Iragarkia

14. ALDIZKARIA - 2023ko urtarrilaren 20a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

1/2023 EBAZPENA, urtarrilaren 4koa, Nekazaritzako eta Abeltzaintzako zuzendari nagusiak emana, zeinaren bidez dirulaguntzen oinarri arautzaileak eta deialdia onesten baitira Nekazaritzako Aseguru Konbinatuen 2023ko Planeko (44. plana) nekazaritzako aseguruak izenpetzeko. DDBN identifikazioa: 669197.

Hala xedatzen baitu bere 1. eta 2. artikuluetan Nekazaritzako finantzaketari buruzko legezko xedapenen testu bateginak (otsailaren 16ko 54/1998 Legegintzako Foru Dekretuaren bidez onetsia), Nafarroako Gobernuak bultzatuko du asegurupean sar daitezkeen nekazaritzako ekoizpen eta arriskuen asegurua egitea, parte hartuz nekazaritzako ondasunen gaineko aseguruak kontratatzeko kostuetan. Legegintzako foru dekretu horrek, VI. tituluan, nekazaritza eta abeltzaintzako aseguru-primetarako laguntzak arautzen ditu, eta bertan ezartzen du Nekazaritza, Abeltzaintza eta Elikadurako kontseilariak urtero onetsi eta argitaratuko dituela laguntzak jasotzen ahal dituzten aseguru lerroak, Nekazaritzako Aseguru Konbinatuen Urteko Planean sarturik dagoen aseguru bakoitzaren ezaugarrien berri duen unean.

Deialdi honen xedea da laguntzak arautzea Nekazaritzako Aseguru Konbinatuen 2023ko Planeko (44. plana) aseguruen polizak kontratatzeko kosturako. Nekazaritzako aseguruetarako laguntzak estatuen laguntzak dira, eta Europar Batasunak nekazaritzako eta basogintzako sektorerako 2014tik 2020 arte ezarri dituen Jarraibideak (2014/C eta 204/01) aplikatu behar zaizkie. Plan honetan aurreikusten den laguntza bateragarritzat jo da Europar Batasuneko barne merkatuarekin, bat etorriz Europako Batzordearen 2015eko apirilaren 9ko Erabakiarekin (SA.40313), zeina aldatua izan baitzen 2015eko abuztuan (SA.42697), 2020ko urrian (SA.58942), 2021eko urrian (SA.64784) eta 2022ko azaroan (SA.104060).

Azaroaren 11ko 425/2016 Errege Dekretuaren bidez, Estatuko Administrazio Orokorrak nekazaritzako asegururako dirulaguntzak emateko oinarri arautzaileak ezarri ziren. Azaroaren 29ko 1180/2020 Errege Dekretuaren bidez aldatu zen.

Nafarroako Gobernuak 2022ko urriaren 26an hartutako Erabakiaren bidez, 3.650.000 euroko gastua baimendu zen 2024ko ekitaldiaren kargura, 2023ko Planaren nekazaritzako aseguru batzuk kontratatzeko kosturako laguntzak ordaintzeko. Gastu hori honako honen kargura izanen da: 2024ko gastuen aurrekontuko "Agroseguro bidezko aseguru-primen konpentsazioa" izeneko 710001 71200 4700 414210 partidaren kargura, edo gaituko den partida baliokidearen kargura.

Urtarrilaren 27ko 5/2022 Foru Aginduaren bidez, zeina aldatua izan baitzen martxoaren 7ko 27/2022 Foru Aginduaren bidez (biak ala biak Landa Garapeneko eta Ingurumeneko kontseilariarenak), onetsi zen Landa Garapeneko eta Ingurumeneko Departamentuaren eta Agrupación Española de Entidades Aseguradoras de los Seguros Agrarios Combinados SA (aurrerantzean, Agroseguro) elkartearen arteko lankidetza hitzarmena, nekazaritzako asegurua garatzeko eta koordinazioa izateko, Nafarroan nekazaritzako aseguruak kontratatzeko kosturako Nafarroako Gobernuak ematen dituen laguntzak kudeatzeko, kontrolatzeko eta ordaintzeko.

2022ko martxoaren 8an Agrosegurorekin sinatutako hitzarmenean, bigarren klausularen 2.4.4 apartatuak ezartzen du zenbateko bat ordainduko zaiola nekazaritzako aseguruetarako dirulaguntzen deialdiaren esparruan sinatutako aseguru polizak kontratatzeko kudeaketa gastu gisa, eta zenbateko hori ez dela izanen egindako gastuaren zenbatekoaren ehuneko 1,5 baino handiagoa.

Deialdi honetan 66.248 euroko gastua baimenduko da kudeaketa gastuetarako. Gastu hori honako honen kargura izanen da: 2022ko gastuen aurrekontuko "Hirugarrenek eginiko bestelako lanak" izeneko 710001 71200 2279 414200 partidaren kargura, edo 2024ko ekitaldirako Nafarroako Aurrekontu Orokorretan horretarako gaitzen den baliokidearen kargura, baldin eta horretarako kreditu egoki eta nahikorik bada.

Nekazaritza, Arrantza eta Elikadura Ministerioak proposatuta, Ministroen Kontseiluak, 2022ko azaroaren 29ko Akordioaren bidez, onetsi zuen Nekazaritzako Aseguru Konbinatuen berrogeita laugarren Plana, bai 2023ko harpidetzeko epeari dagokionez, bai aseguru lerroetako estatuaren laguntza publikoaren portzentajeei dagokienez.

Ebazpen honi honako hauek aplikatu behar zaizkio: Nekazaritzako Finantziazioari buruzko otsailaren 16ko 54/1998 Legegintzako Foru Dekretua eta Dirulaguntzei buruzko azaroaren 9ko 11/2005 Foru Legea.

Adierazitakoarekin bat, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak eta Landa Garapeneko eta Ingurumeneko Departamentuaren egitura organikoa ezartzen duen urriaren 23ko 258/2019 Foru Dekretuak ematen dizkidaten eskudantziak erabiliz,

EBAZTEN DUT:

1. Oinarri arautzaileak onestea, Nekazaritzako Aseguru Konbinatuen 44. planeko (2023ko Plana) nekazaritzako zenbait aseguru kontratatzeko kosturako laguntzetarako. Oinarriak ebazpen honen I. eranskinean ageri dira.

2. Nekazaritzako zenbait aseguru, aurreko puntuan aipatzen direnak, izenpetzeko dirulaguntzak emateko deialdia onestea.

3. Gardentasun betebeharrari buruzko adierazpenaren eredua onestea, bai eta erakundearen gobernu organoen osaerari eta kargudunen ordainsariei buruzko ereduak ere. Gardentasun betebeharrari buruzko adierazpenaren ereduaren I. eta II. eranskinetan daude jasota eredu horiek, eta hamalaugarren oinarrian ezarritako esteken bidez eskura daitezke.

4. 3.650.000 euroko gastua baimentzea 2022ko gastuen aurrekontuko partida honen kargura: "Agroseguro bidezko aseguru-primen konpentsazioa" izeneko 710001 71200 4700 414210 partida, edo 2024ko ekitaldirako Nafarroako Aurrekontu Orokorretan horretarako gaitzen den baliokidearen kargura, baldin eta horretarako kreditu egoki eta nahikorik bada.

5. 66.248 euroko gehieneko gastua baimentzea 2022ko gastuen aurrekontuko partida honen kargura: "Hirugarrenek eginiko bestelako lanak" izeneko 710001 71200 2279 414200 partida, edo 2024ko ekitaldirako Nafarroako Aurrekontu Orokorretan horretarako gaitzen den baliokidearen kargura, baldin eta horretarako kreditu egoki eta nahikorik bada.

6. Deialdi hau eta oinarri arautzaileak erregistratzea Nafarroako Gobernuaren Dirulaguntzen Datu Basean (NGDDB).

7. Ebazpen hau eta eranskina Nafarroako Aldizkari Ofizialean argitaratzea.

8. Deialdi honen eta bere oinarri arautzaileen aurka gora jotzeko errekurtsoa jar daiteke, Landa Garapeneko eta Ingurumeneko kontseilariari zuzendua, ebazpen hau Nafarroako Aldizkari Ofizialean argitaratu eta biharamunetik hilabeteko epean.

Iruñean, 2023ko urtarrilaren 1ean.–Nekazaritza eta Abeltzaintzako zuzendari nagusia, Ignacio Gil Jordán.

I. ERANSKINA

Nekazaritzako Aseguru Konbinatuen 44. planeko nekazaritzako aseguruak kontratatzeko kosturako dirulaguntza. Oinarri arautzaileak. 2023ko Plana

Lehena.–Xedea.

1. Hala xedatzen baitu bere 1. eta 2. artikuluetan Nekazaritzako finantzaketari buruzko legezko xedapenen testu bateginak (otsailaren 16ko 54/1998 Legegintzako Foru Dekretuaren bidez onetsia), Nafarroako Gobernuak bultzatuko du asegurupean sar daitezkeen nekazaritzako ekoizpen eta arriskuen asegurua egitea, parte hartuz nekazaritzako ondasunen gaineko aseguruak kontratatzeko kostuetan.

2. Deialdi honen xedea da, beraz, Nekazaritzako Aseguru Konbinatuen 44. planeko (2023ko Plana) nekazaritzako aseguruak izenpetzen dituzten nekazari eta abeltzainei laguntzak ematea, Estatuko Administrazio Orokorrak Nekazaritzako Aseguruen Estatuko Entitatearen (aurrerantzean, ENESA) bitartez helburu bererako ematen dituen dirulaguntzen osagarri. Aseguruak Nafarroako Foru Komunitatean dauden nekazaritzako ondasunen gainekoak izanen dira.

Bigarrena.–Onuradunak.

1. Laguntzen onuradun izan daitezke:

1.1. Aseguru poliza bat izenpetzen duten nekazariak eta abeltzainak, baldin Nekazaritzako Ustiategiak Modernizatzeko uztailaren 4ko 19/1995 Legearen arabera lanbidez nekazariak badira eta nekazaritzaren arloko gizarte segurantzan kotizatzen badute edo lehentasunezko ustiategia badute.

1.2. Aseguru poliza bat izenpetzen duten kooperatibetako elkarlaneko laborantzako atalak, honako beharkizun hauek betetzen badituzte:

a) Kooperatiba Nafarroako Nekazaritzako Ustiategien Erregistroan izena emanik egotea, bai eta kasuan kasuko Kooperatiben Erregistroan ere, eta helbide soziala Nafarroan izatea.

b) Elkarlaneko laborantzako atalaren helburu nagusia atalera ekarritako lurrak batera ustiatzea izatea.

c) Haren estatutuetan aurreikusirik egotea lur-eremua lantzeko modua, eta hauetako bat izatea modu hori: kooperatibak zuzenean; kooperatiben arteko akordioen bidez; edo errentan emanik edo beste kontratu mota batzuen bidez, ogibide nagusia nekazaritza duten nekazariekin (bazkideekin lehentasunez), kooperatibekin edo beste sozietate mota batzuekin eginik.

d) Zuzendaritza kontseiluko kideen erdiak baino gehiagok izatea nekazaritza ogibide nagusi.

1.3. Ustiategian hildako animaliak suntsitzeak dakartzan gastuen estaldurari dagokion 415. lerroko aseguruen poliza bat izenpetzen duten abeltzainak.

2. Aurreko ataleko 1.1 eta 1.2 puntuetan aipatutako polizetan sartzen diren ekoizpen unitateek nekazari profesionalenak izan beharko dute, Nekazaritzako Ustiategiak Modernizatzeko uztailaren 4ko 19/1995 Legearen arabera. Nekazari horiek nekazaritzaren arloko gizarte segurantzan kotizatu behar dute edo lehentasunezko ustiategia izan behar dute.

3. Nekazaritzako asegurua garatzeko eta Nafarroako Gobernuak Nafarroan nekazaritzako asegurua kontratatzeko kosturako emandako laguntzen kudeaketa, kontrola eta ordainketa koordinatzeko, eskatuko da, ebazpen honetan ezartzen diren laguntzen onuradun izateko, sartuta egotea oraingo Landa Garapeneko eta Ingurumeneko Departamentuak eta Agrosegurok izenpetutako lankidetza hitzarmenaren II. eta III. eranskinetako fitxategietan. Aipatutako II. fitxategia dagokio Nafarroako Foru Komunitatearen laguntzen oinarri arautzaileetako baldintzak betetzearen egiaztapenari, eta III. fitxategia dagokio, berriz, zerga betebeharrak eta Gizarte Segurantzakoak eguneratuak egoteko baldintzak betetzearen egiaztapenari.

4. Abeltzaintzako aseguru lerroetan, poliza berean "bizi-bermeak" eta animaliak "erretiratzea eta suntsitzea" badaude, Foru Komunitatearen dirulaguntza aplikatuko da baldin eta 3. puntuko ezaugarriak baditu eta titularra Komunitateak emandako datu-baseetan badago. Halaber, "erretiratzea eta suntsitzea" dirulaguntza aplikatuko zaie zerbitzu horretarako berariaz ezarritako datu-basean dauden titularrei, ez beste inori. Gainerako lerroetan, laguntzen onuradunek aurreko paragrafoan aipatutako datu-baseetan egon beharko dute.

Hirugarrena.–Primak Agroseguroren bitartez konpentsatzea.

Agroseguro entitateak laguntzen kudeaketan lagunduko du, berak eta Landa Garapeneko eta Ingurumeneko Departamentuak sinatutako hitzarmenean ezarritako moduan.

Laugarrena.–Dirulaguntza jaso dezaketen lerroak.

1. Nekazaritzako Aseguru Konbinatuen 2023ko Planeko aseguru lerro hauek kontratatzeko kostua diruz lagungarria izanen da:

2. Nekazaritzako lerroetan, aipatutako laboreen aseguru osagarriak ez dira inoiz diruz lagunduko, mahats ustiategietarako estaldura gorakorreko asegurua izan ezik.

Bosgarrena.–Dirulaguntzaren zenbatekoa.

1. Aurreko oinarrian jasotako nekazaritzako, abeltzaintzako eta ustiategian hildako animaliak erretiratu eta suntsitzeko aseguruetarako dirulaguntzen zenbatekoa, Landa Garapeneko eta Ingurumeneko Departamentuak ematen duena, ENESAk helburu horretarako ematen dituenen portzentaje bat adinakoa izanen da.

Administrazio Publikoek emandako dirulaguntzen zenbatekoak ezin izanen ditu inoiz gainditu Europar Batasunak nekazaritzako eta basogintzako sektorerako 2014tik 2020 arte ezarri dituen Jarraibideek (2020/C 204/01) ezarritako mugak:

–Nekazaritzako eta abeltzaintzako aseguruek ezin dute primaren ordainagiriaren %65 gainditu.

–Ustiategian hildako animaliak erretiratu eta suntsitzearen gaineko aseguruetan, primaren ordainagiriaren %90ekoa izanen da gehienez ere.

Nafarroako Gobernuaren eta ENESAren dirulaguntzek baimendutako mugak gainditzen badituzte, ENESAk ezarri, Agrosegurok baliozkotu eta 234/2014 zirkularrean agertzen den moduan eginen da doikuntza.

2. Nafarroako Gobernuak nekazaritzako eta abeltzaintzako aseguruei ematen dizkien dirulaguntzak ENESAk helburu bererako ematen duen dirulaguntzaren portzentaje hauek izanen dira:

3. Ustiategian hildako animaliak erretiratu eta suntsitzeko aseguruetarako dirulaguntzak jarraian zehazten dira:

Hauek dira udalerriak:

4. Abeltzaintzako aseguru lerroetan, baldin bizi-bermeak eta ustiategian hildako animaliak erretiratu eta suntsitzeko zerbitzua badituzte, 2. puntuan zehazten den banaketa-taulan ezarritakoa izanen da bizi-kapitalari aplikatzen zaion dirulaguntzaren portzentajea –ENESAren dirulaguntzaren gainekoa–.

3. puntuan zehazten den banaketa-taulan ezarritakoa izanen da hildako animaliak erretiratu eta suntsitzearen kapitalari aplikatzen zaion dirulaguntzaren portzentajea –ENESAren dirulaguntzaren gainekoa–.

Bizi-kapitalerako dirulaguntzaren muga ezartzeko, kontuan hartu behar da gehienez ere bizi-kapitalaren prima-ordainagiriaren %65 izanen dela ENESAren dirulaguntzaren zenbatekoa gehi Foru Komunitatearen dirulaguntzarena.

Hildako animaliak eraman eta suntsitzearen kapitalerako dirulaguntzaren muga ezartzeko, kontuan hartu behar da gehienez ere erretiratu eta suntsitzearen kapitalaren prima-ordainagiriaren %90 izanen dela ENESAren dirulaguntzaren zenbatekoa gehi Foru Komunitatearen dirulaguntzarena.

Seigarrena.–Eskaerak non eta noiz aurkeztu.

1. Dirulaguntzaren eskaeratzat joko da aseguratuak, edo asegurua haren izenean hartzen duenak, aseguru polizaren kontratua formalizatzea ENESAk urtero onesten duen ebazpenean ezarritako moduan, baldin eta Nekazaritza, Arrantza eta Elikaduraren Ministerioak ezarritako izenpetze epeetan egiten bada eta zuzen bete bada edo Agrosegurok zuzendu badu, bai kontratuaren osagaiei dagokienez, aplikatzekoa den araudian xedatutakoarekin bat, bai izenpetutako polizari dagokion dirulaguntza zehazteko behar diren datu guztiei dagokienez. Aipatutako ebazpen horren bidez deialdia egin da Estatuko Administrazio Orokorrak Nekazaritzako Aseguru Konbinatuen 2023ko Planeko nekazaritzako aseguruak izenpetzeko ematen dituen dirulaguntzetarako.

2. Aseguru berriztagarriko polizen kasuan, dirulaguntzarako eskaeratzat hartuko da hasiera batean izenpetutako aseguru poliza, urteko ordainketa egin izanaren agiria erantsirik. Ulertuko da polizaren ordainketak adierazten duela aseguruaren baldintzak onartzen direla eta kasuan kasuko dirulaguntzak jasotzeko betebeharrak betetzen direla.

3. Nekazaritza eta Abeltzaintza Zuzendaritza Nagusiko Nekazaritza Zerbitzuak ofizioz egiaztatuko du aseguratuak dirulaguntza eta laguntza publikoei buruzko arauetan eskatutako baldintzak betetzen dituela, bereziki Dirulaguntzei buruzko azaroaren 9ko 11/2005 Foru Legearen 9.e) artikuluan aurreikusitakoak. Hala ere, beharrezkoa denean, onuradunei eskatzen ahalko die egiaztapen egokiak egiteko behar den informazio zehatza emateko.

Zazpigarrena.–Dirulaguntza emateko modua, lehentasunak eta irizpide objektiboak.

1. Dirulaguntza zuzeneko prozeduraren bidez emanen da.

2. Agrosegurok eta Landa Garapeneko eta Ingurumeneko Departamentuak sinatutako hitzarmenean ezarritakoarekin bat, poliza izenpetzean, beste dirulaguntzak kendu ondoren, aseguratuari polizaren zenbatekoa kobratuko zaio, dagokion dirulaguntza guztia kenduta, deialdi honen bosgarren oinarrian ezarritako portzentajeen arabera.

3. Dirulaguntza hauek emanen dira Nafarroako Aurrekontu Orokorretako kasuan kasuko aurrekontu-aplikazioan kreditu egoki eta aski baldin badago. Dena dela, dagokion aplikazioa handitzen ahalko da onartzen diren obligazioak berdindu arte. Nolanahi ere, hasi ez diren kontratazioaldietako aseguru lerroetako gehieneko dirulaguntza portzentajeak aldatu ahal izanen dira.

Zortzigarrena.–Ebaluazio organoa.

1. Nekazaritza Zerbitzuak ebaluatuko ditu eskaerak eta eginen du ebazpen proposamena.

2. Nekazaritza eta Abeltzaintzako zuzendari nagusiak ebazpen arrazoitua emanen du dirulaguntzei buruz, eta espresuki jakinaraziko zein eskaera ezetsi den.

3. Prozeduraren gainean ebazteko epea hiru hilabetekoa izanen da. Epea bukatzen bada berariazko ebazpenik eman gabe, ezetsitzat joko da eskaera.

Bederatzigarrena.–Aseguratuek laguntzaren aldaketen berri ematea.

Laguntzak onartzen dituzten aseguratuak beharturik daude komunikatzera, haien hartzaileen bitartez, kontratatutako aseguru lerroan aldaketak egiteko duen epean polizak izaten duen edozein aldaketa.

Hamargarrena.–Dirulaguntzaren bateragarritasuna.

Dirulaguntza hau osagarria eta bateragarria izanen da Estatuaren Administrazio Orokorrak helburu bererako ematen duen dirulaguntzarekin.

Hamaikagarrena.–Kontrola, zehapen araubidea eta dirulaguntzen itzulketa.

1. Dirulaguntzen onuradun diren aseguratuak beharturik daude Landa Garapeneko eta Ingurumeneko Departamentuaren esku jartzera dirulaguntzen kontrolerako egokiak diren datu eta argibide guztiak.

2. Aseguratuek, nekazaritzako aseguru poliza kontratatzean, baimena emanen diote Landa Garapeneko eta Ingurumeneko Departamentuari, beharrezkoa bada, beste administrazio batzuei informazioa eskatzeko, informatika edo telematika bidez, eskatutako baldintzak betetzen diren egiaztatzeko, zerga betebeharrei eta Gizarte Segurantzarekikoei dagokienez, bai eta araututako dirulaguntzak eskuratzeko betebeharrak betetzen diren egiaztatzeko beste edozein informazio ere.

Aurreko paragrafoarekin ados ez badago, aseguratuak berak aurkeztu beharko ditu zerga betebeharren eta Gizarte Segurantzaren gaineko betebeharrak betetzeari buruzko datuak.

Era berean, poliza kontratatzean baimena emanen dio Agroseguro SAri Landa Garapeneko eta Ingurumeneko Departamentuari polizari buruzko informazio guztia emateko, dagokion dirulaguntza kudeatu, kontrolatu eta ordaintzeko lanak egin ditzan.

3. Ebazpen honetan eta gainerako arau aplikagarrietan ezarritako baldintzak betetzen ez badira, onuraduna beharturik egonen da dirulaguntzak eta dagozkion legezko interesak osorik edo zati batean itzultzera, Dirulaguntzei buruzko azaroaren 9ko 11/2005 Foru Legearen 37.1 artikuluan xedatutakoari jarraikiz.

4. Aseguru hartzailea, kontratazio kolektiboko polizen kasuan, edo, aseguratua, banakako polizen kasuan, arau-hauste administratiboen erantzule baldin bada, zehapena jasoko dute Dirulaguntzei buruzko azaroaren 9ko 11/2005 Foru Legearen IV. tituluan xedatutakoarekin bat.

Hamabigarrena.–Emandako dirulaguntzen publizitatea.

Interesdunek hemen kontsulta ditzakete beren emakidaren ebazpenak: Landa Garapeneko eta Ingurumeneko Departamentuko zerbitzuen katalogoan eta Dirulaguntzen Datu Base Nazionalean (DDBN).

Hamahirugarrena.–Onuradunaren betebeharrak.

Onuradunak Dirulaguntzei buruzko azaroaren 9ko 11/2005 Foru Legearen 9. artikuluan ezarritako betebeharrak izanen ditu.

Hamalaugarrena.–Onuradunaren gardentasun betebeharrak.

Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 3. artikuluan aipatutako entitateak behartuak daude gardentasun betebeharra betetzera baldin eta, urtebetean, 20.000 eurotik gorako laguntzak edo dirulaguntzak jasotzen badituzte Nafarroako Aurrekontu Orokorren kargura, edo jasotako laguntzak edo dirulaguntzak beren urteko sarrera guztien %20 edo gehiago badira eta, gutxienez, 5.000 euro. Horretarako, honako esteka honetan dagoen eredua bete beharko dute, gardentasun betebeharrari buruzko adierazpena, alegia:

https://www.navarra.es/documents/48192/5726243/1+Declaracion+de+obligacion–cas.pdf/dfc3bda0-ebed-f7b1-7186-c457c32f79b7?t=1651059278956

Aurreko atalean ezarritako mugak gainditzen diren jakiteko, Nafarroako Foru Komunitateko Administrazioak edo haren erakunde publikoek urte naturalean emandako dirulaguntza guztien kopuruak batuko dira. Urte batean baino gehiagotan ordaintzen diren dirulaguntzen kasuan, aurrekontuko ekitaldi bakoitzean emandako kopurua konputatuko da ondorio hauetarako, ez guztizko batura. Negozio zifra honako hauetako txikiena izanen da:

a) Aurreko urteko negozio zifra.

b) Hala badagokio, dirulaguntza ematen den ekitaldian entitatearen organo eskudunak onartutako negozio zifra.

Aipatu diren inguruabarrak gertatzeagatik gardentasun betebeharra duten entitate onuradunek jarraian adierazten den informazioa eman beharko dute hilabeteko epean, dirulaguntza esleitzeko ebazpena jakinarazten denetik aurrera:

–Entitatearen gobernu, administrazio eta zuzendaritza organoen osaera.

–Organo horiek osatzen dituzten kargudunen zerrenda.

–Entitateak aurreko urtean kargudun bakoitzari ordaindutako ordainsari gordinak eta gainerako diru konpentsazioak. Sortu berriak diren entitateen kasuan, informazioa izanen da haien aurrekontuetan edo plan ekonomiko-finantzarioan jasotakoa.

–Entitatearen gobernu, administrazio eta zuzendaritza eginkizunetan ematen den dedikazioaren araubidea.

–Entitate onuradunaren urteko azken kontuen kopia bat.

Informazio hori entitate onuradunaren legezko ordezkariak sinatuta eta telematikoki aurkeztuko da, Nafarroako Gobernuaren Erregistro Orokor Elektronikoaren bidez, laguntza kudeatzen duen unitateari zuzenduta, honako eredu hauen arabera (I. eta II. eranskinak eta gardentasun betebeharrari buruzko adierazpenaren eredua):

https://www.navarra.es/documents/48192/5726243/2+Declaracion+de+cargos+y+dedicacion–cas–eus.pdf/a4040dbc-5f38-6419-de18-be7af29f4cca?t=1651059276963

https://www.navarra.es/documents/48192/5726243/3+Declaracion+de+retribuciones+cas–eus.pdf/476d1d82-9ef4-7d25-7668-36cf9ae8c191?t=1651059275713

Aurreikusitako egoerak gertatzen ez direlako entitateak gardentasun betebeharrik ez badu ere, horren gaineko adierazpena aurkeztu beharko du.

Entitateak ekitaldi berean dirulaguntza bat baino gehiago jasotzen baditu, ez du informazioa errepikatu beharko dirulaguntza bakoitzerako, salbu eta hasieran eman zituen datuak aldatzen badira. Horretarako, entitateak identifikatu beharko du Foru Komunitateko Administrazioaren zein organoren aurrean aurkeztu zuen, eta noiz.

Betebehar hori bete ezean, ez da ordainduko onetsitako dirulaguntza.

Aurrekoa galarazi gabe, onuradun guztiak behartuak daude Administrazioari behar den informazio guztia ematera, aurretiazko errekerimendua eginda eta hamar eguneko epean, frogatzeko betetzen dituztela Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen II. tituluan jasotako gardentasun betebeharrak.

Errekerimenduan emandako epea bukatzen bada eskatutakoa bete gabe, hertsapen-isunak ezartzea erabakitzen ahalko da, 500 eurotik 5.000 eurora bitartekoak, interesdunari ohartarazpena egin ondoren eta entzunaldia emanda. Isuna hamabost egunetik behin errepikatuko da, errekerimendua bete arte. Isunaren zenbateko osoa ez da izanen dirulaguntzaren zenbatekoaren ehuneko bost baino handiagoa. Zenbatekoa zehazteko, ez-betetzearen astuntasuna eta proportzionaltasunaren printzipioa hartuko dira kontuan.

Iragarkiaren kodea: F2300320