1. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
163E/2023 FORU AGINDUA, maiatzaren 18koa, Osasuneko kontseilariak emana, zeinaren bidez aldatzen baita Osasuneko Kontseilariak ekainaren 22an emandako 498E/2017 Foru Agindua, finantzaketa publikoa duten eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzea errazteko laguntzak arautzen dituena.
Osasuneko kontseilariaren ekainaren 22ko 498E/2017 Foru Aginduaren bidez, finantzaketa publikoa duten eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzea errazteko laguntzak arautzen dira (2017ko 127. Nafarroako Aldizkari Ofiziala, uztailaren 3koa). Foru agindu horren bidez laguntza batzuk arautzen dira, finantzaketa publikoa duten eta Osasunbidea-Nafarroako Osasun Zerbitzuko mediko fakultatiboek gaixorik dauden eta premia larrian dauden pertsonei agintzen dizkieten tratamendu medikoei atxikitzea errazteko. Foru agindu horrek arautzen duen laguntza araubidearen helburua da tratamenduaren jarraipenari laguntzea eta, horrela, kolektibo jakin batzuetan gerta daitezkeen desberdintasunak murriztea, gerta liteke-eta kolektibo horiek agindu medikoen jarraipen optimoa ez egitea edo agindu horiek bertan behera uztea, beren muga ekonomikoen edo gizarte-bazterketako egoeren ondorioz.
Foru agindu horren 2.1 artikuluak honako hauek jotzen ditu laguntzen onuraduntzat: a) Gizarte Segurantzako aseguratu aktiboak edo pentsiodunak, pertsona fisikoen errentaren gaineko zergaren aitorpenean, likidazio-oinarri orokorraren eta aurrezkiaren oinarriaren laukian, hain zuzen, jasotakoaren arabera 18.000 eurotik beherako errenta dutenak eta Osasunbidea-Nafarroako Osasun Zerbitzuak eman eta bermatzen duen banakako osasun-txartelaren titularrak direnak. Halaber, aseguratuaren onuradunei ere laguntzak berdin jasotzea egokituko zaie. b) Osasun Sistema Nazionalaren aseguratuak edo onuradunak izan gabe, Nafarroan bizi diren pertsonei Nafarroako osasun-sistema publikoan doako osasun laguntza jasotzeko eskubidea aitortzen dien otsailaren 25eko 8/2013 Foru Legearen aplikazio eremu subjektiboan dauden eta urteko errenta 18.000 eurotik beherakoa dutela aitortzen duten pertsonak.
Onuradun horiei dagokienez, Konstituzio Auzitegiak 2018ko otsailaren 22an emandako eta 2018ko martxoaren 23ko Estatuko Aldizkari Ofizialean argitaratutako 17/2018 Epaiaren arabera, Nafarroan bizi diren pertsonei Nafarroako osasun-sistema publikoan doako osasun laguntza jasotzeko eskubidea aitortzen dien otsailaren 25eko 8/2013 Foru Legearen konstituzio-kontrakotasuna eta deuseztasuna deklaratu zen.
Bestalde, Osasun Sistema Nazionalerako sarbide unibertsalari buruzko uztailaren 27ko 7/2018 Errege Lege-dekretuak honako hauek aldatu ditu: Osasun Sistema Nazionalaren kohesio eta kalitateari buruzko maiatzaren 28ko 16/2003 Legearen 3., 3 bis eta 3 ter artikuluak; eta Medikamentuen eta osasun produktuen bermeei eta haien erabilera arrazionalari buruzko Legearen testu bateginaren 102.5.e) artikulua. Testu bategin hori uztailaren 24ko 1/2015 Legegintzako Errege Dekretuaren bidez onetsi zen. Egindako aldaketaren arabera, osasunaren babeserako eta osasun-laguntzarako eskubidearen titularrak dira: (i) batetik, Espainiako nazionalitatea duten pertsona guztiak eta Espainiako lurraldean bizilekua duten atzerritarrak; (ii) eta, bestetik, Espainian egoiliar gisa erregistratuta edo baimenduta ez dauden atzerritarrak, Espainiako nazionalitatea duten pertsonen baldintza berberetan osasun-babeserako eta osasun-laguntzarako eskubidea dutenak, 3.1 artikuluan ezartzen den bezala.
Era berean, adierazi behar da ezen, 2021erako Estatuko Aurrekontu Orokorrei buruzko abenduaren 30eko 11/2020 Legearen bidez, aldatu egin zela Medikamentuen eta osasun produktuen bermeei eta haien erabilera arrazionalari buruzko Legearen testu bateginaren 102. artikuluaren 8. apartatua, eta zabaldu egin zela sendagaiak ordaintzeko salbuespena beste kolektibo batzuetara; besteak beste, urteko errenta baxuak jasotzen dituzten pentsiodunak daude horien artean. Aipatutako testu bategina uztailaren 24ko 1/2015 Legegintzako Errege Dekretuaren bidez onetsi zen, eta 2021eko urtarrilaren 1ean jarri zen indarrean.
Azkenik, Osasun Sistema Nazionalaren errezeta elektroniko elkarreragingarriaren zerbitzua ezartzeko prozesua 2022an amaitzearekin batera, gaur egun edozein farmaziak eman dezake beste autonomia erkidego batean agindutako medikazioa, bitarteko elektronikoen bidez.
Beraz, aldatu egin behar da Osasuneko kontseilariaren ekainaren 22ko 498E/2017 Foru Agindua, Osasunbidea-Nafarroako Osasun Zerbitzuko mediku fakultatiboek agindutako eta finantzaketa publikoa duten tratamendu medikoei atxikitzea errazteko laguntzak arautzen dituena, arestian azaldutako arau-aldaketetara egokitzeko.
Zehazki, 1. artikuluko 1. atalean, arauaren xedea zabaltzen da, Osasun Sistema Nazionalean zerbitzuak ematen dituztenek agindutako tratamendu medikoei atxikitzea errazteko laguntzak arautzeari dagokionez.
Gainera, 2. artikuluaren b) atala aldatzen da, aipatzen zuen otsailaren 25eko 8/2013 Foru Legea konstituzioaren aurkakotzat jo zelako, eta atal horri beste eduki bat ematen zaio, farmazia-prestaziorako eskubidea duten pertsonak kontuan hartzeko. Azkenik, c) atala gehitzen da, zeinaren edukia ekainaren 22ko 498E/2017 Foru Aginduaren hirugarren xedapen gehigarrian araututa baitzegoen.
Aldatu egiten da 3. artikulua: batetik, gehitzen da laguntzak Osasun Sistema Nazionalean lan egiten dutenek agindutako medikamentuak eta osasun-produktuak ordaintzeko izanen direla, eta, bestetik, kendu egiten da medikamentu eta osasun-produktu horiek Nafarroako Foru Komunitateko farmazia-bulegoetan erosi behar izateari buruzko aipamena.
Aldatu egiten da 4. artikuluko 1. atala, eta modu generikoan aipatzen dira Osasunbidea-Nafarroako Osasun Zerbitzuaren Kudeaketa Zuzendaritza eta farmaziaren eta prestazioen arloko organo eskuduna.
5. artikuluko 1. eta 3. atalak aldatzen dira, 2. artikuluan ezarritako onuradunak aipatuz. Era berean, prestazioen arloan eskumena duen organoari buruzko aipamena aldatzen da.
7. artikuluko 4. atalak gardentasunaren arloko araudia eguneratzen du. Era berean, 14. artikuluan datuak babesteari buruzko araudia aldatzen da, gaur egun indarrean dagoenera egokitzeko.
Azkenik, lehen xedapen gehigarria indargabetzen da, haren edukia arauaren artikuluetan sartu delako; bigarren xedapen gehigarria ere indargabetzen da, aipatutako foru aginduaren aldaketan kendu egin delako medikamentuak eta osasun-produktuak farmazia-bulegoetan erosteari buruzko aipamena; eta hirugarren xedapen gehigarria ere indargabetzea justifikatuta dago, 2. artikuluaren edukian jaso delako.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskudantziak erabiliz,
AGINTZEN DUT:
Artikulu bakarra.–Aldatzea Osasuneko kontseilariaren 498E/2017 Foru Agindua, ekainaren 22koa, finantzaketa publikoa duten eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzea errazteko laguntzak arautzen dituena.
Osasuneko kontseilariaren ekainaren 22ko 498E/2017 Foru Agindua, finantzaketa publikoa duten eta Osasunbidea-Nafarroako Osasun Zerbitzuko langileek agintzen dituzten tratamendu medikoei atxikitzea errazteko laguntzak arautzen dituena, honela geldituko da:
Bat.–1. artikuluaren 1. atalak testu hau izanen du:
"1. Arau honen xedea da Osasun Sistema Nazionaleko eta Osasunbidea-Nafarroako Osasun Zerbitzuko medikuek agindutako tratamendu medikoei atxikitzea errazteko laguntzak arautzea, gaixorik dauden eta premia larrian dauden eta ohiko bizilekua Nafarroako Foru Komunitatean duten pertsonei dagokienez."
Bi.–2. artikuluak testu hau izanen du:
"2. artikulua. Onuradunak.
Laguntza hauen onuradun izaten ahalko dira Nafarroako Foru Komunitatean bizi eta honako egoera hauetan daudenak:
a) Gizarte Segurantzako aseguratu aktiboak direnak edo parekatutako egoeran daudenak, eta horien onuradunak, baldin eta urtean 18.000 eurotik beherako errenta badute eta Osasunbidea-Nafarroako Osasun Zerbitzuak emandako banakako osasun-txartelaren titularrak badira.
b) Urtean 18.000 eurotik beherako errentak dituzten pertsonak, baldin eta erakunde eskudunak titular edo titularraren onuradun gisa aitortu badie farmazia-prestazioa funts publikoen kargura jasotzeko eskubidea, eta Osasunbidea-Nafarroako Osasun Zerbitzuak emandako banakako osasun-txartelaren titularrak badira.
c) MUFACE, MUGEJU eta ISFASeko mutualisten kolektiboa, titular edo titularraren onuradun diren aldetik, a) letran jasotako errenta-baldintzak betetzen badituzte eta osasun-zerbitzuak Osasunbidea-Nafarroako Osasun Zerbitzuaren bidez jasotzea aukeratu badute, dagokion deialdian ezartzen diren muga eta baldintzekin."
Hiru.–3. artikuluak testu hau izanen du:
"3. artikulua. Laguntzen zenbatekoa.
Finantzaketa publikoa duten eta zerbitzuak Osasun Sistema Nazionalean eta Osasunbidea-Nafarroako Osasun Zerbitzuan ematen dituztenek agindutako medikamentuak eta osasun produktuak ordaintzeko laguntzek honako zenbateko hauek izanen dituzte:
a) Urtean 6.000 euroko edo gutxiagoko errentak dituzten onuradunentzat, hilero benetan ordaindutako zenbatekoari 2,60 euro kentzetik ateratzen dena.
b) Urtean 6.000 eurotik gorako errentak dituzten onuradunentzat, hilero benetan ordaindutako zenbatekoari 8,23 euro kentzetik ateratzen dena".
Lau.–4. artikuluko 1. atalak testu hau izanen du:
"1. Osasunbidea-Nafarroako Osasun Zerbitzuko kudeaketa-zuzendariak onetsiko du foru agindu honetan araututako laguntzen deialdia. Prestazioen arloan eskumena duen organoak antolatu eta bideratuko ditu dirulaguntza hauek emateko prozedurak."
Bost.–5. artikuluko 1. eta 3. atalek testu hau izanen dute:
"1. Aseguratutako pertsonek edo farmazia-prestaziorako eskubidearen titularrek aurkeztu beharko dituzte eskaerak.
(...)
"3. Eskaera aurkezteak badakar berekin eskatzaileak baimena ematea prestazioen arloko eskumena duen organoari, horrek dagokion erakundearen aurrean automatikoki egiazta dezan onuraduna izatea egiaztatzen duten baldintzak betetzen dituen eta pertsona horrek farmazia eta osasun-produktuetan zer gastu egin duen."
Sei.–7. artikuluko 4. atalak testu hau izanen du:
"4. Osasunbidea-Nafarroako Osasun Zerbitzuak emandako dirulaguntzak jakinaraziko ditu, Dirulaguntzei buruzko azaroaren 9ko 11/2005 Foru Legearen 15. artikuluan, Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 22. eta 26. artikuluetan eta Dirulaguntzei buruzko azaroaren 17ko 38/2003 Lege Orokorraren 18. artikuluan xedatutakoarekin bat. Emandako dirulaguntzen argitalpenak ez du inola ere izanen onuradunen datu pertsonalik."
Zazpi.–14. artikuluak testu hau izanen du:
"14. artikulua. Datuen babesa.
Foru agindu honetan xedatutakoaren babesean ematen diren datuak ondorio horretarako sortzen den berariazko fitxategi automatizatura gehituko dira. Fitxategi horretako datuak ez zaizkie lagako hirugarren pertsonei edo erakundeei, eta horren erabilera Osasunbidea-Nafarroako Osasun Zerbitzuak laguntzak kudeatzeko behar denera mugatuko da. Eskatzaileek datu horiek ikusi, zuzendu, ezabatu eta haien aurka jotzeko eskubidea erabiltzen ahalko dute, Datu pertsonalak babesteari eta eskubide digitalak bermatzeari buruzko abenduaren 5eko 3/2018 Lege Organikoarekin bat."
Xedapen indargabetzaile bakarra.–Indargabetzea.
Lehen xedapen gehigarria, bigarren xedapen gehigarria eta hirugarren xedapen gehigarria indargabetzen dira.
Azken xedapen bakarra.–Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2023ko maiatzaren 18an.–Osasuneko kontseilaria, Santos Induráin Orduna.
Iragarkiaren kodea: F2307948
