartuko beren jarduera diru birtualari buruzko aholkularitzara, diru birtualarekin eragiketak egiteko interesa duten alderdiak harremanetan jartze hutsera edo diru birtualaren eta diru fiduziarioen arteko edo beste diru birtual batzuen arteko truke zerbitzuak ematen dituzten edo hirugarrenen izenean gako kriptografiko pribatuak gordetzeko zerbitzuak ematen dituzten pertsonen edo erakundeen kobrantza eta ordainketa aginduez arduratze hutsera mugatzen den pertsonak edo erakundeak.

2. Zerga administrazioari eman beharreko informazioak hauek jasoko ditu: aurreko apartatuan adierazitako eragiketak egiten dituzten subjektuen izen-deiturak edo sozietate izena edo izendapen osoa, bizilekua eta identifikazio fiskaleko zenbakia.

Eragiketa bakoitzari dagokionez, zerga administrazioari eman beharreko informazioak honako hauek jasoko ditu: eragiketa mota, eragiketaren eguna, erositako, eskualdatutako, trukatutako edo transferitutako diru birtual mota eta unitate kopurua, eragiketaren eurotako balioa eta, hala badagokio, eragiketari lotutako komisioak eta gastuak, informazioa ematera behartuta dagoen subjektuak jasoko dituenak.

Kontraprestaziorik egonez gero, eta informazioa ematera behartuta dagoen subjektua hura aseko edo jasoko duena, hura jasotzeko bitartekari izanen dena, hura entregatzen duena edo haren berri duena bada, hura diru fiduziarioa, beste diru edo aktibo birtual bat, ondasuna edo zerbitzuak edo aurrekoen konbinazio bat den ere jakinaraziko da.

Eragiketak diru fiduziarioko kontraprestaziorik ez badakar erabat eta, beraz, eragiketa eurotan baloratu behar bada, behartutako subjektuek eragiketa egin den egunean negoziazio plataforma nagusiek edo prezioen jarraipenerako webguneek eskaintzen duten kotizazioa hartuko dute edo, bestela, eragiketa egin den egunean diru birtualak eurotan duen merkatuko balioaren arrazoizko estimazioa emanen dute. Horri dagokionez, balorazioa egiteko zer kotizazio edo balio erabili den adieraziko da.

3. Espainian egoitza duten pertsonek eta erakundeek eta atzerrian egoitza duten pertsonen edo erakundeen Espainiako lurraldeko establezimendu iraunkorrek, diru birtual berriaren hasierako eskaintzak egiten badituzte, urteko aitorpen informatibo hau aurkeztu beharko dute, beste diru birtual baten edo diru fiduziarioaren truke egiten dituzten diru birtual berriaren entregei buruz aurreko apartatuan aurreikusitako informazioarekin.

Hala ere, diru birtual berriaren hasierako eskaintzak 1. apartatuan aipatutako behartutako subjekturen baten bitartekaritzarekin egiten direnean, urteko aitorpen informatiboa azken horrek egin beharko du, edozein dela ere diru birtual berriaren hasierako eskaintza egiten duen pertsonaren edo erakundearen bizilekua, eta horren identifikazioa eta 1. apartatuan aipatutako eragiketa guztiei buruz 2. apartatuan aurreikusitako informazioa jasoko ditu, baldin eta, hala badagokio, hasierako eskaintza horren esparruan egiten badira.

4. Artikulu honetan aipatzen den urteko aitorpen informatiboa Nafarroako Foru Ogasunean aurkeztuko da, Estatuaren eta Nafarroako Foru Komunitatearen arteko hitzarmen ekonomikoaren 46.2 artikuluan aurreikusitako eskumen irizpideen arabera.

4. artikulua. 173 eredua ("Diru birtualarekin egindako eragiketen gaineko aitorpen informatiboa") onartzea.

173 eredua ("Diru birtualarekin egindako eragiketen gaineko aitorpen informatiboa") onartzen da. 3. artikuluan adierazitako aitorpena egin behar dutenek aurkeztu beharko dute, I. eranskinean adierazitako edukiarekin, gako publiko bakoitzean sartutako diruari dagokienez, baldin eta hura aitortzeko betebeharra badute.

5. artikulua. Diru birtualaren eta diru fiduziarioaren kontzeptuak.

Foru agindu honen ondorioetarako, diru birtualaren eta diru fiduziarioaren kontzeptuak Kapital Zuriketari eta Terrorismoaren Finantzaketari Aurrea Hartzeko apirilaren 28ko 10/2010 Legearen 1. artikuluaren 5. eta 6. apartatuetan xedatutakoaren arabera ulertuko dira.

6. artikulua. 172 eta 173 ereduak aurkezteko epeak.

172 eta 173 ereduak urtero aurkeztuko dira, eta aurkezteko epea aitortutako informazioari dagokion urtearen hurrengo urteko urtarrila izanen da.

7. artikulua. 172 eta 173 ereduak aurkezteko moduak.

172 eta 173 ereduak formatu elektronikoan izanen dira eskuragarri bakarrik, eta modu elektronikoz aurkeztu beharko da, Internet bidez, 9. eta 10. artikuluetan azaltzen diren baldintza orokorren eta prozeduraren arabera.

Aurkezpena egiten dutenek kontuan hartu beharko dituzte aurkezpen telematiko hori egiteko behar diren arau teknikoak, Nafarroako Gobernuaren web-orrian argitaratuak daudenak, Nafarroako Foru Ogasunari dagokion atalean.

8. artikulua. 172 eta 173 ereduak aurkezteko gaikuntza.

Honako hauek aurkezten ahalko dituzte 172 eta 173 ereduak modu elektronikoz, Internet bidez:

1. Zergapekoek edo, hala dagokionean, haien ordezkariek.

2. Tributuen aplikazioan laguntzaile sozialen izaera duten pertsonek edo erakundeek, Tributuei buruzko abenduaren 14ko 13/2000 Foru Lege Orokorraren 90. artikuluan eta ekainaren 29ko 130/2009 Foru Aginduan xedatutakoarekin bat, foru agindu horretan onesten baita kanpo lankidetzarako akordioa, hirugarren pertsonen izenean telematika bidez aurkezteko aitorpenak, jakinarazpenak eta zerga arloko beste agiri batzuk, eta telematika bidez tramitatzeko tributu-zorren ordainketa.

9. artikulua. 172 eta 173 ereduak aurkezteko baldintza orokorrak.

172 eta 173 ereduak elektronikoki aurkezteko, bete beharko dira Ekonomia eta Ogasuneko kontseilariaren uztailaren 3ko 132/2009 Foru Aginduaren 2. artikuluan ezarritako baldintza orokorrak, foru agindu horretan arautzen baitira zenbait tributu aitorpen baliabide telematikoen bidez edo ordenagailuak irakurtzen ahal duen euskarriaren bidez aurkeztera behartzen duten kasuak.

10. artikulua. 172 eta 173 ereduak elektronikoki aurkezteko prozedura.

Aitorpenak Internet bidez aurkezteko, bi prozedura hauetako bat erabiliko da:

a) Web formulariotik:

1. 172 edo 173 eredua aurkezteko tramitera sartu, Nafarroako Gobernuaren web orrian, Nafarroako Foru Ogasunaren atalean.

2. Web formularioko beharrezko datu guztiak bete.

Web formularioak aukera emanen du fitxategi bat inportatzeko; horren edukia II. edo IV. eranskinean ezartzen diren erregistro diseinuen araberakoa izan beharko da.

3. Aitorpena bete ondoren, igortzeko aukera erabili.

Aitorpena zuzen egina bada, sistemak baliozkotuko du. Akatsik atzemanez gero, inprimakiaren bidez emanen da horren berri, eta haiek zuzendu arte ez da aitorpena aurkezten ahalko.

Aitorpena zuzen bete ondoren, sistemak komunikatuko du aurkeztutako aitorpenari esleitutako zenbakia, eta, orobat, inprimatzeko aukera eskainiko du, frogagiri gisa erabiltzeko. Zergadunak onartutako aitorpena gorde beharko du.

b) Salbuespen gisa, aurkeztu beharreko adierazpenak 12.000 erregistro baino gehiago baditu, eredu informatiboen formulario osagarritik:

1. Eredu informatiboen formulario osagarrian (994) sartu Ogasunarekiko tramiteen zerbitzuaren bitartez, Nafarroako Atarian.

2. Egin beharreko aitorpenaren eredua hautatu: E172 edo E173.

3. Transmititu beharreko aitorpenaren fitxategia erantsi.

Fitxategi horren edukia II. edo IV. eranskinean ezartzen diren erregistro diseinuen araberakoa izan beharko da.

Akatsik atzemanez gero, inprimakiaren bidez emanen da horren berri, eta haiek zuzendu arte ez da aitorpena aurkezten ahalko. Aitorpena zuzen bete ondoren, sistemak komunikatuko du aurkeztutako aitorpenari esleitutako zenbakia, eta, orobat, inprimatzeko aukera eskainiko du, frogagiri gisa erabiltzeko. Zergadunak onartutako aitorpena gorde beharko du.

Azken xedapen bakarra.–Indarrean jartzea.

Foru agindu hau Nafarroako Aldizkari Ofizialean argitaratu eta hurrengo egunean sartuko da indarrean, eta lehen aldiz aplikatuko zaie 2024ko urtarrilaren 1etik aurrera aurkezten diren aitorpenei, 2023ko saldoei eta foru agindu hau indarrean sartzen denetik 2023ko abenduaren 31ra arte egindako eragiketei dagokienez.

Iruñean, 2023ko ekainaren 14an.–Ekonomia eta Ogasuneko kontseilaria, Juan Cruz Cigudosa García.

I. ERANSKINA.–1. ERREGISTRO MOTA

Aitortzailearen erregistroa

–Zenbateko guztiak positiboak izanen dira.

–Edukirik ez duten zenbakizko eremuak zeroz beteko dira.

–Edukirik ez duten eremu alfanumerikoak/alfabetikoak zuriunez beteko dira.

–Zenbakizko eremu guztiak eskuinaldean lerrokaturik eta ezkerraldean zeroz beterik.

–Eremu alfanumeriko/alfabetiko guztiak ezkerraldean lerrokaturik eta eskuinaldean zuriuneak dituztela, letra larriz, karaktere berezirik eta azentudun bokalik gabe, non eta eremuaren azalpenean besterik agintzen ez den.

172 EREDUA

C.–2. ERREGISTRO MOTA

Aitortuen erregistroa

–Zenbateko guztiak positiboak izanen dira.

–Edukirik ez duten zenbakizko eremuak zeroz beteko dira.

–Edukirik ez duten eremu alfanumerikoak/alfabetikoak zuriunez beteko dira.

–Zenbakizko eremu guztiak eskuinaldean lerrokaturik eta ezkerraldean zeroz beterik.

–Eremu alfanumeriko/alfabetiko guztiak ezkerraldean lerrokaturik eta eskuinaldean zuriuneak dituztela, letra larriz, karaktere berezirik eta azentudun bokalik gabe, non eta eremuaren azalpenean besterik agintzen ez den.

II. ERANSKINA.–1. ERREGISTRO MOTA

Aitortzailearen erregistroa

–Zenbateko guztiak positiboak izanen dira.

–Edukirik ez duten zenbakizko eremuak zeroz beteko dira.

–Edukirik ez duten eremu alfanumerikoak/alfabetikoak zuriunez beteko dira.

–Zenbakizko eremu guztiak eskuinaldean lerrokaturik eta ezkerraldean zeroz beterik.

–Eremu alfanumeriko/alfabetiko guztiak ezkerraldean lerrokaturik eta eskuinaldean zuriuneak dituztela, letra larriz, karaktere berezirik eta azentudun bokalik gabe, non eta eremuaren azalpenean besterik agintzen ez den.

173 EREDUA

C.–2. ERREGISTRO MOTA

Aitortuen erregistroa

–Zenbateko guztiak positiboak izanen dira.

–Edukirik ez duten zenbakizko eremuak zeroz beteko dira.

–Edukirik ez duten eremu alfanumerikoak/alfabetikoak zuriunez beteko dira.

–Zenbakizko eremu guztiak eskuinaldean lerrokaturik eta ezkerraldean zeroz beterik.

–Eremu alfanumeriko/alfabetiko guztiak ezkerraldean lerrokaturik eta eskuinaldean zuriuneak dituztela, letra larriz, karaktere berezirik eta azentudun bokalik gabe, non eta eremuaren azalpenean besterik agintzen ez den.

Iragarkiaren kodea: F2309438